ܩܠܐ ܕܬܫܥܐ

ܒܪܘܼܟܵܒܼ ܠܵܐ ܒܵܗ̇ܬ̇ܝܼܢܲܢ.

ܐܲܝܟ݂ ܐܲܝܠܵܐ ܕܓܼܵܥܹ̇ܐ ܥܲܠ ܦܨܝܼܕܼܵܐ ܕܡܲܝ̈ܵܐ. ܠܘܵܬܼܵܟܼ ܓܵܥ̈ܝܵܢ ܢܲܦ̮ܫ̈ܵܬܲܢ ܡܫܝܼܚܵܐ ܣܲܒܼܪܹܗ ܕܲܟܼܝܵܢܲܢ. ܦܬܲܚܠܵܗ̇ ܬܲܪܥܵܐ ܠܲܨܠܘܿܬܲܢ. ܘܬܸܥܘܿܠ ܩܕܼܵܡܲܝܟ ܒܵܥܘܼܬܲܢ. ܘܦܲܢܵܐ ܒܪ̈ܲܚܡܲܝܟ ܫܹ̈ܐܠܵܬܲܢ. ܡ̣ܢ ܒܹܝܬܼ ܓܲܙܵܟܼ ܥܲܬ̇ܝܼܪܵܐ. ܕܠܵܟܼܘܼ ܚܵܝܪ̈ܵܢ ܘܼܿܡܣܲܟ̇ܝ̈ܵܢ. ܥܲܝܢܹ̈ܐ ܕܠܸܒܲܢ ܒܟܼܠܥܸܕܵܢ. ܘܐܲܫܘܵܢ ܕܲܒܼܓܲܠܝܘܼܬܼ ܐܲܦܹ̈ܐ. ܢܸܦܘܿܩ ܠܐܘܼܪܥܵܟܼ ܡܵܐ ܕܐܵܬܹ̇ܝܬ̇. ܘܢܸܥܘܿܠ ܥܲܡܵܟܼ ܠܲܓܼܢܘܿܢܵܐ. ܘܢܹܐܪܲܬܼ ܚܲܝܹ̈ܐ ܕܠܵܐ ܡܸܫܬ̇ܪܹܝܢ.

ܫܘܼܚܠܵܦܵܐ ܩܲܕܼܡܵܝܵܐ

ܒܪܘܼܟܵܒܼ ܬܵܘ ܒܲܝܬܵܝܹ̈ܐ.

ܟܠܟܼܘܿܢ ܥܲܒܼܕܵܘ̈ܗܝ ܕܐܲܠܵܗܵܐ. ܬܵܘ ܟܲܫܝܼܪܹ̈ܐ ܢܸܗܘܸܐ ܥܝܼܪܹ̈ܐ ܒܲܨܠܘܿܬܼܵܐ. ܕܗ̤ܝ ܝܵܗَܒܵܐ ܠܲܢ ܣܲܒܼܪܵܐ ܪܲܒܵܐ ܘܦܘܼܪܩܵܢܵܐ ܘܓܲܠܝܘܼܬܼ ܐܲܦܹ̈ܐ. ܒܵܗ̇ ܓܹܝܪ ܡܩܲܒ̇ܠܝܼܢܲܢ ܪܲܗܒ̣ܘܿܢ ܚܲܝܹ̈ܐ ܫܡܲܝܵܢܹ̈ܐ. ܘܒܼܵܗ̇ ܬܘܼܒܼ ܢܵܣܒ̇ܝܼܢܲܢ ܐܲܓܼܪܵܐ ܕܣܝܼܡܲܬܼ ܒܢܲܝ̈ܵܐ. ܘܒܼܵܗ̇ ܬܘܼܒܼ ܩܵܢܹ̇ܝܢܲܢ ܙܲܝܢܵܐ ܚܲܣܝܼܢܵܐ. ܚܫܝܼܠ ܡ̣ܢ ܪܘܼܚܵܐ ܩܲܕܝܼܫܵܐ؛ ܘܒܼܵܗ̇ ܗܵܘܹ̇ܝܢܲܢ ܝܵܪ̈ܘܿܬܹܐ ܕܡܲܠܟ̇ܘܼܬܼ ܪܵܘܡܵܐ. ܬܵܘ ܢܸܬܼܥܲܛܲܦ ܐܸܣܛܲܠ ܡܝܲܬ̇ܪܘܼܬܼܵܐ. ܕܠܵܐ ܢܸܬ݂ܢܲܟܼܪܸܐ ܠܡܸܫܬ̇ܘܼܬܼܵܐ. ܘܢܲܪܡܸܐ ܡܸܫܚܵܐ ܒܠܲܡܦܹܝ̈ܕܲܝܢ. ܕܠܵܐ ܢܸܬܼܕܲܡܸܐ ܠܣܲܟܼܼ̈ܠܵܬܼܵܐ. ܕܲܒܼܓܸܠܝܵܢܹܗ ܕܡܲܠܟܵܐ ܡܫܝܼܚܵܐ. ܢܸܐܪܥܝܼܘܗܝ ܥܲܡ ܚܲܟ̇ܝܼ̈ܡܵܬܼܵܐ. ܘܢܸܥܘܿܠ ܥܲܡܹܗ ܠܲܓܼܢܘܿܢܵܐ.

ܫܘܼܚܠܵܦܵܐ ܕܲܬܼܪܹܝܢ

ܒܪܘܼܟܵܒܼ ܗܵܘ̇ ܕܲܡܪܝܼܡ.

ܠܵܟܼ ܝܵܐ̇ܝܵܐ ܬܸܫܒ̇ܘܿܚܬܵܐ ܐܲܠܵܗܵܐ ܒܨܸܗܝܘܿܢ. ܠܵܟܼܘܼ ܦܲܐܝܵܐ ܬܵܘܕܿܝܼܬܼܵܐ؛ ܡܵܪܵܐ ܕܟܼܠܵܐ. ܕܝܲܗَܼܒܼܬܼ ܠܲܢ ܒܲܚܢܵܢܵܟܼ؛ ܥܘܼܡܪܵܐ ܡܫܲܝܢܵܐ. ܨܠܝܼܒܼܵܟܼ ܡܵܪܝ ܢܸܗܘܸܐ ܫܘܼܪܵܐ؛ ܠܟܸܢ̈ܫܹܐ ܕܙܲܝܚ̣ܘܼܟܼ. ܘܐܲܫܘܵܐ ܠܟܼܠܲܢ ܒܝܲܕܼ ܪ̈ܲܚܡܲܝܟ؛ ܠܥܘܼܡܪܵܟܼ ܡܫܲܒ̇ܚܵܐ. ܕܢܸܚܙܸܐ ܟܢܘܼܫܝܲܢ ܕܒܲܫܡܲܝܵܐ؛ ܘܢܸܙܡܲܪ ܠܵܟܼ ܫܘܼܒܼܚܵܐ.

ܫܘܼܚܠܵܦܵܐ ܕܲܬܼܠܵܬܼܵܐ

ܪܹܫ ܩܵܠܵܐ.

ܠܵܐ ܬܲܗܦܸܟܼ ܐܲܦܲܝ̈ܟ ܡܸܢܲܢ. ܡܫܝܼܚܵܐ ܠܵܐ ܬܲܗܡܸܐ ܡܸܢܲܢ. ܘܠܵܐ ܬܲܪܚܸܩ ܡ̣ܢ ܣܵܓܼܘܿܕܵܝ̈ܟ. ܕܒܼܵܟܼܘܼ ܡܵܪܝ ܐܸܬܼܓܵܘܲܣܢܲܢ. ܕܲܒܲܪܲܝܢ ܒܐܘܼܪܚܵܟܼ ܕܚܲܝܹ̈ܐ. ܕܲܢܙܲܡܲܪ ܠܵܟܼ ܟܠܲܢ ܬܸܫܒ̇ܘܿܚܬܵܐ ܡܵܪܝܵܐ ܐܲܠܵܗܵܐ.

ܫܘܼܚܠܵܦܵܐ ܕܐܲܪܒ̇ܥܵܐ

ܒܪܘܼܟܵܒܼ ܐܝܼܬܼܝܵܐ ܕܲܒܼܪܸܡܙܹܗ.

ܫܲܬܸ̇ܩ ܐܸܢܘܿܢ ܡܵܪܝܵܐ ܐܲܠܵܗܲܢ. ܡܫܝܼܚܵܐ ܕܲܒܼܪܸܡܙܹܗ؛ ܫܲܬܸ̇ܩ ܡܲܚܫܘܼ̈ܠܹܐ؛ ܘܲܙܓܲܪ ܥܲܠ̈ܥܵܠܹܐ. ܒܚܲܝܠܵܟܼ ܢܸܫܬܲܬ̇ܩܘܼܢ؛ ܓܲܠ̈ܠܹܐ ܘܟܼܝܼܡ̈ܘܿܢܹܐ: ܕܐܸܬ̇ܬ̇ܥܝܼܪܘ ܥܲܠ ܥܹܕܬܵܟܼ.

ܫܘܼܚܠܵܦܵܐ ܕܚܲܡܫܵܐ

ܒܪܘܼܟܵܒܼ ܢܘܼܗܪܵܐ ܘܒܲܪ ܢܘܼܗܪܵܐ.

ܫܡܲܥ ܐܲܠܵܗܵܐ ܘܪܲܚܸܡܥܠܲܝ. ܫܵܡܲܥ ܘܠܵܐ ܡܲܗܡܸܐ. ܥܵܢܹ̇ܐ ܘܦܵܪܹܩ. ܘܲܡܫܵܘܙܸܒܼ؛ ܫܡܲܥ ܡܵܪܝ ܒܵܥܘܼܬܲܢ؛ ܘܦܲܢܵܐ ܒܪ̈ܲܚܡܲܟ ܫܹ̈ܐܠܵܬܲܢ.