ܩܠܐ ܕܬܪܝܢ

ܒܪܘܼܟܵܒܼ ܠܲܫ̈ܡܲܝ ܫܡܲܝܵܐ.

ܩܲܕܿܝܼܫܘܼ ܘܲܕܼܚܝܼܠ ܫܡܹܗ. ܐܲܒܼܘܼܢ ܓܢܝܼܙܵܐ ܕܒܲܫܡܲܝܵܐ. ܢܸܬܼܩܲܕܲܫ ܒܲܢ ܫܡܵܟܼ ܩܲܕܝܼܫܵܐ؛ ܕܲܒܼܪܘܼܚܩܘܼܕܼܫܵܐ ܩܲܕܸܫܬܵܢ. ܕܠܵܐ ܢܸܚܕܸܐ ܠܲܢ ܐܵܟܹ̇ܠܩܲܪܨܵܐ؛ ܕܫܲܥܒܸ̇ܕܼ ܚܲܝܲܝ̈ܢ ܒܟܼܠܕܵܪ̈ܝܼܢ؛ ܓܥܘܿܪ ܒܹܗ ܒܚܲܝܠܵܟܼ ܪܲܒܵܐ܀ ܘܬܹܐܬܸܐ ܨܹܐܕܲܝܢ ܡܲܠܟ̇ܘܼܬ݂ ܪܵܘܡܵܐ؛ ܗܵܝ ܕܐܸܫܬܵܘܕܝܼܬ̇ ܠܪ̈ܵܚܡܲܝ ܚܘܼܒܵܟܼ. ܘܢܸܬ̇ܬ̇ܢܝܼܚ ܒܥܲܒ̣ܕܲܝ̈ܟ ܚܹܝܠ. ܨܸܒܝܵܢܵܟܼ؛ ܗܵܪܟܵܐ ܒܐَܪܵܙܵܐ ܘܬܲܡܵܢ ܒܪ̈ܲܚܡܹܐ. ܘܡ̣ܢ ܦܵܬܼܘܿܪܵܟܼ ܕܠܵܐ ܡܸܬܼܡܲܣܟܲܢ: ܙܘܼܢ ܡܵܙܘܿܢܵܐ ܠܲܣܢܝܼܩܘܼܬܲܢ. ܘܗܲܒ݂ ܚܘܼܣܵܝܵܐ ܠܣܲܟܼܠ̱ܘܵܬܲܢ؛ ܕܐܲܢَܬ̇ܘܼ ܡܦܵܣܲܬ̇ ܒܲܡܚܝܠܘܼܬܲܢ܀ ܒܓܼܵܢ ܐܝܼܬܘܼܬܼܵܟܼ؛ ܦܪܘܿܩ ܠܲܓܼܒܼܝܼܠܬܵܟܼ؛ ܕܗܵܐ ܦܬܼܝܼܚ ܦܘܼܡܹܗ ܕܒ݂ܝܼܫܵܐ ܕܢܸܒܼܠ̱ܥܝܼܗ̇ ܡܸܛܠ ܕܕܝܼܠܵܟܼ ܗَܝܼ ܡܲܠܟ̇ܘܼܬܼܵܐ: ܘܚܲܝܠܵܐ ܘܥܘܼܫܢܵܐ ܘܬܸܫܒ̇ܘܿܚܬܵܐ. ܠܵܐ ܡܵܪܝ ܬܸܓܼܠ̱ܙܲܢ ܡ̣ܢ ܒܘܼܣܵܡܵܐ ܕܥܲܡ ܩܲܕܝܼ̈ܫܲܝܟ.

ܫܘܼܚܠܵܦܵܐ ܩܲܕܼܡܵܝܵܐ

ܒܪܘܼܟܵܒܼ ܒܐܘܼܪܚܵܐ ܕܪܗ݇ܘܿܡܹܐ.

ܐܲܝܟ݂ ܐܲܝܠܵܐ ܕܓܼܵܥܹܐ ܥܲܠ ܦܨܝܼܕܼܵܐ ܕܡܲܝ̈ܵܐ. ܒܚܲܫܵܐ ܘܕܸܡ̈ܥܹܐ ܓܵܥܹܝܢ ܥܲܒܼܕܲܝ̈ܟ؛ ܠܘܵܬܼܵܟܼ ܡܵܪܝܵܐ؛ ܡܲܥܒܲܪ ܚܲܫܹ̈ܐ. ܐܲܥܒܲܪ ܡܸܢܲܢ: ܙܲܒܼܢܵܐ ܒܝܼܫܵܐ؛ ܕܲܠܚܝܼܡ ܥܠܲܝܢ. ܐܲܟܼܡܵܐ ܕܐܲܥܒܲܪܬ؛ ܡ̣ܢ ܢܝܼܢ̈ܘܵܝܹܐ؛ ܫܲܒ݂ܛܵܐ ܕܪܘܼܓܼܙܵܐ. ܘܪܲܣܸܬ̇ ܥܠܲܝܗܘܿܢ؛ ܛܲܠܵܐ ܕܪ̈ܲܚܡܹܐ؛ ܘܲܕܼܚܵܘܣܵܢܵܐ. ܐܲܢَܬ̇ܘܼ ܕܒܲܪܸܟܼܬ̇؛ ܩܲܪܢܵܗ̇ ܘܩܘܼܠܬܼܵܗ̇؛ ܕܗܵܝ ܐܲܪܡܲܠܬܵܐ. ܘܐܲܢَܬ̇ܘ݂ ܕܙܲܕܸܩ؛ ܠܡܵܟܼܣܵܐ ܒܗܲܝܟܠܵܐ؛ ܚܢܵܢܵܟܼ ܪܲܒܵܐ. ܘܐܲܢَܬ̇ܘܼ ܕܐܲܣ̣ܝܼܬ̇؛ ܟܹܐܒܼܵܐ ܟܣܲܝܵܐ؛ ܕܗܵܝ̇ ܡܡܲܚܲܝܬܵܐ܀ ܦܘܿܩ ܒܲܒ̣ܥܵܬܵܐ؛ ܕܐܲܝܠܹܝܢ ܕܩܵܪܹܝܢ ܠܲܫܡܵܟܼ ܟܠܝܘܿܡ. ܘܠܵܐ ܡܵܪܝ ܬܲܗܡܸܐ؛ ܡ̣ܢ ܒܵܥܘܼܬܼܵܐ ܕܲܡܫܲܒ̇ܚܵܢܲܝ̈ܟ. ܣܲܒ̣ܪܵܐ ܕܟܹܐܢܹ̈ܐ؛ ܘܐܝܼܵܠܵܐ ܕܲܡܫܵܘ̈ܚܕܹܐ܀ ܥܲܕܲܪ ܠܲܢ ܡܵܪܝ ܒܐܘܼ̈ܠܨܵܢܲܝܢ؛ ܘܣܲܝܲܥ ܠܲܢ ܒܛܲܝܒ̇ܘܼܬܼܵܟܼ. ܘܦܲܢܵܐ ܠܲܢ ܒܪ̈ܲܚܡܲܝܟ ܫܹ̈ܐܠܵܬܲܢ ܝܵܕܲܥ ܟܠ.

ܫܘܼܚܠܵܦܵܐ ܕܲܬܼܪܹܝܢ

ܒܪܘܼܟܵܒܼ ܙܲܝܢܵܐ ܕܪܘܼܚܵܐ.

ܡܵܪܝܵܐ ܐܲܠܵܗܲܢ ܐܲܢܗܲܪ ܠܲܢ. ܡܫܝܼܚܵܐ ܪܵܚܹܡ ܬܲܝܵܒܹ̈ܐ. ܦܬܲܚ ܠܵܗ̇ ܬܲܪܥܵܐ ܠܲܨܠܘܿܬܲܢ؛ ܕܐܲܢَܬ̇ܘܼ: ܐܝܼܬܲܝܟ ܒܹܝܬ݂ ܓܵܘܣܵܐ ܘܦܵܪܘܿܩܵܐ ܕܟܼܠ ܕܩܵܪܹܐ ܠܵܟܼ ܒܲܚܢܲܓܼܬܼܵܐ܀ ܐܲܢَܬ̇ ܓܹܝܪ ܐܸܡܲܪܬ̇ ܒܲܣܒܲܪܬܼܵܟܼ ܡܲܠܲܝܬܼ ܚܲܝܹ̈ܐ. ܕܟܼܠ ܐܲܝܢܵܐ ܕܫܵܐܹܠ ܢܵܣܹܒܼ. ܘܐܲܝܢܵܐ ܕܢܵܩܹܫ ܡܸܬܼܦܬܲܚ ܠܹܗ. ܬܲܪܥܹܗ ܪܲܒܵܐ ܕܲܚܢܵܢܵܟܼ܀ ܘܵܝ ܕܠܵܐ ܢܸܩ̇ܫܹܬܼ ܒܬܲܪܥܵܟܼ ܪܵܚܹܡ ܬܲܝܵܒܹ̈ܐ. ܡܲܢܘܼ ܢܦܝܼܤܵܟܼ ܥܲܠ ܣܲܟܼ̈ܠ̱ܘܵܬܼܝ. ܒܗܵܘ̇ ܒܹܝܬܼ ܕܝܼܢܵܐ ܕܟܹܐܢܘܼܬܼܵܟܼ. ܕܠܲܝܬ̇ ܩܕܼܵܡܲܝܟ ܡܲܣܲܒ̣ ܒܐܲܦܹ̈ܐ܀ ܡܫܝܼܚܵܐ؛ ܣܲܒܼܪܵܐ ܕܟܼܠܗܘܿܢ ܚܲܛܵܝܹ̈ܐ. ܚܘܼܢܲܝܢܝ ܒܪ̈ܲܚܡܲܝܟ ܘܲܒܼܛܲܝܒ̇ܘܼܬܼܵܟܼ ܘܪܲܚܸܡܥܠܲܝ.

ܫܘܼܚܠܵܦܵܐ ܕܲܬܠܵܬܵܐ

ܪܹܫ ܩܵܠܵܐ

ܙܲܕܝܼܩܲܬ̇ ܡܵܪܝܵܐ ܘܛܵܒܼ ܬܪܝܼܨܝܼܢ ܕܝܼܢܲܝ̈ܟ. ܠܵܟܼ ܕܲܝܵܢܵܐ ܡܙܲܕܸܩ ܡܲܓܵܢ. ܡܲܓܼܥܸܠ ܐَܢܵܐ ܠܵܟܼ ܡܘܼܡܵܘ̈ܗܝ ܕܲܩܢܘܿܡܝ. ܗܲܒ݂ܠܝܼ ܓܲܠܝܘܼܬܼ ܐܲܦܹ̈ܐ ܒܹܝܬܼ ܕܝܼܢܵܐ. ܒܪ̈ܲܚܡܹܐ ܕܫܲܠܚܘܼܟܼ ܨܹܝܕ ܓܸܢܣܲܢ ܘܪܲܚܸܡܥܠܲܝ.

ܫܘܼܚܠܵܦܵܐ ܕܐܲܪܒ̇ܥܵܐ

ܪܹܫ ܩܵܠܵܐ

ܥܘܼܕܼܪܵܢܲܢ ܒܲܫܡܹܗ ܕܡܵܪܝܵܐ. ܥܘܼܕܼܪܵܢ ܛܲܝܒ̇ܘܼܬܼܵܟܼ؛ ܐܲܠܘܵܐ ܠܣܵܓܼܘܿܕܲܝ̈ܟ ܡܵܪܝܵܐ. ܘܲܬܼܚܹܝܬܼ ܟܸܢܦܵܘ̈ܗܝ ܕܲܨܠܝܼܒܼܵܟܼ؛ ܣܲܬܲܪ ܚܲܝܲܝ̈ܢ ܡ̣ܢ ܒܝܼܫܵܐ. ܘܐܲܢܗܲܪ ܙܵܘܥܹ̈ܐ ܕܚܘܼܫܵܒܲܝ̈ܢ؛ ܒܗܸܪܓܵܐ ܦܲܐܝܵܐ ܕܝܘܼܠܦܵܢܵܟܼ. ܝܵܨܘܿܦܹܗ ܕܓܸܢܣܲܢ؛ ܡܵܪܵܐ ܕܟܼܠܵܐ ܪܲܚܸܡܥܠܲܝܢ.

ܫܘܼܚܠܵܦܵܐ ܕܚܲܡܫܵܐ

ܒܪܘܼܟܵܒ̣ ܥܹܐܕܹ̈ܐ ܕܩܲܕܝܼܫܹ̈ܐ.

ܡܵܪܝܵܐ ܪ̈ܲܚܡܲܝܟܼ ܠܥܵܠܲܡ. ܡܫܝܼܚܵܐ ܡܠܸܐ ܪ̈ܲܚܡܹܐ. ܐܲܫܦܲܥ ܛܲܝܒ̇ܘܼܬܼܵܟܼ ܥܲܠ ܟܠ ܕܩܵܪܹܝܢ ܠܵܟܼ. ܘܐܵܘܫܸܛ ܐܝܼܕܼܵܐ ܕܥܘܼܕܼܪ̈ܵܢܹܐ ܠܟܼܠܗܘܿܢ ܐܲܝܠܹܝܢ ܕܲܪܡܹܝܢ ܒܢܸܣܝ̈ܘܿܢܹܐ. ܡܵܪܵܐ ܛܵܒܼܵܐ ܕܲܠܟܼܠܗܘܿܢ ܥܲܒܼܕܵܘ̈ܗܝ ܚܵܐܹܢ ܒܛܲܝܒ̇ܘܼܬܹܗ. ܗܲܒܼܠܲܢ ܡܵܪܲܢ ܒܲܚܢܵܢܵܟܼ ܕܲܒܼܛܸܠܵܠܵܐ ܕܟܸܢܦܲܝ̈ܟܼ ܢܸܣܬܲܬܲܪ؛ ܡ̣ܢ ܒܝܼܫܵܐ ܘܚܲܝܠܹܗ ܒܪ̈ܲܚܡܹܐ ܕܛܲܝܒ̇ܘܼܬܼܵܟܼ.