ܚܕܒܫܒܐ ܕܥܐܕܐ ܕܩܝܡܬܐ
ܐܹܫܲܥܝܵܐ ܣ؛ 1‐8
ܬܸܒ̣ܘ ܘܲܫܠܵܘ ܢܒ̣ܝܼܘܼܬܹܗ ܕܐܹܫܲܥܝܵܐ؛ ܐܲܚܲܝ̈ ܒܲܪܸܟ̣ܡܵܪܝ܀
ܗܵܕܟ̣ܵܐ ܒܹܐܡܵܪܵܐ ܝ݇ܠܹܗ ܡܵܪܝܵܐ ܩܘܼܡܝ ܒܲܗܪܸܢܝ ܣܵܒܵܒ ܕܡܛܹܐܠܹܗ ܒܲܗܪܵܟ̣ܝ. ܘܐܝܼܩܵܪܹܗ ܕܡܵܪܝܵܐ ܥܲܠܵܟ̣ܝ ܒܸܬ ܙܵܪܸܩ܀ ܣܵܒܵܒ ܕܗܵܐ ܚܸܫܟܵܐ ܡܵܟܘܿܣܹܐ ܝ݇ܠܹܗ ܠܐܲܪܥܵܐ؛ ܘܥܲܝܒ̣ܵܐ ܠܡܸܠܲܬܹ̈ܐ؛ ܘܥܲܠܵܟ̣ܝ ܒܸܬ ܙܵܪܸܩ ܡܵܪܵܝܵܐ ܘܐܝܼܩܵܪܹܗ ܥܲܠܵܟ̣ܝ ܒܸܬ ܦܵܐܹܫ ܚܸܙܝܵܐ܀ ܘܒܸܬ ܐܵܬܝܼ ܛܵܝܸܦܹ̈ܐ ܠܒܲܗܪܵܟ̣ܝ ܘܡܲܠܟܹ̈ܐ ܠܒܲܗܪܵܐ ܕܙܪܵܩܵܟ̣ܝ. ܡܵܪܸܡܝ ܥܲܝܢܵܟ̣ܝ ܠܚܵܕܸܪܘܵܢܵܟ̣ܝ. ܘܚܙܵܝ ܕܟܠܲܝܗܝ ܒܸܬ ܓ̰ܵܡܥܝܼ ܘܐܵܬܝܼ ܠܟܸܣܠܵܟ̣ܝ؛ ܒܢ̈ܘܿܢܵܟ̣ܝ ܡ̣ܢ ܪܸܚܩܵܐ ܒܸܬ ܐܵܬܝܼ ܘܒܢ̈ܵܬܵܟ̣ܝ ܥܲܠ ܕܲܪ̈ܓܘܼܫܝܵܬܹܐ ܒܸܬ ܦܵܝܫܝܼ ܓܘܼܪܘܸܣܹܐ܀ ܗܵܝܓܵܗ̇ ܒܸܬ ܚܵܙܝܵܬ̇ܝ ܘܒܲܗܪܸܢܵܬ̇ܝ؛ ܘܚܵܕܝܵܬ̇ܝ ܘܦܵܨܸܚ ܠܸܒܵܟ̣ܝ؛ ܣܵܒܵܒ ܒܸܬ ܦܵܐܹܫ ܡܘܼܕܸܪܵܐ ܩܵܬܵܟ̣ܝ ܥܘܼܬܪܵܐ [ܕܵܘܸܠܬܵܐ] ܕܝܵܡܵܐ؛ ܘܚܲܝܠܹ̈ܐ ܕܛܵܝܸܦܹ̈ܐ ܒܸܬ ܐܵܬܝܼ ܐܸܠܵܟ̣ܝ؛ ܒܘܼܫܵܝܘܼܬܵܐ ܕܓܘܼܡܠܹ̈ܐ ܒܸܬ ܡܲܟܸܣܵܐ ܠܵܟ̣ܝ؛ ܒܘܼܟ̣ܪܹ̈ܐ ܕܡܸܕܝܵܢ ܘܕܐܲܥܦܵܐ؛ ܟܠܲܝܗܝ ܡ̣ܢ ܫܒ̣ܵܐ ܒܸܬ ܐܵܬܝܼ. ܕܲܗܒ̣ܵܐ ܘܠܒ̣ܘܼܢ݇ܬܵܐ ܒܸܬ ܛܵܥܢܝܼ؛ ܘܬܸܫܒܚܵܬܹ̈ܗ ܕܡܵܪܝܵܐ ܒܸܬ ܡܲܫܚܸܕܝܼ܀ ܟܠܲܝܗܝ ܥܸܪ̈ܒܹܐ ܕܩܹܕܲܪ ܒܸܬ ܦܵܝܫܝܼ ܓ̰ܘܼܡܥܝܹܐ ܩܵܬܵܟ̣ܝ؛ ܘܒܲܪ̈ܥܵܢܹܐ ܕܢܒ̣ܵܐܘܼܬ ܒܸܬ ܥܵܒ̣ܕܝܼ ܠܵܟ̣ܝ ܚܸܠܡܲܬ ܘܒܸܬ ܐܵܣܩܝܼ ܠܪܸܙܵܝܵܐ ܥܲܠ ܡܲܕܒܚܝܼ؛ ܘܒܲܝܬܵܐ ܕܬܸܫܒܘܿܚܬܝܼ ܒܸܬ ܫܵܒܚܸܢ.
ܚܲܒ̣ܪܹܗ
ܐ؛ ܫܡܘܼܹܐܹܝܠ ܒ؛ 1‐11
ܫܠܵܘ ܣܸܦܪܵܐ ܕܲܫܡܘܼܐܹܝܠ؛ ܐܲܚܲܝ̈ ܒܲܪܸܟ̣ܡܵܪܝ܀
ܘܨܘܼܠܹܐܠܵܗ̇ ܚܲܢܵܐ ܘܐ݇ܡܸܪܵܗ̇؛ ܚܘܼܠܸܢܹܗ ܠܸܒܝܼ ܒܡܵܪܝܵܐ ܘܪܝܼܡܠܵܗ̇ ܩܲܪ݇ܢܝܼ؛ ܘܦܬܸܚܠܹܗ ܦܘܼܡܝܼ ܥܲܠ ܕܸܫ̰ܡܸܢܝܼ؛ ܣܵܒܵܒ ܕܡܘܼܚܕܹܐܠܘܼܟܼ ܐܸܠܝܼ ܒܦܘܼܪܩܵܢܘܼܟܼ܀ ܠܲܝܬ̇ ܕܩܲܕܝܼܫܵܐ ܝ݇ܠܹܗ ܐܲܝܟܼ ܡܵܪܝܵܐ؛ ܣܵܒܵܒ ܕܠܲܝܬ̇ ܫܒ̣ܘܿܩ ܡܸܢܘܼܟܼ؛ ܘܠܲܝܬ̇ ܒܘܼܫ ܚܲܝܠܵܢܵܐ ܐܲܝܟܼ ܐܲܠܵܗܲܢ܀ ܠܵܐ ܡܲܙܝܸܕܝܼܬܘܿܢ ܠܗܲܡܙܘܼܡܹܐ ܫܘܼܠܵܢܹ̈ܐ ܓܘܼܪܹ̈ܐ؛ ܘܠܵܐ ܦܵܠܸܛ ܙܠܘܼܡܝܵܐ ܡ̣ܢ ܦܘܼܡܵܘܟ̣ܘܿܢ؛ ܣܵܒܵܒ ܡܵܪܝܵܐ ܕܝ݇ܕܥܵܝܬܵܐ ܝ݇ܠܹܗ؛ ܘܠܹܐ ܬܵܪܨܝܼ ܨܸܢܥܵܬܹ̈ܐ [ܦܲܢܕܹ̈ܐ] ܩܵܕ݇ܡܘܼܗܝ܀ ܩܸܫܬܵܬܹ̈ܐ ܕܓܲܢ݇ܒܵܪܹ̈ܐ ܒܸܬ ܦܵܝܫܝܼ ܫܡܝܼܛܹܐ؛ ܘܙܲܒܘܼܢܹ̈ܐ ܒܸܬ ܦܵܝܫܝܼ ܙܘܼܪܒܸܢܹܐ ܒܚܲܝܠܵܐ. ܘܣܒ̣ܝܼܥܹ̈ܐ ܒܠܲܚܡܵܐ ܦܸܫܠܗ݇ܘܿܢ ܕܒ̣ܝܼܩܹܐ ܒܗܵܩܵܐ. ܘܟܦܝܼܢܹ̈ܐ ܐ݇ܟ̣ܸܠܗ݇ܘܿܢ ܘܡܘܼܙܝܸܕܠܗ݇ܘܿܢ. ܥܩܲܪܬܵܐ ܗܘܼܨܸܠܵܗ̇ ܘܣܒ̣ܝܼܥܠܵܗ̇؛ ܘܡܵܪܬܵܐ ܕܒܢܘܿܢܹ̈ܐ ܪܵܒܵܐ ܗ݇ܘܹܐܠܵܗ̇ ܒܲܝܵܪܵܐ [ܥܩܲܪܬܵܐ]܀ ܡܵܪܝܵܐ ܝ݇ܠܹܗ ܕܟܹܐ ܡܲܡܝܸܬ ܘܡܲܚܹܐ. ܘܡܲܨܠܹܐ ܠܫܝܘܿܠ ܘܡܲܣܸܩ܀ ܡܵܪܝܵܐ ܝ݇ܠܹܗ ܕܟܹܐ ܥܵܒ̣ܸܕ ܡܸܣܟܹܢܵܐ܀ ܘܥܲܬܝܼܪܵܐ؛ ܡܲܟܸܦ ܘܐܘܼܦ ܡܵܪܸܡ܀ ܡܵܪܸܡ ܡ̣ܢ ܥܲܦܪܵܐ ܠܡܸܣܟܹܢܵܐ. ܘܡ̣ܢ ܣܘܼܠܬܵܐ ܡܲܩܸܡ ܠܡܸܣܟܹܢܵܐ ܠܡܲܬܲܒ̣ܬܹܗ ܥܲܡ ܓܘܼܪ̈ܵܢܹܐ؛ ܘܟܘܼܪܣܝܵܐ ܕܐܝܼܩܵܪܵܐ ܒܸܬ ܡܲܪܝܸܬ̇ ܠܗ݇ܘܿܢ. ܥܒ̣ܸܕܠܹܗ ܛܸܠܵܢܝܼܬܵܐ ܡܵܪܝܵܐ ܥܘܼܡܩܹ̈ܐ ܕܐܲܪܥܵܐ؛ ܘܡܘܼܬܸܒ̣ܠܹܗ ܥܲܠܲܝܗܝ ܕܘܼܢܝܹܐ܀ ܐܲܩܠܵܬܹ̈ܐ ܕܩܲܕܝܼܫ̈ܘܼܗܝ ܒܸܬ ܢܵܛܸܪ؛ ܘܟܵܦܘܿܪܹ̈ܐ ܒܚܸܫܟܵܐ ܦܵܝܫܝܼ ܡܘܼܫܬܸܩܹܐ؛ ܣܵܒܵܒ ܕܠܹܐ ܝ݇ܠܹܗ ܒܚܲܝܠܹܗ ܕܐ݇ܢܵܫܵܐ ܗܵܘܹܐ ܓܲܢ݇ܒܵܪܵܐ܀ ܡܵܪܝܵܐ ܒܸܬ ܫܵܡܸܛ ܡܲܟܪܸ̈ܒܵܢܹܐ ܕܝܼܹܗ؛ ܘܥܲܠܲܝܗܝ ܒܫܡܲܝܵܐ ܒܸܬ ܩܲܪܩܸܡ؛ ܡܵܪܝܵܐ ܒܸܬ ܕܵܐܸܢ ܡܲܪ̈ܙܵܢܵܢܹܐ ܕܐܲܪܥܵܐ؛ ܘܒܸܬ ܝܵܗ݇ܒ̣ܸܠ ܚܲܝܠܵܐ ܠܡܲܠܟܹܗ؛ ܘܡܵܪܸܡ ܩܲܪܢܵܐ ܕܡܫܝܼܚܹܗ.܀
♱♱♱♱♱♱♱♱♱
ܚܕܒܫܒܐ ܕܥܐܕܐ ܕܩܝܡܬܐ
ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ
ܕܲܠܘܵܬܼ ܪ̈ܗܘܿܡܵܝܹܐ ܐܲܚܲܝ̈ ܒܲܪܸܟܼܡܵܪܝ܀
ܐܝܼܢܵܐ ܬܲܪܥܵܐ ܕܗܘܹܐܠܹܗ ܠܢܵܡܘܿܣܵܐ ܩܵܐ ܕܙܵܝܕܵܐ ܚܛܝܼܬܵܐ. ܘܒܗ̇ܝ ܕܘܼܟܬܵܐ ܕܙܝܼܕܠܵܗ̇ ܚܛܝܼܬܵܐ؛ ܬܵܡܵܐ ܦܸܫܠܵܗ̇ ܡܘܼܙܝܸܕܬܵܐ ܫܵܦܵܩܲܬ* ܕܐܲܝܟܼ ܕܗܘܼܟܸܡܠܵܗ̇ ܚܛܝܼܬܵܐ ܒܡܵܘܬܵܐ؛ ܗܲܕܟܼܵܐ ܒܸܬ ܗܵܟܡܵܐ ܫܵܦܵܩܲܬ ܒܟܹܐܢܘܼܬܵܐ ܠܚܲܝܹ̈ܐ ܕܠܐܵܒܲܕ ܒܝܼܲܕ ܡܵܪܲܢ ܝܼܫܘܿܥ ܡܫܝܼܚܵܐ* ܒܲܣ ܡܘܼܕܝܼ ܐܵܡܪܵܚ؛ ܟܵܠܲܚ ܓܵܘ ܚܛܝܼܬܵܐ ܩܵܐ ܕܫܵܦܵܩܲܬ ܙܵܝܕܵܐ؟ ܚܵܣܠܝܼ! ܣܵܒܵܒ ܐܵܢܝܼ ܕܡܝܼܬܠܲܢ ܠܚܛܝܼܬܵܐ ܕܵܐܟܼܝܼ ܡܸܢ݇ܕܪܹܫ̄ ܚܲܝܲܚ ܓܵܘܵܗ̇* ܝܲܢ ܠܹܐ ܝ݇ܬܘܿܢ ܒܝܼܕܲܥܝܵܐ ܕܐܵܢܝܼ ܕܥܡܸܕܠܲܢ ܒܝܼܫܘܿܥ ܡܫܝܼܚܵܐ. ܒܡܵܘܬܹܗ ܥܡܸܕܠܲܢ* ܦܸܫܠܲܢ ܩܒܼܝܼܪܹܐ ܥܲܡܹܗ ܒܡܲܥܡܘܿܕܝܼܬܵܐ ܠܡܵܘܬܵܐ ܕܵܐܟܼܝܼ ܕܩܸܡܠܹܗ ܝܼܫܘܿܥ ܡܫܝܼܚܵܐ ܡ̣ܢ ܓܵܘ ܡܝܼܬܹ̈ܐ ܒܚܸܩܪܵܐ ܕܒܵܒܹܗ. ܗܲܕܟܼܵܐ ܐܘܼܦ ܐܲܚܢܲܢ ܒܚܲܝܹ̈ܐ ܚܲܕ݇ܬܹ̈ܐ ܒܸܬ ܚܵܕܪܲܚ* ܣܵܒܵܒ ܐܸܢ ܡܐܸܚܕܵܕܹܐ ܦܸܫܠܲܢ ܢܨܝܼܒܼܹܐ ܥܲܡܹܗ ܒܕܵܡܵܝܬܵܐ ܕܡܵܘܬܹܗ. ܗܲܕܟܼܵܐ ܐܘܼܦ ܒܩܝܵܡܬܹܗ ܒܸܬ ܗܵܘܲܚ* ܣܵܒܵܒ ܒܝܼܕܲܥܝܵܐ ܝ݇ܘܲܚ ܕܒܲܪܢܵܫܲܢ ܥܲܬܝܼܩܵܐ ܦܸܫܠܹܗ ܡܸܚܝܵܐ ܠܙܩܝܼܦܵܐ ܥܲܡܹܗ. ܩܵܐ ܕܦܵܐܸܫ ܒܘܼܛܠܵܐ ܦܲܓܼܪܵܐ ܕܚܛܝܼܬܵܐ ܕܡܸܢ݇ܕܪܹܫ̄ ܠܵܐ ܥܵܒܼܕܲܚ ܚܸܠܡܲܬ ܠܚܛܝܼܬܵܐ* ܣܵܒܵܒ ܗ̇ܘ ܕܡܝܼܬܠܹܗ ܗܘܹܐܠܹܗ ܐܵܙܲܕ ܡ̣ܢ ܚܛܝܼܬܵܐ* ܒܲܣ ܐܹܢ ܡܝܼܬܠܲܢ ܥܲܡ ܡܫܝܼܚܵܐ؛ ܗܲܡܸܢܲܚ ܕܥܲܡ ܡܫܝܼܚܵܐ ܒܸܬ ܚܲܝܲܚ* ܒܝܼܕܲܥܝܵܐ ܝ݇ܘܲܚ ܕܡܫܝܼܚܵܐ ܩܸܡܠܹܗ ܡ̣ܢ ܓܵܘ ܡܝܼܬܹ̈ܐ ܘܡܸܢ݇ܕܪܹܫ̄ ܠܹܐ ܡܵܐܸܬ؛ ܘܡܵܘܬܵܐ ܠܹܐ ܡܗܵܟܸܡ ܒܝܼܹܗ* ܣܵܒܵܒ ܕܡܝܼܬܠܹܗ. ܠܚܛܝܼܬܵܐ ܡܝܼܬܠܹܗ ܚܕܵܐ ܓܵܗܵܐ. ܘܗ̇ܘ ܕܝܼܠܹܗ ܚܲܝܵܐ؛ ܚܲܝܵܐ ܝ݇ܠܹܗ ܠܐܲܠܵܗܵܐ* ܗܲܕܟܼܵܐ ܐܘܼܦ ܐܲܚܬܘܿܢ ܚܲܫܒܸܢܗ݇ܘܿܢ ܓܵܢܵܘܟܼܘܿܢ ܕܡܝܼܬܹ̈ܐ ܝ݇ܬܘܿܢ ܠܚܛܝܼܬܵܐ. ܘܚܲܝܹ̈ܐ ܝ݇ܬܘܿܢ ܠܐܲܠܵܗܵܐ ܒܡܵܪܲܢ ܝܼܫܘܿܥ ܡܫܝܼܚܵܐ* ܒܲܣ ܠܵܐ ܗܵܟܡܵܐ ܚܛܝܼܬܵܐ ܒܦܲܓܼܪܵܘܟܼܘܿܢ ܡܝܼܬܵܐ ܩܵܐ ܕܡܲܨܝܸܬܝܼܬܘܿܢ ܠܫܲܗܘܲܬܝܵܬܘܼܗ̈ܝ* ܘܐܘܼܦ ܠܵܐ ܗܵܕܪܝܼܬܘܿܢ ܗܲܕܵܡܵܘ̈ܟܼܘܿܢ ܐܲܣܒܲܒ ܕܥܵܘܠܵܐ ܩܵܐ ܚܛܝܼܬܵܐ. ܐܸܠܵܐ ܗܵܕܪܘܿܢ ܓܵܢܵܘܟܼܘܿܢ ܠܐܲܠܵܗܵܐ ܐܲܝܟܼ ܐ݇ܢܵܫܹ̈ܐ ܕܡ̣ܢ ܓܵܘ ܡܝܼܬܹ̈ܐ ܚܝܹܐܠܵܘܟܼܘܿܢ. ܘܗܲܕܵܡܵܘ̈ܟܼܘܿܢ ܗܵܘܝܼ ܐܲܣܒܲܒ ܩܵܐ ܟܹܐܢܘܼܬܹܗ ܕܐܲܠܵܗܵܐ* ܘܚܛܝܼܬܵܐ ܥܲܠܵܘܟܼܘܿܢ ܠܵܐ ܥܵܒܼܕܵܐ ܗܘܼܟܡܵܐ ܣܵܒܵܒ ܠܹܐ ܝ݇ܬܘܿܢ ܬܚܘܿܬ ܢܵܡܘܿܣܵܐ؛ ܐܸܠܵܐ ܬܚܘܿܬ ܫܵܦܵܩܲܬ* ܒܲܣ ܡܘܼܕܝܼ ܥܵܒܼܕܲܚ؛ ܚܵܛܵܚ ܕܠܹܐ ܝ݇ܘܲܚ ܬܚܘܿܬ ܢܵܡܘܿܣܵܐ؛ ܐܸܠܵܐ ܬܚܘܿܬ ܫܵܦܵܩܲܬ؟ ܚܵܣܠܝܼ!* ܠܹܐ ܝ݇ܬܘܿܢ ܒܝܼܕܲܥܝܵܐ ܩܵܐ ܡܵܢܝܼ ܗܘܼܕܪܹܐ ܝ݇ܬܘܿܢ ܓܵܢܵܘܟܼܘܿܢ ܕܡܲܨܝܸܬܝܼܬܘܿܢ ܐܸܠܹܗ ܐܲܝܟܼ ܕܠܪܹ̈ܓܵܘܵܬܹܐ. ܐܲܚܬܘܿܢ ܪܹ̈ܓܵܘܵܬܹܐ ܝ݇ܬܘܿܢ ܕܗ̇ܘ ܕܡܲܨܝܸܬܝܼܬܘܿܢ ܐܸܠܹܗ. ܐܸܢ ܠܚܛܝܼܬܵܐ ܘܐܸܢ ܠܫܡܵܥܝܬܵܐ ܕܢܵܬܵܐ ܕܟܹܐܢܘܼܬܵܐ* ܡܸܢܬܵܐ ܡܐܲܠܵܗܵܐ ܕܪܹ̈ܓܵܘܵܬܹܐ ܝ݇ܬܘܿܢ ܗ݇ܘ̣ܵܘ ܕܚܛܝܼܬܵܐ ܘܡܘܼܨܝܸܬܠܵܘܟܼܘܿܢ ܡ̣ܢ ܠܸܒܵܐ ܠܕܵܡܵܝܬܵܐ ܕܝܘܼܠܦܵܢܵܐ ܕܦܸܫܠܵܘܟܼܘܿܢ ܣܘܼܦܝܸܐ ܐܸܠܹܗ* ܘܟܲܕ ܗ݇ܘܹܐ ܠܵܘܟܼܘܿܢ ܐܵܙܲܕ ܡ̣ܢ ܚܛܝܼܬܵܐ ܗ݇ܘܹܐܠܵܘܟܼܘܿܢ ܙܲܒܛ ܠܟܹܐܢܘܼܬܵܐ* ܐܲܝܟܼ ܕܓܵܘ ܒܢܲܝ̈ܢܵܫܵܐ ܒܹܐܡܵܪܵܐ ܝ݇ܘܸܢ ܡ̣ܢ ܣܵܒܵܒ ܕܙܲܒܘܼܢܘܼܬܵܐ ܕܒܸܣܪܵܘܟܼܘܿܢ. ܕܵܐܟܼܝܼ ܕܗܘܼܕܸܪܵܘܟܼܘܿܢ ܗܲܕܵܡܵܘ̈ܟܼܘܿܢ ܠܪܹܓܘܼܬܵܐ ܕܟ̰ܲܦܵܠܘܼܬܵܐ ܘܥܵܘܠܵܐ. ܗܲܕܟܼܵܐ ܐܘܼܦ ܐܵܕܝܵܐ ܗܲܕܪܘܿܢ ܠܗ݇ܘܿܢ ܠܪܹܓܘܼܬܵܐ ܕܟܹܐܢܘܼܬܵܐ ܘܩܲܕܝܼܫܘܼܬܵܐ* ܣܵܒܵܒ ܟܲܕ ܪܹ̈ܓܵܘܵܬܹܐ ܝ݇ܬܘܿܢ ܕܚܛܝܼܬܵܐ ܗ݇ܘܹܐܠܵܘܟܼܘܿܢ ܐܵܙܲܕ ܠܟܹܐܢܘܼܬܵܐ* ܡܘܼܕܝ݇ ܛܥܘܼܢܬܵܐ ܐܝܼܬ ܗ݇ܘ̣ܵܐ ܠܵܘܟܼܘܿܢ ܗܵܝܓܵܗ ܐܲܝܢܝܼ ܕܐܸܕܝܘܿܡ݇ ܝܵܘܡܵܐ ܒܸܢܚܵܦܵܐ ܝ݇ܬܘܿܢ ܒܝܼܵܗ̇. ܣܵܒܵܒ ܚܲܪܬܵܗ̇ ܝܼܠܵܗ̇ ܡܵܘܬܵܐ* ܘܐܵܕܝܼܵܐ ܕܗ݇ܘܹܐܠܵܘܟܼܘܿܢ ܐܵܙܲܕ ܡ̣ܢ ܚܛܝܼܬܵܐ ܘܗ݇ܘܹܐܠܵܘܟܼܘܿܢ ܪܹ̈ܓܵܘܵܬܹܐ ܕܐܲܠܵܗܵܐ. ܐܝܼܬܠܵܘܟܼܘܿܢ ܛܥܘܼܢܝܵܬܹ̈ܐ ܩܲܕܝܼܫܹ̈ܐ ܕܚܲܪܬܲܝܗܝ ܝܼܠܵܗ̇ ܚܲܝܹ̈ܐ ܕܠܐܵܒܲܕ* ܐܝܼܢܵܐ ܩܢܵܝܬܵܐ ܕܚܛܝܼܬܵܐ ܡܵܘܬܵܐ ܝ݇ܠܵܗ̇؛ ܘܚܲܠܥܲܬ ܕܐܲܠܵܗܵܐ ܚܲܝܹ̈ܐ ܕܠܐܵܒܲܕ ܒܡܵܪܲܢ ܝܼܫܘܿܥ ܡܫܝܼܚܵܐ*
♱♱♱♱♱♱♱♱♱
ܚܕܒܫܒܐ ܕܥܐܕܐ ܕܩܝܡܬܐ
ܝܘܚܢܢ ܟܟ: 1 ‐ 19
ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ ܟܪܘܙܘܬܼܐ ܕܝܘܚܢܢ
♰ ܐܝܼܢܵܐ ܒܚܲܕܒܫܲܒܵܐ ܒܨܲܦܪܵܐ ܗܵܠܵܐ ܚܸܫܟܵܐ، ܐ݇ܬܹܐܠܵܗ̇ ܡܲܪܝܲܡ ܡܲܓܼܕܠܵܝܬܵܐ ܠܒܹܝܬ ܩܒܼܘܼܪܵܐ، ܘܚܙܹܐܠܵܗ̇ ܟܹܐܦܵܐ ܕܫܩܝܼܠܬܵܐ ܡ̣ܢ ܩܲܒܼܪܵܐ. ܘܪܚܸܛܠܵܗ̇ ܘܐ݇ܬܹܐܠܵܗ̇ ܠܘܵܬ ܫܸܡܥܘܿܢ ܟܹܐܦܵܐ، ܘܠܘܵܬ ܗ̇ܘ ܬܲܠܡܝܼܕܵܐ ܐ݇ܚܹܪ݇ܢܵܐ ܕܡܲܚܸܒ ܗ݇ܘܵܐܠܹܗ ܝܑܼܫܘܿܥ. ܘܐܲܡܪܵܐ ܐܸܠܲܝܗܝ: ܕܫܩܸܠܗ݇ܘܿܢ ܠܡܵܪܲܢ ܡ̣ܢ ܗ̇ܘ ܒܹܝܬ ܩܒܼܘܼܪܵܐ. ܘܠܹܐ ܝܘܲܢܝ ܒܝܼܕܵܥܵܐ ܐܲܝܟܵܐ ܡܘܼܬܸܒܼܠܗ݇ܘܿܢ ܐܸܠܹܗ. ܘܦܠܸܛܠܸܗ ܫܸܡܥܘܿܢ ܘܗ̇ܘ ܬܲܠܡܝܼܕܵܐ ܐ݇ܚܹܪ݇ܢܵܐ. ܘܐܵܬܝܼ ܗ݇ܘܵܘ ܠܒܹܝܬ ܩܒܼܘܼܪܵܐ. ܘܪܵܚܛܝܼ ܗ݇ܘܵܘ ܬܸܪܘܲܝܗܝ ܡܐܸܚܕܵܕܹܐ. ܐܝܼܢܵܐ ܗ̇ܘ ܬܲܠܡܝܼܕܵܐ ܪܚܸܛܠܹܗ ܩܕܸܡܠܹܗ ܠܫܸܡܥܘܼܢ. ܘܐ݇ܬܹܐܠܹܗ ܩܲܕ݇ܡܵܝܵܐ ܠܒܹܝܬ ܩܒܼܘܼܪܵܐ. ܘܓܘܼܫܸܩܠܹܗ ܚܙܹܐܠܹܗ ܟܸܬܵܢܹ̈ܐ ܟܲܕ ܡܘܼܬܒܼܹܐ. ܐܝܼܢܵܐ ܥܒܼܵܪܵܐ ܠܵܐ ܥܒܼܸܪܹܗ. ܐܝܼܢܵܐ ܐ݇ܬܹܐܠܹܗ ܫܸܡܥܘܿܢ ܒܵܬ݇ܪܹܗ، ܘܥܒ̣ܸܪܹܗ ܠܒܹܝܬ ܩܒ̣ܘܼܪܵܐ، ܘܚܙܹܐܠܹܗ ܟܸܬܵܢܹ̈ܐ ܟܲܕ ܡܘܼܬܒ̣ܹܐ، ܘܝܵܠܸܚܬܵܐ ܗ̇ܝ ܕܚܠܝܼܨܬܵܐ ܗ݇ܘܵܐ ܒܪܹܫܹܗ، ܠܵܐ ܥܲܡ ܟܸܬܵܢܹ̈ܐ. ܐܸܠܵܐ ܟܲܕ ܟܪܝܼܟܼܬܵܐ ܘܡܘܼܬܸܒܼܬܵܐ ܠܚܕܵܐ ܕܸܦܢܵܐ ܒܚܕܵܐ ܕܘܼܟܵܐ. ܗܿܝܓܵܗ ܥܒܼܸܪܹܗ ܐܘܿܦ ܗ̇ܘ ܬܲܠܡܝܼܕܵܐ ܕܐ݇ܬܹܐܠܹܗ ܩܲܕ݇ܡܵܝܵܐ ܠܒܹܝܬ ܩܒܼܘܼܪܵܐ، ܘܚܙܹܐܠܹܗ ܘܗܘܼܡܸܢܹܗ. ܣܵܒܵܒ ܗܵܠܵܐ ܠܹܐ ܝܲܕܥܝܼ ܗ݇ܘܵܘ ܡ̣ܢ ܟܬܵܒܼܹ̈ܐ. ܕܗܕܝܼܪܵܐ ܗ݇ܘܵܐ ܠܸܩܝܵܡܵܐ ܡ̣ܢ ܓܵܘ ܡܝܼܬܹ̈ܐ. ܘܐ݇ܙܸܠܗ݇ܘܿܢ ܐܵܢܝܼ ܬܲܠܡܝܼܕܹ̈ܐ ܡܸܢ݇ܕܪܹܫ݇ ܠܕܘܼܟܬܲܝܗܝ. ܐܝܼܢܵܐ ܡܲܪܝܲܡ ܟܠܹܝܬܵܐ ܗ݇ܘܵܐ ܠܘܵܬ ܩܲܒܼܪܵܐ ܘܒܟܼܵܝܵܐ. ܘܟܲܕ ܒܟܼܵܝܵܐ ܓܘܼܫܸܩܠܵܗ̇ ܒܩܲܒܼܪܵܐ. ܘܚܙܹܐܠܵܗ̇ ܬܪܹܝ ܡܲܠܲܐܟܼܹ̈ܐ ܒܓ̰ܘܼܠܹ̈ܐ ܚܘܵܪܹ̈ܐ ܕܒܸܬܝܵܒܼܵܐ ܚܲܕ݇ ܡ̣ܢ ܠܵܪܹܫܹܗ ܘܚܲܕ݇ ܡ̣ܢ ܐܲܩܠܵܬ̈ܘܼܗܝ. ܐܲܝܟܵܐ ܕܡܘܼܬܒܼܵܐ ܗ݇ܘܵܐ ܦܲܓܼܪܹܗ ܕܝܼܫܘܿܥ. ܘܐܲܡܪܝܼ ܐܸܠܵܗ̇: ܒܲܟܼܬܵܐ: ܩܵܡܘܼܕܝܼ ܝܘܲܬܝ ܒܟܼܵܝܵܐ؟ ܐܲܡܪܵܐ ܐܸܠܲܝܗܝ: ܕܫܩܸܠܗ݇ܘܿܢ ܠܡܵܪܝܼ. ܘܠܹܐ ܝܘܲܢܝ ܒܝܼܕܵܥܵܐ ܐܲܝܟܵܐ ܡܘܼܬܸܒܼܠܗ݇ܘܿܢ. ܐܵܗܵܐ ܐ݇ܡܸܪܵܗ̇. ܘܕܥܸܪܵܗ̇ ܠܒܵܬ݇ܪܵܐ، ܘܚܙܹܐܠܵܗ̇ ܠܝܼܫܘܿܥ ܕܟܸܠܝܵܐ. ܘܠܹܐ ܗ݇ܘܵܐ ܒܝܼܕܵܥܵܐ ܕܝܼܫܘܿܥ ܝܠܹܗ. ܐܵܡܸܪ ܐܸܠܵܗ̇ ܝܑܼܫܘܿܥ: ܒܲܟܼܬܵܐ: ܩܵܡܘܼܕܝܼ ܒܟܼܵܝܵܐ ܗ݇ܘܲܬܝ. ܘܠܡܵܢܝܼ ܒܥܵܝܵܐ ܝܘܲܬܝ؟ ܐܝܼܢܵܐ ܗ̇ܝ ܚܫܸܒܼܠܵܐ ܕܓܲܢܵܢܵܐ ܝܠܹܗ، ܘܐܲܡܪܵܐ ܐܸܠܹܗ: ܡܵܪܝܼ ܐܸܢ ܐܲܢ݇ܬ ܫܩܸܠܘܼܟܼ ܐܸܠܹܗ، ܐ݇ܡܘܿܪ ܐܸܠܝܼ ܐܲܝܟܵܐ ܡܘܼܬܸܒܼܠܘܼܟܼ. ܒܐܵܙܲܠ݇ܢܝ ܫܲܩܠܲܢܹܗ؟ ܐܵܡܸܪ ܐܸܠܵܗ̇ ܝܑܼܫܘܿܥ: ܡܲܪܝܲܡ. ܘܕܥܸܪܵܗ̇ ܘܐ݇ܡܸܪܵܗ̇ ܐܸܠܹܗ ܥܸܒܼܪܵܐܝܼܬ: ܪܲܒܘܼܠܝܼ. ܕܐܲܬܝܵܐ ܠܹܐܡܵܪܵܐ ܡܲܠܦܵܢܵܐ. ܐܵܡܸܪ ܐܸܠܵܗ̇ ܝܑܼܫܘܿܥ: ܠܵܐ ܩܲܪܒܸܢܵܬܝ ܐܸܠܝܼ. ܣܵܒܵܒ ܗܵܠܵܐ ܠܹܐ ܝܘܸܢ ܣܝܼܩܵܐ ܠܘܵܬ ܒܵܒܝܼ. ܐܝܼܢܵܐ ܙܹܠ݇ܝ ܠܘܵܬ ܐܲܚܘܿܢ̈ܘܵܬܝܼ، ܘܐ݇ܡܘܿܪܝ ܐܸܠܲܝܗܝ: ܒܹܣܵܠ݇ܩܵܐ ܝܘܸܢ ܠܘܵܬ ܒܵܒܝܼ ܘܒܵܒܵܘܟܼܘܿܢ، ܘܐܲܠܵܗܝܼ ܘܐܲܠܵܗܵܘܟܼܘܿܢ. ܗܿܝܓܵܗ̇ ܐ݇ܬܹܐܠܵܗ̇ ܡܲܪܝܲܡ ܡܲܓܼܕܠܵܝܬܵܐ. ܘܡܘܼܫܚܸܕܠܵܗ̇ ܠܬܲܠܡܝܼܕܹ̈ܐ ܕܚܙܹܐܠܵܗ̇ ܠܡܵܪܲܢ. ܘܕܐܲܢܹܐ ܐ݇ܡܸܪܹܗ ܐܸܠܵܗ̇.
♱♱♱♱♱♱♱♱♱