ܚܕܒܫܒܐ ܕܥܐܕܐ ܕܦܢܛܩܘ̈ܣܛܐ

 

ܡܲܦܩܵܢܵܐ ܝܛ؛ 1‐10 ܐܲܩܸܦ؛ ܟ؛ 18‐22

ܬܸܒ̣ܘ ܘܲܫܠܵܘ ܡܲܦܩܵܢܵܐ ܣܸܦܪܵܐ ܬܪܲܝܵܢܵܐ ܕܐܘܿܪܵܝܬܵܐ؛

ܐܲܚܲܝ̈ ܒܲܪܸܟ̣ܡܵܪܝ܀

 

ܒܝܲܪܚܵܐ ܕܬܠܵܬܵܐ ܡ̣ܢ ܒܵܬ݇ܪ ܦܠܵܛܬܵܐ ܕܒܢܲܝ̈ ܝܼܣܪܵܝܹܠ ܡ̣ܢ ܡܸܨܪܹܝܢ. ܒܐܵܗܵܐ ܝܵܘܡܵܐ ܐ݇ܬܹܐܠܗ݇ܘܿܢ ܠܒܲܪܝܼܵܐ ܕܣܝܼܢ؛ ܡܘܼܛܥܸܢܗ݇ܘܿܢ ܡ̣ܢ ܪܦܝܼܕܝܼܢ؛ ܘܐ݇ܬܹܐܠܗ݇ܘܿܢ ܠܒܲܪܝܼܵܐ ܕܣܝܼܢܲܝ؛ ܘܫܪܹܐܠܗ݇ܘܿܢ ܓܵܘ ܒܲܪܝܼܵܐ؛ ܘܫܪܹܐܠܹܗ ܝܼܣܪܵܝܹܠ ܬܵܡܵܐ ܒܲܪܩܘܼܒ̣ܠ ܛܘܼܪܵܐ܀ ܘܡܘܼܫܹܐ ܐ݇ܣܸܠ݇ܩܠܹܗ ܠܟܸܣ ܐܲܠܵܗܵܐ؛ ܘܩܪܹܐܠܹܗ ܐܸܠܹܗ ܐܲܠܵܗܵܐ ܡ̣ܢ ܛܘܼܪܵܐ؛ ܘܐ݇ܡܸܪܹܗ؛ ܗܵܕܟ̣ܵܐ ܐܵܡܪܸܬ̇ ܠܒܹܝܬ̣ ܝܲܥܩܘܿܒ̣ ܘܡܲܚܙܸܬ̇ ܠܒܢܲܝ̈ ܝܼܣܪܵܝܹܠ܀ ܐܲܚܬܘܿܢ ܚܙܹܐܠܵܘܟ̣ܘܿܢ ܡܸܢܕܝܼ ܕܥܒ̣ܸܕܠܝܼ ܠܡܸܨܪ̈ܵܝܹܐ؛ ܘܩܲܡ ܫܵܩܠܸܢܵܘܟ̣ܘܿܢ ܐܲܝܟܼ ܕܥܲܠ ܓܘܼܠܦܵܢܹ̈ܐ ܕܢܸܫܪܵܐ܀ ܘܩܲܡ ܡܲܝܬ݇ܝܸܢܘܟ̣ܘܿܢ ܠܟܸܣܠܝܼ܀ ܘܐܵܕܝܼܵܐ ܐܸܢ ܫܡܲܥܝܵܐ ܫܵܡܥܝܼܬܘܿܢ ܒܩܵܠܝܼ؛ ܘܢܵܛܪܝܼܬܘܿܢ ܩܵܘܠܝܼ؛ ܒܸܬ ܗܵܘܝܼܬܘܿܢ ܡܘܼܚܸܒܹ̈ܐ ܩܵܬܝܼ ܡ̣ܢ ܟܠܲܝܗ‌ܝ ܛܵܝܸܦܹ̈ܐ ܕܐܲܪܥܵܐ. ܣܵܒܵܒ ܕܝܼܝܼ ܝ݇ܠܵܗ̇ ܐܲܪܥܵܐ܀ ܘܐܲܚܬܘܿܢ ܒܸܬ ܗܵܘܝܼܬܘܿܢ ܐܸܠܝܼ ܡܲܠܟܘܼܬܵܐ؛ ܘܟܵܗܢܹ̈ܐ ܘܛܵܝܸܦܵܐ ܩܲܕܝܼܫܵܐ. ܐܲܢܹܐ ܚܲܒܪܹ̈ܐ ܐܵܡܪܸܬ̇ ܠܒܹܝܬ̣ ܝܼܣܪܵܝܹܠ܀ ܘܐ݇ܬܹܐܠܹܗ ܡܘܼܫܹܐ ܘܩܪܹܐܠܹܗ ܠܩܲܫܝܼܫܹ̈ܐ ܕܥܲܡܵܐ؛ ܘܐ݇ܡܸܪܹܗ ܩܵܕ݇ܡܲܝܗ‌ܝ ܟܠܲܝܗ‌ܝ ܐܲܢܹܐ ܚܲܒܪܹ̈ܐ ܕܦܘܼܩܸܕܠܹܗ ܡܵܪܝܵܐ܀ ܘܓ̰ܘܼܘܸܒܠܗ݇ܘܿܢ ܟܠܹܗ ܥܲܡܵܐ ܡܐܘܼܕܵܠܹܐ ܘܐ݇ܡܸܪܘܿܢ؛ ܟܠ ܡܸܢܕܝܼ ܕܐܵܡܸܪ ܡܵܪܝܵܐ ܒܸܬ ܥܵܒ̣ܕܲܚ. ܘܡܘܼܕܸܪܹܗ ܡܘܼܫܹܐ ܓ̰ܘܼܘܵܒܹܗ ܕܥܲܡܵܐ ܠܟܸܣ ܡܵܪܝܵܐ܀ ܘܐ݇ܡܸܪܹܗ ܡܵܪܝܵܐ ܠܡܘܼܫܹܐ. ܗܵܐ ܐܵܢܵܐ ܒܸܬ ܐܵܬܸܢ ܠܟܸܣܠܘܼܟܼ ܒܥܲܡܛܵܢܵܐ ܕܥܲܝܒ̣ܵܐ؛ ܩܵܐ ܕܫܵܡܥܝܼ ܥܲܡܵܐ ܐܝܼܡܲܢ ܕܗܲܡܙܘܼܡܹܐ ܝ݇ܘܸܢ ܥܲܡܘܼܟܼ؛ ܘܐܘܼܦ ܐܸܠܘܼܟܼ ܒܸܬ ܗܲܡܸܢܝܼ ܗܲܠ ܥܵܠܲܡ. ܘܡܘܼܕܸܥܠܹܗ ܡܘܼܫܹܐ ܚܲܒܪܹ̈ܐ ܕܥܲܡܵܐ ܩܵܕ݇ܡ ܡܵܪܝܵܐ܀ ܘܟܠܹܗ ܥܲܡܵܐ ܒܸܚܙܵܝܵܐ ܩܲܪ̈ܩܲܡܝܵܬܹܐ ܘܠܵܗܹ̈ܐ ܘܩܵܠܵܐ ܕܩܲܪ݇ܢܵܐ ܘܛܘܼܪܵܐ ܬܲܢܬܘܼܢܹܐ. ܘܚܙܹܐܠܗ݇ܘܿܢ ܥܲܡܵܐ ܘܙܕܝܼܥܠܗ݇ܘܿܢ ܘܟܠܹܐܠܗ݇ܘܿܢ ܡ̣ܢ ܪܸܚܩܵܐ܀ ܘܐ݇ܡܸܪܗ݇ܘܿܢ ܠܡܘܼܫܹܐ؛ ܐܲܢ݇ܬ̇ ܗܲܡܙܸܡ ܥܲܡܲܢ ܘܒܸܬ ܫܵܡܲܥܚ؛ ܘܠܵܐ ܗܲܡܙܸܡ ܥܲܡܲܢ ܐܲܠܵܗܵܐ ܕܠܵܐ ܡܵܝܬܲܚ܀ ܘܐ݇ܡܸܪܹܗ ܡܘܼܫܹܐ ܠܥܲܡܵܐ ܠܵܐ ܙܵܕܥܝܼܬܘܿܢ ܣܵܒܵܒ ܩܵܐ ܓ̰ܵܪܲܒܬܵܘܟ̣ܘܿܢ ܐ݇ܬܹܐܠܹܗ ܐܲܠܵܗܵܐ ܩܵܐ ܕܗܵܘܝܵܐ ܙܕܘܿܥܬܹܗ ܩܵܕ݇ܡ ܦܵܬܵܘܟ̣ܘܿܢ ܘܕܠܵܐ ܚܵܛܝܼܬܘܿܢ܀ ܘܟܠܹܐܠܗ݇ܘܿܢ ܥܲܡܵܐ ܡ̣ܢ ܪܸܚܩܵܐ ܘܡܘܼܫܹܐ ܩܘܼܪܒܸܢܹܗ ܠܟܸܣ ܥܢܵܢܵܐ ܕܝܼܗ݇ܘܵܐ ܬܵܡܵܐ ܐܲܠܵܗܵܐ܀

 

ܚ̣ܲܒ̣ܪܹܗ

 

ܦܪܲܟܣܝܼܣ ܒ؛ 1‐22

ܫܠܵܘ ܦܪܲܟܣܝܼܣ ܕܲܫܠܝܼܚܹ̈ܐ؛ ܐܲܚܲܝ̈ ܒܲܪܸܟ̣ܡܵܪܝ܀

 

ܘܟܲܕ ܬܘܼܡܸܡܠܗ݇ܘܿܢ ܝܵܘܡܵܢܹ̈ܐ ܕܦܲܢܛܹܩܘܿܣܛܹ̈ܐ. ܟܲܕ ܓ̰ܸܡܥܝܹܐ ܗ݇ܘܵܘ ܟܠܲܝܗ‌ܝ ܡܐܘܼܕܵܠܹܐ܀ ܡܸܢܫܸܠܬܵܢܹܐ ܗ݇ܘܹܐܠܹܗ ܚܲܕ݇ ܩܵܠܵܐ ܡ̣ܢ ܫܡܲܝܵܐ ܐܲܝܟܼ ܦܵܘܚܵܐ ܚܲܝܠܵܢܵܐ؛ ܘܦܸܫܠܹܗ ܡܸܠܝܵܐ ܟܠܹܗ ܗ̇ܘ ܒܲܝܬܵܐ ܕܝ݇ܬܝܼܒ̣ܹܐ ܗ݇ܘܵܘ ܓܵܘܹܗ܀ ܘܦܸܫܠܗ݇ܘܿܢ ܚܸܙܝܹܐ ܐܸܠܲܝܗ‌ܝ ܠܹܫܵܢܹ̈ܐ ܕܦܝܵܫܵܐ ܦܘܼܠܓ̣݇ܝܼܹܐ ܐܲܝܟܼ ܢܘܼܪܵܐ ܘܝ݇ܬܸܒ̣ܠܗ݇ܘܿܢ ܥܲܠ ܟܠ ܚܲܕ݇ ܡܸܢܲܝܗ‌ܝ؛ ܘܦܸܫܠܗ݇ܘܿܢ ܡܸܠܝܹܐ ܒܪܘܼܚܵܐ ܕܩܘܼܕܫܵܐ؛ ܘܫܘܼܪܹܐܠܗ݇ܘܿܢ ܠܗܲܡܙܘܼܡܹܐ ܒܠܹܫܵܢܹ̈ܐ ܦܪ̈ܝܼܫܹܐ ܐܲܝܟܼ ܕܗ̇ܘ ܡܸܢܕܝܼ ܕܪܘܼܚܵܐ ܝܵܗ݇ܒ̣ܸܠ ܗ݇ܘܵܐ ܠܗ݇ܘܿܢ ܠܗܲܡܙܘܼܡܹܐ܀ ܘܐܝܼܬ ܗ݇ܘܵܘ ܐ݇ܢܵܫܹ̈ܐ ܥܵܡܪ̈ܵܢܹܐ ܓܵܘ ܐܘܿܪܸܫܠܹܡ ܙܵܕܥܝܵܢܹ̈ܐ ܡ̣ܢ ܐܲܠܵܗܵܐ. ܝܗ݇ܘܼܕܵܝܹ̈ܐ ܡ̣ܢ ܟܠ ܛܵܝܸܦܹ̈ܐ ܬܚܘܿܬ ܫܡܲܝܵܐ܀ ܘܟܲܕ ܗ݇ܘܹܐܠܹܗ ܗ̇ܘ ܩܵܠܵܐ؛ ܓ̰ܡܝܼܥܠܹܗ ܟܠܹܗ ܛܵܝܸܦܵܐ ܘܫܓ̣ܸܫܠܹܗ؛ ܣܵܒܵܒ ܟܠ ܐ݇ܢܵܫܵܐ ܡܸܢܲܝܗ‌ܝ ܒܸܫܡܲܥܝܵܐ ܗ݇ܘܵܐ ܕܗܲܡܙܘܼܡܹܐ ܗ݇ܘܵܐ ܒܠܸܫܵܢܲܝܗ‌ܝ؛ ܚܓ̰ܝܼܠܹܐ ܗ݇ܘܵܘ ܟܠܲܝܗ‌ܝ ܘܥܵܓ̰ܘܿܒܹܐ؛ ܟܲܕ ܒܹܐܡܵܪܵܐ ܚܲܕ݇ ܠܗ̇ܘ ܐ݇ܚܹܪ݇ܢܵܐ؛ ܐܲܢܹܐ ܟܠܲܝܗ‌ܝ ܕܗܲܡܙܘܼܡܹܐ ܝ݇ܢܵܐ؛ ܓܠܝܼܠܵܝܹ̈ܐ ܝ݇ܢܵܐ܀ ܕܵܐܟ̣ܝܼ ܐܲܚܲܢܲܢ ܒܸܫܡܲܥܝܵܐ ܝ݇ܘܲܚ ܟܠ ܚܲܕ݇ ܡܸܢܲܢ ܠܹܫܵܢܵܐ ܕܓܵܢܹܗ ܕܒܝܼܹܗ ܗ݇ܘܝܼܹܐ ܝ݇ܘܲܚ܀ ܦܵܪ̈ܬܘܵܝܹܐ؛ ܘܡܵܕܵܝܹ̈ܐ؛ ܘܐܵܠܵܢܵܝܹ̈ܐ ܘܐܵܢܝܼ ܕܒܸܥܡܵܪܵܐ ܝ݇ܢܵܐ ܓܵܘ ܒܹܝܬ̣ ܢܵܗܪ̈ܝܼܢ؛ ܝܗ݇ܘܼܕܵܝܹ̈ܐ ܘܩܵܦܘܿܕܩܵܝܹ̈ܐ؛ ܘܕܡ̣ܢ ܐܲܬܪܵܐ ܕܦܘܿܢܛܘܿܣ ܘܕܐܵܣܝܼܵܐ܀ ܘܕܡ̣ܢ ܐܲܬܪܵܐ ܕܦܪܘܿܓ̣ܝܼܵܐ؛ ܘܕܦܲܡܦܸܘܠܝܼܵܐ؛ ܘܕܡܸܨܪܹܝܢ ܘܕܐܲܬܪ̈ܵܘܵܬܹܐ ܕܠܘܼܒܹܐ ܕܩܘܼܪܒܵܐ ܝ݇ܢܵܐ ܠܩܸܘܪܝܼܢܹܐ؛ ܘܐܵܢܝܼ ܕܐ݇ܬܹܐܠܗ݇ܘܿܢ ܡ̣ܢ ܪܗ݇ܘܿܡܹܐ؛ ܝܗ݇ܘܼܕܵܝܹ̈ܐ ܘܓܝܼܘܿܪܹ̈ܐ܀ ܘܕܡ̣ܢ ܩܪܹܛܹܐ ܘܥܵܪ̈ܵܒܵܝܹܐ؛ ܗܵܐ ܒܸܫܡܲܥܝܵܐ ܝ݇ܘܲܚ ܕܗܲܡܙܘܼܡܹܐ ܝ݇ܢܵܐ ܒܠܸܫܵܢܹ̈ܐ ܕܝܼܲܢ ܥܵܓ̰ܝܼܒܘܼܝܵܬܹ̈ܐ ܕܐܲܠܵܗܵܐ܀ ܥܓ̰ܝܼܒܹܐ ܗ݇ܘܵܘ ܟܠܲܝܗ‌ܝ ܘܚܓ̰ܝܼܠܹܐ ܟܲܕ ܒܹܐܡܵܪܵܐ ܚܲܕ݇ ܠܗ̇ܘ ܐ݇ܚܹܪ݇ܢܵܐ؛ ܐܵܗܵܐ ܫܘܼܠܵܐ ܡܘܼܕܝܼ ܝ݇ܠܹܗ؛ ܘܚܲܕ݇ܟܡܵܐ ܐ݇ܚܹܪ̈݇ܢܹܐ ܡܲܣܚܸܪܝܼ ܗ݇ܘܵܘ ܒܝܼܲܝܗ‌ܝ ܘܐܵܡܪܝܼ؛ ܕܐܲܢܹܐ ܚܲܡܪܵܐ ܝ݇ܢܵܐ ܫܸܬܝܹܐ ܘܪܸܘܝܹܐ܀ ܘܡ̣ܢ ܒܵܬ݇ܪ ܗܵܕܵܐ ܩܸܡܠܹܗ ܫܸܡܥܘܿܢ ܟܹܐܦܵܐ ܥܲܡ ܚܲܕܸܥܣܲܪ ܫܠܝܼܚܹ̈ܐ؛ ܘܡܘܼܪܸܡܠܹܗ ܩܵܠܹܗ ܘܐ݇ܡܸܪܹܗ ܐܸܠܲܝܗ‌ܝ؛ ܝܵܐ ܐ݇ܢܵܫܹ̈ܐ ܝܗ݇ܘܼܕܵܝܹ̈ܐ؛ ܘܟܠܲܝܗ‌ܝ ܐܵܢܝܼ ܕܒܸܥܡܵܪܵܐ ܝ݇ܢܵܐ ܒܐܘܿܪܸܫܠܹܡ. ܐܵܗܵܐ ܦܵܝܫܵܐ ܝ݇ܕܝܼܥܬܵܐ ܐܸܠܵܘܟ̣ܘܿܢ ܡܲܨܝܸܬܘܿܢ ܗܹܡܲܙܡܵܢ̈ܝܼ؛ ܠܹܐ ܝ݇ܠܵܗ̇ ܐܲܝܟܼ ܕܐܲܚܬܘܿܢ ܒܲܚܫܵܒ̣ܵܐ ܝ݇ܬܘܿܢ ܕܐܲܢܹܐ ܪ̈ܵܘܵܝܹܐ ܝ݇ܢܵܐ. ܗܵܐ ܗܲܠ ܐܵܕܝܼܵܐ ܬܠܵܬܵܐ ܣܵܥܲܬܹ̈ܐ ܝ݇ܢܵܐ. ܐܸܠܵܐ ܐܵܗܵܐ ܝ݇ܠܵܗ̇ ܕܦܝܼܫܬܵܐ ܝ݇ܠܵܗ̇ ܐ݇ܡܝܼܪܬܵܐ ܒܝܘܼܐܹܝܠ ܢܒ̣ܝܼܵܐ܀ ܒܸܬ ܗܵܘܹܐ ܒܝܵܘܡܵܢܹ̈ܐ ܐ݇ܚܵܪ̈ܵܝܹܐ ܒܹܐܡܵܪܵܐ ܝ݇ܠܹܗ ܐܲܠܵܗܵܐ. ܒܸܬ ܬܲܦܚܸܢ ܪܘܼܚܝܼ ܥܲܠ ܟܠ ܒܸܣܪܵܐ؛ ܘܒܸܬ ܢܵܒܝܼ ܒܢܘܿܢ̈ܵܘܟ̣ܘܿܢ ܘܒܢܵܬܵܘ̈ܟ̣ܘܿܢ؛ ܘܓ̰ܘܲܢ̈ܩܵܘܟ̣ܘܿܢ ܚܸܙܘܹ̈ܐ ܒܸܬ ܚܵܙܝܼ؛ ܘܚܘܲܪ̈ܕܸܩܢܵܘܟ̣ܘܿܢ ܚܸܠܡܹ̈ܐ ܒܸܬ ܚܵܠܡܝܼ܀ ܘܥܲܠ ܪܹ̈ܓܵܘܵܬܝܼ ܘܚܸܕܲܡܝܵܬ̈ܝܼ ܒܸܬ ܬܲܦܚܸܢ ܪܘܼܚܝܼ ܒܐܵܢܝܼ ܝܵܘܡܵܢܹ̈ܐ ܘܒܸܬ ܢܵܒܝܼ܀ ܘܒܸܬ ܝܵܗ݇ܒ̣ܸܢ ܢܝܼܫܲܢܩܹ̈ܐ ܒܫܡܲܝܵܐ؛ ܘܥܵܓ̰ܝܼܒܘܼܝܵܬܹ̈ܐ ܥܲܠ ܐܲܪܥܵܐ؛ ܕܸܡܵܐ ܘܢܘܼܪܵܐ ܘܗܵܘܓܵܐ ܕܬܸܢܢܵܐ܀ ܫܸܡܫܵܐ ܒܸܬ ܦܵܐܹܫ ܫܘܼܚܠܸܦܵܐ ܒܥܲܡܛܵܢܵܐ ܘܣܲܗܪܵܐ ܒܕܸܡܵܐ. ܡ̣ܢ ܩܵܕ݇ܡ ܕܐܵܬܹܗ ܝܵܘܡܹܗ ܕܡܵܪܝܵܐܓܘܼܪܵܐ ܘܡܲܙܕܸܥܝܵܢܵܐ܀ ܘܒܸܬ ܗܵܘܹܐ ܟܠ ܕܩܵܪܹܐ ܫܸܡܹܗ ܕܡܵܪܝܵܐ ܒܸܬ ܚܵܝܹܐ܀

 

♱♱♱♱♱♱♱♱

 

 

ܚܕܒܫܒܐ ܕܥܐܕܐ ܕܦܢܛܩܘܣܛܐ

 

ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ ܕܲܠܘܵܬܼ ܩܘܼܪ̈ܲܢܬܵܝܹܐ ܐܲܚܲܝ̈ ܒܵܪܸܟܼܡܵܪܝ܀

1 Corinthians 12:1‐27

 

ܐܝܼܢܵܐ ܒܲܗܣ ܕܡܸܢܕܝܼܵܢܹ̈ܐ ܪ̈ܘܼܚܵܢܵܝܸܐ ܒܵܥܝܸܢ ܕܝܵܕܥܝܼܬܘܿܢ؛ ܕܚܲܢܦܹ̈ܐ ܝ݇ܬܘܿܢ ܗ݇ܘ̣ܵܘ؛ ܘܠܣܵܢܲܡܹ̈ܐ ܐܵܢܝܼ ܕܠܲܝܬ ܠܗ݇ܘܿܢ ܩܵܠܵܐ ܘܠܵܐ ܦܲܪܡܵܝܬܵܐ ܬܲܓܒܘܼܪܹܐ ܝ݇ܬܘܿܢ ܗ݇ܘ̣ܵܘ* ܒܘܼܬ ܕܐܵܗܵܐ؛ ܡܲܕܘܼܥܝܹܐ ܝ݇ܘܸܢ ܐܸܠܵܘܟܼܘܿܢ ܕܠܲܝܬ ܚܲܕ ܐ݇ܢܵܫܵܐ ܕܒܪܘܼܚܵܐ ܗܲܡܙܸܡ ܘܐܵܡܸܪ ܕܡܘܼܚܪܸܡܵܐ ܝ݇ܠܹܗ ܝܼܫܘܿܥ ܘܐܘܼܦ ܠܵܐ ܡܵܨܹܐ ܕܐܵܡܸܪ ܕܡܵܪܝܵܐ ܝ݇ܠܹܗ؛ ܐܸܠܵܐ ܐܸܢ ܒܪܘܼܚܵܐ ܕܩܘܼܕܫܵܐ* ܐܝܼܬ ܦܲܠܵܓ݇ܝܵܬܹ̈ܐ ܕܚܲܠܥܲܬܹ̈ܐ. ܐܝܼܢܵܐ ܪܘܼܚܵܐ ܚܲܕ݇ ܝܼܠܹܗ* ܐܝܼܬ ܦܲܠܵܓ݇ܝܵܬܹ̈ܐ ܕܚܸܠܡܲܬܹ̈ܐ ܐܝܼܢܵܐ ܡܵܪܝܵܐ ܚܲܕ݇ ܝܼܠܹܗ؛ ܐܝܼܬ ܦܲܠܵܓ݇ܝܵܬܹ̈ܐ ܕܚܲܝܠܵܘܵܬܹ̈ܐ ܐܝܼܢܵܐ ܐܲܠܵܗܵܐ ܚܲܕ݇ ܝܼܠܹܗ ܕܡܲܥܒܸܕ ܟܠ ܡܸܢܕܝܼ ܒܟܠ ܐ݇ܢܵܫܵܐ* ܐܝܼܢܵܐ ܩܵܐ ܟܠ ܐ݇ܢܵܫܵܐ ܦܝܼܫܵܐ ܝ݇ܠܹܗ ܝܘܼܗܒܼܵܐ ܓܸܠܝܵܢܵܐ ܕܪܘܼܚܵܐ ܐܲܝܟܼ ܕܠܵܙܸܡ ܝܼܠܵܗ̇ ܩܵܬܹܗ* ܐܝܼܬ ܕܦܝܼܫܬܵܐ ܝ݇ܠܵܗ̇ ܝܘܼܗܒܸܠܬܵܐ ܐܸܠܹܗ ܒܪܘܼܚܵܐ ܗܹܡܸܙܡܲܢ ܕܚܸܟܼܡܬܵܐ؛ ܘܩܵܐ ܚܲܕ݇ ܐ݇ܚܹܪ݇ܢܵܐ ܗܹܡܸܙܡܲܢ ܕܝ݇ܕܵܥܝܬܵܐ ܗܲܪ ܒܗ̇ܝܼ ܪܘܼܚܵܐ. ܘܩܵܐ ܕܗ̇ܘ ܐ݇ܚܹܪ݇ܢܵܐ ܗܲܝܡܵܢܘܼܬܵܐ؛ ܘܩܵܐ ܐ݇ܚܹܪ݇ܢܵܐ ܚܲܠܥܲܬܹ̈ܐ ܕܒܵܣܲܡܬܵܐ ܘܩܵܐ ܐ݇ܚܹܪ݇ܢܵܐ ܚܲܝܠܹ̈ܐ؛ ܘܩܵܐ ܚܲܕ݇ ܐ݇ܚܹܪ݇ܢܵܐ ܢܒܼܝܼܘܼܬܵܐ؛ ܘܩܵܐ ܐ݇ܚܹܪ݇ܢܵܐ ܦܲܪܡܵܝܬܵܐ ܕܪܘܼܚܵܐ؛ ܘܩܵܐ ܐ݇ܚܹܪ݇ܢܵܐ ܬܵܗܵܪܹ̈ܐ ܕܠܸܫܵܟܹ̈ܐ ܘܩܵܐ ܕܗ̇ܘ ܐ݇ܚܹܪ݇ܢܵܐ ܦܘܼܫܵܩܵܐ ܕܠܸܫܵܢܹ̈ܐ* ܐܲܢܹܐ ܟܠܲܝܗܝ ܚܕܵܐ ܪܘܼܚܵܐ ܝ݇ܠܵܗ̇ ܒܸܦܠܵܚܵܐ؛ ܘܦܲܓ݇ܘܼܝܸܐ ܩܵܐ ܟܠ ܐ݇ܢܵܫܵܐ ܐܲܝܟܼ ܕܗ̇ܝ ܒܵܥܝܵܐ* ܗܲܪ ܐܲܝܟܼ ܕܚܲܕ݇ ܦܲܓܼܪܵܐ ܝ݇ܠܹܗ ܘܐܝܼܬ ܓܵܘܹܗ ܪܵܒܵܐ ܗܲܕܵܡܹ̈ܐ. ܘܟܠܲܝܗܝ ܗܲܕܵܡܹ̈ܐ ܕܦܲܓܼܪܵܐ ܐܵܦܸܢ ܕܪܵܒܵܐ ܝ݇ܢܵܐ؛ ܐܝܼܢܵܐ ܚܲܕ݇ ܦܲܓܼܪܵܐ ܝ݇ܢܵܐ؛ ܗܲܕܟܼܵܐ ܐܵܦ ܡܫܝܼܚܵܐ* ܣܵܒܵܒ ܐܵܦ ܐܲܚܢܲܢ ܟܠܲܢ ܒܚܕܵܐ ܪܘܼܚܵܐ ܠܚܲܕ݇ ܦܲܓܼܪܵܐ ܥܡܸܕܠܲܢ؛ ܐܸܢ ܝܗܘܼܕܵܝܹ̈ܐ ܘܐܸܢ ܐܲܪ̈ܡܵܝܹܐ؛ ܐܸܢ ܪܹ̈ܐܓܵܘܵܬܹܐ ܘܐܸܢ ܒܢܲܝ̈ ܚܹܐܪܹ̈ܐ. ܘܟܠܲܢ ܚܕܵܐ ܪܘܼܚܵܐ ܫܬܹܐܠܲܢ* ܣܵܒܵܒ ܐܵܦ ܦܲܓܼܪܵܐ ܠܹܐ ܝ݇ܠܹܗ ܚܲܕ݇ ܗܲܕܵܡܵܐ ܐܸܠܵܐ ܪܵܒܵܐ* ܐܸܢ ܐܵܡܪܵܐ ܐܲܩܠܵܐ ܡ̣ܢ ܣܵܒܵܒ ܕܠܹܐ ܝ݇ܘܲܢܝ ܐܝܼܕܵܐ؛ ܠܹܐ ܝ݇ܘܲܢܝ ܡ̣ܢ ܦܲܓܼܪܵܐ. ܠܵܐ ܡ̣ܢ ܕܐܵܗܵܐ ܣܵܒܵܒ ܠܹܐ ܝ݇ܠܵܗ̇ ܡ̣ܢ ܦܲܓܼܪܵܐ. ܘܐܸܢ ܐܵܡܪܵܐ ܢܵܬܵܐ. ܡ̣ܢ ܣܵܒܵܒ ܕܠܹܐ ܝ݇ܘܲܢܝ ܥܲܝܢܵܐ؛ ܠܹܐ ܝ݇ܘܲܢܝ ܡ̣ܢ ܦܲܓܼܪܵܐ. ܠܵܐ ܡ̣ܢ ܕܐܵܗܵܐ ܣܵܒܵܒ ܠܹܐ ܝ݇ܠܵܗ̇ ܡ̣ܢ ܦܲܓܼܪܵܐ* ܣܵܒܵܒ ܐܸܢ ܟܠܹܗ ܦܲܓܼܪܵܐ ܗܵܘܹܐ ܗ݇ܘ̣ܵܐ ܥܲܝܢܹ̈ܐ؛ ܐܲܝܟܵܐ ܒܸܕ ܗܵܘܝܵܐ ܗ݇ܘ̣ܵܐ ܢܵܬܵܐ. ܘܐܸܢ ܟܠܹܗ ܗܵܘܹܐ ܗ݇ܘ̣ܵܐ ܢܵܬܵܐ. ܕܵܐܟܼܝܼ ܒܸܕ ܫܵܩܸܠ ܗ݇ܘ̣ܵܐ ܪܹܝܚܵܐ* ܐܝܼܢܵܐ ܐܵܕܝܼܵܐ ܐܲܠܵܗܵܐ ܡܘܼܬܸܒܼܠܹܗ ܟܠ ܚܲܕ݇ ܡ̣ܢ ܗܲܕܵܡܹ̈ܐ ܓܵܘ ܦܲܓܼܪܵܐ ܐܲܝܟܼ ܕܗ̇ܘ ܒܣܸܡܠܵܐ ܠܹܗ* ܐܸܢ ܟܠܲܝܗܝ ܗܵܘܝܼ ܗ݇ܘ̣ܵܘ ܚܲܕ݇ ܗܲܕܵܡܵܐ ܐܲܝܟܵܐ ܗ݇ܘ̣ܵܐ ܦܲܓܼܪܵܐ* ܐܵܕܝܼܵܐ ܗܲܕܵܡܹ̈ܐ ܪܵܒܵܐ ܝ݇ܢܵܐ؛ ܐܝܼܢܵܐ ܚܲܕ݇ ܦܲܓܼܪܵܐ ܝ݇ܠܹܗ* ܠܹܐ ܡܵܨܝܵܐ ܥܲܝܢܵܐ ܕܐܵܡܪܵܐ ܩܵܐ ܐܝܼܕܵܐ ܕܠܹܐ ܝ݇ܘܲܬܝ ܠܵܙܸܡ ܩܵܬܝܼ؛ ܘܐܘܼܦ ܠܵܐ ܪܹܫܵܐ ܡܵܨܹܐ ܕܐܵܡܸܪ ܩܵܐ ܐܲܩܠܵܬܹ̈ܐ ܕܠܹܐ ܒܵܥܝܸܢܵܘܟܼܘܿܢ* ܐܸܠܵܐ ܒܘܼܫ ܙܵܘܕܵܐ ܐܵܢܝܼ ܗܲܕܵܡܹ̈ܐ ܕܦܝܼܫܹܐ ܝ݇ܢܵܐ ܚܫܝܼܒܹܐ ܙܲܒܘܼܢܹ̈ܐ؛ ܥܲܠܲܝܗܝ ܝ݇ܠܵܗ̇ ܣܢܝܼܩܘܼܬܵܐ ܘܐܵܢܝܼ ܕܦܝܼܫܹܐ ܝ݇ܢܵܐ ܚܫܝܼܒܹܐ ܒܘܼܫ ܒܵܨܘܿܪܹ̈ܐ ܒܦܲܓܼܪܵܐ؛ ܩܵܐ ܕܐܲܢܹܐ ܐܝܼܩܵܪܵܐ ܒܘܼܫ ܙܵܘܕܵܐ ܟܹܐ ܡܲܙܝܸܕܲܚ. ܘܐܵܢܝܼ ܕܐܵܕܵܒܘܼܬܵܐ ܝ݇ܢܵܐ؛ ܐܸܣܟܹܝܡܵܐ ܒܘܼܫ ܙܵܘܕܵܐ ܥܵܒܼܕܲܚ ܠܗ݇ܘܿܢ ܘܐܵܢܝܼ ܗܲܕܵܡܹ̈ܐ ܕܐܝܼܬ ܡܝܘܼܩܪܹ̈ܐ ܓܵܘܲܢ؛ ܠܹܐ ܝ݇ܠܹܗ ܠܵܙܸܡ ܩܵܬܲܝܗܝ ܐܝܼܩܵܪܵܐ؛ ܣܵܒܵܒ ܐܲܠܵܗܵܐ ܡܙܸܓܼܠܹܗ ܠܦܲܓܼܪܵܐ؛ ܘܝܘܼܗܒܸܠܹܗ ܐܝܼܩܵܪܵܐ ܒܘܼܫ ܙܵܘܕܵܐ ܩܵܐ ܕܗ̇ܘ ܗܲܕܵܡܵܐ ܕܝܼܠܹܗ ܒܘܼܫ ܙܥܘܿܪܵܐ* ܕܠܵܐ ܗܵܘܹܐ ܦܘܼܠܵܓܼܵܐ ܓܵܘ ܦܲܓܼܪܵܐ. ܐܝܼܢܵܐ ܕܟܠܲܝܗܝ ܗܲܕܵܡܹ̈ܐ ܒܵܪܵܒܵܪ ܚܲܕ݇ ܕܗ̇ܘ ܐ݇ܚܹܪ݇ܢܵܐ ܗܵܘܝܼ ܒܹܐܟܼܵܠܵܐ ܚܲܡ* ܕܐܝܼܡܲܢ ܕܚܲܕ݇ ܗܲܕܵܡܵܐ ܗܵܘܹܐ ܡܸܪܥܝܵܐ؛ ܟܠܲܝܗܝ ܗܵܘܝܼ ܚܲܫܵܢܹ̈ܐ. ܘܐܸܢ ܚܲܕ݇ ܗܲܕܵܡܵܐ ܦܵܐܸܫ ܚܩܝܼܪܵܐ؛ ܟܠܲܝܗܝ ܗܲܕܵܡܹ̈ܐ ܐ݇ܚܹܪ݇ܢܹܐ ܚܵܕܝܼ ܥܲܡܹܗ* ܐܝܼܢܵܐ ܐܲܚܬܘܿܢ ܝܼܬܘܿܢ ܦܲܓܼܪܹܗ ܕܡܫܝܼܚܵܐ ܘܗܲܕܵܡܹ̈ܐ ܒܕܘܼܟܬܵܟܼܘܿܢ*

 

♱♱♱♱♱♱♱♱

 

 

ܚܕܒܫܒܐ ܕܥܐܕܐ ܕܦܢܛܩܘܣܛܐ

 

ܝܘܚܢܢ ܝܕ؛ 15‐18، 25‐27 ܝܗ؛26‐ܝܘ؛16

ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ ܟܪܘܙܘܬܼܐ ܕܠܘܩܐ.

 

ܘܐ݇ܡܸܪܹܗ ܝܼܫܘܿܥ ܠܬܲܠܡܝܼ̈ܕܘܼܗܝ؛ ܐܸܢ ܡܲܚܸܒܝܼܬܘܿܢ ܠܝܼ، ܦܘܼܩ̈ܕܵܢܝܼ ܢܛܘܼܪܘܿܢ. ܘܐܵܢܵܐ ܒܸܬ ܛܲܠܒܸܢ ܡ̣ܢ ܒܵܒܝܼ، ܘܐ݇ܚܹܪ݇ܢܵܐ ܦܵܪܲܩܠܹܝܛܵܐ ܒܸܬ ܝܲܗ݇ܒܼܸܠܵܘܟܼܘܿܢ. ܕܗܵܘܹܐ ܥܲܡܵܘܟܼܘܿܢ ܠܥܵܠܲܡ. ܪܘܼܚܵܐ ܕܫܪܵܪܵܐ ܗ̇ܘ ܕܥܵܠܡܵܐ ܠܹܐ ܡܵܨܹܐ ܠܩܵܒܲܠܬܹܗ، ܣܵܒܵܒ ܕܠܹܐ ܝܠܹܗ ܚܸܙܝܘܼܗܝ ܘܠܹܐ ܝܵܕܸܥܠܹܗ. ܐܝܼܢܵܐ ܐܲܚܬܘܿܢ ܝܲܕܥܝܼܬܘܿܢ ܠܹܗ. ܕܠܟܸܣܠܵܘܟܼܘܿܢ ܒܸܥܡܵܪܵܐ ܝܠܹܗ ܘܒܝܼܵܘܟܼܘܿܢ ܝܠܹܗ. ܐܲܢܹܐ ܗܘܼܡܙܸܡܠܝܼ ܥܲܡܵܘܟܼܘܿܢ ܟܲܕ ܠܟܸܣܠܵܘܟܼܘܿܢ ܝܘܸܢ. ܐܝܼܢܵܐ ܐܵܗܵܐ ܦܵܪܲܩܠܹܝܛܵܐ ܪܘܼܚܵܐ ܕܩܘܼܕܫܵܐ، ܗ̇ܘ ܕܡܫܵܕܸܪ ܒܵܒܝܼ ܒܫܸܡܝܼ. ܗ̇ܘ ܒܸܬ ܡܵܠܸܦܠܵܘܟܼܘܿܢ ܟܠ ܡܸܢܕܝܼ. ܘܗ̇ܘ ܒܸܬ ܡܲܕܟܼܸܪܵܘܟܼܘܿܢ ܟܠ ܡܸܢܕܝܼ ܕܒܹܐܡܵܪܵܐ ܝܘܸܢ ܐܸܠܵܘܟܼܘܿܢ. ܐܝܼܢܵܐ ܐܝܼܡܵܢ ܕܐ݇ܬܹܐܠܹܗ ܦܵܪܲܩܠܹܝܛܵܐ ܗ̇ܘ ܕܐܵܢܵܐ ܒܸܬ ܡܫܲܕܪܸܢܹܗ ܐܸܠܵܘܟܼܘܿܢ ܡ̣ܢ ܠܘܵܬ ܒܵܒܝܼ، ܪܘܼܚܵܐ ܕܫܪܵܪܵܐ، ܗ̇ܘ ܕܡ̣ܢ ܠܘܵܬ ܒܵܒܝܼ ܟܹܐ ܦܵܠܸܛ. ܗ̇ܘ ܒܸܬ ܣܵܗܸܕ ܥܲܠܝܼ. ܐܘܿܦ ܐܲܚܬܘܿܢ ܒܸܬ ܣܵܗܕܝܼܬܘܿܢ. ܕܡ̣ܢ ܫܘܼܪܵܝܵܐ ܥܲܡܝܼ ܝܬܘܿܢ. ܐܲܢܹܐ ܗܘܼܡܙܸܡܠܝܼ ܥܲܡܵܘܟܼܘܿܢ ܕܠܵܐ ܟܵܦܪܝܼܬܘܿܢ. ܣܵܒܵܒ ܒܸܬ ܦܲܠܛܝܼܠܵܘܟܼܘܿܢ ܡ̣ܢ ܟܢܘܼܫܝܵܬܲܝ̈ܗܝ. ܘܒܸܬ ܐܲܬܝܵܐ ܣܵܥܵܬ ܕܟܠ ܕܩܵܛܸܠܵܘܟܼܘܿܢ، ܒܸܬ ܚܵܫܸܒܼ ܕܩܘܼܪܒܵܢܵܐ ܡܲܩܪܘܼܒܼܹܐ ܝܠܹܗ ܠܐܲܠܵܗܵܐ. ܘܐܲܢܹܐ ܒܸܬ ܥܲܒܼܕܝܼ  ܣܵܒܵܒ  ܕܠܵܐ ܠܒܵܒܝܼ ܝܕܸܥܠܗ݇ܘܿܢ، ܘܠܵܐ ܐܸܠܝܼ. ܐܲܢܹܐ ܗܘܼܡܙܸܡܠܝܼ ܥܲܡܵܘܟܼܘܿܢ ܕܐܝܼܡܵܢ ܕܐ݇ܬܹܐܠܵܗ̇ ܥܸܕܵܢܲܝܗܝ، ܕܲܟܼܪܝܼܬܘܿܢ ܠܗ݇ܘܿܢ ܕܐܵܢܵܐ ܐ݇ܡܸܪܝܼ ܐܸܠܵܘܟܼܘܿܢ. ܐܝܼܢܵܐ ܐܲܢܹܐ ܡ̣ܢ ܩܲܕ݇ܡܵܝܬܵܐ ܠܵܐ ܐ݇ܡܸܪܝܼ ܐܸܠܵܘܟܼܘܿܢ. ܕܥܲܡܵܘܟܼܘܿܢ ܝܘܸܢ ܗ݇ܘܵܐ. ܐܝܼܢܵܐ ܐܵܕܝܼܵܐ ܒܹܐܙܵܠܵܐ ܝܘܸܢ ܠܘܵܬ ܡ̇ܢ ܕܫܘܼܕܪܸܢܹܗ. ܘܐ݇ܢܵܫܵܐ ܡܸܢܵܘܟܼܘܿܢ ܠܹܐ ܝܠܹܗ ܒܵܩܘܼܪܝܼ؛ ܠܐܲܝܟܵܐ ܒܹܐܙܵܠܵܐ ܝܘܸܬ؟ ܣܵܒܵܒ ܐ݇ܡܸܪܝܼ ܐܸܠܵܘܟܼܘܿܢ ܐܲܢܹܐ. ܘܐ݇ܬܹܐܠܵܗ̇ ܦܵܫܲܡܬܵܐ ܘܡܠܹܐܠܵܗ̇ ܠܸܒܵܘܵܬܵܘ̈ܟܼܘܿܢ. ܐܸܠܵܐ ܐܵܢܵܐ ܫܪܵܪܵܐ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ؛ ܕܨܦܵܝܝܼ ܝܠܵܗ̇ ܐܸܠܵܘܟܼܘܿܢ ܕܐܵܢܵܐ ܐܵܙܸܠ݇ܢ. ܣܵܒܵܒ ܐܸܢ ܐܵܢܵܐ ܠܵܐ ܐܵܙܸܠ݇ܢ، ܦܵܪܲܩܠܹܝܛܵܐ ܠܹܐ ܐܵܬܹܐ ܠܟܸܣܠܵܘܟܼܘܿܢ. ܐܝܼܢܵܐ ܐܸܢ ܐܵܙܸܠ݇ܢ ܒܸܬ ܫܲܕܪܸܢܹܗ ܠܟܸܣܠܵܘܟܼܘܿܢ. ܘܐܝܼܡܵܢ ܕܐ݇ܬܹܐܠܹܗ، ܗ̇ܘ ܒܸܬ ܡܲܢܟܼܸܣ ܠܥܵܠܡܵܐ ܥܲܠ ܚܛܝܼܬܵܐ، ܘܥܲܠ ܙܲܕܝܼܩܘܼܬܵܐ. ܘܥܲܠ ܕܝܼܢܵܐ. ܥܲܠ ܚܛܝܼܬܵܐ؛ ܕܠܹܐ ܝܢܵܐ ܡܗܲܝܡܘܼܢܹܐ ܒܝܼܝܼ. ܐܝܼܢܵܐ ܥܲܠ ܙܲܕܝܼܩܘܼܬܵܐ، ܕܠܘܵܬ ܒܵܒܝܼ ܒܹܐܙܵܠܵܐ ܝܘܸܢ. ܘܡܸܢ݇ܕܪܹܫ݇ ܠܹܐ ܚܵܙܝܼܬܘܿܢ ܠܝܼ. ܐܝܼܢܵܐ ܥܲܠ ܕܝܼܘܵܢ. ܕܐܲܪܟܘܼܢܵܐ ܕܐܵܗܵܐ ܥܵܠܡܵܐ ܦܝܼܫܠܹܗ ܕܝܼܢܵܐ. ܡܸܢ݇ܕܪܹܫ݇ ܪܵܒܵܐ ܐܝܼܬܠܝܼ ܠܹܐܡܵܪܵܐ ܐܸܠܵܘܟܼܘܿܢ. ܐܸܠܵܐ ܠܹܐ ܡܵܨܝܼܬܘܿܢ ܠܸܕܒܼܵܩܵܐ ܐܵܕܝܼܵܐ. ܐܝܼܢܵܐ ܐܝܼܡܵܢ ܕܐ݇ܬܹܐܠܹܗ ܪܘܼܚܵܐ ܕܫܪܵܪܵܐ، ܗ̇ܘ ܒܸܬ ܕܵܒܸܪܵܘܟܼܘܿܢ ܒܟܠܹܗ ܫܪܵܪܵܐ. ܣܵܒܵܒ ܠܹܐ ܗܲܡܙܸܡ ܡ̣ܢ ܪܸܥܝܵܢܵܐ ܕܓܵܢܹܗ. ܐܸܠܵܐ ܟܠ ܕܫܵܡܸܥ ܗ̇ܘ ܒܸܬ ܗܲܡܙܸܡ. ܘܡܸܢܕܝܼܵܢܹ̈ܐ ܕܲܥܬܝܼܕ ܗ̇ܘ ܒܸܬ ܡܲܕܸܥܠܵܘܟܼܘܿܢ. ܘܗ̇ܘ ܒܸܬ ܫܵܒܸܚܠܝܼ. ܣܵܒܵܒ ܡ̣ܢ ܕܝܼܠ݇ܝܼ ܒܸܬ ܫܵܩܸܠ ܘܡܲܚܙܹܐ ܐܸܠܵܘܟܼܘܿܢ. ܟܠ ܡܸܢܕܝܼ ܕܐܝܼܬ ܠܒܵܒܝܼ  ܕܝܼܠ݇ܝܼ ܝܠܹܗ. ܒܘܼܬ  ܕܐܵܗܵܐ ܐ݇ܡܸܪܝܼ ܐܸܠܵܘܟܼܘܿܢ؛ ܕܡ̣ܢ ܕܝܼܠ݇ܝܼ ܒܸܬ ܫܵܩܸܠ ܘܡܲܚܙܹܐ ܐܸܠܵܘܟܼܘܢ.

 

♱♱♱♱♱♱♱♱♱