ܡܲܪܡܝܼܬܼܵܐ ܕܐ݇ܪ̈ܵܙܹܐ؛ ܐܹܪܲܡ̱ܪܡܵܟܼ ܡܵܪܝ ܡܲܠܟܵܐ. ܥܲܕܼ ܠܲܫܟ̣ܵܚܬܵܐ܀
ܐܲܩܲܦܬܵܐ؛ ܐܵܘܕܸ̇ܐ ܠܵܟܼ ܒܥܹܕ̇ܬܵܐ ܪܲܒ̇ܬܼܵܐ܀
ܥܘܼܢܵܝܵܐ. ܘܲܒ̣ܥܲܡܡܹ̈ܐ ܣܲܓܝܼܐܹ̈ܐ ܐܹܙܲܡܲܪ ܠܵܟܼ܀
ܕܩܲܢܟܹ̇ܐ؛ ܒܣܵܗ̈ܕܵܘܗܝ ܕܲܒ̣ܪܵܐ.
ܬܵܘ ܢܫܲܒܲܚ ܠܡܵܪܝܵܐ. ܘܲܒ̣ܩܵܠܵܐ ܕܩܲܪ̈ܢܵܬܼܵܐ ܫܲܒܲܚܘ ܩܕܼܵܡ ܡܲܠܟܵܐ ܡܵܪܝܵܐ. ܒܩܵܠܵܐ ܪܵܡܵܐ ܕܬܸܫܒ̇ܘܿܚܬܵܐ. ܢܫܲܒܲܚ ܟܠܲܢ ܠܒܼܵܪܘܿܝܵܐ. ܚܲܝܠܵܐ ܪܲܒܵܐ ܘܬܲܩܝܼܦܵܐ. ܘܝܲܗ̣݇ܒ̣ ܠܲܢ ܕܢܸܕܥܝܼܘܗܝ ܚܲܕܼ ܟܝܵܢܵܐ. ܘܚܲܕܼ ܚܲܝܠܵܐ ܕܠܵܐ ܡܸܣܬܲܝܲܟܼ. ܐܲܒܼܵܐ ܘܲܒܼܪܵܐ ܘܪܘܼܚ ܩܘܼܕܼܫܵܐ؛ ܬܢܝܼ؛ ܫܲܒܲܚ. ܡܵܐ ܝܵܐܹ̇ܐ ܠܲܡܫܲܒܵܚܘܼ. ܒܒܲܝܬܵܐ ܗܵܢܵܐ ܩܲܕܝܼܫܵܐ. ܕܐܝܼܬܼ ܒܹܗ ܢܒ̣ܝܼܹ̈ܐ ܘܲܫܠܝܼܚܹ̈ܐ. ܘܣܵܗ̈ܕܹܐ ܘܟܼܵܗܢܹ̈ܐ ܘܡܲܠܦܵܢܹ̈ܐ. ܘܡܲܬܼܩܲܢ ܒܹܗ ܦܵܬܼܘܿܪ ܩܘܼܕܼܫܵܐ. ܠܚܘܼܣܵܝܵܐ ܕܝܲܠܕܵܘ̈ܗܝ ܕܐܵܕܼܵܡ.
ܩܲܪܝܵܢܵܐ؛ ܡܲܦܩܵܢܵܐ؛ ܝܛ؛ 1‐10. ܐܲܦܸܩ؛ ܟ؛ 18‐22 ܚܲܒ̣ܪܹܗ؛ ܦܪܲܟܿܣܝܼܣ؛ ܒ؛ 1‐22
ܫܘܼܪܵܝܵܐ؛ ܠܸܒܵܐ ܕܲܟܼܝܵܐ ܒܪܝܼ ܒܝܼ ܐܲܠܵܗܵܐ. ܠܡܲܚܲܬ̇ܬܹ̇ܗ ܕܪܘܼܚ ܩܘܼܕܼܫܵܐ. ܢܝܲܩܲܪ ܒܲܙܡܝܼܪ̈ܵܬܼܵܐ ܕܪܘܼܚܵܐ ܗܲܠܸܠܘܼܝܲܗ ܗܲܠܸܠܘܼܝܲܗ ܐܹܗܲܠܸܠܘܼܝܲܗ܀ ܘܪܘܼܚܵܟܼ ܬܩܲܢܬܼܵܐ ܚܲܕܸ̇ܬܼ ܒܓܼܵܘܝ. ܠܡܲܚܲܬ̇ܬܹ̇ܗ ܕܪܘܼܚ ܩܘܼܕܼܫܵܐ. ܢܝܲܩܲܪ ܒܲܙܡܝܼܪ̈ܵܬܼܵܐ ܕܪܘܼܚܵܐ ܗܲܠܸܠܘܼܝܲܗ ܗܲܠܸܠܘܼܝܲܗ ܐܹܗܲܠܸܠܘܼܝܲܗ܀ ܫܒܲܚ.. ܠܡܲܚܲܬ̇ܬܹ̇ܗ..܀ ܥܵܠܲܡ.. ܠܡܲܚܲܬ̇ܬܹ̇ܗ..܀
ܫܠܝܼܚܵܐ؛ ܐ؛ ܩܘܿܪ̈ܲܢܬܼܵܝܹܐ؛ ܝܒ؛ 1‐28
ܙܘܼܡܵܪܵܐ؛ ܒܛܘܼܒܲܝܗܘܿܢ. ܠܸܒܵܐ ܕܲܟܼܝܵܐ ܒܪܝܼ ܒܝܼ ܐܲܠܵܗܵܐ. ܘܪܘܼܚܵܟܼ ܬܩܲܢܬܼܵܐ ܚܲܕܸ̇ܬܼ ܒܓܼܵܘܝ. ܠܵܐ ܬܸܫܕܹ̇ܝܢܝ ܡ̣ܢ ܩܕܼܵܡܲܝܟ. ܓ܀ ܘܪܘܼܚܵܟܼ ܩܲܕ̇ܝܼܫܵܐ ܠܵܐ ܬܸܣܲܒ̣ ܡܹܢܝ. ܐܸܠܵܐ ܐܲܗܦܸܟܼ ܠܝܼ ܒܘܼܣܵܡܵܟܼ ܘܦܘܼܪܩܵܢܵܟܼ. ܘܪܘܼܚܵܟܼ ܡܫܲܒܲܚܬܵܐ ܬܣܲܡܟܲܢܝ. ܓ܀
ܐܹܘܲܢܓܲܠܝܼܘܿܢ. ܝܘܿܚܲܢܵܢ؛ ܝܕ؛ 15‐18. 25‐27. ܐܲܩܸܦ؛ ܝܗ؛ 26‐ܝܘ 16
ܕܐܹܘܲܢܓܲܠܝܼܘܿܢ؛ ܪܹܫ ܩܵܠܵܐ. ܐܲܚܘܿܕܼ ܙܲܝܢܵܐ ܘܣܲܟ̇ܪܵܐ ܘܩܘܼܡ ܒܥܘܼܕܼܪܵܢܝ؛ ܙܲܝܢܵܐ ܘܣܲܝܦܵܐ ܒܲܩܪܵܒ̣ܵܐ. ܙܲܝܢܵܐ ܕܪܘܼܚܵܐ ܩܲܕ̇ܝܼܫܵܐ. ܐܲܠܒܸ̇ܫ̣ ܡܫܝܼܚܵܐ ܠܲܫܠܝܼܚܵܘ̈ܗܝ. ܘܒܲܕ̇ܩܹܗ؛ ܠܐ݇ܪܵܙܵܐ ܟܲܣܝܵܐ ܕܐܲܠܵܗܘܼܬܹܗ. ܕܒܲܩܢܘܿܡܹ̈ܐ ܬܠܵܬܼܵܐ ܡܸܬܼܟ̇ܪܸܙ܀ ܘܒܲܕܼܡܘܼܬܼ ܢܘܼܪܵܐ. ܐܲܝܟܼ ܠܸܫܵܢܹ̈ܐ ܐܲܓܸ̇ܢ ܥܠܲܝܗܘܿܢ. ܘܫܲܪܝܼܘ ܡܡܲܠܠܝܼܢ ܒܠܸܫܵܢ ܠܸܫܵܢ. ܬܸܫ̈ܒ̇ܚܵܬܹܗ ܕܡܵܪܝܵܐ ܡܫܝܼܚܵܐ܀ ܥܲܡܵܐ ܘܥܲܡܡܹ̈ܐ. ܒܬܲܗܪܵܐ ܪܲܒܵܐ ܩܵܝ̇ܡܝܼܢ ܗ݇ܘ̣ܵܘ. ܘܡܵܢܲܐ ܗ݇ܝܼ ܗܵܕܹܐ ܚܕܲܬܵܐ ܕܲܗܘܸܵܬܼ. ܕܡ̣ܢ ܗܸܕܼܝܘܿܛܹ̈ܐ ܘܨܲܝܵܕܹ̈ܐ. ܐ݇ܪ̈ܵܙܹܐ ܟܣܲܝ̈ܵܐ ܡܸܬܼܒܲܕ̇ܩܝܼܢ܀ ܡܫܝܼܚܵܐ؛ ܕܐܲܥ̣ܬܲܪ ܠܥܲܒ̣ܕܵܘ̈ܗܝ ܒܝܲܕܼ ܡܵܘܗ̈ܒ̣ܵܬܹܗ. ܚܘܼܣ ܥܲܠ ܥܹܕ̇ܬܵܟܼ ܘܢܲܛܲܪ ܝܲܠܕܹ̇ܝ̈ܗ̇ ܘܪܲܚܸܡ ܥܠܹܝܗ̇؛ ܬܢܝܼ؛ ܫܲܒܲܚ. ܒܒܼܵܥܘܼ ܡܸܢܵܟܼ ܚܲܢܵܢܵܐ. ܬܵܐ ܠܐܝܼܵܠܲܢ ܘܲܦܪܘܿܩܲܝܢ. ܘܗܲܒ̣ܠܲܢ؛ ܕܲܕܼܠܵܐ ܫܲܠܘܵܐ ܥܲܡ ܩܲܕ̇ܝܼܫܲܝ̈ܟ ܢܸܙܡܲܪ ܫܘܼܒ̣ܚܵܐ ܠܡܵܪܘܿܬܼܵܟܼ܀ ܠܟ̣ܵܗܢܲܝ̈ܟ ܐܲܓ̣ܙܲܪܬ̇. ܫܘܼܠܛܵܢ ܪܵܘܡܵܐ ܘܐܘܼܚܕܵܢ ܥܘܼܡܩܵܐ. ܩܲܒܸ̇ܠ ܟܠܫܵܥ ܨܠܵܘܵܬܼ̈ܗܘܿܢ. ܘܲܦܬܲܚ̣ ܬܲܪܥܵܐ ܠܒ̣ܵܥܘܼܬܼܗܘܿܢ. ܘܦܲܢܵܐ ܒܪ̈ܲܚܡܲܝܟ ܫܹܐܠܵܬ̣̈ܗܘܿܢ܀ ܘܠܲܡܫܲܡܫܵܢܹ̈ܐ ܡܫܲܡܫܲܝ̈ ܐ݇ܪ̈ܵܙܹܐ ܕܒܲܣܝܼܡܘܼܬܼܵܟܼ. ܩܲܕܸ̇ܫ ܐܸܢܘܿܢ ܒܩܲܕ̇ܝܼܫܘܼܬܼܵܟܼ. ܕܲܢܩܲܕ̇ܫܘܼܢ ܩܲܕ̇ܝܼܫܵܐܝܼܬܼ. ܠܵܟܼ ܩܲܕ̇ܝܼܫܵܐ ܡܩܲܕܸ̇ܫ ܟܠ܀ ܐܵܦ ܠܲܡܗܲܝܡܢܹ̈ܐ ܕܡܸܬܼܓܵܘܣܝܼܢ ܒܓܼܵܘ ܥܹ̈ܕܼܵܬܼܵܟܼ. ܐܲܫܦܲܥ ܥܠܲܝܗܘܿܢ ܛܲܠܵܐ ܕܪ̈ܲܚܡܲܝܟ. ܘܣܲܬܲܪ ܐܸܢܘܿܢ ܒܝܲܡܝܼܢܵܟܼ. ܡ̣ܢ ܢܸܟ̣ܝܵܢܹ̈ܐ ܘܣܲܩܘܼܒ̣ܠܹ̈ܐ܀ ܘܐܲܥܒܲܪ ܡܸܢܗܘܿܢ ܙܲܒ̣ܢܹ̈ܐ ܩܫܲܝ̈ܵܐ ܕܪܸܚܡܲܬ̣ ܟܸܣܦܵܐ. ܘܗܲܒ̣ ܠܗܘܿܢ ܪ̈ܲܚܡܹܐ ܒܥܲܝܢܲܝ̈ ܡܲܠ̈ܟܹ̇ܐ. ܫܪܝܼ ܐܲܣܘܼܪ̈ܲܝܗܘܿܢ ܒܪ̈ܲܚܡܲܝܟ. ܘܐܲܦܸܩ̣ ܕܝܼܢܗܘܿܢ ܒܙܵܟܼܘܼܬܼܵܐ܀ ܘܐܲܫܘܵܐ ܠܟ̣ܠܲܢ. ܕܥܘܼܡܪܵܐ ܫܲܠܝܵܐ ܘܢܝܼܚܵܐ ܢܸܥܡܲܪ. ܘܢܸܫܟܲܚ ܪ̈ܲܚܡܹܐ ܒܝܘܿܡ ܦܘܼܪܥܵܢܵܐ. ܘܢܸܬ̇ܕܲܒܲܪ ܐܲܝܟܼ ܦܘܼܩܕܵܢܲܝ̈ܟ. ܘܢܸܫܦܲܪ ܠܨܸܒ̣ܝܵܢ ܡܵܪܘܼܬܼܵܟܼ܀ ܡܫܝܼܚܵܐ؛ ܫܲܝܢܵܐ ܡܫܲܝܸܢ ܟܠ ܒܸܪ̈ܝܵܢ. ܫܲܝܸܢ ܥܹܕ̇ܬܵܟܼ ܘܢܲܛܲܪ ܝܲܠܕܹ̇ܝ̈ܗ̇. ܒܲܨܠܘܿܬܼ ܟܠܗܘܿܢ ܩܲܕ̇ܝܼܫܲܝ̈ܟ ܘܪܲܚܸܡ ܥܠܹܝܗ̇܀
ܕܐ݇ܪ̈ܵܙܹܐ؛ ܒܩܵܠ. ܒܪܝܼܟܼ ܚܲܝܠܵܐ.
ܫܲܒܲܚܘ ܠܡܵܪܝܵܐ ܒܩܘܼܕܼܫܹܗ؛ ܠܲܫܡܵܐ ܕܩܘܼܕܼܫܹܗ ܠܥܵܠܲܡ ܥܵܠܡܝܼܢ. ܬܵܘ ܢܫܲܒܲܚ ܠܡܵܪܝܵܐ. ܕܨܘܼܪܬܵܐ. ܘܬܸܫ̈ܒ̇ܚܵܬܹܗ ܢܫܲܒܲܚ ܟܠܗܘܿܢ ܝܵܘ̈ܡܵܬܼܵܐ ܕܚܲܝܲܝ̈ܢ ܒܒܲܝܬܹ̇ܗ ܕܡܵܪܝܵܐ. ܡܸܛܠ ܕܚܲܝܠܵܐ ܗ݇ܘܼ ܕܐܲܠܵܗܵܐ. ܡܫܲܒ̇ܚܝܼܢܲܢ ܠܚܲܝܠܹܗ ܪܲܒܵܐ ܘܲܣܓ̣ܝܼܕܼܵܐ ܕܐܲܒ̣ܵܐ ܘܲܒ̣ܪܵܐ ܘܪܘܼܚ ܩܘܼܕܼܫܵܐ. ܫܘܼܠܛܵܢܹܗ ܡܵܘܕܹ̇ܝܢܲܢ ܘܲܡܩܲܠܣܝܼܢܲܢ. ܠܗܵܘ̇ ܕܠܵܐ ܡܸܣܬܲܝܲܟܼ. ܐܲܠܵܗܘܼܬܼܵܐ ܕܠܵܐ ܡܸܬ̇ܕܲܪܟܵܐ. ܬܠܝܼܬܼܵܝܘܼܬܼܵܐ ܚܲܕܼ ܟܝܵܢܵܐ. ܡܲܡܠܸܟܼ ܫܘܼܠܛܵܢܹܗ. ܡ̣ܢ ܥܵܠܲܡ ܥܕܲܡܵܐ ܠܥܵܠܲܡ. ܬܢܝܼ؛ ܘܫܲܒܲܚ ܒܵܗ̇.
(ܩܘܼܕܵܫܵܐ ܕܲܫܠܝܼܚܹ̈ܐ)
ܕܚܝܼܠܲܬ̇؛ ܠܸܒܵܐ ܕܲܟܼܝܵܐ ܒܪܝܼ ܒܝܼ ܐܲܠܵܗܵܐ. ܘܪܘܼܚܵܟܼ ܬܩܲܢܬܼܵܐ ܚܲܕܸ̇ܬܼ ܒܓ̣ܵܘܝ܀ ܦܵܪܲܩܠܹܝܛܵܐ ܢ̣ܚܸܬܼ ܝܵܘܡܵܢܵܐ. ܘܚܲܟܸ̇ܡ̣ ܠܥܲܒ̣ܕܵܘ̈ܗܝ ܒܝܲܕܼ ܡܵܘܗ̈ܒ̣ܵܬܹܗ܀ ܐܲܩܲܦܬܵܐ؛ ܒܥܹܐܕܼܵܐ ܕܦܸܨܚܵܐ ܕܒܲܚ̣ ܠܲܩܢܘܿܡܹܗ ܒܛܘܼܦ̮ܣܵܐ ܕܐܸܡܪܵܐ. ܘܲܒܼܥܲܕܼܥܹܕܼܵܐ ܕܦܲܢܛܹܩܘܼܣܛܹ̈ܐ ܪܫܲܡ̣ ܙܵܟܼܘܼܬܹܗ܀ ܟܠܲܢ ܒܝܲܕܼ ܛܲܝܒ̇ܘܼܬܹܗ ܕܦܵܪܘܿܩܲܢ. ܒܗܲܝܡܵܢܘܼܬܼܵܐ ܠܘܵܬܹܗ ܢܸܬ̣ܩܲܪܲܒ̣. ܘܦܲܓ̣ܪܹܗ ܘܲܕܼܡܹܗ ܕܲܒ̣ܪܵܐ ܡܫܝܼܚܵܐ. ܢܸܣܲܒ̣ ܘܲܢܫܲܒܲܚ ܟܲܕܼ ܐܵܡ̇ܪܝܼܢܲܢ ܗܲܠܸܠܘܼܝܲܗ܀
♱♱♱♱♱♱♱♱♱