ܚܡܫܒܫܒܐ ܕܦܨܚܐ
ܡܲܦܩܵܢܵܐ ܝܒ. 1‐21
ܬܸܒ̣ܘ ܘܲܫܠܵܘ ܡܲܦܩܵܢܵܐ ܣܸܦܪܵܐ ܬܪܲܝܵܢܵܐ ܕܐܘܿܪܵܝܬܵܐ؛
ܐܲܚܲܝ̈ ܒܲܪܸܟ̣ܡܵܪܝ܀
ܘܐ݇ܡܸܪܹܗ ܡܵܪܝܵܐ ܠܡܘܼܫܹܐ ܘܠܐܲܗܪܘܿܢ ܒܐܲܪܥܵܐ ܕܡܸܨܪܹܝܢ܀ ܐܵܗܵܐ ܝܲܪܚܵܐ ܗܵܘܹܐ ܐܸܠܵܘܟ̣ܘܿܢ ܪܹܫܵܐ ܕܝܲܪ̈ܚܹܐ؛ ܘܗܵܘܹܐ ܩܵܕ݇ܡܵܝܵܐ ܩܵܐ ܟܠܲܝܗܝ ܝܲܪ̈ܚܹܐ ܕܫܹܢ݇ܬܵܐ. ܐ݇ܡܘܿܪܘܿܢ ܠܟܠܵܗ̇ ܟܢܘܼܫܬܵܐ ܕܒܢܲܝ̈ ܝܼܣܪܵܝܹܠ؛ ܥܸܣܪܵܐ ܒܐܵܗܵܐ ܝܲܪܚܵܐ؛ ܗܵܘܝܼ ܒܸܫܩܵܠܵܐ ܟܠ ܐ݇ܢܵܫܵܐ ܦܵܐܪܵܐ ܩܵܐ ܒܲܝܬܵܐ؛ ܘܦܵܐܪܵܐ ܠܒܲܝܬܵܐ ܕܒܵܒܹܗ؛ ܘܐܸܢ ܒܲܝܬܵܐ ܙܥܘܿܪܵܐ ܝ݇ܠܹܗ ܕܠܹܐ ܦܵܠܸܛ ܒܝܼܹܗ ܚܲܕ݇ ܦܵܐܪܵܐ؛ ܒܸܬ ܫܵܩܸܠ ܗ̇ܘ ܘܫܒ̣ܵܒ̣ܹܗ ܕܩܘܼܪܒܵܐ ܝ݇ܠܹܗ ܠܒܲܝܬܹܗ ܒܡܸܢܝܵܢܵܐ ܕܓܵܢܵܬܹ̈ܐ. ܘܟܠ ܐ݇ܢܵܫܵܐ ܠܩܲܕܪܵܐ ܕܡܹܐܟ̣ܘܼܠܬܹܗ ܡܵܢܝܼܬܘܿܢ ܥܲܠ ܦܵܐܪܵܐ܀ ܦܵܐܪܵܐ ܕܠܵܐ ܗܵܘܹܐ ܒܝܼܹܗ ܠܲܟܵܐ؛ ܘܗܵܘܹܐ ܐܘܼܪܙܵܐ ܒܲܪ ܚܲܕ݇ ܫܹܢ݇ܬܵܐ؛ ܡ̣ܢ ܦܵܐܪܹ̈ܐ ܘܡ̣ܢ ܓܸܕܝܹ̈ܐ ܫܵܩܠܝܼܬܘܿܢ؛ ܘܗܵܘܹܐ ܢܛܝܼܪܵܐ ܗܲܠ ܐܲܪܒܲܥܣܲܪ ܒܐܵܗܵܐ ܝܲܪܚܵܐ. ܘܦܵܪܡܝܼܠܹܗ ܟܠܹܗ ܛܵܝܸܦܵܐ ܕܟܢܘܼܫܬܵܐ ܕܒܢܲܝ̈ ܝܼܣܪܵܝܹܠ ܒܓܢܵܝܬܵܐ ܕܫܸܡܫܸܐ؛ ܘܒܸܬ ܫܵܩܠܝܼ ܡ̣ܢ ܕܸܡܹܗ ܘܡܲܪܝܸܣܝܼ ܥܲܠ ܬܸܪܘܲܝܗܝ ܫܝܼܦܵܢܹ̈ܐ ܕܬܲܪܥܵܐ ܘܥܲܠ ܐ݇ܣܩܘܼܦܝܵܬܹ̈ܐ؛ ܘܥܲܠ ܒܵܬܹ̈ܐ ܕܐܵܟ̣ܠܝܼܠܹܗ ܓܵܘܲܝܗܝ܀ ܘܐܵܟ̣ܠܝܼܠܹܗ ܒܸܣܪܵܐ ܒܐܵܗܵܐ ܠܲܝܠܹܗ؛ ܟܲܕ ܡܛܘܼܝܵܐ ܒܢܘܼܪܵܐ ܘܦܲܛܝܼܪܵܐ ܥܲܡ ܝܲܪ̈ܩܹܐ ܡܲܪܝܼܪܹ̈ܐ ܐܵܟ̣ܠܝܼܠܹܗ܀ ܠܵܐ ܐܵܟ̣ܠܝܼܬܘܿܢ ܡܸܢܹܗ ܟܲܕ ܚܵܝܵܐ؛ ܘܐܘܼܦ ܠܵܐ ܟܲܕ ܒܘܼܫܠܵܐ ܒܡܝܼܵܐ؛ ܐܸܠܵܐ ܟܲܕ ܡܛܘܼܝܵܐ ܒܢܘܼܪܵܐ؛ ܘܪܹܫܹܗ ܘܐܲܩܠܹ̈ܗ ܘܓܵܘܹܗ܀ ܠܵܐ ܡܲܙܝܸܕܝܼܬܘܿܢ ܡܸܢܹܗ ܠܩܵܝܕܲܡܬܵܐ؛ ܘܡܸܢܕܝܼ ܕܙܵܝܸܕ ܡܸܢܹܗ ܠܩܵܝܕܲܡܬܵܐ. ܒܢܘܼܪܵܐ ܡܲܩܕܝܼܬܘܿܢ ܠܹܗ܀ ܗܵܕܟ̣ܵܐ ܐܵܟ̣ܠܝܼܬܘܿܢ ܠܹܗ؛ ܘܟܲܕ ܚܵܨܵܘ̈ܟ̣ܘܿܢ ܐ݇ܣܝܼܪܹ̈ܐ؛ ܘܨܵܘܠܵܘ̈ܟ̣ܘܿܢ ܒܐܲܩܠܵܬܵܘ̈ܟ̣ܘܿܢ ܘܚܘܼܛܪܹ̈ܐ ܒܐܝܼܕܵܬܵܘ̈ܟ̣ܘܿܢ؛ ܘܐ݇ܟ̣ܘܿܠܘܿܢ ܠܹܗ ܒܡܲܠܝܲܙܬܵܐ. ܣܵܒܵܒ ܦܸܨܚܵܐ ܝ݇ܠܹܗ ܠܡܵܪܝܵܐ܀ ܘܒܸܬ ܥܵܒ̣ܪܸܢ ܒܐܲܪܥܵܐ ܕܡܸܨܪܹܝܢ ܒܐܵܗܵܐ ܠܲܝܠܹܐ؛ ܘܒܸܬ ܡܵܝܬ݇ܝܼ ܟܠܲܝܗܝ ܒܘܼܟ̣ܪܹ̈ܐ ܕܐܲܪܥܵܐ ܕܡܸܨܪܹܝܢ؛ ܡ̣ܢ ܒܢܲܝ̈ܢܵܫܵܐ ܘܗܲܠ ܗܲܝܘܵܢܹ̈ܐ. ܘܒܟܠܲܝܗܝ ܨܵܢܲܡܹ̈ܐ ܕܡܸܨܪ̈ܵܝܹܐ ܒܸܬ ܥܵܒ̣ܕܸܢ ܕܝܼܘܵܢ ܐܵܢܵܐ ܡܵܪܝܵܐ܀ ܘܒܸܬ ܗܵܘܹܐ ܩܵܬܵܘܟ̣ܘܿܢ ܐܵܗܵܐ ܕܸܡܵܐ ܢܝܼܫܲܢܩܵܐ ܥܲܠ ܒܵܬܹ̈ܐ ܕܐܲܚܬܘܿܢ ܓܵܘܲܝܗܝ؛ ܘܒܸܬ ܚܵܙܸܢܹܗ ܠܕܸܡܵܐ ܘܒܸܬ ܥܵܒ̣ܪܸܢ ܡܸܢܵܘܟ̣ܘܿܢ؛ ܘܠܵܐ ܗܵܘܹܐ ܓܵܘܵܘܟ̣ܘܿܢ ܡܵܘܬܵܐ ܠܡܲܚܪܘܼܒ̣ܹܐ؛ ܐܝܼܡܲܢ ܕܩܵܛܠܸܢ ܒܐܲܪܥܵܐ ܕܡܸܨܪܹܝܢ܀ ܘܒܸܬ ܗܵܘܹܐ ܐܵܗܵܐ ܝܵܘܡܵܐ ܩܵܬܵܘܟ̣ܘܿܢ ܠܕܟ̣ܵܪܵܐ؛ ܥܒ̣ܘܿܕܘܿܢ ܠܹܗ ܥܹܐܕܵܐ ܠܡܵܪܝܵܐ؛ ܥܹܐܕܵܐ ܠܕܵܘܪ̈ܵܘܟ̣ܘܿܢ؛ ܢܵܡܘܿܣܵܐ ܗܲܠ ܥܵܠܲܡ ܗܵܘܝܼܬܘܿܢ ܒܸܥܒ̣ܵܕܵܐ܀ ܫܲܒ̣ܥܵܐ ܝܵܘܡܵܢܹ̈ܐ ܠܲܚܡܵܐ ܦܲܛܝܼܪܵܐ ܐܵܟ̣ܠܝܼܬܘܿܢ. ܘܡ̣ܢ ܝܵܘܡܵܐ ܩܵܕ݇ܡܵܝܵܐ ܒܲܛܠܝܼܬܘܿܢ ܚܡܝܼܪܵܐ ܡ̣ܢ ܒْܬܘܵܬܵܘ̈ܟ̣ܘܿܢ؛ ܣܵܒܵܒ ܕܟܠ ܕܐܵܟ̣ܸܠ ܚܸܡܥܝܵܐ ܡ̣ܢ ܒܵܬܵܘܟ̣̈ܘܿܢ ܒܸܬ ܬܵܠܩܵܐ ܗ̇ܝ ܓܵܢܵܐ ܡ̣ܢ ܝܼܣܪܵܝܹܠ؛ ܡ̣ܢ ܝܵܘܡܵܐ ܩܵܕ݇ܡܵܝܵܐ ܗܲܠ ܝܵܘܡܵܐ ܕܫܲܒ̣ܥܵܐ܀ ܝܵܘܡܵܐ ܩܲܕ݇ܡܵܝܵܐ ܓ̰ܡܲܥܝܬܵܐ ܩܲܕܝܼܫܬܵܐ؛ ܘܝܵܘܡܵܐ ܕܫܲܒ̣ܥܵܐ ܓ̰ܡܲܥܝܬܵܐ ܩܲܕܝܼܫܬܵܐ ܗܵܘܝܵܐ ܩܵܐ ܟܠܵܘܟ̣ܘܿܢ ܘܗܝܼܟ̰ ܦܘܼܠܚܵܢܵܐ ܠܵܐ ܦܵܐܹܫ ܥܒ̣ܝܼܕܵܐ ܒܝܼܲܝܗܝ؛ ܐܸܠܵܐ ܗ̇ܘ ܡܸܢܕܝܼ ܕܐܵܟ̣ܸܠ ܒܲܪܢܵܫܵܐ ܦܵܐܹܫ ܥܒ̣ܝܼܕܵܐ ܒܝܼܲܝܗܝ. ܘܢܵܛܪܝܼܬܘܿܢ ܠܲܚܡܵܐ ܦܲܛܝܼܪܵܐ؛ ܣܵܒܵܒ ܗܲܪ ܒܐܵܗܵܐ ܝܵܘܡܵܐ ܦܘܼܠܸܛܠܝܼ ܚܲܝܠܵܘܵܬ̈ܵܘܟ̣ܘܿܢ ܡ̣ܢ ܐܲܪܥܵܐ ܕܡܸܨܪܹܝܢ؛ ܘܢܵܛܪܝܼܬܘܿܢ ܐܵܗܵܐ ܝܵܘܡܵܐ ܠܕܵܘܪ̈ܵܘܟ̣ܘܿܢ ܢܵܡܘܿܣܵܐ ܠܥܵܠܲܡ܀ ܒܝܲܪܚܵܐ ܩܲܕ݇ܡܵܝܵܐ؛ ܒܪܲܡܫܵܐ ܐܲܪܒܲܥܣܲܪ ܒܝܲܪܚܵܐ ܐܵܟ̣ܠܝܼܬܘܿܢ ܦܲܛܝܼܪܵܐ؛ ܗܲܠ ܪܲܡܫܵܐ ܕܝܵܘܡܵܐ ܕܥܸܣܪܝܼ ܘܚܲܕ݇ ܒܝܲܪܚܵܐ܀ ܫܲܒ̣ܥܵܐ ܝܵܘܡܵܢܹ̈ܐ ܚܸܡܥܝܵܐ ܠܵܐ ܦܵܐܹܫ ܡܘܼܫ݇ܟ̰ܚܵܐ ܓܵܘ ܒܵܬܘܵܬ̈ܵܘܟ̣ܘܿܢ؛ ܣܵܒܵܒ ܟܠ ܕܐܵܟ̣ܸܠ ܚܸܡܥܝܵܐ؛ ܒܸܬ ܬܵܠܩܵܐ ܗ̇ܝ ܓܵܢܵܐ ܡ̣ܢ ܟܢܘܼܫܬܵܐ ܕܝܼܣܪܵܝܹܠ؛ ܡ̣ܢ ܡܵܫܵܚܲܛܹ̈ܐ ܘܡ̣ܢ ܥܵܡܪ̈ܵܢܹܐ ܕܐܲܪܥܵܐ؛ ܟܠ ܚܸܡܥܝܵܐ ܠܵܐ ܐܵܟ̣ܠܝܼܬܘܿܢ؛ ܒܟܠܹܗ ܐܲܬܪܵܘܟ̣ܘܿܢ ܐܵܟ̣ܠܝܼܬܘܿܢ ܦܲܛܝܼܪܵܐ.܀
ܚܲܒ̣ܪܹܗ
ܙܟܲܪܝܵܐ ܛ؛ 9‐13 ܝܐ؛ 12‐14 ܝܒ؛ 9‐ܫܘܼܠܵܡܵܐ. ܝܓ؛ 3‐ܫܘܼܠܵܡܵܐ.
ܫܠܵܘ ܢܒ̣ܝܼܘܼܬܹܗ ܕܙܟܲܪܝܵܐ؛ ܐܲܚܲܝ̈ ܒܲܪܸܟ̣ܡܵܪܝ܀
ܗܵܕܟ̣ܵܐ ܒܹܐܡܵܪܵܐ ܝ݇ܠܹܗ ܡܵܪܝܵܐ؛ ܦܨܘܿܚܝ ܪܵܒܵܐ ܒܪܵܬܵܐ ܕܨܸܗܝܘܿܢ؛ ܘܡܲܩܘܸܚܝ ܒܪܵܬܵܐ ܕܐܘܿܪܸܫܠܹܡ؛ ܗܵܐ ܡܲܠܟܵܟ̣ܝ ܒܹܐܬܵܝܵܐ ܐܸܠܵܟ̣ܝ. ܙܲܕܝܼܩܵܐ؛ ܘܦܵܪܘܿܩܵܐ؛ ܘܡܲܟܝܼܟ̣ܵܐ؛ ܘܪܟܝܼܒ̣ܵܐ ܥܲܠ ܚܡܵܪܵܐ ܘܥܲܠ ܓ̰ܲܥܫܵܐ ܒܲܪ ܚܡܲܪܬܵܐ܀ ܘܒܸܬ ܬܵܠܸܩ ܟܵܠܸܣܟܵܐ ܡ̣ܢ ܐܲܦܪܹܝܡ ܘܣܘܼܣܵܐ ܡ̣ܢ ܐܘܿܪܸܫܠܹܡ. ܒܸܬ ܫܵܡܸܛ ܩܸܫܬܵܐ ܓܵܘ ܦܠܵܫܵܐ؛ ܘܗܲܡܙܸܡ ܫܠܵܡܵܐ ܥܲܡ ܛܵܝܸܦܹ̈ܐ؛ ܘܒܸܬ ܡܗܵܟܸܡ ܡ̣ܢ ܝܵܡܵܐ ܠܝܵܡܵܐ؛ ܘܡ̣ܢ ܢܲܗܪܵܐ ܗܲܠ ܡܲܪ̈ܙܵܢܹܐ ܕܐܲܪܥܵܐ܀ ܘܐܘܼܦ ܐܲܢ݇ܬ̇ ܒܕܸܡܵܐ ܕܩܵܘܠܵܐ ܕܝܼܘܼܟܼ؛ ܫܪܹܐܠܘܼܟܼ ܐܲܣܝܼܪܹ̈ܐ ܡ̣ܢ ܓܘܼܒܵܐ ܕܠܲܝܬ̇ ܒܝܼܹܗ ܡܝܼܵܐ܀ ܝ݇ܬܘܿܒ̣ܘܿܢ ܓܵܘ ܩܲܠܥܵܐ ܐܲܣܝܼܪܹ̈ܐ ܕܟܢܘܼܫܬܵܐ؛ ܡ̣ܢ ܓܹܒ ܚܲܕ݇ ܝܵܘܡܵܐ ܬܪܹܝ ܝܵܘܡܵܢܹ̈ܐ ܒܸܬ ܦܲܪܥܸܢܵܘܟ̣ܘܿܢ܀ ܐܸܢ ܨܦܵܝܝܼ ܝ݇ܠܵܗ̇ ܒܥܲܝܢ̈ܵܘܟ̣ܘܿܢ ܗܲܒ̣݇ܠܘܿܢ ܠܝܼ ܗܵܩܝܼ؛ ܝܲܢ ܙܵܠܡܝܼܬܘܿܢ ܐܸܠܝܼ؛ ܘܬܩܸܠܗ݇ܘܿܢ ܠܗܵܩܝܼ ܬܠܵܬܝܼ ܙܘܼܙܹ̈ܐ܀ ܘܐ݇ܡܸܪܹܗ ܐܸܠܝܼ ܡܵܪܝܵܐ ܡܲܬܸܒ̣ܠܹܗ ܓܵܘ ܒܹܝܬ̣ ܓܲܙܵܐ؛ ܚܸܩܪܵܐ ܕܐܝܼܩܵܪܵܐ ܕܦܸܫܠܝܼ ܡܘܼܕܩܸܪܵܐ ܡܸܢܲܝܗܝ؛ ܘܫܩܸܠܝܼ ܬܠܵܬܝܼ ܕܣܹܐܡܵܐ؛ ܘܕܸܪܝܲܝܗܝ ܠܝܼ ܓܵܘ ܒܹܝܬ̣ ܓܲܙܵܐ ܒܒܲܝܬܹܗ ܕܡܵܪܝܵܐ܀ ܘܒܸܬ ܗܵܘܹܐ ܗܲܪ ܒܗ̇ܘ ܝܵܘܡܵܐ ܒܸܬ ܛܵܥܸܢ ܠܬܵܠܘܿܩܹܐ ܠܟܠܲܝܗܝ ܛܵܝܸܦܹ̈ܐ ܕܐܵܬܝܼ ܥܲܠ ܐܘܿܪܸܫܠܹܡ܀ ܘܒܸܬ ܬܲܦܚܸܢ ܥܲܠ ܒܲܝܬܵܐ ܕܕܵܘܝܼܕ ܘܥܲܠ ܥܵܡܪ̈ܵܢܹܐ ܕܐܘܿܪܸܫܠܹܡ ܪܘܼܚܵܐ ܕܪ̈ܲܚܡܹܐ ܘܫܵܦܵܩܲܬ؛ ܘܒܸܬ ܚܵܝܪܝܼ ܠܟܸܣܠܝܼ ܒܡ̇ܢ ܕܕܩܸܪܗ݇ܘܿܢ؛ ܘܒܸܬ ܥܵܒ̣ܕܝܼ ܬܵܙܝܼ ܥܲܠܹܗ ܐܲܝܟܼ ܬܵܙܝܼ ܕܥܲܠ ܝܼܚܝܼܕܵܝܵܐ؛ ܘܒܸܬ ܦܵܫܡܝܼ ܥܲܠܹܗ ܐܲܝܟܼ ܕܦܵܫܡܝܼ ܥܲܠ ܒܘܼܟ̣ܪܵܐ܀ ܗܲܪ ܒܗ̇ܘ ܝܵܘܡܵܐ ܒܸܬ ܙܵܝܕܵܐ ܬܵܙܝܼ ܓܵܘ ܐܘܿܪܸܫܠܹܡ ܐܲܝܟܼ ܬܵܙܝܼ ܕܒܲܪ ܐܲܡܘܿܢ ܓܵܘ ܕܸܫܬܵܐ ܕܡܲܓ̣ܕܘܿ܀ ܘܐܲܪܥܵܐ ܒܸܬ ܥܵܒ̣ܕܵܐ ܬܵܙܝܼ ܐܘܼܓ̰ܵܓ̣ܹ̈ܐ ܐܘܼܓ̰ܵܓ̣ܹ̈ܐ ܡܐܘܼܕܵܠܹܐ؛ ܘܐܘܼܓ̰ܵܓ̣ ܕܒܹܝܬ̣ ܕܵܘܝܼܕ ܡܐܘܼܕܵܠܹܐ؛ ܘܒܲܟ̣ܬܵܬܲܝ̈ܗܝ ܡܐܘܼܕܵܠܹܐ؛ ܐܘܼܓ̰ܵܓ̣ ܕܒܹܝܬ̣ ܢܵܬܵܢ ܡܐܘܼܕܵܠܹܐ ܘܒܲܟ̣ܬܵܬܲܝ̈ܗܝ ܡܐܘܼܕܵܠܹܐ܀ ܐܘܼܓ̰ܵܓ̣ ܕܒܹܝܬ̣ ܠܹܘܝܼ ܡܐܘܼܕܵܠܹܐ ܘܒܲܟ̣ܬܵܬܲܝ̈ܗܝ ܡܐܘܼܕܵܠܹܐ. ܘܐܘܼܓ̰ܵܓ̣ ܕܒܹܝܬ̣ ܫܸܡܥܘܿܢ ܘܒܲܟ̣ܬܵܬܲܝ̈ܗܝ ܡܐܘܼܕܵܠܹܐ܀ ܣܵܡܵܐ ܦܝܼܫܵܐ ܕܟܠܲܝܗܝ ܐܘܼܓ̰ܵܓ̣ܹ̈ܐ ܒܸܬ ܥܵܒ̣ܕܝܼ ܬܵܙܝܼ ܐܘܼܓ̰ܵܓ̣ܹ̈ܐ ܐܘܼܓ̰ܵܓ̣ܹ̈ܐ ܡܐܘܼܕܵܠܹܐ ܘܒܲܟ̣ܬܵܬܲܝ̈ܗܝ ܡܐܘܼܕܵܠܹܐ. ܣܲܝܦܵܐ ܦܸܫܠܹܗ ܡܘܼܪܥܸܫܵܐ ܥܲܠ ܪܵܥܝܵܐ ܕܝܼܝܼ ܘܥܲܠ ܐ݇ܢܵܫܵܐ ܕܘܿܣܬܝܼ ܒܹܐܡܵܪܵܐ ܝ݇ܠܹܗ ܡܵܪܝܵܐ ܚܲܝܠܬܵܢܵܐ؛ ܡܚܝܼ ܠܪܵܥܝܵܐ ܘܦܵܝܫܝܼ ܒܘܼܪ̈ܒܸܙܹܐ ܥܸܪ̈ܒܹܐ؛ ܘܡܲܕܸܪܸܢ ܐܝܼܕܝܼ ܥܲܠ ܪܹ̈ܫܵܢܹܐ܀ ܘܒܸܬ ܗܵܘܹܐ ܒܟܠܵܗ̇ ܐܲܪܥܵܐ ܒܹܐܡܵܪܵܐ ܝ݇ܠܹܗ ܡܵܪܝܵܐ؛ ܬܪܹܝ ܣܵܡܹ̈ܐ ܕܓܵܘܵܗ̇ ܒܸܬ ܬܵܝܡܝܼ ܘܬܲܠܩܝܼ؛ ܘܚܲܕ݇ ܬܠܝܼܬܵܝܵܐ ܒܸܬ ܦܵܐܹܫ ܓܵܘܵܗ̇܀ ܘܒܸܬ ܡܲܥܒ̣ܸܪܸܢ ܠܗ̇ܘ ܬܠܝܼܬܵܝܵܐ ܦܵܝܫܵܢܵܐ ܒܢܘܼܪܵܐ ܘܒܸܬ ܨܲܪܸܦܸܢܗ݇ܘܿܢ [ܨܵܦܸܢܗ݇ܘܿܢ] ܐܲܝܟܼ ܕܨܲܪܸܦܝܼ [ܕܨܵܦܝܼ] ܠܣܹܐܡܵܐ ܘܒܲܚܪܸܢܗ݇ܘܿܢ [ܨܲܚܨܸܢܗ݇ܘܿܢ] ܐܲܝܟܼ ܕܒܵܚܪܝܼ [ܕܨܲܚܨܝܼ] ܠܕܲܗܒ̣ܵܐ؛ ܗ̇ܘ ܒܸܬ ܩܵܪܹܐ ܒܫܸܡܝܼ؛ ܘܐܵܢܵܐ ܒܸܬ ܓ̰ܲܘܸܒܸܢܹܗ؛ ܘܒܸܬ ܐܵܡܪܸܢ ܐܵܗܵܐ ܝ݇ܠܹܗ ܛܵܝܸܦܝܼ؛ ܘܗ̇ܘ ܒܸܬ ܐܵܡܸܪ ܡܵܪܝܵܐ ܐܲܠܵܗܝܼ܀
♱♱♱♱♱♱♱♱♱
ܚܡܫܒܫܒܐ ܕܦܨܚܐ
ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ
ܕܲܠܘܵܬܼ ܩܘܼܪ̈ܲܢܬܵܝܹܐ ܐܲܚܲܝ̈ ܒܲܪܸܟܼܡܵܪܝ܀
ܣܵܒܵܒ ܦܸܨܚܵܐ ܕܝܼܲܢ ܡܫܝܼܚܵܐ ܝ݇ܠܹܗ ܕܦܸܫܠܹܗ ܦܪܝܼܡܵܐ ܡ̣ܢ ܓܹܒܲܢ. ܒܘܼܬ ܕܐܵܗܵܐ؛ ܒܸܬ ܥܵܒܼܕܲܚ ܥܹܐܕܵܐ ܠܵܐ ܒܚܡܝܼܪܵܐ ܥܲܬܝܼܩܵܐ ܘܠܵܐ ܒܚܡܝܼܪܵܐ ܕܒܝܼܫܘܼܬܵܐ ܘܟܲܪܒܵܐ. ܐܸܠܵܐ ܒܚܡܝܼܪܵܐ ܕܕܸܟܼܝܘܼܬܵܐ ܘܩܲܕܝܼܫܘܼܬܵܐ* ܐܲܝܟܼ ܕܩܵܐ ܗܵܘܢܵܢܹ̈ܐ ܒܹܐܡܵܪܵܐ ܝ݇ܘܸܢ. ܐܲܚܬܘܿܢ ܕܘܼܢܘܼܢ ܡܸܢܕܝܼ ܕܒܹܐܡܵܪܵܐ ܝ݇ܘܸܢ* ܗ̇ܘ ܟܵܣܵܐ ܕܫܵܟܲܪܬܵܐ ܕܒܵܪܘܿܟܼܹܐ ܝ݇ܘܲܚ؛ ܠܹܐ ܝ݇ܠܹܗ ܫܲܪܝܼܟܘܼܬܵܐ ܕܕܸܡܹܗ ܕܡܫܝܼܚܵܐ؟ ܘܗ̇ܘ ܠܲܚܡܵܐ ܕܒܸܩܨܵܝܵܐ ܝ݇ܘܲܚ؛ ܠܹܐ ܝ݇ܠܹܗ ܫܲܪܝܼܟܘܼܬܵܐ ܕܦܲܓܼܪܹܗ ܕܡܫܝܼܚܵܐ܋ ܐܲܝܟܼ ܕܝܼܠܹܗ ܗ̇ܘ ܚܲܕ݇ ܠܲܚܡܵܐ. ܗܲܕܟܼܵܐ ܟܠܲܢ ܚܲܕ݇ ܦܲܓܼܪܵܐ ܝ݇ܘܲܚ. ܣܵܒܵܒ ܟܠܲܢ ܡ̣ܢ ܕܗ̇ܘ ܚܲܕ݇ ܠ̣ܲܚܡܵܐ ܒܸܫܩܵܠܵܐ ܝ݇ܘܲܚ* ܐܵܢܵܐ ܩܘܼܒܸܠܝܼ ܡ̣ܢ ܡܵܪܲܢ ܗ̇ܘ ܡܸܢܕܝܼ ܕܣܘܼܦܹܐܠܝܼ ܐܸܠܵܘܟܼܘܿܢ ܕܡܵܪܲܢ ܝܼܫܘܿܥ ܒܗ̇ܘ ܠܲܝܠܹܐ ܕܦܝܵܫܵܐ ܗܘ̣ܵܐ ܣܘܼܦܝܵܐ ܫܩܸܠܹܗ ܠܲܚܡܵܐ* ܘܒܘܼܪܸܟܼܠܹܗ ܘܩܨܹܐܠܹܗ ܘܐ݇ܡܸܪܹܗ ܫܩܘܿܠܗ݇ܘܿܢ ܐ݇ܟܼܘܿܠܗ݇ܘܿܢ ܐܵܗܵܐ ܝ݇ܠܹܗ ܦܲܓܼܪܝܼ. ܕܡ̣ܢ ܓܹܒܵܘܟܼܘܿܢ ܦܝܵܫܵܐ ܝ݇ܠܹܗ ܩܸܨܝܵܐ. ܗܲܕܟܼܵܐ ܗܵܘܝܼܬܘܿܢ ܒܸܥܒܼܵܕܵܐ ܠܕܟܼܵܪܝܼ* ܗܲܕܟܼܵܐ ܡ̣ܢ ܒܵܬ̄ܪ ܕܐ݇ܟܼܸܠܗ݇ܘܿܢ ܐ݇ܟܼܵܠܪܲܡܫܵܐ ܐܘܼܦ ܟܵܣܵܐ ܝܘܼܗ݇ܒܼܸܠܹܗ ܘܐ݇ܡܸܪܹܗ؛ ܐܵܗܵܐ ܟܵܣܵܐ ܝܼܠܹܗ ܕܝܵܬܹܩܹܐ ܚܲܕܬܵܐ ܒܕܸܡܝܼ؛ ܗܲܕܟܼܵܐ ܗܵܘܝܼܬܘܿܢ ܒܸܥܒܼܵܕܵܐ ܟܠ ܐܝܼܡܲܢ ܕܫܵܬܝܼܬܘܿܢ ܠܕܟܼܵܪܝܼ* ܣܵܒܵܒ ܟܠ ܐܝܼܡܲܢ ܕܐܵܟܼܠܝܼܬܘܿܢ ܐܵܗܵܐ ܠܲܚܡܵܐ ܘܫܵܬܝܼܬܘܿܢ ܐܵܗܵܐ ܟܵܣܵܐ؛ ܡܵܘܬܹܗ ܕܡܵܪܲܢ ܡܲܕܟܼܘܼܪܹܐ ܝ݇ܬܘܿܢ ܗܲܠ ܝܵܘܡܵܐ ܕܐ݇ܬܵܝܬܹܗ* ܗܲܕܟܼܵܐ ܗ̇ܘ ܕܐܵܟܼܸܠ ܡ̣ܢ ܠܲܚܡܹܗ ܕܡܵܪܝܵܐ ܘܫܵܬܹܐ ܡ̣ܢ ܟܵܣܹܗ ܘܠܵܐ ܚܵܫܸܚ ܐܸܠܹܗ؛ ܓܘܼܢܵܗܟܵܪ ܝܼܠܹܗ ܠܕܸܡܹܗ ܕܡܵܪܝܵܐ ܘܠܦܲܓܼܪܹܗ* ܒܘܼܬ ܕܐܵܗܵܐ؛ ܓܵܪܲܓ ܐ݇ܢܵܫܵܐ ܨܲܚܨܹܐ ܓܵܢܹܗ ܗܵܝܓܵܗ ܐܵܟܼܸܠ ܡ̣ܢ ܕܐܵܗܵܐ ܠܲܚܡܵܐ ܘܫܵܬܹܐ ܡ̣ܢ ܕܐܵܗܵܐ ܟܵܣܵܐ* ܣܵܒܵܒ ܡ̇ܢ ܕܐܵܟܼܸܠ ܡܸܢܹܗ ܟܲܕ ܠܵܐ ܚܫܝܼܚܵܐ. ܓܢܵܗܵܐ ܩܵܐ ܓܵܢܹܗ ܝ݇ܠܹܗ ܒܹܐܟܼܵܠܵܐ ܘܒܸܫܬܵܝܵܐ؛ ܕܠܵܐ ܦܪܸܫܠܹܗ ܦܲܓܼܪܹܗ ܕܡܵܪܝܵܐ* ܒܘܼܬ ܕܐܵܗܵܐ؛ ܐܝܼܬ ܓܵܘܵܘܟܼܘܿܢ ܪܵܒܵܐ ܡܸܪ̈ܥܝܹܐ ܘܙܲܒܘܼܢܹ̈ܐ ܘܪܵܒܵܐ ܕܕܡܝܼܟܼܹܐ ܝ݇ܢܵܐ* ܣܵܒܵܒ ܐܸܢ ܕܵܝܢܲܚ ܗ݇ܘ̣ܵܘ ܓܵܢܲܢ؛ ܠܹܐ ܦܵܝܫܲܚ ܗ݇ܘ̣ܵܘ ܕܝܼܢܹܐ* ܐܝܼܡܲܢ ܕܦܵܝܵܫܵܐ ܝ݇ܘܲܚ ܕܝܼܢܹܐ ܡ̣ܢ ܡܵܪܲܢ ܬܲܥܠܘܼܡܹܐ ܦܝܵܫܵܐ ܝ݇ܘܲܚ ܬܘܼܥܠܡܹܐ ܕܠܵܐ ܥܲܡ ܥܵܠܡܵܐ ܦܵܝܫܲܚ ܓܘܼܢܵܗܟܵܪ* ܡܐܵܕܝܼܵܐ ܐܵܚܘܿܢܘܵܬ̈ܝܼ ܐܝܼܡܲܢ ܕܒܸܓ̰ܡܲܥܝܵܐ ܝ݇ܬܘܿܢ ܠܹܐܟܼܵܠܵܐ؛ ܗܵܘܝܼܬܘܿܢ ܒܸܚܡܵܠܵܐ ܚܲܕ݇ ܠܗ̇ܘ ܐ݇ܚܹܪ݇ܢܵܐ ܘܡ̇ܢ ܕܝܼܠܹܗ ܟܦܝܼܢܵܐ ܚܘܼܫ ܓܵܘ ܒܲܝܬܹܗ ܐܵܟܼܸܠ. ܕܠܵܐ ܗܵܘܝܼܬܘܿܢ ܒܸܓ̰ܡܲܥܝܵܐ ܩܵܐ ܓܘܼܢܵܗܟܵܪܘܼܬܵܐ. ܘܒܘܼܬ ܣܵܡܵܐ ܦܝܼܫܵܐ ܐܝܼܡܲܢ ܕܐܵܬܸܢ ܒܸܬ ܦܵܩܕܸܢܵܘܟܼܘܿܢ*
♱♱♱♱♱♱♱♱♱
ܚܡܫܒܫܒܐ ܕܦܨܚܐ
ܡܬܝ ܟܘ: 1‐6، 14‐30
ܐܘܢܓܠܝܘܢ ܩܕܝܫܐ ܕܡܪܢ ܝܼܫܘܥ ܡܫܝܚܐ ܟܪܘܙܘܬܼܐ ܕܡܬܝ
♰ ܘܐ݇ܡܸܪܹܗ ܝܑܼܫܘܿܥ ܠܬܲܠܡܝܼܕ̈ܘܼܗܝ: ܒܝܼܕܵܥܵܐ ܝܬܘܿܢ ܕܡ̣ܢ ܒܵܬ݇ܪ ܬܪܹܝ ܝܵܘܡܵܢܹ̈ܐ ܒܸܬ ܗܵܘܹܐ ܦܸܨܚܵܐ: ܘܒܪܘܿܢܹܗ ܕܐ݇ܢܵܫܵܐ ܒܸܬ ܦܵܐܸܫ ܣܘܼܦܝܵܐ ܕܦܵܐܸܫ ܙܩܝܼܦܵܐ. ܗܲܝܓܵܗ̇ ܓ̰ܡܸܥܠܗ݇ܘܿܢ ܪ̈ܲܒܲܝ ܟܵܗܢܹ̈ܐ ܘܣܵܦܪܹ̈ܐ ܘܩܲܫܝܼܫܹ̈ܐ ܕܥܲܡܵܐ ܠܕܲܪܬܹܗ ܕܪܲܒ ܟܵܗܢܹ̈ܐ ܕܟܹܐ ܦܵܐܸܫ ܩܸܪܝܵܐ ܩܲܝܵܦܵܐ: ܘܥܒܼܸܕܠܗ݇ܘܿܢ ܪܵܐܝܼ ܥܲܠ ܝܑܼܫܘܿܥ: ܕܒܢܸܟܼܠܵܐ ܕܲܒܼܩܝܼܠܹܗ ܘܩܲܛܠܝܼܠܹܗ: ܘܐܲܡܪܝܼ ܗ݇ܘܵܘ: ܠܵܐ ܒܥܲܕܥܹܕܵܐ: ܕܠܵܐ ܗܵܘܹܐ ܫܓܼܘܫܝܵܐ ܓܵܘ ܥܲܡܵܐ. ܗܲܝܓܵܗ̇ ܐ݇ܙܸܠܹܗ ܚܲܕ݇ ܡ̣ܢ ܬܪܸܥܣܲܪ ܕܟܹܐ ܦܵܐܸܫ ܩܸܪܝܵܐ ܝܼܗܘܼܕܵܐ ܣܟܼܲܪܝܘܼܛܵܐ ܠܘܵܬ ܪ̈ܲܒܲܝ ܟܵܗܢܹ̈ܐ: ܘܐ݇ܡܸܪܹܗ ܐܸܠܲܝܗܝ: ܡܘܿܕܝܼ ܒܣܵܡܵܘܟܼܘܿܢ ܝܠܵܗ̇ ܠܝܼܵܗ݇ܒܼܵܐ ܐܸܠܝܼ: ܘܐܵܢܵܐ ܒܸܬ ܣܵܦܸܢܹܗ ܐܸܠܵܘܟܼܘܿܢ؟ ܐܝܼܢܵܐ ܐܵܢܝܼ ܩܘܼܘܸܠܗ݇ܘܿܢ ܐܸܠܹܗ ܬܠܵܬܝܼ ܕܙܘܼܙܵܐ: ܘܡ̣ܢ ܗܲܝܓܵܗ̇ ܒܵܥܹܐ ܗ݇ܘܵܐ ܚܕܵܐ ܦܸܪܤܵܬ ܕܣܵܦܹܐܠܹܗ: ܐܝܼܢܵܐ ܒܝܵܘܡܵܐ ܩܲܕ݇ܡܵܝܵܐ ܕܦܲܛܝܼܪܹ̈ܐ: ܩܘܼܪܒܸܢܗ݇ܘܿܢ ܬܲܠܡܝܼܕܹ̈ܐ ܠܘܵܬ ܝܑܼܫܘܿܥ: ܘܐ݇ܡܸܪܗ݇ܘܿܢ ܐܸܠܹܗ: ܐܲܝܟܵܐ ܒܣܵܡܘܼܟܼ ܝܼܠܵܗ̇ ܕܗܲܕܪܸܚ ܐܸܠܘܼܟܼ ܕܐܲܟܼܠܸܬ ܦܸܨܚܵܐ؟ ܐܝܼܢܵܐ ܗ̇ܘ ܐ݇ܡܸܪܹܗ ܐܸܠܲܝܗܝ: ܙܹܠ݇ܡܘܿܢ ܠܡܕܝܼܢ݇ܬܵܐ ܠܘܵܬ ܦܸܠܲܢ: ܘܐ݇ܡܘܼܪܘܿܢ ܐܸܠܹܗ: ܪܲܒܝܼܵܢ ܒܹܐܡܵܪܵܐ ܝܠܹܗ: ܙܲܒܼܢܝܼ ܡܛܹܐܠܹܗ. ܠܘܵܬܘܼܟܼ ܒܸܬ ܥܲܒܼܕܸܢ ܦܸܨܚܵܐ ܥܲܡ ܬܲܠܡܝܼܕܝܼ̈: ܘܬܲܠܡܝܼܕܘܼ̈ܗܝ ܥܒܼܸܕܠܗ݇ܘܿܢ ܕܲܐܟܼܝܼ ܕܩܲܡ ܦܵܩܸܕܠܗ݇ܘܿܢ ܝܑܼܫܘܿܥ: ܘܗܘܼܕܸܪܗ݇ܘܿܢ ܦܸܨܚܵܐ: ܘܟܲܕ ܗ݇ܘܹܐܠܹܗ ܪܲܡܫܵܐ: ܝܬܝܼܒܼܵܐ ܗ݇ܘܵܐ ܥܲܡ ܬܪܸܥܣܲܪ ܬܲܠܡܝܼܕܘܼ̈ܗܝ، ܘܟܲܕ ܒܹܐܟܼܵܠܵܐ ܗ݇ܘܵܘ، ܐ݇ܡܸܪܹܗ: ܬܪܘܿܨܵܐ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ: ܕܚܲܕ݇ ܡܸܢܵܘܟܼܘܿܢ ܒܸܬ ܣܵܦܹܐ ܠܝܼ: ܘܦܫܸܡܠܗ݇ܘܿܢ ܪܵܒܵܐ: ܘܫܘܼܪܹܐ ܠܗ݇ܘܿܢ ܚܲܕ݇ ܚܲܕ݇ ܡܸܢܲܝܗܝ ܠܹܐܡܵܪܵܐ ܐܸܠܹܗ: ܩܵܡܘܿ ܐܵܢܵܐ ܝܘܸܢ ܡܵܪܝܼ؟ ܐܝܼܢܵܐ ܗ̇ܘ ܓ̰ܘܼܘܸܒܠܹܗ ܘܐ݇ܡܸܪܹܗ: ܡ̇ܢ ܕܛܵܡܸܫ ܐܝܼܕܹܗ ܥܲܡܝܼ ܒܡܵܢܵܐ ܗ̇ܘ ܒܸܬ ܣܵܦܹܐ ܠܝܼ. ܘܒܪܘܿܢܹܗ ܕܐ݇ܢܵܫܵܐ ܒܸܬ ܐܵܙܸܠ ܕܲܐܟܼܝܼ ܕܟܬܝܼܒܼܵܐ ܝܠܹܗ ܥܲܠܘܼܗܝ: ܐܝܼܢܵܐ ܘܵܝ ܠܗ̇ܘ ܓܲܒܼܪܵܐ، ܕܒܐܝܼܕܹܗ ܒܪܘܿܢܹܗ ܕܐ݇ܢܵܫܵܐ ܦܵܐܸܫ ܣܘܼܦܝܵܐ: ܨܦܵܝܝܼ ܝܼܗ݇ܘܵܐ ܠܗ̇ܘ ܓܲܒܼܪܵܐ، ܕܐܸܢ ܠܵܐ ܗܵܘܹܐ ܗ݇ܘܵܐ ܦܝܼܫܵܐ ܝܠܝܼܕܵܐ: ܚܸܪܗ݇ܘܿܢ ܬܲܠܡܝܼܕܹ̈ܐ ܚܲܕ݇ ܒܗ̇ܘ ܐ݇ܚܹܪ݇ܢܵܐ، ܤܵܒܵܒ ܠܹܐ ܗ݇ܘܵܘ ܒܝܼܕܵܥܵܐ ܕܥܲܠ ܡܵܢܝܼ ܐ݇ܡܸܪܹܗ. ܐܝܼܢܵܐ ܐܝܼܬ ܗ݇ܘܵܐ ܚܲܕ݇ ܡ̣ܢ ܬܲܠܡܝܼܕܘܼ̈ܗܝ ܕܓܸܢܝܵܐ ܗ݇ܘܵܐ ܒܥܘܼܒܹܗ، ܗ̇ܘ ܕܡܲܚܸܒ ܗ݇ܘܵܐ ܠܹܗ ܝܑܼܫܘܿܥ. ܠܐܵܗܵܐ ܪܡܸܙܠܹܗ ܫܸܡܥܘܿܢ ܟܹܐܦܵܐ ܕܒܵܩܸܪܹܗ ܕܡܵܢܝܼ ܝܑܼܠܹܗ ܗ̇ܘ ܕܐ݇ܡܸܪܹܗ ܒܘܼܬ ܕܝܼܘܼܗܝ. ܘܢܦܸܠܹܗ ܗ̇ܘ ܬܲܠܡܝܼܕܵܐ ܥܲܠ ܚܵܕܝܹܗ ܕܝܼܫܘܿܥ، ܘܐ݇ܡܸܪܹܗ ܐܸܠܹܗ: ܡܵܪܝܼ ܡܵܢܝܼ ܝܠܹܗ ܐܵܗܵܐ؟ ܓ̰ܘܼܘܸܒܠܹܗ ܝܑܼܫܘܿܥ ܘܐ݇ܡܸܪܹܗ: ܗ̇ܘ ܝܼܠܹܗ ܕܛܲܡܫܸܢ ܠܲܚܡܵܐ ܘܝܲܗܒ̣ܸܢ ܐܸܠܹܗ. ܘܛܡܸܫܠܹܗ ܝܑܼܫܘܿܥ ܠܲܚܡܵܐ ܘܝܘܼܗܒ̣ܸܠܹܗ ܠܝܼܗܘܼܕܵܐ ܒܲܪ ܫܸܡܥܘܿܢ ܤܟܼܲܪܝܘܼܛܵܐ. ܘܒܵܬ݇ܪ ܠܲܚܡܵܐ ܗ̇ܝܓܵܗ̇ ܥܒ̣ܸܪܹܗ ܒܝܼܹܗ ܤܵܛܵܢܵܐ. ܓ̰ܘܼܘܸܒܠܹܗ ܝܼܗܘܼܕܵܐ ܡܣܲܦܝܵܢܵܐ ܘܐ݇ܡܸܪܹܗ: ܩܵܡܘܿ ܐܵܢܵܐ ܝܘܸܢ ܪܵܒܝܼܝܼ؟ ܐܵܡܸܪ ܐܸܠܹܗ ܝܑܼܫܘܿܥ: ܐܲܢ݇ܬ ܐ݇ܡܸܪܘܼܟܼ. ܐܝܼܢܵܐ ܟܲܕ ܒܹܐܟܼܵܠܵܐ ܗ݇ܘܵܘ: ܫܩܸܠܹܗ ܝܑܼܫܘܿܥ ܠܲܚܡܵܐ ܘܒܘܼܪܸܟܼܠܹܗ ܘܩܨܹܐܠܹܗ ܘܝܘܼܗ݇ܒܼܸܠܹܗ ܠܬܲܠܡܝܼ̈ܕܘܼܗܝ ܘܐ݇ܡܸܪܹܗ: ܫܩܘܼܠܘܿܢ ܐ݇ܟܼܘܼܠܘܿܢ: ܐܵܗܵܐ ܝܼܠܹܗ ܦܲܓܼܪܝܼ. ܘܫܩܸܠܹܗ ܟܵܣܵܐ ܘܫܘܼܟܸܪܹܗ ܘܝܘܼܗ݇ܒܼܸܠܹܗ ܐܸܠܲܝܗܝ ܘܐ݇ܡܸܪܹܗ: ܫܩܘܼܠܘܿܢ ܫܬܹܝܡܘܿܢ ܡܸܢܹܗ ܟܠܵܘܟܼܘܿܢ. ܐܵܗܵܐ ܝܼܠܹܗ ܕܸܡܝܼ ܕܕܝܵܬܹܩܹܐ ܚܲܕܬܵܐ ܕܚܠܵܦ ܪܵܒܵܐ ܦܝܵܫܵܐ ܝܠܹܗ ܬܘܼܦܚܵܐ ܠܫܘܼܒܼܩܵܢܵܐ ܕܚܛܵܗܹ̈ܐ: ܐܝܼܢܵܐ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ: ܕܠܹܐ ܫܵܬܸܢ ܡ̣ܢ ܐܵܕܝܼܵܐ ܡ̣ܢ ܐܵܗܵܐ ܝܲܠܕܵܐ ܕܓܸܦܬܵܐ: ܗܲܠ ܝܵܘܡܵܐ ܕܒܝܼܹܗ ܫܵܬܸܢܹܗ ܥܲܡܵܘܟܼܘܿܢ ܚܲܕܬܵܐ ܒܡܲܠܟܘܼܬܹܗ ܕܒܵܒܝܼ. ܘܫܘܼܒܸܚܠܗ݇ܘܿܢ ܘܦܠܸܛܠܗ݇ܘܿܢ ܠܛܘܼܪܵܐ ܕܙܲܝܬܹܐ.
♱♱♱♱♱♱♱♱♱