ܥܐܕܐ ܕܝܠܕܐ

 

ܐܹܫܲܥܝܵܐ؛ ܙ؛ 10‐16 ܛ؛ 1‐4، 6‐8

ܬܸܒ̣ܘ ܘܲܫܠܵܘ ܢܒ̣ܝܼܘܼܬܹܗ ܕܐܹܫܲܥܝܵܐ؛ ܐܲܚܲܝ̈ ܒܲܪܸܟ̣ܡܵܪܝ܀

 

ܘܡܘܼܙܝܸܕܠܹܗ ܡܵܪܝܵܐ ܠܹܐܡܵܪܵܐ ܠܐܵܚܲܙ؛ ܛܠܘܿܒܠܘܼܟܼ ܢܝܼܫܲܢܩܵܐ ܡ̣ܢ ܡܵܪܝܵܐ ܐܲܠܵܗܘܼܟܼ؛ ܡ̣ܢ ܥܘܼܡܩܵܐ ܛܠܘܿܒ ܝܲܢ ܡ̣ܢ ܡܪܵܘܡܵܐ.܀ ܘܐ݇ܡܸܪܹܗ ܐܵܚܲܙ ܠܹܐ ܛܵܠܒܸܢ ܘܠܹܐ ܓ̰ܲܪܒܸܢ ܠܡܵܪܝܵܐ ܐܲܠܵܗ‌ܝܼ.܀ ܘܐ݇ܡܸܪܹܗ ܫܸܡܥܘܿܢ ܝܵܐ ܒܲܝܬܹܗ ܕܕܵܘܝܼܕܼ. ܠܹܐ ܝ݇ܠܵܗ̇ ܒܲܣܵܐ ܩܵܬܵܘܟ̣ܘܿܢ ܕܡܲܓ̰ܗ݇ܝܼܬܘܿܢ ܠܐ݇ܢܵܫܵܐ؛ ܐܸܠܵܐ ܕܡܲܓ̰ܗ݇ܝܼܬܘܿܢ ܐܘܼܦ ܠܐܲܠܵܗ‌ܝܼ.܀ ܒܘܼܬ ܕܐܵܗܵܐ؛ ܒܸܬ ܝܵܗ݇ܒ̣ܸܠ ܠܵܘܟ̣ܘܿܢ ܡܵܪܝܵܐ ܐܲܠܵܗܵܐ ܢܝܼܫܲܢܩܵܐ؛ ܗܵܐ ܒܬܘܼܠܬܵܐ ܒܸܬ ܒܵܛܢܵܐ ܘܒܸܬ ܗܲܨܠܵܐ ܒܪܘܿܢܵܐ؛ ܘܫܸܡܹܗ ܒܸܬ ܦܵܐܹܫ ܩܸܪܝܵܐ ܥܲܡܵܢܘܼܐܹܝܠ.܀ ܩܪܘܼܫܬܵܐ ܘܕܸܒ̣ܫܵܐ ܒܸܬ ܐܵܟ̣ܸܠ؛ ܕܝܵܕܸܥ ܠܡܲܣܠܘܼܝܹܐ ܒܝܼܫܬܵܐ ܘܠܓܵܒܘܿܝܹܐ ܛܵܒ̣ܬܵܐ.܀ ܣܵܒܵܒ ܕܡ̣ܢ ܩܵܕ݇ܡ ܕܝܵܕܸܥ ܝܵܠܵܕ݇ܐ ܠܡܲܣܠܘܼܝܹܐ ܒܝܼܫܬܵܐ ܘܠܓܵܒܘܿܝܹܐ ܛܵܒ̣ܬܵܐ ܒܸܬ ܦܵܝܫܵܐ ܫܒ̣ܝܼܩܬܵܐ ܐܲܪܥܵܐ ܕܡܘܼܥܝܸܩܵܐ ܝ݇ܘܸܬ̇ ܓܵܘܵܗ̇ ܡ̣ܢ ܩܵܕ݇ܡ ܬܪܹܝ ܡܲܠܟ̈ܘܼܗ̇.܀ ܡܘܼܠܝܸܙܠܵܗ̇ ܐܲܪܥܵܐ ܕܙܒ̣ܘܿܠܘܿܢ ܘܐܲܪܥܵܐ ܕܢܲܦ̮ܬܵܠܝܼ؛ ܗܘܼܟܡܵܐ ܚܘܼܠܸܢܹܗ؛ ܐܘܼܪܚܵܐ ܕܝܵܡܵܐ ܡܲܪ̈ܙܵܢܵܢܹܐ ܕܢܲܗܪܵܐ ܕܝܘܿܪܕܢܵܢ؛ ܓܠܝܼܠܵܐ ܕܛܵܝܸܦܹ̈ܐ. ܛܵܝܸܦܵܐ ܕܒܸܚܕܵܪܵܐ ܗ݇ܘܵܐ ܒܚܸܫܟܵܐ ܒܲܗܪܵܐ ܓܘܼܪܵܐ ܚܙܹܐܠܗ݇ܘܿܢ؛ ܘܐܵܢܝܼ ܕܝ݇ܬܝܼܒ̣ܹܐ ܗ݇ܘܵܘ ܒܐܲܪܥܵܐ ܕܛܸܠܵܢܝܼܵܬܹ̈ܐ ܕܡܵܘܬܵܐ؛ ܒܲܗܪܵܐ ܙܪܸܩܠܹܗ ܐܸܠܲܝܗ‌ܝ؛ ܓܘܼܪܘܸܣܠܘܼܟܼ ܛܵܝܸܦܵܐ ܘܩܵܐ ܕܝܼܹܗ ܡܘܼܙܝܸܕܠܘܼܟܼ ܚܲܕܘܼܬܵܐ؛ ܚܕܹܐܠܗ݇ܘܿܢ ܩܵܕ݇ܡܘܼܟܼ ܐܲܝܟܼ ܕܐܵܢܝܼ ܕܚܵܕܝܼ ܒܥܸܕܵܢܵܐ ܕܚܸܨܕܵܐ؛ ܘܐܲܝܟܼ ܕܐܵܢܝܼ ܕܦܵܨܚܝܼ ܐܝܼܡܲܢ ܕܦܲܠܓ݇ܝܼ ܣܠܵܒܵܐ.܀ ܣܵܒܵܒ ܕܝܵܠܵܕ݇ܐ ܦܸܫܠܹܗ ܗܘܼܨܠܵܐ ܩܵܬܲܢ ܘܒܪܘܿܢܵܐ ܦܸܫܠܹܗ ܝܘܼܗܒ̣ܵܐ ܩܵܬܲܢ؛ ܘܗ݇ܘܹܐܠܹܗ ܗܘܼܟܡܹܗ ܥܲܠ ܪܘܼܦ̮ܫܹܗ؛ ܘܦܸܫܠܹܗ ܩܸܪܝܵܐ ܫܸܡܹܗ ܕܘܼܡܵܪܵܐ ܘܡܵܠܘܿܟ̣ܵܐ؛ ܐܲܠܵܗܵܐ ܓܲܢ݇ܒܵܪܵܐ ܕܥܵܠܡܹ̈ܐ؛ ܫܲܠܝܼܛܵܐ ܕܫܠܵܡܵܐ. ܠܡܲܙܝܘܼܕܹܐ ܗܘܼܟܡܹܗ؛ ܘܲܠܫܠܵܡܹܗ ܠܲܝܬ̇ ܬܸܚܘܼܒ؛ ܥܲܠ ܟܘܼܪܣܝܵܐ ܕܕܵܘܝܼܕܼ ܘܥܲܠ ܡܲܠܟܘܼܬܹܗ؛ ܕܗܵܕܸܪܵܗ̇ ܘܣܵܢܸܕܠܵܗ̇ ܒܕܝܼܘܵܢ ܘܒܙܲܕܝܼܩܘܼܬܵܐ؛ ܡ̣ܢ ܐܵܕܝܼܵܐ ܘܗܲܠ ܥܵܠܲܡ. ܛܢܵܢܵܐ ܕܡܵܪܝܵܐ ܚܲܝܠܬܵܢܵܐ ܒܸܬ ܥܵܒ̣ܸܕ ܐܵܗܵܐ.܀

 

ܚܲܒ̣ܪܹܗ

 

ܡܝܼܟ̣ܵܐ؛ ܕ؛ 1‐4 ܗ؛ 2‐5. 7‐10

ܫܠܵܘ ܢܒ̣ܝܼܘܼܬܹܗ ܕܡܝܼܟ̣ܵܐ؛ ܐܲܚܲܝ̈ ܒܲܪܸܟ̣ܡܵܪܝ.

 

ܘܒܸܬ ܗܵܘܹܐ ܒܝܵܘܡܵܢܹ̈ܐ ܐ݇ܚܵܪ̈ܵܝܹܐ؛ ܛܘܼܪܵܐ ܕܒܲܝܬܵܐ ܕܡܵܪܝܵܐ ܬܘܼܪܨܵܐ ܒܪܹܫ ܟܠܲܝܗ‌ܝ ܛܘܼܪ̈ܵܢܹܐ؛ ܘܒܘܼܫ ܪܵܡܵܐ ܡ̣ܢ ܪ̈ܘܼܡܝܵܬܹܐ؛ ܘܒܸܬ ܓ̰ܲܡܥܝܼ ܐܸܠܹܗ ܟܠܲܝܗ‌ܝ ܛܵܝܸܦܹ̈ܐ.܀ ܘܒܸܬ ܐܵܙܠ݇ܝܼ ܪܵܒܵܐ ܛܵܝܸܦܹ̈ܐ ܘܒܸܬ ܐܵܡܪܝܼ؛ ܬܹܐܡܘܼܢ ܐܵܣܩܲܚ ܠܛܘܼܪܵܐ ܕܡܵܪܝܵܐ؛ ܘܠܒܲܝܬܵܐ ܕܐܲܠܵܗܵܐ ܕܝܲܥܩܘܿܒ̣؛ ܘܡܲܠܸܦܠܲܢ ܡ̣ܢ ܐܘܼܪ̈ܚܵܬܹܗ؛ ܘܚܵܕܪܵܚ ܒܓ̰ܵܕܵܘܵܬܹ̈ܗ؛ ܣܵܒܵܒ ܡ̣ܢ ܨܸܗܝܘܿܢ ܒܸܬ ܦܵܠܸܛ ܢܵܡܘܿܣܵܐ ܘܗܹܡܸܙܡܲܢ ܕܡܵܪܝܵܐ ܡ̣ܢ ܐܘܿܪܸܫܠܹܡ.܀ ܒܸܬ ܕܵܐܹܢ ܕܝܼܢܵܐ ܓܵܘ ܛܵܝܸܦܹ̈ܐ؛ ܘܡܲܢܟ̣ܸܣ ܠܡܸܠܲܬܹ̈ܐ ܚܲܝܠܵܢܹ̈ܐ ܕܪܸܚܩܵܐ. ܘܒܸܬ ܚܵܫܠܝܼ ܣܲܝܦܲܝܗ‌ܝ ܠܣܸܟܵܟܹ̈ܐ ܕܦܕܵܢܵܐ ܘܪ̈ܘܼܡܚܵܬܲܝܗ‌ܝ ܠܡܲܓܠܹ̈ܐ؛ ܘܠܹܐ ܫܵܩܸܠ ܛܵܝܸܦܵܐ ܥܲܠ ܛܵܝܸܦܵܐ ܣܲܝܦܵܐ؛ ܘܡܸܕܪܹܐ ܠܹܐ ܝܵܠܦܝܼ ܦܠܵܫܵܐ.܀ ܐܝܼܢܵܐ ܐܲܢ݇ܬ̇ܝ ܒܹܝܬ̣ܠܚܸܡ ܐܵܦܲܪܬܵܐ؛ ܙܥܘܿܪܬܵܐ ܝ݇ܘܵܬ̇ܝ ܕܗܵܘܝܵܬ̇ܝ ܒܐܲܠܦܹ̈ܐ ܕܲܝܗܘܼܕܵܐ؛ ܡܸܢܵܟ̣ܝ ܒܸܬ ܦܵܠܸܛ ܡܲܠܟܵܐ ܕܗܵܘܹܐ ܥܲܠ ܝܼܣܪܵܝܹܠ؛ ܘܦܠܵܛܹܗ ܡ̣ܢ ܫܘܼܪܵܝܵܐ؛ ܘܡ̣ܢ ܝܵܘܡܵܢܹ̈ܐ ܕܥܵܠܡܵܐ.܀ ܡܐܵܕܝܼܵܐ ܒܸܬ ܣܵܦܹܐܠܗ݇ܘܿܢ ܗܲܠ ܙܲܒ̣ܢܵܐ ܕܝܵܠܕܵܗ̇ ܗܲܨܠܵܢܬܵܐ؛ ܘܣܵܡܵܐ ܦܝܼܫܵܐ ܕܐܵܚܘܿܢܘܵܬ̈ܘܼܗ‌ܝ ܒܸܬ ܕܵܝܪܝܼ ܠܟܸܣ ܒܢܲܝ̈ ܝܼܣܪܵܝܹܠ.܀ ܘܒܸܬ ܩܵܐܹܡ ܘܡܲܪܥܹܐ ܒܙܲܪܒܹܗ ܕܡܵܪܝܵܐ؛ ܘܒܐܝܼܩܵܪܵܐ ܕܫܸܡܵܐ ܕܡܵܪܝܵܐ ܐܲܠܵܗܹܗ ܘܒܸܬ ܕܵܝܪܝܼ؛ ܣܵܒܵܒ ܕܡ̣ܢ ܐܵܕܝܼܵܐ ܒܸܬ ܓܲܪܘܸܣ ܗܲܠ ܠܡܲܪ̈ܙܵܢܹܐ ܕܐܲܪܥܵܐ. ܘܒܸܬ ܗܵܘܹܐ ܫܠܵܡܵܐ؛ ܘܐܵܬܘܿܪܵܝܵܐ ܐܝܼܡܲܢ ܕܐܵܬܹܐ ܠܐܲܬܪܲܢ ܘܦܵܣܸܥ ܓܵܘ ܕܵܪ̈ܵܬܲܢ؛ ܒܸܬ ܡܲܩܸܡ ܥܲܠܹܗ ܫܲܒ̣ܥܵܐ ܪ̈ܵܥܝܹܐ؛ ܘܬܡܲܢܝܵܐ ܓܘܼܪ̈ܵܢܹܐ ܕܐ݇ܢܵܫܹ̈ܐ.܀ ܘܒܸܬ ܗܵܘܹܐ ܣܵܡܵܐ ܦܝܼܫܵܐ ܕܝܲܥܩܘܿܒ̣ ܓܵܘ ܛܵܝܸܦܹ̈ܐ ܪܵܒܵܐ ܐܲܝܟܼ ܐܲܪܝܵܐ ܓܵܘ ܗܲܝܘܵܢܹ̈ܐ ܕܡܲܝܫܵܐ؛ ܘܐܲܝܟܼ ܓܘܼܪܝܵܐ ܕܐܲܪܝܵܐ ܓܵܘ ܦܸܣܩܵܐ ܕܥܸܪ̈ܒܹܐ. ܕܐܝܼܡܲܢ ܕܦܵܪܸܫ ܘܩܲܛܸܥ؛ ܒܸܬ ܫܵܡܸܛ ܘܠܲܝܬ̇ ܡܦܲܨܝܵܢܵܐ؛ ܒܸܬ ܝܵܪܡܵܐ ܐܝܼܕܘܼܟܼ ܥܲܠ ܣܵܢܝܵܢ̈ܘܼܟܼ؛ ܘܟܠܲܝܗ‌ܝ ܕܸܫ̰ܡܸܢ̈ܘܼܟܼ ܒܸܬ ܬܵܠܩܝܼ܀

 

 

 

♱♱♱♱♱♱♱♱♱♱♱♱♱♱

ܥܹܐܕܵܐ ܕܝܲܠܕܵܐ

ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ

ܕܲܠܘܵܬܼ ܓܵܠܵܛܵܝܹ̈ܐ ܐܲܚܲܝ̈ ܒܲܪܸܟܼܡܵܪܝ܀

ܐܵܚܘܿܢܘܵܬ̈ܝܼ؛ ܐܲܝܟܼ ܕܓܵܘ ܒܢܲܝ̈ܢܵܫܵܐ ܒܹܐܡܵܪܵܐ ܝ݇ܘܸܢ ܕܐܘܼܦ ܕܝܵܬܹܩܹܐ ܕܚܲܕ݇ ܐ݇ܢܵܫܵܐ ܐܝܼܡܲܢ ܕܦܸܫܠܵܗ̇ ܡܘܼܩܘܝܼܬܵܐ. ܗܸܟ̃ ܚܲܕ݇ ܐ݇ܢܵܫܵܐ ܠܹܐ ܡܲܣܠܹܐ ܠܵܗ̇ ܝܲܢ ܫܲܚܠܸܦ ܓܵܘܵܗ̇ ܚܲܕ݇ ܡܸܢܕܝܼ* ܩܵܐ ܐܲܒܼܪܵܗܵܡ ܦܸܫܠܸܗ ܝܘܼܗܒܼܵܐ ܩܵܘܠܵܐ ܘܩܵܐ ܙܲܪܥܹܗ. ܘܠܵܐ ܐ݇ܡܸܪܹܗ ܐܸܠܹܗ ܩܵܐ ܙܲܪ̈ܥܘܼܟܼ ܐܲܝܟܼ ܪܵܒܹܐ؛ ܐܸܠܵܐ ܩܵܐ ܙܲܪܥܘܼܟܼ ܐܲܝܟܼ ܚܲܕ݇؛ ܗ̇ܘ ܕܝܼܠܹܗ ܡܫܝܼܚܵܐ* ܐܝܼܢܵܐ ܐܵܢܵܐ ܒܹܐܡܵܪܵܐ ܝ݇ܘܸܢ؛ ܕܝܵܬܹܩܹܐ ܕܡ̣ܢ ܩܵܕ݇ܡܵܝܬܵܐ ܦܸܫܠܵܗ̇ ܡܘܼܩܘܝܼܬܵܐ ܡ̣ܢ ܐܲܠܵܗܵܐ ܒܡܫܝܼܚܵܐ؛ ܫܲܪܥܲܬ ܗ̇ܝ ܕܗܘܹܐܠܵܗ̇ ܡ̣ܢ ܒܵܬ̄ܪ ܐܲܪܒܲܥܡܵܐܐ ܘܬܠܵܬܝܼ ܫܸܢܹ̈ܐ؛ ܠܹܐ ܡܵܨܝܵܐ ܕܡܲܣܠܝܼܵܐ ܠܵܗ̇ ܝܲܢ ܒܲܛܠܵܐ ܠܩܵܘܠܵܐ* ܐܝܼܢܵܐ ܐܸܢ ܡ̣ܢ ܫܲܪܥܲܬ ܝܼܠܵܗ̇ ܝܵܪܬܘܼܬܵܐ؛ ܒܲܣ ܠܵܐ ܗܘܹܐܠܵܗ̇ ܡ̣ܢ ܩܵܘܠܵܐ؛ ܘܩܵܐ ܐܲܒܼܪܵܗܵܡ ܒܩܵܘܠܵܐ ܝܘܼܗܒܸܠܹܗ ܐܲܠܵܗܵܐ* ܒܲܣ ܫܲܪܥܲܬ ܡܘܼܕܝܼ ܝ݇ܠܵܗ̇ ܒܘܼܬ ܩܠܲܒܬܵܐ ܦܸܫܠܵܗ̇ ܡܘܼܙܝܸܕܬܵܐ ܗܲܠ ܕܐܵܬܹܐ ܙܲܪܥܵܐ ܗ̇ܘ ܕܩܵܬܹܗ ܗܘܹܐܠܹܗ ܩܵܘܠܵܐ. ܘܐܵܗܵܐ ܫܲܪܥܲܬ ܦܹܫܠܵܗ̇ ܝܘܼܗܒܸܠܬܵܐ ܒܝܼـܲܕ ܡܲܠܲܐܟܹ̈ܐ ܒܐܝܼܕܵܐ ܕܢܵܘܸܢܓ̰ܝܼ* ܐܝܼܢܵܐ ܢܵܘܸܢܓ̰ܝܼ ܠܹܐ ܝ݇ܠܹܗ ܕܚܲܕ݇؛ ܐܝܼܢܵܐ ܐܲܠܵܗܵܐ ܚܲܕ݇ ܝܼܠܹܗ* ܒܲܣ ܫܲܪܥܲܬ ܕܲܪܩܘܼܒܼܠ ܝܼܠܵܗ̇ ܕܩܵܘܠܵܐ ܕܐܲܠܵܗܵܐ؟ ܚܵܣܠܹܗ! ܣܵܒܵܒ ܐܸܢ ܦܝܼܫܬܵܐ ܝܗ݇ܘ̣ܵܐ ܝܘܼܗܒܸܠܬܵܐ ܫܲܪܥܲܬ؛ ܐܲܝܢܝܼ ܕܡܵܨܝܵܐ ܗ݇ܘ̣ܵܐ ܠܡܲܚܘܼܝܹܐ؛ ܒܣܲܪܲܣܬܘܼܬܵܐ ܡ̣ܢ ܫܲܪܥܲܬ ܒܸܬ ܗܵܘܝܵܐ ܗ݇ܘ̣ܵܐ ܙܕܝܼܩܘܼܬܵܐ* ܐܸܠܵܐ ܚܒܼܸܫܠܹܗ ܟܬܵܒܼܵܐ ܟܠ ܡܸܢܕܝܼ ܬܚܘܿܬ ܚܛܝܼܬܵܐ ܕܩܵܘܠܵܐ ܒܗܲܝܡܵܢܘܼܬܵܐ ܕܝܼܫܘܿܥ ܡܫܝܼܚܵܐ ܦܵܐܸܫ ܝܘܼܗ݇ܒܼܵܐ ܩܵܐ ܕܐܵܢܝܼ ܕܗܲܡܸܢܝܼ* ܡ̣ܢ ܩܵܕ݇ܡ ܕܐܵܬܝܵܐ ܗ݇ܘ̣ܵܐ ܗܲܝܡܵܢܘܼܬܵܐ ܫܲܪܥܲܬ ܟܹܐ ܢܵܛܪܵܐ ܗ݇ܘ̣ܵܐ ܠܲܢ؛ ܟܲܕ ܕܒܼܝܼܩܹܐ ܝ݇ܘܲܚ ܗ݇ܘ̣ܵܘ ܠܗܲܝܡܵܢܘܼܬܵܐ ܕܗܕܝܼܪܬܵܐ ܝܗ݇ܘ̣ܵܐ ܠܸܦܝܵܫܵܐ ܓܠܝܼܬܵܐ* ܗܲܕܟܼܵܐ؛ ܫܲܪܥܲܬ ܗܘܹܐܠܵܗ̇ ܡܲܠܦܲܢܬܵܐ ܩܵܬܲܢ ܠܟܸܣ ܡܫܝܼܚܵܐ. ܕܡ̣ܢ ܗܲܝܡܵܢܘܼܬܵܐ ܦܵܝܫܲܚ ܡܘܼܟܫܸܛܹܐ* ܐܝܼܢܵܐ ܐܝܼܡܲܢ ܕܐ݇ܬܹܐܠܵܗ̇ ܗܲܝܡܵܢܘܼܬܵܐ؛ ܠܵܐ ܗ݇ܘܹܐܠܲܢ ܬܚܘܿܬ ܐܝܼܕܵܐ ܕܡܲܠܦܵܢܹ̈ܐ* ܣܵܒܵܒ ܟܠܵܘܟܼܘܿܢ ܒܢܘܼܢܹ̈ܐ ܕܐܲܠܵܗܵܐ ܝ݇ܬܘܿܢ ܒܗܲܝܡܵܢܘܼܬܵܐ ܕܝܼܫܘܿܥ ܡܫܝܼܚܵܐ* ܣܵܒܵܒ ܐܵܢܝܼ ܕܒܡܫܝܼܚܵܐ ܥܡܸܕܠܵܘܟܼܘܿܢ ܠܡܫܝܼܚܵܐ ܠܒܸܫܠܵܘܟܼܘܿܢ* ܠܲܝܬ ܝܗܘܼܕܵܝܵܐ ܘܠܵܐ ܐܲܪܡܵܝܵܐ؛ ܘܠܵܐ ܪܹܓܵܐ ܘܠܵܐ ܒܲܪ ܚܹܐܪܹ̈ܐ؛ ܠܵܐ ܐܘܼܪܙܵܐ ܘܠܵܐ ܢܸܩܒܼܵܐ. ܣܵܒܵܒ ܟܠܵܘܟܼܘܿ. ܚܲܕ݇ ܝܼܬܘܿܢ ܒܝܼܫܘܿܥ ܡܫܝܼܚܵܐ* ܘܐܸܢ ܕܡܫܝܼܚܵܐ ܝܼܬܘܿܢ؛ ܒܲܣ ܙܲܪܥܹܗ ܕܐܲܒܼܪܵܗܵܡ ܝܼܬܘܿܢ ܘܝܪ̈ܘܿܬܹܐ ܒܩܵܘܠܵܐ* ܐܝܼܢܵܐ ܒܸܐܡܵܪܵܐ ܝ݇ܘܸܢ ܐܸܠܵܘܟܘܿܢ؛ ܟܡܵܐ ܕܝܵܪܘܿܬܵܐ ܙܥܘܿܪܵܐ ܝ݇ܠܹܗ؛ ܠܹܐ ܝ݇ܠܹܗ ܦܪܝܼܫܵܐ ܡ̣ܢ ܪܸܓܵܐ ܐܘܼܦܢ ܕܝܼܠܹܗ ܡܵܪܵܐ ܕܟܠܲܝܗܝ* ܐܸܠܵܐ ܬܚܘܿܬ ܐܝܼܕܵܐ ܕܘܲܟܝܼܠܹ̈ܐ ܘܡܲܠܦܵܢܹ̈ܐ ܝ݇ܠܹܗ؛ ܗܲܠ ܕܗ̇ܝ ܥܕܵܢܵܐ ܪܫܝܼܡܬܵܐ ܒܝܼـܲܕ ܒܵܒܹܗ* ܗܲܕܟܼܵܐ ܐܘܸܦ ܐܲܚܢܲܢ ܐܝܼܡܲܢ ܕܝܵܠܹ̈ܕ݇ܐ ܝ݇ܘܲܚ ܗ݇ܘ̣ܵܘ؛ ܬܚܘܿܬ ܐܸܣܛܘܼܟܼܣܹ̈ܐ ܕܐܵܗܵܐ ܕܘܼܢܝܹܐ ܙܘܼܒܛܸܢܹܐ ܝ݇ܘܲܚ ܗ݇ܘ̣ܵܘ* ܐܝܼܢܵܐ ܐܝܼܡܲܢ ܕܡܛܸܐܠܹܗ ܫܘܼܠܵܡܵܐ ܕܙܲܒܼܢܵܐ؛ ܫܘܼܕܸܪܹܗ ܐܲܠܵܗܵܐ ܠܒܪܘܼܢܹܗ ܘܗ݇ܘܹܐ ܠܹܗ ܡ̣ܢ ܒܲܟܼܬܵܐ؛ ܘܗ݇ܘܹܐܠܹܗ ܬܚܘܿܬ ܫܲܪܥܲܬ؛ ܩܵܐ ܕܙܵܒܸܢ ܠܐܵܢܝܼ ܕܝܼܢܵܐ ܬܚܘܿܬ ܫܲܪܥܲܬ ܘܩܵܒܠܝܼ ܡܲܬܲܒܼܬܵܐ ܒܫܵܘܦܵܐ ܕܒܢܘܼܢܹ̈ܐ. ܘܡ̣ܢ ܣܵܒܵܒ ܕܝܼܬܘܿܢ ܒܢܘܼܢܹ̈ܐ؛ ܫܘܼܕܸܪܹܗ ܐܲܠܵܗܵܐ ܪܘܼܚܵܐ ܕܒܪܘܼܢܹܗ ܓܵܘ ܠܸܒܵܘܵܬܵܘ̈ܟܼܘܿܢ ܗ̇ܝ ܕܒܸܩܪܵܝܵܐ ܝ݇ܠܵܗ̇ ܐܲܒܵܐ ܒܵܒܲܢ܀

 

 

♱♱♱♱♱♱♱♱♱♱♱♱♱♱

ܥܐܕܐ ܕܝܠܕܗ ܕܡܪܢ ܕܒܼܒܼܣܪ

ܠܘܩܐ ܒ: 1 ‐ 21

ܐܘܢܓܠܝܘܢ ܩܕܝܫܐ ܕܡܪܢܝܫܘܥ ܡܫܝܚܐ ܟܪܘܙܘܬܼܐ ܕܠܘܩܐ

ܐܝܼܢܵܐ ܗ݇ܘܹܐܠܵܗ̇ ܒܐܵܢܝܼ ܝܵܘܡܵܢܹ̈ܐ: ܘܦܠܝܼܛܠܹܗ ܦܘܼܩܕܵܢܵܐ ܡ̣ܢ ܐܵܓܼܘܼܣܛܘܿܣ ܩܹܣܲܪ: ܕܦܵܐܸܫ ܟܬܝܼܒܼܵܐ ܟܠܹܗ ܥܲܡܵܐ ܕܐܘܼܚܕܵܢܹܗ: ܐܵܗܵܐ ܡܲܟܬܒܼܵܢܘܼܬܵܐ ܩܲܕ݇ܡܵܝܬܵܐ ܗ݇ܘܹܐܠܵܗ̇ ܒܗܘܼܟܡܵܐ ܕܩܸܘܪܝܼܢܘܿܣ ܒܣܘܼܪܝܼܵܐ. ܘܐܵܙܸܠ ܗ݇ܘܵܐ ܟܠܢܵܫܵܐ ܕܦܵܐܸܫ ܟܬܝܼܒܼܵܐ ܒܡܕܝܼܢ݇ܬܹܗ: ܐܝܼܢܵܐ ܐ݇ܣܝܼܩܠܹܗ ܐܘܿܦ ܝܵܘܣܸܦ ܡ̣ܢ ܢܲܨܪܲܬ ܡܕܝܼܢ݇ܬܵܐ ܕܓܠܝܼܠܵܐ ܠܝܼܗܘܼܕ: ܠܸܡܕܝܼܢ݇ܬܹܗ ܕܕܵܘܝܼܕ ܕܦܝܵܫܵܐ ܝܠܵܗ̇ ܩܪܝܼܬܵܐ ܒܹܝܬܠܚܸܡ: ܣܵܒܵܒ ܕܝܼܗَܘܵܐ ܡ̣ܢ ܒܲܝܬܹܗ ܘܡ̣ܢ ܫܲܪܒܬܹܗ ܕܕܵܘܝܼܕ: ܥܲܡ ܡܲܪܝܲܡ ܛܠܝܼܒܬܹܗ ܟܲܕ ܒܛܝܼܢܬܵܐ: ܕܬܵܡܵܐ ܦܵܐܸܫ ܟܬܝܼܒ̣ܵܐ: ܘܗ݇ܘܹܐܠܵܗ̇ ܕܟܲܕ ܐܵܢܝܼ ܬܵܡܵܐ: ܬܘܼܡܸܡܠܗ݇ܘܿܢ ܝܵܘܡܵܢܘܼ̈ܗ̇ ܕܝܵܠܕܵܐ ܗ݇ܘܵܐ. ܘܝܠܝܼܕܠܵܗ̇ ܒܪܘܿܢܵܐ ܒܘܼܟܼܪܵܐ: ܘܟܘܼܪܡܸܟܼܠܵܗ̇ ܐܸܠܹܗ ܒܒܲܢܕܹ̈ܐ ܘܕܪܹܐܠܵܗ̇ ܐܸܠܹܗ ܓܵܘ ܐܘܼܪܹܐ: ܣܵܒܵܒ ܕܠܲܝܬ ܗ݇ܘܵܘ ܠܗ݇ܘܿܢ ܕܘܼܟܬܵܐ ܐܲܝܟܵܐ ܕܫܸܪܝܹܐ ܝܗ݇ܘܵܘ. ܐܝܼܢܵܐ ܐܝܼܬ ܗ݇ܘܵܘ ܬܵܡܵܐ ܪ̈ܵܥܝܹܐ ܒܗ̇‌ܝ ܕܘܼܟܬܵܐ ܕܫܸܪܝܹܐ ܝܗ݇ܘܵܘ ܬܵܡܵܐ. ܘܒܸܢܛܵܪܵܐ ܒܲܕܠܵܐ ܕܠܸܠܝܵܐ ܥܲܠ ܦܸܣܩܲܝܗܝ. ܘܗܵܐ ܡܲܠܲܐܟܼܵܐ ܕܐܲܠܵܗܵܐ ܐ݇ܬܹܐܠܹܗ ܠܘܵܬܲܝܗܝ: ܘܬܸܫܒܘܼܚܬܹܗ ܕܡܵܪܝܵܐ ܡܘܼܢܗܸܪܵܗ̇ ܥܲܠܲܝܗܝ. ܘܙܕܝܼܥܠܗ݇ܘܿܢ ܙܕܘܿܥܬܵܐ ܪܲܒܬܵܐ. ܘܐ݇ܡܝܼܪܹܗ ܐܸܠܲܝܗܝ ܡܲܠܲܐܟܼܵܐ: ܠܵܐ ܙܵܕܥܝܼܬܘܿܢ، ܣܵܒܵܒ ܗܵܐ ܡܲܫܚܘܼܕܹܐ ܝܘܸܢ ܐܸܠܵܘܟܼܘܿܢ ܚܲܕܘܼܬܵܐ ܪܲܒܬܵܐ، ܕܒܸܕ ܗܵܘܝܵܐ ܠܟܠܹܗ ܥܵܠܡܵܐ. ܣܵܒܵܒ ܦܝܼܫܠܹܗ ܝܠܝܼܕܵܐ ܐܸܠܵܘܟܼܘܿܢ ܐܸܕܝܘܿܡ ܝܵܘܡܵܐ ܦܵܪܘܿܩܵܐ: ܕܝܼܠܹܗ ܡܵܪܝܵܐ ܡܫܝܼܚܵܐ ܒܡܕܝܼܢ݇ܬܹܗ ܕܕܵܘܝܼܕ. ܘܐܵܗܵܐ ܐܸܠܵܘܟܼܘܿܢ ܢܝܼܫܲܢܩܵܐ: ܒܸܕ ܡܲܫ݇ܟ̰ܚܝܼܬܘܿܢ ܝܲܠܵܕ݇ܐ ܟܪܝܼܟܼܵܐ ܒܒܲܢܕܹ̈ܐ ܘܡܘܼܬܒܼܵܐ ܒܐܘܼܪܹܐ: ܘܡ̣ܢ ܢܵܓܸܣܬܲܢ ܦܝܼܫܠܗ݇ܘܿܢ ܚܸܙܝܹܐ ܥܲܡ ܡܲܠܲܐܟܼܵܐ: ܚܲܝ̈ܠܵܘܵܬܹܐ ܪܵܒܵܐ ܕܫܡܲܝܵܐ، ܟܲܕ ܡܫܵܒܘܼܚܹܐ ܠܐܲܠܵܗܵܐ ܘܒܹܐܡܵܪܵܐ: ܬܸܫܒܘܼܚܬܵܐ ܠܐܲܠܵܗܵܐ ܒܲܡܪ̈ܵܘܡܹܐ: ܘܥܲܠ ܐܲܪܥܵܐ ܫܠܵܡܵܐ: ܘܣܲܒܼܪܵܐ ܛܵܒܼܵܐ ܠܲܒܼܢܲܝ̈ܢܵܫܵܐ. ܘܗ݇ܘܹܐܠܵܗ̇ ܕܟܲܕ ܐ݇ܙܝܼܠܗ݇ܘܿܢ ܡ̣ܢ ܠܘܵܬܲܝܗܝ ܡܲܠܲܐܟܼܹ̈ܐ ܠܸܫܡܲܝܵܐ، ܗܘܼܡܙܸܡܠܗ݇ܘܿܢ ܪ̈ܵܥܝܹܐ ܚܲܕ݇ ܥܲܡ ܕܗ̇ܘ ܐ݇ܚܹܪ݇ܢܵܐ ܘܐܵܡܪܝܼ: ܐܵܙܲܠ݇ܚ ܗܲܠ ܠܒܹܝܬܠܚܸܡ، ܘܚܵܙܲܚ ܠܐܵܗܵܐ ܗܹܡܸܙܡܵܢ ܕܗ݇ܘܹܐܠܵܗ̇، ܐܲܝܟ ܕܡܵܪܝܵܐ ܩܲܡ ܡܲܕܸܥܠܲܢ. ܘܐ݇ܬܹܐܠܗ݇ܘܿܢ ܒܡܲܠܝܵܙܬܵܐ ܘܡܘܼܫ݇ܟ̰ܸܚܠܗ݇ܘܿܢ ܠܡܲܪܝܲܡ ܘܠܝܵܘܤܸܦ ܘܠܝܲܠܵܕ݇ܐ ܕܡܘܼܬܒ̣ܵܐ ܒܐܘܼܪܹܐ. ܘܟܲܕ ܚܙܹܐܠܗ݇ܘܿܢ، ܡܘܼܕܸܥܠܗ݇ܘܿܢ ܠܗܹܡܸܙܡܵܢ ܕܦܝܼܫܠܵܗ̇ ܗܘܼܡܙܸܡܬܵܐ ܥܲܡܲܝܗܝ ܒܘܼܬ ܝܲܠܵܕ݇ܐ. ܘܟܠܲܝܗܝ ܕܫܡܝܼܥܠܗ݇ܘܿܢ ܥܘܼܓ̰ܸܒܠܗ݇ܘܿܢ ܥܲܠ ܐܲܝܢܝܼ ܕܦܝܼܫܠܗ݇ܘܿܢ ܗܘܼܡܙܸܡܹܐ ܐܸܠܲܝܗܝ ܡ̣ܢ ܪ̈ܵܥܝܹܐ. ܐܝܼܢܵܐ ܡܲܪܝܲܡ ܢܵܛܪܵܐ ܗ݇ܘܵܐ ܟܠܲܝܗܝ ܐܲܢܹܐ ܗܹܡܸܙ̈ܡܵܢܹܐ، ܘܬܲܚܡܸܢܵܐ ܗ݇ܘܵܐ ܒܠܸܒܘܼܗ̇. ܘܕܥܝܼܪܗ݇ܘܿܢ ܐܵܢܝܼ ܪ̈ܵܥܝܹܐ ܟܲܕ ܡܫܵܒܘܼܚܹܐ ܘܡܵܤܘܼܩܹܐ ܗܲܠܹܠܘܼܝܵܐ ܠܐܲܠܵܗܵܐ ܥܲܠ ܟܠ ܕܚܙܹܐܠܗ݇ܘܿܢ ܘܫܡܝܼܥܠܗ݇ܘܿܢ: ܕܲܐܟܼܝܼ ܕܦܝܼܫܠܹܗ ܗܘܼܡܙܸܡܵܐ ܥܲܡܲܝܗܝ.

 

♱♱♱♱♱♱♱♱♱♱♱♱♱♱