ܐܲܪܒܲܥܒܫܲܒܵܐ ܕܦܲܠܓܘܼܬ̣ܵܐ ܕܨܵܘܡܵܐ
ܒܪܝܼܬܵܐ؛ ܝܓ؛ 8‐ ܫܘܼܠܵܡܵܐ
ܬܸܒ̣ܘ ܘܲܫܠܵܘ ܒܪܝܼܬܵܐ ܣܸܦܪܵܐ ܩܲܕ݇ܡܵܝܵܐ ܕܐܘܿܪܵܝܬܵܐ؛
ܐܲܚܲܝ̈ ܒܲܪܸܟ̣ܡܵܪܝ܀
ܘܐ݇ܡܸܪܹܗ ܐܲܒ̣ܪܵܡ ܠܠܘܿܛ؛ ܠܵܐ ܚܘܼܫ ܗܵܘܝܵܐ ܡܲܩܪܲܨܬܵܐ ܒܹܝܠܝܼ ܘܐܸܠܘܼܟܼ؛ ܘܒܹܝܠ ܪ̈ܵܥܵܘܵܬܝܼ ܘܪ̈ܵܥܵܘܵܬܘܼܟܼ؛ ܣܵܒܵܒ ܕܓܲܒ̣ܪܹ̈ܐ ܐܵܚܘܿܢܘܵܬܹ̈ܐ ܝ݇ܘܲܚ.܀ ܗܵܐ ܟܠܵܗ̇ ܐܲܪܥܵܐ ܩܵܕ݇ܡܘܼܟܼ؛ ܦܪܘܿܫ ܡܸܢܝܼ. ܝܲܢ ܐܲܢ݇ܬ̇ ܠܝܲܡܝܼܢܵܐ ܘܐܵܢܵܐ ܠܣܸܡܵܠܵܐ؛ ܘܝܲܢ ܐܲܢ݇ܬ̇ ܠܣܸܡܵܠܵܐ ܘܐܵܢܵܐ ܠܝܲܡܝܼܢܵܐ. ܘܡܘܼܪܸܡܠܹܗ ܠܘܿܛ ܥܲܝܢ̈ܘܼܗܝ ܘܚܙܹܐܠܹܗ ܟܠܵܗ̇ ܐܲܪܥܵܐ ܕܝܘܿܪܕܢܵܢ؛ ܕܘܼܟܬܵܐ ܕܡܝܼܵܐ ܝ݇ܠܵܗ̇ ܡ̣ܢ ܩܵܕ݇ܡ ܕܡܲܚܪܸܒ̣ ܐܲܠܵܗܵܐ ܠܣܕܘܿܡ ܘܠܥܵܡܘܿܪܵܐ؛ ܐܲܝܟܼ ܦܲܪܕܲܝܣܵܐ ܕܐܲܠܵܗܵܐ؛ ܘܐܲܝܟܼ ܐܲܪܥܵܐ ܕܡܸܨܪܹܝܢ ܒܥܒ̣ܵܪܬܵܐ ܠܨܵܥܵܢ.܀ ܘܓܘܼܒܹܐܠܹܗ ܠܘܿܛ ܟܠܵܗ̇ ܐܲܪܥܵܐ ܕܝܘܿܪܕܢܵܢ؛ ܘܡܘܼܛܥܸܢܹܗ ܠܘܿܛ ܡ̣ܢ ܡܲܕܢܚܵܐ ܘܦܪܸܫܠܗ݇ܘܿܢ ܚܲܕ݇ ܡܗ̇ܘ ܐ݇ܚܹܪ݇ܢܵܐ.܀ ܐܲܒ̣ܪܵܡ ܝ݇ܬܸܒ̣ܠܹܗ ܒܐܲܪܥܵܐ ܕܟܢܲܥܢ ܘܠܘܿܛ ܝ݇ܬܸܒ̣ܠܹܗ ܒܡܵܬܘܵܬܹ̈ܐ ܕܟܵܟܲܪ؛ ܘܡܘܼܪܥܹܐܠܹܗ ܗܲܠ ܣܕܘܿܡ.܀ ܘܐ݇ܢܵܫܹ̈ܐ ܕܣܕܘܿܡ ܒܝܼܫܹ̈ܐ ܗ݇ܘܵܘ ܘܚܲܛܵܝܹ̈ܐ ܩܵܕٔܡ ܡܵܪܝܵܐ.܀ ܘܐ݇ܡܸܪܹܗ ܡܵܪܝܵܐ ܠܐܲܒ̣ܪܵܡ؛ ܡ̣ܢ ܒܵܬ݇ܪ ܕܦܪܸܫܠܹܗ ܠܘܿܛ ܡ̣ܢ ܠܟܸܣܠܹܗ؛ ܡܵܪܸܡ ܥܲܝܢ̈ܘܼܟܼ ܘܚܙܝܼ ܡ̣ܢ ܕܘܼܟܬܵܐ ܕܟܸܠܝܵܐ ܝ݇ܘܸܬ̇ ܠܓܲܪܒܝܵܐ ܘܠܬܲܝܡܢܵܐ ܘܡܲܕܢܚܵܐ ܘܡܲܥܪܒ̣ܵܐ.܀ ܣܵܒܵܒ ܟܠܵܗ̇ ܐܲܪܥܵܐ ܕܒܸܚܙܵܝܵܐ ܝ݇ܘܸܬ̇ ܐܸܠܘܼܟܼ ܒܸܬ ܝܵܗ݇ܒ̣ܸܢܵܗ̇ ܘܩܵܐ ܙܲܪܥܘܿܟܼ ܗܲܠ ܥܵܠܲܡ.܀ ܘܒܸܬ ܥܵܒ̣ܕܸܢܹܗ ܙܲܪܥܘܼܟܼ ܐܲܝܟܼ ܥܲܦܪܵܐ ܕܐܲܪܥܵܐ.܀ ܕܐܸܢ ܡܵܨܸܬ̇ ܠܸܡܢܵܝܵܐ ܥܲܦܪܵܐ ܕܐܲܪܥܵܐ؛ ܐܘܼܦ ܙܲܪܥܘܼܟܼ ܒܸܬ ܦܵܐܹܫ ܡܸܢܝܵܐ.܀ ܩܘܼܡ ܚܕܘܿܪ ܒܐܲܪܥܵܐ ܠܝܘܼܪܟ̣ܘܼܬܵܗ̇ ܘܦܸܬܝܘܼܬܵܗ̇؛ ܣܵܒܵܒ ܩܵܬܘܼܟܼ ܒܸܬ ܝܵܗ݇ܒ̣ܸܢܵܗ̇.܀ ܘܐ݇ܬܹܐܠܹܗ ܐܲܒ̣ܪܵܡ ܘܥܒ̣ܸܪܹܗ ܘܝ݇ܬܸܒ̣ܠܹܗ ܒܹܝܬ̣ ܒܲܠܘܼܛܵܐ ܕܡܲܡܪܹܐ ܐܵܡܘܿܪܵܝܵܐ ܕܓܵܘ ܚܸܒ̣ܪܘܿܢ ܘܒܢܹܐܠܹܗ ܬܵܡܵܐ ܡܲܕܒܚܵܐ ܠܡܵܪܝܵܐ܀
ܚܲܒ̣ܪܹܗ
ܝܼܫܘܿܥ ܒܲܪܢܘܿܢ؛ ܚ؛ 18‐30
ܫܠܵܘ ܟܬ̣ܵܒ̣ܵܐ ܕܝܼܫܘܿܥ ܒܲܪܢܘܿܢ؛ ܐܲܚܲܝ̈ ܒܲܪܸܟ̣ܡܵܪܝ܀
ܘܐ݇ܡܸܪܹܗ ܡܵܪܝܵܐ ܠܝܼܫܘܿܥ؛ ܡܵܪܸܡ ܐܝܼܕܘܼܟܼ ܒܪܘܼܡܚܵܐ ܥܲܠ ܥܵܝ؛ ܣܵܒܵܒ ܒܐܝܼܕ̈ܘܼܟܼ ܣܘܼܦܝܵܐ ܠܝܼ؛ ܘܡܘܼܪܸܡܠܹܗ ܝܼܫܘܿܥ ܪܘܼܡܚܵܐ ܕܕܒ̣ܝܼܩܵܐ ܗ݇ܘܵܐ ܒܐܝܼܕܹܗ ܥܲܠ ܡܕܝܼܢ݇ܬܵܐ.܀ ܘܟܡܹܐܢܵܐ ܩܸܡܠܹܗ ܒܡܲܠܝܲܙܬܵܐ ܡ̣ܢ ܕܘܼܟܬܹܗ؛ ܘܪܚܸܛܠܗ݇ܘܿܢ ܚܦܝܼܛܵܐܝܼܬ ܐܲܝܟܼ ܡܲܕܲܪܬܵܐ ܕܐܝܼܕܵܐ. ܥܒ̣ܸܪܗ݇ܘܿܢ ܠܡܕܝܼܢ݇ܬܵܐ ܘܕܒ̣ܝܼܩܵܐ ܠܗ݇ܘܿܢ؛ ܘܡܘܼܠܝܸܙܠܗ݇ܘܿܢ ܘܡܘܼܩܕܵܐ ܠܗ݇ܘܿܢ ܒܢܘܼܪܵܐ.܀ ܘܕܸܪܗ݇ܘܿܢ ܐ݇ܢܵܫܹ̈ܐ ܕܥܵܝ ܠܵܒܵܬ݇ܪܲܝܗܝ ܘܚܙܹܐܠܗ݇ܘܿܢ ܬܸܢܢܵܐ ܕܡܕܝܼܢ݇ܬܵܝܗܝ ܒܹܐܣܵܩܵܐ ܗܲܠ ܫܡܲܝܵܐ؛ ܘܠܵܐ ܗܘܹܐܠܵܗ̇ ܠܗ݇ܘܿܢ ܦܸܪܣܲܬ ܠܹܥܪܵܩܵܐ ܠܐܵܗܵܐ ܓܹܒܵܐ ܘܠܗ̇ܘ ܓܹܒܵܐ. ܘܥܲܡܵܐ ܕܝܼܣܪܵܝܹܠ ܕܒܸܥܪܵܩܵܐ ܗ݇ܘܵܐ ܓܵܘ ܒܲܪܝܼܵܐ ܕܸܪܹܗ ܥܲܠ ܛܵܪܕܵܢܘܼܗܝ.܀ ܘܝܼܫܘܿܥ ܘܟܠܹܗ ܝܼܣܪܵܝܹܠ ܚܙܹܐܠܹܗ ܕܙܘܼܒܛܸܢܵܐ ܠܹܗ ܟܡܹܐܢܵܐ ܠܡܕܝܼܢ݇ܬܵܐ ܘܐ݇ܣܸܩܠܹܗ ܬܸܢܢܵܐ ܕܡܕܝܼܢ݇ܬܵܐ.܀ ܕܸܪܗ݇ܘܿܢ ܘܡܘܼܚܪܸܒ̣ܠܗ݇ܘܿܢ ܠܐ݇ܢܵܫܹ̈ܐ ܕܥܵܝ.܀ ܘܐܲܢܹܐ ܦܠܸܛܠܗ݇ܘܿܢ ܡ̣ܢ ܡܕܝܼܢ݇ܬܵܐ ܠܸܬܦܵܩܵܐ ܒܝܲܝܗܝ؛ ܘܗ݇ܘܹܐܠܗ݇ܘܿܢ ܐ݇ܢܵܫܹ̈ܐ ܕܥܵܝ ܒܒܹܝܬ̣݇ܦܲܠܓܵܐ ܕܝܼܣܪܵܝܹܠ؛ ܐܲܢܹܐ ܡܐܲܟ̣ܵܐ ܘܐܲܢܹܐ ܡܗ̇ܘ ܓܹܒܵܐ ܐ݇ܚܹܪ݇ܢܵܐ؛ ܘܡܘܼܚܪܸܒ̣ܝܼܠܗ݇ܘܿܢ ܘܠܵܐ ܫܒ̣ܸܩܠܗ݇ܘܿܢ ܡܸܢܲܝܗܝ ܚܲܕ݇ ܟܲܬܬܵܐ.܀ ܘܡܲܠܟܵܐ ܕܥܵܝ ܕܒ̣ܸܩܠܗ݇ܘܿܢ ܚܵܝܵܐ ܘܡܘܼܬ݇ܝܹܐ ܠܗ݇ܘܿܢ ܠܟܸܣ ܝܼܫܘܿܥ.܀ ܘܟܲܕ ܦܪܸܩܠܹܗ ܝܼܣܪܵܝܹܠ ܠܡܲܚܪܘܼܒ̣ܹܐ ܠܟܠܲܝܗܝ ܥܵܡܪ̈ܵܢܹܐ ܕܥܵܝ؛ ܓܵܘ ܕܸܫܬܵܐ ܘܓܵܘ ܒܲܪܝܼܵܐ ܒܸܛܪܵܕܵܐ ܗ݇ܘܵܘ؛ ܘܢܦܸܠܗ݇ܘܿܢ ܟܠܲܝܗܝ ܒܦܘܼܡܵܐ ܕܣܲܝܦܵܐ ܗܲܠ ܕܬܸܡܠܗ݇ܘܿܢ؛ ܘܕܸܪܗ݇ܘܿܢ ܟܠܲܝܗܝ ܒܢܲܝ̈ ܝܼܣܪܵܝܹܠ ܠܥܵܝ؛ ܘܡܘܼܚܪܸܒ̣ܵܐ ܠܗ݇ܘܿܢ ܒܦܘܼܡܵܐ ܕܣܲܝܦܵܐ.܀ ܘܟܠܲܝܗܝ ܐܵܢܝܼ ܕܢܦܸܠܗ݇ܘܿܢ ܒܗ̇ܘ ܝܵܘܡܵܐ ܡ̣ܢ ܓܲܒ̣ܪܹ̈ܐ ܘܗܲܠ ܒܲܟ̣ܬܵܬܹ̈ܐ ܬܪܸܥܣܲܪ ܐܲܠܦܹ̈ܐ؛ ܟܠܲܝܗܝ ܐ݇ܢܵܫܹ̈ܐ ܕܥܵܝ. ܘܝܼܫܘܿܥ ܠܵܐ ܡܘܼܕܸܪܹܗ ܐܝܼܕܹܗ ܕܡܘܼܪܡܵܐ ܗ݇ܘܵܐ ܒܪܘܼܡܚܵܐ؛ ܗܲܠ ܕܡܘܼܚܪܸܒ̣ܠܗ݇ܘܿܢ ܠܟܠܲܝܗܝ ܥܵܡܪ̈ܵܢܹܐ ܕܥܵܝ؛ ܐܲܚܟ̰ܝܼ ܪܸܣܩܵܐ ܘܣܠܵܒܵܐ ܕܡܕܝܼܢ݇ܬܵܐ ܣܠܸܒܠܗ݇ܘܿܢ ܒܢܲܝ̈ ܝܼܣܪܵܝܹܠ ܐܲܝܟܼ ܗܹܡܸܙܡܵܢ ܕܡܵܪܝܵܐ ܕܦܘܼܩܸܕܠܹܗ ܠܝܼܫܘܿܥ.܀ ܘܡܘܼܩܕܵܐ ܠܹܗ ܝܼܫܘܿܥ ܠܥܵܝ؛ ܘܥܒ̣ܝܼܕܵܐ ܠܹܗ ܪܘܼܡܬܵܐ ܚܵܪܵܒܵܐ ܗܲܠ ܥܵܠܲܡ ܗܲܠ ܐܸܕܝܘܿܡ݇ ܝܵܘܡܵܐ.܀ ܘܠܡܲܠܟܵܐ ܕܥܵܝ ܡܚܹܐܠܹܗ ܠܙܩܝܼܦܵܐ ܥܲܠ ܩܲܝܣܵܐ ܗܲܠ ܥܸܕܵܢܵܐ ܕܪܲܡܫܵܐ؛ ܘܟܲܕ ܓܢܹܐܠܵܗ̇ ܫܸܡܫܵܐ ܦܘܼܩܸܕܠܹܗ ܝܼܫܘܿܥ ܡܘܼܨܠܝܼܵܐ ܠܗ݇ܘܿܢ ܫܠܲܕܵܐ ܡ̣ܢ ܩܲܝܣܵܐ ܘܕܸܪܝܵܐ ܠܗ݇ܘܿܢ ܒܥܵܠܘܿܠܵܐ ܕܬܲܪܥܵܐ ܕܡܕܝܼܢ݇ܬܵܐ؛ ܘܡܘܼܩܸܡܠܗ݇ܘܿܢ ܥܲܠܘܼܗܝ ܡܘܼܟܪܵܐ ܕܟܹܐܦܹ̈ܐ [ܩܘܼܚܵܐ ܕܟܹܐܦܹ̈ܐ] ܓܘܼܪܹ̈ܐ ܗܲܠ ܐܸܕܝܘܿܡ݇ ܝܵܘܡܵܐ܀
♱♱♱♱♱♱♱♱♱
ܐܲܪܒܲܥܒܫܲܒܵܐ ܕܦܲܠܓܘܼܬ̣ܵܐ ܕܨܵܘܡܵܐ
ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ
ܕܲܠܘܵܬܼ ܪ̈ܗܘܿܡܵܝܹܐ ܐܲܚܲܝ̈ ܒܲܪܸܟܼܡܵܪܝ܀
ܒܲܣ ܡܘܼܕܝܼ ܐܵܡܪܲܚ؛ ܕܛܵܝܸܦܹ̈ܐ ܕܠܹܐ ܗ݇ܘܼܵܘ ܒܸܪܚܵܛܵܐ ܒܵܬ̄ܪ ܟܹܐܢܘܼܬܵܐ ܡܛܹܐܠܗ݇ܘܿܢ ܠܟܹܐܢܘܼܬܵܐ. ܐܝܼܢܵܐ ܟܹܐܢܘܼܬܵܐ ܗ̇ܝ ܕܡ̣ܢ ܗܲܝܡܵܢܘܼܬܵܐ ܝ݇ܠܵܗ̇* ܐܝܼܢܵܐ ܝܼܣܪܵܝܹܠ ܕܒܸܪܚܵܛܵܐ ܗ݇ܘ̣ܵܐ ܒܵܬ̄ܪ ܢܵܡܘܿܣܵܐ ܕܟܹܐܢܘܼܬܵܐ؛ ܠܢܵܡܘܿܣܵܐ ܕܟܹܐܢܘܼܬܵܐ ܠܵܐ ܡܛܹܐܠܹܗ* ܩܵܡܘܿܕܝܼ؛ ܣܵܒܵܒ ܕܠܹܐ ܗ݇ܘ̣ܵܐ ܡ̣ܢ ܗܲܝܡܵܢܘܼܬܵܐ؛ ܐܝܼܢܵܐ ܡ̣ܢ ܦܘܼܠܚܵܢܹ̈ܐ ܕܢܵܡܘܿܣܵܐ؛ ܦܸܫܠܗ݇ܘܿܢ ܬܘܼܪܩܸܠܹܐ ܒܟܹܐܦܵܐ ܕܬܲܪܩܲܠܬܵܐ* ܐܲܝܟܼ ܕܝܼܠܹܗ ܟܬܝܼܒܼܵܐ ܕܗܵܐ ܡܲܬܘܼܒܹܐ ܝ݇ܘܸܢ ܒܨܸܗܝܘܿܢ ܟܹܐܦܵܐ ܕܬܲܪܩܲܠܬܵܐ ܘܟܹܐܦܵܐ ܕܟܦܘܼܪܝܵܐ. ܟܠ ܡ̇ܢ ܕܗܲܡܸܢ ܒܝܼـܹܗ ܠܹܐ ܢܵܚܸܦ* ܐܵܚܘܿܢܘܵܬ̈ܝܼ ܪܸܙܝܵܐ ܕܠܸܒܝܼ ܘܒܵܥܘܼܬܝܼ ܕܠܟܸܣ ܐܲܠܵܗܵܐ ܡ̣ܢ ܓܸܒܵܐ ܕܝܼܣܪܵܝܹܠ ܝܼܠܵܗ̇ ܕܚܲܝܝܼ. ܣܵܒܵܒ ܒܝܼܵܗܒܼܵܐ ܝ݇ܘܸܢ ܣܵܗܕܘܼܬܵܐ ܒܘܼܬ ܕܝܹܿܝܗܝ ܕܛܢܵܢܵܐ ܕܐܲܠܵܗܵܐ ܐܝܼܬ؛ ܒܝܹܿܝܗܝ ܐܝܼܢܵܐ ܠܵܐ ܒܝ݇ܕܵܥܝܬܵܐ* ܟܹܐܢܘܼܬܹܗ ܕܐܲܠܵܗܵܐ ܠܵܐ ܝ݇ܕܝܼܥܠܗ݇ܘܿܢ؛ ܐܝܼܢܵܐ ܒܥܹܐܠܗ݇ܘܿܢ ܕܡܲܩܸܡܝܼ ܟܹܐܢܘܼܬܵܐ ܕܓܵܢܲܝܗܝ؛ ܘܒܘܼܬ ܕܐܵܗܵܐ؛ ܠܟܹܐܢܘܼܬܵܐ ܕܐܲܠܵܗܵܐ ܠܵܐ ܦܸܫܠܗ݇ܘܿܢ ܙܲܒܛ* ܣܵܒܵܒ ܚܘܼܬܵܡܵܐ ܕܢܵܡܘܿܣܵܐ ܡܫܝܼܚܵܐ ܝ݇ܠܹܗ ܠܟܹܐܢܘܼܬܵܐ ܩܵܐ ܟܠ ܕܗܲܡܸܢ* ܣܵܒܵܒ ܡܘܼܫܹܐ ܗܲܕܟܼܵܐ ܟܬܸܒܼܠܹܗ ܒܘܼܬ ܟܹܐܢܘܼܬܵܐ ܕܓܵܘ ܢܵܡܘܿܣܵܐ. ܕܡ̇ܢ ܕܥܵܒܼܸܕ ܐܲܢܹܐ ܒܸܬ ܚܲܝܹܐ ܒܝܼܲܝܗܝ* ܐܝܼܢܵܐ ܟܹܐܢܘܼܬܵܐ ܕܓܵܘ ܗܲܝܡܵܢܘܼܬܵܐ ܗܲܕܟܼܵܐ ܟܹܐ ܐܵܡܪܵܐ. ܕܠܵܐ ܐܵܡܪܸܬ ܒܠܸܒܘܼܟܼ ܡܵܢܝܼ ܐ݇ܣܸܩܠܹܗ ܠܫܡܲܝܵܐ ܘܡܘܼܨܠܹܐܠܹܗ ܠܡܫܝܼܚܵܐ* ܘܡܵܢܝܼ ܨܠܹܐܠܹܗ ܠܥܘܼܡܩܵܐ ܕܫܝܘܿܠ ܘܡܘܼܣܸܩܠܹܗ ܠܡܫܝܼܚܵܐ ܡ̣ܢ ܓܵܘ ܡܝܼܬܹ̈ܐ* ܐܸܠܵܐ ܡܘܼܕܝܼ ܐ݇ܡܸܪܹܗ؛ ܩܘܼܪܒܵܐ ܝ݇ܠܹܗ ܐܸܠܘܼܟܼ ܚܲܒܪܵܐ ܠܦܘܼܡܘܼܟܼ ܘܠܠܸܒܘܼܟܼ؛ ܘܐܵܗܵܐ ܝ݇ܠܵܗ̇ ܗܹܡܸܙܡܲܢ ܕܗܲܝܡܵܢܘܼܬܵܐ ܕܡܲܟܪܘܼܙܹܐ ܝ݇ܘܲܚ* ܘܐܸܢ ܡܵܘܕܸܬ ܒܦܘܼܡܘܼܟܼ ܒܡܵܪܲܢ ܝܼܫܘܿܥ ܘܗܲܡܸܢܸܬ ܒܠܸܒܘܼܟܼ ܕܐܲܠܵܗܵܐ ܡܘܼܩܸܡܠܹܗ ܡ̣ܢ ܓܵܘ ܡܝܼܬܹ̈ܐ ܒܸܬ ܚܲܝܸܬ* ܣܵܒܵܒ ܠܸܒܵܐ ܕܗܲܡܸܢ ܒܝܼܹܗ ܒܸܬ ܦܵܐܸܫ ܡܘܼܟܫܸܛܵܐ؛ ܘܦܘܼܡܵܐ ܕܡܵܘܕܸܐ ܒܝܼـܹܗ ܒܸܬ ܚܲܝܹܐ* ܣܵܒܵܒ ܐ݇ܡܸܪܹܗ ܟܬܵܒܼܵܐ؛ ܕܟܠ ܕܗܲܡܸܢ ܒܝܼܹܗ ܠܹܐ ܢܵܚܸܦ* ܒܐܵܗܵܐ ܠܵܐ ܦܪܸܫܠܹܗ ܒܹܝܠ ܝܗܘܼܕܵܝܵܐ ܘܐܵܪܡܵܝܵܐ. ܣܵܒܵܒ ܕܚܲܕ݇ ܝܼܠܹܗ ܡܵܪܝܵܐ ܕܟܠܲܝܗܝ؛ ܘܥܲܬܝܼܪܵܐ ܝ݇ܠܹܗ ܒܟܠ ܕܩܵܪܹܐ ܠܹܗ* ܣܵܒܵܒ ܟܠ ܕܩܵܪܹܐ ܫܸܡܹܗ ܕܡܵܪܝܵܐ ܒܸܬ ܚܲܝܹܐ* ܒܲܣ ܕܵܐܟܼܝܼ ܒܸܬ ܩܵܪܝܼ ܠܗ̇ܘ ܕܠܵܐ ܗܘܼܡܸܢܗ݇ܘܿܢ ܒܝܼܹܗ؛ ܝܲܢ ܕܵܐܟܼܝܼ ܒܸܬ ܗܲܡܸܢܝܼ ܠܗ̇ܘ ܕܠܵܐ ܫܡܝܼܥܠܗ݇ܘܿܢ؛ ܝܲܢ ܕܵܐܟܼܝܼ ܒܸܬ ܫܵܡܥܝܼ ܕܠܵܐ ܡܲܟܪܸܙܵܢܵܐ* ܝܲܢ ܕܵܐܟܼܝܼ ܒܸܬ ܡܲܟܪܸܙܝܼ ܐܸܢ ܠܵܐ ܦܵܝܫܝܼ ܫܘܼܕܪܹܐ. ܐܲܝܟܼ ܕܝܼܠܹܗ ܟܬܝܼܒܼܵܐ. ܟܡܵܐ ܫܲܦܝܼܪܹ̈ܐ ܝ݇ܢܵܐ ܐܲܩܠܵܬܹ̈ܐ ܕܡܲܫܚܸܕܵܢܹ̈ܐ ܕܫܠܵܡܵܐ ܘܡܲܫܚܸܕܵܢܹ̈ܐ ܕܛܵܒܼܵܬܹ̈ܐ* ܐܝܼܢܵܐ ܟܠܲܝܗܝ ܠܵܐ ܡܘܼܨܝܸܬܠܗ݇ܘܿܢ ܠܡܲܫܚܲܕܬܵܐ ܕܐܹܘܲܢܓܵܠܝܼܘܿܢ. ܣܵܒܵܒ ܐܹܫܲܥܝܵܐ ܐ݇ܡܸܪܹܗ. ܝܵܐ ܡܵܪܝܼ ܡܵܢܝܼ ܗܘܼܡܸܢܹܗ ܠܒܪܲܬ̄ܩܵܠܲܢ* ܒܲܣ ܗܲܝܡܵܢܘܼܬܵܐ ܡ̣ܢ ܫܡܵܥܝܬܵܐ ܕܢܵܬܵܐ ܝ݇ܠܵܗ̇ ܘܫܡܵܥܝܬܵܐ ܕܢܵܬܵܐ ܡ̣ܢ ܗܹܡܸܙܡܲܢ ܕܐܲܠܵܗܵܐ*
♱♱♱♱♱♱♱♱♱
ܐܲܪܒܲܥܒܫܲܒܵܐ ܕܦܲܠܓܘܼܬ̣ܵܐ ܕܨܵܘܡܵܐ
ܝܘܚܢܢ ܘ: 51 ‐ 70
ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ ܟܪܘܙܘܬܼܐ ܕܝܘܚܢܢ
♰ ܐ݇ܡܸܪܹܗ ܝܑܼܫܘܿܥ ܠܟܸܢܫܹ̈ܐ ܕܝܗ݇ܘܼܕܵܝܹ̈ܐ: ܐܵܢܵܐ ܝܼܘܸܢ ܠܲܚܡܵܐ ܚܵܝܵܐ ܕܡ̣ܢ ܫܡܲܝܵܐ ܨܠܹܐܠܝܼ. ܘܐܸܢ ܐ݇ܢܵܫܵܐ ܐܵܟܼܸܠ ܡ̣ܢ ܐܵܗܵܐ ܠܲܚܡܵܐ، ܒܸܬ ܚܲܝܹܐ ܠܥܵܠܲܡ: ܘܠܲܚܡܵܐ ܐܲܝܢܝܼ ܕܐܵܢܵܐ ܝܲܗ݇ܒܼܸܢ: ܦܲܓܼܪܝܼ ܝܠܹܗ ܕܒܘܼܬ ܚܲܝܹ̈ܐ ܕܥܲܠܡܵܐ ܒܝܼܵܗ݇ܒܼܵܐ ܝܘܸܢ: ܐܝܼܢܵܐ ܕܵܪܫܝܼ ܗ݇ܘܵܘ ܝܗ݇ܘܼܕܵܝܹ̈ܐ ܚܲܕ݇ ܥܲܡ ܗ̇ܘ ܐ݇ܚܹܪ݇ܢܵܐ ܘܐܲܡܪܝܼ. ܕܲܐܟܼܝܼ ܒܡܵܨܹܐ ܐܵܗܵܐ ܕܝܲܗ݇ܒܼܸܠܲܢ ܦܲܓܼܪܹܗ ܠܹܐܟܼܵܠܵܐ؟ ܘܐ݇ܡܸܪܹܗ ܐܸܠܲܝܗܝ ܝܑܼܫܘܿܥ: ܬܪܘܿܨܵܐ ܬܪܘܿܨܵܐ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ: ܕܐܸܢ ܠܵܐ ܐܲܟܼܠܝܼܬܘܿܢ ܦܲܓܼܪܹܗ ܕܒܪܘܿܢܹܗ ܕܐ݇ܢܵܫܵܐ ܘܫܵܬܝܼܬܘܿܢ ܕܸܡܹܗ: ܠܲܝܬܠܵܘܟܼܘܿܢ ܚܲܝܹ̈ܐ ܒܩܢܘܿܡܵܘܟܼܘܿܢ: ܐܝܼܢܵܐ ܡ̇ܢ ܕܐܵܟܼܸܠ ܡ̣ܢ ܦܲܓܼܪܝܼ ܘܫܵܬܹܐ ܡ̣ܢ ܕܸܡܝܼ: ܐܝܼܬܠܹܗ ܚܲܝܹ̈ܐ ܕܠܥܵܠܲܡ: ܘܐܵܢܵܐ ܒܸܬ ܡܲܩܸܡܸܢܹܗ ܒܝܵܘܡܵܐ ܐ݇ܚܵܪܵܝܵܐ: ܣܵܒܵܒ ܦܲܓܼܪܝܼ ܫܲܪܝܼܪܵܐܝܼܬ، ܝܼܠܹܗ ܡܹܐܟܼܘܼܠܬܵܐ: ܘܕܸܡܝܼ ܫܲܪܝܼܪܵܐܝܼܬ ܝܼܠܹܗ ܫܬܵܝܬܵܐ: ܡ̇ܢ ܕܐܵܟܼܸܠ ܦܲܓܼܪܝܼ، ܘܫܵܬܹܐ ܕܸܡܝܼ: ܒܝܼܝܼ ܒܸܬ ܥܲܪܩܸܠ ܘܐܵܢܵܐ ܒܝܼܹܗ. ܕܲܐܟܼܝܼ ܕܫܘܼܕܪܸܢܹܗ ܒܵܒܵܐ ܚܵܝܵܐ: ܘܐܵܢܵܐ ܚܵܝܵܐ ܝܘܸܢ ܡܸܛܠ ܒܵܒܵܐ: ܘܡ̇ܢ ܕܐܵܟܼܸܠܝܼ ܐܘܿܦ ܗ̇ܘ ܒܸܬ ܚܵܝܹܐ ܡܸܛܠ ܕܝܼܠ݇ܝܼ: ܐܵܗܵܐ ܝܠܹܗ ܠܲܚܡܵܐ ܕܨܠܹܐܠܹܗ ܡ̣ܢ ܫܡܲܝܵܐ. ܠܹܐ ܗ݇ܘܵܐ ܐܲܝܟܼ ܗ̇ܘ ܕܐ݇ܟܼܸܠܗ݇ܘܿܢ ܐܲܒܼܵܗܵܬܵܘ̈ܟܼܘܿܢ ܡܲܢܢܵܐ ܘܡܝܼܬܠܗ݇ܘܿܢ. ܡ̇ܢ ܕܐܵܟܼܸܠ ܡ̣ܢ ܐܵܗܵܐ ܠܲܚܡܵܐ ܒܸܬ ܚܲܝܹܐ ܠܥܵܠܲܡ. ܐܲܢܹܐ ܐ݇ܡܸܪܹܗ ܓܵܘ ܟܢܘܼܫܬܵܐ ܟܲܕ ܡܵܠܘܼܦܹܐ ܓܵܘ ܟܦܲܪܢܵܚܘܿܡ: ܘܪܵܒܵܐ ܕܫܡܸܥܠܗ݇ܘܿܢ ܡ̣ܢ ܬܲܠܡܝܼܕܘܼ̈ܗܝ ܐܲܡܪܝܼ: ܩܫܹܬܵܐ ܝܠܵܗ̇ ܐܵܗܵܐ ܗܹܡܸܙܡܵܢ: ܡܵܢܝܼ ܒܡܵܨܹܐ ܠܸܫܡܵܥܘܼܗܿ؟ ܐܝܼܢܵܐ ܝܑܼܫܘܿܥ ܝܕܸܥܠܹܗ ܒܓܵܢܹܗ ܕܛܲܪܛܘܼܡܹܐ ܝܢܵܐ ܬܲܠܡܝܼܕܘܼ̈ܗܝ ܥܲܠ ܕܐܵܗܵܐ: ܘܐ݇ܡܸܪܹܗ ܐܸܠܲܝܗܝ: ܐܵܗܵܐ ܡܲܟܦܘܼܪܵܘܟܼܘܿܢ ܝܑܼܠܵܗ̇؟ ܒܲܣ ܐܸܢ ܚܵܙܹܝܬܘܿܢ ܠܒܪܘܿܢܹܗ ܕܐ݇ܢܵܫܵܐ ܒܹܣܵܠ݇ܩܵܐ ܠܕܘܼܟܬܵܐ ܕܝܼܗَܘܵܐ ܡ̣ܢ ܩܲܕ݇ܡܵܝܬܵܐ. ܪܘܼܚܵܐ ܝܠܵܗ̇ ܕܡܲܚܝܼܵܐ: ܦܲܓܼܪܵܐ ܠܹܐ ܡܲܩܢܹܐ ܡܸܢܕܝܼ. ܗܹܡܸܙܡܵܢܹ̈ܐ ܕܐܵܢܵܐ ܗܘܼܡܙܸܡܠܝܼ ܥܲܡܵܘܟܼܘܿܢ ܪܘܼܚܵܐ ܝܢܵܐ ܘܚܲܝܹ̈ܐ ܝܢܵܐ: ܐܸܠܵܐ ܐܝܼܬ ܐ݇ܢܵܫܹ̈ܐ ܡܸܢܵܘܟܼܘܿܢ ܕܠܹܐܝܢܵܐ ܡܗܲܝܡܘܼܢܹܐ: ܣܵܒܵܒ ܝܑܼܫܘܿܥ ܡ̣ܢ ܩܲܕ݇ܡܵܝܬܵܐ ܒܝܼܕܵܥܵܐ ܗ݇ܘܵܐ ܡܵܢܝܼ ܝܢܵܐ ܐܲܝܢܝܼ ܕܠܹܐ ܡܗܲܝܡܢܝܼ: ܘܡܵܢܝܼ ܝܠܹܗ ܗ̇ܘ ܕܣܵܦܹܐ ܠܹܗ: ܘܐ݇ܡܸܪܹܗ ܐܸܠܲܝܗܝ: ܒܘܼܬ ܕܐܵܗܵܐ ܐ݇ܡܸܪܝܼ ܐܸܠܵܘܟܼܘܿܢ ܕܐ݇ܢܵܫܵܐ ܠܹܐ ܡܵܨܹܐ ܕܐܵܬܹܐ ܠܘܵܬܝܼ. ܐܸܢ ܠܵܐ ܗܵܘܹܐ ܝܘܼܗ݇ܒܼܵܐ ܐܸܠܹܗ ܡ̣ܢ ܒܵܒܝܼ. ܒܘܼܬ ܕܐܵܗܵܐ ܗܹܡܸܙܡܵܢ ܪܵܒܵܐ ܡ̣ܢ ܬܲܠܡܝܼ̈ܕܘܼܗܝ ܐ݇ܙܸܠܗ݇ܘܿܢ ܠܵܒܵܬ݇ܪܲܝܗܝ: ܘܠܹܐ ܚܲܕܪܝܼ ܗ݇ܘܵܘ ܥܲܡܹܗ: ܘܐ݇ܡܸܪܹܗ ܝܑܼܫܘܿܥ ܠܬܪܸܥܣܲܪܬܹܗ: ܩܵܡܘܿ ܐܘܿܦ ܐܲܚܬܘܿܢ ܒܥܵܝܵܐ ܝܬܘܿܢ ܠܹܐܙܵܠܵܐ؟ ܓ̰ܘܼܘܸܒܠܹܗ ܫܸܡܥܘܿܢ ܟܹܐܦܵܐ ܘܐ݇ܡܸܪܗ: ܡܵܪܝܼ: ܠܘܵܬ ܡܵܢܝܼ ܐܵܙܵܠ݇ܚ؟ ܗܹܡܸܙܡܵܢܹ̈ܐ ܕܚܲܝܹ̈ܐ ܕܠܥܵܠܲܡ ܐܲܢ݇ܬ ܐܝܼܬܠܘܼܟ: ܘܐܲܚܢܲܢ ܗܘܼܡܸܢܲܢ ܘܝܕܸܥܠܲܢ ܕܐܲܢ݇ܬ ܝܼܘܸܬ ܡܫܝܼܚܵܐ ܒܪܘܿܢܹܗ ܕܐܲܠܵܗܵܐ ܚܵܝܵܐ.
♱♱♱♱♱♱♱♱♱