ܥܐܕܐ ܕܨܠܝܒܼܐ ܣܓܼܝܕܐ
ܐܹܫܲܥܝܵܐ ܢܒ؛ 13‐ܢܓ؛ ܫܘܼܠܵܡܵܐ
ܬܸܒ̣ܘ ܘܲܫܠܵܘ ܢܒ̣ܝܼܘܼܬܹܗ ܕܐܹܫܲܥܝܵܐ؛ ܐܲܚܵܝ̈ ܒܲܪܸܟ̣ܡܵܪܝ܀
ܗܵܐ ܪܹܓܝܼ ܦܲܪܡܘܼܝܹܐ ܝ݇ܠܹܗ؛ ܦܝܵܫܵܐ ܡܘܼܪܡܵܐ ܘܡܘܼܣܩܵܐ. ܦܝܵܫܵܐ ܡܘܼܪܡܵܐ ܪܵܒܵܐ܀ ܐܲܝܟܼ ܕܥܵܓ̰ܒܝܼ ܥܲܠܹܗ ܪܵܒܵܐ؛ ܗܵܕܟ̣ܵܐ ܡܘܼܚܪܸܒ̣ܵܐ ܝ݇ܠܹܗ ܚܸܙܘܹܗ ܡ̣ܢ ܕܐ݇ܢܵܫܵܐ؛ ܘܕܘܼܡܝܹܗ ܡ̣ܢ ܕܒܢܲܝ̈ܢܵܫܵܐ܀ ܐܵܗܵܐ ܒܸܬ ܡܕܵܟ̣ܹܐ ܪܵܒܵܐ ܛܵܝܸܦܹ̈ܐ؛ ܘܥܲܠܹܗ ܒܸܬ ܥܵܟ̰ܡܝܼ ܡܲܠܟܹ̈ܐ ܦܘܼܡܲܝܗܝ؛ ܣܵܒܵܒ ܕܠܵܐ ܦܸܫܠܹܗ ܐ݇ܡܝܼܪܵܐ ܐܸܠܲܝܗܝ ܚܙܹܐܠܗ݇ܘܿܢ؛ ܘܕܠܵܐ ܫܡܝܼܥܠܗ݇ܘܿܢ ܦܘܼܪܡܹܐܠܗ݇ܘܿܢ܀ ܡܵܢܝܼ ܗܘܼܡܸܢܹܗ ܠܩܵܠܲܢ ܘܕܪܲܥܢܹܗ ܕܡܵܪܝܵܐ ܠܡܵܢܝܼ ܦܸܫܠܹܗ ܡܘܼܚܙܝܼܵܐ؟ ܐ݇ܣܸܩܠܹܗ ܐܲܝܟܼ ܝܵܠܵܕ݇ܐ ܩܵܕ݇ܡܹܗ؛ ܘܐܲܝܟܼ ܥܸܩܪܵܐ ܡ̣ܢ ܐܲܪܥܵܐ ܨܗܝܼܬܵܐ؛ ܠܲܝܬ̇ ܗ݇ܘܵܐ ܠܹܗ ܚܸܙܘܵܐ ܘܠܵܐ ܠܵܘܓ̰ܵܐ؛ ܘܚܙܹܐܠܲܢ ܐܸܠܹܗ ܕܠܲܝܬ̇ ܗ݇ܘܵܐ ܠܹܗ ܚܸܙܘܵܐ؛ ܕܘܼܓܸܠܲܢ ܐܸܠܹܗ܀ ܡܘܼܣܠܝܼܵܐ ܘܡܲܟܝܼܟ̣ܵܐ ܕܐ݇ܢܵܫܹ̈ܐ؛ ܐ݇ܢܵܫܵܐ ܝ݇ܠܹܗ ܕܡܲܪ̈ܥܹܐ؛ ܘܝܵܕܥܵܢܵܐ ܕܓ̰ܘܼܢܓ̰ܵܪܹ̈ܐ؛ ܡܘܼܕܸܪܲܢ ܦܵܬܲܢ ܡܸܢܹܗ؛ ܘܡܘܼܣܠܹܐܠܲܢ ܘܠܵܐ ܚܘܼܫܒܸܢܲܢ ܐܸܠܹܗ܀ ܒܣܲܪܲܣܬܘܼܬܵܐ ܓ̰ܘܼܢܓ̰ܵܪ̈ܲܝܢ ܗ̇ܘ ܩܘܼܒܸܠܹܗ ܘܡܲܪ̈ܥܲܝܢ ܗ̇ܘ ܛܥܸܢܹܗ؛ ܘܐܲܚܢܲܢ ܚܘܼܫܒܸܢܲܢ ܐܸܠܹܗ ܕܘܼܪܒܸܢܵܐ؛ ܘܡܸܚܝܵܐ ܕܐܲܠܵܗܵܐ ܘܡܘܼܟܸܦܵܐ܀ ܘܗ̇ܘ ܦܝܵܫܵܐ ܩܛܝܼܠܵܐ ܒܘܼܬ ܚܛ̈ܝܼܵܬܲܢ ܘܦܝܼܫܵܐ ܡܘܼܡܟܸܟ̣ܵܐ ܒܘܼܬ ܥܵܘܠܲܢ؛ ܬܲܥܠܲܡܬܵܐ ܕܫܠܵܡܲܢ ܥܲܠܹܗ؛ ܘܒܕܲܪ̈ܒܵܬܹܗ ܦܵܝܫܲܚ ܒܘܼܣܡܹ̈ܐ܀ ܟܠܲܢ ܐܲܝܟܼ ܥܸܪ̈ܒܹܐ ܚܠܸܛܠܲܢ؛ ܘܟܠ ܐ݇ܢܵܫܵܐ ܠܕܸܦܢܹܗ ܕܸܪܲܢ؛ ܘܡܵܪܝܵܐ ܡܘܼܬܦܸܩܠܹܗ ܒܝܼܹܗ ܓܢܵܗܵܬܹ̈ܐ ܕܟܠܲܢ܀ ܩܘܼܪܒܸܢܹܗ ܘܦܸܫܠܹܗ ܡܘܼܡܟܸܟ̣ܵܐ؛ ܘܠܵܐ ܦܬܸܚܠܹܗ ܦܘܼܡܹܗ. ܐܲܝܟܼ ܦܵܐܪܵܐ ܠܦܪܵܡܬܵܐ ܦܸܫܠܹܗ ܠܘܼܒܠܵܐ؛ ܘܐܲܝܟܼ ܘܲܥܢܵܐ ܩܵܕ݇ܡ ܓܲܪܵܥܵܐ ܫܬܝܼܩܵܐ ܗ݇ܘܵܐ؛ ܘܠܵܐ ܦܬܸܚܠܹܗ ܦܘܼܡܹܗ؛ ܡ̣ܢ ܚܒ̣ܘܼܫܝܵܐ ܘܡ̣ܢ ܕܝܼܘܵܢ ܦܸܫܠܹܗ ܠܘܼܒܠܵܐ؛ ܘܕܵܘܪܹܗ ܡܵܢܝܼ ܒܸܬ ܗܵܩܹܐ؟ ܣܵܒܵܒ ܕܦܸܫܠܹܗ ܩܸܛܥܝܵܐ ܡ̣ܢ ܐܲܪܥܵܐ ܕܚܲܝܹ̈ܐ ܘܡ̣ܢ ܥܵܘܵܠܹ̈ܐ ܕܛܵܝܸܦܝܼ ܩܘܼܪܒܸܢܗ݇ܘܿܢ ܐܸܠܹܗ܀ ܟܵܦܘܿܪܵܐ ܝܘܼܗ݇ܒ̣ܸܠܹܗ ܩܲܒ̣ܪܹܗ ܘܥܲܬܝܼܪܵܐ ܒܡܵܘܬܹܗ. ܣܵܒܵܒ ܕܠܵܐ ܥܒ̣ܸܕܠܹܗ ܥܵܘܠܵܐ؛ ܘܠܲܝܬ̇ ܦܸܟ̰ܠܵܐ ܒܦܘܼܡܹܗ؛ ܘܡܵܪܝܵܐ ܒܣܸܡܠܵܐ ܠܹܗ ܕܡܲܡܟܸܟ̣ ܠܹܗ ܘܓ̰ܵܢܓ̰ܸܪܹܗ؛ ܦܸܫܠܹܗ ܡܘܼܬܒ̣ܵܐ ܓܢܵܗܵܐ ܒܓܵܢܹܗ؛ ܕܚܵܙܹܐ ܙܲܪܥܵܐ ܘܡܲܙܝܸܕ ܝܵܘܡܵܢܹ̈ܐ؛ ܘܪܸܙܵܝܹܗ ܕܡܵܪܝܵܐ ܒܐܝܼܕܹܗ ܒܸܬ ܡܲܢܬܹܐ܀ ܘܡ̣ܢ ܓ̰ܲܥܦܵܐ ܕܓܵܢܹܗ ܒܸܬ ܚܵܙܹܐ؛ ܘܒܸܬ ܡܲܣܒ̣ܸܥ ܒܝܕܲܥܝܬܵܐ؛ ܘܥܵܒ̣ܸܕ ܚܵܠܝܼܨ ܠܙܲܕܝܼܩܹ̈ܐ؛ ܪܹܓܵܐ ܝ݇ܠܹܗ ܩܵܐ ܪܵܒܵܐ ܐ݇ܢܵܫܹ̈ܐ؛ ܘܚܛܝܼܵܬܲܝ̈ܗܝ ܗ̇ܘ ܒܸܬ ܛܵܥܸܢ܀ ܒܘܼܬ ܕܐܵܗܵܐ؛ ܒܸܬ ܦܲܠܸܓ݇ܢܹܗ ܒܪܵܒܵܐ؛ ܘܠܚܲܝܠܵܢܹ̈ܐ ܒܸܬ ܦܲܠܹܓ̣݇ܐ ܣܠܵܒܵܐ؛ ܡ̣ܢ ܒܵܕܲܠ ܕܪܘܼܦܹܐܠܹܗ ܓܵܢܹܗ ܠܡܵܘܬܵܐ؛ ܥܲܡ ܥܵܘܵܠܹ̈ܐ ܦܸܫܠܹܗ ܡܸܢܝܵܐ؛ ܘܗ̇ܘ ܚܛܝܼܵܬܹ̈ܐ ܕܪܵܒܵܐ ܛܥܸܢܹܗ؛ ܘܒܥܵܘܵܠܹ̈ܐ ܬܦܸܩܠܹܗ܀
ܚܲܒ̣ܪܹܗ
ܦܪܲܟܣܝܼܣ ܒ؛ 14‐37
ܫܠܵܘ ܦܪܲܟܣܝܼܣ ܕܲܫܠܝܼܚܹ̈ܐ؛ ܐܲܚܲܝ̈ ܒܲܪܸܟ̣ܡܵܪܝ܀
ܘܒܵܬ݇ܪ ܗܵܕܵܐ ܩܸܡܠܹܗ ܫܸܡܥܘܿܢ ܟܹܐܦܵܐ ܥܲܡ ܚܲܕܸܥܣܲܪ ܫܠܝܼܚܹ̈ܐ. ܘܡܘܼܪܸܡܠܹܗ ܩܵܠܹܗ ܘܐ݇ܡܸܪܹܗ ܐܸܠܲܝܗܝ؛ ܝܵܐ ܐ݇ܢܵܫܹ̈ܐ ܝܗ݇ܘܼܕܵܝܹ̈ܐ ܘܟܠܲܝܗܝ ܐܵܢܝܼ ܕܒܸܥܡܵܪܵܐ ܝ݇ܢܵܐ ܒܐܘܿܪܸܫܠܸܡ. ܐܵܗܵܐ ܦܵܝܫܵܐ ܝ݇ܕܝܼܥܬܵܐ ܐܸܠܵܘܟ̣ܘܿܢ ܡܲܨܝܸܬܘܿܢ ܗܹܡܸܙܡܵܢ̈ܝܼ܀ ܠܹܐ ܝ݇ܠܵܗ̇ ܐܲܝܟܼ ܕܐܲܚܬܘܿܢ ܒܸܚܫܵܒ̣ܵܐ ܝ݇ܬܘܿܢ ܕܐܲܢܹܐ ܪ̈ܵܘܵܝܹܐ ܝ݇ܢܵܐ. ܕܗܵܐ ܗܲܠ ܐܵܕܝܼܵܐ ܬܠܵܬܵܐ ܣܵܥܲܬܹ̈ܐ ܝ݇ܢܵܐ܀ ܐܸܠܵܐ ܐܵܗܵܐ ܝ݇ܠܵܗ̇ ܕܦܝܼܫܬܵܐ ܝ݇ܠܵܗ̇ ܐ݇ܡܝܼܪܬܵܐ ܒܝܘܼܐܹܝܠ ܢܒ̣ܝܼܵܐ܀ ܒܸܬ ܗܵܘܹܐ ܒܝܵܘܡܵܢܹ̈ܐ ܐ݇ܚܵܪ̈ܵܝܹܐ ܒܹܐܡܵܪܵܐ ܝ݇ܠܹܗ ܐܲܠܵܗܵܐ. ܒܸܬ ܬܲܦܚܸܢ ܪܘܼܚܝܼ ܥܲܠ ܟܠ ܒܸܣܪܵܐ؛ ܘܒܸܬ ܢܵܒܝܼ ܒܢܘܿܢ̈ܵܘܟ̣ܘܿܢ ܘܒܢܵܬ̈ܵܘܟ̣ܘܿܢ؛ ܓ̰ܘܲܢܩ̈ܵܘܟ̣ܘܿܢ ܚܸܙܘܹ̈ܐ ܒܸܬ ܚܵܙܝܼ؛ ܚܘܲܪ̈ܕܸܩܢܵܘܟ̣ܘܿܢ ܚܸܠܡܹ̈ܐ ܒܸܬ ܚܵܠܡܝܼ؛ ܘܥܲܠ ܪܹ̈ܓܵܘܵܬܝܼ ܘܥܲܠ ܚܸܕܲܡܝܵܬ̈ܝܼ ܒܸܬ ܬܲܦܚܸܢ ܪܘܼܚܝܼ ܒܐܵܢܝܼ ܝܵܘܡܵܢܹ̈ܐ ܘܒܸܬ ܢܵܒܝܼ܀ ܘܒܸܬ ܝܵܗ݇ܒ̣ܸܢ ܢܝܼܫܲܢܩܹ̈ܐ ܒܫܡܲܝܵܐ؛ ܘܫܘܼܠܵܢܹ̈ܐ ܓܘܼܪܹ̈ܐ ܥܲܠ ܐܲܪܥܵܐ. ܕܸܡܵܐ ܘܢܘܼܪܵܐ ܘܗܵܘܓܵܐ ܘܬܸܢܢܵܐ؛ ܫܸܡܫܵܐ ܒܸܬ ܦܵܐܹܫ ܡܘܼܚܠܸܦܵܐ ܒܚܸܫܟܵܐ؛ ܘܣܲܗܪܵܐ ܒܕܸܡܵܐ؛ ܡ̣ܢ ܩܵܕ݇ܡ ܕܐܵܬܹܐ ܝܵܘܡܵܐ ܕܡܵܪܝܵܐ ܓܘܼܪܵܐ ܘܡܲܙܕܸܥܝܵܢܵܐ܀ ܘܒܸܬ ܗܵܘܹܐ ܟܠ ܕܩܵܪܹܐ ܫܸܡܹܗ ܕܡܵܪܝܵܐ ܒܸܬ ܚܵܝܹܐ܀ ܐ݇ܢܵܫܹ̈ܐ ܒܢܲܝ̈ ܝܼܣܪܵܝܹܠ ܫܡܸܥܡܘܿܢ ܐܲܢܹܐ ܗܹܡܸܙܡܵܢܹ̈ܐ. ܝܼܫܘܿܥ ܢܵܨܪܵܝܵܐ ܐ݇ܢܵܫܵܐ ܕܡ̣ܢ ܐܲܠܵܗܵܐ ܦܸܫܠܹܗ ܚܸܙܝܵܐ ܠܟܸܣܠܵܘܟ̣ܘܢ ܒܚܲܝܠܹ̈ܐ ܘܢܝܼܫܲܢܩܹ̈ܐ ܓܘܼܪܹ̈ܐ ܐܵܢܝܼ ܕܐܲܠܵܗܵܐ ܥܒ̣ܸܕܠܹܗ ܓܵܘܵܘܟ̣ܘܿܢ ܒܐܝܼܕܹܗ ܐܲܝܟܼ ܕܐܲܚܬܘܿܢ ܝܵܕܥܝܼܬܘܿܢ܀ ܠܐܵܗܵܐ ܕܦܝܼܫܵܐ ܗ݇ܘܵܐ ܓܘܼܒܝܵܐ ܩܵܐ ܕܐܵܗܵܐ ܫܘܼܠܵܐ ܒܝ݇ܕܲܥܝܬܵܐ ܩܲܕ݇ܡܵܝܬܵܐ ܘܒܪܸܙܵܝܵܐ ܕܐܲܠܵܗܵܐ؛ ܣܘܼܦܹܐܠܵܘܟ̣ܘܿܢ ܐܸܠܹܗ ܒܐܝܼܕܵܬܹ̈ܐ ܕܟܵܦܘܿܪܹ̈ܐ ܘܡܚܹܐܠܵܘܟ̣ܘܿܢ ܠܙܩܝܼܦܵܐ ܘܩܛܸܠܵܘܟ̣ܘܿܢ܀ ܐܝܼܢܵܐ ܐܲܠܵܗܵܐ ܡܘܼܩܸܡܠܹܗ؛ ܘܫܪܹܐܠܹܗ ܚܸܒ̣ܠܹ̈ܐ ܕܫܝܘܿܠ؛ ܣܵܒܵܒ ܕܠܹܐ ܡܵܨܝܵܐ ܗ݇ܘܵܐ ܕܦܵܐܹܫ ܕܒ̣ܝܼܩܵܐ ܓܵܘ ܫܝܘܿܠ؛ ܣܵܒܵܒ ܕܵܘܝܼܕ ܐ݇ܡܸܪܹܗ ܒܘܼܬ ܕܝܼܹܗ؛ ܡ̣ܢ ܩܵܕ݇ܡ ܥܸܕܵܢܵܐ ܒܸܚܙܵܝܵܐ ܝ݇ܘܸܢ ܗ݇ܘܵܐ ܠܡܵܪܝܵܐ ܡܵܪܝܼ ܒܟܠ ܥܸܕܵܢܵܐ ܕܥܲܠ ܝܲܡܝܼܢܝܼ ܝ݇ܠܹܗ ܕܠܵܐ ܫܵܥܫܸܢ܀ ܒܘܼܬ ܕܐܵܗܵܐ ܒܣܸܡܠܹܗ ܠܸܒܝܼ ܘܦܨܸܚܠܵܗ̇ ܬܸܫܒܘܿܚܬܝܼ؛ ܘܐܘܼܦ ܦܲܓ̣ܪܝܼ ܒܸܬ ܫܵܪܹܐ ܥܲܠ ܗܹܒ̣ܝܼ܀ ܕܠܵܐ ܫܒ̣ܸܩܠܘܼܟܼ ܠܓܵܢܝܼ ܓܵܘ ܫܝܘܿܠ؛ ܘܠܵܐ ܝܘܼܗ݇ܒ̣ܸܠܘܼܟܼ ܠܙܲܕܝܼܩܘܼܟܼ ܕܚܵܙܹܐ ܚܪܵܒ̣ܵܐ܀ ܓܠܹܐܠܘܼܟܼ ܐܸܠܝܼ ܐܘܼܪܚܵܐ ܕܚܲܝܹ̈ܐ. ܒܸܬ ܡܵܠܸܬ̇ ܠܝܼ ܒܲܣܝܼܡܘܼܬܵܐ ܥܲܡ ܦܲܪܨܘܿܦܘܼܟܼ܀ ܐ݇ܢܵܫܹ̈ܐ ܐܵܚܘܿܢ̈ܘܵܬܲܢ؛ ܒܕܲܣܬܘܼܪ ܝܼܠܵܗ̇ ܠܹܐܡܵܪܵܐ ܐܲܫܟܵܪܵܐ ܠܟܸܣܠܵܘܟ̣ܘܿܢ ܒܘܼܬ ܪܹܫܵܐ ܕܒܵܒܵܘܵܬܹ̈ܐ ܕܵܘܝܼܕ. ܕܡܝܼܬܠܹܗ ܘܐܘܼܦ ܦܸܫܠܹܗ ܩܒ̣ܝܼܪܵܐ. ܘܒܹܝܬ̣ ܩܒ̣ܘܼܪܹܗ ܠܟܸܣܠܲܢ ܝܼܠܹܗ ܗܲܠ ܐܸܕܝܘܿܡ݇ ܝܵܘܡܵܐ܀ ܣܵܒܵܒ ܢܒ̣ܝܼܵܐ ܗ݇ܘܵܐ ܘܝܵܕܸܥ ܗ݇ܘܵܐ ܕܡܵܘܡܵܬܹ̈ܐ ܝ݇ܡܹܐܠܹܗ ܐܸܠܹܗ ܐܲܠܵܗܵܐ؛ ܕܡ̣ܢ ܛܥܘܼܢܬܵܐ ܕܟܸܪ݇ܣܘܼܟܼ ܒܸܬ ܡܲܬܒ̣ܸܢ ܥܲܠ ܟܘܼܪܣܝܼܘܼܟܼ܀ ܘܡ̣ܢ ܩܵܕ݇ܡ ܥܸܕܵܢܵܐ ܚܙܹܐܠܹܗ ܘܗܘܼܡܙܸܡܠܹܗ ܒܘܼܬ ܩܝܵܡܬܹܗ ܕܡܫܝܼܚܵܐ. ܕܠܵܐ ܦܸܫܠܹܗ ܫܒ̣ܝܼܩܵܐ ܒܫܝܘܿܠ. ܘܐܘܼܦ ܦܲܓ̣ܪܹܗ ܠܵܐ ܚܙܹܐܠܹܗ ܚܪܵܒ̣ܵܐ܀ ܠܐܵܗܵܐ ܝܼܫܘܿܥ ܡܘܼܩܸܡܠܹܗ ܐܲܠܵܗܵܐ ܘܐܲܚܢܲܢ ܟܠܲܢ ܣܵܗܵܕܹ̈ܐ ܕܝܼܹܗ ܝ݇ܘܲܚ܀ ܘܗܲܪ ܗ̇ܘ ܝܼܠܹܗ ܕܒܝܲܡܝܼܢܹܗ ܕܐܲܠܵܗܵܐ ܦܸܫܠܹܗ ܡܘܼܪܡܵܐ. ܘܫܩܸܠܹܗ ܡ̣ܢ ܒܵܒܵܐ ܩܵܘܠܵܐ ܕܥܲܠ ܪܘܼܚܵܐ ܕܩܘܼܕܫܵܐ. ܘܬܘܼܦܸܚܠܹܗ ܐܵܗܵܐ ܚܲܠܥܲܬ ܕܗܵܐ ܒܸܚܙܵܝܵܐ ܝ݇ܬܘܿܢ ܘܒܸܫܡܲܥܝܵܐ܀ ܣܵܒܵܒ ܠܹܐ ܗ݇ܘܵܐ ܕܵܘܝܼܕܼ ܐ݇ܣܸܩܠܹܗ ܠܫܡܲܝܵܐ؛ ܣܵܒܵܒ ܕܗ̇ܘ ܐ݇ܡܸܪܹܗ؛ ܕܐ݇ܡܸܪܹܗ ܡܵܪܝܵܐ ܠܡܵܪܝܼ ܝ݇ܬܸܒ̣ܠܘܼܟܼ ܡ̣ܢ ܝܲܡܝܼܢܝܼ܀ ܗܲܠ ܕܡܲܬܒ̣ܸܢ ܕܸܫ̰ܡܸܢܘܼܟܼ ܟܘܼܒ̣ܫܵܐ ܩܵܐ ܐܲܩ̈ܠܘܼܟܼ ܗܵܕܟ̣ܵܐ ܒܣܲܪܲܣܬܘܼܬܵܐ ܚܘܼܫ ܝܵܕܸܥ ܟܠܹܗ ܒܹܝܬ̣ ܝܼܣܪܵܝܹܠ. ܕܡܵܪܝܵܐ ܘܡܫܝܼܚܵܐ ܥܒ̣ܸܕܠܹܗ ܐܲܠܵܗܵܐ ܠܐܵܗܵܐ ܝܼܫܘܿܥ ܕܐܲܚܬܘܿܢ ܙܩܝܼܦܠܵܘܟ̣ܘܿܢ܀
♱♱♱♱♱♱♱♱♱
ܥܐܕܐ ܕܨܠܝܒܼܐ ܣܓܼܝܕܐ
ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ
ܕܲܠܘܵܬܼ ܩܘܼܪ̈ܲܢܬܵܝܹܐ ܐܲܚܲܝ̈ ܒܲܪܸܟܼܡܵܪܝ܀
ܣܵܒܵܒ ܗܹܡܸܙܡܲܢ ܕܙܩܝܼܦܵܐ ܩܵܐ ܕܐܵܢܝܼ ܕܝܼܢܵܐ ܬܠܝܼܩܹ̈ܐ ܐܲܗܡܵܩܘܼܬܵܐ ܝ݇ܠܵܗ̇. ܐܝܼܢܵܐ ܩܵܬܲܢ ܕܝܼܘܲܚ ܚܲܝܹ̈ܐ ܚܲܝܠܵܐ ܝ݇ܠܵܗ̇ ܕܐܲܠܵܗܵܐ* ܣܵܒܵܒ ܟܬܝܼܒܼܵܐ ܝ݇ܠܹܗ ܕܒܸܬ ܬܲܠܩܸܢ ܦܲܪܡܵܝܬܵܐ ܕܗܵܘܢܵܢܹ̈ܐ ܘܩܵܛܥܸܢ ܚܝܼܵܠ ܕܦܲܪ̈ܡܝܼܵܢܸܐ* ܐܲܝܟܵܐ ܝ݇ܠܹܗ ܗܵܘܢܵܢܵܐ ܝܲܢ ܐܲܝܟܵܐ ܝ݇ܠܹܗ ܣܵܦܪܵܐ ܝܲܢ ܐܲܝܟܵܐ ܝ݇ܠܹܗ ܡܲܠܦܵܢܵܐ ܕܐܵܗܵܐ ܥܵܠܡܵܐ* ܣܵܒܵܒ ܕܒܝܼܲܕ ܦܲܪܡܵܝܬܵܐ ܕܐܲܠܵܗܵܐ ܥܵܠܡܵܐ ܠܵܐ ܝ݇ܕܝܼܥܠܹܗ ܠܐܲܠܵܗܵܐ ܒܝܼܲܕ ܦܲܪܡܵܝܬܵܐ. ܗܲܕܟܼܵܐ ܒܣܸܡܠܵܐ ܠܹܗ ܐܲܠܵܗܵܐ ܕܒܝܼـܲܕ ܢܲܙܵܢܘܼܬܵܐ ܕܡܲܟܪܲܙܬܵܐ ܡܲܚܸܐ ܠܐܵܢܝܼ ܕܗܲܡܸܢܝܼ* ܣܵܒܵܒ ܝܗܘܼܕܵܝܹ̈ܐ ܢܝܼܫܲܢܩܹ̈ܐ ܒܸܛܠܵܒܵܐ ܝ݇ܢܵܐ ܘܐܲܪ̈ܡܵܝܹܐ ܒܵܬ̄ܪ ܗܵܘܢܵܐ ܒܸܛܥܵܝܵܐ ܝ݇ܢܵܐ* ܐܝܼܢܵܐ ܐܲܚܢܲܢ ܡܲܟܪܘܼܙܹܐ ܝ݇ܘܲܚ ܡܫܝܼܚܵܐ ܟܲܕ ܡܸܚܝܵܐ ܠܙܩܝܼܦܵܐ. ܬܲܪܩܲܠܬܵܐ ܩܵܐ ܝܗܘܼܕܵܝܹ̈ܐ ܘܐܲܗܡܵܩܘܼܬܵܐ ܩܵܐ ܐܲܪ̈ܡܵܝܹܐ* ܐܝܼܢܵܐ ܩܵܐ ܕܐܵܢܝܼ ܕܦܝܼܫܹܐ ܝ݇ܢܵܐ ܟ̰ܝܼܕܹܐ ܝܗܘܼܕܵܝܹ̈ܐ ܘܐܲܪ̈ܡܵܝܸܐ؛ ܡܫܝܼܚܵܐ ܚܲܝܠܵܐ ܝ݇ܠܹܗ ܘܦܲܪܡܵܝܬܵܐ ܕܐܲܠܵܗܵܐ* ܣܵܒܵܒ ܕܢܲܙܵܢܘܼܬܹܗ ܕܐܲܠܵܗܵܐ ܒܘܼܫ ܗܵܘܢܵܢܬܵܐ ܝ݇ܠܵܗ̇ ܡ̣ܢ ܒܢܲܝ̈ܢܵܫܵܐ. ܘܙܲܒܘܼܢܘܼܬܹܗ ܕܐܲܠܵܗܵܐ ܒܘܼܫ ܚܲܝܠܵܢܬܵܐ ܝ݇ܠܵܗ̇ ܡ̣ܢ ܒܢܲܝ̈ܢܵܫܵܐ. ܚܙܹܐܡܘܿܢ ܐܘܼܦ ܩܪܵܝܬܵܘܟܼܘܿܢ ܐܵܚܘܿܢܘܵܬ̈ܝܼ؛ ܕܠܹܐ ܝ݇ܢܵܐ ܪܵܒܵܐ ܓܵܘܵܘܟܼܘܿܢ ܗܵܘܢܵܢܹ̈ܐ ܒܒܸܣܪܵܐ ܘܠܵܐ ܪܵܒܵܐ ܚܲܝܠܵܢܹ̈ܐ؛ ܘܠܵܐ ܪܵܒܵܐ ܓܵܘܵܘܟܼܘܿܢ ܒܢܲܝ̈ ܐܘܼܓ̰ܵܓܼ ܓܘܼܪܬܵܐ. ܐܸܠܵܐ ܓܘܼܒܹܐܠܹܗ ܐܲܠܵܗܵܐ ܠܢܲܙܲܢܹ̈ܐ ܕܐܵܗܵܐ ܕܘܼܢܝܹܐ ܕܡܲܢܚܸܦ ܠܗܵܘܢܵܢܹ̈ܐ. ܘܓܘܼܒܹܐܠܹܗ ܠܙܲܒܘܼܢܹ̈ܐ ܕܥܵܠܡܵܐ ܕܡܲܢܚܸܦ ܠܚܲܝܠܵܢܹ̈ܐ. ܘܓܘܼܒܹܐܠܹܗ ܠܐܵܢܝܼ ܕܒܵܨܘܿܪܬܵܐ ܝ݇ܠܵܗ̇ ܐܘܼܓ̰ܵܓܼܲܝܗܝ ܒܥܵܠܡܵܐ ܘܠܡܘܼܣ̈ܠܝܼܹܐ؛ ܘܐܵܢܝܼ ܕܝܼܢܵܐ ܗܸܟ̃ ܡܸܢܕܝܼ؛ ܩܵܐ ܕܒܵܛܸܠ ܠܐܵܢܝܼ ܕܝܼܢܵܐ* ܕܠܵܐ ܥܵܒܼܸܕ ܫܘܼܒܼܗܵܪܵܐ ܟܠ ܒܸܣܪܵܐ ܩܵܕ݇ܡܘܼܗܝ. ܐܘܼܦ ܐܲܚܬܘܿܢ ܡܸܢܹܗ ܝ݇ܬܘܿܢ ܒܝܼܫܘܿܥ ܡܫܝܼܚܵܐ. ܗ̇ܘ ܕܗܘܹܐܠܹܗ ܥܵܩܸܠܕܵܪܘܼܬܵܐ ܡ̣ܢ ܐܲܠܵܗܵܐ؛ ܘܙܲܕܝܼܩܘܼܬܵܐ ܘܩܲܕܝܼܫܘܼܬܵܐ ܘܦܘܼܪܩܵܢܵܐ* ܐܲܝܟܼ ܕܝܼܠܹܗ ܟܬܝܼܒܼܵܐ ܕܡ̇ܢ ܕܥܵܒܼܸܕ ܫܘܼܒܼܗܵܪܵܐ؛ ܚܘܼܫ ܥܵܒܼܸܕ ܫܘܼܒܼܗܵܪܵܐ ܒܡܵܪܝܵܐ*
♱♱♱♱♱♱♱♱♱
ܥܐܕܐ ܕܨܠܝܒܼܐ ܣܓܼܝܕܐ
ܠܘܩܐ ܟܕ: 13 ‐ 36
ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ ܟܪܘܙܘܬܼܐ ܕܠܘܩܐ
♰ ܒܵܬ݇ܪ ܐܲܢܹܐ ܘܗܵܐ ܬܪܹܝ ܡ̣ܢ ܬܲܠܡܝܼܕܹ̈ܐ ܕܝܼܫܘܿܥ ܒܗ̇ܘ ܝܵܘܡܵܐ ܒܹܐܙܵܠܵܐ ܗ݇ܘܵܘ ܠܡܵܬܵܐ ܕܫܸܡܵܗ̇ ܥܲܡܵܐܘܿܣ. ܘܪܸܚܩܵܐ ܝܠܵܗ̇ ܡ̣ܢ ܐܘܿܪܸܫܠܸܡ ܫܬܝܼ ܐܸܛܕܵܘܵܬ̈ܵܐ، ܘܐܵܢܝܼ ܗܲܡܙܘܼܡܹܐ ܗ݇ܘܵܘ ܚܲܕ݇ ܥܲܡ ܗ̇ܘ ܐ݇ܚܹܪ݇ܢܵܐ ܒܘܼܬ ܟܠܲܝܗܝ ܐܲܢܹܐ ܕܩܘܼܘܸܡܠܗ݇ܘܿܢ. ܘܟܲܕ ܐܵܢܝܼ ܗܲܡܙܘܼܡܹܐ ܗ݇ܘܵܘ ܘܒܸܕܪܵܫܵܐ ܚܲܕ݇ ܥܲܡ ܕܗ̇ܘ ܐ݇ܚܹܪ݇ܢܵܐ، ܐ݇ܬܹܐܠܹܗ ܝܑܼܫܘܿܥ ܘܡܸܛܝܲܝܠܹܗ. ܘܐܵܙܸܠ ܗ݇ܘܵܐ ܥܲܡܲܝܗܝ. ܘܥܲܝܢܲܝ̈ܗܝ ܕܒܼܝܼܩܹܐ ܗ݇ܘܵܘ ܕܠܵܐ ܝܲܕܥܝܼܠܹܗ. ܘܐ݇ܡܸܪܹܗ ܐܸܠܲܝܗܝ: ܡܘܿܕܝܼ ܝܢܵܐ ܐܲܢܹܐ ܗܹܡܸܙܡܵܢܹ̈ܐ ܕܗܲܡܙܘܼܡܹܐ ܝܬܘܿܢ ܚܲܕ݇ ܥܲܡ ܗ̇ܘ ܐ݇ܚܹܪ݇ܢܵܐ، ܟܲܕ ܒܹܐܙܵܠܵܐ ܝܬܘܿܢ ܘܦܫܝܼܡܹ̈ܐ؟ ܘܓ̰ܘܼܘܸܒܠܹܗ ܚܲܕ݇ ܡܸܢܲܝܗܝ ܕܫܸܡܹܗ ܩܲܠܝܘܿܦܵܐ، ܘܐ݇ܡܸܪܹܗ ܐܸܠܹܗ: ܝܵܐ ܪܲܒ ܐܲܢ݇ܬ ܒܢܲܦ̮ܫܘܼܟܼ ܢܘܼܟܼܪܵܝܵܐ ܝܘܸܬ ܡ̣ܢ ܐܘܿܪܸܫܠܸܡ ܕܠܹܐ ܝܘܸܬ ܒܝܼܕܵܥܵܐ ܡܸܢܕܝܼ ܕܗ݇ܘܹܐ ܠܹܗ ܓܵܘܘܼܗ̇ ܒܐܵܢܝܼ ܝܵܘܡܵܢܹ̈ܐ. ܐܵܡܸܪ ܐܸܠܲܝܗܝ: ܡܘܿܕܝܼ؟ ܐܵܡܪܝܼ ܐܸܠܹܗ: ܒܘܼܬ ܝܑܼܫܘܿܥ ܗ̇ܘ ܕܡ̣ܢ ܢܵܨܪܲܬ. ܕܝܼܗ݇ܘܵܐ ܚܲܕ݇ ܐ݇ܢܵܫܵܐ ܢܒܼܝܼܵܐ. ܘܚܲܝܠܵܢܵܐ ܒܗܹܡܸܙܡܵܢ ܘܒܥܒܼܵܕܵܐ، ܩܵܕ݇ܡ ܐܲܠܵܗܵܐ ܘܩܵܕ݇ܡ ܟܠܹܗ ܥܲܡܵܐ. ܘܣܘܼܦܹܐܠܗ݇ܘܿܢ ܪ̈ܲܒܲܝ ܟܵܗܢܹ̈ܐ ܘܩܲܫܝܼܫܹ̈ܐ ܠܕܝܼܘܵܢ ܕܡܵܘܬܵܐ ܘܙܩܝܼܦܠܗ݇ܘܿܢ ܐܸܠܹܗ. ܐܝܼܢܵܐ ܐܲܚܢܲܢ ܒܤܲܒ̣ܪܵܐ ܝܘܲܚ ܗ݇ܘܵܐ، ܕܐܵܗܵܐ ܗܕܝܼܪܵܐ ܝܠܹܗ ܕܦܵܪܸܩ ܗ݇ܘܵܐ ܠܝܼܣܪܵܝܸܠ. ܘܗܵܐ ܬܠܵܬܵܐ ܝܵܘܡܵܢܹ̈ܐ ܡ̣ܢ ܕܐܲܢܹܐ ܟܠܲܝܗܝ ܗܘܹܐܠܗ݇ܘܿܢ. ܐܸܠܵܐ ܐܵܦ ܒܲܟܼܬܵܬܹ̈ܐ ܡܸܢܲܢ ܩܲܡ ܥܲܒ̣ܕܝܼܠܲܢ ܬܡܝܼܗܹ̈ܐ، ܣܵܒܵܒ ܐ݇ܙܝܼܠܹܐ ܗ݇ܘܵܘ ܠܒܹܝܬ ܩܒܼܘܼܪܵܐ، ܘܟܲܕ ܠܵܐ ܡܘܼܫ݇ܟ̰ܸܚܠܗ݇ܘܿܢ ܦܲܓܼܪܹܗ. ܐ݇ܬܹܐܠܗ݇ܘܿܢ ܐ݇ܡܸܪܗ݇ܘܿܢ ܐܸܠܲܢ ܕܡܲܠܲܐܟܼܹ̈ܐ ܚܙܹܐܠܲܢ ܬܵܡܵܐ ܘܐܲܡܪܝܼ ܒܘܼܬ ܕܝܼܘܼܗܝ ܕܚܵܝܵܐ ܝܠܹܗ. ܘܐܘܼܦ ܐ݇ܢܵܫܹ̈ܐ ܡܸܢܲܢ ܐ݇ܙܸܠܗ݇ܘܿܢ ܠܒܹܝܬ ܩܒܼܘܼܪܵܐ، ܘܡܘܼܫ݇ܟ̰ܸܚܠܗ݇ܘܿܢ ܗܲܕܟܼܵܐ ܐܲܝܟܼ ܡܸܢܕܝܼ ܕܐ݇ܡܸܪܗ݇ܘܿܢ ܒܲܟܼܬܵܬܹ̈ܐ. ܐܝܼܢܵܐ ܐܸܠܹܗ ܠܵܐ ܚܙܹܐܠܗ݇ܘܿܢ. ܗܿܝܓܵܗ̇ ܐ݇ܡܸܪܹܗ ܐܸܠܲܝܗܝ ܝܑܼܫܘܿܥ: ܝܵܐ ܒܵܨܘܼܪܹ̈ܐ ܕܪܸܥܝܵܢܵܐ ܘܝܲܩܘܼܪܹ̈ܐ ܕܠܸܒܵܐ ܠܡܗܲܝܡܘܼܢܹܐ ܒܟܠܲܝܗܝ ܐܲܝܢܝܼ ܕܗܘܼܡܙܸܡܠܗ݇ܘܿܢ ܢܒܼܝܹ̈ܐ. ܠܹܐ ܗ݇ܘܵܐ ܗܕܝܼܪܵܐ ܕܐܲܢܹܐ ܡܣܲܝܒܸܪ ܗ݇ܘܵܐ ܡܫܝܼܚܵܐ، ܘܕܥܵܒܼܸܪ ܠܬܸܫܒܘܿܚܬܹܗ؟ ܘܫܘܼܪܹܐܠܹܗ ܡ̣ܢ ܡܘܼܫܹܐ ܘܡ̣ܢ ܟܠܲܝܗܝ ܢܒܼܝܼܹ̈ܐ. ܘܦܵܫܸܩ ܗ݇ܘܵܐ ܠܗ݇ܘܿܢ ܒܘܼܬ ܓܵܢܹܗ ܡ̣ܢ ܟܠܲܝܗܝ ܟܬܵܒܼܹ̈ܐ. ܘܩܘܼܪܒܸܢܗ݇ܘܿܢ ܠܗ̇ܝ ܡܵܬܵܐ ܕܒܹܐܙܵܠܵܐ ܗ݇ܘܵܘ ܐܸܠܵܗ̇، ܘܗ̇ܘ ܡܲܚܫܘܼܒܼ ܗ݇ܘܵܐ ܠܗ݇ܘܿܢ ܕܐܲܝܟܼ ܕܠܕܘܼܟܬܵܐ ܪܸܚܩܵܐ ܒܹܐܙܵܠܵܐ ܗ݇ܘܵܐ. ܘܩܲܡ ܡܲܠܝܸܨܝܼܠܹܗ ܒܹܐܡܵܪܵܐ ܐܸܠܹܗ: ܦܘܼܫ ܠܘܵܬܲܢ، ܣܵܒܵܒ ܝܵܘܡܵܐ ܐܵܕܝܼܵܐ ܓܢܹܐܠܹܗ ܠܚܲܫܟܘܼܢܹܐ. ܘܥܒܼܸܪܹܗ ܕܦܵܐܸܫ ܠܘܵܬܲܝܗܝ. ܘܗ݇ܘܹܐܠܵܗ̇ ܟܲܕ ܝܬܸܒܼܠܹܗ ܥܲܡܲܝܗܝ ܫܩܸܠܹܗ ܠܲܚܡܵܐ ܘܒܘܼܪܸܟܼܠܹܗ ܘܩܨܹܐܠܹܗ ܘܝܘܼܗ݇ܒܼܸܠܹܗ ܐܸܠܲܝܗܝ. ܘܒܗ̇ܝ ܥܸܕܵܢܵܐ ܦܸܫܠܗ݇ܘܿܢ ܦܬܝܼܚܹܐ ܥܲܝܢܲܝ̈ܗܝ. ܘܩܲܡ ܝܲܕܥܝܼܠܹܗ. ܘܗ̇ܘ ܦܸܫܠܹܗ ܫܩܝܼܠܵܐ ܡܸܢܲܝܗܝ. ܘܐܲܡܪܝܼ ܗ݇ܘܵܘ ܚܲܕ݇ ܠܗ̇ܘ ܐ݇ܚܹܪ݇ܢܵܐ: ܠܹܐ ܗ݇ܘܵܐ ܝܵܩܘܼܪܵܐ ܠܸܒܲܢ ܒܓܵܘܲܢ، ܟܲܕ ܗܲܡܙܘܼܡܹܐ ܥܲܡܲܢ ܒܐܘܼܪܚܵܐ ܘܦܵܫܘܼܩܹܐ ܐܸܠܲܢ ܟܬܵܒܼܹ̈ܐ؟ ܘܩܸܡܠܗ݇ܘܿܢ ܒܗ̇ܝ ܣܵܥܵܬ، ܘܕܥܸܪܗ݇ܘܿܢ ܠܐܘܿܪܸܫܠܸܡ. ܘܡܘܼܫ݇ܟ̰ܸܚܠܗ݇ܘܿܢ ܠܚܲܕܸܥܣܲܪ ܕܓ̰ܸܡܥܝܹܐ، ܘܠܐܵܢܝܼ ܕܥܲܡܲܝܗܝ. ܟܲܕ ܒܹܐܡܵܪܵܐ: ܕܫܲܪܝܼܪܵܐܝܼܬ ܩܸܡܠܹܗ ܡܵܪܲܢ. ܘܦܸܫܠܹܗ ܚܸܙܝܵܐ ܠܫܸܡܥܘܿܢ. ܘܐܘܿܦ ܐܵܢܝܼ ܗܘܼܩܹܐ ܠܗ݇ܘܿܢ ܐܲܝܢܝܼ ܕܗ݇ܘܹܐܠܗ݇ܘܿܢ ܒܐܘܼܪܚܵܐ. ܘܕܲܐܟܼܝܼ ܦܸܫܠܹܗ ܝܕܸܥܝܵܐ ܐܸܠܲܝܗܝ ܟܲܕ ܩܨܹܐܠܹܗ ܠܲܚܡܵܐ.
♱♱♱♱♱♱♱♱♱