ܥܐܕܐ ܕܨܠܝܒܼܐ ܣܓܼܝܕܐ
ܕܡܸܬܼܥ̱ܒܸܕܼ ܒܟܼܠܗܹܝܢ ܫܢܲܝ̈ܵܐ ܕܥܵܠܡܵܐ ܒܲܬܼܠܵܬܲܥܣܲܪ ܒܐܹܝܠܘܿܠ ܝܲܪܚܵܐ. ܟܠ ܝܵܘܡܵܐ ܕܟܼܵܐܹ̇ܢ.
ܡܲܪܡܝܼܬܼܵܐ ܕܐ݇ܪ̈ܵܙܹܐ؛ ܫܲܒܲܚܘ ܠܡܵܪܝܵܐ ܬܸܫܒ̇ܘܿܚܬܵܐ ܚܕܲܬܵܐ. (ܥܲܕܼ ܠܩܘܼܕܵܫ ܥܹܕܿܬܵܐ).
ܐܲܩܲܦܬܵܐ؛ ܐܵܘܕܸܿܐ ܠܵܟܼ ܒܥܹܕܿܬܵܐ ܪܲܒܿܬܼܵܐ܀
ܥܘܼܢܵܝܵܐ؛ ܘܲܒܼܥܲܡܡܹ̈ܐ ܣܲܓܿܝܼܐܹ̈ܐ ܐܹܙܲܡܲܪ ܠܵܟܼ܀
ܕܩܲܢܟܹ̇ܐ. ܒܡܵܪܵܐ ܕܟܼܠܵܐ.
ܡ̣ܢ ܥܲܡܵܐ ܕܠܵܐ ܡܪܲܚܡܵܢ؛ ܐܲܢ̣ܗܲܪܘ ܒܲܪ̈ܩܵܘܗܝ ܠܬܹܒܹܝܠ. ܨܠܝܼܒܼܵܟܼ ܡܵܪܲܢ ܕܐܸܬܼܚܲܦܝܼ. ܡ̣ܢ ܒܝܼܫܘܼܬܼܗܘܿܢ ܕܙܵܩܘܿܦܹ̈ܐ. ܦ̣ܪܲܚܘ ܙܲܠܝܼܩܵܘ̈ܗܝ ܒܲܒܼܪܝܼܬܼܵܐ. ܠܐܲܪܒܲܥ ܦܸܢ̈ܝܵܬܹܗ ܕܥܵܠܡܵܐ. ܘܗܵܐ ܡܙܲܝܚܝܼܢ ܠܹܗ ܒܥܹ̈ܕܼܵܬܼܵܐ. ܟܵܗܢܹ̈ܐ ܕܲܓ̣ܒܲܝܬ̇ ܠܐܝܼܩܵܪܵܟܼ. ܘܲܥܒ̣ܝܼܕܼ ܪܘܼܫܡܵܐ ܠܲܡܗܲܝܡܢܹ̈ܐ. ܕܢܸܦܪܘܿܩ ܐܸܢܘܿܢ ܡ̣ܢ ܠܵܘܛܬܼܵܐ؛ ܬܢܝܼ؛ ܫܲܒܲܚ. ܓܲܙܵܐ ܘܥܘܼܬܼܪܵܐ ܫܡܲܝܵܢܵܐ. ܛܥܝܼܢܵܐ ܥܹܕܿܬܵܟܼ ܦܵܪܘܿܩܲܢ. ܒܐ݇ܪ̈ܵܙܹܐ ܘܛܘܼܦ̮ܣܹ̈ܐ ܕܐܲܫ̣ܠܸܡܬ̇ ܠܵܗ̇. ܠܒܼܝܼܟ̣ܵܐ ܓܵܘܣܵܐ ܘܲܡܣܲܒ̇ܪܵܐ. ܟܬܼܵܒܼܵܐ ܪܲܒܵܐ ܕܲܣܒܲܪܬܼܵܟܼ. ܘܩܲܝܣܵܐ ܣܓ̣ܝܼܕܼܵܐ ܕܲܨܠܝܼܒܼܵܟܼ. ܘܝܘܼܩܢܵܐ ܦܲܐܝܵܐ ܕܐ݇ܢܵܫܘܼܬܼܵܟܼ. ܪܵܘܪ̱ܒ̣ܝܼܢ ܐ݇ܪ̈ܵܙܹܐ ܕܦܘܼܪܩܵܢܵܗ̇.
ܩܸܪܝܵܢܵܐ؛ ܐܹܿܫܲܥܝܵܐ؛ ܢܒ؛ 13‐ܢܓ؛ ܫܘܼܠܵܡܵܐ ܚܲܒ̣ܪܹܗ؛ ܦܪܲܟ̇ܣܝܼܣ. ܒ؛ 14‐37
ܫܘܼܪܵܝܵܐ؛ ܡܸܛܠ ܗܵܢܵܐ ܒܲܪܟܼܵܟܼ ܐܲܠܵܗܵܐ ܠܥܵܠܲܡ. ܠܲܫܟ̣ܵܚܬܹ̇ܗ ܕܲܨܠܝܼܒ̣ܵܐ ܢܝܲܩܲܪ ܒܲܙܡܝܼܪ̈ܵܬܼܵܐ ܕܪܘܼܚܵܐ؛ ܗܲܠܸܠܘܼܝܲܗ ܗܲܠܸܠܘܼܝܲܗ ܐܹܗܲܠܸܠܘܼܝܲܗ܀ ܐܲܪܡܵܐ ܣܲܝܦܵܐ ܒܚܲܨܲܝ̈ܟ ܓܲܢ݇ܒܵܪܵܐ. ܠܲܫܟܼܵܚܬܹ̇ܗ ܕܲܨܠܝܼܒ̣ܵܐ ܢܝܲܩܲܪ ܒܲܙܡܝܼܪ̈ܵܬܼܵܐ ܕܪܘܼܚܵܐ؛ ܗܲܠܸܠܘܼܝܲܗ ܗܲܠܸܠܘܼܝܲܗ ܐܹܗܲܠܸܠܘܼܝܲܗ܀ ܫܲܒܲܚ...܀ ܠܲܫܟܼܵܚܬܹ̇ܗ ܕܲܨܠܝܼܒ̣ܵܐ. ܥܵܠܲܡ...܀ ܠܲܫܟܼܵܚܬܹ̇ܗ ܕܲܨܠܝܼܒ̣ܵܐ.
ܫܠܝܼܚܵܐ؛ ܐ؛ ܩܘܿܪ̈ܲܢܬܼܵܝܹܐ؛ ܐ؛ 18‐ܫܘܼܠܵܡܵܐ
ܙܘܼܡܵܪܵܐ. ܪܹܫ ܣܝܼܥܬܵܐ. ܨܠܝܼܒܼܵܟܼ ܐܲܡ̣ܠܸܟܼ ܒܲܫܡܲܝܵܐ. ܘܲܨܠܝܼܒܼܵܟܼ ܐܲܡ̣ܠܸܟܼ ܒܐܲܪܥܵܐ. ܘܲܨܠܝܼܒ̣ܵܟܼ ܟܲܠܸܠ̣ ܐܸܢܘܿܢ. ܠܟܸܢܫܹ̈ܐ ܕܐܵܘܕ̇ܝܼܘ ܒܲܨܠܝܼܒ̣ܵܟܼ. ܕ܀ ܩܲܕܿܝܼܫܵܐ ܐܲܠܵܗܵܐ. ܩܲܕܿܝܼܫܵܐ ܚܲܝ̱ܠܬܼܵܢܵܐ. ܩܲܕܿܝܼܫܵܐ ܠܵܐ ܡܵܝܘܿܬܼܵܐ. ܐܸܬܼܪܲܚܲܡܥܠܲܝܢ. ܕ܀
ܐܹܘܲܢܓܲܠܝܘܿܢ. ܠܘܼܩܵܐ؛ ܟܕ؛ 13‐36
ܐܹܘܲܢܓܲܠܝܼܘܿܢ. ܒܡܵܪܵܐ ܕܟܼܠܵܐ. ܕܢܲܚ̣ ܢܘܼܗܪܵܐ ܒܚܸܫܘܿܟ̣ܵܐ ܠܲܬܼܪ̈ܝܼܨܹܐ؛ ܚ̣ܵܘܝܼ ܡܵܪܝܵܐ ܦܘܼܪܩܵܢܹܗ؛ ܘܲܕܼܚܝܼܠ ܥܲܠ ܡܲܠ̈ܟܹ̇ܐ ܕܐܲܪܥܵܐ. ܨܠܝܼܒ̣ܵܐ ܕܢܘܼܗܪܵܐ ܕܐܸܬܼܚܵܘܝܼ. ܠܩܘܼܣܛܲܢܛܝܼܢܘܿܣ ܒܲܫܡܲܝܵܐ. ܐܲܝܟܼ ܪܲܒ̇ ܚܲܝܠܵܐ ܐܵܙܹ̇ܠ ܗ݇ܘ̣ܵܐ. ܒܪܹܫ ܡܲܫܪܝܼܬܹܗ ܠܲܩܪܵܒ̣ܵܐ. ܘܙܵܥ ܘܐܸܬܼܒܲܠܗܝܼ ܓܘܼܕܲܝ̈ܗܘܿܢ. ܕܚܲܢܦܹ̈ܐ ܣܵܓ̣ܕܲܝ̈ ܠܒܸܪ̈ܝܵܬܼܵܐ. ܘܐܲܪܦ̣ܝܼܘ ܛܘܼܥܝܲܝ ܕܚܲܢܦܘܼܬܼܵܐ. ܘܲܣ̣ܓܸܕܼܘ ܠܲܨܠܝܼܒܼܵܐ ܘܝܲܩ̣ܪܘܼܗܝ؛ ܬܢܝܼ؛ ܫܲܒܲܚ. ܠܗܲܝܟܿܠܵܐ ܣܓ̣ܝܼܕܼܵܐ ܕܲܫܟ̣ܝܼܢܬܵܟܼ. ܪܵܗ̇ܛܵܐ ܥܵܢ̈ܵܐ ܕܡܲܪܥܝܼܬܼܵܟܼ. ܡܫܝܼܚܵܐ ܪܵܥܝܵܐ ܫܲܪܝܼܪܵܐ. ܚܬ̣ܘܿܡ ܡܵܪܝ ܚܲܝܹܝ̈ܗ̇ ܒܲܚܢܵܢܵܟܼ. ܘܢܲܛܲܪ ܝܲܠܕܹ̇ܝ̈ܗ̇ ܒܛܲܝܒ̇ܘܼܬܼܵܟܼ. ܡܲܠܟܵܐ ܪܲܒܵܐ ܕܬܸܫܒ̇ܘܿܚܬܵܐ. ܪܫܘܿܡܹܝܗ̇ ܒܐܵܬܵܐ ܕܲܨܠܝܼܒ̣ܵܐ. ܕܒܲܕܼܡܵܟܼ ܚܲܝܵܐ ܐܸܙܕܲܒ̣ܢܲܬܸ.
ܕܐ݇ܪ̈ܵܙܹܐ؛ ܒܐܲܝܠܹܝܢ ܕܐܸܬ̇ܬ̇ܚܸܕܼܘ. ܐܹܪܲܡ̱ܪܡܵܟܼ ܡܵܪܝ ܡܲܠܟܵܐ؛ ܫܘܼܒ̣ܚܹܗ ܒܐܲܪܥܵܐ ܘܒܲܫܡܲܝܵܐ. ܕܨܘܼܪܬܵܐ. ܫܲܪܝܼܪܵܐܝܼܬܼ ܪܲܒ̇ܘܼ ܐ݇ܪܵܙܵܐ ܗܵܢܵܐ ܕܟܹܐܢܘܼܬܼܵܐ. ܘܒܲܫܡܹܗ ܥܲܡܡܹ̈ܐ ܢܣܲܒ̇ܪܘܼܢ. ܐ݇ܪܵܙܹܗ ܕܲܨܠܝܼܒ̣ܵܐ ܡܸܬܼܡܲܠܲܠ. ܘܟܼܠ ܒܸܪ̈ܝܵܬܼܵܐ ܡܸܬܼܦܲܨ̈ܚܵܢ. ܕܡܲܠܟܵܐ ܡܫܝܼܚܵܐ ܡܸܬܼܟ̇ܪܸܙ. ܘܥܵܠܡܵܐ ܟܠܹܗ ܡܸܬܼܩܲܕܲܫ. ܬܢܝܼ؛ ܫܲܒܲܚ. ܒܢܸܬ̇ܛܲܝܲܒ̣ ܒܕܸܚܠ̱ܬܼܵܐ. ܬܵܘ ܟܠܲܢ ܢܸܟ̇ܘܿܦ ܒܘܼܪ̈ܟܲܝܢ ܒܲܨܠܘܿܬܼܵܐ. ܩܕܼܵܡ ܨܠܝܼܒ̣ܵܐ ܕܐܝܼܬܼܵܘܗܝ ܓܲܙܵܐ ܕܥܘܼܕܼܪ̈ܵܢܹܐ. ܢܸܫܟܲܚ ܪ̈ܲܚܡܹܐ ܘܫܘܼܒ̣ܩܵܢܵܐ ܕܚܵܘܒܹ̈ܐ. ܡܵܐ ܕܟܼܠ ܣܵܘ̈ܦܝܼܢ ܢܵܗ̇ܪܝܼܢ ܒܙܲܠܝܼܩܵܘ̈ܗܝ. ܘܟܲܕܼ ܠܵܐ ܨܵܒܹ̇ܝܢ ܣܵܩܘܿܪ̈ܵܘܗܝ. ܣܵܓ̣ܕ̇ܝܼܢ ܠܡܵܪܘܼܬܹܗ.
ܕܚܝܼܠܲܬ̇. ܨܠܝܼܒ̣ܵܐ ܫܝܼܛܵܐ ܕܲܒܼܪܹܫ ܩܲܝܣܵܐ. ܗܵܐ ܡܙܲܝܚܝܼܢ ܠܹܗ ܥܝܼܪܹ̈ܐ ܘܐ݇ܢܵܫܵܐ܀ ܢܦܲܠ ܕܸܚ̈ܠܵܬܼܵܐ ܪܥܸܡ ܥܹ̈ܕܼܵܬܼܵܐ. ܚ̣ܵܒ̣ ܣܵܛܵܢܵܐ ܘܲܙ̣ܟܼܵܐ ܨܠܝܼܒ̣ܵܐ.
ܐܲܩܲܦܬܵܐ؛ ܐܲܚܲܝ̈ ܢܸܩܪܘܿܒܼ ܘܢܸܚܙܸܐ ܠܕܸܒ̣ܚܵܐ. ܕܦܲܓ̣ܪܹܗ ܘܲܕܼܡܹܗ ܕܒܲܪ ܐܲܠܵܗܵܐ. ܕܲܬܼܠܸܐ ܒܩܲܝܣܵܐ ܚܠܵܦ ܚܲܛܵܝܹ̈ܐ. ܘܲܕܼܒ̣ܝܼܚ ܒܚܘܼܒܹ̇ܗ ܡܸܛܠ ܥܹܕܿܬܹ̇ܗ. ܬܠܸܐ ܒܲܙܩܝܼܦܵܐ ܐܲܝܟܼ ܚܲܠܵܫܵܐ. ܘܝܵܗܹ̇ܒܼ ܚܲܝܹ̈ܐ ܐܲܝܟܼ ܐܲܠܵܗܵܐ. ܗܲܠܸܠܘܼܝܲܗ.
ܕܒܹܝܡ؛ ܥܘܼܢܵܝܵܐ. ܒܗܵܘ̇ ܕܝܘܿܚܲܢܵܢ. ܒܗܵܢܵܐ ܥܹܐܕܼܵܐ ܕܲܫܟܼܵܚܬܵܐ. ܕܲܨܠܝܼܒܹܗ ܕܡܲܠܟܵܐ ܡܫܝܼܚܵܐ. ܢܸܙܡܲܪ ܫܘܼܒ̣ܚܵܐ ܥܲܡ ܪ̈ܘܼܚܵܢܹܐ. ܠܗܵܘ̇ ܕܒܲܨܠܝܼܒܹܗ ܫܩܲܠ̣ ܙܵܟܼܘܼܬܼܵܐ. ܘܲܥ̣ܒܲܕܼ ܫܲܝܢܵܐ ܒܪܵܘܡܵܐ ܘܥܘܼܡܩܵܐ. ܘܦܲܓ̣ܪܹܗ ܘܲܕܼܡܹܗ ܝܲܗ̣݇ܒܼ ܠܵܗ̇ ܠܥܹܕܿܬܹ̇ܗ. ܗܲܠܸܠܘܼܝܲܗ.
ܒܵܬܹ̈ܐ؛ ܨܠܝܼܒ̣ܵܐ ܕܢܘܼܗܪܵܐ ܨܡܲܚ̣ ܒܲܒܼܪܝܼܬܼܵܐ. ܘܲܪܕܲܦ̣ ܚܸܫܟܵܐ ܕܲܦܬܲܟܼܪܘܼܬܼܵܐ. ܩܘܼܣܛܲܢܛܝܼܢܘܿܣ ܚ̣ܙܵܝܗܝ ܒܲܫܡܲܝܵܐ. ܕܗܸܘܝܘܼ ܕܡܲܡܠܸܟܼ ܥܲܠ ܟܠ ܕܸܚ̈ܠܵܢ. ܘܗܸܘܝܘܼ ܕܫܲܝܸܢ ܪܵܘܡܵܐ ܘܥܘܼܡܩܵܐ. ܥܲܡ ܫܵܠܘܿܚܹܗ ܕܲܠܘܵܬܼ ܓܸܢܣܲܢ ܗܲܠܸܠܘܼܝܲܗ.
ܕܦܲܓ̣ܪܵܟܼ ܘܲܕܼܡܵܟܼ. ܬܲܗܪܵܐ ܗ݇ܘ̣ ܪܲܒܵܐ ܗܵܢܵܐ ܨܠܝܼܒ̣ܵܐ. ܒܪܵܘܡܵܐ ܘܥܘܼܡܩܵܐ ܫܘܼܒ̣ܚܵܐ ܠܲܫܡܹܗ܀ ܨܠܝܼܒ̣ܵܐ ܦܲܪܩܲܢ ܨܠܝܼܒ̣ܵܐ ܙܲܟ̇ܝܲܢ. ܨܠܝܼܒ̣ܵܐ ܚܲܕܿܬܲܢ ܨܠܝܼܒ̣ܵܐ ܫܲܝܢܲܢ܀ ܨܠܝܼܒ̣ܵܐ ܚܲܝܵܐ ܢܦܲܩ̣ ܒܲܒܼܥܵܬܲܢ. ܘܲܦ̣ܪܲܩ ܚܲܝܲܝ̈ܢ ܕܐܲܒ̇ܝܼܕܼܝܼܢ ܗ݇ܘ̣ܵܘ.
ܬܸܫܒ̇ܘܿܚܬܵܐ. ܚܲܝܸܠ ܡܲܪܲܢ.
♱♱♱♱♱♱♱♱♱