ܥܐܕܐ ܕܕܢܚܐ
ܡܸܢܝܵܢܵܐ؛ ܟܕ؛ 2‐10 ، 15‐ܫܘܼܠܵܡܵܐ
ܬܸܒ̣ ܘܲܫܠܵܘ ܡܸܢܝܵܢܵܐ ܣܸܦܪܵܐ ܕܐܲܪܒܥܵܐ ܕܐܘܿܪܵܝܬܵܐ
ܐܲܚܲܝ̈ ܒܲܪܸܟ̣ܡܵܪܝ.
ܡܘܼܪܸܡܠܹܗ ܒܸܠܥܲܡ ܥܲܝܢ̈ܘܼܗܝ ܘܚܙܹܐܠܹܗ ܠܝܼܣܪܵܝܹܠ ܟܲܕ ܫܸܪܝܵܐ ܟܠ ܫܲܒ̣ܛܵܐ ܒܢܲܦ̮ܫܹܗ؛ ܗܘܹܐܠܵܗ̇ ܐܸܠܹܗ ܪܘܼܚܹܗ ܕܐܲܠܵܗܵܐ.܀ ܘܡܘܼܪܸܡܠܹܗ ܒܡܲܬܠܹܗ ܘܐ݇ܡܸܪܹܗ؛ ܒܹܐܡܵܪܵܐ ܝ݇ܠܹܗ ܒܸܠܥܲܡ ܒܲܪ ܒܥܘܼܪ؛ ܒܹܐܡܵܪܵܐ ܝ݇ܠܹܗ ܐ݇ܢܵܫܵܐ ܥܲܝܢܹܗ ܦܬܝܼܚܬܵܐ؛ ܒܹܐܡܵܪܵܐ ܝ݇ܠܹܗ ܕܫܡܝܼܥܠܹܗ ܚܲܒܪܵܐ ܕܐܲܠܵܗܵܐ؛ ܘܚܸܙܘܵܐ ܕܐܲܠܵܗܵܐ ܚܙܹܐܠܹܗ؛ ܟܲܕ ܢܦܝܼܠܵܐ ܠܐܲܪܥܵܐ ܘܥܲܝܢ̈ܘܼܗܝ ܦܬܝܼܚܹ̈ܐ. ܟܡܵܐ ܫܲܦܝܼܪܵܐ ܝ݇ܠܹܗ ܡܲܫܟܢܘܼܟܼ ܝܲܥܩܘܿܒ̣ ܘܡܲܫܟܢܘܼܟܼ ܝܼܣܪܵܝܹܠ.܀ ܒܸܓ̰ܪܵܝܵܐ ܐܲܝܟܼ ܪ̈ܵܓ݇ܘܘܿܠܹܐ ܘܐܲܝܟܼ ܟܲܪ̈ܡܵܢܹܐ ܕܥܲܠ ܢܲܗܪܵܐ؛ ܘܐܲܝܟܼ ܡܲܫܟܢܵܐ ܕܢܨܝܼܒ̣ܠܹܗ ܡܵܪܝܵܐ؛ ܘܐܲܝܟܼ ܐܲܪ̈ܙܹܐ ܕܥܲܠ ܡܝܼܵܐ.܀ ܒܸܬ ܦܵܠܸܛ ܚܲܕ݇ ܐ݇ܢܵܫܵܐ ܡ̣ܢ ܒܢܘܿܢ̈ܘܼܗܝ؛ ܘܙܲܪܥܹܗ ܘܡܝܼܵܐ ܪܵܒܵܐ؛ ܘܒܸܬ ܦܵܐܹܫ ܡܘܼܪܡܵܐ ܒܘܼܫ ܡ̣ܢ ܐܵܓ̣ܵܓ̣ ܡܲܠܟܵܐ ܘܒܸܬ ܦܵܝܫܵܐ ܡܘܼܪܸܡܬܵܐ ܡܲܠܟܘܼܬܹܗ.܀ ܐܲܠܵܗܵܐ ܕܦܘܼܠܛܝܼܠܹܗ ܡ̣ܢ ܡܸܨܪܹܝܢ ܒܚܲܝܠܹܗ ܘܒܪܵܡܘܼܬܹܗ؛ ܒܸܬ ܐܵܟ̣ܸܠ ܛܵܝܸܦܹ̈ܐ ܣܲܢܝܵܢ̈ܘܼܗܝ ܘܓܲܪ̈ܡܲܝܗܝ ܒܸܬ ܬܵܒ̣ܸܪ ܘܚܵܨܲܝܗܝ ܒܸܬ ܫܵܡܸܛ.܀ ܒܪܸܟܠܹܗ ܘܕܡܸܟ̣ܠܹܗ ܡܐܲܝܟܼ ܐܲܪܝܵܐ؛ ܘܐܲܝܟܼ ܓܘܼܪܝܵܐ ܕܐܲܪܝܵܐ؛ ܘܡܵܢܝܼ ܒܸܬ ܡܲܩܸܡ ܠܹܗ؟ ܒܲܪܟ̣ܵܢܘܼܟܼ ܒܪ̈ܝܼܟ̣ܹܐ؛ ܘܠܵܝܛܵܢܘܼܟܼ ܠܝܼܛܹ̈ܐ. ܘܡܘܼܪܸܡܠܹܗ ܒܡܲܬܠܹܗ؛ ܘܐ݇ܡܸܪܹܗ؛ ܒܹܐܡܵܪܵܐ ܝ݇ܠܹܗ ܒܸܠܥܲܡ ܒܪܘܿܢܹܗ ܕܒܥܘܿܪ؛ ܒܹܐܡܵܪܵܐ ܝ݇ܠܹܗ ܐ݇ܢܵܫܵܐ ܥܲܝܢܹܗ ܦܬܝܼܚܬܵܐ؛ ܒܹܐܡܵܪܵܐ ܝ݇ܠܹܗ ܕܫܡܝܼܥܠܹܗ ܚܲܒܪܵܐ ܕܐܲܠܵܗܵܐ ܘܝ݇ܕܝܼܥܠܹܗ ܗܵܘܢܵܐ ܕܥܸܠܵܝܵܐ؛ ܘܚܸܙܘܵܐ ܕܐܲܠܵܗܵܐ ܚܙܹܐܠܹܗ؛ ܟܲܕ ܢܦܝܼܠܵܐ ܠܐܲܪܥܵܐ ܘܥܲܝܢ̈ܘܼܗܝ ܦܬܝܼܚܹ̈ܐ. ܚܙܹܐܠܝܼ ܐܸܠܹܗ ܘܠܵܐ ܡ̣ܢ ܓ̰ܲܠܕܹܐ؛ ܘܚܸܪܝܼ ܒܝܼܹܗ ܘܠܹܐ ܗ݇ܘܵܐ ܩܘܼܪܒܵܐ؛ ܒܸܬ ܙܵܪܸܩ ܟܵܘܟ̣ܒ̣ܵܐ ܡ̣ܢ ܝܲܥܩܘܿܒ̣؛ ܘܒܸܬ ܩܵܐܹܡ ܡܲܠܟܵܐ ܡ̣ܢ ܝܼܣܪܵܝܸܠ؛ ܘܒܸܬ ܡܬܵܠܸܩ ܠܓܲܢ݇ܒܵܪܹ̈ܐ ܕܡܘܼܐܵܒ̣؛ ܘܒܸܬ ܙܲܒܛܸܢ ܠܟܠܲܝܗܝ ܒܢܲܝ̈ ܫܹܝܬܼ؛ ܘܒܸܬ ܗܵܘܝܵܐ ܐܵܕܘܿܡ ܝܵܪܬܘܼܬܹܗ؛ ܘܣܵܥܝܼܪ ܝܵܪܬܘܼܬܵܐ ܕܕܸܫ̮ܡܸܢ̈ܘܼܗܝ؛ ܒܸܬ ܗܵܘܝܵܐ ܕܝܼܹܗ؛ ܘܝܼܣܪܵܝܸܠ ܒܸܬ ܩܵܢܹܐ ܚܲܝܠܵܐ. ܘܒܸܬ ܨܵܠܹܐ ܡ̣ܢ ܝܲܥܩܘܿܒ̣ ܘܒܸܬ ܡܬܵܠܸܩ ܠܗ̇ܘ ܕܦܵܐܹܫ ܡܚܘܼܠܨܵܐ ܡ̣ܢ ܡܵܬܵܐ. ܘܚܙܹܐܠܹܗ ܠܥܡܵܠܝܼܩ؛ ܘܡܘܼܪܸܡܠܹܗ ܒܡܲܬܠܹܗ ܘܐ݇ܡܸܪܹܗ؛ ܪܹܫܵܐ ܕܛܵܝܸܦܹ̈ܐ ܥܡܵܠܝܼܩ؛ ܘܚܲܪܬܹܗ ܒܸܬ ܬܵܠܩܵܐ ܗܲܠ ܐܵܒܲܕ.܀ ܘܚܙܹܐܠܹܗ ܠܩܝܼܢܵܝܹ̈ܐ؛ ܘܡܘܼܪܸܡܠܹܗ ܒܡܲܬܠܹܗ ܘܐ݇ܡܸܪܹܗ؛ ܚܲܝܠܵܢܬܵܐ ܝ݇ܠܵܗ̇ ܕܘܼܟܬܘܼܟܼ؛ ܘܩܸܢܘܼܟܼ ܦܝܼܫܬܵܐ ܝ݇ܠܵܗ̇ ܡܘܼܬܸܒ̣ܬܵܐ ܓܵܘ ܩܵܝܵܐ.܀ ܘܐܸܢ ܦܵܐܹܫ ܩܵܐ ܒܘܼܝܵܪܵܐ ܡ̣ܢ ܩܝܼܢ؛ ܗܲܠ ܠܐܵܬܼܘܿܪ ܒܸܬ ܦܵܝܫܸܬ̇ ܠܘܼܒܠܵܐ ܒܸܣܠܵܒܵܐ ܘܡܘܼܪܸܡܠܹܗ ܒܡܲܬܠܹܗ ܘܐ݇ܡܸܪܹܗ؛ ܘܵܝ ܡܵܢܝܼ ܒܸܬ ܚܲܝܹܐ ܐܝܼܡܲܢ ܕܐܲܠܵܗܵܐ ܥܵܒ̣ܸܕ ܐܲܢܹܐ؟܀ ܘܠܸܓ̣ܝܘܿܢܹ̈ܐ ܒܸܬ ܦܵܠܛܝܼ ܡ̣ܢ ܐܲܪܥܵܐ ܕܟܹܬܵܝܹ̈ܐ؛ ܘܒܸܬ ܙܲܒܛܸܢܝܼ ܠܐܵܬ̣ܘܿܪ؛ ܘܙܲܒܛܸܢܝܼ ܠܥܸܒ̣ܪ̈ܵܝܹܐ؛ ܘܐܘܼܦ ܐܵܢܝܼ ܒܸܬ ܬܵܠܩܝܼ ܗܲܠ ܐܵܒܲܕ.܀ ܘܩܸܡܠܹܗ ܒܸܠܥܲܡ ܘܕܸܪܹܗ ܘܐ݇ܙܸܠܹܗ ܠܐܲܬܪܹܗ؛ ܘܐܘܼܦ ܒܵܠܲܩ ܐ݇ܙܸܠܹܗ ܒܐܘܼܪܚܹܗ.܀
ܚܲܒ̣ܪܹܗ
ܐܹܫܲܥܝܵܐ ܕ؛ 2‐6. ܝܐ؛ 1‐6. ܝܒ؛ 4‐ܫܘܼܠܵܡܵܐ
ܫܠܵܘ ܢܒ̣ܝܼܘܼܬܹܗ ܕܐܹܫܲܥܝܵܐ؛ ܐܲܚܲܝ̈ ܒܲܪܸܟ̣ܡܵܪܝ܀
ܗܲܪ ܒܗ̇ܘ ܝܵܘܡܵܐ ܒܸܬ ܗܵܘܹܐ ܠܵܘܓ̰ܹܗ ܕܡܵܪܝܵܐ ܠܚܸܩܪܵܐ ܘܐܝܼܩܵܪܵܐ؛ ܘܛܥܘܼܢܝܵܬܹ̈ܐ ܕܐܲܪܥܵܐ ܠܙܲܪܝܼܦܘܼܬܵܐ ܘܠܚܸܩܪܵܐ ܩܵܐ ܕܗ̇ܘ ܕܦܵܐܹܫ ܡ̣ܢ ܝܼܣܪܵܝܹܠ؛ ܘܒܸܬ ܗܵܘܹܐ ܟܠ ܡ̇ܢ ܕܦܵܐܹܫ ܒܨܸܗܝܘܿܢ ܘܟܠ ܡ̇ܢ ܕܦܵܐܹܫ ܒܐܘܿܪܸܫܠܸܡ ܩܲܕܝܼܫܵܐ ܒܸܬ ܦܵܐܹܫ ܩܸܪܝܵܐ. ܘܟܠ ܕܝܼܠܹܗ ܟܬܝܼܒ̣ܵܐ ܓܵܘ ܐܘܿܪܸܫܠܸܡ ܠܚܲܝܹ̈ܐ.܀ ܘܒܸܬ ܚܲܠܸܠ ܡܵܪܝܵܐ ܫܸܚܬܵܐ ܕܒܢܵܬܹ̈ܐ ܕܨܸܗܝܘܿܢ؛ ܘܕܸܡܵܐ ܒܸܬ ܡܲܪܚܸܩ ܡ̣ܢ ܓܵܘܵܗ̇ ܕܐܘܿܪܸܫܠܸܡ ܒܪܘܼܚܵܐ ܕܕܝܼܘܵܢ؛ ܘܒܪܘܼܚܵܐ ܡܲܩܕܵܢܬܵܐ.܀ ܘܒܸܬ ܒܵܪܹܐ ܡܵܪܝܵܐ ܥܲܠ ܟܠ ܚܲܕ݇ ܒܲܝܬܵܐ ܠܛܘܼܪܵܐ ܕܨܸܗܝܘܿܢ ܘܚܵܕܸܪ̈ܘܵܢܵܗ̇؛ ܥܢܵܢܵܐ ܒܝܵܘܡܵܐ؛ ܘܬܸܢܢܵܐ ܘܠܵܘܓ̰ܵܐ ܕܠܵܗܵܐ ܕܢܘܼܪܵܐ ܒܠܲܝܠܹܐ؛ ܣܵܒܵܒ ܕܥܲܠ ܐܝܼܩܵܪܵܐ ܒܸܬ ܗܵܘܝܵܐ ܛܸܠܵܢܝܼܬܵܐ؛ ܘܒܸܬ ܦܵܠܸܛ ܚܘܼܛܪܵܐ ܡ̣ܢ ܩܘܼܪܡܵܐ ܕܐܝܼܫܲܝ ܘܒܸܬ ܡܲܓ̰ܝܸܢ ܢܘܼܪܒ̣ܵܐ ܡ̣ܢ ܥܸܩܪܹܗ. ܘܒܸܬ ܡܲܢܝܸܚܵܐ ܘܫܵܪܝܵܐ ܥܲܠܹܗ ܪܘܼܚܵܐ ܕܐܲܠܵܗܵܐ. ܘܦܵܪܡܵܝܬܵܐ ܕܗܵܘܢܵܐ. ܪܘܼܚܵܐ ܕܚܝܼܵܠ ܘܕܓܲܢ݇ܒܵܪܘܼܬܵܐ؛ ܪܘܼܚܵܐ ܕܝܼܕܲܥܬܵܐ ܘܙܕܘܿܥܬܹܗ ܕܡܵܪܝܵܐ.܀ ܘܒܸܬ ܙܵܪܸܩ ܒܙܕܘܿܥܬܵܐ ܕܡܵܪܝܵܐ؛ ܘܠܹܐ ܕܵܐܹܢ ܐܲܝܟܼ ܕܚܵܙܝܼ ܥܲܝܢ̈ܘܼܗܝ؛ ܘܠܵܐ ܐܲܝܟܼ ܕܫܵܡܥܝܼ ܢܵܬܝܵܬ̈ܘܼܗܝ ܒܸܬ ܡܲܢܟ̣ܸܣ.܀ ܒܸܬ ܕܵܐܸܢ ܒܗܵܩܘܼܬܵܐ ܠܡܸܣܟܹܢܹ̈ܐ؛ ܘܒܸܬ ܡܲܢܟ̣ܸܣ. ܒܬܪܘܼܨܘܼܬܵܐ ܠܒܝܼܫܹ̈ܐ ܕܐܲܪܥܵܐ؛ ܘܒܸܬ ܡܵܚܹܐ ܠܐܲܪܥܵܐ ܒܩܵܛܝܼܵܐ ܕܦܘܼܡܹܗ؛ ܘܒܪܘܼܚܵܐ ܕܣܸܦܘܵܬܹ̈ܗ ܒܸܬ ܡܲܡܝܸܬ̇ ܠܟܵܦܘܿܪܹ̈ܐ؛ ܒܸܬ ܗܵܘܝܵܐ ܙܲܕܝܼܩܘܼܬܵܐ ܚܲܪܚܵܨܹܗ ܘܗܲܝܡܵܢܘܼܬܵܐ ܝܸܣܘܼܪܵܐ ܩܵܐ ܕܸܦܢܵܬܹ̈ܗ. ܫܲܟܪܘܿܢ ܠܡܵܪܝܵܐ ܘܩܪܹܐܡܘܿܢ ܫܸܡܹܗ؛ ܘܡܲܚܙܹܐܡܘܿܢ ܓܵܘ ܛܵܝܸܦܹ̈ܐ ܨܲܢܥܲܬܹܗ.܀ ܕܟ̣ܘܿܪܘܿܢ ܕܚܲܝܠܬܵܢܵܐ ܝ݇ܠܹܗ ܫܸܡܹܗ.܀ ܙܡܘܿܪܘܿܢ ܠܡܵܪܝܵܐ ܣܵܒܵܒ ܕܪܵܡܘܼܬܵܐ ܥܿܒ̣ܸܕܠܹܗ. ܘܦܝܼܫܬܵܐ ܝ݇ܠܵܗ̇ ܝ݇ܕܝܼܥܬܵܐ ܐܵܗܵܐ ܓܵܘ ܟܠܵܗ̇ ܐܲܪܥܵܐ ܦܨܘܿܚܝ ܘܫܵܒܸܚܝ ܥܵܡܪܵܢܬܵܐ ܕܨܸܗܝܘܿܢ؛ ܣܵܒܵܒ ܕܓܘܼܪܵܐ ܝ݇ܠܹܗ ܗ̇ܘ ܕܓܵܘܵܟ̣ܝ ܩܲܕܝܼܫܵܐ ܕܝܼܣܪܵܝܹܠ.܀
♱♱♱♱♱♱♱♱
ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ
ܕܲܠܘܵܬܼ ܛܸܛܘܿܣ؛ ܐܲܚܲܝ̈ ܒܲܪܸܟܼܡܵܪܝ܀
ܣܵܒܵܒ ܦܸܫܠܵܗ̇ ܓܠܝܼܬܵܐ ܫܵܦܵܩܲܬ ܕܐܲܠܵܗܵܐ ܡܲܚܝܼܵܢܬܵܐ ܩܵܐ ܟܠܲܝܗܝ ܒܢܲܝ̈ܢܵܫܵܐ* ܘܡܵܠܘܿܦܲܢ ܝܼܠܵܗ̇ ܕܟܵܦܪܲܚ ܒܟܦܘܼܪ̈ܝܹܐ ܘܫܲܗܘܲܬܝܵܬܹ̈ܐ ܕܕܘܼܢܝܸܐ. ܘܚܲܝܲܚ ܓܵܘ ܕܐܵܗܵܐ ܥܵܠܡܵܐ ܒܐܵܕܵܒܘܼܬܵܐ ܘܒܟܹܐܢܘܼܬܵܐ ܘܙܕܘܼܥܬܵܐ ܕܐܲܠܵܗܵܐ* ܟܲܕ ܒܸܣܦܵܪܵܐ ܝ݇ܘܲܚ ܠܗܹܒܼܝܼ ܒܪܝܼܟܼܬܵܐ ܘܠܓܸܠܝܵܢܵܐ ܕܬܸܫܒܘܿܚܬܹܗ ܕܐܲܠܵܗܵܐ ܓܘܼܪܵܐ ܘܡܲܚܝܼܵܢܲܢ ܝܼܫܘܿܥ ܡܫܝܼܚܵܐ* ܕܗ̇ܘ ܝܘܼܗܒܸܠܹܗ ܓܵܢܹܗ ܡ̣ܢ ܓܹܒܲܢ؛ ܩܵܐ ܕܡܚܵܠܸܨ ܠܲܢ ܡ̣ܢ ܟܠ ܥܵܘܠܵܐ؛ ܘܡܕܵܟܹܐ ܠܲܢ ܩܵܐ ܓܵܢܹܗ ܛܵܝܸܦܵܐ ܚܲܕ݇ܬܵܐ ܕܒܲܚܸܠ ܒܦܘܼܠܚܵܢܹ̈ܐ ܛܵܒܹ̈ܐ* ܐܲܢܹܐ ܗܲܡܙܸܡ ܘܛܠܘܿܒ ܘܡܲܢܟܸܣ ܒܟܠ ܦܘܼܩܕܵܢܵܐ؛ ܘܗܸܟ̃ ܚܲܕ݇ ܐ݇ܢܵܫܵܐ ܠܵܐ ܡܲܣܠܹܐ ܠܘܼܟ* ܘܗܵܘܸܬ ܡܲܕܟܼܘܼܪܹܐ ܐܸܠܲܝܗܝ ܕܡܲܨܝܸܬܝܼ ܘܗܵܘܝܼ ܙܲܒܛ ܠܪܹ̈ܫܵܢܹܐ ܕܗܘܼܟܡܵܐ. ܘܗܵܘܝܼ ܗܘܹܕܪܹܐ ܩܵܐ ܟܠ ܦܘܼܠܚܵܢܵܐ ܛܵܒܼܵܐ* ܘܥܲܠ ܗܸܟ̃ ܐ݇ܢܵܫܵܐ ܠܵܐ ܓܵܕܦܝܼ؛ ܘܠܵܐ ܗܵܘܝܼ ܡܲܩܪܸ̈ܨܵܢܹܐ؛ ܐܸܠܵܐ ܗܵܘܝܼ ܡܲܟܝܼܟܼܹ̈ܐ؛ ܘܒܟܠ ܡܸܢܕܝܼ ܡܲܚܙܝܼ ܒܲܣܝܼܡܘܼܬܵܐ ܠܟܸܣ ܟܠܲܝܗܝ ܒܢܲܝ̈ܢܵܫܵܐ* ܣܵܒܵܒ ܐܘܼܦ ܐܲܚܢܲܢ ܡ̣ܢ ܩܲܕܡܵܝܬܵܐ ܕܠܵܐ ܦܲܪܡܵܝܬܵܐ ܝ݇ܘܲܚ ܗ݇ܘ̣ܵܘ ܘܕܠܵܐ ܐܸܢܝܲܬ؛ ܘܚܠܝܼܛܸܐ ܘܙܘܼܒܛܸܢܹܐ ܠܫܲܗܘܲܬܝܵܬܹ̈ܐ ܕܬܲܗܵܪܹ̈ܐ ܬܲܗܵܪܹ̈ܐ؛ ܘܒܒܝܼܫܘܼܬܵܐ ܘܒܲܚܝܼܠܘܼܬܵܐ ܚܵܕܪܲܚ ܗ݇ܘ̣ܵܘ؛ ܘܣܸܢܝܹ̈ܐ؛ ܘܐܘܼܦ ܚܲܕ݇ ܠܗ̇ܘ ܐ݇ܚܹܪ݇ܢܵܐ ܣܵܢܲܚ ܗ݇ܘ̣ܵܘ* ܐܝܼܢܵܐ ܐܝܼܡܲܢ ܕܦܸܫܠܵܗ̇ ܓܠܝܼܬܵܐ ܒܲܣܝܼܡܘܼܬܹܗ ܘܡܪܲܚܡܵܢܘܼܬܹܗ ܕܐܲܠܵܗܵܐ ܡܲܚܝܼܵܢܲܢ* ܠܵܐ ܒܦܘܼܠܚܵܢܹ̈ܐ ܕܙܲܕܝܼܩܘܼܬܵܐ ܕܥܵܒܼܸܕܠܲܢ؛ ܐܸܠܵܐ ܒܪ̈ܲܚܡܹܐ ܕܝܼـܹܗ ܩܲܡ ܡܲܚܹܐ ܠܲܢ ܒܣܚܵܝܬܵܐ ܕܡܵܘܠܵܕܵܐ ܓܵܗܵܐ ܕܬܪܸܝ؛ ܘܒܚܲܕܲܬܬܵܐ ܕܪܘܼܚܵܐ ܕܩܘܼܕܫܵܐ* ܗ̇ܝ ܕܬܘܼܦܸܚܠܹܗ ܥܲܠܲܢ ܒܦܸܪܝܘܼܬܵܐ ܒܝܼـܲܕ ܝܼܫܘܿܥ ܡܫܝܼܚܵܐ ܡܲܚܝܼܵܢܲܢ* ܕܒܫܵܦܵܩܲܬ ܕܝܼـܹܗ ܦܵܝܫܲܚ ܡܘܼܟܫܸܛܹܐ ܘܗܵܘ̣ܝ ܝܵܪ̈ܘܿܬܹܐ ܒܗܹܒܼܝܼ ܕܚܲܝܹ̈ܐ ܕܠܥܵܠܲܡ*
♱♱♱♱♱♱♱♱
ܥܐܕܐ ܕܕܢܚܐ
ܡܬܝ ܓ: 1 ‐ ܫܘܠܡܐ
ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܟܪܘܙܘܬܼܐ ܕܡܬܝ
♰ ܐܝܼܢܵܐ ܒܐܵܢܝܼ ܝܵܘܡܵܢܹ̈ܐ ܐ݇ܬܹܐ ܠܹܗ ܝܘܿܚܲܢܵܢ ܡܲܥܡܕܵܢܵܐ ܘܡܲܟܪܸܙ ܗ݇ܘܵܐ ܓܵܘ ܒܲܪܝܼܵܐ ܕܝܼܗܘܼܕ ܘܐܵܡܸܪ: ܬܲܘܸܒܘܿܢ ܩܘܼܪܒܸܢܵܗ̇ ܡܲܠܟܘܼܬܵܐ ܕܫܡܲܝܵܐ: ܣܵܒܵܒ ܐܵܗܵܐ ܝܠܹܗ ܗ̇ܘ ܕܝܼܠܹܗ ܐ݇ܡܝܼܪܵܐ ܒܝܲܕ ܐܹܫܲܥܝܵܐ ܢܒܼܝܼܵܐ: ܩܵܠܵܐ ܕܩܵܪܹܐ ܒܒܲܪܝܼܵܐ: ܗܲܕܪܘܿܢ ܐܘܼܪܚܹܗ ܕܡܵܪܝܵܐ ܘܡܲܫܘܲܝܡܘܿܢ ܠܲܫܒܼܝܼܠܘܼ̈ܗܝ: ܐܝܼܢܵܐ ܐܵܗܵܐ ܝܘܿܚܲܢܲܢ. ܠܒܼܝܼܫܬܹܗ ܝܑܼܗَܘܵܐ ܕܣܲܥܪܵܐ ܕܓܘܼܡܠܹ̈ܐ: ܘܐܲܣܲܪ ܚܲܨܹ̈ܐ ܕܓܸܠܕܵܐ ܥܲܠ ܚܲܨܘܼܗܝ، ܘܡܹܐܟܼܘܼܠܬܹܗ ܩܲܡܨܹ̈ܐ ܘܕܸܒܼܫܵܐ ܕܒܲܪܝܼܵܐ: ܗܿܝܓܵܗ̇ ܦܲܠܛܵܐ ܗ݇ܘܵܐ ܠܘܵܬܹܗ: ܐܘܿܪܸܫܠܸܡ ܘܟܠܵܗ̇ ܝܼܗܘܼܕ: ܘܟܠܹܗ ܐܲܬܪܵܐ ܕܚܵܕܸܪ̈ܘܵܢܹܐ ܕܝܘܿܪܕܢܲܢ: ܘܥܲܡܕܝܼ ܗ݇ܘܵܘ ܡܸܢܹܗ ܒܝܘܿܪܕܢܲܢ ܢܲܗܪܵܐ: ܟܲܕ ܡܵܘܕܘܼܝܹܐ ܒܚܛܝܼܵܬܲܝ̈ܗܝ. ܐܝܼܢܵܐ ܟܲܕ ܚܙܹܐܠܹܗ ܪܵܒܵܐ ܡ̣ܢ ܦܪ̈ܝܼܫܹܐ ܘܡ̣ܢ ܙܲܕܘܼܩܵܝܹ̈ܐ ܕܒܹܐܬܵܝܵܐ ܠܸܥܡܵܕܵܐ: ܐ݇ܡܝܼܪܹܗ ܐܸܠܲܝܗܝ: ܙܲܪܥܵܐ ܕܐܵܟܼܸܕܢܹ̈ܐ ܡܵܢܝܼ ܡܘܼܕܸܥܠܹܗ ܐܸܠܵܘܟܼܘܿܢ ܠܸܥܪܵܩܵܐ ܡ̣ܢ ܟܲܪܒܵܐ ܕܒܹܐܬܵܝܵܐ ܝܠܹܗ: ܥܒܼܘܼܕܘܿܢ ܗܲܕܟܼܵܐ ܛܥܘܿܢܝܵܬܹ̈ܐ ܕܚܲܫܚܝܼ ܠܬܝܵܒܼܘܼܬܵܐ: ܘܠܵܐ ܚܲܫܒܼܝܼܬܘܿܢ ܘܐܲܡܪܝܼܬܘܿܢ ܒܓܵܢܵܘܟܼܘܿܢ: ܕܒܵܒܵܐ ܐܝܼܬܠܲܢ ܐܲܒܼܪܵܗܵܡ: ܣܵܒܵܒ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ: ܕܒܡܵܨܹܐ ܐܲܠܵܗܵܐ ܡ̣ܢ ܐܲܢܹܐ ܟܹܐܦܹ̈ܐ ܠܡܲܩܘܼܡܹܐ ܒܢܘܿܢܹ̈ܐ ܠܐܲܒܼܪܵܗܵܡ: ܐܝܼܢܵܐ ܗܵܐ ܢܲܪܥܵܐ ܡܘܼܬܒܼܵܐ ܝܠܹܗ ܥܲܠ ܥܸܩܪܵܐ ܕܐܝܼܠܵܢܹ̈ܐ: ܗܲܕܟܼܵܐ ܟܠ ܐܝܼܠܵܢܵܐ ܕܠܵܐ ܥܵܒܼܸܕ ܛܥܘܘܼܢܝܵܬܹ̈ܐ ܛܵܒܼܹ̈ܐ: ܒܸܕ ܦܵܐܸܫ ܩܸܛܥܝܵܐ ܘܪܘܼܦܵܐ ܓܵܘ ܢܘܼܪܵܐ: ܐܵܢܵܐ ܡܲܥܡܘܼܕܹܐ ܝܘܸܢ ܐܸܠܵܘܟܼܘܿܢ ܒܡܝܼܵܐ ܠܸܬܝܵܒܼܘܬܵܐ: ܐܝܼܢܵܐ ܗ̇ܘ ܕܡ̣ܢ ܒܵܬ݇ܪ ܡܸܢܝܼ ܒܹܐܬܵܝܵܐ ܝܠܹܗ: ܒܘܼܫ ܚܲܝܠܵܢܵܐ ܝܠܹܗ ܡܸܢܝܼ. ܗ̇ܘ ܕܠܹܐܚܲܫܚܸܢ ܐܵܢܵܐ ܨܵܘܠܘܼ̈ܗܝ ܠܸܫܩܵܠܵܐ: ܗ̇ܘ ܒܸܕ ܡܲܥܡܸܕ ܠܵܘܟܼܘܿܢ ܒܪܘܼܚܵܐ ܕܩܘܼܕܫܵܐ ܘܒܢܘܼܪܵܐ: ܗ̇ܘ ܕܝܼܠܵܗ̇ ܪܘܼܦ̮݇ܫܬܵܐ ܒܐܝܼܕܹܗ ܘܡܕܲܟܼܹܘܼܝܹܐ ܒܸܕܪ̈ܵܬܘܼܗܝ: ܘܚܸܛܹ̈ܐ ܒܸܕ ܟܵܦܸܫ ܠܐܲܢܒܵܪ̈ܘܼܗܝ: ܘܬܸܒܼܢܵܐ ܒܡܵܩܸܕ ܒܢܘܼܪܵܐ ܕܠܹܐ ܕܵܥܸܟܼ: ܗܲܝܓܵܗ̇ ܐ݇ܬܹܐܠܹܗ ܝܑܼܫܘܿܥ ܡ̣ܢ ܓܠܝܼܠܵܐ ܠܝܘܿܪܕܢܲܢ ܠܘܵܬ ܝܘܿܚܲܢܲܢ ܕܥܵܡܸܕ ܡܸܢܹܗ: ܐܝܼܢܵܐ ܝܘܿܚܲܢܲܢ ܡܲܟܠܹܐ ܗ݇ܘܵܐ ܠܹܗ ܘܐܵܡܸܪ: ܐܵܢܵܐ ܝܘܸܢ ܣܢܝܼܩܵܐ ܕܡܸܢܘܼܟܼ ܦܲܝܫܸܢ ܥܡܝܼܕܵܐ، ܘܐܲܢ݇ܬ ܠܟܸܣܠܝܼ ܐ݇ܬܹܐܠܘܟܼ؟ ܐܝܼܢܵܐ ܝܑܼܫܘܿܥ ܓ̰ܘܼܘܸܒܠܹܗ ܘܐ݇ܡܝܼܪܹܗ ܐܸܠܹܗ: ܫܒܼܘܿܩ ܐܵܕܝܼܵܐ، ܣܵܒܵܒ ܗܲܕܟܼܵܐ ܘܵܠܹܐ ܐܸܠܲܢ ܕܬܲܡܸܡܵܚ ܟܠܵܗ̇ ܟܹܐܢܘܼܬܵܐ: ܘܗܿܝܓܵܗ̇ ܫܒ̣ܝܼܩܠܹܗ. ܐܝܼܢܵܐ ܟܲܕ ܥܡܝܼܕܠܹܗ ܝܑܼܫܘܿܥ ܒܗ̇ܝ ܥܸܕܵܢܵܐ ܣܸܝܼܩܠܹܗ ܡ̣ܢ ܡܝܼܵܐ: ܘܦܝܼܫܠܵܗ̇ ܦܬܝܼܚܬܵܐ ܐܸܠܹܗ ܫܡܲܝܵܐ: ܘܚܙܹܐܠܹܗ ܪܘܼܚܵܐ ܕܐܲܠܵܗܵܐ ܕܒܸܨܠܵܝܵܐ ܐܲܝܟܼ ܝܵܘܢܵܐ ܘܐ݇ܬܹܐܠܵܗ̇ ܥܲܠܘܼܗܝ. ܘܗܵܐ ܩܵܠܵܐ ܡ̣ܢ ܫܡܲܝܵܐ ܕܒܹܐܡܵܪܵܐ: ܐܵܗܵܐ ܝܑܼܠܹܗ ܒܪܘܿܢܝܼ ܚܲܒܝܼܒܼܵܐ ܕܒܝܼܹܗ ܒܣܸܡܠܵܐ ܠܝܼ.
♱♱♱♱♱♱♱♱