ܕܗܵܘܹ̇ܐ؛ ܘ؛ ܒܟܵܢܘܿܢ ܐ݇ܚܪܵܝ.
ܡܲܪܡܝܼܬܼܵܐ ܕܐ݇ܪ̈ܵܙܹܐ. ܫܲܒܲܚܘ ܠܡܵܪܝܵܐ ܬܸܫܒ̇ܘܿܚܬܵܐ ܚܕܲܬܵܐ.
ܐܲܩܲܦܬܵܐ. ܐܵܘܕܸ̇ܐ ܠܵܟܼ ܒܥܹܕܿܬܵܐ ܪܲܒܿܬܼܵܐ܀
ܥܘܼܢܵܝܵܐ. ܘܲܒ̣ܥܲܡܡܹ̈ܐ ܣܲܓܝܼܐܹ̈ܐ ܐܹܙܲܡܲܪ ܠܵܟܼ܀
ܥܘܿܢܝܼܬܼܵܐ ܕܩܲܢܟܹ̇ܐ. ܒܩܵܠ؛ ܬܵܘ ܢܸܬ̇ܕܲܡܲܪ.
ܐܹܪܲܡܪ̱ܡܵܟܼ ܡܵܪܝ ܡܲܠܟܵܐ. ܟܘܼܪܣܝܵܟܼ ܐܲܠܵܗܵܐ ܠܥܵܠܲܡ ܥܵܠܡܝܼܢ. ܕܨܘܼܪܬܵܐ. ܐܵܠܹܦ ܐܲܠܦܝܼ̈ܢ ܘܪܸܒ̇ܘܿ ܪܸ̈ܒ̇ܘܵܢ ܟܪܝܼܟ̣ܝܼܢ ܠܹܗ. ܠܟ̣ܘܼܪܣܝܵܐ ܕܚܝܼܠܵܐ ܕܪܲܒ̇ܘܼܬܼܵܟܼ. ܟܪ̈ܘܿܒܹܐ ܟܪܝܼܟ̣ܝܼܢ ܠܹܗ ܡܵܪܝܵܐ. ܘܲܒ̣ܕܸܚܠ̱ܬܼܵܐ ܒܝܲܕܼ ܓܸܦܲܝ̈ܗܘܿܢ. ܒܙܵܘܥܵܐ ܡܟܲܣܹܝ̇ܢ ܦܲܪ̈ܨܘܿܦܲܝܗܘܿܢ. ܒܲܕܼ ܠܵܐ ܡܸܫܟ̇ܚܝܼܢ ܠܡܸܬ̣ܠܵܐ ܥܲܝܢܲܝ̈ܗܘܿܢ. ܘܲܠܡܸܚܙܵܐ ܢܘܼܪܵܐ ܗ̇ܝ ܕܐܲܠܵܗܘܼܬ̣ܵܟܼ. ܘܐܲܢ݇ܬ̇ ܗܵܟܲܢܵܐ ܫܒ̣ܝܼܚܲܬ̇. ܥܵܡܲܪ ܐܲܢ݇ܬ̇ ܒܲܒ̣ܢܲܝ̈ܢܵܫܵܐ. ܠܵܐ ܠܡܵܘܩܵܕܼܘܼ؛ ܐܸܠܵܐ ܠܡܲܢܗܵܪܘܼ. ܪܲܒܵܐ ܗ݇ܝܼ ܡܵܪܝ ܡܪܲܚܡܵܢܘܼܬܼܵܟܼ ܘܛܲܝܒ̇ܘܼܬܼܵܟܼ ܕܲܣܥܲܪܬ̇ ܨܹܝܕܼ ܓܸܢܣܲܢ ܫܘܼܒ̣ܚܵܐ ܠܵܟܼ. ܬܢܝܼ؛ ܫܲܒܲܚ. ܠܚܲܝܹ̈ܐ ܘܛܘܼܒܹ̈ܐ ܐܲܡܝܼܢܹ̈ܐ. ܡܣܲܟܹ̇ܝܢ ܥܲܒ̣ܕܲܝ̈ܟ ܦܵܪܘܿܩܲܢ. ܘܐܵܚ̇ܕ̇ܝܼܢ ܓܵܘܣܵܐ ܒܗܲܝܡܵܢܘܼܬܼܵܐ ܘܛܵܦܣ̇ܝܼܢ ܒܟܸܢܦܵܘ̈ܗܝ ܕܲܨܠܝܼܒ̣ܵܐ. ܢܲܛܲܪ ܒܲܚܢܵܢܵܟܼ ܠܟܸܢܫܵܐ ܕܣܵܓ̣ܘܿܕܲܝ̈ܟ. ܘܫܲܡܠܵܐ ܨܹܐܕܲܝܗܘܿܢ ܫܘܼܘܕܵܝ ܡܘܼܠܟܵܢܲܝ̈ܟ. ܕܐܸܡܲܪܬ̇ ܠܪ̈ܵܚܡܲܝܟ ܒܲܣܒܲܪܬ̣ܵܟܼ. ܕܟ̣ܠ ܐܲܝܢܵܐ ܕܲܡܗܲܝܡܸܢ ܒܝܼ. ܝܵܪܹܬ̣ ܡܲܠܟ̇ܘܼܬܼܵܐ ܘܚܲܝܹ̈ܐ ܕܲܠܥܵܠܲܡ. ܐܲܫܘܵܐ ܠܲܢ ܡܵܪܝ ܥܲܡ ܩܲܕ̇ܝܼܫܲܝܟ. ܢܸܙܡܲܪ ܠܵܟܼ ܒܲܓ̣ܢܘܿܢ ܡܲܠܟ̇ܘܼܬ̣ܵܟܼ ܫܘܼܒ̣ܚܵܐ ܠܵܟܼ.
ܩܸܪܝܵܢܵܐ. ܡܸܢܝܵܢܵܐ؛ ܟܕ؛2‐10. 15‐ܫܘܼܠܵܡܵܐ
ܚܲܒ̣ܪܹܗ. ܐܹܫܲܥܝܵܐ؛ ܕ؛ 2‐6. ܝܐ؛1‐6 ܝܒ؛ 4‐ ܫܘܼܠܵܡܵܐ.
ܫܘܼܪܵܝܵܐ. ܡܸܛܠ ܗܵܢܵܐ ܡܲܫ̣ܚܵܟܼ ܐܲܠܵܗܵܐ ܐܲܠܵܗܵܟܼ. ܠܲܥܡܵܕܹܗ ܕܲܡܫܝܼܚܵܐ ܢܝܲܩܲܪ ܒܲܙܡܝܼܪ̈ܵܬܼܵܐ ܕܪܘܼܚܵܐ. ܗܲܠܵܠܘܼܝܲܗ ܗܲܠܸܠܘܼܝܲܗ ܐܹܗܲܠܸܠܘܼܝܲܗ܀ ܡܸܫܚܵܐ ܕܚܲܕܘܼܬܼܵܐ ܝܲܬ̇ܝܼܪ ܡ̣ܢ ܚܲܒ̣ܪ̈ܲܝܟ؛ ܠܲܥܡܵܕܹܗ ܕܲܡܫܝܼܚܵܐ.. ܫܲܒܲܚ. ܠܲܥܡܵܕܹܗ ܕܲܡܫܝܼܚܵܐ.. ܥܵܠܲܡ. ܠܲܥܡܵܕܹܗ ܕܲܡܫܝܼܚܵܐ..
ܫܠܝܼܚܵܐ. ܛܸܛܘܿܣ ܒ؛11‐ܓ؛8
ܙܘܼܡܵܪܵܐ. ܒܪܵܥܝܹܗ ܕܝܼܣܪܵܝܹܠ܀ ܐܲܒܲܥ ܠܹܒ̇ܝ ܦܸܬ̣ܓ̣ܵܡܹ̈ܐ ܛܵܒܹ̈ܐ. ܘܐܸܡܲܪ ܥܒ̣ܵܕܲܝ̈ ܠܡܲܠܟܵܐ. ܠܸܫܵܢܝ ܩܲܢܝܹܗ ܕܣܵܦܪܵܐ ܡܗܝܼܪܵܐ. ܓ܀ ܡܸܛܠ ܗܵܢܵܐ ܡܲܫ̣ܚܵܟܼ ܐܲܠܵܗܵܐ ܐܲܠܵܗܵܟܼ. ܡܸܫܚܵܐ ܕܚܲܕܼܘܼܬܼܵܐ ܝܲܬ̇ܝܼܪ ܡ̣ܢ ܚܲܒ̣ܪ̈ܲܝܟ. ܡܘܼܪܵܐ ܘܩܲܣܝܵܐ ܘܐܸܣܛܲܩܛܹ̈ܐ. ܓ܀
ܐܹܘܲܢܓܲܠܝܼܘܿܢ. ܡܲܬܲܝ؛ ܓ؛ 1‐ܫܘܼܠܵܡܵܐ
ܥܘܿܢܝܼܬܼܵܐ ܕܐ݇ܪ̈ܵܙܹܐ. ܒܩܵܠ؛ ܡܵܪܵܐ ܕܟ̣ܠܵܐ. ܫܲܒܲܚܘ ܠܡܵܪܝܵܐ ܬܸܫܒܿܘܿܚܬܵܐ ܚܕܲܬܵܐ. ܬܹܒܹܝܠ ܘܟ̣ܠܗܘܿܢ ܥܵܡܘܿܪܹ̈ܝܗ̇. ܕܨܘܼܪܬܵܐ. ܕܐܵܦ ܗܸܝ ܒܪܝܼܬܼܵܐ ܬܸܬܼܚܲܪܲܪ ܡ̣ܢ ܥܲܒ̣ܕ̇ܘܼܬܼܵܐ ܕܲܚܒ̣ܵܠܵܐ. ܒܪܝܼܬܼܵܐ ܒܡܵܪܵܗ̇ ܐܸܬ̣ܚܲܕܲܬܸ. ܘܲܠܦܵܪܘܿܩܵܗ̇ ܐܸܫܬܵܘܕܥܲܬܸ. ܕܲܥ̣ܡܲܕܼ ܘܲܓ̣ܠ̣ܵܐ ܠܵܗ̇ ܒܝܘܿܪܕܢܵܢ. ܬܵܘܕ̇ܝܼܬܼܵܐ ܕܲܬ̣ܠܝܼܬܼܵܝܘܼܬܼܵܐ. ܐܲܒ̣ܵܐ ܕܡܲܙܥܸܩ ܘܩܵܥܹ̇ܐ؛ ܕܗܵܢܵܘ ܚܲܒ̇ܝܼܒ̣ܝ ܕܒܹܗ ܐܸܨܛܒ̣ܝܼܬ̣. ܘܪܘܼܚܵܐ ܕܐܸܬ̣ܵܐ ܘܩ̣ܵܘܝܼ ܥܠܵܘܗܝ. ܘܐܵܘܕܲܥ̣ ܫܘܼܒ̣ܚܹܗ ܩܕܼܵܡ ܥܵܠܡܹ̈ܐ. ܬܢܝܼ؛ ܫܲܒܲܚ. ܒܫܘܼܚܠܵܦ. ܣܵܗܕܵܘ̈ܗܝ ܕܲܒ̣ܪܵܐ. ܘܒ̣ܵܗ̇ ܡܸܬ̣ܝܼܕܲܥ ܪܘܼܟܵܒ̣ܵܗ̇. ܬܵܘ ܡܗܲܝܡ̱ܢܹ̈ܐ ܚܙܵܘ ܘܲܬ̣ܗܲܪܘ. ܒܥܹܐܕܼܵܐ ܗܵܢܵܐ ܩܲܕܝܼܫܵܐ. ܐ݇ܪܵܙܵܐ ܕܚܝܼܠܵܐ ܘܲܡܫܲܡܠ̱ܝܵܐ. ܕܥܵܡܹ̇ܕܼ ܒܝܘܿܪܕܢܵܢ ܒܪܵܐ ܕܐܝܼܬ̣ܵܘܗܝ ܕܠܵܐ ܚܛܵܗܹ̈ܐ. ܘܲܠܡܲܥܡ̄ܕܼܵܢܵܐ ܟܲܕܼ ܡܸܫܬ̇ܐܸܠ ܡܸܢܹܗ. ܘܒ̣ܵܥܹܐ ܘܐܵܡܲܪ. ܕܐܸܢܵܐ ܣܢܝܼܩ ܐ݇ܢܵܐ ܕܡܸܢܵܟܼ ܕܝܼܠܵܟܼ ܡܵܪܝ ܐܸܬ̣ܥ̱ܡܸܕܼ. ܛܝܼܢܵܐ ܓܹܝܪ ܠܵܐ ܩܵܪܹܒ̣ ܠܢܸܒ̣ܥܵܐ. ܐܵܦܠܵܐ ܫܪܵܓ̣ܵܐ ܡܨܸܐ ܡܲܢܗܲܪ ܠܫܸܡܫܵܐ. ܐܸܠܵܐ ܡܸܛܠ ܕܲܫ̣ܦܲܪ ܠܵܟܼ ܕܬܲܪܟܸ̇ܢ ܪܹܫܵܟܼ ܩܕܼܵܡܲܝ. ܡܲܡܪܲܚ ܐ݇ܢܵܐ ܕܐܹܣܝܼܡ ܝܲܡܝܼܢܝ ܥܠܲܝܟ ܒܦܘܼܩܕܵܢܵܟܼ. ܡܸܛܠ ܦܘܼܪܩܵܢܵܐ ܕܓܸܢܣܵܐ ܕܲܒ̣ܢܲܝ̈ܢܵܫܵܐ.
«ܘܲܡܩܲܕ̇ܫܝܼܢ ܩܘܼܕܵܫܵܐ ܕܡܵܪܝ ܢܸܣܛܘܿܪܝܼܣ.»
ܘܐܵܡܪܝܼܢ ܚܠܵܦ ܕܚܝܼܠܲܬ̇؛ ܐܝܼܙܓܲܕܹ̈ܐ ܗܲܠܸܠܘܼܝܲܗ ܗܲܠܸܠܘܼܝܲܗ.
ܒܵܬܹ̈ܐ. ܕܢܲܚ̣ ܠܹܗ ܟܵܘܟ̇ܒ̣ܵܐ ܡ̣ܢ ܝܲܥܩܘܿܒ̣. ܘܩ̣ܵܡ ܪܹܫܵܐ ܡ̣ܢ ܝܼܣܪܵܝܹܠ. ܗܲܠܸܠܘܼܝܲܗ ܗܲܠܸܠܘܼܝܲܗ. ܐܵܠܹܦ ܐܲܠܦܝܼ̈ܢ ܩܵܝܡ̇ܝܼܢ ܩܕܼܵܡܵܘܗܝ. ܘܪܸܒ̇ܘܿ ܪܸ̈ܒ̇ܘܵܢ ܡܩܲܕ̇ܫܝܼܢ ܠܲܫܡܹܗ. ܗܲܠܸܠܘܼܝܲܗ ܗܲܠܸܠܘܼܝܲܗ.
ܐܲܩܲܦܬܵܐ. ܩܵܠܵܐ ܗܘ݀ܵܐ ܡ̣ܢ ܫܡܲܝܵܐ ܕܐܵܡܲܪ؛ ܕܗܵܢܵܘ ܒܹܪܝ ܚܲܒ̇ܝܼܒ̣ܵܐ ܕܒܹܗ ܐܸܨܛܒ̣ܝܼܬܼ؛ ܠܘܵܬܹܗ ܢܸܬ̣ܐ̱ܡܸܢ ܟܠܲܢ ܘܲܠܡܵܪܘܼܬܹܗ ܢܸܦܠܘܿܚ ܡ̣ܢ ܟܠܹܗ ܠܸܒܲܢ. ܟܲܕܼ ܐܵܡ̇ܪܝܼܢܲܢ ܩܲܕ̇ܝܼܫܲܬ̇ ܩܲܕ̇ܝܼܫܲܬ̇ ܩܲܕ̇ܝܼܫܲܬ̇ ܪܵܚܹ̇ܡ ܐ݇ܢܵܫܵܐ ܗܲܠܸܠܘܼܝܲܗ܀
ܕܒܹܝܡ. ܥܘܼܢܵܝܵܐ؛ ܬܵܘ ܟܠܲܢ ܫܲܘܝܵܐܝܼܬ̣ ܢܵܘܕܸ̇ܐ ܘܢܸܣܓܘܿܕܼ ܠܹܗ. ܠܦܵܪܘܿܩܵܐ ܕܓܸܢܣܵܐ ܕܲܒ̣ܢܲܝ̈ܢܵܫܵܐ ܘܲܕܥܵܠܡܵܐ ܟܠܹܗ ܡ̣ܢ ܒܝܼܫܵܐ؛ ܗ̇ܘ ܓܹܝܪ ܝܲܗ̣݇ܒ̣ܠܲܢ ܒܛܲܝܒ̇ܘܼܬܹܗ ܡܵܘܗܲܒ̣ܬܵܐ ܫܡܲܝܵܢܝܼܬܼܵܐ ܕܦܲܓ̣ܪܹܗ ܘܲܕܼܡܹܗ ܠܚܘܼܣܵܝܵܐ ܕܚܵܘܒܹ̈ܐ܀ ܠܘܵܬܹܗ ܢܸܬ̣ܐ̱ܡܸܢ ܟܠܲܢ...܀
ܒܵܬܹ̈ܐ؛ ܢܸܦܘܿܩ ܚܘܼܛܪܵܐ ܡ̣ܢ ܓܘܼܙܥܹܗ ܕܐܝܼܫܲܝ. ܘܢܲܦܪܲܥ ܢܘܼܪܒܵܐ ܡ̣ܢ ܥܸܩܵܪܹܗ܀ ܠܘܵܬܹܗ ܢܸܬ̣ܐܡܸܢ ܟܠܲܢ...܀
ܦܲܓ̣ܪܵܟܼ ܘܲܕܼܡܵܟܼ ܡܵܪܝ ܐܵܘܟܸܠ̣ܬܵܢ. ܟܡܵܐ ܠܲܢ ܦܘܼܡܝܼ̈ܢ ܕܢܵܘܕܸ̇ܐ ܠܲܫܡܵܟܼ.
ܒܵܬܹ̈ܐ؛ ܒܡܲܝ̈ܵܐ ܘܪܘܼܚܵܐ ܐܸܬ̣ܩܲܕܼ̇ܫܢܲܢ. ܒܦܲܓ̣ܪܵܟܼ ܘܲܕܼܡܵܟܼ ܚܲܝܹ̈ܐ ܩ̣ܢܲܝܢܲܢ܀ ܛܵܒ̣ܵܐ ܕܓܲܒ̣ܠܲܢ ܡ̣ܢ ܕܲܚܝܼܚܵܐ. ܒܡܲܝ̈ܵܐ ܘܪܘܼܚܵܐ ܚܲܕܸ̇ܬܼ ܨܲܠܡܲܢ܀ ܒܡܲܝ̈ܵܐ ܘܪܘܼܚܵܐ ܓܒܲܠ̣ܬܵܢ ܡܸܢܕܪܹܫ. ܫܒ̣ܝܼܚ ܚܘܼܕܵܬ̣ܵܟܼ ܘܲܦܐܸܐ ܡܹܐܬ̣ܝܵܟܼ܀
ܬܸܫܒ̇ܘܿܚܬܵܐ؛ ܚܲܝܸܠ ܡܵܪܲܢ.