ܚܡܫܒܫܒܐ
ܒ؛ ܡܲܠܟܹ̈ܐ؛ ܒ. 1‐16 ܬܸܒ̣ܘ ܘܲܫܠܵܘ ܟܬܼܵܒ̣ܵܐ ܕܲܣܦܲܪ ܡܲܠܟܘܵܬܼ̈ܵܐ؛ ܐܲܚܲܝ̈ ܒܲܪܸܟ̣ܡܵܪܝ܀
ܘܗܘܹܐܠܵܗ̇ ܕܟܲܕ ܡܵܣܠ݇ܘܿܩܹܐ ܗ݇ܘܵܐ ܡܵܪܝܵܐ ܠܐܹܠܝܼܵܐ ܒܥܲܠܥܵܠܵܐ (ܒܓܲܪܕܵܒܘܼܠܹܐ) ܠܫܡܲܝܵܐ؛ ܐ݇ܙܸܠܗ݇ܘܿܢ ܐܹܠܝܼܵܐ ܘܐܹܠܝܼܫܲܥ ܡ̣ܢ ܓܲܠܓܵܠܵܐ܀ ܘܐ݇ܡܸܪܹܗ ܐܹܠܝܼܵܐ ܠܐܹܠܝܼܫܲܥ؛ ܟܠܝܼܠܝܼ ܠܲܐܟ̣ܵܐ؛ ܣܵܒܵܒ ܡܵܪܝܵܐ ܫܘܼܕܪܸܢܹܗ ܠܒܹܝܬ̣ ܐܹܝܠ؛ ܘܐ݇ܡܸܪܹܗ ܐܹܠܝܼܫܲܥ؛ ܚܵܝܵܐ ܝ݇ܠܹܗ ܡܵܪܝܵܐ ܘܚܲܝܬܵܐ ܝ݇ܠܵܗ̇ ܓܵܢܘܼܟܼ ܕܠܹܐ ܫܵܒ̣ܩܸܢܘܼܟܼ. ܘܨܠܹܐܠܗ݇ܘܿܢ ܠܒܹܝܬ̣ ܐܹܝܠ܀ ܘܦܠܸܛܠܗ݇ܘܿܢ ܒܢܲܝ̈ ܢܒ̣ܝܼܹ̈ܐ ܕܒܹܝܬ̣ ܐܹܝܠ ܠܟܸܣ ܐܹܠܝܼܫܲܥ؛ ܘܐܵܡܪܝܼ ܐܸܠܹܗ؛ ܠܹܐ ܝܵܕܥܸܬ̇ ܕܐܸܕܝܘܿܡ݇ ܒܸܬ ܫܵܩܸܠ ܡܵܪܝܵܐ ܠܡܵܪܘܼܟܼ ܡ̣ܢ ܪܹܫܘܼܟܼ؛ ܘܐ݇ܡܸܪܹܗ؛ ܐܘܼܦ ܐܵܢܵܐ ܝܵܕܥܸܢ؛ ܫܬܘܿܩܘܿܢ܀ ܘܐ݇ܡܸܪܹܗ ܐܹܠܝܼܵܐ ܠܐܹܠܝܼܫܲܥ؛ ܟܠܝܼ ܠܝܼ ܠܲܐܟ̣ܵܐ؛ ܣܵܒܵܒ ܡܵܪܝܵܐ ܫܘܼܕܪܸܢܹܗ ܠܐܝܼܪܝܼܚܘܿ. ܘܐ݇ܡܸܪܹܗ؛ ܚܵܝܵܐ ܝ݇ܠܹܗ ܡܵܪܝܵܐ ܘܚܲܝܬܵܐ ܝ݇ܠܵܗ̇ ܓܵܢܘܼܟܼ؛ ܕܠܹܐ ܫܵܒ̣ܩܸܢܘܼܟܼ. ܘܐ݇ܙܸܠܗ݇ܘܿܢ ܠܐܝܼܪܝܼܚܘܿ܀ ܘܩܘܼܪܒܸܢܗ݇ܘܿܢ ܒܢܲܝ̈ ܢܒ̣ܝܼܹ̈ܐ ܕܒܐܝܼܪܝܼܚܘܿ ܠܟܸܣ ܐܹܠܝܼܫܲܥ؛ ܘܐܵܡܪܝܼ ܐܸܠܹܗ؛ ܝܵܕܥܸܬ̇ ܕܐܸܕܝܘܿܡ݇ ܒܸܬ ܫܵܩܸܠ ܡܵܪܝܵܐ ܠܡܵܪܘܼܟ ܡ̣ܢ ܪܹܫܘܼܟܼ. ܘܐ݇ܡܸܪܹܗ ܐܘܼܦ ܐܵܢܵܐ ܝܵܕܥܸܢ؛ ܫܬܘܿܩܘܿܢ܀ ܘܐ݇ܡܸܪܹܗ ܐܹܠܝܼܵܐ ܠܐܹܠܝܼܫܲܥ؛ ܟܠܝܼ ܠܝܼ ܠܲܐܟ̣ܵܐ؛ ܣܵܒܵܒ ܕܡܵܪܝܵܐ ܫܘܼܕܪܸܢܹܗ ܠܝܘܿܪܕܢܵܢ. ܘܐ݇ܡܸܪܹܗ؛ ܚܵܝܵܐ ܝ݇ܠܹܗ ܡܵܪܝܵܐ ܘܚܲܝܬܵܐ ܝ݇ܠܵܗ̇ ܓܵܢܘܼܟܼ ܕܠܹܐ ܫܵܒ̣ܩܸܢܘܼܟܼ. ܘܐ݇ܙܸܠܗ݇ܘܿܢ ܬܸܪܘܲܝܗܝ. ܘܚܲܡܫܝܼ ܐ݇ܢܵܫܹ̈ܐ ܡ̣ܢ ܒܢܲܝ̈ ܢܒ̣ܝܼܹ̈ܐ؛ ܐ݇ܙܸܠܗ݇ܘܿܢ ܘܟܠܹܐ ܠܗ݇ܘܿܢ ܡ̣ܢ ܒܲܪܩܘܼܒ̣ܠ ܡ̣ܢ ܪܸܚܩܵܐ܀ ܘܬܸܪܘܲܝܗܝ ܟܠܹܐܠܗ݇ܘܿܢ ܠܣܸܦܬܹܗ ܕܝܘܿܪܕܢܵܢ܀ ܘܫܩܸܠܹܗ ܐܹܠܝܼܵܐ ܡܲܥܦܪܹܗ؛ ܘܟܘܼܪܡܸܟ̣ܠܹܗ؛ ܘܡܚܹܐܠܹܗ ܠܡܝܼܵܐ ܕܝܘܿܪܕܢܵܢ؛ ܘܦܠܝܼܓ̣݇ܠܗ݇ܘܿܢ ܦܲܠܓܵܐ ܠܐܵܗܵܐ ܦܵܬܵܐ ܘܦܲܠܓܵܐ ܠܗ̇ܝ ܐ݇ܚܹܪ݇ܬܵܐ. ܘܥܒ̣ܸܪܗ݇ܘܿܢ ܬܸܪܘܲܝܗܝ ܒܒܸܪܙܵܐ܀ ܘܟܲܕ ܥܒ̣ܸܪܗ݇ܘܿܢ؛ ܐ݇ܡܸܪܹܗ ܐܹܠܝܼܵܐ ܠܐܹܠܝܼܫܲܥ. ܛܠܘܿܒ ܡܘܼܕܝܼ ܥܵܒ̣ܕܸܢ ܩܵܬܘܼܟܼ ܡ̣ܢ ܩܵܕ݇ܡ ܕܦܵܝܫܸܢ ܠܘܼܒܠܵܐ ܡܸܢܘܼܟܼ؟ ܘܐ݇ܡܸܪܹܗ ܐܹܠܝܼܫܲܥ؛ ܗܵܘܹܐ ܚܲܕ݇ ܒܬܪܹܝ ܒܪܘܼܚܘܼܟܼ ܥܲܠܝܼ܀ ܘܐ݇ܡܸܪܹܗ ܪܵܒܵܐ ܛܠܸܒܠܘܼܟܼ؛ ܐܸܢ ܚܵܙܹܬ̇ ܠܝܼ ܐܝܼܡܲܢ ܕܦܵܝܫܸܢ ܠܘܼܒܠܵܐ ܡܸܢܘܼܟܼ؛ ܒܸܬ ܗܵܘܹܐ ܠܘܼܟܼ ܗܵܕܟ̣ܵܐ؛ ܘܐܸܢ ܠܵܐ؛ ܠܹܐ ܗܵܘܹܐ܀ ܘܗܵܕܟ̣ܵܐ ܟܲܕ ܐܵܢܝܼ ܗܲܡܙܘܼܡܹܐ ܘܒܸܓ̰ܘܵܓ̰ܵܐ. ܗܵܐ ܟܵܠܸܣܟܵܐ ܕܢܘܼܪܵܐ ܘܣܘܼܣܵܘܵܬܹ̈ܐ ܕܢܘܼܪܵܐ؛ ܘܦܪܸܫܠܗܘܿܢ ܒܹܝܠ ܬܸܪܘܲܝܗܝ ܘܐ݇ܣܸܩܠܹܗ ܐܹܠܝܼܵܐ ܒܥܲܠܥܵܠܵܐ ܠܫܡܲܝܵܐ܀ ܘܚܙܹܐܠܹܗ ܐܹܠܝܼܫܲܥ؛ ܘܫܘܼܪܹܐܠܹܗ ܘܲܠܘܘܼܠܹܐ ܘܒܹܐܡܵܪܵܐ؛ ܒܵܒܝܼ؛ ܒܵܒܝܼ؛ ܟܵܠܸܣܟܵܐ ܕܝܼܣܪܵܝܹܠ ܘܪ̈ܵܟܵܒ̣ܹܐ؛ ܘܡܸܕܪܹܐ ܠܵܐ ܚܙܹܐܠܹܗ. ܘܕܒ̣ܸܩܠܹܗ ܒܠܒ̣ܸܫܬܹܗ ܘܣܪܝܼܛܝܼܠܹܗ ܠܬܪܹܝ ܩܸܛܥܵܛܹ̈ܐ܀ ܘܫܩܸܠܹܗ ܡܲܥܦܪܹܗ ܕܐܹܠܝܼܵܐ ܕܢܦܸܠܹܗ ܡܸܢܹܗ؛ ܘܕܐܸܪܹܗ ܘܟܠܹܐܠܹܗ ܥܲܠ ܣܸܦܬܵܐ ܕܝܘܿܪܕܢܵܢ܀ ܘܫܩܸܠܹܗ ܠܡܲܥܦܪܹܗ ܕܐܹܠܝܼܵܐ ܕܢܦܸܠܹܗ ܡܸܢܹܗ؛ ܘܡܚܹܐܠܹܗ ܠܡܝܼܵܐ ܘܐ݇ܡܸܪܹܗ؛ ܝܵܐ ܡܵܪܝܵܐ ܐܲܠܵܗܹܗ ܕܡܵܪܝܼ ܐܹܠܝܼܵܐ؛ ܐܘܼܦ ܗ̇ܘ ܡܚܹܐܠܹܗ ܠܡܝܼܵܐ ܕܝܘܿܪܕܢܵܢ؛ ܘܦܠܝܼܓ̣݇ܠܗ݇ܘܿܢ ܦܲܠܓܲܝܗܝ ܠܲܐܟ̣ܵܐ؛ ܘܦܲܠܓܲܝܗܝ ܠܲܟ̣ܵܐ؛ ܘܥܒ̣ܸܪܹܗ ܐܹܠܝܼܫܲܥ܀ ܘܚܙܹܐܠܗ݇ܘܿܢ ܒܢܲܝ̈ ܢܒ̣ܝܼܹ̈ܐ ܕܒܐܝܼܪܝܼܚܘܿ ܡ̣ܢ ܒܲܪܩܘܼܒ̣ܠ؛ ܘܐ݇ܡܸܪܗ݇ܘܿܢ؛ ܫܪܹܐܠܵܗ̇ ܪܘܼܚܹܗ ܕܐܹܠܝܼܵܐ ܥܲܠ ܐܹܠܝܼܫܲܥ؛ ܘܐ݇ܬܹܐܠܗ݇ܘܿܢ ܠܩܵܕ݇ܡܵܝܘܼܬܹܗ؛ ܘܣܓ̣ܸܕܠܗ݇ܘܿܢ ܐܸܠܹܗ ܥܲܠ ܐܲܪܥܵܐ܀
ܚܲܒ̣ܪܹܗ
ܩܪܝܼ ܗ̇ܘ ܕܕܘܼܟ̣ܪܵܢܵܐ ܕܡܵܪܬܝ ܡܲܪܝܲܡ
ܦܪܲܟܣܝܼܣ؛ ܐ؛ 1‐15 ܫܠܵܘ ܦܪܲܟܣܝܼܣ ܕܲܫܠܝܼܚܹ̈ܐ؛ ܐܲܚܲܝ̈ ܒܲܪܸܟ̣ܡܵܪܝ܀
ܟܬܵܒ̣ܵܐ ܩܵܕ݇ܡܵܝܵܐ ܟܬܸܒ̣ܠܝܼ ܐܸܠܘܼܟܼ ܝܵܐ ܬܹܐܘܿܦܝܼܠܵܐ؛ ܒܘܼܬ ܟܠܲܝܗܝ ܕܐܵܢܝܼ ܡܸܢܕܝܼܵܢܹ̈ܐ ܕܫܘܼܪܹܐܠܹܗ ܡܵܪܲܢ ܝܼܫܘܿܥ ܡܫܝܼܚܵܐ ܠܸܥܒ̣ܵܕܵܐ ܘܠܡܵܠܘܿܦܹܐ.܀ ܗܲܠ ܕܗ̇ܘ ܝܵܘܡܵܐ ܕܒܝܼܹܗ ܦܸܫܠܹܗ ܡܘܼܣܩܵܐ؛ ܡ̣ܢ ܒܵܬ݇ܪ ܕܦܘܼܩܕܵܐ ܗ݇ܘܵܐ ܠܫܠܝܼܚܹ̈ܐ ܐܵܢܝܼ ܕܓܘܼܒܹܐܠܹܗ ܒܪܘܼܚܵܐ ܕܩܘܼܕܫܵܐ.܀ ܐܵܢܝܼ ܕܐܘܼܦ ܡܘܼܚܙܹܐܠܹܗ ܐܸܠܲܝܗܝ ܓܵܢܹܗ ܟܲܕ ܚܵܝܵܐ ܡ̣ܢ ܒܵܬ݇ܪ ܕܩܘܼܒܸܠܹܗ ܚܲܫܵܐ. ܒܪܵܒܵܐ ܢܝܼܫܲܢܩܹ̈ܐ ܐܲܪܒܥܝܼ ܝܵܘܡܵܢܹ̈ܐ ܟܕ ܦܝܵܫܵܐ ܗ݇ܘܵܐ ܚܸܙܝܵܐ ܐܸܠܲܝܗܝ ܘܐܵܡܸܪ ܗ݇ܘܵܐ ܒܘܼܬ ܡܲܠܟܘܼܬܵܐ ܕܐܲܠܵܗܵܐ.܀ ܘܟܲܕ ܐ݇ܟ̣ܸܠܹܗ ܥܲܡܲܝܗܝ ܠܲܚܡܵܐ؛ ܦܘܼܩܕܲܝܗܝ ܠܹܗ ܕܡ̣ܢ ܐܘܿܪܸܫܠܸܡ ܠܵܐ ܪܵܚܩܝܼ؛ ܐܸܠܵܐ ܟܵܠܝܼ ܠܩܵܘܠܵܐ ܕܒܵܒܵܐ ܗ̇ܘ ܕܫܡܝܼܥܠܵܘܟ̣ܘܿܢ ܡܸܢܝܼ.܀ ܕܝܘܿܚܲܢܵܢ ܡܘܼܥܡܸܕܠܹܗ ܒܡܝܼܵܐ؛ ܘܐܲܚܬܘܿܢ ܒܸܬ ܥܵܡܕܝܼܬܘܿܢ ܒܪܘܼܚܵܐ ܕܩܘܼܕܫܵܐ. ܠܵܐ ܒܵܬ݇ܪ ܪܵܒܵܐ ܝܵܘܡܵܢܹ̈ܐ.܀ ܟܲܕ ܐܵܢܝܼ ܓ̰ܸܡܥܝܹܐ ܗ݇ܘܵܘ ܒܘܼܩܸܪܗ݇ܘܿܢ ܡܸܢܹܗ ܘܐܵܡܪܝܼ ܐܸܠܹܗ؛ ܡܵܪܲܢ؛ ܐܸܢ ܒܐܵܗܵܐ ܙܲܒ̣ܢܵܐ ܒܸܬ ܡܲܕܸܪܸܬ̇ ܡܲܠܟܘܼܬܵܐ ܠܝܼܣܪܵܝܹܠ؟܀ ܐܵܡܸܪ ܐܸܠܲܝܗܝ ܗ̇ܘ؛ ܠܹܐ ܝ݇ܠܵܗ̇ ܕܝܼܵܘܟ̣ܘܿܢ ܠܝܼܕܲܥܝܵܐ ܙܲܒ̣ܢܵܐ ܝܲܢ ܙܲܒ̣ܢܹ̈ܐ ܐܵܢܝܼ ܕܒܵܒܵܐ ܡܘܼܬܒ̣ܝܼܠܹܗ ܒܗܘܼܟܡܵܐ ܕܓܵܢܹܗ.܀ ܐܸܠܵܐ ܟܲܕ ܐܵܬܹܐ ܪܘܼܚܵܐ ܕܩܘܼܕܫܵܐ ܐܸܠܵܘܟ̣ܘܿܢ؛ ܒܸܬ ܩܲܒܠܝܼܬܘܿܢ ܚܲܝܠܵܐ ܘܒܸܬ ܗܵܘܝܼܬܘܿܢ ܩܵܬܝܼ ܣܵܗܕܹ̈ܐ ܒܐܘܿܪܸܫܠܸܡ ܘܓܵܘ ܟܠܵܗ̇ ܝܼܗܘܼܕ ܘܐܘܼܦ ܓܵܘ ܫܵܡܪ̈ܵܝܹܐ ܘܗܲܠ ܡܲܪ̈ܙܵܢܵܢܹܐ ܕܐܲܪܥܵܐ.܀ ܘܟܲܕ ܐܲܢܹܐ ܐ݇ܡܸܪܹܗ؛ ܘܐܵܢܝܼ ܓܵܫܘܿܩܹܐ ܒܝܼܹܗ ܦܸܫܠܹܗ ܡܘܼܣܩܵܐ ܘܥܢܵܢܵܐ ܩܘܼܒܸܠܵܗ̇ ܘܦܸܫܠܹܗ ܡܘܼܟܣܵܐ ܡ̣ܢ ܥܲܝܢܲܝ̈ܗܝ.܀ ܘܟܲܕ ܓܵܫܘܿܩܹܐ ܗ݇ܘܵܘ ܒܫܡܲܝܵܐ؛ ܘܗ̇ܘ ܒܹܐܙܵܠܵܐ ܦܸܫܠܗ݇ܘܿܢ ܡܘܼܫ݇ܟ̰ܚܹܐ ܟܸܠܝܹܐ ܠܟܸܣܠܲܝܗܝ ܬܪܹܝ ܐ݇ܢܵܫܹ̈ܐ ܒܓ̰ܘܼܠܹ̈ܐ ܚܘܵܪܹ̈ܐ.܀ ܘܐܵܡܪܝܼ ܐܸܠܲܝܗܝ ܝܵܐ ܐ݇ܢܵܫܹ̈ܐ ܓܠܝܼܠܵܝܹ̈ܐ. ܩܵܡܘܿܕܝܼ ܟܸܠܝܹܐ ܝ݇ܬܘܿܢ ܘܓܵܫܘܿܩܹܐ ܒܫܡܲܝܵܐ. ܐܵܗܵܐ ܝܼܫܘܿܥ ܕܦܸܫܠܹܗ ܡܘܼܣܩܵܐ ܡܸܢܵܘܟ̣ܘܿܢ ܠܫܡܲܝܵܐ؛ ܗܲܕܟ̣ܵܐ ܒܸܬ ܐܵܬܹܐ ܡܸܕܪܹܐ ܕܵܐܟ̣ܝܼ ܕܚܙܹܐܠܵܘܟ̣ܘܿܢ ܕܐ݇ܣܸܩܠܹܗ ܠܫܡܲܝܵܐ.܀ ܘܡ̣ܢ ܒܵܬ݇ܪ ܗܵܕܵܐ ܕܸܪܗ݇ܘܿܢ ܠܐܘܿܪܸܫܠܸܡ ܡ̣ܢ ܛܘܼܪܵܐ ܕܦܵܐܹܫ ܗ݇ܘܵܐ ܩܸܪܝܵܐ ܒܹܝܬ̣ ܙܲܝܬܹ̈ܐ؛ ܕܝܼܗ݇ܘܵܐ ܠܕܸܦܢܵܐ ܕܐܘܿܪܸܫܠܸܡ؛ ܘܪܸܚܩܵܐ ܡܸܢܵܗ̇ ܐܲܝܟܼ ܫܲܒ̣ܥܵܐ ܐܸܣܛ̈ܕܵܘܵܬܹܐ.܀ ܘܡ̣ܢ ܒܵܬ݇ܪ ܕܥܒ̣ܸܪܗ݇ܘܿܢ؛ ܣܸܠ݇ܩܠܗ݇ܘܿܢ ܠܥܸܠܝܼܬܵܐ ܗ̇ܝ ܕܗܵܘܝܼ ܗ݇ܘܵܘ ܓܵܘܵܗ̇ ܦܲܛܪܘܿܣ ܘܝܘܿܚܲܢܵܢ. ܘܝܲܥܩܘܿܒ̣ ܘܐܲܢܕܪܹܐܘܿܣ. ܘܦܝܼܠܝܼܦܘܿܣ ܘܬܐܘܿܡܵܐ. ܘܡܲܬܲܝ ܘܒܲܪܬܘܼܠܡܲܝ ܘܝܲܥܩܘܿܒ̣ ܒܲܪ ܚܲܠܦܲܝ؛ ܘܫܸܡܥܘܿܢ ܛܲܢܵܢܵܐ ܘܝܼܗܘܼܕܵܐ ܒܲܪ ܝܲܥܩܘܿܒ̣. ܐܲܢܹܐ ܟܠܲܝܗܝ ܡܐܘܼܕܵܠܹܐ ܕܵܝܸܡ ܝܼܗܘܵܘ ܒܨܠܘܿܬܵܐ ܒܚܕܵܐ ܓܵܢܵܐ ܥܲܡ ܒܲܟ̣ܬܵܬܹ̈ܐ ܘܥܲܡ ܡܲܪܝܲܡ ܝܸܡܹܗ ܕܝܼܫܘܿܥ ܘܥܲܡ ܐܵܚܘܿܢ̈ܘܵܬܘܼܗܝ.
♱♱♱♱♱♱♱♱♱♱
ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ ܩܲܕَܡܵܝܬܵܐ ܕܲܠܘܵܬܼ ܛܝܼܡܵܬܹܐܘܿܣ ܐܲܚܲܝ̈ ܒܵܪܸܟܼܡܵܪܝ܀
ܐ؛ ܛܝܼܡܵܬܹܐܘܿܣ ܐ؛ 18‐ܒ؛ ܫܘܼܠܵܡܵܐ. ܐܲܩܸܦ؛ ܓ؛ 14‐ܫܘܼܠܵܡܵܐ.
ܐܵܗܵܐ ܦܘܼܩܕܵܢܵܐ ܣܲܦܘܼܝܹܐ ܝܘܸܢ ܒܝܼܘܼܟܼ، ܒܪܘܿܢܝܼ ܛܝܼܡܵܬܹܐܘܿܣ، ܐܲܝܟܼ ܢܲܒܲܝܵܬܹ̈ܐ ܕܡ̣ܢ ܩܲܕَܡ ܥܕܵܢܵܐ ܗܘܹܐ ܠܗَܘܿܢ ܥܲܠܘܼܟܼ، ܕܒܝܼܵܝܗܝ ܦܵܠܫܹܬ ܦܠܵܫܵܐ ܫܲܦܝܼܪܵܐ، ܕܒܼܝܼܩܵܐ ܒܗܲܝܡܵܢܘܼܬܵܐ ܘܐܸܢܝܲܬ ܛܵܒܼܬܵܐ، ܐܲܝܢܝܼ ܕܚܲܕَܟܡܵܐ ܪܘܼܦܝܵܝ ܠܗَܘܿܢ، ܘܡ̣ܢ ܓܹܒܵܐ ܕܗܲܝܡܵܢܘܼܬܵܐ ܗܘܹܐ ܠܗَܘܿܢ ܐܲܝܟܼ ܐܸܠܦܵܐ ܚܪܝܼܩܬܵܐ. ܡܸܢܵܝܗܝ ܝܼܢܵܐ ܗܹܘܡܹܢܹܐܘܿܣ ܘܐܵܠܸܟܣܲܢܕܪܘܿܣ، ܐܲܝܢܝܼ ܕܣܘܼܦܝܵܝ ܠܝܼ ܠܣܵܛܵܢܵܐ ܕܦܵܝܫܝܼ ܡܘܼܠܦܹܐ ܕܠܵܐ ܓܵܕܦܝܼ. ܡ̣ܢ ܩܲܕَܡ ܟܠ ܡܸܢܕܝܼ، ܒܸܛܠܵܒܵܐ ܝܘܸܢ ܕܒܵܥܘܼܝܵܬܹ̈ܐ ܘܨܠܵܘܵܬܹ̈ܐ ܘܦܲܪ̈ܦܲܠܝܵܬܹܐ ܘܫܲܟܲܪ̈ܝܵܬܹܐ ܦܵܝܫܝܼ ܡܘܼܩܪܸܒܹܐ ܡ̣ܢ ܓܹܒܵܐ ܕܟܠܵܝܗܝ ܒܢܲܝ̈ܢܵܫܵܐ، ܡ̣ܢ ܓܹܒܵܐ ܕܡܲܠܟܹ̈ܐ، ܘܡ̣ܢ ܓܹܒܵܐ ܕܟܠܵܝܗܝ ܐܵܢܝܼ ܕܝܼܢܵܐ ܓܵܘ ܫܘܼܠܛܵܢܵܐ، ܕܚܵܝܲܚ ܚܲܝܹ̈ܐ ܫܸܠܝܹܐ ܘܢܝܼܚܹ̈ܐ ܒܟܠܵܗ̇ ܙܕܘܼܥܬܵܐ ܕܐܲܠܵܗܵܐ ܘܒܐܝܼܩܵܪܵܐ. ܐܵܗܵܐ ܛܵܒܼܵܐ ܝܠܹܗ ܘܡܩܲܒܠܵܐ ܩܲܕَܡ ܐܲܠܵܗܵܐ ܦܵܪܘܿܩܲܢ، ܗ̇ܘ ܕܟܹܐ ܒܵܥܹܐ ܕܟܠܵܝܗܝ ܐَܢܵܫܹ̈ܐ ܦܵܪܩܝܼ ܘܐܵܬܝܼ ܠܝܕܵܥܬܵܐ ܕܫܪܵܪܵܐ. ܣܵܒܵܒ ܐܝܼܬ ܚܲܕَ ܐܲܠܵܗܵܐ، ܘܚܲܕَ ܡܸܨܥܵܝܵܐ ܒܹܝܠ ܐܲܠܵܗܵܐ ܘܒܢܲܝ̈ܢܵܫܵܐ، ܕܝܼܠܹܗ ܒܲܪܢܵܫܵܐ ܝܑܼܫܘܿܥ ܡܫܝܼܚܵܐ، ܗ̇ܘ ܕܝܘܼܗَܒܼܹܠ ܠܹܗ ܓܵܢܹܗ ܦܘܼܪܩܵܢܵܐ ܡ̣ܢ ܓܹܒܵܐ ܕܟܠܵܝܗܝ ܐَܢܵܫܹ̈ܐ، ܣܵܗܕܘܼܬܵܐ ܕܦܝܼܫ ܠܵܗ̇ ܝܘܼܗَܒܼܹܠܬܵܐ ܒܙܲܒܼܢܵܐ ܕܓܵܢܘܼܗ̇. ܠܐܵܗܵܐ ܢܝܼܫܵܐ ܐܵܢܵܐ ܦܝܼܫ ܠܝܼ ܪܫܝܼܡܵܐ ܟܵܪܘܿܙܵܐ ܘܫܠܝܼܚܵܐ ܘܡܲܠܦܵܢܵܐ ܕܗܲܝܡܵܢܘܼܬܵܐ ܘܕܫܪܵܪܵܐ ܠܐܸܡܘܵܬܹ̈ܐ. ܫܪܵܪܵܐ ܗܲܡܙܘܼܡܹܐ ܝܘܸܢ ܘܠܹܐ ܝܘܸܢ ܕܲܓܘܼܠܹܐ. ܒܵܣ ܒܸܒܥܵܝܵܐ ܝܘܸܢ ܕܐَܢܵܫܹ̈ܐ ܗܵܘܝܼ ܨܲܠܘܼܝܹܐ ܨܠܘܿܬܵܐ ܒܟܠ ܕܘܼܟܵܐ، ܡܲܪܘܼܡܹܐ ܐܝܼܕܵܬܹ̈ܐ ܕܸܟܼܝܹ̈ܐ ܕܠܵܐ ܟܲܪܒܵܐ ܘܕܠܵܐ ܕܘܼܒܵܪܘܼܬܵܐ. ܗܵܕܟܼܵܐ ܐܘܼܦ ܒܲܟܼܬܵܬܹ̈ܐ ܠܵܒܼܫܝܼ ܪܹܐܙܵܢܵܐܝܼܬ ܒܠܒܼܝܼܫܬܵܐ ܕܡܲܪܕܘܼܬܵܐ ܘܕܢܲܟܼܦܘܼܬܵܐ، ܠܵܐ ܣܲܩܠܝܼ ܓܵܢܵܝܗܝ ܒܓܸܕܠܹ̈ܐ ܘܒܕܲܗܒܼܵܐ، ܘܠܵܐ ܒܡܲܪ̈ܓܵܢܝܵܬܹܐ ܘܠܵܐ ܒܠܒܼܝܼܫܝܵܬܹ̈ܐ ܛܝܼܡܵܢܹ̈ܐ، ܐܸܠܵܐ ܒܦܘܼܠܚܵܢܹ̈ܐ ܛܵܒܹ̈ܐ، ܐܲܝܟܼ ܕܚܫܝܼܚܬܵܐ ܝܠܵܗ̇ ܠܒܲܟܼܬܵܬܹ̈ܐ، ܐܵܢܝܼ ܕܡܵܘܕܝܼ ܙܕܘܼܥܬܵܐ ܕܐܲܠܵܗܵܐ. ܒܲܟܼܬܵܐ ܝܵܠܦܵܐ ܒܫܸܠܝܘܼܬܵܐ ܘܒܟܠܵܗ̇ ܙܲܒܛܘܼܬܵܐ. ܐܝܼܢܵܐ ܠܹܐ ܝܘܸܢ ܒܝܼܵܗܒܼܵܐ ܦܣܵܣܵܐ ܠܒܲܟܼܬܵܐ ܕܡܲܠܦܵܐ ܘܠܵܐ ܕܥܵܒܼܕܵܐ ܫܘܼܠܛܵܢܵܐ ܥܲܠ ܓܲܒܼܪܵܐ، ܐܝܼܢܵܐ ܗܵܘܝܵܐ ܫܠܝܼܬܵܐ. ܣܵܒܵܒ ܩܲܕَܡܵܝܬܵܐ ܐܵܕܵܡ ܦܝܼܫ ܠܹܗ ܓܒܼܝܼܠܵܐ ܘܗ̇ܝܓܵܗ ܚܵܘܵܐ. ܘܠܹܐ ܝܗَܘܵܐ ܐܵܕܵܡ ܕܦܝܼܫ ܠܹܗ ܥܘܼܠܕܝܼܵܐ، ܐܸܠܵܐ ܒܲܟܼܬܵܐ ܦܝܼܫ ܠܵܗ̇ ܥܘܼܠܕܝܼܬܵܐ، ܘܫܡܝܼܛ ܠܵܗ̇ ܦܘܼܩܕܵܢܵܐ. ܐܝܼܢܵܐ ܒܲܟܼܬܵܐ ܒܸܬ ܦܵܝܫܵܐ ܦܪܝܼܩܬܵܐ ܒܗܲܨܲܠܬܵܐ ܕܝܵܠܹ̈ܕ݇ܐ ܐܸܢ ܥܲܪܩܸܠܵܐ ܒܗܲܝܡܵܢܘܼܬܵܐ، ܘܒܚܘܼܒܵܐ، ܘܒܩܲܕܝܼܫܘܼܬܵܐ، ܥܲܡ ܢܲܟܼܦܘܼܬܵܐ. ܐܲܢܹܐ ܒܸܟܬܵܒܼܵܐ ܝܘܸܢ ܐܸܠܘܼܟܼ، ܒܗܹܒܼܝܼ ܕܐܵܬܹܝܢ ܠܟܸܣܠܘܼܟܼ ܒܓ̰ܲܠܕܘܼܬܵܐ، ܐܝܼܢܵܐ ܐܸܢ ܥܲܪܩܸܠܸܢ، ܕܝܵܕܥܹܬ ܕܵܐܟܼܝܼ ܘܵܠܹܐ ܝܠܵܗ̇ ܕܐَܢܵܫܹ̈ܐ ܝܵܗܒܼܝܼ ܘܫܵܩܠܝܼ ܓܵܘ ܒܲܝܬܵܐ ܕܐܲܠܵܗܵܐ، ܕܝܼܠܹܗ ܥܹܕܬܵܐ ܕܐܲܠܵܗܵܐ ܚܵܝܵܐ، ܘܣܛܘܼܢܵܐ ܘܫܲܬܐܸܣܬܵܐ ܕܫܪܵܪܵܐ. ܫܲܪܝܼܪܵܐܝܼܬ ܓܘܼܪܵܐ ܝܠܹܗ ܐَܪܵܙܵܐ ܕܙܲܕܝܼܩܘܼܬܵܐ، ܗ̇ܘ ܕܦܝܼܫ ܠܹܗ ܓܸܠܝܵܐ ܒܦܲܓܼܪܵܐ، ܦܝܼܫ ܠܹܗ ܡܘܼܟܫܸܛܵܐ ܒܪܘܼܚܵܐ، ܦܝܼܫ ܠܹܗ ܚܸܙܝܵܐ ܒܡܲܠܲܐܟܼܹ̈ܐ، ܦܝܼܫ ܠܹܗ ܡܘܼܟܪܸܙܵܐ ܓܵܘ ܐܸܡܘܵܬܹ̈ܐ، ܦܝܼܫ ܠܹܗ ܗܘܼܡܸܢܵܐ ܒܥܵܠܡܵܐ، ܘܦܝܼܫ ܠܹܗ ܡܘܼܠَܣܩܵܐ ܒܚܸܩܪܵܐ.
♱♱♱♱♱♱♱♱♱♱
ܚܡܫܒܫܒܐ
ܠܘܩܐ ܟܕ: 36 ‐ ܫܘܠܡܐ ܐܘܢܓܠܝܘܢ ܩܕܝܫܐ ܕܡܪܢܝܫܘܥ ܡܫܝܚܐ ܟܪܘܙܘܬܼܐ ܕܠܘܩܐ
♰ ܘܟܲܕ ܐܲܢܹܐ ܗܲܡܙܘܼܡܹܐ ܗ݇ܘܵܘ ܬܲܠܡܝܼ̈ܕܹܐ. ܝܑܼܫܘܿܥ ܟܠܹܐܠܹܗ ܒܲܝܢܵܬܲܝܗܝ ܘܐ݇ܡܸܪܹܗ ܐܸܠܲܝܗܝ: ܫܠܵܡܵܐ ܥܲܡܵܘܟܼܘܿܢ. ܐܵܢܵܐ ܝܘܸܢ ܠܵܐ ܙܲܕܥܝܼܬܘܿܢ. ܘܐܵܢܝܼ ܚܓ̰ܝܼܠܗ݇ܘܿܢ ܘܗܘܹܐܠܗ݇ܘܿܢ ܒܙܕܘܿܥܬܵܐ. ܣܵܒܵܒ ܒܸܚܫܵܒܼܵܐ ܗ݇ܘܵܘ ܕܪܘܼܚܵܐ ܒܸܚܙܵܝܵܐ ܝܢܵܐ. ܐܵܡܸܪ ܐܸܠܲܝܗܝ ܝܑܼܫܘܿܥ: ܩܵܡܘܿܕܝ ܦܝܵܫܵܐ ܝܬܘܿܢ ܫܥܝܼܫܹܐ. ܘܩܵܡܘܼܕܝܼ ܒܹܣܵܠَܩܵܐ ܝܢܵܐ ܚܘܼܫܵܒܼܹ̈ܐ ܥܲܠ ܠܸܒܵܘܵܬܵܘ̈ܟܼܘܢ؟ ܚܙܹܐܡܘܿܢ ܐܝܼܕܵܬ̈ܝܼ ܘܐܲܩ̈ܠܵܬܝܼ ܕܐܵܢܵܐ ܝܘܸܢ. ܕܩܘܼܪܘܿܢ ܒܝܼܝܼ ܘܝܕܹܥܡܘܿܢ: ܕܪܘܼܚܵܐ ܒܸܣܪܵܐ ܘܓܲܪ̈ܡܹܐ ܠܲܝܬܠܵܗ̇، ܐܲܝܟܼ ܕܒܸܚܙܵܝܵܐ ܝܬܘܿܢ ܕܐܵܢܵܐ ܐܝܼܬ ܠܝܼ. ܘܟܲܕ ܐܲܢܹܐ ܐ݇ܡܸܪܹܗ: ܡܘܼܚܙܹܐ ܠܹܗ ܐܸܠܲܝܗܝ ܐܝܼܕܵܬܘܼ̈ܗܝ ܘܐܲܩܠܵܬܘܼ̈ܗܝ. ܘܟܲܕ ܗܲܠ ܐܵܕܝܼܵܐ ܠܹܐ ܗ݇ܘܵܘ ܗܲܡܘܼܢܹܐ ܡ̣ܢ ܚܵܕܘܼܬܲܝܗܝ ܘܦܝܵܫܵܐ ܗ݇ܘܵܘ ܬܡܝܼܗܹܐ. ܐ݇ܡܸܪܹܗ ܐܸܠܲܝܗܝ: ܐܝܼܬܠܵܘܟܼܘܿܢ ܡܸܢܕܝܼ ܠܲܐܟܼܵܐ ܠܹܐܟܼܵܠܵܐ؟ ܐܝܼܢܵܐ ܐܵܢܝܼ ܝܘܼܗ݇ܒܼܸܠܗ݇ܘܿܢ ܐܸܠܹܗ ܚܲܕ݇ ܩܸܛܥܵܐ ܡ̣ܢ ܢܘܼܢܵܐ ܛܘܼܘܵܝܬܵܐ: ܘܡ̣ܢ ܫܵܢܵܐ ܕܕܸܒܼܫܵܐ. ܘܫܩܸܠܹܗ ܐ݇ܟܼܸܠܹܗ ܩܵܕ݇ܡ ܥܲܝ̈ܢܲܝܗܝ. ܘܐ݇ܡܸܪܹܗ ܐܸܠܲܝܗܝ: ܐܲܢܹܐ ܝܢܵܐ ܗܹܡܸܙܡܵܢܹ̈ܐ ܕܗܘܼܡܙܸܡܠܝܼ ܥܲܡܵܘܟܼܘܿܢ ܟܲܕ ܠܟܸܣܠܵܘܟܼܘܿܢ ܝܼܘܸܢ ܗ݇ܘܵܐ. ܕܘܵܠܹܐ ܝܼܠܵܗ ܕܦܵܐܸܫ ܬܘܼܡܸܡܵܐ ܟܠ ܡܸܢܕܝܼ ܕܟܬܝܼܒܼܵܐ ܝܠܹܗ ܒܢܵܡܘܿܣܵܐ ܕܡܘܼܫܹܐ: ܘܒܢܒܼܝܹ̈ܐ ܘܒܡܲܙܡܘܼܪܹ̈ܐ ܒܘܼܬ ܕܝܼܠَܝܼ. ܗܿܝܓܵܗ ܦܬܸܚܠܹܗ ܪܸܥܝܵܢܲܝܗܝ ܠܦܲܪܡܘܼܝܹܐ ܟܬܵܒܼܹ̈ܐ. ܘܐ݇ܡܸܪܹܗ ܐܸܠܲܝܗܝ: ܕܗܲܕܟܼܵܐ ܟܬܝܼܒܼܵܐ ܝܠܹܗ: ܘܗܲܕܟܼܵܐ ܘܵܠܹܐ ܗ݇ܘܵܐ ܕܩܵܒܸܠ ܚܲܫܵܐ ܡܫܝܼܚܵܐ. ܘܕܩܵܐܸܡ ܡ̣ܢ ܓܵܘ ܡܝܼܬܹ̈ܐ ܠܝܵܘܡܵܐ ܕܬܠܵܬܵܐ. ܘܕܦܲܝܫܵܐ ܡܘܼܟܪܸܙܬܵܐ ܒܫܸܡܹܗ ܬܝܵܒܼܘܼܬܵܐ ܠܫܘܼܒܼܩܵܢܵܐ ܕܚܛܝܼܵܬܹ̈ܐ ܓܵܘ ܟܠܲܝܗܝ ܥܲܡܡܹ̈ܐ. ܘܫܘܼܪܵܝܵܐ ܗܵܘܹܐ ܡ̣ܢ ܐܘܿܪܸܫܠܸܡ. ܘܐܲܚܬܘܿܢ ܝܼܬܘܿܢ ܣܵܗܕܹ̈ܐ ܕܐܲܢܹܐ. ܘܐܵܢܵܐ ܒܸܬ ܫܲܕܪܸܢ ܥܲܠܵܘܟܼܘܿܢ ܩܵܘܠܵܐ ܕܒܵܒܝܼ. ܐܝܼܢܵܐ ܐܲܚܬܘܿܢ ܥܲܪܩܸܠܗ݇ܘܿܢ ܒܐܘܿܪܸܫܠܸܡ ܡܕܝܼܢ݇ܬܵܐ. ܗܲܠ ܕܠܲܒܼܫܝܼܬܘܿܢ ܚܲܝܠܵܐ ܡ̣ܢ ܪܵܘܡܵܐ. ܘܦܘܼܠܛܵܝܠܹܗ ܗܲܠ ܠܒܹܝܬ ܥܲܢܝܵܐ. ܘܡܘܼܪܸܡܠܹܗ ܐܝܼܕܵܬ̈ܘܼܗܝ ܘܒܘܼܪܟܼܵܝܠܹܗ. ܘܗ݇ܘܹܐܠܵܗ̇ ܟܲܕ ܒܲܪܘܼܟܼܵܝܗܝ ܗ݇ܘܵܐ. ܦܸܫܠܹܗ ܦܪܝܼܫܵܐ ܡܸܢܲܝܗܝ ܘܣܸܠَܩܠܹܗ ܠܫܡܲܝܵܐ. ܐܝܼܢܵܐ ܐܵܢܝܼ ܣܓܼܸܕܠܗ݇ܘܿܢ ܐܸܠܹܗ. ܘܕܥܸܪܗ݇ܘܿܢ ܠܐܘܿܪܸܫܠܸܡ ܒܚܲܕܘܼܬܵܐ ܪܲܒܬܵܐ. ܘܒܟܠ ܙܲܒܼܢܵܐ ܒܗܲܝܟܠܵܐ ܗ݇ܘܵܘ. ܟܲܕ ܫܵܒܘܼܚܹܐ ܘܡܒܲܪܘܼܟ݂ܹܐ ܠܐܲܠܵܗܵܐ. ܐܵܡܹܝܢ.
♱♱♱♱♱♱♱♱♱♱
|