|
ܡܲܪܡܝܼܬܼܵܐ ܕܐ݇ܪ̈ܵܙܹܐ؛ ܫܲܒܲܚܘ ܠܡܵܪܝܵܐ ܬܸܫܒ̇ܘܿܚܬܵܐ ܚܕܲܬܵܐ. ܐܲܩܲܦܬܵܐ؛ ܐܵܘܕܸ̇ܐ ܠܵܟܼ ܒܥܹܕ̇ܬܵܐ ܪܲܒ̇ܬܼܵܐ܀ ܥܘܼܢܵܝܵܐ؛ ܘܲܒܼܥܲܡܡܹ̈ܐ ܣܲܓܝܼܐܹ̈ܐ ܐܹܙܲܡܲܪ ܠܵܟܼ܀
ܕܩܲܢܟܹ̇ܐ؛ ܒܬܼܵܘ ܢܸܬ̇ܕܲܡܲܪ. ܟܘܼܪܣܝܵܟܼ ܐܲܠܵܗܵܐ ܠܥܵܠܲܡ ܥܵܠܡܝܼܢ. ܡܵܪܝܵܐ ܒܲܫܡܲܝܵܐ ܡܲܬܼܩܲܢ ܟܘܼܪܣܝܹܗ. ܠܟܼܘܼܪܣܝܵܐ ܕܚܝܼܠܵܐ ܕܪܲܒ̇ܘܼܬܼܵܟܼ. ܟܪ̈ܘܿܒܹܐ ܟܪܝܼܟܼܝܼܢ ܠܹܗ ܡܵܪܝܵܐ. ܘܲܒܼܕܸܚܠ̱ܬܼܵܐ ܒܝܲܕܼ ܓܸܦܲܝ̈ܗܘܿܢ. ܒܙܵܘܥܵܐ ܡܟܲܣܹܝܢ ܦܲܪ̈ܨܘܿܦܲܝܗܘܿܢ. ܒܲܕܼܠܵܐ ܡܸܫܟ̇ܚܝܼܢ ܠܡܸܬܼܠܵܐ ܥܲܢܲܝ̈ܗܘܿܢ. ܘܲܠܡܸܚܙܵܐ ܢܘܼܪܵܐ ܗܵܝ ܕܐܲܠܵܗܘܼܬܼܵܟܼ. ܘܐܲܢ݇ܬ̇ ܕܗܵܟܲܢܵܐ ܫܒܼܝܼܚܲܬ̇. ܥܵܡܲܪ ܐܲܢ݇ܬ̇ ܒܲܒܼܢܲܝ̈ܢܵܫܵܐ. ܠܵܐ ܠܡܵܘܩܵܕܼܘܼ. ܐܸܠܵܐ ܠܡܲܢܗܵܪܘܼ. ܪܲܒܵܐ ܗ݇ܝܼ ܡܵܪܝ ܡܪܲܚܡܵܢܘܼܬܼܵܟܼ ܘܛܲܝܒ̇ܘܼܬܼܵܟܼ ܕܲܣ̣ܥܲܪܬ̇ ܨܹܝܕܼ ܓܸܢܣܲܢ ܫܘܼܒܼܚܵܐ ܠܵܟܼ؛ ܬܢܝܼ؛ ܫܲܒܲܚ. ܠܚܲܝܹ̈ܐ ܘܛܘܼܒܹ̈ܐ ܐܲܡܝܼܢܹ̈ܐ. ܡܣܲܟܹ̇ܝܢ ܥܲܒܼܕܲܝ̈ܟ ܦܵܪܘܿܩܲܢ. ܘܐܵܚ̇ܕ̇ܝܼܢ ܓܵܘܣܵܐ ܒܗܲܝܡܵܢܘܼܬܼܵܐ ܘܛܵܦܣ̇ܝܼܢ ܒܟܸܢܦܵܘ̈ܗܝ ܕܲܨܠܝܼܒܼܵܐ. ܢܲܛܲܪ ܒܲܚܢܵܢܵܟܼ ܠܟܸܢܫܵܐ ܕܣܵܓܼܘܿܕܲܝ̈ܟ. ܘܫܲܡܠܵܐ ܨܹܐܕܲܝܗܘܿܢ ܫܘܼܘܕܵܝ ܡܘܼܠܟܵܢܲܝ̈ܟ. ܕܐܸܡܲܪܬ̇ ܠܪ̈ܵܚܡܲܝܟ ܒܲܣܒܲܪܬܼܵܟܼ ܕܟܼܠ ܐܲܝܢܵܐ ܕܲܡܗܲܝܡܸܢ ܒܝܼ. ܝܵܪܹܬܼ ܡܲܠܟ̇ܘܼܬܼܵܐ ܘܚܲܝܹ̈ܐ ܕܲܠܥܵܠܲܡ. ܐܲܫܘܵܐ ܠܲܢ ܡܵܪܝ ܕܥܲܡ ܩܲܕ̇ܝܼܫܲܝ̈ܟ. ܢܸܙܡܲܪ ܠܵܟܼ ܒܲܓܼܢܘܿܢ ܡܲܠܟ̇ܘܼܬܼܵܟܼ ܫܘܼܒܼܚܵܐ ܠܵܟܼ܀
ܩܸܪܝܵܢܵܐ؛ ܒ ܡܲܠܟܹ̈ܐ؛ ܒ؛ 1‐16. ܚܲܒܼܪܹܗ؛ ܦܪܲܟ̇ܣܝܼܣ ܐ؛ 1‐15
ܫܘܼܪܵܝܵܐ؛ ܣ̣ܠܸܩ ܐܲܠܵܗܵܐ ܒܫܘܼܒܼܚܵܐ ܡܵܪܝܵܐ ܒܩܵܠܵܐ ܕܩܲܪܢܵܐ. ܠܣܘܼܠܵܩܹܗ ܕܲܡܫܝܼܚܵܐ ܢܝܲܩܲܪ ܒܲܙܡܝܼܪ̈ܵܬܼܵܐ ܕܪܘܼܚܵܐ؛ ܗܲܠܸܠܘܼܝܲܗ ܗܲܠܸܠܘܼܝܲܗ ܐܹܗܲܠܸܠܘܼܝܲܗ܀ ܙܡܲܪܘ ܠܐܲܠܵܗܵܐ ܒܫܘܼܒܼܚܵܐ ܙܡܲܪܘ ܠܡܲܠܟܲܢ. ܠܣܘܼܠܵܩܹܗ ܕܲܡܫܝܼܚܵܐ..܀ ܫܒܲܚ؛ ܠܣܘܼܠܵܩܹܗ ܕܲܡܫܝܼܚܵܐ...܀ ܥܵܠܲܡ؛ ܠܣܘܼܠܵܩܹܗ ܕܲܡܫܝܼܚܵܐ...܀
ܫܠܝܼܚܵܐ؛ ܐ؛ ܛܝܼܡܵܬܹܐܘܿܣ ܐ؛ 18‐ܒ؛ ܫܘܼܠܵܡܵܐ. ܐܲܩܸܦ؛ ܓ؛ 14‐ܫܘܼܠܵܡܵܐ.
ܙܘܼܡܵܪܵܐ؛ ܒܩܵܠ. ܪܵܥܝܹܗ. ܙܡܲܪܘ ܠܡܵܪܝܵܐ ܕܲܪܟܼܝܼܒܼ ܒܲܫܡܲܝ̈ ܫܡܲܝܵܐ. ܡ̣ܢ ܡܲܕܼܢ̱ܚܵܐ ܝܲܗ̣݇ܒܼ ܩܵܠܹܗ ܩܵܠܵܐ ܥܲܫܝܼܢܵܐ. ܒ܀ ܕܥܘܼܫܢܹܗ ܒܲܫܡܲܝ̈ ܫܡܲܝܵܐ. ܕܚܝܼܠܲܬ̇ ܐܲܠܵܗܵܐ ܡ̣ܢ ܡܲܩܕܫܵܟܼ. ܐܲܠܵܗܹܗ ܕܝܼܣܪܵܝܹܠ. ܗܸܘ ܢܸܬܸ̇ܠ ܚܲܝܠܵܐ ܘܥܘܼܫܢܵܐ ܠܥܲܡܹܗ ܒܪܝܼܟܼܘ ܐܲܠܵܗܵܐ. ܕ܀
ܐܹܘܲܢܓܲܠܝܼܘܿܢ؛ ܠܘܼܩܵܐ. ܟܕ؛ 36‐ܫܘܼܠܵܡܵܐ
ܥܘܿܢ̈ܝܵܬܼܵܐ ܕܐܹܘܲܢܓܲܠܝܼܘܿܢ. ܒܩܵܠܵܐ ܪܲܒܵܐ. ܣ̣ܠܸܩ ܐܲܠܵܗܵܐ ܒܫܘܼܒܼܚܵܐ ܡܵܪܝܵܐ ܒܩܵܠܵܐ ܕܩܲܪܢܵܐ. ܕܨܘܼܪܬܵܐ. ܘܥܲܠ ܝܲܡܝܼܢܵܐ ܕܟܼܘܼܪܣܝܹܗ ܕܐܲܠܵܗܵܐ ܝܼܬܸܒܼ. ܠܲܫܡܲܝ̈ ܫܡܲܝܵܐ ܥܸܠܵܝܹ̈ܐ. ܣ̣ܠܸܩ ܪܹܫܝܼܬܼܵܐ ܕܲܢ̣ܣܲܒܼ ܡܸܢܲܢ ܡܸܠܬܹܗ ܕܐܲܒܼܵܐ ܝܑܼܚܝܼܕܼܵܝܵܐ. ܟܲܕܼ ܡܲܙܕܲܝܲܚ ܥܲܠ ܡܲܪܟܲܒܼܬܼܵܐ ܕܲܟܼܪ̈ܘܿܒܹܐ. ܘܲܕܼܪܲܫ̣ ܐܘܼܪܚܵܐ ܠܓܸܢܣܲܢ܀ ܘܲܥ̣ܒܲܕܼ ܫܲܝܢܵܐ ܒܪܵܘܡܵܐ ܘܥܘܼܡܩܵܐ. ܘܐܲܦ̣ܨܲܚ ܐܸܢܘܿܢ ܒܝܘܿܡ ܣܘܼܠܵܩܹܗ. ܘܥܲܠ̣ ܕܲܢܟܲܗܸܢ ܒܲܩܕܼܘܿܫ ܩܘܼܕܼܫܹ̈ܐ. ܐܲܠܵܗܵܝܵܐ ܚܠܵܦ ܦܘܼܪܩܵܢܲܢ. ܘܝܼܬܸܒܼ ܥܲܠ ܟܘܼܪܣܲܝ ܡܲܠܟ̇ܘܼܬܼܵܐ. ܡ̣ܢ ܝܲܡܝܼܢܵܐ ܕܐܲܒܼܵܐ ܕܫܲܠ̣ܚܹܗ. ܘܥܲܡܹܗ ܪܲܡ̣ܪܸܡ ܘܐܲܩ̣ܝܼܡܲܢ. ܡ̣ܢ ܝܲܡܝܼܢܹܗ ܐܲܝܟܲܢ ܕܲܟܼܬܼܝܼܒܼ܀ ܫܲܒܲܚܘ ܘܐܵܘܕܵܘ ܠܹܗ ܒܕܼܚܠܵܐ ܘܲܒܼܚܘܼܒܵܐ. ܥܲܠ ܐܲܦܲܝ̈ ܗܵܕܹܐ ܛܲܝܒ̇ܘܼܬܼܵܐ؛ ܡܸܛܠ ܕܗܸܘܝܘܼ ܪܹܫܵܐ. ܘܓܼܘܼܫܡܵܐ ܕܥܹܕ̇ܬܵܐ ܩܲܕ̇ܝܼܫܬܵܐ. ܠܹܗ ܐܸܬܼܟܲܫܲܦܘ ܘܲܒܼܥܵܘ ܕܲܢܚܘܼܣ ܥܠܲܝܢ؛ ܬܢܝܼ؛ ܫܲܒܲܚ. ܒܝܵܘܡܵܐ ܪܲܒܵܐ ܕܣܘܼܠܵܩܹܗ. ܕܲܡܠܸܟܼ ܡܲܠܟܹ̈ܐ ܫܡܲܝܵܢܵܐ. ܠܪܵܘܡܵܐ ܪܲܒܵܐ ܕܲܫܡܲܝܵܐ. ܐܲܪܝܼܡ̣ ܐܝܼܕܼܵܘ̈ܗܝ ܩܲܕ̇ܝܼ̈ܫܵܬܼܵܐ. ܘܒܲܪܸܟܼ ܠܟܸܢܫܵܐ ܕܲܫܠܝܼܚܹ̈ܐ. ܘܐܸܬܼܦܪܸܫ ܡܸܢܗܘܿܢ ܕܬܲܠܡܝܼܕܹ̈ܐ. ܘܲܣ̣ܠܸܩ ܒܫܘܼܒܼܚܵܐ ܠܲܫܡܲܝܵܐ܀ ܥܢܵܢܵܐ ܕܢܘܼܗܪܵܐ ܩܲܒܸ̇ܠܬܹܗ. ܘܐܸܬܼܟܲܣܝܼ ܗ݇ܘ̣ܵܐ ܡ̣ܢ ܥܲܝܢܲܝ̈ܗܘܿܢ. ܘܬܼܘܼܒܼ ܠܵܐ ܚ̣ܙܵܐܘܼܗܝ ܬܲܠܡܝܼ̈ܕܹܐ܀ ܘܗܵܐ ܬܪܹܝܢ ܡ̣ܢ ܡܲܠܲܐܟܹ̈ܐ ܩܵܝ̇ܡܝܼܢ ܒܲܠܒܼܘܼܫܹ̈ܐ ܚܸܘܵܪܹ̈ܐ. ܘܐܵܡܪܝܼܢ ܠܟܸܢܫܵܐ ܕܲܫܠܝܼܚܹ̈ܐ܀ ܓܲܒܼܪܹ̈ܐ ܡܵܢܵܐ ܩܵܝܡ̇ܝܼܬ̇ܘܿܢ. ܘܚܵܝ̇ܪܝܼܢ ܐܢ݇ܬܘܿܢ ܠܥܸܠ ܒܲܫܡܲܝܵܐ. ܗܵܢܵܐ ܝܑܼܫܘܿܥ ܕܐܸܣܬܲܠܲܩ. ܥܬܼܝܼܕܼ ܗ݇ܘ̣ ܕܢܹܐܬܸܐ ܒܬܸܫܒ̇ܘܿܚܬܵܐ ܒܝܵܘܡܵܐ ܪܲܒܵܐ ܕܲܩܝܵܡܬܵܐ܀ ܘܲܒܼܟܲܪܝܘܼܬܼܵܐ ܗ̣ܦܲܟܼܘ ܬܲܠܡܝܼ̈ܕܹܐ. ܡ̣ܢ ܛܘܼܪܵܐ ܕܡܸܬܼܩܪܸܐ ܕܒܹܝܬܼ ܙܲܝܬܹ̈ܐ. ܘܟܼܠܝܘܿܡ ܐܝܼܬܲܝܗܘܿܢ ܗ݇ܘ̣ܵܘ ܒܓܼܵܘ ܗܲܝܟܿܠܵܐ. ܟܲܕܼ ܡܫܲܒ̇ܚܝܼܢ ܘܲܡܒܲܪܟܼܝܼܢ ܠܡܵܪܝܵܐ. ܘܐܲܝܟܼ ܦܘܼܩܕܵܢܵܐ ܩ̣ܵܘܝܼܘ ܒܗܲܝܟ̇ܠܵܐ ܕܐܘܿܪܸܫܠܸܡ. ܥܕܲܡܵܐ ܕܲܠ̣ܒܸܫܘ ܪܘܼܚ ܩܘܼܕܼܫܵܐ. ܘܲܗܘܸܵܘ ܣܵܗ̈ܕܹܐ ܒܟܼܠܵܗ̇ ܝܑܼܗܘܼܕܼ ܘܒܼܐܘܿܪܸܫܠܸܡ. ܘܐܲܟܼܪܸܙܘ ܘܣܲܒܲܪܘ ܘܬܲܠ̣ܡܸܕܼܘ ܘܐܲܥ̣ܡܸܕܼܘ. ܒܲܫܡܹܗ ܕܝܼܫܘܿܥ ܠܹܗ ܫܘܼܒܼܚܵܐ܀
ܕܐܪ̈ܵܙܹܐ؛ ܒܲܒܼܛܝܼܠܘܼܬܹܗ. ܡܵܐ ܛܵܒܼ ܘܡܵܐ ܫܲܦܝܼܪ. ܛܵܒܼ ܡ̣ܢ ܟܠܗܘܿܢ ܡܲܫܟ̇ܢܵܘ̈ܗܝ ܕܝܲܥܩܘܿܒܼ. ܕܨܘܼܪܬܵܐ. ܗܵܘ̇ ܕܲܩ̣ܒܲܥ ܐܲܠܵܗܵܐ ܘܠܵܐ ܒܲܪܢܵܫܵܐ. ܡܲܫܟ̇ܢܵܐ ܕܠܵܐ ܙܵܐܲܥ̇. ܡܲܫܟ̇ܢܵܐ ܕܥܲܠ̣ ܠܹܗ ܦܵܪܘܿܩܲܢ ܠܵܐ ܕܵܡܹ̇ܐ. ܠܗܵܘ̇ ܕܲܥ̣ܒܲܕܼ ܡܘܼܫܹܐ ܡ̣ܢ ܩܕܼܝܼܡ. ܕܪܲܒ̇ܟܿܘܼܡܪܹ̈ܐ ܒܲܠܚܘܿܕܼ ܦܩܝܼܕܼ ܗ݇ܘ̣ܵܐ ܕܢܸܥܘܿܠ ܠܹܗ. ܐܸܠܵܐ ܠܗܘܿܢ ܠܲܫܡܲܝ̈ܵܐ ܥܲܠ̣ ܕܲܢܟܲܗܸܢ. ܘܲܢܛܲܝܸܒܼ ܡܲܠܟ̇ܘܼܬܼܵܐ ܕܠܵܐ ܥܵܒܼ̇ܪܵܐ. ܘܟܲܕܼ ܗܸܘ ܠܲܓܼܡܵܪ ܠܵܐ ܫܵܘܹ̇ܐ ܗ݇ܘ̣ܵܐ ܕܲܢܡܘܼܬܼ. ܢܲܦ̮ܫܹܗ ܝܲܗ̣݇ܒܼ ܚܠܵܦܲܝܢ ܕܲܒܼܡܵܘܬܹ̇ܗ ܢܸܙܕܲܕܲܩ. ܒܪܝܼܟܼܘܼ ܕܢܲܣܒܹ̇ܗ ܡܸܢܲܢ ܘܲܥ̣ܡܲܪ ܒܹܗ ܘܥܲܒܼܕܹ̇ܗ ܪܹܫܵܐ ܘܡܵܪܵܐ ܘܕܲܝܵܢܵܐ ܐܝܼܬܼܝܵܐ ܕܥܵܡܲܪ ܒܲܡܪ̈ܵܘܡܹܐ. ܫܘܼܒܼܚܵܐ ܠܵܟܼ. ܬܢܝܼ؛ ܘܫܲܒܲܚ. ܒܵܗ̇.
ܕܚܝܼܠܲܬ̇. ܣ̣ܠܸܩ ܐܲܠܵܗܵܐ ܒܫܘܼܒܼܚܵܐ ܡܵܪܝܵܐ ܒܩܵܠܵܐ ܕܩܲܪܢܵܐ. ܙܡܲܪܘ ܠܐܲܠܵܗܵܐ ܒܫܘܼܒܼܚܵܐ ܙܡܲܪܘ ܠܡܲܠܟܲܢ. ܕܚܝܼܠܲܬ̇. ܐܲܡ̣ܠܸܟܼ ܐܲܠܵܗܵܐ ܥܲܠ ܥܲܡܡܹ̈ܐ. ܐܲܠܵܗܵܐ ܝܑܼܬܸܒܼ ܥܲܠ ܟܘܼܪܣܝܹܗ ܩܲܕܝܼܫܵܐ. ܕܚܝܼܠܲܬ̇. ܓܘܼܕܝܼ̈ܢ ܓܘܼܕܝܼ̈ܢ ܩܵܡ̣ܘ ܪ̈ܘܼܚܵܢܹܐ ܘܙܲܝܚܘܼܗܝ ܠܲܒܼܪܵܐ ܒܝܘܿܡ ܣܘܼܠܵܩܹܗ. ܕܚܝܼܠܲܬ̇. ܟܲܕܼ ܚܵܙܹܝ̇ܢ ܠܹܗ ܕܐܸܣܬܲܠܲܩ. ܘܲܥܢܵܢܵܐ ܩܲܒܸ̇ܠܬܹܗ ܘܐܸܬܼܟܲܣܝܼ ܡ̣ܢ ܥܲܝܢܲܝ̈ܗܘܿܢ. ܕܚܝܼܠܲܬ̇. ܠܗܵܢܵܐ ܕܡܵܐ ܝܲܩܝܼܪܵܐ ܘܦܲܓܼܪܵܐ ܕܲܢ̣ܣܲܒܼܢ ܟܠܲܢ. ܒܬܼܵܘܕܝܼܬܼܵܐ ܢܫܲܒܲܚ ܠܹܗ ܘܢܹܐܡܲܪ. ܗܲܠܸܠܘܼܝܲܗ ܗܲܠܸܠܘܼܝܲܗ. ܕܚܝܼܠܲܬ̇.
ܕܒܹܝܡ؛ ܥܘܼܢܵܝܵܐ. ܡܸܢܹܗ ܘܠܹܗ. ܡ̣ܢ ܡܪ̈ܵܘܡܹܐ ܥܸܠܵܝܹ̈ܐ؛ ܡܫܝܼܚܵܐ ܡܵܪܲܢ ܘܦܵܪܘܿܩܵܐ ܕܟܼܠܵܐ. ܓܲܐܝܘܼܬܼܵܐ ܘܫܘܼܒܼܚܵܐ ܘܗܸܕܼܪܵܐ ܠ̣ܒܸܫ. ܟܲܕܼ ܝܲܗ̣݇ܒܼ ܗ݇ܘ̣ܵܐ ܦܘܼܪܩܵܢܵܐ ܠܥܲܡܡܹ̈ܐ. ܘܫܘܼܒܼܩܵܢ ܚܵܘ̈ܒܹ̇ܐ ܘܲܚܛܵܗܹ̈ܐ ܠܚܘܼܣܵܝܵܐ ܕܟܼܠܵܐ܀ ܠܗܵܢܵܐ ܕܡܵܐ...܀ ܒܵܬܹ̈ܐ؛ ܐܲܢ݇ܬ̇ܘܿܢ ܕܹܝܢ ܩܵܘܵܘ ܒܐܘܿܪܸܫܠܸܡ ܡܕܼܝܼܢ݇ܬܵܐ. ܥܕܲܡܵܐ ܕܬܸܠܒ̇ܫܘܼܢ ܚܲܝܠܵܐ ܡ̣ܢ ܪܵܘܡܵܐ܀ ܠܗܵܢܵܐ ܕܡܵܐ ܝܲܩܝܼܪܵܐ ܘܦܲܓܼܪܵܐ ܕܲܢ̣ܣܲܒܼܢ ܟܠܲܢ. ܒܬܼܵܘܕܝܼܬܼܵܐ ܢܫܲܒܲܚ ܠܹܗ ܘܢܹܐܡܲܪ. ܗܲܠܸܠܘܼܝܲܗ ܗܸܠܸܠܘܼܝܲܗ܀ ܘܐܲܦܸܩ̣ ܐܸܢܘܿܢ ܥܕܲܡܵܐ ܠܒܹܝܬܼ ܥܲܢܝܵܐ. ܘܐܲܪܝܼܡ̣ ܐܝܼܕܼܵܘ̈ܗܝ ܘܒܲܪܸܟܼ ܐܸܢܘܿܢ܀ ܠܗܵܢܵܐ ܕܡܵܐ...܀ ܘܲܗܘܸܵܐ ܕܟܲܕܼ ܡܒܲܪܸܟܼ ܠܗܘܿܢ. ܐܸܬܼܦܪܸܫ ܡܸܢܗܘܿܢ ܘܲܣ̣ܠܸܩ ܠܲܫܡܲܝܵܐ܀
ܕܦܲܓܼܪܵܟܼ ܘܲܕܼܡܵܟܼ. ܒܪܝܼܟܼܘܼ ܡܫܝܼܚܵܐ ܕܫܲܡ̣ܠܝܼ ܚܢܵܢܹܗ. ܘܲܣ̣ܠܸܩ ܒܫܘܼܒܼܚܵܐ ܠܲܫܡܲܝ̈ ܫܡܲܝܵܐ܀ ܬܗܲܪܘ ܬܲܠܡܝܼ̈ܕܹܐ ܒܗܵܘ̇ ܥܸܕܵܢܵܐ. ܟܲܕܼ ܩܲܒܸܠܬܹܗ ܥܢܵܢܵܐ ܡܸܢܗܘܿܢ܀ ܬܲܪ̈ܥܹܐ ܦܬܼܝܼܚܝܼܢ ܘܟܸܢܫܹ̈ܐ ܡܝܲܒ̇ܒܼܝܼܢ. ܘܐܲܒܼܵܐ ܕܩܵܥܹ̇ܐ ܕܬܼܵܐ ܥܘܿܠ ܚܲܒ̇ܝܼܒܼܝ܀
♱♱♱♱♱♱♱♱♱♱
|