ܐܲܪܒܲܥܒܫܲܒܵܐ ܕܒܵܥܘܼܬܵܐ ܕܢܝܼܢܘܵܝܹ̈ܐ
ܝܘܼܐܹܝܠ ܒ؛ 15‐28
ܬܸܒ̣ܘ ܘܲܫܠܵܘ ܢܒ̣ܝܼܘܼܬܹܗ ܕܝܘܼܐܹܝܠ؛ ܐܲܚܲܝ̈ ܒܲܪܸܟ̣ܡܵܝ.
ܩܪܹܐܡܘܿܢ ܫܝܼܦܘܼܪܵܐ ܒܨܸܗܝܘܿܢ؛ ܩܲܕܫܘܿܢ ܨܵܘܡܵܐ؛ ܩܪܹܐܡܘܿܢ ܟܢܘܼܫܝܵܐ؛ ܓ̰ܡܸܥܡܘܿܢ ܛܵܝܸܦܵܐ؛ ܩܲܕܫܘܿܢ ܥܹܕܬܵܐ؛ ܓ̰ܡܸܥܡܘܿܢ ܣܵܒ̣ܹ̈ܐ ܓ̰ܘܲܢܩܹ̈ܐ ܘܡܲܝܨܵܢܹ̈ܐ ܕܒܸܙܵܙܹ̈ܐ. ܒܸܬ ܦܵܠܸܛ ܚܲܬܢܵܐ ܡ̣ܢ ܩܵܝܛܘܿܢܹܗ؛ ܘܟܲܠܬܵܐ ܡ̣ܢ ܒܹܝܬ̣ ܓܢܘܼܢܘܿܗ̇؛ ܒܹܝܠ ܩܸܣܛܪܘܼܡܵܐ ܠܡܲܕܒܚܵܐ ܒܸܬ ܒܵܟ̣ܝܼ ܟܵܗܢܹ̈ܐ ܘܡܫܲܡܫܵܢܹ̈ܐ ܕܡܵܪܝܵܐ ܘܐܵܡܪܝܼ؛ ܪܵܚܸܡ ܝܵܐ ܡܵܪܝܵܐ ܥܲܠ ܛܵܝܸܦܘܼܟܼ؛ ܘܠܵܐ ܝܵܗܒ̣ܸܬ̇ ܝܵܪܬܘܼܬܘܼܟܼ ܠܠܵܘܡܵܐ ܘܠܗܘܼܟܡܵܐ ܕܛܵܝܸܦܹ̈ܐ؛ ܕܠܵܐ ܐܵܡܪܝܼ ܛܵܝܸܦܹ̈ܐ ܐܲܝܟܵܐ ܝ݇ܠܹܗ ܐܲܠܵܗܲܝܗܝ؟܀ ܥܒ̣ܸܪܹܗ ܒܛܢܵܢܵܐ ܡܵܪܝܵܐ ܒܐܲܪܥܹܗ ܘܪܘܼܚܸܡܠܹܗ ܥܲܠ ܛܵܝܸܦܹܗ.܀ ܘܓ̰ܘܼܘܸܒܠܹܗ ܡܵܪܝܵܐ ܘܐ݇ܡܸܪܹܗ ܠܛܵܝܸܦܹܗ ܗܵܐ ܒܸܬ ܫܲܕܪܸܢܵܘܟ̣ܘܿܢ ܕܸܚܠܵܐ ܘܚܲܡܪܵܐ ܘܡܸܫܚܵܐ ܘܒܸܬ ܣܵܒ̣ܥܝܼܬܘܿܢ؛ ܘܠܹܐ ܝܵܗ݇ܒ̣ܸܢܵܘܟ̣ܘܿܢ ܡܸܕܪܹܐ ܕܗܵܘܝܼܬܘܿܢ ܠܵܘܡܵܐ ܕܛܵܝܸܦܹ̈ܐ؛ ܘܠܓܲܪܒܝܵܝܵܐ ܒܸܬ ܡܲܪܚܸܩܸܢ ܡܸܢܵܘܟ̣ܘܿܢ ܘܒܸܬ ܡܲܪܚܩܸܢܹܗ ܠܚܲܕ݇ ܐܲܪܥܵܐ ܨܗܝܼܬܵܐ ܘܚܵܪܵܒܵܐ؛ ܦܵܬܹܗ ܠܝܵܡܵܐ ܩܲܕ݇ܡܵܝܵܐ ܘܚܲܪܬܹܗ ܠܝܵܡܵܐ ܐ݇ܚܵܪܵܝܵܐ؛ ܘܒܸܬ ܡܵܚܹܐ ܪܹܝܚܹܗ ܘܐܵܣܸܩ ܬܸܢܢܹܗ؛ ܡ̣ܢ ܣܵܒܵܒ ܕܝ݇ܪܸܡܠܹܗ ܠܸܥܒ̣ܵܕܵܐ.܀ ܠܵܐ ܙܵܕܥܝܵܬ̇ܝ ܐܲܪܥܵܐ؛ ܦܨܘܿܚܝ ܘܚܕܵܝ؛ ܣܵܒܵܒ ܕܡܵܪܝܵܐ ܥܒ̣ܸܕܠܹܗ ܦܘܼܠܚܵܢܹ̈ܐ ܓܘܼܪܹ̈ܐ. ܠܵܐ ܙܵܕܥܝܵܬ̇ܝ ܗܲܝܘܵܢ ܕܒܲܪܝܼܵܐ؛ ܣܵܒܵܒ ܕܡܘܼܓ̰ܝܸܢܹܗ ܓܸܠܵܐ ܒܕܲܝܪܹ̈ܐ ܘܒܲܪܝܼܵܐ؛ ܘܐܝܼܠܵܢܵܐ ܝܘܼܗܒ̣ܸܠܹܗ ܛܥܘܼܢܝܵܬܹ̈ܐ ܘܓܸܦܬܵܐ ܘܬܹܐܢܵܐ ܝܘܼܗܒ̣ܸܠܗ݇ܘܿܢ ܚܲܝܠܲܝܗܝ.܀ ܒܢܲܝ̈ ܨܸܗܝܘܿܢ ܦܨܘܿܚܘܿܢ ܘܚܕܹܐܡܘܿܢ ܒܡܵܪܝܵܐ ܐܲܠܵܗܵܘܟ̣ܘܿܢ؛ ܕܝܵܗܒ̣ܸܠ ܠܵܘܟ̣ܘܿܢ ܡܹܐܟ̣ܘܼܠܬܵܐ ܕܙܲܕܝܼܩܘܼܬܵܐ؛ ܘܡܲܨܠܹܐ ܠܵܘܟ̣ܘܿܢ ܡܸܛܪܵܐ ܩܵܕ݇ܡܵܝܵܐ ܘܐ݇ܚܵܪܵܝܵܐ ܐܲܝܟܼ ܩܲܕ݇ܡܵܝܬܵܐ.܀ ܘܒܹܐܕܪ̈ܵܬܹܐ ܒܸܬ ܦܵܝܫܝܼ ܡܸܠܝܹܐ ܕܸܚܠܵܐ؛ ܘܡܲܥܨܵܪ̈ܝܵܬܹܐ ܒܸܬ ܫܵܦܚܝܼ ܚܲܡܪܵܐ ܘܡܸܫܚܵܐ؛ ܘܒܸܬ ܦܲܪܥܸܢܵܘܟ̣ܘܿܢ ܗ̇ܘ ܡܸܢܕܝܼ ܕܐ݇ܟ̣ܸܠܹܗ ܩܲܡܨܵܐ؛ ܘܣܸܢܸܟ ܘܨܸܨܪܵܐ ܘܬܵܘܠܥܵܐ؛ ܚܲܝܠܝܼ ܓܘܼܪܵܐ ܕܫܘܼܕܸܪܝܼ ܐܸܠܵܘܟ̣ܘܿܢ؛ ܘܒܸܬ ܐܵܟ̣ܠܝܼܬܘܿܢ ܘܣܵܒ̣ܥܝܼܬܘܿܢ ܘܫܵܒܚܝܼܬܘܿܢ ܠܫܸܡܹܗ ܕܡܵܪܝܵܐ ܐܲܠܵܗܵܘܟ̣ܘܿܢ؛ ܕܥܵܒ̣ܸܕ ܥܲܡܵܘܟ̣ܘܿܢ ܥܵܓ̰ܝܼܒܘܼܝܵܬܹ̈ܐ؛ ܘܠܹܐ ܢܵܟ̣ܸܦ ܛܵܝܸܦܝܼ ܗܲܠ ܥܵܠܲܡ.܀ ܘܒܸܬ ܝܵܕܥܝܼܬܘܿܢ ܕܓܵܘ ܒܢܲܝ̈ ܝܼܣܪܵܝܹܠ ܝܼܘܸܢ؛ ܐܵܢܵܐ ܝ݇ܘܸܢ ܡܵܪܝܵܐ ܐܲܠܵܗܵܘܟ̣ܘܿܢ؛ ܘܠܲܝܬ̇ ܡܸܕܪܹܐ ܫܒ̣ܘܿܩ ܡܸܢܝܼ؛ ܘܠܵܐ ܢܵܟ̣ܸܦ ܛܵܝܸܦܝܼ ܠܥܵܠܲܡ ܒܹܐܡܵܪܵܐ ܝ݇ܠܹܗ ܡܵܪܝܵܐ ܚܲܝܠܬܵܢܵܐ܀
ܚܲܒ̣ܪܹܗ
ܝܵܘܢܵܢ ܓ؛ 1‐ܕ؛ ܫܘܼܠܵܡܵܐ
ܫܠܵܘ ܢܒ̣ܝܼܘܼܬܹܗ ܕܝܵܘܢܵܢ؛ ܐܲܚܲܝ̈ ܒܲܪܸܟ̣ܡܵܪܝ܀
ܘܗ݇ܘܹܐܠܹܗ ܚܲܒܪܹܗ ܕܡܵܪܝܵܐ ܥܲܠ ܝܵܘܢܵܢ ܓܵܗܵܐ ܕܬܪܹܝ ܠܹܐܡܵܪܵܐ.܀ ܩܘܼܡ ܙܹܠ ܠܢܝܼܢܘܹܐ ܡܕܝܼܢ݇ܬܵܐ ܓܘܼܪܬܵܐ؛ ܘܡܲܟܪܸܙ ܥܲܠܵܗ̇ ܟܵܪܘܿܙܘܼܬܵܐ ܕܐܵܡܪܸܢܘܼܟܼ.܀ ܘܩܸܡܠܹܗ ܝܵܘܢܵܢ ܘܐ݇ܙܸܠܹܗ ܠܢܝܼܢܘܹܐ ܐܲܝܟܼ ܚܲܒܪܵܐ ܕܡܵܪܝܵܐ.܀ ܘܢܝܼܢܘܹܐ ܡܕܝܼܢ݇ܬܵܐ ܓܘܼܪܬܵܐ ܗ݇ܘܵܐ ܠܐܲܠܵܗܵܐ؛ ܐܲܝܟܼ ܐܘܼܪܚܵܐ ܕܬܠܵܬܵܐ ܝܵܘܡܵܢܹ̈ܐ.܀ ܘܫܘܼܪܹܐܠܹܗ ܝܵܘܢܵܢ ܠܸܥܒ̣ܵܪܵܐ ܠܢܝܼܢܘܹܐ ܐܲܝܟܼ ܐܘܼܪܚܵܐ ܕܚܲܕ݇ ܝܵܘܡܵܐ؛ ܘܡܘܼܟܪܸܙܠܹܗ ܘܐ݇ܡܸܪܹܗ؛ ܡ̣ܢ ܐܸܕܝܘܿܡ݇ ܠܐܲܪܒܥܝܼ ܝܵܘܡܵܢܹ̈ܐ ܢܝܼܢܘܹܐ ܒܸܬ ܬܵܠܚܵܐ.܀ ܘܗܘܼܡܸܢܗ݇ܘܿܢ ܐ݇ܢܵܫܹ̈ܐ ܕܢܝܼܢܘܹܐ ܒܐܲܠܵܗܵܐ؛ ܘܩܛܸܥܠܗ݇ܘܿܢ ܨܵܘܡܵܐ؛ ܘܠܒ̣ܸܫܠܗ݇ܘܿܢ ܣܲܩܹ̈ܐ؛ ܡ̣ܢ ܓܘܼܪ̈ܲܝܗܝ ܗܲܠ ܙܥܘܿܪ̈ܲܝܗܝ.܀ ܘܡܛܹܐܠܹܗ ܚܲܒܪܵܐ ܠܡܲܠܟܵܐ ܕܢܝܼܢܘܹܐ؛ ܘܩܸܡܠܹܗ ܡ̣ܢ ܟܘܼܪܣܝܼܹܗ؛ ܘܫܩܸܠܹܗ ܡܸܢܹܗ ܬܵܓ̰ܹܗ ܘܠܒ̣ܸܫܠܹܗ ܣܲܩܵܐ ܘܝ݇ܬܸܒ̣ܠܹܗ ܥܲܠ ܩܸܛܡܵܐ.܀ ܘܡܘܼܟܪܸܙܠܗ݇ܘܿܢ ܘܐ݇ܡܸܪܗ݇ܘܿܢ ܒܢܝܼܢܘܹܐ ܡ̣ܢ ܦܘܼܩܕܵܢܵܐ ܕܡܲܠܟܵܐ ܘܓܘܼܪ̈ܵܢܘܼܗܝ؛ ܒܢܲܝ̈ܢܵܫܵܐ ܘܗܲܝܘܵܢܹ̈ܐ ܘܬܵܘܪܹ̈ܐ ܘܥܸܪ̈ܒܹܐ؛ ܠܵܐ ܛܵܥܡܝܼ ܗܝܼܟ̰ ܡܸܢܕܝܼ ܘܠܵܐ ܪܵܥܝܝܼ؛ ܘܐܘܼܦ ܡܝܼܵܐ ܠܵܐ ܫܵܬܝܼ.܀ ܐܸܠܵܐ ܠܵܒ̣ܫܝܼ ܣܲܩܵܐ ܒܢܲܝ̈ܢܵܫܵܐ ܘܗܲܝܘܵܢܹ̈ܐ ܘܩܵܪܝܼ ܠܹܗ ܠܐܲܠܵܗܵܐ ܒܫܲܦܠܲܦܬܵܐ؛ ܘܕܵܐܸܪ ܟܠ ܐ݇ܢܵܫܵܐ ܡ̣ܢ ܐܘܼܪܚܹܗ ܒܝܼܫܬܵܐ ܘܡ̣ܢ ܓܹܢܵܒ̣ܘܼܬܵܐ ܕܐܝܼܬ ܒܐܝܼܕܵܬܹܗ.܀ ܡܵܢܝܼ ܝܵܕܸܥ؛ ܐܸܢ ܕܵܐܸܪ ܐܲܠܵܗܵܐ ܘܡܪܵܚܸܡ ܥܲܠܲܢ؛ ܘܡܲܕܸܪ ܡܸܢܲܢ ܚܸܡܬܵܐ ܕܟܲܪܒܹܗ ܕܠܵܐ ܬܵܠܩܲܚ؟܀ ܘܚܙܹܐܠܹܗ ܐܲܠܵܗܵܐ ܦܘܼܠܚܵܢܲܝ̈ܗܝ ܘܬܘܼܒ̣ܸܒܠܗ݇ܘܿܢ ܡ̣ܢ ܐܘܼܪ̈ܚܵܬܲܝܗܝ ܒܝܼܫܹ̈ܐ؛ ܘܡܘܼܕܸܪܹܗ ܡܸܢܲܝܗܝ ܚܸܡܬܵܐ ܕܟܲܪܒܹܗ ܘܠܵܐ ܬܘܼܠܩܝܼܠܹܗ.܀ ܘܦܫܸܡܠܵܗ̇ ܠܝܵܘܢܵܢ ܦܵܫܲܡܬܵܐ ܓܘܼܪܬܵܐ ܘܥܸܩܠܵܗ̇ ܐܸܠܹܗ ܪܵܒܵܐ.܀ ܘܡܨܘܼܠܹܐܠܹܗ ܩܵܕ݇ܡ ܡܵܪܝܵܐ ܘܐ݇ܡܸܪܹܗ؛ ܝܵܐ ܡܵܪܝܵܐ؛ ܠܹܐ ܗ݇ܘܵܐ ܐܵܗܵܐ ܗܲܡܙܲܡܬܝܼ ܟܲܕ ܐܵܢܵܐ ܒܐܲܪܥܝܼ؛ ܘܩܵܐ ܕܐܵܗܵܐ ܣܵܒܵܒ ܡ̣ܢ ܩܵܕ݇ܡ ܥܸܕܵܢܵܐ ܥܪܸܩܠܝܼ ܠܬܲܪܫܝܼܫ؛ ܣܵܒܵܒ ܝܵܕܥܸܢ ܗ݇ܘܵܐ ܕܐܲܢ݇ܬ̇ ܐܲܠܵܗܵܐ ܝ݇ܘܸܬ̇ ܡܪܲܚܡܵܢܵܐ ܘܪܲܦܪܸܦܵܢܵܐ؛ ܘܒܹܐܢܘܼܟܼ ܝܵܪܝܼܟ̣ܬܵܐ ܘܫܵܦܵܩܲܬܘܼܟܼ ܓܘܼܪܬܵܐ ܘܟܹܐ ܡܲܕܸܪܸܬ̇ ܒܝܼܫܬܵܐ.܀ ܡܐܵܕܝܼܵܐ ܝܵܐ ܡܵܪܝܼ ܫܩܘܿܠ ܓܵܢܝܼ ܡܸܢܝܼ؛ ܒܘܼܫ ܨܦܵܝܝܼ ܝ݇ܠܵܗ̇ ܩܵܬܝܼ ܕܡܵܝܬܸܢ ܡ̣ܢ ܕܚܲܝܸܢ.܀ ܘܐ݇ܡܸܪܹܗ ܐܸܠܹܗ ܡܵܪܝܵܐ ܪܵܒܵܐ ܦܫܸܡܠܘܼܟܼ.܀ ܘܦܠܸܛܠܹܗ ܝܵܘܢܵܢ ܠܒ̣ܲܕܲܪ ܡ̣ܢ ܡܕܝܼܢ݇ܬܵܐ ܘܝ݇ܬܸܒ̣ܠܹܗ ܒܡܲܕܢܚܵܝܵܗ̇ ܕܡܕܝܼܢ݇ܬܵܐ؛ ܘܬܘܼܪܸܨܠܹܗ ܩܵܐ ܓܵܢܹܗ ܚܲܕ݇ ܛܸܠܵܢܝܼܬܵܐ ܬܡܵܐ ܘܝ݇ܬܸܒ̣ܠܹܗ ܬܚܘܿܬܵܗ̇؛ ܕܚܵܙܹܐ ܡܘܼܕܝܼ ܒܸܬ ܩܲܘܸܡ ܠܡܕܝܼܢ݇ܬܵܐ؟܀ ܘܦܩܸܕܠܹܗ ܡܵܪܝܵܐ ܐܲܠܵܗܵܐ ܠܒܸܪܪܵܐ ܕܩܲܪܐܵܐ؛ ܡܘܼܓ̰ܝܸܢܹܗ ܘܐ݇ܣܸܩܠܹܗ ܥܘܼܠܘܼܠ ܡ̣ܢ ܝܵܘܢܵܢ؛ ܘܗ݇ܘܹܐܠܹܗ ܛܸܠܵܢܝܼܬܵܐ ܥܲܠ ܪܹܫܹܗ؛ ܘܡܘܼܢܝܸܚܠܹܗ ܡ̣ܢ ܒܝܼܫܬܹܗ؛ ܘܚܕܹܐܠܹܗ ܝܵܘܢܵܢ ܒܒܸܪܪܵܐ ܕܩܲܪܐܵܐ ܚܲܕܘܼܬܵܐ ܓܘܼܪܬܵܐ.܀ ܘܠܝܵܘܡܵܐ ܐ݇ܚܹܪ݇ܢܵܐ ܦܘܼܩܸܕܠܹܗ ܐܲܠܵܗܵܐ ܠܬܵܘܸܠܥܵܐ ܒܙܪܵܩܬܹܗ ܕܫܸܡܫܵܐ ܘܡܚܹܐܠܵܗ̇ ܠܒܸܪܪܵܐ ܕܩܲܪܐܵܐ ܘܡܘܼܒܪܸܙܠܵܗ̇. ܘܟܲܕ ܙܪܸܩܠܵܗ̇ ܫܸܡܫܵܐ ܦܩܸܕܠܹܗ ܡܵܪܝܵܐ ܐܲܠܵܗܵܐ ܠܦܵܘܚܵܐ ܚܲܡܝܼܡܵܐ ܘܡܘܼܒܪܸܙܠܹܗ ܠܩܲܪܐܵܐ؛ ܘܨܡܸܚܠܵܗ̇ ܫܸܡܫܵܐ ܒܪܹܫܹܗ ܕܝܵܘܢܵܢ ܝ݇ܩܸܕܠܹܗ ܡ̣ܢ ܚܸܡܵܐ ܘܛܠܸܒܠܹܗ ܡܵܘܬܵܐ ܠܓܵܢܹܗ؛ ܘܐ݇ܡܸܪܹܗ؛ ܡܵܛܝܵܐ ܒܐܝܼܕ̈ܘܼܟܼ ܝܵܐ ܡܵܪܝܵܐ ܕܫܵܩܠܸܬ̇ ܓܵܢܝܼ ܡܸܢܝܼ؛ ܣܵܒܵܒ ܕܠܹܐ ܝ݇ܘܸܢ ܒܘܼܫ ܨܦܵܝܝܼ ܡ̣ܢ ܐܲܒ̣ܵܗ̈ܝܼ.܀ ܘܐ݇ܡܸܪܹܗ ܡܵܪܝܵܐ ܐܲܠܵܗܵܐ ܠܝܵܘܢܵܢ ܪܵܒܵܐ ܦܫܸܡܠܘܼܟܼ ܥܲܠ ܚܲܕ݇ ܒܸܪܪܵܐ ܕܩܲܪܐܵܐ. ܘܐ݇ܡܸܪܹܗ ܝܵܘܢܵܢ ܪܵܒܵܐ ܦܫܸܡܠܵܗ̇ ܠܝܼ ܘܗܲܠ ܡܵܘܬܵܐ؛ ܘܐ݇ܡܸܪܹܗ ܐܸܠܹܗ ܡܵܪܝܵܐ ܐܲܢ݇ܬ̇ ܐ݇ܬܹܐܠܵܗ̇ ܠܘܼܟܼ ܡܘܼܚܲܒܢܵܐ ܕܚܲܕ݇ ܒܸܪܪܵܐ ܕܩܲܪܐܵܐ. ܕܠܵܐ ܦܠܸܚܠܘܼܟܼ ܘܠܵܐ ܓܘܼܪܘܸܣܠܘܼܟܼ؛ ܕܗܲܪ ܒܗ̇ܘ ܠܲܝܠܹܐ ܕܒܪܹܐܠܹܗ ܒܝܼܹܗ ܒܪܸܙܠܹܗ؛ ܐܝܼܢܵܐ ܐܵܢܵܐ ܠܵܐ ܐܵܬܝܵܐ ܠܝܼ ܡܘܼܚܲܒܢܵܐ ܕܢܝܼܢܘܹܐ ܡܕܝܼܢ݇ܬܵܐ ܓܘܼܪܬܵܐ ܕܐܝܼܬ ܓܵܘܵܗ̇ ܙܵܘܕܵܐ ܡ̣ܢ ܬܪܸܥܣܲܪ ܪܸ̈ܒܘܵܬܹܐ ܒܢܲܝ̈ܢܵܫܵܐ؛ ܕܠܹܐ ܝܵܕܥܝܼ ܒܹܝܠ ܝܲܡܝܼܢܵܐ ܠܣܸܡܵܠܵܐ؛ ܘܒܘܼܫܵܝܘܼܬܵܐ ܕܪܸܣܩܵܐ؟܀
♱♱♱♱♱♱♱♱
ܐܲܪܒܲܥܒܫܲܒܵܐ ܕܒܵܥܘܼܬܵܐ ܕܢܝܼܢܘܵܝܹ̈ܐ
ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ
ܕܲܠܘܵܬܼ ܪ̈ܗܘܿܡܵܝܹܐ ܐܲܚܲܝ̈ ܒܲܪܸܟܼܡܵܪܝ܀
ܒܲܣ ܡܘܼܕܝܼ ܐܵܡܪܲܚ؛ ܩܵܡܘܿ ܐܝܼܬ ܢܵܗܵܩܘܼܬܵܐ ܠܟܸܣ ܐܲܠܵܗܵܐ؟ ܚܵܣܠܹܗ؛ ܚܙܹܐܡܘܿܢ ܐܘܼܦ ܩܵܐ ܡܘܼܫܹܐ ܐ݇ܡܸܪܹܗ؛ ܒܸܬ ܥܵܒܼܕܸܢ ܪ̈ܲܚܡܹܐ ܥܲܠ ܕܗ̇ܘ ܕܡܲܚܘܼܒܹܐ ܝ݇ܘܸܢ؛ ܘܒܸܬ ܦܵܚܠܸܢ ܠܗ̇ܘ ܕܦܵܚܘܿܠܹܐ ܝ݇ܘܸܢ* ܗܲܕܟܼܵܐ ܠܹܐ ܝ݇ܠܵܗ̇ ܒܐܝܼܕܵܬܹ̈ܐ ܕܗ̇ܘ ܕܒܵܥܝܹܐ؛ ܘܠܵܐ ܒܐܝܼܕܵܬܹ̈ܐ ܕܗ̇ܘ ܕܪܵܚܸܛ؛ ܐܝܼܢܵܐ ܒܐܝܼܕܵܬܹ̈ܐ ܕܐܲܠܵܗܵܐ ܡܪܲܚܡܵܢܵܐ* ܣܵܒܵܒ ܐ݇ܡܸܪܹܗ ܓܵܘ ܟܬܵܒܼܵܐ ܩܵܐ ܦܸܪܥܘܿܢ. ܕܩܵܐ ܕܐܵܗܵܐ ܩܲܡ ܡܲܩܸܡܸܢܘܼܟܼ؛ ܕܡܲܚܙܸܢ ܒܝܘܼܟܼ ܚܲܝܠܝܼ ܕܦܵܐܸܫ ܡܘܼܟܪܸܙܵܐ ܫܸܡܝܼ ܓܵܘ ܟܠܵܗ̇ ܐܲܪܥܵܐ* ܒܲܣ ܥܲܠ ܕܗ̇ܘ ܕܒܵܣܡܵܠܹܗ ܒܸܬ ܥܵܒܼܸܕ ܪܲܚܡܹܐ. ܘܥܲܠ ܕܗ̇ܘ ܕܒܵܣܡܵܠܹܗ ܒܸܬ ܥܵܒܼܸܕ ܩܸܫܝܘܼܬܵܐ* ܘܒܲܠܟܵܐ ܒܸܬ ܐܵܡܪܸܬ؛ ܒܲܣ ܩܵܡܘܿܕܝܼ ܒܸܩܒܼܵܠܵܐ ܝ݇ܠܹܗ؟ ܣܵܒܵܒ ܡܵܢܝܼ ܐܝܼܬ ܕܡܵܨܹܐ ܟܵܠܹܐ ܕܲܪܩܘܼܒܼܠ ܕܪܸܙܵܝܹܗ* ܘܐܲܢ݇ܬ ܡܵܢܝܼ ܝ݇ܘܸܬ ܝܵܐ ܒܲܪܢܵܫܵܐ ܕܓ̰ܘܼܘܵܒ ܩܵܐ ܐܲܠܵܗܵܐ ܒܝܼܵܗܒܼܵܐ ܝ݇ܘܸܬ. ܩܵܡܘܿ ܒܸܬ ܐܵܡܪܵܐ ܓܒܼܝܼܠܬܵܐ ܩܵܐ ܕܗ̇ܘ ܕܓܒܼܝܼܠܵܐ ܠܹܗ؛ ܩܵܡܘܿ ܗܲܕܟܼܵܐ ܩܲܡ ܓܲܒܼܠܸܬ ܠܝܼ* ܝܲܢ ܠܲܝܬ ܠܹܗ ܗܲܩ ܦܲܚܵܪܵܐ ܥܲܠ ܛܝܼܢܹܗ؛ ܕܗܲܪ ܡ̣ܢ ܕܗ̇ܝ ܓܒܼܝܼܠܬܵܐ ܒܸܬ ܬܵܪܸܨ ܡܵܐܢܹ̈ܐ ܚܲܕ݇ ܠܐܝܼܩܵܪܵܐ ܘܚܲܕ݇ ܠܡܲܣܠܵܝܬܵܐ* ܐܝܼܢܵܐ ܐܸܢ ܐܲܠܵܗܵܐ ܒܵܣܡܵܐ ܠܹܗ ܕܡܲܚܙܹܐ ܟܲܪܒܹܗ ܘܡܲܕܸܥ ܚܲܝܠܹܗ. ܒܸܬ ܡܲܝܬܹܐ ܒܪܵܒܵܐ ܡܲܪܝܲܟܼܬܵܐ ܕܒܹܐܢܹܗ؛ ܟܲܪܒܵܐ ܥܲܠ ܡܵܐܢܹ̈ܐ ܕܟܲܪܒܵܐ ܕܝܼܢܵܐ ܚܫܝܼܚܹܐ ܩܵܐ ܬܠܵܩܵܐ* ܘܡܲܫܦܸܚ ܪܲܚܡܘܼܗܝ ܥܲܠ ܡܵܐܢܹ̈ܐ ܕܪ̈ܲܚܡܹܐ ܕܗܘܼܕܪܹܐ ܗ݇ܘ̣ܵܘ ܩܵܐ ܬܸܫܒܘܿܚܬܵܐ ܕܐܲܠܵܗܵܐ* ܕܝܼܘܲܚ ܐܲܚܢܲܢ ܟ̰ܝܼܕܹ̈ܐ. ܠܵܐ ܐܲܚܟ̰ܝܼ ܡ̣ܢ ܝܗܘܼܕܵܝܹ̈ܐ ܐܝܼܢܵܐ ܐܘܼܦ ܡ̣ܢ ܛܵܝܸܦܹ̈ܐ* ܕܵܐܟܼܝܼ ܕܐܘܼܦ ܓܵܘ ܟܬܵܒܼܵܐ ܕܗܘܿܫܲܥ ܐ݇ܡܸܪܹܗ؛ ܒܸܬ ܩܵܪܸܢ ܠܐܵܢܝܼ ܕܠܹܐ ܗ݇ܘ̣ܵܘ ܛܵܝܸܦܝܼ؛ ܛܵܝܸܦܵܐ ܕܝܼܝܼ. ܘܠܠܵܐ ܡܘܼܚܸܒܬܵܐ ܒܸܬ ܩܵܪܸܢ ܡܘܼܚܸܒܬܵܐ ܘܒܸܬ ܗܵܘܝܵܐ ܒܗ̇ܝ ܕܘܼܟܬܵܐ ܐܲܝܟܵܐ ܕܦܵܝܫܝܼ ܗ݇ܘ̣ܵܘ ܩܸܪܝܹܐ ܠܵܐ ܛܵܝܸܦܝܼ؛ ܬܵܡܵܐ ܒܸܬ ܦܵܝܫܝܼ ܩܸܪܝܹܐ ܒܢܘܼܢܹ̈ܐ ܕܐܲܠܵܗܵܐ ܚܲܝܵܐ* ܐܝܼܢܵܐ ܐܸܫܲܥܝܵܐ ܢܒܼܝܼܵܐ ܡܘܼܟܪܸܙܠܹܗ ܥܲܠ ܒܢܲܝ̈ ܝܼܣܪܵܝܹܠ ܘܐ݇ܡܸܪܹܗ؛ ܕܐܸܢ ܗܵܘܹܐ ܡܸܢܝܵܢܵܐ ܕܒܢܲܝ̈ ܝܼܣܪܵܝܹܠ ܐܲܝܟܼ ܣܹܠܵܐ ܕܓܵܘ ܝܵܡܵܐ؛ ܣܵܡܵܐ ܦܝܼܫܵܐ ܕܡܸܢܲܝܗܝ ܒܸܬ ܚܵܝܹܐ* ܚܲܒܪܵܐ ܩܸܛܥܝܵܐ ܘܦܣܝܼܩܵܐ ܘܒܸܬ ܥܵܒܼܸܕ ܠܹܗ ܡܵܪܝܵܐ ܥܲܠ ܐܲܪܥܵܐ* ܘܗܲܪ ܐܲܝܟܼ ܕܡ̣ܢ ܩܵܕ݇ܡܵܝܬܵܐ ܐ݇ܡܸܪܹܗ ܐܸܫܲܥܝܵܐ ܒܓܵܢܹܗ؛ ܕܐܸܢ ܠܵܐ ܡܵܪܝܵܐ ܨܒܼܵܐܘܼܬ ܗܵܘܹܐ ܗ݇ܘ̣ܵܐ ܫܒܼܝܼܩܵܐ ܩܵܬܲܢ ܙܲܪܥܵܐ؛ ܐܲܝܟܼ ܣܕܘܿܡ ܒܸܬ ܗܵܘܲܚ ܗ݇ܘܵܘ ܘܠܥܵܡܘܿܪܵܐ ܒܸܬ ܦܵܝܫܲܚ ܗ݇ܘ̣ܵܘ ܡܘܼܕܡܝܼـܹܐ* ܒܲܣ ܡܘܼܕܝܼ ܐܵܡܪܲܚ؛ ܕܛܵܝܸܦܹ̈ܐ ܕܠܹܐ ܗ݇ܘ̣ܵܘ ܒܸܪܚܵܛܵܐ ܒܵܬ̄ܪ ܟܹܐܢܘܼܬܵܐ ܡܛܸܐܠܗ݇ܘܿܢ ܠܟܹܐܢܘܼܬܵܐ؛ ܐܝܼܢܵܐ ܟܹܐܢܘܼܬܵܐ ܗ̇ܝ ܕܡ̣ܢ ܗܲܝܡܵܢܘܼܬܵܐ ܝ݇ܠܵܗ̇* ܐܝܼܢܵܐ ܝܼܣܪܵܝܹܠ ܕܒܸܪܚܵܛܵܐ ܝܗ݇ܘ̣ܵܐ ܒܵܬ݇ܪ ܫܲܪܥܲܬ ܕܟܹܐܢܘܼܬܵܐ؛ ܠܫܲܪܥܲܬ ܕܟܹܐܢܘܼܬܵܐ ܠܵܐ ܡܛܸܐܠܹܗ* ܩܵܡܘܿܕܝܼ ܣܵܒܵܒ ܕܠܹܐ ܗ݇ܘ̣ܵܐ ܡ̣ܢ ܗܲܝܡܵܢܘܼܬܵܐ؛ ܐܸܠܵܐ ܡ̣ܢ ܦܘܼܠܚܵܢܹ̈ܐ ܕܫܲܪܥܲܬ ܣܵܒܵܒ ܦܸܫܠܗ݇ܘܿܢ ܬܘܼܪܩܸܠܹܐ ܒܟܹܐܦܵܐ ܕܬܲܪܩܲܠܬܵܐ* ܐܲܝܟܼ ܕܝܼܠܹܗ ܟܬܝܼܒܼܵܐ؛ ܕܗܵܐ ܡܲܬܘܼܒܹܐ ܝ݇ܘܸܢ ܒܨܹܗܝܘܿܢ ܟܹܐܦܵܐ ܕܬܲܪܩܲܠܬܵܐ ܘܟܹܐܦܵܐ ܕܟܦܘܼܪܝܵܐ. ܘܟܠ ܡ̇ܢ ܕܗܲܡܸܢ ܒܝܼܹܗ ܠܹܐ ܢܵܚܸܦ* ܐܵܚܘܿܢܘܵܬ̈ܝܼ؛ ܪܸܙܵܝܵܐ ܕܠܸܒܝܼ ܘܒܵܥܘܼܬܝܼ ܕܠܟܸܣ ܐܲܠܵܗܵܐ؛ ܡ̣ܢ ܓܹܒܵܐ ܕܝܼܣܪܵܝܹܠ ܝܼܠܵܗ̇ ܕܚܲܝܝܼ* ܣܵܒܵܒ ܒܝܼܵܗ݇ܒܼܵܐ ܝ݇ܘܸܢ ܣܵܗܕܘܼܬܵܐ ܒܘܼܬ ܕܝܼܲܝܗܝ ܕܩܲܝܪܲܬ ܕܐܲܠܵܗܵܐ ܐܝܼܬ ܒܝܼـܲܝܗܝ؛ ܐܝܼܢܵܐ ܠܵܐ ܒܝ݇ܕܵܥܝܬܵܐ* ܟܹܐܢܘܼܬܹܗ ܕܐܲܠܵܗܵܐ ܠܵܐ ܝ݇ܕܸܥܠܗ̇ܘܿܢ؛ ܐܸܠܵܐ ܒܥܹܐܠܗ݇ܘܿܢ ܕܡܲܩܸܡܝܼ ܟܹܐܢܘܼܬܵܐ ܕܓܵܢܲܝܗܝ؛ ܘܒܘܼܬ ܕܐܵܗܵܐ ܠܟܹܐܢܘܼܬܵܐ ܕܐܲܠܵܗܵܐ ܠܵܐ ܦܸܫܠܗ݇ܘܿܢ ܙܲܒܛ* ܣܵܒܵܒ ܚܘܼܬܵܡܵܐ ܕܫܲܪܥܲܬ ܡܫܝܼܚܵܐ ܝ݇ܠܹܗ ܠܟܹܐܢܘܼܬܵܐ؛ ܩܵܐ ܟܠ ܕܗܲܡܸܢ* ܣܵܒܵܒ ܡܘܼܫܹܐ ܗܲܕܟܼܵܐ ܟܬܸܒܼܠܹܗ ܒܘܼܬ ܟܹܐܢܘܼܬܵܐ ܕܒܫܲܪܥܲܬ. ܕܡ̇ܢ ܕܥܵܒܼܸܕ ܐܲܢܸܐ ܒܸܬ ܚܲܝܹܐ ܒܝܼܲܝܗܝ* ܐܝܼܢܵܐ ܟܹܐܢܘܼܬܵܐ ܕܓܵܘ ܗܲܝܡܵܢܘܼܬܵܐ ܗܲܕܟܼܵܐ ܟܹܐ ܐܵܡܪܵܐ. ܕܠܵܐ ܐܵܡܪܸܬ ܒܠܸܒܘܼܟܼ؛ ܡܵܢܝܼ ܐ݇ܣܸܩܠܹܗ ܠܫܡܲܝܵܐ ܘܡܘܼܨܠܹܐܠܹܗ ܠܡܫܝܼܚܵܐ. ܘܡܵܢܝܼ ܨܠܸܐܠܹܗ ܠܥܘܼܡܩܵܐ ܕܫܝܘܿܠ ܘܡܘܼܣܸܩܠܹܗ ܠܡܫܝܼܚܵܐ ܡ̣ܢ ܓܵܘ ܡܝܼܬܹ̈ܐ. ܐܸܠܵܐ ܡܘܼܕܝܼ ܐ݇ܡܸܪܹܗ؛ ܩܘܼܪܒܵܐ ܝ݇ܠܹܗ ܐܸܠܘܼܟܼ ܚܲܒܪܵܐ ܠܦܘܼܡܘܼܟܼ ܘܠܠܸܒܘܼܟܼ. ܘܐܵܗܵܐ ܝ݇ܠܵܗ̇ ܗܹܡܸܙܡܲܢ ܕܗܲܝܡܵܢܘܼܬܵܐ ܕܡܲܟܪܘܼܙܹܐ ܝ݇ܘܲܚ* ܘܐܸܢ ܡܵܘܕܸܬ ܒܦܘܼܡܘܼܟܼ ܒܡܵܪܲܢ ܝܼܫܘܿܥ ܘܗܲܡܸܢܸܬ ܒܠܸܒܘܼܟܼ ܕܐܲܠܵܗܵܐ ܡܘܼܩܸܡܠܹܗ ܡ̣ܢ ܓܵܘ ܡܝܼܬܹ̈ܐ؛ ܒܸܬ ܚܲܝܸܬ* ܣܵܒܵܒ ܠܸܒܵܐ ܕܗܲܡܸܢ ܒܝܼܹܗ ܒܸܬ ܦܵܐܸܫ ܡܘܼܟܫܸܛܵܐ ܘܦܘܼܡܵܐ ܕܡܵܘܕܹܐ ܒܝܼܹܗ ܒܸܬ ܚܲܝܹܐ* ܘܡܸܢ݇ܕܪܹܫ̄ ܐ݇ܡܸܪܹܗ ܟܬܵܒܼܵܐ ܕܟܠ ܕܗܲܡܸܢ ܒܝܼܹܗ ܠܹܐ ܢܵܚܸܦ* ܘܒܐܵܗܵܐ ܠܵܐ ܦܪܸܫܠܹܗ ܒܹܝܠ ܝܗܘܼܕܵܝܹ̈ܐ ܘܠܐܵܪ̈ܡܵܝܹܐ ܣܵܒܵܒ ܕܚܲܕ݇ ܝܼܠܹܗ ܡܵܪܝܵܐ ܕܟܠܲܝܗܝ؛ ܘܥܲܬܝܼܪܵܐ ܝ݇ܠܹܗ ܒܟܠ ܕܩܵܪܹܐ ܠܹܗ* ܣܵܒܵܒ ܕܟܠ ܕܩܵܪܹܐ ܫܸܡܹܗ ܕܡܵܪܝܵܐ ܒܸܬ ܚܲܝܹܐ* ܒܲܣ ܕܵܐܟܼܝܼ ܒܸܬ ܩܵܪܝܼ ܠܗ̇ܘ ܕܠܵܐ ܗܘܼܡܸܢܗ݇ܘܿܢ ܒܝܼܹܗ ܝܲܢ ܕܵܐܟܼܝܼ ܒܸܬ ܗܲܡܸܢܝܼ ܠܗ̇ܘ ܕܠܵܐ ܫܡܝܼܥܠܗ݇ܘܿܢ ܐܸܠܹܗ. ܝܲܢ ܕܵܐܟܼܝܼ ܒܸܬ ܫܵܡܥܝܼ ܕܠܵܐ ܡܲܟܪܸܙܵܢܵܐ* ܝܲܢ ܕܵܐܟܼܝܼ ܒܸܬ ܡܲܟܪܸܙܝܼ ܐܸܢ ܠܵܐ ܦܵܝܫܝܼ ܫܘܼܕܪܹܐ؛ ܐܲܝܟܼ ܕܝܼܠܹܗ ܟܬܝܼܒܼܵܐ. ܕܟܡܵܐ ܠܵܚܘܼܡܹ̈ܐ ܝ݇ܢܵܐ ܐܲܩܠܵܬܹ̈ܐ ܕܡܲܫܚܸܕܵܢܹ̈ܐ ܕܫܠܵܡܵܐ ܘܡܲܫܚܸܕܵܢܹ̈ܐ ܕܛܵܒܼܵܬܹ̈ܐ* ܐܝܼܢܵܐ ܟܠܲܝܗܝ ܠܵܐ ܡܘܼܨܝܸܬ ܠܗ݇ܘܿܢ ܠܡܲܫܚܲܕܬܵܐ ܕܐܹܘܲܢܓܵܠܝܼܘܿܢ. ܣܵܒܵܒ ܐܹܫܲܥܝܵܐ ܢܒܼܝܼܵܐ ܐ݇ܡܸܪܹܗ. ܝܵܐ ܡܵܪܝܼ ܡܵܢܝܼ ܗܘܼܡܸܢܹܗ ܠܒܪܲܬ݇ ܩܵܠܲܢ* ܒܲܣ ܗܲܝܡܵܢܘܼܬܵܐ ܡ̣ܢ ܫܡܵܥܝܬܵܐ ܕܢܵܬܵܐ ܝ݇ܠܵܗ̇؛ ܘܫܡܵܥܝܬܵܐ ܕܢܵܬܵܐ ܡ̣ܢ ܗܹܡܸܙܡܲܢ ܕܐܲܠܵܗܵܐ*
♱♱♱♱♱♱♱♱
ܡܬܝ ܘ: 1 ‐ 19
ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ ܟܪܘܙܘܬܼܐ ܕܡܬܝ
♰ ܐ݇ܡܸܪܹܗ ܝܑܼܫܘܿܥ ܠܬܲܠܡܝܼ̈ܕܘܼܗܝ: ܐܝܼܢܵܐ ܚܘܼܪܘܿܢ ܒܐܸܪܘܵܢܵܘܟܼܘܿܢ ܕܠܵܐ ܥܲܒܼܕܝܼܬܘܿܢ ܠܹܗ ܩܵܕ݇ܡ ܒܢܲܝ̈ܢܵܫܵܐ ܐܲܝܟܼ ܕܦܲܝܫܝܼܬܘܿܢ ܚܸܙܝܹܐ ܐܸܠܲܝܗܝ. ܘܐܸܢ ܠܵܐ، ܠܲܝܬܠܵܘܟܼܘܿܢ ܐܲܓܼܪܵܐ ܠܘܵܬ ܒܵܒܵܘܟܼܘܿܢ ܕܒܸܫܡܲܝܵܐ: ܗܲܕܟܼܵܐ ܐܝܼܡ̇ܢ ܕܐܲܢ݇ܬ ܒܸܥܒܼܵܕܵܐ ܝܘܸܬ ܐܸܪܘܵܢܵܐ: ܠܵܐ ܩܵܪܝܵܐ ܩܲܪܢܵܐ ܩܵܕ݇ܡܘܼܟܼ ܐܲܝܟܼ ܕܟܹܐ ܥܲܒܼܕܝܼ ܢܲܣܒܲܝ̈ ܒܐܲܦܹ̈ܐ ܓܵܘ ܟܢܘܼܫܝܵܬܹ̈ܐ ܘܓܵܘ ܫܘܼܩܹ̈ܐ ܐܲܝܟܼ ܕܦܲܝܫܝܼ ܚܩܝܼܪܹ̈ܐ ܡ̣ܢ ܒܢܲܝ̈ܢܵܫܵܐ. ܬܪܘܿܨܵܐ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ ܕܩܘܼܒܸܠܗ݇ܘܿܢ ܗܵܩܲܝܗܝ: ܐܝܼܢܵܐ ܐܲܢ݇ܬ ܐܝܼܡ̇ܢ ܕܒܸܥܒܼܵܕܵܐ ܝܘܸܬ ܐܸܪܘܵܢܵܐ، ܠܵܐ ܝܵܕܥܵܐ ܣܸܡܵܠܘܼܟܼ ܡܘܿܕܝܼ ܒܸܥܒܼܵܕܵܐ ܝܠܵܗ̇ ܝܲܡܝܼܢܘܼܟܼ: ܐܲܝܟܼ ܕܗܵܘܹܐ ܐܸܪܘܵܢܘܼܟܼ ܒܟܸܣܝܵܐ، ܘܒܵܒܘܼܟܼ ܕܚܵܙܹܐ ܒܟܸܣܝܵܐ ܗ̇ܘ ܒܸܬ ܦܵܪܸܥܠܘܼܟܼ ܒܓܸܠܝܵܐ: ܘܐܝܼܡܵܢ ܕܡܨܵܠܘܿܝܹܐ ܝܘܸܬ: ܠܵܐ ܗܵܘܸܬ ܐܲܝܟܼ ܢܲܣܒܲܝ̈ ܒܐܲܦܹ̈ܐ: ܕܟܹܐ ܡܲܚܸܒܝܼ ܠܸܟܠܵܝܵܐ ܓܵܘ ܟܢܘܼܫܝܵܬܹ̈ܐ ܘܒܩܘܼܢܓ̰ܝܼܵܬܹ̈ܐ ܕܫܘܼܩܹ̈ܐ ܠܸܡܨܵܠܘܿܝܹܐ، ܕܦܲܝܫܝܼ ܚܸܙܝܹܐ ܡ̣ܢ ܒܢܲܝ̈ܢܵܫܵܐ: ܘܬܪܘܿܨܵܐ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ ܕܩܘܼܒܸܠܗ݇ܘܿܢ ܗܵܩܲܝܗܝ: ܐܝܼܢܵܐ ܐܲܢ݇ܬ ܐܝܼܡܵܢ ܕܡܨܵܠܸܬ ܨܠܘܿܬܵܐ، ܥܒܼܘܿܪ ܠܬܵܘܵܢܘܼܟܼ ܘܥܟ̰ܘܿܡ ܬܲܪܥܘܼܟܼ ܘܨܵܠܝܼ ܠܒܵܒܘܼܟܼ ܒܟܸܣܝܵܐ ܘܒܵܒܘܼܟܼ ܕܚܵܙܹܐ ܒܟܸܣܝܵܐ ܒܸܬ ܦܵܪܸܥܠܘܼܟܼ ܒܓܸܠܝܵܐ: ܘܐܝܼܡܵܢ ܕܨܵܠܲܝܬܘܿܢ ܐܲܚܬܘܿܢ ܨܠܘܿܬܵܐ ܠܵܐ ܗܵܘܲܝܬܘܿܢ ܒܸܬܢܵܝܵܐ ܐܲܝܟ ܚܲܢܦܹ̈ܐ، ܣܵܒܵܒ ܟܹܐ ܚܲܫܒܼܝܼ ܕܒܡܲܡܠܠܵܐ ܪܵܒܵܐ ܒܸܬ ܦܲܝܫܝܼ ܫܸܡܥܝܹܐ: ܗܲܕܟܼܵܐ ܠܵܐ ܕܵܡܝܼܬܘܿܢ ܐܸܠܲܝܗܝ. ܣܵܒܵܒ ܒܵܒܵܘܟܼܘܿܢ ܝܵܕܸܥ ܡܘܼܕܝܼ ܠܵܙܸܡ ܝܠܹܗ ܐܸܠܵܘܟܼܘܿܢ ܗܵܠܵܐ ܠܵܐ ܛܠܝܼܒܹܐ ܡܸܢܹܗ: ܐܲܚܬܘܿܢ ܗܲܕܟܼܵܐ ܨܵܠܲܝܡܘܿܢ: ܒܵܒܵܢ ܕܒܲܫܡܲܝܵܐ: ܦܵܐܸܫ ܡܩܘܼܕܫܵܐ ܫܸܡܘܼܟܼ: ܐܲܬܝܵܐ ܡܲܠܟܘܼܬܘܼܟܼ: ܗܵܘܹܐ ܨܸܒܼܝܵܢܘܼܟܼ، ܕܲܐܟܼܝܼ ܕܒܸܫܡܲܝܵܐ ܐܵܦ ܒܐܲܪܥܵܐ: ܗܲܒَܼܠܲܢ ܠܲܚܡܵܐ ܕܣܘܼܢܩܵܢܲܢ ܐܸܕܝܘܿܡ ܝܵܘܡܵܐ: ܘܫܒܼܘܿܩܠܲܢ ܚܵܘܒܲܝ̈ܢ ܕܲܐܟܼܝܼ ܕܐܘܼܦ ܐܲܚܢܲܢ ܫܒܼܝܼܩܠܲܢ ܠܚܲܝܵܒܼܲܝ̈ܢ: ܘܠܵܐ ܡܲܥܒ̣ܸܪܸܬܠܲܢ ܠܓ̰ܘܼܪܵܒܵܐ، ܐܸܠܵܐ ܦܲܨܝܼܠܲܢ ܡ̣ܢ ܒܝܼܫܵܐ: ܣܵܒܵܒ ܕܕܝܼܠ݇ܘܼܟܼ ܝܼܠܵܗ̇ ܡܲܠܟܘܼܬܵܐ ܘܚܲܝܠܵܐ ܘܬܸܫܒܿܘܿܚܬܵܐ (ܠܥܵܠܲܡ ܥܵܠܡܝܼܢ ܐܵܡܹܝܢ). ܣܵܒܵܒ ܐܸܢ ܫܲܒܼܩܝܼܬܘܿܢ ܠܒܢܲܝ̈ܢܵܫܵܐ ܤܲܟܼ̈ܠܘܵܬܲܝܗܝ، ܐܵܦ ܒܵܒܵܘܟܼܘܿܢ ܕܒܸܫܡܲܝܵܐ ܒܸܬ ܫܵܒܼܸܩ ܐܸܠܵܘܟܼܘܿܢ. ܐܝܼܢܵܐ ܐܸܢ ܠܵܐ ܫܲܒܼܩܝܼܬܘܿܢ ܠܒܢܲܝ̈ܢܵܫܵܐ: ܐܵܦܠܵܐ ܒܵܒܵܘܟܼܘܿܢ ܒܸܬ ܫܵܒ̣ܸܩ ܐܸܠܵܘܟܼܘܿܢ ܤܲܟܼ̈ܠܘܵܬܵܘܟܼܘܿܢ. ܐܝܼܢܵܐ ܐܝܼܡܵܢ ܕܒܸܨܝܵܡܵܐ ܝܬܘܿܢ، ܠܵܐ ܗܵܘܲܝܬܘܿܢ ܦܫܝܼܡܹ̈ܐ ܐܲܝܟܼ ܢܲܣܒܲܝ̈ ܒܐܲܦܹ̈ܐ: ܣܵܒܵܒ ܟܹܐ ܡܲܚܪܸܒܼܝܼ ܦܲܪܨܘܿܦܲܝܗܝ ܐܲܝܟܼ ܕܦܲܝܫܝܼ ܚܸܙܝܹܐ ܠܒܢܲܝ̈ܢܵܫܵܐ ܕܨܝܼܡܹܐ ܝܢܵܐ: ܘܬܪܘܿܨܵܐ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ ܕܩܘܼܒܸܠܗ݇ܘܿܢ ܗܵܩܲܝܗܝ. ܐܝܼܢܵܐ ܐܲܢ݇ܬ ܐܝܼܡܵܢ ܕܨܵܝܡܸܬ، ܚܲܠܸܠ ܦܲܐܬܘܵܬ̈ܘܼܟܼ ܘܡܫܘܼܚ ܪܹܫܘܼܟܼ. ܐܲܝܟܼ ܕܠܵܐ ܦܲܝܫܸܬ ܚܸܙܝܵܐ ܠܒܢܲܝ̈ܢܵܫܵܐ ܕܨܝܼܡܵܐ ܝܘܸܬ. ܐܸܠܵܐ ܠܒܵܒܘܼܟܼ ܕܒܟܸܣܝܵܐ. ܘܒܵܒܘܼܟܼ ܕܚܵܙܹܐ ܒܟܸܣܝܵܐ ܗܵܘ ܒܸܬ ܦܵܪܸܥܠܘܟܼ:
♱♱♱♱♱♱♱♱