ܥܐܕܐ
ܩܕܝܫܐ ܕܓܠܝܢܗ ܕܡܪܢ
ܥܠ ܛܘܪ ܬܒܼܘܪ
ܡܲܦܩܵܢܵܐ ܝܛ؛ 1‐10 ܐܲܩܸܦ ܟ؛ 18‐22
ܬܸܒ̣ܘ ܘܲܫܠܵܘ ܡܲܦܩܵܢܵܐ ܣܸܦܪܵܐ ܬܪܲܝܵܢܵܐ ܕܐܘܿܪܵܝܬܵܐ
ܐܲܚܲܝ̈ ܒܲܪܸܟ̣ܡܵܪܝ܀
ܒܝܲܪܚܵܐ ܕܬܠܵܬܵܐ ܡ̣ܢ ܒܵܬ݇ܪ ܦܠܵܛܬܵܐ ܕܒܢܲܝ̈ ܝܼܣܪܵܝܹܠ ܡ̣ܢ ܡܸܨܪܹܝܢ. ܒܐܵܗܵܐ ܝܵܘܡܵܐ ܐ݇ܬܹܐܠܗ݇ܘܿܢ ܠܒܲܪܝܼܵܐ ܕܣܝܼܢ؛ ܡܘܼܛܥܸܢܗ݇ܘܿܢ ܡ̣ܢ ܪܦܝܼܕܝܼܢ؛ ܘܐ݇ܬܹܐܠܗ݇ܘܿܢ ܠܒܲܪܝܼܵܐ ܕܣܝܼܢܲܝ؛ ܘܫܪܹܐܠܗ݇ܘܿܢ ܓܵܘ ܒܲܪܝܼܵܐ؛ ܘܫܪܹܐܠܹܗ ܝܼܣܪܵܝܹܠ ܬܵܡܵܐ ܒܲܪܩܘܼܒ̣ܠ ܛܘܼܪܵܐ܀ ܘܡܘܼܫܹܐ ܐ݇ܣܸܠ݇ܩܠܹܗ ܠܟܸܣ ܐܲܠܵܗܵܐ؛ ܘܩܪܹܐܠܹܗ ܐܸܠܹܗ ܐܲܠܵܗܵܐ ܡ̣ܢ ܛܘܼܪܵܐ ܘܐ݇ܡܸܪܹܗ؛ ܗܵܕܟ̣ܵܐ ܐܵܡܪܸܬ̇ ܠܒܹܝܬ̣ ܝܲܥܩܘܿܒ̣ ܘܡܲܚܙܸܬ̇ ܠܒܢܲܝ̈ ܝܼܣܪܵܝܹܠ܀ ܐܲܚܬܘܿܢ ܚܙܹܐܠܵܘܟ̣ܘܿܢ ܡܸܢܕܝܼ ܕܥܒ̣ܸܕܠܝܼ ܠܡܸܨܪ̈ܵܝܹܐ؛ ܘܩܲܡ ܫܵܩܠܸܢܵܘܟ̣ܘܿܢ ܐܲܝܟܼ ܕܥܲܠ ܓܘܼܠܦܵܢܹ̈ܐ ܕܢܸܫܪܵܐ܀ ܘܩܲܡ ܡܲܝܬ݇ܝܸܢܵܘܟ̣ܘܿܢ ܠܟܸܣܠܝܼ܀ ܘܐܵܕܝܼܵܐ ܐܸܢ ܫܡܲܥܝܵܐ ܫܵܡܥܝܼܬܘܿܢ ܒܩܵܠܝܼ؛ ܘܢܵܛܪܝܼܬܘܿܢ ܩܵܘܠܝܼ؛ ܒܸܬ ܗܵܘܝܼܬܘܿܢ ܡܘܼܚܸܒܹ̈ܐ ܩܵܬܝܼ ܡ̣ܢ ܟܠܲܝܗܝ ܛܵܝܸܦܹ̈ܐ ܕܐܲܪܥܵܐ. ܣܵܒܵܒ ܕܝܼܝܼ ܝ݇ܠܵܗ̇ ܐܲܪܥܵܐ܀ ܘܐܲܚܬܘܿܢ ܒܸܬ ܗܵܘܝܼܬܘܿܢ ܐܸܠܝܼ ܡܲܠܟܘܼܬܵܐ؛ ܘܟܵܗܢܹ̈ܐ ܘܛܵܝܸܦܵܐ ܩܲܕܝܼܫܵܐ. ܐܲܢܹܐ ܚܲܒܪܹ̈ܐ ܐܵܡܪܸܬ̇ ܠܒܹܝܬ̣ ܝܼܣܪܵܝܹܠ܀ ܘܐ݇ܬܹܐܠܹܗ ܡܘܼܫܹܐ ܘܩܪܹܐܠܹܗ ܠܩܲܫܝܼܫܹ̈ܐ ܕܥܲܡܵܐ؛ ܘܐ݇ܡܸܪܹܗ ܩܵܕ݇ܡܲܝܗܝ ܟܠܲܝܗܝ ܐܲܢܹܐ ܚܲܒܪܹ̈ܐ ܕܦܘܼܩܸܕܠܹܗ ܡܵܪܝܵܐ܀ ܘܓ̰ܘܼܘܸܒܠܗ݇ܘܿܢ ܟܠܹܗ ܥܲܡܵܐ ܡܐܘܼܕܵܠܹܐ ܘܐ݇ܡܸܪܗ݇ܘܿܢ؛ ܟܠ ܡܸܢܕܝܼ ܕܐܵܡܸܪ ܡܵܪܝܵܐ ܒܸܬ ܥܵܒ̣ܕܲܚ. ܘܡܘܼܕܸܪܸܗ ܡܘܼܫܹܐ ܓ̰ܘܼܘܵܒܹܗ ܕܥܲܡܵܐ ܠܟܸܣ ܡܵܪܝܵܐ܀ ܘܐ݇ܡܸܪܹܗ ܡܵܪܝܵܐ ܠܡܘܼܫܹܐ. ܗܵܐ ܐܵܢܵܐ ܒܸܬ ܐܵܬܸܢ ܠܟܸܣܠܘܼܟܼ ܒܥܲܡܛܵܢܵܐ ܕܥܲܝܒ̣ܵܐ؛ ܩܵܐ ܕܫܵܡܥܝܼ ܥܲܡܵܐ ܐܝܼܡܲܢ ܕܗܲܡܙܘܼܡܹܐ ܝ݇ܘܸܢ ܥܲܡܘܼܟܼ؛ ܘܐܘܼܦ ܐܸܠܘܼܟܼ ܒܸܬ ܗܲܡܸܢܝܼ ܗܲܠ ܥܵܠܲܡ. ܘܡܘܼܕܸܥܠܹܗ ܡܘܼܫܹܐ ܚܲܒܪܹ̈ܐ ܕܥܲܡܵܐ ܩܵܕ݇ܡ ܡܵܪܝܵܐ܀ ܘܟܠܹܗ ܥܲܡܵܐ ܒܸܚܙܵܝܵܐ ܩܲܪ̈ܩܲܡܝܵܬܹܐ ܘܠܵܗܹ̈ܐ ܘܩܵܠܵܐ ܕܩܲܪ݇ܢܵܐ ܘܛܘܼܪܵܐ ܬܲܢܬܘܼܢܹܐ. ܘܚܙܹܐܠܗ݇ܘܿܢ ܥܲܡܵܐ ܘܙܕܝܼܥܠܗ݇ܘܿܢ ܘܟܠܹܐܠܗ݇ܘܿܢ ܡ̣ܢ ܪܸܚܩܵܐ܀ ܘܐ݇ܡܸܪܗ݇ܘܿܢ ܠܡܘܼܫܹܐ؛ ܐܲܢ݇ܬ̇ ܗܲܡܙܸܡ ܥܲܡܲܢ ܘܒܸܬ ܫܵܡܥܲܚ؛ ܘܠܵܐ ܗܲܡܙܸܡ ܥܲܡܲܢ ܐܲܠܵܗܵܐ ܕܠܵܐ ܡܵܝܬܲܚ܀ ܘܐ݇ܡܸܪܹܗ ܡܘܼܫܹܐ ܠܥܲܡܵܐ ܠܵܐ ܙܵܕܥܝܼܬܘܿܢ ܣܵܒܵܒ ܩܵܐ ܓ̰ܵܪܲܒܬܵܘܟ̣ܘܿܢ ܐ݇ܬܹܐܠܹܗ ܐܲܠܵܗܵܐ ܩܵܐ ܕܗܵܘܝܵܐ ܙܕܘܿܥܬܹܗ ܩܵܕ݇ܡ ܦܵܬܵܘܟ̣ܘܿܢ ܘܕܠܵܐ ܚܵܛܝܼܬܘܿܢ܀ ܘܟܠܹܐܠܗ݇ܘܿܢ ܥܲܡܵܐ ܡ̣ܢ ܪܸܚܩܵܐ ܘܡܘܼܫܹܐ ܩܘܼܪܒܸܢܹܗ ܠܟܸܣ ܥܢܵܢܵܐ ܕܝܼܗ݇ܘܵܐ ܬܵܡܵܐ ܐܲܠܵܗܵܐ܀
ܚܲܒ̣ܪܹܗ
ܐܹܫܲܥܝܵܐ ܘ؛ 1‐ܫܘܼܠܵܡܵܐ
ܬܸܒ̣ܘ ܘܲܫܠܵܘ ܢܒ̣ܝܼܘܼܬܹܗ ܕܐܹܫܲܥܝܵܐ؛ ܐܲܚܲܝ̈ ܒܲܪܸܟ̣ܡܵܪܝ܀
ܒܫܹܢ݇ܬܵܐ ܕܡܝܼܬܠܹܗ ܥܘܼܙܝܼܵܐ ܡܲܠܟܵܐ؛ ܚܙܹܐܠܝܼ ܠܡܵܪܝܵܐ ܝ݇ܬܝܼܒ̣ܵܐ ܥܲܠ ܚܲܕ݇ ܟܘܼܪܣܝܼ ܪܵܡܵܐ؛ ܘܫܸܦܘܼܠܵܠ̈ܘܼܗܝ ܡܸܠܝܵܐ ܗܲܝܟܠܹܗ܀ ܘܣܪ̈ܵܦܹܐ ܟܸܠܝܹܐ ܥܘܼܠܘܼܠ ܡܸܢܹܗ؛ ܟܠ ܚܲܕ݇ ܡܸܢܲܝܗܝ ܡܵܪܹܐ ܐܸܫܬܵܐ ܓܘܼܠܦܵܢܹ̈ܐ؛ ܒܬܪܹܝ ܡܟܵܣܘܼܝܹܐ ܦܲܪܨܘܿܦܹܗ ܘܒܬܪܹܝ ܡܟܵܣܘܼܝܹܐ ܐܲܩܠܹ̈ܗ؛ ܘܒܬܪܹܝܗ ܒܸܦܪܵܚܵܐ؛ ܘܒܸܩܪܵܝܵܐ ܐܵܗܵܐ ܠܐܵܗܵܐ؛ ܘܒܹܐܡܵܪܵܐ؛ ܩܲܕܝܼܫ؛ ܩܲܕܝܼܫ؛ ܩܲܕܝܼܫ؛ ܡܵܪܝܵܐ ܚܲܝܠܬܵܢܵܐ؛ ܕܡܠܝܼܬܵܐ ܝ݇ܠܵܗ̇ ܟܠܵܗ̇ ܐܲܪܥܵܐ ܬܸܫܒܘܿܚܝܵܬܹ̈ܗ؛ ܪܓܝܼܕܠܗ݇ܘܿܢ ܐ݇ܣܩܘܼܦܝܵܬܹ̈ܐ ܕܬܲܪ̈ܥܵܢܹܐ ܡ̣ܢ ܩܵܠܵܐ ܕܒܸܩܪܵܝܵܐ؛ ܘܒܲܝܬܵܐ ܦܸܫܠܹܗ ܡܸܠܝܵܐ ܬܸܢܢܵܐ܀ ܘܐ݇ܡܸܪܝܼ؛ ܘܵܝ ܐܸܠܝܼ ܕܬܠܝܼܩܵܐ ܝ݇ܘܸܢ. ܣܵܒܵܒ ܚܲܕ݇ ܛܲܡܵܐܐ ܕܣܸܦܘܵܬܹ̈ܐ ܝ݇ܘܸܢ؛ ܘܓܵܘ ܛܵܝܸܦܵܐ ܕܣܸܦܘܵܬܹ̈ܐ ܛܲܡ̈ܐܹܐ ܒܸܥܡܵܪܵܐ ܝ݇ܘܸܢ؛ ܘܠܡܲܠܟܵܐ ܡܵܪܝܵܐ ܚܲܝܠܬܵܢܵܐ ܚܙܹܐܠܗ݇ܘܿܢ ܥܲܝܢ̈ܝܼ܀ ܘܦܪܸܚܠܹܗ ܠܟܸܣܠܝܼ ܚܲܕ݇ ܡ̣ܢ ܣܪ̈ܵܦܹܐ؛ ܘܒܐܝܼܕܹܗ ܚܕܵܐ ܓܸܡܘܼܪܬܵܐ ܕܢܘܼܪܵܐ ܫܩܸܠܹܗ ܒܡܵܫܵܐ ܡ̣ܢ ܡܲܕܒܚܵܐ܀ ܘܡܘܼܩܪܸܒ̣ܠܹܗ ܠܦܘܼܡܝܼ؛ ܘܐ݇ܡܸܪܹܗ ܐܸܠܝܼ؛ ܗܵܐ ܩܘܼܪܒܸܢܵܗ̇ ܐܵܗܵܐ ܠܣܸܦܘܵܬ̈ܘܼܟܼ؛ ܘܥܵܒ̣ܸܪ ܥܵܘܠܘܼܟܼ ܘܦܵܝܫܝܼ ܦܘܼܚܠܹܐ ܚܛܝܼܵܬ̈ܘܼܟܼ܀ ܘܫܡܝܼܥܠܝܼ ܩܵܠܹܗ ܕܡܵܪܝܵܐ ܕܒܹܐܡܵܪܵܐ؛ ܠܡܵܢܝܼ ܫܲܕܪܸܢ؛ ܘܡܵܢܝܼ ܒܸܬ ܐܵܙܸܠ؟ ܘܐ݇ܡܸܪܝܼ ܗܵܐ ܐܵܢܵܐ ܫܲܕܸܪܝܼ܀ ܘܐ݇ܡܸܪܹܗ ܐܸܠܝܼ ܙܸܠ݇ ܐ݇ܡܘܿܪ ܠܐܵܗܵܐ ܛܵܝܸܦܵܐ؛ ܫܡܲܥܝܵܐ ܫܡܸܥܡܘܿܢ ܘܠܵܐ ܦܵܪܡܝܼܬܘܿܢ؛ ܘܚܙܵܝܵܐ ܚܚܙܹܐܡܘܿܢ ܘܠܵܐ ܝܵܕܥܝܼܬܘܿܢ܀ ܥܘܼܒܹܐܠܹܗ [ܡܘܼܩܫܹܐܠܹܗ] ܠܸܒܹܗ ܕܐܵܗܵܐ ܛܵܝܸܦܵܐ؛ ܘܢܵܬܝܵܬ̈ܘܼܗܝ ܝܘܼܩܪܸܢܗ݇ܘܿܢ؛ ܘܥܲܝܢ̈ܘܼܗܝ ܫܥܝܼܠܗ݇ܘܿܢ؛ ܕܠܵܐ ܚܵܙܹܐ ܒܥܲܝܢ̈ܘܼܗܝ ܘܫܵܡܸܥ ܒܢܵܬܝܵܬ̈ܘܼܗܝ܀ ܘܦܲܪܡܹܐ ܒܠܸܒܹܗ ܘܬܲܘܸܒ ܘܦܵܐܹܫ ܦܘܼܚܠܵܐ. ܘܐ݇ܡܸܪܝܼ؛ ܗܲܠ ܐܝܼܡܲܢ ܝܵܐ ܡܵܪܝܵܐ؟ ܘܐ݇ܡܸܪܹܗ ܗܲܠ ܕܚܵܪܒ̣ܝܼ ܡܵܬܘܵܬܹ̈ܐ ܡ̣ܢ ܕܠܲܝܬ̇ ܝܵܬܒ̣ܵܢܵܐ؛ ܘܒܵܬܹ̈ܐ ܡ̣ܢ ܕܠܲܝܬ̇ ܐ݇ܢܵܫܹ̈ܐ؛ ܘܐܲܪܥܵܐ ܒܸܬ ܚܵܪܒ̣ܵܐ ܘܗܵܘܝܵܐ ܒܲܝܵܪܵܐ [ܣܵܦܝܼܩܬܵܐ]؛ ܘܒܸܬ ܡܲܪܚܸܩ ܡܵܪܝܵܐ ܠܒܢܲܝ̈ܢܵܫܵܐ؛ ܘܒܸܬ ܙܵܝܕܵܐ ܫܒ̣ܝܼܩܘܼܬܵܐ ܒܓܵܘܵܗ̇ ܕܐܲܪܥܵܐ܀ ܘܒܸܬ ܦܵܝܫܝܼ ܓܵܘܵܗ̇ ܚܲܕ݇ ܡ̣ܢ ܥܸܣܪܵܐ؛ ܘܒܸܬ ܕܵܝܪܵܐ ܘܗܵܘܝܵܐ ܠܝܲܩܕܵܢܵܐ؛ ܐܲܝܟܼ ܐܝܼܠܵܢܵܐ ܕܒܸܛܡܵܐ ܘܐܲܝܟܼ ܒܲܠܘܼܛܵܐ ܕܢܦܸܠܹܗ ܡ̣ܢ ܥܸܩܪܹܗ؛ ܙܲܪܥܵܐ ܩܲܕܝܼܫܵܐ ܝ݇ܠܹܗ ܫܸܬܠܹܗ܀
♱♱♱♱♱♱♱♱
ܥܐܕܐ ܕܓܠܝܢܗ ܕܡܪܢ
ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ
ܕܲܠܘܵܬܼ ܥܸܒܼܪ̈ܵܝܹܐ ܐܲܚܲܝ̈ ܒܲܪܸܟܼܡܵܪܝ܀
ܣܵܒܵܒ ܠܵܐ ܩܘܼܪܒܸܢܵܘܟܼܘܿܢ ܠܢܘܼܪܵܐ ܝܲܩܕܵܢܬܵܐ ܘܓܘܼܫܡܵܢܵܝܬܵܐ؛ ܘܐܘܼܦ ܠܵܐ ܠܚܸܫܟܵܐ ܘܠܡܝܼܫ ܘܠܦܸܪܬܘܿܢܵܐ* ܘܠܵܐ ܠܩܵܠܵܐ ܕܩܵܪ݇ܢܵܐ ܘܠܩܵܠܵܐ ܕܗܹܡܸܙܡܵܢܹ̈ܐ ܗ̇ܘ؛ ܕܐܵܢܝܼ ܕܫܡܸܥܠܗ݇ܘܿܢ ܘܛܠܸܒܠܗ݇ܘܿܢ ܕܠܵܐ ܡܸܢ݇ܕܪܹܫ̄ ܗܲܡܙܸܡ ܥܲܡܲܝܗܝ* ܣܵܒܵܒ ܕܠܹܐ ܡܵܨܝܼ ܗ݇ܘ̣ܵܘ ܠܩܵܒܘܿܠܹܐ ܡܸܢܕܝܼ ܕܦܸܫܠܗ݇ܘܿܢ ܦܘܼܩܕܹܐ؛ ܕܐܘܼܦ ܗܲܝܘܵܢ ܐܸܢ ܩܲܪܒܸܢܵܐ ܠܛܘܼܪܵܐ ܒܸܬ ܦܵܝܫܵܐ ܪܓ̰ܝܼܡܬܵܐ. ܗܲܕܟܼܵܐ ܡܲܙܕܸܥܝܵܢܵܐ ܗ݇ܘ̣ܵܐ ܚܸܙܘܵܐ. ܕܡܘܼܫܹܐ ܐ݇ܡܸܪܹܗ؛ ܕܒܸܙܕܲܥܝܵܐ ܝ݇ܘܸܢ ܘܪܲܬܪܘܼܬܹܐ* ܐܝܼܢܵܐ ܐܲܚܬܘܿܢ ܩܘܼܪܒܸܢܵܘܟܼܘܿܢ ܠܛܘܼܪܵܐ ܕܨܸܗܝܘܿܢ ܘܠܡܕܝܼܢ݇ܬܵܐ ܕܐܲܠܵܗܵܐ ܚܲܝܵܐ. ܠܐܘܿܪܸܫܠܸܡ ܕܓܵܘ ܫܡܲܝܵܐ ܘܠܟܸܢܫܹ̈ܐ ܕܪܸܒܘܵܬܹ̈ܐ ܕܡܲܠܲܟܹ̈ܐ* ܘܠܥܹܕܬܵܐ ܕܒܘܼܟܼܪܹ̈ܐ ܕܦܝܵܫܵܐ ܝ݇ܢܵܐ ܟܬܝܼܒܹܐ ܓܵܘ ܫܡܲܝܵܐ. ܘܠܐܲܠܵܗܵܐ ܕܲܝܵܢܵܐ ܕܟܠ؛ ܘܠܪ̈ܘܼܚܵܬܹܐ ܕܟܹܐܢܹ̈ܐ ܕܦܸܫܠܗ݇ܘܿܢ ܬܘܼܓ̰ܸܢܹܐ* ܘܠܝܼܫܘܿܥ ܡܸܨܥܵܝܵܐ ܕܕܝܵܬܹܩܹܐ ܚܲܕܬܵܐ. ܘܠܡܲܪܝܲܣܬܵܐ ܕܕܸܡܹܗ ܕܗܲܡܙܘܼܡܹܐ ܝ݇ܠܹܗ ܒܘܼܫ ܨܦܵܝ ܡ̣ܢ ܕܗ̇ܘ ܕܗܵܒܹܝܠ* ܒܲܣ ܗܘܹܐܡܘܿܢ ܗܸܫܝܲܪ ܕܠܵܐ ܪܵܚܩܝܼܬܘܿܢ ܡ̣ܢ ܡ̇ܢ ܕܗܘܼܡܙܸܡܠܹܗ ܥܲܡܘܟܼܘܿܢ. ܣܵܒܵܒ ܐܸܢ ܐܵܢܝܼ ܠܵܐ ܦܸܫܠܗ݇ܘܿܢ ܦܘܼܨܝܸܐ ܘܪܚܸܩܠܗ݇ܘܿܢ ܡ̣ܢ ܕܗ̇ܘ ܕܗܘܼܡܙܸܡܠܹܗ ܥܲܡܲܝܗܝ ܒܐܲܪܥܵܐ. ܟܡܵܐ ܒܘܼܫ ܙܵܘܕܵܐ ܐܲܚܢܲܢ ܐܸܢ ܪܵܚܩܲܚ ܡ̣ܢ ܕܗ̇ܘ ܕܗܘܼܡܙܸܡܠܹܗ ܥܲܡܲܢ ܡ̣ܢ ܫܡܲܝܵܐ* ܐܲܝܢܝܼ ܕܩܵܠܹܗ ܠܐܲܪܥܵܐ ܡܘܼܫܥܸܫܠܹܗ. ܐܝܼܢܵܐ ܐܵܕܝܼܵܐ ܩܘܼܘܸܠܹܗ ܘܐ݇ܡܸܪܹܗ ܕܡܸܢ݇ܕܪܹܫ̄ ܚܕܵܐ ܓܵܗܵܐ ܐܵܢܵܐ ܒܸܬ ܡܲܫܥܸܫܸܢ ܠܵܐ ܐܲܚܟ̰ܝܼ ܐܲܪܥܵܐ؛ ܐܝܼܢܵܐ ܐܘܼܦ ܫܡܲܝܵܐ* ܐܝܼܢܵܐ ܐܵܗܵܐ ܕܐ݇ܡܸܪܹܗ ܚܕܵܐ ܓܵܗܵܐ ܡܲܚܙܘܼܝܸܐ ܝ݇ܠܹܗ ܫܘܼܚܠܵܦܵܐ ܕܐܵܢܝܼ ܕܦܵܝܫܝܼ ܡܘܼܫܥܸܫܹܐ* ܗܲܕܟܼܵܐ؛ ܡ̣ܢ ܣܵܒܵܒ ܕܩܘܼܒܸܠܲܢ ܡܲܠܟܘܼܬܵܐ ܕܠܵܐ ܦܵܝܫܵܐ ܡܘܼܫܥܸܫܬܵܐ. ܠܵܙܸܡ ܕܵܒܼܩܲܚ ܫܵܦܵܩܲܬ ܕܒܝܼܵܗ̇ ܥܵܒܼܕܲܚ ܚܸܠܡܲܬ ܘܫܵܦܪܲܚ ܠܐܲܠܵܗܵܐ ܒܐܵܕܵܒܘܼܬܵܐ ܘܒܙܕܘܼܥܬܵܐ* ܣܵܒܵܒ ܐܲܠܵܗܲܢ ܢܘܼܪܵܐ ܝ݇ܠܹܗ ܐܵܟܼܠܵܢܬܵܐ*
♱♱♱♱♱♱♱♱
ܥܐܕܐ ܕܓܠܝܢܗ ܕܡܪܢ
ܕܥܠ ܛܘܪ ܬܒܼܘܪ
ܡܬܝ ܝܘ: 24 ‐ ܝܙ: 10
ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ ܟܪܘܙܘܬܼܐ ܕܡܬܝ
♰ ܘܐ݇ܡܸܪܹܗ ܝܑܼܫܘܿܥ ܠܬܲܠܡܝܼ̈ܕܘܼܗܝ: ܡ̇ܢ ܕܒܲܣܡܵܐ ܠܹܗ ܕܐܵܬܹܐ ܒܵܬ݇ܪܝܼ ܟܵܦܸܪ ܒܓܵܢܹܗ ܘܫܵܩܸܠ ܙܩܝܼܦܹܗ ܘܐܵܬܹܐ ܒܵܬ݇ܪܝܼ : ܣܵܒܵܒ ܡ̇ܢ ܕܒܲܣܡܵܐ ܠܹܗ ܕܡܲܚܹܐ ܓܵܢܹܗ ܒܸܬ ܛܵܠܸܩܠܵܗ̇: ܘܡ̇ܢ ܕܛܵܠܸܩ ܓܵܢܹܗ ܒܣܵܒܵܒ ܕܝܼܠ݇ܝܼ ܒܸܬ ܡܵܫ݇ܟ̰ܸܚܠܵܗ̇: ܣܵܒܵܒ ܡܘܼܕܝܼ ܒܸܬ ܩܵܢܹܐ ܒܲܪܢܵܫܵܐ ܐܸܢ ܟܠܹܗ ܥܵܠܡܵܐ ܩܵܢܹܐ ܠܹܗ ܘܓܵܢܹܗ ܚܵܣܸܪ؟ ܝܲܢ ܡܘܿܕܝܼ ܒܸܬ ܝܲܗ݇ܒܼܸܠ ܒܲܪܢܵܫܵܐ ܡܒܵܕܵܠ ܕܓܵܢܹܗ؟ ܣܵܒܵܒ ܗܕܝܼܪܵܐ ܝܠܹܗ ܒܪܘܿܢܹܗ ܕܐ݇ܢܵܫܵܐ ܕܐܵܬܹܐ ܒܬܸܫܒܘܿܚܬܵܐ ܕܒܵܒܘܼܗܝ ܥܲܡ ܡܲܠܲܐܟܼܘܼ̈ܗܝ ܩܲܕܝܼܫܹ̈ܐ. ܘܗܿܝܓܵܗ̇ ܒܸܬ ܦܵܪܸܥ ܠܐ݇ܢܵܫܵܐ ܐ݇ܢܵܫܵܐ ܐܲܝܟܼ ܦܸܠܚܵܢܘܼܗܝ: ܬܪܘܿܨܵܐ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ. ܕܐܝܼܬ ܐ݇ܢܵܫܹ̈ܐ ܕܟܸܠܝܹܐ ܝܢܵܐ ܠܲܐܟܼܵܐ ܕܠܹܐ ܛܵܥܡܝܼ ܡܵܘܬܵܐ ܗܲܠ ܕܚܵܙܝܼ ܠܒܪܘܿܢܹܗ ܕܐ݇ܢܵܫܵܐ ܕܒܹܐܬܵܝܵܐ ܒܡܲܠܟܘܼܬܹܗ. ܘܡ̣ܢ ܒܵܬ݇ܪ ܫܬܵܐ ܝܵܘܡܵܢܹ̈ܐ ܠܘܼܒܸܠܹܗ ܝܑܼܫܘܿܥ ܠܟܹܐܦܵܐ ܘܠܝܲܥܩܘܿܒܼ ܘܠܝܘܿܚܲܢܵܢ ܐܲܚܘܿܢܹܗ: ܘܡܘܼܣܩܝܼܠܹܗ ܠܛܘܼܪܵܐ ܪܵܡܵܐ ܒܢܲܦ̮ܫܲܝܗܝ: ܘܦܸܫܠܹܗ ܫܘܼܚܠܸܦܵܐ ܝܑܼܫܘܿܥ ܩܵܕ݇ܡܵܝܗܝ: ܘܒܘܼܗܪܸܢܹܗ ܦܲܪܨܘܿܦܹܗ ܐܲܝܟܼ ܫܸܡܫܵܐ: ܐܝܼܢܵܐ ܓ̰ܘܼܠܘܼ̈ܗܝ ܚܘܸܪܗ݇ܘܿܢ ܐܲܝܟܼ ܢܘܼܗܪܵܐ: ܘܦܸܫܠܗ݇ܘܿܢ ܚܸܙܝܹܐ ܐܸܠܲܝܗܝ ܡܘܼܫܹܐ ܘܐܹܠܝܼܵܐ ܟܲܕ ܡܗܲܡܙܘܼܡܹܐ ܥܲܡܹܗ: ܐܝܼܢܵܐ ܓ̰ܘܼܘܸܒܠܹܗ ܟܹܐܦܵܐ ܘܐ݇ܡܸܪܹܗ ܠܝܼܫܘܿܥ: ܡܵܪܝܼ: ܨܦܵܝܝܼ ܝܠܵܗ̇ ܐܸܠܲܢ ܕܠܲܐܟܼܵܐ ܗܵܘܵܚ: ܘܐܸܢ ܐܲܢ݇ܬ ܒܵܥܸܬ ܒܸܬ ܥܲܒܼܕܵܚ ܠܲܐܟܼܵܐ ܬܠܵܬ ܡܛܲܠܠܹ̈ܐ: ܚܕܵܐ ܐܸܠܘܼܟܼ ܘܚܕܵܐ ܠܡܘܼܫܹܐ ܘܚܕܵܐ ܠܐܹܠܝܼܵܐ: ܘܗܵܠܵܐ ܗ̇ܘ ܡܗܲܡܙܘܼܡܹܐ: ܗܵܐ ܥܢܵܢܵܐ ܢܲܗܝܼܪܬܵܐ ܥܒܼܝܼܕܠܵܗ̇ ܛܸܠܵܢܝܼܬܵܐ ܥܲܠܲܝܗܝ: ܘܩܵܠܵܐ ܗ݇ܘܹܐ ܠܹܗ ܡ̣ܢ ܥܢܵܢܵܐ ܕܒܹܐܡܵܪܵܐ: ܐܵܗܵܐ ܝܼܠܹܗ ܒܪܘܿܢܝܼ ܚܲܒܝܼܒܼܵܐ ܕܒܝܼܹܗ ܒܣܸܡܠܵܐ ܠܝܼ، ܐܸܠܹܗ ܫܡܸܥܡܘܿܢ: ܘܟܲܕ ܫܡܸܥܠܗ݇ܘܿܢ ܬܲܠܡܝܼܕܹ̈ܐ ܢܦܸܠܗ݇ܘܿܢ ܥܲܠ ܦܲܐܬܘܵܬܲܝ̈ܗܝ. ܘܙܕܸܥܠܗ݇ܘܿܢ ܪܵܒܵܐ: ܘܩܘܼܪܒܸܢܹܗ ܠܘܵܬܲܝܗܝ ܝܑܼܫܘܿܥ ܘܕܩܸܪܹܗ ܒܝܼܵܝܗܝ ܘܐ݇ܡܸܪܹܗ: ܩܘܼܡܘܿܢ ܠܵܐ ܙܲܕܥܝܼܬܘܿܢ: ܘܡܘܼܪܸܡܠܗ݇ܘܿܢ ܥܲܝܢܲܝ̈ܗܝ. ܘܠܐ݇ܢܵܫܵܐ ܠܵܐ ܚܙܹܐ ܠܗ݇ܘܿܢ ܐܸܠܵܐ ܐܸܢ ܠܝܼܫܘܿܥ ܠܚܘܼܕܹܗ: ܘܟܲܕ ܒܸܨܠܵܝܵܐ ܡ̣ܢ ܛܘܼܪܵܐ ܦܩܝܼܕܵܝܠܹܗ ܝܑܼܫܘܿܥ ܘܐ݇ܡܸܪܹܗ ܐܸܠܲܝܗܝ: ܩܵܐ ܗܝܼܟ̰ ܐ݇ܢܵܫܵܐ ܠܵܐ ܐܲܡܪܝܼܬܘܿܢ ܐܵܗܵܐ ܚܸܙܘܵܐ. ܗܲܠ ܕܩܵܐܸܡ ܒܪܘܿܢܹܗ ܕܐ݇ܢܵܫܵܐ ܡ̣ܢ ܡܝܼܬܹ̈ܐ.
♱♱♱♱♱♱♱♱