ܚܲܡܫܵܒܫܲܒܵܐ ܕܒܵܥܘܼܬ̣ܵܐ ܕܢܝܼܢܘܵܝܹ̈ܐ

 

ܐܹܫܲܥܝܵܐ ܣܗ؛ 16‐ܣܘ؛ 3

ܬܸܒ̣ܘ ܘܲܫܠܵܘ ܢܒ̣ܝܼܘܼܬܹܗ ܕܐܹܫܲܥܝܵܐ؛ ܐܲܚܲܝ̈ ܒܲܪܸܟ̣ܡܵܪܝ܀

 

   ܗܵܕܟ̣ܵܐ ܒܹܐܡܵܪܵܐ ܝ݇ܠܹܗ ܡܵܪܝܵܐ؛ ܗ̇ܘ ܕܦܵܐܹܫ ܒܘܼܪܟ̣ܵܐ ܒܐܲܪܥܵܐ؛ ܦܝܵܫܵܐ ܝ݇ܠܹܗ ܒܘܼܪܟ̣ܵܐ ܒܐܲܠܵܗܵܐ ܐܵܡܹܝܢ؛ ܣܵܒܵܒ ܥܸܩܘܼܘܹ̈ܐ ܩܵܕ݇ܡܵܝܹ̈ܐ ܒܸܬ ܦܵܝܫܝܼ ܡܘܼܢܫܝܼܹܐ ܘܦܵܝܫܝܼ ܡܘܼܟܣܹܐ ܡ̣ܢ ܩܵܕ݇ܡܝܼ. ܗܵܐ ܐܵܢܵܐ ܒܸܒܪܵܝܵܐ ܝ݇ܘܸܢ ܫܡܲܝܵܐ ܚܲܕܬܵܐ ܘܐܲܪܥܵܐ ܚܲܕܬܵܐ؛ ܘܡܸܢܕܝܼܵܢܹ̈ܐ ܩܵܕ݇ܡܵܝܹ̈ܐ ܠܹܐ ܦܵܝܫܝܼ ܕܟ̣ܝܼܪܹ̈ܐ؛ ܘܠܹܐ ܐܲܣܩܝܼ ܥܲܠ ܠܸܒܵܐ؛ ܐܸܠܵܐ ܒܸܬ ܚܵܕܝܼ ܘܦܵܨܚܝܼ ܠܥܵܠܲܡ ܥܵܠܡܝܼܢ ܕܒܸܒܪܵܝܵܐ ܝ݇ܘܸܢ. ܣܵܒܵܒ ܕܗܵܐ ܒܸܬ ܒܵܪܸܢ ܠܐܘܿܪܸܫܠܸܡ ܚܲܕܘܼܬܵܐ؛ ܘܒܝܼܵܗ̇ ܒܸܬ ܚܵܕܸܢ.܀ ܘܒܸܬ ܚܵܕܸܢ ܒܐܘܿܪܸܫܠܹܡ ܘܦܵܨܚܸܢ ܒܛܵܝܸܦܝܼ؛ ܘܡܸܕܪܹܐ ܠܹܐ ܦܵܐܹܫ ܫܸܡܥܝܵܐ ܓܵܘܵܗ̇ ܩܵܠܵܐ ܕܒܸܟ̣ܝܵܐ؛ ܘܩܵܠܵܐ ܕܘܲܠܘܲܬܵܐ؛ ܘܡܸܕܪܹܐ ܠܹܐ ܗܵܘܹܐ ܬܵܡܵܐ ܙܥܘܿܪܵܐ ܕܝܵܘܡܵܢܹ̈ܐ؛ ܘܣܵܒ̣ܵܐ ܕܠܵܐ ܡܬܲܡܸܡ ܝܵܘܡܵܬܹ̈ܗ. ܣܵܒܵܒ ܕܝܵܠܵܕ݇ܐ ܒܲܪ ܐܸܡܵܐܐ ܫܸܢܹ̈ܐ ܒܸܬ ܡܵܐܹܬ؛ ܘܗ̇ܘ ܕܚܵܛܹܐ ܒܲܪ ܐܸܡܵܐܐ ܫܸܢܹ̈ܐ ܒܸܬ ܦܵܐܹܫ ܠܝܼܛܵܐ؛ ܘܒܸܬ ܒܵܢܝܼ ܒܵܬܹ̈ܐ ܘܒܸܬ ܝܵܬܒ̣ܝܼ؛ ܘܢܵܨܒ̣ܝܼ ܟܲܪ̈ܡܵܢܹܐ ܘܐܵܟ̣ܠܝܼ ܛܥܘܼܢܝܵܬܲܝ̈ܗ‌ܝ.܀ ܠܹܐ ܒܵܢܝܼ ܘܐ݇ܚܹܪ̈݇ܢܹܐ ܝܵܬܒ̣ܝܼ؛ ܘܠܹܐ ܢܵܨܒ̣ܝܼ ܘܐ݇ܚܹܪ̈݇ܢܹܐ ܐܵܟ̣ܠܝܼ؛ ܣܵܒܵܒ ܕܝܵܘܡܵܢܹ̈ܐ ܕܛܵܝܸܦܝܼ ܐܲܝܟܼ ܝܵܘܡܵܢܹ̈ܐ ܕܐܝܼܠܵܢܹ̈ܐ ܝ݇ܢܵܐ؛ ܘܦܘܼܠܚܵܢܵܐ ܕܐܝܼܕ̈ܵܬܲܝܗ‌ܝ ܒܸܬ ܐܵܟ̣ܠܝܼ ܓܘܼܒܝܝܼ.܀ ܠܹܐ ܟܵܟ̰ܚܝܼ ܠܒܲܛܝܼܠܘܼܬܵܐ؛ ܘܠܹܐ ܗܲܨܠܝܼ ܠܠܵܘܛܬܵܐ؛ ܣܵܒܵܒ ܕܙܲܪܥܵܐ ܝ݇ܢܵܐ ܒܪܝܼܟ̣ܵܐ ܕܡܵܪܝܵܐ؛ ܐܵܢܝܼ ܘܒܢܘܿܢܲܝ̈ܗ‌ܝ.܀ ܥܲܡܲܝܗ‌ܝ. ܡ̣ܢ ܩܵܕ݇ܡ ܕܩܵܪܝܼ ܐܵܢܵܐ ܒܸܬ ܓ̰ܲܘܸܒܸܢܗ݇ܘܿܢ؛ ܘܡ̣ܢ ܩܵܕ݇ܡ ܕܗܲܡܙܸܡܝܼ ܒܸܬ ܫܵܡܥܸܢܗ݇ܘܿܢ.܀ ܕܹܐܒ̣ܵܐ ܘܦܵܐܪܵܐ ܡܐܸܚܕܵܕܹܐ ܒܸܬ ܪܵܥܝܼ؛ ܘܐܲܪܝܵܐ ܐܲܝܟܼ ܬܵܘܪܵܐ ܒܸܬ ܐܵܟ̣ܸܠ ܬܸܒ̣ܢܵܐ؛ ܘܚܘܼܘܹܐ ܥܲܦܪܵܐ ܠܲܚܡܹܗ؛ ܠܹܐ ܥܵܒ̣ܕܝܼ ܣܪܝܼܬܵܐ ܘܠܹܐ ܡܲܚܪܸܒ̣ܝܼ ܒܟܠܹܗ ܛܘܼܪܵܐ ܕܩܘܼܕܫܝܼ ܒܹܐܡܵܪܵܐ ܝ݇ܠܹܗ ܡܵܪܝܵܐ.܀ ܗܵܕܟ̣ܵܐ ܒܹܐܡܵܪܵܐ ܝ݇ܠܹܗ ܡܵܪܝܵܐ؛ ܫܡܲܝܵܐ ܟܘܼܪܣܝܼܝܼ ܝ݇ܠܵܗ̇ ܘܐܲܪܥܵܐ ܟܘܼܒ̣ܫܵܐ ܬܚܘܿܬ ܐܲܩܠ̈ܝܼ؛ ܐܲܝܢܝܼ ܝ݇ܠܹܗ ܒܲܝܬܵܐ ܕܒܵܢܝܼܬܘܿܢ ܠܝܼ؟ ܝܲܢ ܐܲܝܢܝܼ ܝ݇ܠܵܗ̇ ܕܘܼܟܬܵܐ ܕܡܲܢܝܲܚܬܝܼ؟ ܐܲܢܹܐ ܟܠܲܝܗ‌ܝ ܐܝܼܕܝܼ ܥܒ̣ܸܕܠܵܗ̇؛ ܘܕܝܼܝܼ ܝ݇ܢܵܐ؛ ܐܲܢܹܐ ܟܠܲܝܗ‌ܝ ܒܹܐܡܵܪܵܐ ܝ݇ܠܹܗ ܡܵܪܝܵܐ؛ ܘܒܡܵܢܝܼ ܚܵܝܪܸܢ ܘܥܵܡܪܸܢ؟ ܐܸܠܵܐ ܒܢܝܼܚܵܐ ܘܒܡܲܟܝܼܟ̣ܵܐ ܕܪܘܼܚܵܐ؛ ܕܪܵܓܸܕ ܡ̣ܢ ܗܲܡܙܲܡܬܝܼ܀

 

ܚܲܒ̣ܪܹܗ

 

ܐܹܪܲܡܝܵܐ ܝܙ؛ 21‐27

ܫܠܵܘ ܢܒ̣ܝܼܘܼܬܹܗ ܕܐܹܪܲܡܝܵܐ؛ ܐܲܚܲܝ̈ ܒܲܪܸܟ̣ܡܵܪܝ܀

 

   ܗܵܕܟ̣ܵܐ ܒܹܐܡܵܪܵܐ ܝ݇ܠܹܗ ܡܵܪܝܵܐ؛ ܗܘܹܐܡܘܿܢ ܗܸܫܝܲܪ ܒܓܵܢܵܘܟ̣ܘܿܢ ܕܠܵܐ ܫܵܩܠܝܼܬܘܿܢ ܟܲܪܬܵܐ ܒܝܵܘܡܵܐ ܕܫܲܒܬܵܐ ܘܡܲܥܒ̣ܸܪܝܼܬܘܿܢ ܒܬܲܪ̈ܥܵܢܹܐ ܕܐܘܿܪܸܫܠܹܡ؛ ܘܠܵܐ ܦܵܠܛܝܼܬܘܿܢ ܟܲܪܬܵܐ ܡ̣ܢ ܒܵܬܵܘܟ̣ܘܿܢ ܒܝܵܘܡܵܐ ܕܫܲܒܬܵܐ؛ ܟܠ ܦܘܼܠܚܵܢܵܐ ܠܵܐ ܥܵܒ̣ܕܝܼܬܘܿܢ؛ ܘܩܲܕܫܝܼܬܘܿܢ ܝܵܘܡܵܐ ܕܫܲܒܬܵܐ؛ ܐܲܝܟܼ ܕܦܘܼܩܸܕܠܝܼ ܠܒܵܒܵܘܵܬܵܘ̈ܟ̣ܘܿܢ.܀ ܘܠܵܐ ܫܡܝܼܥܠܗ݇ܘܿܢ ܘܠܵܐ ܡܘܼܟܸܦܠܗ݇ܘܿܢ ܢܵܬܵܝܗ‌ܝ ܠܸܫܡܲܥܝܵܐ؛ ܘܡܘܼܩܫܹܐ ܠܗ݇ܘܿܢ ܩܕܵܠܲܝܗ‌ܝ ܕܠܵܐ ܫܵܡܥܝܼ ܘܠܵܐ ܩܵܒܠܝܼ ܡܲܪܕܘܼܬܵܐ.܀ ܘܐܸܢ ܫܵܡܥܝܼܬܘܿܢ ܠܝܼ ܒܹܐܡܵܪܵܐ ܝ݇ܠܹܗ ܡܵܪܝܵܐ ܕܠܵܐ ܡܲܥܒ̣ܸܪܝܼܬܘܿܢ ܟܲܪܬܵܐ ܒܬܲܪ̈ܥܵܢܹܐ ܕܐܵܗܵܐ ܡܕܝܼܢ݇ܬܵܐ ܒܝܵܘܡܵܐ ܕܫܲܒܬܵܐ؛ ܘܩܲܕܫܝܼܬܘܿܢ ܝܵܘܡܵܐ ܕܫܲܒܬܵܐ ܘܠܵܐ ܥܵܒ̣ܕܝܼܬܘܿܢ ܒܝܼܹܗ ܟܠ ܦܘܼܠܚܵܢܵܐ.܀ ܒܸܬ ܥܵܒ̣ܪܝܼ ܒܬܲܪ̈ܥܵܢܹܐ ܕܐܵܗܵܐ ܡܕܝܼܢ݇ܬܵܐ ܡܲܠܟܹ̈ܐ ܘܓܘܼܪ̈ܵܢܹܐ ܕܝܵܬܒ̣ܝܼ ܥܲܠ ܟܘܼܪܣܝܼܹܗ ܕܕܵܘܝܼܕܼ ܟܲܕ ܪ̈ܟܝܼܒ̣ܹܐ ܒܟܵܠܸܣܟܹ̈ܐ ܘܣܘܼܣܵܘܵܬܹ̈ܐ؛ ܐܵܢܝܼ ܘܓܘܼܪ̈ܵܢܲܝܗ‌ܝ؛ ܘܐ݇ܢܵܫܹ̈ܐ ܕܝܼܗܘܼܕܵܐ ܘܥܵܡܪ̈ܵܢܹܐ ܕܐܘܿܪܸܫܠܹܡ؛ ܘܒܸܬ ܝܵܬܒ̣ܵܐ ܐܵܗܵܐ ܡܕܝܼܢ݇ܬܵܐ ܗܲܠ ܥܵܠܲܡ.܀ ܘܒܸܬ ܐܵܬܝܼ ܡ̣ܢ ܡܵܬܘܵܬܹ̈ܐ ܕܝܼܗܘܼܕܵܐ ܘܡ̣ܢ ܚܵܕܸܪ̈ܘܵܢܹܐ ܕܐܘܿܪܸܫܠܹܡ؛ ܘܡ̣ܢ ܐܲܪܥܵܐ ܕܒܸܢܝܵܡܹܝܢ؛ ܘܡ̣ܢ ܕܸܫܬܵܐ ܘܡ̣ܢ ܛܘܼܪܵܐ؛ ܘܡ̣ܢ ܬܲܝܡܢܵܐ؛ ܡܲܝܬܘܿܝܹܐ ܕܸܒ̣ܚܹ̈ܐ ܘܩܘܼܪ̈ܒܵܢܹܐ ܘܒܸܣܡܵܐ؛ ܘܡܲܝܬܝܼ ܫܵܟܲܪܬܵܐ ܠܒܲܝܬܹܗ ܕܡܵܪܝܵܐ܀

 

♱♱♱♱♱♱♱♱

 

ܚܲܡܫܵܒ̇ܫܲܒܵܐ ܕܒܵܥܘܼܬܵܐ ܕܢܝܼܢܘܵܝܹ̈ܐ

ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ

ܕܲܠܘܵܬܼ ܪ̈ܗܘܿܡܵܝܹܐ ܐܲܚܲܝ̈ ܒܲܪܸܟܼܡܵܪܝ܀

 

ܐܵܚܘܿܢܘܵܬܝܼ̈؛ ܪܸܙܵܝܵܐ ܕܠܸܒܝܼ ܘܒܵܥܘܼܬܝܼ ܕܠܟܸܣ ܐܲܠܵܗܵܐ؛ ܡ̣ܢ ܓܹܒܵܐ ܕܝܼܣܪܵܝܹܠ ܝܼܠܵܗ̇ ܕܚܲܝܝܼ* ܣܵܒܵܒ ܒܝܼܵܗܒܼܵܐ ܝ݇ܘܸܢ ܣܵܗܕܘܼܬܵܐ ܒܘܼܬ ܕܝܼܲܝܗܝ ܕܩܲܝܪܲܬ ܕܐܲܠܵܗܵܐ ܐܝܼܬ ܒܝܼـܲܝܗܝ؛ ܐܝܼܢܵܐ ܠܵܐ ܒܝ݇ܕܵܥܝܬܵܐ* ܟܹܐܢܘܼܬܹܗ ܕܐܲܠܵܗܵܐ ܠܵܐ ܝ݇ܕܸܥܠܗ݇ܘܿܢ؛ ܐܸܠܵܐ ܒܥܹܐܠܗ݇ܘܿܢ ܕܡܲܩܸܡܝܼ ܟܹܐܢܘܼܬܵܐ ܕܓܵܢܲܝܗܝ؛ ܘܒܘܼܬ ܕܐܵܗܵܐ؛ ܠܟܹܐܢܘܼܬܵܐ ܕܐܲܠܵܗܵܐ ܠܵܐ ܦܸܫܠܗ݇ܘܿܢ ܙܲܒܛ* ܣܵܒܵܒ ܚܘܼܬܵܡܵܐ ܕܫܲܪܥܲܬ ܡܫܝܼܚܵܐ ܝ݇ܠܹܗ ܠܟܹܐܢܘܼܬܵܐ؛ ܩܵܐ ܟܠ ܕܗܲܡܸܢ܋ ܣܵܒܵܒ ܡܘܼܫܹܐ ܗܲܕܟܼܵܐ ܟܬܸܒܼܠܹܗ ܒܘܼܬ ܟܹܐܢܘܼܬܵܐ ܕܒܫܲܪܥܲܬ ܕܡ̇ܢ ܕܥܵܒܼܸܕ ܐܲܢܸܐ ܒܸܬ ܚܲܝܹܐ ܒܝܼܲܝܗܝ* ܐܝܼܢܵܐ ܟܐܢܘܼܬܵܐ ܕܓܵܘ ܗܲܝܡܵܢܘܼܬܵܐ ܗܲܕܟܼܵܐ ܟܹܐ ܐܵܡܪܵܐ. ܕܠܵܐ ܐܵܡܪܸܬ ܒܠܸܒܘܼܟܼ؛ ܡܵܢܝܼ ܐ݇ܣܸܩܠܹܗ ܠܫܡܲܝܵܐ ܘܡܘܼܨܠܹܐܠܹܗ ܠܡܫܝܼܚܵܐ. ܘܡܵܢܝܼ ܨܠܹܐܠܹܗ ܠܥܘܼܡܩܵܐ ܕܫܝܘܿܠ ܘܡܘܼܣܸܩܠܹܗ ܠܡܫܝܼܚܵܐ ܡ̣ܢ ܓܵܘ ܡܝܼܬܹ̈ܐ. ܐܸܠܵܐ ܡܘܼܕܝܼ ܐ݇ܡܸܪܹܗ؛ ܩܘܼܪܒܵܐ ܝ݇ܠܹܗ ܐܸܠܘܼܟܼ ܚܲܒܪܵܐ ܠܦܘܼܡܘܼܟܼ ܘܠܠܸܒܘܼܟܼ. ܘܐܵܗܵܐ ܝ݇ܠܵܗ̇ ܗܹܡܸܙܡܲܢ ܕܗܲܝܡܵܢܘܼܬܵܐ ܕܡܲܟܪܘܼܙܹܐ ܝ݇ܘܲܚ* ܘܐܸܢ ܡܵܘܕܸܬ ܒܦܘܼܡܘܼܟܼ ܒܡܵܪܲܢ ܝܼܫܘܿܥ ܘܗܲܡܸܢܸܬ ܒܠܸܒܘܼܟܼ ܕܐܲܠܵܗܵܐ ܡܘܼܩܸܡܠܹܗ ܡܼܢ ܓܵܘ ܡܝܼܬܹ̈ܐ؛ ܒܸܬ ܚܲܝܸܬ؛ ܣܵܒܵܒ ܠܸܒܵܐ ܕܗܲܡܸܢ ܒܝܼܹܗ ܒܸܬ ܦܵܐܹܫ ܡܘܼܟܫܸܛܵܐ ܘܦܘܼܡܵܐ ܕܡܵܘܕܹܐ ܒܝܼܹܗ ܒܸܬ ܚܲܝܹܐ܋ ܦܵܐܸܫ ܡܘܼܟܫܸܛܵܐ ܘܦܘܼܡܵܐ ܕܡܵܘܕܹܐ ܒܝܼـܹܗ ܒܸܬ ܚܲܝܹܐ* ܘܡܸܢ݇ܕܪܹܫ̄ ܐ݇ܡܸܪܹܗ ܟܬܵܒܼܵܐ ܕܟܠ ܕܗܲܡܸܢ ܒܝܼܹܗ ܠܹܐ ܢܵܚܸܦ* ܘܒܐܵܗܵܐ ܠܵܐ ܦܪܸܫܠܹܗ ܒܹܝܠ ܝܗܘܼܕܵܝܹ̈ܐ ܘܠܐܵܪ̈ܡܵܝܸܐ ܣܵܒܵܒ ܕܚܲܕ݇ ܝܼܠܹܗ ܡܵܪܝܵܐ ܕܟܠܲܝܗܝ؛ ܘܥܲܬܝܼܪܵܐ ܝ݇ܠܹܗ ܒܟܠ ܕܩܵܪܹܐ ܠܹܗ* ܣܵܒܵܒ ܕܟܠ ܕܩܵܪܹܐ ܫܸܡܹܗ ܕܡܵܪܝܵܐ ܒܸܬ ܚܲܝܹܐ*

 

♱♱♱♱♱♱♱♱

 

 

ܚܡܫܒܿܫܒܐ ܕܒܼܬܪ ܒܥܘܬܼܐ ܕܢܝܢܘܝ̈ܐ

ܠܘܩܐ ܝܗ: 3 ‐ ܫܘܠܡܐ

ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ ܟܪܘܙܘܬܼܐ ܕܠܘܩܐ

 

ܘܐ݇ܡܝܼܪܹܗ ܝܑܼܫܘܿܥ ܠܬܲܠܡܝܼ̈ܕܘܼܗܝ ܐܵܗܵܐ ܡܵܬܠܵܐ: ܡܵܢܝܼ ܡܸܢܵܘܟܼܘܿܢ ܓܲܒܼܪܵܐ ܕܐܝܼܬܠܹܗ ܡܵܐܐ ܥܸܪ̈ܒܹܐ: ܘܐܸܢ ܛܵܠܸܩ ܚܲܕ݇ ܡܸܢܲܝܗܝ. ܠܹܐ ܫܵܒܼܸܩ ܬܸܫܥܝܼ ܘܬܸܫܥܵܐ ܒܒܲܪܝܼܵܐ ܘܐܵܙܸܠ ܛܵܥܹܐ ܠܗ̇ܘ ܕܛܠܝܼܩܠܹܗ ܗܲܠ ܕܡܵܫ݇ܟ̰ܸܚܠܹܗ؟ ܘܐܝܼܡܵܢ ܕܡܵܫ݇ܟ̰ܸܚܠܹܗ ܟܒܸܕ ܚܵܕܹܐ، ܘܒܸܕ ܫܵܩܸܠܹܗ ܥܲܠ ܪ̈ܘܼܦ̮ܫܵܢܘܼܗܝ: ܘܒܸܕ ܐܵܬܹܐ ܠܒܲܝܬܹܗ ܘܒܸܕ ܩܵܪܹܐ ܠܪ̈ܵܚܡܘܼܗܝ ܘܠܫܒܼܵܒܼܘܼ̈ܗܝ ܘܒܸܕ ܐܵܡܸܪ ܐܸܠܲܝܗܝ:  ܚܕܲܝܡܘܿܢ ܥܲܡܝܼ ܕܡܘܼܫ݇ܟ̰ܸܚܠܝܼ ܥܸܪܒܝܼ ܕܝܼܗَܘܵܐ ܛܠܝܼܩܵܐ: ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ: ܕܗܲܕܟܼܵܐ ܒܸܕ ܗܵܘܝܵܐ ܚܲܕܘܼܬܵܐ ܓܵܘ ܫܡܲܝܵܐ ܥܲܠ ܚܲܕ݇ ܚܲܛܵܝܵܐ ܕܬܲܘܸܒ ܝܲܢ ܥܲܠ ܬܸܫܥܝܼ ܘܬܸܫܥܵܐ ܙܲܕܝܼܩܹ̈ܐ ܕܠܹܐ ܝܢܵܐ ܣܢܝܼܩܹ̈ܐ ܠܬܝܵܒܼܘܼܬܵܐ: ܝܲܢ ܐܲܝܢܝܼ ܝܠܵܗ̇  ܒܲܟܼܬܵܐ ܕܐܝܼܬܠܵܗ̇ ܥܸܣܪܵܐ ܙܘܼܙܹ̈ܐ ܘܛܵܠܸܩ ܚܲܕ݇ ܡܸܢܲܝܗܝ: ܘܠܹܐ ܡܲܢܗܸܪܵܐ ܫܪܵܓَܼܝܵܐ ܘܟܵܢܫܵܐ ܒܲܝܬܵܐ: ܘܛܲܥܝܵܐ ܐܸܠܹܗ ܒܐ݇ܟܼܵܠܬܵܐ ܕܚܲܡ ܗܲܠ ܕܡܲܫ݇ܟ̰ܚܵܐ ܠܹܗ؟ ܘܐܝܼܡܵܢ ܕܡܲܫ݇ܟ̰ܚܵܐ ܠܹܗ، ܒܸܕ ܩܵܪܝܵܐ ܠܪ̈ܲܚܡܵܬܘܼܗ̇ ܘܠܫܒܼܵܒܼ̈ܝܵܬܘܼܗ̇ ܘܐܲܡܪܵܐ ܐܸܠܲܝܗܝ: ܚܕܲܝܡܘܿܢ ܥܲܡܝܼ ܕܡܘܼܫ݇ܟ̰ܸܚܠܝܼ ܙܘܼܙܝܼ ܕܛܠܝܼܩܵܐ ܗ݇ܘܵܐ: ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ ܕܗܲܕܟܼܵܐ ܒܸܬ ܗܵܘܝܵܐ ܚܲܕܘܼܬܵܐ ܩܵܕ݇ܡ ܡܲܠܲܐܟܼܹ̈ܐ ܕܐܲܠܵܗܵܐ ܥܲܠ ܚܲܕ݇ ܚܲܛܵܝܵܐ ܕܬܲܘܸܒ: ܘܡܸܢ݇ܕܪܹܫ݇ ܐ݇ܡܝܼܪܹܗ ܐܸܠܲܝܗܝ ܝܑܼܫܘܿܥ: ܚܲܕ݇ ܐ݇ܢܵܫܵܐ ܐܝܼܬ ܗ݇ܘܵܐ ܠܹܗ ܬܪܲܝ ܒܢܘܿܢܹ̈ܐ: ܘܐ݇ܡܝܼܪܹܗ ܐܸܠܹܗ ܒܪܘܿܢܹܗ ܙܥܘܿܪܵܐ: ܒܵܒܝܼ ܗܲܒَܼܠܝܼ ܦܲܠܓܘܼܬܵܐ ܕܡܲܛܝܵܐ ܠܝܼ ܡ̣ܢ ܒܲܝܬܘܼܟܼ: ܘܦܘܼܠܹܓَܼܠܹܗ ܐܸܠܲܝܗܝ ܡܸܢܕܝܼܹܗ: ܘܡ̣ܢ ܒܵܬ݇ܪ ܚܲܕ݇ܟܡܵܐ ܝܵܘܡܵܢܹ̈ܐ، ܓ̰ܘܼܡܸܥܠܹܗ ܗ̇ܘ ܒܪܘܿܢܹܗ ܙܥܘܿܪܵܐ ܟܠܡܸܢܕܝܼ ܕܡܛܹܐܠܹܗ ܐܸܠܹܗ ܘܐ݇ܙܝܼܠܹܗ ܠܐܲܬܪܵܐ ܪܸܚܩܵܐ: ܘܬܵܡܵܐ ܬܘܼܪܬܸܚܠܹܗ ܡܵܐܠܹܗ ܟܲܕ ܒܸܚܵܝܵܐ ܒܐܵܨܘܼܛܘܼܬܵܐ ܘܟܲܕ ܦܘܼܪܸܩܠܹܗ ܟܠ ܡܸܢܕܝܼ ܕܐܝܼܬ ܗ݇ܘܵܐ ܠܹܗ: ܗ݇ܘܹܐܠܹܗ ܟܸܦܢܵܐ ܪܲܒܵܐ ܒܗ̇ܘ ܐܲܬܪܵܐ: ܘܫܘܼܪܹܐܠܹܗ ܒܸܚܣܵܪܵܐ: ܘܐ݇ܙܝܼܠܹܗ ܬܒܝܼܥܠܹܗ ܠܚܲܕ݇ ܡ̣ܢ ܒܢܲܝ̈ ܡܕܝܼܢ݇ܬܵܐ ܕܗ̇ܘ ܐܲܬܪܵܐ: ܘܗ̇ܘ ܩܲܡ ܫܵܕܸܪܹܗ ܠܚܲܩܠܵܐ ܠܡܲܪܥܘܼܝܹܐ ܚܙܘܼܪܹ̈ܐ: ܘܫܲܗܘܸܬ ܗ݇ܘܵܐ ܠܸܡܠܵܝܵܐ ܟܲܪ݇ܣܹܗ ܡ̣ܢ ܐܵܢܝܼ ܚܲܪ̈ܘܼܒ̣ܹܐ ܕܐܲܟܼܠܝܼ ܗ݇ܘܵܘ ܚܙܘܼܪܹ̈ܐ. ܘܗܝܼܟ̰ ܐ݇ܢܵܫܵܐ ܠܵܐ ܝܲܗ݇ܒܼܸܠܗ݇ܘܵܐ ܠܹܗ: ܘܟܲܕ ܐ݇ܬܹܐܠܹܗ ܠܓܵܢܹܗ، ܐ݇ܡܝܼܪܹܗ: ܐܵܕܝܼܵܐ ܟܡܵܐ ܕܒܼܝܼܩܹ̈ܐ ܒܗܵܩܵܐ ܐܝܼܬ ܒܒܲܝܬܵܐ ܕܒܵܒܝܼ ܕܙܵܘܕܵܐ ܝܠܹܗ ܐܸܠܲܝܗܝ ܠܲܚܡܵܐ: ܘܐܵܢܵܐ ܠܲܐܟܼܵܐ ܡ̣ܢ ܟܸܦܢܝܼ ܒܸܛܠܵܩܵܐ ܝܘܸܢ: ܒܸܕ ܩܵܝܡܸܢ ܐܵܙܸܠ݇ܢ ܠܘܵܬ ܒܵܒܝܼ ܘܐܲܡܪܸܢ ܐܸܠܹܗ: ܒܵܒܝܼ: ܚܛܹܐܠܝܼ ܒܫܡܲܝܵܐ  ܘܩܵܕ݇ܡܘܼܟܼ، ܘܡ̣ܢ ܐܵܕܝܼܵܐ ܠܹܐ ܚܵܫܚܸܢ ܕܦܲܝܫܸܢ ܩܸܪܝܵܐ ܒܪܘܿܢܘܼܟܼ،  ܥܒܼܘܼܕܠܝܼ ܐܲܝܟܼ ܚܲܕ݇ ܡ̣ܢ ܕܒ̣ܝܼܩܹ̈ܐ ܒܗܵܩܵܐ ܕܝܼܘܼܟܼ، ܘܩܝܼܡܠܹܗ ܐ݇ܬܹܐܠܹܗ ܠܘܵܬ ܒܵܒܘܼܗܝ، ܘܗܵܠܵܐ ܗ̇ܘ ܪܸܚܩܵܐ، ܩܲܡ ܚܵܙܹܐܠܹܗ ܒܵܒܹܗ ܘܪܘܼܚܸܡܠܹܗ ܥܲܠܘܼܗܝ، ܘܪܚܝܼܛܠܹܗ ܢܦܝܼܠܹܗ ܥܲܠ ܩܕܵܠܹܗ ܘܩܲܡ ܢܵܫܸܩܠܹܗ: ܘܐ݇ܡܝܼܪܹܗ ܐܸܠܹܗ ܒܪܘܿܢܹܗ: ܒܵܒܝܼ ܚܛܹܐܠܝܼ ܒܫܡܲܝܵܐ ܘܩܵܕ݇ܡܘܼܟܼ، ܘܡ̣ܢ ܐܵܕܝܼܵܐ ܠܹܐ ܚܵܫܚܸܢ ܕܦܵܝܫܸܢ ܩܸܪܝܵܐ ܒܪܘܿܢܘܼܟܼ. ܐܝܼܢܵܐ ܐ݇ܡܝܼܪܹܗ ܒܵܒܘܼܗܝ ܠܪܹ̈ܓܵܘܵܬܘܼܗܝ: ܦܲܠܛܘܿܢ ܓ̰ܘܼܒܵܐ  ܪܹܫܵܝܬܵܐ ܘܡܲܠܒܼܸܫܘܿܢ ܠܹܗ: ܘܡܚܲܝܡܘܿܢ ܥܸܙܲܩܬܵܐ ܒܐܝܼܕܹܗ، ܘܡܲܠܒܼܸܫܘܿܢ ܠܹܗ ܨܵܘܠܹ̈ܐ: ܘܡܲܝܬܹܐܡܘܿܢ ܦܪܘܼܡܘܿܢ ܬܵܘܪܵܐ ܬܪܝܼܨܵܐ. ܘܐܲܟܼܠܵܚ ܘܡܲܒܣܸܡܵܚ: ܕܐܵܗܵܐ ܒܪܘܿܢܝܼ ܡܝܼܬܵܐ ܝܗ݇ܘܵܐ ܘܚܝܹܐܠܹܗ، ܘܛܠܝܼܩܵܐ ܝܗ݇ܘܵܐ ܘܦܝܼܫܠܹܗ ܡܫ݇ܟ̰ܝܼܚܵܐ: ܘܫܘܼܪܹܐܠܗ݇ܘܿܢ ܠܸܥܒܼܵܕܵܐ ܒܘܼܣܵܡܵܐ. ܐܝܼܢܵܐ ܗ̇ܘ ܒܪܘܿܢܹܗ ܓܘܼܪܵܐ ܒܚܲܩܠܵܐ ܝܗ݇ܘܵܐ. ܘܟܲܕ ܐ݇ܬܹܐܠܹܗ ܘܩܘܼܪܒܸܢܹܗ ܠܘܵܬ ܒܲܝܬܵܐ، ܫܡܝܼܥܠܹܗ ܩܵܠܵܐ ܕܙܡܵܪܵܐ ܕܪ̈ܵܒܵܐ: ܘܩܪܹܐܠܹܗ ܠܚܲܕ݇ ܡ̣ܢ ܝܵܠܹ̈ܕ݇ܐ ܙܥܘܿܪܹ̈ܐ ܘܩܲܡ ܒܵܩܸܪܹܗ: ܡܘܿܕܝܼ ܝܼܠܹܗ ܐܵܗܵܐ؟ ܐܵܡܸܪ ܐܸܠܹܗ: ܐܲܚܘܿܢܘܼܟܼ ܐ݇ܬܹܐܠܹܗ: ܘܒܵܒܘܼܟܼ ܦܪܝܼܡܠܹܗ ܬܵܘܪܵܐ ܬܪܝܼܨܵܐ ܕܨܵܚ ܩܘܼܒܸܠܹܗ ܐܸܠܹܗ. ܘܟܪܝܼܒܠܹܗ، ܘܠܹܐ ܒܵܤܡܵܐ ܗ݇ܘܵܐ ܠܹܗ ܠܸܥܒܼܵܪܵܐ: ܘܦܠܝܼܛܠܹܗ ܒܵܒܘܼܗܝ ܘܛܠܝܼܒܠܹܗ ܡܸܢܹܗ : ܐܝܼܢܵܐ ܗ̇ܘ ܐ݇ܡܝܼܪܹܗ ܠܒܵܒܘܼܗܝ: ܗܵܐ ܟܡܵܐ ܫܸܢܹ̈ܐ ܦܠܵܚܵܐ ܝܘܸܢ ܪܹܓܘܼܬܵܐ ܐܸܠܘܼܟܼ. ܘܗܝܼܟ̰ ܠܵܐ ܥܒܼܝܼܪܝܼ ܥܲܠ ܦܘܼܩܕܵܢܘܼܟܼ، ܘܚܲܕ݇ ܓܸܕܝܵܐ ܠܵܐ ܝܘܼܗ݇ܒܼܸܠܘܼܟܼ ܐܸܠܝܼ ܕܥܲܒܼܕܸܢ ܒܘܼܣܵܡܵܐ ܥܲܡ ܪ̈ܵܚܡܝܼ، ܐܝܼܢܵܐ ܠܐܵܗܵܐ ܒܪܘܿܢܘܼܟܼ ܟܲܕ ܬܘܼܪܬܸܚܠܹܗ ܡܸܢܕܝܼܘܼܟܼ ܥܲܡ ܙܲܢܝܵܬܹ̈ܐ ܘܐ݇ܬܹܐܠܹܗ: ܦܪܝܼܡܠܘܼܟܼ ܬܵܘܪܵܐ ܬܪܝܼܨܵܐ ܐܸܠܹܗ: ܐܵܡܸܪ ܐܸܠܹܗ ܒܵܒܹܗ: ܒܪܘܿܢܝܼ: ܐܲܢ݇ܬ ܒܟܠܙܲܒܼܢܵܐ ܥܲܡܝܼ ܝܘܸܬ ܘܟܠ ܡܸܢܕܝܼ ܕܕܝܼܠ݇ܝܼ ܕܕܝܼܠ݇ܘܼܟܼ ܝܼܠܹܗ: ܐܝܼܢܵܐ ܘܵܠܹܐ ܝܼܗَܘܵܐ ܐܸܠܲܢ ܠܡܲܒܣܘܼܡܹܐ ܘܠܸܚܕܵܝܵܐ، ܕܐܵܗܵܐ ܐܲܚܘܿܢܘܼܟܼ ܡܝܼܬܵܐ ܝܗ݇ܘܵܐ ܘܚܝܹܐܠܹܗ ܘܛܠܝܼܩܵܐ ܝܗ݇ܘܵܐ ܘܦܝܼܫܠܹܗ ܡܫ݇ܟ̰ܝܼܚܵܐ.

 

♱♱♱♱♱♱♱♱