ܬܪܹܝܢܒܫܲܒܵܐ ܕܒܵܥܘܼܬܵܐ ܕܢܝܼܢܘܵܝܹ̈ܐ
ܐܹܫܲܥܝܵܐ ܣܓ؛ 17‐ܣܕ ‐ ܫܘܼܠܵܡܵܐ
ܬܸܒ̣ܘ ܘܲܫܠܵܘ ܢܒ̣ܝܼܬܹܗ ܕܐܹܫܲܥܝܵܐ؛ ܐܲܚܲܝ̈ ܒܲܪܸܟ̣ܡܵܪܝ.
ܘܨܘܼܠܹܐܠܹܗ ܐܹܫܲܥܝܵܐ ܩܵܕ݇ܡ ܡܵܪܝܵܐ ܘܐ݇ܡܸܪܹܗ؛ ܩܵܡܘܿܕܝܼ ܡܘܼܚܠܸܛܠܘܼܟܼ ܐܸܠܲܢ ܡ̣ܢ ܐܘܼܪܚܘܼܟܼ ܝܵܐ ܡܵܪܝܵܐ؛ ܘܡܘܼܩܫܹܐܠܘܼܟܼ ܠܸܒܲܢ ܡ̣ܢ ܙܕܘܿܥܬܘܼܟܼ؟ ܕܘܼܪ ܝܵܐ ܡܵܪܝܵܐ ܒܘܼܬ ܚܵܬܸܪ ܪܹ̈ܓܵܘܵܬܘܼܟܼ ܩܵܛܝܼܵܐ ܕܝܵܪܬܘܼܬܘܼܟܼ.܀ ܚܲܕ݇ܟ̰ܵܐ ܒܸܬ ܝܵܪܸܬ ܛܵܝܸܦܵܐ ܕܩܘܼܕܫܘܼܟܼ؛ ܡܲܠܝܸ̈ܨܵܢܲܝܢ ܕܘܼܫܕܸܫܠܗ݇ܘܿܢ ܡܲܩܕܫܘܼܟܼ.܀ ܗܘܹܐܠܲܢ ܡ̣ܢ ܥܵܠܲܡ؛ ܡ̣ܢ ܩܵܕ݇ܡ ܕܗܘܼܟܸܡܠܘܼܟܼ ܥܲܠܲܝܗܝ ܘܠܵܐ ܦܸܫܠܹܗ ܩܸܪܝܵܐ ܫܸܡܘܼܟܼ ܥܲܠܲܝܗܝ.܀ ܠܵܐ ܦܬܸܚܠܘܼܟܼ ܫܡܲܝܵܐ ܘܨܠܹܐܠܘܼܟܼ؛ ܘܡ̣ܢ ܩܵܕ݇ܡܘܼܟܼ ܪܓܸܕܠܗ݇ܘܿܢ ܛܘܼܪ̈ܵܢܹܐ؛ ܘܦܫܸܪܗ݇ܘܿܢ ܐܲܝܟܼ ܕܦܵܫܪܵܐ ܫܲܡܥܵܐ ܡ̣ܢ ܩܵܕ݇ܡ ܢܘܼܪܵܐ؟܀ ܘܡܲܩܕܵܐ ܢܘܼܪܵܐ ܠܕܸܫ̮ܡܸܢ̈ܘܼܟܼ ܘܦܵܐܹܫ ܝ݇ܕܝܼܥܝܵܐ ܫܸܡܘܼܟܼ ܠܕܸܫ̮ܡܸܢܘܼܟܼ؛ ܘܦܵܝܫܝܼ ܒܘܼܪܒܸܙܹܐ ܛܵܝܸܦܹ̈ܐ ܡ̣ܢ ܩܵܕ݇ܡܘܼܟܼ.܀ ܟܲܕ ܥܒ̣ܸܕܠܘܼܟܼ ܥܵܓ̰ܝܼܒܘܼܝܵܬܹ̈ܐ ܕܠܵܐ ܣܦܸܪܲܢ ܐܸܠܘܼܟܼ. ܨܠܹܐܠܘܼܟܼ؛ ܘܡ̣ܢ ܩܵܕ݇ܡܘܼܟܼ ܪܓܸܕܠܗ݇ܘܼܢ ܛܘܼܪ̈ܵܢܹܐ.܀ ܡ̣ܢ ܥܵܠܲܡ ܠܵܐ ܡܘܼܨܝܸܬܠܗ݇ܘܿܢ ܘܠܵܐ ܫܡܝܼܥܠܗ݇ܘܿܢ؛ ܘܥܲܝܢܵܐ ܠܵܐ ܚܙܹܐܠܵܗ̇ ܚܲܕ݇ ܐܲܠܵܗܵܐ ܐ݇ܚܹܪ݇ܢܵܐ ܫܒ̣ܘܿܩ ܡܸܢܘܼܟܼ؛ ܕܒܸܥܒ̣ܵܕܵܐ ܝ݇ܘܸܬ̇ ܩܵܐ ܕܐܵܢܝܼ ܕܣܵܦܪܝܼ ܐܸܠܘܼܟܼ.܀ ܘܒܸܬܦܵܩܵܐ ܝ݇ܘܸܬ̇ ܒܚܲܕܘܼܬܵܐ ܒܐܵܢܝܼ ܕܥܵܒ̣ܕܝܼ ܙܲܕܝܼܩܘܼܬܵܐ. ܒܐܘܼܪ̈ܚܵܬܘܼܟܼ؛ ܒܸܬ ܕܵܟ̣ܪܝܼܠܘܼܟܼ. ܗܵܐ ܐܲܢ݇ܬ̇ ܟܪܸܒܠܘܼܟܼ ܘܐܲܚܢܲܢ ܚܛܹܐܠܲܢ ܒܝܼܲܝܗܝ؛ ܡ̣ܢ ܥܵܠܲܡ ܒܸܬ ܦܵܝܫܲܚ ܦܘܼܪܩܹܐ.܀ ܟܠܲܢ ܐܲܝܟܼ ܛܲܡ̈ܐܹܐ ܗ݇ܘܹܐܠܲܢ؛ ܘܐܲܝܟܼ ܓ̰ܘܼܠܵܐ ܕܟܸܦ̮ܣܵܢܝܼܬܵܐ ܟܠܵܗ̇ ܙܲܕܝܼܩܘܼܬܲܢ؛ ܟܠܲܢ ܐܲܝܟܼ ܛܲܪ̈ܦܹܐ ܢܬܸܪܲܢ؛ ܘܐܲܝܟܼ ܦܵܘܚܵܐ ܩܲܡ ܫܵܩܠܝܼܠܲܢ ܚܛ̈ܝܼܵܬܲܢ.܀ ܘܠܲܝܬ̇ ܩܵܪܝܵܢܵܐ ܒܫܸܡܘܼܟܼ؛ ܘܕܵܟ̣ܪܵܢܵܐ ܠܸܕܒ̣ܵܩܵܐ ܒܝܼܘܼܟܼ. ܣܵܒܵܒ ܕܡܘܼܕܸܪܘܼܟܼ ܦܵܬܘܼܟܼ ܡܸܢܲܢ؛ ܘܣܘܼܦܝܲܚܠܘܼܟܼ ܒܝܼܲܕ ܚܛ̈ܝܼܵܬܲܢ.܀ ܐܵܕܝܼܵܐ ܝܵܐ ܡܵܪܝܵܐ ܐܲܢ݇ܬ̇ ܒܵܒܲܢ ܝܼܘܸܬ̇؛ ܘܐܲܚܢܲܢ ܛܝܼܢܵܐ ܘܐܲܢ݇ܬ̇ ܓܵܒ̣ܘܿܠܲܢ. ܦܘܼܠܚܵܢܵܐ ܕܐܝܼܕ̈ܘܼܟܼ ܝܼܘܲܚ ܟܠܲܢ.܀ ܠܵܐ ܟܵܪܒܸܬ̇ ܝܵܐ ܡܵܪܝܵܐ ܗܲܠ ܥܵܠܲܡ. ܘܠܵܐ ܕܲܟ̣ܪܸܬ̇ ܗܲܠ ܥܵܠܲܡ ܚܛܝܼ̈ܵܬܲܢ. ܚܙܝܼ ܕܟܠܲܢ ܛܵܝܸܦܘܼܟܼ ܝܼܘܲܚ.܀ ܡܕܝܼܢܵܬܹ̈ܐ ܕܩܘܼܕܫܵܐ ܗܘܹܐܠܗ݇ܘܿܢ ܒܲܪܝܼܵܐ ܘܨܸܗܝܘܿܢ ܗܘܹܐܠܵܗ̇ ܘܲܝܪܵܢ؛ ܘܐܘܿܪܸܫܠܹܡ ܚܵܪܵܒܵܐ.܀ ܒܹܝܬ̣ ܩܘܼܕܫܲܢ ܘܬܸܫܒܘܿܚܬܲܢ ܘܫܘܼܒܚܸܬܠܗ݇ܘܿܢ ܒܵܒܵܘ̈ܵܬܲܢ؛ ܗܘܹܐܠܗ݇ܘܿܢ ܠܝܲܩܕܵܢܵܐ ܕܢܘܼܪܵܐ؛ ܘܟܠܵܗ̇ ܫܲܗܘܲܬܲܢ ܗܘܹܐܠܵܗ̇ ܠܚܪܵܒ̣ܵܐ.܀ ܥܲܠ ܟܠܲܝܗܝ ܐܲܢܹܐ ܚܡܸܠܘܼܟܼ ܝܵܐ ܡܵܪܝܵܐ ܘܫܬܸܩܠܘܼܟܼ ܘܩܲܡ ܡܲܡܟܸܟ̣ܸܬ̇ ܠܲܢ ܪܵܒܵܐ܀
ܚܲܒ̣ܪܹܗ
ܚܲܒ̣ܩܘܿܩ ܓ؛ 1‐ ܫܘܼܠܵܡܵܐ
ܫܠܵܘ ܨܠܘܿܬܹܗ ܕܚܲܒ̣ܩܘܿܩ؛ ܐܲܚܲܝ̈ ܒܲܪܸܟ̣ܡܵܪܝ܀
ܡܵܪܝܵܐ ܫܡܝܼܥܠܝܼ ܫܸܡܘܼܟܼ ܘܙܕܝܼܥܠܝܼ.܀ ܡܵܪܝܵܐ ܦܘܼܠܚܵܢܘܼܟܼ ܓܵܘ ܫܸܢܹ̈ܐ ܕܚܲܝܹ̈ܐ؛ ܓܵܘ ܫܸܢܹ̈ܐ ܦܵܝܫܸܬ̇ ܝ݇ܕܝܼܥܝܵܐ؛ ܒܟܲܪܒܵܐ ܪ̈ܲܚܡܘܼܟܼ ܕܲܟ̣ܪܸܬ̇.܀ ܐܲܠܵܗܲܢ ܡ̣ܢ ܬܲܝܡܢܵܐ ܐ݇ܬܹܐܠܹܗ؛ ܘܩܲܕܝܼܫܵܐ ܡ̣ܢ ܛܘܼܪܵܐ ܕܦܵܪܵܢ. ܦܸܫܠܵܗ̇ ܡܘܼܟܸܣܬܵܐ ܫܡܲܝܵܐ ܡ̣ܢ ܙܲܪܝܼܦܘܼܬܹܗ ܚܩܝܼܪܬܵܐ؛ ܘܬܸܫܒܘܿܚܬܹܗ ܡܠܹܐܠܵܗ̇ ܐܲܪܥܵܐ.܀ ܘܠܵܘܓ̰ܸܗ ܐܲܝܟܼ ܒܲܗܪܵܐ ܒܸܬ ܗܵܘܹܐ؛ ܓܵܘ ܡܕܝܼܢ݇ܬܵܐ ܕܐܝܼܕ̈ܘܼܗܝ ܒܸܬ ܡܲܬܸܒ̣ ܚܲܝܠܹܗ ܒܠܲܩܚܵܐ [ܒܡܵܬܘܵܬܹ̈ܐ ܚܵܕܸܪܘܵܢܹܐ ܕܡܕܝܼܢ݇ܬܵܐ]. ܩܵܕ݇ܡܹܗ ܒܸܬ ܐܵܙܸܠ ܡܵܘܬܵܐ؛ ܘܒܸܬ ܦܵܠܛܵܐ ܛܲܝܪܵܐ ܠܐܲܩܠ̈ܘܼܗܝ؛ ܘܩܸܡܠܹܗ ܘܟܝܼܠܵܗ̇ ܠܹܗ ܐܲܪܥܵܐ؛ ܚܸܪܹܗ ܘܫܥܸܫܠܗ݇ܘܿܢ ܛܵܝܸܦܹ̈ܐ؛ ܒܘܼܪܒܸܙܠܗ݇ܘܿܢ ܛܘܼܪ̈ܵܢܹܐ ܕܡ̣ܢ ܥܵܠܲܡ؛ ܟܸܦܠܘܿܢ ܪ̈ܘܼܡܝܵܬܹܐ ܕܡ̣ܢ ܥܵܠܡܝܼܢ؛ ܕܝܼܹܗ ܝ݇ܢܵܐ ܓ̰ܘܲܓ̰ܝܵܬܹ̈ܐ ܕܡ̣ܢ ܐܵܒܲܕ.܀ ܬܚܘܿܬ ܐܘܿܢ ܚܙܹܐܠܝܼ ܡܲܫܟܢܵܐ ܕܟܘܼܫܵܢ؛ ܒܸܬ ܫܵܥܫܝܼ ܟ̰ܲܕܪܹ̈ܐ ܕܐܲܪܥܵܐ ܕܡܸܕܝܵܢ.܀ ܥܲܠ ܢܲܗܪ̈ܵܘܵܬܹܐ ܟܪܸܒܠܹܗ ܡܵܪܝܵܐ؛ ܒܢܲܗܪ̈ܵܘܵܬܹܐ ܟܲܪܒܘܼܟܼ؛ ܘܒܝܵܡܵܐ ܚܸܡܬܘܼܟܼ ܝ݇ܬܸܒ̣ܠܘܼܟܼ ܥܲܠ ܣܘܼܣܵܘܵܬ̈ܘܼܟܼ؛ ܘܥܲܠ ܟܵܠܸܣܟܵܐ ܕܦܘܼܪܩܵܢܘܼܟܼ؛ ܪܥܵܫܵܐ ܒܸܬ ܪܵܥܫܵܐ ܩܸܫܬܘܼܟܼ. ܘܒܸܬ ܣܵܒ̣ܥܝܼ ܓܹܐܪܹ̈ܐ ܒܚܲܒܪܘܼܟܼ ܚܩܝܼܪܵܐ. ܘܐܲܪܥܵܐ ܒܢܲܗܪ̈ܵܘܵܬܹܐ ܒܸܬ ܦܵܝܫܵܐ ܟ̰ܠܝܼܦܬܵܐ.܀ ܩܵܡ ܚܵܙܝܼܠܘܼܟܼ ܛܘܼܪ̈ܵܢܹܐ ܘܪܓܸܕܠܗ݇ܘܿܢ؛ ܘܡܲܪܝܲܣܬܵܐ ܕܡܝܼܵܐ ܥܒ̣ܸܪܵܗ̇؛ ܘܝܵܡܵܐ ܡܘܼܪܸܡܠܵܗ̇ ܩܵܠܵܗ̇؛ ܘܪܵܡܘܼܬܵܐ ܕܐܝܼܕ̈ܘܼܗܝ ܫܩܸܠܹܗ.܀ ܫܸܡܫܵܐ ܘܣܲܗܪܵܐ ܟܠܹܐܠܗ݇ܘܿܢ ܒܕܘܼܟܬܵܝܗܝ؛ ܘܒܒܲܗܪܵܐ ܕܓܹܐܪ̈ܘܼܟܼ ܒܸܚܕܵܪܵܐ ܝ݇ܢܵܐ؛ ܒܠܵܘܓ̰ܵܐ ܕܒܸܪ̈ܩܹܐ ܕܪ̈ܘܼܡܚܵܬܘܼܟܼ.܀ ܒܚܸܡܬܘܼܟܼ ܒܸܬ ܦܵܣܥܸܬ̇ ܥܲܠ ܐܲܪܥܵܐ؛ ܘܒܟܲܪܒܘܼܟܼ ܕܲܫܕܸܫܸܬ̇ ܛܵܝܸܦܹ̈ܐ.܀ ܦܠܸܛܠܘܼܟܼ ܠܦܵܨܘܿܝܹܐ ܠܛܵܝܸܦܘܼܟܼ؛ ܘܠܦܵܪܘܿܩܹܐ ܠܡܫܝܼܚܘܼܟܼ. ܦܪܸܡܠܘܼܟܼ ܪܹܫܵܐ ܡ̣ܢ ܒܲܝܬܹܗ ܕܥܵܘܵܠܵܐ؛ ܘܡܘܼܫܠܸܚܠܘܼܟܼ ܡ̣ܢ ܒܸܢܝܲܬܹܗ ܘܗܲܠ ܩܕܵܠܹܗ ܠܥܵܠܡܝܼܢ.܀ ܛܒ̣ܸܚܠܘܼܟܼ ܒܚܘܼܛܪܹ̈ܐ ܪܹ̈ܫܵܢܹܐ ܕܗܘܼܟܡܘܼܗܝ ܕܦܸܫܠܗ݇ܘܿܢ ܒܗܹܒ̣ܝܼ ܥܲܠ ܚܸܡܬܵܝܗܝ ܕܐܵܟ̣ܠܝܼ ܠܡܸܣܟܹܢܵܐ ܒܛܸܫܘܵܐ.܀ ܦܣܸܥܠܘܼܟܼ ܓܵܘ ܝܵܡܵܐ ܥܲܠ ܣܘܼܣܵܘܵܬ̈ܘܼܟܼ ܘܟܸܢܫܵܐ ܪܵܒܵܐ ܕܡܝܼܵܐ.܀ ܫܡܝܼܥܠܝܼ ܘܪܓܸܕܠܵܗ̇ ܟܵܪ݇ܣܝܼ ܕܲܪܩܘܼܒ̣ܠ ܚܲܒܪܵܐ ܕܣܸܦܘܵܬ̈ܝܼ؛ ܥܒ̣ܸܪܵܗ̇ ܪܲܬܪܲܬܵܐ ܒܓܲܪ̈ܡܝܼ ܘܒܸܪ̈ܟܵܟܝܼ ܪܓܸܕܠܗ݇ܘܿܢ؛ ܘܡܘܼܚܒܸܪܹܗ ܘܡܘܼܕܸܥܠܹܗ ܩܵܬܝܼ ܝܵܘܡܵܐ ܕܝܲܠܨܘܼܝ ܕܒܹܐܬܵܝܵܐ ܝ݇ܠܹܗ ܥܲܠ ܛܵܝܸܦܵܐ.܀ ܣܵܒܵܒ ܐܝܼܠܵܢܵܐ ܕܬܹܐܢܵܐ ܠܵܐ ܒܘܼܪܛܸܢܵܗ̇ ܘܠܲܝܬ̇ ܛܲܪ̈ܦܹܐ ܒܓܸܦܬܵܐ.܀ ܛܥܘܼܢܬܵܐ ܕܙܲܝܬܵܐ ܕܘܼܓܸܠܵܗ̇؛ ܘܒܹܐܕܪ̈ܵܬܹܐ ܠܵܐ ܥܒ̣ܸܕܠܗ݇ܘܿܢ ܕܸܚܠܵܐ؛ ܬܸܡܠܗ݇ܘܿܢ ܥܸܪ̈ܒܹܐ ܡ̣ܢ ܦܸܣܩܹ̈ܐ؛ ܘܠܲܝܬ̇ ܬܵܘܪܹ̈ܐ ܓܵܘ ܒܸܩܪܵܐ. ܘܐܵܢܵܐ ܒܡܵܪܝܵܐ ܒܸܬ ܚܵܕܸܢ؛ ܘܒܸܬ ܦܵܨܚܸܢ ܒܐܲܠܵܗܵܐ ܦܵܪܘܿܩܝܼ.܀ ܡܵܪܵܐ ܕܡܵܪ̈ܵܘܵܬܹܐ ܚܲܝܠܝܼ؛ ܕܥܒ̣ܸܕܠܹܗ ܐܲܩܠ̈ܝܼ ܐܲܝܟܼ ܕܐܲܝܠܵܐ؛ ܕܥܲܠ ܕܘܼܟܬܵܐ ܪܵܡܬܵܐ ܩܲܡ ܡܲܟܠܹܐ ܠܝܼ؛ ܕܙܵܡܪܸܢ ܬܸܫܒܘܿܚܝܵܬܹ̈ܗ܀
♱♱♱♱♱♱♱♱
ܬܪܹܝܢܒܫܲܒܵܐ ܕܒܵܥܘܼܬܵܐ ܕܢܝܼܢܘܵܝܹ̈ܐ
ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ
ܕܲܠܘܵܬܼ ܛܝܼܡܵܬܹܐܘܿܣ ܐܲܚܲܝ̈ ܒܲܪܸܟܼܡܵܪܝ܀
ܒܸܛܠܵܒܵܐ ܝ݇ܘܸܢ ܡܸܢܘܼܟܼ ܕܡ̣ܢ ܩܵܕ݇ܡ ܟܠ ܡܸܢܕܝܼ ܒܵܥܘܼܬܵܐ ܘܨܠܘܿܬܵܐ ܘܦܲܪܦܲܠܬܵܐ ܘܫܵܟܲܪܬܵܐ ܗܵܘܸܬ ܡܲܩܪܘܼܒܹܐ ܩܵܐ ܐܲܠܵܗܵܐ ܡ̣ܢ ܓܹܒܵܐ ܕܟܠܲܝܗܝ ܒܢܲܝ̈ܢܵܫܵܐ. ܡ̣ܢ ܓܹܒܵܐ ܕܡܲܠܟܹ̈ܐ ܘܪܹ̈ܫܵܢܹܐ ܩܵܐ ܕܥܵܡܪܝܼ ܒܫܹܠܝܘܼܬܵܐ ܘܢܝܼܚܘܼܬܵܐ ܒܟܠܵܗ̇ ܙܕܘܼܥܬܵܐ ܕܐܲܠܵܗܵܐ ܘܕܸܟܼܝܘܼܬܵܐ* ܣܵܒܵܒ ܐܵܗܵܐ ܝ݇ܠܵܗ̇ ܨܦܵܝ ܘܩܘܼܒܸܠܬܵܐ ܩܵܕ݇ܡ ܐܲܠܵܗܵܐ ܡܲܚܝܼܵܢܲܢ* ܗ̇ܘ ܕܒܵܣܡܵܐ ܠܹܗ ܕܟܠܲܝܗܝ ܒܢܲܝ̈ܢܵܫܵܐ ܚܲܝܝܼ ܘܕܵܝܪܝܼ ܠܝܕܵܥܝܬܵܐ ܕܣܲܪܲܣܬܘܼܬܵܐ* ܣܵܒܵܒ ܚܲܕ݇ ܝܼܠܹܗ ܐܲܠܵܗܵܐ ܘܚܲܕ݇ ܝܼܠܹܗ ܢܵܘܸܢܓ̰ܝܼ ܕܐܲܠܵܗܵܐ ܘܕܒܢܲܝ̈ܢܵܫܵܐ؛ ܒܲܪܢܵܫܵܐ ܝܼܫܘܿܥ ܡܫܝܼܚܵܐ* ܗ̇ܘ ܕܝܘܼܗ݇ܒܸܠܹܗ ܓܵܢܹܗ ܦܘܼܪܩܵܢܵܐ ܡ̣ܢ ܓܹܒܵܐ ܕܟܠ ܐ݇ܢܵܫܵܐ؛ ܣܵܗܕܘܼܬܵܐ ܕܐ݇ܬܹܐܠܵܗ̇ ܒܥܕܵܢܵܗ̇* ܗ̇ܝ ܕܐܵܢܵܐ ܦܸܫܠܝܼ ܡܘܼܬܒܼܵܐ ܡܲܟܪܸܙܵܢܵܗ̇ ܘܫܠܝܼܚܵܗ̇. ܗܵܩܘܼܬܵܐ ܒܹܐܡܵܪܵܐ ܝ݇ܘܸܢ ܘܠܹܐ ܝ݇ܘܸܢ ܕܵܓܘܿܠܹܐ؛ ܕܗܘܹܐܠܝܼ ܡܲܠܦܵܢܵܐ ܕܛܵܝܸܦܹ̈ܐ ܒܗܲܝܡܵܢܘܼܬܵܐ ܕܣܲܪܲܣܬܘܼܬܵܐ* ܗܲܕܟܼܵܐ ܒܵܣܡܵܠܝܼ ܕܗܵܘܝܼ ܓܲܒܼܪܹ̈ܐ ܨܵܠܘܿܝܸܐ ܨܠܘܿܬܵܐ ܒܟܠ ܕܘܼܟܵܐ ܟܲܕ ܡܘܼܪܡܹܐ ܐܝܼܕܵܬܲܝ̈ܗܝ ܒܕܸܟܼܝܘܼܬܵܐ ܘܕܠܵܐ ܟܲܪܒܵܐ ܘܕܠܵܐ ܚܘܼܫܵܒܹ̈ܐ* ܗܲܕܟܼܵܐ ܐܘܼܦ ܒܲܟܼܬܵܬܹ̈ܐ ܒܐܸܣܟܹܝܡܵܐ ܢܲܟܼܘܼܦܵܐ ܕܠܒܼܸܫܬܵܐ؛ ܒܐܵܕܵܒܘܼܬܵܐ ܗܵܘܝܵܐ ܣܵܩܲܠܬܲܝܗܝ ܠܵܐ ܒܓܕܲܠܝܵܬܹ̈ܐ ܘܒܕܲܗܒܼܵܐ ܝܲܢ ܡܲܪ̈ܓܲܢܝܵܬܹܐ ܝܲܢ ܒܓ̰ܘܼܠܹ̈ܐ ܫܲܦܝܼܪܹ̈ܐ* ܐܸܠܵܐ ܒܦܘܼܠܚܵܢܹ̈ܐ ܛܵܒܹ̈ܐ ܐܲܝܟܼ ܕܚܫܝܼܚܬܵܐ ܝ݇ܠܵܗ̇ ܠܒܲܟܼܬܵܬܹ̈ܐ ܕܥܵܒܼܕܝܼ ܩܵܘܠܵܐ ܩܵܐ ܙܕܘܼܥܬܵܐ ܕܐܲܠܵܗܵܐ* ܒܲܟܼܬܵܐ ܒܫܸܠܝܘܼܬܵܐ ܗܵܘܝܵܐ ܒܸܠܝܵܦܵܐ ܒܟܠ ܙܲܒܛܘܼܬܵܐ. ܩܵܐ ܒܲܟܼܬܵܐ ܠܡܵܠܘܿܦܹܐ ܠܹܐ ܝ݇ܘܸܢ ܒܝܼܵܗܒܼܵܐ ܕܲܣܬܘܼܪ؛ ܘܠܵܐ ܠܩܲܫܕܘܼܪܹܐ ܥܲܠ ܓܲܒܼܪܵܐ. ܐܸܠܵܐ ܗܵܘܝܵܐ ܒܫܸܠܝܵܐ* ܣܵܒܵܒ ܐܵܕܵܡ ܦܸܫܠܹܗ ܓܒܼܝܼܠܵܐ ܩܵܕ݇ܡܵܝܬܵܐ ܘܗܵܝܓܵܗ ܚܵܘܵܐ*
♱♱♱♱♱♱♱♱
ܡܬܝ ܝܚ: 23 ‐ ܫܘܠܡܐ.
ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ ܟܪܘܙܘܬܼܐ ܕܡܬܝ
♰ ܘܐ݇ܡܸܪܹܗ ܝܑܼܫܘܿܥ ܠܬܲܠܡܝܼܕܘܼ̈ܗܝ: ܣܵܒܵܒ ܕܐܵܗܵܐ ܦܝܼܫܠܵܗ̇ ܕܘܼܡܵܝܬܵܐ ܡܲܠܟܘܼܬܵܐ ܕܫܡܲܝܵܐ ܠܓܲܒܼܪܵܐ ܡܲܠܟܵܐ ܕܒܥܹܐܠܹܗ ܕܫܵܩܸܠ ܚܸܫܒܘܼܢܵܐ ܡ̣ܢ ܪܹ̈ܓܵܘܵܬܘܼܗܝ: ܘܟܲܕ ܫܘܼܪܹܐ ܠܹܗ ܠܸܫܩܵܠܵܐ، ܡܘܼܩܪܸܒ̣ܠܗ݇ܘܿܢ ܐܸܠܹܗ ܚܲܕ݇ ܕܕܲܝܢܵܢܵܐ ܝܗ݇ܘܵܐ ܪܸܒܘܼ ܟܲܟܪܹ̈ܐ: ܘܟܲܕ ܠܲܝܬ ܗ݇ܘܵܐ ܠܹܗ ܠܸܦܪܵܥܵܐ: ܦܩܝܼܕܠܹܗ ܡܵܪܹܗ ܕܦܵܐܸܫ ܙܘܼܒܢܵܐ ܗ̇ܘ ܘܒܲܟܼܬܹܗ ܘܒܢܘܼܢ̈ܘܼܗܝ ܘܟܠ ܡܸܢܕܝܼ ܕܐܝܼܬܠܹܗ ܘܦܵܪܸܥ: ܘܢܦܝܼܠܹܗ ܗ̇ܘ ܪܹܓܵܐ ܣܓܼܝܼܕܠܹܗ ܐܸܠܹܗ ܘܐ݇ܡܝܼܪܹܗ: ܡܵܪܝܼ ܡܲܪܝܸܚ ܒܹܐܢܵܐ ܥܲܠܝܼ ܘܟܠ ܡܸܢܕܝܼ ܒܸܬ ܦܲܪܥܸܢ ܐܸܠܘܼܟܼ: ܘܪܘܼܚܸܡܠܹܗ ܡܵܪܹܗ ܕܗ̇ܘ ܪܹܓܵܐ ܘܩܲܡ ܫܵܪܹܐܠܹܗ، ܘܕܵܝܢܹܗ ܫܒܼܝܼܩܠܹܗ ܐܸܠܹܗ: ܐܝܼܢܵܐ ܦܠܝܼܛܠܹܗ ܗ̇ܘ ܪܹܓܵܐ: ܘܡܘܼܫ݇ܟ̰ܸܚܠܹܗ ܚܲܕ݇ ܡ̣ܢ ܚܲܒܼܪ̈ܵܘܵܬܘܼܗܝ: ܕܕܲܝܢܵܢܵܐ ܝܗ݇ܘܵܐ ܐܸܠܹܗ ܐܸܡܵܐܐ ܕܹܝܢܵܪܹ̈ܐ: ܘܕܒܼܝܼܩܠܹܗ ܕܚܵܢܸܩ ܗ݇ܘܵܐܠܹܗ ܘܐ݇ܡܝܼܪܹܗ ܐܸܠܹܗ: ܗܲܒَܼܠܝܼ ܡܸܢܕܝܼ ܕܕܲܝܢܵܢܵܐ ܝܘܸܬ ܐܸܠܝܼ: ܘܢܦܝܼܠܹܗ ܗ̇ܘ ܚܵܒܼܪܹܗ ܥܲܠ ܐܲܩܠܵܬܘܼ̈ܗܝ، ܘܒܥܹܐܠܹܗ ܡܸܢܹܗ ܒܹܐܡܵܪܵܐ: ܡܲܪܝܸܚ ܒܹܐܢܵܐ ܥܲܠܝܼ ܘܒܸܬ ܦܲܪܥܸܢ ܐܸܠܘܼܟܼ: ܐܝܼܢܵܐ ܗ̇ܘ ܠܵܐ ܒܣܝܼܡܠܵܐ ܠܹܗ، ܐܸܠܵܐ ܐ݇ܙܝܼܠܹܗ ܘܡܘܼܕܪܹܐܠܹܗ ܓܵܘ ܒܹܝܬ ܐܲܣܝܼܪܹ̈ܐ ܗܲܠ ܕܝܲܗ݇ܒܼܸܠ ܐܸܠܹܗ ܡܸܢܕܝܼ ܕܕܵܝܢܵܢܵܐ ܝܠܹܗ ܐܸܠܹܗ: ܐܝܼܢܵܐ ܟܲܕ ܚܙܹܐܠܗ݇ܘܿܢ ܚܲܒܼܪ̈ܵܘܵܬܲܝܗܝ، ܡܸܢܕܝܼ ܕܗ݇ܘܹܐܠܹܗ: ܪܵܒܵܐ ܦܫܝܼܡܠܗ݇ܘܿܢ: ܘܐ݇ܬܹܐܠܗ݇ܘܿܢ ܡܘܼܕܸܥܠܗ݇ܘܿܢ ܠܡܵܪܲܝܗܝ ܟܠ ܡܸܢܕܝܼ ܕܗ݇ܘܹܐ ܠܹܗ: ܗܿܝܓܵܗ̇ ܩܲܡ ܩܵܪܹܐܠܹܗ ܡܵܪܹܗ ܘܐ݇ܡܝܼܪܹܗ ܐܸܠܹܗ: ܪܹܓܵܐ ܒܝܼܫܵܐ ܟܠܹܗ ܗ̇ܘ ܕܵܝܢܵܐ ܫܒܼܝܼܩܠܝܼ ܐܸܠܘܼܟܼ ܒܗ̇ܝ ܕܛܠܝܼܒܠܘܼܟ ܡܸܢܝܼ: ܠܹܐ ܗ݇ܘܵܐ ܘܵܓ̰ܸܒ ܐܸܠܘܼܟܼ ܐܘܼܦ ܐܲܢ݇ܬ ܕܪܲܚܡܸܬ ܗ݇ܘܵܐ ܠܚܲܒܼܪܘܼܟܼ ܕܲܐܟܼܝܼ ܕܐܵܢܵܐ ܪܘܼܚܸܡܠܝܼ ܥܲܠܘܼܟܼ؟ ܘܟܪܝܼܒܠܹܗ ܡܵܪܹܗ ܘܩܲܡ ܣܵܦܹܐܠܹܗ ܠܓ̰ܲܢܓ̰ܸܪ̈ܵܢܹܐ ܗܲܠ ܕܦܵܪܸܥ ܟܠ ܡܸܢܕܝܼ ܕܕܲܝܢܵܢܵܐ ܝܠܹܗ ܐܸܠܹܗ: ܗܲܕܟܼܵܐ ܒܸܬ ܥܵܒܼܸܕ ܐܸܠܵܘܟܼܘܿܢ ܒܵܒܝܼ ܕܒܫܡܲܝܵܐ، ܐܸܢ ܠܵܐ ܡ̣ܢ ܠܸܒܵܘܟܼܘܿܢ ܫܲܒܼܩܝܼܬܘܿܢ ܐ݇ܢܵܫܵܐ ܠܐܲܚܘܿܢܘܼܗܝ ܣܲܟܼܠܘܼܬܹܗ.
♱♱♱♱♱♱♱♱