ܚܲܕܼܒܫܲܒܵܐ ܕܬܡܵܢܝܵܐ ܕܕܸܢܚܵܐ
ܡܲܦܩܵܢܵܐ ܝܗ؛ 22‐27
ܬܸܒ̣ܘ ܘܲܫܠܵܘ ܡܲܦܩܵܢܵܐ ܣܸܦܪܵܐ ܕܲܬܼܪܹܝܢ ܕܐܘܿܪܵܝܬܵܐ
ܐܲܚܲܝ̈ ܒܲܪܸܟ̣ܡܵܪܝ܀
ܘܡܘܼܫܩܸܠܹܗ [ܘܡܫܘܼܢܹܐܠܹܗ] ܡܘܼܫܹܐ ܠܒܹܝܬ̣ ܝܼܣܪܵܝܹܠ ܡ̣ܢ ܝܵܡܵܐ ܕܣܘܿܦ؛ ܘܦܠܸܛܠܗ݇ܘܿܢ ܠܒܲܪܝܼܵܐ ܕܫܘܿܪ؛ ܘܐ݇ܬܹܐܠܗ݇ܘܿܢ ܐܘܼܪܚܵܐ ܕܬܠܵܬܵܐ ܝܵܘܡܵܢܹ̈ܐ ܓܵܘ ܒܲܪܝܼܵܐ؛ ܘܠܵܐ ܡܘܼܫ݇ܟ̰ܸܚܠܗ݇ܘܿܢ ܡܝܼܵܐ.܀ ܘܐ݇ܬܹܐܠܗ݇ܘܿܢ ܠܡܘܼܪܲܬ؛ ܘܠܵܐ ܡܨܹܐܠܗ݇ܘܢ ܠܸܫܬܵܝܵܐ ܡܝܼܵܐ ܡ̣ܢ ܡܘܼܪܲܬ؛ ܣܵܒܵܒ ܕܡܲܪܝܼܪܹ̈ܐ ܗ݇ܘܵܘ؛ ܒܘܼܬ ܕܐܵܗܵܐ؛ ܩܪܹܐܠܹܗ ܫܸܡܹܗ ܕܗ̇ܘ ܐܲܬܪܵܐ ܡܘܼܪܲܬ.܀ ܘܛܘܼܪܛܸܡܠܗ݇ܘܿܢ ܛܵܝܸܦܵܐ ܥܲܠ ܡܘܼܫܹܐ ܘܐܵܡܪܝܼ ܐܸܠܹܗ؛ ܡܘܼܕܝܼ ܫܵܬܲܚ؟܀ ܘܨܘܼܠܹܐܠܹܗ ܡܘܼܫܹܐ ܩܵܕ݇ܡ ܡܵܪܝܵܐ؛ ܘܡܘܼܚܙܹܐܠܹܗ ܡܵܪܝܵܐ ܚܲܕ݇ ܩܲܝܣܵܐ؛ ܘܪܘܼܦܹܐܠܹܗ ܓܵܘ ܡܝܼܵܐ ܘܚܠܹܐܠܗ݇ܘܿܢ ܡܝܼܵܐ؛ ܘܬܵܡܵܐ ܡܘܼܠܸܦܠܹܗ ܢܵܡܘܿܣܹ̈ܐ ܘܕܝܼܘܵܢܹ̈ܐ؛ ܘܬܵܡܵܐ ܓ̰ܘܼܪܸܒܠܹܗ.܀ ܘܐ݇ܡܸܪܹܗ ܐܸܠܹܗ ܐܸܢ ܫܡܲܥܝܵܐ ܫܵܡܥܸܬ̇ ܒܩܵܠܹܗ ܕܡܵܪܝܵܐ ܐܲܠܵܗܵܐ؛ ܘܡܸܢܕܝܼ ܨܦܵܝܝܼ ܥܵܒ̣ܕܸܬ̇ ܩܵܕ݇ܡܹܗ؛ ܘܡܲܨܝܸܬܸܬ̇ ܠܦܘܼܩܕܵܢܹܗ؛ ܆ܘܢܵܛܪܸܬ̇ ܟܠܲܝܗܝ ܩܵܘܠܘܼ̈ܗܝ؛ ܟܠܲܝܗܝ ܡܚܵܝܵܬܹ̈ܐ ܕܡܘܼܬܹܐܠܝܼ ܥܲܠ ܡܸܨܪ̈ܵܝܹܐ؛ ܠܹܐ ܡܲܝܬ݇ܝܸܢܗ݇ܘܿܢ ܥܲܠܘܼܟܼ؛ ܣܵܒܵܒ ܕܐܵܢܵܐ ܝ݇ܘܸܢ ܡܵܪܝܵܐ ܒܲܣܡܵܢܘܼܟܼ܀
ܚܲܒ̣ܪܹܗ
ܐܹܫܲܥܝܵܐ ܡܕ؛ 14
ܫܠܵܘ ܢܒ̣ܝܼܘܼܬܹܗ ܕܐܹܫܲܥܝܵܐ؛ ܐܲܚܲܝ̈ ܒܲܪܸܟ̣ܡܵܪܝ܀
ܫܲܒܚܘܿܢ ܫܡܲܝܵܐ ܣܵܒܵܒ ܕܐܲܢܹܐ ܕܥܒ̣ܸܕܠܹܗ ܡܵܪܝܵܐ. ܡܲܩܘܸܚܘܿܢ ܒܸܢܝܲܬܹ̈ܐ ܕܐܲܪܥܵܐ؛ ܦܨܘܿܚܘܿܢ ܛܘܼܪ̈ܵܢܹܐ ܒܬܸܫܒܘܿܚܬܵܐ؛ ܡܲܝܫܵܐ ܘܟܠܲܝܗܝ ܐܝܼܠܵܢܹ̈ܐ ܕܓܵܘܹܗ. ܘܦܘܼܪܸܩܠܹܗ ܡܵܪܝܵܐ ܠܝܲܥܩܘܿܒ̣ ܘܒܝܼܣܪܵܝܹܠ ܦܸܫܠܹܗ ܫܘܼܒܚܵܐ.܀ ܗܵܕܟ̣ܵܐ ܒܹܐܡܵܪܵܐ ܝ݇ܠܹܗ ܡܵܪܝܵܐ؛ ܕܩܵܡ ܦܵܪܸܩܠܘܼܟܼ ܘܓܵܒ̣ܸܠܘܼܟܼ ܒܡܲܪܒܥܵܐ ܘܗܲܝܸܪܘܼܟܼ.܀ ܐܵܢܵܐ ܝ݇ܘܸܢ ܡܵܪܝܵܐ ܕܥܒ̣ܸܕܠܝܼ ܟܠ ܡܬܸܚܠܝܼ ܫܡܲܝܵܐ ܠܚܘܿܕܝܼ؛ ܘܪܩܝܼܥܠܝܼ ܐܲܪܥܵܐ ܗܲܪ ܐܵܢܵܐ ܒܓܵܢܝܼ.܀ ܡܒܲܛܠܵܢܵܐ ܕܢܝܼܫܲܢܩܹܐ ܕܚܲܪ̈ܵܫܹܐ ܘܚܸܪ̈ܫܲܝܗܝ ܟܹܐ ܫܵܪܸܢ ܡܲܕܸܪܵܢܵܐ ܕܦܲܪ̈ܡܝܼܵܢܹܐ ܠܵܒܵܬ݇ܪܵܐ ܘܝ݇ܕܵܥܝܬܲܝܗܝ ܥܵܒ̣ܕܸܢ ܣܲܟ̣ܠܹ̈ܐ. ܡܲܩܸܡܵܢܵܐ ܕܗܹܡܸܙܡܵܢ ܕܪܸܓܹܗ؛ ܘܚܝܼܵܠ ܕܩܵܨܸܕ̈ܘܼܗܝ ܟܹܐ ܡܬܲܡܸܡ؛ ܕܐ݇ܡܸܪܹܗ ܠܐܘܿܪܸܫܠܸܡ ܕܦܵܝܫܵܐ ܡܘܼܥܡܸܪܬܵܐ. ܘܡܵܬܘܵܬܹ̈ܐ ܕܝܼܗܘܼܕܵܐ ܕܦܵܝܫܝܼ ܒܸܢܝܹ̈ܐ؛ ܘܚܵܪ̈ܵܒܝܼܵܗ̇ ܦܵܝܫܝܼ ܡܘܼܩܸܡܹܐ ܕܐ݇ܡܸܪܹܗ ܠܥܘܼܡܩܵܐ ܕܚܵܪܸܒ̣ ܘܢܲܗܪ̈ܵܘܵܬܘܼܟܼ ܡܲܒܪܸܙܸܢ؛ ܕܐ݇ܡܸܪܹܗ ܠܟܘܼܪܸܫ ܪܵܥܝܝܼ ܝ݇ܠܹܗ؛ ܘܒܸܬ ܬܲܡܸܡ ܟܠܹܗ ܪܸܙܵܝܝܼ؛ ܠܹܐܡܵܪܵܐ ܠܐܘܿܪܸܫܠܸܡ ܕܦܵܝܫܵܐ ܒܢܝܼܬܵܐ؛ ܘܗܲܝܟܠܵܐ ܦܵܐܹܫ ܡܘܼܟܡܸܠܵܐ.܀ ܗܵܕܟ̣ܵܐ ܒܹܐܡܵܪܵܐ ܝ݇ܠܹܗ ܡܵܪܝܵܐ ܠܡܫܝܼܚܹܗ؛ ܕܒ̣ܸܩܠܝܼ ܒܝܲܡܝܼܢܹܗ ܕܟܘܼܪܸܫ؛ ܦܵܝܫܝܼ ܙܘܼܒܛܸܢܹܐ ܩܵܕ݇ܡܘܼܗܝ ܛܵܝܸܦܹ̈ܐ؛ ܘܚܵܨܵܐ ܕܡܲܠܟܹ̈ܐ ܒܸܬ ܫܵܪܸܢ. ܠܸܦܬܵܚܵܐ ܩܵܕ݇ܡܘܼܗܝ ܬܲܪ̈ܥܵܢܹܐ؛ ܘܬܲܪ̈ܥܵܢܹܐ ܠܹܐ ܦܵܝܫܝܼ ܕܒ̣ܝܼܪܹ̈ܐ.܀ ܐܵܢܵܐ ܒܸܬ ܐܵܙܸܠ݇ܢ ܩܵܕ݇ܡܘܼܗܝ؛ ܥܲܣܩܘܼܝܵܬܹ̈ܐ ܒܸܬ ܥܵܒ̣ܕܸܢ ܗܵܣܵܢܵܝܝܼ؛ ܬܲܪ̈ܥܵܢܹܐ ܕܒܪܸܢܓ̰ ܒܸܬ ܫܵܡܛܸܢ؛ ܘܕܘܿܪܹ̈ܐ ܕܦܲܪܙܠܵܐ ܒܸܬ ܩܵܛܥܸܢ.܀ ܘܒܸܬ ܝܵܗ݇ܒ̣ܸܢܘܼܟܼ ܚܲܙܝܼܢܹ̈ܐ ܕܓܵܘ ܚܸܫܟܵܐ؛ ܘܛܡܘܼܪ̈ܝܵܬܹܐ ܛܘܼܫܝܹܐ؛ ܩܵܐ ܕܝܵܕܥܸܬ̇ ܕܐܵܢܵܐ ܝ݇ܘܸܢ ܡܵܪܝܵܐ ܕܩܲܡ ܩܵܪܸܢܘܼܟܼ ܒܫܸܡܘܼܟܼ ܐܲܠܵܗܹܗ ܕܝܼܣܪܵܝܹܠ܀
♱♱♱♱♱♱♱♱
ܚܕܒܫܒܐ ܚ ܕܕܸܢܚܵܐ
ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ
ܕܲܠܘܵܬܼ ܐܵܦܸܣܵܝܹ̈ܐ ܐܲܚܲܝ̈ ܒܲܪܸܟܼܡܵܪܝ܀
ܒܘܼܬ ܕܐܵܗܵܐ؛ ܐܘܼܦ ܐܵܢܵܐ ܗܵܐ ܡ̣ܢ ܕܫܡܝܼܥܠܝܼ ܗܲܝܡܵܢܘܼܬܵܘܟܼܘܿܢ ܒܡܵܪܲܢ ܝܼܫܘܿܥ ܡܫܝܼܚܵܐ ܘܚܘܼܒܵܘܟܼܘܿܢ ܕܠܟܸܣ ܟܠܲܝܗܝ ܩܲܕܝܼܫܹ̈ܐ* ܠܹܐ ܝ݇ܘܸܢ ܒܸܫܠܵܝܵܐ ܡ̣ܢ ܠܫܵܟܘܿܪܹܐ ܒܘܼܬ ܕܝܼܵܘܟܼܘܿܢ ܘܠܸܕܟܼܵܪܵܘܟܼܘܿܢ ܒܨܠܵܘܵܬ̈ܝܼ* ܕܐܲܠܵܗܹܗ ܕܡܵܪܲܢ ܝܼܫܘܿܥ ܡܫܝܼܚܵܐ ܒܵܒܵܐ ܕܚܸܩܪܵܐ ܝܵܗܒܼܸܠ ܠܵܘܟܼܘܿܢ ܪܘܼܚܵܐ ܕܦܲܪܡܵܝܬܵܐ ܘܕܓܸܠܝܵܢܵܐ ܒܝ݇ܕܵܥܝܼܬܹܗ* ܘܒܲܗܪܸܢܝܼ ܥܲܝܢܹ̈ܐ ܕܠܸܒܵܘܵܬܵܘ̈ܟܼܘܿܢ ܕܝܵܕܥܝܼܬܘܿܢ ܡܘܼܕܝܼ ܝ݇ܠܵܗ̇ ܗܹܒܼܝܼ ܕܟ̰ܝܵܕܬܹܗ؛ ܘܡܘܼܕܝܼ ܝ݇ܠܵܗ̇ ܕܵܘܸܠܬܵܐ ܕܚܸܩܪܵܐ ܕܝܵܪܬܘܼܬܹܗ ܒܩܲܕܝܼܫܹ̈ܐ* ܘܡܘܼܕܝܼ ܝ݇ܠܵܗ̇ ܒܘܼܫܵܝܘܼܬܵܐ ܕܓܘܼܪܘܼܬܵܐ ܕܚܲܝܠܹܗ. ܒܝܲܢ ܐܲܚܢܲܢ ܕܗܲܡܘܼܢܹܐ ܝ݇ܘܲܚ؛ ܐܲܝܟܼ ܡܲܦܠܲܚܬܵܐ ܕܙܲܪܒ ܕܚܲܝܠܹܗ* ܕܥܵܒܼܸܕܠܹܗ ܒܡܫܝܼܚܵܐ؛ ܘܡܘܼܩܸܡܠܹܗ ܡ̣ܢ ܓܵܘ ܡܝܼܬܹ̈ܐ ܘܡܘܼܬܸܒܼܠܹܗ ܡ̣ܢ ܝܲܡܝܼܢܹܗ ܓܵܘ ܫܡܲܝܵܐ* ܠܥܘܼܠܘܼܠ ܡ̣ܢ ܟܠ ܫܸܡܵܐ ܕܦܝܵܫܵܐ ܝ݇ܠܹܗ ܡܫܘܼܡܗܵܐ. ܠܵܐ ܐܲܚܟ̰ܝܼ ܒܐܵܗܵܐ ܥܵܠܡܵܐ. ܐܸܠܵܐ ܐܘܼܦ ܒܗ̇ܘ ܕܐܵܬܹܐ* ܘܙܘܼܒܛܸܢܹܗ ܟܠ ܡܸܢܕܝܼ ܬܚܘܿܬ ܐܲܩܠܵܬ̈ܘܼܗܝ ܘܐܸܠܹܗ ܕܝܼܠܹܗ ܠܥܘܼܠܘܼܠ ܡ̣ܢ ܟܠ ܥܵܒܼܸܕܠܹܗ ܪܹܫܵܐ ܠܥܹܕܬܵܐ ܕܝܼܠܵܗ̇ ܓܘܼܫܡܹܗ. ܘܬܲܡܲܡܬܵܐ ܕܗ̇ܘ ܕܟܠ ܒܟܠ ܡܬܲܡܸܡ* ܐܘܼܦ ܐܹܠܵܘܟܼܘܿܢ ܕܡܝܼܬܹ̈ܐ ܝ݇ܬܘܿܢ ܗ݇ܘ̣ܵܘ ܒܚܛܝܼܵܬܹ̈ܐ ܘܓܢܵܗܹ̈ܐ* ܒܐܲܢܹܐ ܕܡ̣ܢ ܩܵܕ݇ܡܵܝܬܵܐ ܒܸܚܕܵܪܵܐ ܝ݇ܬܘܿܢ ܗ݇ܘ̣ܵܘ ܐܲܝܟܼ ܥܵܠܡܵܝܘܼܬܹܗ ܕܐܵܗܵܐ ܥܵܠܡܵܐ؛ ܘܐܲܝܟܼ ܪܸܙܵܝܹܗ ܕܪܹܫܵܐ ܕܗܘܼܟܡܵܐ ܕܗܵܘܵܐ ܕܐܵܗܵܐ ܪܘܼܚܵܐ ܕܒܸܦܠܵܚܵܐ ܝ݇ܠܵܗ̇ ܒܒܢܘܼܢܹ̈ܐ ܕܠܵܐ ܡܲܨܝܲܬܬܵܐ* ܗܲܪ ܒܐܲܢܹܐ ܦܘܼܠܚܵܢܹ̈ܐ ܐܘܼܦ ܐܲܚܢܲܢ ܚܕܸܪܲܢ ܡ̣ܢ ܩܵܕ݇ܡܵܝܬܵܐ ܒܫܲܗܘܲܬܝܵܬܹ̈ܐ ܕܒܸܣܪܲܢ ܘܥܵܒܼܸܕܠܲܢ ܪܸܙܵܝܵܐ ܕܒܸܣܪܲܢ ܘܚܝܼܵܠܲܝ̈ܢ؛ ܘܗܘܹܐܠܲܢ ܒܢܘܼܢܹ̈ܐ ܕܟܲܪܒܵܐ ܟܵܡܝܼܠ ܐܲܝܟܼ ܣܵܡܵܐ ܦܝܼܫܵܐ* ܐܝܼܢܵܐ ܐܲܠܵܗܵܐ ܕܝܼܠܹܗ ܥܲܬܝܼܪܵܐ ܒܪ̈ܲܚܡܘܼܗܝ ܒܘܼܬ ܚܘܼܒܿܗ ܓܘܼܪܵܐ ܕܩܲܡ ܡܲܚܸܒ ܠܲܢ܋ ܟܲܕ ܡܝܼܬܹ̈ܐ ܝ݇ܘܲܚ ܗ݇ܘܼܵܘ ܒܚ̈ܛܝܼܵܬܲܢ؛ ܩܲܡ ܡܲܚܸܐ ܠܲܢ ܥܲܡ ܡܫܝܼܚܵܐ. ܘܒܫܵܦܵܩܲܬ ܕܝܼܹܗ ܩܲܡ ܦܵܪܸܩܠܲܢ* ܘܩܲܡ ܡܲܩܸܡ ܠܲܢ ܥܲܡܹܗ ܘܡܲܬܸܒܼܠܲܢ ܥܲܡܹܗ ܒܫܡܲܝܵܐ ܒܝܼܫܘܿܥ ܡܫܝܼܚܵܐ܋ ܕܡܲܕܸܥ ܠܕܵܘܪܹ̈ܐ ܕܐܵܬܝܼ ܓܘܼܪܘܼܬܵܐ ܕܕܵܘܸܠܬܵܐ ܕܫܵܦܵܩܲܬܹܗ ܘܒܲܣܝܼܡܘܼܬܹܗ ܕܗܘܹܐܠܵܗ̇ ܥܲܠܲܢ ܒܝܼܫܘܿܥ ܡܫܝܼܚܵܐ*
♱♱♱♱♱♱♱♱
ܡܪܩܘܣ ܐ: 1 ‐ 12
ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ ܟܪܘܙܘܬܼܐ ܕܡܪܩܘܣ
♰ ܪܹܫܵܐ ܕܐܹܘܲܢܓܲܠܝܼܘܿܢ ܕܝܼܫܘܿܥ ܡܫܝܼܚܵܐ ܒܪܘܿܢܹܗ ܕܐܲܠܵܗܵܐ. ܐܲܝܟܼ ܕܟܬܝܼܒܼܵܐ ܝܠܹܗ ܒܐܹܫܲܥܝܵܐ ܢܒܼܝܼܵܐ: ܕܗܵܐ ܡܫܵܕܘܼܪܹܐ ܝܘܸܢ ܡܲܠܲܐܟܼܝܼ ܩܵܕ݇ܡ ܦܲܪܨܘܿܦܘܼܟܼ ܕܬܵܪܸܨ ܐܘܼܪܚܘܼܟܼ. ܩܵܠܵܐ ܕܩܵܪܹܐ ܒܒܲܪܝܼܵܐ: ܗܲܕܪܘܿܢ ܐܘܼܪܚܹܗ ܕܡܵܪܝܵܐ، ܘܡܲܫܘܲܝܡܘܿܢ ܫܒ̣ܝܼܠܘܼ̈ܗܝ: ܗ݇ܘܹܐܠܹܗ ܝܘܿܚܲܢܵܢ ܒܒܲܪܝܼܵܐ ܡܲܥܡܘܼܕܹܐ ܘܡܲܟܪܘܼܙܹܐ ܡܲܥܡܘܿܕܝܼܬܵܐ ܕܬܝܵܒܼܘܼܬܵܐ ܠܫܘܼܒܼܩܵܢܵܐ ܕܚܛܝܼܵܬܹ̈ܐ. ܘܦܵܠܸܛ ܗ݇ܘܵܐ ܠܘܵܬܹܗ ܟܠܹܗ ܐܲܬܪܵܐ ܕܝܼܗܘܼܕܵܐ ܘܟܠܲܝܗܝ ܒܢܲܝ̈ ܐܘܿܪܸܫܠܸܡ ܘܡܲܥܡܸܕ ܗ݇ܘܵܐ ܠܗ݇ܘܿܢ ܒܝܘܿܪܕܢܲܢ ܢܲܗܪܵܐ: ܟܲܕ ܡܵܘܕܝܼ ܗ݇ܘܵܘ ܒܚܛܝܼܵܬܲܝ̈ܗܝ. ܐܝܼܢܵܐ ܐܵܗܵܐ ܝܘܿܚܲܢܲܢ ܠܒܼܝܼܫܵܐ ܗ݇ܘܵܐ ܠܒܼܝܼܫܬܵܐ ܕܣܲܥܪܵܐ ܕܓܘܼܡܠܹ̈ܐ: ܘܐ݇ܤܝܼܪܵܐ ܝܗ݇ܘܵܐ ܬܲܣܡܵܐ ܕܓܸܠܕܵܐ ܒܚܲܨܘܼܗܝ: ܘܡܹܐܟܼܘܼܠܬܹܗ ܝܑܼܗَܘܵܐ ܩܲܡܨܹ̈ܐ ܘܕܸܒܼܫܵܐ ܕܒܲܪܝܼܵܐ. ܘܡܲܟܪܸܙ ܗ݇ܘܵܐ ܘܐܵܡܸܪ: ܗܵܐ ܒܹܐܬܵܝܵܐ ܝܠܹܗ ܡ̣ܢ ܒܵܬ݇ܪ ܡܸܢܝܼ ܕܒܘܼܫ ܚܲܝܠܵܢܵܐ ܝܠܹܗ ܡܸܢܝܼ، ܗ̇ܘ ܕܠܹܐ ܚܲܫܚܸܢ ܐܵܢܵܐ ܕܟܲܝܦܸܢ ܫܵܪܸܢ ܬܲܣܡܵܬܹ̈ܐ ܕܨܵܘܠܘܼ̈ܗܝ. ܐܵܢܵܐ ܡܲܥܡܘܼܕܵܘܟܼܘܿܢ ܝܘܸܢ ܒܡܝܼ̈ܵܐ: ܐܝܼܢܵܐ ܗ̇ܘ ܒܸܕ ܡܲܥܡܸܕ ܠܵܘܟܼܘܿܢ ܒܪܘܼܚܵܐ ܕܩܘܼܕܫܵܐ. ܘܗ݇ܘܹܐܠܵܗ̇ ܒܐܵܢܝܼ ܝܵܘܡܵܢܹ̈ܐ، ܐ݇ܬܹܐܠܹܗ ܝܑܼܫܘܿܥ ܡ̣ܢ ܢܲܨܪܲܬ ܕܓܠܝܼܠܵܐ، ܘܦܝܼܫܠܹܗ ܥܡܝܼܕܵܐ ܒܝܘܿܪܕܢܲܢ ܡ̣ܢ ܝܘܿܚܲܢܵܢ. ܘܗܲܪ ܒܥܸܕܵܢܵܐ ܕܣܝܼܠ݇ܩܠܹܗ ܡ̣ܢ ܡܝܼ̈ܵܐ، ܚܙܹܐܠܹܗ ܕܦܝܼܫܠܵܗ̇ ܦܬܝܼܚܬܵܐ ܫܡܲܝܵܐ: ܘܪܘܼܚܵܐ ܐܲܝܟܼ ܝܵܘܢܵܐ ܕܨܠܹܐܠܵܗ̇ ܥܲܠܘܼܗܝ. ܘܩܵܠܵܐ ܗ݇ܘܹܐܠܹܗ ܡ̣ܢ ܫܡܲܝܵܐ: ܐܲܢ݇ܬ ܝܼܘܸܬ ܒܪܘܿܢܝܼ ܚܲܒܝܼܒܼܵܐ ܒܝܼܘܼܟܼ ܒܣܸܡܠܵܐ ܠܝܼ.
♱♱♱♱♱♱♱♱