ܚܲܕܼܒ̇ܫܲܒܵܐ ܕܲܬ̣ܡܵܢܝܵܐ ܕܕܸܢܚܵܐ
ܡܲܪܡܝܼܬܼܵܐ ܕܐ݇ܪ̈ܵܙܹܐ. ܫܲܒܲܚܘ ܠܡܵܪܝܵܐ ܬܸܫܒ̇ܘܿܚܬܵܐ ܚܕܲܬܵܐ.
ܥܘܿܢܝܼܬܼܵܐ ܕܩܲܢܟܹ̇ܐ. ܒܩܵܠ؛ ܡܫܝܼܚܵܐ ܐܸܬܼܝܼܠܸܕܼ.
ܫܡܲܥܘ ܗܵܕܹܐ ܟܠܟ̣ܘܿܢ ܥܲܡܡܹ̈ܐ. ܬܵܘ ܚܙܵܘ ܥܒ̣ܵܕܼܵܘ̈ܗܝ ܕܐܲܠܵܗܵܐ. ܓܡܘܼܪܬܵܐ ܩܲܪܸܒܼ ܗ̣݇ܘܵܐ ܣܪܵܦܵܐ ܠܲܢܒ̣ܝܼܵܐ؛ ܦܲܓ̣ܪܹܗ ܐܸܬܼܩܲܕܲܫ ܘܥܵܘܠܹܗ ܐܸܬܼܚܲܣܝܼ. ܒܐ݇ܪ̈ܵܙܹܐ ܡܲܚܝܵܢܹ̈ܐ ܩܪܘܿܒ̣ܘ ܥܲܡܡܹ̈ܐ ܘܕܲܟܵܘ؛ ܡܘܼܡܹ̈ܐ ܕܦܲܓ̣ܪ̈ܲܝܟܿܘܿܢ ܘܚܵܘܒܹ̈ܐ ܕܢܲܦ̮̈ܫܵܬܼܟܼܘܿܢ. ܬܢܝܼ. ܫܲܒܲܚ. ܨܠܝܼܒܼܵܐ ܕܲܗܘܸܵܐ ܠܲܢ ܥܸܠܲܬܼ ܛܵܒ̣̈ܵܬܼܵܐ. ܘܒܹܗܸܘ ܐܸܬ̣ܚܲܪܲܪ ܓܸܢܣܲܢ ܡܵܝܘܿܬܼܵܐ. ܗܸܘ ܡܵܪܝ ܢܸܗܘܸܐ ܠܲܢ ܫܘܼܪܵܐ ܚܲܣܝܼܢܵܐ. ܘܒܹܗ ܢܸܙܟܹ̇ܝܘܗܝ ܠܒܼܝܼܫܵܐ ܘܟܼܠܗܹܝܢ ܨܸܢܥܵܬܹ̈ܗ.
ܩܸܪܝܵܢܵܐ. ܡܲܦܩܵܢܵܐ؛ ܝܗ؛22‐27 ܚܲܒ̣ܪܹܗ. ܐܹܫܲܥܝܵܐ؛ ܡܕ؛23‐ܡܗ؛8
ܫܘܼܪܵܝܵܐ.ܘ܀ ܡܵܐ ܣܲܓܿܝܼܐܵܐ ܛܲܝܒܿܘܼܬܼܵܟܼ ܕܢܵܛܲܪ ܐܲܢ݇ܬܿ ܠܕܼܵܚܠܲܝ̈ܟ* ܠܕܲܡܣܲܒܿܪܝܼܢ ܒܵܟܼ ܩܕܼܵܡ ܒܢܲܝ̈ܢܵܫܵܐ* ܕܟܲܣܸܐ ܐܸܢܘܿܢ ܒܣܸܬܵܪܹܗ ܕܦܲܪܨܘܿܦܵܟܼ* ܡ̣ܢ ܕܠܘܼܚܝܵܐ ܕܲܒܼܢܲܝ̈ܢܵܫܵܐ* ܬܟܲܣܸܐ ܐܸܢܘܿܢ ܒܛܸܠܵܠܵܟܼ ܡ̣ܢ ܚܸܪܝܵܢܵܐ* ܒܪܝܼܟܼܘܼ ܡܵܪܝܵܐ ܕܲܓܼܒܼܵܐ ܠܹܗ ܓܒܲܝ̈ܵܐ ܒܲܩܪܝܼܬܼܵܐ ܥܲܫܝܼܢܬܵܐ*
ܫܠܝܼܚܵܐ. ܐܵܦܸܣܵܝܹ̈ܐ؛ ܐ؛15‐ܒ؛8
ܙܘܼܡܵܪܵܐ. ܒܲܫܡܲܝܵܐ ܡܸܫܬܲܥܹܝܢ. ܡܵܪܝܵܐ ܐܲܡ̣ܠܸܟܼ ܬܕܼܘܼܨ ܐܲܪܥܵܐ. ܘܢܸܚ̈ܕܿܝܵܢ ܓܵܙܪ̈ܵܬܼܵܐ ܣܲܓܝܼ̈ܐܵܬܼܵܐ. ܒ܀ ܥܢܵܢܹ̈ܐ ܘܥܲܪ̈ܦܸܠܹܐ ܚܕܼܵܪ̈ܵܘܗܝ. ܒܙܲܕܝܼܩܘܼܬܼܵܐ ܘܲܒܼܕܼܝܼܢܵܐ ܡܲܬܼܩܲܢ ܟܘܼܪܣܝܹܗ. ܒ܀
ܐܹܘܲܢܓܲܠܝܼܘܿܢ. ܡܲܪܩܘܿܣ؛ ܐ؛1‐12
ܥܘܿܢܝܼܬܼܵܐ ܕܐ݇ܪ̈ܵܙܹܐ. ܒܢܸܬ̇ܛܲܝܲܒܼ ܒܕܸܚܠ̱ܬܼܵܐ.
ܐܲܠܵܗܵܐ ܬܘܼܟܼܠܵܢܝ ܕܡ̣ܢ ܛܲܠܝܘܼܬܼܝ. ܐܸܢܵܐ ܕܹܝܢ ܥܠܲܝܟ ܡܵܪܝܵܐ ܐܸܬ̇ܬܲܟܼܠܹܬܼ. ܬܘܼܟܼܠܵܢܵܐ ܕܐܝܼܬܼ ܠܲܢ ܡܵܪܲܢ ܥܲܠ ܪ̈ܲܚܡܲܝܟ. ܡܓܲܪܸܓܼ ܠܲܢ ܕܢܸܫܐܲܠ ܡܸܢܵܟܼ ܫܘܼܒ̣ܩܵܢܵܐ. ܠܵܐ ܗ݇ܘ̤ܵܐ ܕܲܚܢܲܢ ܫܵܘܹܝ̇ܢܲܢ ܡܵܪܝܵܐ. ܐܸܠܵܐ ܕܐܲܢ݇ܬ̇ܘܼ ܡܙܲܕܸܩ ܐܲܢ݇ܬ̇ ܡܲܓܵܢ. ܠܲܕܼܩܵܪܹܝ̇ܢ ܠܵܟܼ ܒܪ̈ܲܚܡܹܐ ܫܦܝܼܥܹ̈ܐ ܕܛܲܝܒ̇ܘܼܬܼܵܐ. ܬܢܝܼ. ܫܲܒܲܚ ܒܵܗ̇.
ܕܒܹܝܡ. ܥܘܼܢܵܝܵܐ. ܒܗܵܘ ܕܐܘܿܫܲܥܢܹ̈ܐ. ܬܵܘ ܟܠܲܢ ܐܲܟܲܚ݇ܕܼ ܢܙܲܝܚܝܼܘܗܝ ܠܕܸܒܼܚܵܐ ܕܦܲܓ̣ܪܹܗ ܕܲܒܼܪܵܐ ܡܫܝܼܚܵܐ. ܕܚܲܕ̇ܝܼ ܠܥܝܼܪܹ̈ܐ ܒܝܘܿܡ ܡܵܘܠܵܕܹܗ. ܘܐܲܦܨܲܚ̣ ܠܐܲܪ̈ܥܵܢܹܐ ܒܲܣܒܲܪܬܼܵܐ ܕܦܘܼܪܩܵܢܲܢ. ܗܵܢܵܘ ܐ݇ܪܵܙܵܐ ܟܲܣܝܵܐ ܕܐܸܬܼܓ̇ܠܝܼ. ܘܲܥ̣ܒܲܕܼ ܬܲܪܥܘܼܬܼܵܐ ܘܫܲܝܸܢ ܠܥܸܠܵܝܹ̈ܐ ܘܲܠܬܲܚܬܵܝܹ̈ܐ ܒܲܙܩܝܼܦܹܗ. ܘܲܒܼܝܲܕܼ ܕܸܒܼܚܵܐ ܕܲܩܢܘܿܡܹܗ ܚܲܣ̣ܝܼ ܚܵܘ̈ܒܵܬܲܢ. ܘܥܲܠ ܗܵܕܹܐ ܟܠܲܢ ܫܲܘܝܵܐܝܼܬܼ ܢܚܲܒ̇ܒܼܝܼܘܗܝ ܠܦܲܓ̣ܪܹܗ ܒܙܲܗܝܘܼܬܼܵܐ܀ ܘܢܸܩܥܸܐ ܠܹܗ ܥܲܡ ܚܲܝ̈ܠܵܘܵܬܼܵܐ ܫܡܲܝܵܢܹ̈ܐ ܘܢܹܐܡܲܪ ܗܲܠܸܠܘܼܝܲܗ. ܒܵܬܹ̈ܐ؛ ܢܗܲܠܠܝܼܘܗܝ ܠܲܒܼܪܵܐ ܥܲܡ ܪ̈ܘܼܚܵܢܹ̈ܐ. ܕܲܥ̣ܒܲܕܼ ܫܲܝܢܵܐ ܒܪܵܘܡܵܐ ܘܥܘܼܡܩܵܐ܀ ܘܢܸܩܥܸܐ ܠܹܗ ܥܲܡ ܚܲܝ̈ܠܵܘܵܬܼܵܐ ܫܡܲܝܵܢܹ̈ܐ ܘܢܹܐܡܲܪ ܗܲܠܸܠܘܼܝܲܗ.