ܟܵܗܢܹ̈ܐ؛ ܝܛ؛ 15‐19 ܟܟ؛ 9‐15
ܬܸܒ̣ܘ ܘܲܫܠܵܘ ܟܵܗܢܹ̈ܐ ܣܸܦܪܵܐ ܕܲܬܠܵܬܼܸܵܐ ܕܐܘܿܪܵܝܬܵܐ؛
ܐܲܚܲܝ̈ ܒܲܪܸܟ̣ܡܵܪܝ܀
ܘܐ݇ܡܸܪܹܗ ܡܘܼܫܹܐ ܠܟܠܹܗ ܝܼܣܪܵܝܹܠ؛ ܠܵܐ ܥܵܒ̣ܕܝܼܬܘܿܢ ܥܵܘܠܵܐ ܒܕܝܼܘܵܢ؛ ܘܠܵܐ ܫܵܩܠܸܬ̇ ܦܵܬܵܐ ܥܲܡ ܡܸܣܟܹܢܵܐ؛ ܘܠܵܐ ܥܲܡ ܓܘܼܪܵܐ. ܐܸܠܵܐ ܕܘܼܢ ܠܚܲܒ̣ܪܘܼܟܼ ܒܙܲܕܝܼܩܘܼܬܵܐ܀ ܠܵܐ ܡܵܚܸܬ̇ ܕܲܪܗܲܩ ܕܛܵܝܸܦܘܼܟܼ؛ ܘܠܵܐ ܟܵܠܸܬ̇ ܕܲܪܩܘܼܒ̣ܠ ܕܸܡܵܐ ܕܫܒ̣ܵܒ̣ܘܼܟܼ؛ ܣܵܒܵܒ ܕܐܵܢܵܐ ܝ݇ܘܸܢ ܡܵܪܝܵܐ܀ ܠܵܐ ܣܵܢܸܬ̇ ܠܐܵܚܘܿܢܘܼܟܼ ܒܠܸܒܘܼܟܼ؛ ܐܸܠܵܐ ܡܲܢܟ̣ܘܼܣܹܐ ܡܲܢܟ̣ܸܣܠܹܗ ܚܲܒ̣ܪܘܼܟܼ؛ ܕܠܵܐ ܒܘܼܬ ܕܝܼܹܗ ܩܲܒܠܸܬ̇ ܚܛܝܼܬܵܐ܀ ܠܵܐ ܚܵܡܸܬ̇ ܣܢܵܝܬܵܐ ܠܒܢܲܝ̈ ܛܵܝܸܦܘܼܟܼ ܐܸܠܵܐ ܡܲܚܸܒ ܠܚܲܒ̣ܪܘܼܟܼ ܡܐܲܝܟܼ ܓܵܢܘܼܟܼ؛ ܐܵܢܵܐ ܝ݇ܘܸܢ ܡܵܪܝܵܐ܀ ܢܛܘܿܪܘܿܢ ܦܘܼܩܕܵܢ̈ܝܼ܀ ܐ݇ܢܵܫܵܐ ܕܡܨܵܥܸܪ ܠܒܵܒܹܗ ܘܠܝܸܡܹܗ؛ ܒܩܸܛܠܵܐ ܦܵܐܹܫ ܩܛܝܼܠܵܐ. ܠܒܵܒܹܗ ܘܠܝܸܡܹܗ ܨܘܼܥܸܪܹܗ؛ ܕܸܡܹܗ ܥܲܠ ܓܵܢܹܗ܀ ܓܲܒ̣ܪܵܐ ܕܥܵܒ̣ܸܕ ܓܲܝܵܪܘܼܬܵܐ ܥܲܡ ܒܲܟ̣ܬܵܐ ܕܚܲܕ݇ ܐ݇ܢܵܫܵܐ ܐ݇ܚܹܪ݇ܢܵܐ؛ ܘܥܵܒ̣ܸܕ ܓܲܝܵܪܘܼܬܵܐ ܥܲܡ ܒܲܟ̣ܬܵܐ ܕܚܲܒ̣ܪܹܗ؛ ܒܩܸܛܠܵܐ ܒܸܬ ܦܵܝܫܝܼ ܩܛܝܼܠܹ̈ܐ ܓܲܝܵܪܵܐ ܘܓܲܝܲܪܬܵܐ܀ ܘܐ݇ܢܵܫܵܐ ܕܕܵܡܸܟܼ ܥܲܡ ܒܲܟ̣ܬܵܐ ܕܒܵܒܹܗ؛ ܫܘܼܠܚܵܝܘܼܬܵܐ ܕܒܵܒܹܗ ܓܘܼܠܹܐܠܹܗ؛ ܒܩܸܛܠܵܐ ܦܵܝܫܝܼ ܩܛܝܼܠܹ̈ܐ ܬܸܪܘܲܝܗܝ؛ ܘܕܸܡܲܝܗܝ ܥܲܠܲܝܗܝ܀ ܘܐ݇ܢܵܫܵܐ ܕܕܵܡܸܟ̣ ܥܲܡ ܟܲܠܬܹܗ؛ ܒܩܸܛܠܵܐ ܦܵܝܫܝܼ ܩܛܝܼܠܹ̈ܐ ܬܸܪܘܲܝܗܝ. ܣܵܒܵܒ ܚܛܝܼܬܵܐ ܥܒ̣ܸܕܠܗ݇ܘܿܢ؛ ܕܸܡܲܝܗܝ ܥܲܠܲܝܗܝ܀ ܘܐ݇ܢܵܫܵܐ ܕܕܵܡܵܟܼ ܥܲܡ ܐܘܼܪܙܵܐ ܐܲܝܟܼ ܕܡܵܟ̣ܬܵܐ ܕܥܲܡ ܒܲܟ̣ܬܵܐ. ܛܲܡܐܘܼܬܵܐ ܥܒ̣ܸܕܠܗ݇ܘܿܢ؛ ܬܸܪܘܲܝܗܝ ܦܵܝܫܝܼ ܩܛܝܼܠܹ̈ܐ؛ ܘܕܸܡܲܝܗܝ ܥܲܠܲܝܗܝ܀ ܘܐ݇ܢܵܫܵܐ ܕܫܵܩܸܠ ܒܲܟ̣ܬܵܐ ܘܝܸܡܵܗ̇؛ ܚܛܝܼܬܵܐ ܝ݇ܠܵܗ̇؛ ܒܢܘܼܪܵܐ ܡܲܩܕܝܼܠܹܗ؛ ܗ̇ܘ ܘܐܵܢܝܼ. ܘܠܵܐ ܗܵܘܝܵܐ ܚܛܝܼܬܵܐ ܓܵܘܵܘܟ̣ܘܿܢ܀
ܚܲܒ̣ܪܹܗ
ܐܹܫܲܥܝܵܐ؛ ܠ؛ 1‐15
ܫܠܵܘ ܢܒ̣ܝܼܘܼܬܹܗ ܕܐܹܫܲܥܝܵܐ؛ ܐܲܚܲܝ̈ ܒܲܪܸܟ̣ܡܵܪܝ܀
ܘܵܝ ܠܒܢܘܿܢܹ̈ܐ ܡܵܪ̈ܘܿܕܹܐ؛ ܒܹܐܡܵܪܵܐ ܝ݇ܠܹܗ ܡܵܪܝܵܐ؛ ܕܥܒ̣ܸܕܠܗ݇ܘܿܢ ܪܵܐܝܝܼ ܘܠܵܐ ܡܸܢܝܼ. ܘܨܘܼܢܨܸܠܗ݇ܘܿܢ ܢܘܼܩܵܝܹ̈ܐ ܕܠܵܐ ܡ̣ܢ ܪܘܼܚܝܼ؛ ܕܡܲܙܝܸܕܝܼ ܚܛܝܼܵܬܹ̈ܐ ܥܲܠ ܚܛܝܼܵܬܹ̈ܐ܀ ܕܐ݇ܙܸܠܗ݇ܘܿܢ ܠܸܨܠܵܝܵܐ ܠܡܸܨܪܹܝܢ. ܘܡ̣ܢ ܦܘܼܡܝܼ ܠܵܐ ܒܘܼܩܸܪܗ݇ܘܿܢ ܕܦܵܝܫܝܼ ܚܘܼܠܸܢܹܐ ܒܙܲܚܡܘܼܬܹܗ ܕܦܸܪܥܘܿܢ؛ ܘܦܵܝܫܝܼ ܚܘܼܡܝܹ̈ܐ ܒܛܸܠܵܢܝܼܬܵܐ ܕܡܸܨܪܹܝܢ܀ ܙܲܚܡܘܼܬܵܐ ܕܦܸܪܥܘܿܢ ܒܸܬ ܗܵܘܝܵܐ ܢܟ̣ܸܦܬܵܐ ܐܸܠܵܘܟ̣ܘܿܢ؛ ܘܣܸܬܵܪܵܐ ܕܛܸܠܵܢܝܼܬܵܐ ܕܡܸܨܪܹܝܢ ܠܡܵܟܲܣܬܵܐ܀ ܣܵܒܵܒ ܕܗ̇ܘ ܒܨܵܥܵܢ ܘܓܘܼܪ̈ܵܢܘܼܗܝ ܘܐܝܼܙܓܲܕ̈ܘܼܗܝ ܡܘܼܚܠܸܦܹܐ ܒܸܬ ܟܵܟ̰ܚܝܼ؛ ܠܟܸܣ ܛܵܝܸܦܵܐ ܕܠܹܐ ܥܵܒ̣ܸܕ ܦܵܝܕܵܐ ܐܸܠܲܝܗܝ؛ ܠܵܐ ܠܗܲܝܲܪܬܵܐ ܘܠܵܐ ܠܦܵܝܕܵܐ؛ ܐܸܠܵܐ ܠܢܟ̣ܸܦܬܵܐ ܘܠܵܘܡܵܐ܀ ܡܲܫܩܠܵܐ [ܝܘܼܩܪܵܐ] ܕܗܲܝܘܵܢܹ̈ܐ ܕܬܲܝܡܢܵܐ ܒܐܲܪܥܵܐ ܡܘܼܠܝܸܨܬܵܐ ܘܡܵܪܹܐ ܥܹܩܘܼܝ؛ ܐܲܪܝܵܐ ܘܓܘܼܪܝܵܐ ܕܐܲܪܝܵܐ؛ ܘܡܸܢܲܝܗܝ ܐܸܣܦܸܣ [ܚܘܼܘܵܐ] ܘܚܲܪܡܵܢܵܐ [ܘܬܲܢܝܼܢܵܐ ܩܵܛܘܿܠܵܐ] ܦܵܪܘܿܚܵܐ. ܒܸܬ ܡܲܛܥܸܢܝܼ ܥܲܠ ܚܵܨܵܐ ܕܚܡܵܪܹ̈ܐ ܕܵܘܸܠܬܲܝܗܝ ܘܥܲܠ ܕܸܦܢܵܐ ܕܓܘܼܡܠܹ̈ܐ ܚܲܙܝܼܢܲܝ̈ܗܝ؛ ܠܟܸܣ ܛܵܝܸܦܵܐ ܕܠܹܐ ܥܵܒ̣ܸܕܠܗ݇ܘܿܢ ܦܵܝܕܵܐ؛ ܘܡܸܨܪ̈ܵܝܹܐ ܒܒܲܛܝܼܠܘܼܬܵܐ ܘܒܕܘܼܓܠܹ̈ܐ ܗܲܝܸܪܝܼ؛ ܒܘܼܬ ܕܐܵܗܵܐ ܩܪܹܐܠܝܼ ܐܸܠܲܝܗܝ؛ ܕܒܲܛܝܼܠܵܐ ܝ݇ܠܹܗ ܐܵܗܵܐ ܗܹܒ̣ܝܼܲܝܗܝ܀ ܡܐܵܕܝܼܵܐ ܬܵܐ ܟܬܘܿܒ̣ ܥܲܠ ܕܐܲܢܹܐ ܠܘܼܚܹ̈ܐ؛ ܘܥܲܠ ܟܬܵܒ̣ܵܐ ܕܩܵܘܠܵܐ؛ ܕܗܵܘܹܐ ܠܝܵܘܡܵܐ ܐ݇ܚܵܪܵܝܵܐ ܠܣܵܗܕܘܼܬܵܐ ܠܥܵܠܲܡ ܥܵܠܡܝܼܢ܀ ܣܵܒܵܒ ܕܚܲܕ݇ ܛܵܝܸܦܵܐ ܝ݇ܠܹܗ ܡܲܟܪܸܒܵܢܵܐ؛ ܒܢܘܿܢܹ̈ܐ ܕܵܓܵܠܹ̈ܐ؛ ܒܢܘܿܢܹ̈ܐ ܕܠܹܐ ܒܲܣܡܵܐܠܗ݇ܘܿܢ ܠܸܫܡܲܥܝܵܐ ܢܵܡܘܿܣܹܗ ܕܡܵܪܝܵܐ܀ ܘܐ݇ܡܸܪܗ݇ܘܿܢ ܠܚܲܙܵܝܹ̈ܐ ܕܠܵܐ ܚܵܙܝܼܬܘܿܢ؛ ܘܲܠܢܒ̣ܝܼܹ̈ܐ ܕܠܵܐ ܢܵܒܝܼܬܘܿܢ ܠܲܢ ܡܲܢܟ̣ܵܣܬܵܐ؛ ܗܲܡܙܸܡܘܿܢ ܩܵܬܲܢ ܕܘܼܒܵܪܘܼܬܵܐ؛ ܘܚܙܹܐܡܘܿܢ ܩܵܬܲܢ ܕܘܼܓܠܹ̈ܐ܀ ܘܡܲܦܟ̰ܸܠܗ݇ܘܿܢ ܠܲܢ ܡ̣ܢ ܐܘܼܪܚܵܐ؛ ܘܡܲܕܸܪܘܿܢ ܠܲܢ ܡ̣ܢ ܓ̰ܵܕܵܘܵܬܹ̈ܐ. ܘܒܲܛܠܘܿܢ ܡܸܢܲܢ ܠܩܲܕܝܼܫܵܐ ܕܝܼܣܪܵܝܹܠ܀ ܒܘܼܬ ܕܐܵܗܵܐ؛ ܗܵܕܟ̣ܵܐ ܒܹܐܡܵܪܵܐ ܝ݇ܠܹܗ ܡܵܪܝܵܐ ܩܲܕܝܼܫܵܐ ܕܝܼܣܪܵܝܹܠ؛ ܡ̣ܢ ܣܵܒܵܒ ܕܡܘܼܣܠܹܐ ܠܵܘܟ̣ܘܿܢ ܐܵܗܵܐ ܚܲܒܪܵܐ؛ ܘܦܸܫܠܵܘܟ̣ܘܿܢ ܒܗܹܒ̣ܝܼ ܥܲܠ ܙܠܘܼܡܝܵܐ؛ ܘܛܘܼܪܛܸܡܠܵܘܟ̣ܘܿܢ؛ ܘܦܸܫܠܵܘܟ̣ܘܿܢ ܒܗܹܒ̣ܝܼ ܥܲܠܹܗ܀ ܒܘܼܬ ܕܐܵܗܵܐ؛ ܒܸܬ ܗܵܘܝܵܐ ܠܵܘܟ̣ܘܿܢ ܐܵܗܵܐ ܚܛܝܼܬܵܐ؛ ܐܲܝܟܼ ܬܪܵܥܝܬܵܐ ܕܢܵܦܠܵܐ؛ ܘܐܲܝܟܼ ܫܘܼܪܵܐ ܪܵܡܵܐ ܕܡܸܢܫܸܠܬܵܢܹܐ ܗܵܘܝܵܐ ܬܠܵܚܬܹܗ. ܘܫܡܲܛܬܹܗ ܐܲܝܟܼ ܫܸܡܛܵܐ ܕܡܵܐܢܵܐ ܕܦܲܚܵܪܵܐ ܒܫܡܲܛܬܹܗ ܠܹܐ ܐܵܬܝܵܐ ܠܹܗ ܡܘܼܚܲܒܢܹܗ؛ ܕܠܵܐ ܦܵܐܹܫ ܡܘܼܫ݇ܟ̰ܚܵܐ ܓܵܘ ܩܸܛܥܵܛܘܼܗܝ ܚܲܕ݇ ܚܸܨܦܵܐ [ܡܵܐܢܵܐ ܕܥܘܼܦܪܵܐ] ܠܸܫܩܵܠܵܐ ܓܵܘܹܗ ܢܘܼܪܵܐ ܡ̣ܢ ܓܵܘ ܝܘܼܩܕܵܢܵܐ؛ ܘܐܘܼܦ ܠܵܐ ܠܸܓܪܵܦܵܐ ܒܝܼܹܗ ܡܝܼܵܐ ܡ̣ܢ ܓܘܼܒܵܐ. ܒܘܼܬ ܕܐܵܗܵܐ؛ ܗܵܕܟ̣ܵܐ ܒܹܐܡܵܪܵܐ ܝ݇ܠܹܗ ܡܵܪܝܵܐ ܩܲܕܝܼܫܵܐ ܕܝܼܣܪܵܝܹܠ؛ ܐܝܼܡܲܢ ܕܐܸܪܵܘܟ̣ܘܿܢ ܘܡܘܼܢܝܸܚܠܵܘܟ̣ܘܿܢ؛ ܒܸܬ ܦܵܝܫܝܼܬܘܿܢ ܦܘܼܪܩܹܐ. ܘܒܫܸܠܝܵܐ ܘܒܗܹܒ̣ܝܼ ܒܸܬ ܗܵܘܝܵܐ ܓܲܢ݇ܒܵܪܘܼܬܵܘܟ̣ܘܿܢ܀
♱♱♱♱♱♱♱♱♱
ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ
ܕܲܠܘܵܬܼ ܬܸܣܵܠܘܿܢܝܼܩܵܝܹ̈ܐ ܐܲܚܲܝ̈ ܒܲܪܸܟܼܡܵܪܝ.
ܐܝܼܢܵܐ ܐܲܚܬܘܿܢ ܐܵܚܘܿܢܘܵܬ̈ܝܼ ܦܸܫܠܵܘܟܼܘܿܢ ܡܘܼܕܡܝܼܹܐ ܠܥܸܕܵܬܹ̈ܐ ܕܐܲܠܵܗܵܐ ܕܓܵܘ ܝܼܗܘܼܕ ܐܵܢܝܼ ܕܝܼܢܵܐ ܒܝܼܫܘܿܥ ܡܫܝܼܚܵܐ. ܕܗܲܕܟܼܵܐ ܩܘܼܒܸܠܵܘܟܼܘܿܢ ܙܲܗܡܲܬܹ̈ܐ ܡܼܢ ܒܢܲܝ̈ ܡܸܠܵܬܵܘܟܼܘܿܢ؛ ܕܵܐܟܼܝܼ ܕܐܘܼܦ ܐܵܢܝܼ ܡܼܢ ܝܗ݇ܘܼܕܵܝܹ̈ܐ܋ ܐܵܢܝܼ ܕܠܡܵܪܲܢ ܝܼܫܘܿܥ ܡܫܝܼܚܵܐ ܩܛܸܠܗ݇ܘܿܢ ܘܠܢܒܼܝܼܹ̈ܐ ܕܡܸܢܲܝܗܝ ܘܐܸܠܲܢ ܟܘܼܡܸܪܗ݇ܘܿܢ؛ ܘܠܐܲܠܵܗܵܐ ܠܹܐ ܫܵܦܪܝܼ. ܘܗܘܝܼܹܐ ܝ݇ܢܵܐ ܕܲܪܩܘܼܒܼܠ ܕܟܠܲܝܗܝ ܒܢܲܝ̈ܢܵܫܵܐ܋ ܕܡܲܟܠܘܼܝܹܐ ܝ݇ܢܵܐ ܐܸܠܲܢ ܕܗܲܡܙܸܡܲܚ ܥܲܡ ܛܵܝܸܦܹ̈ܐ ܕܚܲܝܝܼ؛ ܠܬܲܡܘܼܡܹܐ ܚܛܝܼܵܬܲܝ̈ܗܝ ܒܟܠ ܙܲܒܼܢܵܐ. ܐܝܼܢܵܐ ܡܛܹܐܠܹܗ ܥܲܠܲܝܗܝ ܟܲܪܒܵܐ ܗܲܠ ܚܲܪܬܵܐ܋ ܐܝܼܢܵܐ ܐܲܚܢܲܢ ܐܵܚܘܿܢܘܵܬ̈ܝܼ ܗܘܹܐܠܲܢ ܝܲܬܘܼܡܹ̈ܐ ܡܸܢܵܘܟܼܘܢ ܩܵܐ ܚܕܵܐ ܥܕܵܢܵܐ ܟܪܝܼܬܵܐ ܒܦܵܐܬܲܢ ܘܠܵܐ ܒܠܸܒܲܢ؛ ܘܒܘܼܫ ܙܵܘܕܵܐ ܚܘܼܦܸܛܠܲܢ ܠܸܚܙܵܝܵܐ ܦܲܐܬܵܘܟܼܘܿܢ ܒܚܘܼܒܵܐ ܓܘܼܪܵܐ܋ ܘܒܣܸܡܠܵܐܠܲܢ ܕܐܵܬܲܚ ܠܟܸܣܠܵܘܟܼܘܿܢ ܐܵܢܵܐ ܦܵܘܠܘܿܣ. ܚܕܵܐ ܓܵܗܵܐ ܘܬܸܪܬܹܝ ܘܩܲܡ ܚܲܙܕܸܓ ܠܝܼ ܣܵܛܵܢܵܐ܋ ܐܲܝܢܝܼ ܝ݇ܠܵܗ̇ ܗܹܒܼܝܼܲܢ ܘܚܲܕܘܼܬܲܢ ܘܬܵܓܼܵܐ ܕܫܘܼܒܼܗܵܪܲܢ؛ ܐܸܠܵܐ ܐܸܢ ܐܲܚܬܘܿܢ ܩܵܕ݇ܡ ܡܵܪܲܢ ܝܼܫܘܿܥ ܒܐ݇ܬܵܝܬܹܗ܋ ܣܵܒܵܒ ܐܲܚܬܘܿܢ ܝܼܬܘܿܢ ܬܸܫܒܘܿܚܬܲܢ ܘܚܲܕܘܼܬܲܢ܋ ܡܼܢ ܣܵܒܵܒ ܕܠܵܐ ܚܡܸܠܲܢ. ܒܣܸܡܠܵܐ ܠܲܢ ܠܸܦܝܵܫܵܐ ܒܐܵܬܹܢܘܿܣ ܒܢܲܦ̮ܫܲܢ؛ ܘܫܵܕܪܲܚ ܠܟܸܣܠܵܘܟܼܘܿܢ ܠܛܝܼܡܵܬܹܐܘܿܣ ܐܵܚܘܿܢܲܢ ܘܡܫܲܡܫܵܢܵܐ ܕܐܲܠܵܗܵܐ ܘܗܲܝܸܪܵܢܲܢ ܒܡܲܫܚܲܕܬܹܗ ܕܡܫܝܼܚܵܐ ܕܡܲܩܘܹܐ ܠܵܘܟܼܘܿܢ ܘܛܵܠܸܒ ܡܵܢܵܘܟܼܘܿܢ ܒܘܼܬ ܗܲܝܡܵܢܘܼܬܵܘܟܼܘܿܢ.܋ ܕܗܸܟ̰ ܐ݇ܢܵܫܵܐ ܠܵܐ ܣܵܩܸܕ ܒܐܲܢܹܐ ܝܲܠܨܘܼܘܹ̈ܐ. ܣܵܒܵܒ ܐܲܚܬܘܿܢ ܝܵܕܥܝܼܬܘܿܢ ܕܠܐܵܗܵܐ ܦܝܼܫܹܐ ܝ݇ܘܲܚ ܡܘܼܬܒܼܹܐ܋ ܣܵܒܵܒ ܐܘܼܦ ܐܝܼܡܲܢ ܕܠܟܸܣܠܵܘܟܼܘܿܢ ܝܼܘܲܚ ܗ݇ܘܼܵܘ ܡܼܢ ܩܵܕ݇ܡܵܝܬܵܐ ܐ݇ܡܸܪܲܢ ܐܸܠܵܘܟܼܘܿܢ ܕܗܕܝܼܪܹܐ ܝ݇ܘܲܚ ܠܸܦܝܵܫܵܐ ܡܘܼܠܝܸܨܹܐ؛ ܕܵܐܟܼܝܼ ܕܝܵܕܥܝܼܬܘܿܢ ܕܗܘܹܐܠܵܗ̇܋ ܒܘܼܬ ܕܐܵܗܵܐ. ܐܘܼܦ ܐܢܵܐ ܠܵܐ ܚܡܸܠܝܼ. ܗܲܠ ܕܫܘܼܕܸܪܝܼ ܕܝܵܕܥܸܢ ܗܲܝܡܵܢܘܼܬܵܘܟܼܘܿܢ. ܕܠܵܐ ܗܵܘܝܵܐ ܕܓ̰ܵܪܸܒܠܵܘܟܼܘܿܢ ܓ̰ܵܪܒܵܢܵܐ ܘܗܵܘܹܐ ܦܘܼܠܚܵܢܲܢ ܒܲܛܝܼܠܵܐ܋ ܐܝܼܢܵܐ ܐܵܕܝܼܵܐ ܗܵܐ ܡܼܢ ܕܐ݇ܬܹܐܠܹܗ ܠܟܸܣܠܲܢ ܛܝܼܡܵܬܹܐܘܿܣ ܡܼܢ ܠܟܸܣܠܵܘܟܼܘܿܢ. ܘܩܲܡ ܡܲܫܚܸܕܠܲܢ ܒܘܼܬ ܗܲܝܡܵܢܘܼܬܵܘܟܼܘܿܢ ܘܒܘܼܬ ܚܘܼܒܵܘܟܼܘܿܢ ܘܕܐܝܼܬܠܵܘܟܼܘܿܢ ܕܟܼܵܪܲܢ ܛܵܒܼܵܐ ܒܟܠ ܥܕܵܢܵܐ؛ ܫܲܗܘܘܼܬܹܐ ܝ݇ܬܘܿܢ ܠܸܚܙܵܝܲܢ ܕܵܐܟܼܝܼ ܕܐܘܼܦ ܐܲܚܢܲܢ ܐܸܠܵܘܟܼܘܿܢ܋ ܒܘܼܬ ܕܐܵܗܵܐ؛ ܫܩܸܠܲܢ ܠܸܒܵܐ ܒܝܼܵܘܟܼܘܿܢ ܐܵܚܘܿܢ̈ܘܵܬܲܢ ܒܘܼܬ ܟܠܲܝܗܝ ܥܹܩܘܼܘܲܝ̈ܢ ܘܝܲܠܨܘܼܘܲܝ̈ܢ ܒܘܼܬ ܚܵܬܸܪ ܕܗܲܝܡܵܢܘܼܬܵܘܟܼܘܿܢ܋ ܘܐܵܕܝܼܵܐ ܒܸܚܵܝܵܐ ܝ݇ܘܲܚ ܐܸܢ ܐܲܚܬܘܿܢ ܦܵܝܫܝܼܬܘܿܢ ܡܘܼܩܸܡܹܐ ܒܡܵܪܲܢ܋ ܡܘܼܕܝ݇ ܫܵܟܲܪܬܵܐ ܡܵܨܲܚ ܠܸܦܪܲܥܝܵܐ ܡܼܢ ܓܹܒܵܘܟܼܘܿܢ ܠܐܲܠܵܗܵܐ ܒܘܼܬ ܟܠ ܚܲܕܘܼܬܵܐ ܕܒܸܚܕܵܝܵܐ ܝ݇ܘܲܚ ܒܘܼܬ ܚܵܬܸܪ ܕܝܼܵܘܟܼܘܿܢ܋ ܐܝܼܢܵܐ ܕܩܵܕ݇ܡ ܐܲܠܵܗܵܐ ܒܘܼܫ ܙܵܘܕܵܐ ܦܲܪܦܸܠܲܚ ܒܠܲܝܠܹܐ ܘܒܐܝܼܡܵܡܵܐ ܕܚܵܙܲܚ ܦܵܐܬܵܘܟܼܘܿܢ؛ ܘܬܲܡܡܲܚ ܡܸܢܕܝܼ ܕܒܵܨܘܼܪܬܵܐ ܝ݇ܠܵܗ̇ ܗܲܝܡܵܢܘܼܬܵܘܟܼܘܿܢ܋ ܐܝܼܢܵܐ ܗܲܪ ܗܵܘ̇ ܐܲܠܵܗܵܐ ܒܵܒܲܢ ܘܡܵܪܲܢ ܝܼܫܘܿܥ ܡܫܝܼܚܵܐ ܥܵܒܼܸܕ ܕܘܼܙ ܐܘܼܪܚܲܢ ܠܟܸܣܠܵܘܟܼܘܿܢ. ܘܡܲܙܝܸܕ ܘܓܲܪܘܸܣ ܚܘܼܒܵܘܟܼܘܿܢ ܕܚܲܕ݇ ܠܟܸܣ ܕܗ̇ܘ ܐ݇ܚܹܪ݇ܢܵܐ ܘܠܟܸܣ ܟܠ ܐ݇ܢܵܫܵܐ ܕܵܐܟܼܝ ܕܐܲܚܢܲܢ ܡܲܚܘܼܒܹܐ ܝ݇ܘܲܚ ܐܸܠܵܘܟܼܘܿܢ܋ ܘܡܲܩܸܡ ܠܸܒܵܘܵܬܵܘ̈ܟܼܘܿܢ ܕܠܵܐ ܠܵܘܡܵܐ ܒܩܲܕܝܼܫܘܼܬܵܐ ܩܵܕ݇ܡ ܐܲܠܵܗܵܐ ܒܵܒܲܢ ܒܐ݇ܬܵܝܬܹܗ ܕܡܵܪܲܢ ܝܼܫܘܿܥ ܡܫܝܼܚܵܐ ܕܥܲܡ ܟܠܵܝܗܝ ܩܲܕܝܼܫ̈ܘܼܗܝ܋
♱♱♱♱♱♱♱♱♱
ܚܕܒܫܒܐ ܕܫܒܼܥܐ ܕܩܝܛܐ
ܠܘܩܐ ܝܚ: 2 ‐ 15
ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ ܟܪܘܙܘܬܼܐ ܕܠܘܩܐ
♰ ܘܐ݇ܡܸܪܹܗ ܝܑܼܫܘܿܥ ܠܬܲܠܡܝܼ̈ܕܘܼܗܝ ܐܵܗܵܐ ܡܲܬܠܵܐ: ܕܒܟܠ ܥܸܕܵܢܵܐ ܡܨܵܠܝܼ ܘܠܵܐ ܣܵܩܕܝܼ. ܚܲܕ݇ ܕܲܝܵܢܵܐ ܐܝܼܬ ܗ݇ܘܵܐ ܓܵܘ ܚܕܵܐ ܡܕܝܼܢ݇ܬܵܐ: ܕܡ̣ܢ ܐܲܠܵܗܵܐ ܠܹܐ ܙܵܕܸܥ ܗ݇ܘܵܐ ܘܡ̣ܢ ܒܢܲܝ̈ܢܵܫܵܐ ܠܹܐ ܢܵܟܼܸܦ ܗ݇ܘܵܐ: ܐܝܼܢܵܐ ܐܝܼܬ ܗ݇ܘܵܐ ܚܕܵܐ ܐܲܪܡܲܠܬܵܐ ܓܵܘ ܗ̇ܝ ܡܕܝܼܢ݇ܬܵܐ: ܘܐܲܬܝܵܐ ܗ݇ܘܵܐ ܠܘܵܬܹܗ ܘܐܲܡܪܵܐ ܗ݇ܘܵܐ: ܥܒܼܘܼܕܠܵܗ̇ ܕܝܼܘܵܢܝܼ ܥܲܡ ܒܥܸܠܕܝܼܢܝܼ. ܘܩܵܐ ܚܲܕ݇ ܙܲܒܼܢܵܐ ܝܲܪܝܼܟܼܵܐ ܠܹܐ ܒܲܣܡܵܐ ܗ݇ܘܵܐ ܠܹܗ: ܐܝܼܢܵܐ ܡ̣ܢ ܒܵܬ݇ܪ ܗܵܕܵܐ ܐ݇ܡܸܪܹܗ ܒܓܵܢܹܗ: ܐܸܢ ܡ̣ܢ ܐܲܠܵܗܵܐ ܠܹܐ ܝܘܸܢ ܒܸܙܕܵܥܵܐ ܘܡ̣ܢ ܒܢܲܝ̈ܢܵܫܵܐ ܠܹܐ ܝܘܸܢ ܒܸܢܟܼܵܦܵܐ: ܐܵܦ ܣܵܒܵܒ ܕܡܲܣܩܘܼܕܝܼ ܝܠܵܗ̇ ܗܵܕܹܐ ܐܲܪܡܲܠܬܵܐ: ܒܸܬ ܥܲܒܼܕܸܢܵܗ̇ ܕܝܼܘܵܢܘܼܗܿ: ܕܠܵܐ ܗܵܘܝܵܐ ܒܟܠ ܥܸܕܵܢܵܐ ܒܹܐܬܵܝܵܐ ܘܡܲܣܩܘܼܕܝܼ. ܘܐ݇ܡܸܪܹܗ ܡܵܪܲܢ: ܫܡܸܥܡܘܿܢ ܡܘܿܕܝܼ ܐ݇ܡܸܪܹܗ ܕܲܝܵܢܵܐ ܕܥܵܘܠܵܐ: ܐܝܼܢܵܐ ܐܲܠܵܗܵܐ ܠܵܐ ܒܘܼܫ ܙܵܘܕܵܐ ܒܸܬ ܫܵܩܸܠ ܬܘܿܥܠܵܐ ܕܓܘܼܒܝ̈ܘܼܗܝ: ܕܩܵܪܝܼܠܹܗ ܒܐܝܼܡܵܡܵܐ ܘܒܠܸܠܝܵܐ: ܘܡܲܪܝܸܟܼ ܒܹܐܢܹܗ ܥܲܠܲܝܗܝ؟ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ ܓ̰ܲܠܕܹܐ ܒܸܬ ܫܵܩܸܠܵܗ̇ ܬܘܿܥܠܲܝܗܝ: ܐܝܼܢܵܐ ܒܸܬ ܐܵܬܹܐ ܒܪܘܿܢܹܗ ܕܐ݇ܢܵܫܵܐ: ܝܵܐ ܪܲܒ ܒܸܬ ܡܵܫ݇ܟ̰ܸܚ ܗܲܝܡܵܢܘܼܬܵܐ ܥܲܠ ܐܲܪܥܵܐ؟ ܘܐ݇ܡܸܪܹܗ ܐܵܗܵܐ ܡܲܬܠܵܐ ܕܲܠܩܘܼܒ̣ܠ ܐܵܢܝܼ ܐ݇ܢܵܫܹ̈ܐ ܕܬܟܼܝܼܠܹܐ ܗ݇ܘܵܘ ܥܲܠ ܓܵܢܲܝܗܝ ܕܙܲܕܝܼܩܹ̈ܐ ܝܢܵܐ: ܘܡܲܣܠܝܼ ܗ݇ܘܵܘ ܠܟܠ ܐ݇ܢܵܫܵܐ: ܬܪܹܝ ܓܲܒܼܪܹ̈ܐ ܣܸܠ݇ܩܠܗ݇ܘܿܢ ܠܗܲܝܟܠܵܐ ܠܡܨܵܠܘܼܝܹܐ: ܚܲܕ݇ ܦܪܝܼܫܵܐ ܘܐ݇ܚܹܪ݇ܢܵܐ ܡܲܟܼܣܵܐ: ܘܗ̇ܘ ܦܪܝܼܫܵܐ ܟܸܠܝܵܐ ܗ݇ܘܵܐ ܒܹܝܬ݇ܠܹܗ ܘܠܓܵܢܹܗ ܘܐܲܢܹܐ ܡܨܵܠܹܐ ܗ݇ܘܵܐ: ܝܵܐ ܐܲܠܵܗܵܐ ܡܵܘܕܘܼܝܹܐ ܝܘܸܢ ܐܸܠܘܼܟܼ ܕܠܵܐ ܗ݇ܘܹܐ ܠܝܼ ܐܲܝܟܼ ܫܲܪܟܵܐ ܕܐ݇ܢܵܫܹ̈ܐ: ܟ̰ܵܠܘܼܓ̰ܹ̈ܐ ܘܙܵܠܝܼܡܹ̈ܐ ܘܓܲܝܵܪܹ̈ܐ: ܘܠܵܐ ܐܲܝܟܼ ܐܵܗܵܐ ܡܲܟܼܣܵܐ: ܐܸܠܵܐ ܟܹܐ ܨܵܝܡܸܢ ܬܪܹܝ ܓܵܗܹܐ ܒܫܲܒܬܵܐ: ܘܟܹܐ ܝܲܗ݇ܒܼܸܢ ܡܲܥܣܵܪܹ̈ܐ ܥܲܠ ܟܠ ܡܸܢܕܝܼ ܕܩܵܢܸܢ: ܐܝܼܢܵܐ ܗ̇ܘ ܡܲܟܼܣܵܐ ܟܸܠܝܵܐ ܗ݇ܘܵܐ ܡ̣ܢ ܪܸܚܩܵܐ: ܘܠܹܐ ܒܵܥܹܐ ܗ݇ܘܵܐ ܐܘܿܦ ܠܵܐ ܥܲܝܢܘܼ̈ܗܝ ܡܵܪܸܡ ܠܫܡܲܝܵܐ: ܐܸܠܵܐ ܡܵܚܹܐ ܗ݇ܘܵܐ ܥܲܠ ܨܲܕܪܹܗ ܘܐܵܡܸܪ: ܝܵܐ ܐܲܠܵܗܵܐ ܥܒܼܘܿܕ ܪ̈ܲܚܡܹܐ ܥܲܠܝܼ ܐܵܢܵܐ ܚܲܛܵܝܵܐ: ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ: ܕܨܠܹܐܠܹܗ ܐܵܗܵܐ ܠܒܲܝܬܹܗ ܒܘܼܫ ܡܘܼܟܫܸܛܵܐ ܡ̣ܢ ܗ̇ܘ ܦܪܝܼܫܵܐ: ܣܵܒܵܒ ܟܠ ܐ݇ܢܵܫܵܐ ܕܡܵܪܸܡ ܓܵܢܹܗ ܒܸܬ ܦܵܐܸܫ ܡܘܼܡܟܸܟܼܵܐ: ܘܟܠ ܡ̇ܢ ܕܡܲܡܟܸܟܼ ܓܵܢܹܗ ܒܸܬ ܦܵܐܸܫ ܡܘܼܪܡܵܐ.
♱♱♱♱♱♱♱♱♱
The Assyrian Church
of the East did not yet sanction this document.
Please email any errors/corrections you may find to Fr. Lawrance Namato via Lnamato@gmail.com
|
1: This Document is typed using EastAssyrian Font. 3: Install the downloaded font. 4: Copy any part of this page and Paste into Microsoft Word, then change the font to EastAssyrian or to your favorite Assyrian font.
Qasha Lawrance Namato |