ܚܲܕܼܒܫܲܒܵܐ ܕܫܲܒ̣ܥܵܐ ܕܕܸܢܚܵܐ
ܬܸܢܝܵܢ ܢܵܡܘܿܣܵܐ ܝܕ؛ 2‐ ܝܗ؛ 5.
ܬܸܒ̣ܘ ܘܲܫܠܵܘ ܢܵܡܘܿܣܵܐ ܣܸܦܪܵܐ ܕܚܲܡܫܵܐ ܕܐܘܿܪܵܝܬܵܐ؛
ܐܲܚܲܝ̈ ܒܲܪܸܟ̣ܡܵܪܝ܀
ܘܐ݇ܡܸܪܹܗ ܡܘܼܫܹܐ ܩܵܐ ܟܠܹܗ ܝܼܣܪܵܝܹܠ؛ ܐܸܠܘܼܟܼ ܓܘܼܒܹܐܠܹܗ ܡܵܪܝܵܐ ܐܲܠܵܗܘܼܟܼ ܕܗܵܘܸܬ̇ ܐܸܠܹܗ ܛܵܝܸܦܵܐ ܡܘܼܚܸܒܵܐ ܒܘܼܫ ܡ̣ܢ ܟܠܲܝܗܝ ܛܵܝܸܦܹ̈ܐ ܕܥܲܠ ܦܵܬܵܐ ܕܐܲܪܥܵܐ. ܠܵܐ ܐܵܟ̣ܠܝܼܬܘܿܢ ܟܠ ܛܲܡܵܐܐ.܀ ܐܵܗܵܐ ܗܲܝܘܵܢ ܐܵܟ̣ܠܝܼܬܘܿܢ ܬܵܘܪܵܐ؛ ܘܦܵܐܪܵܐ؛ ܘܲܥܢܵܐ؛ ܘܥܸܙܵܐ؛ ܘܐܲܝܠܵܐ ܘܛܲܒ̣ܝܵܐ؛ ܘܝܲܚܡܘܼܪ؛ ܥܸܪܒܵܐ ܕܛܘܼܪܵܐ؛ ܘܪܲܝܡܵܐ؛ ܘܕܲܝܨܵܐ ܘܬܵܘܪܵܐ ܕܛܘܼܪܵܐ. ܘܟܠ ܗܲܝܘܵܢ ܕܦܬܝܼܚܬܵܐ ܝ݇ܠܵܗ̇ ܣܸܡܹܗ ܕܦܘܼܠܓ݇ܝܼܬܵܐ ܠܬܪܹܝ ܘܦܵܫܸܪ؛ ܗ̇ܘ ܐ݇ܟ̣ܘܿܠܘܿܢ.܀ ܘܐܲܢܹܐ ܠܵܐ ܐܵܟ̣ܠܝܼܬܘܿܢ؛ ܡ̣ܢ ܕܐܵܢܝܼ ܕܦܵܫܪܝܼ ܘܡ̣ܢ ܕܐܵܢܝܼ ܕܨܸܪ̈ܝܹܐ ܝ݇ܢܵܐ ܣܸܡܵܬܲܝ̈ܗܝ ܠܬܪܹܝ ܣܵܡܹ̈ܐ ܓܘܼܡܠܵܐ؛ ܘܐܲܪܢܒ̣ܵܐ؛ ܣܝܼܚܘܿܪ ܕܦܵܫܪܝܼ ܘܣܸܡܵܬܲܝ̈ܗܝ ܠܹܐ ܝ݇ܢܵܐ ܨܸܪ̈ܝܹܐ ܛܲܡܐܹܐ ܝ݇ܢܵܐ ܐܸܠܵܘܟ̣ܘܿܢ.܀ ܚܙܘܼܪܵܐ ܕܨܪܝܼܬܵܐ ܝ݇ܠܵܗ̇ ܣܸܡܹܗ ܘܠܹܐ ܦܵܫܸܪ ܛܲܡܵܐܐ ܝ݇ܠܹܗ ܐܸܠܵܘܟ̣ܘܿܢ. ܡ̣ܢ ܒܸܣܪܲܝܗܝ ܠܵܐ ܐܵܟ̣ܠܝܼܬܘܿܢ ܘܠܦܲܓ̣ܪ̈ܲܝܗܝ ܠܵܐ ܩܲܪܒܸܢܝܼܬܘܿܢ.܀ ܐܲܢܹܐ ܐ݇ܟ̣ܘܿܠܘܿܢ.܀ ܡ̣ܢ ܟܠ ܕܐܝܼܬ ܓܵܘ ܡܝܼܵܐ.܀ ܘܟܠ ܕܐܝܼܬ ܠܹܗ ܓܘܼܠܦܵܢܹ̈ܐ ܘܩܲܠܦܹ̈ܐ ܐ݇ܟ̣ܘܿܠܘܿܢ.܀ ܘܟܠ ܕܠܲܝܬ̇ ܠܹܗ ܓܘܼܠܦܵܢܹ̈ܐ ܘܩܲܠܦܹ̈ܐ ܠܵܐ ܐܵܟ̣ܠܝܼܬܘܿܢ ܛܲܡܐܵܐ ܝ݇ܠܹܗ ܐܸܠܵܘܟ̣ܘܿܢ.܀ ܘܟܠ ܦܵܪܲܚܬܵܐ ܕܟ̣ܝܼܬܵܐ ܐܵܟ̣ܠܝܼܬܘܿܢ.܀ ܘܐܲܢܹܐ ܠܵܐ ܐܵܟ̣ܠܝܼܬܘܿܢ ܡܸܢܲܝܗܝ؛ ܢܸܫܪܵܐ؛ ܘܕܵܝܕܵܐ؛ ܘܥܘܼܪܒ̣ܵܐ ܒܓܸܢܣܲܝܗܝ ܢܲܥܵܡܵܐ؛ ܘܢܸܨܵܐ ܒܓܸܢܣܲܝܗܝ؛ ܒܘܼܡܵܐ؛ ܘܫܵܠܹܐ ܢܘܼܢܹ̈ܐ؛ ܘܩܲܦܘܼܦܵܐ؛ ܘܩܘܼܦܬܵܐ؛ ܘܩܲܪܓ̣ܵܐ؛ ܘܠܲܓܠܲܓ؛ ܘܚܘܼܪܒ̣ܵܐ؛ ܘܐܲܢܦܵܐ ܠܓܸܢܣܲܝܗܝ.܀ ܩܵܪܘܿܘܵܐ ܟܹܘܝܼ؛ ܘܛܵܘܘܿܣ؛ ܘܟܠܲܝܗܝ ܙܵܥܝܹ̈ܐ ܕܐܲܢܹܐ ܛܲܝܪܹ̈ܐ ܛܲܡܐܹܐ ܝ݇ܢܵܐ؛ ܠܵܐ ܦܵܝܫܝܼ ܐ݇ܟ̣ܝܼܠܹܐ. ܟܠ ܦܵܪܲܚܬܵܐ ܐ݇ܟ̣ܘܿܠܘܿܢ.܀ ܠܵܐ ܐܵܟ̣ܠܝܼܬܘܿܢ ܟܠ ܛܲܡܵܐܐ؛ ܐܸܠܵܐ ܠܥܵܡܪ̈ܵܢܹܐ ܕܓܵܘ ܡܵܬܘܵܬ̈ܘܼܟܼ ܗܲܒ̣݇ܠܹܗ ܕܐܵܟ̣ܠܝܼ ܠܹܗ. ܝܲܢ ܙܵܒܸܢܹܗ ܩܵܐ ܢܘܼܟ̣ܪ̈ܵܝܹܐ. ܣܵܒܵܒ ܐܲܢ݇ܬ̇ ܛܵܝܸܦܵܐ ܩܲܕܝܼܫܵܐ ܝ݇ܘܸܬ̇ ܠܡܵܪܝܵܐ ܐܲܠܵܗܘܼܟܼ؛ ܠܵܐ ܒܲܫܠܸܬ̇ ܓܸܕܝܵܐ ܓܵܘ ܚܲܠܒ̣ܵܐ ܕܝܸܡܹܗ.܀ ܝܵܗܒ̣ܸܬ̇ ܚܲܕ݇ ܡ̣ܢ ܥܸܣܪܵܐ ܕܟܠܲܝܗܝ ܗܵܨܝܼܠܹ̈ܐ ܕܒܸܪܙܲܪܥܘܼܟܼ ܕܦܵܠܸܛ ܡ̣ܢ ܐܲܪܥܘܼܟܼ ܫܹܢ݇ܬܵܐ ܒܫܹܢ݇ܬܵܐ.܀ ܘܐ݇ܟ̣ܘܿܠ ܩܵܕ݇ܡ ܡܵܪܝܵܐ ܐܲܠܵܗܘܼܟܼ؛ ܒܕܘܼܟܬܵܐ ܕܓܵܒܹܐ ܠܡܲܫܪܘܼܝܹܐ ܫܸܡܹܗ ܬܵܡܵܐ.܀ ܚܲܕ݇ ܡ̣ܢ ܥܸܣܪܵܐ ܕܕܸܚܠܘܼܟܼ ܘܚܲܡܪܘܼܟܼ ܘܡܸܫܚܘܼܟܼ؛ ܘܒܘܼܟ̣ܪܹ̈ܐ ܕܬܵܘܪ̈ܘܼܟܼ ܘܥܸܪ̈ܒܘܼܟܼ؛ ܘܝܵܠܦܸܬ̇ ܠܸܙܕܲܥܝܵܐ ܩܵܕ݇ܡ ܡܵܪܝܵܐ ܐܲܠܵܗܘܼܟܼ ܟܠܲܝܗܝ ܝܵܘܡܵܢܹ̈ܐ.܀ ܘܐܸܢ ܪܸܚܩܵܐ ܝ݇ܠܵܗ̇ ܐܘܼܪܚܵܐ ܘܠܹܐ ܡܵܨܸܬ̇ ܠܸܛܝܵܢܹܗ؛ ܣܵܒܵܒ ܕܪܸܚܩܵܐ ܝ݇ܠܹܗ ܐܲܬܪܵܐ ܕܓܵܒܹܐ ܡܵܪܝܵܐ ܐܲܠܵܗܘܼܟܼ ܠܡܲܫܪܘܼܝܹܐ ܫܸܡܹܗ ܬܵܡܵܐ؛ ܐܝܼܡܲܢ ܕܒܘܼܪܟ̣ܸܬܠܹܗ ܡܵܪܝܵܐ ܐܲܠܵܗܘܼܟܼ.܀ ܙܵܒܸܢܹܗ ܒܙܘܼܙܹ̈ܐ ܘܟܬܘܿܪ ܙܘܼܙܹ̈ܐ ܒܐܝܼܕܘܼܟܼ؛ ܘܙܹܠ݇ ܠܕܘܼܟܬܵܐ ܕܓܵܒܹܐ ܡܵܪܝܵܐ ܐܲܠܵܗܘܼܟܼ.܀ ܘܙܒ̣ܘܿܢ ܒܙܘܼܙܹ̈ܐ ܟܠ ܡܸܢܕܝܼ ܕܡܲܚܸܒܸܬ̇؛ ܡ̣ܢ ܬܵܘܪܹ̈ܐ ܘܡ̣ܢ ܥܸܪ̈ܒܹܐ ܘܡ̣ܢ ܚܲܡܪܵܐ ܘܡ̣ܢ ܥܵܪܲܩ ܘܡ̣ܢ ܟܠ ܡܸܢܕܝܼ ܕܛܵܠܒܵܐ ܓܵܢܘܼܟܼ؛ ܘܐ݇ܟ̣ܘܿܠ ܬܵܡܵܐ ܩܵܕ݇ܡ ܡܵܪܝܵܐ ܐܲܠܵܗܘܼܟܼ؛ ܘܚܕܝܼ ܐܲܢ݇ܬ̇ ܘܒܲܝܬܘܼܟܼ.܀ ܘܠܹܘܵܝܵܐ ܕܓܵܘ ܡܵܬܘܵܬ̈ܘܼܟܼ ܠܵܐ ܡܲܢܫܸܬ̇ ܠܹܗ؛ ܣܵܒܵܒ ܕܠܲܝܬ̇ ܠܹܗ ܝܵܪܬܘܼܬܵܐ ܘܣܵܡܵܐ ܥܲܡܘܼܟܼ.܀ ܘܡ̣ܢ ܒܵܬ݇ܪ ܬܠܵܬܵܐ ܫܸܢܹ̈ܐ؛ ܡܦܵܠܸܛ ܟܠܹܗ ܡܲܥܣܵܪܵܐ ܕܗܵܨܝܼܠܘܼܟܼ ܕܗ̇ܝ ܫܹܢ݇ܬܵܐ ܘܫܒ̣ܘܿܩ ܓܵܘ ܡܵܬܘܵܬ̈ܘܼܟܼ.܀ ܘܒܸܬ ܐܵܬܹܐ ܠܹܘܵܝܵܐ ܕܠܲܝܬ̇ ܠܹܗ ܝܵܪܬܘܼܬܵܐ ܘܣܵܡܵܐ ܥܲܡܘܼܟܼ؛ ܘܗ̇ܘ ܕܕܵܐܸܪ ܠܟܸܣܠܝܼ؛ ܘܝܲܬܘܼܡܵܐ ܘܐܲܪܡܸܠܬܵܐ ܕܓܵܘ ܡܵܬܘܵܬ̈ܘܼܟܼ؛ ܘܒܸܬ ܐܵܟ̣ܠܝܼ ܘܣܵܒ̣ܥܝܼ ܩܵܐ ܕܒܲܪܸܟ̣ܠܘܼܟܼ ܡܵܪܝܵܐ ܐܲܠܵܗܘܼܟܼ ܒܟܠܹܗ ܦܘܼܠܚܵܢܵܐ ܕܐܝܼܕ̈ܘܼܟܼ ܕܥܵܒ̣ܕܸܬ̇.܀ ܘܒܵܬ݇ܪ ܫܲܒ̣ܥܵܐ ܫܸܢܹ̈ܐ ܥܒ̣ܘܿܕ ܫܘܼܒ̣ܩܵܢܵܐ.܀ ܘܐܵܗܵܐ ܝ݇ܠܹܗ ܪܹܐܙܹܗ ܘܫܘܼܒ̣ܩܵܢܵܐ؛܀ ܟܠ ܐ݇ܢܵܫܵܐ ܕܐܝܼܬ ܠܹܗ ܕܵܝܢܵܐ ܠܟܸܣ ܚܲܒ̣ܪܹܗ ܒܸܬ ܫܵܒ̣ܸܩܠܹܗ. ܘܠܵܐ ܛܵܠܸܒܠܹܗ ܡܸܢܹܗ؛ ܣܵܒܵܒ ܕܦܸܫܠܹܗ ܩܸܪܝܵܐ ܫܘܼܒ̣ܩܵܢܵܐ ܠܡܵܪܝܵܐ.܀ ܘܡ̣ܢ ܢܘܼܟ̣ܪܵܝܵܐ ܫܩܘܿܠ؛ ܘܡܸܢܕܝܼ ܕܐܝܼܬܠܘܼܟܼ ܠܟܸܣ ܐܵܚܘܿܢܘܼܟܼ ܫܒ̣ܘܿܩ.܀ ܕܠܵܐ ܗܵܘܹܐ ܓܵܘܵܘܟ̣ܘܿܢ ܡܸܣܟܹܢܵܐ؛ ܣܵܒܵܒ ܡܵܪܝܵܐ ܐܲܠܵܗܘܼܟܼ ܒܸܬ ܒܵܪܸܟܼܠܘܼܟܼ ܒܐܲܪܥܵܐ ܕܝܵܗ݇ܒ̣ܸܠܘܼܟܼ ܕܝܵܪܬܸܬ̇ ܠܵܗ̇܀
ܚܲܒ̣ܪܹܗ
ܐܹܫܲܥܝܵܐ ܡܒ؛ 5‐10؛ 14‐18
ܫܠܵܘ ܢܒ̣ܝܼܘܬܹܗ ܕܐܹܫܲܥܝܵܐ؛ ܐܲܚܲܝ̈ ܒܲܪܸܟ̣ܡܵܪܝ܀
ܗܵܕܟ̣ܵܐ ܒܹܐܡܵܪܵܐ ܝ݇ܠܹܗ ܡܵܪܝܵܐ ܕܒܪܹܐܠܹܗ ܫܡܲܝܵܐ ܘܡܬܝܼܚܵܐ ܠܹܗ؛ ܘܪܩܝܼܥܠܹܗ ܐܲܪܥܵܐ ܘܟܠ ܡܸܢܕܝܼ ܕܓܵܘܵܗ̇؛ ܕܝܘܼܗ݇ܒ̣ܸܠܹܗ ܢܫܲܡܬܵܐ ܠܛܵܝܸܦܵܐ ܕܥܲܠܵܗ̇؛ ܘܪܘܼܚܵܐ ܠܐܵܢܝܼ ܕܚܵܕܪܝܼ ܓܵܘܵܗ̇.܀ ܐܵܢܵܐ ܡܵܪܝܵܐ ܩܲܡ ܩܵܪܸܢܘܼܟܼ ܒܙܲܕܝܼܩܘܼܬܵܐ؛ ܘܕܒ̣ܸܩܠܝܼ ܒܐܝܼܕܘܼܟܼ ܘܚܘܼܠܸܢܝܼ ܐܸܠܘܼܟܼ؛ ܘܩܲܡ ܝܵܗ݇ܒ̣ܸܢܘܼܟܼ ܩܵܘܠܵܐ ܠܛܵܝܸܦܵܐ؛ ܘܒܲܗܪܵܐ ܠܛܵܝܸܦܹ̈ܐ. ܕܦܵܬܚܸܬ̇ ܥܲܝܢܹ̈ܐ ܕܟܘܼܪܹ̈ܐ ܘܦܲܠܛܸܬ̇ ܠܐܲܣܝܼܪܹ̈ܐ ܡ̣ܢ ܚܒ̣ܘܼܫܝܵܐ؛ ܘܡ̣ܢ ܒܹܝܬ̣ ܐܲܣܝܼܪܹ̈ܐ ܠܐܵܢܝܼ ܕܒܸܬܝܵܒ̣ܵܐ ܝ݇ܢܵܐ ܒܚܸܫܟܵܐ.܀ ܐܵܢܵܐ ܝ݇ܘܸܢ ܡܵܪܝܵܐ ܘܐܵܗܵܐ ܝ݇ܠܹܗ ܫܸܡܝܼ؛ ܘܐܝܼܩܵܪܝܼ ܠܐ݇ܚܹܪ݇ܢܵܐ ܠܹܐ ܝܵܗ݇ܒ̣ܸܢ؛ ܘܐܵܦܠܵܐ ܚܸܩܪܝܼ ܠܨܵܢܲܡܹ̈ܐ.܀ ܡܸܢܕܝܼܵܢܹ̈ܐ ܚܲܕܬܹ̈ܐ ܐܵܢܵܐ ܒܸܬ ܡܲܚܙܸܢ؛ ܘܩܵܕ݇ܡܵܝܹ̈ܐ ܗܵܐ ܐܸܬܝܹܐ ܝ݇ܢܵܐ؛ ܡ̣ܢ ܩܵܕ݇ܡ ܕܨܵܡܚܝܼ ܡܘܼܫܡܥܝܼܲܝܗܝ ܠܝܼ ܐܸܠܵܘܟ̣ܘܿܢ.܀ ܫܬܸܩܠܝܼ ܡ̣ܢ ܥܵܠܲܡ ܒܸܬ ܫܵܬܩܸܢ؛ ܚܡܸܠܝܼ ܐܲܝܟܼ ܗܲܨܠܵܢܬܵܐ؛ ܒܸܬ ܡܲܢܘܸܪܸܢ ܘܡܥܲܓ̰ܒܸܢ ܡܐܘܼܕܵܠܹܐ.܀ ܘܒܸܬ ܡܲܚܪܸܒ̣ܸܢ ܛܘܼܪ̈ܵܢܹܐ ܘܪ̈ܘܼܡܝܵܬܹܐ؛ ܘܟܠܹܗ ܚܲܝܠܲܝܗܝ؛ ܒܸܬ ܡܲܒܪܸܙܸܢ ܢܲܗܪ̈ܵܘܵܬܹܐ ܒܸܬ ܫܲܚܠܸܦܸܢ ܠܓܵܙܲܪ̈ܝܵܬܹܐ؛ ܘܫܵܩܝܼܵܬܹ̈ܐ ܡܲܒܪܸܙܸܢ؛ ܒܸܬ ܠܵܒܠܸܢ ܟܘܼܪܹ̈ܐ ܒܐܘܼܪܚܵܐ ܕܠܵܐ ܝܵܕܥܝܼ؛ ܘܒܓ̰ܵܕܵܘܵܬܹ̈ܐ ܕܠܹܐ ܝܵܕܥܝܼ ܗ݇ܘܵܘ ܒܸܬ ܡܲܚܕܸܪܸܢܗ݇ܘܿܢ؛ ܒܸܬ ܥܵܒ̣ܕܸܢ ܚܸܫܟܵܐ ܩܵܕ݇ܡܲܝܗܝ ܒܲܗܪܵܐ؛ ܘܛܘܼܪܵܐ ܥܵܒ̣ܕܸܢ ܕܸܫܬܵܐ. ܐܲܢܹܐ ܡܸܢܕܝܼܵܢܹ̈ܐ ܥܒ̣ܸܕܠܝܼ ܐܸܠܲܝܗܝ؛ ܘܠܵܐ ܫܒ̣ܝܼܩܝܼ ܠܝܼ؛ ܘܒܸܬ ܕܵܝܪܝܼ ܠܵܒܵܬ݇ܪܵܐ ܘܒܸܬ ܢܵܟ̣ܦܝܼ ܢܟ̣ܸܦܬܵܐ؛ ܐܵܢܝܼ ܕܐܝܼܬ ܠܗ݇ܘܿܢ ܗܹܒ̣ܝܼ ܥܲܠ ܨܵܢܲܡܹ̈ܐ؛ ܘܐܵܡܪܝܼ ܩܵܐ ܪܸ̈ܡܝܹܐ [ܩܵܝܸܡܝܵܬܹ̈ܐ] ܐܲܚܬܘܿܢ ܝܼܬܘܿܢ ܐܲܠܵܗܲܝ̈ܢ܀
♱♱♱♱♱♱♱♱
ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ
ܕܲܠܘܵܬܼ ܛܝܼܡܵܬܹܐܘܿܣ ܐܲܚܲܝ̈ ܒܲܪܸܟܼܡܵܪܝ܀
ܐܝܼܢܵܐ ܐܵܢܝܼ ܕܒܵܥܝܝܼ ܠܸܗܘܵܝܵܐ ܥܲܬܝܼܪܹ̈ܐ ܟܹܐ ܢܵܦܠܝܼ ܒܓ̰ܘܼܪ̈ܵܒܹܐ ܘܢܸܫܒܹ̈ܐ ܘܒܪܵܒܵܐ ܫܲܗܘܲܬܝܵܬܹ̈ܐ ܕܝܼܢܵܐ ܣܲܟܼܠܹ̈ܐ ܘܚܲܙܕܸܓܵܢܹ̈ܐ. ܘܟܹܐ ܡܛܲܒ̇ܥܝܼ ܠܒܢܲܝ̈ ܐ݇ܢܵܫܵܐ ܓܵܘ ܚܪܵܒܼܵܐ ܘܬܠܵܩܵܐ* ܣܵܒܵܒ ܥܸܩܪܵܐ ܕܟܠܲܝܗܝ ܒܝܼܫܵܬܹ̈ܐ ܝܼܠܵܗ̇ ܡܲܚܲܒܬܵܐ ܕܙܘܼܙܹ̈ܐ. ܘܐܝܼܬ ܐ݇ܢܵܫܹ̈ܐ ܕܫܘܼܗܘܸܬܠܗ݇ܘܿܢ ܐܸܠܵܗ̇ ܡ̣ܢ ܗܲܝܡܵܢܘܼܬܵܐ ܬܠܸܩܠܗ݇ܘܿܢ ܘܡܘܼܥܒܸܪܵܐ ܠܗ݇ܘܿܢ ܓܵܢܲܝܗܝ ܠܪܵܒܵܐ ܦܵܫܲܡܝܵܬܹ̈ܐ* ܐܝܼܢܵܐ ܐܲܢ݇ܬ ܝܵܐ ܒܲܪܢܵܫܵܐ ܕܐܲܠܵܗܵܐ؛ ܡ̣ܢ ܕܐܲܢܹܐ ܥܪܘܿܩ. ܘܪܚܘܿܛ ܒܵܬ̄ܪ ܙܲܕܝܼܩܘܼܬܵܐ ܘܒܵܬ̄ܪ ܟܹܐܢܘܼܬܵܐ؛ ܘܒܵܬ̄ܪ ܗܲܝܡܵܢܘܼܬܵܐ؛ ܘܒܵܬ̄ܪ ܚܘܼܒܵܐ ܘܒܵܬ̄ܪ ܚܡܲܠܬܵܐ؛ ܘܒܵܬ̄ܪ ܡܲܟܝܼܟܘܼܬܵܐ* ܘܦܠܘܿܫ ܦܠܵܫܵܐ ܕܗܲܝܡܵܢܘܼܬܵܐ. ܘܡܛܝܼ ܠܚܲܝܹ̈ܐ ܕܠܐܵܒܲܕ ܕܐܸܠܲܝܗܝ ܦܸܫܠܘܼܟܼ ܟ̰ܝܼܕܵܐ. ܘܡܘܼܕܹܐ ܠܘܼܟܼ ܬܵܘܕܝܼܬܵܐ ܛܵܒܼܬܵܐ ܩܵܕ݇ܡ ܪܵܒܵܐ ܣܵܗܕܹ̈ܐ* ܒܝܼܵܗܒܼܵܐ ܝ݇ܘܸܢ ܣܵܗܕܘܼܬܵܐ ܐܸܠܘܼܟܼ ܩܵܕ݇ܡ ܐܲܠܵܗܵܐ ܡܲܚܝܼܵܢܵܐ ܕܟܠ ܘܝܼܫܘܿܥ ܡܫܝܼܚܵܐ ܗ̇ܘ ܕܝܘܼܗ݇ܒܸܠܹܗ ܣܵܗܕܘܼܬܵܐ ܩܵܕ݇ܡ ܦܲܢܛܝܼܘܿܣ ܦܝܼܠܵܛܘܿܣ ܣܵܗܕܘܼܬܵܐ ܨܦܵܝ* ܕܢܵܛܪܸܬ ܠܹܗ ܦܘܼܩܕܵܢܵܐ ܕܠܵܐ ܠܲܟܵܐ ܘܕܠܵܐ ܠܵܘܡܵܐ ܗܲܠ ܓܸܠܝܵܢܹܗ ܕܡܵܪܲܢ ܝܼܫܘܿܥ ܡܫܝܼܚܵܐ* ܗ̇ܘ ܕܗܕܝܼܪܵܐ ܝ݇ܠܹܗ ܒܥܕܵܢܸܗ ܕܡܲܚܙܹܐ ܠܹܗ ܐܲܠܵܗܵܐ ܡܒܘܼܪܟܼܵܐ ܘܚܲܝܠܵܢܵܐ ܒܢܲܦ̮ܫܹܗ؛ ܡܲܠܟܵܐ ܕܡܲܠܟܹ̈ܐ ܘܡܵܪܵܐ ܕܡܵܪ̈ܵܘܵܬܹܐ* ܕܗ̇ܘ ܝܼܠܹܗ ܐܲܚܟ̰ܝܼ ܒܢܲܦ̮ܫܹܗ ܠܵܐ ܚܲܪܒܼܵܢܵܐ؛ ܘܟܹܐ ܥܵܡܸܪ ܒܒܲܗܪܵܐ ܕܗܸܟܼ̃ ܐ݇ܢܵܫܵܐ ܠܹܐ ܡܵܨܹܐ ܕܩܲܪܒܸܢ ܐܸܠܹܗ. ܕܚܲܕ݇ ܐ݇ܢܵܫܵܐ ܡ̣ܢ ܒܢܲܝ̈ܢܵܫܵܐ ܠܹܐ ܝ݇ܠܹܗ ܚܸܙܝܹܗ؛ ܘܐܘܼܦ ܠܹܐ ܡܵܨܹܐ ܕܚܵܙܹܐ ܠܹܗ. ܗ̇ܘ ܕܐܸܠܹܗ ܐܝܼܩܵܪܵܐ ܘܗܘܼܟܡܵܐ ܠܐܵܒܲܕ ܐܵܒܲܕܝܼܢ ܐܵܡܹܝܢ* ܠܥܲܬܝܼܪܹ̈ܐ ܕܐܵܗܵܐ ܕܘܼܢܝܹܐ ܦܩܘܿܕ ܕܠܵܐ ܦܵܝܫܝܼ ܡܘܼܪܡܹܐ ܒܚܝܼܵܠܲܝܗܝ؛ ܘܠܵܐ ܦܵܝܫܝܼ ܒܗܹܒܼܝܼ ܥܲܠ ܕܵܘܸܠܬܲܝܗܝ ܕܠܲܝܬ ܥܲܠܵܗ̇ ܗܹܒܼܝܼ؛ ܐܸܠܵܐ ܥܲܠ ܐܲܠܵܗܵܐ ܗ̇ܘ ܕܝܘܼܗܒܸܠܹܗ ܩܵܬܲܢ ܟܠ ܡܸܢܕܝܼ ܒܦܸܪܝܘܼܬܵܐ ܩܵܐ ܪܵܗܲܬܘܼܬܲܢ* ܘܥܵܒܼܕܝܼ ܦܘܼܠܚܵܢܹ̈ܐ ܛܵܒܼܹ̈ܐ؛ ܘܗܵܘܝܼ ܥܲܬܝܼܪܹ̈ܐ ܒܫܘܼܠܹ̈ܐ ܫܲܦܝܼܪܹ̈ܐ܋ ܘܡܲܬܒܼܝܼ ܩܵܐ ܓܵܢܲܝܗܝ ܒܸܢܝܲܬ ܛܵܒܼܬܵܐ ܠܡܸܢܕܝܼ ܕܝܼܠܹܗ ܗܘܼܕܪܵܐ؛ ܩܵܐ ܕܡܵܛܝܼ ܠܚܲܝܹ̈ܐ ܫܲܪܝܼܪܹ̈ܐ* ܝܵܐ ܛܝܼܡܵܬܹܐܵܐ ܗܘܝܼ ܗܸܫܝܲܪ ܒܡܸܢܕܝܼ ܕܦܸܫܠܹܗ ܣܘܼܦܝܵܐ ܐܸܠܘܼܟܼ. ܘܥܪܘܿܩ ܡ̣ܢ ܒܪ̈ܵܬ̄ܩܵܠܹܐ ܒܲܛܝܼܠܹ̈ܐ ܘܡ̣ܢ ܡܲܕܲܪܬܵܐ ܘܓ̰ܘܼܘܵܒ ܩܵܐ ܝܘܼܠܦܵܢܵܐ ܕܵܓܵܠܵܐ* ܣܵܒܵܒ ܐܵܢܝܼ ܕܩܘܼܘܸܠܵܐ ܠܗ݇ܘܿܢ ܓܵܢܲܝܗܝ ܐܸܠܹܗ؛ ܦܠܸܛܠܗ݇ܘܿܢ ܡ̣ܢ ܐܘܼܪܚܵܐ ܕܗܲܝܡܵܢܘܼܬܵܐ. ܫܵܦܵܩܲܬ ܥܲܡܘܼܟܼ؛ ܐܵܡܹܝܢ*
♱♱♱♱♱♱♱♱
ܡܬܝ ܙ: 28 ‐ ܚ؛ 14
ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ ܟܪܘܙܘܬܼܐ ܕܡܬܝ
♰ ܘܗ݇ܘܹܐ ܠܵܗ̇ ܟܲܕ ܬܘܼܡܸܡܠܹܗ ܝܑܼܫܘܿܥ ܐܲܢܹܐ ܗܹܡܸܙܡܵܢܹ̈ܐ، ܥܲܓ̰ܒܝܼ ܗ݇ܘܵܘ ܟܸܢܫܹ̈ܐ ܥܲܠ ܝܘܼܠܦܵܢܹܗ: ܣܵܒܵܒ ܡܵܠܸܦ ܗ݇ܘܵܐ ܠܗ݇ܘܿܢ ܐܲܝܟܼ ܡܫܲܠܛܵܐ: ܘܠܵܐ ܐܲܝܟܼ ܣܲܦܪ̈ܲܝܗܝ ܘܦܪ̈ܝܼܫܹܐ: ܐܝܼܢܵܐ ܟܲܕ ܨܠܹܐܠܹܗ ܡ̣ܢ ܛܘܼܪܵܐ: ܬܒܸܥܠܗ݇ܘܿܢ ܐܸܠܹܗ ܟܸܢܫܹ̈ܐ ܪܵܒܵܐ: ܘܗܵܐ ܚܲܕ݇ ܓܲܪܒܼܵܢܵܐ ܐ݇ܬܹܐܠܹܗ، ܣܓܼܸܝܼܕܠܹܗ ܐܸܠܹܗ ܘܐ݇ܡܝܼܪܹܗ: ܡܵܪܝܼ ܐܸܢ ܐܲܢ݇ܬ ܒܲܣܡܵܐ ܠܘܼܟܼ: ܡܵܨܸܬ ܐܲܢ݇ܬ ܠܡܕܲܟܼܵܝܬܝܼ: ܘܦܘܼܫܛܵܐܠܹܗ ܐܝܼܕܹܗ ܝܑܼܫܘܿܥ، ܘܕܩܝܼܪܹܗ ܒܝܼܹܗ ܘܐ݇ܡܝܼܪܹܗ: ܒܣܵܡܝܼ ܝܠܵܗ̇ ܦܘܼܫ ܕܸܟܼܝܵܐ. ܘܒܗ̇ܝ ܣܵܥܵܬ ܦܝܼܫܠܹܗ ܕܸܟܼܝܵܐ ܓܲܪܒܼܹܗ: ܘܐ݇ܡܝܼܪܹܗ ܐܸܠܹܗ ܝܑܼܫܘܿܥ: ܚܙܝܼ ܠܐ݇ܢܵܫܵܐ ܠܵܐ ܐܲܡܪܸܬ: ܐܸܠܵܐ ܙܹܠ݇ ܡܲܚܙܝܼ ܓܵܢܘܼܟܼ ܠܟܵܗܢܹ̈ܐ: ܘܡܲܩܪܸܒܼ ܩܘܼܪܒܵܢܵܐ ܐܲܝܟܼ ܕܦܩܝܼܕܠܹܗ ܡܘܼܫܹܐ ܠܣܵܗܕܘܼܬܲܝܗܝ: ܐܝܼܢܵܐ ܟܲܕ ܥܒܼܝܼܪܹܗ ܝܑܼܫܘܿܥ ܠܟܦܲܪܢܵܚܘܿܡ: ܩܘܼܪܒܸܢܹܗ ܐܸܠܹܗ ܚܲܕ݇ ܩܸܢܛܪܘܿܢܵܐ: ܛܵܠܸܒ ܗ݇ܘܵܐ ܡܸܢܹܗ ܘܐܵܡܸܪ: ܡܵܪܝܼ ܝܲܠܕ݇ܝܼ ܫܛܝܼܚܵܐ ܝܠܹܗ ܒܒܲܝܬܵܐ ܘܫܦܝܼܠܵܐ ܝܠܹܗ ܘܚܸܪܒܵܐ ܓ̰ܲܢܓ̰ܘܼܪܹܐ ܝܠܹܗ: ܐܵܡܸܪ ܐܸܠܹܗ ܝܑܼܫܘܿܥ: ܒܸܬ ܐܵܬܸܢ ܐܵܢܵܐ ܘܒܸܬ ܒܲܣܡܸܢܹܗ: ܓ̰ܘܼܘܸܒܠܹܗ ܗ̇ܘ ܩܹܢܛܪܘܿܢܵܐ ܘܐ݇ܡܝܼܪܹܗ: ܡܵܪܝܼ ܠܹܐ ܚܲܫܚܸܢ ܕܥܲܒܼܪܸܬ ܬܚܘܿܬ ܫܟܘܼܪܝܼ: ܐܸܠܵܐ ܐܲܚܟ̰ܝܼ ܐ݇ܡܘܿܪ ܒܗܹܡܸܙܡܵܢ ܘܒܸܬ ܒܵܤܸܡ ܝܲܠܕ݇ܝܼ: ܣܵܒܵܒ ܐܵܦ ܐܵܢܵܐ ܓܲܒܼܪܵܐ ܝܘܸܢ ܕܬܚܘܿܬ ܫܘܼܠܛܵܢܵܐ، ܘܐܝܼܬ ܬܚܘܿܬ ܐܝܼܕܝܼ ܣܲܪ̈ܒܵܙܹܐ: ܘܟܹܐ ܐܲܡܪܸܢ ܠܐܵܗܵܐ ܕܙܹܠ݇ ܘܟܹܐ ܐܵܙܸܠ: ܘܠܐ݇ܚܹܪ݇ܢܵܐ ܕܬܵܐ ܘܟܹܐ ܐܵܬܹܐ: ܘܠܪܹܓܝܼ ܕܥܒܼܘܕ ܐܵܗܵܐ ܘܟܹܐ ܥܵܒܼܸܕ: ܐܝܼܢܵܐ ܟܲܕ ܫܡܝܼܥܠܹܗ ܝܑܼܫܘܿܥ ܥܘܼܓ̰ܸܒܠܹܗ ܘܐ݇ܡܝܼܪܹܗ ܠܐܵܢܝܼ ܕܒܹܐܬܵܝܵܐ ܝܗ݇ܘܵܘ ܥܲܡܗ: ܬܪܘܿܨܵܐ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ: ܕܐܘܿܦܠܵܐ ܒܝܼܣܪܵܝܸܠ ܡܘܼܫ݇ܟ̰ܸܚܠܝܼ ܐܲܝܟܼ ܗܵܕܹܐ ܗܲܝܡܵܢܘܼܬܵܐ: ܐܝܼܢܵܐ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ ܕܪܵܒܵܐ ܒܸܬ ܐܵܬܝܼ ܡ̣ܢ ܡܲܕܢܚܵܐ ܘܡ̣ܢ ܡܲܥܪܒܼܵܐ ܘܒܸܕ ܝܲܬܒܼܝܼ ܥܲܡ ܐܲܒܼܪܵܗܵܡ ܘܐܝܼܣܚܵܩ ܘܝܲܥܩܘܼܒܼ ܒܡܲܠܟܘܼܬܵܐ ܕܫܡܲܝܵܐ: ܐܝܼܢܵܐ ܒܢܘܿܢܹ̈ܐ ܕܡܲܠܟܘܼܬܵܐ ܒܸܕ ܦܲܠܛܝܼ ܠܚܸܫܟܵܐ ܒܲܪܵܝܵܐ: ܬܵܡܵܐ ܒܸܕ ܗܵܘܹܐ ܒܸܟܼܝܵܐ ܘܚܲܪܚܲܟ̰ܬܵܐ ܕܟܵܟܹ̈ܐ: ܘܐ݇ܡܝܼܪܹܗ ܝܑܼܫܘܿܥ ܠܗ̇ܘ ܩܸܢܛܪܘܿܢܵܐ: ܙܸܠ݇ ܕܲܐܟܼܝܼ ܕܗܘܼܡܸܢܘܼܟܼ ܗܵܘܹܐ ܠܘܼܟ: ܘܦܝܼܫܠܹܗ ܒܣܝܼܡܵܐ ܝܲܠܹܕ݇ܗ ܒܗ̇ܝ ܣܵܥܵܬ.
♱♱♱♱♱♱♱♱