ܚܲܕܼܒܫܲܒܵܐ ܕܐܲܪܒܥܵܐ ܕܲܨܠܝܼܒ̣ܵܐ
ܘܕܫܲܒ̣ܥܵܐ ܗ݇ܘ̣ ܕܐܹܠܝܼܵܐ
ܬܸܢܝܵܢ ܢܵܡܘܿܣܵܐ ܝ؛ 12‐ ܫܘܼܠܵܡܵܐ
ܬܸܒ̣ܘ ܘܲܫܠܵܘ ܬܸܢܝܵܢ ܢܵܡܘܿܣܵܐ ܣܸܦܪܵܐ ܕܚܲܡܫܵܐ ܕܐܘܿܪܵܝܬܵܐ؛
ܐܲܚܲܝ̈ ܒܲܪܸܟ̣ܡܵܪܝ܀
ܡܐܵܕܝܼܵܐ ܝܼܣܪܵܝܹܠ؛ ܡܘܼܕܝܼ ܒܸܛܠܵܒܵܐ ܝ݇ܠܹܗ ܡܸܢܘܼܟܼ ܡܵܪܝܵܐ ܐܲܠܵܗܘܼܟܼ؟ ܫܒ̣ܘܿܩ ܡ̣ܢ ܕܙܵܕܥܸܬ̇ ܡ̣ܢ ܡܵܪܝܵܐ ܐܲܠܵܗܘܼܟܼ ܘܚܵܕܪܸܬ̇ ܒܐܘܼܪ̈ܚܵܬܹܗ ܘܡܲܚܸܒܸܬ̇ ܠܹܗ. ܘܦܵܠܚܸܬ̇ ܠܡܵܪܝܵܐ ܐܲܠܵܗܘܼܟܼ ܡ̣ܢ ܟܠܹܗ ܠܸܒܘܼܟܼ ܘܡ̣ܢ ܟܠܵܗ̇ ܓܵܢܘܼܟܼ؛ ܘܢܵܛܪܸܬ̇ ܦܘܼܩܕܵܢܹ̈ܐ ܕܡܵܪܝܵܐ ܐܲܠܵܗܘܼܟܼ؛ ܘܢܵܡܘܿܣܹ̈ܐ ܕܒܸܦܩܵܕܵܐ ܝ݇ܘܸܢ ܐܸܠܘܼܟܼ ܐܸܕܝܘܿܡ݇ ܝܵܘܡܵܐ ܘܕܗܵܘܝܵܐ ܛܵܒ̣ܬܵܐ ܐܸܠܘܼܟܼ܀ ܕܡܵܪܝܵܐ ܐܲܠܵܗܘܼܟܼ ܝܼܢܵܐ؛ ܫܡܲܝܵܐ ܘܫܡܲܝܵܬܹ̈ܐ ܕܫܡܲܝܵܐ؛ ܘܐܲܪܥܵܐ ܘܟܠ ܡܸܢܕܝܼ ܕܐܝܼܬ ܓܵܘܵܗ̇؛ ܐܲܚܟ̰ܝܼ ܡܵܪܝܵܐ ܒܣܸܡܠܵܐ ܠܹܗ ܒܵܒܵܘܵܬܵܘ̈ܟ̣ܘܿܢ؛ ܘܡܘܼܚܸܒܠܹܗ ܘܓܘܼܒܹܐܠܹܗ ܠܙܲܪܥܲܝܗܝ ܡ̣ܢ ܒܵܬ݇ܪܲܝܗܝ ܡ̣ܢ ܟܠܲܝܗܝ ܛܵܝܸܦܹ̈ܐ ܐܲܝܟܼ ܕܐܸܕܝܘܿܡ݇ ܝܵܘܡܵܐ܀ ܓܙܘܿܪܘܿܢ ܥܘܼܪܠܘܼܬܵܐ ܕܠܸܒܵܘܟ̣ܘܿܢ. ܘܩܕܵܠܵܘܟ̣ܘܿܢ ܡܸܕܪܹܐ ܠܵܐ ܡܲܩܫܝܼܬܘܿܢ܀ ܣܵܒܵܒ ܕܡܵܪܝܵܐ ܐܲܠܵܗܵܘܟ̣ܘܿܢ ܗܲܪ ܗ̇ܘ ܝܼܠܹܗ ܐܲܠܵܗܵܐ ܕܐܲܠܵܗܹ̈ܐ؛ ܘܡܵܪܵܐ ܕܡܵܪ̈ܵܘܵܬܹܐ؛ ܐܲܠܵܗܵܐ ܓܘܼܪܵܐ؛ ܘܓܲܢ݇ܒܵܪܵܐ ܘܣܲܗܡܵܢܵܐ ܕܠܹܐ ܫܵܩܸܠ ܦܵܬܵܐ؛ ܘܠܹܐ ܩܵܒܸܠ ܪܹܫܘܲܬ܀ ܘܥܵܒ̣ܸܕ ܕܝܼܘܵܢ ܕܝܵܬܘܿܡܹ̈ܐ ܘܐܲܪ̈ܡܸܠܝܵܬܹܐ؛ ܘܡܲܚܸܒ ܠܗ̇ܘ ܕܕܵܐܸܪ ܠܟܸܣܠܹܗ؛ ܘܝܵܗ݇ܒ̣ܸܠܹܗ ܠܲܚܡܵܐ ܘܠܒ̣ܸܫܬܵܐ܀ ܡܲܚܸܒܘܿܢ ܠܐܵܢܝܼ ܕܕܵܝܪܝܼ ܠܟܸܣܠܹܗ؛ ܣܵܒܵܒ ܡܵܫܵܚܲܛܹ̈ܐ ܗܘܹܐܠܵܘܟ̣ܘܿܢ ܒܐܲܪܥܵܐ ܕܡܸܨܪܹܝܢ܀ ܡ̣ܢ ܡܵܪܝܵܐ ܐܲܠܵܗܘܼܟܼ ܙܕܝܼܥ؛ ܘܐܸܠܹܗ ܦܠܘܿܚ؛ ܘܐܸܠܹܗ ܬܒܝܼܥ؛ ܘܒܫܸܡܹܗ ܝ݇ܡܝܼ܀ ܗ̇ܘ ܝܼܠܹܗ ܚܸܩܪܘܼܟܼ؛ ܘܗ̇ܘ ܝܼܠܹܗ ܐܲܠܵܗܘܼܟܼ؛ ܕܥܒ̣ܸܕܠܹܗ ܥܲܡܘܼܟܼ ܥܵܓ̰ܝܼܒܘܼܝܵܬܹ̈ܐ ܡܲܙܕܸܥܝܵܢܹ̈ܐ ܕܚܙܹܐܠܗ݇ܘܿܢ ܥܲܝܢ̈ܘܼܟܼ܀ ܒܫܲܒ̣ܥܝܼ ܓܵܢܵܬܹ̈ܐ ܨܠܹܐܠܗ݇ܘܿܢ ܒܵܒܵܘܵܬܵܘ̈ܟ̣ܘܿܢ ܠܡܸܨܪܹܝܢ؛ ܘܐܵܕܝܼܵܐ ܗܵܐ ܡܘܼܙܝܸܕܸܬܠܹܗ ܡܵܪܝܵܐ ܐܲܠܵܗܘܼܟܼ ܐܲܝܟܼ ܟܵܘܟ̣ܒ̣ܹ̈ܐ ܕܓܵܘ ܫܡܲܝܵܐ܀
ܚܲܒ̣ܪܹܗ
ܐܹܫܲܥܝܵܐ ܟܚ؛ 23‐ܟܛ12
ܫܠܵܘ ܢܒ̣ܝܼܘܼܬܹܗ ܕܐܹܫܲܥܝܵܐ؛ ܐܲܚܲܝ̈ ܒܲܪܸܟ̣ܡܵܪܝ܀
ܗܵܕܟ̣ܵܐ ܒܹܐܡܵܪܵܐ ܝ݇ܠܹܗ ܡܵܪܝܵܐ؛ ܡܲܨܝܸܬܘܿܢ ܘܫܡܸܥܡܘܿܢ ܩܵܠܝܼ؛ ܡܲܨܝܸܬܘܿܢ ܘܫܡܸܥܡܘܿܢ ܚܲܒܪܝܼ܀ ܩܵܡܘܿ ܟܠܹܗ ܝܵܘܡܵܐ ܟܹܐ ܛܵܪܹܐ ܐܲܟܵܪܵܐ ܠܸܙܪܲܥܝܵܐ؛ ܘܟܵܠܹܐ ܘܫܵܦܸܢ [ܘܥܵܒ̣ܸܕܠܵܗ̇ ܕܘܼܙ] ܐܲܪܥܹܗ؟܀ ܠܹܐ ܗ݇ܘܵܐ ܐܝܼܡܲܢ ܕܡܘܼܫܘܹܐܠܹܗ ܦܵܬܵܐ ܕܐܲܪܥܵܐ؛ ܒܵܙܸܩ ܫܸܒܸܬ ܘܟܲܡܘܼܢܵܐ ܙܵܪܸܥ؛ ܘܕܵܪܹܐ ܚܸܛܹ̈ܐ ܘܣܥܵܪܹ̈ܐ ܘܫܸܠܸܠ ܒܬܸܚܘܼܒܲܝ̈ܗܝ؟܀ ܒܸܬ ܬܲܥܠܸܡܠܹܗ ܐܲܠܵܗܵܐ ܒܕܝܼܘܵܢ؛ ܘܒܸܬ ܫܵܒܸܚܠܹܗ. ܣܵܒܵܒ ܫܸܒܸܬ ܠܹܐ ܦܵܐܹܫ ܕܘܝܼܪܵܐ ܒܫܲܦܢܵܐ؛ ܘܠܵܐ ܓ̰ܲܢܓ̰ܲܪ ܦܵܐܹܫ ܡܘܼܚܕܸܪܵܐ ܥܲܠ ܟܲܡܘܼܢܵܐ؛ ܫܸܒܸܬ ܦܵܐܹܫ ܢܦܝܼܨܵܐ ܒܚܘܼܛܪܵܐ ܘܟܲܡܘܼܢܵܐ ܒܩܵܛܝܼܵܐ܀ ܕܸܚܠܵܐ ܦܵܐܹܫ ܕܘܝܼܪܵܐ ܒܘܼܬ ܚܵܬܸܪ ܕܝܼܲܢ؛ ܗܝܼܟ̰ ܕܘܵܪܵܐ ܠܵܐ ܦܵܐܹܫ ܕܘܝܼܪܵܐ؛ ܘܒܘܼܫܵܝܘܼܬܵܐ ܕܓܝܼܓ̣ܠܹ̈ܐ ܕܓ̰ܲܢܓ̰ܲܪ. ܘܐܲܩܠܵܬܹ̈ܐ ܠܹܐ ܕܲܩܕܸܩܝܼܠܹܗ ܘܐܘܼܦ ܐܵܗܵܐ ܡ̣ܢ ܩܵܕ݇ܡ ܡܵܪܝܵܐ ܚܲܝܠܬܵܢܵܐ ܦܠܸܛܠܵܗ̇؛ ܥܘܼܓ̰ܵܒܵܐ ܕܚܝܼܵܠ ܡܲܙܝܸܕ ܦܲܪܡܵܝܬܵܐ܀ ܘܵܝ ܐܵܪܝܼܠ ܐܵܪܝܼܠ ܡܕܝܼܢ݇ܬܵܐ؛ ܐܲܝܟܵܐ ܕܫܪܹܐܠܹܗ ܕܵܘܝܼܕ؛ ܡܲܙܝܸܕܘܿܢ ܫܹܢ݇ܬܵܐ ܥܲܠ ܫܹܢ݇ܬܵܐ؛ ܥܹܐܕܵܘܵܬܹ̈ܐ ܒܸܬ ܦܵܝܫܝܼ ܥܒ̣ܝܼܕܹ̈ܐ؛ ܘܒܸܬ ܡܲܥܝܸܩܸܢ ܠܐܵܪܝܼܠ ܘܒܸܬ ܗܵܘܝܵܐ ܢܗܵܝܬܵܐ [ܒܟ̣ܵܝܬܵܐ] ܘܐܘܿܠܝܼܬܵܐ [ܘܓ̰ܢܲܢܬܵܐ]؛ ܘܒܸܬ ܗܵܘܝܵܐ ܐܲܝܟܼ ܐܵܪܝܼܠ܀ ܘܒܸܬ ܫܵܪܸܢ ܥܲܠܵܟ̣ܝ ܐܲܝܟܼ ܐܸܣܦܹܪܵܐ؛ ܘܒܸܬ ܡܲܠܝܸܨܸܢܵܟ̣ܝ ܒܗܲܨܲܪ؛ ܘܡܲܩܸܡܸܢ ܥܲܠܵܟ̣ܝ ܢܵܛܘܿܪܹ̈ܐ؛ ܘܦܵܝܫܲܬ̇ܝ ܡܘܼܟܸܦܬܵܐ؛ ܘܡ̣ܢ ܥܲܦܪܵܐ ܒܸܬ ܗܲܡܙܸܡܲܬ̇ܝ ܘܡ̣ܢ ܥܲܦܪܵܐ ܒܸܬ ܦܵܠܛܝܼ ܗܹܡܸܙܡܵܢܵܟ̣̈ܝ. ܘܦܵܐܹܫ ܫܸܡܥܝܵܐ ܩܵܠܵܟ̣ܝ ܡ̣ܢ ܐܲܪܥܵܐ ܐܲܝܟܼ ܙܲܟܘܼܪܵܐ [ܗܵܘ̇ ܕܟܹܐ ܡܲܕܸܥ ܦܸܠܚܵܢܹ̈ܐ ܛܸܫܝܹ̈ܐ ܕܗܕܝܼܪܹܐ ܝܢܵܐ ܠܸܗܘܵܝܵܐ]. ܘܡ̣ܢ ܥܲܦܪܵܐ ܒܸܬ ܨܵܘܨܝܼ ܗܹܡܸܙܡܵܢܵܟ̣̈ܝ܀ ܒܸܬ ܗܵܘܝܼ ܐܲܝܟܼ ܬܘܿܙ ܕܲܩܝܼܩܬܵܐ ܟܠܲܝܗܝ ܕܲܫܕܸܫܵܢܵܟ̣̈ܝ؛ ܘܐܲܝܟܼ ܬܸܒ̣ܢܵܐ ܥܵܒ̣ܪܵܢܵܐ ܟܠܲܝܗܝ ܙܵܚܡܵܟ̣̈ܝ؛ ܘܡܸܢܫܸܠܬܵܢܹܐ ܒܸܬ ܗܵܘܝܼ ܓ̰ܲܠܕܹܐ؛ ܡ̣ܢ ܩܵܕ݇ܡ ܡܵܪܝܵܐ ܚܲܝܠܬܵܢܵܐ ܒܸܬ ܦܵܝܫܲܬ̇ܝ ܣܘܼܚܒܸܪܬܵܐ ܒܪܵܘܕܵܢܵܐ ܘܒܪ̈ܲܥܡܹܐ ܘܒܩܵܠܵܐ ܪܵܡܵܐ؛ ܘܒܸܪ̈ܩܹܐ؛ ܘܥܲܠܥܵܠܵܐ ܘܠܵܗܵܐ ܕܢܘܼܪܵܐ ܡܲܩܕܵܢܬܵܐ܀ ܘܒܸܬ ܗܵܘܹܐ ܐܲܝܟܼ ܚܸܠܡܵܐ ܒܚܸܙܘܵܐ ܕܠܲܝܠܹܐ؛ ܘܒܘܼܫܵܝܘܼܬܵܐ ܕܟܠܲܝܗܝ ܛܵܝܸܦܹ̈ܐ ܕܗܵܘܝܼ ܚܲܝܠܵܢܹ̈ܐ ܥܲܠ ܨܸܗܝܘܿܢ؛ ܘܟܠܲܝܗܝ ܚܲܝܠܹ̈ܐ ܘܟܸܢܫܹ̈ܐ ܕܡܲܥܝܸܩܝܼܠܵܗ̇܀ ܘܒܸܬ ܗܵܘܹܐ ܐܲܝܟܼ ܟܦܝܼܢܵܐ ܕܚܵܙܹܐ ܒܚܸܠܡܹܗ ܒܹܐܟ̣ܵܠܵܐ؛ ܘܐܝܼܡܲܢ ܕܪܥܸܫܠܹܗ؛ ܓ̰ܲܢܓ̰ܘܼܪܹܐ ܘܟܹܪ݇ܣܹܗ ܣܦܝܼܩܬܵܐ. ܐܲܝܟܼ ܨܸܗܝܵܐ ܕܚܵܙܹܐ ܒܚܸܠܡܹܗ ܒܸܫܬܵܝܵܐ ܡܝܼܵܐ؛ ܘܐܝܼܡܲܢ ܕܪܥܸܫܠܹܗ ܦܘܼܡܹܗ ܒܪܝܼܙܵܐ ܘܓܵܢܹܗ ܣܦܝܼܩܬܵܐ؛ ܗܵܕܟ̣ܵܐ ܒܸܬ ܗܵܘܝܵܐ ܒܘܼܫܵܝܘܼܬܵܐ ܕܟܠܲܝܗܝ ܛܵܝܸܦܹ̈ܐ ܕܥܵܒ̣ܕܝܼ ܚܲܝܠܵܐ ܥܲܠ ܛܘܼܪܵܐ ܕܨܸܗܝܘܿܢ܀ ܦܘܼܫܘܼܢ ܒܵܗܲܬܝܼ ܘܥܲܓ̰ܒܘܿܢ ܪ̈ܵܘܵܝܹܐ ܠܵܐ ܡ̣ܢ ܚܲܡܪܵܐ ܘܚܠܝܼܛܹ̈ܐ ܠܵܐ ܡ̣ܢ ܥܵܪܲܩ. ܣܵܒܵܒ ܕܡܵܪܵܝܵܐ ܨܘܼܢܨܸܠܹܗ ܥܲܠܲܝܗܝ ܪܘܼܚܵܐ ܕܫܸܢܬܵܐ ܝܲܩܘܼܪܬܵܐ؛ ܘܚܘܼܠܸܢܵܗ̇ ܥܲܠ ܥܲܝܢܲܝ̈ܗܝ ܘܥܲܠ ܢܒ̣ܝܼܹ̈ܐ ܘܥܲܠ ܪܹܫܵܢܲܝܗܝ ܕܚܵܙܝܼ ܫܘܼܠܵܢܹ̈ܐ ܛܸܫܝܹ̈ܐ܀ ܘܒܸܬ ܗܵܘܹܐ ܓܵܘܲܝܗܝ ܚܸܙܘܵܐ ܕܟܠܲܝܗܝ؛ ܐܲܝܟܼ ܚܲܒܪܹ̈ܐ ܕܚܲܕ݇ ܟܬܵܒ̣ܵܐ ܚܬܝܼܡܵܐ؛ ܘܐܝܼܡܲܢ ܕܝܵܗܒ̣ܝܼܠܹܗ ܠܚܲܕ݇ ܕܝܵܕܸܥ ܩܪܵܝܬܵܐ؛ ܘܒܸܬ ܐܵܡܪܝܼ ܠܹܗ ܩܪܝܼ ܐܵܗܵܐ؛ ܘܒܸܬ ܐܵܡܸܪ ܠܹܐ ܡܵܨܸܢ ܣܵܒܵܒ ܕܚܬܝܼܡܵܐ ܝ݇ܠܹܗ؛ ܘܒܸܬ ܝܵܗ݇ܒ̣ܝܼܠܹܗ ܠܡ̇ܢ ܕܠܹܐ ܝܵܕܸܥ ܩܪܵܝܬܵܐ؛ ܘܒܸܬ ܐܵܡܪܝܼ ܠܹܗ ܩܪܝܼ ܐܵܗܵܐ؛ ܘܒܸܬ ܐܵܡܸܪ ܠܹܐ ܝܵܕܥܸܢ ܩܪܵܝܬܵܐ܀
♱♱♱♱♱♱♱♱♱
ܚܲܕ݇ܒܫܹܒܵܐ ܕ ܕܨܠܝܼܒܼܵܐ ܙ ܕܐܹܠܝܼܵܐ
ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ
ܕܲܠܘܵܬܼ ܩܘܼܪ̈ܲܢܬܵܝܹܐ ܐܲܚܲܝ̈ ܒܲܪܸܟܼܡܵܪܝ܀
ܡܐܵܕܝܼܵܐ ܐܵܚܘܿܢܘܵܬ̈ܝܼ ܒܹܐܡܵܪܵܐ ܝ݇ܘܸܢ ܕܐܝܼܡܲܢ ܕܓ̰ܵܡܥܝܼܬܘܿܢ؛ ܟܠ ܡܸܢܵܘܟܼܘܿܢ ܕܐܝܼܬ ܠܹܗ ܡܲܙܡܘܿܪܵܐ ܐܵܡܸܪ؛ ܘܗ̇ܘ ܕܐܝܼܬܠܹܗ ܝܘܼܠܦܵܢܵܐ. ܘܗ̇ܘ ܕܐܝܼܬܠܹܗ ܓܸܠܝܵܢܵܐ؛ ܘܗ̇ܘ ܕܐܝܼܬܠܹܗ ܠܸܫܵܢܵܐ؛ ܘܗ̇ܘ ܕܐܝܼܬܠܹܗ ܦܘܼܫܵܩܵܐ؛ ܟܠܲܝܗܝ ܠܒܸܢܝܵܢܵܐ ܗܵܘܝܼ* ܘܐܸܢ ܚܲܕ݇ ܐ݇ܢܵܫܵܐ ܗܲܡܙܸܡ ܒܠܸܫܵܢܵܐ؛ ܬܪܹܝ ܗܲܡܙܸܡܝܼ؛ ܘܐܸܢ ܙܵܘܕܵܐ ܬܠܵܬܵܐ. ܘܚܲܕ݇ ܚܲܕ݇ ܗܲܡܙܸܡܝܼ ܘܚܲܕ݇ ܡܦܵܫܸܩ* ܘܐܸܢ ܠܲܝܬ ܡܦܲܫܩܵܢܵܐ؛ ܫܵܬܸܩ ܓܵܘ ܥܸܕܬܵܐ ܗ̇ܘ ܕܗܲܡܙܸܡ ܒܠܸܫܵܢܵܐ ܘܒܹܝܠܹܗ ܘܠܓܵܢܹܗ ܘܠܐܲܠܵܗܵܐ ܗܲܡܙܸܡ. ܬܪܹܝ ܢܒ̈ܝܼܹܐ ܝܲܢ ܬܠܵܬܵܐ ܗܲܡܲܙܸܡܝܼ ܘܣܵܡܵܐ ܦܝܼܫܵܐ ܦܵܪܫܝܼ* ܘܐܸܢ ܩܵܐ ܚܲܕ݇ ܐ݇ܚܹܪ̄ܢܵܐ ܦܵܐܸܫ ܓܸܠܝܵܐ ܟܲܕ ܝ݇ܬܝܼܒܼܵܐ؛ ܗ̇ܘ ܩܵܕ݇ܡܵܝܵܐ ܚܘܼܫ ܫܵܬܸܩ* ܣܵܒܵܒ ܠܹܐ ܡܵܨܝܼܬܘܿܢ ܟܠܵܘܟܼܘܿܢ ܕܚܲܕ݇ ܚܲܕ݇ ܢܵܒܝܼܬܘܿܢ ܕܟܠ ܐ݇ܢܵܫܵܐ ܝܵܠܸܦ ܘܟܠ ܐ݇ܢܵܫܵܐ ܦܵܐܸܫ ܝܘܼܗ݇ܒܼܵܐ ܠܸܒܵܐ܋ ܣܵܒܵܒ ܪܘܼܚܵܐ ܕܢܒܼܝܼܹ̈ܐ ܠܢܒܼܝܼܹ̈ܐ ܦܵܝܫܵܐ ܙܲܒܛ܋ ܣܵܒܵܒ ܐܲܠܵܗܵܐ ܠܹܐ ܝ݇ܠܹܗ ܕܩܲܠܡܵܩܲܠ ܐܸܠܵܐ ܕܫܠܵܡܵܐ؛ ܐܲܝܟܼ ܕܓܵܘ ܟܠܲܝܗܝ ܥܹܕܵܬܹ̈ܐ ܕܩܲܕܝܼܫܹ̈ܐ܋ ܒܲܟܼܬܵܬܵܘ̈ܟܼܘܿܢ ܓܵܘ ܥܹܕܬܵܐ ܗܵܘܝܼ ܫܬܝܼܩܹܐ ܣܵܒܵܒ ܠܲܝܬܠܗ݇ܘܿܢ ܕܲܣܬܘܼܪ ܕܗܲܡܙܸܡܝܼ. ܐܝܼܢܵܐ ܗܵܘܝܼ ܙܲܒܛ ܐܲܝܟܼ ܕܐܘܼܦ ܢܵܡܘܿܣܵܐ ܐ݇ܡܸܪܸܗ، ܘܐܸܢ ܒܵܥܝܝܼ ܚܲܕ݇ ܡܸܢܕܝܼ ܝܵܠܦܝܼ؛ ܓܵܘ ܒܲܬܘܵܬܲܝ̈ܗܝ ܒܵܩܪܝܼ ܓܲܒܼܪ̈ܵܢܲܝܗܝ. ܣܵܒܵܒ ܢܚܸܦܬܵܐ ܝ݇ܠܵܗ̇ ܕܒܲܟܼܬܵܬܹ̈ܐ ܗܲܡܙܸܡܝܼ* ܝܲܢ ܩܵܘܡܵܐ ܡܸܢܵܘܟܼܘܿܢ ܦܠܸܛܠܵܗ̇ ܗܹܡܸܙܡܲܢ ܕܐܲܠܵܗܵܐ. ܝܲܢ ܠܟܸܣܠܵܘܟܼܘܿܢ ܐܲܚܟ̰ܝܼ ܡܛܹܐܠܵܗ̇* ܐܸܢ ܚܲܕ݇ ܐ݇ܢܵܫܵܐ ܡܸܢܵܘܟܼܘܿܢ ܚܵܫܸܒܼ ܕܢܒܼܝܼܵܐ ܝ݇ܠܹܗ ܝܲܢ ܪܘܼܚܵܐ ܝ݇ܠܹܗ. ܓܵܪܲܓ ܝܲܕܸܥ ܕܐܲܢܹܐ ܡܸܢܕܝܼܵܢܹ̈ܐ ܕܒܸܟܬܵܒܼܵܐ ܝ݇ܘܸܢ؛ ܦܘܼܩܕܵܢܹ̈ܐ ܕܡܵܪܲܢ ܝܼܢܵܐ* ܐܸܢ ܐܝܼܬ ܐ݇ܢܵܫܵܐ ܕܠܵܐ ܝܲܕܸܥ؛ ܠܵܐ ܚܘܼܫ ܝܲܕܸܥ* ܗܲܕܟܼܵܐ ܐܵܚܘܿܢܘܵܬ̈ܝܼ ܒܲܚܸܠܗ݇ܘܿܢ ܠܢܵܒܘܿܝܸܐ. ܘܠܗܲܡܙܘܼܡܹܐ ܒܠܸܫܵܢܹ̈ܐ ܠܵܐ ܟܵܠܝܼܬܘܿܢ* ܐܝܼܢܵܐ ܟܠ ܡܸܢܕܝܼ ܒܐܸܣܟܹܝܡܵܐ ܘܒܪܹܐܙܵܐ ܗܵܘܹܐ*
♱♱♱♱♱♱♱♱♱
ܚܲܕܼܒܫܲܒܵܐ ܕܐܲܪܒܥܵܐ ܕܲܨܠܝܼܒ̣ܵܐ
ܘܕܫܲܒ̣ܥܵܐ ܗ݇ܘ̣ ܕܐܹܠܝܼܵܐ
ܡܬܝ ܝܚ: 1 ‐ 23
ܐܘܢܓܠܝܘܢ ܩܕܝܫܐ ܕܡܪܢܝܫܘܥ ܡܫܝܚܐ ܟܪܘܙܘܬܼܐ ܕܡܬܝ
♰ ܒܗ̇ܝ ܣܵܥܵܬ ܩܘܼܪܒܸܢܗ݇ܘܿܢ ܬܲܠܡܝܼܕܹ̈ܐ ܠܘܵܬ ܝܑܼܫܘܿܥ ܘܐܵܡܪܝܼ: ܝܵܐ ܪܲܒ ܡܵܢܝܼ ܝܠܹܗ ܪܲܒܵܐ ܒܡܲܠܟܘܼܬܵܐ ܕܫܡܲܝܵܐ؟ ܘܩܪܹܐܠܹܗ ܝܑܼܫܘܿܥ ܚܲܕ݇ ܝܲܠܵܕ݇ܐ ܙܥܘܿܪܵܐ. ܘܡܘܼܟܠܹܐ ܠܹܗ ܒܲܝܢܵܬܲܝܗܝ. ܘܐ݇ܡܸܪܹܗ: ܬܪܘܿܨܵܐ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ: ܕܐܸܢ ܠܵܐ ܕܲܥܪܝܼܬܘܿܢ ܘܗܵܘܹܝܬܘܿܢ ܐܲܝܟܼ ܝܲܠܹ̈ܕ݇ܐ ܙܥܘܿܪܹ̈ܐ. ܠܹܐ ܥܲܒܼܪܝܼܬܘܿܢ ܠܡܲܠܟܘܼܬܵܐ ܕܫܡܲܝܵܐ. ܗܲܕܟܼܵܐ ܡ̇ܢ ܕܡܲܡܟܸܟܼ ܓܵܢܹܗ ܐܲܝܟܼ ܐܵܗܵܐ ܝܲܠܵܕ݇ܐ ܙܥܘܿܪܵܐ، ܗ̇ܘ ܒܸܬ ܗܵܘܹܐ ܪܲܒܵܐ ܒܡܲܠܟܘܼܬܵܐ ܕܫܡܲܝܵܐ. ܘܡ̇ܢ ܕܡܩܵܒܸܠ ܐܲܝܟܼ ܐܵܗܵܐ ܝܲܠܵܕ݇ܐ ܙܥܘܿܪܵܐ ܒܫܸܡܝܼ. ܐܸܠܝܼ ܡܩܵܒܘܼܠܹܐ ܝܠܹܗ. ܘܟܠ ܕܡܲܟܦܸܪ ܠܚܲܕ݇ ܡ̣ܢ ܐܲܢܹܐ ܙܥܘܿܪܹ̈ܐ ܕܡܗܲܝܡܘܼܢܹܐ ܝܢܵܐ ܒܝܼܝܼ. ܒܘܼܫ ܨܦܵܝܝܼ ܗ݇ܘܵܐ ܐܸܠܹܗ ܕܗܵܘܝܵܐ ܬܠܝܼܬܵܐ ܐܲܪܚܹܐ ܕܚܡܵܪܵܐ ܒܩܵܕܵܠܹܗ ܘܡܛܘܼܒܸܥܝܵܐ ܒܥܘܼܡܩܹ̈ܐ ܕܝܵܡܵܐ. ܘܵܝ ܠܥܵܠܡܵܐ ܡ̣ܢ ܟܦܘܼܪ̈ܝܹܐ. ܣܵܒܵܒ ܡ̣ܢ ܐܲܢܵܢܩܹܐ ܒܸܬ ܐܵܬܝܼ ܟܦܘܼܪ̈ܝܹܐ. ܐܝܼܢܵܐ ܘܵܝ ܠܓܲܒܼܪܵܐ ܕܒܐܝܼܕܹܗ ܐܵܬܝܼ ܟܦܘܼܪ̈ܝܹܐ. ܐܝܼܢܵܐ ܐܸܢ ܐܝܼܕܘܼܟܼ ܝܲܢ ܐܲܩܠܘܼܟܼ ܡܲܟܦܸܪܵܐ ܠܘܼܟܼ. ܩܛܝܼܥܠܵܗ̇ ܘܪܲܦܝܼܠܵܗ̇ ܡܸܢܘܼܟܼ. ܣܵܒܵܒ ܒܘܼܫ ܨܦܵܝܝܼ ܝܠܵܗ̇ ܐܸܠܘܼܟܼ ܕܥܲܒܼܪܸܬ ܠܚܲܝܹ̈ܐ ܟܲܕ ܟ̰ܘܼܠܵܓ݂ ܝܲܢ ܣܲܩܲܛ. ܘܠܵܐ ܟܲܕ ܐܝܼܬܠܘܼܟܼ ܬܸܪܬܹܝ ܐܝܼܕܵܬܹ̈ܐ ܝܲܢ ܬܸܪܬܹܝ ܐܲܩܠܵܬܹ̈ܐ ܢܲܦܠܸܬ ܒܢܘܼܪܵܐ ܕܠܥܵܠܲܡ. ܘܐܸܢ ܗܵܘܝܵܐ ܕܥܲܝܢܘܼܟܼ ܡܲܟܦܸܪܵܐ ܠܘܼܟܼ. ܚܪܘܼܛܠܵܗ̇ ܘܪܲܦܝܼܠܵܗ̇ ܡܸܢܘܼܟܼ. ܒܘܼܫ ܨܦܵܝܝܼ ܝܠܵܗ̇ ܐܸܠܘܼܟܼ ܕܒܚܕܵܐ ܥܲܝܢܵܐ ܥܲܒܼܪܸܬ ܠܚܲܝܹ̈ܐ. ܘܠܵܐ ܟܲܕ ܐܝܼܬܠܘܼܟܼ ܬܸܪܬܹܝ ܥܲܝܢܹ̈ܐ ܢܲܦܠܸܬ ܒܓܹܗܲܢܵܐ ܕܢܘܼܪܵܐ. ܚܙܹܝܡܘܿܢ ܠܵܐ ܡܲܤܠܹܝܬܘܿܢ ܠܚܲܕ݇ ܡ̣ܢ ܐܲܢܹܐ ܙܥܘܿܪܹ̈ܐ. ܣܵܒܵܒ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ. ܕܡܲܠܲܐܟܼܲܝ̈ܗܝ ܒܟܠܙܲܒܼܢܵܐ ܟܹܐ ܚܵܙܝܼ ܦܲܪܨܘܿܦܹܗ ܕܒܵܒܝܼ ܕܒܲܫܡܲܝܵܐ. ܣܵܒܵܒ ܐ݇ܬܹܐܠܹܗ ܒܪܘܿܢܹܗ ܕܐ݇ܢܵܫܵܐ ܕܡܲܚܹܐ ܡܸܢܕܝܼ ܕܝܼܗ݇ܘܵܐ ܛܠܝܼܩܵܐ. ܡܘܿܕܝܼ ܒܸܚܫܵܒܼܵܐ ܝܬܘܿܢ، ܐܸܢ ܐ݇ܢܵܫܵܐ ܗܵܘܹܐ ܠܹܗ ܡܵܐܐ ܥܸܪ̈ܒܹܐ. ܘܛܵܠܸܩ ܚܲܕ݇ ܡܸܢܲܝܗܝ. ܠܹܐ ܫܵܒܼܸܩ ܬܸܫܥܝܼ ܘܬܸܫܥܵܐ ܒܛܘܼܪܵܐ. ܘܐܵܙܸܠ ܛܵܥܹܐ ܠܗ̇ܘ ܕܛܠܸܩܠܹܗ؟ ܘܐܸܢ ܡܵܫ݇ܟ̰ܸܚܠܹܗ، ܬܪܘܿܨܵܐ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ ܕܒܸܬ ܚܵܕܹܐ ܒܝܼܹܗ ܒܘܼܫ ܙܵܘܕܵܐ ܡ̣ܢ ܬܸܫܥܝܼ ܘܬܸܫܥܵܐ ܕܠܵܐ ܛܠܸܩܠܗ݇ܘܿܢ. ܗܲܕܟܼܵܐ ܠܲܝܬ ܨܸܒܼܝܵܢܵܐ ܩܵܕ݇ܡ ܒܵܒܵܘܟܼܘܿܢ ܕܒܲܫܡܲܝܵܐ ܕܛܵܠܸܩ ܚܲܕ݇ ܡ̣ܢ ܐܲܢܹܐ ܙܥܘܿܪܹ̈ܐ. ܐܝܼܢܵܐ ܐܸܢ ܥܒܼܸܕܠܹܗ ܓܢܵܗܵܐ ܒܝܼܘܼܟܼ ܐܲܚܘܿܢܘܼܟܼ، ܙܹܠ݇ ܡܲܢܟܼܸܣܠܹܗ ܒܹܝܬ݇ܠܘܼܟܼ ܘܐܸܠܹܗ ܐܲܚܟ̰ܝܼ. ܐܸܢ ܫܵܡܸܥܠܘܼܟܼ، ܩܢܹܐ ܠܘܼܟܼ ܐܲܚܘܿܢܘܼܟܼ. ܘܐܸܢ ܠܵܐ ܫܵܡܸܥܠܘܼܟܼ. ܠܵܒܸܠ ܥܲܡܘܼܟܼ ܚܲܕ݇ ܝܲܢ ܬܪܹܝ. ܕܥܲܠ ܦܘܼܡܵܐ ܕܬܪܹܝ ܝܲܢ ܬܠܵܬܵܐ ܣܵܗܕܹ̈ܐ ܟܹܐ ܟܵܠܝܵܐ ܟܠ ܗܹܡܸܙܡܵܢ. ܐܝܼܢܵܐ ܐܸܢ ܐܘܿܦ ܠܵܐ ܠܐܵܢܝܼ ܫܵܡܸܥ، ܐ݇ܡܘܿܪ ܠܥܹܕܬܵܐ. ܐܝܼܢܵܐ ܐܸܢ ܐܘܿܦ ܠܵܐ ܠܥܹܕܬܵܐ ܫܵܡܸܥ، ܗܵܘܹܐ ܐܸܠܘܼܟܼ ܐܲܝܟܼ ܡܲܟܼܣܵܐ ܘܐܲܝܟܼ ܚܲܢܦܵܐ. ܘܬܪܘܿܨܵܐ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ: ܕܟܠ ܡܸܢܕܝܼ ܕܐܲܣܪܝܼܬܘܼܢ ܒܐܲܪܥܵܐ. ܒܸܬ ܗܵܘܹܐ ܐ݇ܣܝܼܪܵܐ ܒܫܡܲܝܵܐ. ܘܡܸܢܕܝܼ ܕܫܵܪܝܼܬܘܿܢ ܒܐܲܪܥܵܐ ܒܸܬ ܗܵܘܹܐ ܫܸܪܝܵܐ ܒܫܡܲܝܵܐ. ܡܸܢ݇ܕܪܹܫ݇ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ: ܕܐܸܢ ܬܪܹܝ ܡܸܢܵܘܟܼܘܿܢ ܣܲܙܓܸܪܝܼ ܒܐܲܪܥܵܐ ܥܲܠ ܟܠ ܨܒܼܘܼܬܵܐ ܕܛܲܠܒܝܼ، ܒܸܬ ܗܵܘܹܐ ܠܗ݇ܘܿܢ ܡ̣ܢ ܠܘܵܬ ܒܵܒܝܼ ܕܒܲܫܡܲܝܵܐ. ܣܵܒܵܒ ܐܲܝܟܵܐ ܕܬܪܹܝ ܝܲܢ ܬܠܵܬܵܐ ܓ̰ܸܡܥܝܹܐ ܝܢܵܐ ܒܫܸܡܝܼ، ܬܵܡܵܐ ܝܘܸܢ ܒܲܝܢܵܬܲܝܗܝ. ܗܿܝܓܵܗ ܩܘܼܪܒܸܢܹܗ ܠܘܵܬܹܗ ܟܹܐܦܵܐ ܘܐ݇ܡܸܪܹܗ ܐܸܠܹܗ: ܡܵܪܝܼ: ܟܡܵܐ ܓܵܗܹ̈ܐ ܐܸܢ ܥܵܒܼܸܕ ܓܢܵܗܵܐ ܒܝܼܝܼ ܐܲܚܘܿܢܝܼ ܫܲܒܼܩܸܢܹܗ، ܗܲܠ ܠܫܲܒܼܥܵܐ ܓܵܗܹ̈ܐ؟ ܐܵܡܸܪ ܐܸܠܹܗ ܝܑܼܫܘܿܥ: ܠܹܐ ܝܘܸܢ ܒܹܐܡܵܪܵܐ ܐܸܠܘܼܟܼ ܗܲܠ ܠܫܲܒܼܥܵܐ. ܐܸܠܵܐ ܗܲܠ ܠܫܲܒܼܥܝܼ ܓܵܗܹ̈ܐ ܫܲܒܼܥܵܐ ܫܲܒܼܥܵܐ.
♱♱♱♱♱♱♱♱♱