ܚܲܕܼܒܫܲܒܵܐ ܕܫܲܒ̣ܥܵܐ ܕܲܫܠܝܼܚܹ̈ܐ

ܬܸܢܝܵܢ ܢܵܡܘܿܣܵܐ ܕ؛ 10‐25

ܬܸܒ̣ܘ ܘܲܫܠܵܘ ܬܸܢܝܵܢ ܢܵܡܘܿܣܵܐ ܣܸܦܪܵܐ ܕܚܲܡܫܵܐ ܕܐܘܿܪܵܝܬܵܐ؛

ܐܲܚܲܝ̈ ܒܲܪܸܟ̣ܡܵܪܝ܀

ܘܐ݇ܡܸܪܹܗ ܡܵܪܝܵܐ ܠܡܘܼܫܹܐ؛ ܓ̰ܲܡܸܥ ܩܵܕ݇ܡܝܼ ܠܛܵܝܸܦܵܐ ܘܡܲܫܡܸܥܢܗ݇ܘܿܢ ܚܲܒܪ̈ܝܼ؛ ܘܒܸܬ ܝܵܠܦܝܼ ܠܸܙܕܲܥܝܵܐ ܩܵܕ݇ܡܝܼ ܟܠܲܝܗ‌ܝ ܝܵܘܡܵܢܹ̈ܐ ܕܚܲܝܲܝܗ‌ܝ ܒܐܲܪܥܵܐ؛ ܘܡܲܠܦܝܼ ܩܵܐ ܒܢܘܿܢܲܝ̈ܗ‌ܝ܀ ܘܩܘܼܪܒܸܢܵܘܟ̣ܘܿܢ ܘܟܠܹܐܠܵܘܟ̣ܘܿܢ ܒܫܸܦܘܼܠܵܠܹ̈ܐ ܕܛܘܼܪܵܐ؛ ܘܛܘܼܪܵܐ ܒܲܠܗܵܝܵܐ ܗ݇ܘܵܐ ܒܢܘܼܪܵܐ ܗܲܠ ܠܸܒܵܐ ܕܫܡܲܝܵܐ؛ ܘܚܸܫܟܵܐ ܘܥܢܵܢܵܐ ܘܥܲܪܦܸܠܵܐ [ܘܡܸܫ]܀ ܘܗܘܼܡܙܸܡܠܹܗ ܡܵܪܝܵܐ ܥܲܡܵܘܟ̣ܘܿܢ ܒܛܘܼܪܵܐ ܡ̣ܢ ܓܵܘ ܢܘܼܪܵܐ܀ ܩܵܠܵܐ ܕܗܲܡܙܲܡܬܵܐ ܒܸܫܡܲܥܝܵܐ ܝ݇ܬܘܿܢ ܗ݇ܘܵܘ ܘܕܡܘܼܬܵܐ ܠܵܐ ܚܙܹܐܠܵܘܟ̣ܘܿܢ؛ ܐܸܠܵܐ ܐܸܢ ܩܵܠܵܐ ܐܲܚܟ̰ܝܼ؛ ܘܩܲܡ ܡܲܚܙܹܐܠܵܘܟ̣ܘܿܢ ܩܵܘܠܹܗ ܘܦܵܩܸܕܠܵܘܟ̣ܘܿܢ ܕܥܵܒ̣ܕܝܼܬܘܿܢ ܥܸܣܪܵܐ ܦܘܼܩܕܵܢܹ̈ܐ؛ ܘܟܬܝܼܒ̣ܲܝܗ‌ܝ ܠܹܗ ܥܲܠ ܬܪܹܝ ܠܘܼܚܹ̈ܐ ܕܟܹܐܦܵܐ܀ ܘܩܵܐ ܕܝܼܝܼ ܦܩܸܕܠܹܗ ܡܵܪܝܵܐ ܒܗ̇ܘ ܙܲܒ̣ܢܵܐ؛ ܕܡܲܠܦܸܢܵܘܟ̣ܘܿܢ ܢܵܡܘܿܣܹ̈ܐ ܘܕܝܼܘܵܢܹ̈ܐ؛ ܕܥܵܒ̣ܕܝܼܬܘܿܢ ܠܗ݇ܘܿܢ ܒܐܲܪܥܵܐ ܕܥܵܒ̣ܪܝܼܬܘܿܢ ܬܵܡܵܐ ܠܸܪܝܵܬܵܗ̇܀ ܗܘܹܐܡܘܿܢ ܗܸܫܝܲܪ ܪܵܒܵܐ ܒܓܵܢܵܘܟ̣ܘܿܢ؛ ܣܵܒܵܒ ܕܠܵܐ ܚܙܹܐܠܵܘܟ̣ܘܿܢ ܕܡܘܼܬܵܐ؛ ܒܝܵܘܡܵܐ ܕܗܘܼܡܙܸܡܠܹܗ ܡܵܪܝܵܐ ܥܲܡܵܘܟ̣ܘܿܢ ܒܚܘܿܪܝܼܒ̣ ܡ̣ܢ ܓܵܘ ܢܘܼܪܵܐ܀ ܕܠܵܐ ܡܲܚܪܸܒ̣ܝܼܬܘܿܢ ܘܥܵܒ̣ܕܝܼܬܘܿܢ ܠܵܘܟ̣ܘܿܢ ܨܲܠܡܹ̈ܐ ܘܕܵܡܵܝܵܬܹ̈ܐ ܕܟܠ ܓܸܢܣܵܐ؛ ܕܡܘܼܬܵܐ ܕܐܘܼܪܙܵܐ ܝܲܢ ܕܢܸܩܒ̣ܵܐ܀ ܕܡܘܼܬܵܐ ܕܟܠ ܗܲܝܘܵܢ ܕܐܝܼܬ ܒܐܲܪܥܵܐ؛ ܕܡܘܼܬܵܐ ܕܟܠ ܦܵܪܲܚܬܵܐ ܡܵܪܹܐ ܓܘܼܠܦܵܐ ܕܦܵܪܚܵܐ ܓܵܘ ܫܡܲܝܵܐ܀ ܕܡܘܼܬܵܐ ܕܟܠ ܪܸܓ̰ܒܵܐ ܕܐܲܪܥܵܐ؛ ܕܡܘܼܬܵܐ ܕܟܠ ܢܘܼܢܹ̈ܐ ܕܓܵܘ ܝܵܡܵܐ ܕܐܸܠܬܸܚܬ̇ ܡ̣ܢ ܐܲܪܥܵܐ܀ ܘܕܠܵܐ ܡܲܪܡܝܼܬܘܿܢ ܥܲܝܢܵܘ̈ܟ̣ܘܿܢ ܠܫܡܲܝܵܐ؛ ܘܚܵܙܝܼܬܘܿܢ ܫܸܡܫܵܐ ܘܣܲܗܪܵܐ ܘܟܵܘܟ̣ܒ̣ܹ̈ܐ؛ ܘܟܠܲܝܗ‌ܝ ܚܲܝܠܵܘܵܬܹ̈ܐ ܕܫܡܲܝܵܐ؛ ܘܚܵܠܛܝܼܬܘܿܢ ܘܣܵܓ̣ܕܝܼܬܘܿܢ ܐܸܠܲܝܗ‌ܝ ܘܦܵܠܚܝܼܬܘܿܢ ܠܗ݇ܘܿܢ؛ ܕܦܘܼܠܓ̣݇ܝܼܲܝܗ‌ܝ ܝ݇ܠܹܗ ܡܵܪܝܵܐ ܠܟܠܲܝܗ‌ܝ ܛܵܝܸܦܹ̈ܐ ܕܬܚܘܿܬ ܫܡܲܝܵܐ܀ ܘܐܸܠܵܘܟ̣ܘܿܢ ܡܘܼܩܪܸܒ̣ܠܹܗ ܡܵܪܝܵܐ؛ ܘܩܲܡ ܦܵܠܸܛܠܵܘܟ̣ܘܿܢ ܡ̣ܢ ܟܘܼܪܵܐ ܕܦܲܪܙܠܵܐ ܡ̣ܢ ܡܸܨܪܹܝܢ؛ ܘܗܵܘܝܼܬܘܿܢ ܐܸܠܹܗ ܛܵܝܸܦܵܐ ܘܝܵܪܬܘܼܬܵܐ ܐܲܝܟܼ ܕܐܸܕܝܘܿܡ݇ ܝܵܘܡܵܐ܀ ܘܟܪܸܒܠܹܗ ܥܲܠܝܼ ܡܵܪܝܵܐ ܒܣܵܒܵܒ ܕܓ̰ܘܼܘܵܒܵܘܟ̣ܘܿܢ؛ ܘܝ݇ܡܹܐܠܹܗ ܕܠܵܐ ܥܵܒ̣ܪܸܢ ܐܵܗܵܐ ܝܘܿܪܕܢܵܢ؛ ܘܠܵܐ ܥܵܒ̣ܪܸܢ ܠܐܲܪܥܵܐ ܛܵܒ̣ܬܵܐ ܕܝܵܗ݇ܒ̣ܸܠܵܘܟ̣ܘܿܢ ܡܵܪܝܵܐ ܐܲܠܵܗܵܘܟ̣ܘܿܢ ܝܵܪܬܘܼܬܵܐ܀ ܣܵܒܵܒ ܐܵܢܵܐ ܒܸܬ ܡܵܝܬܸܢ ܒܐܲܗܵܐ ܐܲܪܥܵܐ. ܘܠܹܐ ܥܵܒ̣ܪܸܢ ܠܐܵܗܵܐ ܝܘܿܪܕܢܵܢ؛ ܐܝܼܢܵܐ ܐܲܚܬܘܿܢ؛ ܒܸܬ ܥܵܒ̣ܪܝܼܬܘܿܢ ܘܝܵܪܬܝܼܬܘܿܢ ܐܵܗܵܐ ܐܲܪܥܵܐ ܛܵܒ̣ܬܵܐ ܕܒܝܼܵܗ݇ܒ̣ܵܐ ܝ݇ܠܹܗ ܐܸܠܵܘܟ̣ܘܿܢ ܡܵܪܝܵܐ ܐܲܠܵܗܵܘܟ̣ܘܿܢ܀ ܗ݇ܘܹܐܡܘܿܢ ܗܸܫܝܲܪ ܕܠܵܐ ܡܲܢܫܝܼܬܘܿܢ ܩܵܘܠܹܗ ܕܡܵܪܝܵܐ ܐܲܠܵܗܵܘܟ̣ܘܿܢ܀ ܕܡܘܼܩܸܡܠܹܗ ܥܲܡܵܘܟ̣ܘܿܢ؛ ܘܡܲܚܪܸܒ̣ܝܼܬܘܿܢ ܘܥܵܒ̣ܕܝܼܬܘܿܢ ܠܵܘܟ̣ܘܿܢ ܨܲܠܡܹ̈ܐ ܘܕܵܡܵܝܵܬܹ̈ܐ؛ ܕܟܠܡܸܢܕܝܼ ܕܩܲܡ ܦܵܩܸܕܠܵܘܟ̣ܘܿܢ ܡܵܪܝܵܐ ܐܲܠܵܗܵܘܟ̣ܘܿܢ܀ ܣܵܒܵܒ ܕܡܵܪܝܵܐ ܐܲܠܵܗܵܘܟ̣ܘܿܢ ܢܘܼܪܵܐ ܝ݇ܠܹܗ ܐܵܟ̣ܠܵܢܬܵܐ؛ ܘܐܲܠܵܗܵܐ ܝ݇ܠܹܗ ܛܲܢܵܢܵܐ܀

ܚܲܒ̣ܪܹܗ

ܐܹܫܲܥܝܵܐ؛ ܗ؛ 8‐26

ܫܠܵܘ ܢܒ̣ܝܼܘܼܬܹܗ ܕܐܹܫܲܥܝܵܐ؛ ܐܲܚܲܝ̈ ܒܲܪܸܟ̣ܡܵܪܝ܀

ܘܵܝ ܠܐܵܢܝܼ ܕܡܲܩܪܸܒ̣ܝܼ ܒܲܝܬܵܐ ܠܒܲܝܬܵܐ؛ ܘܚܲܩܠܵܐ ܒܚܲܩܠܵܐ ܚܵܒ̣ܛܝܼ. ܕܕܵܒ̣ܩܝܼܬܘܿܢ ܕܘܼܟܬܵܐ؛ ܘܝܵܬܒ̣ܝܼܬܘܿܢ ܒܢܲܦ̮ܫܵܘܟ̣ܘܿܢ ܒܓܵܘܵܗ̇ ܕܐܲܪܥܵܐ܀ ܒܢܵܬܝܵܬܹ̈ܐ ܕܡܵܪܝܵܐ ܚܲܝܠܬܵܢܵܐ ܦܝܼܫܠܵܗ̇ ܫܡܝܼܥܬܵܐ؛ ܒܵܬܘܵܬܹ̈ܐ ܪܵܒܵܐ ܠܚܪܵܒ̣ܵܐ ܒܸܬ ܗܵܘܝܼ ܡ̣ܢ ܕܠܲܝܬ̇ ܝܵܬܒ̣ܵܢܵܐ܀ ܣܵܒܵܒ ܥܸܣܪܵܐ ܐܸܫܟܵܪܹ̈ܐܐ [ܗ̄؛ܕ̄؛ ܣܵܡܵܐ ܙܥܘܿܪܵܐ ܡ̣ܢ ܟܲܪܡܵܐ] ܒܸܬ ܥܵܒ̣ܕܝܼ ܚܕܵܐ ܠܝܼܢܬܵܐ ܕܚܲܡܪܵܐ؛ ܘܒܲܪܙܲܪܥܵܐ ܕܚܲܕ݇ ܟܘܵܪܵܐ [ܗ̄؛ܕ؛ ܚܲܕ݇ ܘܵܙܢܵܐ ܡ̣ܢ ܚܸܛܹ̈ܐ] ܒܸܬ ܥܵܒ̣ܸܕ ܚܕܵܐ ܫܸܚܲܪܬܵܐ [ܣܲܠܬܵܐ]܀ ܘܵܝ ܠܐܵܢܝܼ ܕܡܩܲܕܡܝܼ ܒܩܵܝܕܲܡܬܵܐ ܘܪܵܚܛܝܼ ܠܫܲܟ̣ܪܵܐ [ܗ̄؛ܕ̄؛ ܠܫܬܵܝܬܵܐ ܡܲܪܘܝܼܵܢܬܵܐ]. ܘܥܲܪܩܸܠܝܼ ܒܪܲܡܫܵܐ؛ ܘܚܲܡܪܵܐ ܡܵܩܸܕܠܗ݇ܘܿܢ؛ ܒܟܸܢܵܪܹ̈ܐ ܘܒܩܝܼܬܵܪܹ̈ܐ؛ ܘܕܵܘܘܿܠܵܐ ܘܫܲܒܝܼܒܵܐ ܚܲܡܪܵܐ ܫܵܬܝܼ؛ ܘܒܦܘܼܠܚܵܢܹ̈ܐ ܕܐܲܠܵܗܵܐ ܠܹܐ ܬܲܚܡܸܢܝܼ؛ ܘܒܦܘܼܠܚܵܢܵܐ ܕܐܝܼܕ̈ܘܼܗ‌ܝ ܠܹܐ ܚܵܝܪܝܼ܀ ܒܘܼܬ ܕܐܵܗܵܐ ܦܸܫܠܹܗ ܠܘܼܒܠܵܐ ܛܵܝܸܦܝܼ ܒܓܵܠܘܼܬܵܐ ܡ̣ܢ ܕܠܵܐ ܝ݇ܕܥܵܝܬܵܐ؛ ܘܙܝܼܕܠܗ݇ܘܿܢ ܡܝܼܬܲܝܗ̈‌ܝ ܡ̣ܢ ܟܸܦܢܵܐ؛ ܘܙܘܼܪܒܸܢܗ݇ܘܿܢ ܡ̣ܢ ܨܲܗܘܵܐ܀ ܩܵܐ ܕܐܵܗܵܐ ܣܵܒܵܒ ܫܝܘܿܠ ܡܘܼܦܬܹܐܠܵܗ̇ ܓܵܢܵܗ̇ ܘܦܬܸܚܠܵܗ̇ ܦܘܼܡܵܗ̇ ܕܠܵܐ ܩܝܼܵܣ؛ ܘܒܸܬ ܨܵܠܝܼ ܓܵܘܵܗ̇ ܟܠܲܝܗ‌ܝ ܚܩܝܼܪܹ̈ܐ ܘܡܝܲܩܪܹ̈ܐ ܘܚܲܝܠܵܢܹ̈ܐ܀ ܘܒܸܬ ܦܵܐܹܫ ܡܘܼܡܟܸܟ̣ܵܐ ܐ݇ܢܵܫܵܐ ܘܦܵܐܹܫ ܡܘܼܫܦܸܠܵܐ ܓܲܒ̣ܪܵܐ؛ ܘܥܲܝܢܹ̈ܐ ܪ̈ܵܡܹܐ ܦܵܝܫܝܼ ܡܘܼܟܸܦܹܐ܀ ܘܒܸܬ ܝܵܪܸܡ ܡܵܪܝܵܐ ܚܲܝܠܬܵܢܵܐ ܒܕܝܼܘܵܢ؛ ܘܐܲܠܵܗܵܐ ܩܲܕܝܼܫܵܐ ܦܵܐܹܫ ܩܘܼܕܫܵܐ ܒܙܲܕܝܼܩܘܼܬܵܐ܀ ܘܒܸܬ ܪܵܥܝܝܼ ܦܵܐܪܹ̈ܐ ܐܲܝܟܼ ܥܵܕܲܬܵܝܗ‌ܝ؛ ܘܚܵܪ̈ܵܒܝܼܹܐ ܕܦܸܫܠܗ݇ܘܿܢ ܒܸܢܝܹܐ؛ ܥܵܡܪ̈ܵܢܹܐ ܒܸܬ ܐܵܟ̣ܠܝܼ ܠܗ݇ܘܿܢ܀ ܘܵܝ ܠܐܵܢܝܼ ܕܡܲܪܝܸܟ̣ܝܼ ܚܛܝܼܵܬܲܝ̈ܗ‌ܝ ܐܲܝܟܼ ܚܲܒ̣ܠܵܐ ܝܲܪܝܼܟ̣ܵܐ؛ ܘܐܲܝܟܼ ܬܲܣܡܵܐ ܕܐܲܪܵܒܵܢܵܐ ܚܛܝܼܵܬܲܝ̈ܗ‌ܝ܀ ܘܐܵܡܪܝܼ ܓ̰ܲܠܕܹܐ ܚܘܼܫ ܡܲܠܝܸܙ ܡܵܪܝܵܐ ܦܘܼܠܚܵܢܘܼܗ‌ܝ ܕܚܵܙܲܚܠܗ݇ܘܿܢ؛ ܘܩܲܪܒܸܢܵܐ ܘܐܵܬܝܵܐ ܚܝܼܵܠ ܕܩܲܕܝܼܫܵܐ ܕܝܼܣܪܵܝܹܠ ܘܝܵܕܥܲܚ ܠܵܗ̇܀ ܘܵܝ ܠܐܵܢܝܼ ܕܩܵܪܝܼ ܠܒܝܼܫܵܐ ܛܵܒ̣ܵܐ؛ ܘܠܛܵܒ̣ܵܐ ܒܝܼܫܵܐ؛ ܘܡܲܬܒ̣ܝܼ ܒܲܗܪܵܐ ܠܚܸܫܟܵܐ؛ ܘܚܸܫܟܵܐ ܠܒܲܗܪܵܐ؛ ܘܩܵܪܝܼ ܠܡܲܪܝܼܪܵܐ ܚܸܠܝܵܐ؛ ܘܚܸܠܝܵܐ ܡܲܪܝܼܪܵܐ܀ ܘܵܝ ܠܐܵܢܝܼ ܕܝܼܢܵܐ ܗܵܘܢܵܢܹ̈ܐ ܒܥܲܝܢܹ̈ܐ ܕܓܵܢܲܝܗ‌ܝ؛ ܘܒܲܪܩܘܼܒ̣ܠ ܦܵܬܲܝܗ‌ܝ ܦܲܪ̈ܡܝܼܵܢܹܐ. ܘܵܝ ܠܐܵܢܝܼ ܕܓܲܢ݇ܒܵܪܹ̈ܐ ܝ݇ܢܵܐ ܩܵܐ ܫܬܵܝܬܵܐ ܕܚܲܡܪܵܐ ܘܠܐ݇ܢܵܫܹ̈ܐ ܚܲܝܠܵܢܹ̈ܐ ܕܡܲܙܓ̣ܝܼ ܥܵܪܲܩ؛ ܘܥܵܒ̣ܕܝܼ ܚܵܠܝܼܨ ܠܓܘܼܢܵܗܟܵܪ ܒܘܼܬ ܪܸܫܘܲܬܹܗ؛ ܘܚܵܠܹܨܘܼܬܹܗ ܕܚܵܠܝܼܨ ܡܲܥܒ̣ܸܪܝܼ ܡܸܢܲܝܗ‌ܝ܀ ܒܘܼܬ ܕܐܵܗܵܐ؛ ܒܦܵܝܫܵܐ ܐ݇ܟ̣ܝܼܠܬܵܐ ܒܠܹܫܵܢܵܐ ܕܢܘܼܪܵܐ ܠܵܗܝܵܢܬܵܐ؛ ܡ̣ܢ ܠܵܗܵܐ ܕܦܵܝܫܵܐ ܫܒ̣ܝܼܩܬܵܐ ܒܸܬ ܦܵܝܫܝܼ ܐ݇ܟ̣ܝܼܠܹܐ؛ ܘܥܸܩܪܲܝܗ‌ܝ ܐܲܝܟܼ ܣܸܦܣܵܐ ܒܸܬ ܗܵܘܹܐ ܘܦܸܩܚܲܝܗ‌ܝ ܐܲܝܟܼ ܬܘܿܙ ܒܸܬ ܐܵܣܸܩ. ܣܵܒܵܒ ܕܡܘܼܣܠܹܐ ܠܗ݇ܘܿܢ ܢܵܡܘܿܣܹܗ ܕܡܵܪܝܵܐ ܚܲܝܠܬܵܢܵܐ؛ ܘܠܚܲܒܪܹܗ ܕܩܲܕܝܼܫܵܐ ܕܝܼܣܪܵܝܹܠ ܡܘܼܟܪܸܒܠܗ݇ܘܿܢ܀ ܒܘܼܬ ܕܐܵܗܵܐ؛ ܚܸܡܠܵܗ̇ ܟܲܪܒܹܗ ܕܡܵܪܝܵܐ ܥܲܠ ܛܵܝܸܦܹܗ ܘܡܘܼܪܸܡܠܹܗ ܐܝܼܕܹܗ ܥܲܠܲܝܗ‌ܝ؛ ܘܡܸܚܝܲܝܗ‌ܝ ܠܹܗ؛ ܘܪܓܸܕܠܗ݇ܘܿܢ ܛܘܼܪ̈ܵܢܹܐ؛ ܘܗܘܹܐܠܗ݇ܘܿܢ ܫܠܲܕܲܝ̈ܗ‌ܝ ܐܲܝܟܼ ܛܝܼܢܵܐ ܓܵܘ ܥܵܠܘܿܠܵܢܹ̈ܐ؛ ܘܒܐܲܢܹܐ ܟܠܲܝܗ‌ܝ ܠܵܐ ܕܐܸܪܹܗ ܟܲܪܒܹܗ؛ ܘܡܸܕܪܹܐ ܐܝܼܕܹܗ ܪܵܡܬܵܐ܀

♱♱♱♱♱♱♱♱♱

ܚܕܒܫܒܐ ܙ ܕܫܠܝܚ̈ܐ

ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ

ܕܲܠܘܵܬܼ ܩܘܼܪ̈ܲܢܬܵܝܹܐ ܐܲܚܲܝ̈ ܒܲܪܸܟܼܡܵܪܝ.

ܡܐܵܕܝܼܵܐ ܐܵܚܘܿܢܘܵܬ̈ܝܼ ܘܡܘܼܚܸܒ̈ܝܼ. ܗܘܹܐܡܘܿܢ ܡܘܼܩܘܝܼܹܐ ܘܠܵܐ ܙܵܕܘܿܥܘܹ̈ܐ؛ ܐܸܠܵܐ ܗܵܘܝܼܬܘܿܢ ܒܸܙܝܵܕܵܐ ܒܟܠ ܙܲܒܼܢܵܐ ܒܦܘܼܠܚܵܢܹܗ ܕܡܵܪܝܵܐ ܟܲܕ ܒܝܼܕܲܥܝܵܐ ܝ݇ܬܘܿܢ ܕܓ̰ܵܥܦܵܘܟܼܘܿܢ ܠܹܐ ܝ݇ܠܹܗ ܒܲܛܝܼܠܵܐ ܒܡܵܪܝܵܐ܋ ܒܘܼܬ ܟܠܡܸܢܕܝܼ ܕܦܝܵܫܵܐ ܝ݇ܠܹܗ ܓ̰ܘܼܡܸܥܝܵܐ ܩܵܐ ܩܲܕܝܼܫܹ̈ܐ ܐܲܝܟܼ ܕܦܘܼܩܸܕܠܝܼ ܠܥܹܕܵܬܹ̈ܐ ܕܓܵܠܵܛܵܝܹ̈ܐ؛ ܗܲܕܟܼܵܐ ܐܘܼܦ ܐܲܚܬܘܿܢ ܥܒܼܘܿܕܘܿܢ܋ ܒܟܠ ܚܲܕ݇ܒܼܫܹܒܵܐ ܟܠ ܐ݇ܢܵܫܵܐ ܡܸܢܵܘܟܼܘܿܢ ܓܵܘ ܒܲܝܬܹܗ ܗܵܘܹܐ ܡܲܬܘܼܒܼܹܐ ܘܚܵܡܘܿܝܹܐ ܠܗ̇ܘ ܡܸܢܕܝܼ ܕܡܵܛܝܵܐ ܒܐܝܼܕܹܗ؛ ܕܠܵܐ ܐܝܼܡܲܢ ܕܐܵܬܸܢ ܗܵܝܓܵܗ ܗܵܘܝܼ ܓ̰ܲܡܥܵܝܵܬܹ̈ܐ܋ ܘܐܝܼܡܲܢ ܕܐܵܬܸܢ ܠܐܵܢܝܼ ܕܓ̰ܵܡܥܝܼܬܘܿܢ ܐܲܚܬܘܿܢ ܒܸܬ ܫܵܕܪܸܢ ܒܐܸܓܲܪܬܵܐ ܕܠܵܒܠܝܼ ܫܵܦܵܩܲܬܵܘܟܼܘܿܢ ܠܐܘܿܪܸܫܠܸܡ܋ ܘܐܸܢ ܚܫܝܼܚܵܐ ܝ݇ܠܹܗ ܦܘܼܠܚܵܢܵܐ ܕܐܘܼܦ ܐܵܢܵܐ ܐܵܙܸܠ݇ܢ؛ ܒܸܬ ܐܵܙܠ݇ܝܼ ܥܲܡܝܼ܋ ܒܹܐܬܵܝܵܐ ܝ݇ܘܸܢ ܠܟܸܣܠܵܘܟܼܘܿܢ ܐܝܼܡܲܢ ܕܥܵܒܼܪܸܢ ܡܼܢ ܡܵܩܹܕܘܿܢܝܼܵܐ. ܣܵܒܵܒ ܒܹܐܙܵܠܵܐ ܝ݇ܘܸܢ ܠܡܵܩܹܕܘܿܢܝܼܵܐ܋ ܘܒܲܠܟܵܐ ܐܘܼܦ ܠܟܸܣܠܵܘܟܼܘܿܢ ܥܲܪܩܸܠܸܢ ܝܲܢ ܦܵܝܫܸܢ ܒܣܸܬܘܵܐ ܕܐܲܚܬܘܿܢ ܡܲܦܫܸܛܝܼܬܘܿܢ ܠܝܼ ܠܗ̇ܝ ܕܘܼܟܬܵܐ ܕܐܵܙܸܠ݇ܢ܋ ܣܵܒܵܒ ܠܹܐ ܒܵܥܝܸܢ ܕܐܵܕܝܼܵܐ ܚܵܙܸܢܵܘܟܼܘܿܢ ܐܲܝܟܼ ܥܵܒܼܪܵܢܵܐ ܕܐܘܼܪܚܵܐ ܐܝܼܢܵܐ ܐܝܼܬܠܝܼ ܗܹܒܼܝܼ ܕܒܸܬ ܥܲܪܩܸܠܸܢ ܠܟܸܣܠܵܘܟܼܘܿܢ ܚܲܕ݇ ܙܲܒܼܢܵܐ ܐܸܢ ܡܵܪܝܼ ܝܵܗܒܼܸܠ ܕܲܣܬܘܼܪ* ܒܸܬ ܥܲܪܩܸܠܸܢ ܓܵܘ ܐܵܦܸܣܘܿܣ ܗܲܠ ܦܲܢܛܹܩܘܿܣܛܹ̈ܐ* ܣܵܒܵܒ ܬܲܪܥܵܐ ܓܘܼܪܵܐ ܦܸܫܠܹܗ ܦܬܝܼܚܵܐ ܩܵܬܝܼ ܘܡܸܠܝܵܐ ܦܘܼܠܚܵܢܹ̈ܐ؛ ܘܟܵܠܝܵܢܹ̈ܐ ܕܲܪܩܘܼܒܼܠ ܪܵܒܵܐ ܝ݇ܢܵܐ* ܐܝܼܢܵܐ ܐܸܢ ܐܵܬܹܐ ܠܟܸܣܠܵܘܟܼܘܿܢ ܛܝܼܡܵܬܹܐܘܿܣ ܚܙܹܐܡܘܿܢ ܕܠܵܐ ܙܕܘܼܥܬܵܐ ܗܵܘܹܐ ܥܲܡܵܘܟܼܘܿܢ؛ ܣܵܒܵܒ ܦܘܼܠܚܵܢܵܐ ܕܡܵܪܝܵܐ ܒܸܦܠܵܚܵܐ ܝ݇ܠܹܗ ܐܲܝܟܼ ܕܝܼܝܼ* ܒܲܣ ܠܵܐ ܗܵܘܝܵܐ ܕܚܲܕ݇ ܐ݇ܢܵܫܵܐ ܡܲܣܠܹܐ ܠܹܗ ܐܸܠܵܐ ܡܲܦܫܸܛܘܿܢ ܠܹܗ ܒܫܠܵܡܵܐ ܕܐܵܬܹܐ ܠܘܵܬܝܼ. ܣܵܒܵܒ ܒܸܣܦܵܪܵܐ ܝ݇ܘܸܢ ܐܸܠܹܗ ܥܲܡ ܐܵܚܘܿܢܘܵܬܹ̈ܐ* ܐܝܼܢܵܐ ܡ̣ܢ ܐܵܦܲܠܘܿ ܪܵܒܵܐ ܛܠܸܒܠܝܼ ܕܐܵܬܹܐ ܠܘܵܬܼܵܘܟܼܘܿܢ ܥܲܡ ܐܵܚܘܿܢܘܵܬܹ̈ܐ ܐܝܼܢܵܐ ܠܵܐ ܗܘܹܐܠܹܗ ܪܵܐܙܝܼ ܕܐܵܬܹܐ. ܘܐܝܼܡܲܢ ܕܗܵܘܹܐ ܠܹܗ ܦܸܪܣܲܬ ܒܸܬ ܐܵܬܹܐ* ܪܥܘܿܫܘܿܢ ܘܟܠܹܐܡܘܿܢ ܒܗܲܝܡܵܢܘܼܬܵܐ؛ ܗܘܹܐܡܘܿܢ ܓܲܢ݇ܒܵܪܹ̈ܐ ܘܚܲܝܠܵܢܹ̈ܐ* ܘܟܠܲܝܗܝ ܫܘܼܠܵܢܵܘ̈ܟܼܘܿܢ ܒܚܘܼܒܵܐ ܗܵܘܝܼ* ܒܸܛܠܵܒܵܐ ܝ݇ܘܸܢ ܡܸܢܵܘܟܼܘܿܢ ܐܵܚܘܿܢܘܵܬ̈ܝܼ ܒܘܼܬ ܒܲܝܬܹܗ ܕܐܸܣܛܲܦܵܢܵܐ. ܣܵܒܵܒ ܝܵܕܥܝܼܬܘܿܢ ܐܵܢܝܼ ܝ݇ܢܵܐ ܪܹܫܝܼܬܵܐ ܕܐܲܟܼܵܐܝܼܵܐ؛ ܘܡܘܼܬܸܒܼܠܗ݇ܘܿܢ ܓܵܢܲܝܗܝ ܩܵܐ ܚܸܠܡܲܬ ܕܩܲܕܝܼܫܹ̈ܐ* ܕܐܘܼܦ ܐܲܚܬܘܿܢ ܗܵܘܝܼܬܘܿܢ ܡܲܨܝܘܼܬܹܐ ܠܐܵܢܝܼ ܕܗܲܕܟܼܵܐ ܝ݇ܢܵܐ؛ ܘܠܟܠ ܐ݇ܢܵܫܵܐ ܕܓ̰ܲܗܝܸܐ ܘܗܲܝܸܪ ܥܲܡܲܢ* ܐܝܼܢܵܐ ܒܸܚܕܵܝܵܐ ܝ݇ܘܸܢ ܒܐ݇ܬܵܝܬܹܗ ܕܐܸܣܛܲܦܵܢܵܐ ܘܕܦܲܪܛܘܼܢܵܛܘܿܣ ܘܕܐܵܟܼܵܐܝܼܩܘܿܣ ܕܡܸܢܕܝܼ ܕܡܘܼܒܨܸܪܵܘܟܼܘܿܢ. ܐܵܢܝܼ ܬܘܼܡܸܡܠܗ݇ܘܿܢ* ܣܵܒܵܒ ܡܘܼܢܝܸܚܠܗ݇ܘܿܢ ܪܘܼܚܵܐ ܕܝܼܝܼ ܘܕܝܼܵܘܟܼܘܿܢ. ܒܲܣ ܗܵܘܝܼܬܘܿܢ ܒܝܼܕܲܥܝܵܐ ܠܐܵܢܝܼ ܕܗܲܕܟܼܵܐ ܝ݇ܢܵܐ* ܒܵܩܘܿܪܹܐ ܝ݇ܢܵܐ ܒܫܠܵܡܵܘܟܼܘܿܢ ܟܠܲܝܗܝ ܥܹܕܵܬܹ̈ܐ ܕܓܵܘ ܐܵܣܝܼܵܐ. ܒܵܩܘܿܪܹܐ ܝ݇ܢܵܐ ܒܫܠܵܡܵܘܟܼܘܿܢ ܪܵܒܵܐ ܒܡܵܪܲܢ ܐܵܩܸܠܘܿܣ ܘܦܪܝܼܣܩܸܠܵܐ ܥܲܡ ܥܹܕܬܵܐ ܕܓܵܘ ܒܲܝܬܵܝܗܝ* ܒܵܩܘܿܪܹܐ ܝ݇ܢܵܐ ܒܫܠܵܡܵܘܟܼܘܿܢ ܟܠܲܝܗܝ ܐܵܚܘܿܢܘܵܬܹ̈ܐ* ܒܵܩܪܘܿܢ ܒܫܠܵܡܵܐ ܚܲܕ݇ ܕܗ̇ܘ ܐ݇ܚܹܪ݇ܢܵܐ ܒܢܫܵܩܬܵܐ ܩܲܕܝܼܫܬܵܐ* ܫܠܵܡܵܐ ܒܟܬܵܒܼܬܵܐ ܕܐܝܼܕܵܐ ܕܝܼܝܼ ܦܵܘܠܘܿܣ* ܡ̇ܢ ܕܠܵܐ ܡܲܚܹܒ ܠܡܵܪܲܢ ܝܼܫܘܿܥ ܡܫܝܼܚܵܐ ܗܵܘܹܐ ܡܘܼܚܪܸܡܵܐ. ܡܵܪܲܢ ܐܸܬܵܐ* ܫܵܦܵܩܵܬ ܕܡܵܪܲܢ ܝܼܫܘܿܥ ܡܫܝܼܚܵܐ ܥܲܡܵܘܟܼܘܿܢ* ܘܚܘܼܒܝܼ ܥܲܡ ܟܠܵܘܟܼܘܿܢ ܒܡܫܝܼܚܵܐ ܝܼܫܘܿܥ ܐܵܡܹܝܢ*

♱♱♱♱♱♱♱♱♱

ܚܕܒܫܒܐ ܕܫܒܼܥܐ ܕܫܠܝܚ̈ܐ

ܠܘܩܐ ܝܓ: 22 ‐ ܫܘܠܡܐ

ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ ܟܪܘܙܘܬܼܐ ܕܠܘܩܐ

♰ ܐܝܼܢܵܐ ܒܗ̇ܘ ܙܲܒܼܢܵܐ. ܚܵܕܸܪ ܗ݇ܘܵܐ ܝܑܼܫܘܿܥ ܓܵܘ ܡܲܬܘܵܬܹ̈ܐ ܘܡܕܝܼ̈ܢܵܬܹܐ ܟܲܕ ܡܵܠܘܼܦܹܐ ܘܒܹܐܙܵܠܵܐ ܠܐܘܿܪܸܫܠܸܡ. ܐܝܼܢܵܐ ܒܘܼܩܸܪܹܗ ܡܸܢܹܗ ܚܲܕ݇ ܐ݇ܢܵܫܵܐ: ܕܐܸܢ ܚܲܕ݇ܟ̰ܵܐ ܝܢܵܐ ܐܵܢܝܼ ܕܚܵܝܝܼ؟ ܐܝܼܢܵܐ ܝܑܼܫܘܿܥ ܐ݇ܡܸܪܹܗ ܐܸܠܲܝܗܝ: ܟ̰ܲܠܸܫܘܿܢ ܠܸܥܒܼܵܪܵܐ ܒܬܲܪܥܵܐ ܐܲܠܝܼܨܵܐ. ܣܵܒܵܒ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ: ܕܪܵܒܵܐ ܒܸܬ  ܒܵܥܝܼ ܠܸܥܒܼܵܪܵܐ ܘܠܹܐ ܡܵܨܝܼ. ܡ̣ܢ ܣܵܥܵܬ ܕܩܵܐܸܡ ܡܵܪܵܐ ܕܒܲܝܬܵܐ ܘܕܵܘܸܪ ܬܲܪܥܵܐ. ܘܒܸܬ ܗܵܘܹܝܬܘܿܢ ܟܸܠܝܹܐ ܠܒܼܲܕܵܪ ܘܬܲܩܬܘܼܩܹܐ ܒܬܲܪܥܵܐ، ܘܒܸܬ ܫܵܪܹܝܬܘܿܢ ܠܹܐܡܵܪܵܐ: ܡܵܪܲܢ ܡܵܪܲܢ ܦܬܘܿܚ ܐܸܠܲܢ. ܘܒܸܬ ܓ̰ܲܘܸܒ ܗ̇ܘ ܘܒܸܬ ܐܵܡܸܪ: ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ ܕܠܹܐ ܝܲܕܥܸܢܵܘܟܼܘܿܢ ܡܐܲܝܟܵܐ ܝܬܘܿܢ؟ ܘܒܸܬ ܫܵܪܹܝܬܘܿܢ ܠܹܐܡܵܪܵܐ: ܠܘܵܬܘܼܟܼ ܐ݇ܟܼܸܠܲܢ ܘܫܬܹܐܠܲܢ. ܘܓܵܘ ܫܘܼܩܲܝ̈ܢ ܡܘܼܠܸܦܠܘܼܟܼ. ܘܒܸܬ ܐܵܡܸܪ ܐܸܠܵܘܟܼܘܿܢ: ܠܹܐ ܝܲܕܥܸܢܵܘܟܼܘܿܢ ܡܐܲܝܟܵܐ ܝܬܘܿܢ. ܪܚܘܼܩܘܿܢ ܡܸܢܝܼ ܦܵܠܵܚܹܐ ܕܫܘܼܩܪܵܐ. ܬܵܡܵܐ ܒܸܬ ܗܵܘܹܐ ܒܸܟܼܝܵܐ ܘܚܲܪܚܲܟ̰ܬܵܐ ܕܟܵܟܹ̈ܐ. ܟܲܕ ܚܵܙܹܝܬܘܿܢ ܠܐܲܒܼܪܵܗܲܡ ܘܠܐܝܼܣܚܵܩ ܘܠܝܲܥܩܘܼܒܼ ܘܠܟܠܲܝܗܝ ܢܒܼܝܼܹ̈ܐ ܒܡܲܠܟܘܼܬܵܐ ܕܐܲܠܵܗܵܐ. ܐܝܼܢܵܐ ܐܲܚܬܘܿܢ ܒܸܬ ܗܵܘܹܝܬܘܿܢ ܦܘܼܠܛܹܐ ܠܒܼܲܕܵܪ. ܘܒܸܬ ܐܵܬܝܼ ܡ̣ܢ ܡܲܕܢܚܵܐ ܘܡ̣ܢ ܡܲܥܪܒܼܵܐ ܘܡ̣ܢ ܬܲܝܡܢܵܐ ܘܡ̣ܢ ܓܲܪܒܝܵܐ. ܘܒܸܬ ܝܲܬܒܼܝܼ ܒܡܲܠܟܘܼܬܵܐ ܕܐܲܠܵܗܵܐ. ܘܗܵܐ ܐܝܼܬ ܐ݇ܚܵܪ̈ܵܝܹܐ ܕܒܸܬ ܗܵܘܝܼ ܩܲܕ݇ܡܵܝܹ̈ܐ. ܘܐܝܼܬ ܩܲܕ݇ܡܵܝܹ̈ܐ ܕܒܸܬ ܗܵܘܝܼ ܐ݇ܚܵܪ̈ܵܝܹܐ. ܒܝܼܹܗ ܒܗ̇ܘ ܝܵܘܡܵܐ ܩܘܼܪܒܸܢܗ݇ܘܿܢ ܐ݇ܢܵܫܹ̈ܐ ܡ̣ܢ ܦܪ̈ܝܼܫܹܐ. ܘܐܲܡܪܝܼ ܐܸܠܹܗ: ܙܹܠ݇ ܡܐܲܟܼܵܐ. ܣܵܒܵܒ ܗܹܪܘܿܕܸܣ ܒܥܵܝܵܐ ܝܠܹܗ ܠܸܩܛܵܠܘܼܟܼ. ܐܵܡܸܪ ܐܸܠܲܝܗܝ ܝܑܼܫܘܿܥ ܙܹܠ݇ܡܘܿܢ ܐ݇ܡܘܼܪܘܿܢ ܠܐܵܗܵܐ ܬܲܥܠܵܐ. ܕܗܵܐ ܦܵܠܘܼܛܹܐ ܝܘܸܢ ܫܹܐܕܹ̈ܐ، ܘܒܵܤܘܼܡܹܐ ܝܘܸܢ ܐܸܕܝܘܿܡ ܘܩܘܼܕܡܹܐ. ܘܠܝܵܘܡܵܐ ܕܬܠܵܬܵܐ ܒܸܬ ܗܵܘܸܢ ܬܘܼܡܸܡܵܐ. ܐܝܼܢܵܐ ܒܹܐܡܵܪܵܐ ܝܘܸܢ ܘܵܠܹܐ ܐܸܠܝܼ ܕܐܸܕܝܘܿܡ ܘܩܘܼܕܡܹܐ ܦܵܠܚܸܢ ܘܠܝܵܘܡܵܐ ܐ݇ܚܹܪ݇ܢܵܐ ܒܸܬ ܐܵܙܸܠ݇ܢ. ܣܵܒܵܒ ܕܠܹܐ ܡܲܨܝܵܐ ܕܢܒܼܝܼܵܐ ܛܵܠܸܩ ܠܒܼܲܕܲܪ ܡ̣ܢ ܐܘܿܪܸܫܠܸܡ. ܐܘܿܪܸܫܠܸܡ ܐܘܿܪܸܫܠܸܡ ܩܵܛܠܵܢܬܵܐ ܕܢܒܼܝܼܹ̈ܐ ܘܪܵܓ̰ܡܵܢܬܵܐ ܠܐܲܝܢܝܼ ܕܝܼܢܵܐ ܫܘܼܕܪܹܐ ܠܘܵܬܵܗ̇. ܟܡܵܐ ܓܵܗܹܐ ܒܣܸܡܠܵܐ ܠܝܼ ܠܓ̰ܵܡܘܼܥܝܹܐ ܒܢ̈ܘܿܢܹܟܼܝ ܐܲܝܟܼ ܟܬܵܝܬܵܐ ܕܓ̰ܲܡܥܵܐ ܙܲܥܝ̈ܘܼܗ̇ ܬܚܘܿܬ ܓܘܼܠܦܵܢ̈ܘܼܗ̇. ܘܠܵܐ ܒܣܸܡܠܵܐ ܠܵܘܟܼܘܿܢ. ܗܵܐ ܦܝܵܫܵܐ ܝܠܹܗ ܫܒܼܝܼܩܵܐ ܒܲܝܬܵܘܟܼܘܿܢ ܚܵܪܵܒܵܐ ܐܸܠܵܘܟܼܘܿܢ. ܣܵܒܵܒ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ: ܕܠܹܐ ܚܵܙܝܼܬܘܿܢ ܠܝܼ ܗܲܠ ܕܐܲܡܪܝܼܬܘܿܢ: ܒܪܝܼܟܼܵܐ ܝܠܹܗ ܗ̇ܘ ܕܒܹܐܬܵܝܵܐ ܝܠܹܗ ܒܫܸܡܹܗ ܕܡܵܪܝܵܐ.

♱♱♱♱♱♱♱♱♱