ܚܲܕܼܒܫܲܒܵܐ ܕܐܸܫܬܵܐ ܕܩܲܝܛܵܐ

ܟܵܗܢܹ̈ܐ؛ ܝܛ؛ 1‐5. 9‐15

ܬܸܒ̣ܘ ܘܲܫܠܵܘ ܟܵܗܢܹ̈ܐ ܣܸܦܪܵܐ ܕܲܬܼܠܵܬܼܵܐ ܕܐܘܿܪܵܝܬܵܐ؛

ܐܲܚܲܝ̈ ܒܲܪܸܟ̣ܡܵܪܝ܀

ܘܗܘܼܡܙܸܡܠܹܗ ܡܵܪܝܵܐ ܥܲܡ ܡܘܼܫܹܐ؛ ܘܐ݇ܡܸܪܹܗ ܐܸܠܹܗ܀ ܗܲܡܙܸܡ ܥܲܡ ܟܠܵܗ̇ ܟܢܘܼܫܬܵܐ ܕܒܢܲܝ̈ ܝܼܣܪܵܝܹܠ؛ ܘܐ݇ܡܘܿܪ ܐܸܠܲܝܗ‌ܝ؛ ܗܘܹܐܡܘܿܢ ܩܲܕܝܼܫܹ̈ܐ؛ ܣܵܒܵܒ ܕܐܵܢܵܐ ܩܲܕܝܼܫܵܐ ܝ݇ܘܸܢ؛ ܐܵܢܵܐ ܝ݇ܘܸܢ ܡܵܪܝܵܐ ܐܲܠܵܗܵܘܟ̣ܘܿܢ܀ ܟܠ ܐ݇ܢܵܫܵܐ ܡ̣ܢ ܒܵܒܹܗ ܘܡ̣ܢ ܝܸܡܹܗ ܙܕܸܥܡܘܿܢ؛ ܘܢܛܘܿܪܘܿܢ ܦܘܼܩܕ̈ܵܢܝܼ. ܣܵܒܵܒ ܕܐܵܢܵܐ ܝ݇ܘܸܢ ܡܵܪܝܵܐ ܐܲܠܵܗܵܘܟ̣ܘܿܢ܀ ܠܵܐ ܕܵܝܪܝܼܬܘܿܢ ܒܵܬ݇ܪ ܫܹܐܕܹ̈ܐ؛ ܘܐܲܠܵܗܹ̈ܐ ܪܸ̈ܡܝܹܐ ܠܵܐ ܥܵܒ̣ܕܝܼܬܘܿܢ ܠܵܘܟ̣ܘܿܢ. ܐܵܢܵܐ ܝ݇ܘܸܢ ܡܵܪܝܵܐ ܐܲܠܵܗܵܘܟ̣ܘܿܢ܀ ܘܐܝܼܡܲܢ ܕܚܵܨܕܝܼܬܘܿܢ ܚܸܨܕܵܐ ܕܐܲܪܥܵܘܟ̣ܘܿܢ؛ ܠܵܐ ܬܵܝܡܝܼܬܘܿܢ ܡܲܪ̈ܙܵܢܵܢܹܐ ܕܚܲܩܠܵܬܵܘ̈ܟ̣ܘܿܢ ܠܸܚܨܵܕܵܐ. ܘܫܸܒܠܹ̈ܐ ܕܚܸܨܕܵܘܟ̣ܘܿܢ ܠܵܐ ܠܵܩܛܝܼܬܘܿܢ܀ ܘܟܲܪ̈ܡܵܢܵܘܟ̣ܘܿܢ ܠܵܐ ܒܲܥܘܸܪܝܼܬܘܿܢ؛ ܘܢܸܬܪܵܐ ܕܙܲܝܬܵܘܟ̣ܘܿܢ ܠܵܐ ܠܵܩܛܝܼܬܘܿܢ؛ ܐܸܠܵܐ ܫܒ̣ܘܿܩܘܿܢ ܠܗ݇ܘܿܢ ܩܵܐ ܡܸܣܟܹܢܹ̈ܐ؛ ܘܩܵܐ ܕܵܐܢܝܼ ܕܕܵܝܪܝܼ ܠܟܸܣܠܝܼ. ܣܵܒܵܒ ܕܐܲܢܵܐ ܝ݇ܘܸܢ ܡܵܪܝܵܐ ܐܲܠܵܗܵܘܟ̣ܘܿܢ܀ ܠܵܐ ܓܵܢܒ̣ܝܼܬܘܿܢ؛ ܠܵܐ ܕܵܪܝܼܬܘܿܢ ܒܘܼܚܬܵܢ؛ ܘܠܵܐ ܕܲܓܠܝܼܬܘܿܢ ܐ݇ܢܵܫܵܐ ܒܚܲܒ̣ܪܹܗ܀ ܠܵܐ ܝܵܡܝܼܬܘܿܢ ܒܫܸܡܝܼ ܒܕܘܼܓܠܵܐ؛ ܘܫܲܚܬܸܢܝܼܬܘܿܢ ܫܸܡܹܗ ܕܐܲܠܵܗܵܘܟ̣ܘܿܢ؛ ܐܵܢܵܐ ܝ݇ܘܸܢ ܡܵܪܝܵܐ܀ ܠܵܐ ܙܵܠܡܸܬ̇ ܠܚܲܒ̣ܪܘܼܟܼ؛ ܘܠܵܐ ܠܵܒܠܸܬ̇ ܠܹܗ ܒܚܲܝܠܵܐ؛ ܘܠܵܐ ܦܵܐܹܫ ܗܵܩܵܐ ܕܕܒ̣ܝܼܩܵܐ ܒܗܵܩܵܐ ܠܟܸܣܠܘܼܟܼ ܗܲܠ ܩܵܝܕܲܡܬܵܐ ܠܵܐ ܡܨܲܥܪܸܬ̇ ܠܟܲܪܵܐ ܘܩܵܕ݇ܡ ܟܘܼܪܵܐ ܠܵܐ ܡܲܬܒ̣ܸܬ̇ ܬܲܪܩܲܠܬܵܐ؛ ܐܸܠܵܐ ܙܕܝܼܥ ܡ̣ܢ ܐܲܠܵܗܘܼܟܼ؛ ܐܵܢܵܐ ܝ݇ܘܸܢ ܡܵܪܝܵܐ܀

ܚܲܒ̣ܪܹܗ

ܐܹܫܲܥܝܵܐ؛ ܟܛ؛ 13‐ܫܘܼܠܵܡܵܐ

ܫܠܵܘ ܢܒ̣ܝܼܘܼܬܹܗ ܕܐܹܫܲܥܝܵܐ؛ ܐܲܚܲܝ̈ ܒܲܪܸܟ̣ܡܵܪܝ܀

ܘܐ݇ܡܸܪܹܗ ܡܵܪܝܵܐ؛ ܡ̣ܢ ܣܵܒܵܒ ܕܩܘܼܪܒܸܢܹܗ ܐܵܗܵܐ ܛܵܝܸܦܵܐ ܒܦܘܼܡܹܗ؛ ܒܣܸܦܘܵܬܹ̈ܗ ܡܝܘܼܩܪܸܢܹܗ؛ ܘܠܸܒܹܗ ܪܸܚܩܵܐ ܝ݇ܠܹܗ ܡܸܢܝܼ. ܘܗܘܹܐܠܵܗ̇ ܙܕܘܿܥܬܲܝܗ‌ܝ ܡܸܢܝܼ؛ ܒܦܘܼܩܕܵܢܵܐ ܘܒܝܘܼܠܦܵܢܵܐ ܕܒܢܲܝ̈ܢܵܫܵܐ܀ ܒܘܼܬ ܕܐܵܗܵܐ ܗܵܐ ܒܸܬ ܡܲܙܝܸܕܸܢ ܠܸܦܪܵܫܹܗ ܐܵܗܵܐ ܛܵܝܸܦܵܐ ܒܥܵܓ̰ܝܼܒܘܼܬܵܐ ܘܥܘܼܓ̰ܵܒܵܐ؛ ܘܒܸܬ ܬܵܠܩܵܐ ܚܸܟ̣ܡܬܵܐ [ܥܵܩܸܠܕܵܪܘܼܬܵܐ] ܕܗܵܘܢܵܢ̈ܘܼܗ‌ܝ؛ ܘܦܲܪܡܵܝܬܵܐ ܕܦܲܪ̈ܡܝܼܵܢܘܼܗ‌ܝ ܒܸܬ ܦܵܝܫܵܐ ܩܛܝܼܥܬܵܐ܀ ܘܵܝ ܠܐܵܢܝܼ ܕܦܵܟ̰ܠܝܼ ܡ̣ܢ ܡܵܪܝܵܐ ܠܛܵܫܘܿܝܹܐ ܪܵܐܝܝܼ؛ ܘܦܘܼܠܚܵܢܲܝ̈ܗ‌ܝ ܗܵܘܝܼ ܒܚܸܫܟܵܐ؛ ܘܐܵܡܪܝܼ؛ ܡܵܢܝܼ ܒܸܬ ܚܵܙܹܐܠܲܢ؛ ܝܲܢ ܡܵܢܝܼ ܝܵܕܸܥ؛ ܡܘܼܕܝܼ ܝ݇ܘܲܚ ܒܸܦܠܵܚܵܐ؟ ܐܲܝܟܼ ܛܝܼܢܵܐ ܕܦܲܚܵܪܵܐ ܦܝܼܫܹܐ ܝ݇ܬܘܿܢ ܚܫܝܼܒ̣ܹܐ. ܩܵܡܘܿ ܐܵܡܸܪ ܦܘܼܠܚܵܢܵܐ ܩܵܐ ܦܵܠܵܚܹܗ ܠܵܐ ܦܠܝܼܚܸܢܘܼܟܼ؟ ܘܓܒ̣ܝܼܠܬܵܐ ܐܵܡܪܵܐ ܩܵܐ ܓܵܒ̣ܠܵܢܵܗ̇ ܠܵܐ ܓܒ̣ܝܼܠܲܢܘܼܟܼ ܨܦܵܝܝܼ؟ ܗܵܐ ܚܲܕ݇ܟ̰ܵܐ ܦܵܝܫܵܐ ܒܸܬ ܚܵܕܸܪ ܠܸܒ̣ܢܵܢ ܠܟܲܪܡܠܵܐ [ܠܓܲܢܬܵܐ]؛ ܘܟܲܪܡܠܵܐ ܐܲܝܟܼ ܡܲܝܫܵܐ ܒܸܬ ܦܵܐܹܫ ܚܘܼܫܒܸܢܵܐ܀ ܘܒܗ̇ܘ ܝܵܘܡܵܐ ܟܲܪܹ̈ܐ ܒܸܬ ܫܵܡܥܝܼ ܗܹܡܸܙܡܵܢܹ̈ܐ ܕܟܬܵܒ̣ܵܐ؛ ܘܡ̣ܢ ܚܸܫܟܵܐ ܘܥܲܡܛܵܢܵܐ؛ ܥܲܝܢܹ̈ܐ ܕܟܘܼܪܹ̈ܐ ܒܸܬ ܚܵܙܝܼ܀ ܡܲܟܝܼܟ̣ܹ̈ܐ ܒܸܬ ܡܲܙܝܸܕܝܼ ܚܲܕܘܼܬܵܐ ܒܡܵܪܝܵܐ؛ ܘܡܸܣܟܹܢܹ̈ܐ ܒܸܬ ܦܵܨܚܝܼ ܒܩܲܕܝܼܫܵܐ ܕܝܼܣܪܵܝܹܠ܀ ܣܵܒܵܒ ܕܲܫܕܸܫܵܢܵܐ ܒܛܸܠܹܗ؛ ܘܡܲܣܚܸܪܵܢܵܐ ܦܪܸܩܠܹܗ؛ ܘܬܠܸܩܠܗ݇ܘܿܢ ܟܠܲܝܗ‌ܝ ܐܵܢܝܼ ܕܡܲܙܝܸܕܝܼ ܥܵܘܠܵܐ ܘܡܲܚܛܝܼ ܠܐ݇ܢܵܫܹ̈ܐ ܒܗܹܡܸܙܡܵܢ؛ ܘܠܗ̇ܘ ܕܡܲܢܟ̣ܸܣ ܡܲܬܒ̣ܝܼ ܬܲܪܩܲܠܬܵܐ. ܘܐܵܣܪܝܼ ܩܘܼܠܬܵܐ ܒܚܸܫܟܵܐ ܠܙܲܕܝܼܩܵܐ܀ ܒܘܼܬ ܕܐܵܗܵܐ؛ ܗܵܕܟ̣ܵܐ ܒܹܐܡܵܪܵܐ ܝ݇ܠܹܗ ܡܵܪܝܵܐ؛ ܥܲܠ ܒܲܝܬܹܗ ܕܝܲܥܩܘܿܒ̣؛ ܕܦܘܼܪܸܩܠܹܗ ܠܐܲܒ̣ܪܵܗܵܡ؛ ܡ̣ܢ ܐܵܕܝܼܵܐ ܠܹܐ ܢܵܟ̣ܸܦ ܝܲܥܩܘܿܒ̣؛ ܘܦܵܬܘܵܬ̈ܘܼܗ‌ܝ ܠܹܐ ܦܵܫܡܝܼ؛ ܐܝܼܡܲܢ ܕܚܵܙܹܐܠܗ݇ܘܿܢ ܒܢܘܿܢ̈ܘܼܗ‌ܝ ܦܘܼܠܚܵܢܵܐ ܕܐܝܼܕ̈ܝܼ؛ ܘܒܓܵܘܹܗ ܒܸܬ ܡܩܲܕܫܝܼ ܫܸܡܝܼ؛ ܘܒܸܬ ܩܲܕܫܝܼ ܠܩܲܕܝܼܫܵܐ؛ ܕܝܲܥܩܘܿܒ̣؛ ܘܠܐܲܠܵܗܵܐ ܕܝܼܣܪܵܝܹܠ ܒܸܬ ܡܲܪܡܝܼ܀ ܘܒܸܬ ܝܵܕܥܝܼ ܣܲܟ̣ܠܹ̈ܐ ܐܵܢܝܼ ܕܪܘܼܚܲܝܗ‌ܝ ܬܠܝܼܩܬܵܐ ܝ݇ܠܵܗ̇؛ ܘܐܲܗܡܲܩܹ̈ܐ ܒܸܬ ܝܵܠܦܝܼ ܠܡܲܨܝܘܼܬܹܐ܀

♱♱♱♱♱♱♱♱♱

ܚܕܒܫܒܐ ܕܐܫܬܐ ܕܩܝܛܐ

ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ

ܕܲܠܘܵܬܼ ܬܸܣܵܠܘܿܢܝܼܩܵܝܹ̈ܐ ܐܲܚܲܝ̈ ܒܲܪܸܟܼܡܵܪܝ܀

ܘܐܲܚܬܘܿܢ ܒܝܼܕܲܥܝܵܐ ܝ݇ܬܘܿܢ ܐܵܚܘܿܢܘܵܬ̈ܝܼ ܕܥܒܼܲܪܬܲܢ ܠܟܸܣܠܵܘܟܼܘܿܢ ܠܹܐ ܝܗ݇ܘܼܵܐ ܒܵܛܝܼܠܬܵܐ܋ ܐܝܼܢܵܐ ܩܵܕ݇ܡܵܝܬܵܐ ܩܘܼܒܸܠܲܢ ܚܲܫܵܐ ܘܦܸܫܠܲܢ ܡܘܼܣܠܝܼܹܐ ܓܵܘ ܦܝܼܠܝܼܦܘܿܣ ܐܲܝܟܼ ܕܒܝܼܕܲܥܝܵܐ ܝ݇ܬܘܿܢ. ܗܵܝܓܵܗ ܒܐܵܓܼܘܿܢܵܐ ܓܘܼܪܵܐ ܗܘܼܡܙܸܡܠܲܢ ܥܲܡܵܘܟܼܘܿܢ ܒܒܸܣܬܵܝܘܼܬܵܐ ܕܐܲܠܵܗܲܢ ܡܲܫܚܲܕܬܹܗ ܕܡܫܝܼܚܵܐ܋ ܣܵܒܵܒ ܝܵܗ݇ܒܼܵܠܬܲܢ ܕܠܸܒܵܐ ܠܹܐ ܝܗ݇ܘܼܵܐ ܡܼܢ ܚܸܠܛܘܼܢܝܘܼܬܵܐ؛ ܘܠܵܐ ܡܼܢ ܟ̰ܲܦܵܠܘܼܬܵܐ ܘܠܵܐ ܒܦܲܢܕܹ̈ܐ܋ ܐܝܼܢܵܐ ܐܲܝܟܼ ܕܐܲܫܟܵܪܵܐ ܝ݇ܘܲܚ؛ ܩܵܕ݇ܡ ܐܲܠܵܗܵܐ ܕܦܵܝܫܵܐ ܗܘܼܡܸܢܬܵܐ ܡܲܫܚܲܕܬܹܗ؛ ܗܲܕܟܼܵܐ ܗܲܡܙܘܼܡܹܐ ܝ݇ܘܲܚ؛ ܠܵܐ ܐܲܝܟܼ ܕܫܵܦܪܲܚ ܠܒܢܲܝ̈ܢܵܫܵܐ؛ ܐܝܼܢܵܐ ܠܐܲܠܵܗܵܐ ܗ̇ܘ ܕܨܲܚܨܹܐ ܠܸܒܵܘ̈ܵܬܲܢ܋ ܐܘܼܦ ܠܵܐ ܡܘܼܦܠܸܚܠܲܢ ܗܹܡܸܙܡܲܢ ܫܵܕܠܵܢܬܵܐ ܐܲܝܟܼ ܕܐܲܚܬܘܿܢ ܝܵܕܥܝܼܬܘܿܢ؛ ܘܠܵܐ ܒܗܲܓ̰ܲܬ ܕܛܲܡܲܥܟܵܪܘܼܬܵܐ؛ ܐܲܠܵܗܵܐ ܣܵܗܕܵܐ ܝ݇ܠܹܗ܋ ܠܵܐ ܛܘܼܥܹܐܠܲܢ ܒܵܬ݇ܪ ܚܸܩܪܵܐ ܡܼܢ ܒܢܲܝ̈ܢܵܫܵܐ؛ ܠܵܐ ܡܸܢܵܘܟܼܘܿܢ ܘܠܵܐ ܡܼܢ ܐ݇ܚܹܪ̈݇ܢܹܐ ܘܟܲܕ ܡܵܨܲܚ ܗ݇ܘܼܵܘ ܠܸܗܘܵܝܵܐ ܡܵܪܹܐ ܗܘܼܟܡܵܐ ܐܲܝܟܼ ܫܠܝܼܚܹ̈ܐ ܕܡܫܝܼܚܵܐ܋ ܐܸܠܵܐ ܗܘܹܐܠܲܢ ܓܵܘܵܘܟܼܘܿܢ ܡܲܟܝܼܟܼܹ̈ܐ ܐܲܝܟܼ ܝܸܡܵܐ ܕܡܲܚܸܒܵܐ ܒܢ̈ܘܼܢܵܗ̇܋ ܗܲܕܟܼܵܐ ܐܘܼܦ ܐܲܚܢܲܢ ܡܲܚܘܼܒܹܐ ܝ݇ܘܲܚ. ܘܫܲܗܘܘܼܬܹܐ ܠܝܼܵܗ݇ܒܼܵܐ ܩܵܬܵܘܟܼܘܿܢ ܠܵܐ ܐܲܚܟ̰ܝܼ ܡܲܫܚܲܕܬܹܗ ܕܐܲܠܵܗܵܐ ܐܸܠܵܐ ܐܘܼܦ ܓܵܢܲܢ. ܣܵܒܵܒ ܡܘܼܚܸܒܹ̈ܐ ܕܝܼܲܢ ܝܼܬܘܿܢ܋ ܒܸܕܟܼܵܪܵܐ ܝ݇ܬܘܿܢ ܐܵܚܘܿܢܘܵܬ̈ܝܼ؛ ܕܟܹܐ ܓ̰ܵܗܝܲܚ ܗ݇ܘܼܵܘ ܘܦܵܠܚܲܚ ܗ݇ܘܼܵܘ ܒܐܝܼܕ̈ܵܬܲܢ ܒܠܲܝܠܹܐ ܘܒܝܵܘܡܵܐ ܕܥܲܠ ܚܲܕ݇ ܡܸܢܵܘܟܼܘܿܢ ܠܵܐ ܗܵܘܲܚ ܝܘܼܩܪܵܐ܋ ܐܲܚܬܘܿܢ ܣܵܗܕܹ̈ܐ ܘܐܲܠܵܗܵܐ. ܕܵܐܟܼܝܼ ܡܘܼܟܪܸܙܠܲܢ ܐܸܠܵܘܟܼܘܿܢ ܡܲܫܚܲܕܬܹܗ ܕܐܲܠܵܗܵܐ ܒܕܸܟܼܝܘܼܬܵܐ ܘܒܟܹܐܢܘܼܬܵܐ. ܕܠܵܐ ܠܵܘܡܵܐ ܗܘܹܐܠܲܢ ܠܟܸܣ ܟܠܲܝܗܝ ܡܗܘܼܡܢܹ̈ܐ܋ ܐܲܝܟܼ ܕܟܹܐ ܝܵܕܥܝܼܬܘܿܢ ܕܡܼܢ ܟܠ ܚܲܕ݇ ܡܸܢܵܘܟܼܘܿܢ ܐܲܝܟܼ ܒܵܒܵܐ ܡܼܢ ܒܢܘܼܢܘܼ̈ܗܝ ܦܘܼܪܦܸܠܲܢ ܘܝܘܼܗ݇ܒܼܸܠܲܢ ܠܸܒܵܐ܋ ܘܒܝܼܵܗ݇ܒܼܵܐ ܝ݇ܘܲܚ ܣܵܗܕܘܼܬܵܐ ܐܸܠܵܘܟܼܘܿܢ ܕܚܵܕܪܝܼܬܘܿܢ ܐܲܝܟܼ ܕܚܫܝܼܚܬܵܐ ܝ݇ܠܵܗ̇ ܩܵܐ ܐܲܠܵܗܵܐ ܗ̇ܘ ܕܩܲܡ ܩܵܪܹܐܠܵܘܟܼܘܿܢ ܠܡܲܠܟܘܼܬܹܗ ܘܠܚܸܩܪܹܗ܋

♱♱♱♱♱♱♱♱♱

ܚܕܒܫܒܐ ܕܫܬܐ ܕܩܝܛܐ

ܠܘܩܐ ܝܙ: 5 ‐ 20

ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ ܟܪܘܙܘܬܼܐ ܕܠܘܩܐ

♰ ܐ݇ܡܸܪܗ݇ܘܿܢ ܫܠܝܼܚܹ̈ܐ ܠܡܵܪܲܢ: ܡܲܙܝܸܕܠܲܢ ܗܲܝܡܵܢܘܼܬܵܐ. ܐܵܡܸܪ ܐܸܠܲܝܗܝ: ܐܸܢ ܐܝܼܬ ܗ݇ܘܵܐ ܠܵܘܟܼܘܿܢ ܗܲܝܡܵܢܘܼܬܵܐ ܐܲܝܟܼ ܕܲܢܕܸܟܬܵܐ ܕܚܲܪܕܲܠ: ܒܸܬ ܐܲܡܪܝܼܬܘܿܢ ܗ݇ܘܵܐ ܠܐܵܗܵܐ ܬܘܼܬܵܐ: ܦܘܼܫ ܥܩܝܼܪܵܐ ܘܦܘܼܫ ܢܨܝܼܒܼܵܐ ܒܝܵܡܵܐ: ܒܸܬ ܡܲܨܝܸܬ ܗ݇ܘܵܐ ܐܸܠܵܘܟܼܘܿܢ. ܐܝܼܢܵܐ ܡܵܢܝܼ ܡܸܢܵܘܟܼܘܿܢ ܕܐܝܼܬܠܹܗ ܥܲܒܼܕܵܐ ܕܛܵܪܹܐ ܦܬܵܢܵܐ. ܝܲܢ ܕܡܲܪܥܹܐ ܥܸܪ̈ܒܹܐ. ܘܐܸܢ ܐܵܬܹܐ ܡ̣ܢ ܚܲܩܠܵܐ: ܒܸܬ ܐܵܡܸܪ ܐܸܠܹܗ ܒܗ̇‌ܝ ܥܕܵܢܵܐ ܥܒܼܘܿܪ ܝܬܸܒܼ، ܐܸܠܵܐ ܒܸܬ ܐܵܡܸܪ ܐܸܠܹܗ. ܗܵܕܸܪ ܐܸܠܝܼ ܡܸܢܕܝܼ ܕܐܲܟܼܠܸܢ ܐ݇ܟ݂ܲܠ݇ܪܲܡܫܵܐ: ܘܐ݇ܣܘܿܪ ܚܲܨܘܼܟܼ ܥܒܼܘܼܕ ܠܝܼ ܚܸܠܡܵܬ ܗܲܠ ܕܐܲܟܼܠܸܢ ܘܫܵܬܸܢ. ܘܡ̣ܢ ܒܵܬ݇ܪ ܗܵܕܵܐ ܐܵܦ ܐܲܢ݇ܬ ܐܲܟܼܠܸܬ ܘܫܵܬܸܬ: ܩܵܡܘܿ ܛܥܲܢܬܵܐ ܕܡܸܢܬܵܐ ܒܸܬ ܩܵܒܸܠ ܗ̇ܘ ܥܲܒܼܕܵܐ ܕܥܒܼܸܕܠܹܗ ܡܸܢܕܝܼ ܕܦܸܫܠܹܗ ܦܩܝܼܕܵܐ ܐܸܠܹܗ؟ ܠܹܐ ܝܘܸܢ ܒܸܚܫܵܒܼܵܐ. ܗܲܕܟܼܵܐ ܐܘܿܦ ܐܲܚܬܘܿܢ: ܐܝܼܡܵܢ ܕܥܒܼܝܼܕܠܵܘܟܼܘܿܢ ܟܠܲܝܗܝ ܐܲܢܹܐ ܕܦܩܝܼܕܹܐ ܝܢܵܐ ܐܸܠܵܘܟܼܘܿܢ. ܐ݇ܡܘܼܪܘܼܢ: ܕܥܲܒܼܕܹ̈ܐ ܒܲܛܝܼܠܹ̈ܐ ܝܘܲܚ. ܕܡܸܢܕܝܼ ܕܕܲܝܢܵܢܹ̈ܐ ܝܘܲܚ ܗ݇ܘܵܐ ܠܸܥܒܼܵܕܵܐ ܥܒܼܸܕܠܲܢ. ܘܗ݇ܘܹܐ ܠܵܗ̇ ܕܟܲܕ ܒܹܐܙܵܠܵܐ ܗ݇ܘܵܐ ܝܑܼܫܘܿܥ ܠܐܘܿܪܸܫܠܸܡ: ܒܸܥܒܼܵܪܵܐ ܗ݇ܘܵܐ ܡ̣ܢ ܓܵܘ ܒܹܝܬ ܫܵܡܪ̈ܵܝܹܐ ܠܓܠܝܼܠܵܐ: ܘܟܲܕ ܩܘܼܪܒܵܐ  ܠܸܥܒܼܵܪܵܐ ܠܚܕܵܐ ܡܵܬܵܐ: ܬܦܸܩܠܗ݇ܘܿܢ ܒܝܼܹܗ ܥܸܣܪܵܐ ܐ݇ܢܵܫܹ̈ܐ  ܓܲܪ̈ܒܼܵܢܹܐ: ܘܟܠܹܐ ܠܗ݇ܘܿܢ ܡ̣ܢ ܪܸܚܩܵܐ: ܘܡܘܼܪܸܡܠܗ݇ܘܿܢ ܩܵܠܲܝܗܝ ܒܹܐܡܵܪܵܐ: ܪܲܒܲܢ ܝܑܼܫܘܿܥ ܥܒܼܘܼܕ ܪ̈ܲܚܡܹܐ ܥܲܠܲܢ. ܘܟܲܕ ܚܸܙܝܲܝܠܹܗ ܐ݇ܡܸܪܹܗ ܐܸܠܲܝܗܝ. ܙܹܠ݇ܡܘܿܢ ܡܲܚܙܹܝܡܘܿܢ ܓܵܢܵܘܟܼܘܿܢ ܠܟܵܗܢܹ̈ܐ. ܘܟܲܕ ܒܹܐܙܵܠܵܐ ܦܸܫܠܗ݇ܘܿܢ ܕܘܼܟܼܝܹܐ. ܐܝܼܢܵܐ ܚܲܕ݇ ܡܸܢܲܝܗܝ ܟܲܕ ܚܙܹܐܠܹܗ ܕܦܸܫܠܹܗ ܕܘܼܟܼܝܵܐ، ܕܥܸܪܹܗ ܘܒܩܵܠܵܐ ܪܵܡܵܐ ܡܫܵܒܸܚ ܗ݇ܘܵܐ ܠܐܲܠܵܗܵܐ، ܘܢܦܸܠܹܗ ܥܲܠ ܦܲܐܬܘܵܬܘܼ̈ܗܝ ܩܵܕ݇ܡ ܐܲܩܠܵܬܹ̈ܐ ܕܝܑܼܫܘܿܥ: ܟܲܕ ܫܵܟܘܼܪܹܐ ܐܸܠܹܗ. ܘܐܵܗܵܐ ܫܵܡܪܵܝܵܐ ܗ݇ܘܵܐ: ܐܝܼܢܵܐ ܓ̰ܘܼܘܸܒܠܹܗ ܝܑܼܫܘܿܥ ܘܐ݇ܡܸܪܹܗ: ܠܵܐ ܗ݇ܘܵܘ ܥܸܣܪܵܐ ܐܵܢܝܼ ܕܦܸܫܠܗ݇ܘܿܢ ܕܘܼܟܼܝܹܐ؟ ܐܲܝܟܵܐܝܢܵܐ ܐܵܢܝܼ ܬܸܫܥܵܐ؟ ܩܵܡܘܼܕܝܼ ܠܵܐ ܬܹܐܠܗ݇ܘܿܢ ܕܝܲܗ݇ܒ̣ܝܼ  ܬܸܫܒܘܼܚܬܵܐ ܠܐܲܠܵܗܵܐ: ܐܸܠܵܐ ܐܵܗܵܐ ܕܡ̣ܢ ܥܲܡܵܐ ܢܘܼܟܼܪܵܝܵܐ ܝܠܹܗ؟ ܘܐ݇ܡܸܪܹܗ ܐܸܠܹܗ: ܩܘܼܡ ܙܹܠ݇ ܗܲܝܡܵܢܘܼܬܘܼܟܼ ܩܲܡ ܡܲܚܝܼܵܐܠܘܼܟܼ.

♱♱♱♱♱♱♱♱♱