ܚܲܕܼܒܫܲܒܵܐ ܕܐܸܫܬܵܐ ܕܲܩܝܵܡܬܵܐ
ܐܹܫܲܥܝܵܐ ܢܐ؛ 9‐12. ܢܒ؛ 7‐13
ܬܸܒ̣ܘ ܘܲܫܠܵܘ ܢܒ̣ܝܼܘܼܬܹܗ ܕܐܹܫܲܥܝܵܐ؛ ܐܲܚܲܝ̈ ܒܲܪܸܟ̣ܡܵܪܝ܀
ܗܵܕܟ̣ܵܐ ܒܹܐܡܵܪܵܐ ܝ݇ܠܹܗ ܡܵܪܝܵܐ ܪܥܘܿܫܝ! ܪܥܘܿܫܝ ܘܠܒ̣ܘܼܫܝ ܚܲܝܠܵܐ ܕܕܪܵܥܹܗ ܕܡܵܪܝܵܐ܀ ܪܥܘܿܫܝ ܐܲܝܟܼ ܕܒܝܵܘܡܵܢܹ̈ܐ ܩܲܕ݇ܡܵܝܹ̈ܐ ܘܐܲܝܟܼ ܕܵܘܪܹ̈ܐ ܕܡ̣ܢ ܥܵܠܲܡ؛ ܐܲܢ݇ܬ̇ܝ ܝ݇ܘܲܬ̇ܝ ܕܩܛܝܼܥܠܵܟ̣ܝ ܩܛܥܵܝܬܵܐ ܓܘܼܪܬܵܐ؛ ܘܩܛܸܠܵܟ̣ܝ ܠܬܲܢܝܼܢܵܐ؛ ܐܲܢ݇ܬ̇ܝ ܝ݇ܘܲܬ̇ܝ ܕܡܘܼܚܪܸܒ̣ܠܵܟ̣ܝ ܝܵܡܵܐ؛ ܘܡܝܼܵܐ ܕܝܵܡܵܐ ܓܘܼܪܬܵܐ؛ ܘܓܵܘ ܥܘܼܡܩܵܐ ܕܡܝܼܵܐ ܥܒ̣ܸܕܠܵܟ̣ܝ ܐܘܼܪܚܵܐ ܕܒܸܬ ܥܵܒ̣ܪܝܼ ܦܪ̈ܝܼܩܹܐ ܦܘܼܪܩܹܐ ܕܡܵܪܝܵܐ܀ ܘܒܸܬ ܕܵܝܪܝܼ ܘܥܵܒ̣ܪܝܼ ܠܨܸܗܝܘܿܢ ܒܚܸܩܪܵܐ؛ ܘܗܲܠ ܥܵܠܲܡ ܥܲܠ ܪܹܫܲܝܗܝ ܒܸܬ ܗܵܘܝܵܐ ܚܲܕܘܼܬܵܐ؛ ܒܘܼܣܵܡܵܐ ܘܚܲܕܘܼܬܵܐ ܒܸܬ ܡܵܛܝܼ؛ ܘܒܸܬ ܥܵܪܩܝܼ؛ ܐܵܚܹ̈ܐ ܘܐܘܼܚܹ̈ܐ ܘܬܵܢܲܚܝܵܬܹ̈ܐ܀ ܟܡܵܐ ܠܵܚܘܿܡܹ̈ܐ ܝ݇ܢܵܐ ܥܲܠ ܛܘܼܪ̈ܵܢܹܐ؛ ܐܲܩܠܵܬܹ̈ܐ ܕܡܲܫܚܸܕܵܢܵܐ ܕܫܠܵܡܵܐ؛ ܘܡܲܫܚܸܕܵܢܵܐ ܕܛܵܒ̣ܵܬܹ̈ܐ؛ ܘܡܲܫܡܸܥܝܵܢܵܐ ܕܦܘܼܪܩܵܢܵܐ؛ ܕܐܵܡܸܪ ܠܨܸܗܝܘܿܢ؛ ܐܲܠܵܗܵܟ̣ܝ ܗܘܹܐܠܹܗ ܡܲܠܟܵܐ܀ ܩܵܠܵܐ ܕܢܵܛܘܿܪܵܟ̣ܝ ܡܘܼܪܸܡܠܗ݇ܘܿܢ ܩܵܠܵܐ؛ ܡܐܘܼܕܵܠܹܐ ܡܲܩܘܘܼܚܹܐ. ܣܵܒܵܒ ܕܥܲܝܢܵܐ ܒܥܲܝܢܵܐ ܒܸܬ ܚܵܙܝܼ؛ ܟܲܕ ܡܵܪܝܵܐ ܡܲܕܘܼܪܹܐ ܠܨܸܗܝܘܿܢ܀ ܦܨܘܿܚܘܿܢ ܘܡܲܩܘܸܚܘܿܢ ܡܐܘܼܕܵܠܹܐ ܚܵܪ̈ܵܒܝܼܹܐ ܕܐܘܿܪܸܫܠܹܡ. ܣܵܒܵܒ ܝܘܼܗ݇ܒ̣ܸܠܹܗ ܠܸܒܵܐ ܡܵܪܝܵܐ ܠܜܲܝܸܦܹܗ ܘܦܘܼܪܸܩܠܹܗ ܠܐܘܿܪܸܫܠܸܡ܀ ܓܘܼܠܹܐܠܹܗ ܡܵܪܝܵܐ ܕܪܲܥܢܹܗ ܩܲܕܝܼܫܵܐ ܒܲܪܩܘܼܒ̣ܠ ܟܠܲܝܗܝ ܛܵܝܸܦܹ̈ܐ؛ ܘܒܸܬ ܚܵܙܝܼ ܟܠܲܝܗܝ ܡܲܪ̈ܙܵܢܵܢܹܐ ܕܐܲܪܥܵܐ ܦܘܼܪܩܵܢܹܗ ܕܐܲܠܵܗܲܢ܀ ܥܒ̣ܘܿܪܘܿܢ؛ ܥܒ̣ܘܿܪܘܿܢ. ܦܠܘܿܛܘܿܢ ܡ̣ܢ ܬܵܡܵܐ؛ ܘܠܛܲܡܹ̈ܐܐ ܠܵܐ ܩܲܪܒܸܢܝܼܬܘܿܢ؛ ܦܠܘܿܛܘܿܢ ܡ̣ܢ ܓܵܘܵܗ̇؛ ܦܘܼܫܘܼܢ ܓܘܼܒܝܹ̈ܐ؛ ܫܵܩܠܵܢܹ̈ܐ ܕܡܵܐܢܹ̈ܐ ܕܡܵܪܝܵܐ܀ ܣܵܒܵܒ ܕܠܹܐ ܦܵܠܛܝܼܬܘܿܢ ܒܡܲܠܝܲܙܬܵܐ؛ ܘܠܹܐ ܐܵܙܠ݇ܝܼܬܘܿܢ ܐܲܝܟܼ ܥܵܪ̈ܘܿܩܹܐ. ܡܵܪܝܵܐ ܒܸܬ ܐܵܙܸܠ ܩܵܕ݇ܡܵܘܟ̣ܘܿܢ؛ ܘܓ̰ܲܡܥܝܵܢܵܘܟ̣ܘܿܢ ܐܲܠܵܗܹܗ ܕܝܼܣܪܵܝܹܠ܀
ܚܲܒ̣ܪܹܗ
ܦܪܲܟܣܝܼܣ ܝ؛ 1‐17
ܫܠܵܘ ܦܲܪܲܟܣܝܼܣ ܕܲܫܠܝܼܚܹ̈ܐ؛ ܐܲܚܲܝ̈ ܒܲܪܸܟ̣ܡܵܪܝ܀
ܓܵܘ ܩܹܣܵܪܝܼܵܐ ܐܝܼܬ ܗ݇ܘܵܐ ܚܲܕ݇ ܐ݇ܢܵܫܵܐ ܫܸܡܹܗ ܩܘܼܪܢܹܠܝܼܘܿܣ. ܩܸܢܛܪܘܿܢܵܐ ܡ̣ܢ ܕܲܣܬܵܐ ܕܦܵܝܫܵܐ ܗ݇ܘܵܐ ܩܪܝܼܬܵܐ ܐܝܼܛܵܠܝܼܩܹܐ܀ ܙܲܕܝܼܩܵܐ ܗ݇ܘܵܐ ܘܙܵܕܥܝܵܢܵܐ ܡ̣ܢ ܐܲܠܵܗܵܐ؛ ܗ̇ܘ ܘܟܠܵܗ̇ ܒܲܝܬܘܼܬܹܗ؛ ܘܪܵܒܵܐ ܐܸܪ̈ܘܵܢܹܐ ܥܵܒ̣ܸܕ ܗ݇ܘܵܐ ܓܵܘ ܛܵܝܸܦܵܐ. ܘܒܟܠ ܥܸܕܵܢܵܐ ܦܲܪܦܸܠ ܗ݇ܘܵܐ ܒܐܲܠܵܗܵܐ܀ ܐܵܗܵܐ ܚܙܹܐܠܹܗ ܒܚܸܙܘܵܐ ܐܲܫܟܵܪܵܐ ܡܲܠܲܐܟ̣ܵܐ ܕܐܲܠܵܗܵܐ. ܐܲܝܟܼ ܣܵܥܲܬ ܕܐܸܬܫܥܵܐ ܒܝܵܘܡܵܐ؛ ܕܥܒ̣ܸܪܹܗ ܠܟܸܣܠܹܗ ܘܐ݇ܡܸܪܹܗ ܐܸܠܹܗ؛ ܩܘܼܪܢܹܠܝܼܵܐ܀ ܘܗ̇ܘ ܚܸܪܹܗ ܒܝܼܹܗ ܘܙܕܝܼܥܠܹܗ. ܘܐ݇ܡܸܪܹܗ ܡܘܼܕܝܼ ܝܵܐ ܡܵܪܝܼ؟ ܘܐ݇ܡܸܪܹܗ ܐܸܠܹܗ ܡܲܠܲܐܟ̣ܵܐ؛ ܨܠܵܘܵܬ̈ܘܼܟܼ ܘܐܸܪ̈ܘܵܢܘܼܟܼ ܐ݇ܣܸܩܠܗ݇ܘܿܢ ܠܕܟ̣ܵܪܵܐ ܩܵܕ݇ܡ ܐܲܠܵܗܵܐ܀ ܘܐܵܕܝܼܵܐ ܫܲܕܸܪ ܐ݇ܢܵܫܹ̈ܐ ܠܝܘܿܦܹܐ ܡܕܝܼܢ݇ܬܵܐ؛ ܘܡܲܝܬ݇ܝܼ ܠܫܸܡܥܘܿܢ ܕܦܵܐܹܫ ܩܸܪܝܵܐ ܟܹܐܦܵܐ܀ ܗܵܐ ܫܸܪܝܵܐ ܝ݇ܠܹܗ ܓܵܘ ܒܲܝܬܹܗ ܕܫܸܡܥܘܿܢ ܒܘܼܪܣܵܝܵܐ؛ ܗ̇ܘ ܕܝܼܠܹܗ ܠܡܲܪܙܵܐ ܕܝܵܡܵܐ܀ ܘܟܲܕ ܐ݇ܙܸܠܹܗ ܡܲܠܲܐܟ̣ܵܐ ܕܗܘܼܡܙܸܡܠܹܗ ܥܲܡܹܗ؛ ܩܪܹܐܠܹܗ ܬܪܹܝ ܡ̣ܢ ܒܢܲܝ̈ ܒܲܝܬܹܗ؛ ܘܚܲܕ݇ ܦܵܠܚܵܐ [ܣܲܪܒܲܙ] ܙܵܕܥܝܵܢܵܐ ܡܐܲܠܵܗܵܐ؛ ܘܡܲܨܝܸܬܵܢܵܐ ܐܸܠܹܗ܀ ܘܗܘܼܩܹܐܠܹܗ ܐܸܠܲܝܗܝ ܟܠ ܡܸܢܕܝܼ ܕܚܙܹܐܠܹܗ. ܘܫܘܼܕܪܝܼܠܹܗ ܠܝܘܿܦܹܐ܀ ܘܠܝܵܘܡܵܐ ܐ݇ܚܹܪ݇ܢܵܐ ܟܲܕ ܐܵܢܝܼ ܒܹܪ݇ܚܵܫܵܐ ܒܐܘܼܪܚܵܐ ܩܘܼܪܒܸܢܗ݇ܘܿܢ ܠܡܕܝܼܢ݇ܬܵܐ. ܐ݇ܣܸܩܠܹܗ ܫܸܡܥܘܿܢ ܠܐ݇ܓܵܪܹܐ ܕܨܵܠܹܐ ܨܠܘܿܬܵܐ ܒܣܵܥܲܬ ܕܐܸܫܬܵܐ܀ ܟܦܸܢܹܗ ܘܒܵܥܹܐ ܗ݇ܘܵܐ ܕܐܵܟ̣ܸܠ؛ ܘܟܲܕ ܐܵܢܝܼ ܗܵܕܘܿܪܹܐ ܩܵܬܹܗ؛ ܢܦܸܠܵܗ̇ ܥܲܠܹܗ ܒܹܐܗܘܼܫܘܼܬܵܐ. ܘܚܙܹܐܠܹܗ ܫܡܲܝܵܐ ܟܲܕ ܦܬܝܼܚܬܵܐ؛ ܘܚܲܕ݇ ܡܵܐܢܵܐ ܐ݇ܣܝܼܪܵܐ ܒܐܲܪܒܥܵܐ ܩܘܼܢܓ̰ܝܼܵܬܹ̈ܐ. ܘܒܸܕܡܵܝܵܐ ܗ݇ܘܵܐ ܠܚܲܕ݇ ܩܸܛܥܵܐ ܓܘܼܪܵܐ ܕܟܸܬܵܢ. ܬܲܢܕܘܼܠܹܐ ܡ̣ܢ ܫܡܲܝܵܐ ܥܲܠ ܐܲܪܥܵܐ܀ ܘܐܝܼܬ ܗ݇ܘܵܐ ܓܵܘܹܗ ܟܠܲܝܗܝ ܗܲܝܘܵܢܹ̈ܐ ܕܐܲܪܒܥܵܐ ܐܲܩܠܵܬܹ̈ܐ؛ ܘܪܸ̈ܓ̰ܒܹܐ ܕܐܲܪܥܵܐ. ܘܦܵܪܲܚܬܵܐ ܕܫܡܲܝܵܐ܀ ܘܩܵܠܵܐ ܐ݇ܬܹܐܠܹܗ ܐܸܠܹܗ ܒܹܐܡܵܪܵܐ؛ ܫܸܡܥܘܿܢ ܩܘܼܡ ܦܪܘܿܡ ܘܐ݇ܟ̣ܘܿܠ܀ ܘܫܸܡܥܘܿܢ ܐ݇ܡܸܪܹܗ ܚܵܣܠܝܼ ܡܵܪܝܼ؛ ܕܗܝܼܟ̰ ܠܵܐ ܝ݇ܘܸܢ ܐ݇ܟ̣ܝܼܠܵܐ ܡܸܢܕܝܼ ܠܵܐ ܕܸܟ̣ܝܵܐ ܘܛܲܡܵܐܐ܀ ܘܡܸܕܪܹܐ ܓܵܗܵܐ ܕܬܪܹܝ ܐ݇ܬܹܐܠܹܗ ܐܸܠܹܗ ܩܵܠܵܐ. ܐܵܢܝܼ ܕܐܲܠܵܗܵܐ ܕܘܼܟ̣ܹܐܠܹܗ ܐܲܢ݇ܬ̇ ܠܵܐ ܡܛܲܡܸܐܬ̇܀ ܘܐܵܗܵܐ ܗܘܹܐܠܵܗ̇ ܬܠܵܬܵܐ ܓܵܗܹ̈ܐ. ܘܦܸܫܠܹܗ ܡܘܼܪܡܵܐ ܡܵܐܢܵܐ ܠܫܡܲܝܵܐ܀
♱♱♱♱♱♱♱♱♱
ܚܲܕܼܒܫܲܒܵܐ ܕܐܸܫܬܵܐ ܕܲܩܝܵܡܬܵܐ
ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ
ܕܲܠܘܵܬܼ ܐܵܦܸܣܵܝܹ̈ܐ ܐܲܚܲܝ̈ ܒܲܪܸܟܼܡܵܪܝ܀
ܐܝܼܢܵܐ ܐܲܠܵܗܵܐ ܕܥܲܬܝܼܪܵܐ ܝ݇ܠܹܗ ܒܪ̈ܲܚܡܹܐ ܒܣܵܒܵܒ ܕܚܘܼܒܹܗ ܓܘܼܪܵܐ ܕܩܲܡ ܡܲܚܸܒܠܲܢ* ܟܲܕ ܡܝܼܬܹ̈ܐ ܝ݇ܘܲܚ ܗ݇ܘ̣ܵܘ ܒܚ̈ܛܝܼܵܬܲܢ ܩܲܡ ܡܲܚܸܐ ܠܲܢ ܥܲܡ ܡܫܝܼܚܵܐ ܘܒܫܵܦܵܩܲܬܹܗ ܦܘܼܪܸܩܠܹܗ ܐܸܠܲܢ* ܘܡܘܼܩܸܡܲܚܠܹܗ ܥܼܲܡܹܗ ܘܡܘܼܬܒܼܲܚܠܹܗ ܥܲܡܹܗ ܓܵܘ ܫܡܲܝܵܐ ܒܝܼܫܘܿܥ ܡܫܝܼܚܵܐ* ܕܡܲܕܸܥ ܠܕܵܘܪܹ̈ܐ ܕܐܵܬܝܼ ܓܘܼܪܘܼܬܵܐ ܕܕܵܘܸܠܬܵܐ ܕܫܵܦܵܩܲܬܹܗ ܘܒܲܣܝܼܡܘܼܬܹܗ ܕܗܘܹܐܠܵܗ̇ ܥܲܠܲܢ ܒܝܼܫܘܿܥ ܡܫܝܼܚܵܐ* ܣܵܒܵܒ ܒܫܵܦܵܩܲܬܹܗ ܦܸܫܠܲܢ ܦܘܼܪܩܹܐ ܒܗܲܝܡܵܢܘܼܬܵܐ. ܘܐܵܗܵܐ ܠܹܐ ܝ݇ܠܵܗ̇ ܡܸܢܵܘܟܼܘܿܢ؛ ܐܸܠܵܐ ܚܲܠܥܲܬ ܝܼܠܵܗ̇ ܕܐܲܠܵܗܵܐ* ܠܵܐ ܡ̣ܢ ܦܘܼܠܚܵܢܹ̈ܐ؛ ܕܗܸܟ̃ ܐ݇ܢܵܫܵܐ ܠܵܐ ܥܵܒܼܸܕ ܫܘܼܒܼܗܵܪܵܐ* ܣܵܒܵܒ ܒܪܝܼܬܵܐ ܝ݇ܘܲܚ ܕܝܼܹܗ ܕܦܸܫܠܲܢ ܒܸܪܝܹܐ ܒܝܼܫܘܿܥ ܡܫܝܼܚܵܐ ܩܵܐ ܦܘܼܠܚܵܢܹ̈ܐ ܛܵܒܼܹ̈ܐ* ܐܵܢܝܼ ܕܡ̣ܢ ܩܵܕ݇ܡܵܝܬܵܐ ܗܘܼܕܸܪܹܗ ܐܲܠܵܗܵܐ ܒܚܵܕܪܲܚ ܒܝܼܲܝܗܝ* ܒܘܼܬ ܕܐܵܗܵܐ؛ ܗܵܘܝܼܬܘܿܢ ܒܸܕܟܼܵܪܵܐ؛ ܕܐܲܚܬܘܿܢ ܛܵܝܸܦܹ̈ܐ ܡ̣ܢ ܩܵܕ݇ܡܵܝܬܵܐ ܕܒܸܣܪܵܐ ܝ݇ܬܘܿܢ ܗ݇ܘ̣ܵܘ؛ ܘܦܵܝܫܝܼܬܘܿܢ ܗ݇ܘ̣ܵܘ ܩܸܪܝܸܐ ܥܘܼܪܠܘܼܬܵܐ* ܡ̣ܢ ܗ̇ܝ ܕܦܝܵܫܵܐ ܝ݇ܠܵܗ̇ ܩܪܝܼܬܵܐ ܓܙܘܼܪܬܵܐ؛ ܘܝܼܠܵܗ̇ ܦܘܼܠܚܵܢܵܐ ܕܐܝܼܕܵܬܹ̈ܐ ܒܒܸܣܪܵܐ* ܘܒܗ̇ܝ ܥܕܵܢܵܐ ܕܠܵܐ ܡܫܝܼܚܵܐ ܝ݇ܬܘܿܢ ܗ݇ܘ̣ܵܘ ܘܢܘܼܟܼܪܵܝܸܐ ܡ̣ܢ ܕܘܼܒܵܪܵܐ ܕܝܼܣܪܵܝܹܠ؛ ܘܩܲܪ̈ܝܼܒܵܝܸܐ ܠܕܝܵܬܹܩܹܐ ܕܩܵܘܠܵܐ ܘܕܠܵܐ ܗܹܒܼܝܼ ܝ݇ܬܘܿܢ ܗ݇ܘ̣ܵܘ ܘܕܠܵܐ ܐܲܠܵܗܵܐ ܓܵܘ ܕܘܼܢܝܸܐ* ܐܝܼܢܵܐ ܐܵܕܝܼܵܐ ܒܝܼܫܘܿܥ ܡܫܝܼܚܵܐ ܝ݇ܬܘܿܢ ܕܡ̣ܢ ܩܵܕ݇ܡܵܝܬܵܐ ܪܸܚܩܵܐ؛ ܘܐܵܕܝܼܵܐ ܗܘܹܐܠܵܘܟܼܘܿܢ ܩܘܼܪܒܵܐ* ܒܕܸܡܹܗ ܕܡܫܝܼܚܵܐ. ܣܵܒܵܒ ܗ̇ܘ ܝܼܠܹܗ ܫܲܝܢܲܢ؛ ܗ̇ܘ ܕܥܵܒܼܸܕܠܹܗ ܠܬܸܪܘܲܝܗܝ ܚܲܕ݇. ܘܣܬܸܪܹܗ ܠܣܝܵܓܼܵܐ ܕܟܸܠܝܵܐ ܗ݇ܘ̣ܵܐ ܒܹܝܦܲܠܓܵܐ* ܘܕܸܫ̰ܡܸܢܵܝܘܼܬܵܐ ܒܒܸܣܪܹܗ؛ ܘܢܵܡܘܿܣܵܐ ܕܦܘܼܩܵܕܹ̈ܐ ܒܦܘܼܩܕܵܢ̈ܘܼܗܝ ܒܘܼܛܸܠܹܗ. ܕܠܬܸܪܘܲܝܗܝ ܒܵܪܹܐ ܒܩܢܘܿܡܹܗ ܠܚܲܕ݇ ܒܲܪܢܵܫܵܐ ܚܲܕ݇ܬܵܐ ܘܥܒܼܸܕܠܹܗ ܫܲܝܢܵܐ* ܘܣܘܼܙܓܸܪܹܗ ܠܬܸܪܘܲܝܗܝ ܒܚܲܕ݇ ܦܲܓܼܪܵܐ ܥܲܡ ܐܲܠܵܗܵܐ. ܘܒܙܩܝܼܦܹܗ ܩܛܸܠܹܗ ܠܕܸܫܡܸܢ* ܘܐ݇ܬܹܐܠܹܗ ܡܘܼܫܚܸܕܠܹܗ ܫܠܵܡܵܐ ܐܸܠܵܘܟܼܘܿܢ؛ ܐܵܢܝܼ ܕܝܼܢܵܐ ܪܸܚܩܵܐ ܘܐܵܢܝܼ ܕܝܼܢܵܐ ܩܘܼܪܒܵܐ* ܣܵܒܵܒ ܕܒܝܼܹܗ ܗܘܹܐܠܵܗ̇ ܩܘܼܪܒܵܝܘܼܬܵܐ ܠܬܸܪܘܲܝܢ ܒܚܲܕ݇ ܪܘܼܚܵܐ ܠܟܸܣ ܒܵܒܵܐ* ܡܐܵܕܝܼܵܐ ܠܹܐ ܝ݇ܬܘܿܢ ܢܘܼܟܼܪ̈ܵܝܹܐ؛ ܐܸܠܵܐ ܒܢܘܼܢܹ̈ܐ ܕܡܕܝܼܢ݇ܬܵܐ ܕܩܲܕܝܼܫܹ̈ܐ ܘܒܢܘܼܢܹ̈ܐ ܕܒܲܝܬܵܐ. ܕܐܲܠܵܗܵܐ* ܘܦܸܫܠܵܘܟܼܘܿܢ ܒܸܢܝܸܐ ܥܲܠ ܒܸܢܝܲܬ ܕܫܠܝܼܚܹ̈ܐ ܘܢܒܼܝܼܹ̈ܐ؛ ܘܗ̇ܘ ܗܘܹܐܠܹܗ ܪܹܫܵܐ ܕܩܸܪܢܝܼܬܵܐ ܕܒܸܢܝܵܢܵܐ ܝܼܫܘܿܥ ܡܫܝܼܚܵܐ* ܘܒܝܼܹܗ ܦܝܵܫܵܐ ܝ݇ܠܹܗ ܡܪܘܼܟܒܼܵܐ ܟܠܹܗ ܒܸܢܝܵܢܵܐ ܘܓܲܪܘܘܼܣܹܐ ܠܗܲܝܟܠܵܐ ܩܲܕܝܼܫܵܐ ܒܡܵܪܝܵܐ* ܟܲܕ ܐܘܼܦ ܐܲܚܬܘܿܢ ܒܝܼܹܗ ܦܝܵܫܵܐ ܝ݇ܬܘܿܢ ܒܸܢܝܸܐ ܠܡܲܥܡܪܵܐ ܕܐܲܠܵܗܵܐ ܒܪܘܼܚܵܐ*
♱♱♱♱♱♱♱♱♱
ܚܲܕܼܒܫܲܒܵܐ ܕܐܸܫܬܵܐ ܕܲܩܝܵܡܬܵܐ
ܝܘܚܢܢ ܝܙ: 1 ‐ ܫܘܠܡܐ
ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ ܟܪܘܙܘܬܼܐ ܕܝܘܚܢܢ
♰ ܒܵܬ݇ܪ ܕܐܲܢܹܐ ܡܘܼܪܸܡܠܹܗ ܝܑܼܫܘܿܥ ܥܲܝ̈ܢܘܼܗܝ ܠܫܡܲܝܵܐ ܘܐ݇ܡܸܪܹܗ: ܒܵܒܝܼ: ܐ݇ܬܹܐܠܵܗ̇ ܣܵܥܵܬ. ܫܵܒܸܚ ܒܪܘܿܢܘܼܟܼ ܕܒܪܘܿܢܘܼܟܼ ܫܵܒܸܚܠܘܼܟܼ. ܕܲܐܟܼܝܼ ܕܝܘܼܗ݇ܒܼܸܠܘܼܟܼ ܐܸܠܹܗ ܫܘܼܠܛܵܢܵܐ ܥܲܠ ܟܠ ܒܸܣܪܵܐ. ܕܟܠ ܡܸܢܕܝܼ ܕܝܘܼܗ݇ܒܼܸܠܘܼܟܼ ܐܸܠܹܗ، ܝܲܗ݇ܒܼܸܠܹܗ ܚܲܝܹ̈ܐ ܕܠܥܵܠܲܡ. ܐܝܼܢܵܐ ܐܲܢܹܐ ܝܢܵܐ ܚܲܝܹ̈ܐ ܕܠܥܵܠܲܡ. ܕܝܲܕܥܝܼܠܘܼܟܼ ܕܐܲܢ݇ܬ ܝܼܘܸܬ ܐܲܠܵܗܵܐ ܕܫܪܵܪܵܐ ܒܲܠܚܘܼܕܘܼܟ. ܘܡ̇ܢ ܕܫܘܼܕܸܪܘܼܟܼ ܝܑܼܫܘܿܥ ܡܫܝܼܚܵܐ. ܐܵܢܵܐ ܩܲܡ ܫܲܒܚܸܢܘܼܟܼ ܒܐܲܪܥܵܐ. ܥܒܼܵܕܵܐ ܗ̇ܘ ܕܝܘܼܗ݇ܒܼܸܠܘܼܟܼ ܐܸܠܝܼ ܕܥܲܒܼܕܸܢ ܬܘܼܡܸܡܠܝܼ. ܘܐܵܕܝܼܵܐ ܫܵܒܸܚܠܝܼ ܐܲܢ݇ܬ ܒܵܒܝܼ ܠܘܵܬܘܼܟܼ، ܒܗ̇ܘ ܫܘܼܒܼܚܵܐ ܕܐܝܼܬ ܗ݇ܘܵܐ ܠܝܼ ܠܘܵܬܘܼܟܼ ܡ̣ܢ ܩܵܕ݇ܡ ܕܗܵܘܹܐ ܗ݇ܘܵܐ ܥܵܠܡܵܐ. ܡܘܼܕܸܥܠܝܼ ܫܸܡܘܼܟܼ ܠܒܢܲܝ̈ܢܵܫܵܐ: ܐܵܢܝܼ ܕܝܘܼܗ݇ܒܼܸܠܘܼܟܼ ܐܸܠܝܼ ܡ̣ܢ ܥܵܠܡܵܐ. ܕܝܼܠَܘܼܟܼ ܝܼܗ݇ܘܵܘ، ܘܐܸܠܝܼ ܝܘܼܗ݇ܒܼܲܝܠܘܼܟܼ ܘܢܛܸܪܗ݇ܘܿܢ ܗܹܡܸܙܡܵܢܘܼܟܼ. ܐܵܕܝܼܵܐ ܝܕܸܥܠܝܼ ܕܟܠ ܡܸܢܕܝܼ ܕܝܘܼܗ݇ܒܼܸܠܘܼܟܼ ܐܸܠܝܼ ܡ̣ܢ ܠܘܵܬܘܼܟܼ ܝܼܠܹܗ. ܕܗܹܡܸܙܡܵܢܹ̈ܐ ܕܝܘܼܗܒܼܸܠܘܼܟܼ ܐܸܠܝܼ. ܝܘܼܗ݇ܒܼܸܲܝܠܝܼ ܐܸܠܲܝܗܝ. ܘܐܵܢܝܼ ܩܘܼܒܸܠܗ݇ܘܿܢ ܘܝܕܸܥܠܗ݇ܘܿܢ ܫܲܪܝܼܪܵܐܝܼܬ ܕܡ̣ܢ ܠܘܵܬܘܼܟܼ ܦܠܸܛܠܝܼ. ܘܗܘܼܡܸܢܗ݇ܘܿܢ ܕܐܲܢ݇ܬ ܫܘܼܕܪܸܢܘܼܟܼ. ܘܐܵܢܵܐ ܒܘܼܬ ܕܝܼܵܠَܝܗܝ ܒܸܛܠܵܒܵܐ ܝܘܸܢ. ܠܹܐ ܗ݇ܘܵܐ ܒܘܼܬ ܥܵܠܡܵܐ ܒܸܛܠܵܒܵܐ ܝܘܸܢ. ܐܸܠܵܐ ܒܘܼܬ ܕܐܵܢܝܼ ܕܝܘܼܗ݇ܒܼܸܠܘܼܟܼ ܐܸܠܝܼ ܕܕܝܼܘܼܟܼ ܝܢܵܐ. ܘܟܠ ܡܸܢܕܝܼ ܕܝܼܠܹܗ ܕܝܼܠَܝܼ، ܕܝܼܠَܘܼܟܼ ܝܠܹܗ. ܘܕܝܼܘܼܟܼ ܕܝܼܠَܝܼ ܝܠܹܗ. ܘܦܝܵܫܵܐ ܝܘܸܢ ܡܫܘܼܒܚܵܐ ܒܝܼܵܝܗܝ. ܘܡ̣ܢ ܐܵܕܝܼܵܐ ܠܹܐ ܝܘܸܢ ܒܓܵܘ ܥܵܠܡܵܐ، ܘܐܲܢܹܐ ܓܵܘ ܥܵܠܡܵܐ ܝܢܵܐ. ܘܐܵܢܵܐ ܠܘܵܬܘܼܟܼ ܒܹܐܬܵܝܵܐ ܝܘܸܢ. ܒܵܒܵܐ ܩܲܕܝܼܫܵܐ. ܢܛܘܼܪܗ݇ܘܿܢ ܒܫܸܡܘܼܟܼ ܗ̇ܘ ܕܝܘܼܗ݇ܒܼܸܠܘܼܟܼ ܐܸܠܝܼ. ܕܗܵܘܝܼ ܚܲܕ݇ ܕܲܐܟܼܝܼ ܕܐܲܚܢܲܢ ܝܼܘܸܚ. ܟܲܕ ܥܲܡܵܝܗܝ ܗ݇ܘܹܐܠܝܼ ܓܵܘ ܥܵܠܡܵܐ، ܐܵܢܵܐ ܢܛܝܼܪܵܝܠܝܼ ܒܫܸܡܘܼܟܼ. ܠܐܵܢܝܼ ܕܝܘܼܗ݇ܒܼܸܠܘܼܟܼ ܐܸܠܝܼ ܢܛܸܪܝܼ. ܘܐ݇ܢܵܫܵܐ ܡܸܢܲܝܗܝ ܠܵܐ ܛܠܸܩܠܹܗ، ܐܸܠܵܐ ܒܪܘܿܢܹܗ ܕܐܲܒܼܕܵܢܵܐ ܕܦܵܐܸܫ ܬܘܼܡܸܡܵܐ ܟܬܵܒܼܵܐ. ܐܝܼܢܵܐ ܐܵܕܝܼܵܐ ܠܘܵܬܘܼܟ ܒܹܐܬܵܝܵܐ ܝܘܸܢ ܘܐܲܢܹܐ ܡܗܲܡܙܘܼܡܹܐ ܝܘܸܢ ܓܵܘ ܥܵܠܡܵܐ، ܕܗܵܘܝܵܐ ܚܲܕܘܼܬܝܼ ܟܵܡܝܼܠ ܒܝܼܵܝܗܝ. ܐܵܢܵܐ ܝܘܼܗ݇ܒܼܸܠܝܼ ܐܸܠܲܝܗܝ ܗܹܡܸܙܡܵܢܘܼܟܼ، ܘܥܵܠܡܵܐ ܣܸܢܝܵܝܠܹܗ. ܕܠܹܐ ܗ݇ܘܵܘ ܡ̣ܢ ܥܵܠܡܵܐ. ܕܲܐܟܼܝܼ ܕܐܵܢܵܐ ܠܵܐ ܗ݇ܘܹܐ ܠܝܼ ܡ̣ܢ ܥܵܠܡܵܐ. ܠܹܐ ܗ݇ܘܵܐ ܕܫܲܩܠܸܬܠܗ݇ܘܿܢ ܡ̣ܢ ܥܵܠܡܵܐ ܒܸܛܠܵܒܵܐ ܝܘܸܢ، ܐܸܠܵܐ ܕܢܲܛܪܸܬܠܗ݇ܘܿܢ ܡ̣ܢ ܒܝܼܫܵܐ. ܣܵܒܵܒ ܠܹܐ ܝܢܵܐ ܡ̣ܢ ܥܵܠܡܵܐ، ܕܵܐܟܼܝܼ ܕܐܵܢܵܐ ܠܹܐ ܝܘܸܢ ܡ̣ܢ ܥܵܠܡܵܐ. ܒܵܒܵܐ ܩܵܕܸܫܠܗ݇ܘܿܢ ܒܲܫܪܵܪܘܼܟܼ. ܕܗܹܡܸܙܡܵܢ ܕܝܼܠَܘܼܟܼ ܫܪܵܪܵܐ ܝܠܵܗ̇. ܕܲܐܟܼܝܼ ܕܐܸܠܝܼ ܫܘܼܕܸܪܘܼܟܼ ܠܥܵܠܡܵܐ. ܐܘܿܦ ܐܵܢܵܐ ܫܘܼܕܪܵܝܠܝܼ ܠܥܵܠܡܵܐ. ܒܘܼܬ ܕܝܼܵܠَܝܗܝ ܐܵܢܵܐ ܡܩܲܕܘܼܫܹܐ ܝܘܸܢ ܓܵܢܝܼ. ܕܗܵܘܝܼ ܐܘܼܦ ܐܵܢܝܼ ܡܩܘܼܕܫܹܐ ܒܲܫܪܵܪܵܐ. ܘܠܹܐ ܗ݇ܘܵܐ ܒܘܼܬ ܕܐܲܢܹܐ ܐܲܚܟ̰ܝܼ ܒܸܛܠܵܒܵܐ ܝܘܸܢ. ܐܸܠܵܐ ܐܘܿܦ ܒܘܼܬ ܐܲܝܢܝܼ ܕܡܗܲܝܡܢܝܼ ܒܝܼܝܼ ܒܗܲܡܙܲܡܬܲܝܗܝ، ܕܟܠܲܝܗܝ ܗܵܘܝܼ ܚܲܕ݇. ܕܲܐܟܼܝܼ ܕܐܲܢ݇ܬ ܒܵܒܝܼ ܒܝܼܝܼ ܝܘܸܬ ܘܐܵܢܵܐ ܒܝܼܘܼܟܼ. ܕܐܵܦ ܐܵܢܝܼ ܗܵܘܝܼ ܚܲܕ݇ ܒܝܼܵܢ. ܕܗܲܝܡܸܢ ܥܵܠܡܵܐ ܕܐܲܢ݇ܬ ܫܘܼܕܪܸܢܘܼܟܼ. ܘܐܵܢܵܐ ܫܘܼܒܼܚܵܐ ܕܝܘܼܗ݇ܒܼܸܠܘܼܟܼ ܐܸܠܝܼ، ܝܘܼܗ݇ܒܼܸܠܝܼ ܐܸܠܲܝܗܝ. ܕܗܵܘܝܼ ܚܲܕ݇ ܕܲܐܟܼܝܼ ܕܐܲܚܢܲܢ ܚܲܕ݇ ܝܼܘܲܚ. ܐܵܢܵܐ ܒܝܼܵܝܗܝ ܘܐܲܢ݇ܬ ܒܝܼܝܼ. ܕܗܵܘܝܼ ܓܡܝܼܪܹܐ ܠܚܲܕ݇. ܘܕܝܲܕܸܥ ܥܵܠܡܵܐ ܕܐܲܢ݇ܬ ܫܘܼܕܪܸܢܘܼܟܼ: ܘܕܡܘܼܚܸܒܝܼܠܘܼܟܼ ܕܲܐܟܼܝܼ ܕܐܘܿܦ ܐܸܠܝܼ ܡܘܼܚܸܒܠܘܼܟܼ. ܒܵܒܵܐ: ܐܵܢܝܼ ܕܝܘܼܗ݇ܒܼܸܠܘܼܟܼ ܐܸܠܝܼ، ܒܣܵܡܝܼ ܝܠܵܗ̇ ܕܕܘܼܟܬܵܐ ܕܐܝܼܘܸܢ: ܐܘܿܦ ܐܵܢܝܼ ܗܵܘܝܼ ܥܲܡܝܼ. ܕܗܵܘܝܼ ܒܸܚܙܵܝܵܐ ܫܘܼܒܼܚܵܐ ܕܝܼܠَܝܼ ܗ̇ܘ ܕܝܘܼܗ݇ܒܼܸܠܘܼܟܼ ܐܸܠܝܼ. ܕܡܘܼܚܸܒܸܢܘܼܟܼ ܡ̣ܢ ܩܵܕ݇ܡ ܒܸܢܝܲܬܹ̈ܗ ܕܥܵܠܡܵܐ. ܒܵܒܝܼ ܟܹܐܢܵܐ. ܘܥܵܠܡܵܐ ܠܵܐ ܩܲܡ ܝܲܕܸܥܠܘܼܟܼ. ܐܝܼܢܵܐ ܐܵܢܵܐ ܩܲܡ ܝܲܕܥܸܢܘܼܟܼ. ܘܐܵܢܝܼ ܝܕܸܥܠܗ݇ܘܿܢ ܕܐܲܢ݇ܬ ܫܘܼܕܪܸܢܘܼܟܼ. ܘܡܘܼܕܸܥܠܝܼ ܐܸܠܲܝܗܝ ܫܸܡܘܼܟܼ ܘܡܲܕܘܼܥܹܐ ܝܘܸܢ. ܕܚܘܼܒܵܐ ܗ̇ܘ ܕܡܘܼܚܸܒܠܘܼܟܼ ܐܸܠܝܼ ܗܵܘܹܐ ܒܝܼܵܝܗܝ. ܘܐܵܢܵܐ ܗܵܘܸܢ ܒܝܼܵܝܗܝ.
♱♱♱♱♱♱♱♱♱