ܚܲܕܼܒܫܲܒܵܐ ܕܐܸܫܬܵܐ ܕܨܵܘܡܵܐ

 

ܒܪܝܼܬܵܐ؛ ܝܛ؛ 1‐27

ܬܸܒ̣ܘ ܘܲܫܠܵܘ ܒܪܝܼܬܵܐ ܣܸܦܪܵܐ ܩܲܕܼܡܵܝܵܐ ܕܐܘܿܪܵܝܬܵܐ؛

ܐܲܚܲܝ̈ ܒܲܪܸܟ̣ܡܵܪܝ܀

 

ܘܐ݇ܬܹܐܠܗ݇ܘܿܢ ܬܪܹܝ ܡܲܠܲܐܟ̣ܹ̈ܐ ܠܣܕܘܿܡ ܒܪܲܡܫܵܐ؛ ܘܠܘܿܛ ܝ݇ܬܝܼܒ̣ܵܐ ܗ݇ܘܵܐ ܒܬܲܪܥܵܐ ܕܣܕܘܿܡ؛ ܘܚܸܙܝܲܝܗ‌ܝ ܠܹܗ ܠܘܿܛ ܘܩܸܡܠܹܗ ܠܩܵܕ݇ܡܵܝܘܼܬܵܝܗ‌ܝ ܘܣܓ̣ܸܕܠܹܗ ܥܲܠ ܦܵܬܹܗ ܥܲܠ ܐܲܪܥܵܐ.܀ ܘܐ݇ܡܸܪܹܗ؛ ܦܲܪܦܘܼܠܹܐ ܝ݇ܘܸܢ ܡܵܪ̈ܵܘܵܬܝܼ؛ ܥܒ̣ܘܿܪܘܿܢ ܠܒܲܝܬܵܐ ܕܪܹܓܵܘܟ̣ܘܿܢ ܫܪܹܐܡܘܿܢ ܘܚܲܠܸܠܗ݇ܘܿܢ ܐܲܩܠܵܬܵܘ̈ܟ̣ܘܿܢ؛ ܘܩܘܼܡܘܼܢ ܩܵܝܕܲܡܬܵܐ ܘܪ݇ܚܘܿܫܘܿܢ ܒܐܘܼܪܚܵܘܟ̣ܘܿܢ؛ ܘܐ݇ܡܸܪܗ݇ܘܿܢ ܠܵܐ؛ ܒܸܬ ܕܲܡܟ̣ܲܚ ܓܵܘ ܥܵܠܘܠܵܐ.܀ ܪܵܒܵܐ ܚܠܝܼܨܝܼܠܹܗ؛ ܘܦܬܸܠܗ݇ܘܿܢ ܠܟܸܣܠܹܗ ܘܥܒ̣ܸܪܗ݇ܘܿܢ ܠܒܲܝܬܹܗ؛ ܘܥܒ̣ܸܕܠܹܗ ܐܸܠܲܝܗ‌ܝ ܫܬܵܝܬܵܐ ܘܦܲܛܝܼܪܵܐ ܐ݇ܦܹܐܠܹܗ ܐܸܠܲܝܗ‌ܝ ܘܐ݇ܟ̣ܸܠܗ݇ܘܿܢ. ܘܗܵܠܵܐ ܠܹܐ ܗ݇ܘܵܘ ܕܡܝܼܟ̣ܹ̈ܐ؛ ܐ݇ܢܵܫܹ̈ܐ ܕܡܵܬܵܐ ܕܣܕܘܿܡ ܚܘܼܪܕܹܐܠܗ݇ܘܿܢ ܠܒܲܝܬܵܐ؛ ܡ̣ܢ ܓ̰ܘܲܢܩܹ̈ܐ ܗܲܠ ܣܵܒ̣ܹ̈ܐ؛ ܘܟܠܹܗ ܛܵܝܸܦܵܐ ܡ̣ܢ ܩܝܼܵܣܹܗ.܀ ܘܩܪܹܐܠܗ݇ܘܿܢ ܠܠܘܿܛ ܘܐ݇ܡܸܪܗ݇ܘܿܢ ܐܸܠܹܗ؛ ܐܲܝܟܵܐ ܝ݇ܢܵܐ ܐܵܢܝܼ ܐ݇ܢܵܫܹ̈ܐ ܕܐ݇ܬܹܐܠܗ݇ܘܿܢ ܠܟܸܣܠܘܼܟܼ ܒܠܲܝܠܹܐ؟ ܦܲܠܸܛܠܗ݇ܘܿܢ ܐܸܠܲܢ ܘܝܵܕܥܲܚܠܗ݇ܘܿܢ.܀ ܘܦܠܸܛܠܹܗ ܠܘܿܛ ܠܟܸܣܠܲܝܗ‌ܝ ܠܒ̣ܲܕܲܪ؛ ܘܬܲܪܥܵܐ ܥܟ̰ܸܡܠܹܗ ܒܵܬ݇ܪܹܗ.܀ ܘܐ݇ܡܸܪܹܗ ܐܸܠܲܝܗ‌ܝ ܠܘܿܛ؛ ܠܵܐ ܥܵܒ̣ܕܝܼܬܘܿܢ ܣܪܝܼܬܵܐ ܐܵܚܘܿܢܘܵܬ̈ܝܼ. ܘܐ݇ܡܸܪܗ݇ܘܿܢ ܪܚܘܿܩ ܡܲܐܟ̣ܵܐ؛ ܐ݇ܡܸܪܗ݇ܘܿܢ؛ ܐ݇ܬܹܐܠܹܗ ܚܲܕ݇ ܠܸܬܝܵܒ̣ܵܐ ܥܲܡܲܢ ܘܗܵܐ ܒܸܕܝܵܢܲܢ ܝܼܠܹܗ ܕܝܼܘܵܢܹ̈ܐ؛ ܘܐܵܕܝܼܵܐ ܒܸܬ ܥܵܒ̣ܕܲܚ ܣܪܝܼܬܵܐ ܥܲܠܘܼܟܼ ܒܘܼܫ ܡ̣ܢ ܕܐܵܢܝܼ؛ ܪܵܒܵܐ ܕܪܸܫܠܹܗ ܥܲܡܲܝܗ‌ܝ ܠܘܿܛ؛ ܘܩܘܼܪܒܸܢܗ݇ܘܿܢ ܠܸܫܡܵܛܵܐ ܬܲܪܥܵܐ.܀ ܘܦܘܼܫܸܛܠܗ݇ܘܿܢ ܐܵܢܝܼ ܬܪܹܝ ܐ݇ܢܵܫܹ̈ܐ ܐܝܼܕܵܬܲܝ̈ܗ‌ܝ ܘܡܘܼܥܒ̣ܸܪܗ݇ܘܿܢ ܠܠܘܿܛ ܠܟܸܣܠܲܝܗ‌ܝ ܠܒܲܝܬܵܐ؛ ܘܬܲܪܥܵܐ ܕܒ̣ܸܪܗ݇ܘܿܢ؛ ܘܐ݇ܢܵܫܹ̈ܐ ܕܓܵܘ ܬܲܪܥܵܐ ܕܒܲܝܬܵܐ ܦܸܫܠܗ݇ܘܿܢ ܡܸܚܝܹ̈ܐ ܒܣܸܡܝܘܼܬܵܐ ܡ̣ܢ ܙܥܘܿܪܵܐ ܗܲܠ ܓܘܼܪܵܐ؛ ܘܓ̰ܗܹܠܗ݇ܘܿܢ ܠܡܵܫ݇ܟ̰ܘܿܚܹܐ ܬܲܪܥܵܐ.܀ ܘܐ݇ܡܸܪܗ݇ܘܿܢ ܐܵܢܝܼ ܐ݇ܢܵܫܹ̈ܐ ܩܵܐ ܠܘܿܛ؛ ܡܘܼܕܝܼ ܒܸܥܒ̣ܵܕܵܐ ܝ݇ܘܸܬ̇ ܠܲܐܟ̣ܵܐ؟ ܚܸܬܢܵܘܵܬ̈ܘܼܟܼ ܘܒܢܘܿܢ̈ܘܼܟܼ ܘܒܢܵܬ̈ܘܼܟܼ ܘܟܠ ܕܐܝܼܬܠܘܼܟܼ ܓܵܘ ܡܕܝܼܢ݇ܬܵܐ ܦܲܠܸܛܠܗ݇ܘܿܢ ܡ̣ܢ ܕܐܵܗܵܐ ܐܲܬܪܵܐ؛ ܣܵܒܵܒ ܒܸܬ ܡܲܚܪܸܒ̣ܲܚܠܹܗ ܐܵܗܵܐ ܐܲܬܪܵܐ؛ ܐ݇ܣܸܩܠܵܗ̇ ܡܲܩܘܲܚܬܵܝܗ‌ܝ ܩܵܕ݇ܡ ܡܵܪܝܵܐ؛ ܘܩܲܡ ܫܲܕܸܪܲܢ ܡܵܪܝܵܐ ܩܵܐ ܡܲܚܪܲܒ̣ܬܹܗ.܀ ܘܦܠܸܛܠܹܗ ܠܘܿܛ ܗܘܼܡܙܸܡܠܹܗ ܥܲܡ ܚܸܬܢܵܘܵܬ̈ܘܼܗ‌ܝ ܫܵܩܠܵܢܹ̈ܐ ܕܒܢܵܬ̈ܘܼܗ‌ܝ؛ ܘܐ݇ܡܸܪܹܗ ܐܸܠܲܝܗ‌ܝ؛ ܩܘܼܡܘܿܢ ܦܠܘܿܛܘܿܢ ܡ̣ܢ ܕܐܵܗܵܐ ܐܲܬܪܵܐ ܣܵܒܵܒ ܒܸܬ ܡܲܚܪܸܒ̣ܠܹܗ ܡܵܪܝܵܐ.܀ ܘܗ݇ܘܹܐܠܹܗ ܐܲܝܟܼ ܡܲܣܚܵܪܵܐ ܒܥܲܝܢܵܐ ܕܚܸܬܢܵܘܵܬܹ̈ܗ.܀ ܟܲܕ ܗ݇ܘܹܐܠܵܗ̇ ܩܵܝܕܲܡܬܵܐ ܡܘܼܠܝܸܨܠܗ݇ܘܿܢ ܡܲܠܲܐܟ̣ܹ̈ܐ ܠܠܘܿܛ؛ ܘܐܵܡܪܝܼ ܐܸܠܹܗ ܩܘܼܡ ܠܵܒܸܠ ܒܲܟ̣ܬܘܼܟܼ ܘܬܲܪܬܹܝ ܒܢܵܬ̈ܘܼܟܼ ܕܝܑܼܢܵܐ ܦܝܵܫܵܐ. ܕܠܵܐ ܦܵܝܫܸܬ̇ ܡܸܚܝܵܐ ܒܚܛܝܼܵܬܹ̈ܐ ܕܡܕܝܼܢ݇ܬܵܐ.܀ ܘܥܘܼܪܩܸܠܹܗ ܠܘܿܛ؛ ܘܕܒ̣ܸܩܠܗ݇ܘܿܢ ܡܲܠܲܐܟ̣ܹ̈ܐ ܒܐܝܼܕܹܗ ܘܒܐܝܼܕܵܐ ܕܒܲܟ̣ܬܹܗ ܘܒܐܝܼܕܵܐ ܕܬܸܪ̈ܘܲܝܗ‌ܝ ܒܢܵܬܹܗ ܣܵܒܵܒ ܕܪܘܼܚܸܡܠܹܗ ܡܵܪܝܵܐ ܥܲܠܹܗ؛ ܘܦܘܼܠܸܛܠܗ݇ܘܿܢ ܠܒ̣ܲܕܲܪ ܡ̣ܢ ܡܕܝܼܢ݇ܬܵܐ؛ ܘܐ݇ܡܸܪܗ݇ܘܿܢ ܐܸܠܹܗ؛ ܡܚܵܠܸܨ ܓܵܢܘܼܟܼ؛ ܘܠܵܐ ܕܲܝܪܸܬ̇ ܠܵܒܵܬ݇ܪܘܼܟܼ؛ ܘܠܵܐ ܟܵܠܸܬ̇ ܒܟܠܵܗ̇ ܕܸܫܬܵܐ؛ ܥܪܘܿܩ ܠܛܘܼܪܵܐ ܕܠܵܐ ܬܲܠܩܸܬ̇.܀ ܘܐ݇ܡܸܪܹܗ ܐܸܠܲܝܗ‌ܝ ܠܘܿܛ ܦܲܪܦܘܼܠܹܐ ܝ݇ܘܸܢ ܒܝܼܵܘܟ̣ܘܿܢ ܡܵܪ̈ܵܘܵܬܝܼ.܀ ܗܵܐ ܡܘܼܫ݇ܟ̰ܸܚܠܹܗ ܪܹܓܘܼܟܼ ܪ̈ܲܚܡܹܐ ܒܥܲܝܢܘܼܟܼ؛ ܘܓܘܼܪܬܵܐ ܝ݇ܠܵܗ̇ ܫܵܦܵܩܲܬ ܕܥܒ̣ܸܕܠܘܼܟܼ ܥܲܡܝܼ ܠܡܲܚܘܼܝܹܐ ܓܵܢܝܼ؛ ܘܐܵܢܵܐ ܠܹܐ ܡܵܨܸܢ ܥܵܪܩܸܢ ܠܛܘܼܪܵܐ؛ ܕܠܵܐ ܗܵܘܝܵܐ ܕܡܵܛܝܵܐ ܠܝܼ ܒܝܼܫܬܵܐ ܘܡܵܝܬܸܢ؛ ܐܵܗܵܐ ܡܵܬܵܐ ܩܘܼܪܒܵܐ ܝ݇ܠܵܗ̇ ܥܵܪܩܸܢ ܠܬܵܡܵܐ؛ ܘܚܵܠܨܸܢ ܬܵܡܵܐ؛ ܚܲܕ݇ ܡܵܬܵܐ ܙܥܘܿܪܬܵܐ ܝ݇ܠܵܗ̇ ܘܒܸܬ ܚܲܝܵܐ ܓܵܢܝܼ؛ ܘܐ݇ܡܸܪܹܗ ܐܸܠܹܗ؛ ܒܘܼܬ ܚܵܬܸܪ ܕܝܼܘܼܟܼ ܐܘܼܦ ܒܐܵܗܵܐ ܡܸܢܕܝܼ؛ ܠܹܐ ܡܲܚܪܸܒ̣ܸܢ ܗ̇‌ܝ ܡܵܬܵܐ ܕܐ݇ܡܸܪܘܼܟܼ؛ ܓ̰ܲܠܕܹܐ ܥܪܘܿܩ ܠܬܵܡܵܐ؛ ܣܵܒܵܒ ܕܠܹܐ ܡܵܨܸܢ ܕܥܵܒ̣ܕܸܢ ܗܝܼܟ̰ ܡܸܢܕܝܼ ܗܲܠ ܕܥܵܒ̣ܪܸܬ̇ ܠܬܵܡܵܐ؛ ܒܘܼܬ ܕܐܵܗܵܐ؛ ܩܪܹܐܠܹܗ ܫܸܡܵܐ ܕܗ̇‌ܝ ܡܵܬܵܐ ܨܵܥܲܪ܀ ܘܫܸܡܫܵܐ ܦܠܸܛܠܹܗ ܥܲܠ ܐܲܪܥܵܐ؛ ܘܠܘܿܛ ܥܒ̣ܸܪܹܗ ܠܨܵܥܲܪ܀ ܘܡܵܪܝܵܐ ܡܘܼܨܠܹܐܠܹܗ ܥܲܠ ܣܕܘܿܡ ܘܥܲܠ ܥܵܡܘܿܪܵܐ؛ ܟܸܒܪܝܼܬ ܘܢܘܼܪܵܐ ܡ̣ܢ ܩܵܕ݇ܡ ܡܵܪܝܵܐ ܡ̣ܢ ܫܡܲܝܵܐ܀ ܘܡܘܼܚܪܸܒ̣ܠܹܗ ܠܐܲܢܹܐ ܡܵܬܘܵܬܹ̈ܐ ܘܠܟܠܵܗ̇ ܕܸܫܬܵܐ ܘܠܟܠܲܝܗ‌ܝ ܥܵܡܪ̈ܵܢܹܐ ܕܐܲܪܥܵܐ؛ ܘܐܘܼܦ ܠܓܸܠܵܐ ܕܐܲܪܥܵܐ܀ ܘܒܲܟ̣ܬܹܗ ܕܠܘܿܛ ܦܬܸܠܵܗ̇ ܒܵܠܵܗ̇ ܠܵܒܵܬ݇ܪܵܐ؛ ܘܗ݇ܘܹܐܠܵܗ̇ ܩܵܝܸܡܬܵܐ ܕܡܸܠܚܵܐ.܀܆

 

ܚܲܒ̣ܪܹܗ

 

ܝܼܫܘܿܥ ܒܲܪܢܘܿܢ؛ ܟܐ؛ 43‐ܟܒ؛ 10

ܫܠܵܘ ܟܬ̣ܵܒ̣ܵܐ ܕܝܼܫܘܿܥ ܒܲܪܢܘܿܢ؛ ܐܲܚܲܝ̈ ܒܲܪܸܟ̣ܡܵܪܝ܀

 

ܘܝܘܼܗ݇ܒ̣ܸܠܹܗ ܡܵܪܝܵܐ ܠܝܼܣܪܵܝܹܠ ܟܠܵܗ̇ ܐܲܪܥܵܐ ܕܝ݇ܡܹܐܠܹܗ ܠܝܼܵܗ݇ܒ̣ܵܐ ܩܵܐ ܒܵܒܵܘܵܬܲܝ̈ܗ‌ܝ؛ ܘܗ݇ܘܹܐܠܵܗ̇ ܝܵܪܬܘܼܬܵܐ ܩܵܬܲܝܗ‌ܝ ܘܝ݇ܬܸܒ̣ܠܗ݇ܘܿܢ ܓܵܘܵܗ̇.܀ ܘܡܘܼܢܝܸܚܠܹܗ ܐܸܠܲܝܗ‌ܝ ܡܵܪܝܵܐ ܡ̣ܢ ܟܠܲܝܗ‌ܝ ܚܵܕܸܪ̈ܘܵܢܲܝܗ‌ܝ؛ ܐܲܝܟܼ ܕܝ݇ܡܹܐܠܹܗ ܠܒܵܒܵܘܵܬܲܝ̈ܗ‌ܝ܀ ܘܗܝܼܟ̰ ܐ݇ܢܵܫܵܐ ܡ̣ܢ ܕܸܫ̰ܡܸܢܲܝ̈ܗ‌ܝ ܠܵܐ ܡܨܹܐܠܹܗ ܕܟܵܠܹܐ ܕܲܪܩܘܼܒ̣ܠܲܝܗ‌ܝ؛ ܐܸܠܵܐ ܣܘܼܦܹܐܠܹܗ ܡܵܪܝܵܐ ܠܟܠܲܝܗ‌ܝ ܕܸܫ̰ܡܸܢܲܝ̈ܗ‌ܝ ܒܐܝܼܕ̈ܵܬܲܝܗ‌ܝ܀ ܐܘܼܦ ܚܕܵܐ ܡ̣ܢ ܗܹܡܸܙܡܵܢܹ̈ܐ ܛܵܒ̣ܹ̈ܐ ܕܐ݇ܡܸܪܹܗ ܡܵܪܝܵܐ ܩܵܐ ܒܢܲܝ̈ ܝܼܣܪܵܝܹܠ ܠܵܐ ܒܛܸܠܗ̇؛ ܐܸܠܵܐ ܟܠܲܝܗ‌ܝ ܐ݇ܬܹܐܠܗ݇ܘܿܢ ܠܐܝܼܬܘܼܬܵܐ܀ ܗܵܝܓܵܗ̇ ܩܪܹܐܠܹܗ ܝܼܫܘܿܥ ܠܒܢܲܝ̈ ܪܘܼܒ̣ܹܝܠ ܘܒܢܲܝ̈ ܓܵܕ؛ ܘܦܸܠܓܹܗ ܕܫܲܒ̣ܛܵܐ ܕܡܢܲܫܹܐ܀ ܘܐ݇ܡܸܪܹܗ ܐܸܠܲܝܗ‌ܝ؛ ܐܲܚܬܘܿܢ ܢܛܸܪܵܘܟ̣ܘܿܢ ܟܠ ܡܸܢܕܝܼ ܕܐ݇ܡܸܪܹܗ ܐܸܠܵܘܟ̣ܘܿܢ ܡܘܼܫܹܐ ܪܹܓܹܗ ܕܡܵܪܝܵܐ؛ ܘܡܘܼܨܝܸܬ ܠܵܘܟ̣ܘܿܢ ܐܸܠܝܼ ܠܟܠ ܡܸܢܕܝܼ ܕܦܩܸܕܠܝܼ ܐܸܠܵܘܟ̣ܘܿܢ܀ ܘܠܵܐ ܫܒ̣ܸܩܠܵܘܟ̣ܘܿܢ ܠܐܵܚܘܿܢ̈ܘܵܬܵܘܟ̣ܘܿܢ ܩܵܐ ܪܵܒܵܐ ܝܵܘܡܵܢܹ̈ܐ ܘܗܲܠ ܐܸܕܝܘܿܡ݇ ܝܵܘܡܵܐ؛ ܘܢܛܸܪܵܘܟ̣ܘܿܢ ܦܘܼܩܕܵܢܹ̈ܐ ܕܡܵܪܝܵܐ ܐܲܠܵܗܵܘܟ̣ܘܿܢ܀ ܘܐܵܕܝܼܵܐ ܗܵܐ ܡܘܼܢܝܸܚܠܹܗ ܡܵܪܝܵܐ ܐܲܠܵܗܵܐ ܠܐܵܚܘܿܢ̈ܘܵܬܵܘܟ̣ܘܿܢ ܐܲܝܟܼ ܕܐ݇ܡܸܪܹܗ ܐܸܠܲܝܗ‌ܝ؛ ܡܐܵܕܝܼܵܐ ܕܘܼܪܘܿܢ ܘܪ݇ܚܘܿܫܘܿܢ ܠܡܵܬܘܵܬܵܘ̈ܟ̣ܘܿܢ ܘܠܐܲܪܥܵܐ ܕܝܵܪܬܘܼܬܵܘܟ̣ܘܿܢ؛ ܕܝܗ݇ܘܼܒ̣ܸܠܹܗ ܐܸܠܵܘܟ̣ܘܿܢ ܡܘܼܫܹܐ ܪܹܓܹܗ ܕܡܵܪܝܵܐ ܒܥܸܒ̣ܪܵܐ ܕܝܘܿܪܕܢܵܢ ܡ̣ܢ ܡܲܕܢܚܵܐ܀ ܐܲܚܟ̰ܝܼ ܗܵܘܝܼܬܘܿܢ ܗܸܫܝܲܪ ܪܵܒܵܐ ܘܢܵܛܪܝܼܬܘܿܢ ܦܘܼܩܕܵܢܹ̈ܐ ܘܢܵܡܘܿܣܹ̈ܐ ܕܦܩܸܕܠܹܗ ܐܸܠܵܘܟ̣ܘܿܢ ܡܘܼܫܹܐ ܪܹܓܹܗ ܕܡܵܪܝܵܐ؛ ܠܡܲܚܘܼܒܹܐ ܠܡܵܪܝܵܐ ܐܲܠܵܗܵܘܟ̣ܘܿܢ ܘܠܸܢܛܵܪܵܐ ܦܘܼܩܕܵܢ̈ܘܼܗ‌ܝ ܘܠܸܬܒܲܥܝܵܐ ܐܸܠܹܗ؛ ܘܠܸܦܠܵܚܵܐ ܐܸܠܹܗ؛ ܒܟܠܹܗ ܠܸܒܵܘܟ̣ܘܿܢ؛ ܘܒܟܠܵܗ̇ ܓܵܢܵܘܟ̣ܘܿܢ܀ ܘܒܘܼܪܟ̣ܝܼܠܹܗ ܝܼܫܘܿܥ؛ ܘܫܘܼܕܪܝܼܠܹܗ ܘܐ݇ܙܸܠܗ݇ܘܿܢ ܠܡܵܬܘܵܬܲܝ̈ܗ‌ܝ܀ ܘܠܦܲܠܓܹܗ ܕܫܲܒ̣ܛܵܐ ܕܡܢܲܫܹܐ ܝܘܼܗ݇ܒ̣ܸܠܹܗ ܡܘܼܫܹܐ ܝܵܪܬܘܼܬܵܐ ܒܡܲܬܢܝܼܢ؛ ܘܩܵܐ ܕܗ̇ܘ ܦܲܠܓܹܗ ܐ݇ܚܹܪ݇ܢܵܐ ܝܘܼܗ݇ܒ̣ܸܠܹܗ ܝܼܫܘܿܥ ܥܲܡ ܐܵܚܘܿܢ̈ܘܵܬܲܝܗ‌ܝ ܒܥܸܒ̣ܪܵܐ ܕܝܘܿܪܕܢܵܢ ܡ̣ܢ ܡܲܥܪܒ̣ܵܐ؛ ܘܫܘܼܕܪܝܼܠܹܗ ܝܼܫܘܿܥ ܘܐ݇ܙܸܠܗ݇ܘܿܢ ܠܡܵܬܘܵܬܲܝ̈ܗ‌ܝ ܘܒܘܼܪܟ̣ܝܼܠܹܗ܀ ܘܐ݇ܡܸܪܹܗ ܐܸܠܲܝܗ‌ܝ؛ ܒܕܵܘܸܠܬܵܐ ܓܘܼܪܬܵܐ ܕܘܼܪܘܿܢ ܠܡܵܬܘܵܬܵܘ̈ܟ̣ܘܿܢ؛ ܘܠܐܲܪܥܵܐ ܕܝܵܪܬܘܼܬܵܘܟ̣ܘܿܢ ܒܩܸܢܝܵܢܵܐ ܪܵܒܵܐ ܓܘܼܪܵܐ ܒܣܹܐܡܵܐ ܒܕܲܗܒ̣ܵܐ؛ ܘܒܪܸܢܓ̰ ܘܦܲܪܙܠܵܐ؛ ܘܒܠܒ̣ܸܫܝܵܬܹ̈ܐ ܪܵܒܵܐ؛ ܘܦܲܠܹܓ݇ܡܘܿܢ ܣܠܵܒܵܐ ܕܕܸܫ̰ܡܸܢܵܘܟ̣ܘܿܢ ܥܲܡ ܐܵܚܘܿܢ̈ܘܵܬܵܘܟ̣ܘܿܢ܀ ܘܕܸܪܗ݇ܘܿܢ ܘܐ݇ܙܸܠܗ݇ܘܿܢ ܒܢܲܝ̈ ܪܘܼܒ̣ܹܝܠ ܘܒܢܲܝ̈ ܓܵܕ؛ ܘܦܲܠܓܹܗ ܕܫܲܒ̣ܛܵܐ ܕܡܢܲܫܹܐ؛ ܡ̣ܢ ܠܟܸܣ ܒܢܲܝ̈ ܝܼܣܪܵܝܹܠ؛ ܡ̣ܢ ܫܝܼܠܘܿ ܒܐܲܪܥܵܐ ܕܟܢܲܥܢ؛ ܠܹܐܙܵܠܵܐ ܠܐܲܪܥܵܐ ܕܓܸܠܥܵܕ؛ ܠܐܲܪܥܵܐ ܕܝܵܪܬܘܼܬܲܝܗ‌ܝ؛ ܐܲܝܟܼ ܗܹܡܸܙܡܵܢ ܕܦܘܼܡܹܗ ܕܡܵܪܝܵܐ ܒܐܝܼܕܵܐ ܕܡܘܼܫܹܐ.܀

 

♱♱♱♱♱♱♱♱♱

ܚܲܕܼܒܫܲܒܵܐ ܕܐܸܫܬܵܐ ܕܨܵܘܡܵܐ

ܘܕܘܼܟܼܪܵܢܵܐ ܝ݇ܠܹܗ ܕܡܵܪܝ ܡܝܼܟܼܵܐܹܝܠ ܚܲܒܼܪܵܐ ܕܡܲܠܲܐܟܹ̈ܐ.

ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ

ܕܲܠܘܵܬܼ ܪ̈ܗܘܿܡܵܝܹܐ ܐܲܚܲܝ̈ ܒܲܪܸܟܼܡܵܪܝ܀

 

ܐܝܼܢܵܐ ܐܲܢ݇ܬ ܩܵܡܘܿܕܝܼ ܒܸܕܝܵܢܵܐ ܝ݇ܘܸܬ ܠܐܵܚܘܿܢܘܼܟܼ؛ ܝܲܢ ܩܵܡܘܿܕܝܼ ܡܲܣܠܘܼܝܸܐ ܝ݇ܘܸܬ ܐܸܠܹܗ ܣܵܒܵܒ ܟܠܲܢ ܗܕܝܼܪܹܐ ܝ݇ܘܲܚ ܠܹܟܠܵܝܵܐ ܩܵܕ݇ܡ ܒܹܝܡ ܕܡܫܝܼܚܵܐ* ܐܲܝܟܼ ܕܝܼܠܹܗ ܟܬܝܼܒܼܵܐ ܕܚܲܝܵܐ ܝ݇ܘܸܢ ܒܹܐܡܵܪܵܐ ܝ݇ܠܹܗ ܡܵܪܝܵܐ؛ ܕܐܸܠܝܼ ܒܸܬ ܟܵܝܦܵܐ ܟܠ ܒܘܼܪܟܵܐ؛ ܘܐܸܠܝܼ ܒܸܬ ܡܵܘܕܸܐ ܟܠ ܠܸܫܵܢܵܐ* ܡܐܵܕܝܼ ܟܠ ܚܲܕ݇ ܡܸܢܲܢ ܓ̰ܘܼܘܵܒ ܡ̣ܢ ܓܸܒܵܐ ܕܓܵܢܹܗ ܒܸܬ ܝܵܗܒܼܸܠ ܩܵܐ ܐܲܠܵܗܵܐ* ܒܘܼܬ ܕܐܵܗܵܐ؛ ܠܵܐ ܕܵܝܢܲܚ ܚܲܕ݇ ܠܗ̇ܘ ܐ݇ܚܹܪ݇ܢܵܐ. ܐܸܠܵܐ ܐܵܗܵܐ ܒܘܼܫ ܙܵܘܕܵܐ ܕܘܼܢܘܼܢ. ܕܬܲܪܩܲܠܬܵܐ ܠܐܵܚܘܿܢܘܼܟܼ ܠܵܐ ܡܲܬܒܼܸܬ* ܣܵܒܵܒ ܒܝܼܕܲܥܝܵܐ ܝ݇ܘܸܢ ܘܒܵܠܲܕ ܝܼܘܸܢ ܒܡܵܪܝܵܐ ܝܼܫܘܿܥ ܕܡܸܢܕܝܼ ܠܵܐ ܕܸܟܼܝܵܐ ܡ̣ܢ ܠܟܸܣܠܹܗ ܠܲܝܬ. ܐܝܼܢܵܐ ܩܵܐ ܕܗ̇ܘ ܕܚܵܫܸܒܼ ܒܘܼܬ ܚܲܕ݇ ܡܸܢܕܝܼ ܠܵܐ ܕܸܟܼܝܵܐ؛ ܩܵܐ ܕܗ̇ܘ ܝܼܠܹܗ ܒܢܲܦ̮ܫܹܗ ܠܵܐ ܕܸܟܼܝܵܐ* ܐܝܼܢܵܐ ܐܸܢ ܒܣܵܒܵܒ ܕܡܹܐܟܼܘܼܠܬܵܐ ܡܲܦܫܘܼܡܹܐ ܝ݇ܘܸܬ ܠܐܵܚܘܿܢܘܼܟܼ. ܠܹܐ ܝ݇ܘܸܬ ܒܚܘܼܒܵܐ ܒܸܚܕܵܪܵܐ. ܠܵܐ ܬܵܠܩܸܬ ܒܡܹܐܟܼܘܼܠܬܘܼܟܼ ܠܗ̇ܘ ܕܒܘܼܬ ܕܝܼܹܗ ܡܸܬܠܹܗ ܡܫܝܼܚܵܐ* ܘܠܵܐ ܦܵܝܫܵܐ ܓܕܝܼܦܬܵܐ ܛܵܒܼܬܲܢ* ܣܵܒܵܒ ܡܲܠܟܘܼܬܹܗ ܕܐܲܠܵܗܵܐ ܠܹܐ ܝ݇ܠܵܗ̇ ܐ݇ܟܼܵܠܬܵܐ ܘܫܬܵܝܬܵܐ؛ ܐܸܠܵܐ ܟܹܐܢܘܼܬܵܐ ܘܫܠܵܡܵܐ؛ ܘܚܲܕܘܼܬܵܐ ܒܪܘܼܚܵܐ ܕܩܘܼܕܫܵܐ* ܣܵܒܵܒ ܡ̇ܢ ܕܒܐܲܢܹܐ ܥܵܒܼܸܕ ܚܸܠܡܲܬ ܩܵܐ ܡܫܝܼܚܵܐ ܟܹܐ ܫܵܦܸܪ ܠܐܲܠܵܗܵܐ. ܘܩܵܕ݇ܡ ܒܢܲܝ̈ܢܵܫܵܐ ܪܸܕܝܵܐ ܝ݇ܠܹܗ* ܐܵܕܝܼܵܐ ܒܵܬ̄ܪ ܫܠܵܡܵܐ ܪܵܚܛܲܚ؛ ܘܒܵܬ̄ܪ ܒܸܢܝܵܢܵܐ ܕܚܲܕ݇ ܕܗ̇ܘ ܐ݇ܚܹܪ݇ܢܵܐ* ܘܠܵܐ ܒܣܵܒܵܒ ܕܡܹܐܟܼܘܼܠܬܵܐ ܒܵܛܠܲܚ ܦܘܼܠܚܵܢܹ̈ܐ ܕܐܲܠܵܗܵܐ. ܣܵܒܵܒ ܟܠ ܡܸܢܕܝܼ ܕܸܟܼܝܵܐ ܝ݇ܠܹܗ. ܐܝܼܢܵܐ ܚܸܪܒܵܐ ܝ݇ܠܵܗ̇ ܠܒܲܪܢܵܫܵܐ ܕܒܬܲܪܩܲܠܬܵܐ ܐܵܟܼܸܠ* ܨܦܵܝ ܝܼܠܵܗ̇ ܕܠܵܐ ܐܵܟܼܠܲܚ ܒܸܣܪܵܐ ܘܠܵܐ ܫܵܬܲܚ ܚܲܡܪܵܐ. ܘܠܵܐ ܡܸܢܕܝܼ ܕܬܲܪܩܸܠ ܒܝܼـܹܗ ܐܵܚܘܿܢܲܢ* ܐܲܢ݇ܬ ܕܐܝܼܬ ܒܝܼܘܼܟܼ ܗܲܝܡܵܢܘܼܬܵܐ ܒܓܵܢܘܼܟܼ ܕܒܼܘܿܩܠܵܗ̇ ܩܵܕ݇ܡ ܐܲܠܵܗܵܐ. ܛܘܼܒܼܵܐ ܠܡ̇ܢ ܕܠܵܐ ܥܒܼܸܕܠܹܗ ܓܘܼܢܵܗܟܵܪ ܠܓܵܢܹܗ ܒܡܸܢܕܝܼ ܕܦܪܸܫܠܹܗ* ܣܵܒܵܒ ܗ̇ܘ ܕܗܵܘܹܐ ܕܘܼܒܵܪ ܘܐܵܟܼܸܠ؛ ܓܘܼܢܵܗܟܵܪ ܝܼܠܹܗ؛ ܣܵܒܵܒ ܕܠܹܐ ܗ݇ܘ̣ܵܐ ܒܗܲܝܡܵܢܘܼܬܵܐ. ܘܟܠ ܡܸܢܕܝܼ ܕܠܹܐ ܝ݇ܠܹܗ ܡ̣ܢ ܗܲܝܡܵܢܘܼܬܵܐ ܚܛܝܼܬܵܐ ܝ݇ܠܹܗ*

 

♱♱♱♱♱♱♱♱♱

 

ܚܲܕܼܒܫܲܒܵܐ ܕܐܸܫܬܵܐ ܕܨܵܘܡܵܐ

ܝܘܚܢܢ ܛ: 39 ‐ ܝ؛ 22

ܐܘܢܓܠܝܘܢ ܩܕܝܫܐ ܕܡܪܢܝܫܘܥ ܡܫܝܚܐ ܟܪܘܙܘܬܼܐ ܕܝܘܚܢܢ

 

ܘܐ݇ܡܸܪܹܗ ܝܑܼܫܘܿܥ ܠܟܸܢܫܵܐ ܕܝܗ݇ܘܼܕܵܝܹ̈ܐ: ܠܕܝܵܢܬܹܗ ܕܐܵܗܵܐ ܥܵܠܡܵܐ ܐ݇ܬܹܐܠܝܼ: ܕܐܲܝܢܝܼ ܕܠܹܐ ܝܢܵܐ ܒܸܚܙܵܝܵܐ ܚܵܙܝܼ. ܘܐܲܝܢܝܼ  ܕܒܸܚܙܵܝܵܐ ܝܢܵܐ ܣܵܡܝܼ: ܘܫܡܸܥܠܗ݇ܘܿܢ ܡ̣ܢ ܦܪ̈ܝܼܫܹܐ ܐܵܢܝܼ ܕܥܲܡܹܗ ܗ݇ܘܵܘ ܐܲܢܹܐ: ܘܐ݇ܡܸܪܗ݇ܘܿܢ ܐܸܠܹܗ: ܩܵܡܘܿ ܐܘܿܦ ܐܲܚܢܲܢ ܣܸܡܝܹ̈ܐ ܝܘܲܚ؟ ܐܵܡܸܪ ܐܸܠܲܝܗܝ ܝܑܼܫܘܿܥ: ܐܸܢ ܗܵܘܹܝܬܘܿܢ ܗ݇ܘܵܘ ܣܸܡܝܹ̈ܐ: ܠܲܝܬ ܗ݇ܘܵܐ ܠܵܘܟܼܘܿܢ ܚܛܝܼܬܵܐ: ܐܝܼܢܵܐ ܐܵܕܝܼܵܐ ܒܹܐܡܵܪܵܐ ܝܬܘܿܢ ܕܒܸܚܙܵܝܵܐ ܝܘܲܚ: ܒܘܼܬ  ܕܐܵܗܵܐ ܚܛܝܼܬܵܘܟܼܘܿܢ ܦܲܝܫܵܢܬܵܐ ܝܠܵܗ̇. ܬܪܘܿܨܵܐ ܬܪܘܿܨܵܐ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ: ܕܡ̇ܢ ܕܠܵܐ ܥܵܒܼܸܪ ܡ̣ܢ ܬܲܪܥܵܐ ܠܓܘܼܡܵܐ ܕܥܸܪ̈ܒܹܐ، ܐܸܠܵܐ ܐܵܣܸܩ ܡ̣ܢ ܕܘܼܟܵܐ ܐ݇ܚܹܪ݇ܬܵܐ، ܗ̇ܘ ܓܹܢܵܒܼܵܐ ܝܠܹܗ ܘܓܲܝܵܣܵܐ: ܐܝܼܢܵܐ ܗ̇ܘ ܕܥܵܒܼܸܪ ܡ̣ܢ ܬܲܪܥܵܐ، ܪܵܥܝܵܐ  ܕܥܸܪ̈ܒܹܐ ܝܠܹܗ: ܘܠܐܵܗܵܐ ܢܵܛܘܿܪܵܐ ܕܬܲܪܥܵܐ ܒܸܬ ܦܵܬܸܚܠܹܗ ܬܲܪܥܵܐ: ܘܥܵܢܵܐ ܒܸܬ ܫܵܡܹܥ ܩܵܠܹܗ، ܘܥܸܪ̈ܒܘܼܗܝ ܒܸܬ ܩܵܪܹܐ ܒܫܸܡܵܢܲܝܗܝ، ܘܒܸܬ ܦܵܠܸܛܠܗ݇ܘܿܢ: ܘܐܝܼܡܵܢ ܕܦܵܠܸܛܠܹܗ ܥܵܢܹ̈ܗ، ܩܵܕ݇ܡܵܐ ܩܵܕ݇ܡܲܝܗܝ ܒܸܬ ܐܵܙܸܠ: ܘܥܸܪ̈ܒܹܐ ܕܝܼܹܠ݇ܗ ܒܸܬ ܐܵܙܠ݇ܝܼ ܒܵܬ݇ܪܹܗ: ܣܵܒܵܒ ܕܝܲܕܥܝܼ ܩܵܠܹܗ: ܐܝܼܢܵܐ ܒܵܬ݇ܪ ܢܘܼܟܼܪܵܝܵܐ ܠܹܐ ܐܵܙܸܠ ܥ̈ܵܢܵܐ: ܐܸܠܵܐ ܒܸܬ ܥܵܪܸܩ ܡܸܢܹܗ، ܕܠܹܐ ܝܲܕܸܥ ܩܵܠܵܐ ܕܢܘܼܟܼܪܵܝܵܐ: ܐܵܗܵܐ ܡܲܬܠܵܐ ܐ݇ܡܸܪܹܗ ܐܸܠܲܝܗܝ ܝܑܼܫܘܿܥ: ܐܝܼܢܵܐ ܐܵܢܝܼ ܠܵܐ ܝܕܸܥܠܗ݇ܘܿܢ ܡܘܿܕܝܼ ܗܘܼܡܙܸܡܠܹܗ ܥܲܡܲܝܗܝ: ܐܝܼܢܵܐ ܡܸܢ݇ܕܪܹܫ݇ ܐ݇ܡܸܪܹܗ ܐܸܠܲܝܗܝ ܝܑܼܫܘܿܥ: ܬܪܘܿܨܵܐ ܬܪܘܿܨܵܐ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ: ܕܐܵܢܵܐ ܝܘܸܢ ܬܲܪܥܵܐ ܕܥ̈ܵܢܵܐ: ܘܟܠܲܝܗܝ ܐܵܢܝܼ ܕܐ݇ܬܹܐܠܗ݇ܘܿܢ: ܓܹܢܵܒܼܹ̈ܐ ܝܢܵܐ ܘܓܲܝܵܣܹ̈ܐ: ܐܸܠܵܐ ܥ̈ܵܢܵܐ ܠܵܐ ܫܡܸܥܠܹܗ ܐܸܠܲܝܗܝ: ܐܵܢܵܐ ܝܘܸܢ ܬܲܪܥܵܐ: ܘܒܝܼܝܼ ܐܸܢ ܐ݇ܢܵܫܵܐ ܥܵܒܼܸܪ ܒܸܬ ܚܵܝܹܐ: ܘܒܸܬ ܥܵܒܼܸܪ ܘܦܵܠܸܛ ܘܡܲܪܸܥܝܵܐ ܒܸܬ ܡܵܫ݇ܟ̰ܸܚ: ܓܹܢܵܒܼܵܐ ܠܹܐ ܐܵܬܹܐ ܐܸܠܵܐ ܕܓܵܢܸܒܼ ܘܕܩܵܛܸܠ ܘܕܛܵܠܸܩ. ܐܵܢܵܐ ܐ݇ܬܹܐܠܝܼ ܕܚܲܝܹ̈ܐ ܗܵܘܹܐ ܠܗ݇ܘܿܢ: ܘܡܸܢܕܝܼ ܕܒܘܼܫ ܙܵܘܕܵܐ ܗܵܘܹܐ ܠܗ݇ܘܿܢ: ܐܵܢܵܐ ܝܑܼܘܸܢ ܪܵܥܝܵܐ ܛܵܒܼܵܐ: ܘܪܵܥܝܵܐ ܛܵܒܼܵܐ ܓܵܢܹܗ ܟܹܐ ܡܲܬܸܒܼ ܚܠܵܦ ܥܵܢܹ̈ܗ. ܐܝܼܢܵܐ ܕܒܼܝܼܩܵܐ ܒܗܵܩܵܐ ܕܠܹܐ ܝܠܹܗ ܪܵܥܝܵܐ: ܘܥܸܪ̈ܒܹܐ ܠܹܐ ܝܢܵܐ ܕܓܵܢܹܗ: ܐܝܼܡܵܢ ܕܚܵܙܹܐ ܕܹܐܒܼܵܐ ܒܹܐܬܵܝܵܐ: ܒܸܬ ܫܵܒܼܸܩ ܠܥܵܢ̈ܵܐ ܘܒܸܬ ܥܵܪܸܩ: ܘܒܸܬ ܐܵܬܹܐ ܕܹܐܒܼܵܐ ܘܒܸܬ ܚܵܛܸܦ ܘܒܲܪܒܸܙܠܹܗ ܠܥܵܢ̈ܵܐ. ܐܝܼܢܵܐ ܕܒܼܝܼܩܵܐ ܒܗܵܩܵܐ ܒܸܬ ܥܵܪܸܩ: ܣܵܒܵܒ ܕܒܼܝܼܩܵܐ ܒܗܵܩܵܐ ܝܠܹܗ: ܘܠܹܐ ܝܠܹܗ ܒܚܲܡ ܥܲܠ ܥܵܢ̈ܵܐ: ܐܵܢܵܐ ܝܘܸܢ ܪܵܥܝܵܐ ܛܵܒܼܵܐ: ܘܟܹܐ ܝܲܕܥܸܢ ܠܐܵܢܝܼ ܕܕܝܼܠ݇ܝܼ. ܘܟܹܐ ܦܲܝܫܸܢ ܝܕܝܼܥܵܐ ܡ̣ܢ ܐܵܢܝܼ ܕܕܝܼܠ݇ܝܼ. ܕܲܐܟܼܝܼ ܕܟܹܐ ܝܵܕܸܥܠܝܼ ܒܵܒܝܼ: ܘܐܵܢܵܐ ܟܹܐ ܝܲܕܥܸܢ ܠܒܵܒܝܼ. ܘܓܵܢܝܼ ܒܸܬ ܡܲܬܒܼܸܢ ܚܠܵܦ ܥܵܢ̈ܵܐ: ܐܝܼܢܵܐ ܐܵܦ ܐܝܼܬܠܝܼ ܥܸܪ̈ܒܹܐ ܐ݇ܚܹܪ݇ܢܹܐ: ܐܲܝܢܝܼ ܕܠܹܐ ܝܢܵܐ ܡ̣ܢ ܐܵܗܵܐ ܓܘܼܡܵܐ، ܐܵܦ ܐܸܠܲܝܗܝ ܘܵܠܹܐ ܐܸܠܝܼ ܠܡܲܝܬܘܼܝܲܝܗܝ: ܘܒܸܬ ܫܲܡܥܝܼ ܩܵܠܝܼ: ܘܒܸܬ ܗܵܘܹܐ ܦܸܣܩܵܐ ܟܠܹܗ ܚܲܕ݇ ܘܚܲܕ݇ ܪܵܥܝܵܐ: ܒܘܼܬ ܕܐܵܗܵܐ ܒܵܒܝܼ ܟܹܐ ܡܲܚܸܒܠܝܼ. ܕܐܵܢܵܐ ܡܲܬܘܼܒܼܹܐ ܝܘܸܢ ܓܵܢܝܼ ܕܡܸܢ݇ܕܪܹܫ݇ ܫܲܩܠܸܢܵܗܿ: ܠܹܐ ܗ݇ܘܵܐ ܐ݇ܢܵܫܵܐ ܒܸܫܩܵܠܘܼܗ̇ ܝܠܹܗ ܡܸܢܝܼ، ܐܸܠܵܐ ܐܵܢܵܐ ܡ̣ܢ ܨܸܒܼܝܵܢܝܼ ܡܲܬܘܼܒܼܘܼܗ̇ ܝܘܸܢ: ܣܵܒܵܒ ܐܝܼܬ ܠܝܼ ܫܘܼܠܛܵܢܵܐ ܕܡܲܬܒܼܸܢܵܗܿ: ܘܐܝܼܬ ܠܝܼ ܫܘܼܠܛܵܢܵܐ ܕܡܸܢ݇ܕܪܹܫ݇ ܫܲܩܠܸܢܵܗܿ: ܕܐܵܗܵܐ ܦܘܼܩܕܵܢܵܐ ܩܘܼܒܸܠܝܼ ܡ̣ܢ ܒܵܒܝܼ. ܘܗ݇ܘܹܐܠܹܗ ܡܸܢ݇ܕܪܹܫ݇ ܦܘܼܠܵܓܼܵܐ ܒܲܝܢܲܝ ܝܗ݇ܘܼܕܵܝܹ̈ܐ ܒܘܼܬ  ܕܐܲܢܹܐ ܗܹܡܸܙܡܵܢܹ̈ܐ: ܘܐܲܡܪܝܼ ܗ݇ܘܵܘ ܪܵܒܵܐ ܡܸܢܲܝܗܝ: ܕܕܲܝܘܵܐ ܐܝܼܬܠܹܗ ܘܫܢܵܝܵܐ ܫܢܹܐ ܠܹܗ: ܩܵܡܘܼܕܝܼ ܡܲܨܝܘܼܬܹܐ ܝܬܘܿܢ ܐܸܠܹܗ؟ ܐܝܼܢܵܐ ܐ݇ܚܹܪ̈݇ܢܹܐ ܐܲܡܪܝܼ ܗ݇ܘܵܘ: ܐܲܢܹܐ ܗܹܡܸܙܡܵܢܹ̈ܐ ܠܹܐ ܝܢܵܐ ܕܕܲܝܘܵܢܵܐ: ܩܵܡܘܿ ܕܲܝܘܵܐ ܒܡܵܨܹܐ ܥܲܝ̈ܢܹܐ ܕܣܸܡܝܵܐ ܠܸܦܬܵܚܵܐ؟

 

♱♱♱♱♱♱♱♱♱