ܚܲܕܒܫܲܒܵܐ ܕܸܫܬܵܐ ܕܕܸܢܚܵܐ
ܬܸܢܝܵܢ ܢܵܡܘܿܣܵܐ ܟܕ؛ 9‐ ܫܘܼܠܵܡܵܐ
ܬܸܒ̣ܘ ܘܲܫܠܵܘ ܬܸܢܝܵܢ ܢܵܡܘܿܣܵܐ ܣܸܦܪܵܐ ܕܚܲܡܫܵܐ ܕܐܘܿܪܵܝܬܵܐ
ܐܲܚܵܝ̈ ܒܲܪܸܟ̣ܡܵܪܝ.
ܘܐ݇ܡܸܪܹܗ ܡܘܼܫܹܐ ܠܟܠܹܗ ܝܼܣܪܵܝܹܠ؛ ܕܟ̣ܘܿܪ ܡܸܢܕܝܼ ܕܥܒ̣ܸܕܠܹܗ ܡܵܪܝܵܐ ܐܲܠܵܗܘܼܟܼ ܠܡܲܪܝܲܡ ܒܐܘܼܪܚܵܐ؛ ܐܝܼܡܲܢ ܕܦܠܸܛܠܵܘܟ̣ܘܿܢ ܡ̣ܢ ܡܸܨܪܹܝܢ.܀ ܐܸܢ ܚܲܒ̣ܪܘܼܟܼ ܕܵܝܢܵܢܵܐ ܝ݇ܠܹܗ ܩܵܬܘܼܟܼ؛ ܠܵܐ ܥܵܒ̣ܪܸܬ̇ ܠܒܲܝܬܹܗ ܠܸܫܩܵܠܵܐ ܡܸܫܟܵܢܹܗ.܀ ܐܸܠܵܐ ܩܘܼܡ [ܟܠܝܼ] ܓܵܘ ܥܵܠܘܿܠܵܐ؛ ܘܗ̇ܘ ܐ݇ܢܵܫܵܐ ܕܵܝܢܵܢܵܐ ܝ݇ܠܹܗ ܩܵܬܘܼܟܼ ܗ̇ܘ ܒܸܬ ܦܵܠܸܛܠܹܗ ܩܵܬܘܼܟܼ ܡܸܫܟܵܢܵܐ ܠܥܵܠܘܿܠܵܐ. ܘܐܸܢ ܐ݇ܢܵܫܵܐ ܡܸܣܟܹܢܵܐ ܝ݇ܠܹܗ ܠܵܐ ܕܲܡܟ̣ܸܬ̇ ܒܓ̰ܘܼܠܹ̈ܐ ܕܝܼܹܗ؛ ܐܸܠܵܐ ܡܲܕܸܪܹܗ ܩܵܬܹܗ ܡܸܫܟܵܢܹܗ ܐܝܼܡܲܢ ܕܓܵܢܝܵܐ ܫܸܡܫܵܐ؛ ܘܒܸܬ ܕܵܡܸܟ̣ ܒܓ̰ܘܼܠܹܗ ܘܒܲܪܸܟ̣ܠܘܼܟܼ؛ ܘܒܸܬ ܗܵܘܝܵܐ ܠܘܼܟܼ ܙܲܕܝܼܩܘܼܬܵܐ ܩܵܕ݇ܡ ܡܵܪܝܵܐ ܐܲܠܵܗܘܼܟܼ.܀ ܠܵܐ ܙܵܠܡܸܬ̇ ܗܵܩܵܐ ܕܡܸܣܟܹܢܵܐ ܘܩܲܪܝܼܒܵܝܵܐ ܡ̣ܢ ܐܵܚܘܿܢ̈ܘܵܬܘܼܟܼ ܝܲܢ ܡ̣ܢ ܥܵܡܪ̈ܵܢܹܐ ܕܓܵܘ ܡܵܬܘܵܬ̈ܘܼܟܼ.܀ ܐܸܠܵܐ ܒܝܵܘܡܵܐ ܕܦܘܼܠܚܵܢܹܗ ܝܵܗܒ̣ܸܬ̇ܠܹܗ ܗܵܩܹܗ؛ ܘܠܵܐ ܓܵܢܝܵܐ ܥܲܠܹܗ ܫܸܡܫܵܐ ܣܵܒܵܒ ܕܡܸܣܟܹܢܵܐ ܝ݇ܠܹܗ؛ ܘܒܘܼܬ ܚܵܬܸܪ ܕܗܵܩܹܗ ܣܘܼܦܝܵܐ ܝ݇ܠܹܗ ܓܵܢܹܗ ܒܝܼܘܼܟܼ؛ ܕܠܵܐ ܩܵܪܹܐ ܕܲܪܩܘܼܒ̣ܠܘܼܟܼ ܠܡܵܪܝܵܐ؛ ܘܗܵܘܝܵܐ ܥܲܠܘܼܟܼ ܚܛܝܼܬܵܐ.܀ ܐܲܒ̣ܵܗܹ̈ܐ ܠܹܐ ܡܵܝܬ݇ܝܼ ܡ̣ܢ ܓܹܒܵܐ ܕܒܢ̈ܘܿܢܲܝܗܝ؛ ܘܒܢ̈ܘܿܢܹܐ ܠܹܐ ܡܵܝܬ݇ܝܼ ܡ̣ܢ ܓܹܒܵܐ ܕܐܲܒ̣ܵܗܲܝ̈ܗܝ؛ ܐܸܠܵܐ ܟܠ ܐ݇ܢܵܫܵܐ ܒܓܢܵܗܵܐ ܕܓܵܢܹܗ ܒܸܬ ܡܵܐܸܬ؛ ܠܵܐ ܡܸܦܟ̰ܸܠܸܬ̇ ܕܝܼܘܵܢ ܕܥܵܡܘܿܪܵܐ ܘܝܵܬܘܿܡܵܐ؛ ܘܠܵܐ ܫܵܩܠܸܬ̇ ܡܸܫܟܵܢܵܐ ܠܒ̣ܸܫܬܵܐ ܕܐܲܪܡܸܠܬܵܐ.܀ ܕܟ̣ܘܿܪ ܕܪܹܓܵܐ ܝ݇ܘܸܬ̇ ܗ݇ܘܵܐ ܓܵܘ ܡܸܨܪܹܝܢ؛ ܘܩܲܡ ܦܵܪܸܩܠܘܼܟܼ ܡܵܪܝܵܐ ܐܲܠܵܗܘܼܟܼ ܡ̣ܢ ܬܵܡܵܐ؛ ܒܘܼܬ ܕܐܵܗܵܐ ܒܸܦܩܵܕܵܐ ܝ݇ܘܸܢ ܐܸܠܘܼܟܼ ܘܒܹܐܡܵܪܵܐ ܕܥܵܒ̣ܕܸܬ̇ ܐܵܗܵܐ ܡܸܢܕܝܼ.܀ ܘܐܝܼܡܲܢ ܕܚܵܨܕܸܬ̇ ܚܸܨܕܵܐ ܕܚܲܩܠܘܼܟܼ؛ ܘܡܲܢܫܸܬ̇ ܚܲܕ݇ ܕܲܪܙܵܐ؛ ܠܵܐ ܕܵܝܪܸܬ̇ ܫܵܩܠܸܬ̇ ܠܹܗ؛ ܐܸܠܵܐ ܚܘܼܫ ܦܵܐܹܫ ܩܵܐ ܥܵܡܘܿܪܵܐ ܘܝܵܬܘܼܡܵܐ ܘܐܲܪܡܲܠܬܵܐ ܩܵܐ ܕܒܲܪܸܟ̣ܠܘܼܟܼ ܡܵܪܝܵܐ ܐܲܠܵܗܘܼܟܼ ܦܘܼܠܚܵܢܵܐ ܕܐܝܼܕ̈ܘܼܟܼ.܀ ܘܐܝܼܡܲܢ ܕܢܲܦܨܸܬ̇ ܙܲܝܬܘܼܟܼ ܠܵܐ ܦܵܬܠܸܬ̇ ܒܵܬ݇ܪܘܼܟܼ؛ ܐܸܠܵܐ ܠܥܵܡܘܿܪܵܐ ܘܝܵܬܘܿܡܵܐ ܘܐܲܪܡܸܠܬܵܐ ܗܵܘܝܼ؛ ܘܐܝܼܡܲܢ ܕܩܵܛܦܸܬ̇ ܟܲܪܡܘܼܟܼ ܠܵܐ ܒܵܥܘܸܪܸܬ̇ ܒܵܬ݇ܪܘܼܟܼ؛ ܐܸܠܵܐ ܠܥܵܡܘܿܪܵܐ ܘܝܵܬܘܼܡܵܐ ܘܐܲܪܡܸܠܬܵܐ ܗܵܘܹܐ.܀ ܕܟ̣ܘܿܪ ܕܪܹܓܵܐ ܝ݇ܘܸܬ̇ ܗ݇ܘܵܐ ܒܡܸܨܪܹܝܢ؛ ܒܘܼܬ ܕܐܵܗܵܐ ܒܸܦܩܵܕܵܐ ܝ݇ܘܸܢ ܐܸܠܘܼܟܼ ܕܥܵܒ̣ܕܸܬ̇ ܐܵܗܵܐ ܡܸܢܕܝܼ܀
ܚܲܒ̣ܪܹܗ
ܐܹܫܲܥܝܵܐ ܣܓ؛ 7‐17
ܫܠܵܘ ܢܒ̣ܝܼܘܼܬܹܗ ܕܐܹܫܲܥܝܵܐ؛ ܐܲܚܲܝ̈ ܒܲܪܸܟ̣ܡܵܪܝ܀
ܫܵܦܵܩܲܬ ܕܡܵܪܝܵܐ ܒܸܬ ܕܵܟ̣ܪܸܢ؛ ܘܬܸܫܒܘܿܚܬܹܗ ܕܡܵܪܝܵܐ ܥܲܠ ܟܠ ܕܩܲܡ ܦܲܪܸܥܠܝܼ ܡܵܪܝܵܐ؛ ܘܡܘܼܙܝܸܕܠܹܗ ܫܵܦܵܩܲܬܹܗ ܥܲܠ ܒܹܝܬ̣ ܝܼܣܪܵܝܹܠ ܕܩܲܡ ܦܲܪܸܥܠܝܼ ܪ̈ܲܚܡܘܼܗܝ ܘܐܲܝܟܼ ܒܘܼܫܵܝܘܼܬܵܐ ܕܫܵܦܵܩܲܬܹܗ؛ ܘܐ݇ܡܸܪܹܗ ܕܛܵܝܸܦܝܼ ܝܑܼܢܵܐ ܒܢܘܿܢܹ̈ܐ ܕܠܵܐ ܕܲܓܠܝܼ؛ ܘܗ݇ܘܹܐ ܠܹܗ ܩܵܬܲܝܗܝ ܦܵܪܘܿܩܵܐ.܀ ܒܟܠ ܝܲܠܨܘܼܘܲܝ̈ܗܝ ܠܵܐ ܡܘܼܠܝܸܨܠܹܗ ܐܸܠܲܝܗܝ؛ ܘܡܲܠܲܐܟ̣ܵܐ ܕܦܵܬܘܼܗܝ ܦܘܼܪܩܲܝܗܝ ܠܹܗ؛ ܒܡܪܲܚܡܵܢܘܼܬܹܗ ܘܒܡܲܚܲܒܬܹܗ؛ ܦܘܼܪܸܩܠܹܗ ܐܸܠܲܝܗܝ؛ ܘܡܘܼܪܡܝܼ ܠܹܗ ܘܫܩܝܼܠܝܼ ܠܹܗ ܟܠܲܝܗܝ ܝܵܘܡܵܢܹ̈ܐ ܕܥܵܠܡܵܐ.܀ ܘܐܵܢܝܼ ܡܘܼܟܪܸܒܠܗ݇ܘܿܢ ܘܡܘܼܡܪܸܥܠܗ݇ܘܿܢ ܠܪܘܼܚܵܐ ܕܩܘܼܕܫܹܗ؛ ܘܕܸܪܹܗ ܗܘܹܐܠܹܗ ܐܸܠܲܝܗܝ ܕܸܫ̮ܡܸܢ؛ ܘܦܠܸܫܠܹܗ ܥܲܡܲܝܗܝ؛ ܘܕܟ̣ܸܪܹܗ ܝܵܘܡܵܢܹ̈ܐ ܩܵܕ݇ܡܵܝܹ̈ܐ ܕܡܘܼܫܹܐ ܪܹܓܹܗ. ܐܲܝܟܼ ܕܡܘܼܣܸܩܠܹܗ ܡ̣ܢ ܝܵܡܵܐ ܠܪܵܥܝܵܐ ܕܥܸܪ̈ܒܹܐ ܕܝܼܹܗ؛ ܘܐܲܝܟܼ ܕܡܘܼܬܸܒ̣ܠܹܗ ܒܓܵܘܹܗ ܪܘܼܚܵܐ ܕܩܘܼܕܫܹܗ.܀ ܠܵܒܘܿܠܹܐ ܒܐܘܼܪܚܵܐ ܠܝܲܡܝܼܢܵܐ ܕܡܘܼܫܹܐ ܕܪܵܥܢܵܐ ܕܬܸܫܒܘܿܚܬܹܗ؛ ܦܬܸܚܠܹܗ ܡ̣ܢ ܩܵܕ݇ܡܵܝܗܝ ܝܵܡܵܐ؛ ܘܥܒ̣ܸܕܠܹܗ ܐܸܠܲܝܗܝ ܫܸܡܵܐ ܐܵܒܵܕܝܼܢܵܝܵܐ.܀ ܠܘܼܒܠܝܼܠܹܗ ܓܵܘ ܝܵܡܵܐ ܐܲܝܟܼ ܣܘܼܣܹ̈ܐ ܓܵܘ ܒܲܪܝܼܵܐ ܘܠܵܐ ܬܘܼܪܩܸܠ ܠܗ݇ܘܿܢ.܀ ܘܐܲܝܟܼ ܥܸܪ̈ܒܹܐ ܕܨܵܠܝܼ ܓܵܘ ܕܸܫܬܵܐ ܪܘܼܚܹܗ ܕܡܵܪܝܵܐ ܠܘܼܒܠܝܼܠܹܗ؛ ܗܵܕܟ̣ܵܐ ܬܘܼܓܒܸܪܘܼܟܼ ܠܛܵܝܸܦܘܼܟܼ؛ ܘܥܒ̣ܸܕܠܘܼܟܼ ܐܸܠܘܼܟܼ ܫܸܡܵܐ ܚܩܝܼܪܵܐ.܀ ܚܘܼܪ ܡ̣ܢ ܫܡܲܝܵܐ ܘܚܙܝܼ ܡ̣ܢ ܡܲܢܙܝܼܠܘܼܟܼ ܩܲܕܝܼܫܵܐ ܘܚܩܝܼܪܵܐ؛ ܐܲܝܟܵܐ ܝ݇ܠܹܗ ܛܢܵܢܘܼܟܼ ܘܓܲܢ݇ܒܵܪܘܼܬܘܼܟܼ؛ ܘܕܝܵܪܬܵܐ ܕܡܲܥ̈ܝܘܼܟܼ ܘܕܪ̈ܲܚܡܘܼܟܼ ܕܕܸܪܗ݇ܘܿܢ ܥܲܠܲܢ؟ ܣܵܒܵܒ ܐܲܢ݇ܬ̇ ܝܼܘܸܬ̇ ܒܵܒܲܢ. ܐܲܒ̣ܪܵܗܵܡ ܠܵܐ ܝ݇ܕܝܼܥܠܲܢ ܘܝܼܣܪܵܝܹܠ ܠܵܐ ܩܵܡ ܝܵܕܥܲܚ ܠܹܗ. ܐܲܢ݇ܬ̇ ܝܼܘܸܬ̇ ܡܵܪܝܵܐ ܒܵܒܲܢ ܘܦܵܪܘܿܩܲܢ ܘܡ̣ܢ ܥܵܠܲܡ ܫܸܡܘܼܟܼ܀
♱♱♱♱♱♱♱♱
ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ
ܕܲܠܘܵܬܼ ܥܸܒܼܪ̈ܵܝܹܐ ܐܲܚܲܝ̈ ܒܲܪܸܟܼܡܵܪܝ܀
ܐܝܼܢܵܐ ܪܹܫܵܐ ܕܟܠܲܝܗܝ ܐܲܢܹܐ ܐܝܼܬܠܲܢ ܓܘܼܪܵܐ ܕܟܵܗܢܹ̈ܐ ܐܲܝܢܝܼ ܕܝ݇ܬܸܒܼܠܹܗ ܡ̣ܢ ܝܲܡܝܼܢܵܐ ܕܟܘܼܪܣܝܵܐ ܕܓܘܼܪܘܼܬܵܐ ܒܫܡܲܝܵܐ* ܘܗ݇ܘܹܐܠܹܗ ܚܸܠܡܲܬܟܲܪ ܕܒܹܝܬ ܩܘܼܕܫܵܐ ܘܕܡܲܫܟܢܵܐ ܕܣܲܪܲܣܬܘܼܬܵܐ؛ ܗ̇ܘ ܕܬܘܼܪܸܨܠܹܗ ܐܲܠܵܗܵܐ ܘܠܵܐ ܒܲܪܢܵܫܵܐ* ܣܵܒܵܒ ܟܠ ܓܘܼܪܵܐ ܕܟܵܗܢܹ̈ܐ ܕܩܵܐܸܡ ܩܵܐ ܕܡܲܩܪܸܒܼ ܩܘܼܪ̈ܒܵܢܹܐ ܘܕܸܒܼܚܹ̈ܐ. ܒܘܼܬ ܕܐܵܗܵܐ ܘܵܓ̰ܸܒ ܝܼܗ݇ܘ̣ܵܐ ܐܘܼܦ ܩܵܐ ܕܐܵܗܵܐ ܕܗܵܘܹܐ ܠܹܗ ܚܲܕ݇ ܡܸܢܕܝܼ ܕܡܲܩܪܸܒܼ* ܘܐܸܢ ܗܵܘܹܐ ܗ݇ܘ̣ܵܐ ܒܐܲܪܥܵܐ؛ ܐܘܼܦ ܟܵܗܢܵܐ ܠܹܐ ܗܵܘܹܐ ܗ݇ܘ̣ܵܐ ܣܵܒܵܒ ܐܝܼܬ ܗ݇ܘ̣ܵܘ ܟܵܗܢܹ̈ܐ ܕܡܲܩܪܸܒܼܝܼ ܗ݇ܘ̣ܵܘ ܩܘܼܪ̈ܒܵܢܹܐ ܐܲܝܟܼ ܫܲܪܥܲܬ* ܐܵܢܝܼ ܕܥܵܒܼܕܝܼ ܚܸܠܡܲܬ ܠܕܵܡܵܝܬܵܐ ܘܠܛܸܠܵܢܝܼܬܵܐ ܕܐܵܢܝܼ ܕܓܵܘ ܫܡܲܝܵܐ. ܐܲܝܟܼ ܕܦܸܫܠܵܗ̇ ܐ݇ܡܝܼܪܬܵܐ ܩܵܐ ܡܘܼܫܹܐ ܐܝܼܡܲܢ ܕܬܵܪܘܿܨܹܐ ܗ݇ܘ̣ܵܐ ܡܲܫܟܢܵܐ. ܚܙܝܼ ܘܥܒܼܘܿܕ ܟܠ ܡܸܢܕܝܼ ܒܕܵܡܵܝܬܵܐ ܗ̇ܝ ܕܦܸܫܠܵܗ̇ ܡܘܼܚܙܝܼܬܵܐ ܐܸܠܘܼܟܼ ܒܛܘܼܪܵܐ* ܐܝܼܢܵܐ ܐܵܕܝܼܵܐ ܚܸܠܡܲܬ ܒܘܼܫ ܨܦܵܝ ܡ̣ܢ ܕܗ̇ܝ ܩܘܼܒܸܠܹܗ ܝܼܫܘܿܥ ܡܫܝܼܚܵܐ. ܐܲܝܟܼ ܕܒܘܼܫ ܨܦܵܝ ܝ݇ܠܵܗ̇ ܐܘܼܦ ܕܝܵܬܹܩܹܐ ܗ̇ܝ ܕܥܒܼܝܼܕܵܐ ܝ݇ܠܹܗ ܒܝܼܵܗ̇ ܢܵܘܸܢܓ̰ܝܼ. ܘܒܩܵܘܠܹ̈ܐ ܕܒܘܼܫ ܨܦܵܝ ܡ̣ܢ ܕܗ̇ܝ ܦܸܫܠܵܗ̇ ܝܘܼܗܒܸܠܬܵܐ* ܣܵܒܵܒ ܐܸܢ ܗ̇ܝ ܩܵܕ݇ܡܵܝܬܵܐ ܗܵܘܝܵܐ ܗ݇ܘ̣ܵܐ ܕܠܵܐ ܠܵܘܡܵܐ؛ ܠܲܝܬ ܗ݇ܘ̣ܵܐ ܕܘܼܟܬܵܐ ܩܵܐ ܕܐܵܗܵܐ ܕܬܪܹܝ* ܣܵܒܵܒ ܒܸܠܝܵܡܵܐ ܝ݇ܠܹܗ ܐܸܠܲܝܗܝ ܘܒܹܐܡܵܪܵܐ؛ ܕܗܵܐ ܒܹܐܬܵܝܵܐ ܝ݇ܢܵܐ ܝܵܘܡܵܢܹ̈ܐ ܒܹܐܡܵܪܵܐ ܝ݇ܠܹܗ ܡܵܪܝܵܐ؛ ܒܸܬ ܬܲܡܸܡܸܢ ܥܲܠ ܒܲܝܬܵܐ ܕܒܹܝܬ ܝܼܗܘܼܕܵܐ ܕܝܵܬܹܩܹܐ ܚܲܕܬܵܐ* ܠܵܐ ܐܲܝܟܼ ܕܗ̇ܝ ܕܝܵܬܹܩܹܐ ܕܝܘܼܗܒܼܸܠܝܼ ܩܵܐ ܒܵܒܵܘܵܬܲܝ̈ܗܝ؛ ܒܝܵܘܡܵܐ ܕܕܒܼܸܩܠܝܼ ܒܐܝܼܕܲܝܗܝ ܘܦܘܼܠܛܲܝܗܝ ܠܝܼ ܡ̣ܢ ܐܲܪܥܵܐ ܕܡܸܨܪܹܝܢ. ܡ̣ܢ ܣܵܒܵܒ ܕܐܵܢܝܼ ܠܵܐ ܟܠܹܐܠܗ݇ܘܿܢ ܒܕܝܵܬܹܩܹܐ ܕܕܝܼܝܼ؛ ܐܘܼܦ ܐ݇ܢܵܐ ܡܘܼܣܠܹܐܠܝܼ ܐܸܠܲܝܗܝ ܒܹܐܡܵܪܵܐ ܝ݇ܠܹܗ ܡܵܪܝܵܐ* ܐܝܼܢܵܐ ܐܵܗܵܐ ܕܝܵܬܹܩܹܐ ܕܒܸܬ ܝܵܗܒܼܸܢ ܩܵܐ ܒܲܝܬܵܐ ܕܒܹܝܬ ܝܼܣܪܵܝܹܠ ܒܵܬ݇ܪ ܕܐܵܢܝܼ ܝܵܘܡܵܢܹ̈ܐ ܒܸܐܡܵܪܵܐ ܝ݇ܠܹܗ ܡܵܪܝܵܐ. ܒܸܬ ܝܵܗ݇ܒܼܸܢܵܗ̇ ܫܲܪܥܲܬܝܼ ܒܚܝܼܵܠܲܝܗܝ ܘܥܲܠ ܠܸܒܵܘܵܬܲܝ̈ܗܝ ܒܸܬ ܟܵܬܒܼܸܢܵܗ̇. ܘܒܸܬ ܗܵܘܸܢ ܩܵܬܲܝܗܝ ܐܵܢܵܐ ܐܲܠܵܗܵܐ؛ ܘܐܵܢܝܼ ܒܸܬ ܗܵܘܝܼ ܩܵܬܝܼ ܛܵܝܸܦܵܐ* ܗܸܟ̃ ܐ݇ܢܵܫܵܐ ܠܹܐ ܡܵܠܸܦ ܠܒܪܘܼܢܵܐ ܕܡܕܝܼܢ݇ܬܹܗ؛ ܘܐܘܼܦ ܠܵܐ ܡܵܠܸܦ ܠܐܵܚܘܿܢܹܗ ܘܐܵܡܸܪ ܕܝ݇ܕܝܼܥ ܠܡܵܪܝܵܐ. ܣܵܒܵܒ ܟܠܲܝܗܝ ܒܸܬ ܝܵܕܥܝܼ ܠܝܼ ܡ̣ܢ ܙܥܘܿܪܲܝܗܝ ܘܗܲܠ ܓܘܼܪܲܝܗܝ. ܘܒܸܬ ܦܵܚܠܸܢܗ݇ܘܿܢ ܡ̣ܢ ܥܵܘܠܲܝܗܝ؛ ܘܚܛܝܼܵܬܲܝ̈ܗܝ ܡܸܢ݇ܕܪܹܫ̄ ܠܹܐ ܕܵܟܼܪܸܢ ܐܸܠܲܝܗܝ* ܒܗ̇ܝ ܕܐ݇ܡܸܪܹܗ ܚܲܕܬܵܐ؛ ܥܵܒܼܸܕܠܹܗ ܥܲܬܝܼܩܬܼܵܐ ܠܗ̇ܝ ܩܵܕ݇ܡܵܝܬܵܐ؛ ܘܗ̇ܘ ܕܝܼܠܹܗ ܥܲܬܝܼܩܵܐ ܘܣܝܼܒܼܵܐ. ܩܘܼܪܒܵܐ ܝ݇ܠܹܗ ܠܚܪܵܒܼܵܐ* ܒܕܝܵܬܹܩܹܐ ܩܵܕ݇ܡܵܝܬܵܐ ܐܝܼܬ ܗ݇ܘܼܵܐ ܦܘܼܩܵܕܹ̈ܐ ܕܚܸܠܡܲܬ ܘܒܹܝܬ ܩܘܼܕܫܵܐ ܥܵܠܡܵܢܵܝܵܐ* ܣܵܒܵܒ ܡܲܫܟܢܵܐ ܩܵܕ݇ܡܵܝܵܐ ܕܦܸܫܠܹܗ ܬܘܼܪܨܵܐ ܐܝܼܬ ܗ݇ܘ̣ܵܐ ܓܵܘܹܗ ܡܢܵܪܬܵܐ ܘܦܵܬܘܿܪܵܐ ܘܠܚܸܡ ܐܲܦܹ̈ܐ. ܘܦܵܐܸܫ ܗ݇ܘ̣ܵܐ ܩܸܪܝܵܐ ܒܹܝܬ ܩܘܼܕܫܵܐ* ܐܝܼܢܵܐ ܡܲܫܟܢܵܐ ܓܵܘܵܝܵܐ ܕܠܓܵܘܵܝܝܼ ܡ̣ܢ ܣܸܬܪܵܐ ܕܬܲܪܥܵܐ ܕܬܪܹܝ. ܦܵܐܸܫ ܗ݇ܘ̣ܵܐ ܩܸܪܝܵܐ ܩܕܘܿܫ ܩܘܼܕܫܹ̈ܐ؛ ܐܝܼܬ ܗ݇ܘ̣ܵܐ ܓܵܘܹܗ ܦܝܼܪܡܵܐ ܕܕܲܗܒܼܵܐ ܘܩܹܒܼܘܼܬܵܐ ܕܕܝܵܬܹܩܹܐ ܡܘܼܟܸܣܬܵܐ ܟܠܵܗ̇ ܒܕܲܗܒܼܵܐ. ܘܐܝܼܬ ܗ݇ܘ̣ܵܐ ܓܵܘܵܗ̇ ܡܵܐܢܵܐ ܕܕܲܗܒܼܵܐ؛ ܗ̇ܘ ܕܐܝܼܬ ܗ݇ܘ̣ܵܐ ܓܵܘܹܗ ܡܲܢܢܵܐ ܘܚܘܼܛܪܵܐ ܕܐܲܗܪܘܿܢ ܗ̇ܘ ܕܡܘܼܓ̰ܝܸܢܹܗ ܘܦܵܪ̈ܘܿܫܝܵܬܹܐ ܕܕܝܵܬܹܩܹܐ* ܘܥܘܼܠܘܼܠ ܡܸܢܵܗ̇ ܟܪ̈ܘܿܒܹܐ ܕܚܸܩܪܵܐ ܒܸܥܒܼܵܕܵܐ ܛܸܠܵܢܝܼܬܵܐ ܥܲܠ ܚܘܼܣܵܝܵܐ. ܐܝܼܢܵܐ ܠܹܐ ܝ݇ܠܵܗ̇ ܥܕܵܢܵܐ ܕܗܲܡܙܸܡܲܚ ܒܘܼܬ ܟܠ ܚܕܵܐ ܡ̣ܢ ܕܐܲܢܹܐ ܕܵܐܟܼܝܼ ܦܝܼܫܹܐ ܗ݇ܘ̣ܵܘ ܬܘܼܪܨܹܐ* ܘܠܡܲܫܟܢܵܐ ܒܲܪܵܝܵܐ ܒܟܠ ܥܕܵܢܵܐ ܥܵܒܼܪܝܼ ܗ݇ܘ̣ܵܘ ܟܵܗܢܹ̈ܐ ܘܬܲܡܸܡܝܼ ܗ݇ܘ̣ܵܘ ܚܸܠܡܲܬܲܝܗܝ* ܐܝܼܢܵܐ ܠܡܲܫܟܢܵܐ ܕܠܓܵܘܵܝܝܼ ܡܸܢܹܗ ܚܕܵܐ ܓܵܗܵܐ ܒܫܹܢ݇ܬܵܐ ܐܲܚܟ̰ܝܼ ܟܹܐ ܥܵܒܹܪ ܗ݇ܘ̣ܵܐ ܓܘܼܪܵܐ ܕܟܵܗܢܹ̈ܐ ܒܕܸܡܵܐ ܗ̇ܘ ܕܡܲܩܪܸܒܼ ܗ݇ܘ̣ܵܐ ܡ̣ܢ ܓܹܒܵܐ ܕܓܵܢܹܗ ܘܡ̣ܢ ܓܹܒܵܐ ܕܓܢܵܗܹ̈ܐ ܕܛܵܝܸܦܵܐ܋ ܐܝܼܢܵܐ ܒܐܵܗܵܐ ܡܲܕܘܼܥܝܹܐ ܗ݇ܘܼܵܐ ܪܘܼܚܵܐ ܕܩܘܼܕܫܵܐ ܕܗܵܠܵܐ ܐܘܼܪܚܵܐ ܕܩܲܕܝܼܫܹ̈ܐ ܠܹܐ ܝܗ݇ܘܼܵܐ ܦܝܼܫܬܵܐ ܓܠܝܼܬܵܐ. ܟܡܵܐ ܥܕܵܢܵܐ ܕܐܝܼܬ ܗ݇ܘܼܵܐ ܩܵܘܠܵܐ ܠܡܲܫܟܢܵܐ ܩܵܕ݇ܡܵܝܵܐ܋ ܐܝܼܬ ܗ݇ܘܼܵܐ ܐܵܗܵܐ ܡܲܬܠܵܐ ܩܵܐ ܕܗ̇ܝ ܥܕܵܢܵܐ ܕܒܝܼܵܗ̇ ܩܘܼܪ̈ܒܵܢܹܐ ܘܕܸܒܼܚܹ̈ܐ ܦܵܝܫܝܼ ܗ݇ܘܼܵܘ ܡܘܼܩܪܸܒܼܹܐ ܐܵܢܝܼ ܕܠܹܐ ܡܵܨܝܼ ܗ݇ܘ̣ܵܘ ܠܬܲܡܘܼܡܹܐ ܐܸܢܝܲܬܹܗ ܕܗ̇ܘ ܕܡܲܩܪܸܒܼ ܠܗ݇ܘܿܢ. ܐܸܠܵܐ ܒܐ݇ܟܼܵܠܬܵܐ ܘܫܬܵܝܬܵܐ ܐܲܚܟ̰ܝܼ ܘܚܲܠܲܠܝܵܬܹ̈ܐ ܕܬܲܗܵܪܹ̈ܐ ܬܲܗܵܪܹ̈ܐ ܕܝܼܢܵܐ ܦܘܼܩܕܹ̈ܐ ܕܒܸܣܪܵܐ؛ ܦܝܼܫܹܐ ܡܘܼܬܒܼܹܐ ܗܲܠ ܙܲܒܼܢܵܐ ܕܬܘܼܪܵܨܵܐ܋
♱♱♱♱♱♱♱♱
ܚܕܒܫܒܐ ܕܫܬܐ ܕܒܬܼܪ ܕܢܚܐ
ܝܘܚܢܢ ܓ: 22 ‐ ܕ: 4
ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ ܟܪܘܙܘܬܼܐ ܕܝܘܚܢܢ
♰ ܒܵܬܲܪ ܐܲܢܹܐ ܐ݇ܬܹܐܠܹܗ ܝܑܼܫܘܿܥ ܘܬܲܠܡܝܼ̈ܕܘܼܗܝ ܠܐܲܪܥܵܐ ܕܝܼܗܘܼܕ: ܘܬܵܡܵܐ ܚܵܕܸܪ ܗ݇ܘܵܐ ܥܲܡܲܝܗܝ ܘܡܲܥܡܸܕ ܗ݇ܘܵܐ: ܐܝܼܢܵܐ ܐܵܦ ܝܘܿܚܲܢܵܢ ܡܲܥܡܸܕ ܗ݇ܘܵܐ ܒܥܹܝܢ ܝܘܿܢ ܕܥܲܠ ܓܹܒܵܐ ܕܫܵܠܝܼܡ ܣܵܒܵܒ ܕܪܵܒܵܐ ܡܝܼ̈ܵܐ ܐܝܼܬ ܗ݇ܘܵܐ ܬܵܡܵܐ. ܘܐܵܬܝܼ ܗ݇ܘܵܘ ܘܥܲܡܕܝܼ ܗ݇ܘܵܘ. ܣܵܒܵܒ ܗܵܠܵܐ ܠܹܐ ܗ݇ܘܵܐ ܢܦܝܼܠܵܐ ܝܘܿܚܲܢܲܢ ܓܵܘ ܒܹܝܬ ܐܲܣܝܼܪܹ̈ܐ. ܐܝܼܢܵܐ ܗ݇ܘܹܐܠܹܗ ܕܘܼܪܵܫܵܐ ܠܚܲܕ݇ ܡ̣ܢ ܬܲܠܡܝܼܕܹ̈ܐ ܕܝܘܿܚܲܢܵܢ ܥܲܡ ܚܲܕ݇ ܝܗ݇ܘܼܕܵܝܵܐ ܥܲܠ ܕܲܟܼܵܝܬܵܐ: ܘܐ݇ܬܹܐܠܗ݇ܘܿܢ ܠܘܵܬ ܝܘܿܚܲܢܵܢ ܘܐ݇ܡܝܼܪܗ݇ܘܿܢ ܐܸܠܹܗ: ܪܲܒܝܼܵܢ ܗ̇ܘ ܕܥܲܡܘܼܟܼ ܝܼܗَܘܵܐ ܒܡܲܪܙܵܐ ܕܝܘܿܪܕܢܲܢ، ܕܐܲܢ݇ܬ ܤܗܝܼܕܠܘܼܟ ܥܲܠܘܼܗܝ، ܗܵܐ ܐܵܦ ܗ̇ܘ ܡܲܥܡܘܼܕܹܐ ܝܠܹܗ، ܘܪܵܒܵܐ ܒܹܐܬܵܝܵܐ ܝܢܵܐ ܠܘܵܬܹܗ: ܓ̰ܘܼܘܸܒܠܹܗ ܝܘܿܚܲܢܵܢ ܘܐ݇ܡܝܼܪܹܗ ܐܸܠܲܝܗܝ: ܠܹܐ ܡܵܨܹܐ ܒܲܪܢܵܫܵܐ ܡ̣ܢ ܓܵܢܹܗ ܠܸܫܩܵܠܵܐ ܡܸܢܕܝܼ. ܐܸܠܵܐ ܐܸܢ ܦܵܐܸܫ ܝܘܼܗ݇ܒܼܵܐ ܐܸܠܹܗ ܡ̣ܢ ܫܡܲܝܵܐ: ܐܲܚܬܘܿܢ ܣܵܗܕܹ̈ܐ ܝܼܬܘܿܢ ܐܸܠܝܼ ܕܐ݇ܡܝܼܪܝܼ: ܕܐܵܢܵܐ ܠܹܐ ܝܘܸܢ ܡܫܝܼܚܵܐ: ܐܸܠܵܐ ܫܠܝܼܚܵܐ ܝܘܸܢ ܕܩܵܕ݇ܡܵܐ ܩܵܕ݇ܡܘܼܗܝ: ܡ̇ܢ ܕܐܝܼܬܠܹܗ ܟܲܠܬܵܐ ܚܲܬܢܵܐ ܝܠܹܗ: ܐܝܼܢܵܐ ܪܵܚܡܹܗ ܕܚܲܬܢܵܐ ܗ̇ܘ ܕܟܵܠܹܐ ܘܡܲܨܝܸܬ ܐܸܠܹܗ، ܚܲܕܘܼܬܵܐ ܪܲܒܬܵܐ ܟܹܐ ܚܵܕܹܐ ܒܘܼܬ ܩܵܠܹܗ ܕܚܲܬܢܵܐ. ܗܲܕܟܼܵܐ ܗܵܕܹܐ ܚܲܕܘܼܬܵܐ ܕܝܼܠ݇ܝܼ ܗܵܐ ܬܘܼܡܸܡܠܵܗ̇. ܠܗ̇ܘ ܘܵܠܹܐ ܝܼܠܵܗ̇ ܠܸܗܘܵܝܵܐ ܒܘܼܫ ܪܲܒܵܐ، ܘܐܸܠܝܼ ܠܸܒܨܵܪܵܐ. ܣܵܒܵܒ ܗ̇ܘ ܕܡ̣ܢ ܠܥܸܠ ܐ݇ܬܹܐܠܹܗ، ܠܥܸܠ ܡ̣ܢ ܟܠ ܝܼܠܹܗ. ܘܗ̇ܘ ܕܡ̣ܢ ܐܲܪܥܵܐ، ܡ̣ܢ ܐܲܪܥܵܐ ܝܠܹܗ ܘܡ̣ܢ ܐܲܪܥܵܐ ܒܸܬ ܗܲܡܙܸܡ. ܗ̇ܘ ܕܡ̣ܢ ܫܡܲܝܵܐ ܐ݇ܬܹܐܠܹܗ، ܠܥܸܠ ܡ̣ܢ ܟܠ ܝܼܠܹܗ، ܘܡܸܢܕܝܼ ܕܚܙܹܐܠܹܗ ܘܫܡܝܼܥܠܹܗ ܒܸܣܗܵܕܵܐ ܝܠܹܗ، ܘܣܵܗܕܘܼܬܹܗ ܟ̰ܘܼ ܐ݇ܢܵܫܵܐ ܠܹܐ ܝܠܹܗ ܩܵܒܘܼܠܹܐ: ܐܝܼܢܵܐ ܗ̇ܘ ܕܩܵܒܸܠ ܣܵܗܕܘܼܬܹܗ: ܚܬܝܼܡܠܹܗ ܕܐܲܠܵܗܵܐ ܫܲܪܝܼܪܵܐ ܝܠܹܗ: ܣܵܒܵܒ ܐܲܝܢܝܼ ܕܐܲܠܵܗܵܐ ܩܲܡ ܫܵܕܸܪܹܗ، ܗܹܡܸܙܡܵܢܹ̈ܐ ܕܐܲܠܵܗܵܐ ܒܸܕ ܗܲܡܙܸܡ: ܣܵܒܵܒ ܠܹܐ ܝܗ݇ܘܵܐ ܒܟܝܼܘܼܠܵܐ ܝܘܼܗ݇ܒܼܸܠܹܗ ܐܲܠܵܗܵܐ ܪܘܼܚܵܐ: ܒܵܒܵܐ ܟܹܐ ܡܲܚܸܒ ܠܒܪܘܿܢܵܐ، ܘܟܠ ܡܸܢܕܝܼ ܝܘܼܗ݇ܒ̣ܵܐ ܝܠܹܗ ܒܐܝܼܕܵܬܘܼ̈ܗܝ، ܡ̇ܢ ܕܡܗܲܝܡܸܢ ܒܒܪܘܿܢܵܐ ܐܝܼܬܠܹܗ ܚܲܝܹ̈ܐ ܕܠܥܵܠܲܡ، ܘܡ̇ܢ ܕܠܵܐ ܡܲܨܝܸܬ ܠܒܪܘܿܢܵܐ ܠܹܐ ܚܵܙܹܐ ܚܲܝܹ̈ܐ. ܐܸܠܵܐ ܟܲܪܒܹܗ ܕܐܲܠܵܗܵܐ ܒܸܬ ܥܲܪܩܸܠ ܥܲܠܘܼܗܝ. ܐܝܼܢܵܐ ܝܕܝܼܥܠܹܗ ܝܑܼܫܘܿܥ ܕܫܡܝܼܥܠܗ݇ܘܿܢ ܦܪ̈ܝܼܫܹܐ ܕܥܒܼܝܼܕܠܹܗ ܪܵܒܵܐ ܬܲܠܡܝܼܕܹ̈ܐ: ܘܡܲܥܡܘܼܕܹܐ ܝܗ݇ܘܵܐ ܒܘܼܫ ܡ̣ܢ ܝܘܿܚܲܢܵܢ. ܟܲܕ ܝܑܼܫܘܿܥ ܒܓܵܢܹܗ ܠܹܐ ܡܲܥܡܸܕ ܗ݇ܘܵܐ ܐܸܠܵܐ ܬܲܠܡܝܼ̈ܕܘܼܗܝ. ܘܫܒܼܝܼܩܵܐ ܠܹܗ ܠܝܼܗܘܼܕ ܘܐ݇ܬܹܐܠܹܗ ܡܸܢ݇ܕܪܹܫ݇ ܠܓܠܝܼܠܵܐ.
♱♱♱♱♱♱♱♱