ܚܲܕܼܒܫܲܒܵܐ ܕܲܬ̣ܠܵܬ̣ܵܐ ܕܲܨܠܝܼܒ̣ܵܐ
ܘܕܸܫܬܵܐ ܗ݇ܘ̣ ܕܐܹܠܝܼܵܐ
ܬܸܢܝܵܢ ܢܵܡܘܿܣܵܐ ܛ؛ 13‐23
ܬܸܒ̣ܘ ܘܲܫܠܵܘ ܬܸܢܝܵܢ ܢܵܡܘܿܣܵܐ ܣܸܦܪܵܐ ܕܚܲܡܫܵܐ ܕܐܘܿܪܵܝܬܵܐ؛
ܐܲܚܲܝ̈ ܒܲܪܸܟ̣ܡܵܪܝ܀
ܘܐ݇ܡܸܪܹܗ ܡܵܪܝܵܐ ܠܡܘܼܫܹܐ؛ ܒܸܚܙܵܝܵܐ ܝ݇ܘܸܢ ܠܐܵܗܵܐ ܛܵܝܸܦܵܐ؛ ܚܲܕ݇ ܛܵܝܸܦܵܐ ܝ݇ܠܹܗ ܩܕܵܠܹܗ ܩܸܫܝܵܐ܀ ܐܵܕܝܼܵܐ ܫܒ̣ܘܿܩܠܝܼ ܕܬܵܠܩܸܢܗ݇ܘܿܢ ܘܓܲܪܕܸܢ ܫܸܡܲܝܗܝ ܡ̣ܢ ܬܚܘܿܬ ܫܡܲܝܵܐ. ܘܒܸܬ ܥܵܒ̣ܕܸܢܘܼܟܼ ܠܛܵܝܸܦܵܐ ܒܘܼܫ ܚܲܝܠܵܢܵܐ ܘܪܵܒܵܐ ܡܸܢܲܝܗܝ܀ ܘܕܐܸܪܝܼ ܘܨܠܹܐܠܝܼ ܡ̣ܢ ܛܘܼܪܵܐ؛ ܘܛܘܼܪܵܐ ܒܸܠܗܵܝܵܐ ܗ݇ܘܵܐ ܒܢܘܼܪܵܐ؛ ܘܬܲܪܬܹܝ ܠܘܼܚܹ̈ܐ ܕܩܵܘܠܵܐ ܒܬܸܪܘܲܝܗܝ ܐܝܼܕ̈ܝܼ܀ ܘܚܙܹܐܠܝܼ ܕܚܛܹܐܠܵܘܟ̣ܘܿܢ ܠܡܵܪܝܵܐ ܐܲܠܵܗܵܘܟ̣ܘܿܢ؛ ܘܬܘܼܪܸܨܠܵܘܟ̣ܘܿܢ ܫܲܪܚܵܐ ܪܸܡܝܵܐ [ܨܵܢܵܡ ܬܘܼܪܨܵܐ ܒܩܵܠܸܒ]؛ ܘܦܬܸܠܵܘܟ̣ܘܿܢ ܓ̰ܲܠܕܹܐ ܡ̣ܢ ܐܘܼܪܚܵܐ ܕܦܘܼܩܸܕܠܹܗ ܐܸܠܵܘܟ̣ܘܿܢ ܡܵܪܝܵܐ ܐܲܠܵܗܵܘܟ̣ܘܿܢ܀ ܘܕܒ̣ܸܩܠܝܼ ܠܬܸܪܘܲܝܗܝ ܠܘܼܚܹ̈ܐ؛ ܘܪܘܼܦܲܝܗܝ ܠܝܼ ܡ̣ܢ ܬܸܪܘܲܝܗܝ ܐܝܼܕ̈ܝܼ ܘܫܡܝܼܛܝܼܠܝܼ ܩܵܕ݇ܡ ܥܲܝܢܵܘ̈ܟ̣ܘܿܢ܀ ܘܨܘܿܠܹܐܠܝܼ ܩܵܕ݇ܡ ܡܵܪܝܵܐ ܐܲܝܟܼ ܡ̣ܢ ܩܲܕ݇ܡܵܝܬܵܐ ܐܲܪܒܥܝܼ ܝܵܘܡܵܢܹ̈ܐ ܘܐܲܪܒܥܝܼ ܠܲܝܠܵܘܵܬܹ̈ܐ؛ ܠܲܚܡܵܐ ܠܵܐ ܐ݇ܟ̣ܸܠܝܼ؛ ܘܡܝܼܵܐ ܠܵܐ ܫܬܹܐܠܝܼ ܒܘܼܬ ܟܠܲܝܗܝ ܚܛܝܼܵܬܵܘ̈ܟ̣ܘܿܢ ܕܚܛܹܐܠܵܘܟ̣ܘܿܢ؛ ܘܥܒ̣ܸܕܠܵܘܟ̣ܘܿܢ ܒܝܼܫܬܵܐ ܩܵܕ݇ܡ ܡܵܪܝܵܐ؛ ܘܡܘܼܟܪܸܒܠܵܘܟ̣ܘܿܢ ܐܸܠܹܗ܀ ܣܵܒܵܒ ܕܙܕܝܼܥܠܝܼ ܡ̣ܢ ܩܵܕ݇ܡ ܚܸܡܬܵܐ ܘܟܲܪܒܵܐ ܕܟܪܸܒܠܹܗ ܡܵܪܝܵܐ ܥܲܠܵܘܟ̣ܘܿܢ ܕܬܵܠܸܩܠܵܘܟ̣ܘܿܢ. ܘܩܲܡ ܫܵܡܸܥܠܝܼ ܡܵܪܝܵܐ ܐܘܼܦ ܒܗ̇ܘ ܙܲܒ̣ܢܵܐ܀ ܘܥܲܠ ܐܲܗܪܘܿܢ ܪܵܒܵܐ ܟܪܸܒܠܹܗ ܡܵܪܝܵܐ ܠܡܬܵܠܘܿܩܹܐ؛ ܘܨܘܿܠܹܐܠܝܼ ܒܘܼܬ ܐܲܗܪܘܿܢ ܒܗ̇ܘ ܙܲܒ̣ܢܵܐ. ܘܫܲܪܚܵܐ ܕܚܛܝܼܬܵܐ ܕܥܒ̣ܸܕܠܵܘܟ̣ܘܿܢ؛ ܫܩܸܠܝܼ ܘܡܘܼܩܸܕܠܝܼ ܒܢܘܼܪܵܐ؛ ܘܕܘܼܩܕܸܩܠܝܼ ܘܛܚܸܢܝܼ ܪܵܒܵܐ؛ ܗܲܠ ܕܦܸܫܠܹܗ ܕܘܼܩܕܸܩܵܐ ܐܲܝܟܼ ܥܲܦܪܵܐ؛ ܘܪܘܼܦܹܐܠܝܼ ܥܲܦܪܹܗ ܒܪܵܓ̣݇ܘܘܿܠܵܐ ܕܒܸܨܠܵܝܵܐ ܡ̣ܢ ܛܘܼܪܵܐ܀ ܘܒܝܘܼܩܕܵܢܵܐ ܘܒܓ̰ܘܼܪ̈ܵܒܹܐ ܘܒܩܲܒ̣ܪܹ̈ܐ ܕܫܲܗܘܸܬܵܢܹ̈ܐ ܕܫܲܗܘܲܬܵܐ ܡܘܼܟܪܸܒܠܵܘܟ̣ܘܿܢ ܠܡܵܪܝܵܐ܀
ܚܲܒ̣ܪܹܗ
ܐܹܫܲܥܝܵܐ ܟܘ؛ 1‐20
ܫܠܵܘ ܢܒ̣ܝܼܘܼܬܹܗ ܕܐܹܫܲܥܝܵܐ؛ ܐܲܚܲܝ̈ ܒܲܪܸܟ̣ܡܵܪܝ܀
ܗܵܐ ܝܵܘܡܵܢܹ̈ܐ ܒܹܐܬܵܝܵܐ ܝ݇ܢܵܐ ܒܹܐܡܵܪܵܐ ܝ݇ܠܹܗ ܡܵܪܝܵܐ؛ ܒܸܬ ܦܵܝܫܵܐ ܙܡܝܼܪܬܵܐ ܐܵܗܵܐ ܙܡܲܪܬܵܐ ܒܐܲܪܥܵܐ ܕܝܼܗܘܼܕ؛ ܡܕܝܼܢ݇ܬܵܐ ܦܘܼܪܩܵܢܵܗ̇ ܚܲܝܠܵܢܵܐ؛ ܡܘܼܬܸܒ̣ܠܗ݇ܘܿܢ ܫܘܼܪܵܐ ܘܒܲܪ ܫܘܼܪܵܐ؛ ܦܬܸܚܠܗ݇ܘܿܢ ܬܲܪ̈ܥܵܢܹܐ؛ ܒܸܬ ܥܵܒ̣ܸܪ ܛܵܝܸܦܵܐ ܙܲܕܝܼܩܵܐ؛ ܢܵܛܪܵܢܵܐ ܕܗܲܝܡܵܢܘܼܬܵܐ؛ ܢܵܛܪܵܢܵܐ ܕܣܲܪܲܣܬܘܼܬܵܐ܀ ܒܸܬ ܢܵܛܪܸܬ̇ܠܲܢ ܫܠܵܡܵܐ. ܣܵܒܵܒ ܕܒܝܼܘܼܟܼ ܣܒܸܪܲܢ ܝܵܐ ܡܵܪܝܵܐ ܠܥܵܠܲܡ ܥܵܠܡܝܼܢ܀ ܣܵܒܵܒ ܕܡܵܪܝܵܐ ܐܲܠܵܗܵܐ ܚܲܝܠܵܢܵܐ ܠܥܵܠܡܝܼܢ܀ ܒܸܬ ܡܲܡܟܸܟܼ ܠܐܵܢܝܼ ܕܒܸܥܡܵܪܵܐ ܝܢܵܐ ܒܪܵܘܡܵܐ؛ ܘܡܕܝܼܢ݇ܬܵܐ ܙܲܪܒܵܢܬܵܐ ܒܸܬ ܡܲܟܸܦܠܵܗ̇ ܗܲܠ ܐܲܪܥܵܐ؛ ܘܡܲܡܛܹܐܠܵܗ̇ ܗܲܠ ܥܲܦܪܵܐ. ܒܸܬ ܕܲܫܕܸܫܵܐ ܠܵܗ̇ ܐܲܩܠܵܐ ܕܦܲܩܝܼܪܹ̈ܐ؛ ܘܦܵܣܘܿܥܬܵܐ ܕܡܸܣܟܹܢܹ̈ܐ. ܓ̰ܵܕܵܐ ܕܡܸܣܟܹܢܹ̈ܐ ܕܘܼܙ؛ ܘܐܘܼܪܚܵܐ ܕܙܲܕܝܼܩܹ̈ܐ ܕܘܼܙ ܝܼܠܵܗ̇ ܘܕܠܵܐ ܬܲܪܩܲܠܬܵܐ؛ ܘܐܘܼܦ ܠܐܘܼܪܚܵܐ ܕܕܝܼܘܵܢܘܼܟܼ ܣܦܸܪܲܢ ܝܵܐ ܡܵܪܝܵܐ؛ ܠܫܸܡܘܼܟܼ ܘܕܟ̣ܵܪܘܼܟܼ ܫܘܼܗܘܸܬܠܵܗ̇ ܓܵܢܲܢ܀ ܓܵܢܝܼ ܫܘܼܗ݇ܘܸܬܠܵܗ̇ ܐܸܠܘܼܟܼ ܒܠܲܝܠܹܐ؛ ܐܘܼܦ ܪܘܼܚܝܼ ܒܓܵܘܝܼ ܡܩܵܕܘܿܡܹܐ ܝ݇ܠܵܗ̇ ܠܟܸܣܠܘܼܟܼ. ܣܵܒܵܒ ܐܲܝܟܼ ܕܝܑܼܢܵܐ ܕܝܼܘܵܢ̈ܘܼܟܼ ܥܲܠ ܐܲܪܥܵܐ. ܙܲܕܝܼܩܘܼܬܵܐ ܝ݇ܠܸܦܠܗ݇ܘܿܢ ܥܵܡܪ̈ܵܢܹܐ ܕܕܘܼܢܝܹܐ܀ ܪܚܸܩܠܹܗ ܥܵܘܠܵܐ ܕܠܵܐ ܝܵܠܸܦ ܙܲܕܝܼܩܘܼܬܵܐ. ܡܲܢܟ̣ܲܣܬܵܐ ܒܐܲܪܥܵܐ ܡܘܼܣܠܝܼܬܵܐ ܝ݇ܠܵܗ̇ ܕܠܵܐ ܚܵܙܝܼ ܪܵܡܘܼܬܵܐ ܕܡܵܪܝܵܐ܀ ܡܵܪܝܵܐ ܒܪܵܡܘܼܬܵܐ ܕܐܝܼܕ̈ܘܼܟܼ ܠܹܐ ܚܵܙܝܼ؛ ܒܸܬ ܚܵܙܝܼ ܘܢܵܟ̣ܦܝܼ ܛܢܵܢܹܗ ܕܛܵܝܸܦܵܐ؛ ܘܐܲܝܟܼ ܬܲܢܘܼܪܵܐ ܒܸܬ ܐܵܟ̣ܠܵܐ ܠܗ݇ܘܿܢ ܕܸܫ̰ܡܸܢ̈ܘܼܟܼ. ܝܵܐ ܡܵܪܝܵܐ ܢܵܛܪܸܬ̇ܠܲܢ ܫܠܵܡܵܐ. ܣܵܒܵܒ ܡܐܲܝܟܼ ܟܠܲܝܗܝ ܦܘܼܠܚܵܢܲܝ̈ܢ ܗܘܼܕܸܪܘܼܟܼ ܩܵܬܲܢ܀ ܝܵܐ ܡܵܪܝܵܐ ܐܲܠܵܗܲܢ ܗܘܹܐܠܗ݇ܘܿܢ ܥܲܠܲܢ ܡܵܪ̈ܵܘܵܬܹܐ ܫܒ̣ܘܿܩ ܡܸܢܘܼܟܼ؛ ܐܲܚܟ̰ܝܼ ܫܸܡܵܐ ܕܝܼܘܼܟܼ ܦܵܐܹܫ ܕܟ̣ܝܼܪܵܐ܀ ܡܝܼܬܹ̈ܐ ܠܹܐ ܡܲܚܝܼ؛ ܘܓܲܢ݇ܒܵܪܹ̈ܐ ܠܹܐ ܡܲܩܸܡܝܼ؛ ܒܘܼܬ ܕܐܵܗܵܐ؛ ܦܘܼܩܸܕܠܘܼܟܼ ܘܥܒ̣ܝܼܕܲܝܗܝ ܠܘܼܟܼ ܕܘܼܢܒܵܐ [ܡܘܼܣܠܝܼܹ̈ܐ]؛ ܘܬܘܼܠܸܩܠܘܼܟܼ ܟܠܹܗ ܕܟ̣ܵܪܲܝܗܝ܀ ܡܘܼܙܝܸܕܠܘܼܟܼ ܡܵܪܝܵܐ ܥܲܠ ܛܵܝܸܦܵܐ؛ ܡܘܼܙܝܸܕܠܘܼܟܼ ܥܲܠ ܛܵܝܸܦܵܐ؛ ܪܚܸܩܠܘܼܟܼ؛ ܘܡܘܼܪܚܸܩܠܘܼܟܼ ܟܠܲܝܗܝ ܡܲܪ̈ܙܵܢܹܐ ܕܐܲܪܥܵܐ. ܝܵܐ ܡܵܪܝܵܐ ܒܐܘܼܠܨܵܢܵܐ ܬܦܸܩܠܗ݇ܘܿܢ ܒܝܼܘܼܟܼ؛ ܘܓܵܘ ܚܒ̣ܘܼܫܝܵܐ ܦܘܼܬܦܸܬܠܗ݇ܘܿܢ ܡܲܪܕܘܼܬܘܼܟܼ܀ ܐܲܝܟܼ ܒܛܸܢܬܵܐ ܕܩܘܼܪܒܵܐ ܝ݇ܠܵܗ̇ ܠܗܵܨܘܿܠܹܐ؛ ܕܵܒ̣ܩܵܐ ܚܸܒ̣ܠܹ̈ܐ ܘܡܲܩܘܸܚܵܐ ܒܚܸܒ̣ܠܵܗ̇؛ ܗܵܕܟ̣ܵܐ ܗܘܹܐܠܹܗ ܐܸܠܲܢ ܡ̣ܢ ܩܵܕ݇ܡܘܼܟܼ ܝܵܐ ܡܵܪܝܵܐ܀ ܒܛܸܢܲܢ ܘܓܪܝܼܫܠܲܢ ܚܸܒ̣ܠܹ̈ܐ ܐܲܝܟܼ ܕܵܐܢܝܼ ܕܗܲܨܠܝܼ ܦܵܘܚܹ̈ܐ. ܦܵܪܸܩܠܲܢ ܕܠܵܐ ܬܵܠܩܲܚ ܒܐܲܪܥܵܐ. ܘܠܵܐ ܢܵܦܠܝܼ ܥܵܡܪ̈ܵܢܹܐ ܕܕܘܼܢܝܹܐ܀ ܡܝܼܬ̈ܘܼܟܼ ܒܸܬ ܚܲܝܝܼ؛ ܘܫܠܲܕܲܝ̈ܗܝ ܒܸܬ ܩܵܝܡܝܼ؛ ܘܪܵܥܫܝܼ ܘܙܵܡܪܝܼ ܕܡܝܼܟ̣ܹ̈ܐ ܕܥܲܦܪܵܐ. ܣܵܒܵܒ ܛܠܘܼܠܘܼܟܼ ܛܠܘܼܠܵܐ ܝ݇ܠܹܗ ܕܒܲܗܪܵܐ. ܘܐܲܪܥܵܐ ܕܓܲܢ݇ܒܵܪܹ̈ܐ ܒܸܬ ܬܵܠܚܵܐ܀
♱♱♱♱♱♱♱♱♱
ܚܲܕ݇ܒܫܹܒܵܐ ܓ ܕܨܠܝܼܒܼܵܐ ܘ ܕܐܹܠܝܼܵܐ
ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ
ܕܲܠܘܵܬܼ ܦܝܼܠܝܼܦܣܵܝܹ̈ܐ ܐܲܚܲܝ̈ ܒܲܪܸܟܼܡܵܪܝ܀
ܚܕܹܐܡܘܿܢ ܒܡܵܪܲܢ ܒܟܠ ܙܲܒܼܢܵܐ؛ ܘܡܸܢ݇ܕܪܹܫ̄ ܒܹܐܡܵܪܵܐ ܝ݇ܘܸܢ ܚܕܹܐܡܘܿܢ* ܘܡܲܟܝܼܟܼܘܼܬܵܘܟܼܘܿܢ ܦܵܝܫܵܐ ܝ݇ܕܝܼܥܬܵܐ ܠܟܸܣ ܐ݇ܢܵܫܵܐ. ܡܵܪܲܢ ܩܘܼܪܒܵܐ ܝ݇ܠܹܗ* ܠܵܐ ܐܵܟܼܠܝܼܬܘܿܢ ܚܲܡ ܕܡܸܢܕܝܼ. ܐܸܠܵܐ ܒܟܠ ܙܲܒܼܢܵܐ ܒܨܠܘܿܬܵܐ ܘܦܲܪܦܲܠܬܵܐ ܘܫܵܟܲܪܬܵܐ ܡܲܛܠܲܒܵܘ̈ܟܼܘܿܢ ܦܵܝܫܝܼ ܝ݇ܕܝܼܥܝܹܐ ܩܵܕ݇ܡ ܐܲܠܵܗܵܐ* ܘܫܠܵܡܹܗ ܕܐܲܠܵܗܵܐ ܗ̇ܘ ܕܒܘܼܫ ܓܘܼܪܵܐ ܝ݇ܠܹܗ ܡ̣ܢ ܟܠ ܚܝܼܵܠ؛ ܢܵܛܸܪ ܠܸܒܵܘܵܬܵܘ̈ܟܼܘܿܢ ܘܚܝܼܵܠܵܘ̈ܟܼܘܿܢ ܒܝܼܫܘܿܥ ܡܫܝܼܚܵܐ* ܡܐܵܕܝܼܵܐ ܐܵܚܘܿܢܘܵܬܝܼ؛ ܐܵܢܝܼ ܡܸܢܕܝܼܵܢܹ̈ܐ ܕܝܼܢܵܐ ܣܲܪܲܣܬ ܘܐܵܢܝܼ ܕܝܼܢܵܐ ܡܵܪܹܐ ܐܵܕܲܒ؛ ܘܐܵܢܝܼ ܕܝܼܢܵܐ ܗܲܩ؛ ܘܐܵܢܝܼ ܕܝܼܢܵܐ ܕܸܟܼܝܹ̈ܐ؛ ܘܐܵܢܝܼ ܕܝܼܢܵܐ ܡܘܼܚܸܒܹ̈ܐ ܘܚܩܝܼܪܹ̈ܐ. ܘܦܘܼܠܚܵܢܹ̈ܐ ܕܚܸܩܪܵܐ ܘܛܵܒܼܬܵܐ ܒܐܲܢܹܐ ܬܲܚܡܸܢܗ݇ܘܿܢ* ܐܵܢܝܼ ܕܝ݇ܠܸܦܠܵܘܟܼܘܿܢ ܘܩܘܼܒܸܠܵܘܟܼܘܿܢ ܘܫܡܸܥܠܵܘܟܼܘܿܢ ܘܚܕܹܐܠܵܘܟܼܘܿܢ ܒܝܼܝܼ ܐܲܢܹܐ ܦܠܘܿܚܘܿܢ؛ ܘܐܲܠܵܗܵܐ ܕܫܠܵܡܵܐ ܗܵܘܹܐ ܥܲܡܵܘܟܼܘܿܢ* ܐܝܼܢܵܐ ܒܘܼܫ ܙܵܘܕܵܐ ܚܕܹܐܠܝܼ ܒܡܵܪܲܢ ܕܒܚܲܪܬܵܐ ܫܘܼܪܹܐܠܵܘܟܼܘܿܢ ܠܹܐܟܼܵܠܵܐ ܚܲܡ ܒܘܼܬ ܕܝܼܝܼ؛ ܕܵܐܟܼܝܼ ܕܐܘܼܦ ܒܹܐܟܼܵܠܵܐ ܝ݇ܬܘܿܢ ܗ݇ܘ̣ܵܘ ܐܸܠܵܐ ܠܹܐ ܗ݇ܘ̣ܵܐ ܡܲܠܝܵܢܬܵܐ* ܠܹܐ ܝ݇ܘܸܢ ܒܹܐܡܵܪܵܐ ܡ̣ܢ ܣܵܒܵܒ ܕܦܸܫܠܝܼ ܣܢܝܼܩܵܐ. ܣܵܒܵܒ ܐܵܢܵܐ ܝ݇ܠܹܦܠܝܼ ܕܡܵܠܹܐ ܠܝܼ ܗ̇ܘ ܡܸܢܕܝܼ ܕܐܝܼܬ ܠܝܼ* ܒܝܼܕܲܥܝܵܐ ܝ݇ܘܸܢ ܕܦܵܝܫܸܢ ܡܘܼܟܸܦܵܐ ܘܒܝܼܕܲܥܝܵܐ ܝ݇ܘܸܢ ܕܦܵܝܫܸܢ ܡܘܼܪܡܵܐ. ܒܟܠ ܐܲܗܘܲܠ ܘܒܟܠ ܡܸܢܕܝܼ ܡܘܼܠܦܵܐ ܝ݇ܘܸܢ ܓܵܢܝܼ؛ ܐܘܼܦ ܒܟܸܦܢܵܐ ܘܐܘܼܦ ܒܣܒܼܵܥܝܬܵܐ؛؛ ܒܦܸܪܝܘܼܬܵܐ ܘܒܵܨܘܿܪܘܼܬܵܐ* ܘܟܠ ܡܸܢܕܝܼ ܡܵܨܹܢ ܥܵܒܼܕܸܢ؛ ܒܡܫܝܼܚܵܐ ܕܚܲܠܘܼܢܝܼ ܝ݇ܠܹܗ* ܐܝܼܢܵܐ ܒܘܼܫ ܨܦܵܝ ܥܵܒܼܸܕܠܵܘܟܼܘܿܢ ܕܗܘܹܐܠܵܘܟܼܘܿܢ ܫܲܪ̈ܝܼܟܹܐ ܠܝܲܠܨܘܼܘܝܼ̈* ܒܝܼܕܲܥܝܵܐ ܝ݇ܘܸܢ ܐܘܼܦ ܐܲܚܬܘܿܢ ܦܝܼܠܝܼܦܸܣܵܝܹ̈ܐ؛ ܕܒܫܘܼܪܵܝܵܐ ܕܡܲܫܚܲܕܬܵܐ ܐܝܼܡܲܢ ܕܦܠܸܛܠܝܼ ܡ̣ܢ ܡܵܩܹܕܘܿܢܝܼܵܐ ܐܘܼܦ ܚܕܵܐ ܡ̣ܢ ܥܹܕܵܬܹ̈ܐ ܠܵܐ ܫܘܼܪܸܟܠܗ݇ܘܿܢ ܥܲܡܝܼ ܒܚܸܫܒܘܿܢܵܐ ܕܝܵܗ݇ܒܼܵܐ ܘܫܩܵܠܵܐ. ܐܸܠܵܐ ܐܲܚܟ̰ܝܼ ܐܲܚܬܘܿܢ* ܘܐܘܼܦ ܠܬܸܣܵܠܘܿܢܝܼܩܹܐ ܚܕܵܐ ܓܵܗܵܐ ܝܲܢ ܬܪܹܝ ܣܢܝܼܩܘܼܬܝܼ ܫܘܼܕܸܪܵܘܟܼܘܿܢ* ܠܹܐ ܝ݇ܘܸܢ ܒܸܛܠܵܒܵܐ ܐܸܪܘܵܢܵܐ. ܐܸܠܵܐ ܒܵܥܝܸܢ ܕܛܥܘܼܢܝܵܬܵܘ̈ܟܼܘܿܢ ܙܵܝܕܝܼ܋ ܟܠ ܡܸܢܕܝܼ ܕܩܘܼܒܼܠܝܼ ܡܲܠܝܵܢܵܐ ܝ݇ܠܹܗ ܘܙܵܘܕܵܐ ܝ݇ܠܹܗ ܩܵܬܝܼ. ܘܫܩܸܠܝܼ ܠܟܠ ܡܸܢܕܝܼ ܕܫܘܼܕܸܪܵܘܟܼܘܿܢ ܐܸܠܝܼ ܒܐܝܼܕܵܐ ܕܐܵܦܲܦܪܘܿܕܝܼܛܘܿܣ ܪܹܝܚܵܐ ܒܲܣܝܼܡܵܐ ܘܕܸܒܼܚܵܐ ܡܲܩܒܘܼܠ ܕܫܦܸܪܹܗ ܠܐܲܠܵܗܵܐ* ܘܐܲܠܵܗܝܼ ܬܲܡܸܡ ܟܠܵܗ̇ ܣܢܝܼܩܘܼܬܵܘܟܼܘܿܢ ܐܲܝܟܼ ܕܵܘܸܠܬܹܗ ܒܚܸܩܪܵܐ ܕܝܼܫܘܿܥ ܡܫܝܼܚܵܐ* ܐܝܼܢܵܐ ܠܐܲܠܵܗܵܐ ܒܵܒܲܢ ܚܸܩܪܵܐ ܘܐܝܼܩܵܪܵܐ ܠܐܵܒܲܕ ܐܵܒܲܕܝܼܢ ܐܵܡܹܝܢ* ܒܵܩܪܘܿܢ ܒܫܠܵܡܵܐ ܕܟܠܲܝܗܝ ܩܲܕܝܼܫܹ̈ܐ ܕܒܝܼܫܘܿܥ ܡܫܝܼܚܵܐ* ܒܵܩܘܿܪܹܐ ܝ݇ܢܵܐ ܒܫܠܵܡܵܘܟܼܘܿܢ ܐܵܚܘܿܢܘܵܬܹ̈ܐ ܕܐܝܼܬ ܥܲܡܝܼ. ܒܵܩܘܿܪܹܐ ܝ݇ܢܵܐ ܒܫܠܵܡܵܘܟܼܘܿܢ ܟܠܲܝܗܝ ܩܲܕܝܼܫܹ̈ܐ. ܒܘܼܫ ܙܵܘܕܵܐ ܐܵܢܝܼ ܕܡ̣ܢ ܒܲܝܬܹܗ ܕܩܸܣܲܪ* ܫܵܦܵܩܲܬ ܕܡܵܪܲܢ ܝܼܫܘܿܥ ܡܫܝܼܚܵܐ ܥܲܡ ܟܠܵܘܟܼܘܿܢ ܐܵܡܹܝܢ*
♱♱♱♱♱♱♱♱♱
ܚܲܕܼܒܫܲܒܵܐ ܕܲܬ̣ܠܵܬ̣ܵܐ ܕܲܨܠܝܼܒ̣ܵܐ
ܘܕܸܫܬܵܐ ܗ݇ܘ̣ ܕܐܹܠܝܼܵܐ
ܡܬܝ ܝܗ: 21 ‐ 39
ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ ܟܪܘܙܘܬܼܐ ܕܡܬܝ
♰ ܘܦܠܸܛܠܹܗ ܡ̣ܢ ܬܵܡܵܐ ܝܑܼܫܘܿܥ، ܘܐ݇ܬܹܐܠܹܗ ܠܬܸܚܘܼܒ ܕܨܘܿܪ ܘܕܨܲܝܕܵܢ. ܘܗܵܐ ܚܕܵܐ ܒܲܟܼܬܵܐ ܟܢܲܥܢܵܝܬܵܐ ܡ̣ܢ ܐܵܢܝܼ ܬܸܚܘܼܒܹ̈ܐ ܦܠܸܛܠܵܗ̇، ܟܲܕ ܡܲܩܘܘܼܚܹܐ ܘܒܹܐܡܵܪܵܐ: ܪܲܚܸܡ ܥܲܠܝܼ ܡܵܪܝܼ ܒܪܘܿܢܹܗ ܕܕܵܘܝܼܕ. ܒܪܵܬܝܼ ܚܸܪܒܵܐ ܦܝܵܫܵܐ ܝܠܵܗ̇ ܓ̰ܘܼܢܓ̰ܸܪܬܵܐ ܡ̣ܢ ܫܹܐܕܵܐ. ܐܝܼܢܵܐ ܗ̇ܘ ܠܵܐ ܡܘܼܕܥܸܪܹܗ ܐܸܠܵܗ̇ ܓ̰ܘܼܘܵܒ. ܘܩܘܼܪܒܸܢܗ݇ܘܿܢ ܬܲܠܡܝܼ̈ܕܘܼܗܝ ܛܠܸܒܠܗ݇ܘܿܢ ܡܸܢܹܗ ܘܐܲܡܪܝܼ: ܫܪܝܼܠܵܗ̇ ܕܡܲܩܘܘܼܚܹܐ ܝܠܵܗ̇ ܒܵܬ݇ܪܲܢ. ܐܝܼܢܵܐ ܗ̇ܘ ܓ̰ܘܼܘܸܒܠܹܗ ܘܐ݇ܡܸܪܹܗ ܐܸܠܲܝܗܝ: ܠܵܐ ܦܸܫܠܝܼ ܫܘܼܕܪܵܐ ܐܸܠܵܐ ܠܘܵܬ ܥܸܪ̈ܒܹܐ ܕܛܠܸܩܠܗ݇ܘܿܢ ܡ̣ܢ ܒܹܝܬ ܝܼܣܪܵܐܹܝܠ. ܐܝܼܢܵܐ ܗ̇ܝ ܐ݇ܬܹܐ ܠܵܗ̇ ܣܓܼܸܕܠܵܗ̇ ܐܸܠܹܗ ܘܐ݇ܡܸܪܵܗ̇: ܡܵܪܝܼ ܗܲܝܸܪܝܼ. ܐܵܡܸܪ ܐܸܠܵܗ̇ ܝܑܼܫܘܿܥ، ܠܹܐ ܝܠܵܗ̇ ܨܦܵܝܝܼ ܠܸܫܩܵܠܵܐ ܠܲܚܡܵܐ ܕܒܢܘܿܢܹ̈ܐ ܘܠܸܕܪܵܝܵܐ ܠܟܲܠܒܹ̈ܐ. ܐܝܼܢܵܐ ܗ̇ܝ ܐ݇ܡܸܪܵܗܿ: ܗܹܐ ܡܵܪܝܼ: ܐܵܦ ܟܲܠܒܹ̈ܐ ܟܹܐ ܐܲܟܼܠܝܼ ܡ̣ܢ ܦܲܪ̈ܬܘܼܬܹܐ ܕܢܵܦܠܝܼ ܡ̣ܢ ܦܵܬܘܿܪܹ̈ܐ ܕܡܵܪ̈ܵܘܵܬܲܝܗܝ ܘܟܹܐ ܚܲܝܝܼ. ܗܿܝܓܵܗ̇ ܐ݇ܡܸܪܹܗ ܐܸܠܵܗ̇ ܝܑܼܫܘܿܥ: ܝܵܐ ܒܲܟܼܬܵܐ ܪܲܒܬܵܐ ܝܠܵܗ̇ ܗܲܝܡܵܢܘܼܬܹܟܼܝ. ܗܵܘܹܐ ܠܹܟܼܝ ܐܲܝܟܼ ܕܒܲܣܡܵܐ ܠܹܟܼܝ. ܘܦܸܫܠܵܗ̇ ܒܣܝܼܡܬܵܐ ܒܪܵܬܘܼܗ̇ ܡ̣ܢ ܗ̇ܝ ܣܵܥܵܬ. ܘܫܘܼܢܹܐ ܠܹܗ ܡ̣ܢ ܬܵܡܵܐ ܝܑܼܫܘܿܥ، ܘܐ݇ܬܹܐܠܹܗ ܥܲܠ ܓܹܒܵܐ ܕܝܵܡܵܐ ܕܓܠܝܼܠܵܐ. ܘܣܸܠ݇ܩܠܹܗ ܠܛܘܼܪܵܐ ܘܝܬܸܒܼܠܹܗ ܬܵܡܵܐ. ܘܩܘܼܪܒܸܢܗ݇ܘܿܢ ܠܘܵܬܹܗ ܟܸܢܫܹ̈ܐ ܪܵܒܵܐ. ܕܐܝܼܬ ܗ݇ܘܵܘ ܥܲܡܲܝܗܝ ܟ̰ܘܼܠܵܓ݂ܹ̈ܐ ܘܣܸܡܝܹ̈ܐ ܘܠܲܥܠܹ̈ܐ ܘܣܲܩܲܛܹ̈ܐ ܘܐ݇ܚܹܪ̈݇ܢܹܐ ܪܵܒܵܐ ܘܕܸܪܝܵܝܠܗ݇ܘܿܢ ܠܘܵܬ ܐܲܩܠܵܬܹ̈ܐ ܕܝܑܼܫܘܿܥ ܘܒܘܼܣܡܵܝܠܹܗ. ܐܲܝܟܼ ܕܥܲܓ̰ܒܝܼ ܗ݇ܘܵܘ ܐܵܢܝܼ ܟܸܢܫܹ̈ܐ. ܕܒܸܚܙܵܝܵܐ ܗ݇ܘܵܘ ܕܠܲܥܠܹ̈ܐ ܗܲܡܙܘܼܡܹܐ، ܘܣܲܩܲܛܹ̈ܐ ܕܦܝܵܫܵܐ ܒܘܼܣܡܹܐ، ܘܟ̰ܘܼܠܵܓ݂ܹ̈ܐ ܕܒܸܚܕܵܪܵܐ، ܘܣܸܡܝܹ̈ܐ ܕܒܸܚܙܵܝܵܐ، ܘܫܘܼܒܸܚܠܗ݇ܘܿܢ ܠܐܲܠܵܗܵܐ ܕܝܼܣܪܵܝܸܠ. ܐܝܼܢܵܐ ܝܑܼܫܘܿܥ ܩܪܹܐܠܹܗ ܠܬܲܠܡܝܼܕܘܼ̈ܗܝ ܘܐ݇ܡܸܪܹܗ ܐܸܠܲܝܗܝ: ܡܪܵܚܘܼܡܹܐ ܝܘܸܢ ܥܲܠ ܐܵܗܵܐ ܟܸܢܫܵܐ. ܕܗܵܐ ܬܠܵܬܵܐ ܝܵܘܡܵܢܹ̈ܐ ܥܘܼܪܩܸܠܗ݇ܘܿܢ ܠܘܵܬܝܼ، ܘܠܲܝܬܠܗ݇ܘܿܢ ܡܸܢܕܝܼ ܕܐܲܟܼܠܝܼ. ܘܕܫܲܪܸܢܗ݇ܘܿܢ ܟܲܕ ܨܝܼܡܹܐ ܠܹܐ ܝܠܵܗ̇ ܒܣܵܡܝܼ. ܕܒܲܠܟܵܐ ܦܵܢܝܼ ܒܐܘܼܪܚܵܐ. ܐܲܡܪܝܼ ܐܸܠܹܗ ܬܲܠܡܝܼܕ̈ܘܼܗܝ: ܡܐܲܝܟܵܐ ܐܝܼܬܠܲܢ ܠܲܚܡܵܐ ܒܚܵܪܵܒܝܼ ܕܡܲܣܒܼܲܥܚ ܟܠܹܗ ܐܵܗܵܐ ܟܸܢܫܵܐ. ܐܵܡܸܪ ܐܸܠܲܝܗܝ ܝܑܼܫܘܿܥ: ܟܡܵܐ ܠܲܚܡܹ̈ܐ ܐܝܼܬܠܵܘܟܼܘܿܢ؟ ܐܵܡܪܝܼ ܐܸܠܹܗ: ܫܲܒܼܥܵܐ ܘܚܲܕ݇ܟ̰ܵܐ ܢܘܼܢܹ̈ܐ ܕܲܩܝܼܩܹ̈ܐ. ܘܦܩܸܕܠܹܗ ܠܟܸܢܫܹ̈ܐ ܕܝܲܬܒܼܝܼ ܥܲܠ ܐܲܪܥܵܐ. ܘܫܩܸܠܹܗ ܠܐܵܢܝܼ ܫܲܒܼܥܵܐ ܠܲܚܡܹ̈ܐ ܘܠܢܘܼܢܹ̈ܐ. ܘܫܘܼܒܸܚܠܹܗ ܘܩܨܹܐܠܹܗ، ܘܝܘܼܗ݇ܒܼܸܠܹܗ ܠܬܲܠܡܝܼܕ̈ܘܼܗܝ. ܘܬܲܠܡܝܼܕܹ̈ܐ ܝܘܼܗ݇ܒܼܸܠܗ݇ܘܿܢ ܠܟܸܢܫܹ̈ܐ. ܘܐ݇ܟܼܸܠܗ݇ܘܿܢ ܟܠܲܝܗܝ ܘܣܒܼܸܥܠܗ݇ܘܿܢ ܘܫܩܸܠܗ݇ܘܿܢ ܙܘܿܕܘܼܢܝܹ̈ܐ ܕܩܸܛܥܵܛܹ̈ܐ ܫܲܒܼܥܵܐ ܣܵܠܹ̈ܐ. ܐܝܼܢܵܐ ܐܵܢܝܼ ܕܐ݇ܟܼܸܠܗ݇ܘܿܢ ܗܵܘܝܼ ܗ݇ܘܵܘ ܐܲܪܒܥܵܐ ܐܲܠܦܹ̈ܐ ܓܲܒܼܪܹ̈ܐ ܫܒܼܘܿܩ ܡ̣ܢ ܢܸܫܹ̈ܐ ܘܛܠܵܝܹ̈ܐ.
♱♱♱♱♱♱♱♱♱