ܚܲܕܼܒܫܲܒܵܐ ܕܚܲܡܫܵܐ ܕܩܲܝܛܵܐ

ܟܵܗܢܹ̈ܐ ܟܓ؛ 22-9

ܬܸܒ̣ܘ ܘܲܫܠܵܘ ܟܵܗܢܹ̈ܐ ܣܸܦܪܵܐ ܕܬܲܠܵܬܼܵܐ ܕܐܘܿܪܵܝܬܵܐ؛

ܐܲܚܲܝ̈ ܒܲܪܸܟ̣ܡܵܪܝ.

ܘܗܘܼܡܙܸܡܠܹܐ ܡܵܪܝܵܐ ܥܲܡ ܡܘܼܫܹܐ: ܘܐ݇ܡܸܪܹܗ ܐܸܠܹܗ.܀ ܗܲܡܙܸܡ ܥܲܡ ܒܢܲܝ̈ ܝܼܣܪܵܝܹܠ ܘܐ݇ܡܘܿܪ ܐܸܠܵܝܗܝ: ܐܝܼܡܵܢ ܕܥܵܒܼܪܝܼܬܘܿܢ ܠܐܲܪܥܵܐ ܕܝܵܗ݇ܒܼܸܢܵܗ̇ ܐܸܠܵܘܟܼܘܿܢ؛ ܘܚܵܨܕܝܼܬܘܿܢ ܠܚܸܨܕܘܼܗ̇: ܡܲܐܝܝܼܬܘܿܢ ܠܕܲܪܙܵܐ ܕܢܘܼܒܲܪܠܘܼܓܼ ܕܚܸܨܕܵܘܟܼܘܿܢ ܠܟܵܗܢܵܐ.܀ ܘܦܵܪܸܫܠܵܗ̇ ܠܕܲܪܙܵܐ ܩܵܕ݇ܡ ܡܵܪܝܵܐ ܠܩܘܼܒܵܠܵܘܟܼܘܿܢ: ܒܗܵܘ̇ ܝܵܘܡܵܐ ܐ݇ܚܹܪ݇ܢܵܐ ܒܸܬ ܦܵܪܸܫܠܵܗ̇ ܟܵܗܢܵܐ.܀ ܥܵܒܼܕܝܼܬܘܿܢ ܒܝܵܘܡܵܐ ܕܦܲܪܫܝܼܬܘܿܢ ܕܲܪܙܵܐ؛ ܦܵܐܪܵܐ ܕܥܸܪܒܵܐ ܒܲܪ ܚܕܵܐ ܫܹܢ݇ܬܵܐ ܕܠܲܝܬ ܒܝܼܹܗ ܠܲܟܵܐ؛ ܕܸܒܼܚܵܐ ܡܘܼܩܕܵܐ ܠܡܵܪܝܵܐ. ܘܩܘܼܪܒܵܢܘܼܗܝ ܕܲܬܪܵܝ ܥܸܣܪ̈ܘܼܢܹܐ؛ ܡ̣ܢ ܬܪܵܝ ܟܝܘܿܠܹ̈ܐ ܕܩܲܡܚܵܐ ܨܸܦܝܵܐ ܦܝܼܝܵܐ ܒܡܸܫܚܵܐ؛ ܩܘܼܪܒܵܢܵܐ ܠܡܵܪܝܵܐ ܠܪܹܝܚܵܐ ܒܲܣܝܼܡܵܐ ܘܢܘܼܩܵܝܹܐ ܕܚܲܡܪܵܐ؛ ܚܲܕ݇ ܪܒܼܝܼܥܵܝܵܐ ܕܟܝܘܼܠܵܐ ܠܲܚܡܵܐ؛ ܘܩܠܵܝܵܬܹ̈ܐ ܘܦܸܪ̈ܬܘܼܟܼܹܐ؛ ܠܵܐ ܐܵܟܼܠܝܼܬܘܿܢ ܗܲܠ ܠܐܵܗܵܐ ܝܵܘܡܵܐ؛ ܗܲܠ ܕܡܲܐܝܝܼܬܘܿܢ ܩܘܼܪܒܵܢܵܐ ܠܐܲܠܵܗܵܘܟܼܘܿܢ؛ ܢܵܡܘܿܣܵܐ ܝ݇ܠܹܗ ܠܐܵܒܲܕ ܠܕܵܘܪܹ̈ܐ ܕܕܵܘܪ̈ܵܘܟܼܘܿܢ؛ ܒܟܠܹܗ ܒܲܝܬܵܐ ܕܚܲܝܘܼܬܵܘܟܼܘܿܢ. ܚܲܫܒܸܢܘܿܢ ܡ̣ܢ ܒܵܬ݇ܪܹܗ ܕܝܵܘܡܵܐ؛ ܡ̣ܢ ܝܵܘܡܵܐ ܕܡܲܐܝܝܼܬܘܿܢ ܕܲܪܙܵܐ ܕܦܘܼܪܫܵܢܵܐ ܫܲܒܼܥܵܐ ܫܵܒܼܘܿܥܹ̈ܐ ܟܵܡܝܼܠ ܒܸܬ ܗܵܘܝܼ ܐܸܠܵܘܟܼܘܿܢ. ܗܲܠ ܒܵܬ݇ܪ ܫܵܒܼܘܿܥܬܵܐ ܫܒܼܝܼܥܵܝܬܵܐ؛ ܚܲܫܒܸܢܘܿܢ ܚܲܡܫܝܼ ܝܵܘܡܵܢܹ̈ܐ؛ ܡܲܩܪܸܒܼܝܼܬܘܿܢ ܕܲܚܠܵܐ ܡ̣ܢ ܚܲܕ݇ܬܵܐ ܠܡܵܪܝܵܐ.܀ ܬܪܵܝ ܠܲܚܡܹ̈ܐ ܡ̣ܢ ܬܪܵܝ ܥܸܣܪ̈ܘܿܢܹܐ ܗܵܘܝܼ ܨܸܦܝܹ̈ܐ ܘܚܸܡܥܝܵܐ ܦܵܝܫܝܼ ܝܸܦܝܹ̈ܐ؛ ܢܘܼܒܲܪ̈ܠܘܼܓܼܹܐ ܠܡܵܪܝܵܐ. ܘܡܲܩܪܸܒܼܝܼܬܘܿܢ ܥܲܡ ܠܲܚܡܵܐ ܫܲܒܼܥܵܐ ܦܵܐܪܹ̈ܐ ܕܥܸܪ̈ܒܹܐ ܒܢܘܿܢܹ̈ܐ ܕܫܹܢ݇ܬܵܐ ܕܠܲܝܬ ܠܗ݇ܘܿܢ ܠܲܟܵܐ؛ ܘܚܲܕ݇ ܡܘܼܓ̰ܵܐ ܒܲܪ ܒܲܩܪܵܐ؛ ܘܬܪܵܝ ܒܲܪ̈ܥܵܢܹܐ؛ ܗܵܘܝܼ ܕܸܒܼܚܵܐ ܡܵܘܩܕܵܐ ܠܡܵܪܝܵܐ. ܘܩܘܼܪܒܵܢܵܝܗܝ ܕܕܲܚܠܵܐ؛ ܘܢܘܼܩܵܝܵܝ̈ܗܝ؛ ܕܸܒܼܚܵܐ ܕܢܘܼܪܵܐ؛ ܗܵܘܝܼ ܪܹܝܚܵܐ ܒܲܣܝܼܡܵܐ ܠܡܵܪܝܵܐ܀ ܘܥܵܒܼܕܝܼܬܘܿܢ ܚܲܕ݇ ܓܸܙܟܵܐ ܕܥܸܙܹ̈ܐ ܠܩܘܼܪܒܵܢܵܐ ܕܲܚܛܝܼܬܵܐ؛ ܘܬܪܵܝ ܦܵܐܪܹ̈ܐ ܕܥܸܪܒܵܐ ܒܢܘܿܢܹ̈ܐ ܕܫܹܢ݇ܬܵܐ ܠܕܸܒܼܚܵܐ ܫܲܠܡܵܐ ܘܦܵܪܸܫܠܗ݇ܘܿܢ ܟܵܗܢܵܐ ܥܲܠ ܠܲܚܡܵܐ ܕܢܘܼܒܲܪ̈ܠܘܼܓܼܹܐ ܦܘܼܪܫܵܢܵܐ ܩܵܕ݇ܡ ܡܵܪܝܵܐ؛ ܥܲܡ ܬܪܵܝ ܦܵܐܪܹ̈ܐ ܕܥܸܪܒܵܐ. ܩܘܼܕܫܵܐ ܗܵܘܝܼ ܠܡܵܪܝܵܐ ܩܵܐ ܟܵܗܢܵܐ܀ ܗܲܪ ܒܐܵܗܵܐ ܝܵܘܡܵܐ ܩܵܪܝܼܬܘܿܢ ܓ̰ܡܥܵܝܬܵܐ ܩܲܕܝܼܫܬܵܐ ܗܵܘܝܵܐ ܐܸܠܵܘܟܼܘܿܢ. ܘܟܠ ܥܒܼܵܕܵܐ ܕܦܸܠܚܵܢܵܐ ܠܵܐ ܥܵܒܼܕܝܼܬܘܿܢ ܩܵܢܘܿܢܵܐ ܝ݇ܠܹܗ ܠܐܵܒܲܕ ܒܟܠܵܝܗܝ ܕܘܼܟܬܵܐ ܕܚܲܝܘܼܬܵܘܟܼܘܿܢ ܠܕܵܘܪ̈ܵܘܟܼܘܿܢ. ܘܟܲܕ ܚܵܨܕܝܼܬܘܿܢ ܠܚܸܨܕܵܐ ܕܐܲܪܥܵܘܟܼܘܿܢ؛ ܠܵܐ ܬܲܡܸܡܸܬ̇ ܡܲܪ̈ܙܵܢܹܐ ܕܚܲܩܠܘܼܟܼ ܒܝܼܲܕ ܚܨܵܕܬܘܼܟܼ؛ ܘܫܸܒ̈ܠܹܐ [ܒܘܼܠܹ̈ܐ] ܕܚܸܨܕܘܼܟܼ ܠܵܐ ܓ̰ܲܡܥܸܬ̇؛ ܩܵܐ ܡܸܣܟܹܢܵܐ ܘܡܵܫܵܚܲܛ ܫܵܒܼܩܸܬ ܠܗ݇ܘܿܢ ܐܵܢܵܐ ܝ݇ܘܸܢ ܡܵܪܝܵܐ ܐܲܠܵܗܵܘܟܼܘܿܢ.

ܚܲܒ̣ܪܹܗ

ܐܹܫܲܥܝܵܐ؛ ܟܚ؛ 14‐23

ܫܠܵܘ ܢܒ̣ܝܼܘܼܬܹܗ ܕܐܹܫܲܥܝܵܐ؛ ܐܲܚܲܝ̈ ܒܲܪܸܟ̣ܡܵܪܝ܀

ܒܘܼܬ ܕܐܵܗܵܐ ܫܡܸܥܡܘܿܢ ܚܲܒܪܹܗ ܕܡܵܪܝܵܐ ܝܵܐ ܐ݇ܢܵܫܹ̈ܐ ܡܲܣܚܸܪ̈ܵܢܹܐ؛ ܪܹ̈ܫܵܢܹܐ ܕܐܵܗܵܐ ܛܵܝܸܦܵܐ ܕܓܵܘ ܐܘܿܪܸܫܠܸܡ܀ ܣܵܒܵܒ ܕܐ݇ܡܸܪܵܘܟ̣ܘܿܢ؛ ܡܘܼܩܸܡܠܲܢ ܩܵܘܠܵܐ ܥܲܡ ܡܵܘܬܵܐ. ܘܥܲܡ ܫܝܘܿܠ ܥܒ̣ܸܕܠܲܢ ܚܸܙܘܵܐ. ܩܵܛܝܼܵܐ ܓܵܪܦܵܢܵܐ ܐܝܼܡܲܢ ܕܥܵܒ̣ܸܪ؛ ܠܹܐ ܐܵܬܹܐ ܥܲܠܲܢ. ܣܵܒܵܒ ܕܡܘܼܬܸܒ̣ܠܲܢ ܗܹܒ̣ܝܼܲܢ ܥܲܠ ܕܘܼܓܠܵܐ؛ ܘܒܒܘܼܚܬܲܢ ܚܘܼܡܹܐܠܲܢ ܓܵܢܲܢ܀ ܒܘܼܬ ܕܐܵܗܵܐ؛ ܗܵܕܟ̣ܵܐ ܒܹܐܡܵܪܵܐ ܝ݇ܠܹܗ ܡܵܪܝܵܐ ܐܲܠܵܗܵܐ؛ ܗܵܐ ܐܵܢܵܐ ܒܸܬ ܡܬܲܪܨܸܢ ܒܨܸܗܝܘܿܢ ܟܹܐܦܵܐ. ܟܹܐܦܵܐ ܒܚܝܼܪܬܵܐ ܓܵܘ ܩܘܼܢܓ̰ܝܼܬܵܐ ܛܝܼܡܵܢܬܵܐ؛ ܒܪܹܫ ܓܘܼܕܵܐ ܕܒܸܢܝܲܬ. ܗ̇ܘ ܕܗܲܡܸܢ ܠܹܐ ܙܵܕܸܥ܀ ܘܒܸܬ ܡܲܬܒ̣ܸܢ ܕܝܼܘܵܢ ܠܟܝܼܘܿܠܵܐ؛ ܘܙܲܕܝܼܩܘܼܬܵܐ ܠܬܩܘܼܠܬܵܐ. ܘܒܸܬ ܬܵܠܸܚ ܒܲܪܕܵܐ ܠܗܹܒ̣ܝܼ ܕܵܓܵܠܵܐ؛ ܘܡܝܼܵܐ ܒܸܬ ܓܵܪܦܝܼ ܠܣܸܬܵܪܵܐ؛ ܘܩܵܘܠܵܘܟ̣ܘܿܢ ܕܥܲܡ ܡܵܘܬܵܐ ܒܸܬ ܦܵܐܹܫ ܣܪܝܼܒ̣ܵܐ؛ ܘܚܸܙܘܵܘܟ̣ܘܿܢ ܕܥܲܡ ܫܝܘܿܠ ܠܹܐ ܟܵܠܹܐ؛ ܩܵܛܝܼܵܐ ܓܵܪܘܿܦܵܐ ܐܝܼܡܲܢ ܕܥܵܒ̣ܸܪ؛ ܒܸܬ ܗܵܘܝܼܬܘܿܢ ܐܸܠܹܗ ܕܲܫܕܲܫܬܵܐ܀ ܘܒܥܸܕܵܢܵܐ ܕܥܵܒ̣ܸܪ ܒܸܬ ܠܵܒܸܠܠܵܘܟ̣ܘܿܢ. ܣܵܒܵܒ ܒܟܠ ܩܵܝܕܲܡܬܵܐ ܘܩܵܝܕܲܡܬܵܐ ܒܸܬ ܥܵܒ̣ܸܪ؛ ܒܝܵܘܡܵܐ ܘܒܠܲܝܠܹܐ ܒܸܬ ܗܵܘܝܵܐ ܙܕܘܿܥܬܵܐ؛ ܐܲܚܟ̰ܝܼ ܦܲܪܡܝܼ ܝܵܐ ܫܵܡܘܿܥܵܐ܀ ܣܵܒܵܒ ܕܟܪܹܐܠܵܗ̇ ܫܘܝܼܬܵܐ ܩܵܐ ܚܵܡܵܝܬܹܗ؛ ܘܠܚܹܝܦܵܐ ܥܝܼܩܵܐ ܘܠܹܐ ܡܵܠܹܐ܀ ܣܵܒܵܒ ܕܓܵܘ ܛܘܼܪܵܐ ܓܵܘ ܬܲܪܥܵܐ ܒܸܬ ܟܵܠܹܐ ܡܵܪܝܵܐ؛ ܐܲܝܟܼ ܪܵܓ̣݇ܘܘܼܠܵܐ ܕܓܸܒ̣ܥܘܿܢ ܒܸܬ ܟܵܪܸܒ ܠܸܥܒ̣ܵܕܵܐ ܦܘܼܠܚܵܢ̈ܘܼܗ‌ܝ؛ ܩܲܪ̈ܝܼܒܵܝܹܐ ܝ݇ܢܵܐ ܦܘܼܠܚܵܢ̈ܘܼܗ‌ܝ؛ ܘܠܸܥܒ̣ܵܕܵܐ ܥܒ̣ܵܕܬܘܼܗ‌ܝ؛ ܢܘܼܟ̣ܪܵܝܬܵܐ ܝ݇ܠܵܗ̇ ܥܒ̣ܵܕܬܘܼܗ‌ܝ܀ ܘܐܵܕܝܼܵܐ ܠܵܐ ܡܲܣܚܸܪܝܼܬܘܿܢ ܕܠܵܐ ܗܵܘܝܵܐ ܕܚܲܠܸܢܵܐ ܬܲܥܠܲܡܬܵܘܟ̣ܘܿܢ. ܣܵܒܵܒ ܕܬܝܵܡܬܵܐ ܘܩܛܥܵܝܬܵܐ ܫܡܝܼܥܠܝܼ ܡ̣ܢ ܡܵܪܝܵܐ ܚܲܝܠܬܵܢܵܐ ܥܲܠ ܟܠܵܗ̇ ܐܲܪܥܵܐ܀

♱♱♱♱♱♱♱♱♱

ܚܕܒܫܒܐ ܕܚܡܫܐ ܕܩܝܛܐ

ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ

ܕܲܠܘܵܬܼ ܩܘܼܪ̈ܲܢܬܵܝܹܐ ܐܲܚܲܝ̈ ܒܲܪܸܟܼܡܵܪܝ܀

ܐܵܗܵܐ ܓܵܗܵܐ ܕܬܠܵܬܵܐ ܝ݇ܠܵܗ̇ ܕܗܘܼܕܪܵܐ ܝ݇ܘܸܢ ܕܐܵܬܸܢ ܠܟܸܣܠܵܘܟܼܘܿܢ ܘܠܵܐ ܗܵܘܸܢ ܝܘܼܩܪܵܐ ܥܲܠܵܘܟܼܘܿܢ ܠܹܐ ܒܵܥܝܸܢ ܡܸܢܕܝܼܵܘܟܼܘܿܢ؛ ܐܸܠܵܐ ܐܸܠܵܘܟܼܘܿܢ ܣܵܒܵܒ ܠܹܐ ܝ݇ܢܵܐ ܒܢܘܼܢܹ̈ܐ ܕܵܝܢܵܢܹ̈ܐ ܕܡܲܬܒܼܝܼ ܚܲܙܝܼܢܹ̈ܐ ܩܵܐ ܐܲܒܼܵܗܹ̈ܐ؛ ܐܸܠܵܐ ܐܲܒܼܵܗܹ̈ܐ ܩܵܐ ܒܢܘܼܢܲܝ̈ܗܝ* ܐܝܼܢܵܐ ܐܵܢܵܐ ܒܚܲܕܘܼܬܵܐ ܐܘܼܦ ܢܲܦܩܵܬܹ̈ܐ ܒܸܬ ܚܵܪܓ̰ܸܢ ܘܐܘܼܦ ܓܵܢܝܼ ܝܵܗ݇ܒܼܸܢ ܡ̣ܢ ܓܸܒܵܐ ܕܓܵܢܵܘܟܼܘܿܢ. ܐܵܦܸܢ ܕܟܲܕ ܐܵܢܵܐ ܪܵܒܵܐ ܡܲܚܸܒܸܢܵܘܟܼܘܿܢ؛ ܐܝܼܢܵܐ ܐܲܚܬܘܿܢ ܒܘܼܫ ܒܵܨܘܿܪܵܐ ܡܲܚܘܼܒܹܐ ܝ݇ܬܘܿܢ ܩܵܬܝܼ* ܘܗܵܘܝܵܐ ܕܐܵܢܵܐ ܠܵܐ ܗܘܹܐܠܝܼ ܝܘܼܩܪܵܐ ܥܲܠܵܘܟܼܘܿܢ؛ ܐܸܠܵܐ ܐܲܝܟܼ ܚܲܕ݇ ܐ݇ܢܵܫܵܐ ܦܲܢܕܵܢܵܐ ܒܠܹܐܒܹ̈ܐ ܩܲܡ ܓܲܢܒܼܸܢܵܘܟܼܘܿܢ* ܩܵܡܘܿ! ܒܐܝܼܕܵܐ ܕܐ݇ܢܵܫܹ̈ܐ ܐ݇ܚܹܪ̈݇ܢܹܐ ܕܫܘܼܕܸܪܝܼ ܠܟܸܣܠܵܘܟܼܘܿܢ ܥܵܒܼܸܕܠܝܼ ܛܲܡܲܥܟܵܪܘܼܬܵܐ ܥܲܠܵܘܟܘܿܢ؟* ܡ̣ܢ ܛܸܛܘܿܣ ܛܠܸܒܠܝܼ ܘܫܘܼܕܸܪܝܼ ܥܲܡܹܗ ܠܐܵܚܘܿܢܘܵܬܹ̈ܐ. ܩܵܡܘܿ! ܒܚܲܕ݇ ܡܸܢܕܝܼ ܥܒܼܸܕܠܹܗ ܝܲܥܢܘܼܬܵܐ ܥܲܠܵܘܟܼܘܿܢ ܛܸܛܘܿܣ؟ ܒܚܕܵܐ ܪܘܼܚܵܐ ܠܵܐ ܚܕܸܪܲܢ؛ ܘܗܲܪ ܒܕܐܲܢܹܐ ܫܵܘܦܵܦܹ̈ܐ؟* ܝܲܢ ܒܲܠܟܵܐ ܡܸܢ݇ܕܪܹܫ̄ ܒܸܚܫܵܒܼܵܐ ܝ݇ܬܘܿܢ ܕܩܵܐ ܕܝܼܵܘܟܼܘܿܢ ܗܲܡܙܘܼܡܹܐ ܝ݇ܘܲܚ. ܩܵܕ݇ܡ ܐܲܠܵܗܵܐ ܒܡܫܝܼܚܵܐ ܗܲܡܙܘܼܡܹܐ ܝ݇ܘܲܚ. ܘܟܠ ܡܸܢܕܝܼ. ܩܵܐ ܒܸܢܝܵܢܵܐ ܕܝܼܵܘܟܼܘܿܢ ܝܼܠܹܗ* ܣܵܒܵܒ ܒܸܙܕܲܥܝܵܐ ܝ݇ܘܸܢ ܕܠܵܐ ܗܵܘܝܵܐ ܕܐܵܬܸܢ ܠܟܸܣܠܵܘܟܼܘܿܢ ܘܠܵܐ ܡܵܫ݇ܟ̰ܚܸܢܵܘܟܼܘܿܢ ܐܲܝܟܼ ܕܐܵܢܵܐ ܒܵܥܝܸܢ. ܘܦܵܝܫܸܢ ܡܘܼܫ̄ܟ̰ܚܵܐ ܐܘܼܦ ܠܟܸܣܠܵܘܟܼܘܿܢ ܐܲܝܟܼ ܡܸܢܕܝܼ ܕܐܲܚܬܘܿܢ ܠܹܐ ܒܵܥܝܝܼܬܘܿܢ. ܒܲܠܟܵܐ ܡܲܩܪܲܨܬܵܐ؛ ܒܲܚܝܼܠܘܼܬܵܐ ܘܟܲܪܒܵܐ ܥܵܨܝܼܘܼܬܵܐ؛ ܡܚܲܝܬܵܐ ܕܲܪܗܲܩ. ܛܲܪܛܲܡܬܵܐ؛ ܚܬܲܪܬܵܐ؛ ܫܓܼܘܼܫܝܵܐ* ܠܵܐ ܗ݇ܘ̣ܵܐ ܡܸܢ݇ܕܪܹܫ݇ ܐܵܬܸܢ ܠܟܸܣܠܵܘܟܼܘܿܢ ܡܲܡܟܸܟܼܠܝܼ ܐܲܠܵܗܵܐ ܘܥܵܒܼܕܸܢ ܬܵܙܝܼ ܥܲܠ ܕܐܵܢܝܼ ܕܚܛܹܐܠܗ݇ܘܿܢ ܘܠܵܐ ܬܘܼܘܸܒܠܗ݇ܘܿܢ ܡܼܢ ܛܲܡܐܘܼܬܵܐ ܘܡܼܢ ܙܵܢܝܘܼܬܵܐ ܘܡܼܢ ܦܲܚܙܘܼܬܵܐ ܕܦܠܸܚܠܗ݇ܘܿܢ܋

♱♱♱♱♱♱♱♱♱

ܚܕܒܫܒܐ ܕܚܡܫܐ ܕܩܝܛܐ

ܠܘܩܐ ܝܘ: 19 ‐ ܝܙ: 11

ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ ܟܪܘܙܘܬܼܐ ܕܠܘܩܐ

♰ ܐ݇ܡܸܪܹܗ ܝܑܼܫܘܿܥ ܠܟܸܢܫܵܐ ܕܝܗ݇ܘܼܕܵܝܹ̈ܐ ܐܵܗܵܐ ܡܲܬܠܵܐ: ܐܝܼܢܵܐ ܐܝܼܬ ܗ݇ܘܵܐ ܚܲܕ݇ ܐ݇ܢܵܫܵܐ ܥܲܬܝܼܪܵܐ: ܘܟܹܐ ܠܵܒܼܸܫ ܗ݇ܘܵܐ ܟܸܬܵܢ ܘܐܲܪܓܘܵܢܵܐ. ܘܟܠܝܘܿܡ ܟܹܐ ܥܵܒܼܸܕ ܗ݇ܘܵܐ ܒܘܼܣܵܡܵܐ ܓܲܐܝܵܐܝܼܬ. ܘܐܝܼܬ ܗ݇ܘܵܐ ܚܲܕ݇ ܡܸܣܟܹܢܵܐ ܕܫܸܡܹܗ ܠܲܥܵܙܲܪ. ܕܸܪܝܵܐ ܗ݇ܘܵܐ ܠܘܵܬ ܬܲܪܥܹܗ ܕܗ̇ܘ ܥܲܬܝܼܪܵܐ: ܟܲܕ ܡܸܚܝܵܐ ܒܕܲܪ̈ܒܵܬܹܐ. ܘܫܲܗܒܼܸܬ ܗ݇ܘܵܐ ܕܡܵܐܠܹܗ ܟܲܪ݇ܣܹܗ ܡ̣ܢ ܦܲܪ̈ܬܘܼܚܹܐ ܕܢܲܦܠܝܼ ܗ݇ܘܵܘ ܡ̣ܢ ܦܵܬܘܿܪܹ̈ܐ ܕܗ̇ܘ ܥܲܬܝܼܪܵܐ: ܐܸܠܵܐ ܐܘܿܦ ܟܲܠܒܹ̈ܐ ܐܵܬܝܼ ܗ݇ܘܵܘ ܘܠܲܟܚܝܼ ܗ݇ܘܵܘ ܒܪ̈ܝܼܢܵܬܘܼܗܝ. ܐܝܼܢܵܐ ܗ݇ܘܹܐܠܵܗ̇ ܘܡܝܼܬܠܹܗ ܗ̇ܘ ܡܸܣܟܹܢܵܐ. ܘܩܲܡ ܠܲܒܠܝܼܠܹܗ ܡܲܠܲܐܟ݂ܹ̈ܐ ܠܥܘܼܒܹܗ ܕܐܲܒܼܪܵܗܲܡ. ܐܝܼܢܵܐ ܐܘܿܦ ܗ̇ܘ ܥܲܬܝܼܪܵܐ ܡܝܼܬܠܹܗ ܘܦܸܫܠܹܗ ܩܒܼܝܼܪܵܐ. ܘܟܲܕ ܓ̰ܲܢܓ̰ܘܼܪܹܐ ܓܵܘ ܫܝܘܿܠ: ܡܘܼܪܸܡܠܹܗ ܥܲܝܢܘܼ̈ܗܝ ܡ̣ܢ ܪܘܼܚܩܵܐ، ܘܚܙܹܐܠܹܗ ܠܐܲܒܼܪܵܗܲܡ ܘܠܠܲܥܵܙܲܪ ܒܥܘܼܒܹܗ: ܘܩܪܹܐܠܹܗ ܒܩܵܠܵܐ ܪܵܡܵܐ ܘܐ݇ܡܸܪܹܗ: ܒܵܒܝܼ ܐܲܒܼܪܵܗܲܡ: ܪܲܚܸܡ ܥܲܠܝܼ ܘܫܵܕܸܪ ܠܠܲܥܵܙܲܪ ܕܛܵܡܸܫ ܪܹܫܵܐ ܕܨܸܒܥܹܗ ܒܡܝܼ̈ܵܐ ܘܡܲܬܪܹܐ ܠܹܗ ܠܸܫܵܢܝܼ، ܕܗܵܐ ܓ̰ܲܢܓ̰ܘܼܪܹܐ ܝܘܸܢ ܓܵܘ ܐܵܗܵܐ ܫܲܠܗܝܼܒܼܝܼܬܵܐ. ܐܵܡܸܪ ܐܸܠܹܗ ܐܲܒܼܪܵܗܲܡ: ܒܪܘܿܢܝܼ: ܕܟܼܘܼܪ ܕܩܘܼܒܸܠܘܼܟܼ ܛܵܒܼܵܬܘܼܟܼ ܓܵܘ ܚܲܝܘܼܟܼ، ܘܠܲܥܵܙܲܪ ܒܝܼܫܵܬܹ̈ܗ: ܘܐܵܕܝܼܵܐ ܗܵܐ ܡܲܢܝܘܼܚܹܐ  ܝܠܹܗ ܠܲܐܟܼܵܐ، ܘܐܲܢ݇ܬ ܓ̰ܲܢܓ̰ܘܼܪܹܐ. ܘܥܲܡ ܟܠܲܝܗܝ ܐܲܢܹܐ: ܗܵܘܬܵܐ ܪܲܒܬܵܐ ܡܘܼܬܝܼܒܼܬܵܐ ܝܠܵܗ̇ ܒܲܝܬ݇ܠܲܢ ܘܐܸܠܵܘܟܼܘܿܢ ܕܐܲܝܢܝܼ ܕܒܲܣܡܵܐ ܠܗ݇ܘܿܢ ܡ̣ܢ ܠܲܐܟܼܵܐ ܕܥܲܒܼܪܝܼ ܠܟܸܣܠܵܘܟܼܘܿܢ ܠܹܐ ܡܵܨܝܼ، ܘܐܘܿܦܠܵܐ ܕܡ̣ܢ ܬܵܡܵܐ ܕܥܲܒܼܪܝܼ ܠܘܵܬܲܢ: ܐܵܡܸܪ ܐܸܠܹܗ: ܡ̣ܢ ܐܵܕܝܼܵܐ ܒܸܛܠܵܒܵܐ ܝܘܸܢ ܡܸܢܘܼܟܼ ܒܵܒܝܼ: ܕܫܲܕܪܸܬ ܠܹܗ ܠܒܲܝܬܵܐ ܕܒܵܒܝܼ، ܣܵܒܵܒ ܚܲܡܫܵܐ ܐܲܚܘܿܢܘܵܬܹ̈ܐ ܐܝܼܬܠܝܼ. ܐܵܙܸܠ ܣܵܗܸܕ ܐܸܠܲܝܗܝ. ܕܠܵܐ ܐܵܦ ܐܵܢܝܼ ܐܵܬܝܼ ܠܗܵܕܹܐ ܕܘܼܟܬܵܐ ܕܓ̰ܘܼܢܓ̰ܵܪܵܐ: ܐܵܡܸܪ ܐܸܠܹܗ ܐܲܒܼܪܵܗܲܡ: ܐܝܼܬܠܗ݇ܘܿܢ ܡܘܼܫܹܐ ܘܢܒܼܝܼܹ̈ܐ: ܫܲܡܥܝܼ ܐܸܠܲܝܗܝ: ܐܝܼܢܵܐ ܗ̇ܘ ܐ݇ܡܸܪܹܗ ܐܸܠܹܗ: ܠܵܐ ܒܵܒܝܼ ܐܲܒܼܪܵܗܲܡ: ܐܸܠܵܐ ܐܸܢ ܐ݇ܢܵܫܵܐ ܡ̣ܢ ܡܝܼܬܹ̈ܐ ܐܵܙܸܠ ܠܟܸܣܠܲܝܗܝ ܒܸܬ ܬܲܘܸܒܝܼ. ܐܵܡܸܪ ܐܸܠܹܗ ܐܲܒܼܪܵܗܲܡ: ܐܸܢ ܠܡܘܼܫܹܐ ܘܠܢܒܼܝܼܹ̈ܐ ܠܵܐ ܫܲܡܥܝܼ، ܐܵܦ ܐܸܢ ܐ݇ܢܵܫܵܐ ܡ̣ܢ ܡܝܼܬܹ̈ܐ ܩܵܐܸܡ ܠܹܐ ܡܗܲܝܡܢܝܼ ܐܸܠܹܗ. ܘܐ݇ܡܸܪܹܗ ܝܑܼܫܘܿܥ ܠܬܲܠܡܝܼ̈ܕܘ̈ܗܝ: ܠܹܐ ܡܲܨܝܵܐ ܕܠܵܐ ܐܵܬܝܼ ܟܦܘܼܪ̈ܝܹܐ: ܐܝܼܢܵܐ ܘܵܝ ܠܗ̇ܘ ܕܒܐܝܼܕܹܗ ܐܵܬܝܼ، ܒܘܼܫ ܨܦܵܝܝܼ ܗ݇ܘܵܐ ܐܸܠܹܗ ܐܸܢ ܐܲܪܚܹܐ ܕܚܡܵܪܵܐ ܗܵܘܝܵܐ ܗ݇ܘܵܐ ܬܠܝܼܬܵܐ ܒܩܕܵܠܹܗ ܘܪܘܼܦܝܵܐ ܓܵܘ ܝܵܡܵܐ: ܡ̣ܢ ܕܡܲܟܦܸܪ ܠܚܲܕ݇ ܡ̣ܢ ܐܲܢܹܐ ܙܥܘܿܪܹ̈ܐ. ܗ݇ܘܹܝܡܘܿܢ ܗܸܫܝܵܪ ܒܓܵܢܵܘܟܼܘܿܢ. ܐܸܢ ܚܵܛܹܐ ܐܲܚܘܿܢܘܼܟܼ ܢܓ̰ܘܼ ܒܝܼܹܗ، ܘܐܸܢ ܬܲܘܸܒ ܫܒܼܘܿܩ ܠܹܗ. ܘܐܸܢ ܫܒܼܲܥ ܓܵܗܹ̈ܐ ܒܝܵܘܡܵܐ ܥܵܒܼܸܕ ܓܢܵܗܵܐ ܒܝܼܘܼܟܼ، ܘܫܒܼܲܥ ܓܵܗܹ̈ܐ ܒܝܵܘܡܵܐ ܕܵܥܸܪ ܠܘܵܬܘܼܟܼ ܘܐܵܡܸܪ: ܕܬܲܘܘܼܒܹܐ ܝܘܸܢ، ܫܒܼܘܿܩ ܠܹܗ: ܘܐ݇ܡܸܪܗ݇ܘܿܢ ܫܠܝܼܚܹ̈ܐ ܠܡܵܪܲܢ: ܡܲܙܝܸܕܠܲܢ ܗܲܝܡܵܢܘܼܬܵܐ. ܐܵܡܸܪ ܐܸܠܲܝܗܝ: ܐܸܢ ܐܝܼܬ ܗ݇ܘܵܐ ܠܵܘܟܼܘܿܢ ܗܲܝܡܵܢܘܼܬܵܐ ܐܲܝܟܼ ܕܲܢܕܸܟܬܵܐ ܕܚܲܪܕܲܠ: ܒܸܬ ܐܲܡܪܝܼܬܘܿܢ ܗ݇ܘܵܐ ܠܐܵܗܵܐ ܬܘܼܬܵܐ: ܦܘܼܫ ܥܩܝܼܪܵܐ ܘܦܘܼܫ ܢܨܝܼܒܼܵܐ ܒܝܲܡܵܐ: ܒܸܬ ܡܲܨܝܸܬ ܗ݇ܘܵܐ ܐܸܠܵܘܟܼܘܿܢ. ܐܝܼܢܵܐ ܡܵܢܝܼ ܡܸܢܵܘܟܼܘܿܢ ܕܐܝܼܬܠܹܗ ܥܲܒܼܕܵܐ ܕܛܵܪܹܐ ܦܬܵܢܵܐ. ܝܲܢ ܕܡܲܪܥܹܐ ܥܸܪ̈ܒܹܐ. ܘܐܸܢ ܐܵܬܹܐ ܡ̣ܢ ܚܲܩܠܵܐ: ܒܸܬ ܐܵܡܸܪ ܐܸܠܹܗ ܒܗ̇‌ܝ ܥܕܵܢܵܐ ܥܒܼܘܿܪ ܝܬܸܒܼ: ܐܸܠܵܐ ܒܸܬ ܐܵܡܸܪ ܐܸܠܹܗ. ܗܵܕܸܪ ܐܸܠܝܼ ܡܸܢܕܝܼ ܕܐܲܟܼܠܸܢ ܐ݇ܟ݂ܲܠ݇ܪܲܡܫܵܐ: ܘܐ݇ܣܘܿܪ ܚܲܨܘܼܟܼ ܥܒܼܘܼܕ ܠܝܼ ܚܸܠܡܵܬ ܗܲܠ ܕܐܲܟܼܠܸܢ ܘܫܵܬܸܢ. ܘܡ̣ܢ ܒܵܬ݇ܪ ܗܵܕܵܐ ܐܵܦ ܐܲܢ݇ܬ ܐܲܟܼܠܸܬ ܘܫܵܬܸܬ: ܩܵܡܘܿ ܛܥܵܢܬܵܐ ܕܡܸܢܬܵܐ ܒܸܬ ܩܵܒܸܠ ܗ̇ܘ ܥܲܒܼܕܵܐ ܕܥܒܼܸܕܠܹܗ ܡܸܢܕܝܼ ܕܦܸܫܠܹܗ ܦܩܝܼܕܵܐ ܐܸܠܹܗ؟ ܠܹܐ ܝܘܸܢ ܒܸܚܫܵܒܼܵܐ. ܗܲܕܟܼܵܐ ܐܘܿܦ ܐܲܚܬܘܿܢ: ܐܝܼܡܵܢ ܕܥܒܼܝܼܕܠܵܘܟܼܘܿܢ ܟܠܲܝܗܝ ܐܲܢܹܐ ܕܦܩܝܼܕܹܐ ܝܢܵܐ ܐܸܠܵܘܟܼܘܿܢ. ܐ݇ܡܘܼܪܘܿܢ ܕܥܲܒܼܕܹ̈ܐ ܒܲܛܝܼܠܹ̈ܐ ܝܘܲܚ. ܕܡܸܢܕܝܼ ܕܕܲܝܢܵܢܹ̈ܐ ܝܘܲܚ ܗ݇ܘܵܐ ܠܸܥܒܼܵܕܵܐ ܥܒܼܸܕܠܲܢ.

♱♱♱♱♱♱♱♱♱