ܚܲܕܼܒ̇ܫܲܒܵܐ ܕܚܲܡܫܵܐ ܕܩܲܝܛܵܐ

 

   ܡܲܪܡܝܼܬܼܵܐ ܕܐ݇ܪ̈ܵܙܹܐ؛ ܐܹܪܲܡ̱ܪܡܵܟܼ ܡܵܪܝ ܡܲܠܟܵܐ. 

 

   ܕܩܲܢܟܹ̇ܐ؛ ܒܠܵܟܼܘܼ ܩܵܪܹܝ̇ܢܲܢ.

ܫܲܒܲܚܘ ܠܡܵܪܝܵܐ ܒܩܘܼܕܼܫܹܗ؛ ܘܲܢܫܲܒ̇ܚܘܼܢ ܠܲܫܡܵܟܼ ܠܥܵܠܡܝܼܢ. ܫܘܼܒ̣ܚܵܐ ܠܗܵܘ̇ ܚܲܝܠܵܐ ܕܡܸܬܼܟܿܪܸܙ ܬܠܝܼܬܼܵܐܝܼܬܼ ܘܡܸܣܬ̇ܓܸܕܼ ܫܒ̣ܝܼܚܵܐܝܼܬܼ؛ ܬܢܝܼ. ܘܫܲܒܲܚ ܒܵܗ̇.

 

    ܩܸܪܝܵܢܵܐ؛  ܟܵܗܢܹ̈ܐ؛ ܟܓ؛ 9‐23 ܚܲܒ̣ܪܹܗ؛ ܐܹܫܲܥܝܵܐ؛ ܟܚ؛ 14‐23

 

  ܫܘܼܪܵܝܵܐ. ܛ܀ ܗܸܘܲܝܢ ܚܸܣܕܵܐ ܠܲܫܒ̣ܵܒܲܝ̈ܢ‌* ܘܡܘܼܝܵܩܵܐ ܘܒܼܘܼܙܵܚܵܐ ܠܐܲܝܠܹܝܢ ܕܲܚܕܼܵܪ̈ܲܝܢ ܐܸܢܘܿܢ‌* ܥܕܲܡܵܐ ܠܐܸܡܲܬ̣ܝ ܪܵܓܹܙ̇ ܐܲܢ݇ܬ̇ ܡܵܪܝܵܐ‌* ܘܝܵܩܹ̇ܕܼ ܐܲܝܟܼ ܢܘܼܪܵܐ ܪܘܼܓ̣ܙܵܟܼ‌* ܐܲܫܘܿܕܼ ܪܘܼܓ̣ܙܵܟܼ ܥܲܠ ܥܲܡܡܹ̈ܐ ܐܲܝܠܹܝܢ ܕܠܵܐ ܝܲܕܼܥ̣ܘܼܟܼ‌* ܘܥܲܠ ܡܲܠܟ̈ܘܵܬܼܵܐ ܐܲܝܠܹܝܢ ܕܒܲܫܡܵܟܼ ܠܵܐ ܩܪ̣̈ܵܝ‌* ܡܸܛܠ ܕܐܲܟ̣ܠܘܼܗ‌ܝ ܠܝܲܥܩܘܿܒܼ ܘܲܠܕܲܝܪܹܗ ܚ̣ܪܲܒ̣ܘ‌* ܘܠܵܐ ܬܸܬ̇ܕܟܲܪ ܠܲܢ ܚܛܵܗܲܝ̈ܢ ܩܲܕܼܡܵܝܹ̈ܐ‌* ܒܲܥܓܲܠ ܢܩܲܕ̇ܡܘܼܢܵܢ ܪ̈ܲܚܡܲܝܟ‌*

 

   ܫܠܝܼܚܵܐ؛  ܒ؛ ܩܘܿܪ̈ܲܢܬܼܵܝܹܐ؛ ܝܒ؛ 14‐ܝܓ؛ ܫܘܼܠܵܡܵܐ

 

   ܙܘܼܡܵܪܵܐ. ܒܪܵܥܝܹܗ. ܛܘܼܒܼܵܘܗ‌ܝ ܠܡ̇ܢ ܕܚܵܐܲܪ ܒܡܸܣܟܹ̇ܢܵܐ. ܒܝܵܘܡܵܐ ܕܒܼܝܼܫܬܵܐ ܢܦܲܠܛܝܼܘܗ‌ܝ ܡܵܪܝܵܐ. ܡܵܪܝܵܐ ܢܢܲܛܪܝܼܘܗ‌ܝ ܘܢܲܚܹܝܘܗ‌ܝ ܘܢܲܛܐܸܒܼ ܠܸܗ ܒܐܲܪܥܵܐ. ܓ܀ ܘܠܵܐ ܢܲܫܠ̱ܡܝܼܘܗ‌ܝ ܠܲܒܼܥܸܠܕ̇ܒ̣ܵܒܼܵܘ̈ܗ‌ܝ. ܡܵܪܝܵܐ ܢܣܲܡܟܼܝܼܘܗ‌ܝ ܥܲܠ ܥܲܪܣܵܐ ܕܟܹܐܒ̣ܵܘ̈ܗ‌ܝ. ܒ܀

 

   ܐܹܘܲܢܓܲܠܝܼܘܿܢ؛  ܠܘܼܩܵܐ؛ 19‐ܝܙ؛ 11

 

ܕܐܹܘܲܢܓܲܠܝܼܘܿܢ. ܒܐܲܠܵܗܵܐ ܡܸܠܬܼܵܐ. ܠܵܐ ܬܸܕܼܚܲܠ ܡܵܐ ܕܥܵܬܲܪ ܓܲܒ̣ܪܵܐ؛ ܥܲܠ ܕܠܵܐ ܥ̣ܗܲܕܼܘ ܠܡܸܥܒܲܕܼ ܛܵܒ̣ܬܼܵܐ. ܕܨܘܼܪܬܵܐ. ܠܝܵܗܘܿܒܼܵܐ ܗ݇ܘܼ ܓܹܝܪ ܚܲܕܵܝܵܐ ܪܵܚܹ̇ܡ ܐܲܠܵܗܵܐ. ܗܵܘ̇ ܕܠܵܐ ܗܘܸܵܐ ܝܵܗܘܿܒ̣ܵܐ ܚܲܕܵܝܵܐ ܠܲܣܢܝܼܩܘܼܬܹܗ ܕܠܵܥܵܙܲܪ. ܠܵܐ ܐܸܫ̣ܟܲܚ ܢܦܹܐܫܵܐ ܟܲܕܼ ܡܸܫܬܲܠܗܲܒ̣ ܗ݇ܘ̣ܵܐ. ܒܓܼܵܘ ܗܵ‌ܝ ܓܹܗܲܢܵܐ ܕܠܵܐ ܕܵܥ̇ܟܵܐ. ܗܵܘ̇ ܓܠܝܼܙ ܡ̣ܢ ܪ̈ܲܚܡܹܐ ܥܲܬ̇ܝܼܪܵܐ. ܠܵܐ ܓܹܝܪ ܝܼܕܲܥ̣ ܒܗܵܢ ܥܵܠܡܵܐ ܟܲܕܼ ܐܝܼܬܼܵܘܗ‌ܝ ܒܓܹܐ̈ܘܵܬܼܵܐ. ܕܲܩܕܼܵܡ ܟܘܼܪܣܲܝ ܡܲܠܟ̇ܘܼܬܼܵܐ. ܒܵܪܟ̇ܝܼܢ ܘܣܵܓ̣ܕ̇ܝܼܢ ܟܠܗܘܿܢ ܒܢܲܝ̈ܢܵܫܵܐ ܢܵܚܬܲܝ̈ ܠܥܲܦܪܵܐ. ܐܸܠܵܐ ܡܦܲܢܲܩ ܗ݇ܘ̣ܵܐ ܒܣܲܓ̇ܝܼܐܘܼܬܼ ܢܸܟܼܣܹ̈ܐ. ܘܥܘܼܬܼܪܵܐ ܥܵܒ̣ܘܿܪܵܐ. ܗܵܘ̇ ܕܠܵܐ ܐܸܬܼܡ̱ܨܝܼ. ܕܢܘܼܛܦܬܼܵܐ ܕܛܲܠܵܐ ܢܲܛܸܦ ܠܝܲܩܕܵܢܹܗ. ܘܢܸܦ̱ܪܩܝܼܘܗ‌ܝ ܡ̣ܢ ܥܘܼܙܵܐ ܕܬܲܫܢܝܼܩܵܐ. ܘܡܸܢܹܗ ܐܲܢ݇ܬ̇ ܫܵܘܙܸܒܲܝܢ ܕܲܝܵܢܵܐ ܟܹܐܢܵܐ ܡܵܪܹܟ̇ܠ ܫܘܼܒ̣ܚܵܐ ܠܵܟܼ؛ ܬܢܝܼ؛ ܫܲܒܲܚ. ܡܲܢܘܼ ܕܠܵܐ ܢܸܬ̇ܬ̇ܘܸܐ ܟܲܕܼ ܡܸܬܼܒܲܩܸܐ ܒܫܘܼܚܠܵܦܵܐ ܕܲܗܘܸܵܐ. ܡ̣ܢ ܥܲܬܝܼܪܵܐ ܨܹܝܕܼ ܠܵܥܵܙܲܪ ܘܢܸܗܘܸܐ ܒܐܸܒ̣ܠܵܐ. ܗܵܘ̇ ܕܡ̣ܢ ܩܕܼܝܼܡ ܗܘܸܵܐ ܒܒܼܘܼܣܵܡܵܐ. ܗܵܐ ܓܵܥܹ̇ܐ ܓܵܘ ܢܘܼܪܵܐ. ܐܵܒ̣ܝ ܐܲܒ̣ܪܵܗܵܡ ܐܸܬܼܪܲܚܲܡ ܥܠܲܝ. ܘܲܠܠܵܥܵܙܲܪ ܒܲܥܓܲܠ ܫܲܕܲܪ ܠܝܼ. ܕܢܸܬܸ̇ܠ ܒܪܹܫ ܚܸܨܪܹܗ ܡܲܝ̈ܵܐ ܠܬܲܫܢܝܼܩܝ. ܕܗܵܐ ܒܢܘܼܪܵܐ ܟܣܝܼܬܼܵܐ ܡܸܫܬܲܠܗܲܒ̣ ܐ݇ܢܵܐ. ܐܲܒ̣ܪܵܡ ܕܹܝܢ ܕܲܡܠܸܐ ܗ݇ܘ̣ܵܐ ܪ̈ܲܚܡܹܐ. ܠܵܐ ܨܒ̣ܵܐ ܕܲܢܪܲܚܸܡ ܥܲܠ ܗܵܘ̇ ܕܐܵܦ ܗܸܘ ܠܵܐ ܪܲܚܸܡ̣. ܢܸܥܪܘܿܩ ܚܢܲܢ ܗܵܟܹܝܠ ܘܠܵܐ ܢܸܬ̇ܕܲܡܸܐ ܠܲܓ̣ܠܝܼܙ ܡ̣ܢ ܪ̈ܲܚܡܹܐ. ܘܢܸܪܗܲܛ ܒܵܬܲܪ ܗܵܘ̇ ܕܛܵܒ̣ܵܬܹ̈ܗ ܡܲܫܦܲܥ ܥܲܠ ܕܲܣܢܝܼܩ. ܐܵܦ ܗܵܘ̇ ܓܹܝܪ ܡܲܢ ܕܲܡܪܲܚܸܡ. ܢܸܫܬ̇ܘܸܐ ܠܪ̈ܲܚܡܹܐ ܡ̣ܢ ܕܲܝܵܢܵܐ ܕܟܹܐܢܘܼܬܼܵܐ.

 

   ܕܐ݇ܪ̈ܵܙܹܐ. ܒܡܲܕܼܒ̇ܚܵܟܼ ܡܵܪܝܵܐ. ܒܲܪܸܟܼܘ ܠܡܵܪܝܵܐ ܡܲܠܲܐܟ̣ܵܘ̈ܗ‌ܝ؛ ܡܫܲܡܫܵܢܵܘ̈ܗ‌ܝ ܕܥܵܒ̣ܕ̇ܝܼܢ ܨܸܒ̣ܝܵܢܹܗ. ܕܨܘܼܪܬܵܐ. ܚܲܝ̈ܠܵܘܵܬܼܵܐ ܣܲܓܝܼܐܹ̈ܐ ܕܲܫܡܲܝܵܐ ܟܲܕܼ ܡܫܲܒ̇ܚܝܼܢ. ܚܵܕܹܝ̇ܢ ܗ݇ܘ̣ܵܘ ܘܲܡܫܲܒ̇ܚܝܼܢ ܠܐܲܠܵܗܵܐ. ܚܲܝ̈ܠܵܘܵܬܼܵܐ ܕܡܲܠܲܐܟܹ̈ܐ ܒܵܪܟ̇ܝܼܢ ܘܣܵܓ̣ܕ̇ܝܼܢ ܘܲܡܫܲܒ̇ܚܝܼܢ. ܠܲܚܕܼܵܐ ܬܠܝܼܬܼܵܝܘܼܬܼܵܐ. ܘܠܲܟܼܝܵܢܵܐ ܣܓ̣ܝܼܕܼܵܐ ܫܘܼܒ̣ܚܵܐ ܐܲܡܝܼܢܵܐ ܡܲܣܩܝܼܢ. ܒܩܵܠܹ̈ܐ ܩܲܕ̇ܝܼܫܹ̈ܐ ܟܠܗܘܿܢ ܡܗܲܠܠܝܼܢ. ܠܚܲܕܼ ܚܲܝܠܵܐ ܟܲܣܝܵܐ ܕܐܝܼܬܼܘܼܬܼܵܐ؛ ܬܢܝܼ؛ ܘܫܲܒܲܚ ܒܵܗ̇.

 

   ܕܒܹܝܡ؛ ܥܘܼܢܵܝܵܐ. ܚܲܝ̈ܠܵܘܵܬܼܵܐ ܕܲܫܡܲܝܵܐ ܩܵܝ̇ܡܝܼܢ ܥܲܡܲܢ ܒܓܼܵܘ ܒܹܝܬܼ ܩܘܼܕܼܫܵܐ. ܘܲܡܙܲܝܚܝܼܢ ܠܹܗ ܠܐܸܡܪܹܗ ܚܲܝܵܐ ܕܐܲܠܵܗܵܐ ܕܲܕܼܒ̣ܝܼܚ ܩܘܼܕܼܡܲܝܢ܀ ܩܪܘܿܒ̣ܘ ܣܲܒ̣ܘ ܐܲܚܲܝ̈ ܦܲܓ̣ܪܹܗ ܘܲܕܼܡܹܗ ܕܲܡܫܝܼܚܵܐ. ܘܝܲܒܸ̇ܒܼܘ ܘܐܸܡܲܪܘ ܗܲܠܸܠܘܼܝܲܗ. ܒܪܝܼܟܼ ܕܝܲܗ̣݇ܒ̣ ܠܲܢ ܦܲܓ̣ܪܹܗ ܘܲܕܼܡܹܗ ܕܢܸܬܼܚܲܣܸܐ ܒܹܗ܀

ܒܵܬܹ̈ܐ؛ ܠܗܵܢܵܐ ܐ݇ܪܵܙܵܐ ܠܵܐ ܐ݇ܢܵܫ ܡܸܫܟܲܚ ܕܢܸܫܬܲܥܸܐ ܥܲܠ ܪܲܒ̇ܘܼܬܹܗ. ܕܐܵܦ ܡܲܠܲܐܟܹ̈ܐ ܒܕܸܚܠܵܐ ܩܵܝ̇ܡܝܼܢ ܘܒܲܪܬܹܝܬܼܵܐ ܡܵܐ ܕܡܸܬܼܩܲܪܲܒ̣܀ ܩܪܘܿܒ̣ ܣܲܒ̣ܘ...܀ ܠܗܵܢܵܐ ܐ݇ܪܵܙܵܐ ܣܪܵܦܵܐ ܒܐܝܼܕܹܗ ܠܵܐ ܐܲܡܪܲܚ̣ ܠܡܸܬܼܩܲܪܵܒ̣ܘܼ. ܘܗܵܫܵܐ ܟܵܗܢܹ̈ܐ ܒܥܹܕ̇ܬܵܐ ܛܥܝܼܢܝܼܢ ܘܲܡܙܲܝܚܝܼܢ ܥܲܠ ܐܝܼܕܲܝ̈ܗܘܿܢ܀ ܩܪܘܿܒ̣ܘ ܣܲܒ̣ܘ...܀ ܐܵܠܸܦ ܐܲܠܦܝܼ̈ܢ ܩܵܝ̇ܡܝܼܢ ܥܲܡܲܢ ܒܹܝܬܼ ܩܘܼܕܼܫܵܐ ܟܪ̈ܘܿܒܹܐ ܘܲܣܪ̈ܵܦܹܐ. ܒܗ̇ܘ ܥܸܕܵܢܵܐ ܕܲܡܩܲܕ̇ܫܝܼܢ ܟܵܗܢܹ̈ܐ ܦܲܓ̣ܪܵܐ ܘܲܕܼܡܵܐ ܚܲܝܵܐ܀ ܩܪܘܿܒ̣ܘ ܣܲܒ̣ܘ...܀

 

♱♱♱♱♱♱♱♱♱♱♱

 

The Assyrian Church of the East did not yet sanction this document.
Please email any errors/corrections you may find to Fr. Lawrance Namato via
Lnamato@gmail.com

 

1: This Document is typed using EastAssyrian Font.
2:
 Download the EastAssyrian Font

3: Install the downloaded font.

4: Copy any part of this page and Paste into Microsoft Word, then change the font to EastAssyrian or to your favorite Assyrian font.

 

Qasha Lawrance Namato