ܚܲܕܼܒܫܲܒܵܐ ܕܚܲܡܫܵܐ ܕܲܩܝܵܡܬܵܐ
ܕܘܼܟ̣ܪܵܢܵܐ ܗ݇ܘ̣ ܕܡܵܪܝ ܐܲܕܲܝ ܫܠܝܼܚܵܐ
ܐܹܫܲܥܝܵܐ ܡܛ؛ 7‐14
ܬܸܒ̣ܘ ܘܲܫܠܵܘ ܢܒ̣ܝܼܘܼܬܹܗ ܕܐܹܫܲܥܝܵܐ؛ ܐܲܚܲܝ̈ ܒܲܪܸܟ̣ܡܵܪܝ܀
ܗܵܕܟ̣ܵܐ ܗܵܕܟ̣ܵܐ ܒܹܐܡܵܪܵܐ ܝ݇ܠܹܗ ܡܵܪܝܵܐ ܩܲܕܝܼܫܹܗ ܕܝܼܣܪܵܝܹܠ ܘܦܵܪܘܿܩܹܗ؛ ܗ̇ܘ ܕܡܘܼܣܠܝܼܬܵܐ ܝ݇ܠܵܗ̇ ܓܵܢܹܗ ܘܡܘܼܣܠܝܼܵܐ ܡ̣ܢ ܛܵܝܸܦܵܐ ܘܡ̣ܢ ܪܹ̈ܓܵܘܵܬܹܐ ܕܗܵܟܝܼܡܹ̈ܐ؛ ܡܲܠܟܹ̈ܐ ܒܸܬ ܚܵܙܝܼ ܘܩܵܝܡܝܼ؛ ܘܗܵܟܝܼܡܹ̈ܐ ܒܸܬ ܡܲܟܸܦܝܼ ܪܹܫܵܐ ܩܵܕ݇ܡܹܗ؛ ܒܘܼܬ ܚܵܬܸܪ ܡܵܪܝܵܐ ܕܡܗܘܼܡܢܵܐ ܝ݇ܠܹܗ ܘܩܲܕܝܼܫܵܐ ܕܝܼܣܪܵܝܹܠ ܕܩܲܡ ܓܵܒܹܐܠܘܼܟܼ܀ ܗܵܕܟ̣ܵܐ ܒܹܐܡܵܪܵܐ ܝ݇ܠܹܗ ܡܵܪܝܵܐ؛ ܒܝܵܘܡܵܐ ܕܪܸܙܵܝܵܐ ܩܲܡ ܓ̰ܲܘܸܒܸܢܘܼܟܼ؛ ܘܒܝܵܘܡܵܐ ܕܦܘܼܪܩܵܢܵܐ ܩܲܡ ܗܵܝܸܪܸܢܘܼܟܼ؛ ܘܩܲܡ ܓܵܒ̣ܠܸܢܘܼܟܼ ܘܝܵܗ݇ܒ̣ܸܢܘܼܟܼ ܩܵܘܠܵܐ ܠܛܵܝܸܦܹ̈ܐ؛ ܘܒܲܗܪܵܐ ܠܛܵܝܸܦܹ̈ܐ؛ ܕܡܲܩܸܡܸܬ̇ ܐܲܪܥܵܐ. ܘܝܵܪܬܸܬ̇ ܝܵܪܬܘܼܬܵܐ ܕܚܵܪ̈ܵܒܝܼܹܐ܀ ܘܒܸܬ ܐܵܡܪܸܬ̇ ܠܐܲܣܝܼܪܹ̈ܐ ܦܠܘܿܛܘܿܢ؛ ܘܠܚܒ̣ܝܼܫܹ̈ܐ ܦܘܼܫܘܼܢ ܓܸܠܝܹܐ. ܥܲܠ ܐܘܼܪ̈ܚܵܬܹܐ ܒܸܬ ܪܵܥܝܝܼ؛ ܘܒܟܠܲܝܗܝ ܓ̰ܵܕܵܘܵܬܹ̈ܐ ܡܲܪܸܥܝܲܝܗܝ܀ ܠܹܐ ܟܵܦܢܝܼ ܘܠܹܐ ܨܵܗܝܝܼ؛ ܘܠܹܐ ܚܲܙܕܸܓܠܗ݇ܘܿܢ ܦܵܘܚܵܐ ܘܫܸܡܫܵܐ. ܣܵܒܵܒ ܡܪܲܚܡܵܢܲܝܗܝ ܒܸܬ ܬܲܓܒܸܪܗ݇ܘܿܢ؛ ܘܠܥܲܝܢܵܬܹ̈ܐ ܕܡܝܼܵܐ ܒܸܬ ܡܲܝܬܹܐܠܗ݇ܘܿܢ܀ ܒܸܬ ܥܵܒ̣ܕܸܢ ܟܠܲܝܗܝ ܛܘܼܪ̈ܵܢܹܐ ܐܘܼܪ̈ܚܵܬܹܐ؛ ܘܓ̰ܵܕܵܘܵܬܹܐ ܦܵܝܫܝܼ ܡܘܼܪܡܹܐ܀ ܐܲܢܹܐ ܒܸܬ ܐܵܬܝܼ ܡ̣ܢ ܪܸܚܩܵܐ؛ ܘܐܲܢܹܐ ܡ̣ܢ ܓܲܪܒܝܵܐ؛ ܘܐܲܢܹܐ ܡ̣ܢ ܝܵܡܵܐ؛ ܘܐܲܢܹܐ ܡ̣ܢ ܝܵܡܵܐ ܕܣܵܢܝܼܡ܀ ܫܲܒܚܘܿܢ ܫܡܲܝܵܐ ܘܦܨܘܿܚܝ ܐܲܪܥܵܐ؛ ܘܦܨܘܿܚܘܿܢ ܛܘܼܪ̈ܵܢܹܐ ܒܬܸܫܒܘܿܚܬܵܐ؛ ܣܵܒܵܒ ܕܝܘܼܗ݇ܒ̣ܸܠܹܗ ܡܵܪܝܵܐ ܠܸܒܵܐ ܠܛܵܝܸܦܹܗ ܘܪܘܼܚܸܡܠܹܗ ܥܲܠ ܡܸܣܟܹܢܹ̈ܐ܀
ܚܲܒ̣ܪܹܗ
ܦܪܲܟܣܝܼܣ؛ ܛ؛ 1‐20
ܫܠܵܘ ܦܪܲܟܣܝܼܣ ܕܲܫܠܝܼܚܹ̈ܐ؛ ܐܲܚܲܝ̈ ܒܲܪܸܟ̣ܡܵܪܝ܀
ܐܝܼܢܵܐ ܫܵܐܘܿܠ ܗܵܠܵܐ ܡܸܠܝܵܐ ܗ݇ܘܵܐ ܓܸܙܡܹ̈ܐ ܘܚܸܡܬܵܐ ܕܩܸܛܠܵܐ ܥܲܠ ܬܲܠܡܝܼܕܹ̈ܐ ܕܡܵܪܲܢ. ܘܛܠܸܒܠܹܗ ܐܸܠܹܗ ܟܬܵܒ̣ܵܐ ܡ̣ܢ ܓܘܼܪܵܐ ܕܟܵܗܢܹ̈ܐ ܕܝܵܗ݇ܒ̣ܸܠܹܗ ܩܵܐ ܟܢܘܼܫܝܵܬܹ̈ܐ ܕܓܵܘ ܕܲܪܡܣܘܿܩ؛ ܕܐܸܢ ܡܵܫ݇ܟ̰ܸܚ ܚܵܕܪ̈ܵܢܹܐ ܒܐܵܗܵܐ ܐܘܼܪܚܵܐ ܓܲܒ̣ܪܹ̈ܐ ܝܲܢ ܒܲܟ̣ܬܵܬܹ̈ܐ ܒܸܬ ܐܵܣܸܪ ܘܡܲܝܬܹܐܠܗ݇ܘܿܢ ܠܐܘܿܪܸܫܠܸܡ܀ ܘܟܲܕ ܒܹܐܙܵܠܵܐ ܗ݇ܘܵܐ. ܘܩܘܼܪܒܸܢܹܗ ܠܸܡܛܵܝܵܐ ܠܕܲܪܡܣܘܿܩ ܡܸܢܫܸܠܬܵܢܹܐ ܒܘܼܗܪܸܢܹܗ ܥܲܠܹܗ ܚܲܕ݇ ܒܲܗܪܵܐ ܡ̣ܢ ܫܡܲܝܵܐ܀ ܘܢܦܸܠܹܗ ܥܲܠ ܐܲܪܥܵܐ؛ ܘܫܡܝܼܥܠܹܗ ܩܵܠܵܐ ܕܒܹܐܡܵܪܵܐ ܗ݇ܘܵܐ ܐܸܠܹܗ؛ ܫܵܐܘܿܠ؛ ܫܵܐܘܿܠ؛ ܩܵܡܘܿܕܝܼ ܒܸܛܪܵܕܝܼ ܝ݇ܘܸܬ̇؟܀ ܥܲܣܩܵܐ ܝ݇ܠܵܗ̇ ܥܲܠܘܼܟܼ ܠܸܡܚܵܝܵܐ ܪ̈ܲܦܣܹܐ ܠܢܸܟܣܹ̈ܐ. ܓ̰ܘܼܘܸܒܠܹܗ ܗ̇ܘ ܘܐ݇ܡܸܪܹܗ؛ ܡܵܢܝܼ ܝ݇ܘܸܬ̇ ܡܵܪܝܼ؟ ܘܡܵܪܲܢ ܐ݇ܡܸܪܹܗ؛ ܐܵܢܵܐ ܝ݇ܘܸܢ ܝܼܫܘܿܥ ܢܵܨܪܵܝܵܐ ܗ̇ܘ ܕܐܲܢ݇ܬ̇ ܒܸܛܪܵܕܵܐ ܝ݇ܘܸܬ̇܀ ܐܸܠܵܐ ܩܘܼܡ ܥܒ̣ܘܿܪ ܠܡܕܝܼܢ݇ܬܵܐ ܘܬܵܡܵܐ ܒܸܬ ܦܵܐܹܫ ܗܘܼܡܙܸܡܵܐ ܥܲܡܘܼܟܼ ܗ̇ܘ ܡܸܢܕܝܼ ܕܘܵܓ̰ܸܒ ܝܼܠܵܗ̇ ܕܥܵܒ̣ܕܸܬ̇܀ ܘܐ݇ܢܵܫܹ̈ܐ ܘܒܹܐܙܵܠܵܐ ܗ݇ܘܵܘ ܥܲܡܹܗ ܒܐܘܼܪܚܵܐ؛ ܟܸܠܝܹܐ ܗ݇ܘܵܘ ܟܲܕ ܥܵܓ̰ܘܿܒܹܐ ܣܵܒܵܒ ܕܩܵܠܵܐ ܐܲܚܟ̰ܝܼ ܒܸܫܡܵܥܝܵܐ ܗ݇ܘܵܘ؛ ܘܗܝܼܟ̰ ܐ݇ܢܵܫܵܐ ܠܹܐ ܗ݇ܘܵܐ ܦܝܵܫܵܐ ܚܸܙܝܵܐ ܐܸܠܲܝܗܝ܀ ܘܩܸܡܠܹܗ ܫܵܐܘܿܠ ܡ̣ܢ ܐܲܪܥܵܐ؛ ܘܠܵܐ ܒܸܚܙܵܝܵܐ ܗܝܼܟ̰ ܡܸܢܕܝܼ ܟܲܕ ܥܲܝܢ̈ܘܼܗܝ ܦܬܝܼܚܹܐ ܗ݇ܘܵܘ. ܘܟܲܕ ܕܒ̣ܝܼܩܹܐ ܒܐܝܼܕ̈ܘܼܗܝ ܡܘܼܥܒ̣ܸܪܗ݇ܘܿܢ ܐܸܠܹܗ ܠܕܲܪܡܣܘܿܩ؛ ܘܠܹܐ ܗ݇ܘܵܐ ܒܸܚܙܵܝܵܐ ܩܵܐ ܬܠܵܬܵܐ ܝܵܘܡܵܢܹ̈ܐ؛ ܘܠܵܐ ܐ݇ܟ̣ܸܠܹܗ ܘܠܵܐ ܫܬܹܐܠܹܗ܀ ܘܐܝܼܬ ܗ݇ܘܵܐ ܓܵܘ ܕܲܪܡܣܘܿܩ ܚܲܕ݇ ܬܲܠܡܝܼܕܵܐ ܫܸܡܹܗ ܗ݇ܘܵܐ ܚܲܢܵܢܝܵܐ. ܘܡܵܪܝܵܐ ܐ݇ܡܸܪܹܗ ܐܸܠܹܗ ܒܚܸܙܘܵܐ؛ ܚܲܢܵܢܝܵܐ؛ ܘܐ݇ܡܸܪܹܗ؛ ܗܵܐ ܐܵܢܵܐ ܡܵܪܝܼ܀ ܘܡܵܪܲܢ ܐ݇ܡܸܪܹܗ ܐܸܠܹܗ؛ ܩܘܿܡ ܙܹܠ݇ ܠܥܵܠܘܿܠܵܐ ܕܦܵܐܹܫ ܩܸܪܝܵܐ ܬܪܝܼܨܵܐ؛ ܘܒܵܩܸܪ ܒܒܲܝܬܵܐ ܕܝܼܗܘܼܕܵܐ ܠܫܵܐܘܿܠ ܕܝܼܠܹܗ ܡ̣ܢ ܛܲܪܣܘܿܣ ܡܕܝܼܢ݇ܬܵܐ. ܣܵܒܵܒ ܗܵܐ ܟܲܕ ܗ̇ܘ ܡܨܵܠܘܿܝܹܐ؛ ܚܙܹܐܠܹܗ ܒܚܸܙܘܵܐ ܠܚܲܕ݇ ܐ݇ܢܵܫܵܐ ܫܸܡܹܗ ܚܲܢܵܢܝܵܐ؛ ܕܥܒ̣ܸܪܹܗ ܘܡܘܼܬܸܒ̣ܠܹܗ ܥܲܠܹܗ ܐܝܼܕܵܐ ܐܲܝܟܼ ܕܦܵܝܫܝܼ ܦܬܝܼܚܹܐ ܥܲܝܢ̈ܘܼܗܝ܀ ܘܐ݇ܡܸܪܹܗ ܚܲܢܵܢܝܵܐ؛ ܡܵܪܝܼ؛ ܡ̣ܢ ܪܵܒܵܐ ܐ݇ܢܵܫܹ̈ܐ ܫܡܝܼܥܠܝܼ ܒܘܼܬ ܕܐܵܗܵܐ ܐ݇ܢܵܫܵܐ ܕܟܡܵܐ ܒܝܼܫܵܬܹ̈ܐ ܡܘܼܩܒܸܠܹܗ ܠܩܲܕܝܼܫ̈ܘܼܟܼ ܓܵܘ ܐܘܿܪܸܫܠܹܡ܀ ܘܗܵܐ ܐܘܼܦ ܠܲܐܟ̣ܵܐ ܐܝܼܬܠܹܗ ܦܘܼܩܕܵܢܵܐ ܡ̣ܢ ܓܘܼܪܵܐ ܕܟܵܗܢܹ̈ܐ ܕܐܵܣܸܪ ܠܟܠܲܝܗܝ ܐܵܢܝܼ ܕܩܵܪܝܼ ܫܸܡܘܼܟܼ܀ ܐܵܡܸܪ ܐܸܠܹܗ ܡܵܪܝܵܐ؛ ܩܘܼܡ ܙܹܠ݇ ܣܵܒܵܒ ܕܡܵܐܢܵܐ ܝ݇ܠܹܗ ܓܘܼܒܝܵܐ ܐܸܠܝܼ. ܘܒܸܬ ܫܵܩܸܠ ܫܸܡܝܼ ܓܵܘ ܛܵܝܸܦܹ̈ܐ ܘܒܡܲܠܟܹ̈ܐ ܘܓܵܘ ܒܢܲܝ̈ ܝܼܣܪܵܝܹܠ܀ ܣܵܒܵܒ ܐܵܢܵܐ ܒܸܬ ܡܲܚܙܸܢܹܗ ܟܡܵܐ ܗܵܙܸܪ ܝܼܠܹܗ ܠܩܵܒܘܿܠܹܐ ܙܵܗܡܲܬܹ̈ܐ ܒܘܼܬ ܚܵܬܸܪ ܫܸܡܝܼ܀ ܗܵܝܓܵܗ̇ ܚܲܢܵܢܝܵܐ ܐ݇ܙܸܠܹܗ ܠܒܲܝܬܵܐ ܠܟܸܣܠܹܗ؛ ܘܡܘܼܬܸܒ̣ܠܹܗ ܥܲܠܹܗ ܐܝܼܕܵܐ؛ ܘܐ݇ܡܸܪܹܗ ܐܸܠܹܗ؛ ܫܵܐܘܿܠ ܐܵܚܘܿܢܝܼ. ܡܵܪܲܢ ܝܼܫܘܿܥ ܗ̇ܘ ܕܦܸܫܠܹܗ ܚܸܙܝܵܐ ܐܸܠܘܼܟܼ ܒܐܘܼܪܚܵܐ ܟܲܕ ܒܹܐܬܵܝܵܐ ܝ݇ܘܸܬ̇ ܗ݇ܘܵܐ ܫܘܼܕܪܸܢܹܗ ܕܥܲܝܢ̈ܘܼܟܼ ܦܵܝܫܝܼ ܦܬܝܼܚܹܐ؛ ܘܦܵܝܫܸܬ̇ ܡܸܠܝܵܐ ܪܘܼܚܵܐ ܕܩܘܼܕܫܵܐ܀ ܘܗܲܪ ܒܗ̇ܝ ܥܸܕܵܢܵܐ ܢܦܸܠܹܗ ܡ̣ܢ ܥܲܝܢ̈ܘܼܗܝ؛ ܚܲܕ݇ ܡܸܢܕܝܼ ܕܵܡܝܵܢܵܐ ܠܩܲܠܦܹ̈ܐ؛ ܘܦܬܸܚܠܗ݇ܘܿܢ ܥܲܝܢ̈ܘܼܗܝ ܘܩܸܡܠܹܗ ܥܡܸܕܠܹܗ܀ ܘܩܘܼܒܸܠܹܗ ܡܹܐܟ̣ܘܼܠܬܵܐ ܘܦܸܫܠܹܗ ܚܘܼܠܸܢܵܐ؛ ܘܥܘܼܪܩܸܠܹܗ ܚܲܕ݇ܟܡܵܐ ܝܵܘܡܵܢܹ̈ܐ ܠܟܸܣ ܬܲܠܡܝܼܕܹ̈ܐ ܕܐܝܼܬ ܗ݇ܘܵܐ ܓܵܘ ܕܲܪܡܣܘܿܩ܀
♱♱♱♱♱♱♱♱♱
ܚܲܕܼܒܫܲܒܵܐ ܕܚܲܡܫܵܐ ܕܲܩܝܵܡܬܵܐ
ܘܕܘܼܟܼܪܵܢܵܐ ܝ݇ܠܹܗ ܕܡܵܪܝ ܐܲܕܲܝ ܫܠܝܼܚܵܐ.
ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ
ܕܲܠܘܵܬܼ ܥܸܒܼܪ̈ܵܝܹܐ ܐܲܚܲܝ̈ ܒܲܪܸܟܼܡܵܪܝ܀
ܐܝܼܬܠܲܢ ܗܲܕܟܼܵܐ ܐܵܚܘܿܢܘܵܬ̈ܝܼ ܦܵܐܬܵܐ ܚܘܲܪܬܵܐ ܒܥܒܼܲܪܬܵܐ ܕܒܹܝܬ ܩܘܼܕܫܵܐ ܒܕܸܡܹܗ ܕܝܼܫܘܿܥ* ܘܐܘܼܪܚܵܐ ܕܚܲܝܹ̈ܐ ܕܚܘܼܕܸܬܠܹܗ ܩܵܬܲܢ ܐܵܕܝܼܵܐ ܒܣܸܬܪܵܐ ܕܬܲܪܥܵܐ ܕܝܼܠܹܗ ܒܸܣܪܹܗ* ܘܐܝܼܬܠܲܢ ܟܵܗܢܵܐ ܓܘܼܪܵܐ ܥܲܠ ܒܲܝܬܹܗ ܕܐܲܠܵܗܵܐ* ܒܲܣ ܩܲܪܒܸܢܲܚ ܐܵܕܝܼܵܐ ܒܠܸܒܵܐ ܫܲܪܝܼܪܵܐ ܘܒܗܹܒܼܝܼ ܕܗܲܝܡܵܢܘܼܬܵܐ ܟܲܕ ܡܘܼܪܝܸܣܹܐ ܠܸܒܵܘ̈ܵܬܲܢ ܘܕܘܼܟܼܝܹܐ ܡ̣ܢ ܐܸܢܝܲܬ ܒܝܼܫܬܵܐ ܘܡܘܼܣܚܝܼܵܐ ܦܲܓܼܪܲܢ ܒܡܝܼ̈ܵܐ ܕܸܟܼܝܹ̈ܐ* ܘܚܵܡܠܲܚ ܒܬܵܘܕܝܼܬܵܐ ܕܗܹܒܼܝܼܲܢ ܘܠܵܐ ܦܵܟ̰ܠܲܚ. ܣܵܒܵܒ ܣܲܪܲܣܬ ܝܼܠܹܗ ܗ̇ܘ ܕܥܵܒܼܸܕܠܹܗ ܩܵܘܠܵܐ ܥܲܡܲܢ* ܘܚܵܕܲܚ ܚܲܕ݇ ܒܗ̇ܘ ܐ݇ܚܹܪ݇ܢܵܐ ܒܪܲܚܪܲܚܬܵܐ ܕܚܘܼܒܵܐ ܘܦܘܼܠܚܵܢܹ̈ܐ ܛܵܒܹ̈ܐ* ܘܠܵܐ ܗܵܘܲܚ ܒܸܫܒܼܵܩܵܐ ܓ̰ܡܲܥ̈ܝܵܬܲܢ ܐܲܝܟܼ ܕܝܼܠܵܗ̇ ܥܵܕܲܬ ܕܚܲܕ݇ܟܡܵܐ ܐ݇ܢܵܫܹ̈ܐ. ܐܸܠܵܐ ܛܠܘܿܒܘܿܢ ܚܲܕ݇ ܡ̣ܢ ܕܗ̇ܘ ܐ݇ܚܹܪ݇ܢܵܐ. ܒܘܼܫ ܙܵܘܕܵܐ ܐܝܼܡܲܢ ܕܒܸܚܙܵܝܵܐ ܝ݇ܬܘܿܢ ܕܩܘܼܪܒܸܢܹܗ ܗ̇ܘ ܝܵܘܡܵܐ* ܣܵܒܵܒ ܐܸܢ ܚܲܕ݇ ܐ݇ܢܵܫܵܐ ܚܵܛܹܐ ܒܪܸܙܵܝܸܗ ܡ̣ܢ ܒܵܬ̄ܪ ܕܩܘܼܒܸܠܹܗ ܝ݇ܕܥܵܝܬܵܐ ܕܣܲܪܲܣܬܘܼܬܵܐ؛ ܠܲܝܬ ܕܸܒܼܚܵܐ ܕܦܵܐܸܫ ܡܘܼܩܪܸܒܼܵܐ ܡ̣ܢ ܓܸܒܵܐ ܕܚܛܝܼܵܬܹ̈ܐ* ܐܸܠܵܐ ܗܕܝܼܪܵܐ ܝ݇ܠܹܗ ܕܝܼܘܵܢ ܡܲܙܕܸܥܝܵܢܵܐ ܘܚܸܡܬܵܐ ܕܢܘܼܪܵܐ ܕܐܵܟܼܠܵܐ ܠܕܸܫ̰ܡܸܢ* ܐܸܢ ܗ̇ܘ ܕܫܵܡܸܛ ܗ݇ܘ̣ܵܐ ܢܵܡܘܿܣܵܐ ܕܡܘܼܫܹܐ ܥܲܠ ܦܘܼܡܵܐ ܕܬܪܹܝ ܝܲܢ ܕܬܠܵܬܵܐ ܣܵܗܕܹ̈ܐ ܕܠܵܐ ܪ̈ܲܚܡܸܐ ܡܵܐܸܬ ܗ݇ܘ̣ܵܐ* ܟܡܵܐ ܒܘܼܫ ܙܵܘܕܵܐ ܒܸܚܫܵܒܼܵܐ ܝ݇ܬܘܿܢ ܒܸܬ ܩܵܒܸܠ ܬܲܢܒܵܐ ܗ̇ܘ ܕܕܘܼܫܕܸܫܠܹܗ ܠܒܪܘܼܢܹܗ ܕܐܲܠܵܗܵܐ ܘܚܘܼܫܒܸܢܹܗ ܕܡܵܐ ܕܕܝܵܬܹܩܹܐ ܕܝܼܹܗ ܐܲܝܟܼ ܕܟܠ ܐ݇ܢܵܫܵܐ ܕܒܝܼܹܗ ܦܸܫܠܹܗ ܡܩܘܼܕܫܵܐ؛ ܘܡܘܼܣܠܹܐܠܹܗ ܠܪܘܼܚܵܐ ܕܫܵܦܵܩܲܬ* ܒܝܼܕܲܥܝܵܐ ܝ݇ܘܲܚ ܠܗ̇ܘ ܕܐ݇ܡܸܪܹܗ ܕܝܼܝܼ ܝ݇ܠܵܗ̇ ܫܩܲܠܬܵܐ ܕܬܘܼܥܠܵܐ؛ ܘܐܵܢܵܐ ܒܸܬ ܦܵܪܥܸܢ. ܘܡܸܢܕܪܹܫ݇ ܕܒܸܬ ܕܵܐܸܢ ܡܵܪܝܵܐ ܠܛܵܝܸܦܹܗ* ܙܕܘܼܥܬܵܐ ܓܘܼܪܬܵܐ ܝ݇ܠܵܗ̇ ܠܸܢܦܵܠܵܐ ܒܐܝܼܕܵܬܹ̈ܐ ܕܐܲܠܵܗܵܐ ܚܲܝܵܐ* ܗܲܕܟܼܵܐ ܕܟܼܘܿܪܘܿܢ ܠܝܵܘܡܵܢܹ̈ܐ ܩܵܕ݇ܡܵܝܹ̈ܐ ܐܵܢܝܼ ܕܒܝܼܲܝܗܝ ܩܘܼܒܸܠܵܘܟܼܘܿܢ ܡܲܥܡܘܿܕܝܼܬܵܐ. ܘܚܡܸܠܵܘܟܼܘܿܢ ܓܵܘ ܓ̰ܘܼܢܓ̰ܵܪܹ̈ܐ ܓܘܼܪܹ̈ܐ ܕܚܲܫܹ̈ܐ ܒܠܵܘܡܵܐ ܘܒܝܲܠܨܘܼܘܹ̈ܐ. ܘܕܗܘܹܐܠܵܘܟܼܘܿܢ ܡܲܣܚܵܪܵܐ ܘܐܘܼܦ ܫܲܪ̈ܝܼܟܹܐ ܠܐ݇ܢܵܫܹ̈ܐ ܕܐܲܢܹܐ ܩܘܼܒܸܠܗܘܿܢ* ܘܥܘܼܓ̰ܸܙܠܵܘܟܼܘܿܢ ܒܘܼܬ ܕܐܵܢܝܼ ܕܦܝܼܫܹܐ ܝ݇ܢܵܐ ܐ݇ܣܝܼܪܹ̈ܐ. ܘܣܠܵܒܵܐ ܕܕܵܘܸܠܬܵܘܟܼܘܿܢ ܒܚܲܕܘܼܬܵܐ ܩܘܼܒܸܠܵܘܟܼܘܿܢ ܣܵܒܵܒ ܒܝܼܕܵܥܝܵܐ ܝ݇ܬܘܵܢ ܕܐܝܼܬܠܵܘܟܼܘܿܢ ܕܵܘܸܠܬܵܐ ܓܵܘ ܫܡܲܝܵܐ ܕܒܘܼܫ ܨܦܵܝ ܘܠܹܐ ܒܵܛܠܵܐ* ܗܲܕܟܼܵܐ؛ ܠܵܐ ܬܵܠܩܝܼܬܘܿܢ ܓ̰ܘܼܪܐܲܬ ܕܐܝܼܬܠܵܘܟܼܘܿܢ ܕܗܕܝܼܪܵܐ ܝ݇ܠܹܗ ܩܵܬܵܗ̇ ܗܵܩܵܐ ܪܵܒܵܐ* ܣܢܝܼܩܹܐ ܝ݇ܬܘܿܢ ܠܚܡܲܠܬܵܐ ܩܵܐ ܕܥܵܒܼܕܝܼܬܘܿܢ ܪܸܙܵܝܵܐ ܕܐܲܠܵܗܵܐ ܘܫܵܩܠܝܼܬܘܿܢ ܩܵܘܠܵܐ*
♱♱♱♱♱♱♱♱♱
ܚܲܕܼܒܫܲܒܵܐ ܕܚܲܡܫܵܐ ܕܲܩܝܵܡܬܵܐ
ܝܘܚܢܢ ܟܐ: 1 ‐ 15
ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ ܟܪܘܙܘܬܼܐ ܕܝܘܚܢܢ
♰ ܒܵܬ݇ܪ ܕܐܲܢܹܐ ܡܘܼܚܙܝܼܵܐ ܠܹܗ ܓܵܢܹܗ ܡܸܢ݇ܕܪܹܫ݇ ܝܑܼܫܘܿܥ ܠܬܲܠܡܝܼ̈ܕܘܼܗܝ ܥܲܠ ܝܵܡܵܐ ܕܛܹܒܵܪܝܼܘܿܣ. ܐܝܼܢܵܐ ܗܲܕܟܼܵܐ ܡܘܼܚܙܝܼܵܐ ܠܹܗ. ܡܐܸܚܕܵܕܹܐ ܗ݇ܘܵܘ ܫܸܡܥܘܿܢ ܟܹܐܦܵܐ ܘܬܐܘܿܡܵܐ ܕܟܹܐ ܦܵܐܸܫ ܩܸܪܝܵܐ ܬܐܵܡܵܐ. ܘܢܲܬܢܝܼܐܹܝܠ ܗ̇ܘ ܕܡ̣ܢ ܩܲܛܢܹܐ ܕܓܠܝܼܠܵܐ ܘܒܢܘܿܢܹ̈ܐ ܕܙܲܒܼܕܲܝ ܘܬܪܹܝ ܐ݇ܚܹܪ̈݇ܢܹܐ ܡ̣ܢ ܬܲܠܡܝܼܕܹ̈ܐ. ܐܵܡܸܪ ܐܸܠܲܝܗܝ ܫܸܡܥܘܿܢ ܟܹܐܦܵܐ: ܐܵܢܵܐ ܒܸܬ ܐܵܙܸܠ݇ܢ ܨܲܝܕܸܢ ܢܘܼܢܹ̈ܐ: ܐܲܡܪܝܼ ܐܸܠܹܗ: ܘܐܵܦ ܐܲܚܢܲܢ ܒܸܬ ܐܵܬܸܚ ܥܲܡܘܼܟܼ. ܘܦܠܸܛܠܗ݇ܘܿܢ ܘܣܸܩܠܗ݇ܘܿܢ ܠܓܵܡܝܼ ܘܒܗ̇ܘ ܠܸܠܝܵܐ ܡܸܢܕܝܼ ܠܵܐ ܨܸܕܠܗ݇ܘܿܢ. ܐܝܼܢܵܐ ܟܲܕ ܗ݇ܘܹܐܠܹܗ ܨܲܦܪܵܐ. ܟܠܹܐ ܠܹܗ ܝܑܼܫܘܿܥ ܥܲܠ ܡܲܪܙܵܐ ܕܝܵܡܵܐ. ܘܬܲܠܡܝܼ̈ܕܹܐ ܠܵܐ ܝܕܸܥܠܗ݇ܘܿܢ ܕܝܼܫܘܿܥ ܝܠܹܗ. ܘܐ݇ܡܸܪܹܗ ܐܸܠܲܝܗܝ ܝܑܼܫܘܿܥ: ܛܠܵܝܹ̈ܐ ܐܝܼܬܠܵܘܟܼܘܿܢ ܡܸܢܕܝܼ ܠܹܐܟܼܵܠܵܐ؟ ܐܵܡܪܝܼ ܐܸܠܹܗ : ܠܵܐ. ܐܵܡܸܪ ܐܸܠܲܝܗܝ: ܕܪܹܝܡܘܿܢ ܓܲܪܕܵܘܟܼܘܿܢ ܡ̣ܢ ܓܹܒܵܐ ܝܲܡܝܼܢܵܝܵܐ ܕܓܵܡܝܼ. ܘܒܸܬ ܡܲܫ݇ܟ̰ܚܝܼܬܘܿܢ. ܘܕܪܹܐܠܗ݇ܘܿܢ ܘܠܵܐ ܡܨܹܐܠܗ݇ܘܿܢ ܠܸܓܪܵܫܹܗ ܠܓܲܪܕܵܐ ܡ̣ܢ ܒܘܼܫܵܝܝܼ ܕܢܘܼܢܹ̈ܐ ܕܕܒܼܸܩܠܹܗ. ܘܐ݇ܡܸܪܹܗ ܗ̇ܘ ܬܲܠܡܝܼܕܵܐ ܕܡܲܚܸܒ ܗ݇ܘܵܐ ܠܹܗ ܝܑܼܫܘܿܥ ܠܟܹܐܦܵܐ: ܐܵܗܵܐ ܡܵܪܲܢ ܝܠܹܗ. ܐܝܼܢܵܐ ܫܸܡܥܘܿܢ ܟܲܕ ܫܡܸܥܠܹܗ ܕܡܵܪܲܢ ܝܠܹܗ. ܫܩܸܠܹܗ ܟܘܼܬܝܼܢܹܗ ܡܚܹܐܠܹܗ ܒܚܲܨܘܼ̈ܗܝ. ܣܵܒܵܒ ܫܘܼܠܚܵܝܵܐ ܗ݇ܘܵܐ. ܘܪܘܼܦܹܐܠܹܗ ܓܵܢܹܗ ܒܝܵܡܵܐ. ܕܐܵܬܹܐ ܠܘܵܬ ܝܑܼܫܘܿܥ. ܐܝܼܢܵܐ ܬܲܠܡܝܼ̈ܕܹܐ ܐ݇ܚܹܪ̈݇ܢܹܐ ܒܓܵܡܝܼ ܐ݇ܬܹܐܠܗ݇ܘܿܢ. ܣܵܒܵܒ ܠܹܐ ܗ݇ܘܵܘ ܪܵܒܵܐ ܪܸܚܩܵܐ ܡ̣ܢ ܐܲܪܥܵܐ ܐܸܠܵܐ ܐܲܝܟܼ ܬܪܹܝ ܡܵܐܐ ܝܲܡܝܼܢܹ̈ܐ. ܘܓܲܪܫܝܼ ܗ݇ܘܵܘ ܠܹܗ ܠܗ̇ܘ ܓܲܪܕܵܐ ܕܢܘܼܢܹ̈ܐ. ܟܲܕ ܣܸܩܠܗ݇ܘܿܢ ܠܐܲܪܥܵܐ. ܚܙܹܐܠܗ݇ܘܿܢ ܓܘܼܡܪܹ̈ܐ ܟܲܕ ܡܘܼܬܒܼܹܐ ܘܢܘܼܢܵܐ ܟܲܕ ܡܘܼܬܸܒܼܬܵܐ ܥܲܠܲܝܗܝ ܘܠܲܚܡܵܐ. ܘܐ݇ܡܸܪܹܗ ܐܸܠܲܝܗܝ ܝܑܼܫܘܿܥ: ܡܲܝܬܹܡܘܿܢ ܡ̣ܢ ܐܵܢܝܼ ܢܘܼܢܹ̈ܐ ܕܨܝܼܕܠܵܘܟܼܘܿܢ ܐܵܕܝܼܵܐ. ܘܣܸܠَܩܠܹܗ ܫܸܡܥܘܿܢ ܟܹܐܦܵܐ. ܘܓܪܸܫܠܹܗ ܠܓܲܪܕܵܐ ܠܐܲܪܥܵܐ. ܟܲܕ ܡܸܠܝܵܐ ܢܘܼܢܹ̈ܐ ܓܘܼܪܹ̈ܐ ܡܵܐܐ ܘܚܲܡܫܝܼ ܘܬܠܵܬܵܐ. ܘܒܟܠܹܗ ܐܵܗܵܐ ܝܘܼܩܪܵܐ ܠܵܐ ܓ̰ܕܸܩܠܹܗ ܗ̇ܘ ܓܲܪܕܵܐ. ܘܐ݇ܡܸܪܹܗ ܐܸܠܲܝܗܝ ܝܑܼܫܘܿܥ: ܐ݇ܬܹܐܡܘܿܢ ܐ݇ܟܼܘܼܠܘܿܢ ܫܵܪܘܼܬܵܐ. ܐܝܼܢܵܐ ܐ݇ܢܵܫܵܐ ܡ̣ܢ ܬܲܠܡܝܼ̈ܕܹܐ ܠܵܐ ܩܘܼܫ̰ܕܸܪܹܗ ܕܒܵܩܸܪ ܗ݇ܘܵܐ ܠܹܗ ܡܵܢܝܼ ܝܠܹܗ. ܕܒܝܼܕܵܥܵܐ ܗ݇ܘܵܘ ܕܡܵܪܲܢ ܝܼܠܹܗ. ܐܝܼܢܵܐ ܩܘܼܪܒܸܢܹܗ ܝܑܼܫܘܿܥ. ܘܫܩܸܠܹܗ ܠܲܚܡܵܐ ܘܢܘܼܢܹ̈ܐ ܘܝܘܼܗ݇ܒܼܸܠܹܗ ܐܸܠܲܝܗܝ. ܐܵܗܵܐ ܓܵܗܵܐ ܕܬܠܵܬ ܦܸܫܠܹܗ ܚܸܙܝܵܐ ܝܑܼܫܘܿܥ ܠܬܲܠܡܝܼܕܘܼ̈ܗܝ. ܟܲܕ ܩܸܡܠܹܗ ܡ̣ܢ ܓܵܘ ܡܝܼܬܹ̈ܐ.
♱♱♱♱♱♱♱♱♱