ܚܲܕܼܒܫܲܒܵܐ ܕܲܬ̣ܪܹܝܢ ܕܲܨܠܝܼܒ̣ܵܐ
ܘܲܕܚܲܡܫܵܐ ܗ݇ܘ̣ ܕܐܹܠܝܼܵܐ
ܬܸܢܝܵܢ ܢܵܡܘܿܣܵܐ ܛ؛ 1‐9
ܬܸܒ̣ܘ ܘܲܫܠܵܘ ܬܸܢܝܵܢ ܢܵܡܘܿܣܵܐ ܣܸܦܪܵܐ ܕܚܲܡܫܵܐ ܕܐܘܿܪܵܝܬܵܐ؛
ܐܲܚܲܝ̈ ܒܲܪܸܟ̣ܡܵܪܝ܀
ܘܐ݇ܡܸܪܹܗ ܡܘܼܫܹܐ ܠܟܠܹܗ ܝܼܣܪܵܝܹܠ؛ ܐܲܢ݇ܬ̇ ܒܸܥܒ̣ܵܪܵܐ ܝ݇ܘܸܬ̇ ܐܸܕܝܘܿܡ݇ ܝܵܘܡܵܐ ܢܲܗܪܵܐ ܕܝܘܿܪܕܢܵܢ؛ ܠܹܐܙܵܠܵܐ ܘܠܬܵܠܘܿܩܹܐ ܛܵܝܸܦܹ̈ܐ ܒܘܼܫ ܓܘܼܪܹ̈ܐ ܘܒܘܼܫ ܚܲܝܠܵܢܹ̈ܐ ܡܸܢܘܼܟܼ؛ ܘܡܕܝܼܢܵܬܹ̈ܐ ܓܘܼܪܹ̈ܐ ܘܚܲܝܠܵܢܹ̈ܐ ܘܟܪ̈ܝܼܟ̣ܹܐ ܗܲܠ ܫܡܲܝܵܐ܀ ܚܲܕ݇ ܛܵܝܸܦܵܐ ܒܘܼܫ ܓܘܼܪܵܐ ܘܪܵܡܵܐ؛ ܒܢܲܝ̈ ܓܲܢ݇ܒܵܪܹ̈ܐ ܕܐܲܢ݇ܬ̇ ܝܵܕܥܸܬ̇؛ ܘܐܲܢ݇ܬ̇ ܫܸܡܥܝܵܐ ܝ݇ܘܸܬ̇ ܕܗܝܼܟ̰ ܐ݇ܢܵܫܵܐ ܠܹܐ ܡܵܨܹܐ ܠܸܟܠܵܝܵܐ ܩܵܕ݇ܡ ܓܲܢ݇ܒܵܪܹ̈ܐ؛ ܘܒܸܬ ܝܵܕܥܸܬ̇ ܐܸܕܝܘܿܡ݇ ܝܵܘܡܵܐ؛ ܕܡܵܪܝܵܐ ܐܲܠܵܗܘܼܟܼ ܒܸܥܒ̣ܵܪܵܐ ܝ݇ܠܹܗ ܩܵܕ݇ܡܘܼܟܼ؛ ܢܘܼܪܵܐ ܝ݇ܠܹܗ ܐܵܟ̣ܠܵܢܬܵܐ ܘܗ̇ܘ ܒܸܬ ܬܲܠܸܩܠܗ݇ܘܿܢ ܘܒܸܬ ܫܵܡܸܛܠܗ݇ܘܿܢ ܡ̣ܢ ܩܵܕ݇ܡܘܼܟܼ؛ ܘܡܲܚܪܸܒ̣ܸܬ̇ ܠܗ݇ܘܿܢ ܘܬܵܠܩܸܬ̇ܠܗ݇ܘܿܢ ܓ̰ܲܠܕܹܐ؛ ܐܲܝܟܼ ܕܐ݇ܡܸܪܹܗ ܐܸܠܘܼܟܼ ܡܵܪܝܵܐ܀ ܠܵܐ ܐܵܡܪܸܬ̇ ܒܠܸܒܘܼܟܼ ܐܝܼܡܲܢ ܕܫܡܝܼܛܲܝܠܹܗ ܡܵܪܝܵܐ ܐܲܠܵܗܘܼܟܼ ܡ̣ܢ ܩܵܕ݇ܡܘܼܟܼ؛ ܕܒܙܲܕܝܼܩܘܼܬܝܼ ܩܲܡ ܡܲܥܒ̣ܸܪܝܼ ܡܵܪܝܵܐ ܠܸܪܝܵܬܵܐ ܐܵܗܵܐ ܐܲܪܥܵܐ؛ ܡ̣ܢ ܣܵܒܵܒ ܚܛܝܼܵܬܹ̈ܐ ܕܐܲܢܹܐ ܛܵܝܸܦܹ̈ܐ ܒܸܬ ܬܲܠܸܩܠܗ݇ܘܿܢ ܡܵܪܝܵܐ ܡ̣ܢ ܩܵܕ݇ܡܘܼܟܼ܀ ܠܹܐ ܗ݇ܘܵܐ ܒܙܲܕܝܼܩܘܼܬܘܼܟܼ ܘܬܪܘܼܨܘܼܬܵܐ ܕܠܸܒܘܼܟܼ؛ ܒܸܥܒ̣ܵܪܵܐ ܝ݇ܘܸܬ̇ ܠܸܪܝܵܬܵܐ ܐܲܪܥܲܝܗܝ؛ ܐܸܠܵܐ ܡ̣ܢ ܚܛܝܼܵܬܹ̈ܐ ܕܐܲܢܹܐ ܛܵܝܸܦܹ̈ܐ ܬܵܠܘܿܩܲܝܗܝ ܝ݇ܠܹܗ ܡܵܪܝܵܐ ܐܲܠܵܗܘܼܟܼ ܡ̣ܢ ܩܵܕ݇ܡܘܼܟܼ ܕܡܲܩܸܡ ܩܵܘܠܵܐ ܕܝ݇ܡܹܐܠܹܗ ܠܒܵܒܵܘܵܬ̈ܘܼܟܼ؛ ܠܐܲܒ̣ܪܵܗܵܡ ܘܐܝܼܣܚܲܩ ܘܝܲܥܩܘܿܒ̣؛ ܘܕܝܵܕܥܸܬ̇ ܕܠܹܐ ܗ݇ܘܵܐ ܒܙܲܕܝܼܩܘܼܬܘܼܟܼ ܝܘܼܗ݇ܒ̣ܸܠܹܗ ܐܸܠܘܼܟܼ ܡܵܪܝܵܐ ܐܲܠܵܗܘܼܟܼ ܐܵܗܵܐ ܐܲܪܥܵܐ ܛܵܒ̣ܬܵܐ ܠܸܪܝܵܬܵܗ̇؛ ܣܵܒܵܒ ܚܲܕ݇ ܛܵܝܸܦܵܐ ܝ݇ܘܸܬ̇ ܩܕܵܠܹܗ ܩܸܫܝܵܐ܀ ܕܟ̣ܘܿܪ ܘܠܵܐ ܡܲܢܫܸܬ̇ ܕܡܘܼܟܪܸܒܠܘܼܟܼ ܠܡܵܪܝܵܐ ܐܲܠܵܗܘܼܟܼ ܓܵܘ ܒܲܪܝܼܵܐ؛ ܡ̣ܢ ܝܵܘܡܵܐ ܕܦܠܸܛܠܵܘܟ̣ܘܿܢ ܡ̣ܢ ܡܸܨܪܹܝܢ ܗܲܠ ܕܐ݇ܬܹܐܠܵܘܟ̣ܘܿܢ ܠܐܵܗܵܐ ܐܲܬܪܵܐ؛ ܗܘܹܐܠܵܘܟ̣ܘܿܢ ܛܲܪ̈ܛܸܡܵܢܹܐ ܩܵܕ݇ܡ ܡܵܪܝܵܐ܀ ܘܒܚܘܿܪܝܼܒ̣ ܡܘܼܟܪܸܒܠܵܘܟ̣ܘܿܢ ܠܡܵܪܝܵܐ؛ ܘܟܪܸܒܠܹܗ ܡܵܪܝܵܐ ܥܲܠܵܘܟ̣ܘܿܢ ܕܬܵܠܸܩܠܵܘܟ̣ܘܿܢ܀
ܚܲܒ̣ܪܹܗ
ܐܹܫܲܥܝܵܐ ܟܗ؛ 1‐9
ܫܠܵܘ ܢܒ̣ܝܼܘܼܬܹܗ ܕܐܹܫܲܥܝܵܐ؛ ܐܲܚܲܝ̈ ܒܲܪܸܟ̣ܡܵܪܝ܀
ܡܵܪܝܵܐ ܐܲܠܵܗܝܼ ܝ݇ܘܸܬ̇ ܒܸܬ ܡܲܪܡܸܢܘܼܟܼ ܘܫܵܟܪܸܢ ܠܫܸܡܘܼܟܼ؛ ܕܥܒ̣ܸܕܠܘܼܟܼ ܥܘܼܓ̰ܵܒܵܐ ܘܚܝܼܵܠ ܣܲܪܲܣܬ. ܡ̣ܢ ܪܸܚܩܵܐ ܐܵܡܹܝܢ܀ ܣܵܒܵܒ ܕܥܒ̣ܸܕܠܘܼܟܼ ܡܵܬܵܐ ܠܡܘܼܟܪܵܐ [ܠܩܘܼܚܵܐ] ܕܟܹܐܦܹ̈ܐ؛ ܘܡܕܝܼܢ݇ܬܵܐ ܓܘܼܪܬܵܐ ܠܢܦܵܠܬܵܐ. ܥܵܡܵܪܲܬ ܕܢܘܼܟ̣ܪ̈ܵܝܹܐ ܡ̣ܢ ܡܕܝܼܢ݇ܬܵܐ ܠܹܐ ܦܵܝܫܵܐ ܒܢܝܼܬܵܐ܀ ܒܘܼܬ ܕܐܵܗܵܐ؛ ܒܸܬ ܙܵܡܪܝܼܠܘܼܟܼ ܛܵܝܸܦܹ̈ܐ ܪܵܒܵܐ. ܘܡܕܝܼܢ݇ܬܵܐ ܕܛܵܝܸܦܹ̈ܐ ܚܲܝܠܵܢܹ̈ܐ ܒܸܬ ܣܵܓ̣ܕܝܼܠܘܼܟܼ܀ ܣܵܒܵܒ ܕܗܘܹܐܠܘܼܟܼ ܗܲܝܸܪܵܢܵܐ ܠܡܸܣܟܹܢܵܐ؛ ܘܗܲܝܲܪܬܵܐ ܠܦܲܩܝܼܪܵܐ ܒܐܘܼܠܨܵܢܹܵܗ؛ ܣܸܬܪܵܐ ܡ̣ܢ ܩܲܫܩܲܫܬܵܐ ܕܡܸܛܪܵܐ ܘܛܸܠܵܢܝܼܬܵܐ ܡ̣ܢ ܦܵܘܚܵܐ ܚܲܡܝܼܡܵܐ܀ ܣܵܒܵܒ ܕܦܵܘܚܵܐ ܕܙܲܪ̈ܒܵܢܹܐ ܐܲܝܟܼ ܡܸܛܪܵܐ ܝ݇ܠܹܗ ܥܲܠ ܓܘܼܕܵܐ؛ ܘܐܲܝܟܼ ܛܸܠܵܢܝܼܬܵܐ ܒܚܸܡܵܐ؛ ܪܵܡܘܼܬܵܐ ܕܢܘܼܟ̣ܪ̈ܵܝܹܐ ܒܸܬ ܦܵܝܫܵܐ ܡܘܼܡܟܸܟ̣ܬܵܐ. ܘܚܸܡܵܐ ܒܛܸܠܵܢܝܼܬܵܐ ܕܥܢܵܢܹ̈ܐ. ܩܵܛܝܼܵܐ ܕܙܲܚܡܹ̈ܐ ܒܸܬ ܦܵܐܹܫ ܡܘܼܟܸܦܵܐ܀ ܘܒܸܬ ܥܵܒ̣ܸܕ ܡܵܪܝܵܐ ܚܲܝܠܬܵܢܵܐ ܩܵܐ ܟܠܲܝܗܝ ܛܵܝܸܦܹ̈ܐ ܓܵܘ ܕܐܵܗܵܐ ܛܘܼܪܵܐ؛ ܡܲܫܬܝܵܐ ܫܲܡܝܼܢܵܐ ܘܡܲܫܬܝܵܐ ܢܛܝܼܪܵܐ ܘܫܲܡܝܼܢܵܐ؛ ܕܡܲܚܝܵܢܲܢ ܫܡܲܝܵܢܵܐ ܘܚܲܝܠܵܢܵܐ؛ ܘܒܸܬ ܦܵܐܹܫ ܒܸܠܥܝܵܐ ܒܐܵܗܵܐ ܛܘܼܪܵܐ ܦܵܬܹܗ ܕܗܵܟܝܼܡ ܕܗܵܟܘܿܡܹܐ ܗ݇ܘܵܐ ܥܲܠ ܟܠܲܝܗܝ ܛܵܝܸܦܹ̈ܐ ܘܦܪܵܡܬܵܐ ܕܦܸܫܠܵܗ̇ ܦܪܝܼܡܬܵܐ ܡ̣ܢ ܓܹܒܵܐ ܕܟܠܲܝܗܝ ܛܵܝܸܦܹ̈ܐ܀ ܘܒܸܬ ܦܵܐܹܫ ܒܸܠܥܝܵܐ ܡܵܘܬܵܐ ܠܓ̣ܵܠܝܼܒܘܼܬܵܐ ܗܲܠ ܥܵܠܲܡ؛ ܘܒܸܬ ܡܲܥܒ̣ܸܪ ܡܵܪܝܵܐ ܐܲܠܵܗܵܐ ܚܲܝܠܬܵܢܵܐ ܕܸܡܥܹ̈ܐ ܡ̣ܢ ܟܠ ܦܵܬܵܐ؛ ܘܠܵܘܡܵܐ ܕܛܵܝܸܦܹ̈ܐ ܒܸܬ ܡܲܥܒ̣ܸܪ ܡ̣ܢ ܟܠܵܗ̇ ܐܲܪܥܵܐ؛ ܣܵܒܵܒ ܕܡܵܪܝܵܐ ܗܘܼܡܙܸܡܠܹܗ܀
♱♱♱♱♱♱♱♱♱
ܚܲܕ݇ܒܼܫܹܒܵܐ ܒ ܕܨܠܝܼܒܼܵܐ ܗ ܕܐܹܠܝܼܵܐ
ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܓܹܗ
ܕܲܠܘܵܬܼ ܦܝܼܠܝܼܦܸܣܵܝܹ̈ܐ ܐܲܚܲܝ̈ ܒܲܪܸܟܼܡܵܪ.
ܡܐܵܕܝܼܵܐ ܐܵܚܘܿܢܘܵܬ̈ܝܼ ܚܕܸܐܡܘܿܢ ܒܡܵܪܲܢ؛ ܕܗܲܪ ܐܲܢܹܐ ܟܵܬܒܼܸܢ ܐܸܠܵܘܟܼܘܿܢ ܠܵܐ ܣܵܩܕܵܐ ܠܝܼ. ܣܵܒܵܒ ܩܵܬܵܘܟܼܘܿܢ ܒܸܥܒܼܵܕܵܐ ܝ݇ܢܵܐ ܗܸܫܝܲܪ* ܗܘܹܐܡܘܿܢ ܗܸܫܝܲܪ ܡ̣ܢ ܟܲܠܒܹ̈ܐ؛ ܘܡ̣ܢ ܦܵܥܠܹ̈ܐ ܒܝܼܫܹ̈ܐ؛ ܗܘܹܐܡܘܿܢ ܗܸܫܝܲܪ ܡ̣ܢ ܦܪܲܡܬܵܐ ܕܒܸܣܪܵܐ* ܣܵܒܵܒ ܓܙܘܼܪܬܵܐ ܐܲܚܢܲܢ ܝܼܘܲܚ ܐܵܢܝܼ ܕܒܸܦܠܵܚܵܐ ܝ݇ܘܲܚ ܠܐܲܠܵܗܵܐ ܒܪܘܼܚܵܐ. ܘܐܝܼܬ ܠܲܢ ܫܘܼܒܼܗܵܪܵܐ ܒܝܼܫܘܿܥ ܡܫܝܼܚܵܐ؛ ܘܠܲܝܬ ܠܲܢ ܗܹܒܼܝܼ ܥܲܠ ܒܸܣܪܵܐ܋ ܟܲܕ ܐܝܼܬ ܗ݇ܘܼܵܐ ܠܝܼ ܗܹܒܼܝܼ ܐܘܼܦ ܥܲܠ ܒܸܣܪܵܐ. ܣܵܒܵܒ ܐܸܢ ܚܲܕ݇ ܐ݇ܢܵܫܵܐ ܚܵܫܸܒܼ ܕܗܹܒܼܝܼܹܗ ܒܸܒܣܪܵܐ ܝ݇ܠܵܗ̇ ܒܘܼܫ ܙܵܘܕܵܐ ܡܸܢܹܗ ܐܵܢܵܐ* ܓܙܝܼܪܵܐ ܒܲܪ ܬܡܲܢܝܵܐ ܝܵܘܡܵܢܹ̈ܐ ܡ̣ܢ ܐܲܨܠܵܐ ܕܝܼܣܪܵܝܹܠ ܡ̣ܢ ܫܲܒܼܛܵܐ ܕܒܸܢܝܵܡܹܝܢ ܥܹܒܼܪܵܝܵܐ ܒܪܘܿܢܵܐ ܕܥܸܒܼܪ̈ܵܝܸܐ. ܒܢܵܡܘܿܣܵܐ ܦܪܝܼܫܵܝܵܐ. ܒܩܲܝܪܲܬ ܟܵܡܪܵܢܵܐ ܕܥܹܕܬܵܐ؛ ܘܒܙܲܕܝܼܩܘܼܬܵܐ ܕܢܵܡܘܿܣܵܐ ܕܠܵܐ ܠܲܟܵܐ ܝ݇ܘܸܢ ܗ݇ܘ̣ܵܐ* ܐܵܢܵܐ ܕܐܲܢܹܐ ܦܵܝܕܵܐ ܗ݇ܘ̣ܵܘ ܩܵܬܝܼ. ܚܘܼܣܪܵܢܵܐ ܚܫܝܼܒܼܵܝܠܝܼ ܒܘܼܬ ܚܵܬܸܪ ܕܡܫܝܼܚܵܐ* ܘܐܘܼܦ ܒܸܚܫܵܒܼܲܝܗܝ ܝ݇ܘܸܢ ܟܠܲܝܗܝ ܚܘܼܣܪܵܢܵܐ ܒܣܵܒܵܒ ܕܓܘܼܪܘܼܬܵܐ ܕܝ݇ܕܵܥܝܬܹܗ ܕܝܼܫܘܿܥ ܡܫܝܼܚܵܐ ܡܵܪܝܼ. ܗ̇ܘ ܕܒܘܼܬ ܚܵܬܸܪܹܗ ܟܠܡܸܢܕܝܼ ܚܣܸܪܝܼ ܘܐܲܝܟܼ ܙܸܒܠܵܐ ܚܫܸܒܼܠܝܼ؛ ܕܠܡܫܝܼܚܵܐ ܩܵܢܸܢ* ܘܦܵܝܫܸܢ ܡܘܫܫ̄ܟ̰ܚܵܐ ܒܝܼܹܗ ܟܲܕ ܠܲܝܬ ܠܝܼ ܙܲܕܝܼܩܘܼܬܵܐ ܕܓܵܢܝܼ ܗ̇ܝ ܕܡ̣ܢ ܢܵܡܘܿܣܵܐ؛ ܐܸܠܵܐ ܗ̇ܝ ܕܡ̣ܢ ܗܲܝܡܵܢܘܼܬܵܐ ܕܡܫܝܼܚܵܐ؛ ܕܝܼܠܵܗ̇ ܙܲܕܝܼܩܘܼܬܵܐ ܕܡ̣ܢ ܐܲܠܵܗܵܐ* ܕܒܝܼܵܗ̇ ܝܵܕܥܸܢ ܠܝܼܫܘܿܥ ܘܠܚܲܝܠܵܐ ܕܩܝܵܡܬܹܗ؛ ܘܗܵܘܸܢ ܫܲܪܝܼܟܵܐ ܒܚܲܫܹܗ ܘܦܵܝܫܸܢ ܡܘܼܕܡܝܼܵܐ ܒܡܵܘܬܹܗ* ܕܩܵܘܡܵܐ ܡܵܨܸܢ ܡܵܛܸܢ ܠܩܝܵܡܬܵܐ ܕܡ̣ܢ ܓܵܘ ܡܝܼܬܹ̈ܐ* ܠܹܐ ܝ݇ܘܸܢ ܗܵܠܵܐ ܩܘܼܒܠܵܐ ܝܲܢ ܗܘܝܼܵܐ ܟܵܡܝܼܠ؛ ܐܸܠܵܐ ܒܸܪܚܵܛܵܐ ܝ݇ܘܸܢ ܕܩܵܘܡܵܐ ܡܵܛܸܢ ܠܡܸܢܕܝܼ ܕܒܘܼܬ ܕܝܼܹܗ ܡܛܸܐܠܹܗ ܐܸܠܝܼ ܝܼܫܘܿܥ ܡܫܝܼܚܵܐ* ܐܵܚܘܿܢܘܵܬ̈ܝܼ؛ ܐܵܢܵܐ ܒܘܼܬ ܓܵܢܝܼ ܠܹܐ ܝ݇ܘܸܢ ܬܲܚܡܘܼܢܹܐ ܕܡܛܹܐ ܠܝܼ. ܐܝܼܢܵܐ ܚܲܕ݇ ܡܸܢܕܝܼ ܝܵܕܥܸܢ ܕܡܸܢܕܝܼܵܢܹ̈ܐ ܕܒܵܬ̄ܪ ܚܵܨܝܼ ܡܲܢܫܘܼܝܸܐ ܝ݇ܘܸܢ ܘܠܵܩܵܕ݇ܡܝܼ ܒܸܦܫܵܛܵܐ ܝ݇ܘܸܢ ܘܒܸܪܚܵܛܵܐ ܒܲܪܩܘܼܒܼܠ ܕܢܝܼܫܵܐ ܕܫܵܩܠܸܢ ܓܼܵܠܝܼܒܘܼܬܵܐ ܕܩܸܪܝܵܢܵܐ ܕܠܥܘܼܠܘܼܠ ܕܐܲܠܵܗܵܐ ܒܝܼܫܘܿܥ ܡܫܝܼܚܵܐ*
♱♱♱♱♱♱♱♱♱
ܚܲܕܼܒܫܲܒܵܐ ܕܲܬ̣ܪܹܝܢ ܕܲܨܠܝܼܒ̣ܵܐ
ܘܲܕܚܲܡܫܵܐ ܗ݇ܘ̣ ܕܐܹܠܝܼܵܐ
ܡܬܝ ܝܙ: 14 ‐ ܫܘܠܡܐ
ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ ܟܪܘܙܘܬܼܐ ܕܡܬܝ
♰ ܘܟܲܕ ܐ݇ܬܹܐܠܹܗ ܝܑܼܫܘܿܥ ܠܘܵܬ ܟܸܢܫܵܐ. ܩܘܼܪܒܸܢܹܗ ܐܸܠܹܗ ܚܲܕ݇ ܓܲܒܼܪܵܐ ܘܒܪܸܟܠܹܗ ܥܲܠ ܒܘܼܪ̈ܟܵܟܘܼܗܝ ܘܐ݇ܡܸܪܹܗ ܐܸܠܹܗ: ܡܵܪܝܼ ܪܵܚܸܡ ܥܲܠܝܼ. ܕܐܝܼܬܠܹܗ ܒܪܘܿܢܝܼ ܒܲܪ ܐܸܓܵܪܹ̈ܐ ܘܚܸܪܒܵܐ ܡܸܪܥܝܵܐ ܝܠܹܗ. ܣܵܒܵܒ ܟܡܵܐ ܓܵܗܹ̈ܐ ܒܢܘܼܪܵܐ ܟܹܐ ܢܵܦܸܠ، ܘܟܡܵܐ ܓܵܗܹ̈ܐ ܒܡܝܼ̈ܵܐܵ. ܘܡܘܼܩܪܸܒܼܠܝܼ ܠܬܲܠܡܝܼ̈ܕܘܼܟܼ ܘܠܵܐ ܡܨܹܐܠܗ݇ܘܿܢ ܠܒܵܣܵܡܬܹܗ. ܓ̰ܘܼܘܸܒܠܹܗ ܝܑܼܫܘܿܥ ܘܐ݇ܡܸܪܹܗ: ܝܵܐ ܫܲܪܒܬܵܐ ܕܠܵܐ ܡܗܘܼܝܡܸܢܬܵܐ ܘܦܟ̰ܝܼܠܬܵܐ، ܗܲܠ ܐܝܼܡܵܢ ܒܸܬ ܗܵܘܸܢ ܠܟܸܣܠܵܘܟܼܘܿܢ. ܘܗܲܠ ܠܐܝܼܡܵܢ ܡܣܲܝܒܪܸܢܵܘܟܼܘܿܢ، ܡܲܝܬܝܼ ܠܹܗ ܐܸܠܝܼ ܠܲܐܟܼܵܐ. ܘܢܓ̰ܸܘܠܹܗ ܒܝܼܹܗ ܝܑܼܫܘܿܥ ܘܦܠܸܛܠܹܗ ܡܸܢܹܗ ܫܹܐܕܵܐ. ܘܦܸܫܠܹܗ ܒܣܝܼܡܵܐ ܝܲܠܵܕ݇ܐ ܡ̣ܢ ܗ̇ܝ ܣܵܥܵܬ. ܗܿܝܓܵܗܿ ܩܘܼܪܒܸܢܗ݇ܘܿܢ ܬܲܠܡܝܼܕܹ̈ܐ ܠܘܵܬ ܝܑܼܫܘܿܥ ܠܚܘܼܕܘܼܗܝ ܘܐ݇ܡܸܪܗ݇ܘܿܢ ܐܸܠܹܗ: ܩܵܡܘܼܕܝܼ ܐܲܚܢܲܢ ܠܵܐ ܡܨܹܐ ܠܲܢ ܠܒܵܣܵܡܬܹܗ؟ ܐܵܡܸܪ ܐܸܠܲܝܗܝ ܝܑܼܫܘܿܥ ܒܘܼܬ ܠܵܐ ܗܲܝܡܵܢܘܼܬܵܘܟܼܘܿܢ. ܣܵܒܵܒ ܬܪܘܿܨܵܐ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ: ܕܐܸܢ ܗܵܘܝܵܐ ܒܝܼܵܘܟܼܘܿܢ ܗܲܝܡܵܢܘܼܬܵܐ ܐܲܝܟܼ ܕܲܢܕܸܟܬܵܐ ܕܚܲܪܕܠܵܐ، ܒܸܬ ܐܲܡܪܝܼܬܘܿܢ ܠܐܵܗܵܐ ܛܘܼܪܵܐ: ܕܫܵܢܝܼ ܡܐܲܟܼܵܐ ܘܒܸܬ ܫܵܢܹܐ. ܘܡܸܢܕܝܼ ܠܹܐ ܥܵܨܹܐ ܐܸܠܵܘܟܼܘܿܢ. ܐܝܼܢܵܐ ܐܵܗܵܐ ܓܸܢܣܵܐ ܠܹܐ ܦܵܠܸܛ ܐܸܠܵܐ ܒܨܵܘܡܵܐ ܘܒܨܠܘܿܬܵܐ. ܐܝܼܢܵܐ ܟܲܕ ܒܸܚܕܵܪܵܐ ܗ݇ܘܵܘ ܓܵܘ ܓܠܝܼܠܵܐ، ܐ݇ܡܸܪܹܗ ܐܸܠܲܝܗܝ ܝܑܼܫܘܿܥ: ܗܕܝܼܪܵܐ ܝܠܹܗ ܒܪܘܿܢܹܗ ܕܐ݇ܢܵܫܵܐ ܕܦܵܐܸܫ ܣܘܼܦܝܵܐ ܒܐܝܼܕܵܬܹ̈ܐ ܕܒܢܲܝ̈ܢܵܫܵܐ، ܘܒܸܬ ܩܲܛܠܝܼܠܹܗ، ܘܠܝܵܘܡܵܐ ܕܬܠܵܬܵܐ ܒܸܬ ܩܵܐܸܡ. ܘܦܫܸܡܠܵܗ̇ ܐܸܠܲܝܗܝ ܪܵܒܵܐ. ܘܟܲܕ ܐ݇ܬܹܐ ܠܗ݇ܘܿܢ ܠܟܦܲܪܢܵܚܘܿܡ. ܩܘܼܪܒܸܢܗ݇ܘܿܢ ܐܵܢܝܼ ܕܫܲܩܠܝܼ ܬܪܹܝ ܬܪܹܝ ܙܘܼܙܹ̈ܐ ܕܟܸܣܦܵܐ ܕܪܹܫܵܐ ܠܘܵܬ ܫܸܡܥܘܿܢ ܘܐ݇ܡܸܪܗ݇ܘܿܢ ܐܸܠܹܗ: ܪܵܒܝܼܵܘܟܼܘܿܢ ܠܹܐ ܝܲܗ݇ܒܼܸܠ ܬܪܹܝ ܙܘܼܙܘܼ̈ܗܝ؟ ܐܵܡܸܪ ܐܸܠܲܝܗܝ: ܗܹܐ. ܘܟܲܕ ܥܒܼܸܪܹܗ ܟܹܐܦܵܐ ܠܒܲܝܬܵܐ، ܩܕܸܡܠܹܗ ܝܑܼܫܘܿܥ ܘܐ݇ܡܸܪܹܗ ܐܸܠܹܗ: ܡܘܼܕܝܼ ܒܸܚܫܵܒܼܵܐ ܝܘܸܬ ܫܸܡܥܘܿܢ، ܡܲܠܟܹ̈ܐ ܕܐܲܪܥܵܐ ܡ̣ܢ ܡܵܢܝܼ ܟܹܐ ܫܲܩܠܝܼ ܡܲܟܼܣܵܐ ܘܚܲܪܓ̰ ܕܪܹܫܵܐ. ܡ̣ܢ ܒܢܘܿܢܲܝܗܝ ܝܲܢ ܡ̣ܢ ܢܘܼܟܼܪ̈ܵܝܹܐ؟ ܐܵܡܸܪ ܐܸܠܹܗ ܫܸܡܥܘܿܢ ܡ̣ܢ ܢܘܼܟܼܪ̈ܵܝܹܐ. ܐܵܡܸܪ ܐܸܠܹܗ ܝܑܼܫܘܿܥ: ܒܲܣ ܒܢܘܿܢܹ̈ܐ ܚܹܐܪܹ̈ܐ ܝܢܵܐ. ܐܝܼܢܵܐ ܕܠܵܐ ܡܲܟܦܸܪܵܚ ܠܗ݇ܘܿܢ ܙܹܠ݇ ܠܝܵܡܵܐ ܘܕܪܝܼ ܟ̰ܵܢܓܵܠ. ܘܢܘܼܢܵܐ ܩܵܕ݇ܡܵܝܵܐ ܕܐܲܣܸܠ݇ܩ، ܦܬܘܼܚ ܦܘܼܡܹܗ ܘܒܸܬ ܡܲܫ݇ܟ̰ܚܸܬ ܐܸܣܬܹܝܪܵܐ، ܗ̇ܝ ܫܩܘܿܠ ܘܗܲܒ݇ܠ ܚܠܵܦ ܕܝܼܠ݇ܝܼ ܘܚܠܵܦ ܕܝܼܠ݇ܘܼܟܼ.
♱♱♱♱♱♱♱♱♱