ܬܸܢܝܵܢ ܢܵܡܘܿܣܵܐ؛ ܐ؛ 33‐ܒ؛2 ܬܸܒ̣ܘ ܘܲܫܠܵܘ ܬܸܢܝܵܢ ܢܵܡܘܿܣܵܐ ܣܸܦܪܵܐ ܕܚܲܡܫܵܐ ܕܐܘܿܪܵܝܬܵܐ؛ ܐܲܚܲܝ̈ ܒܲܪܸܟ̣ܡܵܪܝ܀
ܘܐ݇ܡܸܪܹܗ ܡܘܼܫܹܐ؛ ܒܠܲܝܠܹܐ ܒܢܘܼܪܵܐ ܩܲܡ ܡܲܚܙܹܐ ܠܵܘܟ̣ܘܿܢ ܐܘܼܪܚܵܐ ܕܐܵܙܠ݇ܝܼܬܘܿܢ ܒܝܼܵܗ. ܘܒܐܝܼܡܵܡܵܐ ܒܥܢܵܢܵܐ܀ ܘܫܡܝܼܥܠܹܗ ܡܵܪܝܵܐ ܩܵܠܵܐ ܕܗܹܡܲܙܡܵܢܵܘ̈ܟ̣ܘܿܢ؛ ܘܟܪܸܒܠܹܗ ܘܝ݇ܡܹܐܠܹܗ ܘܐ݇ܡܸܪܹܗ܀ ܕܠܵܐ ܚܵܙܝܼ ܚܲܕ݇ ܡ̣ܢ ܕܐܲܢܹܐ ܐ݇ܢܵܫܹ̈ܐ؛ ܐܵܗܵܐ ܕܵܘܪܵܐ ܒܝܼܫܵܐ؛ ܐܲܪܥܵܐ ܛܵܒ̣ܬܵܐ ܕܝ݇ܡܹܐܠܝܼ ܕܝܵܗ݇ܒ̣ܸܢ ܠܒܵܒܵܘ̈ܵܬܲܝܗܝ܀ ܐܸܠܵܐ ܐܸܢ ܟܵܠܵܒ ܒܲܪ ܝܘܿܦܲܢܵܐ ܗ̇ܘ ܒܸܬ ܚܵܙܹܐܠܵܗ̇ ܘܐܸܠܹܗ ܒܸܬ ܝܵܗ݇ܒ̣ܸܢ ܐܲܪܥܵܐ ܕܚܕܸܪܹܗ ܒܝܼܵܗ̇؛ ܘܩܵܐ ܒܢܘܿܢ̈ܘܼܗܝ؛ ܣܵܒܵܒ ܕܬܘܼܡܸܡܠܹܗ ܒܵܬ݇ܪ ܡܵܪܝܵܐ܀ ܘܐܘܼܦ ܥܲܠܝܼ ܟܪܸܒܠܹܗ ܡܵܪܝܵܐ ܒܘܼܬ ܕܝܼܵܘܟ̣ܘܿܢ؛ ܘܐ݇ܡܸܪܹܗ ܐܸܠܝܼ؛ ܐܘܼܦ ܐܲܢ݇ܬ̇ ܠܹܐ ܥܵܒ̣ܪܸܬ̇ ܠܬܵܡܵܐ܀ ܐܸܠܵܐ ܐܸܢ ܝܼܫܘܿܥ ܒܲܪܢܘܿܢ ܕܟܸܠܝܵܐ ܝ݇ܠܹܗ ܩܵܕ݇ܡܘܼܟܼ؛ ܗ̇ܘ ܒܸܬ ܥܵܒ̣ܸܪ ܠܬܵܡܵܐ؛ ܥܒ̣ܘܿܕܠܹܗ ܚܲܝܠܵܢܵܐ؛ ܣܵܒܵܒ ܕܗ̇ܘ ܒܸܬ ܡܲܪܝܸܬܠܵܗ̇ ܠܝܼܣܪܵܝܹܠ܀ ܘܒܲܝܬܘܼܬܵܘܟ̣ܘܿܢ ܕܐ݇ܡܸܪܵܘܟ̣ܘܿܢ ܒܣܠܵܒܵܐ ܒܸܬ ܐܵܙܵܠ݇ܐ؛ ܘܒܢܘܿܢ̈ܵܘܟ̣ܘܿܢ ܕܠܵܐ ܝ݇ܕܸܥܠܗ݇ܘܿܢ ܐܸܕܝܘܿܡ݇ ܝܵܘܡܵܐ ܛܵܒ̣ܬܵܐ ܡ̣ܢ ܒܝܼܫܬܵܐ ܐܵܢܝܼ ܒܸܬ ܥܵܒ̣ܪܝܼ ܠܬܵܡܵܐ؛ ܘܩܵܐ ܕܵܐܢܝܼ ܒܸܬ ܝܵܗ݇ܒ̣ܸܢܵܗ̇؛ ܘܐܵܢܝܼ ܒܸܬ ܝܵܪܬܝܼܠܵܗ̇܀ ܘܐܲܚܬܘܿܢ ܕܘܼܪܘܿܢ؛ ܘܫܩܘܿܠܘܿܢ ܠܒܲܪܝܼܵܐ ܠܐܘܼܪܚܵܐ ܕܝܵܡܵܐ ܕܣܘܿܦ܀ ܘܓ̰ܘܼܘܸܒܠܵܘܟ̣ܘܿܢ ܘܐ݇ܡܸܪܵܘܟ̣ܘܿܢ ܐܸܠܝܼ؛ ܚܛܹܐܠܲܢ ܩܵܕ݇ܡ ܡܵܪܝܵܐ ܐܲܠܵܗܵܐ؛ ܐܲܚܢܲܢ ܒܸܬ ܐܵܣܩܲܚ ܘܦܵܠܫܲܚ ܐܲܝܟܼ ܕܩܲܡ ܦܵܩܸܕܠܲܢ ܡܵܪܝܵܐ ܐܲܠܵܗܲܢ؛ ܘܟ̰ܘܼܟܒܸܢܵܘܟ̣ܘܿܢ ܟܠ ܐ݇ܢܵܫܵܐ ܒܟ̰ܲܟܹ̈ܐ ܘܒܥܹܐܠܵܘܟ̣ܘܿܢ ܠܹܐܣܵܩܵܐ ܠܛܘܼܪܵܐ܀ ܘܐ݇ܡܸܪܹܗ ܐܸܠܝܼ ܡܵܪܝܵܐ؛ ܐ݇ܡܘܿܪ ܐܸܠܲܝܗܝ؛ ܠܵܐ ܐܵܣܩܝܼܬܘܿܢ ܘܠܵܐ ܦܵܠܫܝܼܬܘܿܢ؛ ܣܵܒܵܒ ܕܠܹܐ ܝ݇ܘܸܢ ܓܵܘܵܘܟ̣ܘܿܢ؛ ܕܠܵܐ ܦܵܝܫܝܼܬܘܿܢ ܫܡܝܼܛܹܐ ܩܵܕ݇ܡ ܕܸܫ̰ܡܸܢܵܘܟ̣ܘܿܢ܀ ܘܐ݇ܡܪܝܼ ܐܸܠܵܘܟ̣ܘܿܢ ܘܠܵܐ ܫܡܝܼܥܠܵܘܟ̣ܘܿܢ؛ ܘܡܘܼܟܪܸܒܠܵܘܟ̣ܘܿܢ ܗܹܡܸܙܡܵܢ ܕܦܘܼܡܹܗ ܕܡܵܪܝܵܐ؛ ܘܩܘܼܫܕܸܪܵܘܟ̣ܘܿܢ ܘܐ݇ܣܸܩܠܵܘܟ̣ܘܿܢ ܠܛܘܼܪܵܐ܀ ܘܦܠܸܛܠܗ݇ܘܿܢ ܐܵܡܘܿܪ̈ܵܝܹܐ ܥܵܡܪ̈ܵܢܹܐ ܒܗ̇ܘ ܛܘܼܪܵܐ ܠܩܵܕ݇ܡܵܝܘܼܬܵܘܟ̣ܘܿܢ؛ ܘܢܦܸܠܗ݇ܘܿܢ ܒܵܬ݇ܪܵܘܟ̣ܘܿܢ ܐܲܝܟܼ ܕܸܒܘܼܪܹ̈ܐ ܬܘܼܢܬܸܢܹܐ؛ ܘܩܲܡ ܛܵܪܕܝܼܠܵܘܟ̣ܘܿܢ ܡ̣ܢ ܣܵܥܝܼܪ ܗܲܠ ܚܸܪܡܵܐ܀ ܘܝ݇ܬܸܒ̣ܠܵܘܟ̣ܘܿܢ ܘܒܟ̣ܹܐܠܵܘܟ̣ܘܿܢ ܩܵܕ݇ܡ ܡܵܪܝܵܐ؛ ܘܠܵܐ ܫܡܥܝܼܠܹܗ ܡܵܪܝܵܐ ܒܩܵܠܵܘܟ̣ܘܿܢ ܘܠܵܐ ܡܘܼܨܝܸܬܠܹܗ ܐܸܠܵܘܟ̣ܘܿܢ܀ ܘܝ݇ܬܸܒ̣ܠܵܘܟ̣ܘܿܢ ܒܪܩܸܡ ܩܵܐ ܪܵܒܵܐ ܝܵܘܡܵܢܹ̈ܐ؛ ܐܲܝܟܼ ܝܵܘܡܵܢܹ̈ܐ ܕܝ݇ܬܸܒ̣ܠܵܘܟ̣ܘܿܢ܀ ܕܐܸܪܲܢ ܘܡܘܼܛܥܸܢܲܢ ܠܒܲܪܝܼܵܐ ܠܐܘܼܪܚܵܐ ܕܝܵܡܵܐ ܕܣܘܿܦ؛ ܐܲܝܟܼ ܕܐ݇ܡܸܪܹܗ ܐܸܠܝܼ ܡܵܪܝܵܐ؛ ܘܚܘܼܪܕܹܐܠܲܢ ܠܛܘܼܪܵܐ ܕܣܵܥܝܼܪ ܩܵܐ ܪܵܒܵܐ ܝܵܘܡܵܢܹ̈ܐ܀
ܚܲܒ̣ܪܹܗ
ܐܹܫܲܥܝܵܐ ܐ؛ 21‐ܚܘܼܬܵܡܵܐ ܫܠܵܘ ܢܒ̣ܝܼܘܼܬܹܗ ܕܐܹܫܲܥܝܵܐ؛ ܐܲܚܲܝ̈ ܒܲܪܸܟ̣ܡܵܪܝ܀
ܕܵܐܟ̣ܝܼ ܗܘܹܐܠܵܗ̇ ܙܵܢܝܼܬܵܐ ܡܕܝܼܢ݇ܬܵܐ ܡܗܘܼܡܸܢܬܵܐ؛ ܘܡܠܝܼܬܵܐ ܗ݇ܘܵܐ ܕܝܼܘܵܢ؛ ܘܙܲܕܝܼܩܘܼܬܵܐ ܫܪܹܐܠܵܗ̇ ܓܵܘܵܗ̇؛ ܘܐܵܕܝܼܵܐ ܩܵܛܘܿܠܹ̈ܐ؟܀ ܙܘܼܙܵܟ̣ܝ ܦܸܫܠܹܗ ܡܘܼܣܠܝܼܵܐ؛ ܙܵܒܢܵܢܹ̈ܐ ܕܚܵܡܪܵܟ̣ܝ ܒܸܚܒ̣ܵܛܵܐ ܝ݇ܢܵܐ ܡܝܼܵܐ؛ ܓܘܼܪ̈ܵܢܵܟ̣ܝ ܚܵܝܝܼܢܹ̈ܐ ܝ݇ܢܵܐ؛ ܘܫܲܪ̈ܝܼܟܹܐ ܝ݇ܢܵܐ ܕܓܹܢܵܒ̣ܹ̈ܐ؛ ܟܠܲܝܗܝ ܡܲܚܸܒܵܢܹ̈ܐ ܕܪܸܫܘܲܬ ܘܡܲܠܝܸܙܵܢܹܐ ܠܸܫܩܵܠܵܐ ܦܘܼܪ̈ܥܵܢܹܐ؛ ܠܝܵܬܘܿܡܹ̈ܐ ܠܹܐ ܕܵܝܢܝܼ؛ ܘܕܝܼܘܵܢ ܕܐܲܪܡܸܠܬܵܐ ܠܹܐ ܥܵܒ̣ܪܵܐ ܠܟܸܣܠܲܝܗܝ܀ ܒܘܼܬ ܕܐܵܗܵܐ؛ ܗܵܕܟ̣ܵܐ ܒܹܐܡܵܪܵܐ ܝ݇ܠܹܗ ܡܵܪܹܐ ܡܵܪ̈ܵܘܵܬܹܐ ܚܲܝܠܬܵܢܵܐ؛ ܙܲܚܡܵܐ ܕܝܼܣܪܵܝܹܠ؛ ܘܵܝ ܐܝܼܡܲܢ ܕܦܵܪܥܸܢ ܡ̣ܢ ܣܵܢܝܵܢ̈ܝܼ ܘܫܵܩܠܸܢ ܬܘܼܥܠܵܐ ܡ̣ܢ ܕܸܫ̰ܡܸܢ̈ܝܼ܀ ܘܒܸܬ ܡܲܕܸܪܸܢ ܐܝܼܕܝܼ ܥܲܠܵܟ̣ܝ؛ ܘܒܸܬ ܨܲܪܸܦܸܢ ܚܵܝܝܼܢ̈ܵܟ̣ܝ ܠܕܸܟ̣ܝܘܼܬܵܐ؛ ܘܒܸܬ ܬܲܠܩܸܢ ܟܠܲܝܗܝ ܥܵܘܵܠܵܟ̣̈ܝ؛ ܘܒܸܬ ܡܲܩܸܡܸܢ ܕܲܝܵܢܵܟ̣̈ܝ ܐܲܝܟܼ ܕܡ̣ܢ ܩܲܕ݇ܡܵܝܬܵܐ ܘܡܵܠܘܿܟ̣ܵܟ̣̈ܝ ܐܲܝܟܼ ܕܡ̣ܢ ܫܘܼܪܵܝܵܐ܀ ܘܒܵܬ݇ܪ ܗܵܕܵܐ ܒܸܬ ܦܵܝܫܲܬ̇ܝ ܩܪܝܼܬܵܐ ܡܕܝܼܢ݇ܬܵܐ ܕܙܲܕܝܼܩܘܼܬܵܐ؛ ܘܡܕܝܼܢ݇ܬܵܐ ܕܗܲܝܡܵܢܘܼܬܵܐ܀ ܨܸܗܝܘܿܢ ܒܕܝܼܘܵܢ ܒܸܬ ܦܵܝܫܵܐ ܦܘܼܪܸܩܬܵܐ ܘܣܠܵܒܘܿܗ̇ ܒܙܲܕܝܼܩܘܼܬܵܐ؛ ܘܥܵܘܵܠܹ̈ܐ ܘܚܲܛܵܝܹ̈ܐ ܡܐܘܼܕܵܠܹܐ ܒܸܬ ܦܵܝܫܝܼ ܛܘܼܚܛܸܚܹܐ؛ ܘܐܵܢܝܼ ܕܫܒ̣ܸܩܠܗ݇ܘܿܢ ܠܡܵܪܝܵܐ ܒܸܬ ܬܵܝܡܝܼ܀ ܘܒܸܬ ܢܵܟ̣ܦܝܼ ܡ̣ܢ ܨܵܢܲܡܹ̈ܐ ܕܫܘܼܗ݇ܘܸܬܠܗ݇ܘܿܢ؛ ܘܡ̣ܢ ܨܘܼܪ̈ܝܵܬܹܐ ܕܓܘܼܒܹܐܠܗ݇ܘܿܢ܀ ܘܒܸܬ ܗܵܘܝܼ ܐܲܝܟܼ ܐܝܼܠܵܢܵܐ ܕܒܸܛܡܵܐ ܕܢܬܸܪܗ݇ܘܿܢ ܛܲܪ̈ܦܵܗ̇؛ ܘܐܲܝܟܼ ܓܲܢܬܵܐ ܕܠܲܝܬ̇ ܠܵܗ̇ ܡܝܼܵܐ܀ ܘܒܸܬ ܗܵܘܹܐ ܚܲܝܠܲܝܗܝ ܠܒܲܛܝܼܠܘܼܬܵܐ؛ ܘܦܘܼܠܚܵܢܲܝ̈ܗܝ ܠܒܲܠܒܵܛܹ̈ܐ ܕܢܘܼܪܵܐ؛ ܘܒܸܬ ܝܵܩܕܝܼ ܬܸܪܘܲܝܗܝ ܡܐܘܼܕܵܠܹܐ؛ ܘܠܲܝܬ̇ ܡܲܟ̰ܡܸܥܝܵܢܵܐ ܒܹܐܡܵܪܵܐ ܝ݇ܠܹܗ ܡܵܪܝܵܐ ܚܲܝܠܵܬܵܢܵܐ܀
♱♱♱♱♱♱♱♱♱
ܚܲܕܼܒܫܲܒܵܐ ܕܚܲܡܫܵܐ ܕܲܫܠܝܼܚܹ̈ܐ ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ ܕܲܠܘܵܬܼ ܩܘܼܪ̈ܲܢܬܵܝܹܐ ܐܲܚܲܝ̈ ܒܲܪܸܟܼܡܵܪܝ܀
ܪܚܘܿܛܘܿܢ ܒܵܬ̄ܪ ܚܘܼܒܵܐ ܘܒܲܚܸܠܘܿܢ ܒܚܲܠܥܲܬܹ̈ܐ ܕܪܘܼܚܵܐ ܐܝܼܢܵܐ ܒܘܼܫ ܙܵܘܕܵܐ ܕܢܵܒܝܼܬܘܿܢ* ܣܵܒܵܒ ܡ̇ܢ ܕܗܲܡܙܸܡ ܒܠܸܫܵܢܵܐ ܠܸܐ ܝ݇ܠܹܗ ܠܒܢܲܝ̈ܢܵܫܵܐ ܗܲܡܙܘܼܡܹܐ ܐܸܠܵܐ ܠܐܲܠܵܗܵܐ. ܣܵܒܵܒ ܗܸܟ̃ ܐ݇ܢܵܫܵܐ ܠܹܐ ܫܲܡܸܥ ܡܸܢܕܝܼ ܕܗܲܡܙܘܼܡܹܐ ܝ݇ܠܹܗ ܐܸܠܵܐ ܒܪܘܼܚܵܐ ܐ݇ܪܵܙܵܐ ܗܲܡܙܘܼܡܹܐ ܝ݇ܠܹܗ. ܐܝܼܢܵܐ ܗ̇ܘ ܕܢܵܒܹܐ ܩܵܐ ܒܢܲܝ̈ܢܵܫܵܐ ܗܲܡܙܘܼܡܹܐ ܝ݇ܠܹܗ. ܒܸܢܝܵܢܵܐ ܘܢܵܣܝܼܗܲܬ ܘܝܵܗܒܼܵܠܬܵܐ ܕܠܸܒܵܐ* ܗ̇ܘ ܕܗܲܡܙܸܡ ܒܠܸܫܵܢܵܐ؛ ܓܵܢܹܗ ܝ݇ܠܹܗ ܒܸܒܢܵܝܵܐ. ܘܗ̇ܘ ܕܢܵܒܹܐ؛ ܥܹܕܬܵܐ ܒܸܒܢܵܝܵܐ ܝ݇ܠܹܗ* ܐܝܼܢܵܐ ܒܵܥܝܹܢ ܕܟܠܵܘܟܼܘܿܢ ܗܲܡܙܸܡܝܼܬܘܿܢ ܒܠܸܫܵܢܵܐ ܘܒܘܼܫ ܙܵܘܕܵܐ ܕܢܵܒܝܼܬܘܿܢ. ܣܵܒܵܒ ܒܘܼܫ ܓܘܼܪܵܐ ܝ݇ܠܹܗ ܗ̇ܘ ܕܢܵܒܹܐ ܡ̣ܢ ܕܗ̇ܘ ܕܗܲܡܙܸܡ ܒܠܸܫܵܢܵܐ ܐܸܢ ܠܵܐ ܡܦܵܫܸܩ. ܐܝܼܢܵܐ ܐܸܢ ܡܦܵܫܸܩ ܥܹܕܬܵܐ ܝ݇ܠܹܗ ܒܸܒܢܵܝܵܐ* ܐܵܕܝܼܵܐ ܐܵܚܘܿܢܘܵܬ̈ܝܼ ܐܸܢ ܐܵܬܸܢ ܠܟܸܣܠܵܘܟܼܘܿܢ ܘܗܲܡܙܸܡܸܢ ܥܲܡܵܘܟܼܘܿܢ ܒܠܸܫܵܢܹ̈ܐ؛ ܡܘܼܕܝ݇ ܦܵܝܕܵܐ ܒܸܬ ܥܵܒܼܕܸܢ ܩܵܬܵܘܟܼܘܿܢ؛ ܐܝܼܢܵܐ ܐܸܢ ܗܲܡܙܸܡܸܢ ܥܲܡܵܘܟܼܘܿܢ ܝܲܢ ܒܓܸܠܝܵܢܵܐ ܝܲܢ ܒܝ݇ܕܵܥܝܬܵܐ ܝܲܢ ܒܢܒܼܝܼܘܼܬܵܐ ܝܲܢ ܒܝܘܼܠܦܵܢܵܐ* ܣܵܒܵܒ ܐܘܼܦ ܐܲܣܒܵܒܹ̈ܐ ܐܵܢܝܼ ܕܠܲܝܬ ܒܝܼܲܝܗܝ ܓܵܢܵܐ ܘܝܵܗ݇ܒܼܝܼ ܩܵܠܵܐ. ܐܸܢ ܙܘܼܪܢܵܐ ܘܐܸܢ ܩܝܼܬܵܪܵܐ. ܐܸܢ ܦܘܼܪܫܘܼܢܝܵܐ ܒܹܝܠ ܩܝܼܢܬܵܐ ܠܚܒܼܲܪܬܵܗ̇ ܠܵܐ ܥܵܒܼܕܝܼ. ܕܵܐܟܼܝܼ ܒܸܬ ܦܵܐܸܫ ܝ݇ܕܝܼܥܝܵܐ ܡܸܢܕܝܼ ܕܦܵܐܸܫ ܙܡܝܼܪܵܐ ܝܲܢ ܦܵܐܸܫ ܢܩܝܼܫܵܐ* ܘܐܸܢ ܩܵܪ݇ܢܵܐ ܩܵܪܝܵܐ؛ ܘܩܵܠܵܗ̇ ܠܵܐ ܦܪܝܼܫܵܐ؛ ܡܵܢܝܼ ܒܸܬ ܗܵܕܸܪ ܓܵܢܹܗ ܩܵܐ ܦܠܵܫܵܐ؟* ܗܲܕܟܼܵܐ ܐܘܼܦ ܐܲܚܬܘܿܢ؛ ܐܸܢ ܐܵܡܪܝܼܬܘܿܢ ܗܹܡܸܙܡܲܢ ܒܠܸܫܵܢܵܐ ܘܠܵܐ ܗܵܘܝܵܐ ܦܘܼܫܸܩܬܵܐ؛ ܕܵܐܟܼܝܼ ܒܸܬ ܦܵܐܸܫ ܝ݇ܕܝܼܥܝܵܐ ܡܸܢܕܝܼ ܕܐܵܡܪܝܼܬܘܿܢ. ܒܸܬ ܗܵܘܝܼܬܘܿܢ ܐܲܝܟܼ ܕܗ̇ܘ ܕܥܲܡ ܗܵܘܵܐ ܗܲܡܙܘܼܡܹܐ ܝ݇ܬܘܿܢ* ܣܵܒܵܒ ܐܝܼܬ ܪܵܒܵܐ ܬܵܗܵܪܹ̈ܐ ܕܠܸܫܵܢܹ̈ܐ ܓܵܘ ܕܘܼܢܝܹܐ ܘܐܘܼܦ ܚܲܕ݇ ܡܸܢܲܝܗܝ ܠܲܝܬ ܕܠܵܐ ܩܵܠܵܐ* ܘܐܸܢ ܠܹܐ ܝܵܕܥܸܢܹܗ ܚܲܝܠܹܗ ܕܩܵܠܵܐ ܒܸܬ ܗܵܘܸܢ ܒܲܪܒܪܵܝܵܐ ܩܵܐ ܕܗ̇ܘ ܕܗܲܡܙܘܼܡܹܐ ܝ݇ܠܹܗ؛ ܘܐܘܼܦ ܗ̇ܘ ܕܗܲܡܙܘܼܡܹܐ ܝ݇ܠܹܗ ܒܸܬ ܗܵܘܹܐ ܩܵܬܝܼ ܒܲܪܒܪܵܝܵܐ* ܗܲܕܟܼܵܐ ܐܘܼܦ ܐܲܚܬܘܿܢ ܕܛܲܢܵܢܹ̈ܐ ܝ݇ܬܘܿܢ ܒܚܲܠܥܲܬܹ̈ܐ ܕܪܘܼܚܵܐ ܒܥܹܐܡܘܿܢ ܕܦܵܝܫܝܼܬܘܿܢ ܡܘܼܙܝܸܕܹܐ ܩܵܐ ܒܸܢܝܵܢܵܐ ܕܥܹܕܬܵܐ* ܘܗ̇ܘ ܕܗܲܡܙܸܡ ܒܠܸܫܵܢܵܐ؛ ܚܘܼܫ ܨܵܠܹܐ ܨܠܘܿܬܵܐ ܩܵܐ ܕܦܵܫܸܩ* ܐܸܢ ܐܵܢܵܐ ܨܵܠܘܿܝܸܐ ܝ݇ܘܸܢ ܒܠܸܫܵܢܵܐ؛ ܪܘܼܚܝܼ ܝ݇ܠܵܗ̇ ܨܵܠܘܿܝܸܐ. ܐܝܼܢܵܐ ܚܝܼܵܠܝܼ ܕܠܵܐ ܛܥܘܼܢܝܵܬܹ̈ܐ ܝ݇ܠܹܗ* ܒܲܣ ܡܘܼܕܝܼ ܒܸܬ ܥܵܒܼܕܸܢ؟ ܒܸܬ ܡܨܵܠܸܢ ܒܪܘܼܚܝܼ ܘܡܨܵܠܸܢ ܐܘܼܦ ܒܚܝܼܵܠܝܼ ܘܙܵܡܪܸܢ ܒܪܘܼܚܝܼ ܘܙܵܡܪܸܢ ܐܘܼܦ ܒܚܝܼܵܠܝܼ* ܘܐܸܢ ܠܵܐ؛ ܐܸܢ ܒܵܪܘܿܟܼܹܐ ܝ݇ܘܸܬ ܒܪܘܼܚܵܐ. ܗ̇ܘ ܕܒܸܡܠܵܝܵܐ ܝ݇ܠܹܗ ܕܘܼܟܬܵܐ ܕܚܲܕ݇ ܗܸܕܝܘܿܛܵܐ ܕܐܵܟܼܝܼ ܒܸܬ ܐܵܡܸܪ ܐܵܡܹܝܢ ܥܲܠ ܫܵܟܲܪܬܵܐ ܕܝܼܘܼܟܼ؟ ܣܵܒܵܒ ܕܡܸܢܕܝܼ ܕܒܹܐܡܵܪܵܐ ܝ݇ܘܸܬ ܠܹܐ ܝ݇ܠܹܗ ܦܲܪܡܘܼܝܸܐ* ܐܲܢ݇ܬ ܨܦܵܝ ܝ݇ܘܸܬ ܒܵܪܘܿܟܼܹܐ؛ ܐܝܼܢܵܐ ܚܲܒܼܪܘܼܟܼ ܠܹܐ ܝ݇ܠܹܗ ܦܝܵܫܵܐ ܒܸܢܝܵܐ* ܡܵܘܕܘܿܝܸܐ ܝ݇ܘܸܢ ܠܐܲܠܵܗܵܐ ܕܒܘܼܫ ܙܵܘܕܵܐ ܡ̣ܢ ܟܠܵܘܟܼܘܿܢ ܗܲܡܙܘܼܡܹܐ ܝ݇ܘܸܢ ܒܠܸܫܵܢܹ̈ܐ* ܐܸܠܵܐ ܓܵܘ ܥܸܕܬܵܐ ܒܵܥܝܸܢ ܕܚܲܡܫܵܐ ܗܹܡܸܙܡܵܢܹ̈ܐ ܒܚܝܼܵܠܝܼ ܗܲܡܙܸܡܸܢ ܕܐܘܼܦ ܠܐ݇ܚܹܪ̈݇ܢܹܐ ܡܲܠܦܸܢ ܒܘܼܫ ܡ̣ܢ ܥܸܣܪܵܐ ܐܲܠܵܦܹ̈ܐ ܗܹܡܸܙܡܵܢܹ̈ܐ ܒܠܸܫܵܢܵܐ*
♱♱♱♱♱♱♱♱♱
ܠܘܩܐ ܝܒ: 16 ‐ 35 ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ ܟܪܘܙܘܬܼܐ ܕܠܘܩܐ
♰ ܘܐ݇ܡܸܪܹܗ ܝܑܼܫܘܿܥ ܠܬܲܠܡܝܼܕܘܼ̈ܗܝ ܐܵܗܵܐ ܡܲܬܠܵܐ: ܚܲܕ݇ ܓܲܒܼܪܵܐ ܥܲܬܝܼܪܵܐ ܡܘܼܬ݇ܝܹܐܠܵܗ̇ ܐܸܠܹܗ ܐܲܪܥܹܗ ܗܵܨܝܼܠܹ̈ܐ ܪܵܒܵܐ. ܚܫܸܒ̣ܠܹܗ ܓܵܘ ܓܵܢܹܗ ܘܐ݇ܡܸܪܹܗ: ܡܘܿܕܝܼ ܥܲܒܼܕܸܢ. ܕܠܲܝܬ ܠܝܼ ܕܘܼܟܵܐ ܕܓ̰ܲܡܥܸܢ ܗܵܨܝܼܠܝܼ. ܘܐ݇ܡܸܪܹܗ: ܐܵܗܵܐ ܒܸܬ ܥܲܒܼܕܸܢ. ܒܸܬ ܣܲܬܪܸܢ ܥܲܢܒܵܪ̈ܝܼ ܘܒܸܬ ܒܵܢܸܢ ܘܓܲܪܘܸܣܸܢܗ݇ܘܿܢ. ܘܒܸܬ ܓ̰ܲܡܥܸܢ ܬܵܡܵܐ ܟܠܹܗ ܕܲܒܪܝܼ ܘܛܵܒܼܵܬ̈ܝܼ. ܘܒܸܬ ܐܲܡܪܸܢ ܠܓܵܢܝܼ: ܓܵܢܝܼ. ܐܝܼܬܠܹܟܼܝ ܪܵܒܵܐ ܛܵܒܼܵܬܹ̈ܐ. ܡܘܼܬܒܼܹܐ ܠܪܵܒܵܐ ܫܸܢܹ̈ܐ. ܡܲܢܝܸܚ، ܐ݇ܟܼܘܿܠܝ، ܫܬܹܝ، ܡܲܒܣܸܡܝ. ܐܝܼܢܵܐ ܐܲܠܵܗܵܐ ܐ݇ܡܸܪܹܗ ܐܸܠܹܗ: ܒܵܨܘܼܪܵܐ ܕܪܸܥܝܵܢܵܐ. ܒܐܵܗܵܐ ܠܸܠܝܵܐ ܓܵܢܘܼܟܼ ܒܸܬ ܛܲܠܒܝܼܠܵܗ̇ ܡܸܢܘܼܟܼ. ܘܐܲܢܹܐ ܕܗܘܼܕܸܪܘܼܟܼ ܠܡ̇ܢ ܒܸܬ ܗܵܘܝܼ؟ ܗܲܕܟܼܵܐ ܝܠܹܗ ܡ̇ܢ ܕܡܲܬܸܒܼܠܹܗ ܚܸܙܝܼܢܹ̈ܐ، ܘܒܐܲܠܵܗܵܐ ܠܹܐ ܝܠܹܗ ܥܲܬܝܼܪܵܐ. ܘܐ݇ܡܸܪܹܗ ܠܬܲܠܡܝܼ̈ܕܘܼܗܝ: ܒܘܼܬ ܕܐܵܗܵܐ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ: ܠܵܐ ܐܲܟܼܠܝܼܬܘܿܢ ܚܲܡ ܠܓܵܢܵܘܟܼܘܿܢ ܡܘܿܕܝܼ ܒܸܬ ܐܲܟܼܠܝܼܬܘܿܢ، ܘܠܵܐ ܠܦܲܓܼܪܵܘܟܼܘܿܢ ܡܘܿܕܝܼ ܒܸܬ ܠܲܒܼܫܝܼܬܘܿܢ. ܣܵܒܵܒ ܓܵܢܵܐ ܒܘܼܫ ܙܵܘܕܵܐ ܝܠܵܗ̇ ܡ̣ܢ ܡܹܐܟܼܘܼܠܬܵܐ. ܘܦܲܓܼܪܵܐ ܡ̣ܢ ܠܒܼܝܼܫܬܵܐ. ܓܲܫܩܘܿܢ ܒܢܲܥܒܼܹ̈ܐ ܕܠܹܐ ܙܲܪܥܝܼ ܘܠܹܐ ܚܵܨܕܝܼ. ܘܠܲܝܬ ܠܗ݇ܘܿܢ ܬܵܘܵܢܹ̈ܐ ܘܥܲܢܒܵܪܹ̈ܐ. ܘܐܲܠܵܗܵܐ ܟܹܐ ܡܬܲܪܣܹܐ ܠܗ݇ܘܿܢ. ܗܲܕܟܼܵܐ ܟܡܵܐ ܐܲܚܬܘܿܢ ܒܘܼܫ ܙܵܘܕܵܐ ܝܬܘܿܢ ܡ̣ܢ ܦܵܪܵܚܬܵܐ. ܐܝܼܢܵܐ ܐܲܝܢܝܼ ܡܸܢܵܘܟܼܘܿܢ ܟܲܕ ܐܵܟܼܸܠ ܚܲܡ، ܒܡܵܨܹܐ ܠܡܲܙܝܘܼܕܹܐ ܥܲܠ ܩܵܘܡܬܹܗ ܚܕܵܐ ܝܲܡܝܼܢܵܐ؟ ܐܝܼܢܵܐ ܐܸܢ ܐܘܿܦ ܚܲܕ݇ ܡܸܢܕܝܼ ܙܥܘܿܪܵܐ ܠܵܐ ܡܵܨܝܼܬܘܿܢ ܕܥܲܒ̣ܕܝܼܬܘܿܢ، ܩܵܡܘܿܕܝܼ ܒܘܼܬ ܫܲܪܟܵܐ ܒܹܐܟܼܵܠܵܐ ܝܬܘܿܢ ܚܲܡ؟ ܓܲܫܩܘܿܢ ܒܫܘܼܫܲܢܹ̈ܐ. ܕܲܐܟܼܝܼ ܟܹܐ ܓܲܪܘܸܣܝܼ. ܕܠܹܐ ܟܵܟ̰ܚܝܼ ܘܠܹܐ ܥܲܙܠܝܼ. ܐܝܼܢܵܐ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ: ܕܐܘܿܦ ܠܵܐ ܡܲܠܟܵܐ ܫܠܹܝܡܘܿܢ ܒܟܠܹܗ ܫܘܼܒܼܚܹܗ ܠܒܼܝܼܫܠܹܗ ܐܲܝܟܼ ܚܕܵܐ ܡ̣ܢ ܕܐܲܢܹܐ. ܐܝܼܢܵܐ ܐܸܢ ܠܓܸܠܵܐ ܕܐܸܕܝܘܿܡ ܝܼܠܹܗ ܒܚܲܩܠܵܐ. ܘܒܩܲܝܕܵܡܬܵܐ ܟܹܐ ܢܵܦܸܠ ܓܵܘ ܬܲܢܘܼܪܵܐ. ܐܲܠܵܗܵܐ ܗܲܕܟܼܵܐ ܟܹܐ ܡܲܠܒܼܸܫ. ܟܡܵܐ ܒܘܼܫ ܙܵܘܕܵܐ ܐܸܠܵܘܟܼܘܿܢ ܝܵܐ ܒܵܨܘܿܪܹ̈ܐ ܕܗܲܝܡܵܢܘܼܬܵܐ. ܘܐܲܚܬܘܿܢ ܠܵܐ ܬܲܚܡܸܢܝܼܬܘܿܢ، ܡܘܿܕܝܼ ܒܸܬ ܐܲܟܼܠܝܼܬܘܿܢ ܘܡܘܿܕܝܼ ܒܸܬ ܫܵܬܝܼܬܘܿܢ. ܘܠܵܐ ܒܵܕܹܐ ܪܸܥܝܵܢܵܘܟܼܘܿܢ ܒܐܲܢܹܐ. ܣܵܒܵܒ ܐܲܢܹܐ ܟܠܲܝܗܝ: ܥܲܡܡܹ̈ܐ ܕܥܵܠܡܵܐ ܟܹܐ ܒܵܥܝܼ ܠܗ݇ܘܿܢ. ܐܝܼܢܵܐ ܒܵܒܵܘܟܼܘܿܢ ܝܵܕܸܥ ܕܐܘܿܦ ܐܸܠܵܘܟܼܘܿܢ ܠܵܙܸܡ ܝܢܵܐ ܐܲܢܹܐ. ܐܝܼܢܵܐ ܛܠܘܼܒܘܿܢ ܡܲܠܟܘܼܬܹܗ ܕܐܲܠܵܗܵܐ. ܘܐܲܢܹܐ ܟܠܲܝܗܝ ܒܸܬ ܦܲܝܫܝܼ ܡܘܼܙܝܸܕܹܐ ܐܸܠܵܘܟܼܘܿܢ. ܠܵܐ ܙܲܕܥܸܬ ܦܸܣܩܵܐ ܙܥܘܿܪܵܐ. ܕܒܣܸܡܠܵܐ ܠܹܗ ܒܵܒܵܘܟܼܘܿܢ ܕܝܲܗ݇ܒܼܸܠܵܘܟܼܘܿܢ ܡܲܠܟܘܼܬܵܐ. ܙܲܒܢܘܿܢ ܡܸܢܕܝܼܵܘܟܼܘܿܢ. ܘܗܲܒَܼܠܘܿܢ ܐܸܪܘܵܢܵܐ. ܥܒܼܘܼܕܘܿܢ ܠܵܘܟܼܘܿܢ ܟܝܼܣܝܵܬܹ̈ܐ ܕܠܹܐ ܒܵܠܝܼ. ܘܚܸܙܝܼܢܵܐ ܕܠܹܐ ܬܵܝܡܵܐ ܓܵܘ ܫܡܲܝܵܐ. ܐܲܝܟܵܐ ܕܓܹܢܵܒܼܵܐ ܠܹܐ ܩܲܪܒܸܢ ܘܓ̰ܵܢܓ ܠܹܐ ܡܲܚܪܸܒܼ. ܣܵܒܵܒ ܐܲܝܟܵܐ ܕܝܼܠܵܗ̇ ܚܸܙܝܼܢܵܘܟܼܘܿܢ. ܬܵܡܵܐ ܒܸܬ ܗܵܘܹܐ ܐܵܦ ܠܸܒܵܘܟܼܘܿܢ.
♱♱♱♱♱♱♱♱♱
The Assyrian Church
of the East did not yet sanction this document.
|