ܚܲܕܼܒܫܲܒܵܐ ܕܐܲܪܒܥܵܐ ܕܩܲܝܛܵܐ

ܬܢܹܝܢ ܢܵܡܘܿܣܵܐ؛ ܗ؛ 16‐ܘ؛ 4

ܬܸܒ̣ܘ ܘܲܫܠܵܘ ܬܸܢܝܵܢ ܢܵܡܘܿܣܵܐ ܣܸܦܪܵܐ ܕܚܲܡܫܵܐ ܕܐܘܿܪܵܝܬܵܐ؛

ܐܲܚܲܝ̈ ܒܲܪܸܟ̣ܡܵܪܝ܀

ܘܐ݇ܡܸܪܹܗ ܡܘܼܫܹܐ ܠܟܠܹܗ ܝܼܣܪܵܝܹܠ؛ ܡܝܵܩܸܪ ܠܒܵܒܘܼܟܼ ܘܠܝܸܡܘܼܟܼ ܕܙܵܝܕܝܼ ܝܵܘܡܵܢܘܼܟܼ ܘܗܵܘܝܵܐ ܠܘܼܟܼ ܛܵܒ̣ܬܵܐ ܒܐܲܪܥܵܐ ܛܵܒ̣ܬܵܐ ܕܝܵܗ݇ܒ̣ܸܠܘܼܟܼ ܡܵܪܝܵܐ ܐܲܠܵܗܘܼܟܼ܀ ܠܵܐ ܩܵܛܸܠܸܬ̇܀ ܠܵܐ ܥܵܒ̣ܕܸܬ̇ ܩܲܗܒܘܼܬܵܐ܀ ܠܵܐ ܓܵܢܒ̣ܸܬ̇܀ ܣܵܗܕܘܼܬܵܐ ܕܵܓܵܠܬܵܐ ܥܲܠ ܚܲܒ̣ܪܘܼܟܼ ܠܵܐ ܝܵܗܒ̣ܸܬ̇܀ ܠܵܐ ܫܲܗܘܸܬܸܬ̇ ܠܒܲܟ̣ܬܹܗ ܕܚܲܒ̣ܪܘܼܟܼ؛ ܠܵܐ ܫܲܗܘܸܬܸܬ̇ ܠܒܲܝܬܹܗ ܕܚܲܒ̣ܪܘܼܟܼ؛ ܘܠܵܐ ܠܚܲܩܠܹܗ؛ ܘܠܵܐ ܠܟܲܪܡܹܗ؛ ܘܠܵܐ ܠܪܹܓܹܗ؛ ܘܠܵܐ ܠܚܸܕܲܡܬܹܗ؛ ܘܠܵܐ ܠܬܵܘܪܹܗ؛ ܘܠܵܐ ܠܚܡܵܪܹܗ؛ ܘܠܵܐ ܠܟܠ ܡܸܢܕܝܼ ܕܐܝܼܬܠܹܗ ܚܲܒ̣ܪܘܼܟܼ܀ ܐܲܢܹܐ ܚܲܒܪܹ̈ܐ ܗܘܼܡܙܸܡܠܹܗ ܡܵܪܝܵܐ ܥܲܡ ܟܠܵܗ̇ ܟܢܘܼܫܬܵܐ ܒܛܘܼܪܵܐ ܡ̣ܢ ܓܵܘ ܢܘܼܪܵܐ ܒܥܢܵܢܵܐ ܘܥܲܪܦܸܠܵܐ [ܘܡܸܫ]؛ ܘܒܩܵܠܵܐ ܪܵܒܵܐ ܓܘܼܪܵܐ ܘܟܬܝܼܒ̣ܲܝܗ‌ܝ ܠܹܗ ܥܲܠ ܬܪܹܝ ܠܘܼܚܹ̈ܐ ܕܟܹܐܦܵܐ؛ ܘܝܘܼܗ݇ܒ̣ܲܝܗ‌ܝ ܠܹܗ ܐܸܠܝܼ܀ ܘܟܲܕ ܫܡܝܼܥܠܵܘܟ̣ܘܿܢ ܩܵܠܵܐ ܡ̣ܢ ܓܵܘ ܚܸܫܟܵܐ. ܘܛܘܼܪܵܐ ܒܸܠܗܵܝܵܐ ܗ݇ܘܵܐ ܒܢܘܼܪܵܐ؛ ܘܐ݇ܬܹܐܠܵܘܟ̣ܘܿܢ ܠܟܸܣܠܝܼ ܟܠܵܘܟ̣ܘܿܢ ܪܹ̈ܫܵܢܹܐ ܘܣܵܒ̣ܹ̈ܐ ܕܫܲܒ̣ܛܵܘܟ̣ܘܿܢ܀ ܘܐ݇ܡܸܪܵܘܟ̣ܘܿܢ ܗܵܐ ܩܲܡ ܡܲܚܙܹܐܠܲܢ ܡܵܪܝܵܐ ܐܲܠܵܗܲܢ ܚܸܩܪܹܗ ܘܓܘܼܪܘܼܬܹܗ؛ ܘܩܵܠܹܗ ܫܡܝܼܥܠܲܢ ܡ̣ܢ ܓܵܘ ܢܘܼܪܵܐ. ܐܸܕܝܘܿܡ݇ ܝܵܘܡܵܐ ܚܙܹܐܠܲܢ ܕܗܘܼܡܙܸܡܠܹܗ ܐܲܠܵܗܵܐ ܥܲܡ ܒܲܪܢܵܫܵܐ ܘܚܝܹܐܠܹܗ ܡܐܵܕܝܼܵܐ ܩܵܡܘܿܕܝܼ ܡܵܝܬܲܚ ܘܐܵܟ̣ܠܵܐ ܠܲܢ ܐܵܗܵܐ ܢܘܼܪܵܐ ܓܘܼܪܬܵܐ؟ ܐܸܢ ܡܲܙܝܸܕܲܚ ܡܸܕܪܹܐ ܠܸܫܡܲܥܝܵܐ ܩܵܠܹܗ ܕܡܵܪܝܵܐ ܐܲܠܵܗܲܢ ܒܸܬ ܡܵܝܬܲܚ܀ ܡܵܢܝܼ ܝ݇ܠܹܗ ܒܲܪ ܒܸܣܪܵܐ ܡܐܲܝܟܼ ܕܝܼܲܢ ܕܫܡܝܼܥܠܹܗ ܩܵܠܹܗ ܕܐܲܠܵܗܵܐ ܚܵܝܵܐ ܗܲܡܙܘܼܡܹܐ ܡ̣ܢ ܓܵܘ ܢܘܼܪܵܐ ܘܚܝܹܐܠܹܗ؟܀ ܩܲܪܒܸܢ ܐܲܢ݇ܬ̇ ܘܫܡܝܼܥ ܟܠ ܡܸܢܕܝܼ ܕܐܵܡܸܪ ܐܸܠܘܼܟܼ ܡܵܪܝܵܐ ܐܲܠܵܗܲܢ؛ ܘܐܲܢ݇ܬ̇ ܗܲܡܙܸܡܸܬ̇ ܥܲܡܲܢ ܟܠ ܡܸܢܕܝܼ ܕܐܵܡܸܪ ܐܸܠܘܼܟܼ ܡܵܪܝܵܐ ܐܲܠܵܗܲܢ؛ ܘܒܸܬ ܫܵܡܥܲܚ ܘܥܵܒ̣ܕܲܚ܀ ܘܫܡܝܼܥܠܹܗ ܡܵܪܝܵܐ ܩܵܠܵܐ ܕܗܹܡܸܙܡܵܢܵܘ̈ܟ̣ܘܿܢ ܐܲܝܟܼ ܕܐ݇ܡܸܪܵܘܟ̣ܘܿܢ ܐܸܠܝܼ. ܘܐ݇ܡܸܪܹܗ ܐܸܠܝܼ ܡܵܪܝܵܐ؛ ܫܡܝܼܥܠܝܼ ܒܩܵܠܹܗ ܕܛܵܝܸܦܵܐ؛ ܘܚܲܒܪܹ̈ܐ ܕܐ݇ܡܸܪܗ݇ܘܿܢ ܐܸܠܘܼܟܼ. ܨܦܵܝܝܼ ܝ݇ܠܹܗ ܟܠ ܡܸܢܕܝܼ ܕܗܘܼܡܙܸܡܠܗ݇ܘܿܢ܀ ܐܝܼܢܵܐ ܛܘܼܒ̣ܵܐ ܕܗܵܘܹܐܠܗ݇ܘܿܢ ܐܵܗܵܐ ܠܸܒܵܐ ܠܸܦܠܵܚܵܐ ܩܵܕ݇ܡܝܼ؛ ܘܠܸܢܛܵܪܵܐ ܟܠܲܝܗ‌ܝ ܦܘܼܩܕܵܢ̈ܝܼ؛ ܟܠܲܝܗ‌ܝ ܝܵܘܡܵܢܹ̈ܐ؛ ܕܗܵܘܝܵܐ ܛܵܒ̣ܬܵܐ ܐܸܠܲܝܗ‌‌ܝ ܘܠܒܢܘܿܢܲܝ̈ܗ‌ܝ ܗܲܠ ܥܵܠܲܡ܀ ܙܹܠ݇ ܐ݇ܡܘܿܪ ܐܸܠܲܝܗ‌ܝ؛ ܕܘܼܪܘܿܢ ܠܡܲܫܟܢܵܘ̈ܟ̣ܘܿܢ܀ ܘܐܲܢ݇ܬ̇ ܟܠܝܼ ܠܲܐܟ̣ܵܐ ܠܟܸܣܠܝܼ؛ ܘܒܸܬ ܐܵܡܪܸܢܘܼܟܼ ܟܠܲܝܗ‌ܝ ܢܵܡܘܿܣ̈ܝܼ؛ ܘܦܘܼܩܕܵܢ̈ܝܼ ܘܕܝܼܘܵܢ̈ܝܼ؛ ܕܡܲܠܦܸܬ̇ ܠܗ݇ܘܿܢ؛ ܘܥܵܒ̣ܕܝܼ ܒܐܲܪܥܵܐ ܕܝܵܗ݇ܒ̣ܸܢܗ݇ܘܿܢ ܠܸܪܝܵܬܵܗ̇܀ ܢܛܘܿܪܘܿܢ ܘܥܒ̣ܘܿܕܘܿܢ ܐܲܝܟܼ ܕܩܲܡ ܦܵܩܸܕܠܵܘܟ̣ܘܿܢ ܡܵܪܝܵܐ ܐܲܠܵܗܵܘܟ̣ܘܿܢ؛ ܘܠܵܐ ܦܵܬܠܝܼܬܘܿܢ ܠܵܐ ܠܝܲܡܝܼܢܵܐ ܘܠܵܐ ܠܣܸܡܵܠܵܐ. ܒܟܠܵܗ̇ ܐܘܼܪܚܵܐ ܕܩܲܡ ܦܵܩܸܕܠܵܘܟ̣ܘܿܢ ܡܵܪܝܵܐ ܐܲܠܵܗܵܘܟ̣ܘܿܢ ܙܹܠ݇ܡܘܿܢ؛ ܕܚܲܝܝܼܬܘܿܢ ܘܗܵܘܝܵܐ ܛܵܒ̣ܬܵܐ ܐܸܠܵܘܟ̣ܘܿܢ؛ ܘܡܲܙܝܸܕܝܼܬܘܿܢ ܝܵܘܡܵܢܹ̈ܐ ܒܐܲܪܥܵܐ ܕܝܵܪܬܝܼܬܘܿܢ؛ ܐܲܢܹܐ ܦܘܼܩܕܵܢܹ̈ܐ ܘܢܵܡܘܿܣܹ̈ܐ ܘܕܝܼܘܵܢܹ̈ܐ ܕܦܘܼܩܕܸܢܹܗ ܡܵܪܝܵܐ ܐܲܠܵܗܵܘܟ̣ܘܿܢ ܕܡܲܠܦܸܢܵܘܟ̣ܘܿܢ ܕܥܵܒ̣ܕܝܼܬܘܿܢ ܒܐܲܪܥܵܐ ܕܥܵܒ̣ܪܝܼܬܘܿܢ ܐܸܠܵܗ̇ ܠܸܪܝܵܬܵܗ̇܀ ܘܙܵܕܥܝܼܬܘܿܢ ܡ̣ܢ ܡܵܪܝܵܐ ܐܲܠܵܗܵܘܟ̣ܘܿܢ؛ ܘܢܵܛܪܝܼܬܘܿܢ ܟܠܲܝܗ‌ܝ ܦܘܼܩܕܵܢ̈ܘܼܗ‌ܝ ܘܢܵܡܘܿܣ̈ܘܼܗ‌ܝ ܘܕܝܼܘܵܢ̈ܘܼܗ‌ܝ ܕܒܸܦܩܵܕܵܐ ܝ݇ܘܸܢ ܐܸܠܘܼܟܼ؛ ܐܲܢ݇ܬ̇ ܘܒܪܘܿܢܘܼܟܼ؛ ܘܒܪܘܿܢܵܐ ܕܒܪܘܿܢܘܼܟܼ؛ ܟܠܲܝܗ‌ܝ ܝܵܘܡܵܢܹ̈ܐ ܕܚܲܝ̈ܘܼܟܼ ܕܙܵܝܕܝܼ ܝܵܘܡܵܢ̈ܘܼܟܼ܀ ܫܡܝܼܥ ܝܼܣܪܵܝܹܠ؛ ܘܢܛܘܿܪ ܘܥܒ̣ܘܿܕ؛ ܘܗܵܘܝܵܐ ܠܘܼܟܼ ܛܵܒ̣ܬܵܐ ܘܙܵܝܕܸܬ̇ ܪܵܒܵܐ؛ ܐܲܝܟܼ ܕܐ݇ܡܸܪܹܗ ܐܸܠܘܼܟܼ ܡܵܪܝܵܐ ܐܲܠܵܗܵܐ ܕܒܵܒܵܘܵܬ̈ܘܼܟܼ؛ ܕܝܵܗ݇ܒ̣ܸܠܘܼܟܼ ܐܲܪܥܵܐ ܡܲܓ̰ܪܝܼܵܢܬܵܐ ܕܚܲܠܒ̣ܵܐ ܘܕܸܒ̣ܫܵܐ܀

ܚܲܒ̣ܪܹܗ

ܐܹܫܲܥܝܵܐ ܛ؛ 8‐ܫܘܼܠܵܡܵܐ

ܫܠܵܘ ܢܒ̣ܝܼܘܼܬܹܗ ܕܐܹܫܲܥܝܵܐ؛ ܐܲܚܲܝ̈ ܒܲܪܸܟ̣ܡܵܪܝ܀

ܚܲܒܪܵܐ ܫܘܼܕܸܪܹܗ ܡܵܪܝܵܐ ܒܝܲܥܩܘܿܒ̣؛ ܘܢܦܸܠܹܗ ܒܝܼܣܪܵܝܹܠ؛ ܘܒܸܬ ܝܵܕܥܝܼ ܟܠܲܝܗ‌ܝ ܛܵܝܸܦܹ̈ܐ؛ ܐܲܦܪܹܝܡ ܘܥܵܡܪ̈ܵܢܹܐ ܕܫܵܡܪܹܝܢ؛ ܒܫܘܼܒ̣ܗܵܪܵܐ ܘܪܵܡܘܼܬܵܐ ܘܒܹܐܡܵܪܵܐ؛ ܒܸܬ ܕܵܪܲܚ ܟܲܪ̈ܦܝܼܟ̰ܹܐ؛ ܘܩܵܛܥܲܚ ܟܹܐܦܹ̈ܐ؛ ܘܦܵܪܡܲܚ ܫܲܩܡܹ̈ܐ ܘܡܲܚܠܸܦܲܚ ܒܐܲܪ̈ܙܹܐ؛ ܘܒܸܬ ܚܲܠܸܢ ܡܵܪܝܵܐ ܡܲܠܝܸܨܵܢܹ̈ܐ ܕܪܵܨܵܢ ܥܲܠܘܼܗ‌ܝ ܘܠܕܸܫ̰ܡܸܢ̈ܘܼܗ‌ܝ ܒܸܬ ܚܵܦܸܛ܀ ܠܐܵܕܘܿܡ ܡ̣ܢ ܡܲܕܢܚܵܐ ܘܠܦܠܸܫܬܵܝܹ̈ܐ ܡ̣ܢ ܡܲܥܪܒ̣ܵܐ. ܘܒܸܬ ܐܵܟ̣ܠܝܼ ܠܹܗ ܠܝܼܣܪܵܝܹܠ ܒܟܠܹܗ ܦܘܼܡܲܝܗ‌ܝ. ܘܒܐܲܢܹܐ ܟܠܲܝܗ‌ܝ ܠܵܐ ܕܐܸܪܹܗ ܟܲܪܒܹܗ ܘܡܸܕܪܹܐ ܐܝܼܕܹܗ ܡܘܼܪܸܡܬܵܐ܀ ܘܛܵܝܸܦܵܐ ܠܵܐ ܕܐܸܪܗ݇ܘܿܢ؛ ܗܲܠ ܕܦܸܫܠܗ݇ܘܿܢ ܡܸܚܝܹܐ؛ ܘܠܡܵܪܝܵܐ ܚܲܝܠܬܵܢܵܐ ܠܵܐ ܒܘܼܩܸܪܗ݇ܘܿܢ܀ ܘܬܘܼܠܸܩܠܹܗ ܡܵܪܝܵܐ ܡ̣ܢ ܝܼܣܪܵܝܹܠ؛ ܪܹܫܵܐ ܘܕܵܢܒ̣ܵܐ؛ ܘܕܵܢܒ̣ܵܐ ܘܪܹܫܵܐ ܒܚܲܕ݇ ܝܵܘܡܵܐ. ܣܵܒ̣ܵܐ ܘܣܩܝܼܠܵܐ ܕܦܵܬܵܐ ܗ̇ܘ ܝܼܠܹܗ ܪܹܫܵܐ؛ ܘܢܒ̣ܝܼܵܐ ܕܡܲܠܸܦ ܒܘܼܚܬܲܢ ܗ̇ܘ ܝܼܠܹܗ ܕܵܢܒ̣ܵܐ. ܥܵܒ̣ܕܵܢܹ̈ܐ ܕܛܵܒ̣ܬܵܐ ܕܐܵܗܵܐ ܛܵܝܸܦܵܐ ܒܸܬ ܗܵܘܝܼ ܡܲܚܠܸܛܵܢ̈ܘܼܗ‌ܝ ܘܡܛܲܒܥܵܢ̈ܘܗ‌ܝ ܒܘܼܬ ܕܐܵܗܵܐ؛ ܠܹܐ ܡܲܚܕܹܐ ܡܵܪܝܵܐ ܓ̰ܘܲܢ̈ܩܘܼܗ‌ܝ؛ ܘܥܲܠ ܝܵܬܘܼܡܲܝ̈ܗ‌ܝ ܘܐܲܪ̈ܡܸܠܝ̈ܵܬܲܝܗ‌ܝ ܠܹܐ ܥܵܒ̣ܸܕ ܪ̈ܲܚܡܹܐ. ܣܵܒܵܒ ܟܠܲܝܗ‌ܝ ܚܲܢܦܹ̈ܐ ܝ݇ܢܵܐ ܘܒܝܼܫܹ̈ܐ. ܘܟܠ ܦܘܼܡܵܐ ܗܲܡܙܘܼܡܹܐ ܐܲܗܡܲܩܘܼܬܵܐ؛ ܘܒܐܲܢܹܐ ܟܠܲܝܗ‌ܝ ܠܵܐ ܕܐܸܪܹܗ ܟܲܪܒܹܗ. ܘܡܸܕܪܹܐ ܐܝܼܕܹܗ ܡܘܼܪܸܡܬܵܐ ܣܵܒܵܒ ܠܒ̣ܸܚܠܵܗ̇ ܚܛܝܼܬܵܐ ܡܐܲܝܟܼ ܢܘܼܪܵܐ؛ ܘܒܸܬ ܐܵܟ̣ܠܵܐ ܟܸܬܘܹ̈ܐ ܘܩܝܼܘܵܪܹ̈ܐ ܘܒܸܬ ܠܵܒ̣ܚܵܐ ܒܐܝܼܠܵܢܹ̈ܐ ܕܡܲܝܫܵܐ؛ ܘܒܸܬ ܬܲܪܩܸܠܝܼ ܓܘܼܒܝܹ̈ܐ ܒܬܸܢܢܵܐ܀ ܒܢܓ̰ܵܘܬܹܗ ܕܡܵܪܝܵܐ ܚܲܝܠܬܵܢܵܐ ܫܥܸܫܠܵܗ̇ ܐܲܪܥܵܐ؛ ܘܛܵܝܸܦܵܐ ܗ݇ܘܹܐܠܹܗ ܐܲܝܟܼ ܕܗ̇ܘ ܕܐ݇ܟ̣ܸܠܵܗ̇ ܢܘܼܪܵܐ؛ ܘܐ݇ܢܵܫܵܐ ܥܲܠ ܐܵܚܘܿܢܹܗ ܠܹܐ ܡܪܵܚܸܡ؛ ܘܒܸܬ ܦܵܪܸܡ ܥܲܠ ܝܲܡܝܼܢܹܗ ܘܟܵܦܸܢ؛ ܘܒܸܬ ܐܵܟ̣ܸܠ ܥܲܠ ܣܸܡܵܠܹܗ. ܘܠܹܐ ܣܵܒ̣ܥܝܼ؛ ܘܐ݇ܢܵܫܵܐ ܒܸܣܪܵܐ ܕܕܪܵܥܹܗ ܒܸܬ ܐܵܟ̣ܸܠ܀ ܡܢܲܫܹܐ ܠܐܵܦܪܹܝܡ. ܘܐܵܦܪܹܝܡ ܠܡܢܲܫܹܐ؛ ܡܐܘܼܕܵܠܹܗ ܥܲܠ ܝܼܗܘܼܕܵܐ؛ ܘܒܐܲܢܹܐ ܟܠܲܝܗ‌ܝ ܠܵܐ ܕܐܸܪܹܗ ܟܲܪܒܹܗ؛ ܘܡܸܕܪܹܐ ܐܝܼܕܹܗ ܡܘܼܪܸܡܬܵܐ܀

♱♱♱♱♱♱♱♱♱

ܚܕܒܫܒܐ ܕܐܪܒܥܐ ܕܩܝܛܐ

ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ

ܕܲܠܘܵܬܼ ܩܘܼܪ̈ܲܢܬܵܝܹܐ ܐܲܚܲܝ̈ ܒܲܪܸܟܼܡܵܪܝ܀

ܐܝܼܢܵܐ ܐܵܢܵܐ ܦܵܘܠܘܿܣ ܒܓܵܢܝܼ ܦܲܪܦܘܼܠܹܐ ܝ݇ܘܸܢ ܒܝܼܵܘܟܼܘܿܢ ܒܢܝܼܚܘܼܬܹܗ ܘܒܡܲܟܝܼܟܼܘܼܬܹܗ ܕܡܫܝܼܚܵܐ. ܕܐܵܦܸܢ ܒܦܵܐܬܵܐ ܡܲܟ̇ܝܼܟܼܵܐ ܝ݇ܘܸܢ ܠܟܸܣܠܵܘܟܼܘܿܢ ܐܝܼܢܵܐ ܟܲܕ ܪܸܚܩܵܐ ܝ݇ܘܸܢ ܐܝܼܬܠܝܼ ܗܹܒܼܝܼ ܒܝܼܵܘܟܼܘܿܢ* ܒܸܛܠܵܒܵܐ ܝ݇ܘܸܢ ܡܸܢܵܘܟܼܘܿܢ ܕܠܵܐ ܐܝܼܡܲܢ ܕܐܵܬܸܢ ܦܵܝܫܸܢ ܡܘܼܠܝܸܨܵܐ ܒܗܹܒܼܝܼ ܕܐܝܼܬ ܠܝܼ؛ ܕܩܲܫܕܸܪܸܢ ܐܲܝܟܼ ܕܒܹܚܫܵܒܼܹܐ ܝ݇ܘܸܢ ܥܲܠ ܕܐܵܢܝܼ ܐ݇ܢܵܫܹ̈ܐ ܕܚܵܫܒܼܝܼܠܲܢ ܐܲܝܟܼ ܕܒܒܸܣܪܵܐ ܒܸܚܕܵܪܵܐ ܝ݇ܘܲܚ* ܣܵܒܵܒ ܐܵܦܸܢ ܒܒܸܣܪܵܐ ܒܸܚܕܵܪܵܐ ܝ݇ܘܲܚ؛ ܐܝܼܢܵܐ ܠܹܐ ܝ݇ܘܲܚ ܦܘܼܠܚܵܢܹ̈ܐ ܕܒܸܣܪܵܐ ܒܸܦܠܵܚܵܐ* ܣܵܒܵܒ ܐܲܣܒܵܒ ܕܦܠܵܫܲܢ ܠܹܐ ܝ݇ܠܹܗ ܕܒܸܣܪܵܐ ܐܝܼܢܵܐ ܕܚܲܝܠܵܐ ܕܐܲܠܵܗܵܐ. ܕܒܝܼܹܗ ܙܲܒܛܘܼܢܹܐ ܝ݇ܘܲܚ ܩܲܠܥܵܬܹ̈ܐ ܥܵܨܝܼܹ̈ܐ ܘܒܸܣܬܵܪܵܐ ܝ݇ܘܸܚ ܚܘܼܫܵܒܼܹ̈ܐ ܘܟܠ ܪܵܘܡܵܐ ܕܦܵܐܸܫ ܡܘܼܪܡܵܐ ܕܲܪܩܘܼܒܼܠ ܕܝ݇ܕܵܥܝܬܹܗ ܕܐܲܠܑܵܗܵܐ. ܘܒܸܓܪܵܫܵܐ ܝ݇ܘܲܚ ܟܠܲܝܗܝ ܚܝܼܵܠܹ̈ܐ ܠܡܲܨܝܲܬܬܹܗ ܕܡܫܝܼܚܵܐ* ܘܗܵܕܘܿܪܹܐ ܝ݇ܘܲܚ ܝ݇ܘܲܚ ܠܸܫܩܵܠܵܐ ܬܘܼܥܠܵܐ ܡ̣ܢ ܕܐܵܢܝܼ ܕܠܵܐ ܡܲܨܝܸܬܬܝܼ. ܐܝܼܡܲܢ ܕܗܘܹܐܠܵܗ̇ ܟܵܡܝܼܠ ܡܲܨܝܲܬܬܵܘܟܼܘܿܢ* ܒܦܵܐܬܘܵܬܹ̈ܐ ܒܸܚܝܵܪܵܐ ܝ݇ܬܘܿܢ. ܐܸܢ ܚܲܕ݇ ܐ݇ܢܵܫܵܐ ܐܝܼܬܠܹܗ ܗܹܒܼܝܼ ܥܲܠ ܓܵܢܹܗ ܕܡܫܝܼܚܵܐ ܝ݇ܠܹܗ؛ ܐܵܗܵܐ ܝܲܕܸܥ ܡ̣ܢ ܓܵܢܹܗ ܕܗ̇ܘ ܕܡܫܝܼܚܵܐ ܝ݇ܠܹܗ؛ ܗܲܕܟܼܵܐ ܐܘܼܦ ܐܲܚܢܲܢ܋ ܐܸܢ ܥܵܒܼܕܸܢ ܫܘܼܒܼܗܵܪܵܐ ܙܵܘܕܵܐ ܥܲܠ ܗܘܼܟܡܵܐ ܕܝܘܼܗ݇ܒܼܸܠܹܗ ܐܸܠܝܼ ܡܵܪܲܢ؛ ܠܹܐ ܢܵܚܦܸܢ ܣܵܒܵܒ ܕܩܵܐ ܒܸܢܝܵܢܵܐ ܕܝܼܵܘܟܼܘܿܢ ܝܘܼܗ݇ܒܼܸܠܹܗ ܐܸܠܲܢ ܘܠܵܐ ܩܵܐ ܬܠܵܚܬܵܘܟܼܘܿܢ* ܬܲܚܡܘܼܢܹܐ ܝ݇ܘܸܢ ܕܠܵܐ ܦܵܝܫܸܢ ܚܫܝܼܒܼܵܐ ܐܲܝܟܼ ܕܐܸܢ ܡܲܙܕܘܼܥܝܵܘܟܼܘܿܢ ܝܼܘܸܢ ܒܐܸܓܲܪ̈ܝܵܬܝܼ* ܣܵܒܵܒ ܕܐܝܼܬ ܐ݇ܢܵܫܹ̈ܐ ܕܐܵܡܪܝܼ ܕܐܸܓܲܪ̈ܝܵܬܹܐ ܝܲܩܘܼܪܹ̈ܐ ܝ݇ܢܵܐ ܘܚܲܝܠܵܢܹ̈ܐ ܐܝܼܢܵܐ ܐ݇ܬܵܝܬܹܗ ܕܓܘܼܫܡܵܐ ܙܲܒܘܼܢ ܝܼܠܵܗ̇ ܘܗܲܡܙܲܡܬܹܗ ܡܘܼܣܠܝܼܬܵܐ. ܐܸܠܵܐ ܐܵܗܵܐ ܚܘܼܫ ܬܲܚܡܸܢ ܗ̇ܘ ܕܗܲܕܟܼܵܐ ܐܵܡܸܪ. ܕܵܐܟܼܝܼ ܕܝܼܘܲܚ ܒܗܹܡܸܙܡܲܢ ܕܐܸܓܲܪܬܲܢ ܟܲܕ ܪܸܚܩܵܐ ܝ݇ܘܲܚ؛ ܗܲܕܟܼܵܐ ܝܼܘܲܚ ܐܘܼܦ ܐܝܼܡܲܢ ܕܩܘܼܪܒܵܐ ܝ݇ܘܲܚ ܒܦܘܼܠܚܵܢܵܐ* ܠܹܐ ܝ݇ܘܲܚ ܩܲܫܕܘܼܪܹܐ ܕܚܲܫܒܸܢܲܚ ܝܲܢ ܡܲܕܒܼܸܩܲܚ ܓܵܢܲܢ ܥܲܡ ܕܐܵܢܝܼ ܕܝܼܢܵܐ ܒܸܚܩܵܪܵܐ ܓܵܢܲܝܗܝ. ܐܝܼܢܵܐ ܣܵܒܵܒ ܕܐܵܢܝܼ ܓܵܢܲܝܗܝ ܡܲܕܒܼܘܼܩܹܐ ܝ݇ܢܵܐ ܥܲܡ ܓܵܢܲܝܗܝ ܘܠܹܐ ܝ݇ܢܵܐ ܦܲܪܡܘܼܝܹܐ* ܐܝܼܢܵܐ ܐܲܚܢܲܢ ܠܹܐ ܚܵܩܪܲܚ ܓܵܢܲܢ ܙܵܘܕܵܐ ܡ̣ܢ ܕܗ̇ܘ ܡܸܢܕܝܼ ܕܝܼܘܲܚ. ܐܝܼܢܵܐ ܒܟܝܼܘܿܠܵܐ ܕܬܸܚܘܼܒ ܕܝܘܼܗ݇ܒܼܸܠܹܗ ܐܸܠܲܢ ܐܲܠܵܗܵܐ ܕܡܵܛܲܚ ܐܘܼܦ ܗܲܠ ܠܟܸܣܠܵܘܟܼܘܿܢ* ܣܵܒܵܒ ܠܹܐ ܝ݇ܠܵܗ̇ ܐܲܝܟܼ ܕܐܸܢ ܠܹܐ ܝ݇ܘܲܚ ܡܨܵܝܵܐ ܡܵܛܲܚ ܠܟܸܣܠܵܘܟܼܘܿܢ ܦܵܫܘܿܛܹܐ ܝ݇ܘܲܚ ܓܵܢܲܢ. ܣܵܒܵܒ ܗܲܠ ܠܟܸܣܠܵܘܟܼܘܿܢ ܡܛܸܐܠܲܢ ܒܡܲܫܚܲܕܬܹܗ ܕܡܫܝܼܚܵܐ* ܠܹܐ ܝ݇ܘܲܚ ܒܸܚܩܵܪܵܐ ܓܵܢܲܢ ܙܵܘܕܵܐ ܡ̣ܢ ܟܝܼܘܼܠܲܢ ܒܦܘܼܠܚܵܢܵܐ ܕܐ݇ܚܹܪ̈݇ܢܹܐ. ܐܸܠܵܐ ܐܝܼܬܠܲܢ ܗܹܒܼܝܼ ܕܟܲܕ ܓܲܪܘܸܣܵܐ ܗܲܝܡܵܢܘܼܬܵܘܟܼܘܿܢ. ܒܝܼܵܘܟܼܘܿܢ ܦܵܝܫܲܚ ܓܘܼܪܘܸܣܹܐ ܐܲܝܟܼ ܟܝܼܘܿܠܲܢ* ܘܒܸܬ ܦܵܝܫܲܚ ܡܘܼܙܝܸܕܹܐ ܐܘܼܦ ܠܗ̇ܘ ܓܸܒܵܐ ܡܸܢܵܘܟܼܘܿܢ ܠܡܲܫܚܘܼܕܹܐ. ܠܵܐ ܒܟܝܼܘܿܠܵܐ ܕܐ݇ܚܹܪ̈݇ܢܹܐ. ܐܝܼܢܵܐ ܒܐܵܢܝܼ ܕܗܘܼܕܪܹܐ ܝ݇ܢܵܐ ܥܵܒܼܕܲܚ ܫܘܼܒܼܗܵܪܵܐ* ܠܹܐ ܝ݇ܠܹܗ ܗ̇ܘ ܕܚܵܩܸܪ ܓܵܢܹܗ ܡܘܼܒܝܸܢܵܐ. ܐܝܼܢܵܐ ܗ̇ܘ ܕܡܵܪܝܵܐ ܚܵܩܸܪܹܗ*

♱♱♱♱♱♱♱♱♱

ܚܕܒܫܒܐ ܕܐܪܒܥܐ ܕܩܝܛܐ

ܡܪܩܘܣ ܙ: 1‐ 24

ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ ܟܪܘܙܘܬܼܐ ܕܡܪܩܘܣ

♰ ܒܵܬ݇ܪ ܐܲܢܹܐ ܓ̰ܡܸܥܠܗ݇ܘܿܢ ܠܘܵܬ ܝܑܼܫܘܿܥ ܦܪ̈ܝܼܫܹܐ ܘܣܵܦܪܹ̈ܐ ܕܐ݇ܬܹܐ ܠܗ݇ܘܿܢ ܡ̣ܢ ܐܘܿܪܸܫܠܸܡ. ܘܚܙܹܐܠܗ݇ܘܿܢ ܐ݇ܢܵܫܹ̈ܐ ܡ̣ܢ ܬܲܠܡܝܼܕܘܼ̈ܗܝ ܕܒܹܐܟܼܵܠܵܐ ܠܲܚܡܵܐ ܟܲܕ ܠܵܐ ܚܲܠܘܼܠܹܐ ܐܝܼܕܵܬܲܝܗܝ ܘܩܒܼܸܠܗ݇ܘܿܢ: ܣܵܒܵܒ ܟܠܲܝܗܝ ܝܗ݇ܘܼܕܵܝܹ̈ܐ ܘܦܪ̈ܝܼܫܹܐ ܕܐܸܢ ܒܛܝܼܠܵܐܝܼܬ ܠܵܐ ܚܲܠܸܠܝܼ ܗ݇ܘܵܘ ܐܝܼܕܵܬܲܝ̈ܗܝ ܠܹܐ ܐܲܟܼܠܝܼ ܗ݇ܘܵܘ: ܣܵܒܵܒ ܕܕܒܼܝܼܩܹܐ ܝܢܵܐ ܣܲܦܝܵܢܘܼܬܵܐ ܕܩܲܫܝܼܫܹ̈ܐ. ܘܡ̣ܢ ܫܘܼܩܵܐ ܐܸܢ ܠܵܐ ܚܲܠܸܠܝܼ ܠܹܐ ܐܲܟܼܠܝܼ. ܘܪܵܒܵܐ ܐ݇ܚܹܪ̈݇ܢܹܐ ܐܝܼܬ ܐܲܝܢܝܼ ܕܩܘܼܒܸܠܗ݇ܘܿܢ ܕܢܲܛܪܝܼ. ܚܲܠܲܠܬܵܐ ܕܟܵܣܹ̈ܐ ܘܕܩܸܣܛܹ̈ܐ ܘܕܡܵܢܹ̈ܐ ܕܢܚܵܫܵܐ ܘܲܕܥܲܪ̈ܣܵܬܵܐ. ܘܩܲܡ ܒܲܩܪܝܼܠܹܗ ܣܵܦܪܹ̈ܐ ܘܦܪ̈ܝܼܫܹܐ: ܩܵܡܘܿܕܝܼ ܬܲܠܡܝܼܕܘܼܟܼ ܠܹܐ ܝܢܵܐ ܒܸܚܕܵܪܵܐ ܐܲܝܟܼ ܣܲܦܝܵܢܘܼܬܵܐ ܕܩܲܫܝܼܫܹ̈ܐ: ܐܸܠܵܐ ܟܲܕ ܠܵܐܚܘܼܠܸܠܹܐ ܐܝܼܕܵܬܲܝ̈ܗܝ ܒܹܐܟܼܵܠܵܐ ܝܢܵܐ ܠܲܚܡܵܐ؟ ܐܝܼܢܵܐ ܗ̇ܘ ܐ݇ܡܸܪܹܗ ܐܸܠܲܝܗܝ: ܨܦܵܝ ܢܘܼܒܹܐܠܹܗ ܥܲܠܵܘܟܼܘܿܢ ܐܹܫܲܥܝܵܐ ܢܒܼܝܼܵܐ ܝܵܐ ܡܲܫܦܸܪ̈ܵܢܹܐ: ܐܲܝܟܼ ܕܟܬܝܼܒܼܵܐ ܝܠܹܗ: ܕܐܵܗܵܐ ܥܲܡܵܐ ܒܣܸܦܘܵܬܹ̈ܐ ܡܝܵܩܘܼܪܝܼ ܝܠܹܗ. ܐܝܼܢܵܐ ܠܸܒܲܝܗܝ ܪܵܒܵܐ ܪܸܚܩܵܐ ܝܠܹܗ ܡܸܢܝܼ. ܘܗܵܒܵܣ ܒܸܣܓܼܵܕܵܐ ܝܢܵܐ ܐܸܠܝܼ. ܟܲܕ ܡܵܠܘܼܦܹܐ ܝܢܵܐ ܝܘܼܠܦܵܢܹ̈ܐ ܕܦܘܼܩܕܵܢܹ̈ܐ ܕܒܢܲܝ̈ܢܵܫܵܐ: ܣܵܒܵܒ ܫܒܼܸܩܠܵܘܟܼܘܿܢ ܦܘܼܩܕܵܢܵܐ ܕܐܲܠܵܗܵܐ. ܘܕܒܼܝܼܩܹܐ ܝܬܘܿܢ ܣܲܦܝܵܢܘܼܬܵܐ ܕܒܢܲܝ̈ܢܵܫܵܐ. ܚܲܠܲܠܬܵܐ ܕܟܵܣܹ̈ܐ ܘܕܩܸܣܛܹ̈ܐ ܘܪܵܒܵܐ ܕܠܐܲܢܹܐ ܟܹܐ ܕܵܡܝܼ. ܐ݇ܡܸܪܹܗ ܐܸܠܲܝܗܝ: ܨܦܵܐܝܝܼ ܒܸܙܠܵܡܵܐ ܝܬܘܿܢ ܦܘܼܩܕܵܢܵܐ ܕܐܲܠܵܗܵܐ ܕܡܲܩܸܡܝܼܬܘܿܢ ܣܲܦܝܵܢܘܼܬܵܘܟܼܘܿܢ. ܣܵܒܵܒ ܡܘܼܫܹܐ ܐ݇ܡܸܪܹܗ: ܝܵܩܸܪ ܠܒܵܒܘܼܟܼ  ܘܠܝܸܡܘܼܟܼ ܘܡ̇ܢ ܕܡܨܵܥܸܪ ܠܒܵܒܵܐ ܝܲܢ ܠܝܸܡܵܐ: ܡܵܘܬܵܐ ܡܵܐܸܬ: ܐܝܼܢܵܐ ܐܲܚܬܘܿܢ ܒܹܐܡܵܪܵܐ ܝܬܘܿܢ: ܐܸܢ ܐܵܡܸܪ ܓܲܒܼܪܵܐ ܠܒܵܒܹܗ ܝܲܢ ܠܝܸܡܹܗ: ܩܘܼܪܒܵܢܝܼ ܡܸܢܕܝܼ ܕܡܸܢܝܼ ܙܵܝܸܕܸܬ: ܘܠܹܐ ܝܬܘܿܢ ܒܸܫܒܼܵܩܹܗ ܕܥܵܒܼܸܕ ܡܸܢܕܝܼ ܩܵܐ ܒܵܒܹܗ ܝܲܢ ܩܵܐ ܝܸܡܹܗ: ܡܲܣܠܘܼܝܹܐ ܝܬܘܿܢ ܗܹܡܸܙܡܵܢ ܕܐܲܠܵܗܵܐ ܒܘܼܬ  ܣܲܦܝܵܢܘܼܬܵܘܟܼܘܿܢ ܕܣܘܼܦܹܐ ܠܵܘܟܼܘܿܢ. ܘܪܵܒܵܐ ܕܟܹܐ ܕܵܡܝܼ ܠܐܲܢܹܐ ܒܸܥܒܼܵܕܵܐ ܝܬܘܿܢ: ܘܩܪܹܐܠܹܗ ܝܑܼܫܘܿܥ ܠܟܸܢܫܵܐ ܟܠܹܗ. ܘܐ݇ܡܸܪܹܗ ܐܸܠܲܝܗܝ: ܫܡܸܥܡܘܿܢ ܐܸܠܝܼ ܟܠܵܘܟܼܘܿܢ ܘܦܲܪܡܹܝܡܘܿܢ: ܠܲܝܬ ܡܸܢܕܝܼ ܕܠܒܼܲܕܲܪ ܡ̣ܢ ܒܲܪܢܵܫܵܐ ܝܠܹܗ ܘܥܵܒܼܸܪ ܓܵܘܹܗ، ܕܡܵܨܹܐ ܟ̰ܲܦܠܸܢܹܗ: ܐܸܠܵܐ ܡܸܢܕܝܼ ܕܦܵܠܸܛ ܡܸܢܹܗ ܗ̇ܘ ܟܹܐ ܟ̰ܲܦܠܸܢܹܗ ܠܒܲܪܢܵܫܵܐ: ܡ̇ܢ ܕܐܝܼܬܠܹܗ ܢܲܬܝܵܬܹ̈ܐ ܕܫܵܡܸܥ ܫܵܡܸܥ: ܐܝܼܢܵܐ ܟܲܕ ܥܒܼܸܪܹܗ ܝܑܼܫܘܿܥ ܠܒܲܝܬܵܐ ܡ̣ܢ ܟܸܢܫܵܐ: ܒܘܼܩܸܪܗ݇ܘܿܢ ܡܸܢܹܗ ܬܲܠܡܝܼܕܘܼ̈ܗܝ ܥܲܠ ܗ̇ܘ ܡܲܬܠܵܐ ܐܵܡܸܪ ܐܸܠܲܝܗܝ: ܗܲܕܟܼܵܐ ܐܘܿܦ ܐܲܚܬܘܿܢ ܥܲܣܩܵܐ ܝܠܵܗ ܐܸܠܵܘܟܼܘܿܢ ܠܦܲܪܡܘܼܝܹܐ؟ ܠܹܐ ܝܲܕܥܝܼܬܘܿܢ ܕܟܠ ܡܸܢܕܝܼ ܕܡ̣ܢ ܠܒܼܲܕܲܪ ܥܵܒܼܸܪ ܓܵܘ ܒܲܪܢܵܫܵܐ ܠܹܐ ܡܵܨܹܐ ܟ̰ܲܦܠܸܢܹܗ: ܕܠܹܐ ܝܠܹܗ ܠܠܸܒܹܗ ܒܸܥܒܼܵܪܵܐ: ܐܸܠܵܐ ܠܟܲܪ݇ܣܹܗ. ܘܟܹܐ ܦܵܐܸܫ ܪܘܼܦܝܵܐ ܒܬܲܕܟܼܝܼܬܵܐ ܕܟܹܐ ܡܕܲܟܼܝܵܐ ܟܠܵܗ̇ ܡܹܐܟܼܘܠܬܵܐ: ܐܝܼܢܵܐ ܡܸܢܕܝܼ ܕܦܵܠܸܛ ܡ̣ܢ ܒܲܪܢܵܫܵܐ ܗ̇ܘ ܝܼܠܹܗ ܕܟ̰ܲܦܠܸܢ ܠܒܲܪܢܵܫܵܐ: ܣܵܒܵܒ ܡ̣ܢ ܠܓܵܘܵܝܹܐ ܡ̣ܢ ܠܸܒܵܐ ܕܒܢܲܝ̈ܢܵܫܵܐ ܟܹܐ ܦܲܠܛܝܼ ܚܘܼܫܵܒܼܹ̈ܐ ܒܝܼܫܹ̈ܐ: ܓܲܝܵܪܘܼܬܵܐ. ܙܲܢܝܘܼܬܵܐ. ܓܹܢܵܒܼܘܼܬܵܐ. ܩܸܛܠܵܐ. ܛܲܡܲܥܟܵܪܘܼܬܵܐ ܒܝܼܫܘܼܬܵܐ ܥܲܠܕܵܝܬܵܐ ܨܵܥܲܪܬܵܐ. ܥܲܝܢܵܐ ܒܝܼܫܬܵܐ. ܓܘܼܕܵܦܵܐ. ܫܲܒܼܗܪܵܢܘܼܬܵܐ. ܫܵܛܝܘܼܬܵܐ ܟܠܲܝܗܝ ܐܲܢܹܐ ܒܝܼܫܵܬܹ̈ܐ ܡ̣ܢ ܠܓܵܘܵܝܹܐ ܟܹܐ ܦܲܠܛܝܼ ܘܟܹܐ ܡܟ̰ܲܦܠܸܢܝܼ ܠܒܲܪܢܵܫܵܐ. ܡ̇ܢ ܕܐܝܼܬܠܹܗ ܢܲܬܝܵܬܹ̈ܐ ܕܫܵܡܸܥ ܫܵܡܸܥ.

♱♱♱♱♱♱♱♱♱