ܚܲܕܼܒܫܲܒܵܐ ܕܐܲܪܒܥܵܐ ܕܲܩܝܵܡܬܵܐ
ܐܹܫܲܥܝܵܐ ܡܛ؛ 13‐24
ܬܸܒ̣ܘ ܘܲܫܠܵܘ ܢܒ̣ܝܼܘܼܬܹܗ ܕܐܹܫܲܥܝܵܐ؛ ܐܲܚܲܝ̈ ܒܲܪܸܟ̣ܡܵܪܝ܀
ܗܵܕܟ̣ܵܐ ܒܹܐܡܵܪܵܐ ܝܠܹܗ ܡܵܪܝܵܐ؛ ܫܲܒܚܘܿܢ ܫܡܲܝܵܐ ܕܦܨܘܿܚܝ ܐܲܪܥܵܐ؛ ܦܨܘܿܚܘܿܢ ܛܘܼܪ̈ܵܢܹܐ ܒܬܸܫܒܘܿܚܬܵܐ؛ ܣܵܒܵܒ ܕܡܵܪܝܵܐ ܝܘܼܗ݇ܒ̣ܸܠܹܗ ܠܸܒܵܐ ܠܛܵܝܸܦܹܗ ܘܪܘܼܚܸܡܠܹܗ ܥܲܠ ܡܸܣܟܹܢܹ̈ܐ܀ ܘܐ݇ܡܸܪܵܗ̇ ܨܸܗܝܘܿܢ ܕܩܲܡ ܫܵܒ̣ܸܩܠܝܼ ܡܵܪܝܵܐ ܘܡܲܢܫܹܐܠܝܼ܀ ܐܸܢ ܡܲܢܫܝܼܵܐ ܒܲܟ̣ܬܵܐ ܝܵܠܵܕ݇ܗ̇ ܘܠܵܐ ܥܵܒ̣ܕܵܐ ܪ̈ܲܚܡܹܐ ܥܲܠ ܒܪܘܿܢܵܐ ܕܡܲܥ̈ܝܘܿܗ̇؛ ܐܵܦܸܢ ܕܐܲܢܹܐ ܡܲܢܫܝܼ. ܐܵܢܵܐ ܠܹܐ ܡܲܢܫܸܢܵܟ̣ܝ؛ ܗܵܘ ܥܲܠ ܠܲܚܬܵܐ ܕܐܝܼܕܝܼ ܩܲܡ ܪܵܫܡܸܢܵܟ̣ܝ؛ ܘܫܘܼܪ̈ܵܢܵܟ̣ܝ ܒܟܠ ܥܸܕܵܢܵܐ ܒܲܪܩܘܼܒ̣ܠܝܼ ܝ݇ܢܵܐ܀ ܒܢܘܿܢ̈ܵܟ̣ܝ ܒܸܬ ܗܵܘܝܼ ܬܵܠܚܵܢ̈ܵܟ̣ܝ؛ ܘܡܲܚܪܸ̈ܒ̣ܵܢܵܟ̣ܝ ܡܸܢܵܟ̣ܝ ܒܸܬ ܦܵܠܛܝܼ܀ ܡܵܪܸܡܝ ܥܲܝܢ̈ܵܟ̣ܝ ܠܚܵܕܸܪ̈ܘܵܢܵܟ̣ܝ؛ ܘܚܙܵܝ ܕܟܠܲܝܗܝ ܒܸܓ̰ܡܲܥܝܵܐ ܝ݇ܢܵܐ ܘܒܹܐܬܵܝܵܐ ܠܟܸܣܠܵܟ̣ܝ؛ ܚܵܝܵܐ ܝ݇ܘܸܢ ܒܹܐܡܵܪܵܐ ܝ݇ܠܹܗ ܡܵܪܝܵܐ؛ ܕܟܠܲܝܗܝ ܐܲܝܟܼ ܣܸܩܠܵܐ ܒܸܬ ܠܵܒ̣ܫܲܬ̇ܝ ܠܗ݇ܘܿܢ؛ ܘܦܵܝܫܲܬ̇ܝ ܣܘܼܩܸܠܬܵܐ ܐܲܝܟܼ ܟܵܠܬܵܐ܀ ܣܵܒܵܒ ܕܚܵܪ̈ܵܒܝܼܵܟ̣ܝ ܘܘܵܝܪ̈ܵܢܵܟ̣ܝ ܘܐܲܪܥܵܐ ܕܡܲܢܦܲܠܬܵܟ̣ܝ؛ ܡܐܵܕܝܼܵܐ ܒܸܬ ܦܵܝܫܵܐ ܡܘܼܠܝܸܨܬܵܐ ܡ̣ܢ ܥܵܡܪ̈ܵܢܹܐ؛ ܘܒܸܬ ܥܵܪܩܝܼ ܒܵܠܥܵܢ̈ܵܟ̣ܝ܀ ܘܡܸܕܪܹܐ ܒܸܬ ܐܵܡܪܝܼ ܒܢܘܿܢܹ̈ܐ ܕܥܲܩܪܘܼܬܵܟ̣ܝ؛ ܥܝܼܩܵܐ ܝ݇ܠܹܗ ܐܲܬܪܵܐ ܩܵܬܲܢ؛ ܗܲܒ̣݇ܠܲܢ ܕܘܼܟܬܵܐ ܘܝܵܬܒ̣ܲܚ؛ ܘܒܸܬ ܐܵܡܪܲܬ̇ܝ ܒܠܸܒܵܟ̣ܝ؛ ܡܵܢܝܼ ܗܘܼܨܸܠܹܗ ܩܵܬܝܼ ܐܲܢܹܐ؟ ܕܗܵܐ ܐܵܢܵܐ ܩܛܥܝܼܬܵܐ ܝ݇ܘܲܢܝ ܘܥܩܲܪܬܵܐ؛ ܝܲܚܣܝܼܪ ܘܛܪܝܼܕܬܵܐ؛ ܡܵܢܝܼ ܓܘܼܪܘܸܣܠܹܗ ܠܐܲܢܹܐ؟ ܐܸܢ ܐܵܢܵܐ ܦܝܼܫܬܵܐ ܝ݇ܘܲܢܝ ܒܢܲܦ̮ܫܝܼ؛ ܐܲܢܹܐ ܡ̣ܢ ܐܲܝܟܵܐ ܝ݇ܢܵܐ؟܀ ܗܵܕܟ̣ܵܐ ܒܹܐܡܵܪܵܐ ܝ݇ܠܹܗ ܡܵܪܝܵܐ ܐܲܠܵܗܵܐ؛ ܗܵܐ ܒܸܬ ܡܲܪܡܸܢ ܐܝܼܕܝܼ ܥܲܠ ܛܵܝܸܦܹ̈ܐ؛ ܘܒܸܬ ܡܲܪܡܸܢ ܢܝܼܫܲܢܩܵܐ ܠܛܵܝܸܦܹ̈ܐ. ܘܒܸܬ ܡܲܝܬܝܼ ܠܗ݇ܘܿܢ ܒܢܘܿܢ̈ܵܟ̣ܝ ܥܲܠ ܐܝܼܕ̈ܵܬܲܝܗܝ؛ ܘܠܒܢ̈ܵܬܵܟ̣ܝ ܥܲܠ ܪ̈ܘܼܦ̮ܫܵܢܲܝܗܝ ܒܸܬ ܛܵܥܢܝܼ܀ ܒܸܬ ܗܵܘܝܼ ܡܲܠܟܹ̈ܐ ܓܲܪ̈ܘܸܣܵܢܵܟ̣ܝ ܘܡܲܠܸܟܝܵܬܹ̈ܐ ܡܲܡܨܲܢ̈ܝܵܬܵܟ̣ܝ ܥܲܠ ܦܵܬܲܝܗܝ ܥܲܠ ܐܲܪܥܵܐ ܒܸܬ ܣܵܓ̣ܕܝܼܠܵܟ̣ܝ. ܘܥܲܦܪܵܐ ܕܐܲܩ̈ܠܵܬܵܟ̣ܝ ܒܸܬ ܠܵܟܟ̣ܝܼ؛ ܘܒܸܬ ܝܵܕܥܲܬ̇ܝ ܕܐܵܢܵܐ ܝ݇ܘܸܢ ܡܵܪܝܵܐ؛ ܕܠܹܐ ܢܵܟ̣ܦܝܼ ܐܵܢܝܼ ܕܣܵܒܪܝܼ ܐܸܠܝܼ܀
ܚܲܒ̣ܪܹܗ
ܦܪܲܟܣܝܼܣ ܚ؛ 14‐26
ܫܠܵܘ ܦܪܲܟܣܝܼܣ ܕܲܫܠܝܼܚܹ̈ܐ؛ ܐܲܚܲܝ̈ ܒܲܪܸܟ̣ܡܵܪܝ܀
ܘܟܲܕ ܫܡܝܼܥܠܗ݇ܘܿܢ ܫܠܝܼܚܹ̈ܐ ܕܓܵܘ ܐܘܿܪܸܫܠܹܡ؛ ܕܛܵܝܸܦܵܐ ܕܫܵܡܪ̈ܵܝܹܐ ܩܘܼܒܸܠܗ݇ܘܿܢ ܗܹܡܸܙܡܵܢ ܕܐܲܠܵܗܵܐ ܫܘܼܕܸܪܗ݇ܘܿܢ ܠܟܸܣܠܲܝܗܝ ܠܫܸܡܥܘܿܢ ܟܹܐܦܵܐ ܘܝܘܿܚܲܢܵܢ ܘܨܘܼܠܹܐܠܗ݇ܘܿܢ ܨܠܘܿܬܵܐ ܥܲܠܲܝܗܝ ܐܲܝܟܼ ܕܩܲܒܠܝܼ ܪܘܼܚܵܐ ܕܩܘܼܕܫܵܐ܀ ܣܵܒܵܒ ܗܵܠܵܐ ܠܲܝܬ̇ ܗ݇ܘܵܐ ܥܲܠ ܐܘܼܦ ܚܲܕ݇ ܡܸܢܲܝܗܝ. ܐܲܚܟ̰ܝܼ ܥܵܡܕܝܼ ܗ݇ܘܵܘ ܒܫܸܡܵܐ ܕܡܵܪܲܢ ܝܼܫܘܿܥ܀ ܗܵܝܓܵܗ̇ ܡܲܬܒ̣ܝܼ ܗ݇ܘܵܘ ܥܲܠܲܝܗܝ ܐܝܼܕܵܐ ܘܩܲܒܠܝܼ ܗ݇ܘܵܘ ܪܘܼܚܵܐ ܕܩܘܼܕܫܵܐ܀ ܘܟܲܕ ܚܙܹܐܠܹܗ ܣܝܼܡܘܿܢ ܘܒܣܝܵܡܝܼܕܵܐ ܕܫܠܝܼܚܹ̈ܐ ܦܝܵܫܵܐ ܝ݇ܠܵܗ̇ ܝܘܼܗ݇ܒ̣ܸܠܬܵܐ ܪܘܼܚܵܐ ܕܩܘܼܕܫܵܐ. ܐܘܼܦ ܗ̇ܘ ܝܘܼܗ݇ܒ̣ܸܠܹܗ ܐܸܠܲܝܗܝ ܙܘܼܙܹ̈ܐ܀ ܟܲܕ ܒܹܐܡܵܪܵܐ؛ ܗܲܒ̣݇ܠܘܿܢ ܐܘܼܦ ܩܵܬܝܼ ܐܵܗܵܐ ܫܘܼܠܛܵܢܵܐ؛ ܕܗ̇ܘ ܕܡܲܬܒ̣ܸܢ ܥܲܠܹܗ ܐܝܼܕܵܐ ܒܸܬ ܩܵܒܸܠ ܪܘܼܚܵܐ ܕܩܘܼܕܫܵܐ܀ ܐܵܡܸܪ ܐܸܠܹܗ ܫܸܡܥܘܿܢ ܟܹܐܦܵܐ؛ ܙܘܼܙܘܼܟܼ ܥܲܡܘܼܟܼ ܐܵܙܸܠ ܠܬܠܵܩܵܐ. ܣܵܒܵܒ ܕܚܫܸܒ̣ܠܘܼܟܼ ܕܚܲܠܥܲܬ ܕܐܲܠܵܗܵܐ ܒܙܘܼܙܹ̈ܐ ܕܐܵܗܵܐ ܕܘܼܢܝܹܐ ܟܹܐ ܦܵܝܫܵܐ ܩܢܝܼܬܵܐ܀ ܠܲܝܬ̇ ܠܘܼܟܼ ܣܵܡܵܐ ܐܘܼܦ ܠܵܐ ܦܸܫܟܵܐ ܒܐܵܗܵܐ ܗܲܝܡܵܢܘܼܬܵܐ؛ ܣܵܒܵܒ ܠܒܘܼܟܼ ܠܹܐ ܝ݇ܠܹܗ ܕܘܼܙ ܩܵܕ݇ܡ ܐܲܠܵܗܵܐ܀ ܐܝܼܢܵܐ ܬܲܘܸܒ ܡ̣ܢ ܕܐܵܗܵܐ ܒܝܼܫܘܼܬܘܼܟܼ؛ ܘܦܲܪܦܸܠ ܒܐܲܠܵܗܵܐ؛ ܒܲܠܟܵܐ ܫܵܒ̣ܸܩܠܘܼܟܼ [ܦܲܚܸܠܘܼܟܼ] ܦܸܟ̰ܠܵܐ ܕܠܸܒܘܼܟܼ܀ ܒܟܲܒ̣ܕܵܐ ܡܲܪܝܼܪܬܵܐ ܘܒܟܸܬܪܹ̈ܐ ܕܥܵܘܠܵܐ ܒܸܚܙܵܝܵܐ ܝ݇ܘܸܢ ܕܝܼܘܸܬ̇܀ ܓ̰ܘܼܘܸܒܠܹܗ ܣܝܼܡܘܿܢ ܘܐ݇ܡܸܪܹܗ؛ ܛܠܘܿܒܘܿܢ ܐܲܚܬܘܿܢ ܡ̣ܢ ܓܹܒܝܼ ܡ̣ܢ ܐܲܠܵܗܵܐ. ܕܠܵܐ ܐܵܬܹܐ ܥܲܠܝܼ ܚܲܕ݇ ܡܸܢܕܝܼ ܡ̣ܢ ܕܐܲܢܹܐ ܕܐ݇ܡܸܪܵܘܟ̣ܘܿܢ܀ ܐܝܼܢܵܐ ܫܸܡܥܘܿܢ ܘܝܘܿܚܲܢܵܢ ܟܲܕ ܡܘܼܫܚܸܕܠܗ݇ܘܿܢ ܘܡܘܼܠܸܦܠܗ݇ܘܿܢ ܗܹܡܸܙܡܵܢ ܕܐܲܠܵܗܵܐ ܕܸܐ݇ܪܗ݇ܘܿܢ ܠܐܘܿܪܸܫܠܸܡ ܘܓܵܘ ܪܵܒܵܐ ܡܵܬܘܵܬܹ̈ܐ ܕܫܲܡܪ̈ܵܝܹܐ ܡܘܼܟܪܸܙܠܗ݇ܘܢ܀
♱♱♱♱♱♱♱♱♱
ܚܲܕܼܒܫܲܒܵܐ ܕܐܲܪܒܥܵܐ ܕܲܩܝܵܡܬܵܐ
ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ
ܕܲܠܘܵܬܼ ܐܵܦܸܣܵܝܹ̈ܐ ܐܲܚܲܝ̈ ܒܲܪܸܟܼܡܵܪܝ܀
ܒܘܼܬ ܕܐܵܗܵܐ؛ ܐܘܼܦ ܐܵܢܵܐ ܗܵܐ ܡ̣ܢ ܕܫܡܝܼܥܠܝܼ ܗܲܝܡܵܢܘܼܬܵܘܟܼܘܿܢ ܒܡܵܪܲܢ ܝܼܫܘܿܥ ܡܫܝܼܚܵܐ ܘܚܘܼܒܵܘܟܼܘܿܢ ܕܠܟܸܣ ܟܠܲܝܗܝ ܩܲܕܝܼܫܹ̈ܐ* ܠܹܐ ܝ݇ܘܸܢ ܒܸܫܠܵܝܵܐ ܡ̣ܢ ܠܫܵܟܘܿܪܹܐ ܒܘܼܬ ܕܝܼܵܘܟܼܘܿܢ ܘܠܸܕܟܼܵܪܵܘܟܼܘܿܢ ܒܨܠܵܘܵܬ̈ܝܼ* ܕܐܲܠܵܗܹܗ ܕܡܵܪܲܢ ܝܼܫܘܿܥ ܡܫܝܼܚܵܐ ܒܵܒܵܐ ܕܚܸܩܪܵܐ ܝܵܗܒܼܸܠ ܠܵܘܟܼܘܿܢ ܪܘܼܚܵܐ ܕܦܲܪܡܵܝܬܵܐ ܘܕܓܸܠܝܵܢܵܐ ܒܝ݇ܕܵܥܝܼܬܹܗ* ܘܒܲܗܪܸܢܝܼ ܥܲܝܢܹ̈ܐ ܕܠܸܒܵܘܵܬܵܘ̈ܟܼܘܿܢ ܕܝܵܕܥܝܼܬܘܿܢ ܡܘܼܕܝܼ ܝ݇ܠܵܗ̇ ܗܹܒܼܝܼ ܕܟ̰ܝܵܕܬܹܗ؛ ܘܡܘܼܕܝܼ ܝ݇ܠܵܗ̇ ܕܵܘܸܠܬܵܐ ܕܚܸܩܪܵܐ ܕܝܵܪܬܘܼܬܹܗ ܒܩܲܕܝܼܫܹ̈ܐ* ܘܡܘܼܕܝܼ ܝ݇ܠܵܗ̇ ܒܘܼܫܵܝܘܼܬܵܐ ܕܓܘܼܪܘܼܬܵܐ ܕܚܲܝܠܹܗ. ܒܝܲܢ ܐܲܚܢܲܢ ܕܗܲܡܘܼܢܹܐ ܝ݇ܘܲܚ؛ ܐܲܝܟܼ ܡܲܦܠܲܚܬܵܐ ܕܙܲܪܒ ܕܚܲܝܠܹܗ* ܕܥܵܒܼܸܕܠܹܗ ܒܡܫܝܼܚܵܐ؛ ܘܡܘܼܩܸܡܠܹܗ ܡ̣ܢ ܓܵܘ ܡܝܼܬܹ̈ܐ ܘܡܘܼܬܸܒܼܠܹܗ ܡ̣ܢ ܝܲܡܝܼܢܹܗ ܓܵܘ ܫܡܲܝܵܐ* ܠܥܘܼܠܘܼܠ ܡ̣ܢ ܟܠ ܫܸܡܵܐ ܕܦܝܵܫܵܐ ܝ݇ܠܹܗ ܡܫܘܼܡܗܵܐ. ܠܵܐ ܐܲܚܟ̰ܝܼ ܒܐܵܗܵܐ ܥܵܠܡܵܐ. ܐܸܠܵܐ ܐܘܼܦ ܒܗ̇ܘ ܕܐܵܬܹܐ* ܘܙܘܼܒܛܸܢܹܗ ܟܠ ܡܸܢܕܝܼ ܬܚܘܿܬ ܐܲܩܠܵܬ̈ܘܼܗܝ ܘܐܸܠܹܗ ܕܝܼܠܹܗ ܠܥܘܼܠܘܼܠ ܡ̣ܢ ܟܠ ܥܵܒܼܸܕܠܹܗ ܪܹܫܵܐ ܠܥܹܕܬܵܐ ܕܝܼܠܵܗ̇ ܓܘܼܫܡܹܗ. ܘܬܲܡܲܡܬܵܐ ܕܗ̇ܘ ܕܟܠ ܒܟܠ ܡܬܲܡܸܡ* ܐܘܼܦ ܐܹܠܵܘܟܼܘܿܢ ܕܡܝܼܬܹ̈ܐ ܝ݇ܬܘܿܢ ܗ݇ܘ̣ܵܘ ܒܚܛܝܼܵܬܹ̈ܐ ܘܓܢܵܗܹ̈ܐ* ܒܐܲܢܹܐ ܕܡ̣ܢ ܩܵܕ݇ܡܵܝܬܵܐ ܒܸܚܕܵܪܵܐ ܝ݇ܬܘܿܢ ܗ݇ܘ̣ܵܘ ܐܲܝܟܼ ܥܵܠܡܵܝܘܼܬܹܗ ܕܐܵܗܵܐ ܥܵܠܡܵܐ؛ ܘܐܲܝܟܼ ܪܸܙܵܝܹܗ ܕܪܹܫܵܐ ܕܗܘܼܟܡܵܐ ܕܗܵܘܵܐ ܕܐܵܗܵܐ ܪܘܼܚܵܐ ܕܒܸܦܠܵܚܵܐ ܝ݇ܠܵܗ̇ ܒܒܢܘܼܢܹ̈ܐ ܕܠܵܐ ܡܲܨܝܲܬܬܵܐ* ܗܲܪ ܒܐܲܢܹܐ ܦܘܼܠܚܵܢܹ̈ܐ ܐܘܼܦ ܐܲܚܢܲܢ ܚܕܸܪܲܢ ܡ̣ܢ ܩܵܕ݇ܡܵܝܬܵܐ ܒܫܲܗܘܲܬܝܵܬܹ̈ܐ ܕܒܸܣܪܲܢ ܘܥܵܒܼܸܕܠܲܢ ܪܸܙܵܝܵܐ ܕܒܸܣܪܲܢ ܘܚܝܼܵܠܲܝ̈ܢ؛ ܘܗܘܹܐܠܲܢ ܒܢܘܼܢܹ̈ܐ ܕܟܲܪܒܵܐ ܟܵܡܝܼܠ ܐܲܝܟܼ ܣܵܡܵܐ ܦܝܼܫܵܐ* ܐܝܼܢܵܐ ܐܲܠܵܗܵܐ ܕܝܼܠܹܗ ܥܲܬܝܼܪܵܐ ܒܪ̈ܲܚܡܘܼܗܝ ܒܘܼܬ ܚܘܼܒܿܗ ܓܘܼܪܵܐ ܕܩܲܡ ܡܲܚܸܒ ܠܲܢ܋ ܟܲܕ ܡܝܼܬܹ̈ܐ ܝ݇ܘܲܚ ܗ݇ܘܼܵܘ ܒܚ̈ܛܝܼܵܬܲܢ؛ ܩܲܡ ܡܲܚܸܐ ܠܲܢ ܥܲܡ ܡܫܝܼܚܵܐ. ܘܒܫܵܦܵܩܲܬ ܕܝܼܹܗ ܩܲܡ ܦܵܪܸܩܠܲܢ* ܘܩܲܡ ܡܲܩܸܡ ܠܲܢ ܥܲܡܹܗ ܘܡܲܬܸܒܼܠܲܢ ܥܲܡܹܗ ܒܫܡܲܝܵܐ ܒܝܼܫܘܿܥ ܡܫܝܼܚܵܐ܋ ܕܡܲܕܸܥ ܠܕܵܘܪܹ̈ܐ ܕܐܵܬܝܼ ܓܘܼܪܘܼܬܵܐ ܕܕܵܘܸܠܬܵܐ ܕܫܵܦܵܩܲܬܹܗ ܘܒܲܣܝܼܡܘܼܬܹܗ ܕܗܘܹܐܠܵܗ̇ ܥܲܠܲܢ ܒܝܼܫܘܿܥ ܡܫܝܼܚܵܐ*
♱♱♱♱♱♱♱♱♱
ܚܲܕܼܒܫܲܒܵܐ ܕܐܲܪܒܥܵܐ ܕܲܩܝܵܡܬܵܐ
ܝܘܚܢܢ ܝܘ: 16 ‐ ܫܘܠܡܐ
ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ ܟܪܘܙܘܬܼܐ ܕܝܘܚܢܢ
♰ ܘܐ݇ܡܸܪܹܗ ܝܑܼܫܘܿܥ ܠܬܲܠܡܝܼ̈ܕܘܼܗܝ: ܚܲܕ݇ܟ̰ܵܐ ܘܠܹܐ ܚܵܙܝܼܬܘܿܢ ܠܝܼ. ܘܡܸܢ݇ܕܪܹܫ݇ ܚܲܕ݇ܟ̰ܵܐ ܘܒܸܬ ܚܵܙܝܼܬܘܿܢ ܠܝܼ. ܕܒܹܐܙܵܠܵܐ ܝܘܸܢ ܠܘܵܬ ܒܵܒܵܐ. ܘܐ݇ܡܸܪܗ݇ܘܿܢ ܬܲܠܡܝܼܕܘܼ̈ܗܝ ܚܲܕ݇ ܠܗ̇ܘ ܐ݇ܚܹܪ݇ܢܵܐ: ܡܘܿܕܝܼ ܝܠܵܗ̇ ܐܵܗܵܐ ܕܐ݇ܡܸܪܹܗ ܐܸܠܲܢ: ܕܚܲܕ݇ܟ̰ܵܐ ܘܠܹܐ ܚܵܙܝܼܬܘܿܢ ܠܝܼ. ܘܡܸܢ݇ܕܪܹܫ݇ ܚܲܕ݇ܟ̰ܵܐ ܘܒܸܬ ܚܵܙܝܼܬܘܿܢ ܠܝܼ. ܘܕܒܹܐܙܵܠܵܐ ܝܘܸܢ ܠܘܵܬ ܒܵܒܝܼ؟ ܘܐܲܡܪܝܼ ܗ݇ܘܵܘ: ܡܘܿܕܝܼ ܝܠܵܗ̇ ܐܵܗܵܐ ܚܲܕ݇ܟ̰ܵܐ ܕܐ݇ܡܸܪܹܗ؟ ܠܹܐ ܝܘܲܚ ܒܝܼܕܵܥܵܐ ܡܘܿܕܝܼ ܗܲܡܙܘܼܡܹܐ ܝܠܹܗ. ܐܝܼܢܵܐ ܝܑܼܫܘܿܥ ܝܕܸܥܠܹܗ ܕܒܥܵܝܵܐ ܗ݇ܘܵܘ ܕܡܒܲܩܪܝܼܠܹܗ. ܘܐ݇ܡܸܪܹܗ ܐܸܠܲܝܗܝ: ܥܲܠ ܕܐܵܗܵܐ ܒܸܕܪܵܫܵܐ ܝܬܘܿܢ ܥܲܡ ܐܸܚܕܵܕܹܐ. ܕܐ݇ܡܸܪܝܼ ܐܸܠܵܘܟܼܘܿܢ: ܕܚܲܕ݇ܟ̰ܵܐ ܘܠܹܐ ܚܵܙܝܼܬܘܿܢ ܠܝܼ. ܘܡܸܢ݇ܕܪܹܫ݇ ܚܲܕ݇ܟ̰ܵܐ ܘܒܸܬ ܚܵܙܝܼܬܘܿܢ ܠܝܼ. ܬܪܘܿܨܵܐ ܬܪܘܿܨܵܐ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ:ܕܐܲܚܬܘܿܢ ܒܸܬ ܒܵܟܼܝܼܬܘܿܢ ܘܠܝܵܝܝܼܬܘܿܢ. ܘܥܵܠܡܵܐ ܒܸܬ ܚܵܕܹܐ. ܘܐܲܚܬܘܿܢ ܒܸܬ ܦܲܫܡܝܼܬܘܿܢ. ܐܸܠܵܐ ܦܵܫܲܡܬܵܘܟܼܘܿܢ ܠܚܲܕܘܼܬܵܐ ܒܸܬ ܗܵܘܝܵܐ. ܒܲܟܼܬܵܐ ܐܝܼܡܵܢ ܕܝܲܠܕܵܐ ܟܹܐ ܦܲܫܡܵܐ ܣܵܒܵܒ ܕܡܛܹܐܠܹܗ ܝܵܘܡܵܐ ܕܡܵܘܠܵܕܵܗܿ. ܐܝܼܢܵܐ ܐܝܼܡܵܢ ܕܝܼܠܸܕܠܵܗ̇ ܒܪܘܿܢܵܐ. ܠܹܐ ܕܲܟܼܪܵܐ ܐܘܼܠܨܵܢܘܼܗ̇ ܡܸܛܠ ܚܲܕܘܼܬܵܐ ܕܦܸܫܠܹܗ ܝܠܝܼܕܵܐ ܒܲܪܢܵܫܵܐ ܒܥܵܠܡܵܐ. ܐܘܿܦ ܐܲܚܬܘܿܢ ܐܵܕܝܼܵܐ ܦܫܵܡܵܐ ܝܬܘܿܢ. ܐܝܼܢܵܐ ܡܸܢ݇ܕܪܹܫ݇ ܒܸܬ ܚܵܙܸܢܵܘܟܼܘܿܢ. ܘܒܸܬ ܚܵܕܹܐ ܠܸܒܵܘܟܼܘܿܢ. ܘܐ݇ܢܵܫܵܐ ܠܹܐ ܫܵܩܸܠܵܗ̇ ܚܲܕܘܼܬܵܘܟܼܘܿܢ ܡܸܢܵܘܟܼܘܿܢ. ܘܒܗ̇ܘ ܝܵܘܡܵܐ ܡܸܢܝܼ ܠܹܐ ܛܲܠܒܝܼܬܘܿܢ ܡܸܢܕܝܼ. ܬܪܘܿܨܵܐ ܬܪܘܿܨܵܐ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ. ܕܟܠ ܡܸܢܕܝܼ ܕܛܲܠܒܝܼܬܘܿܢ ܡ̣ܢ ܒܵܒܝܼ ܒܫܸܡܝܼ. ܒܸܬ ܝܲܗ݇ܒܼܸܠܵܘܟܼܘܿܢ. ܗܲܠ ܐܵܕܝܼܵܐ ܠܵܐ ܛܠܸܒܠܵܘܟܼܘܿܢ ܡܸܢܕܝܼ ܒܫܸܡܝܼ. ܛܠܘܼܒܘܿܢ ܘܒܸܬ ܫܲܩܠܝܼܬܘܿܢ ܕܗܵܘܝܵܐ ܚܲܕܘܼܬܵܘܟܼܘܿܢ ܟܵܡܝܼܠ. ܐܲܢܹܐ ܒܡܲܬܠܹ̈ܐ ܗܘܼܡܙܸܡܠܝܼ ܥܲܡܵܘܟܼܘܿܢ. ܐܝܼܢܵܐ ܒܸܬ ܐܲܬܝܵܐ ܣܵܥܲܬ ܐܝܼܡܵܢ ܕܠܹܐ ܗܲܡܙܸܡܸܢ ܥܲܡܵܘܟܼܘܿܢ ܒܡܲܬܠܹ̈ܐ. ܐܸܠܵܐ ܒܐܸܫܟܵܪܵܐ ܒܸܬ ܡܲܕܥܸܢܵܘܟܼܘܿܢ ܒܘܼܬ ܒܵܒܵܐ. ܒܗ̇ܘ ܝܵܘܡܵܐ ܕܛܲܠܒܝܼܬܘܿܢ ܒܫܸܡܝܼ. ܘܠܹܐ ܝܘܸܢ ܒܹܐܡܵܪܵܐ ܐܸܠܵܘܟܼܘܿܢ: ܕܐܵܢܵܐ ܒܸܬ ܛܲܠܒܸܢ ܡ̣ܢ ܒܵܒܵܐ ܒܘܼܬ ܕܝܼܵܠَܘܟܼܘܿܢ. ܣܵܒܵܒ ܗ̇ܘ ܒܵܒܵܐ ܟܹܐ ܡܲܚܸܒܠܵܘܟܼܘܿܢ ܕܐܲܚܬܘܿܢ ܩܲܡ ܡܲܚܸܒܝܼܬܘܿܢ ܠܝܼ، ܘܗܘܼܡܸܢܵܘܟܼܘܿܢ ܕܐܵܢܵܐ ܡ̣ܢ ܠܘܵܬ ܒܵܒܵܐ ܦܠܸܛܠܝܼ. ܦܠܸܛܠܝܼ ܡ̣ܢ ܠܘܵܬ ܒܵܒܵܐ ܘܐ݇ܬܹܐܠܝܼ ܠܥܵܠܡܵܐ. ܘܡܸܢ݇ܕܪܹܫ݇ ܒܸܬ ܫܲܒ̣ܩܸܢ ܠܥܵܠܡܵܐ. ܘܒܸܬ ܐܵܙܸܠ݇ܢ ܠܘܵܬ ܒܵܒܵܐ. ܐܲܡܪܝܼ ܐܸܠܹܗ ܬܲܠܡܝܼ̈ܕܘܼܗܝ: ܗܵܐ ܐܵܕܝܼܵܐ ܓܲܠܝܵܐܝܼܬ ܗܲܡܙܘܼܡܹܐ ܝܘܸܬ. ܘܠܵܐ ܚܲܕ݇ ܡܲܬܠܵܐ ܒܹܐܡܵܪܵܐ ܝܘܸܬ. ܐܵܕܝܼܵܐ ܒܝܼܕܵܥܵܐ ܝܘܲܚ ܕܟܠ ܡܸܢܕܝܼ ܐܲܢ݇ܬ ܝܲܕܥܸܬ. ܘܠܹܐ ܝܘܸܬ ܣܢܝܼܩܵܐ ܕܐ݇ܢܵܫܵܐ ܒܵܩܸܪܘܼܟܼ. ܒܐܵܗܵܐ ܡܗܲܝܡܘܼܢܹܐ ܝܘܲܚ ܕܡ̣ܢ ܐܲܠܵܗܵܐ ܦܠܸܛܠܘܼܟܼ. ܐܵܡܸܪ ܐܸܠܲܝܗܝ ܝܑܼܫܘܿܥ ܗܲܡܸܢܘܿܢ. ܕܗܵܐ ܒܸܬ ܐܲܬܝܵܐ ܣܵܥܵܬ، ܘܐܵܕܝܼܵܐ ܐ݇ܬܹܐܠܵܗ̇. ܕܒܸܬ ܦܲܝܫܝܼܬܘܿܢ ܒܘܼܪܒܸܙܹܐ ܐ݇ܢܵܫܵܐ ܠܕܘܼܟܬܹܗ. ܘܒܸܬ ܫܲܒܼܩܝܼܬܘܿܢ ܠܝܼ ܠܚܘܿܕܝܼ. ܘܠܹܐ ܝܘܸܢ ܠܚܘܿܕܝܼ. ܕܒܵܒܵܐ ܥܲܡܝܼ ܝܠܹܗ. ܐܲܢܹܐ ܐ݇ܡܸܪܝܼ ܐܸܠܵܘܟܼܘܿܢ ܕܒܝܼܝܼ ܗܵܘܹܐ ܠܵܘܟܼܘܿܢ ܫܠܵܡܵܐ. ܒܥܵܠܡܵܐ ܒܸܬ ܗܵܘܹܐ ܠܵܘܟܼܘܿܢ ܐܘܼܠܨܵܢܵܐ. ܐܸܠܵܐ ܦܘܼܫܘܿܢ ܠܸܒܵܢܹ̈ܐ ܐܵܢܵܐ ܓܼܠܝܼܒܹܗ ܝܘܸܢ ܠܥܵܠܡܵܐ.
♱♱♱♱♱♱♱♱♱