ܚܲܕܼܒܫܲܒܵܐ ܕܐܲܪܒܥܵܐ ܕܩܘܼܕܵܫ ܥܹܕܬܵܐ

ܐ ܡܲܠܟܹ̈ܐ؛ ܘ؛ 1‐20

ܬܸܒ̣ܘ ܘܲܫܠܵܘ ܟܬܵܒ̣ܵܐ ܕܲܣܦܲܪ ܡܲܠܟܘܵܬ̈ܵܐ؛

ܐܲܚܵܝ̈ ܒܲܪܸܟ̣ܡܵܪܝ܀

ܘܗܘܹܐܠܵܗ̇ ܒܫܹܢ݇ܬܵܐ ܕܐܲܪܒܲܥܡܵܐܐ ܘܬܡܵܐܢܝܼ ܫܸܢܹ̈ܐ ܠܦܠܵܛܬܵܐ ܕܒܢܲܝ̈ ܝܼܣܪܵܝܹܠ ܡ̣ܢ ܐܲܪܥܵܐ ܕܡܸܨܪܹܝܢ؛ ܒܫܹܢ݇ܬܵܐ ܪܒ̣ܝܼܥܵܝܬܵܐ ܒܝܲܪܚܵܐ ܕܐ݇ܝܵܪ ܕܝܼܠܹܗ ܝܲܪܚܵܐ ܬܪܲܝܵܢܵܐ ܕܗܘܼܟܸܡܠܹܗ ܫܠܹܝܡܘܿܢ ܥܲܠ ܝܼܣܪܵܝܹܠ܀ ܫܘܼܪܹܐܠܹܗ ܠܸܒܢܵܝܵܐ ܒܲܝܬܹܗ ܕܡܵܪܝܵܐ؛ ܘܒܲܝܬܵܐ ܕܒܢܹܐܠܹܗ ܫܠܹܝܡܘܿܢ ܠܡܵܪܝܵܐ܀ ܐܸܫܬܝܼ ܝܲܡܝܼܢܹ̈ܐ ܝܲܪܝܼܟ̣ܘܼܬܹܗ ܘܥܸܣܪܝܼ ܝܲܡܝܼܢܹ̈ܐ ܦܸܬܝܘܼܬܹܗ؛ ܘܬܠܵܬܝܼ ܝܲܡܝܼܢܹ̈ܐ ܪܵܡܘܼܬܹܗ؛ ܘܨܘܼܦܵܐ ܕܩܵܕ݇ܡ ܬܲܪܥܵܐ ܕܒܲܝܬܵܐ؛ ܥܸܣܪܝܼ ܝܲܡܝܼܢܹ̈ܐ ܝܘܼܪܟ̣ܹܗ ܒܲܪܩܘܼܒ̣ܠ ܦܸܬܝܘܼܬܹܗ ܕܒܲܝܬܵܐ؛ ܘܥܸܣܪܵܐ ܝܲܡܝܼܢܹ̈ܐ ܦܸܬܝܘܼܬܹܗ ܒܲܪܩܘܼܒ̣ܠ ܝܲܪܝܼܟ̣ܘܼܬܹܗ ܕܒܲܝܬܵܐ܀ ܘܬܘܼܪܸܨܠܹܗ ܠܒܲܝܬܵܐ ܟܵܘܵܬܹ̈ܐ؛ ܦܸܬܝܹ̈ܐ ܡ̣ܢ ܠܓܵܘܵܝܝܼ ܘܥܝܼܩܹ̈ܐ ܡ̣ܢ ܠܒ̣ܲܕܲܪ܀ ܘܒܢܹܐܠܹܗ ܥܲܠ ܓܘܼܕܵܢܹ̈ܐ ܕܒܲܝܬܵܐ ܬܵܒܵܩܹ̈ܐ ܠܚܵܕܸܪ̈ܘܵܢܹܐ؛ ܘܚܘܼܪܕܹܐܠܹܗ ܠܗܲܝܟܠܵܐ ܘܠܒܹܝܬ̣ ܚܘܼܣܵܝܵܐ ܒܓܘܼܕܵܢܹ̈ܐ ܕܒܲܝܬܵܐ܀ ܥܒ̣ܸܕܠܹܗ ܬܵܒܵܩܵܐ ܬܲܚܬܵܝܵܐ ܚܲܡܫܵܐ ܝܲܡܝܼܢܹ̈ܐ ܦܸܬܝܘܼܬܹܗ؛ ܘܬܵܒܵܩܵܐ ܦܲܠܓܵܝܬܵܐ ܐܸܫܬܵܐ ܝܲܡܝܼܢܹ̈ܐ ܦܸܬܝܘܼܬܹܗ؛ ܘܗ̇ܘ ܬܠܝܼܬܵܝܵܐ ܫܲܒ̣ܥܵܐ ܝܲܡܝܼܢܹ̈ܐ ܦܸܬܝܘܼܬܹܗ. ܣܵܒܵܒ ܣܸܦܘܵܬܹ̈ܐ ܥܒ̣ܸܕܠܹܗ ܟܲܕ ܒܸܚܕܵܪܵܐ ܡ̣ܢ ܠܒ̣ܲܕܲܪ؛ ܕܗܵܘܹܐ ܕܒ̣ܝܼܩܵܐ ܓܘܼܕܵܢܹ̈ܐ ܒܓܘܼܕܵܢܹ̈ܐ܀ ܘܒܲܝܬܵܐ ܐܝܼܡܲܢ ܕܦܝܵܫܵܐ ܗ݇ܘܵܐ ܒܸܢܝܵܐ ܒܟܹܐܦܹ̈ܐ ܦܪ̈ܝܼܡܹܐ ܗܵܙܸܪ ܓܵܘ ܛܘܼܪܵܐ ܦܸܫܠܹܗ ܒܸܢܝܵܐ؛ ܘܐܲܪܙܲܦܬܵܐ [ܘܚܲܨܝܼܢܵܐ] ܕܡܲܥܘܸܠ [ܕܩܲܛܥܩܲܬܵܐ]؛ ܘܟܠ ܐܲܣܒܵܒ ܕܦܲܪܙܠܵܐ ܠܵܐ ܦܸܫܠܹܗ ܫܸܡܥܝܵܐ ܒܒܲܝܬܵܐ ܒܥܕܵܢܵܐ ܕܦܝܵܫܵܐ ܗ݇ܘܵܐ ܒܸܢܝܵܐ܀ ܘܬܲܪܥܵܐ ܕܬܵܒܵܩܵܐ ܦܲܠܓܵܝܬܵܐ؛ ܠܕܸܦܢܹܗ ܬܲܝܡܢܵܝܵܐ ܕܒܲܝܬܵܐ؛ ܘܦܲܠܵܟܵܢܹ̈ܐ ܦܬܝܼܠܹ̈ܐ ܒܹܐܣܵܩܵܐ ܠܦܲܠܓܵܝܬܵܐ؛ ܘܡ̣ܢ ܦܲܠܓܵܝܬܵܐ ܒܹܐܣܵܩܵܐ ܠܬܠܝܼܬܵܝܬܵܐ܀ ܘܒܢܹܐܠܹܗ ܠܒܲܝܬܵܐ ܘܬܘܼܡܸܡܠܹܗ؛ ܘܩܪܸܫܠܹܗ [ܘܥܒ̣ܸܕܠܹܗ ܓܵܪܹܐ] ܠܒܲܝܬܵܐ ܒܩܵܪ̈ܝܼܵܬܹܐ ܘܕܲܦܹ̈ܐ ܢܣܝܼܪܹ̈ܐ ܕܐܲܪܙܵܐ܀ ܘܒܢܹܐܠܹܗ ܠܬܵܒܵܩܹ̈ܐ ܥܲܠ ܟܠܹܗ ܒܲܝܬܵܐ؛ ܚܲܡܫܵܐ ܝܲܡܝܼܢܹ̈ܐ ܪܵܡܘܼܬܲܝܗ‌ܝ؛ ܘܡܘܼܕܒ̣ܸܩܠܹܗ ܠܒܲܝܬܵܐ ܒܩܲܝܣܹ̈ܐ ܕܐܲܪܙܵܐ܀ ܘܗܘܹܐܠܹܗ ܚܲܒܪܹܗ ܕܡܵܪܝܵܐ ܥܲܠ ܫܠܹܝܡܘܿܢ ܠܹܐܡܵܪܵܐ܀ ܐܵܗܵܐ ܒܲܝܬܵܐ ܕܒܢܹܐܠܘܼܟܼ؛ ܐܸܢ ܚܵܕܪܸܬ̇ ܒܩܵܘ̈ܠܝܼ؛ ܘܢܵܛܪܸܬ̇ ܕܝܼܘܵܢ̈ܝܼ؛ ܘܥܵܒ̣ܕܸܬ̇ ܟܠܲܝܗ‌ܝ ܦܘܼܩܕܵܢ̈ܝܼ؛ ܘܚܵܕܪܸܬ̇ ܒܝܼܲܝܗ‌ܝ؛ ܒܸܬ ܡܲܩܸܡܸܢ ܩܵܘܠܝܼ ܥܲܡܘܼܟܼ ܕܐ݇ܡܸܪܝܼ ܠܕܵܘܝܼܕ ܒܵܒܘܼܟܼ܀ ܘܒܸܬ ܫܵܪܸܢ ܓܵܘ ܒܢܲܝ̈ ܝܼܣܪܵܝܹܠ؛ ܘܠܹܐ ܫܵܒ̣ܩܸܢ ܠܛܵܝܸܦܝܼ ܝܼܣܪܵܝܹܠ܀ ܘܒܢܹܐܠܹܗ ܫܠܹܝܡܘܿܢ ܠܒܲܝܬܹܗ ܘܣܘܼܩܸܠܹܗ؛ ܘܒܢܹܐܠܹܗ ܠܓܘܼܕܵܢܹ̈ܐ ܕܒܲܝܬܵܐ ܡ̣ܢ ܠܓܵܘܵܝܝܼ ܒܬܲܚܬܹ̈ܐ ܢܣܝܼܪܹ̈ܐ ܕܐܲܪܙܵܐ؛ ܡ̣ܢ ܒܸܢܝܲܬܹܗ ܘܗܲܠ ܫܟܘܼܪܹ̈ܐ. ܩܪܸܡܠܹܗ [ܡܘܼܠܒ̣ܸܫܠܹܗ] ܩܲܝܣܵܐ ܡ̣ܢ ܠܓܵܘܵܝܝܼ؛ ܘܩܪܸܡܠܹܗ [ܘܡܘܼܠܒ̣ܸܫܠܹܗ] ܠܒܸܢܝܲܬܹ̈ܐ ܕܒܲܝܬܵܐ ܒܬܲܚܝܵܬܹ̈ܐ ܢܣܝܼܪܹ̈ܐ ܕܫܲܪ̈ܘܲܝܢܹܐ܀ ܘܒܢܹܐܠܹܗ ܫܠܹܝܡܘܿܢ ܥܸܣܪܝܼ ܝܲܡܝܼܢܹ̈ܐ ܡ̣ܢ ܫܸܦܘܼܠܵܠܹ̈ܐ ܕܒܲܝܬܵܐ ܒܬܲܚܝܵܬܹ̈ܐ ܢܣܝܼܪܹ̈ܐ ܕܐܲܪܙܵܐ؛ ܡ̣ܢ ܒܸܢܝܲܬܹ̈ܐ ܗܲܠ ܫܟܘܼܪܹ̈ܐ؛ ܘܒܢܹܐܠܹܗ ܡ̣ܢ ܠܓܵܘܵܝܝܼ ܩܕܘܿܫ ܩܘܼܕܫܹ̈ܐ܀ ܥܸܣܪܝܼ ܝܲܡܝܼܢܹ̈ܐ ܗ݇ܘܵܐ ܒܲܝܬܵܐ؛ ܗܲܝܟܠܵܐ ܗ̇ܘ ܓܵܘܵܝܵܐ܀ ܒܲܝܬܵܐ ܡܘܼܟܣܵܐ ܗ݇ܘܵܐ ܒܐܲܪ̈ܙܹܐ ܡ̣ܢ ܠܓܵܘܵܝܝܼ؛ ܘܢܘܼܩܫܵܐ ܗ݇ܘܵܐ ܘܢܩܝܼܪܵܐ ܥܲܠܹܗ ܗܸܠܩܹ̈ܐ [ܘܲܪ̈ܕܹܐ ܠܵܐ ܦܬܝܼܚܹܐ/براعيم] ܘܒܵܛܠܹ̈ܐ [ܘܘܲܪ̈ܕܹܐ] ܘܫܘܼܫܲܢܹ̈ܐ. ܘܟܠܹܗ ܕܐܲܪܙܵܐ ܗ݇ܘܵܐ؛ ܘܟܹܐܦܵܐ ܠܹܐ ܡܲܒܝܸܢ ܗ݇ܘܵܐ ܓܵܘܹܗ܀ ܘܬܘܼܪܸܨܠܹܗ ܒܹܝܬ̣ ܩܘܼܕܫܵܐ ܡ̣ܢ ܠܓܵܘܵܝܝܼ ܕܒܲܝܬܵܐ؛ ܠܡܲܬܘܼܒ̣ܹܐ ܬܵܡܵܐ ܩܹܒ̣ܘܼܬܵܐ ܕܩܵܘܠܵܐ ܕܡܵܪܝܵܐ܀

ܚܲܒ̣ܪܹܗ

ܚܲܙܩܝܼܐܹܝܠ ܡܓ؛ 1‐7 ܐܲܩܸܦ؛ ܡܕ؛ 1‐6

ܫܠܵܘ ܢܒ̣ܝܼܘܼܬܹܗ ܕܚܲܙܩܝܼܐܹܝܠ؛ ܐܲܚܲܝ̈ ܒܲܪܸܟ̣ܡܵܪܝ܀

ܘܠܘܼܒܠܸܢܹܗ ܡܵܪܝܵܐ ܠܬܲܪܥܵܐ ܕܒܸܚܝܵܪܵܐ ܗ݇ܘܵܐ ܠܡܲܕܢܚܵܐ܀ ܘܗܵܐ ܫܘܼܒ̣ܚܹܗ ܕܐܲܠܵܗܵܐ ܕܝܼܣܪܵܝܹܠ ܒܹܐܬܵܝܵܐ ܡ̣ܢ ܐܘܼܪܚܵܐ ܕܡܲܕܢܚܵܐ؛ ܘܩܵܠܹܗ ܐܲܝܟܼ ܩܵܠܵܐ ܕܡܝܼܵܐ ܪܵܒܵܐ؛ ܘܐܲܪܥܵܐ ܒܘܼܗܪܸܢܵܗ̇ ܡ̣ܢ ܐܝܼܩܵܪܹܗ܀ ܐܲܝܟܼ ܚܸܙܘܵܐ ܕܚܙܹܐܠܝܼ ܐܝܼܡܲܢ ܕܐ݇ܬܹܐܠܝܼ ܠܡܲܚܪܘܼܒ̣ܹܐ ܠܡܕܝܼܢ݇ܬܵܐ؛ ܘܐܲܝܟܼ ܚܸܙܘܵܐ ܕܚܙܹܐܠܝܼ ܥܲܠ ܢܲܗܪܵܐ ܓܘܼܪܵܐ؛ ܘܢܦܸܠܝܼ ܥܲܠ ܦܵܬܝܼ܀ ܘܐܝܼܩܵܪܹܗ ܕܡܵܪܝܵܐ ܥܒ̣ܸܪܹܗ ܠܒܲܝܬܵܐ؛ ܒܐܘܼܪܚܵܐ ܕܬܲܪܥܵܐ ܕܒܸܚܝܵܪܵܐ ܗ݇ܘܵܐ ܠܡܲܕܢܚܵܐ܀ ܘܫܩܝܼܠܸܢܵܗ̇ ܪܘܼܚܵܐ ܘܡܘܼܥܒ̣ܸܪܸܢܵܗ̇ ܠܕܵܪܬܵܐ ܓܵܘܵܝܬܵܐ؛ ܘܚܙܹܐܠܝܼ ܠܒܲܝܬܹܗ ܕܡܵܪܝܵܐ ܦܸܫܠܹܗ ܡܸܠܝܵܐ ܐܝܼܩܵܪܹܗ܀ ܘܫܡܝܼܥܠܝܼ ܡܸܢܕܝܼ ܕܐ݇ܡܸܪܹܗ ܐܸܠܝܼ ܡ̣ܢ ܓܵܘ ܒܲܝܬܵܐ؛ ܘܚܲܕ݇ ܐ݇ܢܵܫܵܐ ܟܸܠܝܵܐ ܗ݇ܘܵܐ ܠܟܸܣܠܝܼ܀ ܘܐ݇ܡܸܪܹܗ ܐܸܠܝܼ؛ ܒܲܪܢܵܫܵܐ؛ ܕܘܼܟܬܵܐ ܕܟܘܼܪܣܝܼ؛ ܘܕܘܼܟܬܵܐ ܕܦܲܪ̈ܣܵܬܹܐ [ܕܐܸܫܬܹ̈ܐ] ܕܐܲܩܠ̈ܝܼ ܕܫܵܪܸܢ ܓܵܘ ܒܢܲܝ̈ ܝܼܣܪܵܝܹܠ ܗܲܠ ܥܵܠܲܡ܀ ܘܡܘܼܕܸܪܸܢܹܗ ܠܐܘܼܪܚܵܐ ܕܬܲܪܥܵܐ ܒܲܪܵܝܵܐ ܕܡܲܩܕܫܵܐ؛ ܕܒܸܚܝܵܪܵܐ ܗ݇ܘܵܐ ܠܡܲܕܢܚܵܐ؛ ܘܚܙܹܐܠܝܼ ܐܝܼܢܵܐ ܕܒ̣ܝܼܪܵܐ܀ ܘܐ݇ܡܸܪܹܗ ܐܸܠܝܼ ܡܵܪܝܵܐ؛ ܐܵܗܵܐ ܬܲܪܥܵܐ ܒܸܬ ܗܵܘܹܐ ܕܒ̣ܝܼܪܵܐ؛ ܘܠܹܐ ܦܵܐܹܫ ܦܬܝܼܚܵܐ؛ ܘܗܝܼܟ̰ ܐ݇ܢܵܫܵܐ ܠܹܐ ܥܵܒ̣ܸܪ ܒܝܼܹܗ؛ ܣܵܒܵܒ ܕܡܵܪܝܵܐ ܐܲܠܵܗܵܐ ܕܝܼܣܪܵܝܹܠ ܥܵܒ̣ܸܪ ܒܝܼܹܗ؛ ܘܒܸܬ ܗܵܘܹܐ ܕܒ̣ܝܼܪܵܐ܀ ܡܕܲܒܪܵܢܵܐ ܒܸܬ ܝܵܬܸܒ̣ ܓܵܘܹܗ؛ ܘܒܸܬ ܐܵܟ̣ܸܠ ܠܲܚܡܵܐ ܩܵܕ݇ܡ ܡܵܪܝܵܐ؛ ܡ̣ܢ ܐܘܼܪܚܵܐ ܕܬܲܪܥܵܐ ܕܐ݇ܣܩܘܼܦܬܵܐ ܕܬܲܪܥܵܐ ܒܸܬ ܥܵܒ̣ܸܪ ܘܡܸܢܵܗ̇ ܒܸܬ ܦܵܠܸܛ܀ ܘܡܘܼܥܒ̣ܸܪܸܢܹܗ ܠܐܘܼܪܚܵܐ ܕܬܲܪܥܵܐ ܓܲܪܒܝܵܝܵܐ ܕܩܵܕ݇ܡ ܒܲܝܬܵܐ. ܘܚܙܹܐܠܝܼ ܕܒܲܝܬܵܐ ܦܸܫܠܹܗ ܡܸܠܝܵܐ ܐܝܼܩܵܪܹܗ ܕܡܵܪܝܵܐ؛ ܘܢܦܸܠܝܼ ܥܲܠ ܦܵܬܝܼ܀ ܘܐ݇ܡܸܪܹܗ ܐܸܠܝܼ ܡܵܪܝܵܐ؛ ܒܲܪܢܵܫܵܐ؛ ܡܲܬܸܒ̣ ܒܠܸܒܘܼܟܼ ܘܚܙܝܼ ܒܥܲܝܢ̈ܘܼܟܼ؛ ܘܫܡܝܼܥ ܒܢܵܬܝܵܬ̈ܘܼܟܼ؛ ܟܠ ܡܸܢܕܝܼ ܕܗܲܡܙܸܡܸܢ ܥܲܡܘܼܟܼ؛ ܘܟܠܲܝܗ‌ܝ ܢܵܡܘܿܣܹ̈ܐ ܕܒܲܝܬܵܐ ܘܟܠܲܝܗ‌ܝ ܨܘܼܪ̈ܝܵܬܹܗ؛ ܘܡܲܬܸܒ̣ ܠܒܵܠܘܼܟܼ؛ ܥܒ̣ܵܪܬܵܐ ܓܵܘ ܒܲܝܬܵܐ؛ ܘܦܠܲܛܬܵܐ ܕܡܲܩܕܫܵܐ܀

♱♱♱♱♱♱♱♱♱

ܚܕܒܫܒܐ ܕ ܕܩܘܼܕܵܫ ܥܹܕܬܵܐ

ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ

ܕܲܠܘܵܬܼ ܥܸܒܼܪ̈ܵܝܹܐ ܐܲܚܲܝ̈ ܒܲܪܸܟܼܡܵܪܝ܀

ܣܵܒܵܒ ܒܗ̇ܝ ܕܘܼܟܬܵܐ ܕܐܝܼܬ ܕܝܵܬܹܩܹܐ. ܡܲܚܙܘܼܝܸܐ ܝ݇ܠܵܗ̇ ܡܵܘܬܵܐ ܕܗ̇ܘ ܕܩܲܡ ܥܵܒܼܸܕܠܵܗ̇* ܐܝܼܢܵܐ ܥܲܠ ܡܝܼܬܵܐ ܐܲܚܟ̰ܝܼ ܦܵܝܫܵܐ ܡܘܼܩܘܝܼܬܵܐ؛ ܣܵܒܵܒ ܟܡܵܐ ܕܚܲܝܵܐ ܝ݇ܠܹܗ ܗ̇ܘ ܕܥܒܼܝܼܕܵܐ ܠܹܗ ܠܲܝܬ ܒܝܼܵܗ̇ ܦܵܝܕܵܐ* ܒܘܼܬ ܕܐܵܗܵܐ ܐܘܼܦ ܗ̇ܝ ܩܵܕ݇ܡܵܝܬܵܐ ܒܕܸܡܵܐ ܦܸܫܠܵܗ̇ ܡܘܼܩܘܝܼܬܵܐ* ܣܵܒܵܒ ܟܲܕ ܦܸܫܠܹܗ ܦܩܝܼܕܵܐ ܟܠܹܗ ܦܘܼܩܕܵܢܵܐ ܡ̣ܢ ܡܘܼܫܹܐ ܠܟܠܹܗ ܛܵܝܸܦܵܐ ܒܢܵܡܘܿܣܵܐ؛ ܫܩܸܠܹܗ ܡܘܼܫܹܐ ܕܸܡܵܐ ܕܫܵܪܸܚܬܵܐ ܘܡܝܼ̈ܵܐ ܒܥܲܡܪܵܐ ܕܩܸܪܡܝܼܙ ܘܙܘܿܦܵܐ ܘܡܘܼܪܝܸܣܠܹܗ ܥܲܠ ܟܬܵܒܹ̈ܐ ܘܥܲܠ ܟܠܹܗ ܛܵܝܸܦܵܐ* ܘܐ݇ܡܸܪܹܗ ܐܸܠܲܝܗܝ ܕܐܵܗܵܐ ܝ݇ܠܹܗ ܕܸܡܵܐ ܕܝܵܬܹܩܹܐ ܗ̇ܝ ܕܦܸܫܠܵܗ̇ ܦܘܼܩܸܕܬܵܐ ܐܸܠܵܘܟܼܘܿܢ ܡ̣ܢ ܐܲܠܵܗܵܐ* ܐܘܼܦ ܥܲܠ ܡܲܫܟܢܵܐ ܘܥܲܠ ܟܠܲܝܗܝ ܡܵܐܢܹ̈ܐ ܕܚܸܠܡܲܬ ܗܲܪ ܡ̣ܢ ܕܗ̇ܘ ܕܸܡܵܐ ܡܘܼܪܝܸܣܠܹܗ* ܣܵܒܵܒ ܟܠ ܡܸܢܕܝܼ ܓܵܘ ܢܵܡܘܿܣܵܐ ܒܕܸܡܵܐ ܦܵܐܸܫ ܗ݇ܘ̣ܵܐ ܕܘܼܟܼܝܵܐ ܘܕܠܵܐ ܫܦܲܚܬܵܐ ܕܕܸܡܵܐ ܠܲܝܬ ܗ݇ܘܼܵܐ ܦܘܼܚܵܠܵܐ* ܣܵܒܵܒ ܐܵܢܵܢܩܵܝܬܵܐ ܗ݇ܘ̣ܵܐ ܕܐܲܢܹܐ ܡܸܢܕܝܼܵܢܹ̈ܐ ܕܝܼܢܵܐ ܕܘܼܡܝܵܐ ܕܡܸܢܕܝܼܵܢܹ̈ܐ ܫܡܲܝܵܢܵܝܹ̈ܐ ܒܐܲܢܹܐ ܦܵܝܫܝܼ ܕܘܼܟܼܝܹܐ. ܐܝܼܢܵܐ ܐܲܢܹܐ ܕܝܼܢܵܐ ܫܡܲܝܵܢܵܝܹ̈ܐ ܒܕܸܒܼܚܹ̈ܐ ܕܒܘܼܫ ܨܦܵܝ ܡ̣ܢ ܕܐܲܢܹܐ* ܣܵܒܵܒ ܡܫܝܼܚܵܐ ܠܵܐ ܥܒܼܸܪܹܗ ܠܡܲܩܕܫܵܐ ܬܘܼܪܨܵܐ ܒܐܝܼܕܬܹ̈ܐ ܕܝܼܠܹܗ ܕܵܡܵܝܬܵܐ ܕܗ̇ܘ ܫܲܪܝܼܪܵܐ ܐܸܠܵܐ ܠܫܡܲܝܵܐ ܒܓܵܢܹܗ ܥܒܼܸܪܹܗ ܕܦܵܐܸܫ ܚܸܙܝܵܐ ܩܵܕ݇ܡ ܦܲܪܨܘܿܦܵܐ ܕܐܲܠܵܗܵܐ ܡ̣ܢ ܓܸܒܲܢ* ܐܘܼܦ ܠܵܐ ܕܡܲܩܪܸܒܼ ܓܵܢܹܗ ܪܵܒܵܐ ܓܵܗܹ̈ܐ ܐܲܝܟܼ ܕܥܵܒܼܸܕ ܗ݇ܘ̣ܵܐ ܓܘܼܪܵܐ ܕܟܵܗܢܹ̈ܐ ܘܥܵܒܼܸܪ ܗ݇ܘܵܐ ܒܟܠ ܫܹܢ݇ܬܵܐ ܠܒܹܝܬ ܩܘܼܕܫܵܐ ܒܕܸܡܵܐ ܕܠܵܐ ܕܓܵܢܹܗ* ܘܐܸܢ ܠܵܐ؛ ܕܵܝܢܵܢܵܐ ܗ݇ܘ̣ܵܐ ܕܪܵܒܵܐ ܓܵܗܹ̈ܐ ܩܵܒܸܠ ܚܲܫܵܐ ܡ̣ܢ ܫܘܼܪܵܝܵܐ ܕܥܵܠܡܵܐ. ܐܝܼܢܵܐ ܐܵܕܝܼܵܐ ܒܚܲܪܬܵܐ ܕܥܵܠܡܹ̈ܐ ܚܕܵܐ ܓܵܗܵܐ ܡܘܼܩܪܸܒܼܠܹܗ ܓܵܢܹܗ ܒܕܒܼܲܚܬܹܗ ܩܵܐ ܕܒܵܛܸܠܵܗ̇ ܚܛܝܼܬܵܐ* ܕܵܐܟܼܝܼ ܕܦܝܼܫܬܵܐ ܝ݇ܠܵܗ̇ ܡܘܼܬܸܒܼܬܵܐ ܩܵܕ݇ܡ ܒܢܲܝ̈ܢܵܫܵܐ ܕܚܕܵܐ ܓܵܗܵܐ ܡܵܝܬܝܼ. ܘܡܼܢ ܒܵܬ݇ܪ ܡܵܘܬܲܝܗܝ ܕܝܼܘܵܢ. ܗܲܕܟܼܵܐ ܐܘܼܦ ܡܫܝܼܚܵܐ ܚܕܵܐ ܓܵܗܵܐ ܦܸܫܠܹܗ ܡܘܼܩܪܸܒܼܵܐ ܘܒܓܵܢܹܗ ܕܒܼܸܚܠܹܗ ܚܛܝܼܵܬܹ̈ܐ ܕܪܵܒܵܐ. ܘܒܓܵܗܵܐ ܕܬܸܪܬܹܝ ܕܠܵܐ ܚܛܝܼܵܬܹ̈ܐ ܒܸܬ ܦܵܐܸܫ ܚܸܙܝܵܐ ܩܵܐ ܚܲܝܹ̈ܐ ܕܐܵܢܝܼ ܕܒܸܣܦܵܪܵܐ ܝ݇ܢܵܐ ܐܸܠܹܗ*

♱♱♱♱♱♱♱♱♱

ܚܕܒܫܒܐ ܕܐܪܒܥܐ ܕܩܘܕܫ ܥܕܬܐ

ܡܬܝ ܟܒ: 41 ‐ ܟܓ: 23

ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ ܟܪܘܙܘܬܼܐ ܕܡܬܝ

♰ ܐܝܼܢܵܐ ܒܗ̇ܘ ܙܲܒܼܢܵܐ ܟܲܕ ܓ̰ܸܡܥܝܹܐ ܗ݇ܘܵܘ ܦܪ̈ܝܼܫܹܐ، ܒܘܼܩܪܵܝܠܹܗ ܝܑܼܫܘܿܥ ܘܐ݇ܡܸܪܹܗ: ܡܘܿܕܝܼ ܒܹܐܡܵܪܵܐ ܝܬܘܿܢ ܥܲܠ ܡܫܝܼܚܵܐ. ܒܪܘܿܢܵܐ ܕܡܵܢܝܼ ܝܠܹܗ؟ ܐܲܡܪܝܼ ܐܸܠܹܗ ܒܪܘܿܢܵܐ ܕܕܵܘܝܼܕ. ܐܵܡܸܪ ܐܸܠܲܝܗܝ: ܘܕܲܐܟܼܝܼ ܕܵܘܝܼܕ ܒܪܘܼܚܵܐ ܒܸܩܪܵܝܘܼܗܝ ܝܠܹܗ ܡܵܪܝܵܐ؟ ܣܵܒܵܒ ܐ݇ܡܸܪܹܗ: ܕܐ݇ܡܸܪܹܗ ܡܵܪܝܵܐ ܠܡܵܪܝܼ ܝܬܸܒܼܠܘܼܟܼ ܡ̣ܢ ܝܲܡܝܼܢܝܼ، ܗܲܠ ܕܡܲܬܒܼܸܢ ܕܸܫܡܸܢ̈ܘܼܟܼ ܬܚܘܼܬ ܐܲܩܠܵܬܘܼ̈ܟܼ. ܗܲܕܟܼܵܐ ܐܸܢ ܕܵܘܝܼܕ  ܒܸܩܪܵܝܹܗ ܠܹܗ ܡܵܪܝܵܐ: ܕܲܐܟܼܝܼ ܝܑܼܠܹܗ ܒܪܘܿܢܹܗ؟ ܘܐ݇ܢܵܫܵܐ ܠܵܐ ܡܨܹܐܠܹܗ ܕܝܲܗ݇ܒܼܸܠ ܐܸܠܹܗ  ܓ̰ܘܼܘܵܒ. ܘܡ̣ܢ ܗ̇ܘ ܝܵܘܡܵܐ ܐ݇ܢܵܫܵܐ ܠܵܐ ܩܘܼܫܕܸܪܹܗ ܡܸܢ݇ܕܪܹܫ݇ ܠܡܒܵܩܘܼܪܹܐ ܡܸܢܹܗ. ܗܿܝܓܵܗ ܝܑܼܫܘܿܥ ܗܘܼܡܙܸܡܠܹܗ ܥܲܡ ܟܸܢܫܹ̈ܐ ܘܥܲܡ ܬܲܠܡܝܼ̈ܕܘܼܗܝ  ܘܐ݇ܡܸܪܹܗ ܐܸܠܲܝܗܝ: ܥܲܠ ܟܘܼܪܣܝܵܐ ܕܡܘܼܫܹܐ ܝܬܸܒܼܠܗ݇ܘܿܢ ܣܵܦܪܹ̈ܐ ܘܦܪ̈ܝܼܫܹܐ. ܗܲܕܟܼܵܐ ܟܠ ܡܸܢܕܝܼ ܕܐܲܡܪܝܼ ܐܸܠܵܘܟܼܘܿܢ ܕܢܲܛܪܝܼܬܘܿܢ، ܢܛܘܼܪܘܿܢ ܘܥܒܼܘܼܕܘܿܢ. ܐܝܼܢܵܐ ܐܲܝܟܼ ܥܒܼܵܕܲܝܗܝ ܠܵܐ ܥܲܒܼܕܝܼܬܘܿܢ. ܣܵܒܵܒ ܟܹܐ ܐܵܡܪܝܼ ܘܠܹܐ ܥܲܒܼܕܝܼ. ܘܟܹܐ ܐܲܣܪܝܼ ܟܵܪ̈ܵܬܹܐ ܝܲܩܘܼܪܹ̈ܐ. ܘܡܲܬܒܼܝܼ ܥܲܠ ܪ̈ܘܼܦ̮ܫܵܢܹܐ ܕܒܢܲܝ̈ܢܵܫܵܐ. ܐܝܼܢܵܐ ܐܵܢܝܼ ܒܨܸܒܥܲܝܗܝ ܠܹܐ ܒܵܥܝܼ ܕܩܲܪܒܸܢܝܼ ܐܸܠܲܝܗܝ. ܘܟܠܲܝܗܝ ܥܒܼܵܕܲܝ̈ܗܝ ܟܹܐ ܥܲܒܼܕܝܼ ܕܦܲܝܫܝܼ ܚܸܙܝܹܐ ܠܒܢܲܝ̈ܢܵܫܵܐ. ܣܵܒܵܒ ܟܹܐ ܡܲܦܬܝܼ ܬܸܦܹܠܲܝ̈ܗܝ، ܘܡܲܪܝܸܟܼܝܼ ܬܸܟ݂̈ܠܵܬܵܐ ܕܥܵܒܵܝܲܝ̈ܗܝ. ܘܡܲܚܸܒܝܼ ܪܹܫ ܣܡܵܟ݂ܹ̈ܐ ܒܲܚܫܵܡ̈ܝܵܬܵܐ. ܘܪܹܫ ܡܵܘܬܒܼܹ̈ܐ ܓܵܘ ܟܢܘܼܫܝܵܬܹ̈ܐ. ܘܫܠܵܡܵܐ ܒܫܘܼܩܹ̈ܐ. ܘܕܗܵܘܝܼ ܦܝܵܫܵܐ ܩܸܪܝܹܐ ܪܵܒܝܼ ܡ̣ܢ ܐ݇ܢܵܫܹ̈ܐ. ܐܝܼܢܵܐ ܐܲܚܬܘܿܢ ܠܵܐ ܦܲܝܫܝܼܬܘܿܢ ܩܸܪܝܹܐ ܪܵܒܝܼ. ܣܵܒܵܒ ܚܲܕ݇ ܝܼܠܹܗ ܪܵܒܝܼܵܘܟܼܘܿܢ. ܐܝܼܢܵܐ ܐܲܚܬܘܿܢ ܟܠܵܘܟܼܘܿܢ ܐܲܚܘܿܢܘܵܬܹ̈ܐ ܝܬܘܿܢ. ܘܒܵܒܵܐ ܠܵܐ ܩܵܪܝܼܬܘܿܢ ܠܵܘܟܼܘܿܢ ܒܐܲܪܥܵܐ، ܣܵܒܵܒ ܚܲܕ݇ ܝܼܠܹܗ ܒܵܒܵܘܟܼܘܿܢ ܕܒܲܫܡܲܝܵܐ. ܘܠܵܐ ܦܲܝܫܝܼܬܘܿܢ ܩܸܪܝܹܐ ܡܕܲܒܪ̈ܵܢܹܐ، ܣܵܒܵܒ ܕܚܲܕ݇ ܝܠܹܗ ܡܕܲܒܪܵܢܵܘܟܼܘܿܢ ܡܫܝܼܚܵܐ. ܐܝܼܢܵܐ ܗ̇ܘ ܕܝܼܠܹܗ ܓܘܼܪܵܐ ܓܵܘܵܘܟܼܘܿܢ، ܗܵܘܹܐ ܐܸܠܵܘܟܼܘܿܢ ܡܫܲܡܫܵܢܵܐ. ܣܵܒܵܒ ܡ̇ܢ ܕܡܵܪܸܡ ܓܵܢܹܗ ܒܸܬ ܦܵܐܸܫ ܡܘܼܡܟܸܟܼܵܐ. ܘܡ̇ܢ ܕܡܲܡܟܸܟܼ ܓܵܢܹܗ ܒܸܬ ܦܵܐܸܫ ܡܘܼܪܡܵܐ. ܘܵܝ ܐܸܠܵܘܟܼܘܿܢ ܣܵܦܪܹ̈ܐ ܘܦܪ̈ܝܼܫܹܐ ܢܲܣܒܲܝ̈ ܒܐܲܦܹ̈ܐ، ܕܟܹܐ ܐܲܟܼܠܝܼܬܘܿܢ ܒܵܬܹ̈ܐ ܕܐܲܪ̈ܡܸܠܝܵܬܹ̈ܐ ܒܥܸܠܬܵܐ ܕܟܹܐ  ܡܲܪܝܸܟܼܝܼܬܘܿܢ ܨܠܵܘܵܬܵܘ̈ܟܼܘܿܢ. ܣܵܒܵܒ ܕܐܵܗܵܐ ܒܸܬ ܩܲܒܠܝܼܬܘܿܢ ܕܝܼܘܵܢ ܙܵܘܕܵܐ.  ܘܵܝ  ܐܸܠܵܘܟܼܘܿܢ   ܣܵܦܪܹ̈ܐ  ܘܦܪ̈ܝܼܫܹܐ ܢܲܣܒܲܝ̈ ܒܐܲܦܹ̈ܐ ܕܟܹܐ ܕܵܘܪܝܼܬܘܿܢ ܡܲܠܟܘܼܬܵܐ ܕܫܡܲܝܵܐ ܩܵܕ݇ܡ ܒܢܲܝ̈ܢܵܫܵܐ، ܣܵܒܵܒ ܐܲܚܬܘܿܢ ܠܹܐ ܥܲܒ̣ܪܝܼܬܘܿܢ، ܘܠܐܲܝܢܝܼ ܕܥܲܒ̣ܪܝܼ ܠܹܐ ܝܬܘܿܢ ܒܸܫܒܼܵܩܵܐ ܠܸܥܒ̣ܵܪܵܐ. ܘܵܝ ܐܸܠܵܘܟܼܘܿܢ ܣܵܦܪܹ̈ܐ ܘܦܪ̈ܝܼܫܹܐ ܢܲܣܒܲܝ̈ ܒܐܲܦܹ̈ܐ، ܕܟܹܐ ܚܲܕܪܝܼܬܘܿܢ ܝܵܡܵܐ ܘܒܸܪܙܵܐ ܕܥܲܒܼܕܝܼܬܘܿܢ ܚܲܕ݇ ܓܝܼܘܼܪܵܐ، ܘܐܝܼܡܵܢ ܕܗ݇ܘܹܐܠܹܗ، ܟܹܐ ܥܲܒܼܕܝܼܬܘܿܢ ܠܹܗ ܒܲܪ ܓܹܗܲܢܵܐ ܚܲܕ݇ ܒܬܪܹܝ ܥܲܠܵܘܟܼܘܿܢ. ܘܵܝ ܐܸܠܵܘܟܼܘܿܢ ܡܗܲܕܝܵܢܹ̈ܐ ܣܸܡܝܹ̈ܐ. ܕܟܹܐ ܐܲܡܪܝܼܬܘܿܢ ܡ̇ܢ ܕܝܵܡܹܐ ܒܗܲܝܟܠܵܐ ܠܹܐ ܝܠܵܗ̇ ܚܲܕ݇ ܡܸܢܕܝܼ، ܐܝܼܢܵܐ ܡ̇ܢ ܕܝܵܡܹܐ ܒܕܲܗܒܼܵܐ ܕܓܵܘ ܗܲܝܟܠܵܐ، ܟܹܐ ܗܵܘܹܐ ܚܲܝܵܒܼܵܐ. ܣܲܟܼܠܹ̈ܐ ܘܣܸܡܝܹ̈ܐ ܡܘܼܕܝܼ ܝܠܹܗ ܒܘܼܫ ܓܘܼܪܵܐ: ܕܲܗܒܼܵܐ ܝܲܢ ܗܲܝܟܠܵܐ ܕܗ̇ܘ ܕܟܹܐ ܡܩܵܕܸܫ ܠܕܲܗܒܼܵܐ؟ ܘܡ̇ܢ ܕܝܵܡܹܐ ܒܡܲܕܒܚܵܐ، ܠܹܐ ܝܠܵܗ̇ ܚܲܕ݇ ܡܸܢܕܝܼ، ܐܝܼܢܵܐ ܡ̇ܢ ܕܝܵܡܹܐ ܒܩܘܼܪܒܵܢܵܐ ܕܠܥܸܠ ܡܸܢܹܗ ܟܹܐ ܗܵܘܹܐ ܚܲܝܵܒܼܵܐ. ܣܲܟܼܠܹ̈ܐ ܘܣܸܡܝܹ̈ܐ. ܣܵܒܵܒ ܡܘܿܕܝܼ ܝܠܹܗ ܒܘܼܫ ܓܘܼܪܵܐ. ܩܘܼܪܒܵܢܵܐ ܝܲܢ ܡܲܕܒܚܵܐ ܕܟܹܐ ܡܩܵܕܸܫ ܠܩܘܼܪܒܵܢܵܐ؟ ܗܲܕܟܼܵܐ ܡ̇ܢ ܕܝܵܡܹܐ ܒܡܲܕܒܚܵܐ ܟܹܐ ܝܵܡܹܐ ܒܝܼܹܗ ܘܒܟܠ ܡܸܢܕܝܼ ܕܐܝܼܬ ܠܥܸܠ ܡܸܢܹܗ. ܘܡ̇ܢ ܕܝܵܡܹܐ ܒܗܲܝܟܠܵܐ، ܟܹܐ ܝܵܡܹܐ ܒܝܼܹܗ ܘܒܡ̇ܢ ܕܥܵܡܸܪ ܒܝܼܹܗ. ܘܡ̇ܢ ܕܝܵܡܹܐ ܒܫܡܲܝܵܐ.  ܟܹܐ ܝܵܡܹܐ ܒܟܘܼܪܣܝܹܗ ܕܐܲܠܵܗܵܐ، ܘܒܡ̇ܢ ܕܝܵܬܸܒܼ ܠܥܸܠ ܡܸܢܹܗ.

♱♱♱♱♱♱♱♱♱