ܚܲܕܼܒܫܲܒܵܐ ܕܐܲܪܒܥܵܐ ܕܨܵܘܡܵܐ
ܒܪܝܼܬܵܐ ܝܐ؛ 1‐ܫܘܼܠܵܡܵܐ
ܬܸܒ̣ܘ ܘܲܫܠܵܘ ܒܪܝܼܬܵܐ ܣܸܦܪܵܐ ܩܲܕܡܵܝܵܐ ܕܐܘܿܪܵܝܬܵܐ
ܐܲܚܲܝ̈ ܒܪܸܟ̣ܡܵܪܝ܀
ܘܗ݇ܘܹܐܠܵܗ̇ ܟܠܵܗ̇ ܐܲܪܥܵܐ ܚܲܕ݇ ܠܸܫܵܢܵܐ ܘܚܲܕ݇ ܗܲܡܙܲܡܬܵܐ.܀ ܘܗ݇ܘܹܐܠܵܗ̇ ܕܟܲܕ ܟܘܸܟ̰ܠܗ݇ܘܿܢ ܡ̣ܢ ܡܲܕܢܚܵܐ؛ ܡܘܼܫ݇ܟ̰ܸܚܠܗ݇ܘܿܢ ܕܸܫܬܵܐ ܒܐܲܪܥܵܐ ܕܣܸܢܥܲܪ؛ ܘܝ݇ܬܸܒ̣ܠܗ݇ܘܿܢ ܬܵܡܵܐ.܀ ܘܐ݇ܡܸܪܗ݇ܘܿܢ ܚܲܕ݇ ܩܵܐ ܕܗ̇ܘ ܐ݇ܚܹܪ݇ܢܵܐ؛ ܬܹܐܡܘܿܢ ܕܵܪܲܚ ܟܲܪ̈ܦܝܼܟ̰ܹܐ ܘܡܲܩܕܲܚܠܗ݇ܘܿܢ ܒܢܘܼܪܵܐ؛ ܘܟܲܪ̈ܦܝܼܟ̰ܹܐ ܒܸܬ ܗܵܘܝܼ ܟܹܐܦܹ̈ܐ؛ ܘܟܸܠܫܵܐ ܒܸܬ ܗܵܘܹܐ ܩܵܐ ܡܲܟ̰ܪܵܥܝܬܵܐ.܀ ܘܐ݇ܡܸܪܗ݇ܘܿܢ ܬܹܐܡܘܿܢ ܒܵܢܲܚܠܲܢ ܡܕܝܼܢ݇ܬܵܐ؛ ܘܒܘܼܪܓ̰ܵܐ ܪܹܫܹܗ ܒܫܡܲܝܵܐ؛ ܘܥܵܒ̣ܕܲܚܠܲܢ ܫܸܡܵܐ؛ ܕܠܵܐ ܗܵܘܝܵܐ ܕܦܵܝܫܲܚ ܒܘܼܪ̈ܒܸܙܹܐ ܥܲܠ ܦܵܬܵܐ ܕܟܠܵܗ̇ ܐܲܪܥܵܐ.܀ ܘܨܠܹܐܠܹܗ ܡܵܪܝܵܐ ܠܸܚܙܵܝܵܐ ܡܕܝܼܢ݇ܬܵܐ ܘܒܘܼܪܓ̰ܵܐ ܕܒܸܒܢܵܝܵܐ ܗ݇ܘܵܘ ܒܢܲܝ̈ܢܵܫܵܐ. ܘܐ݇ܡܸܪܹܗ ܡܵܪܝܵܐ ܗܵܐ ܚܲܕ݇ ܛܵܝܸܦܵܐ ܘܚܲܕ݇ ܠܸܫܵܢܵܐ ܩܵܐ ܟܠܲܝܗܝ؛ ܘܗܵܕܟ̣ܵܐ ܬܘܼܚܡܸܢܗ݇ܘܿܢ ܠܸܥܒ̣ܵܕܵܐ ܟܠ ܡܸܢܕܝܼ ܕܬܘܼܚܡܸܢܗ݇ܘܿܢ ܠܸܥܒ̣ܵܕܵܐ ܠܲܝܬ̇ ܒܵܨܘܿܪܵܐ ܡܸܢܲܝܗܝ.܀ ܬܹܐܡܘܿܢ ܨܵܠܲܚ ܘܦܲܠܲܓ̣݇ܚ ܬܵܡܵܐ ܠܸܫܵܢܵܐ ܕܠܵܐ ܦܵܪܡܝܼ ܐ݇ܢܵܫܵܐ ܠܸܫܵܢܵܐ ܕܚܲܒ̣ܪܹܗ.܀ ܘܒܘܼܪܒܸܙܝܼܠܹܗ ܡܵܪܝܵܐ ܡ̣ܢ ܬܵܡܵܐ ܥܲܠ ܦܵܬܵܐ ܕܟܠܵܗ̇ ܐܲܪܥܵܐ؛ ܘܟܠܹܐܠܗ݇ܘܿܢ ܡ̣ܢ ܒܢܵܝܬܵܐ ܕܡܕܝܼܢ݇ܬܵܐ.܀ ܒܘܼܬ ܕܐܵܗܵܐ؛ ܩܪܹܐܠܹܗ ܫܸܡܵܗ̇ ܒܵܒܸܠ؛ ܣܵܒܵܒ ܕܬܵܡܵܐ ܒܘܼܠܒܸܠܹܗ ܡܵܪܝܵܐ ܠܸܫܵܢܹ̈ܐ ܕܟܠܵܗ̇ ܐܲܪܥܵܐ؛ ܘܡ̣ܢ ܬܵܡܵܐ ܒܘܼܪܒܸܙܝܼܠܹܗ ܡܵܪܝܵܐ ܥܲܠ ܦܵܬܵܐ ܕܟܠܵܗ̇ ܐܲܪܥܵܐ.܀ ܐܲܢܹܐ ܝ݇ܢܵܐ ܣܸܢܣܝܼܠܹ̈ܐ ܕܫܹܝܡ؛ ܫܹܝܡ ܒܲܪ ܐܸܡܵܐܐ ܫܸܢܹ̈ܐ ܗܘܼܨܸܠܹܗ ܠܐܲܪܦܲܟ̣ܫܲܪ؛ ܬܪܹܝ ܫܸܢܹ̈ܐ ܡܒܵܬ݇ܪ ܛܵܘܦܵܢܵܐ.܀ ܘܚܝܹܐܠܹܗ ܫܹܝܡ ܡ̣ܢ ܒܵܬ݇ܪ ܕܗܘܼܨܸܠܹܗ ܠܐܲܪܦܲܟ̣ܫܲܪ ܚܲܡܫܸܡܵܐܐ ܫܸܢܹ̈ܐ؛ ܘܗܘܼܨܸܠܹܗ ܒܢܘܿܢܹ̈ܐ ܘܒܢܵܬܹ̈ܐ.܀ ܘܐܲܪܦܲܟ̣ܫܲܪ ܚܝܹܐܠܹܗ ܬܠܵܬܝܼ ܘܚܲܡܸܫ ܫܸܢܹ̈ܐ؛ ܘܗܘܼܨܸܠܹܗ ܠܫܵܠܵܚ.܀ ܘܚܝܹܐܠܹܗ ܐܲܪܦܲܟ̣ܫܲܪ ܡ̣ܢ ܒܵܬ݇ܪ ܕܗܘܼܨܸܠܹܗ ܠܫܵܠܵܚ ܐܲܪܒܲܥܡܵܐܐ ܘܬܠܵܬ ܫܸܢܹ̈ܐ؛ ܘܗܘܼܨܸܠܹܗ ܒܢܘܿܢܹ̈ܐ ܘܒܢܵܬܹ̈ܐ.܀ ܘܚܝܹܐܠܹܗ ܫܵܠܵܚ ܬܠܵܬܝܼ ܫܸܢܹ̈ܐ؛ ܘܗܘܼܨܸܠܹܗ ܠܥܵܒ̣ܲܪ. ܘܚܝܹܐܠܹܗ ܫܵܠܵܚ ܡ̣ܢ ܒܵܬ݇ܪ ܕܗܘܼܨܸܠܹܗ ܠܥܵܒ̣ܲܪ ܐܲܪܒܲܥܡܵܐܐ ܘܬܠܵܬܝܼ ܫܸܢܹ̈ܐ؛ ܘܗܘܼܨܸܠܹܗ ܒܢܘܿܢܹ̈ܐ ܘܒܢܵܬܹ̈ܐ.܀ ܘܚܝܹܐܠܹܗ ܥܵܒ̣ܲܪ ܬܠܵܬܝܼ ܘܐܲܪܒܲܥ ܫܸܢܹ̈ܐ؛ ܘܗܘܼܨܸܠܹܗ ܠܦܵܠܵܓ̣.܀ ܘܚܝܹܐܠܹܗ ܥܵܒ̣ܲܪ ܡ̣ܢ ܒܵܬ݇ܪ ܕܗܘܼܨܸܠܹܗ ܠܦܵܠܵܓ̣ ܐܲܪܒܲܥܡܵܐܐ ܘܬܠܵܬܝܼ ܫܸܢܹ̈ܐ ܘܗܘܼܨܸܠܹܗ ܒܢܘܿܢܹ̈ܐ ܘܒܢܵܬܹ̈ܐ.܀ ܘܚܝܹܐܠܹܗ. ܦܵܠܵܓ̣ ܬܠܵܬܝܼ ܫܸܢܹ̈ܐ ܘܗܘܼܨܸܠܹܗ ܠܐܲܪܥܘܿ.܀ ܘܚܝܹܐܠܹܗ ܦܵܠܵܓ̣ ܡ̣ܢ ܒܵܬ݇ܪ ܕܗܘܼܨܸܠܹܗ ܠܐܲܪܥܘܿ ܬܪܹܝܡܵܐܐ ܘܐܸܬܫܲܥ ܫܸܢܹ̈ܐ. ܘܗܘܼܨܸܠܹܗ ܒܢܘܿܢܹ̈ܐ ܘܒܢܵܬܹ̈ܐ.܀ ܘܚܝܹܐܠܹܗ ܐܲܪܥܘܿ ܬܠܵܬܝܼ ܘܬܪܹܝ ܫܸܢܹ̈ܐ؛ ܘܗܘܼܨܸܠܹܗ ܠܣܪܘܿܓ̣.܀ ܘܚܝܹܐܠܹܗ ܐܲܪܥܘܿ ܡ̣ܢ ܒܵܬ݇ܪ ܕܗܘܼܨܸܠܹܗ ܠܣܪܘܿܓ̣؛ ܬܪܹܝܡܵܐܐ ܘܫܲܒ̣ܲܥ ܫܸܢܹ̈ܐ؛ ܘܗܘܼܨܸܠܹܗ ܒܢܘܿܢܹ̈ܐ ܘܒܢܵܬܹ̈ܐ.܀ ܘܚܝܹܐܠܹܗ ܣܪܘܿܓ̣ ܬܠܵܬܝܼ ܫܸܢܹ̈ܐ ܘܗܘܼܨܸܠܹܗ ܠܢܵܚܘܿܪ.܀ ܘܚܝܹܐܠܹܗ ܣܪܘܿܓ̣ ܡ̣ܢ ܒܵܬ݇ܪ ܕܗܘܼܨܸܠܹܗ ܠܢܵܚܘܿܪ ܬܪܹܝܡܵܐܐ ܫܸܢܹ̈ܐ ܘܗܘܼܨܸܠܹܗ ܒܢܘܿܢܹ̈ܐ ܘܒܢܵܬܹ̈ܐ.܀ ܘܚܝܹܐܠܹܗ ܢܵܚܘܿܪ ܥܸܣܪܝܼ ܘܐܸܬܫܲܥ ܫܸܢܹ̈ܐ؛ ܘܗܘܼܨܸܠܹܗ ܠܬܲܪܚ.܀ ܘܚܝܹܐܠܹܗ ܢܵܚܘܿܪ ܡ̣ܢ ܒܵܬ݇ܪ ܕܗܘܼܨܸܠܹܗ ܠܬܲܪܚ؛ ܐܸܡܵܐܐ ܘܐܸܬܫܲܥܣܲܪ ܫܸܢܹ̈ܐ؛ ܘܗܘܼܨܸܠܹܗ ܒܢܘܿܢܹ̈ܐ ܘܒܢܵܬܹ̈ܐ.܀ ܘܚܝܹܐܠܹܗ ܬܲܪܚ ܫܲܒ̣ܥܝܼ ܘܚܲܡܸܫ ܫܸܢܹ̈ܐ؛ ܘܗܘܼܨܸܠܹܗ ܠܐܲܒ̣ܪܵܡ ܘܠܢܵܚܘܿܪ ܘܠܗܵܪܵܢ. ܐܲܢܹܐ ܝ݇ܢܵܐ ܣܸܢܣܝܼܠܹ̈ܐ ܕܬܲܪܚ؛ ܬܲܪܚ ܗܘܼܨܸܠܹܗ ܠܐܲܒ̣ܪܵܡ ܘܠܢܵܚܘܿܪ ܘܠܗܵܪܵܢ؛ ܘܗܵܪܵܢ ܗܘܼܨܸܠܹܗ ܠܠܘܿܛ. ܘܡܝܼܬܠܹܗ ܗܵܪܵܢ ܒܚܲܝܹ̈ܐ ܕܬܲܪܚ ܒܵܒܹܗ؛ ܒܐܲܪܥܵܐ ܕܦܸܫܠܹܗ ܗܘܼܨܠܵܐ؛ ܒܐܘܿܪ ܕܟܲܠܕܵܝܹ̈ܐ.܀ ܫܩܸܠܗ݇ܘܿܢ ܐܲܒ̣ܪܵܡ ܘܢܵܚܘܿܪ ܒܲܟ̣ܬܵܬܹ̈ܐ؛ ܫܸܡܵܐ ܕܒܲܟ̣ܬܹܗ ܕܐܲܒ̣ܪܵܡ ܣܲܪܲܝ؛ ܘܫܸܡܵܐ ܕܒܲܟ̣ܬܹܗ ܕܢܵܚܘܿܪ ܡܸܠܟܵܐ ܒܪܵܬܵܐ ܕܗܵܪܵܢ؛ ܘܒܵܒܵܗ̇ ܕܡܸܠܟܵܐ ܘܒܵܒܵܗ̇ ܕܐܲܣܟܵܐ.܀ ܘܣܲܪܲܝ ܗܘܹܐܠܵܗ̇ ܥܩܲܪܬܵܐ؛ ܘܠܵܐ ܗ݇ܘܹܐܠܵܗ̇ ܠܵܗ̇ ܒܢܘܿܢܹ̈ܐ.܀ ܘܠܘܼܒܸܠܹܗ ܬܲܪܚ ܠܐܲܒ̣ܪܲܡ ܒܪܘܿܢܹܗ؛ ܘܠܠܘܿܛ ܒܲܪ ܗܵܪܵܢ ܢܵܘܸܓܹܗ؛ ܘܣܲܪܲܝ ܟܲܠܬܹܗ؛ ܒܲܟ̣ܬܹܗ ܕܐܲܒ̣ܪܵܡ ܒܪܘܿܢܹܗ؛ ܘܦܠܸܛܠܹܗ ܥܲܡܲܝܗܝ ܡ̣ܢ ܐܘܼܪ ܕܟܲܠܕܵܝܹ̈ܐ ܠܹܐܙܵܠܵܐ ܠܐܲܪܥܵܐ ܕܟܢܲܥܢ؛ ܘܐ݇ܬܹܐܠܗ݇ܘܿܢ ܗܲܠ ܚܵܪܲܢ ܘܝ݇ܬܸܒ̣ܠܗ݇ܘܿܢ ܬܵܡܵܐ.܀ ܘܗ݇ܘܹܐܠܗ݇ܘܿܢ ܝܵܘܡܵܢܹ̈ܐ ܕܬܲܪܚ ܬܪܹܝܡܵܐܐ ܘܚܲܡܸܫ ܫܸܢܹ̈ܐ؛ ܘܡܝܼܬܠܹܗ ܬܲܪܚ ܒܚܵܪܵܢ܀
ܚܲܒ̣ܪܹܗ
ܝܼܫܘܿܥ ܒܲܪܢܘܿܢ؛ ܘ؛ 27‐ ܙ؛ 16.
ܫܠܵܘ ܟܬܵܒ̣ܵܐ ܕܝܼܫܘܿܥ ܒܲܪܢܘܿܢ؛ ܐܲܚܲܝ̈ ܒܲܪܸܟ̣ܡܵܪܝ܀
ܘܗ݇ܘܹܐܠܹܗ ܡܵܪܝܵܐ ܥܲܡ ܝܼܫܘܿܥ؛ ܘܒܵܗܣܹܗ ܐܵܙܸܠ ܗ݇ܘܵܐ ܒܟܠܵܗ̇ ܐܲܪܥܵܐ.܀ ܘܥܒ̣ܸܕܠܗ݇ܘܿܢ ܥܵܘܠܵܐ ܒܢܲܝ̈ ܝܼܣܪܵܝܹܠ ܒܚܸܪܡܵܐ؛ ܘܫܩܸܠܹܗ ܥܵܟܲܪ ܒܲܪ ܟܲܪܡܝܼ؛ ܒܲܪ ܙܲܒ̣ܕܝܼ؛ ܒܲܪ ܙܲܪܚ؛ ܡ̣ܢ ܫܲܒ̣ܛܵܐ ܕܝܼܗܘܼܕܵܐ ܡ̣ܢ ܚܸܪܡܵܐ ܘܛܘܼܫܹܐܠܹܗ. ܘܚܸܡܠܵܗ̇ ܟܲܪܒܹܗ ܕܡܵܪܝܵܐ ܥܲܠ ܒܢܲܝ̈ ܝܼܣܪܵܝܹܠ.܀ ܘܫܘܼܕܸܪܹܗ ܝܼܫܘܿܥ ܐ݇ܢܵܫܹ̈ܐ ܡ̣ܢ ܐܝܼܪܝܼܚܘܿ ܠܥܵܝ؛ ܕܥܲܠ ܕܸܦܢܵܐ ܕܒܹܝܬ̣ ܐܵܘܵܢ؛ ܡ̣ܢ ܡܲܕܢܚܵܐ ܕܒܹܝܬ̣ ܐܹܝܠ؛ ܘܐ݇ܡܸܪܹܗ ܐܸܠܲܝܗܝ ܐ݇ܣܠ݇ܘܿܩܘܿܢ ܓ̰ܲܣܸܣܗ݇ܘܿܢ ܐܲܪܥܵܐ؛ ܘܐ݇ܣܸܩܠܗ݇ܘܿܢ ܘܓ̰ܘܼܣܸܣܵܗ̇ ܠܗ݇ܘܿܢ ܠܥܵܝ.܀ ܘܕܸܪܗ݇ܘܿܢ ܠܟܸܣ ܝܼܫܘܿܥ ܘܐܵܡܪܝܼ ܐܸܠܹܗ؛ ܠܵܐ ܐܵܣܸܩ ܟܠܹܗ ܛܵܝܸܦܵܐ؛ ܐܸܠܵܐ ܐܲܝܟܼ ܬܪܹܝ ܬܠܵܬܵܐ ܐܲܠܦܹ̈ܐ ܐ݇ܢܵܫܹ̈ܐ ܐܲܣܩܝܼ ܘܒܸܬ ܡܲܚܪܸܒ̣ܝܼ ܠܵܗ̇ ܥܵܝ. ܠܵܐ ܫܲܕܪܸܬ̇ ܠܟܠܹܗ ܛܵܝܸܦܵܐ؛ ܣܵܒܵܒ ܕܚܲܕ݇ܟ̰ܵܐ ܝ݇ܢܵܐ.܀ ܘܐ݇ܣܸܩܠܗ݇ܘܿܢ ܡ̣ܢ ܥܲܡܵܐ ܠܬܵܡܵܐ ܐܲܝܟܼ ܬܠܵܬܵܐ ܐܲܠܦܹ̈ܐ ܐ݇ܢܵܫܹ̈ܐ؛ ܘܥܪܸܩܠܗ݇ܘܿܢ ܡ̣ܢ ܩܵܕ݇ܡ ܐ݇ܢܵܫܹ̈ܐ ܕܥܵܝ.܀ ܘܡܘܼܚܪܸܒ̣ܠܗ݇ܘܿܢ [ܘܩܛܸܠܗ݇ܘܿܢ] ܐ݇ܢܵܫܹ̈ܐ ܕܥܵܝ ܡ̣ܢ ܝܼܣܪܵܝܹܠ ܬܠܵܬܝܼ ܘܐܸܫܬܵܐ ܐ݇ܢܵܫܹ̈ܐ. ܘܛܪܝܼܕܲܝܗܝ ܠܗ݇ܘܿܢ ܩܵܕ݇ܡ ܬܲܪܥܵܐ ܕܡܕܝܼܢ݇ܬܵܐ ܗܲܠ ܕܦܸܫܠܗ݇ܘܿܢ ܫܡܝܼܛܹ̈ܐ؛ ܘܡܚܹܐܠܗ݇ܘܿܢ ܒܝܼܲܝܗܝ ܡܚܲܝܬܵܐ. ܘܪܓܸܕܠܹܗ ܠܸܒܵܐ ܕܛܵܝܸܦܵܐ؛ ܘܗ݇ܘܹܐܠܹܗ ܐܲܝܟܼ ܡܝܼܵܐ.܀ ܘܟ̰ܪܸܬܠܹܗ ܝܼܫܘܿܥ ܓ̰ܘܼܠܘܼ̈ܗܝ ܘܢܦܸܠܹܗ ܥܲܠ ܦܵܬܹܗ ܥܲܠ ܐܲܪܥܵܐ ܩܵܕ݇ܡ ܩܹܒ̣ܘܼܬܵܐ ܕܡܵܪܝܵܐ ܗܲܠ ܪܲܡܫܵܐ؛ ܗ̇ܘ ܘܚܘܲܪ̈ܕܸܩܢܹܐ ܕܝܼܣܪܵܝܹܠ؛ ܘܕܪܹܐܠܗ݇ܘܿܢ ܥܲܦܪܵܐ ܒܪܹܫܲܝܗܝ.܀ ܘܐ݇ܡܸܪܹܗ ܝܼܫܘܿܥ؛ ܝܵܐ ܡܵܪܝܵܐ ܐܲܠܵܗܵܐ؛ ܩܵܡܘܿܕܝܼ ܡܘܼܥܒ̣ܸܪܘܼܟܼ ܐܵܗܵܐ ܛܵܝܸܦܵܐ ܒܢܲܗܪܵܐ ܕܝܘܿܪܕܢܵܢ ܕܣܵܦܸܬ̇ ܠܲܢ ܒܐܝܼܕܵܐ ܕܐܵܡܘܿܪ̈ܵܝܹܐ؛؟ ܛܘܼܒ̣ܵܐ ܕܗܵܘܲܚ ܗ݇ܘܵܘ ܝ݇ܬܝܼܒ̣ܹܐ ܠܗ̇ܝ ܦܵܬܵܐ ܐ݇ܚܹܪ݇ܬܵܐ ܕܝܘܿܪܕܢܵܢ.܀ ܡܐܵܕܝܼܵܐ ܡܘܼܕܝܼ ܐܵܡܪܸܢ؛ ܕܡܘܼܕܸܪܹܗ ܝܼܣܪܵܝܹܠ ܩܕܵܠܹܗ ܩܵܕ݇ܡ ܕܸܫ̰ܡܸܢ̈ܘܼܗܝ؟܀ ܘܒܸܬ ܫܵܡܥܝܼ ܟܢܲܥܢܵܝܹ̈ܐ ܘܟܠܲܝܗܝ ܥܵܡܪ̈ܵܢܹܐ ܕܐܲܪܥܵܐ ܘܒܸܬ ܓ̰ܲܡܥܝܼ ܥܲܠܲܢ ܘܬܲܠܩܝܼ ܫܸܡܲܢ ܡ̣ܢ ܦܵܬܵܐ ܕܐܲܪܥܵܐ. ܘܡܘܼܕܝܼ ܒܸܬ ܥܵܒ̣ܕܸܬ̇ ܠܫܸܡܘܼܟܼ ܓܘܼܪܵܐ؟܀ ܘܐ݇ܡܸܪܹܗ ܡܵܪܝܵܐ ܠܝܼܫܘܿܥ؛ ܩܘܼܡ! ܩܵܡܘܿܕܝܼ ܝ݇ܘܸܬ̇ ܢܦܝܼܠܵܐ ܥܲܠ ܦܵܬܘܼܟܼ ܥܲܠ ܐܲܪܥܵܐ؟܀ ܚܛܹܐܠܹܗ ܝܼܣܪܵܝܹܠ ܘܥܒ̣ܸܪܹܗ ܥܲܠ ܦܘܼܩܕܵܢܵܐ ܕܦܘܼܩܸܕܠܝܼ ܐܸܠܹܗ؛ ܘܫܩܸܠܹܗ ܡ̣ܢ ܚܸܪܡܵܐ ܐܘܼܦ ܓܢܸܒ̣ܠܹܗ ܘܐܘܼܦ ܕܘܼܓܸܠܹܗ؛ ܘܛܘܼܫܹܐܠܹܗ ܓܵܘ ܡܵܐܢ̈ܘܼܗܝ.܀ ܘܡܸܕܪܹܐ ܠܹܐ ܡܵܨܝܼ ܒܢܲܝ̈ ܝܼܣܪܵܝܹܠ ܠܸܩܝܵܡܵܐ ܩܵܕ݇ܡ ܕܸܫ̰ܡܸܢ؛ ܐܸܠܵܐ ܩܕܵܠܲܝܗܝ ܒܸܬ ܡܲܕܸܪܝܼ ܩܵܕ݇ܡ ܕܸܫ̰ܡܸܢ؛ ܣܵܒܵܒ ܕܗ݇ܘܹܐܠܗ݇ܘܿܢ ܚܸܪܡܵܐ؛ ܘܡܸܕܪܹܐ ܠܹܐ ܗܵܘܸܢ ܥܲܡܵܘܟ̣ܘܿܢ؛ ܐܸܠܵܐ ܐܸܢ ܡܲܪܚܸܩܝܼܬܘܿܢ ܚܸܪܡܵܐ ܡ̣ܢ ܓܵܘܵܘܟ̣ܘܿܢ.܀ ܩܘܼܡ ܬܵܢܝܼ ܩܵܐ ܕܐܵܗܵܐ ܛܵܝܸܦܵܐ؛ ܟ̰ܝܕܹ̈ܐ ܝ݇ܬܘܿܢ ܩܵܝܕܲܡܬܵܐ؛ ܣܵܒܵܒ ܕܗܵܕܟ̣ܵܐ ܒܹܐܡܵܪܵܐ ܝ݇ܠܹܗ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ؛ ܚܸܪܡܵܐ ܒܓܵܘܘܼܟܼ ܝܼܣܪܵܝܹܠ؛ ܘܡܸܕܪܹܐ ܠܹܐ ܡܵܨܸܬ̇ ܠܸܩܝܵܡܵܐ ܩܵܕ݇ܡ ܕܸܫ̰ܡܸܢܘܼܟܼ؛ ܗܲܠ ܕܡܲܪܚܸܩܝܼܬܘܿܢ ܚܸܪܡܵܐ ܡ̣ܢ ܓܵܘܵܘܟ̣ܘܿܢ؛ ܩܵܝܕܲܡܬܵܐ ܡܲܩܪܸܒ̣ܘܿܢ ܫܲܒ̣ܛܵܘܟ̣ܘܿܢ؛ ܘܫܲܒ̣ܛܵܐ ܕܕܵܒ̣ܸܩܠܹܗ ܡܵܪܝܵܐ؛ ܦܵܐܹܫ ܡܘܼܩܪܸܒ̣ܵܐ ܠܐܘܼܓ̰ܵܓ̣ܹ̈ܐ؛ ܘܐܘܼܓ̰ܵܓ̣ ܕܕܵܒ̣ܸܩܠܵܗ̇ ܡܵܪܝܵܐ ܦܵܝܫܵܐ ܡܘܼܩܪܸܒ̣ܬܵܐ ܠܒܵܬܹ̈ܐ. ܘܒܲܝܬܵܐ ܕܦܵܐܹܫ ܕܒ̣ܝܼܩܵܐ ܒܸܬ ܦܵܐܹܫ ܡܘܼܩܪܸܒ̣ܵܐ ܠܓܲܒ̣ܪܹ̈ܐ.܀ ܘܡ̇ܢ ܕܦܵܐܹܫ ܕܒ̣ܝܼܩܵܐ ܒܚܸܪܡܵܐ؛ ܒܸܬ ܐܵܩܸܕ ܒܢܘܼܪܵܐ؛ ܗ̇ܘ ܘܟܠ ܡܸܢܕܝܼ ܕܐܝܼܬܠܹܗ؛ ܡ̣ܢ ܣܵܒܵܒ ܕܫܡܝܼܛܠܹܗ ܦܘܼܩܕܵܢܹܗ ܕܡܵܪܝܵܐ ܘܥܒ̣ܸܕܠܹܗ ܥܵܘܠܵܐ ܒܝܼܣܪܵܝܹܠ܀
♱♱♱♱♱♱♱♱♱
ܚܲܕܼܒܫܲܒܵܐ ܕܐܲܪܒܥܵܐ ܕܨܵܘܡܵܐ
ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ
ܕܲܠܘܵܬܼ ܪ̈ܗܘܿܡܵܝܹܐ ܐܲܚܲܝ̈ ܒܲܪܸܟܼܡܵܪܝ܀
ܐܵܕܝܼܵܐ ܐܵܚܘܿܢܘܵܬ̈ܝܼ ܕܵܝܢܵܢܹ̈ܐ ܝ݇ܘܲܚ؛ ܠܵܐ ܠܒܸܣܪܵܐ ܐܲܝܟܼ ܕܒܒܸܣܪܵܐ ܚܲܝܲܚ* ܣܵܒܵܒ ܐܸܢ ܒܒܹܣܪܵܐ ܒܸܚܵܝܵܐ ܝ݇ܬܘܿܢ ܗܕܝܼܪܹܐ ܝ݇ܬܘܿܢ ܠܸܡܝܵܬܵܐ. ܘܐܸܢ ܒܪܘܼܚܵܐ ܦܘܼܠܚܵܢܹ̈ܐ ܕܦܲܓܼܪܵܐ ܡܲܡܝܘܼܬܹܐ ܝ݇ܬܘܿܢ ܒܸܬ ܚܲܝܝܼܬܘܿܢ* ܣܵܒܵܒ ܐܵܢܝܼ ܕܒܪܘܼܚܵܐ ܕܐܲܠܵܗܵܐ ܦܵܝܫܝܼ ܬܘܼܓܒܸܪܹܐ؛ ܐܲܢܹܐ ܝ݇ܢܵܐ ܒܢܘܼܢܹ̈ܐ ܕܐܲܠܵܗܵܐ* ܣܵܒܵܒ ܠܵܐ ܫܩܸܠܵܘܟܼܘܿܢ ܪܘܼܚܵܐ ܕܪܹܓܘܼܬܵܐ ܡܸܢܕܪܹܫ̄ ܠܙܕܘܼܥܬܵܐ؛ ܐܸܠܵܐ ܫܩܸܠܵܘܟܼܘܿܢ ܪܘܼܚܵܐ ܕܣܝܼܡܲܬ ܒܢܲܝ̈ܵܐ ܕܒܝܼܵܗ̇ ܒܸܩܪܵܝܵܐ ܝ݇ܘܲܚ ܐܲܒܵܐ ܒܵܒܲܢ* ܘܗ̇ܝ ܪܘܼܚܵܐ ܒܝܼܵܗܒܼܵܐ ܝ݇ܠܵܗ̇ ܣܵܗܕܘܼܬܵܐ ܠܪܘܼܚܲܢ ܕܝܼܘܲܚ ܒܢܘܼܢܹ̈ܐ ܕܐܲܠܵܗܵܐ. ܘܐܸܢ ܒܢܘܼܢܹ̈ܐ؛ ܐܘܼܦ ܝܵܪ̈ܘܿܬܹܐ. ܝܵܪ̈ܘܿܬܹܐ ܕܐܲܠܵܗܵܐ ܘܚܲܒܼܪ̈ܵܘܵܬܹܐ ܒܝܵܪܬܘܼܬܹܗ ܕܝܼܫܘܿܥ ܡܫܝܼܚܵܐ؛ ܕܐܸܢ ܩܵܒܠܲܚ ܚܲܫܵܐ ܥܲܡܹܗ ܐܘܼܦ ܥܲܡܹܗ ܒܸܬ ܦܵܝܫܲܚ ܚܩܝܼܪܹܐ* ܣܵܒܵܒ ܕܒܸܚܫܵܒܼܵܐ ܝ݇ܘܸܢ ܕܠܹܐ ܝ݇ܢܵܐ ܒܵܪܵܒܲܪ ܚܲܫܹ̈ܐ ܕܐܵܗܵܐ ܙܲܒܼܢܵܐ ܠܬܸܫܒܘܿܚܬܵܐ ܗ̇ܝ ܕܗܕܝܼܪܬܵܐ ܝ݇ܠܵܗ ܕܦܵܝܫܵܐ ܓܠܝܼܬܵܐ ܒܝܼܲܢ* ܣܵܒܵܒ ܟܠܵܗ̇ ܒܪܝܼܬܵܐ ܒܸܣܦܵܪܵܐ ܝ݇ܠܵܗ̇ ܠܓܸܠܝܵܢܵܐ ܕܒܢܘܼܢܹ̈ܐ ܕܐܲܠܵܗܵܐ* ܣܵܒܵܒ ܒܪܝܼܬܵܐ ܦܸܫܠܵܗ̇ ܙܲܒܛ ܠܒܵܛܝܼܠܘܼܬܵܐ ܠܵܐ ܒܪܸܙܵܝܵܗ̇؛ ܐܸܠܵܐ ܒܘܼܬ ܕܗ̇ܘ ܕܙܘܼܒܛܸܢܵܐ ܠܹܗ ܥܲܠ ܗܹܒܼܝܼ* ܕܐܘܼܦ ܗ̇ܝ ܒܪܝܼܬܵܐ ܦܵܝܫܵܐ ܐܵܙܵܕ ܡ̣ܢ ܪܸܓܘܼܬܵܐ ܕܚܪܵܒܼܵܐ ܒܐܵܙܵܕܘܼܬܵܐ ܕܬܸܫܒܘܿܚܬܵܐ ܕܒܢܘܼܢܹ̈ܐ ܕܐܲܠܵܗܵܐ* ܣܵܒܵܒ ܕܒܝܼܕܲܥܝܵܐ ܝ݇ܘܲܚ ܕܟܠܲܝܗܝ ܒܸܪ̈ܝܵܬܹܐ ܬܵܢܘܿܚܹܐ ܝ݇ܢܵܐ ܘܒܸܓܪܵܫܵܐ ܚܸܒܼܠܹ̈ܐ ܗܲܠ ܐܸܕܝܘܿܡ݇ ܝܵܘܡܵܐ* ܠܵܐ ܐܲܚܟ̰ܝܼ ܐܵܢܝܼ؛ ܐܝܼܢܵܐ ܐܘܼܦ ܐܲܚܢܲܢ ܕܐܝܼܬ ܒܝܼܲܢ ܪܹܫܝܼܬܵܐ ܕܪܘܼܚܵܐ ܬܵܢܘܿܚܹܐ ܝ݇ܘܲܚ ܒܓܵܢܲܢ ܘܒܸܣܦܵܪܵܐ ܝ݇ܘܲܚ ܠܣܝܼܡܲܬ ܒܢܲܝ̈ܵܐ ܠܦܘܼܪܩܵܢܵܐ ܕܦܲܓܼܪ̈ܲܝܢ* ܣܵܒܵܒ ܕܒܝܼܲܕ ܗܹܒܼܝܼ ܦܸܫܠܲܢ ܦܘܼܪܩܹܐ* ܐܝܼܢܵܐ ܗܹܒܼܝܼ ܕܦܵܝܫܵܐ ܚܙܝܼܬܵܐ ܠܹܐ ܝ݇ܠܵܗ̇ ܗܹܒܼܝܼ. ܣܵܒܵܒ ܐܸܢ ܒܸܚܙܵܝܵܐ ܝ݇ܘܲܚ ܠܡܸܢܕܝܼ؛ ܩܵܡܘܿܕܝܼ ܣܵܦܪܲܚ ܐܸܠܹܗ* ܐܝܼܢܵܐ ܐܸܢ ܠܡܸܢܕܝܼ ܕܠܵܐ ܦܵܐܸܫ ܚܸܙܝܵܐ ܒܸܣܦܵܪܵܐ ܝ݇ܘܲܚ؛ ܒܣܦܲܪܬܵܐ ܒܸܟܠܵܝܵܐ ܝ݇ܘܲܚ* ܗܲܕܟܵܐ ܐܘܼܦ ܗ̇ܝ ܪܘܼܚܵܐ ܡܗܲܝܸܪܵܐ ܠܙܲܒܘܼܢܘܼܬܲܢ ܡܘܼܕܝܼ ܨܵܠܲܚ ܨܠܘܿܬܵܐ؛ ܐܸܢ ܗ̇ܘ ܡܸܢܕܝܼ ܕܝܼܠܹܗ ܠܵܙܸܡ ܠܵܐ ܝܵܕܥܲܚ. ܐܸܠܵܐ ܗ̇ܝ ܪܘܼܚܵܐ ܡ̣ܢ ܓܸܒܲܢ ܒܸܬ ܡܨܲܠܝܵܐ ܒܬܵܢܲܚܝܵܬܹ̈ܐ ܕܠܹܐ ܐܵܬܝܼ ܠܗܲܡܙܘܼܡܹܐ* ܐܝܼܢܵܐ ܗ̇ܘ ܕܒܵܚܸܪ ܠܸܒܵܘܵܬܹ̈ܐ؛ ܗ̇ܘ ܝܲܕܸܥ ܡܘܼܕܝܼ ܝ݇ܠܵܗ̇ ܚܝܼܵܠ ܕܪܘܼܚܵܐ؛ ܕܐܲܝܟܼ ܪܸܙܵܝܸܗ ܕܐܲܠܵܗܵܐ ܟܹܐ ܨܲܠܝܵܐ ܨܠܘܿܬܵܐ ܡ̣ܢ ܓܸܒܵܐ ܕܩܲܕܝܼܫܹ̈ܐ*
♱♱♱♱♱♱♱♱♱
ܚܲܕܼܒܫܲܒܵܐ ܕܐܲܪܒܥܵܐ ܕܨܵܘܡܵܐ
ܡܬܝ ܟܐ: 23 ‐ ܫܘܠܡܐ
ܐܘܢܓܠܝܘܢ ܩܕܝܫܐ ܕܡܪܢܝܫܘܥ ܡܫܝܚܐ ܟܪܘܙܘܬܼܐ ܕܡܬܝ
♰ ܘܟܲܕ ܐ݇ܬܹܐܠܹܗ ܝܑܼܫܘܿܥ ܠܗܲܝܟܠܵܐ، ܩܘܼܪܒܸܢܗ݇ܘܿܢ ܐܸܠܹܗ ܪ̈ܲܒܲܝ ܟܵܗܢܹ̈ܐ ܘܩܲܫܝܼܫܹ̈ܐ ܕܥܲܡܵܐ: ܟܲܕ ܗ̇ܘ ܡܵܠܘܼܦܹܐ: ܘܐܲܡܪܝܼ ܐܸܠܹܗ: ܒܐܲܝܢܝܼ ܫܘܼܠܛܵܢܵܐ ܐܲܢܹܐ ܒܸܥܒܼܵܕܵܐ ܝܘܸܬ؟ ܘܡܵܢܝܼ ܝܘܼܗ݇ܒܼܸܠܹܗ ܐܸܠܘܼܟܼ ܐܵܗܵܐ ܫܘܼܠܛܵܢܵܐ؟ ܓ̰ܘܼܘܸܒܠܹܗ ܝܑܼܫܘܿܥ ܘܐ݇ܡܸܪܹܗ ܐܸܠܲܝܗܝ: ܐܘܿܦ ܐܵܢܵܐ ܒܸܬ ܒܲܩܪܸܢܵܘܟܼܘܿܢ ܚܕܵܐ ܗܹܡܸܙܡܵܢ: ܘܐܸܢ ܐܲܡܪܝܼܬܘܿܢ ܠܝܼ ܐܘܿܦ ܐܵܢܵܐ ܒܸܬ ܐܲܡܪܸܢ ܐܸܠܵܘܟܼܘܿܢ ܒܐܲܝܢܝܼ ܫܘܼܠܛܵܢܵܐ ܐܲܢܹܐ ܒܸܥܒܼܵܕܵܐ ܝܘܸܢ. ܡܲܥܡܘܿܕܝܼܬܹܗ ܕܝܘܿܚܲܢܵܢ ܡ̣ܢ ܐܲܝܟܵܐ ܝܠܵܗ̇: ܡ̣ܢ ܫܡܲܝܵܐ ܝܲܢ ܡ̣ܢ ܒܢܲܝ̈ܢܵܫܵܐ؟ ܐܝܼܢܵܐ ܐܵܢܝܼ ܬܲܚܡܸܢܝܼ ܗ݇ܘܵܘ ܒܓܵܢܲܝܗܝ ܘܐܲܡܪܝܼ: ܕܐܸܢ ܐܲܡܪܵܚ ܡ̣ܢ ܫܡܲܝܵܐ ܝܠܵܗ̇: ܒܸܬ ܐܵܡܸܪ ܐܸܠܲܢ: ܘܩܵܡܘܿܕܝܼ ܠܵܐ ܗܘܼܡܸܢܵܘܟܼܘܿܢ ܐܸܠܹܗ: ܘܕܐܲܡܪܵܚ ܡ̣ܢ ܒܢܲܝ̈ܢܵܫܵܐ: ܒܸܙܕܵܥܝܵܐ ܝܘܲܚ ܡ̣ܢ ܟܸܢܫܵܐ: ܣܵܒܵܒ ܟܠܲܝܗܝ ܐܲܝܟܼ ܢܒܼܝܼܵܐ ܕܒܼܝܼܩܹܐ ܗ݇ܘܵܘ ܠܝܘܿܚܲܢܵܢ: ܘܓ̰ܘܼܘܸܒܠܗ݇ܘܿܢ ܘܒܹܐܡܵܪܵܐ ܐܸܠܹܗ: ܠܹܐ ܝܲܕܥܵܚ: ܐ݇ܡܸܪܹܗ ܐܸܠܲܝܗܝ ܝܑܼܫܘܿܥ: ܐܵܦ ܠܹܐ ܐܵܢܵܐ ܒܸܬ ܐܲܡܪܸܢ ܐܸܠܵܘܟܼܘܿܢ ܒܐܲܝܢܝܼ ܫܘܼܠܛܵܢܵܐ ܐܲܢܹܐ ܒܸܥܒܼܵܕܵܐ ܝܘܸܢ. ܐܝܼܢܵܐ ܡܘܿܕܝܼ ܒܸܚܫܵܒܼܵܐ ܝܼܬܘܿܢ: ܚܲܕ݇ ܐ݇ܢܵܫܵܐ ܐܝܼܬ ܗ݇ܘܵܐ ܠܹܗ ܬܪܹܝ ܒܢܘܿܢܹ̈ܐ: ܘܩܘܼܪܒܸܢܹܗ ܠܘܵܬ ܩܲܕ݇ܡܵܝܵܐ ܘܐ݇ܡܸܪܹܗ ܐܸܠܹܗ: ܒܪܘܿܢܝܼ: ܙܹܠ݇ ܐܸܕܝܘܿܡ ܦܠܘܿܚ ܓܵܘ ܟܲܪܡܵܐ. ܐܝܼܢܵܐ ܗ̇ܘ ܓ̰ܘܼܘܸܒܠܹܗ ܘܐ݇ܡܸܪܹܗ: ܠܹܐ ܒܲܣܡܵܐ ܠܝܼ. ܐܝܼܢܵܐ ܒܚܲܪܬܵܐ ܦܫܸܡܠܹܗ ܘܐ݇ܙܸܠܹܗ. ܘܩܘܼܪܒܸܢܹܗ ܠܘܵܬ ܗ̇ܘ ܐ݇ܚܹܪ݇ܢܵܐ ܘܐ݇ܡܸܪܹܗ ܐܸܠܹܗ ܗܲܪ ܗܲܕܟܼܵܐ: ܐܝܼܢܵܐ ܗ̇ܘ ܓ̰ܘܼܘܸܒܠܹܗ ܘܐ݇ܡܸܪܹܗ ܗܹܐ ܡܵܪܝܼ: ܘܠܵܐ ܐ݇ܙܸܠܹܗ: ܡܵܢܝܼ ܡ̣ܢ ܐܲܢܹܐ ܬܪܹܝ ܥܒܼܸܕܠܹܗ ܨܸܒܼܝܵܢܵܐ ܕܒܵܒܘܼܗܝ؟ ܐܵܡܪܝܼ ܐܸܠܹܗ ܗ̇ܘ ܩܲܕ݇ܡܵܝܵܐ: ܐܵܡܸܪ ܐܸܠܲܝܗܝ ܝܑܼܫܘܿܥ: ܬܪܘܿܨܵܐ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ: ܕܡܲܟܼܣܹ̈ܐ ܘܙܲܢ̈ܝܵܬܹܐ ܒܸܩܕܵܡܵܘܟܼܘܿܢ ܝܢܵܐ ܠܡܲܠܟܘܼܬܵܐ ܕܐܲܠܵܗܵܐ: ܣܵܒܵܒ ܐ݇ܬܹܐܠܹܗ ܠܘܵܬܵܘܟܼܘܿܢ ܝܘܿܚܲܢܵܢ ܒܐܘܼܪܚܵܐ ܕܟܹܐܢܘܼܬܵܐ، ܘܠܵܐ ܗܘܼܡܸܢܵܘܟܼܘܿܢ ܐܸܠܹܗ: ܐܝܼܢܵܐ ܡܲܟܼܣܹ̈ܐ ܘܙܲܢ̈ܝܵܬܹܐ ܗܘܼܡܸܢܗ݇ܘܿܢ ܐܸܠܹܗ. ܐܝܼܢܵܐ ܐܲܚܬܘܿܢ ܐܵܦ ܟܲܕ ܚܙܹܐܠܵܘܟܼܘܿܢ ܠܵܐ ܦܫܸܡܠܵܘܟܼܘܿܢ ܒܚܲܪܬܵܐ ܕܗܲܡܸܢܝܼܬܘܿܢ ܗ݇ܘܵܘ ܐܸܠܹܗ. ܫܡܸܥܡܘܿܢ ܡܲܬܠܵܐ ܐ݇ܚܹܪ݇ܢܵܐ: ܐܝܼܬ ܗ݇ܘܵܐ ܚܲܕ݇ ܐ݇ܢܵܫܵܐ ܡܵܪܵܐ ܕܒܲܝܬܵܐ: ܢܨܝܼܒܼܠܹܗ ܟܲܪܡܵܐ ܘܚܘܼܪܕܹܐ ܠܹܗ ܒܝܲܕ ܣܝܵܓܼܵܐ ܘܚܦܸܪܹܗ ܓܵܘܹܗ ܡܲܥܨܲܪܬܵܐ: ܘܒܢܹܐܠܹܗ ܓܵܘܹܗ ܒܘܼܪܓ̰ܵܐ: ܘܡܘܼܕܒܼܸܩܠܹܗ ܠܦܲܠܵܚܹ̈ܐ ܘܐ݇ܙܸܠܹܗ ܒܣܵܦܵܪ. ܐܝܼܢܵܐ ܟܲܕ ܡܛܹܐ ܠܵܗ̇ ܥܸܕܵܢܵܐ ܕܛܥܘܿܢ̈ܝܵܬܹܐ: ܫܘܼܕܸܪܹܗ ܠܪܹ̈ܓܵܘܵܬܘܼܗܝ ܠܘܵܬ ܦܵܠܵܚܹ̈ܐ ܕܫܲܕܪܝܼܠܹܗ ܡ̣ܢ ܛܥܘܿܢ̈ܝܵܬܹܐ ܕܟܲܪܡܹܗ: ܘܕܒܼܸܩܠܗܘܿܢ ܦܵܠܵܚܹ̈ܐ ܠܪܹ̈ܓܵܘܵܬܘܼܗܝ: ܐܝܼܬ ܕܡܚܹܐܠܗ݇ܘܿܢ ܐܸܠܹܗ، ܘܐܝܼܬ ܕܪܓ̰ܸܡܠܗ݇ܘܿܢ، ܘܐܝܼܬ ܕܩܛܸܠܗ݇ܘܿܢ: ܘܡܸܢ݇ܕܪܹܫ݇ ܫܘܼܕܸܪܹܗ ܪܹ̈ܓܵܘܵܬܹ̈ܐ ܐ݇ܚܹܪ̈݇ܢܹܐ ܕܒܘܼܫ ܪܵܒܵܐ ܡ̣ܢ ܩܲܕ݇ܡܵܝܹ̈ܐ: ܘܗܲܪ ܗܲܕܟܼܵܐ ܥܒܼܸܕܠܗ݇ܘܿܢ ܐܸܠܲܝܗܝ: ܐܝܼܢܵܐ ܐ݇ܚܵܪܵܝܬܵܐ ܫܘܼܕܸܪܹܗ ܠܘܵܬܲܝܗܝ ܠܒܪܘܿܢܹܗ ܟܲܕ ܒܹܐܡܵܪܵܐ: ܒܲܠܟܵܐ ܢܲܚܦܝܼ ܡ̣ܢ ܒܪܘܿܢܝܼ: ܐܝܼܢܵܐ ܦܵܠܵܚܹ̈ܐ ܟܲܕ ܚܙܹܐܠܗ݇ܘܿܢ ܠܒܪܘܿܢܵܐ: ܐ݇ܡܸܪܗ݇ܘܿܢ ܒܲܝܢܵܬܲܝܗܝ: ܐܵܗܵܐ ܝܠܹܗ ܝܵܪܘܼܬܵܐ ܐ݇ܬܹܐܡܘܿܢ ܩܲܛܠܵܚܠܹܗ ܘܫܲܩܠܵܚ ܝܲܪܬܘܼܬܹܗ: ܘܕܒܼܸܩܠܗ݇ܘܿܢ ܦܘܼܠܸܛܠܗ݇ܘܿܢ ܐܸܠܹܗ ܠܒܼܲܕܲܪ ܡ̣ܢ ܟܲܪܡܵܐ ܘܩܛܸܠܗ݇ܘܿܢ ܐܸܠܹܗ: ܗܲܕܟܼܵܐ ܐܝܼܡܵܢ ܕܐܵܬܹܐ ܡܵܪܵܐ ܕܟܲܪܡܵܐ: ܡܘܼܕܝܼ ܒܸܬ ܥܵܒܼܸܕ ܠܐܵܢܝܼ ܦܵܠܵܚܹ̈ܐ؟ ܐܵܡܪܝܼ ܐܸܠܹܗ: ܕܚܸܪܒܵܐ ܒܸܬ ܛܵܠܸܩܠܗ݇ܘܿܢ: ܘܟܲܪܡܵܐ ܒܸܬ ܡܲܕܒܼܸܩ ܠܦܵܠܵܚܹܐ ܐ݇ܚܹܪ̈݇ܢܹܐ: ܐܲܝܢܝܼ ܕܝܲܗ݇ܒܼܝܼܠܹܗ ܛܥܘܿܢ̈ܝܵܬܹܐ ܒܥܸܕܵܢܲܝܗܝ: ܐܵܡܸܪ ܐܸܠܲܝܗܝ ܝܑܼܫܘܿܥ: ܡ̣ܢ ܩܲܕ݇ܡܵܝܬܵܐ ܠܵܐ ܩܪܹܐܠܵܘܟܼܘܿܢ ܓܵܘ ܟܬܵܒܼܵܐ: ܕܟܹܐܦܵܐ ܕܡܘܼܣܠܹܐ ܠܗ݇ܘܿܢ ܒܲܢܵܝܹ̈ܐ: ܗ̇ܝ ܗ݇ܘܹܐܠܵܗ̇ ܠܪܹܫܵܐ ܕܙܵܘܝܼܬܵܐ: ܡ̣ܢ ܠܘܵܬ ܡܵܪܝܵܐ ܗ݇ܘܹܐܠܵܗ̇ ܐܵܗܵܐ: ܘܝܼܠܵܗ̇ ܥܵܓ̰ܝܼܒܘܼܬܵܐ ܒܥܲܝܢܲܝ̈ܢ. ܒܘܼܬ ܐܵܗܵܐ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ: ܕܒܸܬ ܦܲܝܫܵܐ ܫܩܝܼܠܬܵܐ ܡܸܢܵܘܟܼܘܿܢ ܡܲܠܟܘܼܬܵܐ ܕܐܲܠܵܗܵܐ: ܘܒܸܬ ܦܲܝܫܵܐ ܝܘܼܗ݇ܒܼܸܠܬܵܐ ܠܥܲܡܵܐ ܕܥܵܒܼܸܕ ܛܥܘܿܢ̈ܝܵܬܹܐ: ܘܡܵܢ ܕܢܵܦܸܠ ܥܲܠ ܕܐܵܗܵܐ ܟܹܐܦܵܐ: ܒܸܬ ܦܵܐܸܫ ܛܘܼܚܛܸܚܵܐ: ܘܟܠ ܡ̇ܢ ܕܗ̇ܝ ܢܲܦܠܵܐ ܥܲܠܘܼܗܝ ܒܸܬ ܕܲܪܝܵܐ ܠܹܗ. ܘܟܲܕ ܫܡܸܥܠܗ݇ܘܿܢ ܪ̈ܲܒܲܝ ܟܵܗܢܹ̈ܐ ܘܦܪ̈ܝܼܫܹܐ ܡܲܬܠܘܼ̈ܗܝ: ܝܕܸܥܠܗ݇ܘܿܢ ܕܥܲܠܲܝܗܝ ܐ݇ܡܸܪܹܗ: ܘܒܥܹܐܠܗ݇ܘܿܢ ܠܕܒܼܵܩܹܗ: ܘܙܕܸܥܠܗَܘܿܢ ܡ̣ܢ ܟܸܢܫܵܐ: ܣܵܒܵܒ ܕܐܲܝܟܼ ܕܠܢܒܼܝܼܵܐ ܕܒܼܝܼܩܹܐ ܗ݇ܘܵܘ ܐܸܠܹܗ.
♱♱♱♱♱♱♱♱♱