ܚܲܕܼܒܫܲܒܵܐ ܩܲܕܼܡܵܝܵܐ ܕܲܨܠܝܼܒ̣ܵܐ
ܘܕܲܐܪܒܥܵܐ ܗ݇ܘܼ ܕܐܹܠܝܼܵܐ
ܬܸܢܝܵܢ ܢܵܡܘܿܣܵܐ ܚ؛ 11‐ܫܘܼܠܵܡܵܐ
ܬܸܒ̣ܘ ܘܲܫܠܵܘ ܬܸܢܝܵܢ ܢܵܡܘܿܣܵܐ ܣܸܦܪܵܐ ܕܚܲܡܫܵܐ ܕܐܘܿܪܵܝܬܵܐ؛
ܐܲܚܲܝ̈ ܒܲܪܸܟ̣ܡܵܪܝ܀
ܘܐ݇ܡܸܪܹܗ ܡܘܼܫܹܐ ܠܟܠܹܗ ܝܼܣܪܵܝܹܠ؛ ܗܘܝܼ ܗܸܫܝܲܪ ܕܠܵܐ ܗܵܘܝܵܐ ܕܡܲܢܫܸܬ̇ ܠܡܵܪܝܵܐ ܐܲܠܵܗܘܼܟܼ. ܐܸܠܵܐ ܢܛܘܿܪ ܦܘܼܩܕܵܢ̈ܘܼܗܝ؛ ܘܕܝܼܘܵܢ̈ܘܼܗܝ؛ ܘܢܵܡܘܿܣ̈ܘܼܗܝ ܕܒܸܦܩܵܕܵܐ ܝ݇ܘܸܢ ܐܸܠܘܼܟܼ ܐܸܕܝܘܿܡ݇ ܝܵܘܡܵܐ܀ ܕܠܵܐ ܟܲܕ ܐܵܟ̣ܠܸܬ̇ ܘܣܵܒ̣ܥܸܬ̇؛ ܘܒܵܬܹ̈ܐ ܫܲܦܝܼܪܹ̈ܐ ܒܵܢܸܬ̇ ܘܝܵܬܒ̣ܸܬ̇؛ ܘܥܸܪ̈ܒܘܼܟܼ ܘܬܵܘܪ̈ܘܼܟܼ ܙܵܝܕܝܼ؛ ܘܣܹܐܡܵܐ ܘܕܲܗܒ̣ܵܐ ܗܵܘܹܐܠܘܼܟܼ ܪܵܒܵܐ؛ ܘܟܠ ܡܸܢܕܝܼ ܕܐܝܼܬܠܘܼܟܼ ܙܵܝܸܕ؛ ܘܐܵܣܸܩ ܫܘܼܒ̣ܗܵܪܵܐ ܒܠܸܒܘܼܟܼ؛ ܘܡܲܢܫܸܬ̇ ܠܡܵܪܝܵܐ ܐܲܠܵܗܘܼܟܼ ܕܦܘܼܠܛܸܬ̇ܠܹܗ ܡ̣ܢ ܐܲܪܥܵܐ ܕܡܸܨܪܹܝܢ ܡ̣ܢ ܒܹܝܬ̣ ܪܹܓܘܼܬܵܐ܀ ܘܠܘܼܒܠܸܬܠܹܗ ܒܒܲܪܝܼܵܐ ܓܘܼܪܵܐ ܘܡܲܙܕܸܥܝܵܢܵܐ؛ ܒܗ̇ܝ ܕܘܼܟܬܵܐ ܕܐܝܼܬ ܚܘܼܵܘܵܬܹ̈ܐ ܚܲܪ̈ܡܵܢܹܐ [ܬܲܢܝܼܢܹ̈ܐ ܩܵܠܛܘܿܠܹ̈ܐ] ܘܥܲܩܸܪ̈ܒ̣ܹܐ. ܒܗ̇ܝ ܕܘܼܟܬܵܐ ܕܠܲܝܬ̇ ܡܝܼܵܐ. ܦܘܼܠܸܛܠܹܗ ܐܸܠܘܼܟܼ ܡܝܼܵܐ ܡ̣ܢ ܟܹܐܦܵܐ ܕܣܲܡܛܵܐ܀ ܘܡܘܼܟ̣ܠܸܬܠܹܗ ܡܲܢܢܵܐ ܓܵܘ ܒܲܪܝܼܵܐ ܕܠܵܐ ܝ݇ܕܝܼܥܠܗ݇ܘܿܢ ܒܵܒܵܘܵܬ̈ܘܼܟܼ؛ ܕܡܲܟܸܦܠܘܼܟܼ ܘܓ̰ܵܪܸܒܠܘܼܟܼ؛ ܘܗܵܘܝܵܐ ܛܵܒ̣ܬܵܐ ܐܸܠܘܼܟܼ ܒܚܲܪܬܵܐ܀ ܘܒܸܬ ܐܵܡܪܸܬ̇ ܒܠܸܒܘܼܟܼ؛ ܒܚܲܝܠܝܼ ܘܒܙܲܪܒ ܕܐܝܼܕ̈ܝܼ ܩܢܹܐܠܝܼ ܐܵܗܵܐ ܕܵܘܸܠܬܵܐ܀ ܕܟ̣ܘܿܪ ܠܡܵܪܝܵܐ ܐܲܠܵܗܘܼܟܼ ܕܗ̇ܘ ܝܼܠܹܗ ܕܝܘܼܗ݇ܒ̣ܸܠܹܗ ܐܸܠܘܼܟܼ ܚܲܝܠܵܐ ܕܩܵܢܸܬ̇ ܐܲܢܹܐ ܢܸܟ̣ܣܹ̈ܐ [ܡܵܠܹ̈ܐ]. ܕܡܲܩܸܡ ܩܵܘܠܹܗ ܕܝ݇ܡܹܐܠܹܗ ܠܒܵܒܵܘܵܬ̈ܘܼܟܼ ܐܲܝܟܼ ܕܐܸܕܝܘܿܡ݇ ܝܵܘܡܵܐ܀ ܘܐܸܢ ܡܲܢܫܸܬ̇ ܠܡܵܪܝܵܐ ܐܲܠܵܗܘܼܟܼ؛ ܘܐܵܙܸܠ݇ܬ̇ ܒܵܬ݇ܪ ܐܲܠܵܗܹ̈ܐ ܐ݇ܚܹܪ̈݇ܢܹܐ؛ ܘܦܵܠܚܸܬ̇ ܠܗ݇ܘܿܢ ܘܣܵܓ̣ܕܸܬ̇ ܠܗ݇ܘܿܢ؛ ܡܲܚܒܘܼܪܵܘܟ̣ܘܿܢ ܝܼܘܸܢ ܐܸܕܝܘܿܡ݇ ܝܵܘܡܵܐ؛ ܕܬܠܵܩܵܐ ܒܸܬ ܬܵܠܩܝܼܬܘܿܢ܀ ܐܲܝܟܼ ܛܵܝܸܦܹ̈ܐ ܕܬܘܼܠܸܩܠܹܗ ܡܵܪܝܵܐ ܡ̣ܢ ܩܵܕ݇ܡܵܘܟ̣ܘܿܢ. ܗܵܕܟ̣ܵܐ ܒܸܬ ܬܵܠܩܝܼܬܘܿܢ. ܐܸܢ ܠܵܐ ܫܵܡܥܝܼܬܘܿܢ ܒܩܵܠܹܗ ܕܡܵܪܝܵܐ ܐܲܠܵܗܵܘܟ̣ܘܿܢ܀
ܚܲܒ̣ܪܹܗ
ܐܹܫܲܥܝܵܐ ܠܓ؛ 13‐ܫܘܼܠܵܡܵܐ
ܫܠܵܘ ܢܒ̣ܝܼܘܼܬܹܗ ܕܐܹܫܲܥܝܵܐ؛ ܐܲܚܲܝ̈ ܒܲܪܸܟ̣ܡܵܪܝ܀
ܗܵܕܟ̣ܵܐ ܒܹܐܡܵܪܵܐ ܡܵܪܝܵܐ؛ ܐܵܢܝܼ ܕܝܼܢܵܐ ܪܸܚܩܵܐ ܫܡܸܥܡܘܿܢ ܡܸܢܕܝܼ ܕܥܒ̣ܸܕܠܝܼ؛ ܘܐܵܢܝܼ ܕܝܼܢܵܐ ܩܘܼܪܒܵܐ ܝ݇ܕܸܥܡܘܿܢ ܓܲܢ݇ܒܵܪܘܼܬܝܼ܀ ܙܕܝܼܥܠܗ݇ܘܿܢ ܚܲܛܵܝܹ̈ܐ ܒܨܸܗܝܘܿܢ؛ ܘܪܲܬܪܲܬܵܐ ܢܦܸܠܵܗ̇ ܒܚܲܢܦܹ̈ܐ. ܡܵܢܝܼ ܡܵܨܹܐ ܥܵܡܸܪ ܥܲܡ ܢܘܼܪܵܐ ܐܵܟ̣ܠܵܢܬܵܐ؟ ܘܡܵܢܝܼ ܒܸܬ ܥܵܡܸܪ ܥܲܡ ܡܲܩܕܵܢܬܵܐ ܐܵܒܵܕܝܼܢܵܝܬܵܐ؟܀ ܗ̇ܘ ܕܚܵܕܸܪ ܒܙܲܕܝܼܩܘܼܬܵܐ؛ ܘܗܲܡܙܸܡ ܬܪܘܼܨܘܼܬܵܐ؛ ܘܣܵܢܹܐ ܦܸܟ̰ܠܵܐ ܘܙܠܘܼܡܝܵܐ؛ ܘܢܵܦܸܨ ܐܝܼܕܹܗ ܡ̣ܢ ܫܩܵܠܬܵܐ ܕܪܸܫܘܲܬ؛ ܕܵܒ̣ܸܩ ܢܵܬܝܵܬܹ̈ܗ ܕܠܵܐ ܫܵܡܸܥ؛ ܘܥܵܟ̰ܸܡ ܥܲܝܢ̈ܘܼܗܝ ܕܠܵܐ ܚܵܙܹܐ ܒܝܼܫܬܵܐ؛ ܐܵܗܵܐ ܒܸܬ ܥܵܡܸܪ ܓܵܘ ܫܡܲܝܵܐ؛ ܕܘܼܟܬܵܐ ܕܫܪܵܝܬܹܗ ܓܵܘ ܩܵܝܵܐ ܓܘܼܪܵܐ؛ ܠܲܚܡܹܗ ܦܝܼܫܵܐ ܝ݇ܠܹܗ ܝܘܼܗ݇ܒ̣ܵܐ؛ ܘܡܝܼܘܼܗܝ ܗܵܙܸܪ ܝܼܢܵܐ܀ ܠܡܲܠܟܵܐ ܒܫܘܼܦܪܹܗ ܒܸܬ ܚܵܙܝܼ ܥܲܝܢ̈ܘܼܟܼ ܓܵܘ ܐܲܪ̈ܥܵܬܹܐ ܪܸܚܩܵܐ؛ ܘܠܸܒܘܼܟܼ ܒܸܬ ܝܵܠܸܦ ܙܕܘܿܥܬܵܐ܀ ܐܲܝܟܵܐ ܝ݇ܠܹܗ ܣܵܦܪܵܐ؛ ܐܲܝܟܵܐ ܝ݇ܠܹܗ ܬܵܩܠܵܢܵܐ؛ ܐܲܝܟܵܐ ܝ݇ܠܹܗ ܚܲܫܒܸܢܵܢܵܐ ܕܒܘܼܪ̈ܓ̰ܹܐ ܠܛܵܝܸܦܵܐ ܓܘܼܪܵܐ؟܀ ܠܹܐ ܓܵܫܸܩ ܠܛܵܝܸܦܵܐ ܫܡܲܥܝܬܹܗ ܥܲܣܩܵܐ ܘܠܹܫܵܢܹܗ ܦܸܠܬܸܟ ܘܠܹܐ ܦܲܪܡܹܐ܀ ܚܙܝܼ ܠܨܸܗܝܘܿܢ ܡܕܝܼܢ݇ܬܵܐ ܕܥܹܐܕܵܘ̈ܵܬܲܢ. ܘܥܲܝܢ̈ܘܼܟܼ ܒܸܬ ܚܵܝܪܝܼ ܒܐܘܿܪܸܫܠܸܡ ܒܲܝܬܵܐ ܥܲܬܝܼܪܵܐ؛ ܘܡܲܫܟܢܵܐ ܕܠܹܐ ܫܵܥܸܫ؛ ܘܠܹܐ ܦܵܝܫܝܼ ܥܩܝܼܪܹ̈ܐ ܣܸܟܵܟ̈ܘܼܗܝ ܗܲܠ ܥܵܠܲܡ؛ ܘܟܠܲܝܗܝ ܚܲܒ̣ܠ̈ܘܼܗܝ ܠܹܐ ܦܵܝܫܝܼ ܩܸܛܥܝܹܐ܀ ܣܵܒܵܒ ܕܡܵܪܝܵܐ ܫܸܡܵܐ ܝ݇ܠܹܗ ܚܩܝܼܪܵܐ ܩܵܬܲܢ؛ ܘܗ̇ܘ ܒܸܬ ܗܵܘܹܐ ܩܵܐ ܕܝܼܲܢ ܕܘܼܟܬܵܐ ܒܲܗܪܵܢܬܵܐ؛ ܒܲܗܪܵܐ ܘܪܘܝܼܚܘܼܬܵܐ ܕܕܘܼܟܬܵܐ؛ ܒܗ̇ܝ ܕܘܼܟܬܵܐ ܕܠܹܐ ܗܵܟܡܵܐ ܡܵܪܘܼܬܵܐ ܕܫܲܠܝܼܛܵܐ؛ ܘܚܲܝܠܵܢܵܐ ܕܦܵܐܹܫ ܡܘܼܫ݇ܟ̰ܚܵܐ ܠܹܐ ܥܵܒ̣ܸܪ ܓܵܘܵܗ̇܀ ܣܵܒܵܒ ܕܡܵܪܝܵܐ ܝ݇ܠܹܗ ܕܲܝܵܢܵܐ؛ ܘܡܵܪܝܵܐ ܝ݇ܠܹܗ ܡܲܕܥܝܵܢܵܐ؛ ܘܡܵܪܝܵܐ ܝ݇ܠܹܗ ܡܲܠܟܲܢ؛ ܘܗܲܪ ܗ̇ܘ ܝܼܠܹܗ ܦܵܪܘܿܩܲܢ܀ ܚܲܒ̣ܠܵܟ̣̈ܝ ܕܠܹܐ ܗ݇ܘܵܘ ܩܘܼܝܹܐ؛ ܦܸܫܠܗ݇ܘܿܢ ܫܸܪܝܹܐ؛ ܐ݇ܣܛܘܼܢܵܟ̣̈ܝ ܕܠܹܐ ܗ݇ܘܵܘ ܡܘܼܪܡܹܐ ܐܵܬ̤ܵܐ؛ ܦܸܫܠܗ݇ܘܿܢ ܡܘܼܟܸܦܹܐ؛ ܗܲܠ ܕܦܘܼܠܹܓ̣݇ܠܗ݇ܘܿܢ ܣܠܵܒܵܐ. ܪܵܒܵܐ ܣܲܩܲܬܹ̈ܐ ܣܠܸܒܠܗ݇ܘܿܢ ܣܠܵܒܵܐ܀ ܘܠܹܐ ܐܵܡܸܪ ܥܵܡܪܵܢܵܐ ܕܡܸܪܥܝܵܐ ܝ݇ܘܸܢ؛ ܛܵܝܸܦܵܐ ܝܵܬܒ̣ܵܢܵܐ ܓܵܘܵܗ̇ ܩܘܼܒܸܠܹܗ ܬܲܢܒܵܐ܀
♱♱♱♱♱♱♱♱♱
ܚܲܕ݇ܒܫܹܒܵܐ ܐ ܕܨܠܝܼܒܼܵܐ ܕ ܕܐܹܠܝܼܵܐ
ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ
ܕܲܠܘܵܬܼ ܦܝܼܠܝܼܦܸܣܵܝܹ̈ܐ ܐܲܚܲܝ̈ ܒܲܪܸܟܼܡܵܪܝ܀
ܐܲܝܟܼ ܕܚܵܫܚܵܐ ܠܡܲܫܚܲܕܬܹܗ ܕܡܫܝܼܚܵܐ ܦܵܝܫܝܼܬܘܿܢ ܬܘܼܓܒܸܪܹܐ؛ ܕܐܸܢ ܐܵܬܸܢ ܚܵܙܸܢܵܘܟܼܘܿܢ ܝܲܢ ܟܲܕ ܪܸܚܩܵܐ ܝ݇ܘܸܢ ܫܵܡܥܸܢ ܒܘܼܬ ܕܝܼܵܘܟܼܘܿܢ ܕܒܸܟܠܵܝܵܐ ܝ݇ܬܘܿܢ ܒܚܕܵܐ ܪܘܼܚܵܐ. ܘܒܚܕܵܐ ܓܵܢܵܐ ܡܲܢܬܘܼܝܹܐ ܝ݇ܬܘܿܢ ܒܗܲܝܡܵܢܘܼܬܵܐ ܕܐܹܘܲܢܓܵܠܝܼܘܿܢ* ܘܒܗܸܟ̃ ܡܸܢܕܝܼ ܠܹܐ ܝ݇ܬܘܿܢ ܒܸܫܥܵܫܵܐ ܡ̣ܢ ܕܐܵܢܝܼ ܕܒܸܩܝܵܡܵܐ ܝ݇ܢܵܐ ܕܲܪܩܘܼܒܼܠܲܢ ܩܵܐ ܡܲܚܙܵܝܬܵܐ ܠܬܠܵܩܵܐ ܕܐܵܢܝܼ ܘܠܚܲܝܹ̈ܐ ܕܝܼܵܘܟܼܘܿܢ. ܘܐܵܗܵܐ ܡ̣ܢ ܐܲܠܵܗܵܐ ܦܸܫܠܵܗ̇ ܝܘܼܗ݇ܒܼܸܠܬܵܐ ܩܵܬܵܘܟܼܘܿܢ* ܕܠܵܐ ܡܗܲܝܡܘܼܢܹܐ ܐܲܚܟ̰ܝܼ ܗܼܲܡܸܢܝܼܬܘܿܢ ܒܡܫܝܼܚܵܐ. ܐܝܼܢܵܐ ܐܘܼܦ ܡ̣ܢ ܓܹܒܹܗ ܩܵܒܠܝܼܬܘܿܢ ܚܲܫܵܐ* ܘܚܵܡܠܝܼܬܘܿܢ ܐܵܓܼܘܿܢܵܐ ܗ̇ܘ ܕܚܙܹܐ ܠܵܘܟܼܘܿܢ ܒܝܼܝܼ ܘܐܵܕܝܼܵܐ ܒܸܫܡܲܥܝܵܐ ܝ݇ܬܘܿܢ ܒܘܼܬ ܕܝܼܝܼ* ܗܲܕܟܼܵܐ ܐܸܢ ܐܝܼܬܠܵܘܟܼܘܿܢ ܝܵܗܒܼܵܠܬܵܐ ܕܠܸܒܵܐ ܒܡܫܝܼܚܵܐ ܝܲܢ ܡܠܵܝܬܵܐ ܒܠܸܒܵܐ ܒܚܘܼܒܵܐ؛ ܘܐܹܢ ܫܵܪܝܼܟܘܼܬܵܐ ܕܪܘܼܚܵܐ ܘܐܸܢ ܪܲܦܪܲܦܬܵܐ ܘܪ̈ܲܚܡܹܐ* ܬܲܡܸܡܘܿܢ ܚܲܕܘܼܬܝܼ ܕܚܲܕ݇ ܚܝܼܵܠ ܗܵܘܹܐ ܠܵܘܟܼܘܿܢ ܘܚܲܕ݇ ܚܘܼܒܵܐ ܘܚܕܵܐ ܓܵܢܵܐ ܘܚܲܕ݇ ܚܘܼܫܵܒܼܵܐ* ܘܗܸܟ̃ ܡܸܢܕܝܼ ܒܡܲܩܪܵܨܘܼܬܵܐ ܝܲܢ ܒܚܸܩܪܵܐ ܒܵܛܝܼܠܵܐ ܠܵܐ ܥܵܒܼܕܝܼܬܘܿܢ؛ ܐܸܠܵܐ ܒܡܲܟܝܼܟܼܘܼܬܵܐ ܕܚܝܼܵܠ ܟܠ ܐ݇ܢܵܫܵܐ ܩܵܐ ܚܲܒܼܪܹܗ ܐܲܝܟܼ ܒܘܼܫ ܨܦܵܝ ܡܸܢܹܗ ܚܵܫܒܸܢ. ܘܗܸܟ̃ ܐ݇ܢܵܫܵܐ ܠܵܐ ܐܵܟܼܸܠ ܚܲܡ ܕܓܵܢܹܗ ܐܲܚܟ̰ܝܼ؛ ܐܸܠܵܐ ܟܠ ܐ݇ܢܵܫܵܐ ܐܘܼܦ ܕܚܲܒܼܪܹܗ* ܘܐܵܗܵܐ ܚܫܘܿܒܼܘܿܢ ܒܓܵܢܵܘܟܼܘܿܢ ܗ̇ܝ ܕܐܘܼܦ ܝܼܫܘܿܥ ܡܫܝܼܚܵܐ* ܗ̇ܘ ܕܟܲܕ ܝܼܗܘܼܵܐ ܒܕܵܡܵܝܬܵܐ ܕܐܲܠܵܗܵܐ. ܐܵܗܵܐ ܠܵܐ ܚܘܼܫܒܸܢܵܐ ܠܹܗ ܓܸܢܵܒܼܘܼܬܵܐ ܕܝܼܠܹܗ ܨܲܠܡܵܐ ܕܐܲܠܵܗܵܐ. ܐܸܠܵܐ ܓܵܢܹܗ ܡܘܼܒܨܸܪܹܗ ܘܕܵܡܵܝܬܵܐ ܕܪܹܓܵܐ ܫܩܸܠܹܗ؛ ܘܗܘܹܐ ܠܹܗ ܒܕܵܡܵܝܬܵܐ ܕܒܢܲܝ̈ܢܵܫܵܐ؛ ܘܦܸܫܠܹܗ ܡܘܼܫ̄ܟ̰ܚܵܐ ܒܐܸܣܟܹܝܡܵܐ ܐܲܝܟܼ ܒܲܪܢܵܫܵܐ* ܘܡܘܼܡܟܸܟܼܠܹܗ ܓܵܢܹܗ ܘܡܘܼܨܝܸܬܠܹܗ ܗܲܠ ܡܵܘܬܵܐ. ܐܘܼܦ ܗ̇ܘ ܡܵܘܬܵܐ ܕܙܩܝܼܦܵܐ* ܒܘܼܬ ܕܐܵܗܵܐ ܐܘܼܦ ܐܲܠܵܗܵܐ ܪܵܒܵܐ ܡܘܼܪܸܡܠܹܗ ܘܝܘܼܗܒܼܸܠܹܗ ܐܸܠܹܗ ܫܸܡܵܐ ܕܒܘܼܫ ܨܦܵܝ ܡ̣ܢ ܟܠܲܝܗܝ ܫܸܡܵܢܹ̈ܐ* ܕܒܫܸܡܹܗ ܕܝܼܫܘܿܥ ܟܠ ܒܘܼܪܟܵܐ ܟܵܝܦܵܐ ܕܒܫܡܲܝܵܐ ܘܒܐܲܪܥܵܐ؛ ܘܕܐܸܠܬܸܚܬ ܡ̣ܢ ܐܲܪܥܵܐ* ܘܟܠ ܠܸܫܵܢܵܐ ܡܵܘܕܸܐ ܕܡܵܪܝܵܐ ܝ݇ܠܹܗ ܝܼܫܘܿܥ ܡܫܝܼܚܵܐ ܠܚܸܩܪܵܐ ܕܐܲܠܵܗܵܐ ܒܵܒܹܗ*
♱♱♱♱♱♱♱♱♱
ܚܲܕܼܒܫܲܒܵܐ ܩܲܕܼܡܵܝܵܐ ܕܲܨܠܝܼܒ̣ܵܐ
ܘܕܲܐܪܒܥܵܐ ܗ݇ܘܼ ܕܐܹܠܝܼܵܐ
(ܚܕܒܫܒܐ ܕܒܬܼܪ ܫܟܼܚܬܐ)
ܡܬܝ ܕ: 12 ‐ ܗ: 17
ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ ܟܪܘܙܘܬܼܐ ܕܡܬܝ
♰ ܐܝܼܢܵܐ ܟܲܕ ܫܡܸܥܠܹܗ ܝܑܼܫܘܿܥ ܕܝܘܿܚܲܢܵܢ ܦܸܫܠܹܗ ܣܘܼܦܝܵܐ. ܫܘܼܢܹܐܠܹܗ ܠܓܠܝܼܠܵܐ. ܘܫܒܼܝܼܩܵܐܠܹܗ ܠܢܵܨܪܲܬ. ܘܐ݇ܬܹܐܠܹܗ ܥܡܸܪܹܗ ܒܟܦܲܪܢܵܚܘܿܡ. ܥܲܠ ܡܲܪܙܵܐ ܕܝܵܡܵܐ، ܒܬܸܚܘܼܒܵܐ ܕܙܒܼܘܿܠܘܿܢ ܘܕܢܲܦ̮ܬܵܠܝܼ. ܕܦܵܐܸܫ ܬܘܼܡܸܡܵܐ ܡܸܢܕܝܼ ܕܦܸܫܠܹܗ ܐ݇ܡܝܼܪܵܐ ܒܝܲܕ ܐܹܫܲܥܝܵܐ ܢܒܼܝܼܵܐ ܕܐ݇ܡܸܪܹܗ: ܐܲܪܥܵܐ ܕܙܒܼܘܿܠܘܿܢ ܐܲܪܥܵܐ ܕܢܲܦ̮ܬܵܠܝܼ. ܐܘܼܪܚܵܐ ܕܝܵܡܵܐ، ܥܸܒ̣ܪܹ̈ܐ ܕܝܘܿܪܕܢܲܢ، ܓܠܝܼܠܵܐ ܕܥܲܡܡܹ̈ܐ. ܥܲܡܵܐ ܕܒܸܬܝܵܒܼܵܐ ܒܚܸܫܟܵܐ ܢܘܼܗܪܵܐ ܪܲܒܵܐ ܚܙܹܐܠܹܗ، ܘܐܲܝܢܝܼ ܕܒܸܬܝܵܒܼܵܐ ܒܐܲܬܪܵܐ ܘܒܛܸܠܵܠܹ̈ܐ ܕܡܵܘܬܵܐ، ܢܘܼܗܪܵܐ ܙܪܸܩܠܹܗ ܐܸܠܲܝܗܝ. ܡ̣ܢ ܗܿܝܓܵܗ ܫܘܼܪܹܐܠܹܗ ܝܑܼܫܘܿܥ ܠܡܲܟܪܘܼܙܹܐ ܘܠܹܐܡܵܪܵܐ: ܬܲܘܸܒܘܿܢ ܣܵܒܵܒ ܩܘܼܪܒܸܢܬܵܐ ܝܠܵܗ̇ ܡܲܠܟܘܼܬܵܐ ܕܫܡܲܝܵܐ. ܘܟܲܕ ܒܸܚܕܵܪܵܐ ܥܲܠ ܡܲܪܙܵܐ ܕܝܵܡܵܐ ܕܓܠܝܼܠܵܐ، ܚܙܹܐܠܹܗ ܬܪܹܝܢ ܐܲܚܘܿܢܘܵܬܹ̈ܐ: ܫܸܡܥܘܿܢ ܕܦܸܫܠܹܗ ܩܸܪܝܵܐ ܟܹܐܦܵܐ، ܘܐܲܢܕܪܹܐܘܿܣ ܐܲܚܘܿܢܹܗ، ܕܒܸܕܪܵܝܵܐ ܓܲܪ̈ܕܹܐ ܒܝܵܡܵܐ، ܣܵܒܵܒ ܨܲܝܵܕܹ̈ܐ ܗ݇ܘܵܘ. ܘܐ݇ܡܸܪܹܗ ܐܸܠܲܝܗܝ ܝܑܼܫܘܿܥ: ܬܹܐܡܘܿܢ ܒܵܬ݇ܪܝܼ. ܘܒܸܬ ܥܲܒܼܕܸܢܵܘܟܼܘܿܢ ܕܗܵܘܹܝܬܘܿܢ ܨܲܝܵܕܹ̈ܐ ܕܒܢܲܝ̈ܢܵܫܵܐ. ܐܝܼܢܵܐ ܐܵܢܝܼ ܒܗ̇ܝ ܥܸܕܵܢܵܐ ܫܒܼܸܩܠܗ݇ܘܿܢ ܓܲܪ̈ܕܲܝܗܝ ܘܐ݇ܙܸܠܗ݇ܘܿܢ ܒܵܬ݇ܪܹܗ. ܘܟܲܕ ܥܒܼܸܪܹܗ ܡ̣ܢ ܬܵܡܵܐ، ܚܙܹܐܠܹܗ ܬܪܹܝܢ ܐܲܚܘܿܢܘܵܬܹ̈ܐ ܐ݇ܚܹܪ̈݇ܢܹܐ: ܝܲܥܩܘܿܒܼ ܒܲܪ ܙܲܒܼܕܲܝ، ܘܝܘܿܚܲܢܵܢ ܐܲܚܘܿܢܹܗ، ܓܵܘ ܓܵܡܝܼ ܥܲܡ ܙܲܒܼܕܲܝ ܒܵܒܲܝܗܝ ܬܵܪܘܿܨܹܐ ܓܲܪ̈ܕܲܝܗܝ. ܘܩܸܪܝܲܝܠܹܗ ܝܑܼܫܘܿܥ. ܐܝܼܢܵܐ ܐܵܢܝܼ ܒܗ̇ܝ ܥܸܕܵܢܵܐ ܫܒܼܸܩܠܗ݇ܘܿܢ ܠܓܵܡܝܼ ܘܠܒܵܒܲܝܗܝ ܘܐ݇ܙܸܠܗ݇ܘܿܢ ܒܵܬ݇ܪܹܗ. ܘܒܸܚܕܵܪܵܐ ܗ݇ܘܵܐ ܝܑܼܫܘܿܥ ܓܵܘ ܟܠܹܗ ܓܠܝܼܠܵܐ ܘܡܵܠܘܼܦܹܐ ܗ݇ܘܵܐ ܓܵܘ ܟܢܘܼܫܝܵܬܲܝ̈ܗܝ ܘܡܲܟܪܘܼܙܹܐ ܤܒ̣ܲܪܬܵܐ ܕܡܲܠܟܘܼܬܵܐ. ܘܒܵܣܘܼܡܹܐ ܟܠ ܟܹܐܒܼܵܐ ܘܡܲܪܥܵܐ ܒܥܲܡܵܐ. ܘܦܸܫܠܹܗ ܫܸܡܥܝܵܐ ܒܵܗ݇ܣܹܗ ܒܟܠܵܗ̇ ܣܘܼܪܝܼܵܐ. ܘܡܘܼܩܪܸܒ̣ܠܗ݇ܘܿܢ ܐܸܠܹܗ ܟܠܲܝܗܝ ܐܲܝܢܝܼ ܕܚܸܪܒܵܐ ܡܸܪܥܝܹܐ ܗ݇ܘܵܘ ܒܡܲܪ̈ܥܹܐ ܡܫܲܚܠܦܹ̈ܐ، ܘܐܲܝܢܝܼ ܕܡܘܼܠܝܸܨܹܐ ܗ݇ܘܵܘ ܒܓ̰ܘܼܢܓ̰ܵܪܹ̈ܐ، ܘܕܲܝܘܵܢܹ̈ܐ. ܘܕܒܲܪ ܐܸܓܵܪܹ̈ܐ، ܘܫܦܝܼܠܹ̈ܐ، ܘܒܘܼܣܡܵܝܠܹܗ. ܘܐ݇ܙܸܠܗ݇ܘܿܢ ܒܵܬ݇ܪܹܗ ܪܵܒܵܐ ܟܸܢܫܹ̈ܐ ܡ̣ܢ ܓܠܝܼܠܵܐ ܘܡ̣ܢ ܥܸܣܪܵܬ ܡܕܝܼ̈ܢܵܬܵܐ ܘܡ̣ܢ ܐܘܿܪܸܫܠܸܡ ܘܡ̣ܢ ܝܼܗܘܼܕ ܘܡ̣ܢ ܥܸܒ̣ܪܵܐ ܕܝܘܿܪܕܢܲܢ. ܐܝܼܢܵܐ ܟܲܕ ܚܙܹܐܠܹܗ ܝܑܼܫܘܿܥ ܠܟܸܢܫܹ̈ܐ ܣܸܠ݇ܩܠܹܗ ܠܛܘܼܪܵܐ، ܘܟܲܕ ܝܬܸܒܼܠܹܗ. ܩܘܼܪܒܸܢܗ݇ܘܿܢ ܠܘܵܬܹܗ ܬܲܠܡܝܼ̈ܕܘܼܗܝ. ܘܦܬܸܚܠܹܗ ܦܘܼܡܹܗ ܘܡܵܠܸܦ ܗ݇ܘܵܐ ܠܗ݇ܘܿܢ ܘܐܵܡܸܪ: ܛܘܼܒܼܵܐ ܠܡܸܣܟܹܢܹ̈ܐ ܒܪܘܼܚܵܐ، ܕܕܝܼܵܠ݇ܝܗܝ ܝܼܠܵܗ̇ ܡܲܠܟܘܼܬܵܐ ܕܫܡܲܝܵܐ. ܛܘܼܒܼܵܐ ܠܥܲܒܼܕܵܢܹ̈ܐ ܕܬܲܥܙܝܼ ܣܵܒܵܒ ܕܐܵܢܝܼ ܒܸܬ ܦܲܝܫܝܼ ܝܘܼܗَܒܼܹܐ ܠܸܒܵܐ، ܛܘܼܒܼܵܐ ܠܡܲܟܝܼܟܼܹ̈ܐ ܕܐܵܢܝܼ ܒܸܬ ܝܵܪܬܝܼ ܐܲܪܥܵܐ. ܛܘܼܒܼܵܐ ܠܐܲܝܢܝܼ ܕܟܵܦܢܝܼ ܘܨܵܗܝܼ ܠܟܹܐܢܘܼܬܵܐ ܕܐܵܢܝܼ ܒܸܬ ܣܲܒܼܥܝܼ. ܛܘܼܒܼܵܐ ܠܡܪ̈ܲܚܡܵܢܹܐ ܕܥܲܠܲܝܗܝ ܒܸܬ ܗܵܘܝܼ ܪ̈ܲܚܡܹܐ. ܛܘܼܒܼܵܐ ܠܐܵܢܝܼ ܕܕܸܟܼܝܹ̈ܐ ܝܢܵܐ ܒܠܸܒܲܝܗܝ ܕܐܵܢܝܼ ܒܸܬ ܚܵܙܝܼ ܠܐܲܠܵܗܵܐ. ܛܘܼܒܼܵܐ ܠܥܲܒܼܕܵܢܹ̈ܐ ܕܫܠܵܡܵܐ ܕܒܢܘܿܢܹ̈ܐ ܕܐܲܠܵܗܵܐ ܒܸܬ ܦܲܝܫܝܼ ܩܸܪܝܹܐ. ܛܘܼܒܼܵܐ ܠܐܲܝܢܝܼ ܕܦܸܫܠܗ݇ܘܿܢ ܪܕܝܼܦܹܐ ܡܸܛܠ ܟܹܐܢܘܼܬܵܐ، ܕܕܝܼܵܠ݇ܝܗܝ ܝܼܠܵܗ̇ ܡܲܠܟܘܼܬܵܐ ܕܫܡܲܝܵܐ. ܛܘܼܒܼܵܐ ܐܸܠܵܘܟܼܘܿܢ ܐܝܼܡܵܢ ܕܠܲܝܡܝܼܠܵܘܟܼܘܿܢ، ܘܪܲܕܦܝܼܠܵܘܟܼܘܿܢ، ܘܐܵܡܪܝܼ ܥܲܠܵܘܟܼܘܿܢ ܟܠ ܗܹܡܸܙܡܵܢ ܒܝܼܫܬܵܐ ܒܣܵܒܵܒ ܕܝܼܠ݇ܝܼ ܒܕܲܓܵܠܘܼܬܵܐ، ܗܵܝܓܵܗ ܚܕܹܝܡܘܿܢ ܘܦܨܘܼܚܘܿܢ ܕܐܲܓܼܪܵܘܟܼܘܿܢ ܙܸܕܠܹܗ ܒܫܡܲܝܵܐ. ܣܵܒܵܒ ܗܲܕܟܼܵܐ ܪܕܸܦܠܗ݇ܘܿܢ ܠܢܒܼܝܼܹ̈ܐ ܕܡ̣ܢ ܩܵܕ݇ܡ ܡܸܢܵܘܟܼܘܿܢ. ܐܲܚܬܘܿܢ ܝܼܬܘܿܢ ܡܸܠܚܵܗ̇ ܕܐܲܪܥܵܐ، ܐܸܢ ܡܸܠܚܵܐ ܦܲܝܟܵܐ، ܒܡܘܼܕܝܼ ܒܸܬ ܦܲܝܫܵܐ ܡܘܼܡܠܸܚܬܵܐ؟ ܠܡܸܢܕܝܼ ܠܹܐ ܚܲܫܚܵܐ. ܐܸܠܵܐ ܕܦܲܝܫܵܐ ܪܘܼܦܝܼܬܵܐ ܠܒܼܲܕܲܪ ܘܦܲܝܫܵܐ ܕܝܼܫܬܵܐ ܡ̣ܢ ܐ݇ܢܵܫܹ̈ܐ. ܐܲܚܬܘܿܢ ܝܼܬܘܿܢ ܢܘܼܗܪܹܗ ܕܥܵܠܡܵܐ. ܠܹܐ ܡܲܨܝܵܐ ܕܛܲܫܝܵܐ ܡܕܝܼܢ݇ܬܵܐ ܕܥܲܠ ܛܘܼܪܵܐ ܒܢܝܼܬܵܐ. ܘܠܹܐ ܬܵܦܝܼ ܫܪܵܓَܼܝܵܐ ܘܡܲܬܒܼܝܼܠܵܗ̇ ܬܚܘܿܬ ܣܲܐܬܵܐ، ܐܸܠܵܐ ܥܲܠ ܡܢܵܪܬܵܐ، ܘܡܲܢܗܸܪܵܐ ܠܟܠ ܐܲܝܢܝܼ ܕܓܵܘ ܒܲܝܬܵܐ ܝܢܵܐ. ܗܲܕܟܼܵܐ ܒܲܗܪܸܢ ܒܲܗܪܵܘܟܼܘܿܢ ܩܵܕ݇ܡ ܒܢܲܝ̈ܢܵܫܵܐ ܕܚܵܙܝܼ ܥܒܼܵܕܵܘ̈ܟܼܘܿܢ ܛܵܒܼܹ̈ܐ ܘܫܲܒܚܝܼ ܠܒܵܒܵܘܟܼܘܿܢ ܕܒܲܫܡܲܝܵܐ.
♱♱♱♱♱♱♱♱♱