ܚܲܕܼܒ̇ܫܲܒܵܐ ܐ ܕܲܨܠܝܼܒ̣ܵܐ. ܕ ܕܐܹܠܝܼܵܐ

 

   ܡܲܪܡܝܼܬܼܵܐ ܕܐ݇ܪ̈ܵܙܹܐ. ܫܲܒܲܚܘ ܠܡܵܪܝܵܐ ܬܸܫܒ̇ܘܿܚܬܵܐ ܚܕܲܬܵܐ. 

 

   ܕܩܲܢܟܹ̇ܐ. ܒܚܸܕܼܝܲܬ݀ ܡܲܪܝܲܡ.

ܡܫܲܒܲܚ ܒܲܡܪ̈ܵܘܡܹܐ ܡܵܪܝܵܐ؛ ܡܒܲܛܸܠ ܩܪ̈ܵܒܹܐ ܡ̣ܢ ܣܵܘܦܹܝ̈ܗ̇ ܕܐܲܪܥܵܐ. ܨܠܝܼܒ̣ܵܐ ܕܥܵܡܲܪ ܒܲܡܪ̈ܵܘܡܹܐ. ܫܲܝܸܢ ܠܥܘܼܡܩܹ̈ܐ ܬܲܚܬܵܝܹ̈ܐ. ܕܪܵܘܡܵܐ ܠܵܐ ܣܢܝܼܩ ܥܲܠ ܫܲܝܢܵܐ. ܫܲܝܸܢ ܡܵܪܝ ܠܲܒܼܢܲܝ̈ܢܵܫܵܐ؛ ܬܢܝܼ؛ ܫܲܒܲܚ. ܒܕܼܵܪ̈ܲܝܟ ܩܵܝ̇ܡܝܼܢ ܣܵܓ̣ܘܿܕܲܝ̈ܟ. ܘܐܵܚ̇ܕܝܼܢ ܓܵܘܣܵܐ ܒܲܨܠܘܿܬܼܵܐ. ܙܵܘܸܕܼ ܐܸܢܘܿܢ ܒܘܼܪ̈ܟܵܬܼܵܐ. ܡ̣ܢ ܒܲܝܬܵܟܼ ܡܠܸܐ ܥܘܼܕܼܪ̈ܵܢܹܐ.

 

  ܩܸܪܝܵܢܵܐ.  ܬܸܢܝܵܢ ܢܵܡܘܿܣܵܐ ܚ؛ 11‐ܫܘܼܠܵܡܵܐ ܚܲܒ̣ܪܹܗ؛ ܐܹܫܲܥܝܵܐ ܠܓ؛ 13‐ܫܘܼܠܵܡܵܐ

 

 ܫܘܼܪܵܝܵܐ. ܗ܀ ܠܵܐ ܬܸܚܣܲܡ ܒܓܲܒܼܪܵܐ ܕܥܵܒܹ̇ܕܼ ܥܵܘ̣ܠܵܐ ܘܡܲܨܠ̱ܚܵܐ ܐܘܼܪܚܹܗ‌* ܐܸܬ̇ܬ̇ܢܝܼܚ ܡ̣ܢ ܚܸܡܬܼܵܐ ܘܐܸܬ̇ܬ̇ܢܝܼܚ ܡ̣ܢ ܪܘܼܓ̣ܙܵܐ‌* ܘܠܵܐ ܬܸܚܣܲܡ ܠܡܸܥܒܲܕܼ ܒܝܼܫܬܵܐ‌* ܡܸܛܠ ܕܒܼܝܼܫܹ̈ܐ ܣܵܝ̇ܦܝܼܢ‌* ܘܐܲܝܠܹܝܢ ܕܲܡܣܲܒ̇ܪܝܼܢ ܒܡܵܪܝܵܐ ܝܵܪܬ̇ܝܼܢ ܐܲܪܥܵܐ‌*

 

    ܫܠܝܼܚܵܐ؛  ܦܝܼܠܸܦܣܵܝܹ̈ܐ ܐ؛ 27‐ܒ؛ 12

 

   ܙܘܼܡܵܪܵܐ. ܡܵܪܝܵܐ ܐܲܡ̣ܠܸܟܼ ܘܓܲܐܝܘܼܬܼܵܐ ܠܒܸܫ. ܠܒܸܫ̣ ܡܵܪܝܵܐ ܥܘܼܫܢܵܐ ܘܐܸܬܼܥܲܫܲܢ. ܒ܀ ܘܐܲܬ̣ܩ̄ܢܵܗ̇ ܠܬܹܒܹܝܠ ܕܠܵܐ ܬܙܘܼܥ. ܡܲܬܼܩܲܢܘܼ ܟܘܼܪܣܝܵܟܼ ܡ̣ܢ ܩܕܼܝܼܡ. ܘܡ̣ܢ ܥܵܠܲܡ ܐܲܢ݇ܬ̇ܘܼ. ܓ܀

 

   ܐܹܘܲܢܓܲܠܝܼܘܿܢ؛  ܡܲܬܲܝ ܕ؛ 12‐ܗ؛ 17

 

ܐܹܘܲܢܓܲܠܝܼܘܿܢ. ܒܗܵܐ ܫ̣ܒ̣ܵܢܝ. ܛܘܼܒܲܝܗܘܿܢ ܠܐܲܝܠܹܝܢ ܕܲܕܼܠܵܐ ܡܘܼܡ ܐܸܢܘܿܢ ܒܐܘܼܪܚܵܐ؛ ܗܵܠܹܝܢ ܐܸܬ̇ܕܲܟܼܪܹܬܼ ܘܐܸܬ̇ܛܲܪܦܲܬܸ ܢܲܦ̮ܫܝ. ܕܨܘܼܪܬܵܐ. ܒܛܵܒ̣̈ܵܬܼܵܐ ܕܲܥܬ̣ܝܼ̈ܕܵܢ ܘܠܵܐ ܥܵܒ̣ܪ̈ܵܢ. ܛܘܼܒܼܵܐ ܪܲܒܵܐ ܕܲܡܠܝܼܟܼ ܠܐܲܝܠܹܝܢ ܕܲܒܼܦܘܼܩܕܵܢܲܝ̈ܟ ܡܸܬ̇ܕܲܒ̇ܪܝܼܢ ܥ̣ܒܲܪ ܡ̣ܢ ܨܹܐܕܲܝ. ܘܲܚܠܵܦ ܛܘܼܒ̣ܵܐ ܗܵܐ ܩܢܹ̇ܝܬܼ ܘܵܝܵܐ ܥܲܡ ܕܵܘܘܿܢܹ̈ܐ. ܥܲܠ ܕܐܲܪܦܝܼܬܵܟܼ ܘܲܫ̣ܒܲܩܬܵܟܼ. ܠܵܐ ܡܵܪܝ ܬܲܪܦܹܝܢܝ ܘܠܵܐ ܬܲܗܡܸܐ ܡܹܢܝ. ܐܸܠܵܐ ܒܥܝܼܵܢܝ ܒܲܚܢܵܢܵܟܼ. ܕܠܵܘ ܒܲܦܝܵܣܵܐ ܐܸܬܼܓܲܒ̣ܠܹܬܼ. ܐܵܦܠܵܐ ܒܪܘܼܓܼܙܵܟܼ ܐܸܬܼܚܲܒܲܠ. ܛܵܒ̣ܵܐ ܕܓܲܒ̣ܠܲܢ̣ܝ ܚܘܼܣ ܥܠܲܝ. ܡܵܪܵܐ ܕܲܒ̣ܪܵܢ̣ܝ ܚܲܠܸܠܲܝܢܝ. ܘܗܲܒ̣ܠܝܼ ܐܝܼܕܼܵܐ ܕܥܘܼܕܼܪ̈ܵܢܹܐ. ܕܐܹܩܘܼܡ ܘܐܸܬܼܟܲܬܲܫ ܥܲܡ ܒܝܼܫܵܐ. ܕܲܫܿܒ̣ܵܢܝ ܡܸܢܵܟܼ؛ ܬܢܝܼ. ܫܲܒܲܚ. ܡܘܼܠܟܵܢ ܚܲܝܹ̈ܐ ܡ̣ܠܲܟܼ ܦܵܪܘܿܩܲܢ. ܠܪ̈ܵܚܡܲܝ ܚܘܼܒܹ̇ܗ ܘܐܲܥܬܲܪ ܐܸܢܘܿܢ ܒܝܼܕܲܥܬܹܗ. ܘܲܡ̣ܠܵܐ ܐܸܢܘܿܢ ܚܸܟ̣ܡܲܬܼ ܚܲܝܠܹܗ ܘܐܲܠܸܦ̣ ܐܸܢܘܿܢ ܠܲܡܨܲܠܵܝܘܼ ܒܟܼܠܥܸܕܵܢ. ܐܲܒ̣ܘܼܢ ܕܒܲܫܡܲܝܵܐ ܢܸܬܼܩܲܕܲܫ ܫܡܵܟܼ ܬܹܐܬܸܐ ܨܹܐܕܲܝܢ ܡܲܠܟ̇ܘܼܬܼܵܟܼ. ܢܸܗܘܸܐ ܒܐܲܪܥܵܐ ܨܸܒ̣ܝܵܢܵܟܼ. ܐܲܟܼܡܵܐ ܕܐܝܼܬܼܵܘܗ‌ܝ ܒܼܲܫܡܲܝܵܐ. ܗܲܒ̣ܠܲܢ ܠܲܚܡܵܐ ܕܣܘܼܢܩܵܢܲܢ ܘܠܵܐ ܬܲܥܸܠܲܝܢ ܠܢܸܣܝܘܿܢܵܐ. ܐܸܠܵܐ ܦܲܨܵܢ ܡ̣ܢ ܒܝܼܫܵܐ. ܕܕܼܝܼܠܵܟܼ ܐܝܼܬܹܝܗ̇ ܡܲܠܟ̇ܘܼܬܼܵܐ ܘܚܲܝܠܵܐ ܘܬܸܫܒ̇ܘܿܚܬܵܐ.

 

ܕܐ݇ܪ̈ܵܙܹܐ. ܒܣܵܗ̈ܕܹܿܐ ܒܪ̈ܝܼܟܹܐ. ܪܵܡ ܒܟܼܠܵܗ̇ ܐܲܪܥܵܐ. ܪܲܒ̇ ܘܲܕܼܚܝܼܠ ܥܲܠ ܟܠܗܘܿܢ ܕܲܚܕܼܵܪ̈ܵܘܗ‌ܝ؛ ܡܵܐ ܛܵܒ̣ ܘܡܵܐ ܫܲܦܝܼܪ. ܕܨܘܼܪܬܵܐ. ܢܸܗܘܸܐ ܡܲܕܒ̇ܚܵܐ ܩܕܼܘܿܫ ܩܘܼܕܼܫ̈ܝܼܢ. ܠܲܡܡܲܠܵܠܘܼ ܐ݇ܪܵܙܹܗ ܕܲܡܫܝܼܚܵܐ. ܡܲܕܼܒܿܚܵܐ ܐ݇ܪܵܙܵܐ ܗ݇ܘ̣ ܕܩܲܒ̣ܪܵܐ ܕܒܹܗ ܐܸܬ̇ܬ̇ܣܝܼܡ ܦܲܓ̣ܪܹܗ ܕܦܵܪܘܿܩܲܢ. ܘܠܲܚܡܵܐ ܘܚܲܡܪܵܐ ܕܲܣܕܼܝܼܪܝܼܢ. ܛܘܼܦ̮ܣܹܗ ܕܡܵܪܲܢ ܕܲܒ̣ܩܲܒ̣ܪܵܐ. ܘܟ̣ܵܗܢܵܐ ܐܲܝܟܼ ܢܲܦ̮ܫܹܗ ܕܝܼܫܘܿܥ. ܩܪܵܒ̣ܵܐ ܥܵܒܹܕܼ ܥܲܡ ܒܝܼܫܵܐ. ܘܟܸܢ ܨܵܐܲܪ ܛܘܼܦ̮ܣܵܐ ܕܢܘܼܚܵܡܵܐ؛ ܬܢܝܼ. ܘܫܲܒܲܚ ܒܵܗ̇.

 

  ܕܒܹܝܡ؛ ܥܘܼܢܵܝܵܐ. ܒܗܵܘ̇ ܕܝܘܿܚܲܢܵܢ. ܒܗܵܢܵܐ ܥܹܐܕܼܵܐ ܕܲܫܟ̣ܵܚܬܵܐ. ܕܲܨܠܝܼܒܹܗ ܕܡܲܠܟܵܐ ܡܫܝܼܚܵܐ. ܢܸܙܡܲܪ ܫܘܼܒ̣ܚܵܐ ܥܲܡ ܪ̈ܘܼܚܵܢܹܐ. ܠܗܵܘ̇ ܕܒܲܨܠܝܼܒܹܗ ܫܩܲܠ̣ ܙܵܟܼܘܼܬܼܵܐ. ܘܲܥ̣ܒܲܕܼ ܫܲܝܢܵܐ ܒܪܵܘܡܵܐ ܘܥܘܼܡܩܵܐ. ܘܦܲܓ̣ܪܹܗ ܘܲܕܼܡܹܗ ܝܲܗ̣݇ܒ̣ ܠܵܗ̇ ܠܥܹܕ̇ܬܹ̇ܗ. ܗܲܠܸܠܘܼܝܲܗ.

  ܒܵܬܹ̈ܐ؛ ܨܠܝܼܒܼܵܐ ܕܢܘܼܗܪܵܐ ܨܡܲܚ̣ ܒܲܒ̣ܪܝܼܬܼܵܐ. ܘܲܪܕܲܦ̣ ܚܸܫܟܵܐ ܕܲܦܬܲܟ̣ܪܘܼܬܼܵܐ. ܩܘܼܣܛܲܢܛܝܼܢܘܿܣ ܚ̣ܙܵܝܗ‌ܝ ܒܲܫܡܲܝܵܐ. ܕܗܸܘܝܘܼ ܕܡܲܡܠܸܟܼ ܥܲܠ ܟܠ ܕܸܚ̈ܠܵܢ. ܘܗܸܘܝܘܼ ܕܫܲܝܸܢ ܪܵܘܡܵܐ ܘܥܘܼܡܩܵܐ. ܥܲܡ ܫܵܠܘܿܚܹܗ ܕܲܠܘܵܬܼ ܓܸܢܣܲܢ. ܗܲܠܸܠܘܼܝܲܗ.

 

♱♱♱♱♱♱♱♱♱