|
ܚܲܕܼܒܫܲܒܵܐ ܕܐܲܪܒܥܵܐ ܕܲܫܠܝܼܚܹ̈ܐ
ܬܸܢܝܵܢ ܢܵܡܘܿܣܵܐ ܐ؛ 16‐34 ܬܸܒ̣ܘ ܘܲܫܠܵܘ ܬܸܢܝܵܢ ܢܵܡܘܿܣܵܐ ܣܸܦܪܵܐ ܕܚܲܡܫܵܐ ܕܐܘܿܪܵܝܬܵܐ؛ ܐܲܚܲܝ̈ ܒܲܪܸܟ̣ܡܵܪܝ܀
ܗܵܘܝܼܬܘܿܢ ܒܸܫܡܲܥܝܵܐ ܒܹܝܠ ܐܵܚܘܿܢܘܵܬ̈ܵܘܟ̣ܘܿܢ؛ ܘܒܸܕܝܵܢܵܐ ܗܵܩܘܼܬܵܐ ܒܹܝܠ ܐ݇ܢܵܫܵܐ ܠܐܵܚܘܿܢܹܗ ܘܠܡܵܫܵܚܲܛܬܹܗ܀ ܠܵܐ ܚܵܙܝܼܬܘܿܢ ܦܵܬܵܐ ܒܕܝܼܘܵܢ؛ ܠܙܥܘܿܪܵܐ ܐܲܝܟܼ ܓܘܼܪܵܐ ܗܵܘܝܼܬܘܿܢ ܒܸܫܡܲܥܝܵܐ؛ ܘܠܵܐ ܙܵܕܥܝܼܬܘܿܢ ܡ̣ܢ ܗܝܼܟ̰ ܐ݇ܢܵܫܵܐ ܣܵܒܵܒ ܕܝܼܘܵܢ ܕܐܲܠܵܗܵܐ ܝ݇ܠܵܗ̇؛ ܘܡܸܢܕܝܼ ܕܗܵܘܹܐ ܥܲܣܩܵܐ ܩܵܬܵܘܟ̣ܘܿܢ؛ ܡܲܝܬܹܐܡܘܿܢ ܠܹܗ ܠܟܸܣܠܝܼ ܘܒܸܬ ܫܵܡܥܸܢܹܗ܀ ܘܦܘܼܩܸܕܠܝܼ ܐܸܠܵܘܟ̣ܘܿܢ ܒܗ̇ܘ ܙܲܒ̣ܢܵܐ ܟܠ ܡܸܢܕܝܼ ܕܥܵܒ̣ܕܝܼܬܘܿܢ܀ ܘܡܘܼܛܥܸܢܲܢ ܡ̣ܢ ܚܘܿܪܝܼܒ ܘܚܕܸܪܲܢ ܒܟܠܹܗ ܕܗ̇ܘ ܒܲܪܝܼܵܐ ܓܘܼܪܵܐ ܘܨܵܘܵܢܵܐ؛ ܕܚܙܹܐܠܵܘܟ̣ܘܿܢ ܒܐܲܪܥܵܐ ܕܛܘܼܪܵܐ ܕܐܵܡܘܿܪ̈ܵܝܹܐ؛ ܐܲܝܟܼ ܕܩܲܡ ܦܵܩܸܕܠܲܢ ܡܵܪܝܵܐ ܐܲܠܵܗܵܐ؛ ܘܐ݇ܬܹܐܠܲܢ ܗܲܠ ܠܪܩܸܡ ܕܓܲܝܵܐ܀ ܘܐ݇ܡܸܪܝܼ ܐܸܠܵܘܟ̣ܘܿܢ؛ ܐ݇ܬܹܐܠܵܘܟ̣ܘܿܢ ܗܲܠ ܛܘܼܪܵܐ ܕܐܵܡܘܿܪ̈ܵܝܹܐ ܕܡܵܪܝܵܐ ܐܲܠܵܗܲܢ ܝܘܼܗ݇ܒ̣ܸܠܹܗ ܐܸܠܲܢ܀ ܚܙܹܐܡܘܿܢ ܕܝܘܼܗ݇ܒ̣ܸܠܹܗ ܡܵܪܝܵܐ ܐܲܠܵܗܵܘܟ̣ܘܿܢ ܐܲܪܥܵܐ ܩܵܕ݇ܡܵܘܟ̣ܘܿܢ؛ ܐ݇ܣܘܿܩܘܿܢ ܫܩܘܿܠܘܿܢ ܝܵܪܬܘܼܬܵܐ ܓܵܘܵܗ̇؛ ܐܲܝܟܼ ܕܐ݇ܡܸܪܹܗ ܐܸܠܵܘܟ̣ܘܿܢ ܡܵܪܝܵܐ ܐܲܠܵܗܵܐ ܕܒܵܒܵܘܵܬܵܘ̈ܟ̣ܘܿܢ؛ ܠܵܐ ܙܵܕܥܝܼܬܘܿܢ ܘܠܵܐ ܫܵܥܫܝܼܬܘܿܢ܀ ܘܩܘܼܪܒܸܢܵܘܟ̣ܘܿܢ ܠܟܸܣܠܝܼ ܟܠܵܘܟ̣ܘܿܢ ܘܐ݇ܡܸܪܵܘܟ̣ܘܿܢ ܫܲܕܪܲܚ ܐ݇ܢܵܫܹ̈ܐ ܩܵܕ݇ܡܲܝܢ؛ ܘܓ̰ܲܣܸܣܝܼܠܲܢ ܐܲܪܥܵܐ؛ ܘܝܵܗ݇ܒ̣ܝܼܠܲܢ ܚܲܒܪܵܐ ܘܡܲܚܙܝܼܠܲܢ ܐܘܼܪܚܵܐ ܕܐܵܙܵܠ݇ܚ ܒܝܼܵܗ̇؛ ܘܡܵܬܘܵܬܹ̈ܐ ܕܥܵܒ̣ܪܝܼ ܐܸܠܲܝܗܝ܀ ܘܫܦܸܪܹܗ ܚܲܒܪܵܐ ܒܥܲܝܢ̈ܝܼ. ܘܠܘܼܒܸܠܝܼ ܡܸܢܵܘܟ̣ܘܿܢ ܬܪܸܥܣܲܪ ܐ݇ܢܵܫܹ̈ܐ؛ ܡ̣ܢ ܟܠ ܫܲܒ̣ܛܵܐ ܚܲܕ݇ ܐ݇ܢܵܫܵܐ܀ ܘܕܸܐܪܘܿܢ ܘܐ݇ܣܸܩܠܗ݇ܘܿܢ ܠܛܘܼܪܵܐ ܘܐ݇ܣܸܩܠܗ݇ܘܿܢ ܗܲܠ ܪܵܓ̣݇ܘܘܼܠܵܐ ܕܩܘܼܢܛܲܝܦܵܐ؛ ܘܓ̰ܘܼܣܸܣܵܗ̇ ܠܗ݇ܘܿܢ ܐܲܪܥܵܐ܀ ܘܫܩܸܠܗ݇ܘܿܢ ܒܐܝܼܕܲܝ̈ܗܝ ܡ̣ܢ ܛܥܘܼܢܝܵܬܹ̈ܐ ܕܐܲܪܥܵܐ ܘܡܘܼܬܹܐܠܗ݇ܘܿܢ ܐܸܠܲܢ؛ ܘܡܘܼܕܸܪܗ݇ܘܿܢ ܓ̰ܘܼܘܵܒ ܘܐ݇ܡܸܪܗ݇ܘܿܢ ܐܸܠܲܢ. ܐܲܪܥܵܐ ܕܝܵܗ݇ܒ̣ܸܠܲܢ ܡܵܪܝܵܐ ܐܲܠܵܗܲܢ ܪܵܒܵܐ ܫܲܦܝܼܪܬܵܐ ܝ݇ܠܵܗ̇. ܘܠܵܐ ܗ݇ܘܹܐܠܵܘܟ̣ܘܿܢ ܪܵܐܙܝܼ ܠܹܐܣܵܩܵܐ؛ ܐܸܠܵܐ ܡܘܼܟܪܸܒܠܵܘܟ̣ܘܿܢ ܗܹܡܸܙܡܵܢ ܕܦܘܼܡܹܗ ܕܡܵܪܝܵܐ ܐܲܠܵܗܲܢ܀ ܘܛܘܼܪܛܸܡܠܵܘܟ̣ܘܿܢ ܡ̣ܢ ܡܲܫܟܢܵܘܟ̣ܘܿܢ ܘܐ݇ܡܸܪܵܘܟ̣ܘܿܢ؛ ܣܵܒܵܒ ܕܒܸܣܢܵܝܲܢ ܝ݇ܠܹܗ ܡܵܪܝܵܐ ܩܲܡ ܦܵܠܸܛܠܲܢ ܡ̣ܢ ܐܲܪܥܵܐ ܕܡܸܨܪܹܝܢ ܕܣܵܦܹܐܠܲܢ ܒܐܝܼܕܵܐ ܕܐܵܡܘܿܪ̈ܵܝܹܐ ܕܬܵܠܩܝܼܠܲܢ܀ ܠܐܲܝܟܵܐ ܒܹܐܣܵܩܵܐ ܝ݇ܘܲܚ؟ ܐܵܚܘܿܢ̈ܘܵܬܲܢ ܫܡܝܼܛܠܗ݇ܘܿܢ ܠܸܒܲܢ؛ ܘܐ݇ܡܸܪܗ݇ܘܿܢ ܐܸܠܲܢ؛ ܛܵܝܸܦܵܐ ܓܘܼܪܵܐ ܝ݇ܠܹܗ ܘܪܵܡܵܐ ܘܒܘܼܫ ܚܲܝܠܵܢܵܐ ܡܸܢܲܢ؛ ܘܡܕܝܼܢܵܬܹ̈ܐ ܓܘܼܪܹ̈ܐ ܘܟܪ̈ܝܼܟ̣ܹܐ ܗܲܠ ܫܡܲܝܵܐ؛ ܘܐܘܼܦ ܒܢܲܝ̈ ܓܲܢ݇ܒܵܪܹ̈ܐ ܚܙܹܐܠܲܢ ܬܵܡܵܐ܀ ܘܐ݇ܡܸܪܝܼ ܐܸܠܵܘܟ̣ܘܿܢ. ܠܵܐ ܙܵܕܥܝܼܬܘܿܢ ܘܠܵܐ ܫܵܥܫܝܼܬܘܿܢ ܡܸܢܲܝܗܝ܀ ܡܵܪܝܵܐ ܐܲܠܵܗܵܘܟ̣ܘܿܢ ܒܸܬ ܐܵܙܸܠ ܩܵܕ݇ܡܵܘܟ̣ܘܿܢ؛ ܘܗ̇ܘ ܒܸܬ ܦܵܠܸܫ ܡ̣ܢ ܓܹܒܵܘܟ̣ܘܿܢ؛ ܐܲܝܟܼ ܕܥܒ̣ܸܕܠܹܗ ܥܲܡܵܘܟ̣ܘܿܢ ܓܵܘ ܡܸܨܪܹܝܢ ܩܵܕ݇ܡ ܥܲܝܢܵܘ̈ܟ̣ܘܿܢ܀ ܐܲܝܟܼ ܕܚܙܹܐܠܵܘܟ̣ܘܿܢ ܓܵܘ ܒܲܪܝܼܵܐ؛ ܩܲܡ ܬܲܪܣܹܐܠܵܘܟ̣ܘܿܢ ܡܵܪܝܵܐ ܐܲܠܵܗܵܘܟ̣ܘܿܢ؛ ܐܲܝܟܼ ܕܡܬܲܪܣܹܐ ܓܲܒ̣ܪܵܐ ܠܒܪܘܿܢܹܗ؛ ܒܟܠܵܗ̇ ܐܲܪܥܵܐ ܕܐ݇ܙܸܠܵܘܟ̣ܘܿܢ؛ ܗܲܠ ܕܐ݇ܬܹܐܠܵܘܟ̣ܘܿܢ ܠܐܵܗܵܐ ܐܲܬܪܵܐ܀ ܘܒܐܵܗܵܐ ܡܸܢܕܝܼ ܠܹܐ ܝ݇ܬܘܿܢ ܗܲܡܘܼܢܹܐ ܒܡܵܪܝܵܐ ܐܲܠܵܗܵܘܟ̣ܘܿܢ܀ ܕܒܹܐܙܵܠܵܐ ܝ݇ܠܹܗ ܩܵܕ݇ܡܵܐ ܩܵܕ݇ܡܵܘܟ̣ܘܿܢ ܠܗܵܕܘܼܪܹܐ ܕܘܼܟܬܵܐ ܕܫܵܪܝܼܬܘܿܢ ܓܵܘܵܗ̇. ܒܠܲܝܠܹܐ ܒܢܘܼܪܵܐ ܩܲܡ ܡܲܚܙܹܐܠܵܘܟ̣ܘܿܢ ܐܘܼܪܚܵܐ ܕܐܵܙܠ݇ܝܼܬܘܿܢ ܒܝܼܵܗ̇. ܘܒܐܝܼܡܵܡܵܐ ܒܥܢܵܢܵܐ܀
ܚܲܒ̣ܪܹܗ
ܐܹܫܲܥܝܵܐ. ܐ؛ 10‐21 ܫܠܵܘ ܢܒ̣ܝܼܘܼܬܹܗ ܕܐܹܫܲܥܝܵܐ؛ ܐܲܚܲܝ̈ ܒܲܪܸܟ̣ܡܵܪܝ܀
ܫܡܸܥܡܘܿܢ ܚܲܒܪܹܗ ܕܡܵܪܝܵܐ ܫܲܠܝܼܛܹ̈ܐ ܕܣܕܘܿܡ؛ ܘܡܲܨܝܸܬܘܿܢ ܢܵܡܘܿܣܵܐ ܕܐܲܠܵܗܲܢ ܛܵܝܸܦܵܐ ܕܥܵܡܘܿܪܵܐ܀ ܩܵܡܘܿܕܝܼ ܝ݇ܢܵܐ ܒܘܼܫܵܝܘܼܬܵܐ ܕܕܸܒ̣ܚܵܘ̈ܟ̣ܘܿܢ؟ ܒܹܐܡܵܪܵܐ ܝ݇ܠܹܗ ܡܵܪܝܵܐ؛ ܣܒ̣ܝܼܥܠܝܼ ܕܸܒ̣ܚܹ̈ܐ ܕܒܲܪ̈ܥܵܢܹܐ؛ ܘܬܲܪܒܵܐ ܕܬܪ̈ܝܼܨܹܐ؛ ܘܕܸܡܵܐ ܕܬܵܘܪܹ̈ܐ ܘܦܵܐܪܹ̈ܐ ܘܓܸܕܝܹ̈ܐ ܠܵܐ ܒܣܝܼܡܠܵܐ ܠܝܼ܀ ܐܝܼܡܲܢ ܕܐܵܬܝܼܬܘܿܢ ܠܸܚܙܵܝܵܐ ܦܵܬܝܼ؛ ܡܵܢܝܼ ܛܠܸܒܠܹܗ ܐܲܢܹܐ ܡ̣ܢ ܐܝܼܕܵܘܟ̣ܘܿܢ ܠܕܲܫܕܘܼܫܹܐ ܕܵܪ̈ܵܬܝܼ܀ ܡܸܕܪܹܐ ܠܵܐ ܡܲܝܬ݇ܝܼܬܘܿܢ ܩܘܼܪ̈ܒܵܢܹܐ ܒܲܛܝܼܠܹ̈ܐ؛ ܬܸܢܢܵܐ ܕܡܘܼܣܠܝܼܵܐ ܝ݇ܠܹܗ ܐܸܠܝܼ؛ ܒܪܹܫܵܐ ܕܝܲܪܚܵܐ ܘܒܫܲܒܬܵܐ ܒܸܓ̰ܡܵܥܝܵܐ ܝ݇ܬܘܿܢ ܓ̰ܡܵܥܝܬܵܐ. ܠܹܐ ܐܵܟ̣ܠܸܢ ܡܸܢܕܝܼ ܕܥܵܘܠܵܐ ܘܚܒ̣ܘܼܫܝܵܐ܀ ܪܹܫܵܐ ܕܝܲܪ̈ܚܵܘܟ̣ܘܿܢ ܘܥܹܐܕܵܘܵܬܵܘ̈ܟ̣ܘܿܢ ܣܢܹܐܠܵܗ̇ ܓܵܢܝܼ؛ ܘܗܘܹܐܠܗ݇ܘܿܢ ܐܸܠܝܼ ܝܘܼܩܪܵܐ ܘܓ̰ܹܗܐܠܝܼ ܠܸܛܥܵܢܵܐ܀ ܟܲܕ ܦܵܪܣܝܼܬܘܿܢ ܐܝܼܕ̈ܵܬܵܘܟ̣ܘܿܢ؛ ܒܸܬ ܡܲܚܦܸܠܸܢ ܥܲܝܢ̈ܝܼ ܡܸܢܵܘܟ̣ܘܿܢ؛ ܐܵܦܸܢ ܡܲܙܝܸܕܝܼܬܘܿܢ ܨܠܘܿܬܵܐ؛ ܠܹܐ ܫܵܡܥܸܢ. ܐܝܼܕܵܬܵܘ̈ܟ̣ܘܿܢ ܡܸܠܝܹܐ ܝ݇ܢܵܐ ܕܸܡܵܐ܀ ܣܚܹܐܡܘܿܢ ܘܦܘܼܫܘܼܢ ܕܘܼܟ̣ܝܹܐ؛ ܡܲܪܚܸܩܘܿܢ ܒܝܼܫܬܵܐ ܕܦܘܼܠܚܵܢܵܘܟ̣ܘܿܢ ܡ̣ܢ ܩܵܕ݇ܡ ܥܲܝܢ̈ܝܼ؛ ܫܠܹܐܡܘܿܢ ܡ̣ܢ ܒܝܼܫܵܬܹ̈ܐ ܘܝ݇ܠܘܿܦܘܿܢ ܠܸܥܒ̣ܵܕܵܐ ܛܵܒ̣ܬܵܐ؛ ܨܲܚܨܹܐܡܘܿܢ ܕܝܼܘܵܢ؛ ܥܒ̣ܘܿܕܘܿܢ ܛܵܒ̣ܬܵܐ ܠܙܠܝܼܡܹ̈ܐ؛ ܕܘܼܢܘܼܢ ܝܲܬܘܿܡܹ̈ܐ ܘܐܲܪ̈ܡܸܠܝܵܬܹܐ ܬܹܐܡܘܿܢ ܗܲܡܙܸܡܲܚ ܥܲܡ ܐܘܼܕܵܠܹܐ ܒܹܐܡܵܪܵܐ ܝ݇ܠܹܗ ܡܵܪܝܵܐ؛ ܐܸܢ ܗܵܘܝܼ ܚܛܝܼܵܬܵܘ̈ܟ̣ܘܿܢ ܐܲܝܟܼ ܩܸܪܡܝܼܙ؛ ܐܲܝܟܼ ܬܲܠܓܵܐ ܒܸܬ ܦܵܝܫܝܼ ܡܘܼܚܘܸܪܹܐ؛ ܘܐܸܢ ܣܵܡܩܝܼ ܐܲܝܟܼ ܬܸܘܸܠܥܬܵܐ ܐܲܝܟܼ ܥܲܡܪܵܐ ܒܸܬ ܗܵܘܝܼ܀ ܘܐܸܢ ܡܲܨܝܸܬܝܼܬܘܿܢ ܘܫܵܡܥܝܼܬܘܿܢ ܠܝܼ؛ ܛܘܼܒ̣ܵܐ ܕܐܲܪܥܵܐ ܒܸܬ ܐܵܟ̣ܠܝܼܬܘܿܢ܀ ܘܐܸܢ ܠܵܐ ܡܲܨܝܸܬܝܼܬܘܿܢ ܘܟܵܠܝܼܬܘܿܢ ܕܲܪܩܘܼܒ̣ܠ؛ ܒܣܲܝܦܵܐ ܒܸܬ ܦܵܝܫܝܼܬܘܿܢ ܐ݇ܟ̣ܝܼܠܹܐ. ܦܘܼܡܹܗ ܕܡܵܪܝܵܐ ܗܘܼܡܙܸܡܠܹܗ܀
♱♱♱♱♱♱♱♱♱
ܚܕܒܫܒܐ ܕ ܕܫܠܝܚ̈ܐ ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ ܕܲܠܘܵܬܼ ܩܘܼܪ̈ܲܢܬܵܝܹܐ ܐܲܚܲܝ̈ ܒܲܪܸܟܼܡܵܪܝ܀ ܐ؛ܩܘܿܪ̈ܲܢܬܼܵܝܹܐ؛ ܛ؛ 13‐ܫܘܼܠܵܡܵܐ.
ܠܹܐ ܝ݇ܬܘܿܢ ܒܝܼܕܲܥܝܵܐ ܕܐܵܢܝܼ ܕܓܵܘ ܒܹܝܬ ܩܘܼܕܫܵܐ ܦܵܠܚܝܼ ܡ̣ܢ ܒܹܝܬ ܩܘܼܕܫܵܐ ܠܵܙܸܡ ܦܵܝܫܝܼ ܬܘܼܪܣܝܼܹܐ. ܘܐܵܢܝܼ ܕܩܵܐ ܡܲܕܒܚܵܐ ܦܵܠܚܝܼ ܥܲܡ ܡܲܕܒܚܵܐ ܦܵܠܓ݇ܝܼ* ܗܲܕܟܼܵܐ ܐܘܼܦ ܡܵܪܲܢ ܦܘܼܩܕܠܹܗ ܕܐܵܢܝܼ ܕܡܲܫܚܲܕܬܹܗ ܡܲܟܪܸܙܝܼ ܡ̣ܢ ܡܲܫܚܲܕܬܹܗ ܒܸܬ ܚܲܝܝܼ* ܐܝܼܢܵܐ ܐܵܢܵܐ ܠܵܐ ܡܘܼܦܠܸܚܠܝܼ ܐܘܼܦ ܚܕܵܐ ܡ̣ܢ ܕܐܲܢܹܐ* ܘܠܵܐ ܒܘܼܬ ܚܵܬܹܪ ܕܐܵܗܵܐ ܟܬܸܒܼܠܝܼ؛ ܕܗܲܕܟܼܵܐ ܗܵܘܝܵܐ ܠܝܼ؛ ܒܘܼܫ ܨܦܵܝ ܝܼܠܵܗَ ܩܵܬܝܼ ܕܡܵܝܬܸܢ؛ ܘܠܵܐ ܐ݇ܢܵܫܵܐ ܡܒܵܛܸܠ ܫܘܼܒܼܗܵܪܝܼ* ܣܵܒܵܒ ܐܘܼܦ ܒܡܲܫܚܲܕܬܝܼ ܠܲܝܬ ܠܝܼ ܫܘܼܒܼܗܵܪܵܐ. ܚܲܝܠܵܐ ܦܝܼܫܵܐ ܝ݇ܠܹܗ ܡܘܼܬܒܼܵܐ ܥܲܠܝܼ؛ ܘܵܝ ܐܸܠܝܼ ܐܸܢ ܠܵܐ ܡܲܫܚܸܕܸܢ* ܣܵܒܵܒ ܐܸܢ ܒܪܸܙܵܝܝܼ ܐܵܗܵܐ ܦܵܠܚܸܢ ܐܝܼܬܠܝܼ ܗܵܩܵܐ. ܘܐܸܢ ܕܠܵܐ ܒܪܸܙܵܝܝܼ ܓܘܼܪܘܼܬܵܐ ܕܒܲܝܬܵܐ ܣܘܼܦܝܼܬܵܐ ܝ݇ܠܵܗَ ܒܝܼܝܼ* ܒܲܣ ܐܲܝܟܵܐ ܝ݇ܠܹܗ ܗܵܩܝܼ؛ ܕܟܲܕ ܡܲܫܚܘܼܕܹܐ ܝ݇ܘܸܢ ܕܠܵܐ ܡܲܣܪܲܦ ܥܵܒܼܕܸܢܵܗَ ܡܲܫܚܲܕܬܹܗ ܕܡܫܝܼܚܵܐ. ܘܠܵܐ ܦܵܠܚܸܢ ܒܗܘܼܟܡܵܐ ܕܝܘܼܗ݇ܒܼܸܠܹܗ ܐܹܠܝܼ ܒܐܹܘܲܢܓܵܠܝܼܘܿܢ* ܣܵܒܵܒ ܟܲܕ ܐܵܙܲܕ ܝܼܘܸܢ ܡ̣ܢ ܟܠܲܝܗܝ ܐܲܢܹܐ؛ ܠܟܠ ܐ݇ܢܵܫܵܐ ܙܘܼܒܛܸܢܝܼ ܓܵܢܝܼ ܕܠܪܵܒܵܐ ܐ݇ܢܵܫܹ̈ܐ ܩܵܢܸܢ* ܗܘܹܐܠܝܼ ܥܲܡ ܝܗܘܼܕܵܝܹ̈ܐ ܐܲܝܟܼ ܝܗܘܼܕܵܝܵܐ ܕܠܝܼܗܘܼܕܵܝܹ̈ܐ ܩܵܢܸܢ. ܘܥܲܡ ܕܐܵܢܝܼ ܕܬܚܘܿܬ ܢܵܡܘܿܣܵܐ ܗܘܹܐܠܝܼ ܐܲܝܟܼ ܬܚܘܿܬ ܢܵܡܘܿܣܵܐ؛ ܕܠܕܐܵܢܝܼ ܕܬܚܘܿܬ ܢܵܡܘܿܣܵܐ ܝ݇ܢܵܐ ܩܵܢܸܢ* ܘܠܐܵܢܝܼ ܕܢܵܡܘܿܣܵܐ ܠܲܝܬ ܗ݇ܘ̣ܵܐ ܠܗ݇ܘܿܢ؛ ܗܘܹܐܠܝܼ ܐܲܝܟܼ ܕܠܵܐ ܢܵܡܘܿܣܵܐ؛ ܟܲܕ ܠܹܐ ܝ݇ܘܸܢ ܠܐܲܠܵܗܵܐ ܕܠܵܐ ܢܵܡܘܿܣܵܐ؛ ܐܸܠܵܐ ܒܢܵܡܘܿܣܵܐ ܕܡܫܝܼܚܵܐ؛ ܕܐܘܼܦ ܠܕܐܵܢܝܼ ܕܠܵܐ ܢܵܡܘܿܣܵܐ ܝ݇ܢܵܐ ܩܵܢܸܢ* ܗܘܹܐ ܠܝܼ ܥܲܡ ܡܸܪ̈ܥܝܸܐ ܐܲܝܟܼ ܡܸܪܥܝܵܐ؛ ܕܠܡܸܪ̈ܥܝܸܐ ܩܵܢܸܢ؛ ܩܵܐ ܟܠ ܐ݇ܢܵܫܵܐ ܗܘܹܐܠܝܼ؛ ܕܠܟܠ ܐ݇ܢܵܫܵܐ ܩܵܢܸܢ* ܐܵܗܵܐ ܒܸܥܒܼܵܕܵܐ ܝ݇ܘܸܢ ܩܵܐ ܕܗܵܘܸܢ ܫܲܪܝܼܟܵܐ ܠܡܲܫܚܲܕܬܵܐ* ܠܹܐ ܝ݇ܬܘܿܢ ܒܝܼܕܲܥܝܵܐ ܕܐܵܢܝܼ ܕܓܵܘ ܡܲܝܕܵܢ ܪܵܚܛܝܼ؛ ܟܠܲܝܗܝ ܟܹܐ ܪܵܚܛܝܼ ܐܝܼܢܵܐ ܚܲܕ݇ ܟܹܐ ܫܵܩܸܠܵܗَ ܓܼܵܠܝܼܒܘܼܬܵܐ ܗܲܕܟܼܵܐ ܪܚܘܿܛܘܿܢ ܐܘܼܦ ܐܲܚܬܘܿܢ ܩܵܐ ܕܡܵܛܝܼܬܘܿܢ* ܣܵܒܵܒ ܟܠ ܐ݇ܢܵܫܵܐ ܕܥܵܒܼܸܕ ܐܵܓܼܘܿܢܵܐ؛ ܡ̣ܢ ܟܠ ܡܸܢܕܝܼ ܕܵܒܼܸܩ ܠܗ݇ܘܿܢ ܚܝܼܵܠܘܼ̈ܗܝ. ܐܲܢܹܐ ܒܸܪܚܵܛܵܐ ܝ݇ܢܵܐ ܕܫܵܩܠܝܼ ܟܠܝܼܠܵܐ ܚܵܪܒܼܵܢܵܐ. ܐܝܼܢܵܐ ܐܲܚܢܲܢ ܟܠܝܼܠܵܐ ܠܵܐ ܚܵܪܒܼܵܢܵܐ* ܐܵܢܵܐ ܗܲܕܟܼܵܐ ܒܸܪܚܵܛܵܐ ܝ݇ܘܸܢ ܠܵܐ ܐܲܝܟܼ ܕܥܲܠ ܚܲܕ݇ ܡܸܢܕܝܼ ܠܵܐ ܝ݇ܕܝܼܥܝܵܐ. ܘܗܲܕܟܼܵܐ ܒܸܦܠܵܫܵܐ؛ ܠܵܐ ܐܲܝܟܼ ܕܗَܘ ܕܥܲܡ ܗܵܘܵܐ ܦܵܠܸܫ܋ ܐܸܠܵܐ ܦܲܓܼܪܝܼ ܙܲܒܛܘܼܢܹܐ ܝ݇ܘܸܢ ܘܡܲܥܒܼܘܼܪܘܼܗܝ ܝ݇ܘܸܢ ܬܚܘܿܬ ܪܹܓܘܼܬܵܐ ܕܠܵܐ ܗܵܘܝܵܐ ܕܐܵܢܵܐ ܕܩܵܐ ܐ݇ܚܹܪ̈݇ܢܹܐ ܡܘܼܟܪܸܙܠܝܼ؛ ܒܓܵܢܝܼ ܦܵܝܫܸܢ ܡܘܼܣܠܝܼܵܐ܋
♱♱♱♱♱♱♱♱♱
ܠܘܩܐ ܘ: 12 ‐ 47 ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ ܟܪܘܙܘܬܼܐ ܕܠܘܩܐ ♰ ܐܝܼܢܵܐ ܗ݇ܘܹܐܠܵܗَ ܒܐܵܢܝܼ ܝܵܘܡܵܢܹ̈ܐ ܦܠܸܛܠܹܗ ܝܑܼܫܘܿܥ ܠܛܘܼܪܵܐ ܠܡܨܵܠܘܼܝܹܐ. ܘܬܵܡܵܐ ܡܘܼܥܒܼܸܪܹܗ ܠܸܠܝܵܐ ܒܨܠܘܿܬܹܗ ܕܐܲܠܵܗܵܐ. ܘܟܲܕ ܗ݇ܘܹܐ ܠܵܗَ ܩܲܝܕܵܡܬܵܐ. ܩܪܹܐܠܹܗ ܠܬܲܠܡܝܼܕܘܼ̈ܗܝ. ܘܓܘܼܒܹܐܠܹܗ ܡܸܢܲܝܗܝ ܬܪܸܥܣܲܪ. ܐܵܢܝܼ ܕܩܸܪܝܲܝܠܹܗ ܫܠܝܼܚܹ̈ܐ. ܫܸܡܥܘܿܢ ܗَܘ ܕܫܘܼܡܸܗ ܠܹܗ ܟܹܐܦܵܐ، ܘܐܲܢܕܪܹܐܘܿܣ ܐܲܚܘܿܢܹܗ. ܘܝܲܥܩܘܿܒܼ ܘܝܘܿܚܲܢܵܢ. ܘܦܝܼܠܝܼܦܘܿܣ ܘܒܲܪ ܬܘܼܠܡܲܝ. ܘܡܲܬܲܝ ܘܬܐܘܿܡܵܐ. ܘܝܲܥܩܘܿܒܼ ܒܲܪ ܚܲܠܦܲܝ ܘܫܸܡܥܘܿܢ ܕܦܝܵܫܵܐ ܝܠܹܗ ܩܸܪܝܵܐ ܛܲܢܵܢܵܐ. ܘܝܼܗܘܼܕܵܐ ܒܲܪ ܝܲܥܩܘܿܒܼ. ܘܝܼܗܘܼܕܵܐ ܣܟ݂ܲܪܝܘܿܛܵܐ ܗَܘ ܕܗ݇ܘܹܐܠܹܗ ܣܲܦܝܵܢܵܐ. ܘܨܠܹܐܠܹܗ ܥܲܡܵܝܗܝ ܝܑܼܫܘܿܥ. ܘܟܠܹܐܠܹܗ ܓܵܘ ܕܸܫܬܵܐ ܘܟܸܢܫܵܐ ܪܵܒܵܐ ܕܬܲܠܡܝܼ̈ܕܘܼܗܝ، ܘܣܘܼܓܼܐܵܐ ܕܟܸܢܫܵܐ ܕܥܲܡܵܐ. ܡ̣ܢ ܟܠܵܗَ ܝܼܗܘܼܕ ܘܡ̣ܢ ܐܘܿܪܸܫܠܸܡ ܘܡ̣ܢ ܡܲܪܙܵܐ ܕܝܵܡܵܐ ܕܨܘܼܪ ܘܕܨܲܝܕܵܢ، ܕܐ݇ܬܹܐ ܠܗ݇ܘܿܢ ܕܫܲܡܥܝܼ ܗܲܡܙܲܡܬܹܗ. ܘܕܦܲܝܫܝܼ ܒܘܼܣܡܹܐ ܡ̣ܢ ܟܘܼܪ̈ܗܵܢܲܝܗܝ. ܘܐܲܝܢܝܼ ܕܦܝܵܫܵܐ ܗ݇ܘܵܐ ܡܘܼܠܝܸܨܹܐ ܡ̣ܢ ܪ̈ܘܼܚܹܐ ܛܲܢ̈ܦܵܬܵܐ ܘܦܲܝܫܝܼ ܗ݇ܘܵܘ ܒܘܼܣܡܹܐ. ܘܟܠܹܗ ܟܸܢܫܵܐ ܒܥܵܝܵܐ ܗ݇ܘܵܘ ܠܸܕܩܵܪܵܐ ܒܝܼܹܗ. ܣܵܒܵܒ ܚܲܝܠܵܐ ܟܹܐ ܦܵܠܸܛ ܗ݇ܘܵܐ ܡܸܢܹܗ ܘܠܟܠܲܝܗܝ ܟܹܐ ܒܵܣܸܡ ܗ݇ܘܵܐ. ܘܡܘܼܪܸܡܠܹܗ ܥܲܝ̈ܢܘܼܗܝ ܥܲܠ ܬܲܠܡܝܼܕܘܼ̈ܗܝ ܘܐ݇ܡܸܪܹܗ: ܛܘܼܒܼܵܐ ܐܸܠܵܘܟܼܘܿܢ ܡܸܣܟܹܢܹ̈ܐ. ܕܕܝܼܵܘܟܼܘܿܢ ܝܼܠܵܗَ ܡܲܠܟܘܼܬܵܐ ܕܐܲܠܵܗܵܐ. ܛܘܼܒܼܵܐ ܐܸܠܵܘܟܼܘܿܢ ܐܵܢܝܼ ܕܟܲܦܢܝܼ ܐܵܕܝܼܵܐ ܐܵܕܝܼܵܐ ܕܒܸܬ ܣܲܒܼܥܝܼܬܘܿܢ. ܛܘܼܒܼܵܐ ܐܸܠܵܘܟܼܘܿܢ ܐܵܢܝܼ ܕܒܵܟܼܝܼ ܐܵܕܝܼܵܐ ܒܸܬ ܓܲܚܟܝܼܬܘܿܢ. ܛܘܼܒܼܵܐ ܐܸܠܵܘܟܼܘܿܢ ܐܝܼܡܵܢ ܕܣܵܢܹܝܠܵܘܟܼܘܿܢ ܒܢܲܝ̈ܢܵܫܵܐ. ܘܦܲܪܫܝܼܠܵܘܟܼܘܿܢ ܘܠܲܝܡܝܼܠܵܘܟܼܘܿܢ، ܘܦܲܠܛܝܼ ܫܸܡܵܘܟܼܘܿܢ ܐܲܝܟܼ ܒܝܼܫܹ̈ܐ ܡܸܛܠ ܒܪܘܿܢܹܗ ܕܐ݇ܢܵܫܵܐ. ܚܕܹܝܡܘܿܢ ܒܗَܘ ܝܵܘܡܵܐ ܘܦܨܘܼܚܘܿܢ ܕܐܲܓܼܪܵܘܟܼܘܿܢ ܙܝܼܕܠܹܗ ܒܫܡܲܝܵܐ. ܣܵܒܵܒ ܗܲܕܟܼܵܐ ܟܹܐ ܥܲܒܼܕܝܼ ܗ݇ܘܵܘ ܐܲܒܼܵܗܵܬܲܝ̈ܗܝ ܠܢܒܼܝܼܹ̈ܐ. ܐܝܼܢܵܐ ܘܵܝ ܐܸܠܵܘܟܼܘܿܢ ܥܲܬܝܼܪܹ̈ܐ. ܕܩܘܼܒܸܠܵܘܟܼܘܿܢ ܝܲܗ݇ܒܼܲܠܬܵܐ ܕܠܸܒܵܘܟܼܘܿܢ. ܘܵܝ ܐܸܠܵܘܟܼܘܿܢ ܣܸܒܼܥܝܹ̈ܐ ܕܒܸܬ ܟܲܦܢܝܼܬܘܿܢ. ܘܵܝ ܠܐܵܢܝܼ ܕܓܲܚܟܝܼ ܐܵܕܝܼܵܐ ܕܒܸܬ ܒܵܟܼܝܼܬܘܿܢ ܘܒܸܬ ܥܲܒܼܕܝܼܬܘܿܢ ܬܵܥܙܝܼ. ܘܵܝ ܐܸܠܵܘܟܼܘܿܢ ܟܲܕ ܗܵܘܝܼ ܒܹܐܡܵܪܵܐ ܨܦܵܐܝܝܼ ܒܢܲܝ̈ܢܵܫܵܐ ܒܘܼܬ ܕܝܼܵܠَܘܟܼܘܢ، ܣܵܒܵܒ ܗܲܕܟܼܵܐ ܟܹܐ ܥܲܒܼܕܝܼ ܗ݇ܘܵܘ ܐܲܒܼܵܗܵܬܲܝ̈ܗܝ ܠܢܒܼܝܼܹ̈ܐ ܕܕܲܓܵܠܘܼܬܵܐ. ܐܝܼܢܵܐ ܐܸܠܵܘܟܼܘܿܢ ܕܒܸܫܡܵܥܵܐ ܝܢܵܐ ܒܹܐܡܵܪܵܐ ܝܘܸܢ: ܡܲܚܸܒܘܿܢ ܠܕܸܫܡܸܢܵܘܟܼܘܿܢ. ܘܥܒܼܘܼܕܘܿܢ ܨܦܵܝܘܼܬܵܐ ܠܐܲܝܢܝܼ ܕܣܵܢܝܼ ܐܸܠܵܘܟܼܘܿܢ. ܘܒܲܪܟܼܘܿܢ ܠܐܲܝܢܝܼ ܕܠܲܝܛܝܼ ܐܸܠܵܘܟܼܘܿܢ. ܘܨܵܠܹܝܡܘܿܢ ܒܘܼܬ ܐܲܝܢܝܼ ܕܠܲܒܠܝܼ ܐܸܠܵܘܟܼܘܿܢ ܒܚܲܝܠܵܐ. ܘܠܗَܘ ܕܡܵܚܹܐ ܠܘܼܟܼ ܥܲܠ ܦܲܟܘܼܟ، ܡܲܚܕܸܪ ܐܸܠܹܗ ܗَܘ ܐ݇ܚܹܪ݇ܢܵܐ. ܘܡ̣ܢ ܡ̇ܢ ܕܫܵܩܸܠ ܥܵܒܵܝܬܘܼܟܼ ܠܵܐ ܡܲܟܠܸܬ ܐܘܿܦ ܟܘܼܬܝܼܢܘܼܟܼ، ܠܟܠ ܕܛܵܠܸܒ ܡܸܢܘܼܟܼ ܗܲܒَܼܠܹܗ. ܘܡ̣ܢ ܡ̇ܢ ܕܫܵܩܸܠ ܕܕܝܼܠَܘܼܟܼ ܠܵܐ ܛܵܠܒܸܬܠܹܗ. ܘܕܲܐܟܼܝܼ ܕܒܲܣܡܵܐ ܠܵܘܟܼܘܿܢ ܕܥܲܒܼܕܝܼ ܒܢܲܝ̈ܢܵܫܵܐ ܩܵܬܵܘܟܼܘܿܢ. ܗܲܕܟܼܵܐ ܥܒܼܘܼܕܘܿܢ ܩܵܬܲܝܗܝ ܐܘܿܦ ܐܲܚܬܘܿܢ. ܣܵܒܵܒ ܐܸܢ ܡܲܚܸܒܝܼܬܘܿܢ ܠܐܲܝܢܝܼ ܕܡܲܚܸܒܝܼ ܠܵܘܟܼܘܿܢ. ܡܘܿܕܝܼ ܝܠܵܗَ ܛܲܒܼܬܵܘܟܼܘܿܢ؟ ܣܵܒܵܒ ܐܘܿܦ ܚܲܛܵܝܹ̈ܐ ܠܐܲܝܢܝܼ ܕܡܲܚܸܒܝܼܠܗ݇ܘܿܢ ܟܹܐ ܡܲܚܸܒܝܼ. ܘܐܸܢ ܥܲܒܼܕܝܼܬܘܿܢ ܛܲܒܼܬܵܐ ܠܐܲܝܢܝܼ ܕܥܲܒܼܕܝܼ ܛܲܒܼܬܵܐ ܐܸܠܵܘܟܼܘܿܢ. ܡܘܿܕܝܼ ܝܼܠܵܗَ ܛܲܒܼܬܵܘܟܼܘܿܢ؟ ܣܵܒܵܒ ܐܘܿܦ ܚܲܛܵܝܹ̈ܐ ܗܲܕܟܼܵܐ ܟܹܐ ܥܲܒܼܕܝܼ. ܘܐܸܢ ܝܲܗ݇ܒܼܝܼܬܘܿܢ ܒܕܲܝܢܵܐ ܠܡ̇ܢ ܕܣܲܦܪܝܼܬܘܿܢ ܕܦܲܝܫܝܼܬܘܿܢ ܦܸܪܥܝܹܐ ܡܸܢܹܗ. ܡܘܿܕܝܼ ܝܠܵܗَ ܛܲܒܼܬܵܘܟܼܘܿܢ؟ ܣܵܒܵܒ ܐܘܿܦ ܚܲܛܵܝܹ̈ܐ ܠܚܲܛܵܝܹ̈ܐ ܟܹܐ ܝܲܗܒܼܝܼ ܒܕܲܝܢܵܐ. ܕܗܲܕܟܼܵܐ ܦܲܝܫܝܼ ܦܸܪܥܝܹܐ. ܐܝܼܢܵܐ ܡܲܚܸܒܘܿܢ ܠܕܸܫܡܸܢܵܘ̈ܟܼܘܿܢ ܘܥܒܼܘܼܕܘܿܢ ܛܲܒܼܬܵܐ ܐܸܠܲܝܗܝ. ܘܗܲܒَܼܠܗܘܿܢ ܒܕܲܝܢܵܐ ܘܠܵܐ ܩܲܛܸܥܬܘܿܢ ܗܝܼܒܼܝܼ ܕܐ݇ܢܵܫܵܐ. ܘܒܸܬ ܗܵܘܹܐ ܪܵܒܵܐ ܐܲܓ݂ܪܵܘܟܼܘܿܢ ܘܒܸܬ ܗܵܘܹܝܬܘܿܢ ܒܢܘܿܢܹ̈ܐ ܕܪܵܡܵܐ. ܕܗَܘ ܒܲܣܝܼܡܵܐ ܝܠܹܗ ܥܲܠ ܒܝܼܫܹ̈ܐ ܘܥܲܠ ܟܵܦܘܿܪܹ̈ܐ. ܗܲܕܟܼܵܐ ܗ݇ܘܹܝܡܘܿܢ ܡܪ̈ܲܚܡܵܢܹܐ. ܕܲܐܟܼܝܼ ܕܐܘܿܦ ܒܵܒܵܘܟܼܘܿܢ ܡܪܲܚܡܵܢܵܐ ܝܠܹܗ. ܠܵܐ ܕܵܝܢܝܼܬܘܿܢ ܕܠܵܐ ܦܲܝܫܝܼܬܘܿܢ ܕܝܼܢܹܐ. ܠܵܐ ܕܲܒ̣ܩܝܼܬܘܿܢ ܓܢܵܗܵܐ ܘܠܹܐ ܦܲܝܫܝܼ ܕܒ̣ܝܼܩܹܐ ܓܢܵܗܵܘܟܼܘܿܢ. ܦܲܚܠܘܿܢ ܒܸܬ ܦܲܝܫܝܼܬܘܿܢ ܦܘܼܚܠܹܐ. ܗܲܒَܼܠܘܿܢ ܘܒܸܬ ܦܵܐܸܫ ܝܘܼܗ݇ܒܼܵܐ ܐܸܠܵܘܟܼܘܿܢ. ܒܟܝܵܠܬܵܐ ܛܵܒܼܬܵܐ ܘܕܝܼܫܬܵܐ ܘܫܦܝܼܟܼܬܵܐ ܒܸܬ ܕܵܪܝܼ ܓܵܘ ܥܘܼܒܵܘܟܼܘܿܢ. ܣܵܒܵܒ ܒܗَܝ ܟܝܵܠܬܵܐ ܕܟܵܝܠܝܼܬܘܿܢ ܒܸܬ ܦܵܐܸܫ ܟܝܼܠܵܐ ܐܸܠܵܘܟܼܘܿܢ. ܘܐ݇ܡܝܼܪܹܗ ܐܸܠܲܝܗܝ ܡܲܬܠܵܐ: ܩܵܡܘܿ ܒܡܵܨܹܐ ܣܲܡܝܵܐ ܠܣܲܡܝܵܐ ܠܠܵܒܘܼܠܹܐ؟ ܠܹܐ ܬܸܪܘܲܝܗܝ ܓܵܘ ܓܘܼܒܵܐ ܢܲܦܠܝܼ؟ ܠܲܝܬ ܬܲܠܡܝܼܕܵܐ ܕܒܘܼܫ ܓܘܼܪܵܐ ܡ̣ܢ ܪܵܒܝܼܹܗ. ܣܵܒܵܒ ܟܠ ܐ݇ܢܵܫܵܐ ܕܝܼܠܹܗ ܓܡܝܼܪܵܐ. ܒܸܬ ܗܵܘܹܐ ܐܲܝܟܼ ܪܵܒܝܼܹܗ. ܐܝܼܢܵܐ ܩܵܡܘܿܕܝܼ ܒܸܚܙܵܝܵܐ ܝܘܸܬ ܓܸܠܵܐ ܕܓܵܘ ܥܲܝܢܵܐ ܕܐܲܚܘܿܢܘܼܟܼ. ܐܝܼܢܵܐ ܩܵܪܝܼܬܵܐ ܕܓܵܘ ܥܲܝܢܘܼܟܼ ܠܹܐ ܝܠܵܗَ ܦܝܵܫܵܐ ܚܙܹܝܬܵܐ ܐܸܠܘܼܟܼ؟ ܝܲܢ ܕܲܐܟܼܝܼ ܒܡܵܨܸܬ ܠܹܐܡܵܪܵܐ ܠܐܲܚܘܿܢܘܼܟܼ: ܐܲܚܘܿܢܝܼ ܫܒܼܘܿܩ ܦܲܠܛܸܢ ܓܸܠܵܐ ܡ̣ܢ ܥܲܝܢܘܼܟܼ. ܕܗܵܐ ܩܵܪܝܼܬܵܐ ܕܒܥܲܝܢܘܼܟܼ ܠܹܐ ܝܠܵܗَ ܦܝܵܫܵܐ ܚܙܹܝܬܵܐ ܐܸܠܘܼܟܼ؟ ܢܵܣܸܒܼ ܒܐܲܦܹ̈ܐ. ܩܲܕ݇ܡܵܝܬܵܐ ܦܵܠܸܛ ܩܵܪܝܼܬܵܐ ܡ̣ܢ ܥܲܝܢܘܼܟܼ. ܘܗܿܝܓܵܗ ܒܸܬ ܦܲܝܫܵܐ ܚܙܹܝܬܵܐ ܐܸܠܘܼܟܼ ܠܦܵܠܘܼܛܹܐ ܓܸܠܵܐ ܡ̣ܢ ܥܲܝܢܵܐ ܕܐܲܚܘܿܢܘܼܟܼ. ܠܲܝܬ ܐܝܼܠܵܢܵܐ ܛܵܒܼܵܐ ܕܥܵܒܼܸܕ ܛܥܘܿܢܝܵܬܹ̈ܐ ܒܝܼܫܹ̈ܐ. ܐܘܿܦ ܠܵܐ ܐܝܼܠܵܢܵܐ ܒܝܼܫܵܐ ܕܥܵܒܼܸܕ ܛܥܘܿܢܝܵܬܹ̈ܐ ܛܵܒܼܹ̈ܐ. ܣܵܒܵܒ ܟܠ ܐܝܼܠܵܢܵܐ ܡ̣ܢ ܛܥܘܿܢܝܵܬܘܼ̈ܗܝ ܟܹܐ ܦܵܐܸܫ ܝܕܝܼܥܵܐ. ܣܵܒܵܒ ܠܹܐ ܠܵܩܛܝܼ ܡ̣ܢ ܟܝܼܬܒܼܹ̈ܐ ܬܹܐܢܹ̈ܐ. ܐܘܿܦ ܠܵܐ ܡ̣ܢ ܣܲܢܝܵܐ ܟܹܐ ܩܲܛܦܝܼ ܥܸܢܒܼܹ̈ܐ. ܓܲܒܼܪܵܐ ܛܵܒܼܵܐ ܡ̣ܢ ܚܸܙܝܼܢܹ̈ܐ ܛܵܒܼܹ̈ܐ ܕܓܵܘ ܠܸܒܹܗ ܟܹܐ ܦܵܠܸܛ ܛܵܒܼܵܬܹ̈ܐ. ܘܓܲܒܼܪܵܐ ܒܝܼܫܵܐ ܡ̣ܢ ܚܸܙܝܼܢܹ̈ܐ ܒܝܼܫܹܐ ܕܓܵܘ ܠܸܒܹܗ ܟܹܐ ܦܵܠܸܛ ܒܝܼ̈ܫܵܬܹܐ. ܣܵܒܵܒ ܡ̣ܢ ܙܵܘܕܘܼܢܝܘܼܬܵܐ ܕܠܸܒܵܐ ܟܹܐ ܗܲܡܙܸܡܝܼ ܣܸܦ̈ܘܵܬܹܐ. ܩܵܡܘܿܕܝܼ ܒܸܩܪܵܝܝܼ ܝܬܘܿܢ ܡܵܪܝܼ ܡܵܪܝܼ. ܘܡܸܢܕܝܼ ܕܒܹܐܡܵܪܹܐ ܝܘܸܢ ܐܸܠܵܘܟܼܘܿܢ ܠܹܐ ܝܬܘܿܢ ܒܸܥܒܼܵܕܵܐ؟.
♱♱♱♱♱♱♱♱♱
The Assyrian Church
of the East did not yet sanction this document.
|