ܚܲܕܼܒܫܲܒܵܐ ܕܐܲܪܒܥܵܐ ܕܣܘܼܒܵܪܵܐ
ܒܪܝܼܬܵܐ؛ ܟܕ؛ 50 ‐ ܫܘܼܠܵܡܵܐ.
ܬܸܒ̣ܘ ܘܲܫܠܵܘ ܒܪܝܼܬܵܐ ܣܸܦܪܵܐ ܩܲܕܡܵܝܵܐ ܕܐܘܿܪܵܝܬܵܐ.
ܐܲܚܲܝ̈ ܒܲܪܸܟ̣ܡܵܪܝ܀
ܓ̰ܘܼܘܸܒܠܗ݇ܘܿܢ ܠܵܒܲܢ ܘܒܬܘܼܐܹܝܠ ܘܐ݇ܡܸܪܗ݇ܘܿܢ؛ ܡ̣ܢ ܡܵܪܝܵܐ ܦܠܸܛܠܵܗ̇ ܐܵܗܵܐ ܗܹܡܸܙܡܵܢ؛ ܠܹܐ ܡܵܨܲܚ ܕܐܵܡܪܲܚܠܘܼܟܼ ܠܵܐ ܛܵܒ̣ܬܵܐ ܘܠܵܐ ܒܝܼܫܬܵܐ.܀ ܗܵܐ ܪܲܦܩܵܐ ܩܵܕ݇ܡܘܼܟܼ ܠܵܒܸܠ ܘܙܹܠ݇؛ ܘܚܘܼܫ ܗܵܘܝܵܐ ܒܲܟ̣ܬܵܐ ܩܵܐ ܒܪܘܿܢܵܐ ܕܡܵܪܘܼܟܼ؛ ܕܵܐܟ̣ܝܼ ܕܐ݇ܡܸܪܹܗ ܡܵܪܝܵܐ.܀ ܘܟܲܕ ܫܡܝܼܥ ܠܹܗ ܪܹܓܵܐ ܕܐܲܒ̣ܪܵܗܵܡ ܗܹܡܸܙܡܵܢܲܝ̈ܗܝ؛ ܣܓ̣ܸܕܠܹܗ ܥܲܠ ܐܲܪܥܵܐ ܩܵܕ݇ܡ ܡܵܪܝܵܐ.܀ ܘܦܘܼܠܸܛܠܹܗ ܪܹܓܵܐ ܡܵܐܢܹ̈ܐ ܕܕܲܗܒ̣ܵܐ؛ ܘܡܵܐܢܹ̈ܐ ܕܣܹܐܡܵܐ؛ ܘܠܒ̣ܸܫܝܵܬܹ̈ܐ ܘܝܘܼܗ݇ܒ̣ܸܠܹܗ ܩܵܐ ܪܲܦܩܵܐ؛ ܘܚܲܠܥܲܬܹ̈ܐ ܝܘܼܗ݇ܒ̣ܸܠܹܗ ܩܵܐ ܝܸܡܵܗ̇ ܘܐܵܚܘܿܢ̈ܘܵܬܵܗ̇.܀ ܐ݇ܟ̣ܸܠܗ݇ܘܿܢ ܘܫܬܹܐܠܗ݇ܘܿܢ ܗ̇ܘ ܘܐ݇ܢܵܫܹ̈ܐ ܕܥܲܡܹܗ ܘܒܸܬܠܗ݇ܘܿܢ ܒܠܲܝܠܹܐ. ܘܩܵܝܕܲܡܬܵܐ ܛܠܸܒܠܹܗ ܡܸܢܲܝܗܝ ܘܐ݇ܡܸܪܹܗ ܫܲܕܪܘܼܢ ܠܝܼ ܐܵܙܸܠ݇ܢ ܠܟܸܣ ܡܵܪܝܼ.܀ ܘܐ݇ܡܸܪܗ݇ܘܿܢ ܐܸܠܹܗ ܐܵܚܘܿܢ̈ܘܵܬܵܗ̇ ܘܝܸܡܵܗ̇. ܒܸܬ ܝܵܬܒ̣ܵܐ ܚܲܡܬܵܐ ܥܲܡܲܢ ܚܲܕ݇ ܝܲܪܚܵܐ ܐ݇ܚܹܪ݇ܢܵܐ؛ ܘܗܵܝܓܵܗ̇ ܒܸܬ ܐܵܙܵܠ݇ܐ.܀ ܘܗ̇ܘ ܐ݇ܡܸܪܹܗ ܐܸܠܲܝܗܝ؛ ܠܵܐ ܥܲܪܩܸܠܝܼܬܘܿܢ ܠܝܼ ܕܡܵܪܝܵܐ ܬܘܼܪܸܨܠܹܗ ܐܘܼܪܚܝܼ؛ ܫܲܕܪܘܼܢ ܠܝܼ ܐܵܙܹܠ݇ܢ ܠܟܸܣ ܡܵܪܝܼ. ܘܐ݇ܡܸܪܗ݇ܘܿܢ ܐܸܠܹܗ؛ ܒܸܬ ܩܵܪܲܚ ܠܚܲܡܬܵܐ ܘܒܲܩܪܲܚ ܡ̣ܢ ܦܘܼܡܵܗ̇.܀ ܘܩܸܪܝܵܐ ܠܗ݇ܘܿܢ ܠܪܲܦܩܵܐ ܘܐ݇ܡܸܪܗ݇ܘܿܢ ܐܸܠܵܗ̇. ܒܸܬ ܐܵܙܵܠܬ̇ܝ ܥܲܡ ܕܐܵܗܵܐ ܐ݇ܢܵܫܵܐ؟ ܘܗ̇ܝ ܐ݇ܡܸܪܵܗ̇؛ ܗܹܐ؛ ܒܸܬ ܐܵܙܵܠ݇ܢܝ.܀ ܗܵܕܟ̣ܵܐ ܫܘܼܕܪܵܐ ܠܗ݇ܘܿܢ ܠܪܲܦܩܵܐ ܚܵܬܲܝܗܝ؛ ܘܝܵܨܘܿܦܬܵܐ ܕܝܼܵܗ̇؛ ܘܪܹܓܵܐ ܕܐܲܒ̣ܪܵܗܵܡ ܘܐ݇ܢܵܫ̈ܘܼܗ̇.܀ ܘܒܘܼܪܟ̣ܵܐ ܠܗ݇ܘܿܢ ܪܲܦܩܵܐ ܚܵܬܲܝܗܝ؛ ܘܐ݇ܡܸܪܗ݇ܘܿܢ ܐܸܠܵܗ̇. ܚܵܬܲܢ ܗܵܘܝܵܬ̇ܝ ܐܲܠܦܹ̈ܐ ܘܪܸ̈ܒܘܵܬܹܐ. ܘܝܵܪܸܬ ܙܲܪܥܵܟ̣ܝ ܐܲܪ̈ܥܵܬܹܐ ܕܕܸܫ̰ܡܸܢ̈ܘܼܗܝ.܀ ܘܩܸܡܠܵܗ̇ ܪܲܦܩܵܐ ܘܥܠܲܝ̈ܡܵܬܵܗ̇؛ ܘܝ݇ܬܸܒ̣ܠܗ݇ܘܿܢ ܥܲܠ ܓܘܼܡܠܹ̈ܐ ܘܐ݇ܙܸܠܗ݇ܘܿܢ ܥܲܡ ܕܗ̇ܘ ܐ݇ܢܵܫܵܐ؛ ܘܠܘܼܒܸܠܹܗ ܪܹܓܵܐ ܠܪܲܦܩܵܐ ܘܐ݇ܙܸܠܹܗ.܀ ܘܐܝܼܣܚܲܩ ܒܹܐܬܵܝܵܐ ܗ݇ܘܵܐ ܡ̣ܢ ܒܹܪܵܐ ܕܚܲܝܵܐ ܚܙܵܢܝ؛ ܒܐܲܪܥܵܐ ܕܬܲܝܡܢܵܐ. ܘܦܠܸܛܠܹܗ ܐܝܼܣܚܲܩ ܠܸܚܕܵܪܵܐ ܓܵܘ ܕܸܫܬܵܐ ܒܥܸܕܵܢܵܐ ܕܪܲܡܫܵܐ؛ ܡܘܼܪܸܡܠܹܗ ܥܲܝܢ̈ܘܼܗܝ ܘܚܙܹܐܠܹܗ ܗܵܐ ܓܘܼܡܠܹ̈ܐ ܒܹܐܬܵܝܵܐ.܀ ܘܡܘܼܪܸܡܠܵܗ̇ ܪܲܦܩܵܐ ܥܲܝܢ̈ܘܼܗ̇ ܘܚܙܹܐܠܵܗ̇ ܠܐܝܼܣܚܲܩ؛ ܘܡܘܼܟܸܦܵܐ ܠܵܗ̇ ܓܵܢܵܗ̇ ܡܥܲܠ ܓܘܼܡܠܵܐ. ܘܐ݇ܡܸܪܵܗ̇ ܩܵܐ ܪܹܓܵܐ. ܡܵܢܝܼ ܝ݇ܠܹܗ ܐܵܗܵܐ ܐ݇ܢܵܫܵܐ ܕܒܹܐܬܵܝܵܐ ܝ݇ܠܹܗ ܓܵܘ ܕܸܫܬܵܐ ܠܐܘܼܪܚܲܢ؟ ܘܐ݇ܡܸܪܹܗ ܪܹܓܵܐ ܐܵܗܵܐ ܝ݇ܠܹܗ ܡܵܪܝܼ؛ ܘܫܩܸܠܵܗ̇ ܟ̰ܲܕܪܵܐ ܘܡܘܼܟܣܵܐ ܠܵܗ̇ ܓܵܢܵܗ̇. ܘܗܘܼܩܹܐ ܠܹܗ ܪܹܓܵܐ ܩܵܐ ܐܝܼܣܚܲܩ ܟܠܲܝܗܝ ܦܘܼܠܚܵܢܹ̈ܐ ܕܥܒ̣ܸܕܠܵܗ̇.܀ ܘܡܘܼܥܒ̣ܪܵܐ ܠܹܗ ܐܝܼܣܚܲܩ ܠܡܲܫܟܢܵܐ ܕܣܲܪܵܐ ܝܸܡܹܗ. ܘܫܩܝܼܠܵܐ ܠܹܗ ܪܲܦܩܵܐ؛ ܘܗܘܹܐ ܠܵܗ̇ ܩܵܬܹܗ ܒܲܟ̣ܬܵܐ؛ ܘܡܘܼܚܸܒܵܐ ܠܹܗ. ܘܫܩܸܠܹܗ ܠܸܒܵܐ ܐܝܼܣܚܲܩ ܡ̣ܢ ܒܵܬ݇ܪ ܡܵܘܬܵܐ ܕܝܸܡܹܗ.
ܚܲܒ̣ܪܹܗ
ܐ؛ ܫܡܘܼܐܹܝܠ ܐ؛ 1‐19
ܫܠܵܘ ܣܸܦܪܵܐ ܕܲܫܡܘܼܐܹܝܠ؛ ܐܲܚܲܝ̈ ܒܲܪܸܟ̣ܡܵܪ܀
ܐܝܼܬ ܗ݇ܘ̣ܵܐ ܚܲܕ݇ ܐ݇ܢܵܫܵܐ ܡ̣ܢ ܪܵܡܬܵܐ ܕܕܵܘܩܹܐ ܡ̣ܢ ܛܘܼܪܵܐ ܕܐܵܦܪܹܝܡ؛ ܫܸܡܹܗ ܗܲܠܩܵܢܵܐ؛ ܒܪܘܿܢܵܐ ܕܝܲܪܚܘܿܡ؛ ܒܪܘܿܢܵܐ ܕܐܹܠܝܼܗܘܿ؛ ܒܪܘܿܢܵܐ ܕܬܲܚܘܿ ܒܪܘܿܢܵܐ ܕܨܘܿܦ ܕܡ̣ܢ ܐܲܦܪܲܬ.܀ ܘܐܝܼܬ ܗ݇ܘܵܐ ܠܹܗ ܬܲܪ̈ܬܹܝ ܒܲܟ̣ܬܵܬܹ̈ܐ؛ ܫܸܡܵܐ ܕܚܕܵܐ ܚܲܢܵܐ ܘܫܸܡܵܐ ܕܗ̇ܝ ܐ݇ܚܹܪ݇ܬܵܐ ܦܲܢܵܐ. ܘܦܲܢܵܐ ܐܝܼܬ ܗ݇ܘܵܐ ܠܵܗ̇ ܒܢܘܿܢܹ̈ܐ؛ ܘܚܲܢܵܐ ܠܲܝܬ̇ ܗ݇ܘܵܐ ܠܵܗ̇ ܒܢܘܿܢܹ̈ܐ.܀ ܒܟܠ ܫܹܢ݇ܬܵܐ ܐܵܣܸܩ ܗ݇ܘܵܐ ܐܵܗܵܐ ܐ݇ܢܵܫܵܐ ܡ̣ܢ ܡܵܬܹܗ ܠܸܣܓ̣ܵܕܵܐ ܘܠܡܲܩܪܘܼܒ̣ܹܐ ܕܸܒ̣ܚܹ̈ܐ ܠܡܵܪܝܵܐ ܨܒ̣ܵܐܘܼܬ ܒܫܝܼܠܘܿ؛ ܘܚܲܦܢܝܼ ܘܦܝܼܢܚܸܣ ܬܪܹܝ ܒܢܘܿܢܹ̈ܐ ܕܥܸܠܝܼ؛ ܟܵܗܢܹ̈ܐ ܕܡܵܪܝܵܐ ܬܵܡܵܐ ܗ݇ܘ̣ܵܘ.܀ ܒܚܲܕ݇ ܡ̣ܢ ܝܵܘܡܵܢܹ̈ܐ ܥܒ̣ܸܕܠܹܗ ܕܸܒ̣ܚܵܐ ܗܲܠܩܵܢܵܐ؛ ܘܝܘܼܗܒ̣ܸܠܹܗ ܩܵܐ ܦܲܢܵܐ ܒܲܟ̣ܬܹܗ ܘܩܵܐ ܟܠܲܝܗܝ ܒܢܘܿܢ̈ܘܿܗ̇ ܘܒܢܵܬ̈ܘܿܗ̇ ܣܵܡܵܐ ܡ̣ܢ ܕܸܒ̣ܚܵܐ؛ ܘܩܵܐ ܚܲܢܵܐ ܝܘܼܗܒ̣ܸܠܹܗ ܣܵܡܵܐ ܚܲܕ ܒܬܪܹܝ؛ ܣܵܒܵܒ ܩܵܐ ܚܲܢܵܐ ܒܘܼܫ ܟܹܐ ܡܲܚܸܒ ܗ݇ܘܵܐ. ܘܡܵܪܝܵܐ ܕܒ̣ܸܩܠܹܗ ܡܲܪܒܥܵܗ̇. ܘܡܲܟܪܸܒܵܐ ܗ݇ܘܵܐ ܠܵܗ̇ ܥܵܪܬܵܗ̇ ܩܵܐ ܕܗܵܘܝܵܐ ܦܫܝܼܡܬܵܐ؛ ܣܵܒܵܒ ܡܵܪܝܵܐ ܕܒ̣ܸܩܠܹܗ ܡܲܪܒܥܵܗ̇. ܗܲܕܟ̣ܵܐ ܥܵܒ̣ܕܵܐ ܗ݇ܘܵܐ ܦܲܢܵܐ ܒܟܠ ܫܹܢ݇ܬܵܐ؛ ܐܝܼܡܲܢ ܕܐܵܣܩܵܐ ܗ݇ܘܵܐ ܠܒܲܝܬܹܗ ܕܡܵܪܝܵܐ. ܗܵܕܟ̣ܵܐ ܡܲܟܪܸܒܵܐ ܗ݇ܘܵܐ ܠܵܗ̇؛ ܘܒܟ̣ܹܐ ܠܵܗ̇ ܚܲܢܵܐ ܘܠܵܐ ܐ݇ܟ̣ܸܠܵܗ̇.܀ ܘܐ݇ܡܸܪܹܗ ܐܸܠܵܗ̇ ܗܲܠܩܵܢܵܐ ܓܲܒ̣ܪܵܗ̇؛ ܩܵܡܘܿܕܝܼ ܒܸܟ̣ܝܵܐ ܝ݇ܘܲܬ̇ܝ ܚܲܢܵܐ؟ ܘܩܵܡܘܿ ܠܵܐ ܐ݇ܟ̣ܸܠܵܟ̣ܝ؟ ܩܵܡܘܿ ܗܵܕܟ̣ܵܐ ܠܸܒܵܟ̣ܝ ܚܸܪܒܵܐ ܝ݇ܠܹܗ.؟ ܐܵܢܵܐ ܒܘܼܫ ܨܦܵܝܝܼ ܝ݇ܘܸܢ ܩܵܬܵܟ̣ܝ ܡ̣ܢ ܥܸܣܪܵܐ ܒܢܘܿܢܹ̈ܐ.܀ ܘܩܸܡܠܵܗ̇ ܚܲܢܵܐ ܡ̣ܢ ܒܵܬ݇ܪ ܕܐ݇ܟ̣ܸܠܵܗ̇ ܒܫܝܼܠܘܿ ܘܡ̣ܢ ܒܵܬ݇ܪ ܕܫܬܹܐܠܵܗ̇. ܘܥܸܠܝܼ ܟܵܗܢܵܐ ܝ݇ܬܝܼܒ̣ܵܐ ܗ݇ܘܵܐ ܥܲܠ ܟܘܼܪܣܝܼ ܩܵܕ݇ܡ ܐ݇ܣܩܘܼܦܬܵܐ ܕܗܲܝܟܠܹܗ ܕܡܵܪܝܵܐ.܀ ܘܚܲܢܵܐ ܪܵܒܵܐ ܟܪܝܼܒܬܵܐ ܗ݇ܘܵܐ؛ ܘܨܘܼܠܹܐ ܠܵܗ̇ ܩܵܕ݇ܡ ܡܵܪܝܵܐ ܘܒܟ̣ܹܐܠܵܗ̇.܀ ܢܕܸܪܵܗ̇ ܢܸܕܪܵܐ ܠܡܵܪܝܵܐ ܘܐ݇ܡܸܪܵܗ̇؛ ܝܵܐ ܡܵܪܝܵܐ ܨܒ̣ܵܐܘܼܬ؛ ܐܸܢ ܓܲܫܩܸܬ̇ ܒܙܠܘܼܡܝܵܐ ܕܚܸܕܲܡܬܘܼܟܼ؛ ܘܕܲܟ̣ܪܸܬ̇ܠܝܼ ܘܠܵܐ ܡܲܢܫܸܬ̇ ܠܝܼ؛ ܘܝܵܗܒ̣ܸܬ̇ ܩܵܐ ܚܸܕܲܡܬܘܼܟܼ ܙܲܪܥܵܐ ܕܐ݇ܢܵܫܵܐ؛ ܒܸܬ ܝܵܗܒ̣ܸܢܹܗ ܩܵܐ ܡܵܪܝܵܐ ܟܠܲܝܗܝ ܝܵܘܡܵܢܹ̈ܐ ܕܚܲܝ̈ܘܼܗܝ ܘܡܲܓܪܵܥܝܬܵܐ ܠܹܐ ܐܵܣܩܵܐ ܥܲܠ ܪܹܫܹܗ.܀ ܟܲܕ ܨܘܼܠܹܐܠܵܗ̇ ܪܵܒܵܐ ܒܠܸܒܵܐ ܝ݇ܩܝܼܕܵܐ ܩܵܕ݇ܡ ܡܵܪܝܵܐ؛ ܘܥܸܠܝܼ ܓܵܫܘܿܩܹܐ ܗ݇ܘܵܐ ܠܦܘܼܡܵܗ̇. ܘܚܲܢܵܐ ܒܠܸܒܵܗ̇ ܗ݇ܘܵܐ ܗܲܡܙܘܼܡܹܐ ܐܲܚܟ̰ܝܼ ܘܣܸܦ̈ܘܵܬܵܗ̇ ܒܸܓ̰ܘܵܓ̰ܵܐ ܗ݇ܘܵܐ. ܘܩܵܠܵܗ̇ ܠܹܐ ܗ݇ܘܵܐ ܦܝܵܫܵܐ ܫܸܡܥܝܵܐ؛ ܘܚܘܼܫܒܸܢܵܗ̇ ܠܹܗ ܥܸܠܝܼ ܐܲܝܟܼ ܪܵܘܵܝܬܵܐ. ܘܐ݇ܡܸܪܹܗ ܐܸܠܵܗ̇ ܥܸܠܝܼ؛ ܗܲܠ ܐܝܼܡܲܢ ܒܸܬ ܗܵܘܝܵܬ̇ܝ ܪܵܘܵܝܬܵܐ ܡܲܦܸܓ̣ܝ ܚܲܡܪܵܟ̣ܝ ܡܸܢܵܟ̣ܝ.܀ ܓ̰ܘܼܘܸܒܠܵܗ̇ ܚܲܢܵܐ ܘܐ݇ܡܸܪܵܗ̇؛ ܠܵܐ ܡܵܪܝܼ؛ ܚܲܕ݇ ܒܲܟ̣ܬܵܐ ܝ݇ܘܵܢܝ ܡܘܼܠܝܸܨܬܵܐ ܕܪܘܼܚܵܐ؛ ܘܚܲܡܪܵܐ ܘܥܵܪܲܩ ܠܹܐ ܝ݇ܘܵܢܝ ܫܬܝܼܬܵܐ. ܐܵܕܝܼܵܐ ܪܘܼܦܹܐܠܝܼ ܓܵܢܝܼ ܩܵܕ݇ܡ ܡܵܪܝܵܐ.܀ ܠܵܐ ܚܲܫܒܸܢܸܬ̇ ܠܵܗ̇ ܚܸܕܲܡܬܘܼܟܼ ܒܪܵܬܵܐ ܕܚܛܝܼܬܵܐ. ܣܵܒܵܒ ܡ̣ܢ ܒܘܼܫܵܝܘܼܬܵܐ ܕܥܸܩܘܿܘܝܼ ܘܕܟܲܪܒܝܼ ܗܘܼܡܙܸܡܠܝܼ ܗܲܠ ܐܵܕܝܼܵܐ.܀ ܓ̰ܘܼܘܸܒܠܹܗ ܥܸܠܝܼ ܘܐ݇ܡܸܪܹܗ ܐܸܠܵܗ̇. ܙܹܠ݇ܝ ܒܫܠܵܡܵܐ؛ ܘܐܲܠܵܗܵܐ ܕܝܼܣܪܵܝܹܠ ܝܵܗܒ̣ܸܠܵܟ̣ܝ ܡܲܛܠܲܒ ܕܛܠܸܒܠܵܟ̣ܝ ܡܸܢܹܗ.܀ ܘܐ݇ܡܸܪܵܗ̇ ܐܸܠܹܗ ܡܲܫ݇ܟ̰ܚܵܐ ܚܸܕܲܡܬܘܼܟܼ ܪ̈ܲܚܡܹܐ ܒܥܲܝܢ̈ܘܼܟܼ. ܘܐ݇ܙܸܠܵܗ̇ ܒܲܟ̣ܬܵܐ ܠܐܘܼܪܚܵܗ̇. ܘܦܵܬܵܗ̇ ܠܵܐ ܦܫܸܡܠܵܗ̇ ܡܸܕܪܹܐ.
♱♱♱♱♱♱♱♱♱♱♱♱♱♱
ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ
ܕܲܠܘܵܬܼ ܐܵܦܸܣܵܝܹ̈ܐ ܐܲܚܲܝ̈ ܒܲܪܸܟܼܡܵܪܝ܀
ܐܵܗܵܐ ܒܵܥܝܸܢ ܕܝܵܕܥܝܼܬܘܿܢ؛ ܕܟܠ ܐ݇ܢܵܫܵܐ ܕܝܼܠܹܗ ܙܲܢܵܝܵܐ ܝܲܢ ܟ̰ܲܦܵܠ ܝܲܢ ܟ̰ܵܠܘܿܓ̰ܵܐ ܝܲܢ ܣܵܓܼܕܵܢܵܐ ܕܨܵܢܲܡܹ̈ܐ؛ ܠܲܝܬ ܠܹܗ ܝܵܪܬܘܼܬܵܐ ܓܵܘ ܡܲܠܟܘܼܬܵܐ ܕܡܫܝܼܚܵܐ ܘܕܐܲܠܵܗܵܐ* ܠܵܐ ܗܵܘܝܵܐ ܕܚܲܕ݇ ܐ݇ܢܵܫܵܐ ܡܲܚܠܸܛ ܠܵܘܟܼܘܿܢ ܒܗܹܡܸܙܡܵܢܹ̈ܐ ܒܲܛܝܼܠܹ̈ܐ. ܒܣܵܒܵܒ ܕܐܲܢܹܐ؛ ܟܲܪܒܹܗ ܕܐܲܠܵܗܵܐ ܒܸܬ ܐܵܬܹܐ ܥܲܠ ܒܢܘܼܢܹ̈ܐ ܠܵܐ ܡܲܨܝܸܬܵܢܹ̈ܐ* ܒܘܼܬ ܕܐܵܗܵܐ؛ ܠܵܐ ܗܵܘܝܼܬܘܿܢ ܫܲܪ̈ܝܼܟܹܐ ܥܲܡܲܝܗܝ* ܡ̣ܢ ܩܲܕ݇ܡܵܝܬܵܐ ܐܲܚܬܘܿܢ ܚܸܫܟܵܢܹ̈ܐ ܝ݇ܬܘܿܢ ܗ݇ܘܵܘ؛ ܐܝܼܢܵܐ ܐܵܕܝܼܵܐ ܒܲܗܪܵܐ ܝ݇ܬܘܿܢ ܒܡܵܪܲܢ* ܒܘܼܬ ܕܐܵܗܵܐ؛ ܓܵܪܲܓ ܦܵܠܚܝܼܬܘܿܢ ܐܲܝܟܼ ܒܢܘܼܢܹ̈ܐ ܕܒܲܗܪܵܐ ܣܵܒܵܒ ܛܥܘܼܢܝܵܬܹ̈ܐ ܕܒܲܗܪܵܐ؛ ܟܠܲܝܗܝ ܙܲܕܝܼܩܘܼܬܵܐ ܝ݇ܢܵܐ ܘܛܵܒܼܘܼܬܵܐ ܘܗܵܩܘܼܬܵܐ* ܗܵܘܝܼܬܘܿܢ ܒܸܦܪܵܫܵܐ ܡܘܼܕܝܼ ܝ݇ܠܹܗ ܛܵܒܼܵܐ ܩܵܕ݇ܡ ܡܵܪܲܢ* ܠܵܐ ܗܵܘܝܼܬܘܿܢ ܫܲܪ̈ܝܼܟܹܐ ܥܲܡ ܦܘܼܠܚܵܢܹ̈ܐ ܕܚܸܫܟܵܐ ܕܠܲܝܬܠܗ݇ܘܿܢ ܛܥܘܼܢܝܵܬܹ̈ܐ؛ ܐܸܠܵܐ ܗܵܘܝܼܬܘܿܢ ܡܲܣܠܘܼܝܹܐ ܐܸܠܲܝܗܝ* ܗ̇ܘ ܡܸܢܕܝܼ ܕܒܛܸܫܘܵܐ ܥܵܒܼܕܝܼܬܘܿܢ؛ ܓܘܼܢܓܸܙܵܐ ܝ݇ܠܹܗ ܐܘܼܦ ܩܵܐ ܗܲܡܙܲܡܬܹܗ. ܟܠ ܡܸܢܕܝܼ ܦܵܐܸܫ ܡܘܼܣܠܝܼܵܐ ܘܥܒܼܝܼܕܵܐ ܐܲܫܟܵܪܵܐ ܡ̣ܢ ܒܲܗܪܵܐ. ܘܟܠ ܡܸܢܕܝܼ ܕܝܼܠܹܗ ܐܲܫܟܵܪܵܐ ܒܲܗܪܵܐ ܝ݇ܠܹܗ* ܩܵܐ ܕܐܵܗܵܐ ܣܵܒܵܒ؛ ܦܝܼܫܬܵܐ ܝ݇ܠܵܗ̇ ܐ݇ܡܝܼܪܬܵܐ؛ ܪܥܘܿܫ ܝܵܐ ܕܡܝܼܟܼܵܐ ܘܩܘܼܡ ܡ̣ܢ ܓܵܘ ܡܝܼܬܹ̈ܐ؛ ܘܒܸܬ ܒܲܗܕܸܢܘܼܟܼ ܡܫܝܼܚܵܐ* ܬܲܚܡܸܢܗ݇ܘܿܢ ܕܵܐܟܼܝܼ ܚܵܕܪܝܼܬܘܿܢ ܒܗܸܫܝܵܪܘܼܬܵܐ؛ ܘܠܵܐ ܐܲܝܟܼ ܣܲܟܼܠܹ̈ܐ؛ ܐܝܼܢܵܐ ܐܲܝܟܼ ܗܵܘܢܵܢܹ̈ܐ ܕܙܵܒܼܢܝܼ ܕܲܥܘܝܲܝܗܝ ܣܵܒܵܒ ܕܝܵܘܡܵܢܹ̈ܐ ܒܝܼܫܹ̈ܐ ܝ݇ܢܵܐ* ܠܵܐ ܗܵܘܝܼܬܘܿܢ ܒܵܨܘܿܪܹ̈ܐ ܕܗܵܘܢܵܐ ܐܸܠܵܐ ܦܲܪܡܹܐܡܘܿܢ ܡܘܼܕܝܼ ܝ݇ܠܹܗ ܪܸܙܵܝܵܐ ܕܐܲܠܵܗܵܐ* ܠܵܐ ܗܵܘܝܼܬܘܿܢ ܪ̈ܵܘܵܝܸܐ ܒܚܲܡܪܵܐ ܕܒܝܼـܹܗ ܐܝܼܬܼ ܐܵܣܘܿܛܘܼܬܵܐ. ܐܸܠܵܐ ܦܘܼܫܘܼܢ ܡܸܠܝܹܐ ܒܪܘܼܚܵܐ* ܘܗܲܡܙܸܡܘܿܢ ܥܲܡ ܓܵܢܵܘܟܼܘܿܢ ܒܡܲܙܡܘܿܪܹ̈ܐ ܘܬܸܫܒܘܿܚܝܵܬܹ̈ܐ؛ ܘܒܙܡܲܪ̈ܝܵܬܹܐ ܕܪܘܼܚܵܐ ܗܵܘܝܼܬܘܿܢ ܒܸܙܡܵܪܵܐ ܒܠܸܒܵܘܵܬܵܘ̈ܟܼܘܿܢ ܠܡܵܪܝܵܐ* ܘܗܵܘܝܼܬܘܿܢ ܡܵܘܕܘܿܝܹܐ ܒܟܠ ܥܕܵܢܵܐ ܡ̣ܢ ܒܵܕܲܠ ܕܟܠ ܐ݇ܢܵܫܵܐ ܒܫܸܡܹܗ ܕܡܵܪܲܢ ܝܼܫܘܿܥ ܡܫܝܼܚܵܐ ܠܐܲܠܵܗܵܐ ܒܵܒܵܐ؛ ܐܵܡܹܝܢ*
♱♱♱♱♱♱♱♱♱♱♱♱♱♱
ܡܬܝ ܐ : 18 ‐ ܫܘܼܠܵܡܵܐ
ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ ܟܪܘܙܘܬܼܐ ܕܡܬܝ
♰ ܐܝܼܢܵܐ ܝܲܠܕܹܗ ܕܝܼܫܘܿܥ ܡܫܝܼܚܵܐ ܗܲܕܟܼܵܐ ܝܗ݇ܘܵܐ: ܟܲܕ ܛܠܝܼܒܬܵܐ ܝܗ݇ܘܵܐ ܡܲܪܝܲܡ ܝܸܡܹܗ ܠܝܵܘܣܸܦ: ܗܵܠܵܐ ܠܵܐ ܡܫܵܘܬܦܹܗ، ܦܝܼܫܠܵܗ̇ ܡܫ݇ܟ̰ܝܼܚܬܵܐ ܒܛܝܼܢܬܵܐ ܡ̣ܢ ܪܘܼܚܵܐ ܕܩܘܼܕܫܵܐ: ܐܝܼܢܵܐ ܝܵܘܣܸܦ ܒܲܥܠܵܗ̇ ܟܹܐܢܵܐ ܝܗ݇ܘܵܐ: ܘܠܵܐ ܒܣܝܼܡܠܵܐ ܠܹܗ ܕܥܵܒܼܸܕܠܵܗ̇ ܐܸܫܟܵܪܵܐ: ܘܬܘܼܚܡܸܢܹܗ ܕܒܛܸܫܘܵܐ ܫܵܪܹܐ ܠܵܗ̇: ܐܝܼܢܵܐ ܟܲܕ ܐܲܢܹܐ ܬܘܼܚܡܸܢܹܗ: ܦܝܼܫܠܹܗ ܚܸܙܝܵܐ ܐܸܠܹܗ ܡܲܠܲܐܟܼܵܐ ܕܡܵܪܝܵܐ ܒܚܸܠܡܵܐ ܘܐ݇ܡܝܼܪܹܗ ܐܸܠܹܗ: ܝܵܘܣܸܦ ܒܪܘܿܢܵܐ ܕܕܵܘܝܼܕ: ܠܵܐ ܙܵܕܥܸܬ ܠܸܫܩܵܠܵܐ ܠܡܲܪܝܲܡ ܒܲܟܼܬܘܼܟܼ: ܣܵܒܵܒ ܗ̇ܘ ܕܦܵܐܸܫ ܝܠܝܼܕܵܐ ܒܝܼܵܗ̇ ܡ̣ܢ ܪܘܼܚܵܐ ܕܩܘܼܕܫܵܐ ܝܠܹܗ: ܐܝܼܢܵܐ ܒܸܕ ܝܲܠܕܵܐ ܒܪܘܿܢܵܐ، ܘܒܸܕ ܩܵܪܸܬ ܫܸܡܹܗ ܝܑܼܫܘܿܥ، ܣܵܒܵܒ ܗ̇ܘ ܒܸܕ ܡܲܚܹܐ ܠܥܲܡܹܗ ܡ̣ܢ ܚܛܝܼܵܬܲܝ̈ܗܝ. ܐܝܼܢܵܐ ܐܵܗܵܐ ܟܠܵܗ̇ ܕܗ݇ܘܹܐ ܠܵܗ̇، ܕܦܵܐܸܫ ܬܘܼܡܸܡܵܐ ܡܸܢܕܝܼ ܕܦܝܼܫܠܹܗ ܐ݇ܡܝܼܪܵܐ ܡ̣ܢ ܡܵܪܝܵܐ ܒܝܲܕ ܢܒܼܝܼܵܐ: ܕܗܵܐ ܒܬܘܼܠܬܵܐ ܒܸܕ ܒܲܛܢܵܐ ܘܒܸܕ ܝܲܠܕܵܐ ܒܪܘܿܢܵܐ: ܘܒܸܕ ܩܵܪܝܼ ܫܸܡܹܗ ܥܲܡܵܢܘܼܐܹܝܠ: ܕܦܝܵܫܵܐ ܝܠܹܗ ܬܘܼܪܓܸܡܵܐ ܥܲܡܲܢ ܐܲܠܵܗܲܢ. ܐܝܼܢܵܐ ܟܲܕ ܩܝܼܡܠܹܗ ܝܵܘܣܸܦ ܡ̣ܢ ܫܸܢܬܹܗ: ܥܒܼܝܼܕܠܹܗ ܕܲܐܟܼܝܼ ܕܦܩܝܼܕܠܹܗ ܐܸܠܹܗ ܡܲܠܲܐܟܼܹܗ ܕܡܵܪܝܵܐ ܘܠܘܼܒܠܵܐ ܠܹܗ ܠܒܲܟܼܬܹܗ: ܘܠܵܐ ܝܕܝܼܥܵܐ ܠܹܗ ܗܲܠ ܕܝܠܝܼܕܠܵܗ̇ ܠܒܪܘܿܢܵܗ̇ ܒܘܼܟܼܪܵܐ ܘܩܪܹܐܠܵܗ̇ ܫܸܡܹܗ ܝܑܼܫܘܿܥ.
♱♱♱♱♱♱♱♱♱♱♱♱♱♱