ܚܲܕܼܒܫܲܒܵܐ ܕܲܬ̣ܠܵܬ̣ܵܐ ܕܩܲܝܛܵܐ

ܬܢܹܝܢ ܢܵܡܘܿܣܵܐ؛ ܗ؛ 1‐17

ܬܸܒ̣ܘ ܘܲܫܠܵܘ ܬܸܢܝܵܢ ܢܵܡܘܿܣܵܐ ܣܸܦܪܵܐ ܕܚܲܡܫܵܐ ܕܐܘܿܪܵܝܬܵܐ؛

ܐܲܚܲܝ̈ ܒܲܪܸܟ̣ܡܵܪܝ܀

ܘܩܪܹܐܠܹܗ ܡܘܼܫܹܐ ܠܟܠܹܗ ܝܼܣܪܵܝܹܠ؛ ܘܐ݇ܡܸܪܹܗ ܐܸܠܲܝܗ‌ܝ؛ ܫܡܝܼܥ ܝܼܣܪܵܝܹܠ ܢܵܡܘܿܣܹ̈ܐ ܘܕܝܼܘܵܢܹ̈ܐ ܕܐܵܡܪܸܢ ܩܵܕ݇ܡܵܘܟ̣ܘܿܢ ܒܐܵܗܵܐ ܝܵܘܡܵܐ؛ ܕܝܵܠܦܝܼܬܘܿܢ ܘܢܵܛܪܝܼܬܘܿܢ ܘܥܵܒ̣ܕܝܼܬܘܿܢ ܠܗ݇ܘܿܢ܀ ܡܵܪܝܵܐ ܐܲܠܵܗܲܢ ܡܘܼܩܸܡܠܹܗ ܥܲܡܲܢ ܩܵܘܠܵܐ ܒܚܘܿܪܝܼܒ̣܀ ܠܹܐ ܗ݇ܘܵܐ ܥܲܡ ܐܲܒ̣ܵܗܲܝ̈ܢ ܡܘܼܩܝܸܡܵܐ ܡܵܪܝܵܐ ܐܵܗܵܐ ܩܵܘܠܵܐ؛ ܐܸܠܵܐ ܥܲܡܲܢ؛ ܐܲܚܢܲܢ ܕܠܲܐܟ̣ܵܐ ܝ݇ܘܲܚ ܒܐܵܗܵܐ ܝܵܘܡܵܐ؛ ܘܟܠܲܢ ܚܵܝܹܐ ܝ݇ܘܲܚ܀ ܦܵܬܵܐ ܒܲܪܩܘܼܒ̣ܠ ܦܵܬܵܐ ܗܘܼܡܙܸܡܠܹܗ ܡܵܪܝܵܐ ܥܲܡܵܘܟ̣ܘܿܢ ܒܛܘܼܪܵܐ ܡ̣ܢ ܓܵܘ ܢܘܼܪܵܐ܀ ܘܐܵܢܵܐ ܟܸܠܝܵܐ ܝ݇ܘܸܢ ܗ݇ܘܵܐ ܒܹܝܠ ܡܵܪܝܵܐ ܘܒܹܝܠܵܘܟ̣ܘܿܢ ܒܗ̇‌ܝ ܥܸܕܵܢܵܐ؛ ܕܡܲܚܙܸܢܵܘܟ̣ܘܿܢ ܚܲܒܪܹ̈ܐ ܕܡܵܪܝܵܐ ܐܲܠܵܗܵܘܟ̣ܘܿܢ. ܟܲܕ ܙܕܝܼܥܠܵܘܟ̣ܘܿܢ ܡ̣ܢ ܩܵܕ݇ܡ ܢܘܼܪܵܐ؛ ܘܠܵܐ ܐ݇ܣܸܩܠܵܘܟ̣ܘܿܢ ܠܛܘܼܪܵܐ؛ ܘܐ݇ܡܸܪܹܗ܀ ܐܵܢܵܐ ܝ݇ܘܸܼܢ ܡܵܪܝܵܐ ܐܲܠܵܗܘܼܟܼ ܕܩܲܡ ܦܲܠܛܸܢܘܼܟܼ ܡ̣ܢ ܐܲܪܥܵܐ ܕܡܸܨܪܹܝܢ؛ ܡ̣ܢ ܒܲܝܬܵܐ ܕܪܹܓܘܼܬܵܐ܀ ܠܵܐ ܗܵܘܹܐܠܘܼܟܼ ܐܲܠܵܗܵܐ ܐ݇ܚܹܪ݇ܢܵܐ ܫܒ̣ܘܿܩ ܡܸܢܝܼ܀ ܠܵܐ ܥܵܒ̣ܕܸܬ̇ ܠܘܼܟܼ ܨܲܠܡܵܐ ܘܟܠ ܕܵܡܲܝܬܵܐ؛ ܕܐܝܼܬ ܒܫܡܲܝܵܐ ܡ̣ܢ ܥܘܼܠܘܼܠ ܘܕܐܝܼܬ ܒܐܲܪܥܵܐ ܡ̣ܢ ܐܸܠܬܸܚܬ̇؛ ܘܕܐܝܼܬ ܒܡܝܼܵܐ ܠܐܸܠܬܸܚܬ̇ ܡ̣ܢ ܐܲܪܥܵܐ܀ ܠܵܐ ܣܵܓ̣ܕܸܬ̇ ܠܗ݇ܘܿܢ؛ ܘܠܵܐ ܦܵܠܚܸܬ̇ ܠܗ݇ܘܿܢ؛ ܣܵܒܵܒ ܕܐܵܢܵܐ ܝ݇ܘܸܢ ܡܵܪܝܵܐ ܐܲܠܵܗܘܼܟܼ؛ ܐܲܠܵܗܵܐ ܛܲܢܵܢܵܐ؛ ܦܵܪܥܵܢܵܐ ܕܓܢܵܗܹ̈ܐ ܕܐܲܒ̣ܵܗܹ̈ܐ ܥܲܠ ܒܢܘܿܢܹ̈ܐ ܩܵܐ ܬܠܵܬܵܐ ܘܐܲܪܒܥܵܐ ܕܵܘܪܹ̈ܐ ܠܣܵܢܝܵܢ̈ܝܼ. ܘܥܵܒ̣ܕܸܢ ܫܵܦܵܩܲܬ ܠܐܲܠܦܹ̈ܐ ܕܕܵܘܪܹ̈ܐ ܠܡܲܚܸܒܵܢ̈ܝܼ ܘܢܵܛܪ̈ܵܢܹܐ ܕܦܘܼܩܕܵܢ̈ܝܼ܀ ܠܵܐ ܝܵܡܸܬ̇ ܒܫܸܡܵܐ ܕܡܵܪܝܵܐ ܐܲܠܵܗܘܼܟܼ ܒܕܘܼܓܠܵܐ؛ ܣܵܒܵܒ ܕܠܹܐ ܡܚܵܠܸܨ ܡܵܪܝܵܐ ܠܡ̇ܢ ܕܝܵܡܹܐ ܒܫܸܡܹܗ ܒܕܘܼܓܠܵܐ܀ ܢܛܘܿܪ ܝܵܘܡܵܐ ܕܫܲܒܬܵܐ ܘܩܵܕܸܫܠܹܗ؛ ܐܲܝܟܼ ܕܩܲܡ ܦܵܩܸܕܠܘܼܟܼ ܡܵܪܝܵܐ ܐܲܠܵܗܘܼܟܼ܀ ܐܸܫܬܵܐ ܝܵܘܡܵܢܹ̈ܐ ܦܵܠܚܸܬ̇ ܘܥܵܒ̣ܕܸܬ̇ ܟܠ ܦܘܼܠܚܵܢܘܼܟܼ܀ ܘܝܵܘܡܵܐ ܕܫܲܒ̣ܥܵܐ ܫܲܒܬܵܐ ܠܡܵܪܝܵܐ ܐܲܠܵܗܘܼܟܼ. ܠܵܐ ܥܵܒ̣ܕܸܬ̇ ܒܝܼܹܗ ܟܠ ܦܘܼܠܚܵܢܵܐ؛ ܐܲܢ݇ܬ̇ ܘܒܪܘܿܢܘܼܟܼ ܘܒܪܵܬܘܼܟܼ ܘܪܹܓܘܼܟܼ ܘܚܸܕܲܡܬܘܼܟܼ ܘܬܵܘܪܘܼܟܼ ܘܚܡܵܪܘܼܟܼ ܘܟܠܲܝܗ‌ܝ ܗܲܝܘܵܢ̈ܘܼܟܼ ܘܥܵܡܪ̈ܵܢܹܐ ܕܐܝܼܬ ܓܵܘ ܡܵܬܘܵܬ̈ܘܼܟܼ؛ ܕܡܲܢܝܸܚ ܪܹܓܘܼܟܼ ܘܚܸܕܲܡܬܘܼܟܼ ܡܐܲܝܟܼ ܕܝܼܘܼܟܼ܀ ܕܟ̣ܘܿܪ؛ ܕܪܹܓܵܐ ܝ݇ܘܸܬ̇ ܗ݇ܘܵܐ ܒܡܸܨܪܹܝܢ؛ ܘܩܲܡ ܦܵܠܸܛܠܘܼܟܼ ܡܵܪܝܵܐ ܐܲܠܵܗܘܼܟܼ ܡ̣ܢ ܬܵܡܵܐ ܒܐܝܼܕܵܐ ܚܲܝܠܵܢܬܵܐ ܘܕܪܵܥܵܐ ܪܵܡܵܐ. ܒܘܼܬ ܕܐܵܗܵܐ؛ ܩܲܡ ܦܵܩܸܕܠܘܼܟܼ ܡܵܪܝܵܐ ܐܲܠܵܗܘܼܟܼ ܠܸܢܛܵܪܵܐ ܝܵܘܡܵܐ ܕܫܲܒܬܵܐ܀ ܡܝܵܩܸܪ ܠܒܵܒܘܼܟܼ ܘܠܝܸܡܘܼܟܼ؛ ܐܲܝܟܼ ܕܩܲܡ ܦܵܩܸܕܠܘܼܟܼ ܡܵܪܝܵܐ ܐܲܠܵܗܘܼܟܼ. ܕܙܵܝܕܝܼ ܝܵܘܡܵܢ̈ܘܼܟܼ ܘܗܵܘܝܵܐ ܠܘܼܟܼ ܛܵܒ̣ܬܵܐ. ܒܐܲܪܥܵܐ ܛܵܒ̣ܬܵܐ ܕܝܵܗ݇ܒ̣ܸܠܘܼܟܼ ܡܵܪܝܵܐ ܐܲܠܵܗܘܼܟܼ܀

ܚܲܒ̣ܪܹܗ

ܐܹܫܲܥܝܵܐ؛ ܗ؛ 1‐8

ܫܠܵܘ ܢܒ̣ܝܼܘܼܬܹܗ ܕܐܹܫܲܥܝܵܐ؛ ܐܲܚܲܝ̈ ܒܲܪܸܟ̣ܡܵܪܝ܀

ܒܸܬ ܙܵܡܪܸܢ ܩܵܐ ܡܘܼܚܸܒܝܼ؛ ܙܡܵܪܬܵܐ ܕܡܘܼܚܸܒܝܼ ܒܘܼܬ ܟܲܪܡܹܗ. ܘܡܘܼܚܸܒܝܼ ܐܝܼܬ ܗ݇ܘܵܐ ܠܹܗ ܟܲܪܡܵܐ؛ ܥܲܠ ܚܲܕ݇ ܪܘܼܡܬܵܐ ܫܲܡܝܼܢܬܵܐ ܕܐܲܬܪܵܐ܀ ܘܦܠܸܚܠܹܗ؛ ܘܚܘܼܪܕܹܐܠܹܗ ܒܣܝܵܓ̣ܵܐ [ܒܣܝܵܓ̣݇ܝܵܐ]؛ ܘܢܨܸܒ̣ܠܹܗ ܓܵܘܹܗ ܫܸܬܠܹ̈ܐ ܫܲܦܝܼܪܹ̈ܐ ܕܓܸܦܬܵܐ؛ ܘܒܢܹܐܠܹܗ ܓܵܘܹܗ ܒܘܼܪܓ̰ܵܐ؛ ܘܐܘܼܦ ܡܲܥܨܲܪܬܵܐ ܬܘܼܪܸܨܠܹܗ ܓܵܘܹܗ. ܘܣܦܸܪܹܗ ܕܥܵܒ̣ܸܕ ܥܲܢܒ̣ܹ̈ܐ؛ ܘܥܒ̣ܸܕܠܹܗ ܥܲܢܒ̣ܹ̈ܐ ܚܸܪ̈ܫܵܢܹܐ܀ ܐܵܕܝܼܵܐ ܝܵܐ ܒܢܲܝ̈ ܝܼܗܘܼܕܵܐ؛ ܘܥܵܡܪ̈ܵܢܹܐ ܕܐܘܿܪܸܫܠܸܡ؛ ܕܘܼܢܘܼܢ ܒܹܝܠܝܼ ܘܒܹܝܠ ܟܲܪܡܝܼ܀ ܡܘܼܕܝܼ ܘܵܓ̰ܸܒ ܝܼܗ݇ܘܵܐ ܠܸܥܒ̣ܵܕܵܐ ܠܟܲܪܡܝܼ؛ ܘܠܵܐ ܥܒ̣ܸܕܠܝܼ ܐܸܠܹܗ؟ ܕܣܦܸܪܝܼ ܕܥܵܒ̣ܸܕ ܥܲܢܒ̣ܹ̈ܐ؛ ܘܥܒ̣ܸܕܠܹܗ ܥܲܢܒ̣ܹ̈ܐ ܚܸܪ̈ܫܵܢܹܐ܀ ܐܵܕܝܼܵܐ ܒܸܬ ܡܲܚܙܸܢܵܘܟ̣ܘܿܢ ܡܸܢܕܝܼ ܕܥܵܒ̣ܕܸܢ ܠܟܲܪܡܝܼ؛ ܒܸܬ ܬܵܠܚܸܢ ܒܘܼܪܓ̰ܹܗ؛ ܘܒܸܬ ܗܵܘܹܐ ܠܣܠܵܒܵܐ؛ ܘܒܸܬ ܦܵܬܚܸܢ ܣܝܵܓ̣ܹܗ [ܣܝܵܓ̣݇ܝܹܗ]؛ ܘܒܸܬ ܗܵܘܹܐ ܠܕܲܫܕܲܫܬܵܐ؛ ܘܒܸܬ ܥܵܒ̣ܕܸܢܹܗ ܕܚܵܪܸܒ̣؛ ܘܠܹܐ ܦܵܐܹܫ ܟܣܝܼܚܵܐ؛ ܘܠܵܐ ܦܵܐܹܫ ܦܠܝܼܚܵܐ؛ ܘܡܲܓ̰ܝܸܢܝܼ ܓܵܘܹܗ ܟܸܬܘܹ̈ܐ ܘܩܝܼܘܵܪܹ̈ܐ. ܘܒܸܬ ܦܵܩܕܸܢ ܠܥܲܝܒ̣ܵܬܹ̈ܐ ܕܠܵܐ ܡܲܨܠܝܼ ܥܲܠܹܗ ܡܸܛܪܵܐ܀ ܣܵܒܵܒ ܒܲܝܬܵܐ ܕܒܹܝܬ̣ ܝܼܣܪܵܝܹܠ ܝܼܠܹܗ ܟܲܪܡܹܗ ܕܡܵܪܝܵܐ ܚܲܝܠܬܵܢܵܐ؛ ܘܐ݇ܢܵܫܹ̈ܐ ܕܒܹܝܬ̣ ܝܼܗܘܼܕܵܐ؛ ܢܨܸܒ̣ܬܵܐ ܚܲܕܬܵܐ ܘܡܘܼܚܸܒܬܵܐ. ܣܦܸܪܝܼ؛ ܠܕܝܼܘܵܢ ܘܗܘܹܐܠܹܗ ܙܠܘܼܡܝܵܐ؛ ܘܠܙܲܕܝܼܩܘܼܬܵܐ ܘܗܵܐ ܘܲܠܘܵܠܬܵܐ܀

♱♱♱♱♱♱♱♱♱

ܚܕܒܫܒܐ ܕܬܠܬܐ ܕܩܝܛܐ

ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ

ܕܲܠܘܵܬܼ ܩܘܼܪ̈ܲܢܬܵܝܹܐ ܐܲܚܲܝ̈ ܒܲܪܸܟܼܡܵܪܝ܀

ܡ̣ܢ ܣܵܒܵܒ ܕܐܝܼܬ ܠܲܢ ܗܲܕܟܼܵܐ ܩܵܘܠܹ̈ܐ ܡܘܼܚܸܒ̈ܝܼ؛ ܕܵܟܼܲܚ ܓܵܢܲܢ ܡ̣ܢ ܟܠܵܗ̇ ܛܲܡܐܘܼܬܵܐ ܕܒܸܣܪܵܐ ܘܕܪܘܼܚܵܐ. ܘܦܵܠܚܲܚ ܩܲܕܝܼܫܘܼܬܵܐ ܒܙܕܘܼܥܬܵܐ ܕܐܲܠܵܗܵܐ. ܚܡܘܿܠܘܿܢ ܐܸܠܲܢ ܝܵܐ ܐܵܚܘܿܢܘܵܬ̈ܝܼ* ܒܗܸܟ̃ ܐ݇ܢܵܫܵܐ ܠܹܐ ܝ݇ܘܲܚ ܥܒܼܝܼܕܹܐ ܓܢܵܗܵܐ. ܩܵܐ ܗܸܟ̃ ܐ݇ܢܵܫܵܐ ܠܵܐ ܡܘܼܚܪܸܒܼܠܲܢ؛ ܘܩܵܐ ܗܸܟ̃ ܐ݇ܢܵܫܵܐ ܠܵܐ ܙܠܸܡܠܲܢ* ܠܹܐ ܝ݇ܘܸܢ ܒܐܹܡܵܪܵܐ ܩܵܐ ܥܒܼܲܕܬܵܘܟܼܘܿܢ ܡܵܪܹܐ ܓܢܵܗܵܐ. ܣܵܒܵܒ ܡ̣ܢ ܩܵܕ݇ܡܵܝܬܵܐ ܐ݇ܡܸܪܝܼ ܕܓܵܘ ܠܸܒܲܢ ܝܼܬܘܿܢ ܠܸܡܝܵܬܵܐ ܡܐܘܼܕܵܠܹܐ ܘܠܸܚܵܝܵܐ* ܪܵܒܵܐ ܒܸܣܬܵܝܘܼܬܵܐ ܐܝܼܬܠܝܼ ܠܟܸܣܠܵܘܟܼܘܿܢ. ܘܪܵܒܵܐ ܐܝܼܬ ܠܝܼ ܒܝܼܵܘܿܟܼܘܿܢ ܫܘܼܒܼܗܵܪܵܐ. ܘܡܸܠܝܵܐ ܝ݇ܘܸܢ ܫܩܲܠܬܵܐ ܕܠܸܒܵܐ. ܘܪܵܒܵܐ ܒܸܙܝܵܕܵܐ ܝ݇ܠܵܗ̇ ܒܝܼܝܼ ܚܲܕܘܼܬܵܐ ܒܟܠܲܝܗܝ ܝܲܠܨܘܼܘܝܼ̈* ܐܘܼܦ ܡ̣ܢ ܕܗ̇ܝ ܥܕܵܢܵܐ ܕܐ݇ܬܹܐ ܠܲܢ ܠܡܵܩܹܕܘܿܢܝܼܵܐ ܐܘܼܦ ܚܕܵܐ ܡܲܢܝܲܚܬܵܐ ܠܵܐ ܗܘܹܐܠܵܗ̇ ܠܦܲܓܼܪܲܢ؛ ܐܸܠܵܐ ܒܟܠ ܡܸܢܕܝܼ ܦܸܫܠܲܢ ܡܘܼܠܝܸܨܹܐ. ܡ̣ܢ ܠܒܼܲܕܲܪ ܦܠܵܫܵܐ ܘܡ̣ܢ ܠܓܵܘܵܝܝܼ ܙܕܘܼܥܬܵܐ. ܐܝܼܢܵܐ ܐܲܠܵܗܵܐ ܗ̇ܘ ܕܝܵܗ݇ܒܼܸܠ ܠܸܒܵܐ ܠܡܲܟܝܼܟܹ̈ܐ ܩܲܡ ܝܵܗ݇ܒܼܸܠܲܢ ܠܸܒܵܐ ܒܐ݇ܬܵܝܬܹܗ ܕܛܸܛܘܿܣ* ܠܵܐ ܐܲܚܟ̰ܝܼ ܒܐ݇ܬܵܝܬܹܗ؛ ܐܝܼܢܵܐ ܐܘܼܦ ܒܡܲܢܝܲܚܬܹܗ ܕܡܘܼܢܝܸܚܠܹܗ ܒܝܼܵܘܟܼܘܿܢ. ܣܵܒܵܒ ܩܲܡ ܡܲܕܸܥܠܲܢ ܒܘܼܬ ܚܘܼܒܵܘܟܼܘܿܢ ܕܠܟܸܣܠܲܢ ܘܒܘܼܬ ܦܵܫܲܡܬܵܐ ܘܛܢܵܢܵܐ ܕܝܼܵܘܟܼܘܿܢ ܕܡ̣ܢ ܓܹܒܲܢ. ܘܟܲܕ ܫܡܝܼܥܠܝܼ ܚܲܕܘܼܬܵܐ ܓܘܼܪܬܵܐ ܗܘܹܐܠܵܗ̇ ܠܝܼ* ܕܐܵܦܸܢ ܡܘܼܦܫܸܡܠܝܼ ܐܸܠܵܘܟܼܘܿܢ ܒܟܬܵܒܼܵܐ ܠܹܐ ܝ݇ܘܸܢ ܒܸܦܫܵܡܵܐ ܐܘܼܦܢ ܕܦܫܸܡܠܝܼ. ܣܵܒܵܒ ܒܸܚܙܵܝܵܐ ܝ݇ܘܸܢ ܐܵܦܸܢ ܕܐܸܓܲܪܬܵܐ ܩܵܐ ܚܲܕ݇ ܥܕܵܢܵܐ ܟܪܝܼܬܵܐ ܡܘܼܦܫܸܡܠܵܗ̇ ܐܸܠܵܘܟܼܘܿܢ* ܐܝܼܢܵܐ ܚܲܕܘܼܬܵܐ ܥܒܼܸܕܠܵܗ̇ ܩܵܬܝܼ. ܠܵܐ ܒܘܼܬ ܣܵܒܵܒ ܕܦܫܸܡܠܵܘܟܼܘܿܢ؛ ܐܸܠܵܐ ܕܦܵܫܲܡܬܵܘܟܼܘܿܢ ܠܬܝܵܒܼܘܼܬܵܐ ܩܲܡ ܡܲܝܬܝܵܐ ܠܵܘܟܼܘܿܢ. ܣܵܒܵܒ ܕܦܫܸܡܠܵܘܟܼܘܿܢ ܒܐܲܠܵܗܵܐ؛ ܕܵܐܟܼܝܼ ܕܒܡܸܢܕܝܼ ܠܵܐ ܒܵܨܪܝܼܬܘܿܢ ܡܸܢܲܢ* ܣܵܒܵܒ ܦܵܫܲܡܬܵܐ ܕܒܘܼܬ ܐܲܠܵܗܵܐ ܬܝܵܒܼܘܼܬܵܐ ܟܹܐ ܦܵܠܚܵܐ ܕܠܵܐ ܕܵܝܪܵܐ؛ ܘܟܹܐ ܡܲܕܸܪܵܐ ܠܚܲܝܹ̈ܐ. ܐܝܼܢܵܐ ܦܵܫܲܡܬܵܐ ܕܥܵܠܡܵܐ ܡܵܘܬܵܐ ܟܹܐ ܦܵܠܚܵܐ* ܣܵܒܵܒ ܗܲܪ ܐܵܗܵܐ ܕܦܸܫܠܵܘܟܼܘܿܢ ܡܘܼܥܝܸܩܹܐ ܒܘܼܬ ܐܲܠܵܗܵܐ؛ ܟܡܵܐ ܡܘܼܥܵܒܼܸܕܠܵܗ̇ ܚܵܦܵܛܘܼܬܵܐ ܘܗܲܡܙܲܡܬܵܐ. ܘܟܲܪܒܵܐ ܘܙܕܘܼܥܬܵܐ. ܘܚܘܼܒܵܐ ܘܛܢܵܢܵܐ؛ ܘܫܩܲܠܬܵܐ ܕܬܘܼܥܠܵܐ. ܘܒܟܠ ܡܸܢܕܝܼ ܡܘܼܚܙܹܐܠܵܘܟܼܘܿܢ ܓܵܢܵܘܟܼܘܿܢ ܕܕܸܟܼܝܸܐ ܝ݇ܬܘܿܢ ܒܐܵܗܵܐ ܫܘܼܠܵܐ*

♱♱♱♱♱♱♱♱♱

ܚܕܒܫܒܐ ܕܬܼܠܬܼܐ ܕܩܝܛܐ

ܝܘܚܢܢ ܛ: 1 ‐ 39

ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ ܟܪܘܙܘܬܼܐ ܕܝܘܚܢܢ

♰ ܘܟܲܕ ܦܠܸܛܠܹܗ ܝܑܼܫܘܿܥ ܡ̣ܢ ܗܲܝܟܠܵܐ، ܚܙܹܐܠܹܗ ܚܲܕ݇ ܓܲܒܼܪܵܐ ܣܸܡܝܵܐ ܕܡ̣ܢ ܟܲܪ݇ܣܵܐ ܕܝܸܡܹܗ: ܘܩܲܡ ܒܲܩܪܝܼܠܹܗ ܬܲܠܡܝܼܕܘܼ̈ܗܝ ܘܐܲܡܪܝܼ: ܪܲܒܲܢ ܡܵܢܝܼ ܚܛܹܐܠܹܗ: ܐܵܗܵܐ ܝܲܢ ܐܲܒܼܵܗܘܼ̈ܗܝ ܕܟܲܕ ܣܸܡܝܵܐ ܦܸܫܠܹܗ ܝܼܠܝܼܕܵܐ؟ ܐܵܡܸܪ ܐܸܠܲܝܗܝ ܝܑܼܫܘܿܥ: ܠܵܐ ܐܵܗܵܐ ܚܛܹܐܠܹܗ ܘܠܵܐ ܐܲܒܼܵܗܘܼ̈ܗܝ: ܐܸܠܵܐ ܕܦܲܝܫܝܼ ܚܸܙܝܹܐ ܒܝܼܹܗ ܦܘܼܠܚܵܢܹ̈ܐ ܕܐܲܠܵܗܵܐ: ܘܐܸܠܝܼ ܘܵܓ̰ܸܒ ܝܼܠܵܗ̇ ܠܸܥܒܼܵܕܵܐ ܥܒܼܵܕܹ̈ܐ ܕܡ̇ܢ ܫܘܼܕܪܸܢܹܗ ܗܵܠܵܐ ܕܐܝܼܡܵܡܵܐ ܝܠܹܗ: ܒܸܬ ܐܵܬܹܐ ܠܸܠܝܵܐ ܕܐ݇ܢܵܫܵܐ ܠܹܐ ܡܵܨܹܐ ܠܸܦܠܵܚܵܐ. ܟܡܵܐ ܕܓܵܘ ܥܵܠܡܵܐ ܝܘܸܢ، ܢܘܼܗܪܹܗ ܕܥܵܠܡܵܐ ܝܘܸܢ: ܘܟܲܕ ܐ݇ܡܸܪܹܗ ܐܲܢܹܐ: ܪܸܩܠܹܗ ܥܲܠ ܐܲܪܥܵܐ ܘܓܒܼܸܠܹܗ ܛܝܼܢܵܐ ܡ̣ܢ ܪܘܼܩܹܗ: ܘܠܛܸܫܠܹܗ ܥܲܠ ܥܲܝܢܹ̈ܐ ܕܗ̇ܘ ܣܸܡܝܵܐ: ܘܐ݇ܡܸܪܹܗ ܐܸܠܹܗ: ܙܹܠ݇ ܚܲܠܸܠ ܒܡܲܥܡܘܼܕܝܼܬܵܐ ܕܫܝܼܠܘܼܚܵܐ: ܐ݇ܙܸܠܹܗ ܚܘܼܠܸܠܹܗ ܘܐ݇ܬܹܐܠܹܗ ܟܲܕ ܒܸܚܙܵܝܵܐ: ܐܝܼܢܵܐ ܫܒܼܵܒܼܘܼ̈ܗܝ ܘܐܲܝܢܝܼ ܕܦܝܼܫܵܐ ܗ݇ܘܵܐ ܚܸܙܝܵܐ ܐܸܠܲܝܗܝ ܡ̣ܢ ܩܵܕ݇ܡܵܝܬܵܐ ܕܓܵܒܼܹܐ ܗ݇ܘܵܐ: ܐܲܡܪܝܼ ܗ݇ܘܵܘ: ܠܹܐ ܗ݇ܘܵܐ ܐܵܗܵܐ ܗ̇ܘ ܕܝܵܬܸܒܼ ܗ݇ܘܵܐ ܘܓܵܒܼܹܐ ܗ݇ܘܵܐ؟ ܐܝܼܬ ܕܐܲܡܪܝܼ ܗ݇ܘܵܘ: ܕܐܵܗܵܐ ܝܠܹܗ: ܘܐܝܼܬ ܕܐܲܡܪܝܼ ܗ݇ܘܵܘ: ܠܵܐ: ܐܸܠܵܐ ܕܡܵܝܵܐ ܒܸܕܡܵܝܵܐ ܝܠܹܗ ܐܸܠܹܗ: ܐܝܼܢܵܐ ܗ̇ܘ ܐܵܡܸܪ ܗ݇ܘܵܐ: ܕܐܵܢܵܐ ܝܘܸܢ: ܐܲܡܪܝܼ ܐܸܠܹܗ: ܕܲܐܟܼܝܼ ܦܸܫܠܗ݇ܘܿܢ ܦܬܝܼܚܹܐ ܥܲܝ̈ܢܘܼܟܼ؟ ܓ̰ܘܼܘܸܒܠܹܗ ܘܐ݇ܡܸܪܹܗ ܐܸܠܲܝܗܝ: ܓܲܒܼܪܵܐ ܕܫܸܡܹܗ ܝܑܼܫܘܿܥ ܥܒܼܸܕܠܹܗ ܛܝܼܢܵܐ ܘܠܛܸܫܠܹܗ ܥܲܠ ܥܲܝ̈ܢܝܼ، ܘܐ݇ܡܸܪܹܗ ܐܸܠܝܼ: ܙܹܠ݇ ܚܲܠܸܠ ܒܡܝܼ̈ܵܐ ܕܫܝܼܠܘܼܚܵܐ: ܘܙܸܠܝܼ ܚܘܼܠܸܠܝܼ، ܘܚܙܹܐܠܝܼ. ܐܲܡܪܝܼ ܐܸܠܹܗ: ܐܲܝܟܵܐ ܝܠܹܗ؟ ܐܵܡܸܪ ܐܸܠܲܝܗܝ: ܠܹܐ ܝܘܸܢ ܒܝܼܕܵܥܵܐ. ܘܡܘܼܬ݇ܝܹܐ ܠܗ݇ܘܿܢ ܠܗ̇ܘ ܕܡ̣ܢ ܩܲܕ݇ܡܵܝܬܵܐ ܣܸܡܝܵܐ ܗ݇ܘܵܐ ܠܘܵܬ ܦܪ̈ܝܼܫܹܐ: ܐܝܼܢܵܐ ܫܲܒܬܵܐ ܗ݇ܘܵܐ ܟܲܕ ܥܒܼܸܕܠܹܗ ܛܝܼܢܵܐ ܝܑܼܫܘܿܥ ܘܦܬܝܼܚܠܹܗ ܐܸܠܹܗ ܥܲܝܢܘܼ̈ܗܝ: ܘܡܸܢ݇ܕܪܹܫ݇ ܒܘܼܩܸܪܗ݇ܘܿܢ ܡܸܢܹܗ ܦܪ̈ܝܼܫܹܐ: ܕܲܐܟܼܝܼ ܚܙܹܐܠܘܼܟܼ؟ ܐܝܼܢܵܐ ܗ̇ܘ ܐ݇ܡܸܪܹܗ ܐܸܠܲܝܗܝ: ܛܝܼܢܵܐ ܡܘܼܬܸܒܼܠܹܗ ܥܲܠ ܥܲܝ̈ܢܝܼ، ܘܚܘܼܠܸܠܝܼ ܘܚܙܹܐܠܝܼ. ܘܐܲܡܪܝܼ ܗ݇ܘܵܘ ܐ݇ܢܵܫܹ̈ܐ ܡ̣ܢ ܦܪ̈ܝܼܫܹܐ: ܐܵܗܵܐ ܓܲܒܼܪܵܐ ܠܹܐ ܝܠܹܗ ܡ̣ܢ ܐܲܠܵܗܵܐ ܕܫܲܒܬܵܐ ܠܹܐ ܝܠܹܗ ܒܸܢܛܵܪܵܐ: ܐܝܼܢܵܐ ܐ݇ܚܹܪ̈݇ܢܹܐ ܐܲܡܪܝܼ ܗ݇ܘܵܘ: ܕܲܐܟܼܝܼ ܒܡܵܨܹܐ ܓܲܒܼܪܵܐ ܚܲܛܵܝܵܐ ܐܲܢܹܐ ܢܝܼܫܲܢܩܹ̈ܐ ܠܸܥܒܼܵܕܵܐ؟ ܘܦܘܼܠܵܓܼܵܐ ܐܝܼܬ ܗ݇ܘܵܐ ܒܲܝܢܵܬܲܝܗܝ: ܐܲܡܪܝܼ ܡܸܢ݇ܕܪܹܫ݇ ܠܗ̇ܘ ܣܸܡܝܵܐ: ܐܲܢ݇ܬ ܡܘܿܕܝܼ ܒܹܐܡܵܪܵܐ ܝܘܸܬ ܥܲܠܘܼܗܝ ܕܦܬܸܚܠܹܗ ܐܸܠܘܼܟܼ ܥܲܝ̈ܢܘܼܟܼ؟ ܐܵܡܸܪ ܐܸܠܲܝܗܝ: ܐܵܢܵܐ ܒܹܐܡܵܪܵܐ ܝܘܸܢ ܕܢܒܼܝܼܵܐ ܝܠܹܗ: ܐܝܼܢܵܐ ܠܵܐ ܗܲܡܸܢܝܼ ܗ݇ܘܵܘ ܥܲܠܘܼܗܝ ܝܗ݇ܘܼܕܵܝܹ̈ܐ ܕܣܸܡܝܵܐ ܗ݇ܘܵܘ ܘܚܙܹܐܠܹܗ: ܗܲܠ ܕܩܪܹܐ ܠܗ݇ܘܿܢ ܠܐܲܒܼܵܗܹ̈ܐ ܕܗ̇ܘ ܕܚܙܹܐ ܠܹܗ: ܘܒܘܼܩܸܪܗ݇ܘܿܢ ܡܸܢܲܝܗܝ: ܐܸܢ ܐܵܗܵܐ ܝܠܹܗ ܒܪܘܿܢܵܘܟܼܘܿܢ، ܗ̇ܘ ܕܐܲܚܬܘܿܢ ܒܹܐܡܵܪܵܐ ܝܬܘܿܢ ܕܣܸܡܝܵܐ ܦܸܫܠܹܗ ܝܠܝܼܕܵܐ: ܕܲܐܟܼܝܼ ܐܵܕܝܼܵܐ ܒܸܚܙܵܝܵܐ ܝܠܹܗ؟ ܐܝܼܢܵܐ ܐܲܒܼܵܗܘܼ̈ܗܝ ܓ̰ܘܼܘܸܒܠܗ݇ܘܿܢ ܘܐ݇ܡܸܪܗ݇ܘܿܢ: ܒܝܼܕܵܥܵܐ ܝܘܲܚ ܕܐܵܗܵܐ ܝܠܹܗ ܒܪܘܿܢܲܢ، ܘܕܟܲܕ ܣܸܡܝܵܐ ܦܸܫܠܹܗ ܝܼܠܝܼܕܵܐ: ܐܝܼܢܵܐ ܕܲܐܟܼܝܼ ܐܵܕܝܼܵܐ ܒܸܚܙܵܝܵܐ ܝܠܹܗ ܝܲܢ ܡܵܢܝܼ ܦܬܝܼܚܠܹܗ ܐܸܠܹܗ ܥܲܝ̈ܢܘܼܗܝ: ܠܹܐ ܝܘܲܚ ܒܝܼܕܵܥܵܐ: ܐܘܿܦ ܗ̇ܘ ܥܒܼܝܼܪܵܐ ܝܠܹܗ ܒܫܸܢܹ̈ܐ، ܡܸܢܹܗ ܒܲܩܪܘܿܢ: ܗ̇ܘ ܡܒܵܕܵܠ ܕܓܵܢܹܗ ܒܗܲܡܙܸܡ: ܐܲܢܹܐ ܐ݇ܡܸܪܗ݇ܘܿܢ ܐܲܒܼܵܗܘܼ̈ܗܝ ܣܵܒܵܒ ܒܸܙܕܵܥܵܐ ܗ݇ܘܵܘ ܡ̣ܢ ܝܗ݇ܘܼܕܵܝܹ̈ܐ. ܣܵܒܵܒ ܩܸܛܥܝܹܐ ܗ݇ܘܵܘ ܝܗ݇ܘܼܕܵܝܹ̈ܐ ܕܐܸܢ ܐ݇ܢܵܫܵܐ ܡܵܘܕܹܐ ܒܝܼܹܗ ܕܡܫܝܼܚܵܐ ܝܠܹܗ ܒܸܬ ܦܲܠܛܝܼܠܹܗ ܡ̣ܢ ܟܢܘܼܫܬܵܐ: ܒܘܬ ܕܐܵܗܵܐ ܐܲܒܼܵܗ̈ܘܼܗܝ ܐ݇ܡܸܪܗ݇ܘܿܢ ܥܒܼܝܼܪܵܐ ܝܠܹܗ ܒܫܸܢܹ̈ܐ: ܒܲܩܪܘܿܢ ܡܸܢܹܗ: ܘܩܪܹܐܠܗ݇ܘܿܢ ܓܵܗܵܐ ܕܬܸܪܬܹܝ ܠܗ̇ܘ ܓܲܒܼܪܵܐ ܕܝܼܗَܘܵܐ ܣܸܡܝܵܐ ܘܐܲܡܪܝܼ ܐܸܠܹܗ: ܫܵܒܸܚ ܠܐܲܠܵܗܵܐ: ܣܵܒܵܒ ܐܲܚܢܲܢ ܒܝܼܕܵܥܵܐ ܝܘܸܚ ܕܐܵܗܵܐ ܓܲܒܼܪܵܐ ܚܲܛܵܝܵܐ ܝܠܹܗ: ܗ̇ܘ ܓ̰ܘܼܘܸܒܠܹܗ ܘܐ݇ܡܸܪܹܗ ܐܸܠܲܝܗܝ: ܐܸܢ ܚܲܛܵܝܵܐ ܝܠܹܗ، ܠܹܐ ܝܲܕܥܸܢ: ܐܝܼܢܵܐ ܚܲܕ݇ ܡܸܢܕܝܼ ܝܲܕܥܸܢ: ܕܣܸܡܝܵܐ ܝܘܸܢ ܗ݇ܘܵܐ ܘܐܵܕܝܼܵܐ ܒܸܚܙܵܝܵܐ ܝܘܸܢ: ܡܸܢ݇ܕܪܹܫ݇ ܐܲܡܪܝܼ ܐܸܠܹܗ: ܡܘܿܕܝܼ ܥܒܸܕܠܹܗ ܐܸܠܘܼܟܼ، ܕܲܐܟܼܝܼ ܦܬܝܼܚܝܼܠܹܗ ܐܸܠܘܼܟܼ ܥܲܝ̈ܢܘܼܟܼ؟ ܐܵܡܸܪ ܐܸܠܲܝܗܝ: ܐ݇ܡܸܪܝܼ ܐܸܠܵܘܟܼܘܿܢ ܘܠܵܐ ܫܡܸܥܠܵܘܟܼܘܿܢ، ܩܵܡܘܿܕܝܼ ܡܸܢ݇ܕܪܹܫ݇ ܒܥܵܝܵܐ ܝܬܘܿܢ ܠܸܫܡܵܥܵܐ، ܩܵܡܘܿ ܐܘܿܦ ܐܲܚܬܘܿܢ ܒܥܵܝܵܐ ܝܬܘܿܢ ܠܸܗ݇ܘܵܝܵܐ ܬܲܠܡܝܼܕܹ̈ܐ ܐܸܠܹܗ؟ ܐܝܼܢܵܐ ܐܵܢܝܼ ܨܘܼܥܸܪܗ݇ܘܿܢ ܐܸܠܹܗ ܘܐܲܡܪܝܼ ܐܸܠܹܗ: ܐܲܢ݇ܬ ܝܼܘܸܬ ܬܲܠܡܝܼܕܹܗ ܕܗܿܘ: ܐܲܚܢܲܢ ܬܲܠܡܝܼܕܹ̈ܐ ܕܡܘܼܫܹܐ ܝܘܲܚ: ܘܒܝܼܕܵܥܵܐ ܝܘܲܚ ܕܥܲܡ ܡܘܼܫܹܐ ܐܲܠܵܗܵܐ ܗܘܼܡܙܸܡܠܹܗ. ܐܝܼܢܵܐ ܠܐܵܗܵܐ ܠܹܐ ܝܘܲܚ ܒܝܼܕܵܥܵܐ ܡ̣ܢ ܐܲܝܟܵܐ ܝܠܹܗ: ܓ̰ܘܼܘܸܒܠܹܗ ܗ̇ܘ ܓܲܒܼܪܵܐ ܘܐ݇ܡܸܪܹܗ ܐܸܠܲܝܗܝ: ܒܲܣ ܒܐܵܗܵܐ ܝܠܵܗ̇ ܠܥܵܓ̰ܘܼܒܹܐ: ܕܐܲܚܬܘܿܢ ܠܹܐ ܝܬܘܿܢ ܒܝܼܕܵܥܵܐ ܡ̣ܢ ܐܲܝܟܵܐ ܝܠܹܗ: ܘܥܲܝܢܹ̈ܐ ܕܕܝܼܠ݇ܝܼ ܦܬܝܼܚܝܼܠܹܗ: ܐܝܼܢܵܐ ܒܝܼܕܵܥܵܐ ܝܘܲܚ ܕܐܲܠܵܗܵܐ ܒܩܵܠܵܐ ܕܚܲܛܵܝܹ̈ܐ ܠܹܐ ܫܵܡܸܥ: ܐܸܠܵܐ ܠܡ̇ܢ ܕܙܵܕܸܥ ܡܸܢܹܗ ܘܥܵܒܼܸܕ ܨܸܒܼܝܵܢܹܗ: ܠܗ̇ܘ ܟܹܐ ܫܵܡܸܥ: ܡ̣ܢ ܥܵܠܲܡ ܠܵܐ ܦܝܼܫܠܵܗ̇ ܫܡܸܥܬܵܐ ܕܚܲܕ݇ ܐ݇ܢܵܫܵܐ ܦܬܸܚܠܹܗ ܥܲܝ̈ܢܹܐ ܕܚܲܕ݇ ܕܣܸܡܝܵܐ ܦܸܫܠܹܗ ܝܠܝܼܕܵܐ: ܐܸܢ ܐܵܗܵܐ ܠܵܐ ܗܵܘܹܐ ܗ݇ܘܵܐ ܡ̣ܢ ܐܲܠܵܗܵܐ: ܠܹܐ ܡܵܨܹܐ ܗ݇ܘܵܐ ܐܵܗܵܐ ܠܸܥܒܼܵܕܵܐ: ܓ̰ܘܼܘܸܒܠܗ݇ܘܿܢ ܘܐܲܡܪܝܼ ܐܸܠܹܗ: ܐܲܢ݇ܬ ܟܠܘܼܟܼ ܒܚܛܝܼܬܵܐ ܦܸܫܠܘܼܟܼ ܝܼܠܝܼܕܵܐ: ܘܐܲܢ݇ܬ ܡܵܠܘܼܦܹܐ ܝܘܸܬ ܐܸܠܲܢ؟ ܘܦܘܼܠܸܛܠܗ݇ܘܿܢ ܐܸܠܹܗ ܠܒܼܲܕܵܪ: ܘܫܡܸܥܠܹܗ ܝܑܼܫܘܿܥ ܕܦܘܼܠܸܛܠܗ݇ܘܿܢ ܐܸܠܹܗ  ܠܒܼܲܕܵܪ: ܘܡܘܼܫ݇ܟ̰ܸܚܠܹܗ ܘܐ݇ܡܸܪܹܗ ܐܸܠܹܗ: ܐܲܢ݇ܬ ܗܲܡܘܼܢܹܐ ܝܘܸܬ ܒܒܪܘܿܢܹܗ ܕܐܲܠܵܗܵܐ؟ ܓ̰ܘܼܘܸܒܠܹܗ ܗ̇ܘ ܕܦܸܫܠܹܗ ܒܣܝܼܡܵܐ ܘܐ݇ܡܸܪܹܗ: ܡܵܢܝܼ ܝܼܠܹܗ ܡܵܪܝܼ ܕܗܲܡܸܢܸܢ ܒܝܼܹܗ؟ ܐܵܡܸܪ ܐܸܠܹܗ ܝܑܼܫܘܿܥ: ܚܸܙܝܘܼܗܝ ܝܘܸܬ، ܘܗ̇ܘ ܝܼܠܹܗ ܕܗܲܡܙܘܼܡܹܐ ܝܼܠܹܗ  ܥܲܡܘܼܟܼ. ܐܝܼܢܵܐ ܗ̇ܘ ܐ݇ܡܸܪܹܗ: ܡܗܲܝܡܘܼܢܹܐ ܝܘܸܢ ܡܵܪܝܼ. ܘܢܦܸܠܹܗ ܣܓܼܸܕܠܹܗ ܐܸܠܹܗ.

♱♱♱♱♱♱♱♱♱