ܚܲܕܼܒܫܲܒܵܐ ܕܲܬܠܵܬ̣ܵܐ ܕܩܘܼܕܵܫ ܥܹܕܬܵܐ
ܡܸܢܝܵܢܵܐ؛ ܙ؛ 1‐11 ܐܲܩܸܦ ܛ؛ 15‐21
ܬܸܒ̣ܘ ܘܲܫܠܵܘ ܡܸܢܝܵܢܵܐ ܣܸܦܪܵܐ ܕܐܲܪܒܥܵܐ ܕܐܘܿܪܵܝܬܵܐ؛
ܐܲܚܲܝ̈ ܒܲܪܸܟ̣ܡܵܪܝ܀
ܘܗܘܹܐܠܵܗ̇ ܒܝܵܘܡܵܐ ܕܬܘܼܡܸܡܠܹܗ ܡܘܼܫܹܐ ܠܡܲܩܲܡܬܹܗ ܕܡܲܫܟܢܵܐ؛ ܡܫܸܚܠܹܗ ܘܩܘܼܕܸܫܠܹܗ ܐܸܠܹܗ ܘܠܟܠܲܝܗܝ ܡܵܐܢ̈ܘܼܗܝ. ܘܠܡܲܕܒܚܵܐ ܘܠܟܠܲܝܗܝ ܡܵܐܢ̈ܘܼܗܝ ܡܫܝܼܚܝܼܠܹܗ ܘܩܘܼܕܫܝܼܠܹܗ܀ ܘܡܘܼܩܪܸܒ̣ܠܗ݇ܘܿܢ ܓܘܼܪ̈ܵܢܹܐ ܕܒܢܲܝ̈ ܝܼܣܪܵܝܹܠ؛ ܪܹ̈ܫܵܢܵܐ ܕܒܲܝܬܵܐ ܕܒܵܒܵܘ̈ܵܬܲܝܗܝ؛ ܘܐܵܢܝܼ ܗ݇ܘܵܘ ܓܘܼܪ̈ܵܢܹܐ ܕܫܲܒ̣ܛܹ̈ܐ ܐܵܢܝܼ ܕܟܸܠܝܹܐ ܗ݇ܘܵܘ ܥܲܠ ܚܸܫܒܘܿܢܹ̈ܐ܀ ܘܡܘܼܬܝܹܐܠܗ݇ܘܿܢ ܩܘܼܪ̈ܒܵܢܲܝܗܝ ܩܵܕ݇ܡ ܡܵܪܝܵܐ؛ ܐܸܫܬܵܐ ܥܵܪ̈ܵܒܵܢܹܐ ܟܲܕ ܗܘܼܕܪܹ̈ܐ ܘܬܪܸܥܣܲܪ ܬܵܘܪܹ̈ܐ؛ ܟܠ ܥܵܪܵܒܵܢܵܐ ܩܵܐ ܬܪܹܝ ܓܘܼܪ̈ܵܢܹܐ؛ ܘܬܵܘܪܵܐ ܩܵܐ ܚܲܕ݇܀ ܘܡܘܼܩܪܸܒ̣ܲܝܗܝ ܠܗ݇ܘܿܢ ܩܵܕ݇ܡ ܡܲܫܟܢܵܐ؛ ܘܐ݇ܡܸܪܹܗ ܡܵܪܝܵܐ ܠܡܘܼܫܹܐ܀ ܫܩܘܿܠ ܡܸܢܲܝܗܝ؛ ܘܒܸܬ ܗܵܘܝܼ ܠܸܦܠܵܚܵܐ ܒܝܼܲܝܗܝ ܦܘܼܠܚܵܢܵܐ ܕܡܲܫܟܲܢܙܲܒ̣ܢܵܐ؛ ܘܗܲܒ̣݇ܠܗ݇ܘܿܢ ܩܵܐ ܠܹܘܵܝܹ̈ܐ ܟܠ ܐ݇ܢܵܫܵܐ ܠܩܲܕܪܵܐ ܕܦܘܼܠܚܵܢܹܗ܀ ܘܠܘܼܒܸܠܹܗ ܡܘܼܫܹܐ ܬܵܘܪܹ̈ܐ ܘܥܵܪ̈ܵܒܵܢܹܐ ܘܣܘܼܦܝܲܝܗܝ ܠܹܗ ܠܠܹܘܵܝܹ̈ܐ܀ ܬܸܪܬܹܝ ܥܵܪ̈ܵܒܹܢܹܐ ܘܐܲܪܒܥܵܐ ܬܵܘܪܹ̈ܐ ܝܘܼܗ݇ܒ̣ܸܠܹܗ ܠܒܢܲܝ̈ ܓܸܪܫܘܿܢ ܠܩܲܕܪܵܐ ܕܦܘܼܠܚܵܢܲܝܗܝ؛ ܘܐܲܪܒܥܵܐ ܥܵܪ̈ܵܒܵܢܹܐ ܘܬܡܲܢܝܵܐ ܬܵܘܪܹ̈ܐ ܝܘܼܗ݇ܒ̣ܸܠܹܗ ܠܒܢܲܝ̈ ܡܪܵܪܝܼ؛ ܠܩܲܕܪܵܐ ܕܦܘܼܠܚܵܢܲܝܗܝ؛ ܒܐܝܼܕܵܐ ܕܐܝܼܬܵܡܲܪ ܒܪܘܿܢܹܗ ܕܐܲܗܪܘܿܢ ܟܵܗܢܵܐ܀ ܘܠܒܢܲܝ̈ ܩܵܗܲܬ ܠܵܐ ܝܘܼܗ݇ܒ̣ܸܠܹܗ؛ ܣܵܒܵܒ ܕܦܘܼܠܚܵܢܵܐ ܕܩܘܼܕܫܵܐ ܣܘܼܦܝܵܐ ܗ݇ܘܵܐ ܐܸܠܲܝܗܝ؛ ܘܥܲܠ ܪ̈ܘܼܦ̮ܫܵܢܲܝܗܝ ܛܵܥܢܝܼ܀ ܘܡܘܼܩܪܸܒ̣ܠܗ݇ܘܿܢ ܓܘܼܪ̈ܵܢܹܐ ܩܘܼܪܒܵܢܵܐ ܕܚܘܼܕܵܬܵܐ ܕܡܲܕܒܚܵܐ ܒܝܵܘܡܵܐ ܕܡܫܝܼܚܠܗ݇ܘܿܢ ܐܸܠܹܗ؛ ܘܡܘܼܩܪܸܒ̣ܠܗ݇ܘܿܢ ܓܘܼܪ̈ܵܢܹܐ ܩܘܼܪ̈ܒܵܢܲܝܗܝ ܩܵܕ݇ܡ ܡܵܪܝܵܐ܀ ܘܒܝܵܘܡܵܐ ܕܩܸܡܠܹܗ ܡܲܫܟܢܵܐ؛ ܟܘܼܣܹܐܠܵܗ̇ ܥܢܵܢܵܐ ܠܡܲܫܟܲܢܙܲܒ̣ܢܵܐ ܘܠܣܸܬܪܵܐ ܕܣܵܗܕܘܼܬܵܐ. ܘܒܪܲܡܫܵܐ ܗܵܘܹܐ ܗ݇ܘܵܐ ܥܲܠ ܡܲܫܟܢܵܐ ܐܲܝܟܼ ܚܸܙܘܵܐ ܕܢܘܼܪܵܐ ܗܲܠ ܩܵܝܕܲܡܬܵܐ؛ ܘܗܵܕܟ̣ܵܐ ܗܵܘܹܐ ܗ݇ܘܵܐ ܐܲܡܝܼܢܵܐܝܼܬ. ܘܥܢܵܢܵܐ ܡܵܟܸܣܵܐ ܗ݇ܘܵܐ ܠܹܗ ܒܝܵܘܡܵܐ؛ ܘܚܸܙܘܵܐ ܕܢܘܼܪܵܐ ܒܠܲܝܠܹܐ܀ ܘܐܝܼܡܲܢ ܕܝܵܪܡܵܐ ܗ݇ܘܵܐ ܥܢܵܢܵܐ ܡ̣ܢ ܡܲܫܟܢܵܐ؛ ܒܵܬ݇ܪ ܗܵܕܵܐ ܡܲܛܥܸܢܝܼ ܗ݇ܘܵܘ ܒܢܲܝ̈ ܝܼܣܪܵܝܹܠ؛ ܘܒܕܘܼܟܬܵܐ ܕܫܵܪܝܵܐ ܗ݇ܘܵܐ ܥܢܵܢܵܐ؛ ܬܵܡܵܐ ܫܵܪܝܼ ܗ݇ܘܵܘ ܒܢܲܝ̈ ܝܼܣܪܵܝܹܠ܀ ܒܚܲܒܪܵܐ ܕܦܘܼܡܹܗ ܕܡܵܪܝܵܐ ܡܲܛܥܸܢܝܼ ܗ݇ܘܵܘ ܒܢܲܝ̈ ܝܼܣܪܵܝܹܠ؛ ܘܒܚܲܒܪܵܐ ܕܦܘܼܡܹܗ ܕܡܵܪܝܵܐ ܫܵܪܝܼ ܗ݇ܘܵܘ. ܟܠܲܝܗܝ ܝܵܘܡܵܢܹ̈ܐ ܕܨܵܠܝܵܐ ܗ݇ܘܵܐ ܥܢܵܢܵܐ ܥܲܠ ܡܲܫܟܢܵܐ ܫܵܪܝܼ ܗ݇ܘܵܘ܀
ܚܲܒ̣ܪܹܗ
ܐܹܫܲܥܝܵܐ ܢܕ؛ 1‐16
ܬܸܒ̣ܘ ܘܲܫܠܵܘ ܢܒ̣ܝܼܘܼܬܹܗ ܕܐܹܫܲܥܝܵܐ؛ ܐܲܚܲܝ̈ ܒܲܪܸܟ̣ܡܵܪܝ܀
ܫܵܒܸܚܝ ܥܩܲܪܬܵܐ ܕܠܹܐ ܗܲܨܠܵܐ ܘܚܕܵܝ ܒܬܸܫܒܘܿܚܬܵܐ ܘܦܨܘܿܚܝ ܗ̇ܝ ܕܠܵܐ ܓܪܸܫܠܵܗ̇ ܚܸܒ̣ܠܹ̈ܐ. ܣܵܒܵܒ ܕܙܝܼܕܠܗ݇ܘܿܢ ܒܢܘܿܢܹ̈ܐ ܕܡܘܼܫܲܡܲܪ ܡ̣ܢ ܒܢܘܿܢܹ̈ܐ ܕܡܵܪܹܐ ܓܲܒ̣ܪܵܐ ܒܹܐܡܵܪܵܐ ܝ݇ܠܹܗ ܡܵܪܝܵܐ؛ ܡܲܦܬܵܝ ܕܘܼܟܬܵܐ ܕܡܲܫܟܢܵܟ̣̈ܝ؛ ܘܟ̰ܲܕܪܹ̈ܐ ܕܡܲܫܟ̈ܢܵܟ̣ܝ ܡܬܘܿܚܝ؛ ܘܠܵܐ ܚܵܣܟ̣ܲܬ̇ܝ؛ ܡܲܪܝܸܟ̣ܝ ܬܵܢܵܦܵܟ̣̈ܝ ܘܣܸܟܵܟܲܟ̣̈ܝ ܡܲܩܘܵܝ܀ ܣܵܒܵܒ ܕܠܝܲܡܝܼܢܵܐ ܘܣܸܡܵܠܵܐ ܒܸܬ ܙܵܝܕܲܬܿܝ؛ ܘܙܲܪܥܵܟ̣ܝ ܒܸܬ ܝܵܪܸܬ ܛܵܝܸܦܹ̈ܐ؛ ܘܡܕܝܼܢܵܬܹ̈ܐ ܚܵܪܵܒܵܐ ܒܸܬ ܥܵܡܪܝܼ؛ ܠܵܐ ܙܵܕܥܝܲܬܿܝ ܣܵܒܵܒ ܕܠܹܐ ܢܵܟ̣ܦܲܬ̇ܝ؛ ܠܹܐ ܦܵܝܫܲܬ̇ܝ ܡܘܼܢܟ̣ܸܣܬܵܐ ܣܵܒܵܒ ܕܠܹܐ ܦܵܝܫܲܬ̇ܝ ܠܝܼܡܬܵܐ؛ ܣܵܒܵܒ ܢܟ̣ܸܦܬܵܐ ܕܙܥܘܿܪܘܼܬܵܟ̣ܝ ܒܸܬ ܡܲܢܫܹܝܵܬܿܝ؛ ܘܠܵܘܡܵܐ ܕܐܲܪܡܠܘܼܬܵܟ̣ܝ ܡܸܕܪܹܐ ܠܹܐ ܕܵܟ̣ܪܲܬܿܝ܀ ܣܵܒܵܒ ܡܵܪܵܟ̣ܝ ܒܸܬ ܥܵܒ̣ܸܕܠܵܟ̣ܝ ܗܵܕܟ̣ܵܐ؛ ܡܵܪܝܵܐ ܚܲܝܠܬܵܢܵܐ ܫܸܡܹܗ؛ ܘܦܵܪܘܿܩܵܟ̣ܝ ܩܲܕܝܼܫܵܐ ܕܝܼܣܪܵܝܹܠ؛ ܐܲܠܵܗܵܐ ܕܟܠܵܗ̇ ܐܲܪܥܵܐ ܦܵܐܹܫ ܩܸܪܝܵܐ܀ ܣܵܒܵܒ ܐܲܝܟܼ ܒܲܟ̣ܬܵܐ ܫܒ̣ܝܼܩܬܵܐ ܘܥܝܼܩܬܵܐ ܕܪܘܼܚܵܐ ܩܲܡ ܩܵܪܹܐܠܵܟ̣ܝ ܡܵܪܝܵܐ. ܐܲܝܟܼ ܒܲܟ̣ܬܵܐ ܕܙܥܘܿܪܘܼܬܵܐ ܕܦܵܝܫܵܐ ܫܒ̣ܝܼܩܬܵܐ؛ ܒܹܐܡܵܪܵܐ ܝ݇ܠܹܗ ܐܲܠܵܗܵܟ̣ܝ܀ ܒܟܲܪܒܵܐ ܙܥܘܿܪܵܐ ܩܲܡ ܫܵܒ̣ܩܸܢܵܟ̣ܝ؛ ܘܒܪ̈ܲܚܡܝܼ ܓܘܼܪܹ̈ܐ ܒܸܬ ܓ̰ܲܡܥܸܢܵܟ̣ܝ܀ ܒܟܲܪܒܵܐ ܓܘܼܪܵܐ ܡܘܼܕܸܪܝܼ ܦܵܬܝܼ ܡܸܢܵܟ̣ܝ؛ ܘܒܪܲܚܡܝܼ ܕܠܥܵܠܲܡ ܪܘܼܚܸܡܠܝܼ ܥܲܠܵܟ̣ܝ. ܒܹܐܡܵܪܵܐ ܝ݇ܠܹܗ ܡܵܪܝܵܐ ܦܵܪܘܿܩܵܟ̣ܝ܀ ܐܵܗܵܐ ܝ݇ܠܵܗ̇ ܐܲܝܟܼ ܝܵܘܡܵܢܹ̈ܐ ܕܢܘܿܚ؛ ܕܝ݇ܡܹܐܠܝܼ ܕܠܵܐ ܥܵܒ̣ܪܝܼ ܡܸܕܪܹܐ ܡܝܼܵܐ ܕܢܘܿܚ ܥܲܠ ܐܲܪܥܵܐ؛ ܗܵܕܟ̣ܵܐ ܝ݇ܡܹܐܠܝܼ ܕܠܵܐ ܟܵܪܒܸܢ ܥܲܠܵܟ̣ܝ ܘܠܵܐ ܢܵܓ̰ܘܸܢ ܒܝܼܵܟ̣ܝ܀ ܣܵܒܵܒ ܛܘܼܪ̈ܵܢܹܐ ܒܸܬ ܦܵܝܫܝܼ ܡܘܼܡܟܸܟ̣ܹܐ ܘܪ̈ܘܼܡܝܵܬܹܐ ܦܵܝܫܝܼ ܡܘܼܟܸܦܹܐ؛ ܘܫܵܦܵܩܲܬܝܼ ܡܸܢܵܟ̣ܝ ܠܹܐ ܥܵܒ̣ܪܵܐ؛ ܘܩܵܘܠܵܐ ܕܫܠܵܡܵܟ̣ܝ ܠܹܐ ܥܵܒ̣ܸܪ؛ ܒܹܐܡܵܪܵܐ ܝ݇ܠܹܗ ܡܵܪܝܵܐ ܡܪܲܚܡܵܢܵܐ܀ ܡܘܼܡܟܸܟ̣ܬܵܐ ܘܡܚܝܼܬܵܐ ܒܦܵܘܚܵܐ ܘܦܫܝܼܡܬܵܐ. ܗܵܐ ܐܵܢܵܐ ܒܸܬ ܥܵܒ̣ܕܸܢ ܟܹܐܦܵܟ̣̈ܝ ܒܸܠܘܼܪ ܘܬܲܪܨܸܢ ܒܸܢܝܲܬܵܟ̣̈ܝ ܒܟܹܐܦܹ̈ܐ ܕܣܲܦܝܼܠܵܐ؛ ܘܒܵܢܸܢ ܓܘܼܕܵܢܵܟ̣̈ܝ ܒܟܹܐܦܹ̈ܐ ܕܐܝܼܵܣܦܘܿܢ؛ ܘܬܲܪ̈ܥܵܢܵܟ̣ܝ ܒܟܹܐܦܹ̈ܐ ܕܫܘܼܫܵܐ. ܘܬܸܚܘܼܒܵܟ̣ܝ̈ ܒܟܹܐܦܹ̈ܐ ܓܘܼܒܝܹ̈ܐ܀ ܘܟܠܲܝܗܝ ܒܢܘܿܢܵܟ̣̈ܝ ܒܸܬ ܝܵܠܦܝܼ ܠܝܼ؛ ܘܒܸܬ ܙܵܐܸܕ ܫܠܵܡܵܐ ܕܒܢܘܿܢܵܟ̣̈ܝ؛ ܘܒܙܲܕܝܼܩܘܼܬܵܐ ܒܸܬ ܬܵܪܨܲܬܿܝ܀ ܪܚܘܿܩܝ ܡ̣ܢ ܙܠܘܼܡܝܵܐ ܣܵܒܵܒ ܕܠܵܐ ܙܵܕܥܲܬ̇ܝ؛ ܘܡ̣ܢ ܬܒ̣ܵܪܵܐ؛ ܣܵܒܵܒ ܕܠܹܐ ܩܲܪܒܸܢ ܐܸܠܵܟ̣ܝ؛ ܘܟܠ ܕܕܵܝܪܝܼ ܡ̣ܢ ܐܝܼܕ̈ܝܼ ܒܸܬ ܥܵܒ̣ܪܝܼ ܠܟܸܣܠܵܟ̣ܝ؛ ܘܒܸܬ ܗܵܘܝܵܬ̇ܝ ܒܹܝܬ̣ ܓܵܘܣܵܐ ܠܥܵܡܪ̈ܵܢܵܟ̣ܝ܀
♱♱♱♱♱♱♱♱♱
ܚܕܒܫܒܐ ܓ ܕܩܘܼܕܵܫ ܥܹܕܬܵܐ
ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ
ܕܲܠܘܵܬܼ ܥܸܒܼܪ̈ܵܝܹܐ ܐܲܚܲܝ̈ ܒܲܪܸܟܡܵܪܝ.
ܥܸܒ̣ܪ̈ܵܝܹܐ؛ ܛ؛ 5‐16
ܘܠܥܘܼܠܘܼܠ ܡ̣ܢ ܩܹܒܼܘܼܬܵܐ ܐܝܼܬ ܗ݇ܘ̣ܵܘ ܟܪ̈ܘܿܒܼܹܐ ܕܚܸܩܪܵܐ ܕܒܸܥܒܼܵܕܵܐ ܛܸܠܵܢܝܼܬܵܐ ܥܲܠ ܚܘܼܣܵܝܵܐ. ܠܹܐ ܝ݇ܠܵܗ̇ ܥܕܵܢܵܐ ܕܐܵܡܪܲܚ ܒܘܼܬ ܟܠ ܚܕܵܐ ܡ̣ܢ ܕܐܲܢܹܐ ܕܕܵܐܟܼܝܼ ܦܝܼܫܹܐ ܗ݇ܘ̣ܵܘ ܬܘܼܪܨܹܐ* ܘܠܡܲܫܟܢܵܐ ܒܲܪܵܝܵܐ ܒܟܠ ܥܕܵܢܵܐ ܥܵܒܼܪܝܼ ܗ݇ܘ̣ܵܘ ܟܵܗܢܹ̈ܐ ܘܬܲܡܸܡܝܼ ܗ݇ܘ̣ܵܘ ܚܸܠܡܲܬܲܝܗܝ. ܐܝܼܢܵܐ ܠܡܲܫܟܢܵܐ ܕܠܓܵܘܵܝܝܼ ܡܸܢܹܗ ܚܕܵܐ ܓܵܗܵܐ ܒܫܹܢ݇ܬܵܐ ܥܵܒܼܸܪ ܗ݇ܘ̣ܵܐ ܓܘܼܪܵܐ ܕܟܵܗܢܹ̈ܐ ܒܢܲܦ̮ܫܹܗ ܒܕܸܡܵܐ ܕܡܲܩܪܸܒܼ ܗ݇ܘ̣ܵܐ ܡ̣ܢ ܓܹܒܵܐ ܕܓܵܢܹܗ ܘܡ̣ܢ ܓܹܒܵܐ ܕܚܛܝܼܬܵܐ ܕܛܵܝܸܦܵܐ* ܐܝܼܢܵܐ ܒܐܵܗܵܐ ܡܲܕܘܼܥܝܹܐ ܗ݇ܘ̣ܵܐ ܪܘܼܚܵܐ ܕܩܘܼܕܫܵܐ؛ ܕܗܵܠܵܐ ܠܹܐ ܗ݇ܘ̣ܵܐ ܓܠܝܼܬܵܐ ܐܘܼܪܚܵܐ ܕܩܲܕܝܼܫܹ̈ܐ. ܟܡܵܐ ܥܕܵܢܵܐ ܕܐܝܼܬ ܗ݇ܘ̣ܵܐ ܩܵܘܠܵܐ ܠܡܲܫܟܢܵܐ ܩܵܕ݇ܡܵܝܵܐ* ܘܝܼܗܘ̣ܵܐ ܐܵܗܵܐ ܡܲܬܠܵܐ ܠܕܗ̇ܝ ܥܕܵܢܵܐ ܕܒܼܝܼܵܗ̇ ܩܘܼܪ̈ܒܵܢܹܐ ܘܕܸܒܼܚܹ̈ܐ ܦܵܝܫܝܼ ܗ݇ܘ̣ܵܘ ܡܘܼܩܪܹܒܹܐ ܐܵܢܝܼ ܕܠܹܐ ܡܵܨܝܼ ܗ݇ܘ̣ܵܘ ܠܬܲܡܘܼܡܹܐ ܐܸܢܝܲܬܹܗ ܕܗ̇ܘ ܕܡܲܩܪܸܒܼ ܗ݇ܘ̣ܵܐ ܠܗ݇ܘܿܢ. ܐܸܠܵܐ ܒܐ݇ܟܼܵܠܬܵܐ ܘܫܬܵܝܬܵܐ ܐܲܚܟ̰ܝܼ* ܘܒܚܲܠܲܠܝܵܬܹ̈ܐ ܕܬܵܗܵܪܹ̈ܐ ܦܪ̈ܝܼܫܹ̈ܐ ܕܝܼܢܵܐ ܦܘܼܩܵܕܹ̈ܐ ܕܒܸܣܪܵܐ ܕܦܝܼܫܹܐ ܝ݇ܢܵܐ ܡܘܼܬܒܼܹܐ ܗܲܠ ܙܲܒܼܢܵܐ ܕܬܘܼܪܵܨܵܐ* ܐܝܼܢܵܐ ܡܫܝܼܚܵܐ ܕܐ݇ܬܹܐܠܹܗ؛ ܗܘܹܐܠܹܗ ܓܘܼܪܵܐ ܕܟܵܗܢܹ̈ܐ ܕܛܵܒܼܵܬܹ̈ܐ ܕܦܠܸܚܠܹܗ ܘܥܒܼܸܪܹܗ ܠܡܲܫܟܢܵܐ ܓܘܼܪܵܐ ܘܟܵܡܝܼܠ ܠܵܐ ܬܘܼܪܨܵܐ ܒܐܝܼܕܵܬܹ̈ܐ؛ ܘܠܹܐ ܝ݇ܠܹܗ ܡ̣ܢ ܕܐܲܢܹܐ ܒܸܪ̈ܝܵܬܹܐ* ܠܵܐ ܥܒܼܸܪܹܗ ܒܕܸܡܵܐ ܕܓܸܕܝܹ̈ܐ ܘܫܲܪ̈ܚܹܐ. ܐܸܠܵܐ ܒܕܸܡܵܐ ܕܓܵܢܹܗ ܥܒܸܪܹܗ ܚܕܵܐ ܓܵܗܵܐ ܠܒܹܝܬ ܩܘܼܕܫܵܐ ܘܡܘܼܫ̄ܟ̰ܸܚܠܹܗ ܦܘܼܪܩܵܢܵܐ ܕܠܐܵܒܲܕ* ܣܵܒܵܒ ܐܸܢ ܕܸܡܵܐ ܕܓܸܕܝܹ̈ܐ ܘܫܲܪ̈ܚܹܐ ܘܩܸܛܡܵܐ ܕܫܵܪܸܚܬܵܐ ܦܵܐܸܫ ܗ݇ܘ̣ܵܐ ܡܘܼܪܝܸܣܵܐ ܥܲܠ ܕܐܵܢܝܼ ܕܦܵܝܫܝܼ ܟ̰ܘܼܦܠܸܢܹܐ ܘܡܩܵܕܸܫ ܗ݇ܘ̣ܵܐ ܠܗ݇ܘܿܢ ܠܕܵܟܼܵܝܬܵܐ ܕܒܸܣܪܲܝܗܝ* ܒܲܣ ܟܡܵܐ ܒܘܼܫ ܙܵܘܕܵܐ ܕܸܡܹܗ ܕܡܫܝܼܚܵܐ ܕܒܪܘܼܚܵܐ ܕܠܐܵܒܲܕ ܓܵܢܹܗ ܡܘܼܩܪܸܒܼܠܹܗ ܕܠܵܐ ܠܲܟܵܐ ܠܐܲܠܵܗܵܐ. ܒܸܬ ܕܵܟܼܲܚ ܐܸܢܝܲܬܲܢ ܡ̣ܢ ܦܘܼܠܚܵܢܹ̈ܐ ܡܝܼܬܹ̈ܐ ܩܵܐ ܕܥܵܒܼܕܲܚ ܚܸܠܡܲܬ ܩܵܐ ܐܲܠܵܗܵܐ ܚܲܝܵܐ* ܒܘܼܬ ܕܐܵܗܵܐ؛ ܗ̇ܘ ܗܘܹܐܠܹܗ ܡܸܨܥܵܝܵܐ ܕܕܝܵܬܹܩܹܐ ܚܲܕܬܵܐ؛ ܕܒܡܵܘܬܹܗ ܗܘܹܐܠܹܗ ܦܘܼܪܩܵܢܵܐ ܠܐܵܢܝܼ ܕܥܒܼܸܪܗ݇ܘܿܢ ܥܲܠ ܕܝܵܬܹܩܹܐ ܩܵܕ݇ܡܵܝܬܵܐ ܕܫܵܩܠܝܼ ܩܵܘܠܵܐ ܐܵܢܝܼ ܕܦܸܫܠܗ݇ܘܿܢ ܟ̰ܝܼܕܹܐ ܠܝܵܪܬܘܼܬܵܐ ܐܵܒܵܕܝܼܢܵܝܬܵܐ*
♱♱♱♱♱♱♱♱♱
ܚܕܒܫܒܐ ܕܬܼܠܬܼܐ ܕܩܘܕܫ ܥܕܬܐ
ܝܘܚܢܢ ܒ: 12 ‐ 23
ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ ܟܪܘܙܘܬܼܐ ܕܝܘܚܢܢ
♰ ܒܵܬܲܪ ܐܲܢܹܐ ܨܠܹܐܠܹܗ ܝܑܼܫܘܿܥ ܠܟܦܵܪܢܵܚܘܿܡ ܗ̇ܘ ܘܝܸܡܹܗ ܘܐܲܚܘܿܢܘܵܬܘܼ̈ܗܝ ܘܬܲܠܡܝܼܕܘܼ̈ܗܝ. ܘܬܵܡܵܐ ܗܘܹܐ ܠܗ݇ܘܿܢ ܚܲܕ݇ܟ̰ܐ ܝܵܘܡܵܢܹ̈ܐ. ܘܩܘܼܪܒܸܢܵܐ ܗ݇ܘܵܐ ܦܸܨܚܵܐ ܕܝܗ݇ܘܼܕܵܝܹ̈ܐ. ܘܣܸܠ݇ܩܠܹܗ ܝܑܼܫܘܿܥ ܠܐܘܿܪܸܫܠܸܡ. ܘܡܘܫ݇ܟ̰ܸܚܠܹܗ ܓܵܘ ܗܲܝܟܠܵܐ ܠܐܵܢܝܼ ܕܡܙܵܒܘܼܢܹܐ ܗ݇ܘܵܘ ܬܵܘܪܹ̈ܐ ܘܥܸܪ̈ܒܹܐ ܘܝܵܘܢܹ̈ܐ ܘܠܨܲܪ̈ܵܦܹܐ ܕܝܬܝܼܒܼܹܐ. ܘܬܘܿܪܸܨܠܹܗ ܩܲܡܟ̰ܝܼ ܡ̣ܢ ܚܲܒܼܠܵܐ، ܘܠܟܠܲܝܗܝ ܦܘܼܠܸܛܠܹܗ ܡ̣ܢ ܗܲܝܟܠܵܐ. ܘܠܥܸܪ̈ܒܹܐ ܘܠܬܵܘܪܹ̈ܐ. ܘܠܡܨܲܪ̈ܥܸܦܵܢܹܐ، ܘܬܘܼܦܸܚܠܹܗ ܨܲܪܵܦܘܼܬܲܝܗܝ ܘܦܵܬܘܿܪܲܝܗܝ ܡܘܼܚܕܸܪܹܗ. ܘܠܐܵܢܝܼ ܕܡܙܵܒܘܼܢܹܐ ܗ݇ܘܵܘ ܝܵܘܢܹ̈ܐ ܐ݇ܡܸܪܹܗ: ܫܩܘܼܠܘܿܢ ܐܲܢܹܐ ܡܸܟܵܐ. ܘܠܵܐ ܥܲܒܼܕܝܼܬܘܿܢ ܠܹܗ ܠܒܲܝܬܵܐ ܕܒܵܒܝܼ ܒܹܝܬ ܬܲܓܵܪܘܼܬܵܐ. ܘܕܟܼܸܪܗ݇ܘܿܢ ܬܲܠܡܝܼ̈ܕܘܼܗܝ ܕܟܬܝܼܒܼܵܐ ܝܠܹܗ: ܕܛܢܵܢܹܗ ܕܒܲܝܬܘܼܟܼ ܩܲܡ ܐܲܟܼܸܠܝܼ. ܐܝܼܢܵܐ ܓ̰ܘܼܘܸܒܠܗ݇ܘܿܢ ܝܗ݇ܘܼܕܵܝܹ̈ܐ ܘܐ݇ܡܸܪܗ݇ܘܿܢ ܐܸܠܹܗ: ܡܘܿܕܝܼ ܢܝܼܫܲܢܩܵܐ ܒܡܲܚܙܸܬܠܲܢ ܕܐܲܢܹܐ ܒܸܥܒܼܵܕܵܐ ܝܘܸܬ؟ ܓ̰ܘܼܘܸܒܠܹܗ ܝܑܼܫܘܿܥ ܘܐ݇ܡܸܪܹܗ ܐܸܠܲܝܗܝ: ܣܬܘܼܪܘܿܢ ܐܵܗܵܐ ܗܲܝܟܠܵܐ، ܘܠܲܬܠܵܬܵܐ ܝܵܘܡܵܢܹ̈ܐ ܐܵܢܵܐ ܒܡܲܩܝܼܡܸܢܹܗ. ܐܲܡܪܝܼ ܐܸܠܹܗ ܝܗ݇ܘܼܕܵܝܹ̈ܐ: ܠܐܲܪܒܥܝܼ ܘܐܸܫܸܬ ܫܸܢܹ̈ܐ ܦܸܫܠܹܗ ܒܸܢܝܵܐ ܐܵܗܵܐ ܗܲܝܟܠܵܐ، ܘܐܲܢ݇ܬ ܠܲܬܠܵܬܵܐ ܝܵܘܡܵܢܹ̈ܐ ܒܸܬ ܡܲܩܝܼܡܸܬܠܹܗ؟ ܐܝܼܢܵܐ ܗ̇ܘ ܐܵܡܸܪ ܗ݇ܘܵܐ ܥܲܠ ܗܲܝܟܠܵܐ ܕܦܲܓܼܪܹܗ. ܐܝܼܢܵܐ ܟܲܕ ܩܸܡܠܹܗ ܡ̣ܢ ܒܹܝܬ ܡܝܼܬܹ̈ܐ، ܕܟܼܸܪܗ݇ܘܿܢ ܬܲܠܡܝܼ̈ܕܘܼܗܝ ܕܐܵܗܵܐ ܐ݇ܡܝܼܪܵܐ ܗ݇ܘܵܐ، ܘܗܘܼܡܸܢܗ݇ܘܿܢ ܠܟܬܵܒܼܹ̈ܐ، ܘܠܗܹܡܸܙܡܵܢ ܕܐ݇ܡܸܪܹܗ ܝܑܼܫܘܿܥ.
♱♱♱♱♱♱♱♱♱