ܚܲܕܼܒ̇ܫܲܒܵܐ ܕܲܬܼܠܵܬܼܵܐ ܕܩܘܼܕܵܫ ܥܹܕܿܬܵܐ
ܡܲܪܡܝܼܬܼܵܐ ܕܐ݇ܪ̈ܵܙܹܐ؛ ܫܲܒܲܚܝ ܐܘܿܪܸܫܠܸܡ ܠܡܵܪܝܵܐ.
ܐܲܩܲܦܬܵܐ. ܩܲܕܿܝܼܫܘܼ ܒܹܝܬܼ ܡܲܫܪ̱ܝܹܗ ܕܲܡܪܲܝܡܵܐ܀
ܥܘܼܢܵܝܵܐ. ܐܲܠܵܗܵܐ ܒܓܼܵܘܵܗ̇ ܠܵܐ ܬܙܘܼܥ܀
ܕܩܲܢܟܹ̇ܐ. ܒܟܲܕܼ ܫܲܒܼܪܹ̈ܐ. ܡܵܪܝܵܐ ܡܲܢ̣ܘܼ ܢܸܥܡܲܪ ܒܡܲܫܟܿܢܵܟܼ؛ ܘܡܲܢ̣ܘܼ ܢܸܫܪܸܐ ܒܛܘܼܪܵܟܼ ܩܲܕܿܝܼܫܵܐ. ܐܲܒ̣ܵܐ ܕܐܲܫ̣ܪܝܼ ܫܟܼܝܼܢܬܹܿܗ ܒܛܘܼܪ ܣܝܼܢܲܝ. ܘܲܡ̣ܠܵܝܗܝ ܩܘܼܕܼܫܵܐ ܕܐܝܼܩܵܪܹܗ. ܡܠܝܼܘܗܝ ܬܸܫܒ̇ܘܿܚܬܵܐ ܠܗܵܢ ܗܲܝܟܿܠܵܐ ܕܲܦܪܝܼܫ ܠܐܝܼܩܵܪܵܟܼ. ܘܠܲܚܠܘܿܠ ܚܘܼܒܵܟܼ ܘܠܐܝܼܩܵܪ ܫܘܼܒ̣ܚܵܟܼ. ܢܸܗܘܸܐ ܠܡܹܐܢܵܐ ܘܒܹܝܬܼ ܓܵܘܣܵܐ ܠܟܼܠ ܕܐܲܠܝܼܨܝܼܢ. ܘܒܹܗ ܬܸܫܬܲܒܲܚ ܐܲܢ݇ܬ̇ ܘܼܒܼܪܵܟܼ ܘܪܘܼܚܵܐ ܕܩܘܼܕܼܫܵܐ. ܠܵܟܼ ܬܸܫܒ̇ܘܿܚܬܵܐ ܡ̣ܢ ܫܡܲܝܵܢܹ̈ܐ ܘܐܲܪ̈ܥܵܢܵܝܹܐ ܒܟܼܠ ܥܸܕܵܢܝܼ̈ܢ؛ ܬܢܝܼ؛ ܫܲܒܲܚ. ܠܲܨܠܝܼܒܼܵܟܼ ܦܵܪܘܿܩܲܢ ܣܵܓ̣ܕܿܝܼܢ ܥܝܼܪܹ̈ܐ ܘܐ݇ܢܵܫܵܐ. ܘܲܡܙܲܝܚܝܼܢ ܠܹܗ ܥܲܠ ܐܝܼܕܲܝ̈ܗܘܿܢ ܘܙܵܡ̇ܪܝܼܢ ܫܘܼܒ̣ܚܵܐ. ܕܲܥ̣ܒܲܕܼ ܫܲܝܢܵܐ ܒܲܒܼܪܝܼܬܼܵܐ. ܘܒܲܛܸܠ̣ ܩܪ̈ܵܒܹܐ ܘܬܲܟܼܬ̇ܘܼܫܹ̈ܐ. ܘܫܲܝܸܢ ܥܲܡܵܐ ܥܲܡ ܥܲܡܡܹ̈ܐ. ܕܒܲܚܕܼܵܐ ܥܹܕܿܬܵܐ ܠܹܗ ܢܸܬܼܟܲܫܦܘܼܢ. ܘܢܵܘܕܿܘܿܢ ܘܢܸܣܓܿܕܼܘܼܢ ܠܡܵܪܘܼܬܹܗ. ܘܢܸܩܥܘܿܢ ܒܩܵܠܹ̈ܐ ܩܲܕܿܝܼܫܹ̈ܐ. ܫܘܼܒ̣ܚܵܐ ܠܒܲܪ ܡܲܠܟܵܐ ܫܡܲܝܵܢܵܐ. ܕܲܒܼܝܲܕܼ ܪ̈ܲܚܡܵܘܗܝ ܣܲܓܿܝܼ̈ܐܹܐ ܚܲܣ̣ܝܼ ܚܵܘ̈ܒܲܝܢ. ܘܲܥ̣ܛܵܐ ܥܵܘ̣ܠܲܢ ܒܡܲܥܡܘܿܕܼܝܼܬܹܗ. ܘܝܲܗ̣݇ܒ̣ ܠܲܢ ܐ݇ܪ̈ܵܙܵܘܗܝ ܪܲܗܒ̣ܘܿܢܵܐ.
ܩܸܪܝܵܢܵܐ؛ ܡܸܢܝܵܢܵܐ؛ ܙ؛ 1‐11. ܐܲܩܸܦ؛ ܛ؛ 15‐21 ܚܲܒ̣ܪܹܗ؛ ܐܹܫܲܥܝܵܐ؛ ܢܕ؛ 1‐16
ܫܘܼܪܵܝܵܐ. ܕ܀ ܟܠܗܘܿܢ ܥܲܡܡܹ̈ܐ ܕܲܥܒܲܕܿܬܿ܋ ܢܹܐܬܼܘܿܢ ܘܢܸܣܓܿܕܼܘܼܢ ܠܵܟܼ ܡܵܪܝܵܐ܋ ܘܲܢܫܲܒܿܚܘܼܢ ܠܲܫܡܵܟܼ ܡܸܛܠ ܕܪܲܒܿ ܐܲܢَܬܿ܋ ܥܵܒܸܕܼ ܐܲܢَܬܿ ܬܸܕܼܡ̱ܪ̈ܵܬܼܵܐ ܐܲܢَܬܿ ܐܲܠܵܗܵܐ ܒܲܠܚܘܿܕܲܝܟ܋
ܫܠܝܼܚܵܐ؛ ܥܸܒ̣ܪ̈ܵܝܹܐ؛ ܛ؛ 5‐16. (ܐܵܘ) ܐ؛ܩܘܿܪ̈ܲܢܬܼܵܝܹܐ؛ ܒ؛ 10‐ܓ؛ ܫܘܼܠܵܡܵܐ.
ܙܘܼܡܵܪܵܐ؛ ܒܟܼܵܗܢܲܝ̈ܟ. ܡܲܬܼܩܢܵܐ ܠܡܵܘܬܿܒ̣ܵܟܼ ܥ̣ܒܲܕܿܬ̇ ܡܵܪܝܵܐ ܡܲܩܕܿܫܵܟܼ. ܡܵܪܝܵܐ ܬܲܩܸܢܲܝܗܝ ܒܐܝܼܕܲܝ̈ܟ. ܡܵܪܝܵܐ ܢܲܡܠܸܟܼ ܠܥܵܠܲܡ ܥܵܠܡܝܼܢ. ܓ܀ ܡܫܲܒܲܚ ܒܲܡܪ̈ܵܘܡܹܐ ܡܵܪܝܵܐ. ܘܣܵܗ̈ܕܿܘܵܬܼܵܟܼ ܛܵܒ̣ ܡܗܲܝܡ̈ܢܵܢ. ܘܲܠܒܲܝܬܵܟܼ ܝܵܐ̇ܝܵܐ ܩܲܕ̇ܝܼܫܘܼܬܼܵܐ. ܡܵܪܝܵܐ ܠܢܘܼܓ̣ܪܵܐ ܕܝܵܘ̈ܡܵܬܼܵܐ. ܕ܀
ܐܹܘܲܢܓܲܠܝܼܘܿܢ؛ ܝܘܿܚܲܢܵܢ؛ ܒ؛ 12‐23
ܕܐ݇ܪ̈ܵܙܹܐ. ܒܐܲܒܼܘܼܢ ܓܢܝܼܙܵܐ. ܡܵܐ ܚܲܒܿܝܼܒܼܝܼܢ ܡܲܫܟܿܢܲܝ̈ܟ ܡܵܪܝܵܐ ܚܲܠܝ̱ܬܼܵܢܵܐ. ܢܸܥܘܿܠ ܠܡܲܫܟܿܢܹܗ ܘܢܸܣܓܿܘܿܕܼ ܠܟܼܘܼܒܼܫܵܐ ܕܪܸ̈ܓܼܠܵܘܗܝ؛ ܝܲܩܝܼܪ̈ܵܬܼܵܐ ܐܸܬܼܡܲܠܲܠ̈ ܒܹܟܼܝ ܩܪܝܼܬܹܗ ܕܐܲܠܵܗܲܢ. ܕܨܘܼܪܬܵܐ. ܡܸܛܠ ܕܪܲܒܿܘܼ ܕܲܒܼܓܼܵܘܹܟܼܝ ܩܲܕܿܝܼܫܵܐ ܕܝܼܣܪܵܝܹܠ. ܡܵܪܝܵܐ ܒܓܼܵܘܹܟܼܝ ܬܘܼܒܼ ܠܵܐ ܬܸܚܙܹܝܢ ܒܝܼܫܬܵܐ. ܒܡܲܫܟܿܢܲܝ̈ܟܿܝ ܥܹܕܿܬܵܐ ܡܗܲܝܡܲܢܬܵܐ. ܐܲܝܟܼ ܕܲܒܼܐ݇ܪܵܙܵܐ ܗܵܐ ܚܵܙܹ̇ܝܢܲܢ. ܠܐܸܡܪܹܗ ܚܲܝܵܐ ܕܐܲܠܵܗܵܐ. ܟܲܕܼ ܡܸܙܕܲܝܲܚ ܥܲܠ ܡܲܕܼܒ̇ܚܹܟܼܝ ܙܲܗܝܵܐ. ܘܲܕܼܢܵܩܹ̇ܦ ܠܹܗ ܒܪܸܚܡ̱ܬܼܵܐ܀ ܗܵܘܹ̇ܐ ܥܲܡܹܗ ܒܲܚܕܼܵܐ ܪܘܼܚܵܐ. ܒܗܵܝ̇ ܡܲܠܟܿܘܼܬܼܵܐ ܕܠܵܐ ܡܸܫܬܲܪܝܵܐ. ܘܢܵܣܹ̇ܒܼ ܡܸܢܹܗ ܟܠܝܼܠܵܐ ܦܲܐܝܵܐ. ܘܐܸܣܛܲܠ ܫܘܼܒ̣ܚܵܐ ܕܠܵܐ ܡܸܬܼܚܲܒܿܠܵܐ. ܘܒܼܐܝܼܕܹܗ ܠܐܲܒܼܵܐ ܡܸܬܼܩܲܪܲܒ̣. ܐܲܝܟܼ ܗܲܕܵܡܵܐ ܥܲܠ ܪܹܫ ܓܘܼܫܡܵܐ. ܘܗܘܸܝܘܼ ܪܹܫܵܐ ܫܲܪܝܼܪܵܐ. ܘܲܚܢܲܢ ܦܲܓ̣ܪܵܐ ܠܹܗ ܝܲܩܝܼܪܵܐ܀ ܒܪܘܿܟܿܝ ܘܲܣܓ̣ܘܿܕܼܝ ܠܹܗ ܒܕܸܚܠܵܐ ܘܲܒ̣ܚܘܼܒܵܐ. ܥܲܠ ܐܲܦܲܝ̈ ܗܵܕܹܐ ܛܲܝܒ̇ܘܼܬܼܵܐ؛ ܡܸܛܠ ܕܗܘܸܝܘܼ ܡܵܪܹܟ̣ܝ. ܡܫܝܼܚܵܐ ܡܲܠܟܵܐ ܕܬܸܫܒܘܿܚܬܵܐ. ܠܹܗ ܐܸܬܼܟܲܫܲܦܝ ܘܲܒ̣ܥܵܝ ܕܲܢܚܘܼܣ ܥܠܲܝܟ̇ܝ. ܬܢܝܼ؛ ܘܫܲܒܲܚ ܒܵܗ̇.
ܕܒܹܝܡ؛ ܥܘܼܢܵܝܵܐ. ܒܕܼܘܼܨܘ ܥܲܡܡܹ̈ܐ. ܒܪܝܼܟܼ ܕܲܒ̣ܢ̣ܵܗ̇ ܠܥܹܕܲܬܼ ܩܘܼܕܼܫܵܐ. ܥܲܠ ܟܹܐܦܵܐ ܕܗܲܝܡܵܢܘܼܬܼܵܐ. ܘܣܵܡ̣ ܒܵܗ̇ ܫܠܝܼܚܹ̈ܐ ܘܲܢܒ̣ܝܼܹ̈ܐ. ܘܡܲܠܦܵܢܹ̈ܐ ܝܵܕܼܥܲܝ̈ ܫܪܵܪܵܐ.
ܒܵܬܹ̈ܐ؛ ܛܘܼܒܲܝܟ̇ܝ ܥܹܕܿܬܵܐ ܡܗܲܝܡܲܢܬܵܐ. ܟܲܠܬܹܗ ܕܐܲܒ̣ܵܐ ܡܠܸܟܼ ܡܲܠ̈ܟܹܿܐ. ܕܐܲܝܟܼ ܒܘܼܕܵܩܵܐ ܕܲܢܒ̣ܝܼܹ̈ܐ. ܐܸܫܬܲܡܠܝܼ ܒܕܲܗܒ̣ܵܐ ܫܘܼܦܪܹܝܟ̣ܝ.