ܚܲܕܼܒܫܲܒܵܐ ܕܲܬܠܵܬܼܵܐ ܕܨܵܘܡܵܐ
ܒܪܝܼܬܵܐ؛ ܙ؛ 1‐ܫܘܼܠܵܡܵܐ
ܬܸܒ̣ܘ ܘܲܫܠܵܘ ܒܪܝܼܬܵܐ ܣܸܦܪܵܐ ܩܲܕܡܵܝܵܐ ܕܐܘܿܪܵܝܬܵܐ؛
ܐܲܚܲܝ̈ ܒܲܪܸܟ̣ܡܵܪܝ܀
ܘܐ݇ܡܸܪܹܗ ܐܲܠܵܗܵܐ ܠܢܘܿܚ؛ ܥܒ̣ܘܿܪ ܐܲܢ݇ܬ̇ ܘܟܠܹܗ ܒܲܝܬܘܼܟܼ ܠܩܹܒ̣ܘܼܬܵܐ؛ ܣܵܒܵܒ ܕܐܸܠܘܼܟܼ ܚܙܹܐܠܝܼ ܕܙܲܕܝܼܩܵܐ ܝ݇ܘܸܬ̇ ܩܵܕ݇ܡܝܼ ܒܐܵܗܵܐ ܕܵܘܪܵܐ.܀ ܘܡ̣ܢ ܟܠܵܗ̇ ܗܲܝܘܵܢ ܕܟ̣ܝܼܬܵܐ ܫܩܘܿܠ ܫܲܒ̣ܥܵܐ ܫܲܒ̣ܥܵܐ ܐܘܼܪ̈ܙܹܐ ܘܢܸܩܒ̣ܹ̈ܐ. ܘܡ̣ܢ ܗܲܝܘܵܢ ܕܠܹܐ ܝ݇ܠܵܗ̇ ܕܟ̣ܝܼܬܵܐ ܬܪܹܝ ܬܪܹܝ؛ ܐܘܼܪ̈ܙܹܐ ܘܢܸܩܒ̣ܹ̈ܐ؛ ܘܐܘܼܦ ܡ̣ܢ ܦܵܪܲܚܬܵܐ ܕܟ̣ܝܼܬܵܐ ܫܲܒ̣ܥܵܐ ܫܲܒ̣ܥܵܐ ܐܘܼܪ̈ܙܹܐ ܘܢܸܩܒ̣ܹ̈ܐ؛ ܠܡܲܚܘܼܝܹܐ ܙܲܪܥܵܐ ܥܲܠ ܦܵܬܵܐ ܕܟܠܵܗ̇ ܐܲܪܥܵܐ.܀ ܣܵܒܵܒ ܡ̣ܢ ܐܵܕܝܼܵܐ ܠܫܲܒ̣ܥܵܐ ܝܵܘܡܵܢܹ̈ܐ ܒܸܬ ܡܲܨܠܸܢ ܡܸܛܪܵܐ ܥܲܠ ܐܲܪܥܵܐ ܐܲܪܒܥܝܼ ܝܵܘܡܵܢܹ̈ܐ ܘܐܲܪܒܥܝܼ ܠܲܝܠܵܘܵܬܹ̈ܐ؛ ܘܒܸܬ ܓܵܪܕܸܢ ܠܟܠ ܡܸܢܕܝܼ ܕܥܒ̣ܸܕܠܝܼ ܟܵܠܝܵܢܵܐ ܠܦܵܬܵܐ ܕܐܲܪܥܵܐ.܀ ܘܥܒ̣ܸܕܠܹܗ ܢܘܿܚ ܟܠ ܡܸܢܕܝܼ ܕܦܘܼܩܸܕܠܹܗ ܡܵܪܝܵܐ.܀ ܘܢܘܿܚ ܒܲܪ ܐܸܫܬܲܡܵܐܐ ܫܸܢܹ̈ܐ ܗ݇ܘܵܐ؛ ܛܵܘܦܵܢܵܐ ܕܡܝܼܵܐ ܗ݇ܘܹܐܠܹܗ ܥܲܠ ܐܲܪܥܵܐ.܀ ܥܒ̣ܸܪܗ݇ܘܿܢ ܢܘܿܚ ܘܒܢܘܿܢ̈ܘܼܗܝ ܘܒܲܟ̣ܬܹܗ ܘܒܲܟ̣ܬܵܬܹ̈ܐ ܕܒܢܘܿܢ̈ܘܼܗܝ ܥܲܡܹܗ ܠܩܹܒ̣ܘܼܬܵܐ ܡ̣ܢ ܩܵܕ݇ܡ ܡܝܼܵܐ ܕܛܵܘܦܵܢܵܐ.܀ ܘܡ̣ܢ ܗܲܝܘܵܢ ܕܟ̣ܝܼܬܵܐ ܘܡ̣ܢ ܗܲܝܘܵܢ ܠܵܐ ܕܟ̣ܝܼܬܵܐ ܘܡ̣ܢ ܦܵܪܲܚܬܵܐ ܘܡ̣ܢ ܟܠ ܕܒܲܓ̰ܒܸܓ̰ ܥܲܠ ܐܲܪܥܵܐ.܀ ܬܪܹܝ ܬܪܹܝ ܥܒ̣ܸܪܗ݇ܘܿܢ ܥܲܡ ܢܘܿܚ ܠܩܹܒ̣ܘܼܬܵܐ؛ ܐܘܼܪ̈ܙܹܐ ܘܢܸܩܒ̣ܹ̈ܐ؛ ܐܲܝܟܼ ܕܦܘܼܩܸܕܠܹܗ ܐܲܠܵܗܵܐ ܠܢܘܿܚ.܀ ܘܡ̣ܢ ܒܵܬ݇ܪ ܫܲܒ̣ܥܵܐ ܝܵܘܡܵܢܹ̈ܐ؛ ܘܡܝܼܵܐ ܕܛܵܘܦܵܢܵܐ ܨܠܹܐܠܗ݇ܘܿܢ ܥܲܠ ܐܲܪܥܵܐ.܀ ܒܫܹܢ݇ܬܵܐ ܐܸܫܬܲܡܵܐܐ ܠܚܲܝܹ̈ܐ ܕܢܘܿܚ؛ ܒܝܲܪܚܵܐ ܕܬܪܹܝ؛ ܫܲܒ̣ܥܣܲܪ ܗܲܪ ܒܐܵܗܵܐ ܝܲܪܚܵܐ ܦܸܫܠܗ݇ܘܿܢ ܬܪܝܼܥܹܐ ܟܠܲܝܗܝ ܡܲܒܘܼܥܹ̈ܐ ܕܥܘܼܡܩܵܐ ܓܘܼܪܵܐ؛ ܡܲܪ̈ܙܝܼܒ̣ܹܐ ܕܫܡܲܝܵܐ ܦܸܫܠܗ݇ܘܿܢ ܦܬܝܼܚܹ̈ܐ.܀ ܗ݇ܘܹܐܠܹܗ ܡܸܛܪܵܐ ܥܲܠ ܐܲܪܥܵܐ ܐܲܪܒܥܝܼ ܝܵܘܡܵܢܹ̈ܐ ܘܐܲܪܒܥܝܼ ܠܲܝܠܵܘܵܬܹ̈ܐ.܀ ܗܲܪ ܒܐܵܗܵܐ ܝܵܘܡܵܐ ܥܒ̣ܸܪܹܗ ܢܘܿܚ؛ ܘܫܹܝܡ ܘܚܵܡ ܘܝܲܦ̮ܬ ܒܢܲܝ̈ ܢܘܿܚ ܘܒܲܟ̣ܬܹܗ ܕܢܘܿܚ؛ ܘܬܠܵܬܵܐ ܒܲܟ̣ܬܵܬܹ̈ܐ ܕܒܢܘܿܢܹ̈ܐ ܕܢܘܿܚ ܥܲܡܹܗ ܠܩܹܒ̣ܘܼܬܵܐ.܀ ܐܵܢܝܼ ܕܟܠܵܗ̇ ܗܲܝܘܵܢ ܘܟܠܹܗ ܪܸܣܩܵܐ ܠܓܸܢܣܵܝܗܝ؛ ܘܟܠܹܗ ܪܸܓ̰ܒܵܐ ܕܥܲܠ ܐܲܪܥܵܐ ܘܟܠܵܗ̇ ܦܵܪܲܚܬܵܐ ܘܟܠ ܨܸܦܪܵܐ ܡܵܪܹܐ ܓܘܼܠܦܵܐ.܀ ܥܒ̣ܸܪܗ݇ܘܿܢ ܥܲܡ ܢܘܿܚ ܠܩܹܒ̣ܘܼܬܵܐ.܀ ܬܪܹܝ ܬܪܹܝ ܡ̣ܢ ܟܠ ܒܸܣܪܵܐ ܕܐܝܼܬ ܒܝܼܲܝܗܝ ܪܘܼܚܵܐ ܕܚܲܝܹ̈ܐ.܀ ܐܘܼܪ̈ܙܹܐ ܘܢܸܩܒ̣ܹ̈ܐ ܡ̣ܢ ܟܠ ܒܸܣܪܵܐ ܥܒ̣ܸܪܗ݇ܘܿܢ ܐܲܝܟܼ ܕܦܘܼܩܸܕܠܹܗ ܐܲܠܵܗܵܐ؛ ܘܕܒ̣ܸܪܹܗ ܡܵܪܝܵܐ ܬܲܪܥܵܐ ܒܵܬ݇ܪܘܼܗܝ.܀ ܘܗܘܹܐܠܹܗ ܛܵܘܦܵܢܵܐ ܐܲܪܒܥܝܼ ܝܵܘܡܵܢܹ̈ܐ ܘܐܲܪܒܥܝܼ ܠܲܝܠܵܘܵܬܹ̈ܐ ܥܲܠ ܐܲܪܥܵܐ؛ ܘܙܸܕܠܗ݇ܘܿܢ ܡܝܼܵܐ ܘܫܩܝܼܠܵܐ ܠܗ݇ܘܿܢ ܩܹܒ̣ܘܼܬܵܐ؛ ܘܦܸܫܠܵܗ̇ ܡܘܼܪܸܡܬܵܐ ܡ̣ܢ ܐܲܪܥܵܐ؛ ܘܚܘܼܠܸܢܗ݇ܘܿܢ ܡܝܼܵܐ ܘܙܸܕܠܗ݇ܘܿܢ ܥܲܠ ܐܲܪܥܵܐ ܘܓ̰ܵܘܓ̰ܵܐ ܗ݇ܘܵܐ ܩܹܒ̣ܘܼܬܵܐ ܥܲܠ ܦܵܬܵܐ ܕܡܝܼܵܐ.܀ ܘܡܝܼܵܐ ܚܘܼܠܸܢܗ݇ܘܿܢ ܟ̰ܸܡ ܪܵܒܵܐ ܥܲܠ ܐܲܪܥܵܐ؛ ܘܦܸܫܠܗ݇ܘܿܢ ܡܘܼܟܣܹܐ ܟܠܲܝܗܝ ܛܘܼܪ̈ܵܢܹܐ ܪ̈ܵܡܹܐ ܕܬܚܘܿܬ ܫܡܲܝܵܐ.܀ ܡܝܼܵܐ ܐ݇ܣܸܩܠܗ݇ܘܿܢ ܚܲܡܫܲܥܣܲܪ ܝܲܡܝܼܢܹ̈ܐ ܥܘܼܠܘܼܠ؛ ܘܦܸܫܠܗ݇ܘܿܢ ܡܘܼܟܣܹܐ ܛܘܼܪ̈ܵܢܹܐ ܪ̈ܵܡܹܐ.܀ ܘܬܸܡܠܹܗ ܟܠ ܒܸܣܪܵܐ ܕܪܵܚܸܫ ܥܲܠ ܐܲܪܥܵܐ؛ ܦܵܪܲܚܬܵܐ ܘܪܸܣܩܵܐ ܘܗܲܝܘܵܢ؛ ܘܟܠܹܗ ܪܸܓ̰ܒܵܐ ܕܪܵܚܸܫ ܥܲܠ ܐܲܪܥܵܐ؛ ܘܟܠܲܝܗܝ ܒܢܲܝ̈ܢܵܫܵܐ؛ ܘܟܠ ܕܐܝܼܬ ܢܫܲܡܬܵܐ ܕܪܘܼܚܵܐ ܕܚܲܝܹ̈ܐ ܒܢܵܚܝܼܪܹܗ؛ ܘܡ̣ܢ ܟܠ ܕܓܵܘ ܒܸܪܙܵܐ ܡܝܼܬܠܗ݇ܘܿܢ.܀ ܘܓܪܸܕܠܹܗ ܠܟܠ ܟܵܠܝܵܢܵܐ ܥܲܠ ܐܲܪܥܵܐ؛ ܡ̣ܢ ܒܢܲܝ̈ܢܵܫܵܐ ܘܗܲܠ ܪܸܣܩܵܐ ܘܪܸܓ̰ܒܵܐ ܘܦܵܪܲܚܬܵܐ ܕܫܡܲܝܵܐ؛ ܦܸܫܠܗ݇ܘܿܢ ܡܸܫܝܹ̈ܐ ܡ̣ܢ ܐܲܪܥܵܐ. ܘܦܸܫܠܹܗ ܢܘܿܚ ܘܐܵܢܝܼ ܕܥܲܡܹܗ ܒܩܹܒ̣ܘܼܬܵܐ.܀ ܘܡܝܼܵܐ ܚܘܼܠܸܢܗ݇ܘܿܢ ܥܲܠ ܐܲܪܥܵܐ ܐܸܡܵܐܐ ܘܚܲܡܫܝܼ ܝܵܘܡܵܢܹ̈ܐ܀
ܚܲܒ̣ܪܹܗ
ܝܼܫܘܿܥ ܒܲܪܢܘܿܢ ܗ؛ 13‐ܘ؛ 6.
ܫܠܵܘ ܟܬܵܒ̣ܵܐ ܕܝܼܫܘܿܥ ܒܲܪܢܘܿܢ؛ ܐܲܚܲܝ̈ ܒܲܪܸܟ̣ܡܵܪܝ܀
ܘܟܲܕ ܝܼܫܘܿܥ ܓܵܘ ܕܸܫܬܵܐ ܕܐܝܼܪܝܼܚܘܿ ܗ݇ܘܵܐ ܡܘܼܪܸܡܠܹܗ ܥܲܝܢ̈ܘܼܗܝ ܘܚܙܹܐܠܹܗ ܚܲܕ݇ ܐ݇ܢܵܫܵܐ ܟܸܠܝܵܐ ܒܲܪܩܘܼܒ̣ܠܹܗ؛ ܣܲܝܦܹܗ ܓܪܝܼܫܵܐ ܕܒ̣ܝܼܩܵܐ ܒܐܝܼܕܹܗ. ܘܐ݇ܙܸܠܹܗ ܝܼܫܘܿܥ ܠܟܸܣܠܹܗ ܘܐ݇ܡܸܪܹܗ ܐܸܠܹܗ؛ ܡܸܢܲܢ ܝܼܘܸܬ̇ ܝܲܢ ܡ̣ܢ ܕܸܫ̰ܡܸܢܲܝܢ؟܀ ܐܵܡܸܪ ܐܸܠܹܗ ܐܵܢܵܐ ܓܘܼܪܵܐ ܕܚܲܝܠܵܘܵܬܹ̈ܗ ܝ݇ܘܸܢ ܕܡܵܪܝܵܐ؛ ܘܐܵܕܝܼܵܐ ܐ݇ܬܹܐܠܝܼ. ܘܢܦܸܠܹܗ ܝܼܫܘܿܥ ܥܲܠ ܦܵܬܹܗ ܥܲܠ ܐܲܪܥܵܐ ܘܣܓ̣ܸܕܠܹܗ؛ ܘܐ݇ܡܸܪܹܗ؛ ܡܘܼܕܝܼ ܦܵܩܸܕ ܡܵܪܝܼ ܠܪܹܓܹܗ؟܀ ܘܐ݇ܡܸܪܹܗ ܪܲܒ ܚܲܝܠܵܘܵܬܹ̈ܗ ܕܡܵܪܝܵܐ ܠܝܼܫܘܿܥ؛ ܫܪܝܼ ܨܵܘܠ̈ܘܼܟܼ ܡ̣ܢ ܐܲܩܠ̈ܘܼܟܼ؛ ܣܵܒܵܒ ܕܘܼܟܬܵܐ ܕܟܸܠܝܵܐ ܝ݇ܘܸܬ̇ ܓܵܘܵܗ̇ ܩܲܕܝܼܫܬܵܐ ܝ݇ܠܵܗ̇؛܀ ܘܥܒ̣ܸܕܠܹܗ ܝܼܫܘܿܥ ܐܲܝܟܼ ܕܦܸܫܠܹܗ ܦܘܼܩܕܵܐ.܀ ܘܬܲܪ̈ܥܵܢܹܐ ܕܐܝܼܪܝܼܚܘܿ ܦܝܼܫܹܐ ܗ݇ܘܵܘ ܕܒ̣ܝܼܪܹ̈ܐ ܡ̣ܢ ܩܵܕ݇ܡ ܒܢܲܝ̈ ܝܼܣܪܵܝܹܠ؛ ܘܠܲܝܬ̇ ܗ݇ܘܵܐ ܠܵܐ ܥܵܒ̣ܪܵܢܵܐ ܘܠܵܐ ܦܵܠܛܵܢܵܐ.܀ ܘܐ݇ܡܸܪܹܗ ܡܵܪܝܵܐ ܠܝܼܫܘܿܥ؛ ܚܙܝܼ ܕܣܘܼܦܹܐܠܝܼ ܒܐܝܼܕ̈ܘܼܟܼ ܠܐܝܼܪܝܼܚܘܿ؛ ܘܠܡܲܠܟܵܗ̇ ܘܟܠܹܗ ܚܲܝܠܵܗ̇. ܟܪܘܿܟ̣ܘܿܢ ܠܵܗ̇ ܠܡܕܝܼܢ݇ܬܵܐ ܟܠܵܘܟ̣ܘܿܢ ܦܵܠܵܫܹ̈ܐ؛ ܘܚܕܘܿܪܘܿܢ ܠܚܵܕܸܪ̈ܘܵܢܹܐ ܕܡܕܝܼܢ݇ܬܵܐ ܝܵܘܡܵܐ ܚܲܕ݇ ܓܵܗܵܐ؛ ܗܵܕܟ̣ܵܐ ܥܵܒ̣ܕܝܼܬܘܿܢ ܩܵܐ ܫܲܒ̣ܥܵܐ ܝܵܘܡܵܢܹ̈ܐ.܀ ܘܫܲܒ̣ܥܵܐ ܟܵܗܢܹ̈ܐ ܒܸܬ ܫܵܩܠܝܼ ܩܲܪ̈ܢܵܬܹܐ ܘܒܸܬ ܡܲܩܘܸܚܝܼ ܩܵܕ݇ܡ ܩܹܒ̣ܘܼܬܵܐ؛ ܘܒܝܵܘܡܵܐ ܕܫܲܒ̣ܥܵܐ ܟܪܘܿܟ̣ܘܿܢ ܠܡܕܝܼܢ݇ܬܵܐ ܫܲܒ̣ܥܵܐ ܓܵܗܹ̈ܐ؛ ܘܟܵܗܢܹ̈ܐ ܒܸܬ ܩܵܪܝܼ ܒܫܝܼܦܘܿܪܹ̈ܐ.܀ ܘܐܝܼܡܲܢ ܕܡܘܼܩܘܸܚܠܗ݇ܘܿܢ ܒܩܲܪ̈ܢܵܬܹܐ؛ ܘܫܡܝܼܥܠܵܘܟ̣ܘܿܢ ܩܵܠܵܐ ܕܩܲܪܢܵܐ؛ ܒܸܬ ܡܲܩܘܸܚ ܟܠܹܗ ܛܵܝܸܦܵܐ ܡܲܩܘܲܚܬܵܐ ܓܘܼܪܬܵܐ؛ ܘܒܸܬ ܢܵܦܸܠ ܫܘܼܪܵܐ ܕܡܕܝܼܢ݇ܬܵܐ ܥܲܠ ܕܘܼܟܬܹܗ؛ ܘܒܸܬ ܐܵܣܸܩ ܛܵܝܸܦܵܐ ܟܠ ܐ݇ܢܵܫܵܐ ܒܲܪܩܘܼܒ̣ܠܹܗ܀
♱♱♱♱♱♱♱♱♱
ܚܲܕܼܒܫܲܒܵܐ ܕܲܬܠܵܬܼܵܐ ܕܨܵܘܡܵܐ
ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ
ܕܲܠܘܵܬܼ ܪ̈ܗܘܿܡܵܝܹܐ ܐܲܚܲܝ̈ ܒܲܪܸܟܼܡܵܪܝ܀
ܣܵܒܵܒ ܒܝܼܕܲܥܝܵܐ ܝ݇ܘܲܚ ܒܢܵܡܘܿܣܵܐ ܪܘܼܚܵܢܵܝܵܐ ܝ݇ܠܹܗ. ܐܝܼܢܵܐ ܐܵܢܵܐ ܒܸܣܪܵܢܝܵܐ ܝ݇ܘܸܢ ܘܦܝܼܫܵܐ ܙܘܼܒܢܵܐ ܩܵܐ ܚܛܝܼܬܵܐ* ܣܵܒܵܒ ܡܸܢܕܝܼ ܕܒܸܦܠܵܚܵܐ ܝ݇ܘܸܢ ܠܹܐ ܝ݇ܘܸܢ ܒܝܼܕܲܥܝܵܐ. ܘܠܹܐ ܝ݇ܘܸܢ ܒܸܥܒܼܵܕܵܐ ܡܸܢܕܝܼ ܕܒܵܡܣܵܐ ܠܝܼ؛ ܐܸܠܵܐ ܡܸܢܕܝܼ ܕܒܸܣܢܵܝܵܐ ܝ݇ܘܸܢ ܗ̇ܘ ܒܸܥܒܼܵܕܵܐ ܝ݇ܘܸܢ* ܘܐܸܢ ܡܸܢܕܝܼ ܕܠܵܐ ܒܵܣܡܵܐܠܝܼ ܕܥܵܒܼܕܸܢ ܒܸܥܒܼܵܕܵܐ ܝ݇ܘܸܢ؛ ܒܝܼܵܗܒܼܵܐ ܝ݇ܘܸܢ ܣܵܗܕܘܼܬܵܐ ܥܲܠ ܢܵܡܘܿܣܵܐ ܕܛܵܒܼܵܐ ܝ݇ܠܹܗ* ܐܵܕܝܼܵܐ ܠܹܐ ܝ݇ܘܸܢ ܐܵܢܵܐ ܒܓܵܢܝܼ ܒܸܦܠܵܚܵܐ ܐܵܗܵܐ. ܐܸܠܵܐ ܚܛܝܼܬܵܐ ܕܥܡܝܼܪܬܵܐ ܝ݇ܠܵܗ̇ ܓܵܘܝܼ* ܣܵܒܵܒ ܒܝܼܕܲܥܝܵܐ ܝ݇ܘܸܢ ܕܠܹܐ ܝ݇ܠܵܗ̇ ܒܸܥܡܵܪܵܐ ܒܝܼܝܼ ܝܵܥܢܸܐ ܒܒܸܣܪܝܼ ܛܵܒܼܬܵܐ. ܕܟܹܐ ܒܵܣܡܵܐܠܝܼ ܒܛܵܒܼܬܵܐ ܗܵܣܵܢܵܝܝܼ ܝ݇ܠܵܗ̇ ܩܵܬܝܼ. ܐܝܼܢܵܐ ܕܦܵܠܚܸܢܵܗ̇ ܠܹܐ ܝ݇ܘܸܢ ܒܸܡܨܵܝܵܐ* ܣܵܒܵܒ ܠܹܐ ܝ݇ܘܸܢ ܒܸܥܒܼܵܕܵܐ ܠܛܵܒܼܬܵܐ ܕܒܵܣܡܵܐ ܠܝܼ. ܕܥܵܒܼܕܸܢ. ܐܝܼܢܵܐ ܒܝܼܫܬܵܐ ܕܠܹܐ ܒܵܣܡܵܐܠܝܼ ܕܥܵܒܼܕܸܢ ܗ̇ܝ ܒܸܥܒܼܵܕܵܐ ܝ݇ܘܸܢ. ܠܹܐ ܝ݇ܘܸܢ ܐܵܢܵܐ ܒܸܥܒܼܵܕܵܐ ܐܸܠܵܐ ܚܛܝܼܬܵܐ ܕܥܡܝܼܪܬܵܐ ܝ݇ܠܵܗ̇ ܒܝܼܝܼ* ܡܵܫ݇ܟ̰ܘܿܚܹܐ ܝ݇ܘܸܢ ܗܲܕܟܼܵܐ ܠܢܵܡܘܿܣܵܐ ܕܒܸܫܠܵܡܵܐ ܠܚܝܼܵܠܝܼ ܗ̇ܘ ܕܒܵܣܡܵܐ ܠܹܗ ܕܥܵܒܼܹܕ ܛܵܒܼܬܵܐ. ܣܵܒܵܒ ܕܒܝܼܫܬܵܐ ܩܘܼܪܒܵܐ ܝ݇ܠܵܗ̇ ܐܸܠܝܼ* ܒܸܚܕܵܝܵܐ ܝ݇ܘܸܢ ܒܢܵܡܘܿܣܵܐ ܕܐܲܠܵܗܵܐ ܒܒܲܪܢܵܫܵܐ ܓܵܘܵܝܵܐ* ܐܝܼܢܵܐ ܒܸܚܙܵܝܵܐ ܝ݇ܘܸܢ ܚܲܕ݇ ܢܵܡܘܿܣܵܐ ܐ݇ܚܸܪ݇ܢܵܐ ܒܗܲܕܵܡܝܼ̈ ܒܸܦܠܵܫܵܐ ܕܲܪܩܘܼܒܼܠ ܕܢܵܡܘܿܣܵܐ ܕܚܝܼܵܠܝܼ̈؛ ܘܠܵܒܘܿܠܝܼ ܝ݇ܠܹܗ ܠܢܵܡܘܿܣܵܐ ܕܚܛܝܼܬܵܐ ܕܐܝܼܬ ܓܵܘ ܗܲܕܵܡ̈ܝܼ* ܟܡܵܐ ܒܲܪܢܵܫܵܐ ܫܲܩܝܼ ܝ݇ܘܸܢ؛ ܡܵܢܝܼ ܒܸܬ ܦܵܨܸܐ ܠܝܼ ܡ̣ܢ ܕܐܵܗܵܐ ܦܲܓܼܪܵܐ ܕܡܵܘܬܵܐ* ܡܵܘܕܘܿܝܹܐ ܝ݇ܘܸܢ ܠܐܲܠܵܗܵܐ ܒܝܼܲܕ ܡܵܪܲܢ ܝܼܫܘܿܥ ܡܫܝܼܚܵܐ*
♱♱♱♱♱♱♱♱♱
ܚܲܕܼܒܫܲܒܵܐ ܕܲܬܠܵܬܼܵܐ ܕܨܵܘܡܵܐ
ܡܬܝ ܟܟ: 17 ‐ 29
ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ ܟܪܘܙܘܬܼܐ ܕܡܬܝ
♰ ܐܝܼܢܵܐ ܒܵܬܵܪ ܐܲܢܹܐ ܗܕܝܼܪܵܐ ܗ݇ܘܵܐ ܝܑܼܫܘܿܥ ܕܐܵܣܸܠَܩ ܠܐܘܿܪܸܫܠܸܡ: ܘܠܘܼܒܸܠܹܗ ܠܬܪܹܥܣܲܪ ܬܲܠܡܝܼܕܘܼ̈ܗܝ، ܒܹܝܬ݇ܠܹܗ ܘܐܸܠܲܝܗܝ ܒܐܘܼܪܚܵܐ: ܘܐ݇ܡܝܼܪܹܗ ܐܸܠܲܝܗܝ: ܗܵܐ ܒܹܣܵܠَܩܵܐ ܝܘܲܚ ܠܐܘܿܪܸܫܠܸܡ: ܘܒܪܘܿܢܹܗ ܕܐ݇ܢܵܫܵܐ ܒܸܕ ܦܵܐܸܫ ܣܘܼܦܝܵܐ ܠܪ̈ܲܒܲܝ ܟܵܗܢܹ̈ܐ ܘܠܣܲܦܪܹ̈ܐ: ܘܒܸܕ ܥܵܒ̣ܕܝܼܠܹܗ ܓܘܼܢܵܗܟܲܪ ܠܡܵܘܬܵܐ: ܘܒܸܕ ܣܵܦܝܼܠܹܗ ܠܥܲܡܡܹ̈ܐ، ܘܒܸܕ ܡܲܣܚܸܪܝܼ ܒܝܼܹܗ ܘܒܸܕ ܓ̰ܲܢܓ̰ܸܪܝܼܠܹܗ ܘܒܸܕ ܙܵܩܦܝܼܠܹܗ، ܘܠܝܵܘܡܵܐ ܕܬܠܵܬܵܐ ܒܸܬ ܩܵܐܸܡ: ܗܿܝܓܵܗ̇ ܩܘܼܪܒܸܢܵܗ̇ ܐܸܠܹܗ ܝܸܡܵܐ ܕܒܢܘܿܢܹ̈ܐ ܕܙܲܒܼܕܵܝ، ܗ̇ܝ ܘܒܢܘܿܢ̈ܘܼܗܿ: ܘܣܓܼܝܼܕܠܵܗ̇ ܐܸܠܹܗ ܘܛܲܠܒܵܐ ܗ݇ܘܵܐ ܡܸܢܹܗ ܚܲܕ݇ ܡܸܢܕܝܼ. ܐܝܼܢܵܐ ܗ̇ܘ ܐ݇ܡܝܼܪܹܗ ܐܸܠܵܗ̇: ܡܘܿܕܝܼ ܒܵܥܝܵܬܝ ܐܲܢ݇ܬܝ؟ ܐܵܡܪܵܐ ܐܸܠܹܗ: ܐ݇ܡܘܿܪ ܕܝܲܬܒܼܝܼ ܐܲܢܹܐ ܬܪܹܝ ܒܢܘܿܢ̈ܝܼ ܚܲܕ݇ ܡ̣ܢ ܝܲܡܝܼܢܘܼܟܼ ܘܚܲܕ݇ ܡ̣ܢ ܣܸܡܵܠܘܼܟܼ ܒܡܲܠܟܘܼܬܘܼܟܼ: ܓ̰ܘܼܘܸܒܠܹܗ ܝܑܼܫܘܿܥ ܘܐ݇ܡܝܼܪܹܗ: ܠܹܐ ܝܬܘܿܢ ܒܝܼܕܵܥܵܐ ܡܘܿܕܝܼ ܒܸܛܠܵܒܵܐ ܝܬܘܿܢ. ܒܡܵܨܝܼܬܘܿܢ ܠܸܫܬܵܝܵܐ ܟܵܣܵܐ ܕܐܵܢܵܐ ܗܕܝܼܪܵܐ ܝܘܸܢ ܠܸܫܬܵܝܵܐ؟ ܝܲܢ ܡܲܥܡܘܿܕܝܼܬܵܐ ܕܐܵܢܵܐ ܥܲܡܕܸܢ ܒܸܬ ܥܲܡܕܝܼܬܘܿܢ؟ ܐܲܡܪܝܼ ܐܸܠܹܗ ܒܡܵܨܲܚ: ܐܵܡܸܪ ܐܸܠܲܝܗܝ: ܟܵܣܝܼ ܒܸܬ ܫܵܬܝܼܬܘܿܢ: ܘܡܲܥܡܘܿܕܝܼܬܵܐ ܕܐܵܢܵܐ ܥܲܡܕܸܢ ܒܸܬ ܥܲܡܕܝܼܬܘܿܢ: ܐܝܼܢܵܐ ܕܝܲܬܒܼܝܼܬܘܿܢ ܡ̣ܢ ܝܲܡܝܼܢܝܼ ܘܡ̣ܢ ܣܸܡܵܠܝܼ، ܠܹܐ ܝܠܵܗ̇ ܕܝܼܠ݇ܝܼ ܕܝܲܗܒܼܸܢ، ܐܸܠܵܐ ܠܐܲܝܢܝܼ ܕܦܝܼܫܬܵܐ ܝܠܵܗ̇ ܗܘܼܕܸܪܬܵܐ ܡ̣ܢ ܒܵܒܝܼ. ܐܝܼܢܵܐ ܟܲܕ ܫܡܝܼܥܠܗ݇ܘܿܢ ܥܸܣܪܵܐ: ܟܪܝܼܒܠܗ݇ܘܿܢ ܥܲܠ ܐܵܢܝܼ ܬܪܹܝ ܐܲܚܘܿܢ̈ܘܵܬܹܐ: ܘܩܸܪܝܲܝܠܹܗ ܝܑܼܫܘܿܥ ܘܐ݇ܡܝܼܪܹܗ ܐܸܠܲܝܗܝ: ܒܝܼܕܵܥܵܐ ܝܬܘܿܢ ܕܪܹ̈ܫܵܢܹܐ ܕܥܲܡܡܹ̈ܐ ܡܵܪܵܘܵܬܲܝܗܝ ܝܢܵܐ: ܘܓܘܼܪ̈ܵܢܲܝܗܝ ܫܲܠܝܼܛܹ̈ܐ ܝܢܵܐ ܥܲܠܲܝܗܝ: ܐܝܼܢܵܐ ܠܵܐ ܗܵܘܹܐ ܗܲܕܟܼܵܐ ܒܲܝܢܵܬܵܘܟܼܘܿܢ: ܐܸܠܵܐ ܡ̇ܢ ܕܒܵܥܹܐ ܓܵܘܵܘܟܼܘܿܢ ܕܗܵܘܹܐ ܓܘܼܪܵܐ: ܗܵܘܹܐ ܐܸܠܵܘܟܼܘܿܢ ܡܫܲܡܫܵܢܵܐ، ܘܡ̇ܢ ܕܒܵܥܹܐ ܓܵܘܵܘܟܼܘܿܢ ܕܗܵܘܹܐ ܩܵܕ݇ܡܵܝܵܐ: ܗܵܘܹܐ ܐܸܠܵܘܟܼܘܿܢ ܥܲܒ̣ܕܵܐ . ܕܲܐܟܼܝ ܕܒܪܘܿܢܹܗ ܕܐ݇ܢܵܫܵܐ ܠܵܐ ܐ݇ܬܹܐܠܹܗ ܕܦܵܐܸܫ ܥܒܼܝܼܕܵܐ ܚܸܠܡܵܬ: ܐܸܠܵܐ ܕܥܵܒܼܸܕ ܚܸܠܡܵܬ: ܘܕܝܲܗ݇ܒܼܸܠ ܓܵܢܹܗ ܦܘܼܪܩܵܢܵܐ ܚܠܵܦ ܪܵܒܵܐ.
♱♱♱♱♱♱♱♱♱