ܚܲܕܼܒܫܲܒܵܐ ܕܲܬܠܵܬܼܵܐ ܕܕܸܢܚܵܐ
ܡܸܢܝܵܢܵܐ؛ ܝܐ؛ 11‐21
ܬܸܒ̣ܘ ܘܲܫܠܵܘ ܡܸܢܝܵܢܵܐ ܣܸܦܪܵܐ ܕܐܲܪܒܥܵܐ ܕܐܘܿܪܵܝܬܵܐ؛
ܐܲܚܲܝ̈ ܒܲܪܸܟ̣ܡܵܪܝ܀
ܘܐ݇ܡܸܪܹܗ ܡܘܼܫܹܐ ܠܡܵܪܝܵܐ؛ ܝܵܐ ܡܵܪܝܼ؛ ܩܵܡܘܿܕܝܼ ܥܒ̣ܸܕܠܘܼܟܼ ܣܪܝܼܬܵܐ ܠܪܹܓܘܼܟܼ ܘܩܵܡܘܿܕܝܼ ܠܵܐ ܡܘܼܫ݇ܟ̰ܸܚܠܝܼ ܪ̈ܲܚܡܹܗ ܒܥܲܝ̈ܢܘܼܟܼ ܘܡܘܼܬܸܒ̣ܠܘܼܟܼ ܥܲܠܝܼ ܟܠܹܗ ܝܘܼܩܪܵܐ ܕܐܵܗܵܐ ܛܵܝܸܦܵܐ؟܀ ܩܵܡܘܿ ܐܵܢܵܐ ܒܛܸܢܝܼ؛ ܝܲܢ ܐܵܢܵܐ ܗܘܼܨܸܠܝܼ ܐܸܠܹܗ؟ ܘܒܹܐܡܵܪܵܐ ܝ݇ܘܸܬ̇ ܐܸܠܝܼ؛ ܫܩܘܿܠܹܗ ܒܥܘܼܒܘܼܟܼ ܐܲܝܟܼ ܕܫܵܩܸܠ ܚܲܕ݇ ܬܲܓܒܸܪܵܢܵܐ ܕܝܵܠܵܕ݇ܐ ܙܥܘܿܪܵܐ ܠܙܲܪܥܵܐ ܕܝ݇ܡܹܐܠܘܼܟܼ ܩܵܐ ܒܵܒܵܘܵܬܲܝ̈ܗܝ.܀ ܡܐܲܝܟܵܐ ܠܝܼ ܒܸܣܪܵܐ ܕܝܵܗܒ̣ܸܢ ܩܵܐ ܟܠܹܗ ܐܵܗܵܐ ܛܵܝܸܦܵܐ ܕܒܸܒܟ̣ܵܝܵܐ ܝ݇ܢܵܐ ܘܒܹܐܡܵܪܵܐ؛ ܗܲܒ̣݇ܠܲܢ ܒܸܣܪܵܐ ܕܐܵܟ̣ܠܲܚ ܠܹܐ ܡܵܨܸܢ ܕܛܵܥܢܸܢ ܠܚܘܿܕܝܼ ܝܘܼܩܪܵܐ ܕܐܵܗܵܐ ܛܵܝܸܦܵܐ ܟܠܹܗ! ܣܵܒܵܒ ܒܘܼܫ ܚܲܝܠܵܢܵܐ ܝ݇ܠܹܗ ܡܸܢܝܼ.܀ ܐܸܢ ܗܵܕܟ̣ܵܐ ܥܵܒ̣ܕܸܬ̇ ܐܸܠܝܼ ܩܛܘܿܠ ܠܝܼ ܐܸܢ ܡܘܼܫ݇ܟ̰ܸܚܠܝܼ ܪ̈ܲܚܡܹܐ ܒܥܲܝܢ̈ܘܼܟܼ؛ ܘܠܵܐ ܚܵܙܸܢ ܒܒܝܼܫܬܝܼ܀ ܘܐ݇ܡܸܪܹܗ ܡܵܪܝܵܐ ܩܵܐ ܡܘܼܫܹܐ؛ ܓ̰ܲܡܥܝܼ ܩܵܬܝܼ ܫܲܒ̣ܥܵܐ ܐ݇ܢܵܫܹ̈ܐ ܡ̣ܢ ܣܵܒ̣ܹ̈ܐ ܕܝܼܣܪܵܝܹܠ؛ ܐܵܢܝܼ ܕܝܵܕܥܸܬ̇ ܕܐܵܢܝܼ ܝ݇ܢܵܐ ܪܹ̈ܫܵܢܹܐ ܘܣܵܦܪܹ̈ܐ ܕܛܵܝܸܦܵܐ؛ ܘܠܵܒܸܠ ܠܗ݇ܘܿܢ ܠܡܲܫܟܲܢ ܙܲܒ̣ܢܵܐ؛ ܘܗܵܘܝܼ ܗܵܙܸܪ ܥܲܡܘܼܟܼ ܬܵܡܵܐ؛܀ ܘܒܸܬ ܨܵܠܸܢ ܘܗܲܡܙܸܡܸܢ ܥܲܡܘܼܟܼ ܬܵܡܵܐ؛܀ ܘܒܸܬ ܡܲܒܨܸܪܸܢ ܡ̣ܢ ܪܘܼܚܵܐ ܕܥܲܠܘܼܟܼ ܘܡܲܬܒ̣ܸܢ ܥܲܠܲܝܗܝ؛ ܘܫܵܩܠܝܼ ܥܲܡܘܼܟܼ ܡ̣ܢ ܝܘܼܩܪܹܗ ܕܐܵܗܵܐ ܛܵܝܸܦܵܐ؛ ܘܠܵܐ ܫܵܩܠܸܬ̇ ܐܲܢ݇ܬ̇ ܒܢܲܦ̮ܫܘܼܟܼ.܀ ܘܐ݇ܡܸܪܹܗ ܡܘܼܫܹܐ ܩܵܐ ܛܵܝܸܦܵܐ. ܦܘܼܫܘܼܢ ܩܘܼܕܫܹܐ؛ ܩܵܝܕܲܡܬܵܐ ܕܒܸܬ ܐܵܟ̣ܠܝܼܬܘܿܢ ܒܸܣܪܵܐ؛ ܣܵܒܵܒ ܕܒܟ̣ܹܐܠܵܘܟ̣ܘܿܢ ܩܵܕ݇ܡ ܡܵܪܝܵܐ ܘܐ݇ܡܸܪܵܘܟ̣ܘܿܢ؛ ܡܵܢܝܼ ܒܸܬ ܡܲܐܟ̣ܸܠܲܢ ܒܸܣܪܵܐ؟ ܣܵܒܵܒ ܐܝܼܬ ܗ݇ܘܵܐ ܠܲܢ ܪܵܒܵܐ ܓܵܘ ܡܸܨܪܹܝܢ؛ ܘܒܸܬ ܝܵܗ݇ܒ̣ܸܠ ܠܵܘܟ̣ܘܿܢ ܡܵܪܝܵܐ ܒܸܣܪܵܐ ܕܐܵܟ̣ܠܝܼܬܘܿܢ؛ ܠܵܐ ܐܲܚܟ̰ܝܼ ܚܲܕ݇ ܝܵܘܡܵܐ ܒܸܬ ܐܵܟ̣ܠܝܼܬܘܿܢ ܠܹܗ؛ ܘܠܵܐ ܬܪܹܝ ܝܵܘܡܵܢܹ̈ܐ؛ ܘܠܵܐ ܚܲܡܫܵܐ ܘܠܵܐ ܥܸܣܪܵܐ ܘܠܵܐ ܥܸܣܪܝܼ ܝܵܘܡܵܢܹ̈ܐ.܀ ܩܵܐ ܚܲܕ݇ ܝܲܪܚܵܐ ܒܸܬ ܐܵܟ̣ܠܝܼܬܘܿܢ ܠܹܗ ܗܲܠ ܕܦܵܠܸܛ ܡ̣ܢ ܢܲܚܝܼܪܵܘܟ̣ܘܿܢ ܘܗܵܘܹܐ ܐܸܠܵܘܟ̣ܘܿܢ ܓܲܢܓܲܙܬܵܐ؛ ܣܵܒܵܒ ܕܡܘܼܣܠܹܐ ܠܵܘܟ̣ܘܿܢ ܠܡܵܪܝܵܐ ܕܝܼܠܹܗ ܓܵܘܵܘܟ̣ܘܿܢ؛ ܘܒܟ̣ܹܐܠܵܘܟ̣ܘܿܢ ܩܵܕ݇ܡ ܡܵܪܝܵܐ ܘܐ݇ܡܸܪܵܘܟ̣ܘܿܢ ܩܵܡܘܿܕܝܼ ܦܠܸܛܠܲܢ ܡ̣ܢ ܡܸܨܪܹܝܢ؟܀
ܚܲܒܪܹܗ
ܐܹܫܲܥܝܵܐ ܡܗ؛ 18‐ܡܘ؛ 5
ܫܠܵܘ ܢܒ̣ܝܼܬܹܗ ܕܐܹܫܲܥܝܵܐ؛ ܐܲܚܲܝ̈ ܒܲܪܸܟ̣ܡܵܪܝ܀
ܣܵܒܵܒ ܕܗܵܕܟ̣ܵܐ ܒܹܐܡܵܪܵܐ ܝ݇ܠܹܗ ܡܵܪܝܵܐ ܕܒܪܹܐܠܹܗ ܫܡܲܝܵܐ؛ ܘܗܲܪ ܗ̇ܘ ܝܼܠܹܗ ܐܲܠܵܗܵܐ ܕܓܒ̣ܸܠܹܗ ܐܲܪܥܵܐ ܘܬܘܼܪܨܵܐ ܠܹܗ؛ ܘܗ̇ܘ ܗܘܼܕܪܵܐ ܠܹܗ؛ ܠܹܐ ܗ݇ܘܵܐ ܒܸܪܝܵܗ̇ ܕܠܵܐ ܦܵܝܕܵܐ؛ ܐܸܠܵܐ ܩܵܐ ܕܝܵܬܒ̣ܵܐ ܓܵܘܵܗ̇ ܒܪܝܼܬܹܗ؛ ܐܵܢܵܐ ܝ݇ܘܸܢ ܡܵܪܝܵܐ ܘܠܲܝܬ̇ ܚܲܕ݇ ܐ݇ܚܹܪ݇ܢܵܐ.܀ ܠܹܐ ܝ݇ܘܸܢ ܒܛܸܫܘܵܐ ܗܘܼܡܙܸܡܵܐ؛ ܒܚܲܕ݇ ܕܘܼܟܬܵܐ ܚܸܫܟܵܢܬܵܐ ܕܐܲܪܥܵܐ؛ ܘܠܵܐ ܐ݇ܡܸܪܝܼ ܩܵܐ ܙܲܪܥܹܗ ܕܝܲܥܩܘܿܒ̣ ܕܠܵܐ ܦܵܝܕܵܐ ܛܠܸܒܠܗ݇ܘܿܢ ܡܸܢܝܼ؛ ܣܵܒܵܒ ܐܵܢܵܐ ܝ݇ܘܸܢ ܡܵܪܝܵܐ ܗܲܡܙܸܡܵܢܵܐ ܕܙܲܕܝܼܩܘܼܬܵܐ؛ ܘܡܲܚܙܝܼܵܢܵܐ ܕܬܪܘܼܨܘܼܬܵܐ.܀ ܓ̰ܡܸܥܡܘܿܢ ܘܬܹܐܡܘܿܢ ܘܩܲܪܒܸܢܗ݇ܘܿܢ ܡܐܘܼܕܵܠܹܐ؛ ܐܵܢܝܼ ܕܦܝܵܫܵܐ ܝ݇ܢܵܐ ܦܘܼܨܝܹܐ ܡ̣ܢ ܛܵܝܸܦܹ̈ܐ؛ ܠܵܐ ܝ݇ܕܝܼܥܠܗ݇ܘܿܢ ܕܫܩܸܠܗ݇ܘܿܢ ܩܲܝܣܵܐ ܓܠܝܼܦܵܐ؛ ܘܨܘܼܠܹܐܠܗ݇ܘܿܢ ܨܠܘܿܬܵܐ ܩܵܐ ܐܲܠܵܗܵܐ ܕܠܵܐ ܡܦܵܪܸܩ؛ ܡܲܚܙܹܐܡܘܿܢ ܘܩܲܪܒܸܢܗ݇ܘܿܢ ܘܥܒ̣ܘܿܕܘܿܢ ܡܸܠܟܵܐ [ܪܵܐܝܝܼ] ܥܲܡ ܐܘܼܕܵܠܹܐ. ܡܵܢܝܼ ܝ݇ܠܹܗ ܫܸܡܥܝܵܐ ܐܵܗܵܐ ܡ̣ܢ ܩܲܕ݇ܡܵܝܬܵܐ؛ ܘܡ̣ܢ ܫܘܼܪܵܝܵܐ ܐܵܢܵܐ ܝ݇ܘܸܢ ܡܵܪܝܵܐ؛ ܘܠܲܝܬ̇ ܚܲܕ݇ ܐܲܠܵܗܵܐ ܐ݇ܚܹܪ݇ܢܵܐ ܫܒ̣ܘܿܩ ܡܸܢܝܼ؟ ܐܲܠܵܗܵܐ ܙܲܕܝܼܩܵܐ ܘܦܵܪܘܿܩܵܐ ܘܠܲܝܬ̇ ܫܒ̣ܘܿܩ ܡܸܢܝܼ.܀ ܩܲܪܒܸܢܗ݇ܘܿܢ ܠܟܸܣܠܝܼ ܟܠܵܘܟ̣ܘܿܢ ܡܲܪ̈ܙܵܢܵܢܹܐ ܕܐܲܪܥܵܐ؛ ܕܦܵܝܫܝܼܬܘܿܢ ܦܘܼܪܩܹܐ. ܣܵܒܵܒ ܕܐܵܢܵܐ ܝ݇ܘܸܢ ܡܵܪܝܵܐ ܘܠܲܝܬ̇ ܡܸܕܪܹܐ.܀ ܒܓܵܢܝܼ ܝ݇ܡܹܐܠܝܼ؛ ܘܡ̣ܢ ܦܘܼܡܝܼ ܦܠܸܛܠܵܗ̇ ܗܹܡܸܙܡܵܢ ܕܙܲܕܝܼܩܘܼܬܵܐ؛ ܘܠܹܐ ܕܵܝܪܵܐ؛ ܐܸܠܝܼ ܒܸܬ ܟܵܝܦܵܐ ܟܠ ܒܸܪܟܵܐ؛ ܘܒܝܼܝܼ ܒܸܬ ܝܵܡܹܐ ܟܠ ܠܸܫܵܢܵܐ.܀ ܘܒܸܬ ܐܵܡܪܝܼ ܒܡܵܪܝܵܐ ܝ݇ܠܵܗ̇ ܙܲܕܝܼܩܘܼܬܵܐ؛ ܘܚܲܝܠܵܢܹ̈ܐ ܠܟܸܣܠܹܗ ܒܸܬ ܐܵܙܠ݇ܝܼ؛ ܘܢܵܟ̣ܦܝܼ ܟܠ ܕܣܵܢܝܼܠܘܼܟܼ؛ ܒܝܼܝܼ ܒܸܬ ܦܵܐܹܫ ܚܩܝܼܪܵܐ ܘܡܘܼܟܫܸܛܵܐ ܟܠܹܗ ܙܲܪܥܹܗ ܕܝܼܣܪܵܝܹܠ. ܢܦܸܠܹܗ ܒܹܝܠ ܘܦܸܫܠܹܗ ܡܘܼܒܪܸܟܵܐ ܢܵܒܘܿ؛ ܘܗܘܹܐܠܗ݇ܘܿܢ ܨܵܢܲܡܲܝ̈ܗܝ ܛܲܥܢܹ̈ܐ ܐ݇ܣܝܼܪܹ̈ܐ ܩܵܐ ܗܲܝܘܵܢܹ̈ܐ ܘܓܘܼܡܠܹ̈ܐ ܟܦܝܼܢܹ̈ܐ؛ ܒܪܸܟܠܗ݇ܘܿܢ ܘܢܦܸܠܗ݇ܘܿܢ ܡܐܘܼܕܵܠܹܐ ܘܠܵܐ ܡܨܹܐܠܗ݇ܘܿܢ ܠܚܵܠܘܿܨܹܐ ܛܲܥܢܲܝܗܝ؛ ܘܐ݇ܙܸܠܗ݇ܘܿܢ ܒܣܠܵܒܵܐ ܓܵܢܵܬܲܝ̈ܗܝ.܀ ܫܡܸܥܡܘܿܢ ܠܝܼ ܒܹܝܬ̣ ܝܲܥܩܘܿܒ̣؛ ܘܟܠܹܗ ܣܵܡܵܐ ܦܝܼܫܵܐ ܕܝܼܣܪܵܝܹܠ ܕܦܝܵܫܵܐ ܝ݇ܢܵܐ ܫܩܝܼܠܹܐ ܒܟܹܪ݇ܣܵܐ ܘܦܝܵܫܵܐ ܛܥܝܼܢܹ̈ܐ ܒܡܲܪܒܥܵܐ؛ ܗܲܠ ܣܲܝܒܘܼܬܵܐ ܐܵܢܵܐ ܝ݇ܘܸܢ ܘܗܲܠ ܚܘܲܪܕܸܩܢܘܼܬܵܐ ܐܵܢܵܐ ܒܸܬ ܛܵܥܢܸܢ. ܐܵܢܵܐ ܥܒ̣ܸܕܠܝܼ؛ ܘܐܵܢܵܐ ܒܸܬ ܫܵܩܠܸܢ؛ ܘܐܵܢܵܐ ܒܸܬ ܛܵܥܢܸܢ ܘܒܸܬ ܦܵܨܸܢ܀
♱♱♱♱♱♱♱♱
ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ
ܕܲܠܘܵܬܼ ܥܸܒܼܪ̈ܵܝܹܐ ܐܲܚܲܝ̈ ܒܲܪܸܟܼܡܵܪܝ܀
ܣܵܒܵܒ ܦܸܫܠܲܢ ܚܒܼܝܼܛܹܐ ܥܲܡ ܡܫܝܼܚܵܐ؛ ܐܸܢ ܡܼܢ ܫܘܼܪܵܝܵܐ ܗܲܠ ܚܲܪܬܵܐ ܕܵܒܼܩܲܚ ܩܘܼܝܵܐ ܒܐܵܗܵܐ ܩܵܘܠܵܐ ܫܲܪܝܼܪܵܐ* ܕܵܐܟܼܝܼ ܕܝܼܠܹܗ ܐ݇ܡܝܼܪܵܐ ܕܐܹܢ ܐܸܕܝܘܿܡ ܝܵܘܡܵܐ ܒܪܲܬ̄ ܩܵܠܹܗ ܫܵܡܥܝܼܬܘܿܢ؛ ܠܵܐ ܡܲܩܫܝܼܬܘܿܢ ܠܸܒܵܘܵܬܵܘ̈ܟܼܘܿܢ ܠܡܲܟܪܲܒ̇ܬܹܗ* ܒܲܣ ܡܵܢܝܼ ܝ݇ܢܵܐ ܐܵܢܝܼ ܕܫܡܝܼܥ ܠܗ݇ܘܿܢ ܘܡܘܼܟܪܸܒܠܗ݇ܘܿܢ؛ ܠܹܐ ܝܗ݇ܘ̣ܵܘ ܐܵܢܝܼ ܕܦܠܸܛܠܗ݇ܘܿܢ ܡ̣ܢ ܡܸܨܪܹܝܢ ܒܐܝܼܕܵܐ ܕܡܘܼܫܹܐ؟* ܘܒܐܲܝܢܝܼ ܣܩܸܕܠܹܗ ܐܲܪܒܥܝܼ ܫܸܢܹ̈ܐ؛ ܠܵܐ ܒܐܵܢܝܼ ܕܚܛܹܐ ܠܗ݇ܘܿܢ ܘܓܲܪ̈ܡܲܝܗܝ ܢܦܸܠܗ݇ܘܿܢ ܓܵܘ ܒܲܪܝܼܵܐ؟* ܘܥܲܠ ܕܐܲܝܢܝܼ ܝ݇ܡܹܐ ܠܹܗ ܕܠܵܐ ܥܵܒܼܪܝܼ ܠܡܲܢܝܲܚܬܹܗ؛ ܠܵܐ ܥܲܠ ܕܐܵܢܝܼ ܕܠܵܐ ܡܘܸܨܝܸܬܠܗ݇ܘܿܢ؟* ܘܒܸܚܙܵܝܵܐ ܝ݇ܘܲܚ ܕܠܵܐ ܡܨܹܐܠܗ݇ܘܿܢ ܠܸܥܒܼܵܪܵܐ ܡ̣ܢ ܣܵܒܵܒ ܕܠܵܐ ܗܘܼܡܸܢܗ݇ܘܿܢ܋ ܒܲܣ ܙܲܕܥܲܚ؛ ܕܒܲܠܟܵܐ ܟܲܕ ܩܵܘܠܵܐ ܕܥܒܲܪܬܵܐ ܠܡܲܢܝܲܚܬܹܗ ܗܵܠܵܐ ܠܵܐ ܒܛܝܼܠܵܐ. ܦܵܐܸܫ ܡܘܼܫ̄ܟ̰ܚܵܐ ܚܲܕ݇ ܐ݇ܢܵܫܵܐ ܡܸܢܵܘܟܼܘܿܢ ܕܦܵܐܸܫ ܡ̣ܢ ܠܸܥܒܼܵܪܵܐ* ܣܵܒܵܒ ܐܘܼܦ ܩܵܬܲܢ ܦܸܫܠܵܗ̇ ܡܘܼܟܪܸܙܬܵܐ ܐܲܝܟܼ ܕܩܵܐ ܕܐܵܢܝܼ؛ ܐܝܼܢܵܐ ܠܵܐ ܥܵܒܼܸܕܠܵܗ̇ ܦܵܝܕܵܐ ܩܵܬܲܝܗܝ ܗܸܡܸܙܡܲܢ ܕܫܡܝܼܥܠܗ݇ܘܿܢ. ܣܵܒܵܒ ܕܠܹܐ ܝܗ݇ܘ̣ܵܐ ܡܙܝܼܓܼܬܵܐ ܒܗܲܝܡܵܢܘܼܬܵܐ ܩܵܐ ܕܐܵܢܝܼ ܕܫܸܡܥܝܵܐ ܠܗ݇ܘܿܢ* ܐܝܼܢܵܐ ܒܸܬ ܥܵܒܼܪܲܚ ܠܡܲܢܝܲܚܬܵܐ ܐܲܚܢܲܢ ܐܵܢܝܼ ܕܗܘܼܡܸܢܲܢ. ܐܝܼܢܵܐ ܕܕܵܐܟܼܝܼ ܕܐ݇ܡܸܪܹܗ؛ ܐܲܝܟܼ ܕܝ݇ܡܹܐ ܠܝܼ ܒܟܲܪܒܝܼ ܕܠܹܐ ܥܵܒܼܪܝܼ ܠܡܲܢܝܲܚܬܝܼ؛ ܚܙܹܐܡܘܿܢ ܕܦܘܼܠܚܵܢܹ̈ܐ ܕܐܲܠܵܗܵܐ ܡ̣ܢ ܫܘܼܪܵܝܵܐ ܕܕܘܼܢܝܹܐ ܗܘܹܠܗ݇ܘܿܢ* ܐܲܝܟܼ ܕܐ݇ܡܸܪܹܗ ܒܘܼܬ ܝܵܘܡܵܐ ܕܫܲܒܬܵܐ؛ ܕܡܘܼܢܝܸܚܠܹܗ ܐܲܠܵܗܵܐ ܒܝܵܘܡܵܐ ܕܫܲܒܼܥܵܐ ܡ̣ܢ ܟܠܲܝܗܝ ܦܘܼܠܚܵܢ̈ܘܼܗܝ* ܘܠܲܐܟܼܵܐ ܡܸܢ݇ܕܪܹܫ̄ ܐ݇ܡܸܪܹܗ ܕܠܹܐ ܥܵܒܼܪܝܼ ܠܡܲܢܝܲܚܬܝܼ* ܡ̣ܢ ܣܵܒܵܒ ܕܐܝܼܬ ܗ݇ܘ̣ܵܐ ܦܸܪܣܲܬ ܕܚܲܕ݇ ܚܲܕ݇ ܐ݇ܢܵܫܵܐ ܥܵܒܸܪ ܐܸܠܵܗ̇ ܘܐܵܢܝܼ ܕܦܸܫܠܗ݇ܘܿܢ ܚܫܝܼܒܹܐ ܩܵܕ݇ܡܵܝܹ̈ܐ ܠܵܐ ܥܒܸܪܗ݇ܘܿܢ ܡ̣ܢ ܣܵܒܵܒ ܕܠܵܐ ܡܘܼܨܝܸܬܠܗ݇ܘܿܢ* ܡܸܢ݇ܕܪܹܫ̄ ܚܲܕ݇ ܝܵܘܡܵܐ ܐ݇ܚܹܪ݇ܢܵܐ ܡܲܬܘܼܒܹܐ ܝ݇ܠܹܗ ܡ̣ܢ ܒܵܬ̄ܪ ܚܲܕ݇ ܙܲܒܼܢܵܐ ܝܲܪܝܼܟܼܵܐ؛ ܐܲܝܟܼ ܕܡ̣ܢ ܠܥܘܼܠܘܼܠ ܟܬܝܼܒܼܵܐ ܝ݇ܠܹܗ ܕܐ݇ܡܸܪܹܗ ܕܵܘܝܼܕ؛ ܕܐܸܕܝܘܿܡ ܝܵܘܡܵܐ ܐܸܢ ܒܩܵܠܹܗ ܫܵܡܥܝܼܬܘܿܢ؛ ܠܵܐ ܡܲܩܫܝܼܬܘܿܢ ܠܸܒܵܘܵܬܵܘܵܟܼܘܿܢ* ܣܵܒܵܒ ܐܸܢ ܝܼܫܘܿܥ ܒܲܪܢܘܿܢ ܗܵܘܹܐ ܗ݇ܘ̣ܵܐ ܡܘܼܢܝܸܚܲܝܗܝ؛ ܠܹܐ ܐܵܡܸܪ ܗ݇ܘ̣ܵܐ ܡ̣ܢ ܒܵܬ̄ܪ ܗܵܕܵܐ ܥܲܠ ܚܲܕ݇ ܝܵܘܡܵܐ ܐ݇ܚܹܪ݇ܢܵܐ* ܒܲܣ ܐܝܼܬ ܡܲܢܝܲܚܬܵܐ ܩܵܐ ܛܵܝܸܦܵܐ ܕܐܲܠܵܗܵܐ* ܘܗ̇ܘ ܕܥܒܸܪܹܗ ܠܡܲܢܝܲܚܬܹܗ؛ ܐܘܼܦ ܗ̇ܘ ܡܘܼܢܝܸܚܠܹܗ ܡ̣ܢ ܦܘܼܠܚܵܢ̈ܘܼܗܝ؛ ܐܲܝܟܼ ܕܐܲܠܵܗܵܐ ܡ̣ܢ ܕܕܝܼـܹܗ܀
♱♱♱♱♱♱♱♱
ܝܘܚܢܢ ܐ: 29 ‐ 43
ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ ܟܪܘܙܘܬܼܐ ܕܝܘܚܢܢ
♰ ܘܠܝܵܘܡܵܐ ܕܒܵܬ݇ܪܹܗ ܚܙܹܐܠܹܗ ܝܘܿܚܲܢܵܢ ܠܝܼܫܘܿܥ، ܕܒܹܐܬܵܝܵܐ ܠܘܵܬܹܗ: ܘܐ݇ܡܝܼܪܹܗ: ܗܵܐ ܐܸܡܪܹܗ ܕܐܲܠܵܗܵܐ ܗ̇ܘ ܕܫܵܩܸܠ ܚܛܝܼܬܹܗ ܕܥܵܠܡܵܐ: ܐܵܗܵܐ ܝܼܠܹܗ ܗ̇ܘ ܕܐܵܢܵܐ ܐ݇ܡܝܼܪܝܼ ܒܘܼܬ ܕܝܼܠ݇ܘܼܗܝ: ܕܡ̣ܢ ܒܵܬ݇ܪ ܡܸܢܝܼ ܒܹܐܬܵܝܵܐ ܝܠܹܗ ܓܲܒܼܪܵܐ ܘܝܼܠܹܗ ܡ̣ܢ ܩܵܕ݇ܡ ܡܹܢܝܼ: ܣܵܒܵܒ ܕܡ̣ܢ ܩܵܕ݇ܡ ܡܸܢܝܼ ܝܗ݇ܘܵܐ: ܘܐܵܢܵܐ ܠܹܐ ܝܲܕܥܸܢ ܗ݇ܘܵܐ ܠܹܗ: ܐܸܠܵܐ ܕܦܵܐܸܫ ܝܕܸܥܝܵܐ ܠܝܼܤܪܵܝܹܠ، ܒܘܼܬ ܕܐܵܗܵܐ ܐ݇ܬܹܐܠܝܼ ܐܵܢܵܐ ܕܡܲܥܡܕܸܢ ܒܡܝܼ̈ܵܐ. ܘܤܗܝܼܕܠܹܗ ܝܘܿܚܲܢܵܢ ܘܐ݇ܡܝܼܪܹܗ: ܕܚܙܹܐܠܝܼ ܠܪܘܼܚܵܐ ܕܒܸܨܠܵܝܵܐ ܡ̣ܢ ܫܡܲܝܵܐ، ܐܲܝܟ ܝܵܘܢܵܐ ܘܫܪܹܐܠܵܗ̇ ܥܲܠܘܼܗܝ. ܘܐܵܢܵܐ ܠܹܐ ܝܲܕܥܸܢ ܗ݇ܘܵܐܠܹܗ. ܐܸܠܵܐ ܗ̇ܘ ܕܩܲܡ ܫܵܕܸܪܝܼ ܕܡܲܥܡܕܸܢ ܒܡܝܼ̈ܵܐ، ܗ̇ܘ ܐ݇ܡܝܼܪܹܗ ܐܸܠܝܼ: ܕܐܲܝܢܝܼ ܕܚܵܙܸܬ ܒܸܨܠܵܝܵܐ ܪܘܼܚܵܐ ܘܫܪܵܝܵܐ ܥܲܠܘܼܗܝ: ܐܵܗܵܐ ܝܼܠܹܗ ܗ̇ܘ ܕܡܲܥܡܸܕ ܒܪܘܼܚܵܐ ܕܩܘܼܕܫܵܐ. ܘܐܵܢܵܐ ܚܙܹܐܠܝܼ ܘܣܗܝܼܕܠܝܼ ܕܐܵܗܵܐ ܝܼܠܹܗ ܒܪܘܿܢܵܐ ܕܐܲܠܵܗܵܐ. ܘܠܝܵܘܡܵܐ ܐ݇ܚܹܐܪ݇ܢܵܐ ܟܸܠܝܵܐ ܗ݇ܘܵܐ ܝܘܿܚܲܢܵܢ ܘܬܪܹܝ ܡ̣ܢ ܬܲܠܡܝܼ̈ܕܘܼܗܝ ܘܚܸܪܹܗ ܒܝܼܫܘܿܥ ܟܲܕ ܒܸܚܕܵܪܵܐ ܘܐ݇ܡܝܼܪܹܗ: ܗܵܐ ܐܸܡܪܹܗ ܕܐܲܠܵܗܵܐ: ܘܫܡܝܼܥܠܗ݇ܘܿܢ ܬܸܪܘܲܝܗܝ ܬܲܠܡܝܼ̈ܕܘܼܗܝ ܟܲܕ ܐ݇ܡܝܼܪܹܗ: ܘܐ݇ܙܝܼܠܗ݇ܘܿܢ ܒܵܬ݇ܪ ܝܑܼܫܘܿܥ: ܘܕܥܝܼܪܹܗ ܝܑܼܫܘܿܥ ܘܚܸܙܝܲܝܠܹܗ ܕܒܹܐܬܵܝܵܐ ܒܵܬ݇ܪܹܗ: ܘܐ݇ܡܝܼܪܹܗ ܐܸܠܲܝܗܝ: ܡܘܿܕܝܼ ܒܥܵܝܵܐ ܝܬܘܿܢ؟ ܐܲܡܪܝܼ ܐܸܠܹܗ: ܪܲܒܲܢ ܐܲܝܟܵܐ ܟܹܐ ܗܵܘܸܬ؟ ܐܵܡܸܪ ܐܸܠܲܝܗܝ ܐ݇ܬܲܝܡܘܿܢ ܘܒܸܕ ܚܵܙܝܼܬܘܿܢ: ܐܝܼܢܵܐ ܐܵܢܝܼ ܐ݇ܬܹܐܠܗ݇ܘܿܢ ܘܚܙܹܐܠܗ݇ܘܿܢ ܐܲܝܟܵܐ ܕܗܵܘܹܐ ܗ݇ܘܵܐ: ܘܗ݇ܘܹܐܠܗ݇ܘܿܢ ܠܘܵܬܹܗ ܗ̇ܘ ܝܵܘܡܵܐ: ܘܐܲܝܟܼ ܣܵܥܵܬ ܥܸܣܪܵܐ ܝܗ݇ܘܵܐ: ܐܝܼܢܵܐ ܚܲܕ݇ ܡ̣ܢ ܐܵܢܝܼ ܕܫܡܝܼܥܠܗ݇ܘܿܢ ܡ̣ܢ ܝܘܿܚܲܢܵܢ ܘܐ݇ܙܝܼܠܗ݇ܘܿܢ ܒܵܬ݇ܪ ܕܝܑܼܫܘܿܥ، ܐܲܢܕܪܹܐܘܿܣ ܝܼܗَܘܵܐ ܐܲܚܘܿܢܹܗ ܕܫܸܡܥܘܿܢ: ܐܵܗܵܐ ܚܙܹܐܠܹܗ ܩܲܕ݇ܡܵܝܬܵܐ ܠܫܸܡܥܘܿܢ ܐܲܚܘܿܢܘܼܗܝ ܘܐ݇ܡܝܼܪܹܗ ܐܸܠܹܗ: ܡܘܼܫ݇ܟ̰ܸܚܠܲܢ ܠܡܫܝܼܚܵܐ: ܘܩܲܡ ܡܵܝܬܹܐܠܹܗ ܠܘܵܬ ܝܑܼܫܘܿܥ: ܘܚܝܼܪܹܗ ܝܑܼܫܘܿܥ ܒܝܼܹܗ ܘܐ݇ܡܝܼܪܹܗ: ܐܲܢ݇ܬ ܝܼܘܸܬ ܫܸܡܥܘܿܢ ܒܪܘܿܢܹܗ ܕܝܘܿܢܵܐ: ܐܲܢ݇ܬ ܒܸܬ ܦܲܝܫܸܬ ܩܸܪܝܵܐ ܟܹܐܦܵܐ.
♱♱♱♱♱♱♱♱