ܚܲܕܼܒܫܲܒܵܐ ܕܲܬ̣ܠܵܬ̣ܵܐ ܕܐܹܠܝܼܵܐ
ܬܸܢܝܵܢ ܢܵܡܘܿܣܵܐ ܙ؛ 12‐ܫܘܼܠܵܡܵܐ
ܬܸܒ̣ܘ ܘܲܫܠܵܘ ܬܸܢܝܵܢ ܢܵܡܘܿܣܵܐ ܣܸܦܪܵܐ ܕܚܲܡܫܵܐ ܕܐܘܿܪܵܝܬܵܐ؛
ܐܲܚܲܝ̈ ܒܲܪܸܟ̣ܡܵܪܝ܀
ܘܐ݇ܡܸܪܹܗ ܡܘܼܫܹܐ ܠܟܠܹܗ ܝܼܣܪܵܝܹܠ؛ ܐܸܢ ܫܵܡܥܝܼܬܘܿܢ ܐܲܢܹܐ ܕܝܼܘܵܢܹ̈ܐ ܘܢܵܛܪܝܼܬܘܿܢ ܠܗ݇ܘܿܢ ܘܥܵܒ̣ܕܝܼܬܘܿܢ ܠܗ݇ܘܿܢ؛ ܒܸܬ ܢܵܛܸܪ ܡܵܪܝܵܐ ܐܲܠܵܗܘܼܟܼ ܩܵܘܠܵܐ ܘܛܲܝܒܘܼܬܵܐ ܕܝ݇ܡܹܐܠܹܗ ܠܒܵܒܵܘܵܬܵܘ̈ܟ̣ܘܿܢ܀ ܘܒܸܬ ܡܲܚܸܒܠܘܼܟܼ ܘܒܲܪܸܟ̣ܠܘܼܟܼ ܘܡܲܙܝܸܕܠܘܼܟܼ؛ ܘܒܸܬ ܒܵܪܸܟܼ ܛܥܘܼܢܝܵܬܹ̈ܐ ܕܟܹܪ݇ܣܘܼܟܼ؛ ܘܛܥܘܼܢܝܵܬܹ̈ܐ ܕܐܲܪܥܘܼܟܼ ܘܕܲܚܠܘܼܟܼ ܘܚܲܡܪܘܼܟܼ ܘܡܸܫܚܘܼܟܼ؛ ܘܒܸܩܪ̈ܵܬܹܐ ܕܬܵܘܪ̈ܘܼܟܼ؛ ܘܦܸܣܩܹ̈ܐ ܕܥܸܪ̈ܒܘܼܟܼ؛ ܒܐܲܪܥܵܐ ܕܝ݇ܡܹܐܠܹܗ ܠܒܵܒܵܘܵܬܵܘ̈ܟ̣ܘܿܢ ܕܝܵܗ݇ܒ̣ܸܠ ܠܘܼܟܼ܀ ܒܪܝܼܟ̣ܵܐ ܒܸܬ ܗܵܘܹܐ ܒܘܼܫ ܡ̣ܢ ܟܠܲܝܗܝ ܛܵܝܸܦܹ̈ܐ؛ ܘܠܹܐ ܗܵܘܹܐ ܒܝܼܘܼܟܼ ܥܲܩܪܵܐ ܘܥܩܲܪܬܵܐ؛ ܘܐܘܼܦ ܠܵܐ ܒܗܲܝܘܵܢ̈ܘܼܟܼ܀ ܘܒܸܬ ܡܲܪܚܸܩ ܡܵܪܝܵܐ ܡܸܢܘܼܟܼ ܟܠ ܡܲܪܥܵܐ؛ ܘܟܠܲܝܗܝ ܡܚܵܝܵܬܹ̈ܐ ܒܪܹ̈ܫܹܐ ܕܡܸܨܪ̈ܵܝܹܐ ܕܝܵܕܥܸܬ̇ܠܗ݇ܘܿܢ؛ ܠܹܐ ܡܲܝܬܹܐܠܗ݇ܘܿܢ ܥܲܠܘܼܟܼ؛ ܐܸܠܵܐ ܒܸܬ ܡܲܝܬܹܐܠܗ݇ܘܿܢ ܥܲܠ ܟܠܲܝܗܝ ܣܵܢܝܵܢ̈ܘܼܟܼ܀ ܘܒܸܬ ܐܵܟ̣ܠܸܬ̇ ܠܟܠܲܝܗܝ ܛܵܝܸܦܹ̈ܐ ܕܝܵܗ݇ܒ̣ܸܠ ܠܘܼܟܼ ܡܵܪܝܵܐ ܐܲܠܵܗܘܼܟܼ. ܥܲܝܢ̈ܘܼܟܼ ܠܵܐ ܐܵܬܝܵܐ ܠܵܗ̇ ܡܘܼܚܲܒܢܵܐ ܥܲܠܲܝܗܝ؛ ܘܠܵܐ ܦܵܠܚܸܬ̇ ܠܐܲܠܵܗܲܝ̈ܗܝ؛ ܣܵܒܵܒ ܕܬܲܪ̈ܩܲܠܝܵܬܹܐ ܝ݇ܢܵܐ܀ ܘܐܸܢ ܐܵܡܪܸܬ̇ ܒܠܸܒܘܼܟܼ؛ ܕܐܲܢܹܐ ܛܵܝܸܦܹ̈ܐ ܒܘܼܫ ܪܵܒܵܐ ܝ݇ܢܵܐ ܡܸܢܝܼ؛ ܕܵܐܟ̣ܝܼ ܡܵܨܸܢ ܕܬܵܠܩܸܢܗ݇ܘܿܢ؟܀ ܠܵܐ ܙܵܕܥܸܬ̇ ܡܲܢܲܝܗܝ؛ ܐܸܠܵܐ ܕܟ̣ܘܿܪ ܟܠ ܡܸܢܕܝܼ ܕܥܒ̣ܸܕܠܹܗ ܡܵܪܝܵܐ ܐܲܠܵܗܘܼܟܼ ܠܦܸܪܥܘܿܢ ܘܠܟܠܵܗ̇ ܡܸܨܪܹܝܢ܀ ܓ̰ܘܼܪ̈ܵܒܹܐ ܓܘܼܪܹ̈ܐ ܕܚܙܹܐܠܗ݇ܘܿܢ ܥܲܝܢ̈ܘܼܟܼ؛ ܢܝܼܫܲܢܩܹ̈ܐ ܘܥܵܓ̰ܝܼܒܘܼܝܵܬܹ̈ܐ؛ ܘܐܝܼܕܵܐ ܚܲܝܠܵܢܬܵܐ ܘܒܕܪܵܥܵܐ ܪܵܡܵܐ؛ ܩܲܡ ܦܵܠܸܛܠܘܼܟܼ ܡܵܪܝܵܐ ܐܲܠܵܗܘܼܟܼ؛ ܗܵܕܟ̣ܵܐ ܥܵܒ̣ܸܕ ܡܵܪܝܵܐ ܐܲܠܵܗܘܼܟܼ؛ ܠܟܠܲܝܗܝ ܛܵܝܸܦܹ̈ܐ ܕܒܸܙܕܲܥܝܵܐ ܝ݇ܘܸܬ̇ ܡ̣ܢ ܩܵܕ݇ܡܲܝܗܝ܀ ܐܘܼܦ ܕܸܒܘܼܪܹ̈ܐ ܒܸܬ ܕܵܪܹܐ ܡܵܪܝܵܐ ܐܲܠܵܗܘܼܟܼ ܓܵܘܲܝܗܝ ܗܲܠ ܕܬܵܠܩܝܼ؛ ܘܐܵܢܝܼ ܕܦܵܝܫܝܼ ܘܐܵܢܝܼ ܕܛܵܫܝܼ ܡ̣ܢ ܩܵܕ݇ܡܘܼܟܼ܀ ܠܵܐ ܙܵܕܥܸܬ̇ ܡܸܢܲܝܗܝ؛ ܣܵܒܵܒ ܡܵܪܝܵܐ ܐܲܠܵܗܘܼܟܼ ܓܵܘܘܼܟܼ ܝܼܠܹܗ؛ ܐܲܠܵܗܵܐ ܓܘܼܪܵܐ ܘܣܲܗܡܵܢܵܐ܀ ܚܲܕ݇ܟ̰ܵܐ ܒܚܲܕ݇ܟ̰ܵܐ ܒܸܬ ܡܬܵܠܸܩ ܡܵܪܝܵܐ ܐܲܠܵܗܘܼܟܼ ܠܐܲܢܹܐ ܛܵܝܸܦܹ̈ܐ ܡ̣ܢ ܩܵܕ݇ܡܘܼܟܼ. ܠܹܐ ܡܵܨܸܬ̇ ܕܬܵܠܩܸܬ̇ܠܗ݇ܘܿܢ ܓ̰ܲܠܕܹܐ ܕܠܵܐ ܙܵܝܕܝܼ ܥܲܠܘܼܟܼ ܗܲܝܘܵܢܹ̈ܐ ܟܹܘܝܼ܀ ܘܒܸܬ ܣܵܦܹܐܠܗ݇ܘܿܢ ܡܵܪܝܵܐ ܐܲܠܵܗܘܼܟܼ ܩܵܕ݇ܡܘܼܟܼ؛ ܘܒܸܬ ܡܵܚܸܬ̇ܠܗ݇ܘܿܢ ܡܚܲܝܬܵܐ ܓܘܼܪܬܵܐ ܗܲܠ ܕܬܵܠܩܸܬ̇ܠܗ݇ܘܿܢ؛ ܘܒܸܬ ܣܵܦܹܐ ܒܐܝܼܕ̈ܘܼܟܼ ܠܡܲܠܟܲܝܗܝ؛ ܘܒܸܬ ܬܲܠܩܸܬ̇ ܫܸܡܲܝܗܝ ܡ̣ܢ ܬܚܘܿܬ ܫܡܲܝܵܐ؛ ܘܠܹܐ ܟܵܠܹܐ ܗܝܼܟ̰ ܐ݇ܢܵܫܵܐ ܩܵܕ݇ܡܘܼܟܼ ܗܲܠ ܕܬܵܠܩܸܬ̇ܠܗ݇ܘܿܢ܀ ܓܠܝܼܦܹ̈ܐ ܕܐܲܠܵܗܲܝ̈ܗܝ ܡܲܩܕܝܼܬܘܿܢ ܒܢܘܼܪܵܐ. ܠܵܐ ܫܲܗܘܸܬܸܬ̇ ܠܣܹܐܡܵܐ ܘܕܲܗܒ̣ܵܐ ܕܐܝܼܬ ܒܝܼܲܝܗܝ ܘܫܵܩܠܸܬ̇ܠܘܼܟܼ. ܕܠܵܐ ܦܵܝܫܸܬ̇ ܛܲܡܐܵܐ ܒܝܼܹܗ. ܣܵܒܵܒ ܡܘܼܣܠܝܼܵܐ ܝ݇ܠܹܗ ܩܵܕ݇ܡ ܡܵܪܝܵܐ ܐܲܠܵܗܘܼܟܼ܀ ܠܵܐ ܡܲܥܒ̣ܸܪܸܬ̇ ܛܲܢܦܘܼܬܵܐ ܠܒܲܝܬܘܼܟܼ؛ ܕܠܵܐ ܗܵܘܸܬ̇ ܚܲܪܵܡܵܐ ܡܐܲܝܟܼ ܕܝܼܹܗ؛ ܐܸܠܵܐ ܡܲܣܠܘܼܝܹܐ ܡܲܣܠܝܼܠܹܗ. ܘܛܲܡܐܵܐ ܥܵܒ̣ܕܸܬ̇ܠܹܗ؛ ܣܵܒܵܒ ܕܚܸܪܡܵܐ ܝ݇ܠܹܗ܀
ܚܲܒ̣ܪܹܗ
ܐܹܫܲܥܝܵܐ ܠܒ؛ 1‐ܠܓ؛ 7
ܫܠܵܘ ܢܒ̣ܝܼܘܼܬܹܗ ܕܐܹܫܲܥܝܵܐ؛ ܐܲܚܲܝ̈ ܒܲܪܸܟ̣ܡܵܪܝ܀
ܗܵܐ ܡܲܠܟܵܐ ܒܙܲܕܝܼܩܘܼܬܵܐ؛ ܘܓܘܼܪ̈ܵܢܹܐ ܒܕܝܼܘܵܢ ܒܸܬ ܥܵܒ̣ܕܝܼ ܗܘܼܟܡܵܐ؛ ܘܒܸܬ ܗܵܘܹܐ ܐ݇ܢܵܫܵܐ ܐܲܝܟܼ ܓܸܢܝܵܐ ܠܦܵܘܚܵܐ؛ ܘܐܲܝܟܼ ܣܸܬܵܪܵܐ ܠܩܲܫܩܲܫܬܵܐ ܕܡܸܛܪܵܐ. ܘܐܲܝܟܼ ܫܵܩܝܼܬܵܐ ܕܡܝܼܵܐ ܒܕܘܼܟܬܵܐ ܨܗܝܼܬܵܐ؛ ܘܐܲܝܟܼ ܛܸܠܵܢܝܼܬܵܐ ܕܟܹܐܦܵܐ ܓܘܼܪܬܵܐ ܒܚܲܕ݇ ܕܘܼܟܬܵܐ ܕܠܵܐ ܡܝܼܵܐ܀ ܥܢܵܢܹ̈ܐ ܕܐܵܢܝܼ ܕܚܵܙܝܼ ܠܹܐ ܫܵܥܝܝܼ؛ ܘܢܵܬܝܵܬܹ̈ܐ ܕܐܵܢܝܼ ܕܫܵܡܥܝܼ ܒܸܬ ܡܲܨܝܸܬܝܼ؛ ܠܸܒܵܐ ܕܐܲܗܡܲܩ ܒܸܬ ܦܲܪܡܹܐ ܝ݇ܕܥܵܝܬܵܐ؛ ܘܠܹܫܵܢܵܐ ܕܠܲܥܠܵܐ ܒܸܬ ܡܲܠܝܸܙ ܠܗܲܡܙܘܼܡܹܐ ܫܠܵܡܵܐ܀ ܘܡܸܕܪܹܐ ܠܹܐ ܩܵܪܝܼ ܠܐܲܗܡܲܩ ܡܗܲܟܡܵܢܵܐ؛ ܘܐܘܼܦ ܠܵܐ ܠܣܪܝܼܩܵܐ ܩܵܪܝܼ ܦܵܪܘܿܩܵܐ܀ ܣܵܒܵܒ ܣܲܟ̣ܠܵܐ ܣܲܟ̣ܠܘܼܬܵܐ ܟܹܐ ܗܲܡܙܸܡ؛ ܘܠܸܒܹܗ ܚܵܫܸܠ ܥܵܘܠܵܐ؛ ܠܸܥܒ̣ܵܕܵܐ ܚܲܢܦܘܼܬܵܐ ܘܗܲܡܙܸܡ ܚܸܠܛܵܐ. ܠܡܲܣܦܘܼܩܹܐ ܓܵܢܵܐ ܕܟܦܝܼܢܵܐ. ܘܫܬܵܝܬܵܐ ܕܡܝܼܵܐ ܟܹܐ ܩܲܛܸܥ܀ ܒܝܼܫܹ̈ܐ ܝܢܵܐ ܟ̰ܲܟ̰ܹ̈ܐ ܕܠܹܐܒܵܢܵܐ؛ ܘܟܹܐ ܥܵܒ̣ܸܕ ܪܵܐܝܝܼ؛ ܠܡܲܚܪܘܼܒ̣ܹܐ ܠܡܸܣܟܹܢܵܐ ܒܚܲܒܪܵܐ ܕܒܘܼܚܬܵܢ؛ ܘܗܹܡܸܙܡܵܢ ܕܦܲܩܝܼܪ ܒܕܝܼܘܵܢ܀ ܘܓܘܼܪܵܐ ܒܓܘܼܪܘܼܬܵܐ ܟܹܐ ܬܲܚܡܸܢ ܘܗ̇ܘ ܒܸܬ ܩܵܐܹܡ ܥܲܠ ܓܘܼܪܘܼܬܵܐ܀ ܒܲܟ̣ܬܵܬܹ̈ܐ ܥܲܬܝܼܪܹ̈ܐ؛ ܩܘܼܡܘܼܢ ܫܡܸܥܡܘܿܢ ܩܵܠܝܼ؛ ܒܢܵܬܹ̈ܐ ܡܵܪܹܐ ܗܹܒ̣ܝܼ ܡܲܨܝܸܬܘܿܢ ܠܗܹܡܸܙܡܵܢ̈ܝܼ؛ ܝܵܘܡܵܢܹ̈ܐ ܕܫܹܢ݇ܬܵܐ ܒܸܬ ܟܵܪܒܝܼ ܐܵܢܝܼ ܕܝܑܼܢܵܐ ܒܗܹܒ̣ܝܼ؛ ܣܵܒܵܒ ܬܸܡܠܹܗ ܩܛܵܦܵܐ ܘܦܸܫܠܹܗ ܓ̰ܘܼܡܸܥܝܵܐ ܘܠܵܐ ܐ݇ܬܹܐܠܹܗ܀ ܙܕܸܥܡܘܿܢ ܥܲܬܝܼܪ̈ܵܬܹܐ؛ ܘܟܪܘܿܒܘܿܢ ܐܵܢܝܼ ܕܝܑܼܢܵܐ ܒܗܹܒ̣ܝܼ. ܫܠܘܿܚܘܿܢ ܓ̰ܘܼܠܵܘ̈ܟ̣ܘܿܢ؛ ܘܐ݇ܣܘܿܪܘܿܢ ܣܲܩܹ̈ܐ ܒܚܵܨܵܘ̈ܟ̣ܘܿܢ؛ ܡܚܹܐܡܘܿܢ ܠܨܲܕܪܵܘܟ̣ܘܿܢ؛ ܒܘܼܬ ܓܸܠܵܐ ܕܕܸܫܬܵܐ؛ ܘܒܘܼܬ ܓܸܦܬܵܐ ܕܛܥܘܼܢ̈ܝܵܬܵܗ̇܀ ܘܒܘܼܬ ܐܲܪܥܵܐ ܕܛܵܝܸܦܝܼ؛ ܟܸܬܘܹ̈ܐ ܘܩܝܼܘܵܪܹ̈ܐ ܒܸܬ ܒܵܪܝܼ؛ ܘܓܵܘ ܟܠܲܝܗܝ ܒܵܬܘܵܬܹ̈ܐ ܕܒܘܼܣܵܡܵܐ؛ ܘܓܵܘ ܡܕܝܼܢ݇ܬܵܐ ܓܘܼܪܬܵܐ. ܣܵܒܵܒ ܕܥܵܡܵܪܲܬ ܦܸܫܠܵܗ̇ ܡܘܼܢܫܝܼܬܵܐ ܘܚܲܝܠܵܐ ܕܡܕܝܼܢ݇ܬܵܐ ܫܒ̣ܝܼܩܵܐ؛ ܘܫܘܼܦܪܵܐ ܕܒܵܬܹ̈ܐ ܦܸܫܠܹܗ ܫܘܼܚܠܸܦܵܐ ܠܓܸܦܝܼܵܬܹ̈ܐ ܘܗܲܠ ܥܵܠܲܡ؛ ܟܸܬܘܹ̈ܐ ܘܒܘܼܣܵܡܵܐ ܠܗܲܝܘܵܢܹ̈ܐ؛ ܘܒܹܝܬ̣ ܡܲܪܸܥܝܵܐ ܩܵܐ ܦܸܣܩܹ̈ܐ ܕܥܸܪ̈ܒܹܐ܀ ܗܲܠ ܕܦܵܝܫܵܐ ܡܘܼܪܥܸܫܬܵܐ ܥܲܠܲܢ ܪܘܼܚܵܐ ܡ̣ܢ ܡܪܵܘܡܵܐ؛ ܘܒܸܬ ܗܵܘܹܐ ܒܲܪܝܼܵܐ ܐܲܝܟܼ ܟܲܪܡܠܵܐ [ܓܲܢܬܵܐ]؛ ܘܟܲܪܡܠܵܐ [ܘܓܲܢܬܵܐ] ܐܲܝܟܼ ܡܵܝܫܵܐ ܒܸܬ ܦܵܐܹܫ ܚܘܼܫܒܸܢܵܐ܀ ܘܒܸܬ ܫܵܪܝܵܐ ܗܵܩܘܼܬܵܐ ܓܵܘ ܒܲܪܝܼܵܐ؛ ܘܙܲܕܝܼܩܘܼܬܵܐ ܒܟܲܪܡܠܵܐ [ܒܓܲܢܬܵܐ] ܒܸܬ ܦܵܝܫܵܐ ܝܘܼܗ݇ܒ̣ܸܠܬܵܐ؛ ܘܒܸܬ ܗܵܘܹܐ ܦܘܼܠܚܵܢܵܐ ܕܙܲܕܝܼܩܘܼܬܵܐ ܫܠܵܡܵܐ ܘܫܸܬܩܵܐ؛ ܘܗܹܒ̣ܝܼ ܠܥܵܠܲܡ ܥܵܠܡܝܼܢ܀ ܘܒܸܬ ܝܵܬܸܒ̣ ܛܵܝܸܦܝܼ ܒܕܲܝܪܵܐ ܕܫܠܵܡܵܐ؛ ܘܒܡܲܫܟܢܵܐ ܕܗܹܒ̣ܝܼ؛ ܘܒܹܝܬ̣ ܡܲܫܪܝܵܐ ܕܗܹܒ̣ܝܼ܀ ܘܒܸܬ ܨܵܠܹܐ ܒܲܪܕܵܐ ܥܲܠ ܡܲܝܫܵܐ؛ ܘܡܕܝܼܢ݇ܬܵܐ ܒܸܬ ܦܵܝܫܵܐ ܡܘܼܟܸܦܬܵܐ ܐܲܝܟܼ ܕܸܫܬܵܐ؛ ܛܘܼܒ̣ܵܐ ܠܐܵܢܝܼ ܕܙܵܪܥܝܼ ܥܲܠ ܟܠ ܡܝܼܵܐ؛ ܒܗ̇ܝ ܕܘܼܟܬܵܐ ܕܦܵܣܸܥ ܬܵܘܪܵܐ ܘܚܡܵܪܵܐ܀ ܘܵܝ ܠܗ̇ܘ ܕܣܵܠܸܒ. ܐܲܚܬܘܿܢ ܠܵܐ ܣܵܠܒܝܼܬܘܿܢ؛ ܘܕܲܓܵܠܵܐ ܠܵܐ ܡܕܵܓܸܠ ܓܵܘܵܘܟ̣ܘܿܢ܀ ܘܐܝܼܡܲܢ ܕܒܥܹܐܠܵܘܟ̣ܘܿܢ ܕܣܵܠܒܝܼܬܘܿܢ؛ ܦܵܝܫܝܼܬܘܿܢ ܣܠܝܼܒܹ̈ܐ. ܘܐܝܼܡܲܢ ܕܒܥܹܐܠܵܘܟ̣ܘܿܢ ܕܕܲܓܠܝܼܬܘܿܢ؛ ܒܸܬ ܕܲܓܠܝܼ ܒܝܼܵܘܟ̣ܘܿܢ܀ ܡܵܪܝܵܐ ܪܲܚܸܡ ܥܲܠܲܢ. ܣܵܒܵܒ ܥܲܠܘܼܟܼ ܝܼܠܵܗ̇ ܗܹܒ̣ܝܼܲܢ. ܗܘܝܼ ܗܲܝܸܪܵܢܲܢ ܒܩܵܝܕܲܡܬܵܐ؛ ܘܦܵܪܩܵܢܲܢ ܒܥܸܕܵܢܵܐ ܕܐܘܼܠܨܵܢܵܐ܀ ܡ̣ܢ ܩܵܠܵܐ ܕܙܕܘܿܥܬܘܼܟܼ ܪܓܸܕܠܗ݇ܘܿܢ ܛܵܝܸܦܹ̈ܐ ܘܡ̣ܢ ܪܵܡܘܼܬܘܼܟܼ ܒܘܼܪܒܸܙܠܗ݇ܘܿܢ ܡܸܠܲܬܹ̈ܐ܀ ܡܐܵܕܝܼܵܐ ܒܸܬ ܦܵܐܹܫ ܓ̰ܘܼܡܥܝܵܐ ܣܠܵܒܵܘܟ̣ܘܿܢ ܐܲܝܟܼ ܓ̰ܡܲܥܝܬܵܐ ܕܣܸܢܸܟ ܘܐܲܝܟܼ ܓ̰ܡܲܥܝܬܵܐ ܕܩܲܡܨܵܐ ܕܝܼܠܹܗ ܓ̰ܸܡܥܝܵܐ܀ ܦܸܫܠܹܗ ܡܘܼܪܡܵܐ ܡܵܪܝܵܐ ܥܵܡܪܵܢܵܐ ܓܵܘ ܫܡܲܝܵܐ؛ ܘܡܸܠܝܵܐ ܝ݇ܠܹܗ ܠܨܸܗܝܘܿܢ ܕܝܼܘܵܢ ܘܙܲܕܝܼܩܘܼܬܵܐ܀ ܘܒܸܬ ܗܵܘܹܐ ܙܲܒ̣ܢܘܼܟܼ ܗܲܝܡܵܢܘܼܬܵܐ؛ ܘܦܘܼܪܩܵܢܘܼܟܼ ܒܛܸܫܘܵܐ؛ ܚܸܟ̣ܡܬܵܐ [ܥܵܩܸܠܕܵܪܘܼܬܵܐ] ܘܝ݇ܕܵܥܝܬܵܐ؛ ܙܕܘܿܥܬܹܗ ܕܡܵܪܝܵܐ ܗܲܪ ܗ̇ܝ ܝܼܠܵܗ̇ ܚܲܙܝܼܢܹܗ܀
♱♱♱♱♱♱♱♱♱
ܚܕܒܫܒܐ ܓ ܕܐܠܝܐ
ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ
ܕܲܠܘܵܬܼ ܦܝܼܠܝܼܦܸܣܵܝܹ̈ܐ ܐܲܚܲܝ̈ ܒܲܪܸܟܼܡܵܪܝ܀
ܐܝܼܢܵܐ ܒܵܥܝܹܢ ܕܝܵܕܥܝܼܬܘܿܢ ܐܵܚܘܿܢܘܵܬ̈ܝܼ ܕܫܘܼܠܵܐ ܕܝܼܝܼ ܒܘܼܫ ܙܵܘܕܵܐ ܡܘܼܢܬܹܐܠܹܗ ܒܐܹܘܲܢܓܵܠܝܼܘܿܢ* ܗܲܕܟܼܵܐ ܕܐܘܼܦ ܝܸܣܘܿܪ̈ܝܼ ܦܸܫܠܗ݇ܘܿܢ ܓܸܠܝܸܐ ܒܲܡܫܝܼܚܵܐ ܓܵܘ ܟܠܵܗ̇ ܦܪܵܛܘܿܪܝܼܢ؛ ܕܩܵܐ ܣܵܡܵܐ ܦܝܼܫܵܐ ܕܟܠ ܐ݇ܢܵܫܵܐ* ܘܪܵܒܵܐ ܡ̣ܢ ܐܵܚܘܿܢܘܵܬܹ̈ܐ ܕܒܡܵܪܲܢ ܦܸܫܠܗ݇ܘܿܢ ܒܗܹܒܼܝܼ ܥܲܠ ܝܸܣܘܿܪ̈ܝܼ ܘܩܘܼܫܕܸܪܗ݇ܘܿܢ ܒܘܼܫ ܙܵܘܕܵܐ ܕܠܵܐ ܙܕܘܼܥܬܵܐ ܠܗܲܡܙܘܼܡܹܐ ܗܹܡܸܙܡܲܢ ܕܐܲܠܵܗܵܐ* ܘܚܲܕ݇ܟܡܵܐ ܐ݇ܢܵܫܹ̈ܐ ܡ̣ܢ ܒܲܚܝܼܠܘܼܬܵܐ ܘܡܲܩܪܲܨܬܵܐ. ܘܐ݇ܚܹܪ̈݇ܢܹܐ ܒܪܸܙܵܝܵܐ ܛܵܒܼܵܐ ܘܒܚܘܼܒܵܐ ܠܡܫܝܼܚܵܐ ܡܲܟܪܘܼܙܸܐ ܝ݇ܢܵܐ. ܠܵܐ ܒܕܸܟܼܝܘܼܬܵܐ؛ ܐܸܠܵܐ ܒܸܚܫܵܒܼܵܐ ܝ݇ܢܵܐ ܕܡܲܙܝܸܕܝܼ ܝܲܠܨܘܼܝ ܠܝܸܣܘܼܪ̈ܝܼ* ܘܒܐܵܗܵܐ ܚܕܹܐܠܝܼ ܘܒܸܚܕܵܝܵܐ ܝ݇ܘܸܢ ܕܒܟܠ ܦܸܪܣܲܬ؛ ܐܸܢ ܒܗܲܓ̰ܲܬ ܘܐܸܢ ܒܗܵܩܘܼܬܵܐ ܡܫܝܼܚܵܐ ܦܵܐܸܫ ܡܘܼܟܪܸܙܵܐ* ܣܵܒܵܒ ܒܝܼܕܲܥܝܵܐ ܝ݇ܘܸܢ ܕܐܲܢܹܐ ܩܵܐ ܚܲܝܹ̈ܐ ܦܝܵܫܵܐ ܝ݇ܢܵܐ ܡܘܼܫ̄ܟ̮ܚܹܐ ܒܦܲܪܦܲܠܬܵܘܟܼܘܿܢ ܘܒܚܲܠܥܲܬ ܕܪܘܼܚܵܐ ܕܝܼܫܘܿܥ ܡܫܝܼܚܵܐ* ܐܲܝܟܼ ܕܐܝܼܬܠܝܼ ܗܹܒܼܝܼ ܘܒܸܣܦܵܪܵܐ ܝ݇ܘܸܢ ܕܒܗܸܟ̃ ܡܸܢܕܝܼ ܠܵܐ ܢܵܚܦܸܢ. ܐܸܠܵܐ ܒܦܵܐܬܵܐ ܚܘܲܪܬܵܐ ܐܲܝܟܼ ܕܒܟܠ ܥܕܵܢܵܐ ܐܘܼܦ ܐܵܕܝܼܵܐ ܦܵܐܸܫ ܓܘܼܪܘܸܣܵܐ ܡܫܝܼܚܵܐ ܒܦܲܓܼܪܝܼ ܐܸܢ ܒܚܲܝܹ̈ܐ ܘܐܸܢ ܒܡܵܘܬܵܐ* ܣܵܒܵܒ ܚܲܝܹ̈ܐ ܕܝܼܝܼ ܡܫܝܼܚܵܐ ܝ݇ܢܵܐ. ܘܐܸܢ ܡܵܝܬܸܢ ܦܵܝܕܵܐ ܝ݇ܠܹܗ ܩܵܬܝܼ* ܐܝܼܢܵܐ ܐܸܢ ܒܐܲܢܹܐ ܚܲܝܹ̈ܐ ܕܒܸܣܪܵܐ ܛܥܘܼܢܝܵܬܹ̈ܐ ܐܝܼܬܠܝܼ ܒܦܘܼܠܚܵܢܝܼ ܠܹܐ ܝ݇ܘܸܢ ܒܝܼܕܲܥܝܵܐ ܡܘܼܕܝܼ ܡܓܵܒܸܢ܋ ܣܵܒܵܒ ܬܸܪܘܲܝܗܝ ܡܲܠܝܘܼܨܝܼ ܝ݇ܢܵܐ. ܫܲܗܘܘܼܬܹܐ ܝ݇ܘܸܢ ܠܫܵܢܘܿܝܹܐ ܕܥܲܡ ܡܫܝܼܚܵܐ ܗܵܘܸܢ. ܘܐܵܗܵܐ ܪܵܒܐ ܒܘܼܫ ܨܦܵܝ ܝܼܗܘ̣ܵܐ ܩܵܬܝܼ؛ ܐܝܼܢܵܐ ܐܘܼܦ ܕܟܵܠܸܢ ܓܵܘ ܦܲܓܼܪܝܼ ܡܲܠܝܘܼܨܹܐ ܝ݇ܠܹܗ ܩܵܬܝܼ ܒܘܼܬ ܚܵܬܸܪ ܕܝܼܵܘܟܼܘܿܢ܋ ܘܐܵܗܵܐ ܒܗܹܒܼܝܼ ܩܘܝܼܬܵܐ ܒܝܼܕܲܥܝܵܐ ܝ݇ܘܸܢ ܕܦܵܝܫܸܢ ܘܟܵܠܸܢ ܩܵܐ ܚܲܕܘܼܬܵܐ ܕܕܝܼܵܘܟܼܘܿܢ ܘܠܓܲܪܘܲܣܬܵܐ ܕܗܲܝܡܵܢܘܼܬܵܘܟܼܘܿܢ*
♱♱♱♱♱♱♱♱♱
ܚܕܒܫܒܐ ܕܬܼܠܬܼܐ ܕܐܠܝܐ
ܡܬܝ ܝܓ: 24 ‐ 44
ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ ܟܪܘܙܘܬܼܐ ܕܡܬܝ
♰ ܘܐ݇ܡܸܪܹܗ ܝܑܼܫܘܿܥ ܠܬܲܠܡܝܼܕܘܼ̈ܗܝ ܐܵܗܵܐ ܡܲܬܠܵܐ: ܟܹܐ ܕܲܡܝܵܐ ܡܲܠܟܘܼܬܵܐ ܕܫܡܲܝܵܐ ܠܓܲܒܼܪܵܐ ܕܙܪܸܥܠܹܗ ܙܲܪܥܵܐ ܛܵܒ̣ܵܐ ܓܵܘ ܚܲܩܠܹܗ. ܘܟܲܕ ܕܡܸܟܼܠܗ݇ܘܿܢ ܐ݇ܢܵܫܹ̈ܐ. ܐ݇ܬܹܐܠܹܗ ܕܸܫ̰ܡܸܢܹܗ ܘܙܪܸܥܠܹܗ ܙܝܼܘܵܢܹ̈ܐ ܒܲܝܢܵܬ ܚܸܛܹ̈ܐ ܘܐ݇ܙܸܠܹܗ. ܐܝܼܢܵܐ ܟܲܕ ܡܘܼܓ̰ܝܸܢܹܗ ܝܸܩܢܵܐ ܘܥܒܼܸܕܠܹܗ ܛܥܘܿܢܝܵܬܹ̈ܐ. ܗܿܝܓܵܗ̇ ܦܸܫܠܗ݇ܘܿܢ ܚܸܙܝܹܐ ܐܘܿܦ ܙܝܼܘܵܢܹ̈ܐ. ܘܩܘܼܪܒܸܢܗ݇ܘܿܢ ܪܹ̈ܓܵܘܵܬܘܼܗܝ ܕܡܵܪܹܐ ܕܒܲܝܬܵܐ ܘܐ݇ܡܸܪܗ݇ܘܿܢ ܐܸܠܹܗ: ܡܵܪܲܢ: ܠܵܐ ܗܵܐ ܙܲܪܥܵܐ ܛܵܒܼܵܐ ܙܪܸܥܠܘܼܟܼ ܒܚܲܩܠܘܼܟܼ، ܡ̣ܢ ܐܲܝܟܵܐ ܝܢܵܐ ܙܝܼܘܵܢܹ̈ܐ ܕܐܝܼܬ ܒܝܼܹܗ؟ ܐܝܼܢܵܐ ܗ̇ܘ ܐ݇ܡܸܪܹܗ ܐܸܠܲܝܗܝ: ܓܲܒܼܪܵܐ ܕܸܫ̰ܡܸܢ ܥܒܼܸܕܠܹܗ ܐܵܗܵܐ. ܐܲܡܪܝܼ ܐܸܠܹܗ ܪܹ̈ܓܵܘܵܬܘܼܗܝ: ܒܣܵܡܘܼܟܼ ܝܼܠܵܗ̇ ܕܐܵܙܸܠ݇ܚ ܓܵܒܸܚܠܗ݇ܘܿܢ؟ ܐܝܼܢܵܐ ܗ̇ܘ ܐ݇ܡܸܪܹܗ ܐܸܠܲܝܗܝ: ܒܲܠܟܵܐ ܟܲܕ ܓܵܒܝܼܬܘܿܢ ܙܝܼܘܵܢܹ̈ܐ ܥܲܩܪܝܼܬܘܿܢ ܥܲܡܲܝܗܝ ܐܵܦ ܚܸܛܹ̈ܐ. ܫܒܼܘܼܩܘܿܢ ܓܲܪܘܸܣܝܼ ܬܸܪܘܲܝܗܝ ܡܐܸܚܕܵܕܹܐ ܗܲܠ ܠܚܨܵܕܵܐ. ܘܒܥܸܕܵܢܵܐ ܕܚܨܵܕܵܐ ܒܸܬ ܐܲܡܪܸܢ ܠܚܵܨܘܿܕܹ̈ܐ: ܓܵܒܹܝܡܘܿܢ ܩܲܕ݇ܡܵܝܬܵܐ ܙܝܼܘܵܢܹ̈ܐ ܘܐ݇ܣܘܼܪܘܿܢ ܠܗ݇ܘܿܢ ܕܲܪ̈ܙܹܐ ܕܦܲܝܫܝܼ ܡܘܼܩܕܹܐ. ܐܝܼܢܵܐ ܚܸܛܹ̈ܐ ܟܲܦܫܘܿܢ ܠܐܲܢܒܵܪ̈ܝܼ. ܡܲܬܠܵܐ ܐ݇ܚܹܪ݇ܢܵܐ ܡܬܸܠܹܗ ܐܸܠܲܝܗܝ ܘܐ݇ܡܸܪܹܗ: ܕܵܡܝܵܐ ܡܲܠܟܘܼܬܵܐ ܕܫܡܲܝܵܐ ܠܕܲܢܕܸܟܬܵܐ ܕܚܲܪܕܠܵܐ، ܕܫܩܝܼܠܵܐ ܠܹܗ ܓܲܒܼܪܵܐ ܘܙܸܪܥܝܵܐ ܠܹܗ ܒܚܲܩܠܹܗ. ܘܗ̇ܝ ܒܘܼܫ ܙܥܘܿܪܬܵܐ ܝܠܵܗ̇ ܡ̣ܢ ܟܠܲܝܗܝ ܙܲܪ̈ܥܘܿܢܹܐ. ܐܝܼܢܵܐ ܐܝܼܡܿܢ ܕܓܘܼܪܘܸܣܠܵܗ̇ ܒܘܼܫ ܓܘܼܪܬܵܐ ܝܠܵܗ̇ ܡ̣ܢ ܟܠܲܝܗܝ ܝܲܪ̈ܩܘܿܢܹܐ. ܘܟܹܐ ܗܵܘܝܵܐ ܐܝܼܠܵܢܵܐ، ܐܲܝܟܼ ܕܐܲܬܝܵܐ ܦܵܪܲܚܬܵܐ ܕܫܡܲܝܵܐ ܘܬܲܪܨܵܐ ܩܸܢܵܐ ܒܦܲܥܘܵܢܘܼ̈ܗܝ. ܐ݇ܚܹܪ݇ܢܵܐ ܡܲܬܠܵܐ ܐ݇ܡܸܪܹܗ ܐܸܠܲܝܗܝ: ܟܹܐ ܕܵܡܝܵܐ ܡܲܠܟܘܼܬܵܐ ܕܫܡܲܝܵܐ ܠܚܡܝܼܪܵܐ ܗ̇ܘ ܕܫܩܸܠܵܗ̇ ܒܲܟܼܬܵܐ: ܛܘܼܡܸܪܵܗ̇ ܓܵܘ ܬܠܵܬܵܐ ܣܲܐܝܼܢܹ̈ܐ ܕܩܲܡܚܵܐ. ܗܲܠ ܕܟܠܹܗ ܚܡܸܥܠܹܗ. ܐܲܢܹܐ ܟܠܲܝܗܝ ܒܡܲܬܠܹ̈ܐ ܗܘܼܡܙܸܡܠܹܗ ܝܑܼܫܘܿܥ ܠܟܸܢܫܹ̈ܐ. ܘܕܠܵܐ ܡܲܬܠܹ̈ܐ ܠܹܐ ܗܲܡܙܸܡ ܗ݇ܘܵܐ ܥܲܡܲܝܗܝ. ܐܲܝܟܼ ܕܦܵܐܸܫ ܬܘܼܡܸܡܵܐ ܡܸܢܕܝܼ ܕܦܸܫܠܹܗ ܐ݇ܡܝܼܪܵܐ ܒܢܒܼܝܼܵܐ ܕܐ݇ܡܸܪܹܗ: ܒܸܬ ܦܲܬܚܸܢ ܦܘܼܡܝܼ ܒܡܲܬܠܹ̈ܐ، ܘܒܸܬ ܓܵܠܸܢ ܫܘܼܓَܼܠܹ̈ܐ ܟܸܣܝܹ̈ܐ ܕܡ̣ܢ ܩܵܕ݇ܡ ܒܸܢܝܲܬܹ̈ܐ ܕܥܵܠܡܵܐ. ܗܲܝܓܵܗ̇ ܫܒܼܸܩܠܹܗ ܝܑܼܫܘܿܥ ܠܟܸܢܫܹ̈ܐ. ܘܐ݇ܬܹܐܠܹܗ ܠܒܲܝܬܵܐ. ܘܩܘܼܪܒܸܢܗ݇ܘܿܢ ܠܘܵܬܹܗ ܬܲܠܡܝܼܕܘܼ̈ܗܝ ܘܐܵܡܪܝܼ ܐܸܠܹܗ: ܦܵܫܸܩܠܲܢ ܗ̇ܘ ܡܲܬܠܵܐ ܕܙܝܼܘܵܢܹ̈ܐ ܘܕܚܲܩܠܵܐ. ܐܝܼܢܵܐ ܗ̇ܘ ܓ̰ܘܼܘܸܒܠܹܗ ܘܐ݇ܡܸܪܹܗ ܐܸܠܲܝܗܝ: ܗ̇ܘ ܕܙܪܸܥܠܹܗ ܙܲܪܥܵܐ ܛܵܒܼܵܐ، ܝܼܠܹܗ ܒܪܘܿܢܹܗ ܕܐ݇ܢܵܫܵܐ. ܘܚܲܩܠܵܐ ܥܵܠܡܵܐ ܝܠܹܗ. ܐܝܼܢܵܐ ܙܲܪܥܵܐ ܛܵܒܼܵܐ ܒܢܘܿܢܹ̈ܐ ܕܡܲܠܟܘܼܬܵܐ ܝܢܵܐ. ܐܝܼܢܵܐ ܙܝܼܘܵܢܹ̈ܐ ܒܢܘܿܢܹ̈ܐ ܕܒܝܼܫܵܐ ܝܢܵܐ. ܐܝܼܢܵܐ ܕܸܫܡܸܢ ܕܙܸܪܥܝܲܝܠܹܗ، ܝܑܼܠܹܗ ܣܵܛܵܢܵܐ. ܐܝܼܢܵܐ ܚܨܵܕܵܐ ܝܑܼܠܹܗ ܫܘܼܠܵܡܵܐ ܕܥܵܠܡܵܐ. ܐܝܼܢܵܐ ܚܵܨܵܕܹ̈ܐ ܡܲܠܲܐܟܼܹ̈ܐ ܝܢܵܐ. ܗܲܕܟܼܵܐ ܕܲܐܟܼܝܼ ܕܦܲܝܫܝܼ ܓܘܼܒܝܹܐ ܙܝܼܘܵܢܹ̈ܐ ܘܡܘܼܩܕܹܐ ܒܢܘܼܪܵܐ. ܗܲܕܟܼܵܐ ܒܸܬ ܗܵܘܹܐ ܒܫܘܼܠܵܡܹܗ ܕܐܵܗܵܐ ܥܵܠܡܵܐ. ܒܸܬ ܫܵܕܸܪ ܒܪܘܿܢܹܗ ܕܐ݇ܢܵܫܵܐ ܡܲܠܲܐܟܼܘܼ̈ܗܝ ܘܒܸܬ ܓܵܒܝܼ ܡ̣ܢ ܡܲܠܟܘܼܬܹܗ ܟܠܲܝܗܝ ܟܦܘܼܪ̈ܝܹܐ ܘܟܠܲܝܗܝ ܥܲܒ̣ܕܵܢܹ̈ܐ ܕܥܵܘܠܵܐ. ܘܒܸܬ ܕܵܪܹܝܠܗ݇ܘܿܢ ܒܐܵܬܘܿܢܵܐ ܕܢܘܼܪܵܐ. ܬܵܡܵܐ ܒܸܬ ܗܵܘܹܐ ܒܸܟܼܝܵܐ ܘܚܲܪܚܲܟ̰ܬܵܐ ܕܟܵܟܹ̈ܐ. ܗܿܝܓܵܗ ܙܲܕܝܼܩܹ̈ܐ ܒܸܬ ܒܲܗܪܸܢܝܼ ܐܲܝܟܼ ܫܸܡܫܵܐ ܒܡܲܠܟܘܼܬܵܐ ܕܒܵܒܲܝܗܝ. ܡ̇ܢ ܕܐܝܼܬܠܹܗ ܢܲܬܝܵܬܹ̈ܐ ܕܫܵܡܸܥ ܫܵܡܸܥ.
♱♱♱♱♱♱♱♱♱