ܚܲܕܼܒ̇ܫܲܒܵܐ ܕܲܬܼܠܵܬܼܵܐ ܕܐܹܠܝܼܵܐ
ܡܲܪܡܝܼܬܼܵܐ ܕܐ݇ܪ̈ܵܙܹܐ. ܐܹܪܲܡ̱ܪܡܵܟܼ ܡܵܪܝ ܡܲܠܟܵܐ.
ܕܩܲܢܟܹ̇ܐ؛ ܒܠܵܟܼܘܼ ܩܵܪܹܝ̇ܢܲܢ.
ܪܘܿܣ ܥܠܲܝ ܒܙܘܿܦܵܐ ܘܐܸܬ̇ܕܲܟܸ̇ܐ؛ ܚܲܠܸܠܲܝܢܝ ܒܹܗ ܘܡ̣ܢ ܬܲܠܓܵܐ ܐܸܚܘܲܪ. ܛܲܠܵܐ ܡܦܲܝܓ̣ܵܢܵܐ ܕܪ̈ܲܚܡܹܐ ܕܛܲܝܒ̇ܘܼܬܼܵܟܼ ܫܲܕܲܪ ܠܥܘܼܕܼܪܵܢܲܢ؛ ܬܢܝܼ؛ ܘܫܲܒܲܚ ܒܵܗ̇.
ܩܸܪܝܵܢܵܐ؛ ܬܸܢܝܵܢ ܢܵܡܘܿܣܵܐ ܙ؛ 12‐ܫܘܼܠܵܡܵܐ ܚܲܒ̣ܪܹܗ؛ ܐܹܫܲܥܝܵܐ؛ ܠܒ؛ 1‐ܠܓ؛ 7
ܫܘܼܪܵܝܵܐ. ܘ܀ ܕܵܪܵܐ ܠܕܼܵܪܵܐ ܢܸܫܬܲܥܘܿܢ ܥܒ̣ܵܕܲܝ̈ܟ* ܘܓܲܢ݇ܒܵܪܘܼܬܼܵܟܼ ܢܚܵܘܘܿܢ* ܘܥܘܼܫܢܵܐ ܕܲܕܼܚܝܼܠܘܼܬܼܵܟܼ ܢܹܐܡܪܘܼܢ* ܘܪܵܘ̱ܪ̈ܒܼܵܬܼܵܟܼ ܢܸܫܬܲܥܘܿܢ* ܘܲܕܼܚܝܼܠܘܼܬܼ ܥܘܼܫܢܵܟܼ ܢܹܐܡܪܘܼܢ* ܘܪܲܒ̇ܘܼܬܼܵܟܼ ܐܸܫܬܲܥܸܐ*
ܫܠܝܼܚܵܐ؛ ܦܝܼܠܝܼܦܣܵܝܹ̈ܐ ܐ؛ 12‐26
ܙܘܼܡܵܪܵܐ؛ ܒܲܠܥܵܠܲܡ ܐܲܢ݇ܬ̇ܘܼ. ܐܝܼܕܲܝ̈ܟ ܥܲܒ̣ܕܵܢ̈ܝ ܘܐܲܬܼܩ̈ܢܵܢܝ ܐܲܠܸܦܲܝܢܝ ܢܵܡܘܿܣܵܟܼ. ܕܢܸܚܙܘܿܢ ܕܵܚܠܲܝ̈ܟ ܘܢܸܚܕܿܘܿܢ ܕܲܠܡܸܠܬܼܵܟܼ ܣܲܒ̇ܪܹܬܼ. ܒ܀ ܝܸܕܼܥܹ̇ܬܼ ܕܙܲܕܝܼܩܝܼܢ ܐܸܢܘܿܢ ܕܝܼܢܲܝ̈ܟ ܡܵܪܝܵܐ ܘܗܲܝܡܵܢܘܼܬܼܵܟܼ ܡܲܟܸܟܼܬܲܢܝ. ܢܸܗܘܘܿܢ ܪ̈ܲܚܡܲܝܟ ܠܒܼܘܼܝܵܐܝ ܐܲܝܟܼ ܕܐܸܡܲܪܬ̇ ܠܥܲܒ̣ܕܵܟܼ. ܒ܀
ܐܹܘܲܢܓܲܠܝܼܘܿܢ؛ ܡܲܬܲܝ ܝܓ؛ 24‐44
ܐܹܘܲܢܓܲܠܝܼܘܿܢ. ܒܗܵܐ ܫܒ̣ܵܢܝ. ܐܸܬܕܲܟܼܪܹܬܼ ܐܲܠܵܗܵܐ ܘܐܸܬ̇ܕܲܠܚܹܬܼ؛ ܘܢܸܦܠܲܬܸ ܒܝܼ ܕܸܚ̱ܠܬܼܵܐ. ܕܨܘܼܪܬܵܐ. ܗܵܟܲܢܵܐ ܢܸܗܘܸܐ ܒܫܘܼܠܵܡܹܗ ܕܥܵܠܡܵܐ. ܡܵܪܝܵܐ ܥܲܠ ܓܸܠܝܵܢܵܟܼ ܕܼܲܒܼܫܘܼܠܵܡܵܐ ܡܸܬܼܚܲܫܲܒ̣ ܗ݇ܘܹܝ̇ܬܼ. ܘܐܸܬܼܒܲܠ̇ܗܝܼܬܼ ܡ̣ܢ ܣܘܼܪܵܕܹܗ. ܥܝܼܪܹ̈ܐ ܪܗܝܼܒ̣ܝܼܢ ܡ̣ܢ ܦܘܼܩܕܵܢܵܟܼ ܠܲܡܓܲܒܵܝܘܼ ܙܝܼܙܵܢܹ̈ܐ ܡ̣ܢ ܓܵܘ ܚܸܛܹ̈ܐ. ܘܓܼܵܡ̇ܪܝܼܢ ܒܲܥܒ̣ܵܕܼܵܐ ܠܗܵܝ ܕܲܠܗܝܼܩܝܼܢ ܟܲܕܼ ܐܲܦܝܼܣܘܼܟܼ ܡ̣ܢ ܠܘܼܩܕܼܵܡ. ܘܡܲܪܡܹܝܢ ܒܝܼܫܹ̈ܐ ܒܓܹܗܲܢܵܐ ܘܝܵܪܬ̇ܝܼܢ ܛܵܒܹ̈ܐ ܒܘܼܣܵܡܵܐ. ܘܐܸܢܵܐ ܕܥܸܫܢܲܬܸ ܚܲܝܵܒܼܘܼܬܼܝ. ܠܐܲܝܟܵܐ ܐܸܥܪܘܿܩ ܡ̣ܢ ܕܝܼܢܵܟܼ. ܠܵܐ ܡܵܪܝ ܐܸܗܘܸܐ ܙܝܼܙܵܢܵܐ ܕܒܲܝܢܵܬܼ ܚܸܛܹ̈ܐ ܐܸܬܼܪܲܒ̇ܝܼܬܼ ܠܐܵܘܨܪ̈ܲܝܟ ܟܲܢܸܫܲܝܢܝ؛ ܬܢܝܼ؛ ܫܲܒܲܚ. ܒܡܲܕܼܒ̇ܚܵܟܼ ܡܵܪܝܵܐ. ܐܲܟܵܪܵܐ ܛܵܒ̣ܵܐ ܕܐܸܬܼܵܐ ܕܢܸܥܩܘܿܪ ܙܝܼܙܵܢܹ̈ܐ. ܕܲܙܪܲܥ̣ ܒܝܼܫܵܐ ܒܚܲܩܠܵܐ ܕܒܹܝܬܼ ܐܵܕܼܵܡ. ܗܲܒ̣ܠܲܢ ܒܲܚܢܵܢܵܟܼ. ܕܢܸܗܘܸܐ ܚܸܛܹ̈ܐ ܓܲܒ̣̈ܝܵܬܼܵܐ. ܘܢܸܥܘܿܠ ܥܲܡܵܟܼ ܠܐܵܘܨܲܪ ܡܲܠܟ̇ܘܼܬܼܵܐ.
ܕܐ݇ܪ̈ܵܙܹܐ؛ ܒܩܵܠ ܒܕܸܚ̱ܠܬܼܵܐ ܘܲܒܼܚܲܕܼܘܼܬܼܵܐ. ܬܵܘ ܢܫܲܒܲܚ ܠܡܵܪܝܵܐ؛ ܐܲܝܠܹܝܢ ܕܩܵܝ̇ܡܝܼܢ ܒܒܲܝܬܹ̇ܗ ܕܡܵܪܝܵܐ ܒܠܲܝ̈ܠܵܘܵܬܼܵܐ؛ ܥܲܡܵܐ ܕܲܓ̣ܒܼܵܐ ܠܹܗ ܠܝܵܪܬܿܘܼܬܼܵܐ. ܕܨܘܼܪܬܵܐ. ܩܪ̈ܲܝܵܐ ܘܩܲܕܿܝܼܫܹ̈ܐ ܕܒܼܝܼܫܘܿܥ ܡܫܝܼܚܵܐ ܡܩܲܕܿܫܝܼܢ. ܚܢܲܢ ܕܗܵܪܟܵܐ ܚܢܲܢ ܝܵܘܡܵܢܵܐ ܘܟܼܠܲܢ ܚܲܝܝܼܢܲܢ. ܟܠܲܢ ܐܲܝܠܹܝܢ ܕܐܸܬܼܩܪܝܼܢ ܠܡܸܬܼܒܲܣܵܡܘܼ ܒܐ݇ܪ̈ܵܙܹܐ ܫܒܼܝܼܚܹ̈ܐ ܘܐܲܠܵܗܵܝܹ̈ܐ. ܢܵܘܕܸܿܐ ܘܢܸܣܓܿܘܿܕܼ ܒܕܸܚܠܵܐ ܘܚܘܼܒܵܐ ܠܡܵܪܵܐ ܕܟܼܠܵܐ. ܘܲܒܼܪܸܚܡ̱ܬܼܵܐ ܘܗܲܝܡܵܢܘܼܬܼܵܐ ܢܸܣܲܒܼ ܦܲܓ̣ܪܹܗ ܕܲܒܼܪܵܐ ܡܫܝܼܚܵܐ. ܕܲܚܠܵܦ ܚܲܝܲܝ̈ܢ ܐܸܬ̇ܕܿܒܲܚ. ܘܚܲܣ̣ܝܼ ܚܵܘܒܲܝ̈ܢ. ܘܪܲܥ̣ܝܹܗ ܠܐܲܒ̣ܘܼܗܝ ܥܲܡܲܢ ܒܝܲܕܼ ܫܘܼܦܵܥ ܕܡܹܗ. ܘܗܵܐ ܡܸܙܕܲܝܲܚ ܥܲܠ ܡܲܕܼܒ̇ܚܵܐ. ܘܡ̣ܢ ܝܲܡܝܼܢܵܐ ܕܐܲܒ̣ܵܐ ܕܫܲܠ̣ܚܹܗ. ܘܟܲܕܼ ܚܲܕܼ ܐܝܼܬܼܵܘܗܝ ܘܠܵܐ ܡܸܬܼܦܲܠܲܓܼ. ܠܥܸܠ ܘܲܒܼܥܹܕܿܬܵܐ ܟܠܝܘܿܡ ܡܸܬܿܕܲܒܲܚ ܚܠܵܦ ܚܵܘܒܲܝ̈ܢ ܟܲܕܼ ܠܵܐ ܚܵܐܹ̇ܫ. ܬܵܘ ܢܸܬܼܩܲܪܲܒܼ ܙܲܗܝܵܐܝܼܬܼ. ܠܕܸܒܼܚܵܐ ܕܦܲܓ̣ܪܹܗ ܡܩܲܕܸ̇ܫ ܟܠܵܐ. ܘܢܸܩܥܸܐ ܠܹܗ ܟܠܲܢ ܐܲܟܲܚ݇ܕܼ ܘܢܹܐܡܲܪ ܫܘܼܒ̣ܚܵܐ ܠܵܟܼ. ܬܢܝܼ؛ ܘܫܲܒܲܚ ܒܵܗ̇.
ܕܒܹܝܡ؛ ܥܘܼܢܵܝܵܐ. ܡܸܢܹܗ ܘܠܹܗ. ܦܲܓ̣ܪܵܐ ܝܲܩܝܼܪܵܐ ܘܲܕܼܡܵܐ ܡܚܲܣܝܵܢܵܐ ܡܸܬܼܩܲܪܲܒ̣. ܩܪܘܿܒ̣ܘ ܐܲܢ݇ܬ̇ܘܿܢ ܐܲܝܠܹܝܢ ܕܐܸܬܼܩܪܝܼܘ ܘܐܸܬܼܒܲܣܲܡܘ. ܒܐ݇ܪܵܙܵܐ ܕܲܟܼܝܵܐ ܘܩܲܕܿܝܼܫܵܐ. ܘܥܲܡ ܚܲܝ̈ܠܵܘܵܬܼܵܐ ܥܸܠܵܝܹ̈ܐ. ܬܸܫܒܿܘܿܚܬܵܐ ܒܩܵܠܵܐ ܪܵܡܵܐ ܐܸܡܲܪܘ. ܩܲܕܿܝܼܫܲܬ̇ ܩܲܕܿܝܼܫܲܬ̇ ܐܘܿ ܡܵܪܹܟ̇ܠ܀ ܟܸܢܫܹ̈ܐ ܓܹܝܪ ܕܡܲܠܲܐܟܹ̈ܐ ܥܲܡ ܟܪ̈ܘܿܒܹܐ ܘܲܣܪ̈ܵܦܹܐ ܐܵܡ̇ܪܝܼܢ ܗܲܠܸܠܘܼܝܲܗ.
ܒܵܬܹ̈ܐ؛ ܣܪ̈ܵܦܹܐ ܒܗܲܝܟ̇ܠܵܐ ܚ̣ܙܵܐ ܐܹܫܲܥܝܵܐ. ܟܲܕܼ ܩܵܥܹ̇ܝܢ ܗ݇ܘ̣ܵܘ ܩܲܕܿܝܼܫ ܩܲܕܿܝܼܫ܀ ܟܸܢܫܹ̈ܐ ܓܹܝܪ...܀ ܣܸܕܼܪܹ̈ܐ ܕܢܘܼܪܵܐ ܘܚܲܝܠܹ̈ܐ ܕܪܘܼܚܵܐ. ܦܵܪܚ̇ܝܼܢ ܘܛܵܝ̇ܣܝܼܢ ܘܩܵܥܹ̇ܝܢ ܩܲܕܿܝܼܫ܀ ܣܪ̈ܵܦܹܐ ܕܪܘܼܚܵܐ ܩܵܥܹ̇ܝܢ ܩܲܕ̇ܝܼܫ. ܠܵܟܼ ܩܲܕ̇ܝܼܫܵܐ ܡܩܲܕܸܿܫ ܟܠܵܐ܀ ܟܸܢܫܹ̈ܐ ܓܹܝܪ...܀
♱♱♱♱♱♱♱♱♱