|
ܚܲܕܼܒܫܲܒܵܐ ܕܲܬ̣ܠܵܬܼܵܐ ܕܲܫܠܝܼܚܹ̈ܐ
ܬܢܹܝܢ ܢܵܡܘܿܣܵܐ. ܐ؛ 3‐18 ܬܸܒ̣ܘ ܘܲܫܠܵܘ ܬܸܢܝܵܢ ܢܵܡܘܿܣܵܐ ܣܸܦܪܵܐ ܕܚܲܡܫܵܐ ܕܐܘܿܪܵܝܬܵܐ ܐܲܚܲܝ̈ ܒܲܪܸܟ̣ܡܵܪܝ܀
ܘܗ݇ܘܹܐ ܠܵܗ̇ ܒܫܸܢ݇ܬܵܐ ܕܐܲܪܒܥܝܼ؛ ܒܝܲܪܚܵܐ ܕܚܲܕܸܥܣܲܪ؛ ܚܲܕ݇ ܒܝܲܪܚܵܐ؛ ܗܘܼܡܙܸܡܠܹܗ ܡܘܼܫܹܐ ܥܲܡ ܒܢܲܝ̈ ܝܼܣܪܵܝܹܠ؛ ܟܠ ܡܸܢܕܝܼ ܕܦܘܼܩܸܕܠܹܗ ܡܵܪܝܵܐ ܐܸܠܲܝܗܝ܀ ܡ̣ܢ ܒܵܬܲܪ ܕܩܛܸܠܹܗ ܠܣܝܼܚܘܿܢ ܡܲܠܟܵܐ ܕܐܵܡܘܿܪ̈ܵܝܹܐ ܕܝ݇ܬܝܼܒ̣ܵܐ ܗ݇ܘܵܐ ܒܚܸܫܒܘܿܢ؛ ܘܠܥܘܿܓ̣ ܡܲܠܟܵܐ ܕܡܲܬܢܝܼܢ ܕܝ݇ܬܝܼܒ̣ܵܐ ܗ݇ܘܵܐ ܒܥܲܣܬܪܘܼܬ ܘܒܐܲܪܕܥܝܼ܀ ܒܥܸܒ̣ܪܵܐ ܕܝܵܘܪܕܢܵܢ؛ ܒܐܲܪܥܵܐ ܕܡܘܼܐܵܒ̣. ܫܘܼܪܹܐܠܹܗ ܡܘܼܫܹܐ ܦܵܫܘܿܩܹܐ ܐܵܗܵܐ ܢܵܡܘܿܣܵܐ ܘܒܹܐܡܵܪܵܐ܀ ܡܵܪܝܵܐ ܐܲܠܵܗܲܢ ܐ݇ܡܸܪܹܗ ܐܸܠܲܢ ܒܚܘܿܪܝܼܒ̣؛ ܒܲܣܵܐ ܠܵܘܟ̣ܘܿܢ ܕܝ݇ܬܸܒ̣ܠܵܘܟ̣ܘܿܢ ܒܐܵܗܵܐ ܛܘܼܪܵܐ܀ ܕܘܼܪܘܿܢ ܘܡܲܛܥܸܢܗ݇ܘܿܢ؛ ܘܥܒ̣ܘܿܪܘܿܢ ܠܛܘܼܪܵܐ ܕܐܵܡܘܿܪ̈ܵܝܹܐ ܘܠܟܠ ܚܵܕܸܪܘܵܢܘܼܗܝ؛ ܠܥܵܪܵܒ̣ܵܐ؛ ܠܛܘܼܪܵܐ ܘܠܫܸܦܘܼܠܵܠܹܐ؛ ܘܠܬܲܝܡܢܵܐ؛ ܘܡܲܪ̈ܙܵܢܵܢܹܐ ܕܝܵܡܵܐ؛ ܐܲܪܥܵܐ ܕܟܢܲܥܢܵܝܹ̈ܐ؛ ܘܠܸܒ̣ܢܲܢ؛ ܘܗܲܠ ܢܲܗܪܵܐ ܓܘܼܪܵܐ ܦܪܵܬ܀ ܚܙܹܐܡܘܿܢ ܕܝܘܼܗ݇ܒ̣ܸܠܝܼ ܩܵܕ݇ܡܵܘܟ̣ܘܿܢ ܐܲܪܥܵܐ؛ ܥܒ̣ܘܿܪܘܿܢ ܘܝ݇ܪܘܿܬܘܿܢ ܐܲܪܥܵܐ ܕܝ݇ܡܹܐܠܹܗ ܡܵܪܝܵܐ ܠܒܵܒܵܘܵܬܵܘ̈ܟ̣ܘܿܢ؛ ܘܠܐܲܒ̣ܪܵܗܵܡ ܘܐܝܼܣܚܲܩ ܘܝܲܥܩܘܿܒ̣؛ ܠܝܼܵܗ݇ܒ̣ܵܗ̇ ܩܵܬܲܝܗܝ ܘܠܙܲܪܥܲܝܗܝ ܡ̣ܢ ܒܵܬ݇ܪܲܝܗܝ܀ ܘܐ݇ܡܸܪܝܼ ܐܸܠܵܘܟ̣ܘܿܢ ܒܗ̇ܝ ܥܸܕܵܢܵܐ؛ ܠܹܐ ܡܵܨܸܢ ܠܚܘܿܕܝܼ ܬܲܓܒܸܪܸܢܵܘܟ̣ܘܿܢ܀ ܡܵܪܝܵܐ ܐܲܠܵܗܵܘܟ̣ܘܿܢ ܩܵܡ ܡܲܙܝܸܕܠܵܘܟ̣ܘܿܢ؛ ܘܐܸܕܝܘܿܡ݇ ܝܵܘܡܵܐ ܝܼܬܘܿܢ ܪܵܒܵܐ ܐܲܝܟܼ ܟܵܘܟ̣ܒ̣ܹ̈ܐ ܕܫܡܲܝܵܐ܀ ܡܵܪܝܵܐ ܐܲܠܵܗܵܐ ܕܒܵܒܵܘܵܬܵܘ̈ܟ̣ܘܿܢ ܡܲܙܝܸܕ ܥܲܠܵܘܟ̣ܘܿܢ ܘܡܐܲܝܟܼ ܕܝܼܵܘܟ̣ܘܿܢ ܐܲܠܦܵܐ ܓܵܗܹ̈ܐ ܘܒܲܪܸܟ̣ܠܵܘܟ̣ܘܿܢ ܐܲܝܟܼ ܕܐ݇ܡܸܪܹܗ ܐܸܠܵܘܟ̣ܘܿܢ܀ ܒܘܼܬ ܕܐܵܗܵܐ ܕܵܐܟ̣ܝܼ ܡܵܨܸܢ ܕܛܲܥܢܸܢ ܠܚܘܿܕܝܼ ܟܠܹܗ ܝܘܼܩܪܵܘܟ̣ܘܿܢ ܘܛܵܥܢܵܘܟ̣ܘܿܢ ܘܕܝܼܘܵܢܵܘܟ̣ܘܿܢ؟ ܓܵܒܹܐܡܘܿܢ ܐ݇ܢܵܫܹ̈ܐ ܗܵܘܢܵܢܹ̈ܐ ܘܦܲܪ̈ܡܝܼܵܢܹܐ؛ ܘܦܝܼܫܹܐ ܝ݇ܕܝܼܥܹܐ ܓܵܘ ܫܲܒ̣ܛܵܘܟ̣ܘܿܢ؛ ܘܒܸܬ ܡܲܩܸܡܸܢܗ݇ܘܿܢ ܒܪܹܫܵܘܟ̣ܘܿܢ܀ ܘܐܲܚܬܘܿܢ ܓ̰ܘܼܘܸܒܠܵܘܟ̣ܘܿܢ ܘܐ݇ܡܸܪܵܘܟ̣ܘܿܢ ܐܸܠܝܼ؛ ܨܦܵܝܝܼ ܝ݇ܠܹܗ ܚܲܒܪܵܐ ܕܐ݇ܡܸܪܘܼܟܼ ܠܸܥܒ̣ܵܕܵܐ܀ ܘܠܘܼܒܸܠܝܼ ܪܹ̈ܫܵܢܹܐ ܕܫܲܒ̣ܛܵܘܟ̣ܘܿܢ ܐ݇ܢܵܫܹ̈ܐ ܗܵܘܢܵܢܹ̈ܐ ܘܝ݇ܕܝܼܥܝܹܐ؛ ܘܥܒ̣ܝܼܕܝܼܠܝܼ ܪܹ̈ܫܵܢܹܐ ܥܲܠܵܘܟ̣ܘܿܢ؛ ܪܹ̈ܫܵܢܹܐ ܕܐܲܠܦܹ̈ܐ؛ ܪܹ̈ܫܵܢܹܐ ܕܐܸܡ̈ܐܹܐ؛ ܪܹ̈ܫܵܢܹܐ ܕܚܲܡܫܝܼ؛ ܘܪܹ̈ܫܵܢܹܐ ܕܥܸܣܪܵܐ؛ ܘܣܵܦܪܹ̈ܐ ܠܫܲܒ̣ܛܵܘܟ̣ܘܿܢ܀ ܘܦܘܼܩܸܕܠܝܼ ܠܕܲܝܵܢ̈ܵܘܟ̣ܘܿܢ ܒܗ̇ܘ ܙܲܒ̣ܢܵܐ ܘܐ݇ܡܸܪܝܼ ܐܸܠܲܝܗܝ. ܗܵܘܝܼܬܘܿܢ ܒܸܫܡܲܥܝܵܐ ܒܹܝܠ ܐܵܚܘܿܢܘܵܬܵܘ̈ܟ̣ܘܿܢ؛ ܘܒܸܕܝܵܢܵܐ ܗܵܩܘܼܬܵܐ ܒܹܝܠ ܐ݇ܢܵܫܵܐ ܠܐܵܚܘܿܢܹܗ ܘܠܡܵܫܵܚܲܛܹܗ܀ ܠܵܐ ܚܵܙܝܼܬܘܿܢ ܦܵܬܵܐ ܒܕܝܼܘܵܢ؛ ܗܵܘܝܼܬܘܿܢ ܒܸܫܡܲܥܝܵܐ ܠܙܥܘܿܪܵܐ ܐܲܝܟܼ ܕܗ̇ܘ ܓܘܼܪܵܐ؛ ܘܠܵܐ ܙܵܕܥܝܼܬܘܿܢ ܡ̣ܢ ܗܝܼܟ̰ ܐ݇ܢܵܫܵܐ؛ ܣܵܒܵܒ ܕܝܼܘܵܢ ܕܐܲܠܵܗܵܐ ܝ݇ܠܵܗ̇. ܡܸܢܕܝܼ ܕܗܵܘܹܐ ܥܲܣܩܵܐ ܩܵܬܵܘܟ̣ܘܿܢ؛ ܡܲܝܬܹܐܡܘܿܢ ܠܹܗ ܠܟܸܣܠܝܼ ܘܒܸܬ ܫܵܡܥܸܢܹܗ܀
ܚܲܒ̣ܪܹܗ
ܐܹܫܲܥܝܵܐ ܐ: 1‐10 ܫܠܵܘ ܢܒ̣ܝܼܘܼܬܹܗ ܕܐܹܫܲܥܝܵܐ؛ ܐܲܚܲܝ̈ ܒܲܪܸܟ̣ܡܵܪܝ܀
ܚܸܙܘܵܐ ܕܐܹܫܲܥܝܵܐ ܒܲܪ ܐܵܡܘܿܨ؛ ܕܚܙܹܐܠܹܗ ܥܲܠ ܝܼܗܘܼܕܵܐ ܘܥܲܠ ܐܘܿܪܸܫܠܹܡ؛ ܒܝܵܘܡܵܢܹ̈ܐ ܕܥܘܿܙܝܼܵܐ؛ ܘܝܘܿܬܵܡ؛ ܘܐܵܚܲܙ؛ ܘܚܹܙܲܩܝܵܐ ܡܲܠܟܹ̈ܐ ܕܝܼܗܘܼܕܵܐ܀ ܫܡܝܼܥ ܫܡܲܝܵܐ ܘܡܲܨܝܸܬ ܐܲܪܥܵܐ؛ ܣܵܒܵܒ ܕܡܵܪܝܵܐ ܗܘܼܡܙܸܡܠܹܗ؛ ܒܢܘܿܢܹ̈ܐ ܓܘܼܪܘܸܣܠܝܼ ܘܡܘܼܪܸܡܠܝܼ؛ ܘܐܵܢܝܼ ܥܒ̣ܸܕܠܗ݇ܘܿܢ ܥܵܘܠܵܐ ܒܝܼܝܼ܀ ܝ݇ܕܝܼܥܠܹܗ ܬܵܘܪܵܐ ܩܲܢܵܝܹܗ ܘܚܡܵܪܵܐ ܐܘܼܪܹܐ ܕܡܵܪܹܗ؛ ܘܝܼܣܪܵܝܹܠ ܠܵܐ ܝ݇ܕܝܼܥܠܹܗ ܘܛܵܝܸܦܝܼ ܠܵܐ ܦܘܼܪܡܹܐܠܹܗ܀ ܘܵܝ ܠܛܵܝܸܦܵܐ ܚܲܛܵܝܵܐ؛ ܛܵܝܸܦܵܐ ܥܵܘܠܹܗ ܓܘܼܪܵܐ؛ ܙܲܪܥܵܐ ܒܝܼܫܵܐ؛ ܒܢܘܿܢܹ̈ܐ ܚܪ̈ܝܼܒ̣ܹܐ؛ ܫܒ̣ܸܩܠܵܘܟ̣ܘܿܢ ܠܡܵܪܝܵܐ؛ ܘܡܘܼܟܪܸܒܠܵܘܟ̣ܘܿܢ ܠܩܕܝܼܫܵܐ ܕܝܼܣܪܵܝܹܠ؛ ܘܕܹܐܪܵܘܟ̣ܘܿܢ ܠܵܒܵܬ݇ܪܵܐ܀ ܩܵܡܘܿܕܝܼ ܡܸܕܪܹܐ ܦܝܵܫܵܐ ܝ݇ܬܘܿܢ ܡܸܚܝܹܐ؛ ܘܡܲܙܝܸܕܝܼܬܘܿܢ ܬܲܥܠܲܡܬܵܐ. ܟܠ ܪܹܫܵܐ ܠܡܲܪܥܵܐ؛ ܘܟܠ ܠܸܒܵܐ ܠܦܵܫܲܡܬܵܐ܀ ܡ̣ܢ ܦܲܣܬܵܐ ܕܐܲܩܠܵܐ ܘܗܲܠ ܠܡܘܼܚܵܐ؛ ܠܲܝܬ̇ ܒܝܼܹܗ ܕܘܼܟܬܵܐ ܨܲܚ؛ ܟ̰ܠܲܦܝܵܬܹ̈ܐ ܘܒܪ̈ܝܼܢܵܬܹܐ ܘܕܲܪ̈ܒܵܬܹܐ؛ ܠܵܐ ܠܸܨܡܵܕܵܐ؛ ܘܠܵܐ ܠܹܐܣܵܪܵܐ؛ ܘܐܘܼܦ ܠܵܐ ܠܡܲܪܟܘܼܟ̣ܹܐ ܒܡܸܫܚܵܐ܀ ܐܲܪܥܵܘܟ̣ܘܿܢ ܚܵܪܵܒܵܐ؛ ܡܵܬܘܵܬܵܘ̈ܟ̣ܘܿܢ ܒܸܩܝܵܕܵܐ ܒܢܘܼܪܵܐ؛ ܐܲܪܥܵܘܟ̣ܘܿܢ ܒܲܪܩܘܼܒ̣ܠܵܘܟ̣ܘܢ ܦܝܵܫܵܐ ܐ݇ܟ̣ܝܼܠܬܵܐ ܒܢܘܼܟ̣ܪ̈ܵܝܹܐ؛ ܒܲܝܵܪܵܐ ܐܲܝܟܼ ܬܠܝܼܚܬܵܐ ܕܢܘܼܟ̣ܪ̈ܵܝܹܐ܀ ܦܸܫܠܵܗ̇ ܒܪܵܬܵܐ ܕܨܸܗܝܘܿܢ ܐܲܝܟܼ ܩܸܦܪܵܢܵܐ ܒܟܲܪܡܵܐ ܘܐܲܝܟܼ ܥܲܪܙܵܠܵܐ [ܕܘܼܟܬܵܐ ܕܛܸܠܵܢܝܼܬܵܐ] ܓܵܘ ܒܘܼܣܬܵܢܵܐ؛ ܘܐܲܝܟܼ ܡܕܝܼܢ݇ܬܵܐ ܚܒ̣ܝܼܫܬܵܐ܀ ܘܐܸܢ ܠܵܐ ܗܵܘܹܐ ܗ݇ܘܵܐ ܡܵܪܝܵܐ ܕܫܒ̣ܸܩܠܹܗ ܐܸܠܲܢ ܚܠܝܼܨܵܐ ܐܲܝܟܼ ܣܕܘܿܡ ܒܸܬ ܗܵܘܲܚ ܗ݇ܘܵܘ ܘܠܥܵܡܘܿܪܵܐ ܒܸܬ ܦܵܝܫܲܚ ܗ݇ܘܵܘ ܕܘܼܡܝܹ̈ܐ܀
♱♱♱♱♱♱♱♱♱
ܚܕܒܫܒܐ ܓ ܕܫܠܝܚ̈ܐ ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ ܕܲܠܘܵܬܼ ܩܘܼܪ̈ܲܢܬܵܝܹܐ ܐܲܚܲܝ̈ ܒܲܪܸܟܼܡܵܪܝ܀ ܐ؛ ܩܘܼܪ̈ܲܢܬܼܵܝܹܐ؛ ܙ؛ 1‐8
ܐܝܼܢܵܐ ܒܘܼܬ ܡܸܢܕܝܼܵܢܹ̈ܐ ܕܟܬܸܒܼܠܵܘܟܼܘܿܢ ܐܸܠܝܼ ܨܦܵܝ ܝܼܠܵܗ̇ ܠܓܲܒܼܪܵܐ ܕܠܒܲܟܼܬܵܐ ܠܵܐ ܩܵܪܒܸܢ* ܐܸܠܵܐ ܒܣܵܒܵܒ ܕܙܵܢܘܼܬܵܐ ܟܠ ܐ݇ܢܵܫܵܐ ܠܒܼܵܟܼܬܹܗ ܕܵܒܼܸܩ. ܘܒܲܟܼܬܵܐ ܠܓܲܒܼܪܵܗ̇ ܕܵܒܼܩܵܐ* ܓܲܒܼܪܵܐ ܠܒܲܟܼܬܹܗ ܚܘܼܒܵܐ ܕܕܵܝܢܵܢܵܐ ܝ݇ܠܹܗ ܦܲܪܸܥ. ܗܲܕܟܼܵܐ ܐܘܼܦ ܒܲܟܼܬܵܐ ܠܓܲܒܼܪܵܗ̇* ܒܲܟܼܬܵܐ ܠܲܝܬܠܵܗ̇ ܗܘܼܟܡܵܐ ܥܲܠ ܦܲܓܼܪܵܗ̇ ܐܸܠܵܐ ܓܲܒܼܪܵܗ̇. ܗܲܕܟܼܵܐ ܐܘܼܦ ܓܲܒܼܪܵܐ ܠܲܝܬ ܠܹܗ ܗܘܼܟܡܵܐ ܥܲܠ ܦܲܓܼܪܹܗ ܐܸܠܵܐ ܒܲܟܼܬܹܗ* ܗܲܕܟܼܵܐ ܠܵܐ ܙܵܠܡܝܼܬܘܿܢ ܚܲܕ݇ ܠܗ̇ܘ ܐ݇ܚܹܪ݇ܢܵܐ. ܐܸܠܵܐ ܐܝܼܡܲܢ ܕܬܸܪܘܵܘܟܼܘܿܢ ܡܲܚܫܸܚܝܼܬܘܿܢ ܕܒܵܠܓܝܼܬܘܿܢ ܒܨܵܘܡܵܐ ܘܨܠܘܿܬܵܐ ܘܡܸܢ݇ܕܪܸܫ̄ ܕܵܝܪܝܼܬܘܿܢ ܡܐܘܼܕܵܠܹܐ. ܕܠܵܐ ܓ̰ܵܪܸܒ ܠܵܘܟܼܘܿܢ ܣܵܛܵܢܵܐ ܒܣܵܒܵܒ ܕܫܲܗܘܲܬܬܵܐ ܕܦܲܓܼܪܵܘܟܼܘܿܢ* ܐܝܼܢܵܐ ܐܵܗܵܐ ܒܹܐܡܵܪܵܐ ܝ݇ܘܸܢ ܩܵܐ ܕܐܵܢܝܼ ܕܝܼܢܵܐ ܙܲܒܘܼܢܹ̈ܐ ܘܠܵܐ ܡ̣ܢ ܦܘܼܩܕܵܢܵܐ* ܣܵܒܵܒ ܐܵܢܵܐ ܒܵܥܝܸܢ ܕܟܠܲܝܗܝ ܒܢܲܝ̈ܢܵܫܵܐ ܐܲܝܟܼ ܕܝܼܝܼ ܗܵܘܝܼ ܒܕܸܟܼܝܘܼܬܵܐ ܐܸܠܵܐ ܟܠ ܐ݇ܢܵܫܵܐ ܚܲܠܥܲܬ ܦܝܼܫܬܵܐ ܝ݇ܠܵܗ̇ ܝܘܼܗ݇ܒܼܸܠܬܵܐ ܐܸܠܹܗ ܡ̣ܢ ܐܲܠܵܗܵܐ. ܐܝܼܬ ܕܗܲܕܟܼܵܐ ܘܐܝܼܬ ܕܗܲܕܟܼܵܐ*
♱♱♱♱♱♱♱♱♱
ܠܘܩܐ ܝ: 23 ‐ ܫܘܠܡܐ ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ ܟܪܘܙܘܬܼܐ ܕܠܘܩܐ ♰ ܘܐ݇ܡܸܪܹܗ ܝܑܼܫܘܿܥ ܠܬܲܠܡܝܼ̈ܕܘܼܗܝ: ܛܘܼܒܼܵܐ ܠܥܲܝ̈ܢܹܐ ܕܚܵܙܝܼ ܡܸܢܕܝܼ ܕܐܲܚܬܘܿܢ ܒܸܚܙܵܝܵܐ ܝܬܘܼܢ. ܣܵܒܵܒ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ ܕܪܵܒܵܐ ܢܒܼܝܼܹ̈ܐ ܘܡܲܠܟܹ̈ܐ ܒܣܸܡܠܵܐ ܠܗ݇ܘܿܢ ܕܚܵܙܝܼ ܡܸܢܕܝܼ ܕܐܲܚܬܘܿܢ ܒܸܚܙܵܝܵܐ ܝܬܘܿܢ. ܘܠܵܐ ܚܙܹܐܠܗ݇ܘܿܢ. ܘܠܸܫܡܵܥܵܐ ܡܸܢܕܝܼ ܕܐܲܚܬܘܿܢ ܒܸܫܡܵܥܵܐ ܝܬܘܿܢ، ܘܠܵܐ ܫܡܸܥܠܗ݇ܘܿܢ. ܘܗܵܐ ܚܲܕ݇ ܣܵܦܪܵܐ ܩܸܡܠܹܗ ܕܓ̰ܵܪܸܒܠܹܗ ܘܐ݇ܡܸܪܹܗ ܡܲܠܦܵܢܵܐ: ܡܘܿܕܝܼ ܥܲܒܼܕܸܢ ܕܝܲܪܬܸܢ ܚܲܝܹ̈ܐ ܕܠܥܵܠܲܡ؟ ܐܝܼܢܵܐ ܝܑܼܫܘܿܥ ܐ݇ܡܸܪܹܗ ܐܸܠܹܗ: ܒܢܵܡܘܿܣܵܐ ܕܲܐܟܼܝܼ ܟܬܝܼܒܼܵܐ ܝܠܹܗ. ܕܲܐܟܼܝܼ ܟܹܐ ܩܵܪܸܬ؟ ܓ̰ܘܼܘܸܒܠܹܗ ܘܐ݇ܡܸܪܹܗ ܐܸܠܹܗ: ܕܡܲܚܸܒܸܬ ܠܡܵܪܝܵܐ ܐܲܠܵܗܘܼܟܼ ܡ̣ܢ ܟܠܹܗ ܠܸܒܘܼܟܼ ܘܡ̣ܢ ܟܠܵܗ̇ ܓܵܢܘܼܟܼ ܘܡ̣ܢ ܟܠܹܗ ܚܲܝܠܘܼܟܼ ܘܡ̣ܢ ܟܠܹܗ ܪܸܥܝܵܢܘܼܟܼ. ܘܠܫܒܼܵܒܼܘܼܟܼ ܐܲܝܟܼ ܓܵܢܘܼܟܼ. ܐܵܡܸܪ ܐܸܠܹܗ ܝܑܼܫܘܿܥ ܬܪܝܼܨܵܐܝܼܬ ܐ݇ܡܸܪܘܼܟܼ. ܐܵܗܵܐ ܥܒܼܘܼܕ ܘܒܸܬ ܚܲܝܸܬ. ܐܝܼܢܵܐ ܐܵܗܵܐ ܟܲܕ ܒܥܹܐܠܹܗ ܠܡܲܟܫܘܼܛܹܐ ܓܵܢܘܼܗܝ. ܐ݇ܡܸܪܹܗ ܐܸܠܹܗ: ܘܡܵܢܝܼ ܝܠܹܗ ܫܒܼܵܒܼܝܼ؟ ܐܵܡܸܪ ܐܸܠܹܗ ܝܑܼܫܘܿܥ: ܚܲܕ݇ ܓܲܒܼܪܵܐ ܒܸܨܠܵܝܵܐ ܗ݇ܘܵܐ ܡ̣ܢ ܐܘܿܪܸܫܠܸܡ ܠܐܝܼܪܝܼܚܘܼ. ܘܢܦܸܠܗ݇ܘܿܢ ܥܲܠܘܼܗܝ ܠܸܤܛܵܝܹ̈ܐ ܘܩܲܡ ܫܲܠܚܝܼܠܹܗ ܘܩܲܡ ܡܵܚܝܼܠܹܗ، ܘܫܒܼܸܩܠܗ݇ܘܿܢ ܟܲܕ ܚܲܕ݇ܟ̰ܵܐ ܓܵܢܵܐ ܦܝܼܫܬܵܐ ܒܝܼܹܗ ܘܐ݇ܙܸܠܗ݇ܘܿܢ. ܘܩܘܼܘܸܡܠܵܗ̇ ܚܲܕ݇ ܟܵܗܢܵܐ ܒܸܨܠܵܝܵܐ ܗ݇ܘܵܐ ܒܗ̇ܝ ܐܘܼܪܚܵܐ ܘܚܙܹܐܠܹܗ ܘܥܒܼܸܪܹܗ. ܗܲܕܟܼܵܐ ܐܘܿܦ ܠܹܘܵܝܵܐ ܐ݇ܬܹܐܠܹܗ ܡܛܹܐܠܹܗ ܠܗ̇ܝ ܕܘܼܟܬܵܐ. ܘܚܙܹܐܠܹܗ ܘܥܒܼܸܪܹܗ. ܐܝܼܢܵܐ ܚܲܕ݇ ܐ݇ܢܵܫܵܐ ܫܵܡܪܵܝܵܐ ܟܲܕ ܒܸܛܪܵܝܵܐ ܗ݇ܘܵܐ ܐ݇ܬܹܐܠܹܗ ܐܲܝܟܵܐ ܕܝܼܗَܘܵܐ ܘܚܙܹܐܠܹܗ ܘܪܘܼܚܸܡܠܹܗ ܥܲܠܘܼܗܝ. ܘܩܘܼܪܒܸܢܹܗ ܘܐ݇ܣܸܪܹܗ ܒܪ̈ܝܼܢܵܬܹܗ. ܘܨܘܼܢܨܸܠܹܗ ܥܲܠܲܝܗܝ ܚܲܡܪܵܐ ܘܡܸܫܚܵܐ. ܘܡܘܼܬܸܒܼܠܹܗ ܥܲܠ ܚܡܵܪܹܗ. ܘܡܘܼܬ݇ܝܹܐܠܹܗ ܠܦܘܼܬܩܵܐ ܘܐ݇ܟܼܸܠܹܗ ܚܲܡ ܒܘܼܬ ܕܝܼܹܗ، ܘܠܨܲܦܪܵܐ ܕܝܵܘܡܵܐ ܦܘܼܠܸܛܠܹܗ ܬܪܹܝ ܕܹܝܢܵܪܹ̈ܐ. ܝܘܼܗ݇ܒܼܸܠܹܗ ܠܦܘܼܬܩܵܝܵܐ ܘܐ݇ܡܸܪܹܗ ܐܸܠܹܗ: ܐ݇ܟܼܘܼܠ ܚܲܡ ܒܘܼܬ ܕܝܼܹܗ. ܘܐܸܢ ܡܸܢܕܝܼ ܙܵܘܕܵܐ ܚܲܪܓ̰ܸܬ. ܐܝܼܡܵܢ ܕܕܵܝܪܸܢ ܒܸܬ ܝܲܗ݇ܒܼܸܢܘܼܟܼ. ܗܲܕܟܼܵܐ ܡܵܢܝܼ ܡ̣ܢ ܐܲܢܹܐ ܬܠܵܬܵܐ ܒܸܚܫܵܒܼܵܐ ܝܘܸܬ ܗ݇ܘܹܐܠܹܗ ܫܒܼܵܒܼܵܐ ܠܗ̇ܘ ܕܢܦܸܠܹܗ ܒܐܝܼܕܵܬܹ̈ܐ ܕܠܸܤܛܵܝܹ̈ܐ؟ ܐܝܼܢܵܐ ܗ̇ܘ ܐ݇ܡܸܪܹܗ: ܗ̇ܘ ܕܪܘܼܚܸܡܠܹܗ ܥܲܠܘܼܗܝ. ܐܵܡܸܪ ܐܸܠܹܗ ܝܑܼܫܘܿܥ: ܙܹܠ݇ ܐܘܿܦ ܐܲܢ݇ܬ ܗܲܕܟܼܵܐ ܗܵܘܸܬ ܒܸܥܒܼܵܕܵܐ. ܘܗ݇ܘܹܐܠܵܗ̇ ܟܲܕ ܐܵܢܝܼ ܒܹܐܙܵܠܵܐ ܗ݇ܘܵܐ ܒܐܘܼܪܚܵܐ. ܥܒܼܸܪܹܗ ܠܚܕܵܐ ܡܵܬܵܐ. ܘܚܕܵܐ ܒܲܟܼܬܵܐ ܕܫܸܡܘܼܗ̇ ܡܵܪܬܵܐ ܩܘܼܒܸܠܵܗ̇ ܐܸܠܹܗ ܒܒܲܝܬܵܐ. ܐܝܼܬ ܗ݇ܘܵܐ ܠܵܗ̇ ܚܵܬܵܐ ܕܫܸܡܘܼܗ̇ ܡܲܪܝܲܡ. ܘܐ݇ܬܹܐܠܵܗ̇ ܝܬܸܒܼܠܵܗ̇ ܠܘܵܬ ܐܲܩ̈ܠܵܬܹܗ ܕܡܵܪܲܢ. ܘܫܲܡܥܵܐ ܗ݇ܘܵܐ ܗܹܡܸܙܡܵܢܘܼ̈ܗܝ. ܐܝܼܢܵܐ ܡܵܪܬܵܐ ܒܠܝܼܓܬܵܐ ܗ݇ܘܵܐ ܒܚܸܠܡܵܬ ܪܵܒܵܐ. ܘܐ݇ܬܹܐܠܵܗ̇ ܐܲܡܪܵܐ ܐܸܠܹܗ: ܡܵܪܝܼ. ܠܹܐ ܝܘܸܬ ܒܚܲܡ ܕܚܵܬܝܼ ܩܲܡ ܫܲܒܼܩܵܐ ܠܝܼ ܠܚܘܼܕܝܼ ܠܸܥܒܼܵܕܵܐ ܚܸܠܡܵܬ. ܐ݇ܡܘܼܪ ܐܸܠܵܗ̇ ܕܡܗܲܝܸܪܵܐ ܠܝܼ. ܓ̰ܘܼܘܸܒܠܹܗ ܝܑܼܫܘܿܥ ܘܐ݇ܡܸܪܹܗ ܐܸܠܵܗ̇: ܡܵܪܬܵܐ ܡܵܪܬܵܐ: ܒܚܲܡ ܝܘܲܬܝ ܘܫܓܼܝܼܫܬܵܐ ܥܲܠ ܪܵܒܵܐ ܡܸܢܕܝܼܵܢܹ̈ܐ. ܐܝܼܢܵܐ ܚܕܵܐ ܝܼܠܵܗ̇ ܕܠܵܙܸܡ ܝܼܠܵܗ̇. ܐܝܼܢܵܐ ܡܲܪܝܲܡ ܣܵܗ݇ܡܵܐ ܛܵܒܼܵܐ ܓܘܼܒܹܐܠܵܗ̇ ܩܵܐ ܓܵܢܘܼܗ̇. ܗ̇ܘ ܕܠܹܐ ܦܵܐܸܫ ܫܩܝܼܠܵܐ ܡܸܢܵܗܿ.
♱♱♱♱♱♱♱♱♱
|